Dindigul - Dinakaran

அழகாய் பூத்து குலுங்கும் செண்டு மல்லி கார் மோதி நடந்து சென்ற பெண் பலி

பழநி, பிப். 14:பழநியில் கார் மோதியதில் நடந்து சென்ற பெண் பலியானார்.பழநி டவுன், தெற்கு அண்ணா நகரைச் சேர்ந்தவர் இளங்கோ. இவரது மனைவி மலர்விழி (40). தனியார் நூற்பாலையில் பணிபுரிந்து வந்தார். இவர்களுக்கு 2 மகள்கள் உள்ளனர். நேற்று முன்தினம் இரவு பணி முடிந்து வீடு திரும்பிக் கொண்டிருந்தார். பழநி-திண்டுக்கல் தேசிய நெடுஞ்சாலையில் பயணியர் விடுதி அருகே சாலையை கடக்க முயன்றார். அப்போது பழநி நோக்கி வந்த கார் மலர்விழி மீது மோதியது. இதில் தலையில் அடிபட்டு மலர்விழி சம்பவ இடத்திலேயே உயிரிழந்தார்.இதுகுறித்து பழநி டவுன் போலீசார் வழக்குப்பதிவு செய்து விசாரணை நடத்தி வருகின்றனர்.

குடிநீர் கேட்டு வந்த மக்கள் அலைக்கழிப்பு

வேடசந்தூர், பிப். 14: வேடசந்தூர் ஒன்றிய அலுவலகத்திற்கு குடிநீர் கேட்டு வந்த மக்களை அதிகாரிகள் அலைக்கழித்ததாக புகார் எழுந்துள்ளது.வேடசந்தூர் நல்லமண்ணர் கோட்டை ஊராட்சிக்கு உட்பட்ட மனியம்பட்டியில் 50 வீடுகளுக்கு மேல் உள்ளன. இங்கு உள்ள வீடுகளுக்கு முறையாக தண்ணீர் வருவது இல்லை என்றும், அதனை சரி செய்து கொடுக்க வேண்டும் என்று ஊராட்சி எழுத்தாளரிடம் பலமுறை முறையிட்டனர். ஆனால் எந்த நடவடிக்கையும் இல்லை. இதனால் ஆத்திரமடைந்த மக்கள் நேற்று மதியம் ஊராட்சி ஒன்றிய அலுவலத்துக்கு வந்தனர். அங்கு பொதுமக்களின் குறைகளை கேட்க எந்த அதிகாரியும் இல்லை.இதனால் நீண்ட நேரம் காத்திருந்த பொதுமக்கள், வெறுப்படைந்து அலுவலகத்தை விட்டு வெளியில் வந்தனர். அப்போது அலுவலகத்தில் இருந்து வெளியில் வந்த அதிகாரிகள் தண்ணீர் தேவை என்றால் அந்த பக்கம் கிணற்று உள்ளது, அங்கு சென்று எடுத்துச் செல்லுங்கள் என்று பொது மக்களை கேலி, கிண்டலாக பேசியதாக கூறப்படுகிறது.இதைக் கேட்ட பொதுமக்கள் அதிர்ச்சியடைந்தனர். தங்களின் குறையை சொல்ல வந்தால் அதனை கேட்க ஆள் இல்லை. அதற்கு பதிலாக எங்களை அவமானபடுத்துகின்றனர். எம்.எல்.ஏ. எம்.பி. குறைகள் கேட்க மட்டும் வந்து செல்கின்றனர். ஆனால் குறைகளை சரி செய்ய முயற்சி செய்வதில்லை. பிறகு எதற்கு குறைகள் கேட்டு வரவேண்டும் என பொதுமக்கள் கேள்வி எழுப்பினர். இனிமேல் எங்கள் பகுதிக்கு யாரும் ஓட்டு கேட்டு வரக்கூடாது என்று ஆத்திரத்துடன் கூறி சென்றனர்.

