Erode - Dinakaran

கோபி அருகே சூறாவளி காற்றுக்கு வாழை மரங்கள் சேதம்

கோபி, மே 19: கோபி அருகே உள்ள காசிபாளையத்தில் சூறாவளி காற்றுக்கு சுமார் ரூ.ஒரு கோடி மதிப்புள்ள வாழை மரங்கள் சேதமடைந்தது. கடந்த ஒரு வார காலமாக கோபி மற்றும் சுற்றுப்புற பகுதியில் பலத்த சூறாவளி காற்றுடன் கூடிய கனமழை பெய்து வருகிறது. நேற்று முன்தினம் இரவு பலத்த சூறாவளி காற்றுடன் கூடிய கனமழை பெய்ததில், காசிபாளையம், கணபதிபாளையம், காந்தி நகர், வன்னிமரத்துக்காடு உள்ளிட்ட பகுதியில் பயிரிடப்பட்டு அறுவடைக்கு தயாரான நிலையில் இருந்த சுமார் 20 ஆயிரம் வாழை மரங்கள் காற்றில் முறிந்து விழுந்து சேதமானது. இதனால் அப்பகுதி விவசாயிகளுக்கு சுமார் ரூ.ஒரு கோடி அளவிற்கு இழப்பு ஏற்பட்டுள்ளது. இதுகுறித்து அப்பகுதி விவசாயிகள் கூறியதாவது: கடந்த ஒரு ஆண்டு காலமாக வாழை பயிரிடப்பட்டு வருகிறது. பல்வேறு பராமரிப்பு பணிகளுடன் வாழை மரங்கள் காற்றில் முறிந்து விழாமல் இருப்பதற்காக டேப் மூலம் கட்டப்பட்டு இருந்தது. ஆனால் நேற்று முன்தினம் வீசிய சூறாவளி காற்றுக்கு காசிபாளையம் பேரூராட்சிக்குட்பட்ட பகுதியில் மட்டும் சுமார் ரூ.ஒரு கோடி  மதிப்புள்ள 20 ஆயிரத்திற்கும் மேற்பட்ட வாழை மரங்கள் முறிந்து விழுந்து சேதமடைந்துள்ளது.இதில் வாழைக்கு பயிர் காப்பீடு செய்திருந்த நிலையில் இதுவரை காப்பீடு நிறுவனங்கள் இழப்பீடு வழங்குவதில்லை. இந்நிலையில் ஒவ்வொரு விவசாயிக்கும் சுமார் ரூ.ஒரு லட்சம் முதல் ரூ.5 லட்சம் வரை இழப்பு ஏற்பட்டுள்ளது. இது தவிர முறிந்து விழுந்த வாழை மரங்களை அப்புறப்படுத்த ஏக்கர் ஒன்றுக்கு ரூ.30 ஆயிரம் வரை செலவு செய்ய வேண்டிய நிலை உள்ளது. இதனால் சூறாவளி காற்றால் விவசாயிகளுக்கு ஏற்பட்ட இழப்பை சரி செய்யும் வகையில் உரிய இழப்பீடு வழங்க வேண்டும். அத்துடன் பயிர் காப்பீடு செய்துள்ள விவசாயிகளுக்கு காப்பீடு நிறுவனங்களில் இருந்து இழப்பீடு பெற்றுத்தர வேண்டும் என்றனர்.

பெண்ணிடம் வழிப்பறி

கோபி, மே 19: கோபி அருகே உள்ள மேவாணியில் பைக்கில் சென்ற பெண்ணிடம் மர்ம நபர்கள் வழிப்பறி செய்துள்ளனர். கோபி அருகே உள்ள மேவாணியை சேர்ந்தவர் சந்திரசேகர் மனைவி சாவித்திரி (44). இவர் கோபி தாலுகா அலுவலகம் சென்று விட்டு வீட்டிற்கு பைக்கில் சென்று கொண்டிருந்தார். மேவாணி அருகே செல்லும் போது பைக்கில் வந்த 2 பேர் சாவித்திரியின் கழுத்தில் இருந்த 4 பவுன் தங்க சங்கிலியை பறித்துக்கொண்டு தப்பியோடினர். இதுகுறித்து சாவித்திரி அளித்த புகாரின் பேரில், கோபி போலீசார் வழக்கு பதிவு செய்து, மர்ம நபர்களை தேடி வருகின்றனர்.

