Dharmapuri - Dinakaran

கோடை காலத்தையொட்டி வனப்பகுதியில் தீ தடுப்பு நடவடிக்கைகள் மும்முரம்

தர்மபுரி, பிப்.15: தர்மபுரி மாவட்டத்தில் வெயிலின் தாக்கம் அதிகரித்து வருவதால், வனப்பகுதியில் தீ பரவாமல் தடுக்க தீ தடுப்பு நடவடிக்கைகளை வனத்துறையினர் தீவிரப்படுத்தியுள்ளனர்.தர்மபுரி மாவட்டத்தில் 1,700 சதுர கிலோ மீட்டர் வனக்காப்புக் காடுகளை கொண்டது. இம்மாவட்ட காடுகள், கர்நாடகம், தமிழகம் ஆகியவற்றின் எல்லைகள் சந்திக்கும் பகுதியில் அமைந்துள்ளது. இந்த காடுகள் காவிரி, தென்பெண்ணை ஆறு, சனத்குமார நதி, வாணியாறு ஆகிய ஆறுகளுக்கு நீர்ப்பிடிப்பு பகுதியாக உள்ளன. தென்மேற்கு, வடகிழக்கு மழைக்காலங்களில் மழையை பெறும் இம்மாவட்டம், சராசரியாக 851.1 மில்லி மீட்டர் மழையை பெறுகிறது. இந்த ஆண்டு சராசரி மழையளவில் 45 சதவீதம் மட்டுமே பெய்துள்ளது.  தர்மபுரி மாவட்ட வனங்கள் பெரும்பான்மையும், இலையுதிர் காடுகளாகவே உள்ளன. ஓரிரு இடங்களில் வறண்ட பசுமை மாறாக் காடுகளும் காணப்படுகின்றன. தர்மபுரி காடுகளில் தேக்கு, சந்தனம், வேம்பு, புளிய மரம், துரிஞ்சை, ஆல், வேலம், நீலகிரி, எட்டி, நாகமரம் உள்ளிட்ட பங்வேறு வகை மரங்கள் உள்ளன. மேலும், யானை, சிறுத்தை, காட்டு பன்றி, மான், கரடி, காட்டெருமை, நரி, குரங்குகள் அதிகளவில் உள்ளன.தற்போது மாவட்டம் முழுவதும் வெயிலின் தாக்கம் அதிகரித்துள்ளது. இதனால், வத்தல்மலை, தொப்பூர், பரிகம் காப்புக்காடு, பென்னாகரம் சரகம் பவானூர்மலை காப்புக்காடு, ஒகேனக்கல் சரகம் ஒட்டப்பட்டி குத்திராயன் காப்புக்காடு, பாலக்கோடு சரகம் திருமால்வாடி வனப்பகுதியில் தீ விபத்துக்கள் ஏற்படாமல் இருக்க முன்னெச்சரிக்கை நடவடிக்கைகளை வனத்துறையினர் மேற்கொண்டுள்ளனர். இதில், வனப்பகுதியில் காய்ந்த சருகுகளை அப்புறப்படுத்தல், தீ தடுப்பு கோடுகள் அமைத்தல், ரோந்து போன்ற பணிகளை தீவிரப்படுத்தி வருகின்றனர். மேலும், வனத்துக்குள் எளிதில் தீ பிடிக்கும் பொருட்களை கொண்டு செல்ல வேண்டாம் என, வனத்துறையினர் கிராம பகுதிகளில் எச்சரிக்கை விடுத்து வருகின்றனர்.  இதுகுறித்து தர்மபுரி மாவட்ட வன அதிகாரிகள் கூறுகையில், ‘வனப்பகுதியில் தீ விபத்தை தவிர்க்க, வனப்பகுதியில் தீ தடுப்பு கோடுகள் வெட்டும் பணி நடக்கிறது. வனத்தையொட்டியுள்ள கிராமங்களில் தீ தடுப்பு குறித்த விழிப்புணர்வு ஏற்படுத்தப்பட்டு வருகிறது. வன விலங்குகளின் தேவைக்காக, வனப்பகுதியில் அமைக்கப்பட்டுள்ள தொட்டிகளில் தண்ணீர் நிரப்பும் பணிகளை மேற்கொண்டு வருகிறோம். இதன் மூலம் வனவிலங்குகள், கிராமப்பகுதிக்குள் நுழைவது தடுக்கப்படும். வனப்பகுதியில் தீ வைப்போருக்கு, வனப்பாதுகாப்பு சட்டத்தின் கீழ், 6 மாதம் முதல் 3 ஆண்டுகள் வரை சிறை தண்டனை வழங்க வாய்ப்புள்ளது,’ என்றனர்.

