Ariyalur - Dinakaran

100 சதவீதம் வாக்குப்பதிவு வலியுறுத்தி மக்களுக்கு விழிப்புணர்வு நோட்டீஸ்

ஜெயங்கொண்டம், ஏப். 10: ஜெயங்கொண்டம்  சட்டமன்ற தொகுதிக்கு உட்பட்ட பிராஞ்சேரி கிராமத்தில் பொதுமக்களுக்கு  மின்னணு வாக்குப்பதிவு இயந்திரம் மற்றும் வாக்காளர் தாம் பதிவு செய்த  வாக்கை உறுதி செய்யும் கருவிகள் மூலம் பொதுமக்களிடம் விழிப்புணர்வு  ஏற்படுத்தப்பட்டது. மேலும் சிலம்பூர் கிராமத்தில் பொதுமக்களுக்கு 100  சதவீதம் வாக்களிக்க வலியுறுத்தி விழிப்புணர்வு துண்டு பிரசுரங்கள்  வழங்கப்பட்டது. மாவட்ட வட்ட வழங்கல் அலுவலர் ரவிச்சந்திரன், மாவட்ட  ஆதிதிராவிடர் மற்றும் பழங்குடியினர் நல அலுவலர் கதிரேசன் மற்றும்  அலுவலர்கள், பொதுமக்கள் பங்கேற்றனர்.

பாடாலூர் பகுதி கடை, வீடுகளில் நூதன முறையில் பணம் எடுத்து சென்ற மர்மநபர் அச்சத்தில் வணிகர்கள், பொதுமக்கள்

பாடாலூர்,ஏப். 10: ஆலத்தூர் தாலுகா பாடாலூர் பகுதியில் நூதன முறையில் மர்மநபர் மோசடியில் ஈடுபட்டதால் பொதுமக்களும், வணிகர்களும் அச்சத்தில் உள்ளனர். ஆலத்தூர் தாலுகா பாடலூர் ரைஸ்மில் தெருவில் உள்ள ஒரு மளிகை கடைக்கு சென்ற மர்ம நபர் தங்கள் வீட்டில் விசேஷம் வைத்து இருப்பதாகவும், மளிகை பொருட்கள் வேண்டும் என தன்னை அறிமுகப்படுத்திக் கொண்டு மளிகை பொருட்கள் வேண்டும் எனக்கூறி ஆர்டர் கொடுத்தார். கடை உரிமையாளர் பொருட்களை கடையில் எடுத்துக் கொண்டிருந்தார். அப்போது கடையின் கல்லாவில் இருந்த ரூ.6 ஆயிரம் பணத்தை எடுத்துக்கொண்டு, மளிகைப் பொருள்களை பார்சல் செய்து  எடுத்து வையுங்கள் ஆட்டோ எடுத்து  வந்து வாங்கி கொள்கிறேன் என்று கூறிவிட்டு நைசாக நழுவினார்.  பின்னர் அங்கிருந்து சென்ற மர்ம நபர் கடைவீதியில் உள்ள ஒரு  மளிகை கடைக்கு சென்று அங்கும் அதேபோல் மளிகை பொருட்களை   ஆர்டர் கொடுத்துவிட்டு அவர்கள் கல்லாவில் வைத்திருந்த ரூ.4,000  ரொக்கப் பணத்தை எடுத்துக்கொண்டு பொருட்களை   கொண்டு செல்ல ஆட்டோ எடுத்து  வருகிறேன் எனக்கூறி நைசாக நழுவி சென்று விட்டான். பின்னர் இந்திரா நகர் பகுதியில் கட்டுமானப் பணி நடந்து கொண்டிருந்த ரமேஷ்  வீட்டுக்கு சென்ற மர்ம நபர் வீட்டில் இருந்த மனைவி மஞ்சுளாவிடம்  சிமெண்டு மூட்டை வந்துள்ளது.   அதற்காக உங்கள் கணவர் ரூ.4 ஆயிரம் பணம் வாங்கிக்க சொன்னார் என்று சொல்லி பணத்தை பெற்றுக் கொண்டு நழுவிச் சென்றான். அதனையடுத்து  தேசிய நெடுஞ்சாலையில் உள்ள மசூதிக்கு சென்ற மர்ம நபர் அங்கு  இருந்தவரிடம்   ரூ.2000  பணம் கொடுத்து சிறப்பு  தொழுகை நடத்துங்கள் என்று கூறிவிட்டு நைசாக பேசி அங்கு அவர்  வைத்திருந்த ரூ.15 ஆயிரம் பணத்தை எடுத்துக்கொண்டு நைசாக நழுவி தான் வந்த பைக்கில் சென்று விட்டான். அதே பகுதியில் உள்ள ரத்தினம்பிள்ளை என்பவர் வீட்டுக்கு சென்று அவரது மனைவியிடம்  உங்கள் வீட்டுக்காரர் எனது நண்பர்   என அறிமுகப்படுத்தி கொண்டு தான்   வெளிநாட்டில் இருந்து  வந்து உள்ளதாக கூறி  குடிக்க தண்ணீர் வேண்டும் எனக்கூறியுள்ளார் அப்போது அவர் தண்ணீர் எடுக்க சென்ற போது  வீட்டில் செல்பில் வைத்திருந்த 3/4 பவுன் மதிப்புடைய   2 மோதிரத்தை  எடுத்துக் கொண்டு சென்று விட்டான். இதுகுறித்து ரத்தினம்பிள்ளை பாடாலூர் காவல் நிலையத்தில் புகார் அளித்தார்  இதுபோல் பாடாலூர் பகுதியில் 2 நாள்களில் பல இடங்களில் ஒரு மர்ம நபர்  நூதன முறையில் மோசடியில் ஈடுபட்டதால் பாடாலூர்   பகுதி வணிகர்களும்  பொதுமக்களும் அச்சத்தில் உள்ளனர். கடந்த சில நாட்களுக்கு முன்பு பாடாலூர் அருகே உள்ள திருவிளக்குறிச்சி கிராமத்தில் நகைக்கு பாலீஷ் போட்டு தருவதாக கூறி மோசடியில் ஈடுபட்ட பீகாரை சேர்ந்த இரண்டு இளைஞர்கள் கையும் களவுமாக பிடித்து போலீசாரிடம் ஒப்படைத்தனர் என்பது குறிப்பிடத்தக்கது. இதுபோல் நூதன மோசடியில் ஈடுபட்ட மர்ம நபரை பிடிக்க காவல் துறை நடவடிக்கை எடுக்க வேண்டும் என பொதுமக்களும் வணிகர்களும் வேண்டுகோள் விடுத்துள்ளனர். இந்த சம்பவங்களால் பாடாலூர் பகுதியில் கடைகள் வீடுகளுக்கு அறிமுகம் இல்லாத யாராவது வந்தால் அச்சப்படும் சூழ்நிலை ஏற்பட்டுள்ளது.

