Dindigul - Dinakaran

பழநி கோயிலில் மகனுடன் ஓபிஎஸ் திடீர் தரிசனம்

பழநி, மே 23: இன்று வாக்கு எண்ணிக்கை நடக்கவுள்ள நிலையில் பழநி கோயிலில் துணை முதல்வர் ஓ.பன்னீர்செல்வம் தனது மகனுடன் திடீர் தரிசனம் செய்தார். மக்களவை தேர்தல், சட்டமன்ற இடைத்தேர்தல் வாக்கு எண்ணிக்கை இன்று நடைபெறவுள்ளது. இந்நிலையில் திண்டுக்கல் மாவட்டம், பழநி மலைக்கோயிலில் தமிழக துணை முதல்வர் ஓ.பன்னீர்செல்வம் சாமி தரிசனம் செய்ய நேற்று மாலை வந்திருந்தார். உடன் அவரது மகனும், தேனி நாடாளுமன்ற தொகுதி வேட்பாளருமான ரவீந்திரநாத் குமார், மற்றொரு மகனான பிரதீப் மற்றும் குடும்பத்தினர் வந்திருந்தனர்.முருகன் ராஜ அலங்காரத்தில் காட்சியளிக்கும் சாய்ரட்சை பூஜையில் கலந்து கொண்ட ஓபிஎஸ் ெதாடர்ந்து தங்கரதம் இழுத்தும் வழிபாடும் செய்தார். இவருடன் வனத்துறை அமைச்சர் திண்டுக்கல் சீனிவாசன், முன்னாள் எம்எல்ஏ சுப்புரத்தினம், மாவட்ட ஆவின் பால் தலைவர் செல்லச்சாமி சுவாமி தரிசனம் செய்தனர். பின்னர் ஓபிஎஸ், அவரது குடும்பத்தினர் மலைக்கோயிலில் இருந்து ரோப்கார் மூலம் இறங்கி சென்றனர். முன்னதாக பத்திரிகையாளர்கள் ஓபிஎஸ்சிடம் பேட்டி எடுக்க முற்பட்ட போது, ‘சாமி தரிசனம் செய்ய மட்டுமே வந்துள்ளேன்’ என கூறி சென்றார்.

திண்டுக்கல்லில் ‘கொட்டும்’ குடிநீர் வருமானத்தால் கேள்விக்குறியாகும் வருங்காலம்

திண்டுக்கல், மே 23: இந்தாண்டு லோக்சபா தேர்தலால் தமிழகத்தில் மக்கள் தாகத்தை சரி செய்ய திட்டங்கள் தீட்டப்படவில்லை. வறட்சியை இலக்காக கொண்டு ஏற்கனவே கொண்டு வரப்பட்ட திட்டங்களும் முறையாக செயல்படுத்தப்படவில்லை. இதனால் எந்தாண்டும் இல்லாத நிலையில் குடிநீர் பிரச்னை அனைத்து தரப்பினரையும் பாதித்துள்ளது. திண்டுக்கல்லில் ஒவ்வொரு நாளும் ஒவ்வொரு வார்டிலும் மறியல், மனுக்கொடுத்தல் என மக்கள் சாரை, சாரையாக அதிகாரிகளின் கவனத்தை ஈர்க்கும் போராட்டத்தில் ஈடுபட்டு வருகின்றனர். திண்டுக்கல்லின் சராசரி மழையளவு 836மி.மீ.,தான். இது கடந்த 10 ஆண்டுகளாக எட்டவில்லை. இதனால் 2, 456 கண்மாய்கள், குளங்கள், ஏரிகள் காய்ந்து கிடக்கிறது.குடிநீர் விற்பனை ஜோர் திண்டுக்கல் மாவட்டத்தில் உள்ள 90 ஆயிரம் கிணறுகளிலும் தண்ணீர் இல்லாத நிலை நீடிக்கிறது. இதனால் குடிநீர் பிரச்னை தலைவிரித்தாடுகிறது. இதை பயன்படுத்தி திண்டுக்கல்லில் குடிநீர் விற்பனையும் கொடிகட்டி பறக்கிறது. அலுவலகங்கள், அடுக்குமாடி குடியிருப்புகளில் சுத்திகரிக்கப்பட்ட 20 லிட்டர் குடிநீர் கேன் பிரதானமாக உள்ளது. ஒரு கேன் ரூ.30 முதல் ரூ.40 வரை விற்கப்படுகிறது. உப்பு தண்ணீர் ஒரு மினி டேங்கர் ஆயிரம் லிட்டர் ரூ.200 முதல் ரூ.300க்கு விற்கப்படுகிறது. கிராமங்களில் உள்ள தனியார் ஆழ்துளை கிணற்றில் இருந்து உறிஞ்சப்படும் தண்ணீர் லாரி, வேன், ஆட்டோ டேங்கரில் நிரப்பப்பட்டு, குடம் ரூ.10க்கு விற்கப்படுகிறது. இதனால் விவசாயிகள் பலரும் தண்ணீர் விற்பனையில் இறங்கியுள்ளனர். இதன்மூலம் இலவச மின்சாரம் தண்ணீர் வியாபாரத்திற்கு பயன்படுத்தி ஒவ்வொரு நாளும் பல லட்சம் ரூபாய் ஈட்டுகின்றனர்.இதுகுறித்து சுற்றுச்சூழல் ஆர்வலர்கள் கூறுகையில், ‘தமிழகத்தின் ஆண்டு சராசரி மழையளவு 600 மி.மீ., என இருந்தாலும் அதிலும் பாதிதான் பெய்கிறது. கோடை ஒருபுறம், வறண்ட நீர் ஆதாரம் மறுபுறம் என வாட்டி வதைப்பதால் நிலத்தடிநீர் உறிஞ்சப்படுவதில் தமிழகம் முதல் மாநிலமாக திகழ்கிறது. கிராமங்களில் தண்ணீர் உறிஞ்சப்பட்டு நகரப்பகுதியில் விலைக்கு விற்கப்படுகிறது. பணம் கொடுத்தால் எதுவும் சாத்தியம் என்ற மனப்பான்மை மக்களிடம் வளர்ந்து விட்டது. அதனால் யாரும் தண்ணீர் சிக்கனத்தை பற்றி கவலைப்படுவதாக தெரியவில்லை. இதனால் இன்னும் ஒன்றிரண்டு ஆண்டுகளில் இந்தியாவில் பல நகரங்களில் நிலத்தடிநீர் இல்லாத நிலை ஏற்படும். அதில் திண்டுக்கல்லும் இடம் பிடிக்க வாய்ப்புள்ளது. வருமானத்திற்காக நிலத்தடிநீர் ஆதாரம் அளவு கடந்து உறிஞ்சப்படுவது. இது எதிர்காலத்தில் மிகப்பெரிய பிரச்னையை உண்டாக்கும். மழை பெய்யும்போது கழிவுநீரில் பல லட்சம் லிட்டர் தண்ணீர் வீணாக கலக்கிறது. இதை தடுத்து வீடுகளில் மழை நீர் சேமிப்பு மையங்கள் ஏற்படுத்த வேண்டும். இதனால் நிலத்தடிநீர் மட்டம் உயரும் என்பது மட்டுமல்லாமல், கோடை காலத்தில் தண்ணீர் தேவையையும் பூர்த்தி செய்து கொள்ளலாம். மேலும் மாவட்ட நிர்வாகம் தண்ணீர் சிக்கனம் குறித்து விழிப்புணர்வை ஏற்படுத்த வேண்டும்’ என்றனர்.

