Chennai - Dinakaran

ரியல் எஸ்டேட் அதிபரை மிரட்டி ரூ1 கோடி பறித்த வழக்கில் கோவையில் 2 பேர் கைது

சென்னை: கொரட்டூரை சேர்ந்தவர் முகமது தாஹிர். ரியல் எஸ்டேட் தொழில் செய்து வருகிறார். இவர், போரூர் அருகே 110 ஏக்கர் புறம்போக்கு நிலத்துக்கு பட்டா ஏற்பாடு செய்து தர, ரியல் எஸ்டேட் தொழில் செய்து வரும் ராமகிருஷ்ணன், ராஜதுரை ஆகியோரிடம் ஒன்றரை கோடி ரூபாய் வாங்கியுள்ளார். ஆனால் பட்டா வாங்கி தரவில்லை. இந்த விவகாரம் தொடர்பாக, நெல்லையை சேர்ந்த ஜான் இளங்கோவை சென்னைக்கு வரவழைத்து, துரைப்பாக்கத்தில் பேச்சுவார்த்தை நடந்தது. அப்போது, ஜான் இளங்கோ கும்பல் முகமது தாஹிரை சரமாரி தாக்கி, ஒரு அறையில் அடைத்தது. பின்னர், அவரது மனைவியை மிரட்டி, ரூ1 கோடியை பறித்துக்கொண்டு தப்பியது. இதுகுறித்து துரைப்பாக்கம் போலீசில் தாஹிர் புகார் செய்தார். போலீசார் வழக்குப்பதிவு செய்து ஜான் இளங்கோ கும்பலை தேடி வந்தனர். இந்நிலையில்,  கோவையில் பதுங்கியிருந்த ஜான் இளங்கோ உள்ளிட்ட 2 பேரை தனிப்படை போலீசார் கைது செய்து சென்னைக்கு கொண்டு வந்து விசாரித்து வருகின்றனர்.

பூந்தமல்லி பகுதியில் உள்ள டாஸ்மாக் கடைகளுக்கு 3 நாட்கள் விடுமுறை

சென்னை: திருவள்ளூர் மாவட்ட கலெக்டர் மகேஸ்வரி ரவிக்குமார் வெளியிட்டுள்ள அறிக்கை: வரும் 19ம் தேதி திருவள்ளூர் நாடாளுமன்ற தொகுதிக்கு உட்பட்ட பூந்தமல்லி சட்டமன்ற தொகுதி கன்னபாளையம் வாக்குச்சாவடி எண் 195க்கு நாடாளுமன்றம் மற்றும் சட்டமன்ற இடைத்தேர்தலை  முன்னிட்டு மறுவாக்குப்பதிவு நடைபெற உள்ளது. எனவே தமிழ்நாடு மதுபான உரிமம் மற்றும் அனுமதி விதிகள் 1981 மற்றும் தமிழ்நாடு மதுபான சில்லறை விற்பனை விதிகள் 2003ன்படி மறுவாக்குப் பதிவு நடைபெறும் கன்னபாளையம் கிராமம் பூந்தமல்லி தொகுதியில் வருவதால் சட்டமன்ற தொகுதிக்கு உட்பட்ட பகுதிகளில் இயங்கும் டாஸ்மாக் கடைகள் மற்றும் பார்கள் அனைத்தும் இன்று மாலை 6 மணி முதல் வாக்குப்பதிவு நடைபெறும் நாளான 19ம் தேதி மாலை 6 மணி வரை கண்டிப்பாக மூடப்பட வேண்டும். மீறினால், சட்ட நடவடிக்கை எடுக்கப்படும்.

மாடியிலிருந்து குதித்த பெண் பரிதாப பலி: கள்ளக்காதலனிடம் விசாரணை

பெரம்பூர்: வண்ணாரப்பேட்டை டி.எச்.ரோடு பகுதியை சேர்ந்தவர் முகமது (எ) சின்னத்தம்பி (50). பெயின்டர். இவரது மனைவி, 2 குழந்தைகளுடன் அதிராமப்பட்டினம் பகுதியில் வசித்து வருகிறார். கடந்த 2 ஆண்டுகளுக்கு முன் செஞ்சியை சேர்ந்த கட்டிட வேலை செய்யும் மீனா (49) என்பவருடன் சின்னத்தம்பிக்கு கள்ளத்தொடர்பு ஏற்பட்டது. இவர்கள், ஒன்றாக குடும்பம் நடத்தி வந்தனர். மேலும், இருவரும் இரவு நேரங்களில் ஒன்றாக மது அருந்துவார்கள் என கூறப்படுகிறது. அதன்படி, நேற்று முன்தினம் இரவு மது அருந்தும்போது அவர்களிடையே வாய்த்தகராறு ஏற்பட்டுள்ளது. இதனால் விரக்தியடைந்த மீனா 2வது மாடியில் இருந்து கீழே குதித்து, படுகாயமடைந்தார். அக்கம் பக்கத்தினர் அவரை மீட்டு ஸ்டான்லி அரசு மருத்துவமனைக்கு அனுப்பி வைத்தனர். ஆனால் செல்லும் வழியிலேயே மீனா பரிதாபமாக உயிரிழந்தார். இதுபற்றி வண்ணாரப்பேட்டை போலீசார் வழக்குப்பதிவு செய்து, முகமது (எ) சின்னதம்பியை பிடித்து விசாரித்து வருகின்றனர்.

காஞ்சிபுரம் முருகன் பட்டு கூட்டுறவு சங்க நிர்வாக குழுவை கலைக்க விளக்கம் கேட்டு நோட்டீஸ்: ஊழல் முறைகேடுக்கு முகாந்திரம் உள்ளதால் அதிரடி