தனியார் லாட்ஜ் இடம் ஆக்கிரமிப்பு

ஈரோடு,  மே 19: தனியார் லாட்ஜ் இடத்தை ஆக்கிரமித்து கடை வைத்துள்ளதாக  பாதிக்கப்பட்டவர்கள் ஈரோடு எஸ்பி.,யிடம் ஹலோ சீனியர் திட்டத்தில் புகார்  அளித்தனர். புகார் அளித்த ஒரு மணி நேரத்தில் ஆக்கிரமிப்புகளை அகற்றி  போலீசார் நடவடிக்கை எடுத்தனர். ஈரோடு பன்னீர்செல்வம் பார்க்  மணிக்கூண்டு பகுதியை சேர்ந்தவர் கோவிந்தராஜ் (84). இவரது மனைவி ராஜாமணி  (76). இவர்களுக்கு 2 மகள்கள் உள்ளனர். கோவிந்தராஜ் மணிக்கூண்டு ரோட்டில்  அவரது வீட்டிற்கு அருகிலேயே அவரது பெயரில் 36 அறைகள் கொண்ட தங்கும் விடுதி  வைத்து நடத்தி வருகிறார். விடுதிக்கு கீழ் பகுதியில் இரண்டு கடைகளை கடந்த 5  ஆண்டுக்கு முன்பு ஈரோடு இந்திரா நகர் பகுதியை சேர்ந்த ஷாஜகான் (40)  என்பவருக்கு வாடகைக்கு விட்டிருந்தார். அவர் அங்கு ஸ்கூல் பேக் கடை வைத்து  நடத்தி வந்தார். காலப்போக்கில் அவர் தங்கும் விடுதியின் வழிகளை முழுவதுமாக  ஆக்கிரமித்து கடை வைத்து நடத்தினார். இதனால் தங்கும் விடுதி இருப்பது  தெரியாமல் இருப்பதாக ஷாஜகானிடம், உரிமையாளர் கோவிந்தராஜ்  முறையிட்டுள்ளார். அதற்கு நீ யாரிடம் வேண்டும் என்றாலும் புகார் செய்,  எனக்கு பயமில்லை என கூறியுள்ளார். இதுகுறித்து கோவிந்தராஜ் ஈரோடு  டவுன் போலீசில் கடந்த சில வாரங்களுக்கு முன்பு புகார் அளித்தார். ஆனால்  போலீசார் பெயரளவுக்கு விசாரணை நடத்தி விட்டு, ஷாஜகானிடம் கடையை ஆக்கிரமிப்பு இல்லாமல் போட வேண்டும் என அறிவுறுத்தி விட்டு சென்று  விட்டனர். ஆனால், தொடர்ந்து ஷாஜகான் தனியார் விடுதியின் இடத்தினை ஆக்கிரமித்து கடையை நடத்தி வந்தார். இதனால் அதிருப்தி அடைந்த கோவிந்தராஜ்  ஈரோடு எஸ்.பி., சக்தி கணேசன் அறிமுகப்படுத்திய ஹலோ சீனியர் திட்டத்தில்  புகார் அளித்தார். இந்த புகாரின் பேரில், சம்மந்தப்பட்ட விடுதி முன்பு உள்ள ஆக்கிரமிப்புகளை அகற்றி, உரிய நடவடிக்கை எடுக்க கோரி ஈரோடு டவுன் போலீசாருக்கு உத்தரவிட்டார். இந்த உத்தரவின் பேரில், ஆக்கிரமிப்பில்  இருந்த பொருட்களை போலீசார் அப்புறப்படுத்தினர். மேலும், அவருக்கு உரிய  இடத்தில் மட்டும் கடை போட கோரி அறிவுறுத்தினர். இந்த சம்பவத்தின் காரணமாக மணிக்கூண்டு ரோட்டில் வாகனங்கள் செல்ல சில மணி நேரம் போக்குவரத்து தடை செய்யப்பட்டிருந்தது குறிப்பிடத்தக்கது.

சத்தி வட்டாரத்தில் பள்ளி வாகனங்கள் 23ல் ஆய்வு

ஈரோடு, மே 19:  பள்ளி வாகனங்கள் ஆண்டுதோறும் வட்டார போக்குவரத்து அதிகாரிகளால் ஆய்வு செய்யப்பட்டு வருகிறது. வாகனங்கள் இயக்குவதற்கு தகுதி வாய்ந்ததா, படிக்கட்டுகளின் உறுதி தன்மை,  அவசர கால வழி உள்ளதா, வாகனத்தில் வேக கட்டுப்பாடு கருவி மற்றும் தீயணைப்பு கருவி பொருத்தப்பட்டுள்ளதா உள்ளிட்ட பல்வேறு அம்சங்கள் குறித்து அதிகாரிகள் ஆய்வு நடத்தி தகுதி சான்றிதழ் வழங்கி வருகின்றனர்.  ஈரோடு மாவட்டத்தில் நடப்பு ஆண்டுக்கான பள்ளி வாகனங்கள் ஆய்வு கடந்த 13ம் தேதி ஈரோட்டில் துவங்கப்பட்டது. ஈரோடு கிழக்கு, மேற்கு வட்டார போக்குவரத்து அலுவலகங்கள் மற்றும் பெருந்துறை வட்டார போக்குவரத்து அலுவலகங்கள் கட்டுப்பாட்டில் உள்ள 94 பள்ளிகளை சேர்ந்த 957 பள்ளி வாகனங்கள் ஆய்வு செய்யப்பட்டன. இதைத்தொடர்ந்து கடந்த 16ம் தேதி கோபி, பவானி பகுதிகளுக்குட்பட்ட 75 பள்ளிகளை சேர்ந்த 487 வாகனங்கள் ஆய்வு செய்யப்பட்ட நிலையில் சத்தியமங்கலம் வட்டார போக்குவரத்து எல்லைக்குட்பட்ட 23 பள்ளிகளை சேர்ந்த 94 வாகனங்கள் வருகின்ற 23ம் தேதி எஸ்ஆர்டி பள்ளி வளாகத்தில் ஆய்வு நடத்தப்பட உள்ளதாக வட்டார போக்குவரத்து அதிகாரிகள் தெரிவித்துள்ளனர்.

பவானி ஆற்றில் தண்ணீர் திருட்டு

ஈரோடு, மே 19:  ஈரோடு மாவட்டத்தில் முக்கிய நீராதாரமாக விளங்கும் பவானி ஆற்றில் தண்ணீர் திருடப்பட்டு வருவதால், குடிநீர் தட்டுப்பாடு ஏற்படும் அபாயம் ஏற்பட்டுள்ளது. ஈரோடு மாவட்டத்தின் முக்கிய நீராதரமாக பவானிசாகர் அணையில் இருந்து, பவானி ஆற்றிலும், பாசன வாய்க்கால்களிலும் தண்ணீர் திறந்து விடப்படுகிறது. இதன் மூலம் பல ஹெக்டேர் விளை நிலங்களும், உள்ளாட்சி அமைப்புகளும் பயன்பெற்று வருகின்றன. இந்நிலையில் நடப்பாண்டு கோடை வெயில் சுட்டெரித்து வருவதாலும் குளம், குட்டைகள் உள்ள நீர் வறண்டு போகும் நிலை உருவாகியுள்ளது. இதில் தற்போது பவானி ஆற்றில் குடிநீருக்காக திறக்கப்பட்டுள்ளதால், ஆற்றில் குறைந்தளவு தண்ணீர் ஓடுகிறது. இந்த தண்ணீரை சிலர் மின் மோட்டார் மற்றும் ஆயில் மோட்டார்கள் மூலம் ஆற்றில் குழாய்களை பொருத்தி நேரடியாக தண்ணீரை திருடி வருகின்றனர். இன்னும் ஒரு சிலர் நீரினை உறிஞ்சி திருட்டு தனமாக வணிக ரீதியாகவும் விற்பனை செய்து வருகின்றனர். இதனால் கோடை காலத்தில் குடிநீர் தட்டுப்பாடு ஏற்படும் நிலை உருவாகி உள்ளது. எனவே, தண்ணீரை திருடுவோர்கள் மீது நடவடிக்கை எடுத்து மோட்டார்களை பறிமுதல் செய்ய மாவட்ட நிர்வாகமும், பொதுப்பணித்துறை அதிகாரிகளும் முன் வர வேண்டும் என பொதுமக்களும், விவசாயிகளும் கோரிக்கை விடுத்துள்ளனர்.