கொடைக்கானல் ஆனந்தகிரியில் பெரிய மாரியம்மன் கோயில் திருவிழா

கொடைக்கானல், மே 23: கொடைக்கானல் ஆனந்தகிரி பெரிய மாரியம்மன் கோயில் திருவிழாவில் பக்தர்கள் நேர்த்திக்கடன் செலுத்தி பரவசமடைந்தனர். கொடைக்கானல் மூஞ்சிக்கல்லில் உள்ளது ஆனந்தகிரி பெரிய மாரியம்மன் கோயில். இங்கு ஆண்டுதோறும் சித்திரை பெருந்திருவிழா வெகு விமரிசையாக நடக்கும். இந்தாண்டு திருவிழா கடந்த 7ம் தேதி கொடியேற்றத்துடன் துவங்கியது. முதல்நாளில் காவல்துறை சார்பில் மண்டகப்படி நடைபெற்றது. தொடர்ந்து கேசிஎஸ் பணியாளர்கள், சுற்றுலா வாகன ஓட்டுனர்கள், அந்தோணியார் கோயில் தெரு மக்கள் சார்பில் மண்டகப்படிகள் நடைபெற்றன. இரண்டாவது நாளான மே 14ல் ஆனந்தகிரி 1, 3, 5, 6, 7 ஆகிய தெருக்களில் அம்மன் பவனி வருதல் நிகழ்ச்சியும், தொடர்ந்து பல்வேறு தரப்பின் சார்பில் மண்டகப்படிகள் நடைபெற்றன.மே 17ல் திருக்கல்யாணம், மே 19ல் மலர் வழிபாட்டு விழா, அம்மன் அஞ்சல் உற்சவம், மே 20ல் அம்மன் பூப்பல்லக்கில் பவனி வருதல், மே 21ல் சக்தி கரகம் மாவிளக்கு எடுத்தல் நடைபெற்றது. நேற்று ஏராளமான பக்தர்கள் அக்னிசட்டி எடுத்தல், அலகு குத்துதல், பறவை காவடி எடுத்தல், பொங்கல் வைத்தல் உள்ளிட்ட நேர்த்திக்கடவ்களை செலுத்தினர். திருவிழாவின் இறுதிநாளான மே 28ல் மறுபூஜையும், பாலாபிஷேகமும் நடைபெறும். ஏற்பாடுகளை விழா குழுவினர், வட்டார இந்து மகாஜன சங்கம், இந்து முன்னணி, ஆனந்தகிரி இந்து இளைஞரணி உள்ளிட்டோர் செய்திருந்தனர்.

சுழற்றி அடிக்கும் சூறைக்காற்று பழநி கிராமங்களில் மின்சார சேவை பாதிப்பு

பழநி, மே 23: பழநி பகுதியில் சுழற்றி அடிக்கும் சூறைக்காற்றால் ஏராளமான கிராமங்களில் மின்சார சேவை பாதிக்கப்பட்டுள்ளது.பழநி நகர் மற்றும் அதன் சுற்றுப்புற கிராமங்களில் கடந்த சில நாட்களாக சூறைக்காற்று வீசி வருகிறது. சாலையில் உள்ள புழுதிகளுடன் காற்று வீசுவதால் எதிரே வரும் வாகனங்கள்கூட தெரிவதில்லை. இதனால் வாகனஓட்டிகள் கடும் அவதிக்குள்ளாகி உள்ளனர். இந்நிலையில் சூறைக்காற்றின் காரணமாக பழநி அருகே உள்ள பாப்பம்பட்டி, காவலப்பட்டி, வேலாயுதம்பாளையம்புதூர் உள்ளிட்ட ஊர்களில் நேற்று முன்தினம் இரவு முழுவதும் மின்சாரம் தடைபட்டது. நேற்று பகல் நேரங்களிலும் அடிக்கடி மின்தடை ஏற்பட்டு வந்தது. கடந்த 2 நாட்களாகவே இப்பகுதிகளில் கேபிள் டிவிக்களும் பழுதடைந்துள்ளன. இதனால் இப்பகுதியில் உள்ள குடியிருப்புவாசிகள் கடும் அவதிக்குள்ளாகி உள்ளனர். தடையில்லா மின்சாரம் கிடைக்க மின்வாரிய அதிகாரிகள் நடவடிக்கை எடுக்க வேண்டுமென பொதுமக்கள் கோரிக்கை விடுத்துள்ளனர்.இதுகுறித்து மின்வாரிய அதிகாரிகளிடம் கேட்டபோது கூறியதாவது,காற்று பலமாக வீசுவதால் மின்கம்பிகளின் மீது மரக்கிளைகள் விழுகின்றன. இதனால் மின்தடை ஏற்படுகிறது. மின்தடையை சரிசெய்ய மின்வாரிய ஊழியர்கள் முழுவீச்சில் ஈடுபடுத்தப்பட்டுள்ளனர். எனினும், காற்று பலமாக வீசும்போது மின்தடை தவிர்க்கமுடியாததாகி விடுகிறது. இவ்வாறு கூறினர்.

செம்பட்டியில் திருமண மண்டப ஸ்பீக்கர்களால் பாதிப்பு துறை அதிகாரிகள் நடவடிக்கை எடுப்பார்களா?

செம்பட்டி, மே 23: செம்பட்டியில் திருமண மண்டபங்களில் அதிக சப்தத்துடன் வைக்கப்படும் ஸ்பீக்கர்களால் அனைத்து தரப்பினரும் பாதிப்படையும் நிலை உள்ளது. செம்பட்டியில் திருமண மண்டபம் அருகே பொதுமக்கள் மற்றும் காவலர் குடியிருப்பு, காவல்நிலையம் உள்ளன. இதேபோல் ஆத்தூர் திருமண மண்டபம் அருகில் பொதுமக்கள் குடியிருப்பு, பத்திரப்பதிவு துறை அலுவலகம், சிறு கடைகள் மற்றும் சித்தையன்கோட்டை திருமண மண்டபம் அருகில் பஸ்நிலையம், சிறுவர்கள் பள்ளிக்கூடம், தொலைபேசி அலுவலகம், வங்கி, குழந்தை பாலூட்டும் நிலையம், சிறு தொழில்கூடங்கள் உள்ளன. இந்த திருமண மண்டபங்களில் விஷேச காலங்களில் ஒலிப்பெருக்கி வைப்பவர்கள் மேற்கண்ட எதையும் கவனத்தில் கொள்ளாமல் 1000 வாட்ஸ் ஆம்பிள்பயர் உதயுடன் ஆளுயர ஸ்பீ்க்கர் பாக்ஸ்கள் 2 அல்லது 3 வைத்து அப்பகுதியையே அலற வைக்கின்றனர். இதை யாரேனும் கேட்டால் ஒலிபெருக்கி வைப்பவர்கள் விஷேச வீடு அப்படித்தான் இருக்கும் என கேட்பவர்களை தாக்கவும் துணிகிறார்கள். இதனால் அருகாமையில் உள்ள வயோதிகர்கள், நோயாளிகள், கர்ப்பிணிகள், வியாபாரிகள், அலுவலர்கள் என அனைத்து தரப்பினரும் பாதிப்படையும் நிலை உள்ளது. தற்போது திருமண விஷேசங்கள் தொடர்ந்து வரவுள்ளன. எனவே துறை சார்ந்த அதிகாரிகள் தலையிட்டு யாருக்கும் இடையூறு ஏற்படாத வண்ணம் திருமண மண்டபத்தின் உட்பகுதியில் சிறியளவு ஸ்பீக்கர் பாக்ஸ்களை வைத்து பாடல்களை ஒலிபரப்பிட உரிமையாளர்களுக்கு அறிவுறுத்த வேண்டும் என பொதுமக்களும், சமூகஆர்வலர்களும் கோரிக்கை விடுத்துள்ளனர்.