திண்டுக்கல்லுக்கு வந்த ஆதியோகி ரதத்திற்கு உற்சாக வரவேற்பு

திண்டுக்கல், பிப். 14: தென் கயிலாய பக்தி பேரவை சார்பில் கோவையில் இருந்து திண்டுக்கல் வந்த ஆதியோகி ரதத்துக்கு மக்கள் உற்சாக வரவேற்பு அளித்தனர்.ஈஷாவில் மஹா சிவராத்திரி விழா ஆண்டுதோறும் வெகு விமர்சையாக கொண்டாடப்பட்டு வருகிறது. அதன்படி, 25வது மஹா சிவராத்திரி விழா வரும் மார்ச் 4ம் தேதி 112 அடி ஆதியோகி முன்பு கொண்டாடப்பட உள்ளது. விழாவில் சத்குருவின் அருளுரை, நள்ளிரவு தியானம், தலைசிறந்த கலைஞர்களின் இசை மற்றும் நடன நிகழ்ச்சிகள், மஹா அன்னதானம் உள்ளிட்ட நிகழ்வுகள் நடைபெற உள்ளது. மேலும், ஆதியோகி ஒரு வருடமாக அணிந்திருந்த ருத்ராட்சம் மற்றும் சர்ப்ப சூத்திரம் பக்தர்களுக்கு பிரசாதமாக வழங்கப்பட உள்ளது.மக்கள் ஆதியோகியை தரிசிக்கும் விதமாக தென் கயிலாய பக்தி பேரவை சார்பில் 5 ஆதியோகி ரதங்கள் தமிழகம் முழுவதும் ஊர்வலமாக சென்று கொண்டிருக்கின்றன. அதன் ஒரு பகுதியாக, கோவையில் உள்ள ஆதியோகியில் இருந்து கடந்த பிப்ரவரி 1ம் தேதி புறப்பட்ட ஒரு ரதம் திண்டுக்கல் மாவட்டத்துக்கு நேற்று மாலை வந்தது. தாடிக்கொம்பு சாலையில் உள்ள தனியார் மெட்ரிக் மேல்நிலைப் பள்ளியில் ஆதியோகி ரதத்துக்கு சிறப்பான வரவேற்பு அளிக்கப்பட்டது.மேலும், பொங்கல் வைத்து சிறப்பு அர்ப்பணையும் நிகழ்ந்தது. சிவனுக்கு மிகவும் பிடித்த டமருவும் இசைக்கப்பட்டது. இந்த வரவேற்பு நிகழ்ச்சியில் பள்ளியின் தாளாளர் மங்கள்ராம் பங்கேற்றார்.தொடர்ந்து நேற்று பழநி சாலையில் உள்ள ரவி எலக்ட்ரிக்கல்ஸ் அருகே ஆதியோகிக்கு பூர்ண கும்ப மரியாதை மற்றும் முளைப்பாரியுடன் வரவேற்பு அளிக்கப்பட்டது. பின்னர், 108 விநாயகர் கோயில், வெள்ளை விநாயகர் கோயில் உள்ளிட்ட பல்வேறு இடங்களுக்கு ஆதியோகி ரதம் ஊர்வலமாக சென்றது.செல்லும் இடங்களில் எல்லாம் மக்கள் ஆதியோகிக்கு ஆரத்தி எடுத்து உற்சாக வரவேற்பு அளித்தனர். நத்தம், வேடச்சந்தூர், ஒட்டன்சத்திரம், பழநி, வத்தலக்குண்டு, மதுரை, காரைக்குடி உள்ளிட்ட பகுதிகளுக்கு ஊர்வலமாக எடுத்து செல்லப்படும். இந்த ரதம் மார்ச் 3ம் தேதி கோவை சென்றடையும்.

கொத்தமல்லி விலை குறைவு

ஒட்டன்சத்திரம், பிப். 14: ஒட்டன்சத்திரத்தில் கொத்தமல்லி விலை குறைந்துள்ளது. ஒட்டன்சத்திரம் காந்தி காய்கறி மார்க்கெட்டிற்கு வடகாடு மலைப்பகுதிகள், கள்ளிமந்தையம், இடையகோட்டை, அத்திக்கோம்பை ஆகிய பகுதியிலிருந்து கொத்தமல்லி பயிர் செய்து, விற்பனைக்காக கொண்டு வருகின்றனர்.சென்ற மாதங்களில் தைப்பூசம், பொங்கல் போன்ற பண்டிகை காலங்கள் என்பதால் கொத்தமல்லி ஒரு கிலோ ரூ.30 முதல் ரூ.40 வரை கொள்முதல் செய்யப்பட்டது. தற்போது வரத்து அதிகரித்திருப்பதால் ஒரு கிலோ மல்லித்ழை ரூ.7 முதல் ரூ.10 வரை விற்பனையாகி வருகிறது. இங்கு கொண்டுவரப்படும் கொத்தமல்லி சிறு வியாபாரிகள் மற்றும் மொத்த வியாபாரிகள் நேரடியாக மார்க்கெட்டிலிருந்து வாங்கிச் செல்கின்றனர்.

பழநியில் பிளாஸ்டிக் தடை இல்லை கண்டுகொள்ளாத நகராட்சி: விற்பனை அமோகம்

பழநி, பிப். 14: பழநியில் நகராட்சி அதிகாரிகள் கண்டு கொள்ளாததால் பிளாஸ்டிக் பைகளின் விற்பனை தடையின்றி நடக்கிறது. தமிழகம் முழுவதும் பிளாஸ்டிக் பைகள் பயன்பாட்டிற்கு தடை விதிக்கப்பட்டு தீவிரமாக கடைபிடிக்கப்பட்டு வருகிறது. பிளாஸ்டிக் பைகளின் பயன்பாடு பெருமளவு குறைந்து, துணிப்பைகள் மற்றும் பாத்திரங்கள் பயன்பாட்டிற்கு வந்துள்ளன. ஆனால், நாள்தோறும் ஆயிரக்கணக்கான பக்தர்கள் வருகை தரும் பழநியில் பிளாஸ்டிக் பைகளின் பயன்பாடு தாரளமாகவே உள்ளது. அதிகாரிகளின் பாராமுகத்தால் கடைகளில் பிளாஸ்டிக் பைகளின் விற்பனை தடையின்றி நடந்து வருகிறது. இதுகுறித்து நுகர்வோர் அமைப்பின் நிர்வாகி பெட்காட் பழனிச்சாமியிடம் கேட்டபோது கூறியதாவது: பிளாஸ்டிக் பைகளுக்கான தடை அறிவிப்பு வந்தபோது பழநி நகரிலும் தீவிரமாக கடைபிடிக்கப்பட்டது. ஆனால், நகராட்சி அதிகாரிகளின் அலட்சியத்தால் தற்போது மீண்டும் பிளாஸ்டிக் பைகளின் பயன்பாடு அதிகரித்து வருகிறது. காந்தி மார்க்கெட்டில் உள்ள 2 மொத்த பிளாஸ்டிக் பைகள் விற்பனைக் கடைகள் பூட்டப்பட்டிருந்தாலும், அங்கு விற்பனை தாராளமாகவே நடந்து வருகிறது.நகராட்சி அதிகாரிகள் சிலரின் ஆசியுடன் நடைபெறுவதாக கூறப்படுகிறது. பொதுமக்களே தங்களை மாற்றிக்கொண்டு மாற்று பொருட்களான துணிப்பைகள், கட்டைப்பைகள், பாத்திரங்கள் போன்றவற்றை கொண்டு செல்ல ஆரம்பித்து விட்டனர். ஆனால், நகராட்சி அதிகாரிகள் சிலரின் லாப நோக்கின் காரணமாக பிளாஸ்டிக் பைகள் பயன்பாடு மீண்டும் துவங்கி உள்ளது. மாவட்ட நிர்வாகம் சம்மந்தப்பட்ட அதிகாரிகளை இடமாறுதல் செய்து பிளாஸ்டிக் பைகள் விற்பனை செய்பவர்கள் மீது நடவடிக்கை எடுக்க வேண்டும். நகராட்சி கடையின் உரிமத்தை ரத்து செய்ய வேண்டும். நடவடிக்கை கடுமையாக இருந்ததால் தவறுகள் குறையும். உள்ளாட்சி பிரதிநிதிகள் இல்லாததால் அதிகாரிகளின் அடாவடிதனத்தை கண்டிக்கவும் முடியாத நிலை நிலவுகிறது. இவ்வாறு அவர் கூறினார்.