சென்னை: காஞ்சிபுரத்தில் கைத்தறித்துறை கட்டுப்பாட்டில் 22 அரசு பட்டு கூட்டுறவு சங்கங்கள் செயல்பட்டு வந்தன. இதில் அறிஞர் அண்ணா பட்டு கூட்டுறவு சங்கம், காஞ்சிபுரம் முருகன் பட்டு கூட்டுறவு சங்கம் தவிர மற்ற சங்கங்கள் நஷ்டத்தில் இயங்கி வருகின்றன. கூட்டுறவு சங்கத்தில் அதிமுக சங்க நிர்வாகக் குழுவினரின் ஊழல் முறைகேடுகள் காரணமாக லாபத்தில் செயல்பட்ட அறிஞர் அண்ணா பட்டு கூட்டுறவு சங்கம் மற்றும்  முருகன் பட்டு கூட்டுறவு சங்கமும் தற்போது  நஷ்டத்தில் இயங்கும் நிலைக்கு தள்ளப்பட்டன. இதில் அறிஞர் அண்ணா பட்டு கூட்டுறவு சங்கத்தில் ரூ.2.34 கோடி ஊழல் நடந்தது  நிரூபணமானதால் சங்கத்தின் தலைவர் செல்வராஜ் தகுதி நீக்கம் செய்யப்பட்டார். தற்போது அதில் தொடர்புடைய மற்ற இயக்குநர்களையும் தகுதி நீக்கம் செய்வதற்கான அறிவிப்பு நோட்டீஸ் வழங்க கைத்தறித்துறை அதிகாரிகள் நடவடிக்கை எடுத்து வருகின்றனர்.இந்நிலையில் காஞ்சிபுரம் முருகன் பட்டு கூட்டுறவு சங்கத்திலும்  கடந்த 2017-18ம் ஆண்டில் சுமார் ரூ.2 கோடி ஊழல் முறைகேடுகள் நடைபெற்றுள்ளதாக தகவல்கள் வெளிவந்தன. இந்நிலையில் ஊழல் முறைகேடு குறித்து, இணை இயக்குநர் சாரதிசுப்புராஜ் விசாரணை நடத்தினார். இதுதொடர்பாக சங்க மேலாண் இயக்குநர் உள்பட 3 ஊழியர்கள் பணியிடை நீக்கம் செய்யப்பட்டனர். 2017- 18ம் ஆண்டின் சங்க தணிக்கை முடிக்கப்படாமல்  காலதாமதப்படுத்தி வந்த சங்க நிர்வாகக்குழுவினரின் போக்கால் சங்க உறுப்பினர்களுக்கு நடப்பாண்டு பொங்கல் போனஸ் மறுக்கப்பட்டது. சங்க தணிக்கை அறிக்கை வெளியானால் நிர்வாகக்குழுவினரின் ஊழல் முறைகேடுகள் வெளிவரும் என்பதால் வேண்டுமென்றே காலதாமதப்படுத்தப்படுவதாக நெசவாளர்கள் புகார் தெரிவித்தனர். நீண்டநாட்களாக சங்க தணிக்கை அறிக்கை வெளியிடாமல் இழுத்தடிக்கப்பட்டு வந்த நிலையில் கடந்த வாரம் தணிக்கை அதிகாரிகளால் முருகன் பட்டு கூட்டுறவு சங்கத்தின் தணிக்கை சான்று வெளியிடப்பட்டது. மேலும்  மறு தணிக்கை கோரிய சங்கத் தலைவரின் கோரிக்கை தணிக்கை அதிகாரிகளால் நிராகரிக்கப்பட்டது. இதனை தொடர்ந்து காஞ்சிபுரம் சரக கைத்தறித்துறை துணை இயக்குநர் செல்வம், சங்கத் தலைவர் வள்ளிநாயகம், துணைத்தலைவர் ஜெயந்தி சோமசுந்தரம், இயக்குநர்கள் கிருஷ்ணமூர்த்தி, இளங்கோவன், சம்பத், பாஸ்கர், கீதா உள்ளிட்டவர்களுக்கு விளக்கம் கேட்டு நோட்டீஸ்  அனுப்பியுள்ளார். அதில், சங்கத்தில் ஊழல் முறைகேடுகள் நடைபெற்றதற்கான முகாந்திரம் இருப்பதால் சங்க நிர்வாகக்குழுவை ஏன் கலைக்கக்கூடாது என்றும், சம்மன் அனுப்பப்பட்ட 15 நாட்களில் இதற்கு உரிய விளக்கம் அளிக்க வேண்டுமென அந்த நோட்டீசில் தெரிவிக்கப்பட்டுள்ளது. இதனால் அறிஞர் அண்ணா பட்டு கூட்டுறவு சங்கத்தைத் தொடர்ந்து காஞ்சிபுரம் முருகன் பட்டு கூட்டுறவு சங்க நிர்வாகக்குழுவும் விரைவில் கலைக்கப்படுவது உறுதியாகிவிட்டது. சங்க நிர்வாகக்குழுவை கலைத்துவிட்டு கைத்தறித்துறை சார்பில் தனி அதிகாரியை நியமித்து சங்க செயல்பாடுகளை நிர்வகிக்க வேண்டுமென்பது சங்க நெசவாளர்களின்  பெரும் எதிர்பார்ப்பாக உள்ளது.

திருமணமாகாத விரக்தி சினிமா டான்சர் தற்கொலை

சென்னை: திருமணமாகாத ஏக்கத்தில் சினிமா டான்சர் ஒருவர் தூக்கிட்டு தற்கொலை செய்து கொண்ட சம்பவம் விருகம்பாக்கத்தில் பரபரப்பை ஏற்படுத்தியது. விருகம்பாக்கம் வெங்கடேஸ்வரா நகரை சேர்ந்தவர் பரத் (35). நடன கலைஞரான இவர், நண்பர்களுடன் வாடகை வீட்டில் தங்கி இருந்தார். மின்சார கனவு உள்ளிட்ட பல திரைப்படங்களில் டான்சராக பணியாற்றி உள்ளார். நடிகர் ராகவா லாரன்ஸ் நடன குழுவிலும் பணிபுரிந்து வந்தார். இயக்குநர் ஏ.ஆர்.முருகதாஸ் குழந்தைகளுக்கும் இவர்தான் நடன பயிற்சி கொடுத்து வந்துள்ளார். இந்நிலையில், கடந்த சில ஆண்டுகளாக சினிமாவில் இவருக்கு சரியாக வாய்ப்பு கிடைக்கவில்லை என்று கூறப்படுகிறது. மேலும், இவர் பல ஆண்டுகளாக திருமணம் ெசய்ய பெண் பார்த்து வந்ததாக கூறப்படுகிறது. ஆனால், சரியான வாழ்க்கை துணை அமையவில்லை. இதுபற்றி சக நண்பர்களிடம் கூறி வேதனையடைந்துள்ளார். இதனால், கடந்த ஒரு வாரமாக மன வேதனையில் இருந்து வந்த பரத், அறையில் உடன் தங்கியுள்ள சக நண்பர்களிடமும் சரியாக பேசவில்லை என்று கூறப்படுகிறது. நேற்று முன்தினம் இரவு பரத் வழக்கம்போல் அறையில் படுத்து இருந்தார். நேற்று காலையில் சக நண்பர்கள் எழுந்து பார்த்தபோது பரத் தூக்கிட்டு தற்கொலை செய்து கொண்டதை பார்த்து அதிர்ச்சியடைந்தனர். தகவலறிந்து வந்த விருகம்பாக்கம் போலீசார், சடலத்தை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும், வழக்கு பதிவு செய்த போலீசார் பரத்துடன் தங்கி இருந்த சக நண்பர்களிடம் விசாரணை நடத்தி வருகின்றனர். இந்த சம்பவத்தால் சிறிது நேரம் அப்பகுதியில் பரபரப்பு ஏற்பட்டது.