மாநகராட்சியில் குடிநீர் தட்டுப்பாட்டை போக்க 6 டேங்கர் வாகனங்கள்

ஈரோடு, மே 19: ஈரோடு மாநகராட்சி பகுதியில் குடிநீர் தட்டுப்பாடு ஏற்பட்டால், அந்த பகுதிகளில் குடிநீர் விநியோகம் செய்ய தண்ணீர் லாரிகள், டிராக்டர்கள் என 6 வாகனங்கள் தயார் நிலையில் உள்ளதாக மாநகராட்சி அதிகாரிகள் தெரிவித்தனர்.ஈரோடு மாநகராட்சிக்கு குடிநீர் ஆதாரமாக காவிரி ஆறு விளங்கி வருகிறது. காவிரி ஆற்றில் தற்போது மேட்டூர் அணையில் இருந்து குடிநீருக்காக மட்டும் ஆயிரம் கன அடி நீர் திறந்து விடப்பட்டுள்ளன. இந்த தண்ணீரை ஈரோடு பி.பெ. அக்ரஹாரம், வெண்டிபாளையம் தடுப்பணைகள் மூலம் தேக்கி வைத்து, மாநகராட்சி பம்பிங் ஸ்டேஷன் மூலம் உறிஞ்சப்படுகிறது. பின்னர் இந்த தண்ணீரை சுத்திகரிப்பு செய்து, குடிநீர் குழாய்கள் மூலம் அந்தந்த பகுதி மக்களுக்கு விநியோகம் செய்யப்படுகிறது. இதில் பம்பிங் ஸ்டேஷன் பராமரிப்பு பணி, குடிநீர் இணைப்பு துண்டிப்பு ஏற்பட்டால் சம்பந்தப்பட்ட பகுதியில் மக்களுக்கு குடிநீர் விநியோகம் செய்வதற்காக 10 ஆயிரம் லிட்டர் கொள்ளளவு கொண்ட ஒரு டேங்கர் லாரி மற்றும் 6 ஆயிரம் லிட்டர் கொள்ளளவு கொண்ட 5 டேங்கர் டிராக்டர் வாகனங்கள் மூலம் தண்ணீர் விநியோகம் செய்யப்படுகிறது.இதுகுறித்து மாநகராட்சி அதிகாரிகள் கூறியதாவது: ஈரோடு மாநகராட்சி பகுதியில் 4 மண்டலத்திலும் சுழற்சி முறையில் தண்ணீர் விநியோகம் செய்யப்பட்டு வருகிறது. குடிநீர் தட்டுப்பாடு ஈரோடு மாநகரில் இல்லை. காவிரியிலும் தண்ணீர் இருப்பதால் பிரச்னை இல்லை. இனிவரும் காலங்களில் குடிநீர் தட்டுப்பாடு ஏற்பட்டாலும் அதை சாமளிக்க போதிய நடவடிக்கைகள் எடுக்கப்பட்டுள்ளது. குடிநீர் விநியோகம் தடைப்படும் பகுதியில் லாரிகள் மூலம் மக்களுக்கு தண்ணீர் விநியோகம் செய்யப்பட்டு வருகிறது. மாநகராட்சியில் இதற்கென 6 வாகனங்கள் பயன்பாட்டில் உள்ளன. இதுதவிர தனியார் குடிநீர் வாகனங்களும் ஒப்பந்தம் அடிப்படையில் பயன்படுத்தி வருகிறோம். இவ்வாறு அவர் கூறினார்.

சென்னிமலை அருகே சாலையோரம் வீசப்பட்ட மாடு

சென்னிமலை, மே 19:   கேரளாவுக்கு லாரியில்  கொண்டு செல்லும் போது மாடு இறந்ததால் சென்னிமலை அருகே சாலை ஓரம் போட்டு விட்டு சென்றதாக  பொதுமக்கள் தகவல் ெதரிவித்தனர். சென்னிமலை அருகே ஈரோடு-திருப்பூர் மாவட்ட எல்லையில் நொய்யல் உள்ளது. இங்கு நேற்று சாலை ஓரம் பசு மாடு ஒன்று இறந்து கிடந்துள்ளது. இதனை அப்பகுதி மக்கள் பார்த்துள்ளனர். தினமும் நூற்றுக்கணக்கான லாரிகளில் பல்வேறு மாவட்டங்களில் இருந்து சென்னிமலை, காங்கயம், பொள்ளாச்சி வழியாக கேரளாவுக்கு மாடுகள் கொண்டு செல்வது வழக்கம். அதன்படி நேற்று ஒரு லாரியில் மாடுகளை கொண்டு சென்ற போது ஒரு மாடு இறந்து விட்டதால், அதனை யாருக்கும் தெரியாமல் சாலை ஓரம் போட்டு விட்டு சென்றிருக்கலாம் என பொதுமக்கள் தெரிவித்தனர்.