சவுளூர் பகுதியில் விற்பனைக்காக குவிந்த வாத்துகள்

தர்மபுரி, பிப்.15: தர்மபுரி அருகே ஆம்பூர் வாத்துக்கள், இறைச்சிக்காக விற்பனை செய்யப்படுகிறது. ஒரு ஜோடி ₹280க்கு விற்கப்படுகிறது. தர்மபுரி குமாரசாமிபேட்டை சவுளூர் பகுதியில் வாத்துகள் விற்பனைக்கு வந்துள்ளது. அப்பகுதியில் பட்டி அமைத்து, வாத்துகளை அடைத்து வைத்துள்ளனர். அதில், 2 ஆயிரத்திற்கும் மேற்பட்ட வாத்துக்கள் வளர்க்கப்பட்டு வருகிறது. அவற்றை தாபா ஓட்டல்கள், நட்சத்திர ஓட்டல்களுக்கு விரும்பி வாங்கி செல்கின்றனர். மேலும், கோவை, ஈரோடு, திருப்பூர் உள்ளிட்ட இடங்களிருந்து வியாபாரிகள் வாங்கி செல்கின்றனர். ஒரு வாத்து ₹150ம், ஜோடி ₹280க்கும் விற்பனை செய்யப்படுகிறது.  இதுகுறித்து வேலூர் மாவட்டம் ஆம்பூர் பகுதியை சேர்ந்த விற்பனையாளர் கோபால் கூறுகையில், ‘நாங்கள் கடந்த 15 ஆண்டுகளாக வாத்து வளர்த்து விற்பனை செய்து வருகிறோம். அசைவ ஓட்டல்களுக்கு விரும்பி வாங்கி செல்கின்றனர். தற்போது அறுவடை செய்த வயலில், வாத்துக்கு பட்டி அமைத்து வளர்த்து வருகிறோம். வயல்களில் ஈரப்பதம் இல்லாததால் செயற்கை குளம் அமைத்துள்ளோம். ஆடுகளின் மேய்ச்சல் நிலமாக இருக்கும் வயல்களில், வாத்துக்களை மேய்ச்சலுக்கு அழைத்து செல்கிறோம்’ என்றார். வாத்து இறைச்சி சாப்பிட்டால் ஆஸ்துமா நோயின் தாக்கம் குறையும் என நம்பி, வாத்துக்களை ஏராளமானோர் வாங்கி செல்கின்றனர்.

புளி உலுப்பும் பணி தொடக்கம்

தர்மபுரி, பிப்.15: தமிழகம், கேரளா, கர்நாடகா, ஆந்திர மாநிலங்களில் அதிகளவில் புளி விளைச்சல் உள்ளது. கேரளாவில் டிசம்பர் மாதத்திலும், ஜனவரியில் கர்நாடகாவிலும், மார்ச் மாதத்தில் தமிழகத்திலும் புளி சீசன் தொடங்கும். தற்போது கர்நாடக மாநிலத்தில் இருந்து மைசூர் புளி, தர்மபுரி மாவட்டத்தில் விற்பனை செய்யபட்டு வருகிறது. இந்நிலையில், தர்மபுரி மாவட்டத்தில் புளி சீசன் தொடங்கியதையடுத்து, தர்மபுரி நகரில் மதிகோண்பாளையம், பழைய தர்மபுரி ஆகிய இடங்களில், சாலையோரம் புளியமரங்களில் இருந்து புளியம்பழத்தை உலுப்பும் பணியில் தொழிலாளர்கள் தீவிரமாக ஈடுபட்டு வருகின்றனர். இந்த புளியம்பழத்தின் மேல் ஓடுகளை உறித்து உதிரி புளியாகவும், தோசை புளியாகவும் தயாரித்து கடைவீதியில் உள்ள மொத்த விற்பனை கடைகளுக்கு விற்பனைக்கு அனுப்பி வைக்கப்படுகிறது. ஓட்டுடன் கூடிய புளியம்பழம் கிலோ ₹25 வரை விற்பனையாகிறது. உதிரி புளி ₹100க்கும், தோசை புளி ₹140க்கும் விற்பனை செய்யப்படுகிறது.

சர்வர் முடங்கியதால் மின் கட்டணம் செலுத்த முடியாமல் மக்கள் அவதி

தர்மபுரி, பிப்.15: தர்மபுரி மின்வாரிய அலுவலகத்தில் சர்வர் முடங்கியதால், மின் கட்டணம் செலுத்த முடியாமல் மக்கள் அவதிப்பட்டு வருகின்றனர். தர்மபுரி மின்வாரிய கண்காணிப்பு பொறியாளர் அலுவலகம் அருகே, மின்கட்டண வசூல் மையம் உள்ளது. இந்த மையத்தில் இலக்கியம்பட்டி, செந்தில்நகர், கருவூல காலனி, கலெக்ட்ரேட்,  ெவங்கட்டம்பட்டி, ராயல் நகர், சவுளூர், நேரு நகர் உள்ளிட்ட 10 ஆயிரத்திற்கும் மேற்பட்ட மின் நுகர்வோர், மின் கட்டணத்தை செலுத்தி வருகின்றனர். இந்நிலையில், மின்கட்டண வசூலிப்பு மையத்தில் நேற்று முன்தினம் சர்வர் முடங்கியது. இதனால், வாடிக்கையாளர்கள் கட்டணம் செலுத்த முடியவில்லை. இதனால், அங்கிருந்த பணியாளர்கள் தனியார் சேவை மையங்களில், மின்கட்டணத்தை செலுத்தும்படி அனுப்பி வைத்தனர். இதே போல் நேற்றும் 2வது நாளாக இணைய சேவை பாதிப்பு என அறிவிப்பை மாட்டி விட்டு, வாடிக்கையாளர்களிடம் மின் கட்டணத்தை வசூலிக்கவில்லை. இதனால் வாடிக்கையாளர்கள் தனியார் சேவை மையங்களை தேடி அலைந்து திரிந்ததோடு, கூடுதலாக ₹20 வரை செலுத்தும் நிலை ஏற்பட்டது.