நடவடிக்கை எடுக்க கோரிக்கை தினசரி அறுவடை செய்து நேரடியாக களத்தில் விற்பனை குஜிலியம்பாறையில் சாலை பாதுகாப்பு விழிப்புணர்வு பேரணி

குஜிலியம்பாறை, பிப். 14:குஜிலியம்பாறை அருகே கரிக்காலி செட்டிநாடு சிமென்ட் ஆலை சார்பில் சாலை பாதுகாப்பு வார விழா கொண்டாடப்பட்டது. இதில் சாலை பாதுகாப்பு குறித்து விழிப்பு பேரணி நடந்தது.குஜிலியம்பாறையில் இருந்து துவங்கிய பேரணியை எரியோடு இன்ஸ்பெக்டர் கருப்பசாமி துவக்கி வைத்தார். தொடர்ந்து செட்டிநாடு சிமென்ட் ஆலை நிர்வாகம் சார்பில், பொதுமக்களுக்கு சாலை பாதுகாப்பு விழிப்புணர்வு குறித்து துண்டு பிரசுரங்கள் கொடுக்கப்பட்டது. பின்னர் டூவீலரில் செல்லும்போது ஹெல்மெட் அணிவது பாதுகாப்பு குறித்தும், சீட் பெல்ட் அணியாமல் வாகனம் ஓட்டக்கூடாது என்பது குறித்து ஒலி பெருக்கியில் பேசியவாறு சென்றனர்.தொடர்ந்து தனியார் சிமென்ட் ஆலை ஊழியர்கள் ஹெல்மெட் அணிந்தபடி குஜிலியம்பாறை, பாளையம், சேர்வைகாரன்பட்டி உள்ளிட்ட ஊர்களின் வழியே கரிக்காலி ஆலையை சென்றடைந்தனர். கரிக்காலி செட்டிநாடு ஆலை இணைத்தலைவர் சுப்பிரமணி, துணை பொது மேலாளர் (மனிதவளம்) ராஜவேல் உள்ளிட்ட பலர் பங்கேற்றனர்.

நத்தம் பகுதியில் வெள்ளரிக்காய் விவசாயம் மும்முரம்

நத்தம், பிப். 14: நத்தம் பகுதிகளில் விஷ வெள்ளரி என்னும் மருத்துவ குணம் நிறைந்த வெள்ளரிக்காய்கள் பயிரிடப்பட்டுள்ளன. இந்த பயிர்கள் வளர்ப்பதற்கான கால அளவு மிகவும் குறைவாகும். விதைப்பு செய்ததிலிருந்து 30 நாட்களில் அறுவடைக்கு தயாராகும். அந்த காலக்கட்டத்தில் ஒரு நாள் விட்டு ஒருநாள் தண்ணீர் விட்டு 15 நாட்களுக்கு மகசூல் பெறுகின்றனர். இந்த வகையான விவசாயம் நத்தம் பகுதியில் அதிகம் காணப்படுகிறது. இதிலிருந்து அறுவடை செய்யும் வெள்ளரிக்காய்களை அந்தந்த இடத்திற்கே வாகனங்களை கொண்டு வந்து கொள்முதல் செய்து செல்கின்றனர்.இதற்கு என்று சீசன் கிடையாது வருடம் முழுவதும் இவற்றை விவசாயம் செய்யலாம். இதனால் அலைச்சல் இன்றி வணிகம் செய்ய ஏதுவாக இருப்பதால் இதில் பெரும்பாலான விவசாயிகள் ஈடுபட்டுள்ளனர். இதுகுறித்து சின்னையாபுரம் பகுதியைச் சேர்ந்த விவசாயி மாணிக்கம் என்பவர் கூறுகையில், ‘இந்த விஷ வெள்ளரி என்னும் மருத்துவ குணம் மற்றும் சில உணவு வகைகள் இவற்றை முறையாக பதப்படுத்தி செய்யப்படுகிறது. இதற்காக உள்ள வியாபாரிகள் எங்களை அணுகி விதை, உரம் முதலானவற்றை தந்துவிட்டு செல்கின்றனர்.இவற்றை விதைத்த 30 நாட்களில் கொடியானது படர்ந்து மகசூல் கிடைக்க ஆரம்பித்து விடுகிறது. இவற்றுக்கு ஒருநாள் விட்டு ஒருநாள் தண்ணீர் விட வேண்டும். குறைவான தண்ணீர் இருப்பதாலும் மகசூல் பெறும் காலம் குறைவாக உள்ளதாலும் இவற்றை பயிரிடுகிறோம். 15 நாட்களுக்கு மட்டுமே முழுமையாக ஒரு கொடியிலிருந்து மகசூல் பெற முடியும். இவற்றிலிருந்து பெறப்பட்ட காய்களை வகைப்படுத்தி விலை நிர்ணயம் செய்து எடுத்துச் செல்கின்றனர்.அவ்வாறாக மிகவும் சுண்டு விரல் அளவு இருக்கும் காய்களுக்கு கிலோ ரூ.35 என்றும் பருமன் ஆக ஆக அவற்றின் விலை குறைவாகவும், மிக குறைவான விலையாக கிலோ ரூ.3 வரையிலும் வாங்குகின்றனர். இவற்றை வியாபாரிகள் அந்தந்த இடத்திலேயே வாகனத்தை கொண்டு வந்து எடுத்துச் செல்வதால் அலைச்சல் இன்றி உள்ளது. எனவே இவற்றை ஆர்வமுடன் பயிரிட்டு வந்தாலும் போதிய தண்ணீரும் மேலும் கொடிகளை தாக்கும் நோய்கள் அதிகம் ஏற்படுவதால் மகசூல் கிடைப்பது குறைவாகி விடுகிறது. இதனால் லாபம் குறைவாகவே கிடைக்கிறது’ என்றார்.