வாக்குப்பதிவு இயந்திரத்தில் வேட்பாளர்களின் பெயர், சின்னம் பொருத்தும் பணி மாவட்ட தேர்தல் அலுவலர் ஆய்வு

அரியலூர்,ஏப்.10: அரியலூர் மாவட்டம், உடையார்பாளையம் வருவாய் கோட்டாட்சியர் அலுவலகத்தில் மக்களவை  தேர்தல் 2019-க்கான மின்னணு வாக்குப்பதிவு இயந்திரத்தில் வேட்பாளர்களின் பெயர், சின்னம் அடங்கிய பேலட் பேப்பர் ஒட்டும். பணியினை மாவட்ட தேர்தல் அலுவலர், கலெக்டர் விஜயலட்சுமி,  பார்வையிட்டார். இதில் கலெக்டர் தெரிவித்ததாவது,மக்களவைபொதுத் தேர்தல் - 2019 முன்னிட்டு மின்னணு வாக்குப்பதிவு இயந்திரத்தில் வேட்பாளர் பெயர் மற்றும் சின்னம் அடங்கிய பேலட் பேப்பர் ஒட்டும் பணி அரியலூர் மற்றும் உடையார்பாளையம் வருவாய் கோட்டாட்சியர் அலுவலகத்தில் நடைபெற்று வருகிறது. இப்பணியில் அரியலூர், ஜெயங்கொண்டம் ஆகிய சட்டமன்ற தொகுதிகளுக்குட்பட்ட வாக்குச்சாவடிகளுக்கு கணினி மூலம் குழுக்கள் முறையில் ஒதுக்கீடு செய்யப்பட்ட மின்னணு வாக்குப்பதிவு இயந்திரம் மற்றும் வாக்காளர் சரிபார்க்கும் காகித தணிக்கை சோதனை இயந்திரங்களில் வேட்பாளர் பெயர் மற்றும் சின்னம் அடங்கிய பேப்பர் ஒட்டும் பணி நடைபெறுகிறது.பேலட் பேப்பரில் 13 வேட்பாளர்கள் மற்றும் 1 நோட்டா என மொத்தம் 14 பெயர்கள் உள்ளது. இப்பணிகளை கவனிக்க பெல் நிறுவன பொறியாளர்கள் உள்ளார்கள். மேலும், அவர்கள் ஆய்வு செய்து முடித்த பின்னர் மீண்டும் அந்தந்த தொகுதிக்குட்பட்ட பாதுகாப்பு அறையில் வைக்கப்படும். பின்னர், வாக்குப்பதிவுக்கு முன்தைய நாளான ஏப்ரல் 17ம் தேதி வாக்குப்பதிவு இயந்திரம் ஒதுக்கப்பட்டுள்ள வாக்குச்சாவடிகளுக்கு எடுத்து செல்லப்படும் என கலெக்டர்  விஜயலட்சுமி, தெரிவித்தார்கள். இப்பயிற்சியில், உடையார்பாளையம் வருவாய் கோட்டாட்சியர் ஜோதி, கலெக்டரின்  நேர்முக உதவியாளர் (நிலம்) பாலாஜி, தாசில்தார் குமரய்யா, மண்டல அலுவலர்கள், வாக்குப்பதிவு மைய அலுவலர்கள் உட்பட பலர் கலந்துகொண்டனர்.