பேனரில் திருமாவளவன் படம் கிழிப்பு பஸ்சை சிறைபிடித்து சாலை மறியல்

தர்மபுரி, பிப்.15: தர்மபுரி அருகே விடுதலை சிறுத்தை ேபனர் கிழித்ததை கண்டித்து, பஸ்சை சிறைபிடித்து மறியலில் ஈடுபட்டதால் பரபரப்பு ஏற்பட்டது.தர்மபுரி மாவட்டம் அதியமான்கோட்டை அருகே மாதேமங்கலம் கிராமத்தை சேர்ந்தவர் மாதையன். கடந்த 12ம் தேதி மாதையனின் இல்லத்திருமண விழா நடந்தது. இதையொட்டி பேனர் வைக்கப்பட்டிருந்தது. அதில், விடுதலை சிறுத்தைகள் கட்சி தலைவர் திருமாவளவனின் படம் போடப்பட்டிருந்தது. இந்நிலையில் நேற்று முன்தினம் பேனரில் இருந்த திருமாவளவனின் படம் மட்டும் கிழிக்கப்பட்டிருந்தது. இதனை பார்த்து அதிர்ச்சியடைந்த கிராம மக்கள், இதுகுறித்து அதியமான்கோட்டை போலீசில் புகார் அளித்தனர். ஆனால் போலீசார் எந்த நடவடிக்கையும் எடுக்காததால் ஆவேசமடைந்த மாதேமங்கலம் கிராமத்தை சேர்ந்த பெண்கள், வி.சி கட்சியினர் என 30க்கும் மேற்பட்டோர் நேற்று காலை தர்மபுரி-மிட்டாரெட்டிஅள்ளி சாலையில் திரண்டனர். இதையடுத்து அவ்வழியாக மிட்டாரெட்டிஅள்ளியில் இருந்து தர்மபுரிக்கு வந்த பஸ்சை சிறைபிடித்து மாதேமங்கலம் பேருந்து நிறுத்தம் முன் மறியலில் ஈடுபட்டனர். இதனால் பரபரப்பு ஏற்பட்டது. இதுகுறித்து தகவல் அறிந்து வந்த அதியமான்கோட்டை போலீசார் மறியலில் ஈடுபட்டவர்களிடம் பேச்சு வார்த்தை நடத்தினர். அப்போது நடவடிக்கை எடுப்பதாக உறுதியளித்ததன் பேரில் அனைவரும் கலைந்து சென்றனர். இந்த மறியலால் ஒரு மணிநேரத்திற்கு மேல் போக்குவரத்து பாதிக்கப்பட்டது.  இதுகுறித்து, வி.சி கட்சியை சேர்ந்த அம்பேத்வளவன் என்பவர் கூறுகையில், மாதேமங்கலம் வன்னியர் தெரு அருகே வைக்கப்பட்டிருந்த பேனரில் இருந்த திருமாவளவனின் படம் கிழிக்கப்பட்டிருந்தது. இதுதொடர்பாக 2பேர் மீது போலீசில் புகார் அளித்துள்ளோம். ஆனால் போலீசார் எந்த நடவடிக்கையும் எடுக்காததால், மறியலில் ஈடுபட்டோம். மறியலுக்கு பின்னர் 2பேரை பிடித்து விசாரித்து வருகின்றனர் என்றார்.

தொலைதொடர்பு ஊழியர்கள் வேலைநிறுத்த விளக்க கூட்டம்

தர்மபுரி, பிப்.15: தர்மபுரி தொலைதொடர்பு ஊழியர்கள், அதிகாரிகள் சங்க கூட்டமைப்பு சார்பில், வேலைநிறுத்த விளக்க கூட்டம், தர்மபுரி தொலைபேசி நிலைய மனமகிழ் மன்றத்தில் நடந்தது. கூட்டமைப்பு தலைவர் மகேஷ்குமார் தலைமை வகித்தார். கன்வினர் கிருஷ்ணன் வரவேற்றார். பிஎஸ்என்எல் சங்க நிர்வாகிகள் தமிழ்மணி, சென்னகேசவன், ராமசுந்தரம்ம ஆகியோர் கோரிக்கைகளை விளக்கி பேசினர். கூட்டத்தில், தொலைதொடர்பு பொதுத்துறையை நலிவடைந்த துறை என்றும், விரைவில் மூடுவிழா நடத்தப்படும் என்ற செய்தி உண்மை இல்லை. தொலைதொடர்பு ஊழியர்கள், அதிகாரிகளுக்கு 3வது ஊதிய மாற்றத்தை உடனே வழங்க வேண்டும். தொலைதொடர்பு நிறுவனத்திடமிருந்து ஓய்வூதிய பங்கீடு பெறுவதில், மத்திய அரசு உத்தரவை அமல்படுத்த வேண்டும். தொலை தொடர்புதுறைக்கு 4ஜி, ஸ்பெக்ட்ரம் உடனே வழங்க வேண்டும். ஓய்வூதியதாரர்களுக்கு, ஓய்வூதிய மாற்றத்தை உடனே வழங்க வேண்டும் உள்ளிட்ட கோரிக்கைகளை வலியுறுத்தி, வரும் 18ம் தேதி 19, 20 ஆகிய 3நாட்கள் நாடு தழுவிய வேலைநிறுத்தத்தை வெற்றிகரமாக்குவது என முடிவு செய்யப்பட்டது.