இன்று மின்தடை

நத்தம், பிப். 14:எல்.வலையபட்டி உபமின் நிலையத்தில் இன்று 14ம் தேதி வியாழக்கிழமை மாதாந்திர பராமரிப்பு நடைபெறுவதையொட்டி அன்று காலை 9 மணிமுதல் மாலை 5 மணி வரை ரெட்டியபட்டி, வத்திபட்டி, காசம்பட்டி, புதுக்கோட்டை, லிங்கவாடி, பரளி, வேம்பரளி, தேத்தாம்பட்டி, பொடுகம்பட்டி மற்றும் பெருமாள்பட்டி ஆகிய ஊர்களில் மின்சாரம் இருக்காது என நத்தம் மின்வாரிய உதவி செயற்பொறியாளர் முத்துப்பாண்டியன் தெரிவித்துள்ளார்.

மாவட்ட நுகர்வோர் பாதுகாப்பு குழுவில் பிரதிநிதி நியமனம்

ஒட்டன்சத்திரம், பிப். 14:திண்டுக்கல் மாவட்டத்தில், கலெக்டர் தலைமையில் மாவட்ட அளவிலான நுகர்வோர் பாதுகாப்பு குழு செயல்பட்டு வருகிறது. இந்த குழுக்களில் மாநில, மாவட்ட அளவிலான அரசுத்துறை அதிகாரிகள், பொதுத்துறை நிறுவனங்களின் அலுவலர்கள் மக்கள் பிரதிநிதிகள், வணிகர் சங்க பிரதிநிதிகள், பொது நலச்சங்கங்கள் மற்றும் தன்னார்வ நுகர்வோர் குழுக்களின் பிரதிநிதிகள் இடம்பெற்றிருப்பர். நுகர்வோர் உரிமையை பாதுகாக்கும் பொருட்டு, இந்த குழுக்கள் அப்போது கூடி தன்னார்வ நுகர்வோர் அமைப்பு பிரதிநிதிகளின் புகார் மற்றும் ஆலோசனைகளைப் பெற்று நுகர்வோரின் உரிமையை பாதுகாக்கும் நடவடிக்கையில் செயல்பட்டு வருகிறது. இந்த குழுக்கள் மூன்று ஆண்டுக்கு ஒருமுறை திருத்தி அமைக்கப்படுவது வழக்கம். அதன்படி இந்தாண்டு பிப்.15ம் தேதி முதல் ஒட்டன்சத்திரத்தைச் சேர்ந்த தமிழ்நாடு மக்கள் நுகர்வோர் பேரவையின் மாவட்ட தலைவர் விஸ்வரத்தினம் பிரதிநிதியாக சேர்க்கப்பட்டுள்ளார்.

ராகு கேது பெயர்ச்சி

பட்டிவீரன்பட்டி, பிப். 14 பட்டிவீரன்பட்டியில் உள்ள சுயம்பு நாகேஸ்வரியம்மன் கோவிலில் ராகு கேது பெயர்ச்சியை முன்னிட்டு சிறப்பு வேள்வி பூஜை மற்றும் அபிஷேக ஆராதனை நடைபெற்றது. ராகுகேது பெயர்ச்சியை முன்னிட்டு சுயம்பு நாகேஸ்வரியம்மன் கோவில் வளாகத்தில் யாகசாலையில் யாகம் வளர்க்கப்பட்டு சிறப்பு வேள்வி பூஜைகள் நடைபெற்றன. விழாவில் ராகு மற்றும் கேது பகவானுக்கு பால், தேன், தயிர், சந்தனம், பன்னீர் போன்ற பூஜை பொருட்களால் அபிஷேகம் செய்யப்பட்டு சிறப்பு அலங்காரம் செய்யப்பட்டு தீபராதனை நடைபெற்றது.தொடர்ந்து நவகிரகங்களுக்கும் பூஜைகள் செய்யப்பட்டன. விழாவில் கலந்து கொண்ட பக்தர்களுக்கு பிரசாதம் மற்றும் அன்னதானம் வழங்கப்பட்டது. இந்த ராகு கேது பெயர்ச்சி விழாவிற்கான ஏற்பாடுகளை கோயில் நிர்வாகிகள் மற்றும் ஊர் பொதுமக்கள் இணைந்து செய்திருந்தனர்.