சென்னிமலை முருகன் கோயிலில் சிறப்பு வழிபாடு

சென்னிமலை, மே 19: சென்னிமலை முருகன் கோயிலில் வைகாசி விசாக விழாவை முன்னிட்டு படி பூஜை மற்றும் சிறப்பு வழிபாடு நடந்தது. சென்னிமலை முருகன் கோயிலில் வைகாசி விசாகத்தை முன்னிட்டு படி பூஜை மற்றும் சிறப்பு வழிபாடு நடந்தது. சென்னிமலையில் உள்ள அருணகிரிநாதர் மடம் மற்றும் கிருத்திகை விசாக குழுவினர் சார்பில் வைகாசி விழாவை முன்னிட்டு காவிரி நதிக்கு சென்று தீர்த்தம் எடுத்து வந்தனர். பின்னர் நேற்று காலை சென்னிமலை கைலாசநாதர் கோயிலில் இருந்து தீர்த்த குடங்களுடன் படிக்கட்டுகள் வழியாக முருகன் கோயிலுக்கு சென்றனர். அங்கு காலை 10 மணிக்கு மேல் விநாயகர் பூஜையுடன் நிகழ்ச்சிகள் துவங்கியது. மேலும் கலச அபிஷேகம் மற்றும் 108 சங்கு பூஜை ஆகியவை நடந்தது. இதில் பகல் 12 மணிக்கு உச்சி கால பூஜை நடந்தன. முக்கிய நிகழ்ச்சியாக மாலை 4 மணிக்கு மேல் சந்தன காப்பு அலங்காரம், தீபாராதனை ஆகியவை நடந்தன. அதைத்தொடர்ந்து சாமிகள் புறப்பாடு நடந்தது. விழாவை முன்னிட்டு அருணகிரிநாதர் மண்டபத்தில் விழாக்குழு சார்பில் பக்தர்களுக்கு அன்னதானம் வழங்கப்பட்டது.படி பூஜை:சென்னிமலை சிவஞான சித்தர் பீடம் சார்பில், வைகாசி விசாக நட்சத்திரத்தை முன்னிட்டு நேற்று படி பூஜை நடந்தது. இதற்காக காலை 6 மணி முதல் சரவண சித்தர் தலைமையில் தன்னாசியப்பன் கோயில் வரை உள்ள சுமார் 1600 படிக்கட்டுகளுக்கு மஞ்சள் நீர், பால், பன்னீர் தெளித்து, விபூதி, குங்குமம் இட்டு, வாழை இலை போட்டு அதில் வெற்றிலை, பாக்கு, கனி வகைகள் வைத்து படிகளுக்கு சிறப்பு பூஜை செய்யப்பட்டது. மேலும் இமயமலை, காவிரி, கங்கை, நர்மதை, தாமிரபரணி ஆகிய இடங்களில் இருந்து தீர்த்தம் எடுத்து வந்து முருகப்பெருமானுக்கு தீர்த்த அபிஷேகம் செய்யப்பட்டது. இதில், திரளான பக்தர்கள் கலந்து கொண்டனர்.

பெண் கொலை வழக்கில் கொலையாளியை பிடிக்க தனிப்படை

சத்தியமங்கலம், மே 19: சத்தியமங்கலம் அருகே நடந்து சென்ற பெண்ணை கழுத்தை அறுத்து கொலை செய்த வழக்கில் கொலையாளியை பிடிக்க தனிப்படை அமைக்கப்பட்டுள்ளது. சத்தியமங்கலம் அருகே உள்ள சிக்கரசம்பாளையம் பிரிவு காலனியை சேர்ந்தவர் ஆறுமுகம் (எ) ரங்கன். விவசாயக் கூலித் தொழிலாளியான இவருக்கு லட்சுமி (25) என்ற மனைவியும், புனிதா என்ற மகளும், சபரி வாசன் என்ற மகனும் உள்ளனர். லட்சுமி சத்தியமங்கலம் அரசு மருத்துவமனை அருகே உள்ள தனியார் பனியன் கம்பெனியில் தினசரி கூலி தொழிலாளியாக வேலை செய்து வந்தார். நேற்று முன் தினம் இரவு லட்சுமி வேலைக்கு சென்று விட்டு இரவு 8 மணி அளவில் சத்தியமங்கலத்தில் இருந்து பஸ் ஏறி சிக்கரசம்பாளையம் பிரிவில் வந்து இறங்கி வீட்டிற்கு செல்வதற்காக சத்தியமங்கலம் - மைசூர் தேசிய நெடுஞ்சாலையில் சாலையோரம் நடந்து சென்றுள்ளார்.  அப்போது அவ்வழியே பைக்கில் வந்த நபர்கள் லட்சுமியை பிடித்து திடீரென கழுத்தை கத்தியால் அறுத்து விட்டு கத்தியை வீசி விட்டு தப்பி சென்றனர். கழுத்தில் பலத்த காயமடைந்த லட்சுமி சம்பவ இடத்திலேயே ரத்த வெள்ளத்தில் துடிதுடித்து உயிரிழந்தார். இதை கண்ட அப்பகுதி பொதுமக்கள் உடனடியாக சத்தியமங்கலம் போலீசாருக்கு தகவல் தெரிவித்தனர். சம்பவ இடத்திற்கு விரைந்து சென்ற போலீசார் உடலை மீட்டு பிரேத பரிசோதனைக்கு சத்தியமங்கலம் அரசு மருத்துவமனைக்கு அனுப்பினர்.     இந்நிலையில் ஈரோடு எஸ்.பி. சக்தி கணேசன் உத்தரவின்பேரில் சத்தியமங்கலம் டிஎஸ்பி சுப்பையா, இன்ஸ்பெக்டர் மோகன்ராஜ், தாளவாடி இன்ஸ்பெக்டர் அன்பரசு, பங்களாப்புதூர் இன்ஸ்பெக்டர் நெப்போலியன் ஆகியோர் அடங்கிய தனிப்படை அமைக்கப்பட்டு கொலையாளியை தேடி வருகின்றனர். கொலை செய்யப்பட்ட இடத்தில் புதிய கத்தி கிடைத்துள்ளது.  அந்த கத்தி சத்தியமங்கலத்தில் உள்ள ஒரு தனியார் டிபார்ட்மெண்ட் ஸ்டோரில் வாங்கியது தெரிய வந்துள்ளது.இந்நிலையில் போலீசார் லட்சுமிக்கும் கொலை செய்த நபருக்கும் கள்ளத்தொடர்பு காரணமாக கொலை செய்யப்பட்டு இருக்கலாம் என்ற கோணத்தில் விசாரணை நடத்தி வருகின்றனர். நேற்று காலை லட்சுமியின் உடல் பிரேத பரிசோதனைக்காக சத்தியமங்கலம் அரசு மருத்துவமனையில் இருந்து கோவை அரசு மருத்துவமனைக்கு அனுப்பி வைக்கப்பட்டு அங்கு பிரேத பரிசோதனை செய்யப்பட்டு உடல் அவரது உறவினர்களிடம் ஒப்படைக்கப்பட்டது. இச்சம்பவம் அப்பகுதியில் பரபரப்பை ஏற்படுத்தியுள்ளது.