பராமரிப்பு பணி காரணமாக மின்சார ரயில்கள் ரத்து: தெற்கு ரயில்வே அறிவிப்பு

சென்னை: தெற்கு ரயில்வே வெளியிட்ட அறிக்கை: பராமரிப்பு பணி காரணமாக கும்மிடிப்பூண்டி - சென்னை கடற்கரை இடையே  இன்று முதல் 21ம் தேதி வரை இரவு 9.40 மணிக்கு இயக்கப்படும் மின்சார ரயில் ரத்து செய்யப்பட்டு, கொருக்குப்பேட்டை முதல் சென்னை கடற்கரை இடையே இயக்கப்படும் மின்சார ரயில் மூர்மார்க்கெட் வரை இயக்கப்படும். மேலும் சென்னை கடற்கரை - அரக்கோணம் இடையே நாளை முதல் 22ம் தேதி பிற்பகல் 1.20 மணிக்கு இயக்கப்படும் மின்சார ரயில் மூர்மார்க்கெட்டில் இருந்து பிற்பகல் 1.25 மணிக்கு புறப்படும். மேலும் கொச்சி வேலி- கவுகாத்தி இடையே ஜூன் 9,16,23,30 மற்றும் ஜூலை 7,14 ஆகிய தேதிகளில் பிற்பகல் 2 மணிக்கு சிறப்பு ரயில்கள் இயக்கப்படுகிறது.

திருவல்லிக்கேணியில் காஸ் கசிவால் தீவிபத்து: சிலிண்டர் வெடித்ததால் பரபரப்பு

சென்னை: திருவல்லிக்கேணி எஸ்.எம்.வி.கோயில் தெருவை சேர்ந்தவர் செந்தில் (38). இவர், அப்பகுதியிலேயே 3 வீடுகள் வாடகைக்கு விட்டுள்ளார். அந்த வீடுகளில் ஆந்திராவை சேர்ந்த கட்டிட தொழிலாளிகள் குடும்பத்துடன் தங்கி உள்ளனர்.  நேற்று முன்தினம் இரவு ராஜூ என்பவரின் வீட்டில் காஸ் கசிவால் தீவிபத்து ஏற்பட்டது. இதை பார்த்து வீட்டில் இருந்தவர்கள் வெளியே ஓடிவந்தனர்.கொழுந்து விட்டு எரிந்த காஸ் சிலிண்டர் திடீரென வெடித்து சிதறியது. இதில் வீடு முழுவதும் சேதமடைந்து பொருட்கள் எரிந்து நாசமானது. தீ மளமளவென அருகில் இருந்த வீடுகளிலும் பரவியது. தகவலறிந்து திருவல்லிக்கேணி தீயணைப்பு வீரர்கள் விரைந்து வந்து தீயை அணைத்தனர். ஆனால், அதற்குள் வீட்டில் இருந்த அனைத்து பொருட்களும் எரிந்து நாசமானது. இதுகுறித்து வீட்டின் உரிமையாளர் செந்தில் ஐஸ்அவுஸ் காவல் நிலையத்தில் புகார் அளித்தார். போலீசார் வழக்கு பதிவு செய்து விசாரணை நடத்தி வருகிறன்றனர்.

மகனை காப்பாற்ற முயன்ற தந்தைக்கு கத்திக்குத்து

தண்டையார்பேட்டை: காசிமேடு, ஜி.என்.பேட்டை பகுதியை சேர்ந்தவர் ஆறுமுகம் (48). இவரது மகன் மதன் (24). வேன் டிரைவர். இருவரும், நேற்று முன்தினம் மாலை காசிமேடு, இந்திரா நகர் பகுதியில் நடந்து வந்தபோது எதிரே வந்த 16 வயது சிறுவன், மதனிடம் தகராறில் ஈடுபட்டான். பின்னர், திடீரென அந்த சிறுவன் மறைத்து வைத்திருந்த கத்தியால் மதனை குத்திக் கொல்ல முயன்றான். அதிர்ச்சியடைந்த ஆறுமுகம் அவனை தடுத்தபோது அவருக்கு கத்திக்குத்து விழுந்தது. படுகாயமடைந்த ஆறுமுகத்தை ஸ்டான்லி அரசு மருத்துவமனையில் சேர்த்தனர்.போலீசார் விசாரணையில், மதனுக்கும், அந்த சிறுவனுக்கும் இடையே பணம் கொடுக்கல், வாங்கலில் முன்விரோதம் இருந்துள்ளது. இதனால் மதனை சிறுவன் கத்தியால் குத்தியது தெரிந்தது. இதையடுத்து, அந்த சிறுவனை போலீசார் கைது செய்து கெல்லீசில் உள்ள அரசு சிறுவர் சீர்திருத்தப் பள்ளியில் சேர்த்தனர்.

விமான நிலையத்தில் தீவிபத்து: பயணிகள் அலறியடித்து ஓட்டம்

சென்னை: சென்னை விமான நிலையத்தில் உள்ள கேன்டீனில் நேற்று திடீர் தீவிபத்து ஏற்பட்டதால், பயணிகள் அலறியடித்து ஓட்டம் பிடித்தனர். விரைந்து தீயணைக்கப்பட்டதால் அசம்பாவிதம் தவிர்க்கப்பட்டது. சென்னை உள்நாட்டு விமான நிலையத்தில் பயணிகள் புறப்பாடு பகுதியில் 2ம் நுழைவாயில் உள்பகுதியில் தனியார் கேன்டீன் உள்ளது. இங்கு, நேற்று முன்தினம் இரவு 9.30 மணியளவில் தோசை சுடும் பணியில் ஊழியர்கள் ஈடுபட்டபோது, காஸ் அடுப்பில் தீவிபத்து ஏற்பட்டது. இதை பார்த்து அங்கிருந்த வாடிக்கையாளர்கள் மற்றும் பயணிகள் அலறியடித்து ஓடினர். கேன்டீன் ஊழியர்கள் மற்றும் விமான நிலைய பாதுகாப்பு அதிகாரிகள் அங்கிருந்த அவசர கால தீயணைப்பு கருவிகளை பயன்படுத்தி தீயை அணைத்தனர். இதனால் பெரும் அசம்பாவிதம் தவிர்க்கப்பட்டது. இதுகுறித்து விமான நிலைய உயர் அதிகாரிகள் விசாரணை நடத்தினர். பாதுகாப்பு முக்கியத்துவம் வாய்ந்த ஒரு விமான நிலையத்தில் ஏற்பட்ட தீவிபத்து அதிகாரிகளை அதிர்ச்சிக்குள்ளாக்கியது. எனவே இதுபோன்ற சம்பவங்கள் மீண்டும் நடக்காமல் இருக்க அனைத்து வகையான பாதுகாப்பு முன்னெச்சரிக்கை நடவடிக்கைகளை மேற்கொள்ளும்படி அதிகாரிகள் அந்த கேன்டீன் நிர்வாகிகளுக்கு அறிவுறுத்தினர். இந்த சம்பவத்தால் சென்னை விமான நிலையத்தில் சிறிது நேரம் பரபரப்பு ஏற்பட்டது.