குஜிலியம்பாறை சாலையில் கரும்புகையை கக்கிச் செல்லும் வாகனங்கள்

குஜிலியம்பாறை, பிப். 14: குஜிலியம்பாறையில் சுற்றுச்சூழலை பாதிக்கும் வகையில் கரும்புகையை கக்கிக் கொண்டு செல்லும் வாகனங்கள் மீது நடவடிக்கை எடுக்க வேண்டும் என சுற்றுச்சூழல் ஆர்வலர்கள் கோரிக்கை விடுத்துள்ளனர். திண்டுக்கல்-கரூர் மாநில நெடுஞ்சாலையின் மையப்பகுதியில் குஜிலியம்பாறை உள்ளது. ஒன்றியத்தின் தலைமையிடமாக குஜிலியம்பாறை உள்ளது. இதனால் இங்கிருந்து திண்டுக்கல், கரூர் நகரங்கள் தவிர திருச்சி, விழுப்புரம், கோயம்புத்தூர் உள்ளிட்ட நகரங்களுக்கும் பஸ் போக்குவரத்து இயக்கப்படுகிறது. இதன் காரணமாக இச்சாலையில் தினமும் ஏராளமான வாகன போக்குவரத்து அதிகளவில் சென்று வருகிறது. இது மட்டுமன்றி டூவீலர், கார், லாரி மற்றும் சரக்கு லாரி போக்குவரத்தும் அதிகளவில் உள்ளது. இவ்வாறு செல்லும் ஏராளமான வாகனங்கள் சுற்றுச்சூழல் பாதிக்கும் வகையில் கரும்புகையை கக்கிக் கொண்டு செல்கின்றன. இதனால் ஊரின் சுற்றுச்சூழல பாதிப்பது மட்டுமல்லாமல், சில சமயங்களில் சாலையில் செல்லும் பொதுமக்களுக்கும் மூச்சு விடுவதற்கு திணறும் நிலை ஏற்படுகின்றது. தினமும் கரும்புகையை சுவாசிப்பதால் நுரையீரல் பாதிப்பு, ஆஸ்துமா உள்ளிட்ட நோய்கள் ஏற்பட வாய்ப்புள்ளது. அதிக புகை கக்கும் வாகனங்களுக்கு பின்னால் செல்லும் வாகனங்கள் பாதை தெரியாமல் தடுமாறுகின்றன. தற்போது விற்பனைக்கு வரும் புதிய வாகனங்களில் சுற்றுச்சூழலை பாதுகாக்கும் வகையில், பரிசோதனை செய்யப்பட்டு நிர்ணயிக்கப்பட்ட புகையளவு வெளிவரும் வகையில், வடிவமைக்கப்பட்டு வருகின்றன. அதனால் பாதிப்பில்லாமல் உள்ளது. ஆனால் பழைய வாகனங்களில் சரியாக பராமரிக்கப்படாததால் கரும்புகையை வெளியிட்டபடி சாலையில் செல்கிறது. இவ்வாறு பழைய வாகனங்களுக்கு ஆண்டுக்கு ஒரு முறை பரிசோதனை செய்து சான்றிதழ் பெற வேண்டும் என்று அரசு உத்தரவிட்டுள்ளது. இருந்தாலும் புகை கக்கும் வாகனங்கள் சாலையில் சென்ற வண்ணம்தான் உள்ளன. ஆகையால் குஜிலியம்பாறை பகுதியில் சுற்றுச்சூழல் பாதிக்கும் வகையில் கரும்புகையை கக்கிக் கொண்டு வாகனங்கள் மீது சம்பந்தப்பட்ட அதிகாரிகள் நடவடிக்கை எடுக்க வேண்டும் என சுற்றுச்சூழல் சமூக ஆர்வலர்கள் கோரிக்கை விடுத்துள்ளனர்.