சூறாவளி, வன விலங்குகளால் பாதிக்கும் வாழை இழப்பீடு கிடைக்க காப்பீடு திட்டத்தில் மாற்றம்

ஈரோடு, மே 19:  சூறாவளி, வன விலங்குகளால் பாதிக்கும் வாழைகளுக்கு இழப்பீடு கிடைக்கும் வகையில் காப்பீடு திட்டத்தில் மாற்றம் செய்யப்பட்டுள்ளதாக அதிகாரிகள் தெரிவித்துள்ளனர். மத்திய அரசு மூலம் நியமிக்கப்பட்ட அக்ரிகல்சுரல் இன்சூரன்ஸ் ஏஜென்சி என்ற நிறுவனம் மூலம் பிரதமரின் புதிய பயிர் காப்பீடு திட்டம் கடந்த 3 ஆண்டுகளாக செயல்படுத்தப்பட்டு வந்தது. இந்தாண்டு முதல் யுனைடெட் இந்தியா இன்சூரன்ஸ் நிறுவனம் மூலம் பயிர் காப்பீடு செய்யப்பட்டு வருகிறது. 3 ஆண்டுகளுக்கு இந்நிறுவனம் செயல்பாட்டில் இருக்கும் என அறிவிக்கப்பட்டுள்ளது. இந்நிலையில் வாழை பயிர்க்கு நோய் தாக்குதல், மகசூல் பாதிப்பு, வறட்சி, மழை உள்ளிட்ட பாதிப்புகளுக்கு மட்டும் இழப்பீடு தொகை வழங்கப்பட்டு வந்தது. இந்தாண்டு முதல் புதிய காப்பீடு திட்டத்தின் கீழ் சூறாவளி, வனவிலங்குகளால் பாதிக்கப்பட்ட வாழைக்கும் இனி காப்பீடு தொகை கிடைக்கும் என்று வேளாண் அதிகாரிகள் தெரிவித்துள்ளனர். இது குறித்து வேளாண் அதிகாரிகள் தரப்பில் கூறியதாவது: வாழை பயிருக்கு ஏக்கர் ஒன்றுக்கு ரூ.3700 வரை காப்பீடு செய்யும் விவசாயிக்கு மழை, வெள்ளம், வறட்சி, மகசூல் பாதிப்பு, நோய் தாக்கம் போன்றவைகளுக்கு மட்டும் காப்பீட்டுக்கான இழப்பீடு தொகை வழங்கப்பட்டு வந்தது. இந்தாண்டு முதல் வனவிலங்குகளாலும், சூறாவளி காற்றினாலும் வாழைகள் சேதமடைந்தால் காப்பீடு நிறுவனத்திடமிருந்து இழப்பீடு பெற முடியும் என்றனர். திறப்பு விழாவிற்கு காத்திருப்பு ஈரோடு புதுமைக்காலனியில் குடிசை மாற்று வாரியம் சார்பில் அடுக்குமாடி குடியிருப்பு கட்டப்பட்டு திறப்பு விழாவிற்கு காத்துகிடக்கிறது.

1 ம் வகுப்பு முதல் பிளஸ் 2 மாணவர்களுக்கான நோட்டு-புத்தகம் 70 சதவீதம் வருகை

ஈரோடு,  மே 19:  ஈரோடு மாவட்டத்தில் நடப்பாண்டு 1ம் வகுப்பு முதல் 12ம் வகுப்பு  படிக்கும் மாணவ-மாணவிகளுக்கு பாட நோட்டு புத்தகம் தற்போது வரை 70 சதவீதம்  வந்துள்ளது எனவும், மே மாத இறுதிக்குள் அனைத்தும் பள்ளிகளுக்கும்  அனுப்பி வைக்கப்படும் என ஈரோடு முதன்மை கல்வி அலுவலர் தெரிவித்தார்.  ஈரோடு  மாவட்டத்தில் பள்ளிகள் கோடை விடுமுறை முடிந்து ஜூன் 3ம் தேதி திறக்கப்பட  உள்ளன. இதில் பள்ளிகள் திறக்கப்படும்போது அரசு மற்றும் அரசு உதவி பெறும்  பள்ளி மாணவ-மாணவிகளுக்கு பாட புத்தகம், நோட்டு, சீருடைகள் வழங்கப்பட  உள்ளது. இதற்காக பாட நோட்டு புத்தகங்கள் ஈரோடு ரயில்வே காலனி மாநகராட்சி  மேல்நிலை பள்ளிக்கு வரத்துவங்கியுள்ளன. இதுகுறித்து ஈரோடு மாவட்ட  முதன்மை கல்வி அலுவலர் பாலமுரளி கூறுகையில், ‘‘மாவட்டத்தில் ஒரு லட்சத்து  70 ஆயிரம் மாணவ-மாணவிகளுக்கு பாட புத்தகங்கள் மற்றும் நோட்டுகள் வழங்கப்பட  உள்ளன. இந்த ஆண்டு 7, 8, 10, 12ம் வகுப்பு பாட பிரிவுகளுக்கு புதிய  பாட்டத்திட்டம் அறிமுகம் செய்யப்பட்டுள்ளது.  9ம் வகுப்பு தமிழ், ஆங்கிலம்  பாடத்துக்கு மூன்று தொகுப்புகளுக்கு பதிலாக ஒரே தொகுப்பு பாட புத்தகமாக  வந்துள்ளது. புத்தகங்கள் மற்றும் நோட்டுகள் தற்போது வரை 70 சதவீதம்  வந்துள்ளது. அனைத்து பாட புத்தகம் மற்றும் நோட்டுகள் வந்த உடன்  மாவட்டத்தில் உள்ள ஈரோடு, கோபி, சத்தி, பெருந்துறை, பவானி கல்வி  மாவட்டங்களுக்கு மே  மாத இறுதிக்குள் அதாவது பள்ளிகள் திறப்பதற்கு முன்பாக நோட்டு புத்தகங்கள்  அனைத்தும் அந்தந்த பள்ளிகளுக்கு அனுப்பி வைக்கப்படும்,’’ என்றார்.