தா.பழூர் காவலர் குடியிருப்பில் இருந்து வெளியேறும் கழிவுநீரால் நோய் பரவும் அபாயம்

தா.பழூர், ஏப்.10: அரியலூர் மாவட்டம் தா.பழூர் காவலர் குடியிருப்பு பகுதி இருந்து வருகிறது. இந்த குடியிருப்பில் இருந்து வெளியேறும் கழிவுநீர் சாலையில் உள்ள வாய்க்கால்களில் விடப்படுவதால் இவை தேங்கி நின்று வெளியேறாமல் துர்நாற்றம் வீசுவதோடு அருகில் உள்ள வீடுகளில் பொதுமக்கள் வசிக்க முடியாத வண்ணம் துர்நாற்றமும் கொசுக்கள் உற்பத்தியும் அதிகமாக இருந்து வருகிறது. இதனால் சாலையில் செல்வோர் துர்நாற்றம் வீசுவதால் மூக்கை பொத்திக் கொண்டு செல்லக்கூடிய அவல நிலை உருவாகியுள்ளது.காவலர் குடியிருப்பு வெளி பகுதியில் தண்ணீர் சாக்கடை  போல் தேங்கி கிடப்பதால் காவலர் குடியிருப்பு பகுதியில் வசிப்பவர்களுக்கும் மலேரியா, டெங்கு, மலசிக்கல் போன்ற நோய்கள் ஏற்பட கூடிய சூழல் உருவாகி உள்ளது. ஆகையால் முறையான கழிவு நீர் தேக்க தொட்டி அமைத்து  அல்லது இந்த கழிவுநீர் சாலையில் வீடுகள் பகுதிகளுக்கு செல்லாமல் தடுத்து மாற்று ஏற்பாட்டை செய்யவேண்டி பொதுமக்கள் கோரிக்கை விடுத்துள்ளனர்.

கொல்லாபுரம் அரசு ஆதிதிராவிட நல தொடக்கப்பள்ளிக்கு கல்விசீர்

ஜெயங்கொண்டம், ஏப். 10: ஒருங்கிணைந்த பள்ளி கல்வி திட்டத்தின்கீழ் அரியலூர் மாவட்டம் ஜெயங்கொண்டம் அருகே உள்ள கொல்லாபுரம் ஊராட்சி ஒன்றிய அரசு ஆதிதிராவிட நல பள்ளிக்கு கல்விசீர் வழங்கும் விழா நடந்தது.மருத்துவர் ஜெயராமன் தலைமை வகித்தார். வக்கீல்கள் கோகுல், சேதுராமன் முன்னிலை வகித்தனர். திருமால்வளவன், பழனிவேல், மணிகண்டன், கார்மேகம் சிறப்புரையாற்றினர். மாணவர்களுக்கு தேவையான மேஜை, நாற்காலி, தேச தலைவர்களின் படங்கள், விளையாட்டு பொருட்கள் மற்றும் கடிகாரம் உள்ளிட்ட சுமார் ரூ.50 ஆயிரம் மதிப்புள்ள பொருட்களை ஊர்வலமாக எடுத்து சென்று பள்ளி தலைமை ஆசிரியர் ராஜதுரையிடம் வழங்கினர். விழாவில் உதவி ஆசிரியை பாரதி மற்றும் மாணவர்கள், பொதுமக்கள் பங்கேற்றனர். பேராசிரியர் தேவேந்திரன் வரவேற்றார். சிவகனகசபை நன்றி கூறினார்.

மதுபாட்டில் விற்றவர் கைது+

ஜெயங்கொண்டம், ஏப். 10: ஜெயங்கொண்டம் பகுதியில் சப் இன்ஸ்பெக்டர் தர் தலைமையிலான போலீசார் ரோந்து சென்றனர். அப்போது செங்குந்தபுரம் பகுதியில் பதுக்கி வைத்து மதுபானம் விற்பனை செய்வதாக ரகசிய தகவல் கிடைத்தது. அதன்பேரில் போலீசார் சோதனை நடத்தி மதுபாட்டில் விற்பனை செய்து கொண்டிருந்த ஆறுமுகம் (41) என்பவரை கைது செய்தனர்.

பைக்குகள் மோதல் இருவர் காயம்

ஜெயங்கொண்டம், ஏப்.10: ஜெயங்கொண்டம் அருகில் உள்ள தேவாமங்கலம் கிராமத்தை சேர்ந்தவர் சேகர் மகன் வடிவேல்(32). இவர் சம்பவத்தன்று மாலை தான் பணி செய்யும் தனியார் ஜவுளிக்கடைக்கு தனது பைக்கில் ஜெயங்கொண்டம் நான்குரோடு வழியாக சென்று கொண்டிருந்தார். அப்போது ஜெயங்கொண்டம் மலங்கன்குடியிருப்பு பகுதியை சேர்ந்த பாண்டியராஜன் மகன் ராஜஒளி(26) என்பவர் ஓட்டி வந்த பைக் வடிவேல் பைக் மீது மோதியது. இதில் இருவரும் பலத்த காயமடைந்து ஜெயங்கொண்டம் அரசு மருத்துவமனையில் சிகிச்சை பெற்று வருகின்றனர். இதுகுறித்து ஜெயங்கொண்டம் எஸ்ஐ  வசந்த் வழக்கு பதிந்து விசாரணை செய்து வருகிறார்.