மாநில மலரில் மகத்தான லாபம் செங்காந்தளுக்கு விலை நிர்ணயிக்குமா அரசு

பழநி, மே 23: மாநில மலரான செங்காந்தளுக்கு (கண்வலி) அதிக கிராக்கி இருப்பதால் விலை நிர்ணயிப்பதில் அரசு அக்கறை காட்ட வேண்டுமென விவசாயிகள் கோரிக்கை விடுத்துள்ளனர். பழநி அருகே தொப்பம்பட்டி, வாகரை, பொருளூர், பூலாம்பட்டி, ஒட்டன்சத்திரம் அருகே தேவத்தூர், போடுவார்பட்டி, கள்ளிமந்தையம், பாறைவலசு, கப்பல்பட்டி உள்ளிட்ட பல கிராமங்களில் விவசாயிகள் பயிரிடும் முக்கிய பயிர்களில் ஒன்றாக கண்வலி கிழங்கு உள்ளது. இதன் உள்ளூர் பெயர் கண்வலி கிழங்காக இருந்தாலும், அதை செங்காந்தாள் செடி, கார்த்திகை செடி என்று அழைக்கும் பழக்கமும் வழக்கத்தில் இருந்து வருகிறது. நெருப்பு போன்று சிவந்த நிறத்தில் இதழ்களை கொண்டு கண்ணை கவரும் வகையில் செங்காந்தள் மலர்கள் இச்செடியில் பூக்கிறது. இதன் விதைகள் மருத்துவ குணம் வாய்ந்தது என்பதுடன், செங்காந்தள் மலர் நமது மாநில மலர் என்ற பெருமையையும் பெற்றிருப்பது கூடுதல் சிறப்பு. கண்வலி செடி கோச்சிசாசியே எனும் தாவர இனத்தை சேர்ந்தவை.மருத்துவ குணங்கள் அதிகம்இச்செடியில் காய்க்கும் விதையிலும், கிழங்கிலும் புற்றுநோய் பரவாமல் தடுக்கக்கூடிய கால்சிசின், குலோரியோசின் மருத்துவ பொருட்கள் அதிகளவில் உள்ளன. கண்வலி விதையில் இருந்து நச்சுத்தன்மையை நீங்கி மருந்தாக தயாரித்து ஹீமோதெரபி மூலம் புற்றுநோய் பரவாமல் தடுக்க மருத்துவத்துறையில் பயன்படுத்தப்படுவதாகவும், இதயநோய், தண்டுவடம் தொடர்பான நோய்களுக்கு மருந்துகள் தயாரிக்க பயன்படுவதாகவும் கூறப்படுகிறது. சித்தமருத்துவத்தில் கண்வலி வேர், கிழங்கு மற்றும் விதைகளில் இருந்து வெளிப்பூச்சு மருந்துகள் தயாரிக்கப்படுகிறது. கண்வலியில் மருத்துவ குணம் இருப்பதை அறிந்த வெளிநாட்டு நிறுவனங்கள் சில விவசாயிகளிடம் இதன் விதையை அதிக விலை கொடுத்து வாங்கினர். அதன்பிறகே தொப்பம்பட்டி, ஒட்டன்சத்திரம் பகுதிகளில் கண்வலி பயிரிடுவதில் விவசாயிகள் அதிக அக்கறை காட்ட துவங்கினர். தற்போது சுமார் 600 ஏக்கரில் கண்வலி கிழங்கு பயிரிடப்படுவதாக தெரிகிறது.பயிரிடும் முறைகண்வலி பயிரிட செம்மண் பூமியும், குறைந்தளவு மழையும் உள்ள சூழல் தேவையாக உள்ளது. ஆந்திர மாநிலத்தில் இருந்து கிலோ ரூ.500 முதல் ரூ.600 வரை கொடுத்து கண்வலி கிழங்கை வாங்கி வரும் விவசாயிகள் அதனை கீற்று கொட்டகையில் வைத்து 6 மாத காலம் பராமரிக்கின்றனர். கிழங்கு முளைப்புதன்மையை அடைந்தவுடன் தங்களது நிலத்தில் பதிக்க துவங்குகின்றனர். முன்னதாக நிலத்தை உழுது கிழங்குகள் வளர தேவையான உரங்களை இட்டு, கண்வலி செடி படரும் வகையில் கம்பி, சிறுசிறு குச்சிகளை பயன்படுத்தி பந்தல் போன்ற அமைப்பை ஏற்படுத்தி வைக்கின்றனர். 1 ஏக்கரில் கண்வலி பயிரிட சுமார் 700 கிலோ கிழங்கு தேவைப்படுகிறது. சுமார் ரூ.5 லட்சம் வரை செலவு செய்வதாகவும் விவசாயிகள் தெரிவிக்கின்றனர். நெல், கரும்பு போன்ற பயிர்கள் மழையை நம்பி மட்டுமே பயிரிடப்படும் நிலையில் கண்வலி செடி அதிகம் மழை பெய்தாலும் சேதமாகும், அதிக வெயில் தாக்கினாலும் கருகிவிடுமாம். மேலும், சொட்டுநீர் பாசனத்தை அமைத்து குறைந்த அளவு நீர் பாய்ச்சினாலே போதுமானதாக இருக்குமென விவசாயிகள் கூறுகின்றனர்.இதுகுறித்து பூலாம்பட்டியை சேர்ந்த விவசாயி கருப்புச்சாமி கூறியதாவது,கண்வலி கிழங்கை நிலத்தில் நட்டத்தில் இருந்து 5 மாதத்தில் பூ பூத்து காய்க்க துவங்கி விடுகிறது. மருந்து தயாரிக்கும் தனியார் கம்பெனிகள் எங்கள் பகுதிக்கே வந்து விதையின் தரத்திற்கேற்ப விலை கொடுத்து விதைகளை வாங்கி சென்றபோது 1 கிலோவிற்கு ரூ.3 ஆயிரத்தில் இருந்து ரூ.3 ஆயிரத்து 500 வரை விலை கிடைத்தது. இதனால் அதிக தொகை லாபமாக கிடைத்தது. கண்வலி உற்பத்தியில் 90% அளவிற்கு ஒட்டன்சத்திரம், தொப்பம்பட்டியில் இருந்தே உற்பத்தி செய்யப்படுகிறது. இத்தாலி போன்ற வெளிநாடுகளுக்கு கண்வலி விதைகள் அதிகளவில் ஏற்றுமதி செய்யடுகிறது. சமீபகாலமாக தனியார் நிறுவனங்கள் உள்ளூர் இடைத்தரகர்களுடன் இணைந்து தங்களுக்குள் ஒரு ஒப்பந்தத்தை ஏற்படுத்தி கொண்டு கண்வலி விதையை குறைந்த விலையை கொடுத்து வாங்கி வருகின்றனர்.கடந்தாண்டு கண்வலி பயிரிட்ட எங்களை போன்ற விவசாயிகளிடம் ரூ.2 ஆயிரம் வரை மட்டுமே இடைத்தரகர்கள் பெற்று தந்தனர். இதனால் எதிர்பார்த்த லாபம் கிடைக்கவில்லை. நெல், கரும்பு, தென்னை போன்ற பயிர்களுக்கு மாற்று பயிராக பயிரிட்டு அதிக லாபம் ஈட்டக்கூடிய கண்வலி விவசாயத்தை அரசு முறைப்படுத்த வேண்டும். நெல், கரும்புக்கு அரசு உரிய விலை நிர்ணயம் செய்து கொள்முதல் செய்வதைப்போல், கண்வலிக்கும் உரிய விலை நிர்ணயம் செய்து இடைத்தரகர் பிடிகளில் இருந்து விவசாயிகளை அரசு பாதுகாக்க முன்வர வேண்டும். கண்வலியை அரசு அங்கீகரிக்கப்பட்ட விவசாய தொழிலாக அரசு அறிவிக்க வேண்டும். ஒட்டன்சத்திரம் பகுதியில் கண்வலி கொள்முதல் நிலையத்தை அமைக்க வேண்டும். மேலும், தமிழகத்தின் மாநில மலரான செங்காந்தளை அழிவின் விளிம்பில் இருந்து மீட்க வேண்டும். கண்வலியின் மருத்துவ பயன்களை அனைவரும் அறிந்து கொள்ளும் வகையில் அரசு அலுவலகங்கள், பூங்காக்கள், பள்ளிகளில் நட்டு பராமரிக்க வேண்டும்’ என்றார்.