பி.கே.பி. சாமி பள்ளி 25ம் ஆண்டு வெள்ளிவிழா

மொடக்குறிச்சி, மே 19: மொடக்குறிச்சி தொகுதிக்குட்பட்ட ஈஞ்சம்பள்ளி கிராமம் கல்யாணிபுரத்தில் 1993ம் ஆண்டு பி.கே. பழனிச்சாமிக்கவுண்டர், ருக்மணி அம்மாள் சாமி நர்சரி பள்ளியை துவங்கினர். தற்போது இப்பள்ளி மேல்நிலை பள்ளியாக உயர்ந்துள்ளது. மேலும் 1ம் வகுப்பு முதல் 12ம் வகுப்பு வரை ஆங்கில வழிக் கல்வியும், 6ம் வகுப்பு முதல் 12ம் வகுப்பு வரை தமிழ் வழிக் கல்வியும் கற்பிக்கப்பட்டு வருகிறது. இங்கு சுமார் 2200 மாணவர்கள் பயின்று வருகின்றனர். ஆண், பெண் இருபாலருக்கும் தனித்தனி விடுதி வசதி உள்ளது.இந்நிலையில் பி.கே.பிசாமி பள்ளி 25ம் ஆண்டு வெள்ளிவிழா கொண்டாடப்பட்டது. மேலும் இரண்டரை வயது முதல் 3 வயதுகளுக்குட்பட்ட குழந்தைகளுக்கு பாலர் வகுப்புகள் துவக்கப்பட்டுள்ளது. கடந்த 12 ஆண்டுகளாக 10 மற்றும் 12ம் வகுப்பில் மாணவ, மாணவியர் 100 சதவீத தேர்ச்சி பெற்று வருகின்றனர். மாணவர்களுக்கு கராத்தே, யோகா, சதுரங்கம், அபாகஸ், பேண்டுவாத்தியம், சாரண, சாரணீய இயக்கம், நடனம், பாட்டு, செஸ், கீபோர்டு, ஸ்கேட்டிங், பசுமைப்படை, தமிழ், ஆங்கில இலக்கியப் பேரவை, ஜே ஆர் சி,  ஆர் எஸ் பி, நுகர்வோர் மன்றம், வேதாத்திரி மகரிஷி மனவளக்கலை பயிற்சி, ஐஐடி, நீட் கோச்சிங் போன்ற சிறப்பு வகுப்புகளும் நடத்தப்படுகிறது.

அந்தியூர் அருகே கஞ்சா விற்றவர் கைது

அந்தியூர், மே 19: அந்தியூர் அருகே உள்ள பனங்காட்டூர் தாசளியூர் பிரிவு பகுதியில் போலீஸ் எஸ்.ஐ., ரவி தலைமையிலான போலீசார் ரோந்து பணியில் ஈடுபட்டிருந்தனர். அப்போது அப்பகுதியில் ஒரு முதியவர் சந்தேகப்படும் படியாக நின்று கொண்டிருந்தார். அவரிடம் போலீசார் நடத்திய விசாரணையில்,சுப்பிரமணி(52)  என்பதும் கஞ்சா விற்பதும் தெரியவந்தது. இதனையடுத்து அவரை போலீசார் கைது செய்து, அவரிடம் இருந்து 250 கிராம் கஞ்சா மற்றும் ரூ.10 ஆயிரத்து 100 பணத்தை பறிமுதல் செய்தனர். இது குறித்து அந்தியூர் போலீசார் வழக்குப்பதிவு செய்து விசாரித்து வருகின்றனர்.

பைக்கில் இருந்து விழுந்த காவலாளி பலி

ஈரோடு,  மே 19: ஈரோடு பெரியசடையம்பாளையம் திருப்பதி கார்டன் பகுதியை சேர்ந்தவர்  தர்மராஜ் (65). இவர் திண்டலில் உள்ள தனியார் கல்லூரியில் வாட்ச்மேனாக  பணியாற்றி வந்தார். நேற்று முன்தினம் இரவு பணியை முடித்து கொண்டு டூவீலரில்  தனது வீட்டிற்கு சென்று கொண்டிருந்தார். சென்னிமலை ரோடு ஜீவா நகர் அருகே  வந்தபோது, எதிர்பாரதவிதமாக பைக்கில் இருந்து தவறி ரோட்டில் விழுந்தார். இதில் பலத்த காயம் அடைந்த அவரை அக்கம் பக்கத்தினர் மீட்டு ஈரோடு அரசு  மருத்துவமனையில் சேர்த்தனர். பின்னர் மேல் சிகிச்சைக்காக ஈரோட்டில் உள்ள  தனியார் மருத்துவமனையில் சேர்த்தனர். அங்கு சிகிச்சை பலனின்றி நேற்று  அதிகாலை பரிதாபமாக உயிரிழந்தார். இதுகுறித்து ஈரோடு தாலுகா போலீசார் வழக்கு  பதிவு செய்து விசாரணை நடத்தி வருகின்றனர்.

