Cuddalore - Dinakaran

இளம்பெண் மாயம்

திருவெண்ணெய்நல்லூர், மே 24: திருவெண்ணெய்நல்லூர் அடுத்துள்ள கிராமத்தை சேர்ந்த இளம் பெண் ஒருவர், ஏனாதிமங்கலம் கிராமத்தில் உள்ள அரசு பள்ளியில் 12ம் வகுப்பு படித்து அரசு பொதுதேர்வில் தோல்வியடைந்துள்ளார். இந்நிலையில், சம்பவத்தன்று நர்சிங் கல்லூரி சேர்க்கைக்காக சென்று வருவதாக வீட்டில் கூறிவிட்டு சென்றவர் பல மணிநேரம் ஆகியும் வீடு திரும்பவில்லை. இதையடுத்து அவரது பெற்றோர் பல இடங்களில் தேடியும் கிடைக்காததால் அவரது தாய் திருவெண்ணெய்நல்லூர்போலீசில் புகார் கொடுத்துள்ளார். அதன்பேரில் இன்ஸ்பெக்டர் ஜெயலட்சுமி வழக்கு பதிவு செய்து விசாரணை நடத்தி வருகிறார்.

மணல் திருட்டை தடுக்க போலீசார் நடவடிக்கை

பண்ருட்டி, மே 24: பண்ருட்டி அருகே கரும்பூர், அக்கடவல்லி, எனதிரிமங்கலம் உள்ளிட்ட பல்வேறு கிராமங்களில் அரசு அனுமதியின்றி மணல் எடுக்கப்பட்டு வருகிறது. கடலூர் மாவட்ட எஸ்பி சரவணன் உத்தரவின் பேரில் ஏற்கனவே கெடிலம் ஆற்றில் 3 இடங்களிலும்,  கண்டரக்கோட்டையில் 3 இடங்களிலும் பள்ளம் தோண்டி மணல் கடத்தலை தடுக்க நடவடிக்கை எடுக்கப்பட்டது. தற்போது பண்ருட்டி அருகே அக்கடவல்லி கிராமத்தில் உள்ள தென்பெண்ணை ஆற்றில் 2  இடங்களில் பொக்லைன் இயந்திரம் மூலம் பள்ளம் ேதாண்டி மணல் திருட்டை தடுக்க நடவடிக்கை எடுத்தனர்.

விபத்தில் வாலிபர் பலி

வானூர், மே 24: புதுச்சேரி அருகே அரும்பார்த்தபுரம் பகுதியை சேர்ந்தவர் பன்னீர்செல்வம் (35). இவர் காரில் சென்ைன சென்றுவிட்டு நேற்று அதிகாலை 3 மணியளவில் வீட்டுக்கு திரும்பி வந்து கொண்டிருந்தார். அப்போது விழுப்புரம் மாவட்டம் வானூர் தாலுகா துருவை கிராமம் அருகே புறவழிச்சாலையில் வந்தபோது, கட்டுப்பாட்டை இழந்த கார் சாலையில் கவிழ்ந்தது. இதில் பன்னீர்செல்வம் படுகாயம் அடைந்து சம்பவ இடத்திலேயே இறந்துவிட்டார். தகவல் அறிந்த வானூர் போலீசார் சம்பவ இடத்துக்கு சென்று சடலத்தை கைப்பற்றி பிரேத பரிசோதனைக்காக புதுச்சேரி ஜிப்மர் மருத்துவமனைக்கு அனுப்பி வைத்தனர். மேலும் விபத்து குறித்து வழக்கு பதிவு செய்து விசாரணை நடத்தி வருகின்றனர்.

சாலையில் லாரி கவிழ்ந்து விபத்து ₹1 லட்சம் முட்டைகள் உடைந்து சேதம்

உளுந்தூர்பேட்டை, மே 24: நாமக்கல் மாவட்டத்தில் இருந்து முட்டை லோடு ஏற்றிக்கொண்டு ஒரு லாரி சென்னை நோக்கி வந்து கொண்டிருந்தது. நேற்று உளுந்தூர்பேட்டை அடுத்த ஒலையனூர் என்ற இடம் அருகே வந்து கொண்டிருந்தபோது, திடீரென லாரியின் முன்பக்க டயர் வெடித்து விபத்துக்குள்ளானது. இதனால் லாரி நடுரோட்டில் கவிழ்ந்து விபத்துக்குள்ளானது. இதில் லாரியை ஓட்டி வந்த கண்ணன் லேசான காயத்துடன் உயிர் தப்பினார். லாரியில் வந்த ரூ.ஒரு லட்சம் மதிப்பிலான முட்டைகள் நடுரோட்டில் கீழே விழுந்து உடைந்து சேதமானது. இந்த விபத்தால் சேலம்-உளுந்தூர்பேட்டை தேசிய நெடுஞ்சாலையில் போக்குவரத்து பாதிப்பு ஏற்பட்டது. தகவல் அறிந்து சம்பவ இடத்துக்கு வந்த உளுந்தூர்பேட்டை போலீசார், விபத்துக்குள்ளான லாரியை அங்கிருந்து அப்புறப்படுத்தி போக்குவரத்தை சரி செய்தனர். முட்டை லோடு ஏற்றி வந்த லாரி உளுந்தூர்பேட்டை பகுதியில் கவிழ்ந்து விபத்துக்குள்ளானது அறிந்த அப்பகுதியை சேர்ந்த சிலர் உடைந்த முட்டைகள் மட்டுமன்றி லேசாக உடைப்பு ஏற்பட்ட முட்டைகளையும் அள்ளிச் சென்றனர்.