தார்சாலை பணி தீவிரம் ₹358.95 கோடியில் மொரப்பூர்-தர்மபுரி ரயில் பாதைக்கு அனுமதி

தர்மபுரி, பிப்.15: மொரப்பூர்- தர்மபுரி ரயில் பாதை திட்டத்திற்கு ₹358.95 கோடியில் அனுமதி அளிக்கப்பட்டுள்ளது என, தென்னக ரயில்வே நிர்வாகம் அறிக்கையில் தெரிவித்துள்ளது.  தர்மபுரி பாராளுமன்ற தொகுதி எம்பி அன்புமணி ராமதாஸ், கடந்த 5ம் தேதி தர்மபுரியில் நடந்த செய்தியாளர்கள் சந்திப்பில் மொரப்பூர்- தர்மபுரியை இணைக்கும் ரயில்வே திட்டத்திற்கு, ரயில்வே அமைச்சகம் அனுமதி அளித்துள்ளது. இதன் மூலம் தர்மபுரி மாவட்ட மக்களின் 70 ஆண்டு கால கோரிக்கை நிறைவேற்றப்பட்டுள்ளது. சுமார் 36 கிலோ மீட்டருக்கு ₹358.95 கோடி மதிப்பீட்டில் மத்திய ரயில்வே துறையே இத்திட்டத்தை செயல்படுத்த உள்ளது என கூறியிருந்தார். இத்திட்டம் கடந்த ஜனவரி 16ம் தேதி அனுமதி அளிக்கப்பட்டுள்ளது. இந்நிலையில் தென்னக ரயில்வே துறை சார்பில் வெளியிட்டுள்ள அறிக்கை: ரயில்வே நிர்வாகத்தால், தர்மபுரி மாவட்டம் மொரப்பூரில் இருந்து தர்மபுரி வரையிலான 36 கிலோ மீட்டருக்கான ரயில்வே பாதை அமைக்க ₹358.95 கோடியில் அனுமதி அளிக்கப்பட்டுள்ளது. இந்த பாதையில் 2 பெரிய பாலங்கள், 5 இடங்களில் ரயில்வே மேம்பாலங்கள், 15 இடங்களில் சிறிய நுழைவு பாலங்கள், 24 இடங்களில் சிறிய பாலங்கள் மற்றும் மொரப்பூர், ராணிமூக்கனூர், மூக்கனூர், தர்மபுரி ஆகிய 4 இடங்களில் ரயில் நிலையங்கள் அமைக்கப்பட உள்ளன. இவ்வாறு அறிக்கையில் கூறப்பட்டுள்ளது.

மின் ஊழியர்களுக்கு சிம்கார்டு விநியோகம்

தர்மபுரி, பிப்.15: தர்மபுரி மாவட்டத்தில் மின்சாரம் தொடர்பான குறைகளை சீர் செய்ய, மின் ஊழியர்களுக்கு சிம்கார்டு வழங்கப்பட்டது.தர்மபுரி மின்பகிர்மான வட்டத்தில் தர்மபுரி, தர்மபுரி கிராமம், பென்னாகரம், கடத்தூர், அதியமான்கோட்டை, பொம்மிடி, இருமத்தூர், அரூர் உள்ளிட்ட துணை மின்நிலையங்கள் உள்ளன. இந்த மின்நிலையங்கள் வழியாக மாவட்ட முழுவதும் மின்சாரம் பகிர்ந்தளிக்கப்படுகிறது. 5 லட்சம் மின் இணைப்புகள் உள்ளன. இந்த மின் இணைப்புகளை பராமரிக்கவும், கண்காணிக்கவும் 1,200க்கும் மேற்பட்ட ஒயர்மேன் உள்ளிட்ட மின் ஊழியர்கள் உள்ளனர். இந்த ஊழியர்களுக்கு, மின்வாரியம் சார்பில் சிம்கார்டு வழங்கப்பட்டுள்ளது. இலக்கியம்பட்டி மின்வாரிய அலுவலகத்தில் 15க்கும் மேற்பட்ட மின் ஊழியர்களுக்கு சிம்கார்டு வழங்கப்பட்டது. உதவி பொறியாளர் பிருந்தா, போர்மேன் காவரி உள்ளிட்ட மின் ஊழியர்களுக்கு சிம்கார்டு வழங்கினார். இதே போல் ஒவ்வொரு உதவி பொறியாளர் அலுவலகத்தில், சிம்கார்டு மின் ஊழியர்களுக்கு வழங்கப்பட்டது. இதுகுறித்து மின்ஊழியர்கள் கூறுகையில், ‘மின்வாரியம் மூலம் வழங்கப்பட்ட சிம்கார்டு, மின்தொடர்பான குறைகள், புகார் வந்தால் விரைவில் நேரில் சென்று மின்சாரம் தொடர்பான குறைகளை சீர் செய்யவே, இந்த சிம்கார்டு வழங்கப்பட்டுள்ளது. மேலதிகாரிகளின் நேரடி பார்வையில் இருக்கவும் இந்த சிம்கார்டு விநியோகிக்கப்பட்டுள்ளது,’ என்றனர்.