ஜெயங்கொண்டம் அருகே கூரை வீட்டில் தீ ரூ.2 லட்சம் பொருட்கள் சேதம்

ஜெயங்கொண்டம், ஏப்.3: ஜெயங்கொண்டம் அருகே கூரை வீட்டில் ஏற்பட்ட தீயில் ரூ.2லட்சம் பொருட்கள் எரிந்து சேதமானது. அரியலூர் மாவட்டம் ஜெயங்கொண்டம் அருகே உள்ள சூரப்பள்ளம் கிராமத்தை சேர்ந்தவர் சிதம்பரம்(65) முந்திரி வியாபாரம் செய்து வருகிறார். இவர் காலையில் வழக்கம்போல் வீட்டை பூட்டிவிட்டு அவரும் அவரது மனைவி ராஜலட்சுமி(50) இருவரும் வரதராஜன்பேட்டையில் உள்ள அவருக்கு சொந்தமான காய்கறி கடைக்கு சென்று விட்டனர். திடீரென வீடு  தீப்பற்றி எரிந்தது.  இதனை கண்ட அக்கம் பக்கத்தினர் தீயை அணைக்க போராடினர். இதுகுறித்து ஜெயங்கொண்டம் தீயணைப்பு நிலையத்திற்கு தகவல் தெரிவித்தனர். அதன் நிலைய அதிகாரி ஏழுமலை மற்றும் தீயணைப்பு வீரர்கள் சம்பவ இடத்திற்கு விரைந்து வந்து தீயை அணைத்தனர். இந்த தீ விபத்தில் 12,600 ரொக்க பணம், டிவி, மரக்கட்டில் மர பீரோ, கிரைண்டர், மின்விசிறி, மிக்சி போன்ற வீட்டு உபயோகப் பொருட்கள் மற்றும் வீட்டு பத்திரம் உள்ளிட்ட சுமார் ரூ.2 லட்சம் மதிப்பிலான பொருட்கள் தீயில் எரிந்துசேதமானது.

கங்கைகொண்ட சோழபுரத்தில் 100 சதவீதம் வாக்குப்பதிவு விழிப்புணர்வு வாகன பேரணி

ஜெயங்கொண்டம், ஏப். 3: ஜெயங்கொண்டம் அடுத்த கங்கைகொண்ட சோழபுரத்தில் சிதம்பரம் மக்களவை தொகுதியில் 100 சதவீத வாக்குப்பதிவு வலியுறுத்தி காவல்துறை, பொதுமக்கள் சார்பில் விழிப்புணர்வு பேரணி நடந்தது.மாவட்ட வழங்கல் அலுவலர் ரவிச்சந்திரன் தலைமை வகித்தார். பேரணியை உடையார்பாளையம் ஆர்டிஓ ஜோதி கொடியசைத்து துவக்கி வைத்தார். ஜெயங்கொண்டம் டிஎஸ்பி கென்னடி முன்னிலை வகித்தார். விழிப்புணர்வு பதாகைகளை இருசக்கர வாகனத்தில் பொருத்தி காவல்துறையினர் மற்றும் பொதுமக்கள் ஹெல்மெட் அணிந்து கங்கைகொண்டசோழபுரத்தில் துவங்கி இளையபெருமாள்நல்லூர் தேர்வடம் வழியாக மீன்சுருட்டி, ஜெயங்கொண்டம் குறுக்குரோட்டில் பேரணி நிறைவடைந்தது. மாவட்ட வழங்கல் அலுவலர் ரவிச்சந்திரன், உடையார்பாளையம் ஆர்டிஓ ஜோதி, ஜெயங்கொண்டம் டிஎஸ்பி கென்னடி ஆகியோர் விழிப்புணர்வு துண்டு பிரசுரங்களை அவ்வழியாக சென்ற பேருந்து, கார், வேன், பைக்கில் சென்றவர்களிடம் வழங்கி விழிப்புணர்வு ஏற்படுத்தினர். தாசில்தார்கள் ஆண்டிமடம், ராஜமூர்த்தி, கோவிந்தராஜ், துணை தாசில்தார்கள் மீனா, சம்பத் மற்றும் காவல்துறை இன்ஸ்பெக்டர்கள் ராஜ்மோகன், மலைச்சாமி, சந்திரகலா, போக்குவரத்து காவல் ஆய்வாளர் மணிவண்ணன் மற்றும் சப்இன்ஸ்பெக்டர்கள் பங்கேற்றனர். தாசில்தார் குமரய்யா வரவேற்றார். வருவாய் ஆய்வாளர் சரண்யா நன்றி கூறினார்.

கொள்ளிடம் ஆற்றில் மூதாட்டி சடலம்

தா.பழூர், ஏப். 3: தா.பழூர் அருகே கொள்ளிடம் ஆற்றில் மூதாட்டி சடலம் மிதந்தது. தா.பழூர் அருகே உள்ள வாழைக்குறிச்சியில் இருந்து மதுரை செல்லும் வழியில் கொள்ளிடம் ஆற்றில் இடையில் உள்ள வாட்டர் டேங்க் அருகில் 60 வயது மதிக்கத்தக்க பெண் சடலம், தண்ணீரில் மிதந்தது. இதுகுறித்து காவல் நிலையத்தில்  கிராம நிர்வாக அலுவலர் மணிமாறன் புகார் செய்தார். தா.பழூர் இன்ஸ்பெக்டர் ரஞ்சனா வழக்குப்பதிந்து மூதாட்டி சடலத்தை கைப்பற்றி பிரேத பரிசோதனைக்காக ஜெயங்கொண்டம் அரசு மருத்துவமனைக்கு அனுப்பி வைத்தார். மேலும் இறந்தவர் யார், எந்த ஊர், இங்கு வந்து எப்படி தண்ணீரில் மூழ்கி இறந்தாரா, கொலை செய்யப்பட்டாரா என்ற கோணத்தில் விசாரித்து வருகிறார்.