அனுமதியில்லாத குடிநீர் இணைப்புகள் துண்டிப்பு

பண்ருட்டி, மே 24:  பண்ருட்டி  அருகே விசூர், மேல்மாம்பட்டு, குடியிருப்பு உள்ளிட்ட பல்வேறு கிராமங்களில்  நேற்று முன்தினம் வட்டார வளர்ச்சி அலுவலர் சீனுவாசன் தலைமையில் கொண்ட   குழுவினர் ஆய்வு மேற்கொண்டனர். அப்போது ஊராட்சியில் அனுமதிபெறாமல்  குடிநீர் இணைப்புகள் இருப்பதை அறிந்து அவற்றை துண்டிக்குமாறு  சம்பந்தப்பட்ட ஊழியர்களுக்கு பிடிஓ உத்தரவிட்டார். இதன் பேரில்அனுமதி பெறாத 45  இணைப்புகள் துண்டிக்கப்பட்டது. அப்போது, துணை வட்டார வளர்ச்சி  அலுவலர் சந்தோஷ்குமார், தமிழ்செல்வி, ஊராட்சி  செயலாளர் இளவரசன், வடிவேல்  உள்ளிட்டோர் உடனிருந்தனர்.போக்குவரத்துக்கு இடையூறாக சுற்றித் திரியும் கால்நடைகள்நெய்வேலி, மே 24: நெய்வேலி நகர பகுதி சாலைகளில் சுற்றித்திரியும் மாடுகளால் பலர் விபத்தில் சிக்கி காயமடைந்து வருகின்றனர். நெய்வேலி டவுன்ஷிப் பகுதியை சுற்றி 10க்கும் மேற்பட்ட கிராமங்களை சேர்ந்த மக்கள் தங்களது வீடுகளில் கால்நடைகளை வளர்த்து வருகின்றனர். மாடுகள் உள்ளிட்ட கால்நடைகளை பகல் மற்றும் இரவு நேரங்களில் முறையாக பராமரிக்காமல் அவிழ்த்து விட்டு விடுகின்றனர். இதனால் சாலைகளில் உள்ள புல்களுக்காக மாடுகள் மேய்ச்சலுக்கு வருகிறது. இவைகள் சாலைகளில் சுற்றித்திரிவதால் வாகன போக்குவரத்துக்கு இடையூறு ஏற்படுகிறது. மேலும், மாடுகள் சண்டையிட்டு இருசக்கரம் மற்றும் நான்கு சக்கர வாகனங்கள் மீது மோதி விபத்து ஏற்படுகிறது. இதில் பலர் கீழே விழுந்து காயமடைந்து வருகின்றனர்.எனவே சாலையில் சுற்றித்திரியும் மாடுகளை பிடித்து பட்டியில் அடைக்கவும், உரிமையாளர்களுக்கு உரிய விழிப்புணர்வு ஏற்படுத்தவும் நெய்வேலி நகர நிர்வாக அதிகாரிகள் நடவடிக்கை எடுக்க வேண்டும் என்று சமூக நல ஆர்வலர்கள் கோரிக்கை விடுத்துள்ளனர்.

கட்சி கொடி கட்டி சென்றதை தட்டிக்கேட்டதால் இன்ஸ்பெக்டரை மிரட்டிய அமைச்சரின் கார் டிரைவர்

கடலூர், மே 24: கடலூர் தேவனாம்பட்டினம் வாக்கு எண்ணும் மையம் அருகே காரில் கட்சி கொடி கட்டி சென்றதை தட்டிக்கேட்ட இன்ஸ்பெக்டர் உள்ளிட்ட போலீசாரை உள்ளூர் அமைச்சரின் கார் டிரைவர் மிரட்டியதால் பரபரப்பு ஏற்பட்டது.கடலூர் நாடாளுமன்ற தொகுதி வாக்கு எண்ணிக்கை கடலூர் தேவனாம்பட்டினம் பெரியார் அரசு கலைக் கல்லூரியில் நேற்று காலை 8 மணிக்கு தொடங்கி நடைபெற்றது. வாக்கு எண்ணும் மையத்தை சுற்றி 3 அடுக்கு பாதுகாப்பு போடப்பட்டிருந்தது. அசம்பாவிதங்களை தடுக்க மையத்தை நோக்கி கட்சி கொடிகளுடன் வாகனங்கள் செல்வதற்கு தடை விதித்து மாவட்ட தேர்தல் அலுவலரும் ஆட்சியருமான அன்புச்செல்வன் உத்தரவிட்டிருந்தார். இந்நிலையில் நேற்றுகாலை, வாக்கு எண்ணும் மையம் அமைந்துள்ள கடற்கரை சாலை பகுதியில் உள்ள வண்ணாரப்பாளையம் நான்குமுனை சந்திப்பில் கடலூர் புதுநகர் இன்ஸ்பெக்டர் சுதாகர் தலைமையில் போலீசார் பாதுகாப்பு மற்றும் கண்காணிப்பு பணிகளில் ஈடுபட்டிருந்தனர். அப்போது அந்த வழியாக தொழில் துறை அமைச்சர் எம்.சி.சம்பத்தின் கார் கட்சி கொடியுடன் வேகமாக சென்றது. அப்போது அந்த காரில் அமைச்சர் இல்லை. இந்நிலையில் கட்சி கொடியுடன் வந்த காரை இன்ஸ்பெக்டர் மற்றும் போலீசார் தடுத்து நிறுத்தினர். அப்போது காருக்குள் இருந்த டிரைவர், இது அமைச்சர் கார், எப்படி தடுக்கலாம்? என்று கேட்டு தரக்குறைவாக பேசியதுடன், இன்ஸ்பெக்டர் மற்றும் போலீசாரை மிரட்டி விட்டு வேகமாக காரை வாக்கு எண்ணும் மையத்தை நோக்கி ஓட்டிச் சென்றதாக கூறப்படுகிறது. திரும்பிச் செல்லும் போதும் அமைச்சருடைய கார் டிரைவர் காரை நிறுத்திவிட்டு மீண்டும் காவல்துறையினரை அசிங்கமாக திட்டியுள்ளார். இந்த சம்பவம் காவல்துறை மற்றும் பொதுமக்கள் மத்தியில் பரபரப்பையும், அதிருப்தியையும் ஏற்படுத்தியது.வாக்குப்பதிவு இயந்திரங்கள் பழுது: கடலூர் தேவனாம்பட்டினம் பெரியார் அரசு கலைக்கல்லூரியில் நடந்த கடலூர் நாடாளுமன்ற தொகுதி முதல் சுற்று வாக்கு எண்ணிக்கையில் குறிஞ்சிப்பாடி தொகுதிக்குட்பட்ட குமளங்குளம், நடுவீரப்பட்டு பகுதி 12, 13 பூத்களுக்குஉரிய மின்னணு வாக்குப்பதிவான இயந்திரங்கள் பழுதடைந்தன. இதனால் அங்கு சலசலப்பு ஏற்பட்டது.இதுகுறித்து மாவட்ட தேர்தல் நடத்தும் அலுவலரும் ஆட்சியருமான அன்புச்செல்வன் கவனத்துக்கு கொண்டு செல்லப்பட்டது. அவரது உத்தரவின் பேரில் 2 மின்னணு வாக்குப்பதிவு இயந்திரங்களையும் பொறியாளர்கள் ஆய்வு செய்தனர். பின்னர் அதில் ஏற்பட்ட பழுதுகள் சரிபார்க்கப்பட்டு வாக்கு எண்ணிக்கை நடைபெற்றது. வாக்குப்பதிவு இயந்திரங்கள் பழுதடைந்த சம்பவத்தால் அப்பகுதியில் சிறிது நேரம் பரபரப்பு ஏற்பட்டது.