மின்மோட்டாரை எடுக்க முயன்ற போது கிணற்றுக்குள் தவறி விழுந்து பெண் பலி

கடத்தூர், பிப்.15: கடத்தூர் அருகே கிணற்றுக்குள் இருந்த மின்மோட்டாரை பழுது பார்ப்பதற்காக மேலே இழுத்த போது, கயிறு காலில் மாட்டிக் கொண்டதில் 110 அடி ஆழ கிணற்றுக்குள் தவறி விழுந்த பெண் பரிதாபமாக உயிரிழந்தார். தர்மபுரி மாவட்டம் கடத்தூர் அருகே சுங்கரஅள்ளி கிராமத்தை சேர்ந்த லாரி டிரைவர் ராமச்சந்திரன்(36). இவரது மனைவி கல்பனா(31). இவர்களுக்கு 2 மகன்கள் உள்ளனர். இந்நிலையில், இவர்களுக்கு சொந்தமான 110 அடி ஆழமுள்ள விவசாய கிணற்றில் இருந்த மின்மோட்டார் பழுதடைந்தது.  அதை சரி செய்வதற்காக, கிணற்றில் இருந்த தண்ணீரை இறைத்து விட்டு, உறவினர்கள் உதவியுடன் கிணற்றில் இருந்த மின் மோட்டாரை, ைபப்புடன் மேலே இழுக்கும் பணியில் நேற்று ஈடுபட்டனர். அப்போது, எதிர்பாராத விதமாக மின் மோட்டாரில் கட்டப்பட்டிருந்த கயிறு அறுந்து விழுந்து, மின் மோட்டார் கிணற்றுக்குள் விழுந்தது. அப்போது, கயிற்றின் ஒரு முனை கல்பனாவின் காலில் சிக்கிக் கொண்டதால், கிணற்றில் விழுந்த அவர் சம்பவ இடத்திலேயே பரிதாபமாக உயிரிழந்தார். இதை கண்டு அதிர்ச்சியடைந்த உறவினர்கள், கிணற்றில் விழுந்த கல்பனாவின் உடலை மீட்டனர். இது குறித்து தகவல் அறிந்து சம்பவ இடத்திற்கு வந்த கடத்தூர் ேபாலீசார், கல்பனாவின் உடலை மீட்டு பிரேத பரிசோதனைக்காக தர்மபுரி அரசு மருத்துவமனைக்கு அனுப்பி வைத்தனர். மேலும் இது குறித்து விசாரணை நடத்தி வருகின்றனர்..

பாப்பிரெட்டிப்பட்டியில் மாவட்ட அளவிலான பயிர் விளைச்சல் போட்டி

பாப்பிரெட்டிப்பட்டி, பிப்.15:  பாப்பிரெட்டிப்பட்டியில் வேளாண்மை துறை சார்பில், மாவட்ட அளவிலான பயிர் விளைச்சல் போட்டி நடந்தது. பாப்பிரெட்டிப்பட்டி ஒன்றியத்திற்குட்பட்ட ஆலாபுரம் கிராமத்தை சேர்ந்த சிவசங்கரன் என்பவரது விவசாய தோட்டத்தில், மாவட்ட அளவிலான கரும்பு பயிர் விளைச்சல் போட்டி, வேளாண்மை துறை சார்பில் நடத்தப்பட்டது. இந்நிகழ்ச்சியில் மாவட்ட வேளாண்மை துணை இயக்குநர் (மத்திய திட்டம்) சேகர் கலந்து கொண்டார். விவசாயி சார்பாக நடுவராக கோவிந்தனும், வேளாண் துறை நடுவராக அரூர் வேளாண்மை உதவி இயக்குநர் சகாயராஜ் ஆகியோர் போட்டியை நடத்தினர். கரும்பு பயிர் விளைச்சலை மாவட்ட மற்றும் மாநில அளவில் அதிக மகசூல் தரும் விவசாயிகளை ஊக்குவிக்கும் வகையில், வேளாண்மை துறையில் பரிசு வழங்கி போட்டி நடத்தப்படுகிறது. இந்நிகழ்ச்சியில், சுப்பிரமணியசிவா கூட்டுறவு சர்க்கரை ஆலையின் கரும்பு பெருக்கு அலுவலர்(பொ) கேசவன், கரும்பு அலுவலர் சரவணன், பாப்பிரெட்டிப்பட்டி வட்டார வேளாண்மை உதவி இயக்குநர் மோகன் ஆகியோர் கலந்துகொண்டனர். போட்டிக்கான ஏற்பாடுகளை வேளாண்மை அலுவலர் அருணன், திருநாவுக்கரசு, சுரேஷ் ஆகியோர் செய்திருந்தனர்

இஆர்கே பள்ளியில் சாலை பாதுகாப்பு விழிப்புணர்வு கண்காட்சி

அரூர், பிப்.15:அரூர் அருகே எருமியாம்பட்டி இஆர்கே., மேல்நிலைப்பள்ளியில் சாலை பாதுகாப்பு விழிப்புணர்வு கண்காட்சி நடந்தது. இஆர்கே கல்வி நிறுவனங்களின் தலைவர் செல்வராஜ் தலைமை வகித்தார். நிர்வாக அலுவலர் அருள்குமார் முன்னிலை வகித்தார். பாப்பிரெட்டிப்பட்டி தாசில்தார் கற்பகவடிவு சிறப்புரையாற்றினார். மோட்டார் வாகன ஆய்வாளர் பன்னீர்செல்வம் கண்காட்சியை தொடங்கி வைத்து ஹெல்மெட், சீட் பெல்ட் அணிவதன் அவசியம் குறித்து பேசினார். இதில், 450க்கும் மேற்பட்ட சாலை பாதுகாப்பு விழிப்புணர்வு அரங்குகளை மாணவர்கள் வைத்திருந்தனர். இதில் கோபிநாதம்பட்டி இன்ஸ்பெக்டர் முரளி, சப்-இன்ஸ்பெக்டர் கோகுல், செல்வம், ராமமூர்த்தி மற்றும் 2 ஆயிரத்திற்கும் மேற்பட்ட மாணவர்கள் கலந்து கொண்டனர். நிகழ்ச்சிக்கான ஏற்பாடுகளை பள்ளி ஆசிரியர்கள் மணிகண்டன், புஷ்பா, சசிகலா, பார்த்திபன் ஆகியோர் செய்திருந்தனர். தலைமையாசிரியர் தீத்துமாலை நன்றி கூறினார்.