தகுதி தேர்வில் தேர்ச்சி பெறாத 75 ஆசிரியர்களுக்கு பயிற்சி வகுப்பு

திண்டுக்கல், மே 23: திண்டுக்கல் மாவட்டத்தில் தகுதி தேர்வில் தேர்ச்சி பெறாத 75 ஆசிரியர்களுக்கு தேர்வு பயிற்சி வகுப்பு துவங்கியது.மத்திய அரசு அனைவருக்கும் இலவச கட்டாய கல்வி சட்டத்தை கொண் டுவந்தது. மேலும் பள்ளி ஆசிரியர்கள் தகுதி தேர்வில் (டெட்) தேர்ச்சி பெற உத்தரவிட்டது. இதையடுத்து 2010ம் ஆண்டிற்கு பின்பு, பணியில் சேர்ந்த ஆசிரியர்கள் தகுதி தேர்வு எழுதி தேர்ச்சி பெற வேண்டும் என அறிவிப்பு வெளியானது. இதற்கு 2015ம் ஆண்டு மார்ச் 31ம் தேதி வரை காலகெடு வழங்கப்பட்டது. பின்னர் அந்த காலக்கெடு இந்தாண்டு மார்ச் மாதம் வரை நீட்டிக்கப்பட்டது. இந்த வாய்ப்பை பயன்படுத்தி கொண்டு, இடைநிலை ஆசிரியர்கள், பட்டதாரி ஆசிரியர்கள் தகுதி தேர்வு எழுதினர். இதில் பலர் தேர்ச்சி பெற்றனர். எனினும் மாநிலம் முழுவதும் 1,500 பேர் தகுதி தேர்வில் தேர்ச்சி பெறவில்லை.இந்நிலையில் அடுத்த மாதம் ஆசிரியர் தகுதி தேர்வு நடக்கிறது. இதுவரை தேர்ச்சி பெறாத ஆசிரியர்கள், அந்த தகுதி தேர்வை எழுத தயாராகி வருகின்றனர். இதையொட்டி அரசு மற்றும் அரசு உதவிபெறும் பள்ளிகளை சேர்ந்த இடைநிலை, பட்டதாரி ஆசிரியர்களுக்கு தகுதி தேர்விற்கு பயிற்சி அளிக்கும்படி கல்வித்துறை உத்தரவிட்டுள்ளது. அதன்படி திண்டுக்கல் மாவட்டத்தில் அரசு, அரசு உதவிபெறும் பள்ளிகளில் பணியாற்றும் 75 ஆசிரியர்களுக்கு பயிற்சி அளிக்கப்படுகிறது. ஒட்டன்சத்திரத்தில் உள்ள அரசு மாவட்ட ஆசிரியர் பயிற்சி நிறுவனத்தில் மொத்தம் 10 நாட்கள் இப்பயிற்சி அளிக்கப்படுகிறது. அதில் இடைநிலை பட்டதாரி ஆசிரியர்களுக்கு தனித்தனியாக பயிற்சி அளிக்கப்படுகிறது. இதன்மூலம் ஆசிரியர்கள் தகுதி தேர்வில் தேர்ச்சி பெறுவார்கள் என கல்வித்துறை அதிகாரி ஒருவர் தெரிவித்தார்.

ஆக்கிரமிப்பின் பிடியில் பழநி பஸ்ஸ்டாண்ட் நடைமேடை

பழநி, மே 23: பழநி பஸ்ஸ்டாண்ட் நடைமேடை ஆக்கிரமிப்பின் பிடியில் சிக்கி இருப்பதால் பயணிகள் கடும் அவதிக்குள்ளாகி உள்ளனர்.அறுடை வீடுகளில் 3ம் படை வீடாக விளங்குவது பழநி தண்டாயுதபாணி சுவாமி கோயில். இங்கு தமிழகத்தின் பல்வேறு பகுதிகளில் இருந்தும், கேரளா போன்ற வெளிமாநிலங்களில் இருந்து நாள்தோறும் ஆயிரக்கணக்கான பக்தர்கள் வந்து செல்கின்றனர். இதன் காரணமாக பழநி நகருக்கு தமிழகத்தின் பல்வேறு பகுதிகளில் இருந்து பஸ்கள் இயக்கப்படுகிறது. இதனால் பழநி பஸ்நிலையத்தில் எப்போதும் பயணிகள் கூட்டம் இருந்து கொண்டே இருக்கும்.பஸ் நிலையத்திற்கு வரும் பயணிகளிடம் விற்பனை செய்வதற்காக நடைபாதைகளை ஆக்கிரமித்து ஏராளமான பழக்கடைகள், திண்பண்ட கடைகள் போடப்பட்டுள்ளன. நடைமேடைகளில் கடைகள் அமைத்திருப்பதால் பஸ்சிற்காக காத்திருக்கும் பயணிகள் வெயிலில் காய வேண்டி உள்ளது. நடைமேடை அருகே நிற்கும் பயணிகளையும் ஆக்கிரமிப்பு கடைக்காரர்கள் விரட்டி அடித்து விடுகின்றனர். வெளியூர்க்காரர்கள் என்பதால் பக்தர்களும் வேறு வழியின்றி பஸ்சிற்காக வெயிலிலேயே காத்திருக்கும் சூழ்நிலை ஏற்பட்டுள்ளது. பஸ்நிலையத்தின் எஞ்சிய பகுதிகளை நரிக்குறவர்கள் ஆக்கிரமித்து கடை விரித்துள்ளனர். இதனால் பயணிகள் கடும் அவதிக்குள்ளாகி உள்ளனர். எனவே, நகராட்சி நிர்வாகம் துரித நடவடிக்கை எடுத்து பஸ்ஸ்டாண்ட் நடைபாதை ஆக்கிரமிப்பு கடைகளை அகற்ற வேண்டுமென பக்தர்களும், பயணிகளும் கோரிக்கை விடுத்துள்ளனர்.