சிறுமியை பலாத்காரம் செய்த முதியவர் போக்சோ சட்டத்தில் கைது

சிதம்பரம், மே 23: சிதம்பரம் அருகே 5 வயது சிறுமியை பாலியல் பலாத்காரம் செய்த முதியவர் போக்சோ சட்டத்தில் கைது செய்யப்பட்டுள்ளார். இச்சம்பவம் அப்பகுதியில் பரபரப்பை ஏற்படுத்தி உள்ளது. கடலூர் மாவட்டம் சிதம்பரம் அருகே உள்ள வரகூர்பேட்டை வள்ளுவர் தெருவை சேர்ந்தவர் ரவி (60), விவசாய கூலி தொழிலாளி. இவர் சீர்காழி அருகே உள்ள ஒரு கிராமத்தை சேர்ந்த 5 வயது சிறுமியை பாலியல் பலாத்காரம் செய்ததாக கூறப்படுகிறது. இதுபற்றி சிறுமியின் உறவினர் சிதம்பரம் அனைத்து மகளிர் காவல் நிலையத்தில் புகார் கொடுத்தார். அதன்பேரில் இன்ஸ்பெக்டர் கிருஷ்ணவேணி, சப்-இன்ஸ்பெக்டர் லூசி ஆகியோர் வழக்கு பதிந்து போக்சோ சட்டத்தின் கீழ் ரவியை கைது செய்தனர். ஐந்து வயது சிறுமியை முதியவர் பாலியல் பலாத்காரம் செய்துள்ள சம்பவம் அப்பகுதியில் பரபரப்பை ஏற்படுத்தி உள்ளது.

தவறி விழுந்து ஜோதிடர் சாவு

சிதம்பரம், மே 23: கடலூர் மாவட்டம் விருத்தாசலம் வட்டம் சாத்துக்கூடல் மேல்பாதி பகுதியை சேர்ந்த வரதராஜன் (50). இவர் சிதம்பரம் அருகே உள்ள வல்லம்படுகையில் வாடகைக்கு அறை எடுத்து ஜோதிடம் பார்த்து வந்துள்ளார். நேற்று முன்தினம் இவர் குடிபோதையில் மாடிப்பறி ஏறியபோது எதிர்பாராதவிதமாக தவறி கீழே விழுந்துள்ளார். இதில் பலத்த காயமடைந்த அவர் சம்பவ இடத்திலேயே பரிதாபமாக இறந்தார். இதுபற்றி அவரது மனைவி தமிழ்ச்செல்வி அண்ணாமலை நகர் போலீசில் புகார் செய்தார். அதன்பேரில் சப்-இன்ஸ்பெக்டர் ரங்கராஜன் மற்றும் போலீசார் வழக்கு பதிந்து விசாரணை நடத்தி வருகின்றனர்.

பைக் மாயம்

ரிஷிவந்தியம், மே 23: ரிஷிவந்தியம அடுத்த மேலபழங்கூர் கிராமத்தை சேர்ந்தவர் அய்யாவு மகன் குருசாமி(42). இவர் சிறுபனையூர் தக்கா ரேஷன் கடையில் விற்பனையாளராக பணியாற்றி வருகிறார். இந்நிலையில், சம்பவத்தன்று அத்தியூர் சந்தை பகுதியில் தனது இருசக்கர வாகனத்தை நிறுத்தி விட்டு அருகே உள்ள டீ கடையில் டீ குடித்துவிட்டு வந்து பார்க்கும்போது பைக்கை காணவில்லை.இது குறித்து பகண்டைகூட்ரோடு காவல் நிலையத்தில் குருசாமி கொடுத்த புகாரின்பேரில் போலீசார் வழக்கு பதிந்து விசாரணை நடத்தி வருகின்றனர்.