பழங்குடியின குழந்தைகளுக்கு கோடை பயிற்சி முகாம்

ஈரோடு, மே 19:  பள்ளி இடைநின்ற பழங்குடி குழந்தைகளுக்கு கோடை கால பயிற்சி முகாம் நடத்த முடிவு செய்யப்பட்டுள்ளது. அந்தியூர் அடுத்துள்ள பர்கூர் மலைக்கிராமங்களில் உள்ள பழங்குடி மக்களுக்கு கல்வி குறித்த விழிப்புணர்வு இல்லாத நிலை இருந்து வருகிறது. இதனால் குழந்தைகளை விவசாய பணிகளில் ஈடுபடுத்துவது, கூலி வேலைகளுக்காக வெளியூர்களுக்கு அனுப்பி வைப்பது போன்றவை அதிகரித்து வருகிறது. இதே போல பள்ளிக்கு வரும் குழந்தைகள் இடைநின்றலும் அதிகரித்து வருகிறது. இதை தடுக்கும் வகையிலும், கல்வி மீதான ஈர்ப்பு ஏற்படும் வகையில் பழங்குடி கிராமங்களில் ஆண்டுதோறும் கோடை கால பயிற்சி முகாம் நடத்தப்படுகிறது. சுடர் தொண்டு நிறுவனம் சார்பில் இந்தாண்டு பயிற்சி முகாம் வாண்டுகள் கொண்டாட்டம் என்ற பெயரில் பர்கூர் மலை கொங்காடை கிராமத்தில் வருகின்ற 24ம் தேதி முதல் 27ம் தேதி வரை நடக்க உள்ளதாக அறிவிக்கப்பட்டுள்ளது.  இப்பயிற்சி முகாமில் ஆட்டக்கலை, புகைப்படக்கலை, நடனம், பாடல், கதை சொல்லல், சிலம்பாட்டம், ஒயிலாட்டம், மரபு விளையாட்டு, நாடகம், ஓவியம், ஓரிகாமி, கானகப் பயணம், வில் அம்பு எரிதல், ஆவணப்படம் திரையிடல், பொம்மலாட்டம் உள்ளிட்ட பல்வேறு பயிற்சிகள் நடைபெற உள்ளதாக அறிவிக்கப்பட்டுள்ளது.

பொறியியல் கல்லூரிகளின் தரவரிசைப் பட்டியல் விவேகானந்தா மகளிர் பொறியியல் கல்லூரி முதலிடம் பெற்று சாதனை

திருச்செங்கோடு, மே 19: தமிழகம் முழுவதும் உள்ள பொறியியல் கல்லூரிகளுக்கான தரவரிசைப் பட்டியலை அண்ணா பல்கலைக்கழகம் ஒவ்வொரு ஆண்டும் மாணவர் மற்றும் பொதுமக்களின்  நலனைக் கருத்தில் கொண்டு வெளியிட்டு வருகிறது. 2018 நவம்பர் மற்றும் டிசம்பரில் நடைபெற்ற செமஸ்டர் தேர்வு முடிவுகளின் அடிப்படையில் கல்லூரிகளின் தரவரிசைப்  பட்டியலை அண்ணா பல்கலைக்கழக தேர்வு கட்டுப்பாட்டு துறை அறிவித்துள்ளது. இதில் அண்ணா பல்கலைக்கழக இணைவு பெற்ற 30 தன்னாட்சி பொறியியல் கல்லூரிகளில் 89.59 சத தேர்ச்சி பெற்று திருச்செங்கோடு விவேகானந்தா மகளிர் பொறியியல்  கல்லூரி முதலிடம் பெற்றுள்ளது. அடுத்த நான்கு இடங்கள் பெற்ற கல்லூரிகள் வருமாறு: கோவை டாக்டர் மகாலிங்கம் பொறியியல் மற்றும் தொழில் நுட்ப கல்லூரி (65.87 ), ஈரோடு பண்ணாரியம்மன் இன்ஸ்டிடியூட் ஆப் டெக்னாலஜி (83.37), விருதுநகர் மெப்கோ  பொறியியல் கல்லூரி( 82.65), தூத்துக்குடி நேசனல் பொறியியல் கல்லூரி (82.52) அண்ணா பல்கலைக்கழகத்துடன் இணைவு பெற்ற 481 பொறியியல் கல்லூரிகளில் நவம்பர் டிசம்பர் செமஸ்டர் தேர்வுகள் அடிப்படையில் விவேகானந்தா மகளிர் பொறியியல்  மற்றும் தொழில்நுட்பக் கல்லூரி 81.65 சத தேர்ச்சியைப் பெற்று  மூன்றாமிடம் பிடித்துள்ளது. 88.12 சதம் பெற்ற சேலம் கைத்தறி தொழில் நுட்பக் கல்லூரி முதலிடத்தையும்,  85.57 சத தேர்ச்சி பெற்று கோவை பிஎஸ்ஜி தொழில் நுட்ப கல்லூரி இரண்டமிடமும் பெற்றுள்ளன.78.14 சதம் பெற்ற சென்னை வேலம்மாள் பொறியியல் கல்லூரி  நான்காமிடத்தையும், சென்னை ஆர்எம்டி பொறியியல் கல்லூரி 76.91 சத தேர்ச்சி பெற்று ஐந்தாமிடத்தையும் பிடித்தன. இதுகுறித்து விவேகானந்தா கல்லூரிகளின்  தாளாளர் கருணாநிதி கூறியது: அண்ணா பல்கலைக்கழக  தர வரிசைப் பட்டியலில் எங்களது  இரண்டு  கல்லூரிகளும்  தமிழக  அளவில் முதலாவது மற்றும் மூன்றாவது இடத்தைப் பெற்றது குறித்து மகிழ்ச்சி அடைகிறோம். அண்ணா பல்கலைக்கழகம் தரவரிசைப் பட்டியலை வெளியிடுவதன் மூலம்  மாணவர்களும் பெற்றோர்களும் சிறந்த கல்லூரியை தேர்வு செய்ய உறுதுணையாக இருக்கும்.கிராமப்புற மகளிர் கல்வியில் மேன்மை அடைய வேண்டும் என்ற உயர்ந்த நோக்கில் கிராமப்புறத்தில் எங்கள் கல்லூரிகள் அமைந்துள்ளன. வெறும் பட்டங்கள் பெறுவது  மட்டுமின்றி வேலை வாய்ப்பையும் பெறும் வகையில் பல்வேறு பயிற்சி வகுப்புகள் நடைபெருகின்றன. மத்திய அரசின் ஐஏஎஸ் போட்டித்தேர்வு மற்றும் தமிழக அரசின்  டிஎன்பிஎஸ்சி ஆகிய தேர்வுக்கான பயிற்சிகளும் தீவிரமாக அளிக்கப்படுகின்றன.இதன் காரணமாக ஒரே வளாக்ததில் சுமார் 25 ஆயிரம் மாணவிகள் பயிலும் தென்கிழக்கு  ஆசியாவின் பெரிய கல்வி நிறுவனமாக விவேகானந்தா கல்லூரிகள் உள்ளன  என்றார் அவர்.