உரிய ஆவணமின்றி பைக்கில் எடுத்து சென்ற ரூ.2 லட்சம் பறிமுதல்

அரியலூர், ஏப். 3: அரியலூர் அருகே உரிய ஆவணங்களின்றி பைக்கில் எடுத்து சென்ற ரூ.2 லட்சத்தை பறக்கும் படையினர் பறிமுதல் செய்து கருவூலத்தில் ஒப்படைத்தனர். அரியலூர் மாவட்டம் சித்தேரி அருகே தேர்தல் பறக்கும் படையினர் வாகன சோதனையில் ஈடுபட்டிருந்தனர். அப்போது கீழப்பழுவூர் சேர்ந்த சதீஸ்குமார் என்பவர் பைக்கில் வந்தார். அந்த பைக்கை நிறுத்தி பறக்கும் படையினர் சோதனை நடத்தினர். அதில் பைக்கில் ரூ.2 லட்சம் கொண்டு வந்தது தெரியவந்தது. ஆனால் அந்த பணத்துக்கு உரிய ஆவணங்கள் இல்லை. இதையடுத்து ரூ.2 லட்சத்தை இலரா தலைமையிலான தேர்தல் பறக்கும் படையினர் பறிமுதல் செய்தனர். பின்னர் சார்நிலை கருவூலத்தில் ரூ.2 லட்சத்தை ஒப்படைத்தனர்.

சிதம்பரம் மக்களவை தொகுதி வேட்பாளர்களின் செலவின கணக்கு 5ம் தேதி ஆய்வு

அரியலூர், ஏப். 3: சிதம்பரம் மக்களவை தொகுதி வேட்பாளர்களின் தேர்தல் செலவின கணக்குகள் வரும் 5ம்் தேதி ஆய்வு செய்யப்படுகிறது. சிதம்பரம் மக்களவை தொகுதியில் போட்டியிடும் வேட்பாளர்களின் தேர்தல் செலவு கணக்குகள், தேர்தல் செலவின பார்வையாளர்கள் தெரிவித்துள்ளவாறு வரும் 5ம் தேதி, 10ம் தேதி, 16ம் தேதிகளில் ஆய்வு செய்யப்படுகிறது. அதன்படி சிதம்பரம் தொகுதிக்கு உட்பட்ட குன்னம், அரியலூர், ஜெயங்கொண்டம், புவனிகரி, சிதம்பரம், காட்டுமன்னார்கோவில் ஆகிய 6 சட்டமன்ற தொகுதிகளுக்கும் மூன்று கட்டமாக அரியலூர் கலெக்டர் அலுவலக கூட்டரங்கில் (முதல்தளம்) தேர்தல் செலவின பார்வையாளர்களின் முன்னிலையில் ஆய்வு செய்யப்படவுள்ளன.எனவே நாளை வரையிலான செலவின கணக்குகளை வரும் 5ம் தேதியும், 9ம் தேதி வரையிலான செலவின கணக்குகளை வரும் 10ம் தேதியும், 15ம் தேதி வரையிலான செலவின கணக்குகளை 16ம் தேதியும் ஆய்வு செய்யப்படும். எனவே சிதம்பரம் மக்களவை தேர்தலில் போட்டியிடும் வேட்பாளர்கள், முகவர்கள் தவறாது ஆஜராகி தேர்தல் செலவின அறிக்கை தாக்கல் செய்ய வேண்டும். செலவினங்களில் எவ்வித விடுதலின்றி முழுமையாக செலவினம் தொடர்பான கணக்கு அறிக்கையை தாக்கல் செய்ய வேண்டும்.  இவ்வாறு மாவட்ட தேர்தல் அலுவலரும், கலெக்டருமான விஜயலட்சுமி தெரிவித்துள்ளார்.

பள்ளி செல்லா குழந்தைகளை கண்டறிதல் கள ஆய்வு பயிற்சி

ஜெயங்கொண்டம், ஏப்.3: அரியலூர் மாவட்டம் ஒருங்கிணைந்த பள்ளிக் கல்வித் திட்டம் மூலம் 2019-20 ம் கல்வி ஆண்டில் பள்ளிச் செல்லா மற்றும் இடைநின்ற குழந்தைகள் மற்றும் மாற்றுத்திறனாளி குழந்தைகள் கண்டறிவதற்கான களஆய்வு செய்வதற்கான பயிற்சி ஜெயங்கொண்டம் வட்டார வளமையத்தில் நடைபெற்றது. பயிற்சிக்கு ஒருங்கிணைந்த பள்ளிக்கல்வித் திட்ட உதவிதிட்ட அலுவலர் ராஜா தலைமை வகித்து பேசுகையில், மாணவர்களை கண்டறியும் விதம், மக்கள் தொகை கணக்கேடு புதுப்பித்தல், 6 முதல்18 வயது வரையுள்ள பள்ளிச் செல்லாக் குழந்தைகளையும், 18 வயதுவரை அனைத்து மாற்றுத்திறன் குழந்தைகளையும் மற்றும் குழந்தைத் தொழிலாளர்கள் கண்டறிவது குறித்த விவரங்களை தெரிவித்தார். பயிற்சியில் வட்டார வள மைய மேற்பார்வையாளர்கள் ஆண்டிமடம் சங்கர், மற்றும் தா.பழூர் மேகநாதன் , மற்றும் ஆசிரியர் பயிற்றுநர்கள், சிறப்பு ஆசிரியர்கள் கலந்து கொண்டனர். மாவட்ட ஒருங்கிணைப்பாளர் ஆனந்த் 100 % சிறப்பான முறையில் இந்த கள ஆய்வு சிறப்பாக நடத்தப்பட வேண்டும் என கூறினார். ஜெயங்கொண்டம் வட்டார வளமைய மேற்பார்வையாளர் பாலாஜி கள ஆய்வு குறித்து விரிவாக கூறினார்.