துபாய், தாய்லாந்தில் இருந்து கடத்தி வந்த ரூ76 லட்சம் குங்குமப்பூ, தங்கம் பறிமுதல்: 2 பேர் பிடிபட்டனர்

மீனம்பாக்கம்: துபாய் மற்றும் தாய்லாந்தில் இருந்து கடத்தி வரப்பட்ட ரூ62 லட்சம் குங்குமப்பூ மற்றும் ரூ13.5 லட்சம் தங்க கட்டிகளை சுங்க அதிகாரிகள் பறிமுதல் செய்தனர். இதுதொடர்பாக, 2 பேரை கைது செய்து விசாரித்து வருகின்றனர். துபாயில் இருந்து இண்டிகோ ஏர்லைன்ஸ் விமானம் நேற்று காலை 10.30 மணிக்கு சென்னை சர்வதேச விமான நிலையத்திற்கு வந்தது. அதில் வந்த பயணிகளை சுங்க அதிகாரிகள் சோதனையிட்டனர். அப்போது, தஞ்சாவூரை சேர்ந்த சாகுல் அமீது (42) என்பவர் சுற்றுலா பயணிகள் விசாவில் துபாய் சென்று, திரும்பி வந்தார். அவர் மீது அதிகாரிகளுக்கு சந்தேகம் ஏற்பட்டதால், அவருடைய உடமைகளை சோதனையிட்டனர். அவரது சூட்கேசில் பாக்கெட், பாக்கெட்டாக ஈரான் நாட்டில் பதப்படுத்தப்பட்ட முதல்தர குங்குமப் பூக்கள் மறைத்து வைத்திருந்ததை கண்டு பிடித்தனர். மொத்தம் 31 கிலோ குங்குமப் பூக்கள்  இருந்தன. இதன் மதிப்பு ரூ62 லட்சம்.  சுங்க அதிகாரிகள் அந்த குங்குமப்  பூக்களை பறிமுதல் செய்தனர். பின்னர், சாகுல்அமீதை கைது செய்து, இவர் யாருக்காக கடத்தி வந்தார், இவரை கடத்தலுக்கு பயன்படுத்திய ஆசாமி யார் என தீவிரமாக விசாரணை நடத்துகின்றனர். இதேபோல், தாய்லாந்து நாட்டில் இருந்து இண்டிகோ ஏர்லைன்ஸ் விமானம் நேற்று நண்பகல் 1 மணிக்கு சென்னை சர்வதேச விமான நிலையத்திற்கு வந்தது. அதில் வந்த பயணிகளை சுங்க அதிகாரிகள் சோதனையிட்டனர். அப்போது கும்பகோணத்தை சேர்ந்த முகமது பைசல் (33) என்பவர் சுற்றுலா பயணிகள் விசாவில் தாய்லாந்து நாட்டிற்கு சென்று, திரும்பி வந்தார். இவர் மீது சுங்க அதிகாரிகளுக்கு சந்தேகம் ஏற்பட்டது. அவரது உடமைகளை சோதனையிட்டபோது, எதுவும் சிக்கவில்லை. சந்தேகம் தீராத அதிகாரிகள் அவரை தனி அறைக்கு அழைத்துச்சென்று அவரது ஆடைகளை களைந்து சோதனையிட்டனர். அப்போது அவருடைய உள்ளாடைக்குள் 400 கிராம் தங்க கட்டிகள் மறைத்து வைத்திருந்ததை கண்டு பிடித்தனர். இதன் மதிப்பு ரூ13.5 லட்சம். இதையடுத்து சுங்க அதிகாரிகள் பயணி முகமது பைசலை கைது செய்தனர். தங்க கட்டிகளையும் பறிமுதல் செய்தனர். அவரிடம் விசாரணை நடத்தி வருகின்றனர்.

வங்கி கடனை திரும்ப செலுத்தாத விவகாரம்: 2 கல்லூரிகளில் மாணவர் சேர்க்கைக்கு தடை

சென்னை: வங்கிகளில் வாங்கிய கடனை திருப்பி செலுத்தாத விவகாரத்தில் 2 கல்லூரிகளில் மாணவர் சேர்க்கை நடத்த தடை விதித்து உயர் நீதிமன்றம் உத்தரவிட்டுள்ளது. சென்னை வளசரவாக்கத்தில் இயங்கிவரும் தேவி கருமாரியம்மன் கல்வி அறக்கட்டளை சார்பில் அறிஞர் அண்ணா இன்ஸ்டிடியூட் ஆப் இன்ஜினியரிங் அண்ட் டெக்னாலஜி மற்றும் அறிஞர் அண்ணா மேனேஜ்மென்ட் கல்லூரி ஆகிய கல்லூரிகள் இயங்கி வருகின்றன. இவை அண்ணா பல்கலைக் கழகத்தின் அங்கீகாரம் பெற்ற கல்லூரிகள். இந்த அறக்கட்டளை பல்வேறு வங்கிகளில் கடன் வாங்கியுள்ளது. ஆனால், கடனை திரும்ப செலுத்தவில்லை. இதையடுத்து, சம்பந்தப்பட்ட வங்கிகள் கடன் வசூல் தீர்ப்பாயத்தில் வழக்கு தொடர்ந்தன. அதன் அடிப்படையில் அறக்கட்டளையின் சொத்துக்களை ஏலம் விட உத்தரவிடப்பட்டுள்ளது. எனவே, இந்த கல்லூரிகளில் இந்த ஆண்டு மாணவர் சேர்க்கை நடத்த தடை விதிக்கக் கோரி சென்னை உயர் நீதிமன்றத்தில் மேஸ்சிமம் ஆர்க் லிமிடெட் என்ற நிறுவனம் வழக்கு தொடர்ந்தது. வழக்கு நீதிபதி எஸ்.வைத்தியநாதன் முன்னிலையில் விசாரணைக்கு வந்தது. வழக்கை விசாரித்த நீதிபதி அளித்த உத்தரவில், ஏற்கனவே இந்த அறக்கட்டளை நடத்திய மருத்துவ கல்லூரியில் உள்ள மாணவர்கள் உயர் நீதிமன்ற உத்தரவின் அடிப்படையில் வேறு கல்லூரிகளுக்கு மாற்றப்பட்டனர். அறக்கட்டளை மீது ‘சர்பாசி’ சட்டத்தின்கீழ் (கடனை திரும்ப வசூலிப்பதற்காக சொத்துக்களை முடக்குவது தொடர்பான சட்டம்) நடவடிக்கை எடுக்கப்பட்டுள்ளது. எனவே, இந்த கல்லூரிகளில் 2019-20ம் ஆண்டுக்கான மாணவர் சேர்க்கை நடந்தால் அவர்களும் இந்த நீதிமன்றத்தின் கதவை தட்ட வேண்டிய நிலை ஏற்படும். எனவே, இந்த கல்லூரிகளில் 2019-20ம் ஆண்டுக்கான மாணவர் சேர்க்கை நடத்த தடை விதிக்கப்படுகிறது. இந்த கல்லூரிகளின் அங்கீகாரத்தை நீக்க அண்ணா பல்கலைக்கழகம் உரிய நடவடிக்கைகளை எடுக்க வேண்டும் என்று உத்தரவிட்டார்.