அனுமந்தராயன்கோட்டையில் பூட்டியே கிடக்கிறது பாத்ரூம் திறந்தவெளி தொடர்வதால் நோய் பரவும் அபாயம்

செம்பட்டி, மே 23: அனுமந்தராயன்கோட்டையில் மகளிர் சுகாதார வளாகம் பூட்டியே கிடப்பதால் திறந்தவெளி கழிப்பிடம் தொடர்கதையாகி நோய் பரவும் அபாயம் ஏற்பட்டுள்ளது. ரெட்டியார்சத்திரம் ஒன்றியத்திற்குட்பட்டது அனுமந்தராயன்கோட்டை. சுமார் 5000 பேர் வசிக்கின்றனர். இங்கு திறந்தவெளி கழிப்பிடத்தை ஒழிக்க தூய்மை இந்திய திட்டத்தின் கீழ் பொதுமைதானம் அருகே மகளிர் சுகாதார வளாகம் கட்டப்பட்டது. ஆரம்பத்தில் முறையாக இதை பராமரித்த ஊராட்சி நிர்வாகம் பின் வழக்கம்போல் கண்டுகொள்ளாமல் விட்டு விட்டது. ஒரு கட்டத்தில் சுகாதார வளாகத்தை பூட்டியே விட்டனர். இதனால் அப்பகுதி பெண்கள் மீண்டும் இரவுநேரங்களில் திறந்தவெளியை கழிப்பிடமாக பயன்படுத்தி வருகின்றனர். இதனால் அப்பகுதி முழுவதும் கடும் துர்நாற்றம் வீசுவதுடன் நோய் பரவும் அபாயம் ஏற்பட்டுள்ளது. இதுகுறித்து ஊராட்சி நிர்வாகத்திடம் பலமுறை புகார் தெரிவித்தும் நடவடிக்கை எடுக்கவில்லை.இப்பகுதி பெண்கள் கூறுகையில், ‘எதை ஒழிக்க சுகாதார வளாகத்தை திறந்தார்களோ அது கொஞ்சம் கூட நடக்கவில்லை. மந்தராயன்கோட்டையில் தூய்மை இந்தியா திட்டம் முடங்கி திறந்தவெளி கழிப்பிடம் தொடர்கதையாக உள்ளது. எனவே ஊராட்சி நிர்வாகம் பூட்டி கிடக்கும் சுகாதார வளாகத்தை உடனே பயன்பாட்டிற்கு கொண்டு வருவதுடன் முறையாக பராமரிக்கவும் நடவடிக்கை எடுக்க வேண்டும்’ என்றனர்.

வரத்து குறைவால் எகிறியது எலுமிச்சை

திண்டுக்கல், மே 23: திண்டுக்கல் மார்க்கெட்டில் வரத்து குறைவால் எலுமிச்சை விலை கிலோ தினந்தோறும் அதிகரித்து வருகிறது. இதனால் விவசாயிகள் மகிழ்ச்சியடைந்துள்ளனர். திண்டுக்கல் மாவட்டத்தில் ஒட்டன்சத்திரம், ரெட்டியார்சத்திரம், நத்தம், கொடைக்கானல், சிறுமலையில் சுமார் 800 எக்டேரில் எலுமிச்சை சாகுபடி செய்யப்படுகிறது. இப்பகுதிகளில் இருந்து வாரம் ஒரு முறை டன் கணக்கில் எலுமிச்சை விற்பனைக்கு அனுப்பப்படுகிறது.திண்டுக்கல் மார்க்கெட்டிற்கு தினமும் ஒரு டன் எலுமிச்சை வரத்து வரும். சீசன் காலத்தில் ஒரு கிலோ எலுமிச்சை ரூ.25 முதல் ரூ.40க்கும், ஒரு எலுமிச்சை பழம் ரூ.3க்கும் விற்பனை செய்யப்படுகிறது. தற்போது எலுமிச்சை சீசன் இல்லாததால் வரத்து குறைந்து விலை தினமும் அதிகரித்து வருகிறது. கடந்த மாதம் கிலோ ரூ.80க்கு விற்ற எலுமிச்சை கடந்த வாரம் வரத்து குறைவால் ரூ.100க்கு விற்பனையானது. எண்ணிக்கை கணக்கில் ஒரு பெரிய பழம் ரூ.6க்கும், சிறிய பழம் ரூ.4க்கும் விற்பனை செய்யப்பட்டது. உள்ளூர் மட்டுமின்றி வெளியூர் வரத்தும் குறைந்ததால் நேற்று ஒரு கிலோ எலுமிச்சை ரூ.120 வரை விற்றது. பெரிய பழம் ரூ.10க்கும், சிறிய பழம் ரூ.6க்கும் விற்றது. இதுகுறித்து விவசாயிகள் கூறியதாவது, ‘திண்டுக்கல் மாவட்டத்தில் கடந்த 10 ஆண்டுகளாக மழை இல்லை. இதனால் எலுமிச்சம் செடியில் போதிய விளைச்சல் இல்லை. எலுமிச்சைக்கு பொதுவாக பூச்சி மருந்து தெளிக்க மாட்டோம். இந்தாண்டு எப்போதும் இல்லாத அளவிற்கு பூச்சிகள் தாக்குதலும் அதிகமாக இருந்தது. இதனால் விளைச்சல் இல்லாமல் போனது. இயற்கை மழை இல்லாததே பூச்சிகள் தாக்குதல் அதிகரிக்க காரணம். எலுமிச்சை விலை அதிகரித்துள்ளது மகிழ்ச்சியாக உள்ளது. மழை பெய்தால் மீண்டும் எலுமிச்சை வரத்து அதிகரிக்கும்’ என்றனர்.

பாலசமுத்திரம் பேரூராட்சி மக்கள் கவனத்திற்கு...