பாஜ மாவட்ட நிர்வாகிக்கு ‘அல்வா’ கொடுத்தவர் கைது

செம்பட்டி, பிப்.13: வேடசந்தூரில் பாஜ மாவட்ட பொருளாளரிடம் செக் மோசடி செய்தவர் கைது செய்யப்பட்டார்.வேடசந்தூரை சேர்ந்தவர் பாலமுருகன்(40). பாஜ மாவட்ட பொருளாளராக உள்ளார். இதே ஊரை சேர்ந்தவர் வைரப்பெருமாள் மகன் வேல்முருகன்(45). பாலமுருகன் தனக்கு சொந்தமான வீட்டை, வேல்முருகனுக்கு கிரையம் செய்து கொடுத்தார். இதற்காக வேல்முருகன் ரூ.15 லட்சத்திற்கு செக் கொடுத்துள்ளார். வங்கியில் போட்டபோது பணம் இல்லை என்று செக் திரும்ப வந்துவிட்டது. இதையடுத்து வேல்முருகனிடம் பணத்தை கொடுக்குமாறு பாலமுருகன் கேட்டு வந்தார். ஆனால் பணத்தை தராமல் வேல்முருகன் அல்வா கொடுத்து வந்தார். இதையடுத்து நிலக்கோட்டை போலீஸ் நிலையத்தில் பாலமுருகன் புகார் கொடுத்தார். இன்ஸ்பெக்டர் சங்கரேஸ்வரன் வழக்குபதிவு செய்து விசாரணை நடத்தி வந்தார். இந்நிலையில் வேல்முருகன் கைது செய்யக்கோரி ஐகோர்ட் மதுரை கிளையில் பாலமுருகன் வழக்கு தொடர்ந்தார். இதனை விசாரித்த நீதிபதி, உடனே பிடிவாரண்டு பிறப்பித்து போலீசாருக்கு உத்தரவிட்டார். இதனைத் தொடர்ந்து வேல்முருகனை கைது செய்த போலீசார், நிலக்கோட்டை மாஜிஸ்திரேட் கோர்ட்டில், மாஜிஸ்திரேட் ரிஸ்னாபர்வீனா முன்னிலையில் ஆஜர்படுத்தினர். இதனைத் தொடர்ந்து அவரை 15 நாள் சிறைக்காவலில் வைக்க உத்தரவிட்டார்.

ஓட்டு இயந்திரத்தை நம்பலாமா? விளக்கம் தருகிறது முகாம்

திண்டுக்கல், பிப்.13: வாக்குப்பதிவு இயந்திரத்தின் நம்பகத்தன்மை குறித்து பொதுமக்கள் அதிகம் கூடும் இடங்களில் முகாம் அமைத்து விளக்கம் அளிக்கப்பட்டு வருகிறது.திண்டுக்கல் காமராஜர் பேருந்து நிலையத்தில் வாக்காளர் விழிப்புணர்வு அரங்கம் திறந்துவைக்கப்பட்டது. கலெக்டர் வினய் துவக்கி வைத்தார். வரும் பாராளுமன்ற பொதுத்தேர்தலில் அனைத்து வாக்குச் சாவடிகளிலும் மின்னணு வாக்குப்பதிவு இயந்திரத்துடன் வாக்களிப்பதை உறுதி செய்யும் கருவி இணைக்கப்பட உள்ளது. இதனைத் தொடர்ந்து இதன் செயல்பாடு மற்றும் நம்பகத் தன்மை குறித்து வாக்காளர்களிடையே விழிப்புணர்வு ஏற்படுத்துவதற்கான முகாம் நடத்தப்பட்டு வருகிறது. இதன்படி பொதுமக்கள் அதிகம் கூடும் இடங்கள், ரயில்நிலையங்கள், திருவிழாக்கள் போன்ற இடங்களில் அரங்குகள் அமைக்கப்பட்டுள்ளன. இதன் ஒருபகுதியாக பேருந்துநிலையத்தில் அமைக்கப்பட்ட செயல்முறை விளக்கத்தை பொதுமக்கள் ஆர்வத்துடன் வந்து பார்த்தனர்.தேர்தலில் 100 சதவீதம் வாக்களிக்க வேண்டும் என்றும் அறிவுறுத்தப்பட்டது. கோட்டாட்சியர் ஜீவா, தேர்தல் வட்டாட்சியர் சுப்பிரமணிய பிரசாத் உட்பட பலர் கலந்து கொண்டனர்.

பழங்கள் வாங்க திடீரென வாகனம் நிறுத்துவதால் அடிக்கடி விபத்து கொடைரோடு சாலை ெகால்லுது ஆளை போலீசார் கட்டுப்படுத்துவார்களா?

செம்பட்டி, பிப்.13: கொடைரோடு சாலையில் பழங்கள் வாங்க திடீரென வாகனங்களை நிறுத்துவதால் அடிக்கடி விபத்து நடந்து வருகிறது.திண்டுக்கல்-மதுரை நான்கு வழிச்சாலையில் பஸ், கார், அதிக சக்கரங்கள் பொருத்தப்பட்ட கdfடெய்னர் உள்பட தினமும் ஏராளமான வாகனங்கள் செல்கின்றன. இவற்றில் பெரும்பாலான வாகனங்கள் வெளி மாநிலத்தைச் சேர்ந்தவை. தமிழகத்தின் பிற மாவட்டங்கள் மட்டுமின்றி, வெளி மாநிலங்களிலும் கொடைரோடு பழங்கள் பிரசித்தம். இதுபோன்ற வெளியூர் வாகனங்களை குறிவைத்து, நான்கு வழிச்சாலையின் இருபுறமும் உள்ள தோட்டங்களில் தற்காலிக பழக்கடைகள் செயல்படுகின்றன.கொடைரோடு துவங்கி, சின்னாளபட்டி வரையான 12 கிலோமீட்டர் தூரத்தில் இருபுறமும் ஏராளமான கடைகள் அமைக்கப்பட்டுள்ளன. துவக்கத்தில் ரோட்டோர தோட்டங்களில் பழப்பெட்டிகளை வைத்து விற்பனை செய்து வந்த வியாபாரிகள், ரோட்டார பாலங்களின் விளிம்புகளில் நின்று பழப்பெட்டிகளுடன் கூவி அழைக்கும் அளவிற்கு போட்டி அதிகரித்துள்ளது.