மருந்து மாத்திரைகள் இருப்பில் வைக்க வேண்டும்

மரக்காணம், மே 23: மரக்காணம் மற்றும் சுற்றுப்புற பகுதியில் 50க்கும் மேற்பட்ட கிராமங்கள் உள்ளன. இதில் இரண்டு லட்சத்துக்கும் மேற்பட்ட மக்கள் வசிக்கின்றனர். இவர்களில் பெரும்பாலானோர் விவசாயிகள், மீனவர்கள், உப்பு தொழிலாளர்கள் மற்றும் கூலி தொழிலாளர்கள். இங்குள்ள பொதுமக்கள் இரவு நேரங்களில் காய்ச்சல், விஷ ஜந்துக்கள் கடித்தல் போன்றவற்றால் பாதிக்கப்பட்டால் உடனடியாக மரக்காணம் அரசு பொது மருத்துவ மனைக்குத்தான் வரவேண்டும். இப்பகுதி கிழக்கு கடற்கரை சாலை ஓரம் அமைந்துள்ளது. இதனால் இப்பகுதியில் அடிக்கடி சாலை விபத்துகள் ஏற்படுகிறது. மீன் பிடிக்க கடலுக்கு செல்லும் மீனவர்களும் கடலில் பைபர் படகுகள் கவிழ்ந்து விபத்துக்குள்ளாகின்றனர். இவர்களை சிகிச்சைக்காக இங்குள்ள அரசு பொது மருத்துவமனைக்குத்தான் அழைத்து வருகின்றனர். ஆனால் இந்த மருத்துவமனையில் பகல் நேரத்தில் மட்டுமே டாக்டர்கள் இருக்கின்றனர். இரவு நேரத்தில் டாக்டர்கள் இருப்பதில்லை. இரவு நேரங்களில் நர்ஸ்கள் மட்டுமே இருக்கின்றனர். மேலும் இந்த மருத்துவமனையில் எக்ஸ்ரே, இசிஜி போன்ற கருவிகளும் இல்லை. பாதிக்கப்பட்டு இங்கு வரும் நோயாளிகளின் உறவினர்களுக்கும், மருத்துவமனை ஊழியர்களுக்கும் அடிக்கடி பிரச்னைகள் உண்டாகிறது. இது போன்ற பிரச்னைகளால் அடிக்கடி காவல் நிலையம் வரை செல்லும் நிலையும் உண்டாகிறது.இதன் காரணமாக இப்பகுதியில் விபத்துகளில் பாதிக்கப்படுபவர்களை புதுவை, திண்டிவனம் ஆகிய பகுதிகளில் இருக்கும் அரசு மற்றும் தனியார் மருத்துவ மனைகளுக்கு அழைத்து செல்லும் நிலை உள்ளது. தற்போது பெரும்பாலானவர்களுக்கு நீரிழிவு நோய், உயர் ரத்த அழுத்த நோய், இருதய நோய் உள்ளிட்டவைகள் உண்டாகிறது. இந்த நோய்களுக்கான மாத்திரைகளின் விலை அதிகம் என்பதால் நடுத்தர மற்றும் ஏழை குடும்பங்களை சேர்ந்தவர்கள் அரசு மருத்துவமனைகளில்தான் மருந்து, மாத்திரைகள் வாங்கும் கட்டாய நிலை உள்ளது. ஆனால் இந்த நோய்களுக்கு இங்குள்ள அரசு பொது மருத்துவமனையில் போதிய மருந்து மாத்திரைகள் இல்லை. எனவே, இப்பகுதி பொது மக்களின் நலன் கருதி இங்குள்ள அரசு பொது மருத்துவமனையில் இரவு நேரத்தில் 2 டாக்டர்களை நியமித்து 24 மணி நேரமும் இயங்கக் கூடிய அவசர சிகிச்சை மையம் அமைக்க அரசு உரிய நடவடிக்கை எடுக்க வேண்டும். அனைத்து வியாதிகளுக்கும் கொடுக்கக்கூடிய போதிய மருந்து மாத்திரைகளை உடனடியாக வழங்க மாவட்ட மருத்துவ நிர்வாகம் நடவடிக்கை எடுக்க வேண்டும் என்று பொதுமக்கள், சமூக ஆர்வலர்கள் கோரிக்கை வைத்துள்ளனர்.

மணல் கடத்திய மினிடெம்போ பறிமுதல்

திட்டக்குடி, மே 23:  ராமநத்தம் அருகே கீழ்கல்பூண்டி பகுதியில் உள்ள வெள்ளாற்றில் அனுமதியின்றி மணல் கடத்துவதாக வந்த தகவலின்பேரில் கிராம நிர்வாக அலுவலர் மாயவேல் இதுகுறித்து நடவடிக்கை எடுக்க ராமநத்தம் காவல் நிலையத்திற்கு தகவல் கொடுத்தார். அதன்பேரில் இன்ஸ்பெக்டர் புவனேஸ்வரி மற்றும் போலீசார் சம்பந்தப்பட்ட பகுதிக்கு வந்தனர். அப்போது அங்கு அனுமதியின்றி வெள்ளாற்றில் மணல் அள்ளிய சித்தூரை சேர்ந்த சுப்பிரமணியன் (40) என்பவர் போலீசாரை பார்த்தவுடன் மினி டெம்போவை அங்கேயே விட்டுவிட்டு தப்பிவிட்டார். இதையடுத்து போலீசார் மினி டெம்போவை பறிமுதல் செய்து விசாரணை நடத்தி வருகின்றனர்.

வெற்றி பெறப்போவது யார்?