விதிமீறி நிலத்தடி நீரை உறிஞ்சி விற்பனை தண்ணீர் கம்பெனியை பொதுமக்கள் முற்றுகை: குன்றத்தூர் அருகே பரபரப்பு

பல்லாவரம்: குன்றத்தூர் அடுத்த தரப்பாக்கம் பகுதியில், தாம்பரம் - மதுரவாயல் புறவழிச் சாலையை ஒட்டியுள்ள சர்வீஸ் சாலையில் தனியாருக்கு சொந்தமான தண்ணீர் கம்பெனிகள் அதிகளவில்  உள்ளன. இங்கு ஆழ்துளை கிணறுகள் அமைத்து, தண்ணீரை உறிஞ்சி லாரிகள் மூலம் சென்னை முழுவதும் உள்ள அடுக்குமாடி குடியிருப்புகள், ஓட்டல்கள், தனியர் விடுதிகளுக்கு விற்பனை செய்யப்படுகிறது. இதனால், சுற்று வட்டார பகுதிகளில் உள்ள குடியிருப்புகளில் நிலத்தடி நீர் மட்டம் குறைந்து, தண்ணீர் தட்டுப்பாட்டால் மக்கள் தவித்து வருகின்றனர். எனவே, விதிமீறி தண்ணீரை உறிஞ்சி விற்கும் மேற்கண்ட கம்பெனிகள் மீது நடவடிக்கை எடுக்க வேண்டும், என பொதுமக்கள் வலியுறுத்தி வந்தனர். ஆனால், எந்த நடவடிக்கையும் இல்லை. இதை கண்டித்து தரப்பாக்கம் மற்றும் தண்டலம் ஊராட்சி பகுதி மக்கள் சுமார் 100க்கும் மேற்பட்டோர், நேற்று அங்குள்ள ஒரு தண்ணீர் கம்பெனியை முற்றுகையிட்டு ஆர்ப்பாட்டத்தில் ஈடுபட்டனர். தொடர்ந்து சாலை மறியலிலும் ஈடுபட்டனர். தகவலறிந்து சம்பவ இடத்திற்கு வந்த குன்றத்தூர் போலீசார் மற்றும் பல்லாவரம் தாசில்தார் ஹேமாவதி ஆகியோர், சாலை மறியலில் ஈடுபட்டவர்களிடம்  பேச்சுவார்த்தையில் ஈடுபட்டனர். அப்போது, தாசில்தார் உத்தரவுப்படி தண்ணீர் கம்பெனிகள் அனைத்தும் தற்காலிகமாக மூடப்பட்டது. இதையடுத்து ஆர்ப்பாட்டத்தில் ஈடுபட்டவர்கள் கலைந்து சென்றனர். முன்னதாக ஆர்ப்பாட்டத்தில் ஈடுபட்ட பொதுமக்கள் கூறுகையில், ‘‘தரப்பாக்கம் மற்றும் தண்டலம் ஆகிய  ஊராட்சிகளுக்குட்பட்ட பகுதிகளில் ஏராளமான குடியிருப்புகள் உள்ளன. முன்பெல்லாம் எங்கள் பகுதியில் 20 அடி முதல் 30 அடியில் ஆழ்துளை கிணறு அமைத்தால் தண்ணீர் கிடைக்கும். தற்போது இந்த சர்வீஸ் சாலையில் 8க்கும் மேற்பட்ட தண்ணீர் கம்பெனிகள் வந்ததால் நிலத்தடி நீர் மட்டம் குறைந்துள்ளது. தற்போது கோடை காலம் என்பதாலும், தண்ணீர் விற்பனை அதிகரித்துள்ளதாலும், கூடுதலாக ஆழ்துளை கிணறுகள் அமைக்கபட்டு தண்ணீர் உறிஞ்சி எடுக்கப்பட்டு வருவதால், எங்கள் குடியிருப்பு பகுதிகளில் தண்ணீர் வருவதில்லை. எனவே, இந்த தனியார் தண்ணீர் கம்பெனிகளை நிரந்தரமாக மூடுவதற்கு அரசு நடவடிக்கை வேண்டும். இல்லை என்றால் எங்களது போராட்டம் மிகப்பெரிய அளவில் வெடிக்கும்’’ என்றனர்.

திருவொற்றியூரில் பாதாள சாக்கடை அடைப்பால் வீடுகளுக்குள் கழிவுநீர் புகுந்தது: தொற்றுநோய் பீதியில் பொதுமக்கள்

திருவொற்றியூர்: திருவொற்றியூர் வசந்தம் நகரில் பாதாள சாக்கடை அடைப்பால், வீடுகளில் கழிவுநீர் தேங்கி வருகிறது. இதனால், பொதுமக்கள் தொற்றுநோய் பீதியில் தவித்து வருகின்றனர். சென்னை மாநகராட்சி திருவொற்றியூர் மண்டலம் 12வது  வார்டுக்கு உட்பட்ட வசந்தம் நகரில் 2 ஆயிரத்துக்கும் மேற்பட்ட மக்கள் வசிக்கின்றனர். இந்த பகுதியில் கடந்த சில மாதங்களாக  அடிக்கடி பாதாள சாக்கடையில் அடைப்பு ஏற்படுவதால், மேன்ஹோல்கள் வழியாக கழிவுநீர் வெளியேறி சாலையில் பெருக்கெடுத்து ஓடுகிறது. மேலும், பல வீடுகளில் உள்ள கழிவறையில் கழிவுநீர் செல்ல முடியாமல் குளம் போல் தேங்கி நிற்பதால் கடும்  துர்நாற்றம் வீசுகிறது. இதனால், பொதுமக்களுக்கு தொற்றுநோய் பரவும் அபாயம் ஏற்பட்டுள்ளது. தொடர்ந்து குடியிருப்புகளில் கழிவுநீர் தேங்குவதால், பலர் தங்கள் வீடுகளை பூட்டி விட்டு உறவினர் வீடுகளில் தஞ்சம் புகும் நிலை ஏற்பட்டுள்ளது. இதுகுறித்து மாநகராட்சி அதிகாரிகளிடம் பலமுறை புகார் அளித்தும் இதுவரை எந்த நடவடிக்கையும் எடுக்கவில்லை, என்று கூறப்படுகிறது. இதுபற்றி அப்பகுதி மக்கள் கூறியதாவது: குடியிருப்புகளில் இருந்து வெளியேறும் கழிவுநீர் கால்வாய் வழியாக காலடிப்பேட்டை மேற்கு மாட வீதியில் அமைந்துள்ள கழிவுநீர் உந்து நிலையத்திற்கு செல்கிறது. பின்னர், அங்கிருந்து மின் மோட்டார் மூலம் உறிஞ்சப்பட்டு, மாட்டு மந்தை தெரு அருகே உள்ள பிரதான கழிவுநீரேற்று நிலையத்திற்கு செல்கிறது. காலடிப்பேட்டை கழிவுநீர் உந்து நிலையத்தில் பொருத்தப்பட்டுள்ள மின் மோட்டார் சக்திதிறன் குறைவாக இருப்பதால்ல குடியிருப்புகளில் இருந்து வரக்கூடிய கழிவுநீரை விரைவாக உறிஞ்ச முடியாமல் குழாய்களில்  தேங்குகிறது. மேலும், அடைப்பு காரணமாக மேன்ஹோல்கள் வழியாக கழிவுநீர் வெளியேறி சாலையில் வழிந்தோடுகிறது. அதுமட்டுமின்றி, வீடுகளின் கழிவறையில் இருந்து கழிவுநீர் வெளியேற முடியாமல் குளம்போல் தேங்குகிறது. இதுகுறித்து அதிகாரிகளிடம் புகார் செய்தால் தற்காலிக நடவடிக்கை மூலம் கழிவுநீரை அப்புறப்படுத்துகிறார்களே தவிர இப்பிரச்சினைக்கு நிரந்தர தீர்வு காண்பது இல்லை. எனவே, கழிவுநீர் உந்து நிலையத்தில் அதிக திறன் கொண்ட ராட்சத மோட்டாரை  பொருத்தவும், பாதாள சாக்கடையை முறையாக பராமரிக்கவும் சம்மந்தப்பட்ட அதிகாரிகள் உரிய நடவடிக்கை எடுக்க வேண்டும். இவ்வாறு தெரிவித்த         இதுகுறித்து மாநகராட்சி அதிகாரிகள் கூறுகையில், ‘காலடிப்பேட்டை மேற்கு மாட வீதியில் உள்ள கழிவுநீர் உந்து நிலையத்தில் அதிக சக்தி கொண்ட ராட்சத மோட்டார் புதியதாக இணைத்துள்ளோம். மேலும், தற்போது பிரச்னையாக உள்ள பகுதியில் பல குடியிருப்புகள் தாழ்வாக உள்ளதால் கழிவுநீர் செல்ல முடியாமல் தேங்கி நிற்கிறது. இருப்பினும் பாதாள சாக்கடை அடைப்பு ஏற்படும்போது அதை சரி செய்வதோடு, அடிக்கடி லாரிகள் மூலம்  கழிவு நீரை அப்புறப்படுத்தி வருகிறோம்,’ என்றனர்.