பழநி, மே 23: பொதுமக்கள் குடிநீரை நன்கு கொதிக்க வைத்து உபயோகிக்க வேண்டுமென பாலசமுத்திரம் பேரூராட்சி நிர்வாகம் அறிவுறுத்தி உள்ளது. பழநி அருகே பாலசமுத்திரம் பேரூராட்சிக்கு பாலாறு அணைப்பகுதியில் ராட்சச கிணறு அமைத்து குடிநீர் பெறப்படுகிறது. பேரூராட்சி நிர்வாகத்தின் சார்பில் குடிநீரின் தரத்தினை பாதுகாக்கும் பொருட்டு பல்வேறு நடவடிக்கைகள் மேற்கொள்ளப்பட்டு வருகின்றன. குடிநீர் விநியோக திட்டத்தின் கீழ் மேல்நிலை தொட்டிகள், பிரதானக்குழாய் மற்றும் குடிநீர் விநியோகிக்கும் அனைத்து குழாய்களும் உடனடியாக சுத்தம் செய்ய நடவடிக்கைகள் மேற்கொள்ளப்பட்டு வருகின்றன.பேரூராட்சியில் குடிநீர் விநியோகத்திற்காக பயன்படுத்தப்படும் பிளிச்சிங் பவுடர் ஐ.எஸ்.ஐ தரம் உள்ளதாகவும் 32% குளோரின் அளவு கண்டிப்பாக உள்ளதா என பேரூராட்சி அலுவலர்களால் கண்காணிக்கப்பட்ட பின்னரே பயன்பாட்டிற்கு கொண்டு செல்லப்படுகிறது. குடிநீர் விநியோகத்தின் கடைசி பகுதியை குறைந்தபட்ச குளோரின் அளவான 0.2 பி.பி.எம். இருக்குமாறு குளோரினேசன் செய்யப்படுகிறது. பொதுமக்கள் வயிற்றுபோக்கு, வாந்திபேதி, காய்ச்சல் போன்ற குடிநீர் சார்ந்த நோய்களால் பாதிக்கப்படாமல் இருக்க தண்ணீரை கொதிக்க வைத்து உபயோகிக்க வேண்டுமென பேரூராட்சி அதிகாரிகள் தெரிவித்துள்ளனர்.

வதிலை பஸ்ஸ்டாண்ட் வாயிலில் சுப்பிரமணிய சிவா படம் வைக்க வேண்டும்

வத்தலக்குண்டு, மே 23: வத்தலக்குண்டு பஸ்ஸ்டாண்ட் தோரண வாயிலில் தியாகி சுப்பிரமணிய சிவா படத்துடன் மின்விளக்கும் வைக்க வேண்டும் என கோரிக்கை எழுந்துள்ளது. சுதந்திர போராட்ட தியாகி சுப்பிரமணிய சிவா வத்தலக்குண்டுவில் பிறந்தவர். இவரை பெருமைப்படுத்தும் விதமாக பேருராட்சியினர் ரூ.12 லட்சம் செலவில் வத்தலக்குண்டு பஸ்நிலையத்தில் பளிங்கு கற்களால் தோரணவாயில் அமைக்கப்பட்டுள்ளது.ஆனால் பெயர் அருகே படம் வைக்கவில்லை.இரவில் தெரியுமாறு அருகே மின்விளக்கும் போடவில்லை. இதனால் பகல்நேரத்தில் பெயர் மட்டுமே தெரிகிறது. சுப்பிரமணிய சிவா படத்துடன் மின்விளக்கு வைக்குமாறு பலமுறை கூறியும் பேரூராட்சியினர் கண்டுகொள்ளவே இல்லை. இதுகுறித்து சமூகஆர்வலர்கள் கூறுகையில், ‘குதிரை வண்டியை வாங்கி விட்டு சாட்டை வாங்காதது போல தியாகி சுப்பிரமணிய சிவாவுக்கு தோரண வாயில் மட்டும் அமைத்து விட்டு படமும், விளக்கும் அமைக்காதது குறையாகவே உள்ளது. எனவே பேருராட்சி உடனே இதை அமைக்க நடவடிக்கை எடுக்க வேண்டும்’ என்றனர்.

பட்டிவீரன்பட்டியில் ஆட்டோவில் மணல் கடத்தியவர் கைது

பட்டிவீரன்பட்டி, மே 23: பட்டிவீரன்பட்டி இன்ஸ்பெக்டர் ராமலெட்சுமி தலைமையிலான போலீசார் ரோந்து பணியில் ஈடுபட்டனர். அப்போது சந்தேகப்படும் வகையில் வந்த ஆட்டோவை மறித்து சோதனை செய்தனர். இதில் மருதாநதி ஆற்றில் இருந்து 30 சாக்குகளில் மணல்களை திருடி வந்தது கண்டுபிடிக்கப்பட்டது. விசாரணையில் அவர் மரியாயிபட்டியை சேர்ந்த ஆனந்தன் (38) என்பது தெரிந்தது. இதையடுத்து போலீசார் மணலை பறிமுதல் செய்து, ஆனந்தனை கைது செய்தனர்.

மகளிர் ஸ்டேஷனுக்கு கூடுதல் போலீஸ்

பழநி, மே 23: மகளிர் காவல் நிலையங்களுக்கு கூடுதல் பெண் போலீசார் நியமிக்க வேண்டுமென கோரிக்கை வலுத்துள்ளது. ஆயக்குடி இலவச பயிற்சி மையம் சார்பில் தமிழக முதல்வருக்கு அனுப்பி உள்ள கோரிக்கை மனு: தமிழக காவல்துறை இந்திய காவல்துறைகளில் சிறந்ததாக திகழ்கிறது. இந்தியாவில் உள்ள மாநிலங்களில் தமிழக காவல்துறை 2ம் இடம் வகிக்கிறது. ஆனால் மகளிர் காவல்நிலையங்களில் மக்கள் தொகை பெருக்கத்திற்கேற்ப மகளிர் போலீசார் இல்லாத நிலை நிலவுகிறது. தமிழகத்தில் 196 மகளிர் காவல்நிலையங்கள் உள்ளன. இவற்றில் 13 ஆயிரம் பேர் மட்டுமே மகளிர் காவலர்களாக பணிபுரிகின்றனர். தமிழகத்தில் 6 சட்டம்&ஒழுங்கு அலுவலகத்திற்கு 1 மகளிர் காவல் நிலையம் என்ற முறை பின்பற்றப்படுகின்றது.மகளிர் காவல்நிலையங்களில் மகளிர் காவலர்களின் எண்ணிக்கை குறைவாக உள்ளதால் பணிச்சுமை, விடுமுறை கிடைக்காமை, மனஉளைச்சல் மற்றும் உடல்ரீதியான சிரமங்களுக்கு உட்படுவதால் பலர் விருப்ப ஓய்வு மற்றும் வேலையை ராஜினாமா செய்யும் நிலைமையில் உள்ளனர். எனவே, பணி சுமையை குறைக்க கூடுதல் பெண் போலீசார் நியமிக்கப்பட வேண்டும். தேர்வு மூலம் தேர்வு செய்யப்படும் காவலர்களில் மகளிர் காவல்நிலையத்திற்கு அதிகளவில் பணி நியமிக்க வேண்டும். அதுபோல் 1 தாலுகாவிற்கு 2 மகளிர் காவல்நிலையம் அமைக்க தமிழக அரசு பரிசீலனை செய்ய வேண்டும். இவ்வாறு அதில் கூறப்பட்டிருந்தது.