விழுப்புரம், மே 23: மக்களவை தேர்தல் வாக்கு எண்ணிக்கை இன்று நடக்கிறது. விழுப்புரம், கள்ளக்குறிச்சியில் வெற்றி பெறப் போவது யார் என்ற முடிவு பிற்பகலிலேயே தெரிவதற்கு வாய்ப்புள்ளது. இருப்பினும் ஒப்புகை சீட்டு எண்ணப்படுவதால் வாக்கு எண்ணிக்கை இரவு 12 மணி வரை நீடிக்கலாம் என ஆட்சியர் சுப்ரமணியன் தெரிவித்துள்ளார். மக்களவை தேர்தல் நடக்கும் தேதிகளை கடந்த மார்ச் 10ம் தேதி தலைமை தேர்தல் ஆணையம் அறிவித்தது. அதன்படி நாடு முழுவதும் கடந்த ஏப்ரல் மாதம் 11ம் தேதி முதல் கடந்த 19ம் தேதி வரை 7 கட்டங்களாக மக்களவை தேர்தலுக்கான வாக்குப்பதிவு நடந்தது. தமிழகத்தில் வேலூரை தவிர்த்து 38 மக்களவை தொகுதிகளுக்கான வாக்குப்பதிவும், 18 சட்டமன்ற தொகுதி இடைத்தேர்தலுக்கான வாக்குப்பதிவும் கடந்த மாதம் 18ம் தேதி ஒரே கட்டமாக நடத்தி முடிக்கப்பட்டது. விழுப்புரம் மாவட்டத்தில் விழுப்புரம், கள்ளக்குறிச்சி ஆகிய மக்களவை தொகுதிகளுக்கு தேர்தல் நடந்தது. மாவட்டம் முழுவதும் 11 சட்டமன்ற தொகுதிகளிலும் 3,227 வாக்குச்சாவடிகளில் வாக்குப்பதிவு நடந்தது. விழுப்புரம் மாவட்டம் முழுவதும் 77.96 சதவீதம் வாக்குகள் பதிவாகின. விழுப்புரம் மக்களவை தொகுதியில் மட்டும் 78.31 சதவீத வாக்குகள் பதிவாகின. மாவட்டம் முழுவதும் மொத்தமுள்ள வாக்காளர்களில் ஆண்கள் 13,48,376 பேர், பெண்கள் 13,46,064 பேர் என மொத்தம் 26,94,828 வாக்காளார்கள் உள்ளனர். அதில் 21,00,799 பேர் வாக்களித்துள்ளனர். அதில் ஆண்கள் 10,38,564 பேரும், பெண்கள் 10,62,102 பேரும் வாக்களித்துள்ளனர். ஆண்களை விட 23,568 பெண்கள் அதிகளவு வாக்களித்திருந்தனர். இதனிடையே மக்களவை தொகுதிகளில் பதிவான வாக்குகள் இன்று காலை 8 மணி முதல் எண்ணப்படுகிறது. முதலில் தபால் ஓட்டுகள் எண்ணப்படும். இதையடுத்து மின்னணு வாக்குப்பதிவு இயந்திரங்களில் பதிவான வாக்குகள் எண்ணப்படும். மக்களவை தொகுதிகளுக்கு உட்பட்ட சட்டமன்ற தொகுதிகளின் வாக்காளர்கள் எண்ணிக்கையை பொறுத்து 14 முதல் 22 மேஜைகள் போடப்பட்டு வாக்குகள் எண்ணப்பட உள்ளது. விழுப்புரம் மாவட்டத்தில் விழுப்புரம், கள்ளக்குறிச்சி ஆகிய இரண்டு மக்களவை தொகுதிகளில் வாக்கு எண்ணிக்கை நடக்கிறது. விழுப்புரம் தொகுதிக்கு விழுப்புரம் கீழ்பெரும்பாக்கம் அறிஞர் அண்ணா அரசு கலை கல்லூரியிலும், கள்ளக்குறிச்சி தொகுதிக்கு அங்குள்ள ஏகேடி கல்லூரியிலும் வாக்கு எண்ணிக்கை நடக்கிறது. வாக்கு எண்ணிக்கை மையத்தில் துணை ராணுவம், ஆயுதப்படை, உள்ளூர் போலீசார் என மூன்றடுக்கு போலீஸ் பாதுகாப்புகள் போடப்பட்டுள்ளது. வாக்கு எண்ணிக்கையின்போது வேட்பாளர்கள், முகவர்களுக்கு கடும் கட்டுப்பாடுகள் விதிக்கப்பட்டுள்ளன. செல்போன் கொண்டு செல்லக்கூடாது. அவர்களுக்கு கொடுக்கப்பட்டுள்ள பென்சில், பேப்பர் மட்டுமே உள்ளே கொண்டு செல்லலாம். ஒவ்வொரு சுற்று வாக்கு எண்ணிக்கையும் மேஜை வாரியாக ஒலிபெருக்கியில் அறிவிக்கப்படும். ஒவ்வொரு சுற்று முடிவிலும் சட்டமன்ற தொகுதி வாரியாக வேட்பாளர்கள் பெற்ற வாக்குகள் பற்றிய விவரங்கள் அறிவிப்பு பலகையில் எழுதி வைக்கப்படும்.சுற்றுவாரியாக பெற்ற வாக்குகள் விவரம் அடங்கிய நகல் வேட்பாளர்களுக்கும், அவர்களுடைய முகவர்களுக்கும் அளிக்கப்படும். முதல் சுற்று முடிவுகள் சுமார் 10 மணி அளவில் தெரியவரும். பிற்பகல் முன்னணியில் இருக்கும் வேட்பாளர்களின் நிலவரம் தெரியவரும். மாலை பெரும்பாலான தொகுதிகளில் வெற்றி நிலவரம் தெரிந்துவிடும். பெரிய தொகுதியாக இருந்தால் வேட்பாளர்களின் வெற்றி அதிகாரப்பூர்வமாக அறிவிப்பதற்கு இரவு வரை ஆகும் என்று எதிர்பார்க்கப்படுகிறது. இதனிடையே வாக்காளர்களின் ஒப்புகை சீட்டு ஒரு சட்டமன்றதொகுதிக்கு 5 வாக்குப்பெட்டிகள் குலுக்கல் முறையில் தேர்வு செய்து எண்ணப்படுவதால் அதிகாரப்பூர்வமான அறிவிப்பு வெளிவர நள்ளிரவு 12 மணியாகலாம் என ஆட்சியர் சுப்ரமணியன் தெரிவித்துள்ளார். வாக்கு எண்ணிக்கை மையங்களில் 1000 போலீசார் பாதுகாப்பு பணியில் ஈடுபடுத்தப்பட உள்ளனர். பாதுகாப்பு முன்னெச்சரிக்கை குறித்து வடக்கு மண்டல ஐஜி நாகராஜன், டிஐஜி சந்தோஷ்குமார் ஆகியோர் ஆய்வு செய்துவிட்டு சென்றுள்ளனர். இதனிடையே வாக்கு எண்ணிக்கை மையத்தில் கூச்சல், குழப்பத்தில் ஈடுபடும் முகவர்கள் வெளியேற்றப்படுவார்கள் எனவும் ஆட்சியர் தெரிவித்துள்ளார்.

தவறி விழுந்து ஜோதிடர் சாவு

சிதம்பரம், மே 23: கடலூர் மாவட்டம் விருத்தாசலம் வட்டம் சாத்துக்கூடல் மேல்பாதி பகுதியை சேர்ந்த வரதராஜன் (50). இவர் சிதம்பரம் அருகே உள்ள வல்லம்படுகையில் வாடகைக்கு அறை எடுத்து ஜோதிடம் பார்த்து வந்துள்ளார். நேற்று முன்தினம் இவர் குடிபோதையில் மாடிப்பறி ஏறியபோது எதிர்பாராதவிதமாக தவறி கீழே விழுந்துள்ளார். இதில் பலத்த காயமடைந்த அவர் சம்பவ இடத்திலேயே பரிதாபமாக இறந்தார். இதுபற்றி அவரது மனைவி தமிழ்ச்செல்வி அண்ணாமலை நகர் போலீசில் புகார் செய்தார். அதன்பேரில் சப்-இன்ஸ்பெக்டர் ரங்கராஜன் மற்றும் போலீசார் வழக்கு பதிந்து விசாரணை நடத்தி வருகின்றனர்.