காவல்துறை சார்பில் மதுவிலக்கு வழக்கில் சிக்கிய இருசக்கர வாகனங்கள் ஏலம்

தர்மபுரி, பிப்.15: தர்மபுரி மாவட்டத்தில் மதுவிலக்கு வழக்குகளில் பறிமுதல் செய்யப்பட்ட 49 இருசக்கர வாகனங்கள் வரும் 20ம் தேதி ஏலம் விடப்பட உள்ளது. இது குறித்து தர்மபுரி மாவட்ட காவல்துறை சார்பில் வெளியிடப்பட்டுள்ள அறிக்கை: தர்மபுரி மாவட்டத்தில், மதுவிலக்கு வழக்குகளில் பறிமுதல் செய்யப்பட்ட 49 இருசக்கர வாகனங்கள் வரும் 20ம் தேதி காலை 10 மணிக்கு, மாவட்ட எஸ்பி அலுவலக வளாகத்தில் பொது ஏலம் விடப்பட உள்ளது. ஏலம் விடப்படும் வாகனங்களை, 20ம் தேதி காலை 8 மணி முதல் பார்வையிடலாம். வாகனத்தை ஏலம் எடுத்தவர்கள் அப்பொழுதே முழு தொகையையும், வரியுடன் செலுத்த வேண்டும். மேலும் விபரங்களுக்கு, கூடுதல் எஸ்பியை 04342-262581 என்ற எண்ணிலோ அல்லது நேரிலோ தொடர்பு கொள்ளலாம். இவ்வாறு அறிக்கையில் கூறப்பட்டுள்ளது.

மொரப்பூரில் சில்லறையில் வைக்ேகால் விற்பனை

அரூர், பிப்.14:மொரப்பூர் பகுதியில் செயல்படும் கடைகளில் தீவன வைக்கோல் சில்லறை முறையில் விற்பனை செய்யப்படுகிறது.தர்மபுரி, கிருஷ்ணகிரி மாவட்டங்களில் பருவ மழை பெய்யாததால், நிலத்தடி நீர் மட்டம் மிகவும் குறைந்தது. இதனால் குடிநீருக்கே மக்கள் தவிக்கும் நிலை ஏற்பட்டுள்ளது. இதனால் விவசாயம் முற்றிலும் அழிந்துவிட்டது. பயிர் செய்திருந்த தென்னை, வாழை உள்ளிட்டவை தண்ணீர் இல்லாமல் கருகியது. கால்நடைகளுக்கும் போதிய தீவனம் இல்லாத நிலை ஏற்பட்டுள்ளது. எனவே டெல்டா பகுதிகளிலிருந்து, வைக்கோலை மொத்தமாக வாங்கி வரும் தீவன கடைகாரர்கள், அதனை சில்லறை முறையில் ஒரு கட்டு ₹240 என விற்பனை செய்து வருகின்றனர். கடந்த ஆண்டு, லாரிகளில் மொத்தமாக வாங்கிய விவசாயிகள், இந்த ஆண்டு மொத்தமாக வைக்கோல் வாங்க கூட வழியில்லாத நிலை ஏற்பட்டுள்ளது. மொரப்பூர் பகுதிகளில் உரக்கடைகள், தீவன கடைகளில் இது போல் வைக்கோல் வியாபாரம் தொடங்கியுள்ளது.

அரசு பள்ளியில் கல்வி சீர் விழா

அரூர், பிப்.14: அரூர் அருகே சின்னாங்குப்பம் அரசு உயர்நிலைப்பள்ளியில், கல்வி சீர் திருவிழா நடந்தது. இதற்கு பள்ளி தலைமை ஆசிரியர் ஸ்ரீதர் தலைமை வகித்தார். பெற்றோர் ஆசிரியர் கழக தலைவர் முருகேசன், பள்ளி மேலாண்மை குழு தலைவர் தமிழரசி ஆகியோர் முன்னிலை வகித்தனர். சிறப்பு விருந்தினராக, இப்பள்ளியின் முன்னாள் மாணவர் பல்மருத்துவர் சுரேஷ் பள்ளிக்கு யுபிஎஸ் சாதனத்தை பரிசாக வழங்கினார். பள்ளி தலைமை ஆசிரியர் மாணவர்களுக்கு எழுதுப்பொருட்களை வழங்கினர். இதில் ஆசிரியர்கள், மாணவர்கள் கலந்து கொண்டனர்.