அகரம் ஊராட்சி ஒன்றிய பள்ளிக்கு கல்வி சீர் கிராம மக்கள் வழங்கினர்

ஜெயங்கொண்டம், ஏப்.3: அரியலூர் மாவட்டம் ஜெயங்கொண்டம் அருகே உள்ள அகரம் ஊராட்சி ஒன்றிய நடுநிலைப்பள்ளியில் கல்விச்சீர் வழங்கும் விழா நடைபெற்றது. விழாவிற்கு பள்ளி தலைமை ஆசிரியர் ராமநாதன் தலைமை வகித்தார். பெற்றோர் ஆசிரியர் கழக தலைவர் மகாலட்சுமி, பள்ளி மேலாண்மை குழு தலைவர் சிவசக்தி ஆகியோர் முன்னிலை வகித்தனர். கிராம பொதுமக்கள் மற்றும் பெற்றோர்கள் ரூ3 லட்சம் மதிப்பிலான பள்ளிக்கு தேவையான பொருட்கள் டேபிள், சேர், சுவர்க்கடிகாரம், மின்விசிறி, பீரோ, பெஞ்ச், மேசை, இரும்பு கதவு மற்றும் பழ வகைகள் தட்டுகளில் வைத்து மேளதாளங்கள் முழங்க ஊர்வலமாக பள்ளிக்கு எடுத்து வந்தனர். பின்னர் கல்வி சீர்வரிசைகளை பள்ளி தலைமை ஆசிரியர் மற்றும் உதவி ஆசிரியர்கள் பெற்றுக்கொண்டு பாராட்டி பேசினர். நிகழ்ச்சியில் ஆசிரியர்கள், மாணவர்கள், பெற்றோர்கள், பொதுமக்கள் ஏராளமனோர் கலந்துகொண்டனர்.

நேரடி கொள்முதல் நிலையங்களில் 40 கிலோ மூட்டைக்கு ரூ.40 வசூல் செய்வதாக விவசாயிகள் புகார்

அரியலூர், ஏப். 3: அரியலூர் மாவட்ட நேரடி கொள்முதல் நிலையங்களில் 40 கிலோ மூட்டைக்கு ரூ.40 வசூல் செய்வதாக விவசாயிகள் புகார் தெரிவித்தனர். அரியலூர் கலெக்டர் விஜயலட்சுமியிடம் டெல்டா பகுதி விவசாயிகள் புகார் மனு அளித்தனர். அதில் அரியலூர் மாவட்டம் திருமானூர், தா.பழூர் மற்றும் செந்துறை பகுதிகளில் நெல் கொள்முதல் நிலையங்கள் அமைக்கப்பட்டுள்ளன. இந்த நெல் கொள்முதல் நிலையங்களில் 40 கிலோ மூட்டைக்கு ரூ.40 கட்டாயமாக அதிகாரிகள் வசூல் செய்யப்படுவதாக விவசாயிகள் குற்றம் சாட்டுகின்றனர். தாங்கள் கொண்டு வரும் நெல் மூட்டைகளை திறந்த வெளியில் வைத்து தான் விற்பனை செய்ய வேண்டியுள்ளது. அதனால் நெல் மூட்டைகள் பனியிலும், வெயிலிலும் கிடந்து வீணாகிறது என்று தெரிவிக்கப்பட்டிருந்தது. இதையடுத்து கலெக்டர் விசாரனை செய்வதாக கூறியதையடுத்து விவசாயிகள் கலைந்து சென்றனர். இதைதொடர்ந்து கலெக்டர் விஜயலட்சுமி உடனடியாக அதிகாரிகளை அழைத்து நெல் கொள்முதல் நிலையங்களை ஆய்வு செய்யுமாறு கூறினார். அதற்கு நெல் கொள்முதல் நிலையங்களில் ஆய்வு செய்து ஒவ்வொரு விவசாயிகளிடம் விசாரனை செய்து அறிக்கையை கலெக்டரிடம் ஒப்படைப்பதாக அதிகாரிகள் கூறியுள்ளனர்.