தனியார் பள்ளி பேருந்துகள் ஆய்வு

கள்ளக்குறிச்சி, மே 23: கள்ளக்குறிச்சி, சின்னசேலம், சங்கராபுரம் ஆகிய வட்டத்திற்கு உட்பட்ட பகுதியில் 450 தனியார் பள்ளி பேருந்துகள் உள்ளது. இதில் முதல் கட்டமாக 130 பேருந்துகளை ஆய்வு செய்யும் பணி கள்ளக்குறிச்சி தற்காலிக பேருந்து நிலையம் பகுதியில் நடந்தது. கள்ளக்குறிச்சி சார் ஆட்சியர் காந்த் தலைமை தாங்கினார். கள்ளக்குறிச்சி டிஎஸ்பி ராமநாதன், கள்ளக்குறிச்சி மாவட்ட கல்வி அலுவலர் கார்த்திகா ஆகியோர் முன்னிலை வகித்தனர். கள்ளக்குறிச்சி மோட்டார் வாகன ஆய்வாளர் சிவக்குமார் வரவேற்றார்.சார் ஆட்சியர் காந்த் பேசுகையில், பள்ளிக்கு செல்ல நேரம் ஆகிவிட்டது என கூறி பேருந்தை அதிவேகமாக இயக்கக்கூடாது. மாணவர்கள் பாதுகாப்பு மிக முக்கியம். நமது மாவட்டம் விபத்து இல்லா மாவட்டமாக இருக்க வேண்டும், என்றார். டிஎஸ்பி ராமநாதன் பேசுகையில், விழுப்புரம் மாவட்டத்தில் கடந்த ஆண்டு 230 விபத்துகள் ஏற்பட்டுள்ளது. இந்த ஆண்டில் விபத்து இல்லா மாவட்டமாக மாற் றியமைக்க வேண்டும். பள்ளி மாணவர்களை வாகனத்தில் இருந்து இறக்கும்போது கவனமாக இறக்கிவிட வேண்டும். பேருந்தில் இருந்து இறங்கிய மாணவர்கள் பாதுகாப்பாக சாலையை கடந்து சென்றுவிட்டார்களா என்பதை உறுதி செய்த பின்னர் டிரைவர்கள் பேருந்தை இயக்க வேண்டும் என்றார். மாவட்ட கல்வி அலுவலர் கார்த்திகா பேசுகையில், பள்ளி பேருந்தில் ஆவணங்கள் சரியாக உள்ளதா என ஆய்வு மேற்கொள்ளபட்டது. பேருந்தில் உதவியாளர் இல்லாமல் வாகனத்தை இயக்கக்கூடாது. பின்புறமாக வாகனத்தை இயக்குகின்றபோது குழந்தைகள் யாரேனும் பின்பகுதியில் நிற்கிறார்களா என்பதை உதவியாளர்கள் மூலமாக பார்த்தபின் பாதுகாப்பாக இயக்க வேண்டும் என்றார். இதை தொடர்ந்து பேருந்துகளை அதிகாரிகள் ஆய்வு செய்தனர். வாகனத்திற்கான ஆவணங்கள் மற்றும் லைசென்ஸ் சரியாக உள்ளதா, பேருந்தில் அவசர கால கதவுகள் அமைக்கபட்டுள்ளதா, முதல் உதவி சிகிச்சை பெட்டி மற்றும் தீ தடுப்பு ஆவணங்கள் சரியாக உள்ளதா என ஆய்வு செய்தனர். இதையடுத்து, பேருந்தில் தீ விபத்து ஏற்பட்டால் அதனை எதிர்கொள்வது எப்படி என்பது குறித்து தீயணைப்பு வீரர்கள் விழிப்புணர்வு ஏற்படுத்தினர். விபத்து ஏற்பட்டால் முதல் உதவி சிகிச்சை அளிப்பது குறித்து 108 ஆம்புலன்ஸ் ஊழியர்கள் விழிப்புணர்வு ஏற்படுத்தினர். கள்ளக்குறிச்சி தீயணைப்பு நிலைய அலுவலர் கிருஷ்ணமூர்த்தி, 108 ஆம்புலன்ஸ் மாவட்ட செயல் அலுவலர் அறிவுக்கரசு மற்றும் பள்ளி பேருந்து ஓட்டுநர்கள் கலந்து கொண்டனர். மீதமுள்ள பேருந்துகள் ஓரிரு நாட்களில் ஆய்வு மேற்கொள்ளப்படும் என அதிகாரிகள் தெரிவித்தனர்.

ஐடி கம்பெனி ஊழியர் மாயம்

பண்ருட்டி, மே 23: பண்ருட்டி அருகே பெரியகாட்டுப்பாளையம் பகுதியை சேர்ந்த ராதாகிருஷ்ணன் மகன் பாரிவள்ளல் (28). பெங்களூரில் உள்ள ஐடி கம்பெனியில் வேலை பார்த்து வருகிறார். இவரது மனைவி ரோகிணி (25). இவர் கணவர் வேலைபார்க்கும் கம்பெனியில் வேலை பார்த்து வருகிறார். இவர்களுக்கு ஒரு பெண் குழந்தை உள்ளது. கடந்த சில மாதங்களாக தம்பதி இடையே குடும்ப பிரச்னை ஏற்பட்டு வந்தது. இந்நிலையில் கடந்த ஆண்டு நவம்பர் மாதம் பாரிவள்ளல் ஊருக்கு வந்தபோது மனைவியுடன் தகராறு ஏற்பட்டது. பின்னர் வெளியே சென்று வருவதாக கூறிசென்ற பாரிவள்ளல் அதன் பின்னர் வீடு திரும்பவில்லை. கம்பெனிக்கும் செல்லவில்லை. பல இடங்களில் தேடிபார்த்தும் அவரைபற்றிய தகவல் கிடைக்கவில்லை. இதுபற்றி அவரது மனைவி ரோகிணி காடாம்புலியூர் காவல்நிலையத்தில் அளித்த புகாரின்பேரில் இன்ஸ்பெக்டர் மலர்விழி மற்றும் போலீசார் வழக்கு பதிந்து மாயமான பாரிவள்ளலை தேடி வருகின்றனர்.

ஆபாச பேச்சு: வாலிபர் கைது

சிதம்பரம், மே 23: சிதம்பரம் நகர போலீஸ் சப்-இன்ஸ்பெக்டர் சங்குராஜன் மற்றும் போலீசார் சிதம்பரம் கஞ்சித்தொட்டி பகுதியில் ரோந்து பணியில் ஈடுபட்டனர். அப்போது அங்கு பொதுமக்களுக்கும், பொது அமைதிக்கும் கேடு விளைவிக்கும் வகையில் சிதம்பரம் ஓமக்குளம் சுண்ணாம்புக்கார தெருவைச் சேர்ந்த ஜோசப் மகன் லெனின் (32) என்பவர் ஆபாசமாக பேசிக்கொண்டிருந்தார். அங்கு சென்ற சப்-இன்ஸ்பெக்டர் சங்குராஜன் அங்கிருந்து செல்லுமாறு கூறியும் செல்லாததால் அவரை கைது செய்தனர். விசாரணையில் அவர் பல்வேறு குற்ற வழக்குகளில் தொடர்புடையவர் என தெரியவந்தது.