சிறுமியிடம் சில்மிஷம் முதியவருக்கு 10 ஆண்டு சிறை

சென்னை: அமைந்தகரை பகுதியை சேர்ந்தவர் நீலா  (பெயர் மாற்றப்பட்டுள்ளது). இவர், வாடகை வீட்டில் வசித்து வருகிறார். இவரது 4 வயது மகள், கடந்த 2018ம் ஆண்டு மே மாதம், வீட்டின் வெளியே விளையாடிய போது, திடீரென மாயமானாள். அக்கம் பக்கத்தில் தேடியபோது, வீட்டு உரிமையாளர் ஜெய்லாபுதீன் (72) வீட்டில் இருந்து சிறுமி அழும் சத்தம் கேட்டுள்ளது. அங்கு  சென்றபோது, முதியவர் சிறுமியிடம் தவறாக நடந்தது தெரியவந்தது. சிறுமியை மீட்ட நீலா, இதுபற்றி அண்ணாநகர் அனைத்து மகளிர் காவல் நிலையத்தில் புகார் அளித்தார். போலீசார், போக்சோ சட்டத்தின் கீழ் வழக்கு பதிவு செய்து, ஜெய்லாபுதீனை கைது செய்து குற்றப்பத்திரிகை தாக்கல்செய்தனர். இந்த வழக்கு மகளிர் நீதிமன்ற நீதிபதி மஞ்சுளா முன்பு விசாரணைக்கு வந்தது. அப்போது அரசு வக்கீல் ஸ்ரீலேகா ஆஜராகி வாதிட்டார். அப்போது, ஜெய்லாபுதீன் பாலியல் தொல்லை கொடுத்தது நிரூபிக்கப்பட்டதால், அவருக்கு 10 ஆண்டு சிறை தண்டனையும், ₹5 ஆயிரம் அபராதமும் விதித்து நீதிபதி உத்தரவிட்டார்.

கால் டாக்சியில் பயணித்த அரசு ஊழியரிடம் 10 சவரன் திருட்டு: டிரைவரிடம் விசாரணை

சென்னை: தாம்பரம் அடுத்த ஊரப்பாக்கம் ேராகிணி நகரை சேர்ந்தவர் நடராஜன் (63). ஓய்வு பெற்ற அரசு ஊழியர். இவரது மகள் திருமணம், கடந்த வாரம் விருகம்பாக்கம் வேம்புலியம்மன் கோயில் தெருவில் உள்ள மண்டபத்தில் நடந்தது. திருமணம் முடந்த பிறகு நடராஜன் தனது வீட்டிற்கு செல்வதற்காக கால் டாக்சி பிடித்து, அதில் பொருட்களை ஏற்றினார். அப்போது, 10 சவரன் நகை உள்ள பெட்டியை கார் டிரைவர் முருகனிடம் கொடுத்து பத்திரமாக வைக்கும்படி கூறியதாக தெரிகிறது.பின்னர், வீட்டிற்கு வந்த நடராஜன், திருமண வேலை பரபரப்பு காரணமாக நகை பெட்டியை திறந்து பார்க்கவில்லை என்று தெரிகிறது. நேற்று முன்தினம் காலை நகைப்பெட்டியை திறந்து பார்த்தபோது, அதில் இருந்த 10 சவரன் நகை மாயமானமாது கண்டு அதிர்ச்சி அடைந்தார்.  இதையடுத்து விரும்பாக்கத்தில் உள்ள திருமண மண்டபத்தில் பொருத்தப்பட்டுள்ள சிசிடிவி கேமரா பதிவுகளை ஆய்வு செய்தபோது, அதில் கால்டாக்சி டிரைவர் முருகன், நகை பெட்டியை வாங்குவதும், பின்னர் அவர் வெளியே சென்று திரும்புவதும் பதிவாகி இருந்தது.இதனால் முருகன் மீது சந்தேகம் இருப்பதாக விருகம்பாக்கம் காவல் நிலையத்தில் நடராஜ் புகார் அளித்தார்.போலீசார் வழக்குப்பதிவு செய்து சம்மந்தப்பட்ட கால் டாக்சி டிரைவர் முருகனிடம் விசாரணை நடத்தி வருகின்றனர்.