திருமலைக்கேணியில் சங்கடஹர சதுர்த்தி

நத்தம், மே 23: நத்தம் அருகே திருமலைக்கேணி சுப்பிரமணிய சுவாமி கோயிலில் சங்கடஹர சதுர்த்தி விழா வெகு விமரிசையாக நேற்று நடந்தது. இதையொட்டி அங்குள்ள விநாயக பெருமானுக்கு அருகம்புல், மல்லிகை, ரோஜா உள்ளிட்ட பல்வேறு மாலைகளை பக்தர்கள் காணிக்கையாக செலுத்தி தரிசனம் செய்தனர். முன்னதாக விசேஷ பூஜைகளும், சிறப்பு அலங்காரமும், தீபாராதனைகளும் நடந்தன. இதில் சுற்றுவட்டாரங்களிலிருந்து ஏராளமான பக்தர்கள் வந்திருந்து தரிசனம் செய்தனர். அருகிலுள்ள சுப்பிரமணிய சுவாமி சன்னதியிலும் பக்தர்கள் விளக்கேற்றி தரிசனம் செய்தனர்.

கொடைக்கானலில் சுற்றுலா வாகன நிறுத்துமிட சுற்றுச்சுவரில் விரிசல்

கொடைக்கானல், மே 23: கொடைக்கானலில் சுற்றுலா வாகன நிறுத்துமிட சுற்றுச்சுவர் விரிசல் விழுந்து இடியும் நிலையில் உள்ளது. எனவே அசம்பாவிதம் நடக்கும் முன் சீரமைக்க வேண்டும் சுற்றுலா பயணிகள் கோரிக்கை விடுத்துள்ளனர். கொடைக்கானலில் கோடை சீசனையொட்டி சுற்றுலா பயணிகள் வருகை நாளுக்குநாள் அதிகம் உள்ளது. தமிழகம் மட்டுமின்றி கேரளா, கர்நாடகா, ஆந்திரா போன்ற மாநிலங்களில் இருந்தும் சுற்றுலா பயணிகள் அதிகளவில் வருகின்றனர். இதனால் சுற்றுலா பஸ்கள், வேன்கள், கார்கள் அதிகமான எண்ணிக்கையில் வருகின்றன. இவை கொடைக்கானல் கேஆர்ஆர் கலையரங்கம் பகுதியில் நகராட்சி சார்பில் அமைக்கப்பட்டுள்ள வாகன நிறுத்துமிடத்தில் நிறுத்தப்படுகின்றன. இங்கு 3 பகுதியில் வாகனங்கள் நிறுத்த வசதி செய்யப்பட்டுள்ளது. இதில் ஒரு பகுதியின் சுற்றுச்சுவர் இடிந்து விழும் நிலையில் உள்ளது. இதனால் சுற்றுலா வாகனஓட்டிகள் அச்சத்துடன் நிறுத்தி வருகின்றனர். எனவே அசம்பாவிதம் ஏதும் நடக்கும் முன்பு நகராட்சி நிர்வாகம் விரைந்து வாகன நிறுத்துமிட சுற்றுச்சுவரை சீரமைக்க நடவடிக்கை எடுக்க வேண்டும் என சுற்றுலா பயணிகள் கோரிக்கை விடுத்துள்ளனர். மேலும் இடநெருக்கடியை கருதி இப்பகுதியில் பயன்பாட்டில் இல்லாத பகுதிகளை தூய்மைப்படுத்தி சுற்றுலா வாகனங்கள் நிறுத்தும் இடமாக பயன்படுத்த நடவடிக்கை எடுக்க வேண்டும் என கோரிக்கை விடுத்துள்ளனர்.

மோட்டார் மூலம் குடிநீர் உறிஞ்சுவதை கண்காணிக்க குழு

திண்டுக்கல், மே 23: திண்டுக்கல் நகரில் மோட்டார் மூலம் குடிநீர் உறிஞ்சும் வீடுகளை கண்காணிக்க மாநகராட்சி சார்பில் குழு அமைக்கப்பட்டுள்ளது. திண்டுக்கல் மாநகராட்சியில் 48 வார்டுகள் உள்ளன. இங்கு ஆத்தூர் காமாஜர் நீர்த்தேக்கம் மற்றும் காவிரி கூட்டுக்குடிநீர் திட்டம் மூலம் குடிநீர் விநியோகிக்கப்படுகிறது. காமராஜர் நீர்த்தேக்கத்தில் நீர்மட்டம் ஜீரோ நிலைக்கு சென்று விட்டதால் அங்கு கிடைக்கும் குறைந்தளவு நீரை எடுத்து விநியோகம் செய்ய வேண்டிய நிலையில் மாநகராட்சி நிர்வாகம் உள்ளது. இதனால் தற்போதைக்கு காவிரி கூட்டுக்குடிநீர் மட்டுமே கைகொடுக்கும் நிலையில் உள்ளது. காவிரி குடிநீரும் அவ்வப்போது மின்தடை, பகிர்மான குழாயில் உடைப்பு போன்ற பல்வேறு காரணங்களால் விநியோகிக்க முடியாத சிக்கல் ஏற்படுகிறது. இதனால் தேர்தல் நேரத்தில் தினமும் குடிநீர் சப்ளை செய்த மாநகரட்சி நிர்வாகம் தற்போது வாரம் ஒருமுறையும், சில இடங்களில் 15 நாட்களுக்கு ஒருமுறையும் என சப்ளை செய்கிறது.மேலும் ஜிக்கா திட்ட புதிய பைப் லைனால் பல இடங்களில் குடிநீர் கிடைக்காத நிலை உள்ளது. இதனால் பொதுமக்கள் குடிநீருக்கு படும்பாடு பரிதாபமாக உள்ளது. மேலும் குடிநீர் கோரி அதிகாரிகளிடம் மனு கொடுத்தல் மற்றும் முற்றுகை, சாலை மறியல் உள்ளிட்ட போராட்டங்களில் ஈடுபட்டு வருகின்றனர். இந்நிலையில் மாநகராட்சி பகுதியில் உள்ள சில வீடுகளில் குடிநீரை மின்மோட்டார் மூலம் திருடி வருகின்றனர். இது குடிநீர் தட்டுப்பாட்டை மேலும் அதிகப்படுத்துதுவதாக உள்ளது. ஏற்கனவே மாநகராட்சி அதிகாரிகள் மின்மோட்டார் வைத்து குடிநீர் திருடினால் கடும் நடவடிக்கை எடுக்கப்படும் என எச்சரித்தும் இது தொடர்கதையாக இருந்தது. இதனால் திறந்து விட்ட சில நிமிடங்களில் மின்மோட்டார் மூலம் உறிஞ்சுவதால் பல இடங்களில் தண்ணீர் வரவில்லை என பொதுமக்கள் புகார் தெரிவித்தனர். இதையடுத்து மின்மோட்டார் வைத்து தண்ணீர் உறிஞ்சுபவர்களை கண்காணிக்க மாநகராட்சி நிர்வாகம் சார்பில் பணியாளர்கள் கொண்ட குழு அமைக்கப்பட்டது.இக்குழுவினர் தெருக்களில் தண்ணீர் திறந்து விடும் நேரத்தில் கண்காணித்த போது 45 வீடுகளில் மோட்டார் வைத்து குடிநீரை உறிஞ்சுவது தெரிந்தது. இதையடுத்து குழுவினர் 45 மோட்டார்களையும் பறிமுதல் செய்தனர். மேலும் சம்பந்தப்பட்ட வீடுகளில் குடிநீருக்கான புதிய டெபாசிட் தொகையை செலுத்தினால்தான் மோட்டார் திருப்பி வழங்கப்படும், இல்லையெனில் மோட்டார் ஏலம் விடப்படும் என தெரிவிக்கப்பட்டது.