சாலையை ஆக்கிரமிக்கும் வாகனங்கள் போக்குவரத்து நெரிசல் அதிகரிப்பு

விழுப்புரம், மே 23: விழுப்புரம் நகரில் நாளுக்கு நாள் அதிகரித்து வரும் போக்குவரத்து நெரிசலால் வாகன ஓட்டிகள், பொதுமக்கள் அவதிப்பட்டு வருகின்றனர். சாலை விரிவாக்க பணிகள் நடந்தாலும் வாகன எண்ணிக்கையின் அதிகரிப்பால் போக்குவரத்து நெரிசல் குறைந்தபாடில்லை. இந்நிலையில், சாலையோரங்களில் இருசக்கர வாகனம், கார்களை நிறுத்தி ஆக்கிரமித்து கொள்வதால் காலை, மாலை நேரங்களில் கடும் நெரிசல் ஏற்படுகிறது. குறிப்பாக மாலை முதல் இரவு வரை சாலையோர டீக்கடை, ஓட்டல் முன் இருசக்கர வாகனங்கள், கார்களை நிறுத்தி ஆக்கிரமித்துக் கொள்வதால் கடும் நெரிசல் ஏற்பட்டு வருகிறது. குறிப்பாக விழுப்புரம் பெருந்திட்ட வளாகம் எதிர்புறத்தில் இருந்து திருச்சி சாலையில் நான்குமுனை சந்திப்பு வரை சாலையோரம் உள்ள டீக்கடைகள், ஓட்டல்கள் முன் பார்க்கிங் வசதியில்லாமல் சாலையோரங்களில் பைக்குகள், கார்கள் நிறுத்தப்படுவதால் மற்ற வாகனங்கள் செல்ல முடியாமல் கடும் போக்குவரத்து நெரிசல் ஏற்படுகிறது. போக்குவரத்து போலீசார் ரோந்து சென்றாலும் இந்த கடைகள் முன் வாகனம் நிறுத்துவதை தடுக்க எந்தவித நடவடிக்கையும் எடுக்காமல் உள்ளனர். விழுப்புரத்தில் புதிதாக பொறுப்பேற்றுள்ள டிஎஸ்பி திருமால், நெரிசலை குறைக்க பல்வேறு அதிரடி நடவடிக்கைகளை எடுத்து வருகிறார். அதேபோல் ெபருந்திட்ட வளாகம் எதிரே சாலையோரம் வாகனங்கள் நிறுத்துவதை தடுக்க உரிய நடவடிக்கை எடுக்க வேண்டும் என்ற கோரிக்கையும் எழுந்துள்ளது.

சேத்தியாத்தோப்பு குறுக்குரோட்டில் புறக்காவல் நிலையம் அமைக்க கோரிக்கை

சேத்தியாத்தோப்பு, மே 23: சேத்தியாத்தோப்பில் கடந்த 30 ஆண்டுகளுக்கும் மேலாக காவல்நிலையம் செயல்பட்டு வருகிறது. சேத்தியாத்தோப்பு நகரம் மற்றும் அதனை சுற்றியுள்ள கிராம பகுதிகளில் சட்டம் ஒழுங்கு, மக்களின் அமைதியை கருத்தில் கொண்டு போலீசார் செயல்பட்டு வருகின்றனர். சேத்தியாத்தோப்பு பகுதியில் நாளுக்கு நாள் மக்கள்தொகை மறறும் வாகன போக்குவரத்துகள் அதிகரித்து வருகிறது. இதனால் சேத்தியாத்தோப்பு பகுதியில் பாதுகாப்பை பலப்படுத்தவும், பொதுமக்களுக்கு சிறப்பான சேவைகளை வழங்கிடவும் சேத்தியாத்தோப்பு குறுக்குரோட்டில் புறக்காவல் நிலையம் அமைக்க வேண்டும் என்று இப்பகுதி மக்கள் கோரிக்கை விடுத்துள்ளனர். காவல் நிலையத்திற்கும் சேத்தியாத்தோப்பு குறுக்குரோட்டிற்கும் குறைந்தபட்சம் சுமார் 3 கிலோமீட்டர் தூரம் இருக்கிறது. குறுக்குரோட்டில் ஏதேனும் எதிர்பாராத நிகழ்வுகள் நடக்கும்போது காவல்துறை சேவைகள் வழங்குவதில் காலதாமதம் ஏற்படுகிறது. மேலும் குறுக்குரோட்டில் வாகனங்கள் போக்குவரத்தும் அதிகமாக இருக்கிறது. எனவே அப்பகுதியில் 24 மணிநேரமும் செயல்படக்கூடிய புறக்காவல் நிலையம் அமைத்தால், காவல் துறையின் அனைத்து சேவைகளும் விரைந்து கிடைக்கும் என்று மக்கள் தெரிவித்தனர்.

திருமஞ்சன விழாவை முன்னிட்டு சிதம்பரத்தில் ஆக்கிரமிப்புகளை அகற்ற பொதுமக்கள் வலியுறுத்தல்