கோயில்களில் பிரதோஷ வழிபாடு

ஜெயங்கொண்டம், ஏப். 3: ஜெயங்கொண்டம் பகுதியில் உள்ள சிவன் கோயில்களில் நேற்று பிரதோஷ வழிபாடு நடந்தது. அதன்படி ஜெயங்கொண்டம் கழுமலைநாதர், சென்னீஸ்வரர், சோழீஸ்வரர், ஆவிச்சரமடையார், கங்கைகொண்ட சோழபுரம் பிரகதீஸ்வரர், ஆண்டிமடம் அகத்தீஸ்வரர், உடையார்பாளையம் பயறனீஸ்வரர், பொன்பரப்பி சொர்ணபுரீஸ்வரர், செங்குந்தபுரம் ஏகாம்பரேஸ்வரர், தண்டலை திருமேனிஸ்வரர், இறவாங்குடி ஏகாம்பரேஸ்வரர், மேலகுடியிருப்பு ஆவீஸ்வரர் கோயில்களில் சிறப்பு வழிபாடு நடந்தது. மேலும் திருக்களப்பூர் திருக்கோடி வனத்தீஸ்வரர், புதுச்சாவடி கல்யாண சுந்தரேஸ்வரர், மீன்சுருட்டி சொக்கலிங்கேஸ்வரர், தேவாமங்கலம் பால்வண்ணநாதர், திருத்துளார் அருளுடையநாதர், வீரசோழபுரம் கைலாசநாதர், உட்கோட்டை அவதார ரட்சகர், உத்திரகுடி பசுபதீஸ்வரர், தூத்தூர் வராகமுத்தீஸ்வரர், பாலாம்பிகை உள்ளிட்ட சிவன் கோயில்களில் நேற்று பிரதோஷ வழிபாடு நடந்தது.  அப்போது நந்தியம்பெருமானுக்கு திரவிய பொடி, மாவுப்பொடி, மஞ்சள், சந்தனம், பால், தேன், உள்ளிட்ட அபிஷேகங்கள் நடந்தது. இதில் திரளான பக்தர்கள் பங்கேற்றனர். கங்கைகொண்ட சோழபுரம் பிரகதீஸ்வரர், ஜெயங்கொண்டம் கழுமாலைநாதர் கோவில்களில் நந்தியம்பெருமானின் பிரகார உலா நடந்தது.

கரும்பு வெட்டும் தொழிலாளி மர்மச்சாவு

ஜெயங்கொண்டம், ஏப். 3:   கள்ளக்குறிச்சி அடுத்த வி.பாளையம் வடக்கு தெருவை சேர்ந்தவர் மூக்கன் (37). இவர் இவரது ஊரை சேர்ந்தவர்கள் வெளியூரில் கரும்பு வெட்டும் கூலி வேலைக்கு குழுவாக செல்வது வழக்கம். அரியலூர் மாவட்டம் ஆண்டிமடம் அருகே காட்டாத்தூர் கிராமத்துக்கு குழுவாக கரும்பு வெட்டும் பணிக்கு வந்திருந்தனர். இந்நிலையில் நேற்று முன்தினம் இரவு மூக்கன், கரும்பு வெட்டி விட்டு இரவில் படுத்து தூங்கினார். நேற்று காலை வழக்கம்போல் பணிக்கு செல்வதற்காக மூக்கனை எழுப்பினர். அவர் எழுந்திருக்காததால் சந்தேகமடைந்து உறவினர் கொளஞ்சி, ஆண்டிமடம் காவல் நிலையத்துக்கு தகவல் தெரிவித்தார். சப்-இன்ஸ்பெக்டர் பிரகஸ்பதி மற்றும் போலீசார் சம்பவ இடத்துக்கு சென்று மூக்கன் உடலை கைப்பற்றி பிரேத பரிசோதனைக்காக ஜெயங்கொண்டம் அரசு மருத்துவமனைக்கு அனுப்பி வைத்தனர். மேலும் போலீசார் வழக்குப்பதிந்து விசாரணை நடத்தி வருகின்றனர்.

தேர்தல் நடத்தை விதிமுறைகளை மீறுவோர் மீது கடும் நடவடிக்கை மாவட்ட தேர்தல் அலுவலர் எச்சரிக்கை

அரியலூர், ஏப்.3: தேர்தல் நடத்தை விதிமுறைகளை மீறுவோர் மீது கடும் நடவடிக்கை எடுக்கப்படும் என மாவட்ட தேர்தல்  அ லுவலர்  எச்சரிக்கை விடுத்துள்ளார். இது குறித்து மாவட்ட தேர்தல்அலுவலரும், கலெக்டருமான  விஜயலட்சுமி  வெளியிட்டுள்ள செய்திக்குறிப்பு: பாராளுமன்ற தேர்தலுக்கான பிரசாரத்தில் ஈடுபடும் வாகனங்களுக்கு மாவட்ட தேர்தல் நடத்தும் அலுவலரிடம் முறையாக அனுமதி பெற்றிருக்க வேண்டும். வேட்பாளர்கள் அவர்களின் வாகனங்களை உரிய அதிகாரியிடம் பதிவு செய்து கொள்வதுடன், பெற்ற அனுமதி ஆணையத்தின் அசல் மட்டுமே வாகனத்தின் கண்ணாடி முகப்பு பகுதியில் ஒட்டி வைக்க வேண்டும். நகல்களை ஒட்டினால் சம்மந்தப்பட்ட வாகனங்கள் கண்டறிந்து, பறிமுதல் செய்யப்படும். அரசியல் தலைவர்கள், அமைச்சர்கள், தொண்டர்கள், முகவர்கள் மற்றும் வேட்பாளர்களின் அனுதாபிகள் எவரும் வேறு வாகனங்களை பயன்படுத்தக் கூடாது.வேட்பாளரின் தகுதி அடிப்படையில் சலுகை எதுவும் வழங்க முடியாது. அந்த அனுமதி ஆணையை தவறாக பயன்படுத்தும் நோக்கில் வேட்பாளர்கள், அரசியல் கட்சியினர் மீது சட்டப்படியான நடவடிக்கை மேற்கொள்ளப்படும்.மேலும், தேர்தல் நடத்தும் அலுவலரிடம் உரிய அனுமதி பெறாத வணிக நோக்கிலான வாகனங்களில் கொடிகள், ஸ்டிக்கர் ஒட்டி விளம்பரம் செய்யக் கூடாது. வாகனத்தின் வெளிப்புற அமைப்பை மாற்றுதல் மற்றும் ஒலிப்பெருக்கி பொருத்துதல் ஆகிய செயல்களில் மோட்டார் வாகனச் சட்டத்தின் சரத்துக்கள் படியும், உள்ளுர் சட்டங்கள் விதிகளின்படியும் தான் இருக்க வேண்டும். மோட்டார் வாகனச் சட்டத்திற்கு உட்பட்டு, உரிய அதிகாரியிடம் அனுமதி பெற்ற பின்னரே ரதம் போன்ற மாற்றங்கள் செய்யப்பட்ட வாகனங்கள் தேர்தல் பிரசாரத்தில் பயன்படுத்த வேண்டும். அரசியல் கட்சியினர் கட்சி பணிமனை திறக்கும்போது, அத்தகைய அலுவலகங்கள் அரசு புறம்போக்கு நிலங்களில் ஆக்கிரமித்து, நடத்தக் கூடாது, வழிபாட்டு தலங்கள் அமைந்துள்ள இடத்திலோ, கல்வி நிறுவனங்கள் அமைந்துள்ள இடத்திலோ கட்சி பணிமனைகள் அமைத்திட கூடாது. வாக்குச்சாவடியிலிருந்து 200 மீட்டருக்குள் பிரசார பணிமனைகள் இருக்கக் கூடாது. தேர்தல் நடத்தை விதிமுறைகளை மீறுவோர் மீது கடும் நடவடிக்கைகள் மேற்கொள்ளப்படும் என மாவட்ட தேர்தல் அலுவலரும்,கலெக்டர் விஜயலட்சுமி, தெரிவித்துள்ளார்.