சிகிச்சை பெற்று திரும்பியபோது விமான நிலையத்தில் பீகார் வாலிபர் சாவு: தந்தை கண்முன் பரிதாபம்

மீனம்பாக்கம்: வேலூரில் மருத்துவ சிகிச்சை பெற்று சொந்த ஊர் திரும்பிய பீகார் வாலிபர், விமான நிலையத்தில் மயங்கி விழுந்து பலியான சம்பவம் பரபரப்பை ஏற்படுத்தியது. பீகார் மாநிலம் பாட்னாவை சேர்ந்தவர் ரமேஷ்வரார்.  இவரது மகன் ராஜீவ்குமார் (22). இவருக்கு  வயிற்றில் கட்டி மற்றும் கல்லீரல்  பாதிப்பு இருந்தது. அங்குள்ள பல்வேறு மருத்துவமனைகளில் சிகிச்சை பெற்றும் அவருக்கு குணமாகவில்லை. இதனால், கடந்த 15 நாட்களுக்கு முன் ரமேஸ்வரார் தனது மகன் ராஜீவ்குமாரை பாட்னாவில் இருந்து விமானம் மூலம் சென்னைக்கு அழைத்து வந்தார். பின்னர், வேலூரில் உள்ள ஒரு மருத்துவமனையில் அனுமதிக்கப்பட்டு  15 நாட்கள் தொடர் சிகிச்சை அளிக்கப்பட்டது.  சிகிச்சை முடிந்து நேற்று காலை அவரை மருத்துவமனையில் இருந்து டிஸ்சார்ஜ் செய்தனர். இதையடுத்து, தந்தை, மகன் இருவரும் சொந்த  ஊரான பாட்னாவுக்கு புறப்பட்டனர்.   சென்னை விமான நிலையம் வந்த இவர்கள், பிற்பகல் 2.34 மணிக்கு பாட்னா செல்லும் தனியார் விமானத்தில்  செல்ல  டிக்கெட் எடுத்திருந்தனர். பின்னர், போர்டிங் பாஸ் எடுத்து விமானத்துக்காக காத்திருந்தனர்.  அப்போது ராஜீவ்குமார் திடீரென மயங்கி விழுந்தார். இதை பார்த்து  ரமேஷ்வரார் அதிர்ச்சியடைந்தார்.தகவலறிந்து, விமான நிலைய மருத்துவ குழுவினர் விரைந்து வந்து ராஜீவ்குமாரை   பரிசோதனை  செய்தனர். அப்போது, கடுமையான மாரடைப்பால் ராஜீவ்குமார் இறந்துவிட்டதாக மருத்துவர்கள் கூறினார். விமான நிலைய போலீசார், ராஜீவ்குமார் உடலை கைப்பற்றி பிரோத பரிசோதனைக்காக குரோம்பேட்டை அரசு மருத்துவமனைக்கு அனுப்பினர். பீகாரில் இருந்து மருத்துவ சகிச்சைக்கு வந்தவர் சென்னை விமான நிலையத்தில் இறந்த சம்பவம் பெரும் சோகத்தை ஏற்படுத்தியது.

ரயில் நிலையம், தண்டவாளத்தில் குப்பை கொட்டினால் அபராதம்: தெற்கு ரயில்வே எச்சரிக்கை

சென்னை: தண்டவாளம் மற்றும் ரயில் நிலைய வளாகத்தில் குப்பை கொட்டினால் அபராதம் வசூலிக்க தெற்கு ரயில்வே நிர்வாகம் முடிவு செய்துள்ளதாக அதிகாரிகள் தெரிவித்துள்ளனர். சென்னை சென்ட்ரல், கடற்கரை, எழும்பூர், தாம்பரம், கிண்டி, மாம்பலம் உள்ளிட்ட ரயில் நிலையங்களில் தினசரி ஆயிரக்கணக்கான பயணிகள் வந்து செல்கின்றனர். முக்கிய ரயில் நிலையங்களில் குடிநீர், கழிப்பறை, இருக்கைகள் உள்ளிட்ட அடிப்படை வசதிகளை முறையாக பராமரிக்க வேண்டும். ஆனால், பல ரயில் நிலையங்களில் குடிநீர், கழிவறை வசதிகள் முறையாக இருப்பதில்லை. ரயில் நிலையங்களை தூய்மையாக வைத்திருக்க துப்புரவு பணியாளர்கள் நியமிக்கப்பட்டாலும், பல ரயில் நிலையங்கள் மற்றும் தண்டவாள பகுதியில் குப்பை, கழிவுகள் மிகுந்து காணப்படுகிறது. குறிப்பாக, புறநகர் ரயில் நிலையங்கள் மற்றும் தண்டவாளம் அருகே வீடுகள் அமைந்திருப்பதால், மேற்கண்ட வீடுகளில் இருந்து பலர் குப்பை, கழிவுகளை தண்டவாள பகுதியில் வீசி வருகின்றனர். குறிப்பாக, சென்னை கடற்கரை - தாம்பரம், செங்கல்பட்டு வழித்தடம், சென்னை சென்ட்ரல் - திருவள்ளூர், ஆவடி ஆகிய வழித்தடங்களில் உள்ள ரயில் நிலையங்கள் மற்றும் தண்டவாள பகுதிகளில் குப்பை கொட்டுபவர்களுக்கு அபராதம் விதிக்க ரயில்வே நிர்வாகம் முடிவு செய்துள்ளது.  அதேபோல், புறநகர் ரயில் நிலையங்களில் குடிநீர், கழிவறை உள்ளிட்ட அடிப்படை தேவைகளை நிறைவேற்றவும் முடிவு செய்யப்பட்டுள்ளது. ரயில் நிலையங்கள் தூய்மையாக பராமரிக்கப்படுகிறதா என்பதை கண்காணிக்கவும், ரயில் தண்டவாளத்தில் குப்ைப கொட்டுபவர்களை கண்காணித்து அபராதம் விதிக்கவும் குழு அமைக்கப்பட்டுள்ளது, என ரயில்வே அதிகாரிகள் தெரிவித்துள்ளனர்.

சுவரில் துளையிட்டு டாஸ்மாக் கடையில் நுழைந்து 25,000 மதுபானம் கொள்ளை: 1 லட்சம் ரொக்கம் தப்பியது

புழல்: புழல் அடுத்த சோழவரம் - ஆத்தூர் பைபாஸ் சாலையில் டாஸ்மாக் கடை உள்ளது. நேற்று முன்தினம் வியாபாரம் முடிந்ததும், கடையை பூட்டி விட்டு விற்பனையாளர் ரமேஷ் (45), மேற்பார்வையாளர் ரமேஷ் ஆகியோர் வீடுட்டுக்கு சென்றனர்.இந்நிலையில், நேற்று அதிகாலை சோழவரம் போலீசார் ரோந்து சென்றபோது, டாஸ்மாக் கடையின் சுவரில் துளையிட்டு இருப்பதை கண்டனர். உடனே கடையின் விற்பனையாளர் மற்றும் மேலாளருக்கு தகவல் தெரிவித்தனர்.அவர்கள், சம்பவ இடத்துக்கு வந்து பார்த்தபோது, ₹25 ஆயிரம் மதிப்பிலான மதுபானங்கள் கொள்ளை போயிருந்தது தெரிந்தது. கல்லாவை திறக்க முடியாததால், அதில் வைத்திருந்த ₹1 லட்சம் ரொக்கம் தப்பியது.இதுகுறித்த புகாரின் பேரில் சோழவரம் போலீசார் வழக்கு பதிவு செய்து மர்ம நபர்களை தேடி வருகின்றனர்.