சிதம்பரம், மே 23: சிதம்பரம்நடராஜர் கோயிலில் ஆனி மாதத்தில் நடக்கும் ஆனி திருமஞ்சன திருவிழா வரும் ஜூன் மாதம் 29ம் தேதி கொடி ஏற்றத்துடன் தொடங்க உள்ளது. 10 தினங்கள் நடக்கும் திருவிழாவையொட்டி ஏராளமான வெளியூர் பக்தர்கள் சிதம்பரம் நகருக்கு வருகை தருவது வழக்கம். ஜூன் மாதம் விடுமுறைக்கு பிறகு பள்ளிகளும் திறக்கப்படுகின்றன. ஏற்கனவே சிதம்பரம் நகரில் கடும் போக்குவரத்து நெரிசல் உள்ளது. திருவிழா மற்றும் பள்ளிகள் திறப்பதையொட்டியும், சிதம்பரம் நகரில் போக்குவரத்து மற்றும் பொதுமக்கள் நடப்பதற்கு இடையூறாக உள்ள ஆக்கிரமிப்புகளை அகற்ற வேண்டும் என சமூக ஆர்வலர்கள் கோரிக்கை விடுத்து வருகின்றனர். நடராஜர் கோயிலை சுற்றியுள்ள மேலவீதி, தெற்குவீதி, வடக்குவீதி, கீழவீதி பகுதிகளில் உள்ள நடைபாதைகள் ஆக்கிரமிக்கப்பட்டுள்ளன. சன்னதிகளிலும் மக்கள் நடக்க முடியாத அளவிற்கு ஆக்கிரமிப்புகள் உள்ளன. நடைபாதைக்கு வெளியே இருசக்கர வாகனங்கள், கார்கள் நிறுத்தப்படுகின்றன. இதனால் பொதுமக்கள் சாலைகளில் நடக்க வேண்டியுள்ளது. இதனால் அடிக்கடி விபத்துகள் நடக்கின்றன.இந்நிலையில் திருவிழாவையொட்டி ஏராளமானோர் வெளியூர்களில் இருந்து சிதம்பரம் நகரத்திற்கு வருவதால் பொதுமக்கள் நடப்பதற்கே சிரமப்படும் சூழ்நிலை ஏற்படும். ஆகையால் திருவிழாவையொட்டி நகரின் நான்கு முக்கிய வீதிகள் மற்றும் சன்னதிகளில் உள்ள நடைபாதை ஆக்கிரமிப்புகளை அகற்றினால் பொதுமக்கள் நடைபாதையில் நடந்து செல்ல முடியும். ஆகையால் நகராட்சி நிர்வாகம் நடைபாதை ஆக்கிரமிப்புகளை அகற்ற நடவடிக்கை எடுக்க வேண்டும் என்பதே பொதுமக்களின் எதிர்பார்ப்பாக உள்ளது

தூத்துக்குடி துப்பாக்கி சூடு நினைவு தினம் அனுசரிப்பு

கடலூர், மே 23: தூத்துக்குடி ஸ்டெர்லைட் ஆலை துப்பாக்கி சூட்டில் பலியானவர்களுக்கு கடலூரில் அனைத்து பொது நல இயக்கங்களின் கூட்டமைப்பினர் நினைவு தினம் அனுசரித்தனர். தமிழகத்தையே அதிர்ச்சிக்கு உள்ளாக்கிய தூத்துக்குடி துப்பாக்கி சூடு சம்பவத்தில் 13 பேர் காவல்துறையால் சுட்டுக்கொல்லப்பட்டனர். ஓராண்டு கடந்த நிலையில் அதன் துயர நினைவுகளும் ஆழமாக பதிந்துவிட்டது. அதன் எதிரொலியாக தமிழகம் முழுவதும் தன்னெழுச்சியாக பொதுமக்களும் பல்வேறு அமைப்புகளும் நேற்று ஓராண்டு நினைவு தினத்தை அனுசரித்தனர். கடலூர் எஸ்என். சாவடியில் உள்ள இந்திய கம்யூனிஸ்ட் அலுவலகத்தில் அனைத்து பொது நல இயக்கங்களின் கூட்டமைப்பினர் நினைவு தினக்கூட்டம் நடத்தினர். ஒருங்கிணைப்பாளர் வெண்புறாகுமார் தலைமை தாங்கினார். இணை ஒருங்கிணைப்பாளர்கள் சுப்புராயன், ரவி, ஆலோசகர் திருமார்பன், மக்கள் அதிகாரம் மண்டல ஒருங்கிணைப்பாளர் பாலு, மீனவர் பேரவை மாநில செயலாளர் கஜேந்திரன், இந்திய கம்யூ., நகர செயலாளர் மணிவண்ணன் ஆகியோர் முன்னிலை வகித்தனர்.  பல்வேறு பொது நல அமைப்புகளின் நிர்வாகிகள் ராயர் ராஜாங்கம், பருதிவாணன், தர்மராஜ், பாபு, கார்த்திகேயன், சாய்ராம், தருமர் உள்பட பலர் இரங்கல் உரையாற்றினர். ஆண்டு தோறும் மே 22ம் தேதியை உலக அளவில் மக்களுக்கு எதிரான கார்ப்பரேட் பயங்கரவாத ஒழிப்பு தினமாக அனுசரிக்க வேண்டும். துப்பாக்கி சூடு சம்பவத்தின் போது பொதுமக்கள் மீது போடப்பட்ட பொய் வழக்குகளை திரும்ப பெற வேண்டும். இச்சம்பவத்திற்கு காரணமான காவல்துறை அதிகாரிகளை உடனடியாக பணி நீக்கம் செய்து அவர்கள் மீது கொலை வழக்கு பதிவு செய்ய வேண்டும். ஸ்டெர்லைட் ஆலையை நிரந்தரமாக மூட வேண்டும் உள்ளிட்ட தீர்மானங்கள் நிறைவேற்றப்பட்டன. முன்னதாக தூத்துக்குடி சம்பவத்தில் கொல்லப்பட்டவர்களுக்கு மெழுகுவர்த்தி ஏந்தி மவுனம் அனுசரித்து நினைவு அஞ்சலி செலுத்தினர்.விருத்தாசலம்: விருத்தாசலம் பாலக்கரையில் மக்கள் அதிகாரம் அமைப்பின் சார்பில் அஞ்சலி நிகழ்ச்சி நடக்க இருந்தது. ஆனால் இதற்கு காவல்துறை அனுமதி தரவில்லை. இதனால் மக்கள் அதிகாரம் அமைப்பின் மாநில ஒருங்கிணைப்பாளர் வழக்கறிஞர் ராஜூ அலுவலகத்தில் தூத்துக்குடி துப்பாக்கி சூட்டில் இறந்தவர்களுக்கு அஞ்சலி நிகழ்ச்சி நடந்தது. வட்டார ஒருங்கிணைப்பாளர் முருகானந்தம் தலைமை தாங்கினார். அன்பழகன் வெங்கடேசன் மற்றும் இந்திய புரட்சிகர மார்க்சிஸ்ட்  கட்சியை சேர்ந்த கோகுலகிறிஸ்டீபன், பகுஜன் சமாஜ் கட்சி  அருட்செல்வன், வழக்கறிஞர் செல்வம் உள்ளிட்ட பலர் கலந்துகொண்டு அஞ்சலி செலுத்தினர்.