தொழிலாளர்களிடம் மக்களவை தேர்தல் விழிப்புணர்வு துண்டு பிரசுரம் விநியோகம்

அரியலூர், ஏப். 3: கருவிடைச்சேரியில் 100 நாள் வேலைத்திட்ட தொழிலாளர்களிட் தேர்தல் விழிப்புணர்வு துண்டு பிரசுரம் விநியோகம் செய்யப்பட்டது. அரியலூர் மாவட்டம் கருவிடைச்சேரியில் ஊரக வளர்ச்சி துறை சார்பில் மகாத்மா தேசிய ஊரக வேலைவாய்ப்பு திட்டத்தில் பணிபுரியும் நபர்களுக்கு தேர்தல் விழிப்புணர்வு தொடர்பான துண்டு பிரசுரங்கள் வழங்கப்பட்டு விழிப்புணர்வு ஏற்படுத்தப்பட்டது.மேலும் மின்னணு வாக்குப்பதிவு இயந்திரம் மற்றும் வாக்காளர் தாம் பதிவு செய்த வாக்கை உறுதி செய்யும் கருவி (விவிபேட்) ஆகியவை மூலம் பொதுமக்களிடையே விழிப்புணர்வு ஏற்படுத்தப்பட்டது. உதவி திட்ட அலுவலர் (ஊரக வளர்ச்சி முகமை) நாராயணன், வட்டார வளர்ச்சி அலுவலர் கலையரசன் மற்றும் அலுவலர்கள், பொதுமக்கள் பங்கேற்றனர்.

ஜெயங்கொண்டத்தில் வேட்பாளர் அறிமுக கூட்டம் ராமதாஸ் பங்கேற்பு

ஜெயங்கொண்டம், மார்ச் 27: அதிமுக பாமக உள்ளிட்ட கூட்டணிக் கட்சிகளின் சிதம்பரம் பாராளுமன்ற தொகுதி வேட்பாளர் அறிமுக கூட்டம் மற்றும் வாக்கு சேகரிப்பு கூட்டம் ஜெயங்கொண்டத்தில் நடைபெற்றது.கூட்டத்திற்கு பாமக மாநில  செயலாளர் வைத்தி தலைமை வகித்தார்.சிதம்பரம் பாராளுமன்ற தொகுதி அதிமுக வேட்பாளர் சந்திரசேகர் ஆதரித்து பாமக நிறுவனர் டாக்டர் ராமதாஸ் பேசுகையில்,  20 ஆண்டுகளுக்கு முன்பு தொடங்கப்பட்ட அனல் மின் திட்டத்தை வரப்போகும் மோடி ஆட்சியில் திட்டத்தை துவங்கவும் அல்லது நிலத்தை திருப்பிக் கொடுப்பதற்கு உரிய நடவடிக்கையை நாம் இணைந்து செயல்படுவோம். இந்த திட்டத்தில் இடம் நிலம் கொடுத்தவர்கள் 50 ஆண்டு காலத்திற்கு பங்குதாரர்களாகவும் வீட்டுக்கு ஒருவருக்கு வேலை வழங்கவும் நடவடிக்கை எடுத்து இதற்கு ஒரு தீர்வு காணப்படும்.  கும்ப கோணத்திலிருந்து விருத்தாசலத்திற்கு சிதம்பரத்திலிருந்து அரியலூர் இருக்கும் புதிய வழித்தடத்தில் ரயில் பாதையை இணைக்கவும் நடவடிக்கை மேற்கொள்வோம் என்றார். கூட்டத்தில் வேட்பாளர் சந்திரசேகரரை ஆதரித்து அதிமுக அரசு தலைமை கொறடா தாமரை ராஜேந்திரன், ஜெயங்கொண்டம் எம்எல்ஏ ராமஜெய லிங்கம்  உள்ளிட்ட கூட்டணிக் கட்சிகளின் மாநில மாவட்ட நிர்வாகிகள் பேசினர்.