பெற்றோர் திட்டியதால் மாயமான சிறுவர்கள் மீட்பு

அண்ணாநகர்: முகப்பேர் கிழக்கு ஜானகி கார்டன் சர்ச் சாலையை சேர்ந்தவர் செந்தில்குமார் (43). இவரது மகன்கள் சந்தோஷ் (எ) பழனியப்பன் (16), சஞ்ஜய் சரவணன் (15). இவர்கள் அதே பகுதியில் உள்ள பள்ளியில் பிளஸ் 1 மற்றும் 10ம்  வகுப்பு படித்து வருகிறார்கள். இந்நிலையில், இவர்கள் இருவரும் சரியாக படிக்கவில்லை என்று, கடந்த 10ம் தேதி செந்தில்குமார் கண்டித்துள்ளார். இதனால், மனமுடைந்த சந்தோஷ், சஞ்ஜய் ஆகிய இருவரும், தந்தையின் ஏடிஎம் கார்டு மற்றும் இருசக்கர வாகனத்தை எடுத்துக் கொண்டு வீட்டை விட்டு வௌியேறினர்.பெற்றோர் பல இடங்களில் தேடியும் மகன்கள் கிடைக்காததால் செந்தில்குமார் இதுகுறித்து ஜெ.ஜெ.நகர் காவல் நிலையத்தில் புகார் கொடுத்தார். போலீசார் வழக்குப் பதிவு செய்து சிறுவர்களை தேடி வந்தனர். இந்நிலையில், புதுக்கோட்டையில் உறவினர் வீட்டில் சிறுவர்கள் இருப்பதாக தகவல் கிடைத்தது. அங்கு சென்ற போலீசார், சிறுவர்களை மீட்டு நேற்று மதியம் ஜெ.ஜெ.நகர் காவல் நிலையத்திற்கு அழைத்து வந்தனர். பின்னர், அவர்களின் தந்தை செந்தில்குமாரை வரவழைத்து சிறுவர்களை ஒப்படைத்தனர்.

ஜார்ஜ் டவுன் வக்கீல்கள் சங்க தேர்தலில் விதிமீற கூடாது: தமிழ்நாடு பார்கவுன்சில் எச்சரிக்கை

சென்னை:  ஜார்ஜ் டவுன் நீதிமன்ற வக்கீல்கள் சங்கத்தின் தேர்தல் கடந்த ஏப்ரல் 5ம் தேதி நடக்க இருந்தது. இந்த தேர்தலில் செயலாளர் பதவிக்கு போட்டியிடுவதற்காக எம்.ஆறுமுகம் வேட்புமனு தாக்கல் செய்தார். ஆனால், அவர் வக்கீல் தகுதித் தேர்வில் தேர்ச்சி பெறாததால் சஸ்பெண்ட் செய்யப்பட்டதால் பதிவு மூப்பு இல்லை என்று கூறி தேர்தல் அதிகாரிகள் அவரது வேட்புமனுவை நிராகரித்தனர். இதை எதிர்த்து, தமிழ்நாடு பார்கவுன்சிலில் ஆறுமுகம் மனுதாக்கல் செய்தார். அதில், 2010க்கு பிறகு வக்கீலாக பதிவு செய்தவர்களில் தகுதித் தேர்வில் வெற்றிபெறாதவர்களை சஸ்பெண்ட் செய்து தமிழ்நாடு பார்கவுன்சில் 2015 செப்டம்பரில் உத்தரவிட்டது. கடந்த 2016 ஜூனில் நடந்த தகுதித் தேர்வில் வெற்றி பெற்றேன். இதனால் என்னை சஸ்பெண்ட் செய்த உத்தரவு தானாகவே ரத்தாகிவிட்டது. எனது பதிவு மூப்பும் தொடர்கிறது. எனவே, என்னை தேர்தலில் போட்டியிட அனுமதிக்குமாறு உத்தரவிட வேண்டும் என்று கோரியிருந்தார்.இந்த மனுவை தமிழ்நாடு பார்கவுன்சில் பதிவுக்குழு உறுப்பினர்கள் மூத்த வக்கீல் ஆர்.சிங்காரவேலன், வக்கீல் என்.சந்திரசேகர் ஆகியோர் விசாரித்து அளித்த உத்தரவு வருமாறு:மனுதாரர் ஆறுமுகம் தகுதித் தேர்வை எழுதாததால் வக்கீல் தொழில் செய்ய இடைக்கால தடை விதிக்கப்பட்டது. ஆனால், 9 மாதத்தில் அவர் தகுதித் தேர்வில் வெற்றிபெற்றுள்ளார். எனவே, அவரை தொழில் செய்ய இடைநீக்கம் செய்தது ரத்து செய்யப்படுகிறது. குறுகிய கால இடைவெளிக்குள் அவர் தேர்வில் வெற்றி பெற்றுள்ளதால் அவரது சங்க பதிவு மூப்பு தொடர்கிறது. எனவே, அவர் ஜார்ஜ் டவுன் வக்கீல்கள் சங்கத் தேர்தலில் போட்டியிட அனுமதிக்க வேண்டும். விசாரணையின்போது தேர்தல் தேதி ஜூன் 7ம் தேதிக்கு மாற்றம் செய்து உத்தரவிடப்பட்டுள்ளது. எனவே, தேர்தலை நடத்த நியமிக்கப்பட்ட தேர்தல் அதிகாரிகள்  ஜூன் 7ம் தேதிக்குள் தேர்தலை நடத்த வேண்டும். தேர்தலில் வாக்களிக்க 422 பேருக்கு தகுதி உள்ளது. எனவே, இறுதி வாக்காளர் பட்டியலில் புதிய வாக்காளர்களை சேர்க்கவோ, வாக்காளரை பட்டியலில் இருந்து நீக்கவோ கூடாது. தேர்தல் அமைதியான முறையில் நடத்தப்பட வேண்டும். பேனர்கள், போஸ்டர்கள், துண்டுபிரசுரங்கள் நீதிமன்ற வளாகத்திற்குள்ளோ, நீதிமன்றத்தை சுற்றியோ இருக்க கூடாது. இதை மீறி செயல்படுபவர்கள் மீது கடும் நடவடிக்கை எடுக்கப்படும்.  மிகவும் பழமையான இந்த சங்கத்தின் தேர்தலை அமைதியாக நடத்தி மற்ற சங்கங்களுக்கு முன்னுதாரணமாக திகழ வேண்டும் என்று நம்புகிறோம். தேர்தல் தொடர்பான அறிக்கையை ஜூன் 8ம் தேதி பார்கவுன்சிலில் தாக்கல் செய்ய வேண்டும். இவ்வாறு உத்தரவில் கூறப்பட்டுள்ளது.