19ல் குறைதீர்க்கும் முகாம்

திண்டுக்கல், பிப்.13: திண்டுக்கல் கிழக்கு தாலுகா அலுவலகத்தில் வரும் 19ம் தேதி மாற்றுத்திறனாளிகளுக்கான குறைதீர்க்கும் முகாம் நடைபெற உள்ளது.காலை 10 முதல் பிற்பகல் 1 மணி வரை நடைபெறும் முகாமிற்கு திண்டுக்கல் கிழக்கு, மேற்கு, நிலக்கோட்டை, நத்தம், ஆத்தூர் தாலுகா பகுதியைச் சேர்ந்தவர்கள் கலந்து கொண்டு பயன்பெறலாம் என்று கோட்டாட்சியர் ஜீவா தெரிவித்துள்ளார்.

சாலை பாதுகாப்பு கருத்தரங்கம்

திண்டுக்கல், பிப்.13: திண்டுக்கல் வட்டார போக்குவரத்து கழகம் சார்பில் சாலை பாதுகாப்பு வார விழா கருத்தரங்கம் நடைபெற்றது.திண்டுக்கல் தாடிக்கொம்பு சாலையில் உள்ள தனியார் பள்ளியில் நடந்த கருத்தரங்கில் பள்ளி முதல்வர் சந்திரசேகர் வரவேற்றார். திண்டுக்கல் மாவட்ட போலீஸ் எஸ்பி சக்திவேல் தலைமை தாங்கினார். திண்டுக்கல் அரசு போக்குவரத்து கழக பொது மேலாளர் ராஜேஸ்வரன், வட்டார போக்குவரத்து அலுவலர் ஆனந்த், மோட்டார் வாகன ஆய்வாளர்கள் தர்மானந்தம், மணிவண்ணன், விஜயகுமார் ஆகியோர் வாழ்த்துரை வழங்கினர். பள்ளி ஒருங்கிணைப்பாளர் கார்த்திகைகுமார் நன்றி கூறினார். கருத்தரங்கில் திண்டுக்கல், வேடசந்தூர், வத்தலகுண்டு பகுதிகளிலிருந்து 500க்கும் மேற்பட்ட ஓட்டுநர்கள் கலந்து கொண்டனர்.

புதிய போர்வெல் திறப்பு விழா

பழநி, பிப்.13: பழநி நகராட்சிக்கு உட்பட்ட 31வது வார்டில் சட்டமன்ற உறுப்பினர் தொகுதி மேம்பாட்டு நிதியின் கீழ் போர்வெல் அமைத்து மினிபவர் பம்ப் அமைக்க ஐ.பி.செந்தில்குமார் எம்எல்ஏ ரூ.3 லட்சம் ஒதுக்கீடு செய்தார். இந்நிதியின் கீழ் போர்வெல் போட்டு மினிபவர் பம்ப் அமைக்கப்பட்டு நேற்று பயன்பாட்டிற்கு கொண்டு வரப்பட்டது. நிகழ்ச்சியில் திமுக நகரச் செயலாளர் தமிழ்மணி, முன்னாள் கவுன்சிலர் பழனிச்சாமி உள்ளிட்ட பலர் கலந்து கொண்டனர்.

திண்டுக்கல்-மதுரை சாலையில் அசுர வேக வாகனங்களால் அடிக்கடி நடக்குது விபத்து நடவடிக்கை பாயுமா?

செம்பட்டி, பிப்.13: திண்டுக்கல்-மதுரை நான்குவழிச் சாலை முக்கிய நெடுஞ்சாலையாக இருப்பதால் தினமும் நூற்றுக்கணக்கான வாகனங்கள் இத்தடத்தில் செல்கின்றன. மெட்டூர்-செம்பட்டி வழியே செல்ல வேண்டிய தனியார் வாகனங்கள் மட்டுமின்றி, 90 சதவீத அரசு புறநகர் பஸ்களும் இத்தடத்தில் பயணிக்கின்றன. திண்டுக்கல்லில் இருந்து மதுரைக்கு புறப்படும் தனியார் பஸ்கள் நகரை விட்டு வெளியேற அதிகளவு நேரம் எடுத்துக்கொள்கின்றன.கூடுதல் பயணிகளை ஏற்றுவதற்காக நேரத்தை கண்டுகொள்வதில்லை. இதில் விரயமாகும் நேரத்தை ஈடு செய்வதற்காக, நான்கு வழிச்சாலையில் அசுர வேகத்தில் பஸ்களை இயக்குகின்றனர். பஸ்கள் மட்டுமின்றி கூடுதல் சக்கரங்கள் பொருத்தப்பட்ட கண்டெய்னர் உள்ளிட்ட சரக்கு வாகனங்களும், அதிவேக போட்டி பயணத்தை மேற்கொள்கின்றன. சில நேரங்களில் கட்டுப்பாட்டை இழக்கும் வாகனங்கள், நடுரோட்டிலும், ரோட்டோரங்களில் கவிழ்வது, மீடியனை சேதப்படுத்துதல் என விபத்துக்களை நடந்து வருகின்றன.இப்பிரச்னையால் நான்கு வழிச்சாலையில் விபத்துகளின் எண்ணிக்கை அதிகரித்து வருகிறது. பஸ்சில் பயணிப்போர் மட்டுமின்றி, ரோட்டில் பிற வாகனங்களில் செல்வோர், பாதசாரிகள் பாதிப்பிற்குள்ளாகி வருகின்றனர். நான்கு வழிச்சாலையில் வரும் வாகனங்களின் கட்டுப்பாடற்ற வேகத்தை தவிர்க்க, போலீஸ், வட்டார போக்குவரத்து துறை அதிகாரிகள் தொடர் கண்காணிப்பு, நடவடிக்கையை மேற்கொள்ள வேண்டும் என இப்பகுதி பொதுமக்கள் எதிர்பார்க்கின்றனர்.