சூப்பர் இன்போசிங்கிற்காக சென்னைக்கு செல்கிறது திண்டுக்கல் எலும்புக்கூடு

திண்டுக்கல், மே 23: திண்டுக்கல் குள்ளனம்பட்டியில் கிடைத்த எலும்புக்கூடுவை காணாமல் போனவர்களின் படங்களுடன் ஒப்பிட்டு பார்ப்பதற்காக சூப்பர்இன்போசிங் செய்ய சென்னைக்கு அனுப்ப போலீசார் முடிவு செய்துள்ளனர். திண்டுக்கல் குள்ளனம்பட்டியில் கழிவுநீர் கால்வாயில் நேற்று முன்தினம் ஒரு எலும்பு கூடு கண்டுபிடிக்கப்பட்டது. இது குறித்து எந்த தகவலும் தெரியவில்லை. இறந்தவர், ஆணா, பெணா என சந்தேகமும் ஏற்பட்டுள்ளது. இதனை கைப்பற்றிய நகர் தெற்கு போலீசார் வழக்குப்பதிந்து விசாரணை நடத்தி வருகின்றனர்.இந்நிலையில் மண்டை ஓடு, தொடை எலும்புவை சென்னையில் உள்ள தடய அறிவியல் நிறுவனத்திற்கு சூப்பர் இன்போசிங்கிற்காக அனுப்பும் பணியில் போலீசார் ஈடுபட்டு வருகின்றனர். அவர்கள் ஆய்விற்கு பின்புதான் இறந்தது ஆணா, பெண்ணா என தெரியும். மேலும் தமிழகம் முழுவதும் காணாமல் போனவர்கள் படங்களுடன் ஒப்பிட்டு பார்க்க முடியும் என போலீசார் தெரிவித்தனர்.இதுகுறித்து போலீசார் கூறியதாவது: ‘குள்ளனம்பட்டியில் இறந்து 3 மாதமான எலும்பு கூடு கிடைத்துள்ளது. இவர் தற்கொலை செய்து கொண்டவரா, யாரும் கொலை செய்து வீசினார்களா என்ற கோணத்தில் விசாரணை ஒருபுறம் துவக்கப்பட்டுள்ளது. அதேநேரத்ததில் தமிழகம் முழுவதும் காணாமல் போனவர்கள் பட்டியலுடன் ஒப்பிட்டு வருகிறோம். சூப்பர் இன்போசிங்கிற்காக எலும்பு கூடு தயார் நிலையில் உள்ளது. விரைவில் கண்டுபிடித்து விடுவோம். தனிப்படை அமைக்கப்பட்டுள்ளது’ என்றனர்.

துவங்கியது சீசன் பழநிக்கு பலா வரத்து அதிகரிப்பு

பழநி, மே 23: சீசன் துவங்கி உள்ளதால் பழநிக்கு பலா பழங்களின் வரத்து அதிகரித்துள்ளது. முக்கனிகளில் ஒன்றான பலாப்பழத்தின் சீசன் தற்போது துவங்கி உள்ளது. இதனால் பழநி நகருக்கு பலாப்பழங்களின் வரத்து அதிகரித்துள்ளது. குறிப்பாக கடலூர், பண்ருட்டி பகுதிகளில் இருந்து அதிகளவு பலாப்பழங்கள் கொண்டு வரப்பட்டுள்ளது. கிலோ பலாப்பழம் ரூபாய் 30க்கு விற்பனை செய்யப்படுகிறது. 1 பலாப்பழம் 5ல் இருந்து 7 கிலோ வரை எடை கொண்டதாக உள்ளது. சீசன் துவங்கும் போது வரத்து அதிகரித்து விலை சற்று குறைய வாய்ப்பு உள்ளது. ஆனால், இம்முறை போதிய மழையின்னையால் விளைச்சல் பாதிக்கப்பட்டிருப்பதால் பலாப்பழ வரத்து சீசனுக்கேற்ப இல்லை. இதனால் பெரிய அளவில் விலை குறைய வாய்ப்பில்லை என வியாபாரிகள் தெரிவித்துள்ளனர்.

பழநி கோயிலில் மகனுடன் ஓபிஎஸ் திடீர் தரிசனம்

பழநி, மே 23: இன்று வாக்கு எண்ணிக்கை நடக்கவுள்ள நிலையில் பழநி கோயிலில் துணை முதல்வர் ஓ.பன்னீர்செல்வம் தனது மகனுடன் திடீர் தரிசனம் செய்தார். மக்களவை தேர்தல், சட்டமன்ற இடைத்தேர்தல் வாக்கு எண்ணிக்கை இன்று நடைபெறவுள்ளது. இந்நிலையில் திண்டுக்கல் மாவட்டம், பழநி மலைக்கோயிலில் தமிழக துணை முதல்வர் ஓ.பன்னீர்செல்வம் சாமி தரிசனம் செய்ய நேற்று மாலை வந்திருந்தார். உடன் அவரது மகனும், தேனி நாடாளுமன்ற தொகுதி வேட்பாளருமான ரவீந்திரநாத் குமார், மற்றொரு மகனான பிரதீப் மற்றும் குடும்பத்தினர் வந்திருந்தனர்.முருகன் ராஜ அலங்காரத்தில் காட்சியளிக்கும் சாய்ரட்சை பூஜையில் கலந்து கொண்ட ஓபிஎஸ் ெதாடர்ந்து தங்கரதம் இழுத்தும் வழிபாடும் செய்தார். இவருடன் வனத்துறை அமைச்சர் திண்டுக்கல் சீனிவாசன், முன்னாள் எம்எல்ஏ சுப்புரத்தினம், மாவட்ட ஆவின் பால் தலைவர் செல்லச்சாமி சுவாமி தரிசனம் செய்தனர். பின்னர் ஓபிஎஸ், அவரது குடும்பத்தினர் மலைக்கோயிலில் இருந்து ரோப்கார் மூலம் இறங்கி சென்றனர். முன்னதாக பத்திரிகையாளர்கள் ஓபிஎஸ்சிடம் பேட்டி எடுக்க முற்பட்ட போது, ‘சாமி தரிசனம் செய்ய மட்டுமே வந்துள்ளேன்’ என கூறி சென்றார்.