பிஎஸ்ஏ கல்வியியல் கல்லூரியில் கருத்தரங்கு

தர்மபுரி, பிப்.14: தர்மபுரி சோலைக்கொட்டாய் பிஎஸ்ஏ கல்வியியல் (பி.எட்) கல்லூரியில், கற்பித்தலில் புதுமையும் சமூக முன்னேற்றமும் பற்றி ஒருநாள் கருத்தரங்கு நடந்தது. பிஎஸ்ஏ கல்வி நிறுவனங்களின் தலைவர் சண்முகவடிவேல் தலைமை வகித்தார். உதவி பேராசிரியர் ஸ்ரீ லட்சுமி வரவேற்றார். கல்லூரி முதல்வர் பாலாஜி முன்னிலை வகித்தார். குருகுல கல்வி முறையும் இன்றைய நவீன கல்வி முறையும் பற்றிய தகவல்கள் விரிவாக எடுத்தரைக்கப்பட்டது. வருவான் வடிவேலன் கல்வியியல் கல்லூரி முன்னாள் முதல்வர் சுரேஷ் சிறப்பு விருந்தினராக கலந்து கொண்டார். பிஎஸ்ஏ கலை மற்றும் அறிவியல் கல்லூரி முதல்வர் முனைவர் தமிழரசன், கதிரவன் மற்றும் மாணவ, மாணவிகள் கலந்து கொண்டனர்.

அகில இந்திய சிலம்பாட்ட போட்டியில் அரசு பள்ளி மாணவர் தங்கம் வென்று சாதனை

தர்மபுரி, பிப்.14: தர்மபுரி மாவட்டம் ஏலகிரி அரசு பள்ளி மாணவன், அகில இந்திய அளவிலான சிலம்பாட்ட போட்டியில் தங்கப்பதக்கம் வென்று சாதனை படைத்துள்ளார்.அகில இந்திய சிலம்ப சம்மேளனம் சார்பில், நாமக்கல் மாவட்டம் திருச்செங்கோடு கே.எஸ்.ஆர். கல்லூரியில், அகில இந்திய அளவில் சிலம்பாட்டப்போட்டி நடந்தது. இந்தியாவில் உள்ள பல்வேறு மாநிலங்களிலிருந்து 900க்கும் மேற்பட்ட வீரர்கள் இந்த போட்டியில் கலந்து கொண்டனர். இப்போட்டி சீனியர், ஜூனியர், சப்ஜூனியர் உள்ளிட்ட 4 பிரிவுகளில் நடந்தது. இந்த அகில இந்திய அலவிலான சிலம்பாட்ட போட்டியில், தர்மபுரி மாவட்டம் நல்லம்பள்ளி ஒன்றியம் ஏலகிரி அரசு உயர்நிலைப்பள்ளியில் 9ம் வகுப்பு படிக்கும் மாணவன் நவீன்குமார் கலந்து கொண்டு, தொடுப்பள்ளி பிரிவில் தங்கப்பதக்கமும், தனித்திறமை பிரிவில் வெங்கலப்பதக்கமும் பெற்று வெற்றி பெற்றார். ஆசிய சிலம்பாட்ட போட்டிக்கு இம் மாணவர் தேர்வு செய்யப்பட்டுள்ளார். சாதனைபடைத்த நவீன்குமாரை, பள்ளியின் தலைமை ஆசிரியர் தங்கவேல் பாராட்டி வாழ்த்து தெரிவித்தார். அப்போது, உடற்கல்வி இயக்குனர் பாலமுருகன் மற்றும் உடற்கல்வி ஆசிரியை பாலசுந்தரி ஆகியோர் வாழ்த்து தெரிவித்தனர்.

பாப்பிரெட்டிப்பட்டி அருகே குப்பை தேக்கத்தால் சுகாதார சீர்கேடு

பாப்பிரெட்டிப்பட்டி, பிப்.14: பாப்பிரெட்டிப்பட்டி அருகே வெங்கடசமுத்திரம் ஊராட்சியில், 500க்கும் மேற்பட்ட குடும்பத்தினர் வசித்து வருகின்றனர். வெங்கடசமுத்திரத்தில் இருந்து மோளையானூர் செல்லும் சாலையில் இக்கிராமம் அமைந்துள்ளது. அப்பகுதியில் சேகரமாகும் கட்டிட கழிவுகள் மற்றும் உணவு பொருட்கள், குப்பைகளை சாலையோரங்களில் கொட்டி செல்கின்றனர். சிலர் குப்பைகளுக்கு தீ வைத்து விடுவதால், புகை மூட்டம் ஏற்பட்டு வாகன ஓட்டிகள் சிரமப்பட்டு வருகின்றனர். இதனால் அப்பகுதியில் சுகாதார சீர்கேடு ஏற்பட்டு வருகிறது. எனவே வாகன ஓட்டிகளின் நலனை கருத்தில் கொண்டு, சாலையோரங்களில் குப்பைகள் கொட்ட தடை விதிக்கவும், தேங்கியுள்ள குப்பைகளை உடனடியாக அகற்றவும் நடவடிக்கை எடுக்க ேவண்டும் என அப்பகுதி மக்கள் ேகாரிக்கை விடுத்துள்ளனர்.