பிளாக்கில் மது விற்ற மூன்று பேர் கைது

கொடைக்கானல், பிப்.13: கொடைக்கானலில் சட்டவிரோதமாக மது விற்பனை செய்த மூவரை போலீசார் கைது செய்தனர்.கொடைக்கானல் மலைப்பகுதிகளில் சட்டவிரோதமாக மது விற்பனை செய்வதை கண்டித்து சில வாரங்களுக்கு முன் பொதுமக்கள் பெருமாள் மலை பகுதியில் சாலை மறியல் செய்தனர். இதையடுத்து சட்டவிரோத மது விற்பனையை தடுக்க கொடைக்கானல் போலீசார் தீவிர நடவடிக்கையில் ஈடுபட்டு வந்தனர். கொடைக்கானல் மேல்மலை பகுதியில் உள்ள பழம்புத்தூரில் சட்டவிரோதமாக மது விற்பனை செய்த, அதே பகுதியை சேர்ந்த குபேந்திரன்(44), கொடைக்கானல் நகரம் பகுதியில் கலையரங்கம் அருகே மது விற்பனை செய்த கன்னிவாடி பகுதியை சேர்ந்த முருகன் மகன் முத்துப்பாண்டி(34), கொடைக்கானல் அண்ணாநகர் பகுதியில் மது விற்ற முனியாண்டி மகன் கென்னடி(54) ஆகிய மூவரையும் கைது செய்தனர். இவர்களிடமிருந்து மதுபாட்டில்கள் பறிமுதல் செய்யப்பட்டது. இதுபற்றி கொடைக்கானல் போலீஸ் சப் இன்ஸ்பெக்டர் பொன் குணசேகரன் வழக்குப்பதிவு செய்து விசாரணை செய்து வருகின்றார்.

வசூல் வேட்டை நடத்துகின்றனர் ஆர்டிஓ ஆபீஸில் புரோக்கர் ராஜ்ஜியம் பொதுமக்கள் புகார்

பழநி, பிப்.13: பழநி வட்டார போக்குவரத்து அலுவலகம் புரோக்கர்களின் பிடியில் உள்ளது. இவர்களை அதிகாரிகள் கட்டுப்படுத்த வேண்டும் என பொதுமக்கள் வலியுறுத்தி உள்ளனர்.பழநி-திண்டுக்கல் தேசிய நெடுஞ்சாலையில் வட்டார போக்குவரத்து அலுவலகம் செயல்பட்டு வருகிறது. இங்கு நாள்தோறும் ஏராளமான வாகனங்களுக்கு நம்பர் கொடுப்பது, ஓட்டுநர் உரிமம் வழங்குவது, வாகன தகுதிச் சான்றிதழ் வழங்குவது போன்ற பணிகள் நடைபெறும். இதற்காக வாகன ஓட்டிகள் அரசிற்கு செலுத்த வேண்டிய தொகைகள் மிகவும் குறைவானவையே ஆகும். ஆனால், வட்டார போக்குவரத்து ஆய்வாளர் அலுவலகம் முன்பு சுற்றித்திரியும் புரோக்கர்கள் இவைகளுக்காக அதிக அளவில் கட்டணங்களை வசூலித்து விடுகின்றனர். இதனால் வாகன ஓட்டிகள் பாதிக்கப்படுகின்றனர். புரோக்கர்களின் நடமாட்டத்தை கட்டுப்படுத்த அதிகாரிகள் நடவடிக்கை எடுக்க வேண்டும் என வலியுறுத்தி உள்ளனர்.இதுகுறித்து பழநியைச் சேர்ந்த ஆனந்தன் கூறுகையில், ‘‘வாகன லைசென்ஸ் எடுப்பதற்கு முன்பு எல்.எல்.ஆர் போட வேண்டும். இதில் பைக்கிற்கு ரூ.240ம், காருக்கு ரூ.430 மட்டும் கட்டணமாக செலுத்தினால் போதுமானது. ஆனால், வாகன ஓட்டிகளை வழிமறிக்கும் புரோக்கர்கள் அவர்களிடம் இதற்காக ரூ.2 ஆயிரம் அளவிற்கு வசூலித்து விடுகின்றனர். அதுபோல் ஒவ்வொரு கட்டணத்திற்கும், இவர்கள் வசூலிக்கும் தொகைக்கும் சம்மந்தமே இருக்காது. குறைந்தபட்சம் 5 மடங்கு கூடுதலாக வசூலித்து விடுகின்றனர். ஆன்லைன் மூலம் கட்டணம் செலுத்தலாம் என்று அறிவிப்பு இருந்தாலும், அது எளிதாக இருப்பதில்லை. வட்டார போக்குவரத்து அலுவலகத்தில் உள்ள அலுவலர்கள் உரிய விளக்கம் சொல்வதில்லை. இதனால் வேறு வழியின்றி புரோக்கர்களை நாடிச் செல்ல வேண்டி உள்ளது. அலுவலகத்திற்குள்ளேயே புரோக்கர்களின் நடமாட்டம் தாராளமாக உள்ளது. அங்குள்ள கண்காணிப்பு கேமராக்களில் பதிவான காட்சிகளை ஆய்வு செய்தாலே இதன் உண்மை தெரியும். எனவே அலுவலகத்தில் புரோக்கர்கள் ராஜ்ஜியத்தை அதிகாரிகள் தடுக்க வேண்டும்’’ என்றார்.