தாலிக்கு தங்கம் வழங்கும் விழா

தர்மபுரி, பிப்.14: தர்மபுரி மாவட்டத்தில் தாலிக்கு தங்கம், திருமண நிதி உதவியும், மானிய விலையில் இருசக்கர வாகனங்கள் வழங்கும் விழா நடந்தது. தர்மபுரி கலெக்டர் அலுவலகத்தில் நடந்த விழாவில், 460 பயனாளிகளுக்கு தலா 8 கிராம் தாலிக்கு தங்கம் வீதம் 3.6 கிலோ கிராம் தங்கமும், ₹1.8 கோடி மதிப்பில் திருமண நிதி உதவியும், 220 மகளிருக்கு மானிய விலையில் இரு சக்கர வாகனங்களையும், உயர்கல்வித்துறை அமைச்சர் கே.பி. அன்பழகன் வழங்கினார். விழாவிற்கு கலெக்டர் மலர்விழி தலைமை வகித்தார். இதில், மாவட்ட வருவாய் அலுவலர் ரஹமத்துல்லா கான், சப் கலெக்டர் சிவன் அருள், மாவட்ட ஊரக வளர்ச்சி முகமையின் திட்ட இயக்குநர் காளிதாசன், திட்ட அலுவலர் (மகளிர் திட்டம்) ஆர்த்தி, மாவட்ட சமூகநல அலுவலர் (பொ) நாகலட்சுமி உள்ளிட்ட பலர் கலந்து கொண்டனர்.

கல்வி மாவட்ட அளவில் உலகத்திறனாய்வு தடகள போட்டி 1000 மாணவ, மாணவிகள் பங்கேற்பு

தர்மபுரி, பிப்.14: தர்மபுரி கல்வி மாவட்ட அளவில் நடந்த உலகத்திறனாய்வு தடகள போட்டியில், ஆயிரம் மாணவ, மாணவிகள் கலந்து கொண்டனர்.தர்மபுரி மாவட்ட தமிழ்நாடு விளையாட்டு மேம்பாட்டு ஆணையம் சார்பில், உலகத்திறனாய்வு தடகள போட்டி, நேற்று மாவட்ட விளையாட்டு மைதானத்தில் நடந்தது. போட்டிகளை மாவட்ட விளையாட்டு அலுவலர் ராஜேந்திரன் தொடங்கி வைத்தார். 100மீ, 200மீ, 400மீ, நீளம் தாண்டுதல், உயரம் தாண்டுதல், குண்டு எறிதல் ஆகிய போட்டிகளில், 6, 7, 8ம் வகுப்பு படிக்கும் மாணவ, மாணவிகள் ஆயிரத்திற்கும் மேற்பட்டார் பங்கேற்றனர். கல்வி மாவட்ட அளவிலான விளையாட்டு போட்டியில் வெற்றி பெற்ற மாணவ, மாணவிகள் மண்டல போட்டிக்கு அழைத்து செல்லப்படுகின்றனர். மண்டல போட்டிகளில் 7 கல்வி மாவட்ட அளவில் தேர்வு போட்டிகள் நடைபெற்று, நிர்ணயிக்கப்பட்ட அளவீட்டினை பெற்றவர்கள் தமிழ்நாடு விளையாட்டு மேம்பாட்டு ஆணைய மாநில அளவிலான ஸ்பிரின்ட்ஸ் அன்டு ஜம்ப்ஸ் அகாடமி, மிடில் டிஸ்டன்ஸ் அகாடமி, லாங் டிஸ்டன்ஸ் அகாடமி, த்ரோஸ் அகாடமி, புட்பால் அகாடமி, ஹாக்கி அகாடமி, டைவிங் அகாடமி ஆகிய சிறப்பு அகாடமிக்கு, 1 முதல் 10 இடங்களை பெற்ற வீரர்வீராங்கனைகள் தேர்வு செய்யப்படுகின்றனர்.

ஏஐடியூசி கட்டிட தொழிலாளர் சங்க ஆலோசனை கூட்டம்

தர்மபுரி, பிப்.14: தர்மபுரி மாவட்ட ஏஐடியூசி கட்டிடத் தொழிலாளர் சங்கத்தின் ஆலோசனை கூட்டம், பிக்கிலியில் நடந்தது. கிளை செயலாளர் முருகன் தலைமை வகித்தார். கிளை தலைவர் சின்னசாமி வரவேற்றார். கவுரவ தலைவர் அரங்கநாதன் சங்க கொடி ஏற்றினார். மாநில துணை செயலாளர் செல்வராஜ், மாநில துணை தலைவர் முனுசாமி, மாவட்ட செயலாளர் சுதர்சனன், ஏஐடியூசி மாவட்ட தலைவர் மாதேஸ்வரன், மாவட்ட பொது செயலாளர் மணி ஆகியோர் சிறப்புரையாற்றினர். இதில் பிக்கிலி, பெரியூர் சங்க நிர்வாகிகள் கலந்து கொண்டனர். கூட்டத்தில், வீடு கட்டும் தொழிலாளர்களுக்கு வீடு கட்டிக் கொடுக்க வேண்டும். கட்டுமான தொழிலாளர்களுக்கு இயற்கை மரண நிதியுதவி ₹5லட்சம், விபத்து இழப்பீடு ₹10 லட்சம் வழங்க வேண்டும். கட்டட தொழிலாளி குழந்தைகளின் கல்வி செலவு முழுவதையும் அரசே வழங்க வேண்டும். அனைத்து தொழிலாளர்களுக்கும், விண்ணப்பித்த ஒரு மாதத்திற்குள் நலத்திட்ட உதவிகளை  வழங்க வேண்டும் என்பது உள்ளிட்ட தீர்மானங்கள் நிறைவேற்றப்பட்டன. கிளை பொருளாளர் பெருமாள் நன்றி கூறினார்.