குடிக்க பணம் தர மறுத்த மனைவியை கொல்ல முயற்சி

பந்தலூர்,  மே 17 : பந்தலூர் அருகே சேரம்பாடி கண்ணம்பள்ளி பகுதியில் வசித்து வருபவர்  கூலித்தொழிலாளி டிட்டோகுமார்(40). இவருடைய மனைவி சோபனா(36). இதில் சோபனா  கடந்த இரு தினங்களுக்கு முன் தீக்காயங்களுடன் பந்தலூர் அரசு  மருத்துவமனையில் சிகிச்சைக்காக சேர்க்கப்பட்டார். இதையடுத்து அவர் மேல்  சிகிச்சைக்கா கேரள மாநிலம் கள்ளிக்கோட்டை அரசு மருத்துவமனைக்கு கொண்டு  ேசல்லப்பட்டார். இதுகுறித்து போலீசார் நடத்திய விசாரணையில் குடிக்க பணம் தர  மறத்ததால் டிட்டோகுமார் மனைவி சோபனா மீது மண்ணெண்ணையை ஊற்றி தீ வைத்தது தெரியவந்தது. இதையடுத்து டிட்டோகுமாரை கைது செய்தனர்.

பெருந்துறை அருகே ஓய்வுபெற்ற விஏஓ வீட்டில் 20 பவுன் நகை, ரூ.5 லட்சம் கொள்ளை

பெருந்துறை, மே 17: பெருந்துறையில் ஓய்வுபெற்ற விஏஓ வீட்டில் 20 பவுன் நகை மற்றும் ரூ.5 லட்சத்தை மர்ம நபர்கள் கொள்ளை அடித்து சென்றனர். ஈரோடு மாவட்டம் பெருந்துறை தோப்புபாளையம் பகுதியை சேர்ந்தவர் நடராஜன். ஓய்வுபெற்ற கிராம நிர்வாக அலுவலர் (விஏஓ). இவரது மனைவி காந்திமதி. ஓய்வுபெற்ற ஆசிரியை. இவரது மகன் அருண்குமார். இவர், நம்பூயூர் அருகே உள்ள தேசியமயமாக்கப்பட்ட வங்கியில் உதவி மேலாளராக பணியாற்றி வருகிறார். இவரது மனைவி பவித்ரா. இவர்கள் அனைவரும் நேற்று காலை சிவகிரியில் உள்ள கோயில் கும்பாபிஷேகத்திற்கு சென்றனர். மாலை 6 மணிக்கு வீட்டுக்கு வந்து பார்த்தபோது கதவின் பூட்டு உடைக்கப்பட்டிருந்தது. உள்ளே சென்று பார்த்தபோது பீரோ திறந்திருந்தது. உள்ளே இருந்த 20 பவுன் நகை, ரூ.5 லட்சம் ரொக்கம் கொள்ளை போனது தெரியவந்தது. இதுகுறித்து பெருந்துறை காவல் நிலையத்தில் நடராஜன் புகார் அளித்தார். டிஎஸ்பி ராஜ்குமார், இன்ஸ்பெக்டர் சுகவனம் மற்றும் போலீசார் சம்பவ இடத்துக்கு சென்று விசாரணை நடத்தினர். கைரேகை நிபுணர்கள் சம்பவ இடத்தில் முக்கிய தடயங்களை சேகரித்தனர். இதுகுறித்து பெருந்துறை போலீசார்  வழக்கு பதிவு செய்து கொள்ளையர்களை தேடி வருகின்றனர்.

‘எக்ஸ்பிரஸ் பிரிவே’ திட்டத்தால் நோயாளிகளை மருத்துவமனைகளுக்கு கொண்டுவரும் நேரம் 1 நிமிடம் குறைந்தது

ஈரோடு, மே 17: ஈரோடு மாவட்டத்தில் செயல்படுத்தப்பட்டு வரும் 108 ஆம்புலன்ஸ் `எக்ஸ்பிரஸ் பிரிவே’ திட்டத்தால் நோயாளிகளை மருத்துவமனைக்கு கொண்டு வரும் நேரம் 1 நிமிடம் குறைக்கப்பட்டுள்ளதாக போலீசார் தெரிவித்தனர்.ஈரோடு மாவட்டத்தில் விபத்து, மகப்பேறு மற்றும் உடல்நலம் குன்றிய நபர்களை சிகிச்சைக்கு விரைவாக கொண்டு செல்லும் வகையில் 108 ஆம்புலன்ஸ்களுக்கு வழி விட்டும், ஆம்புலன்ஸ் செல்லும் சாலையில் போக்குவரத்து நெரிசல் ஏற்படாத வகையிலும் இருக்க மாவட்ட காவல்துறை சார்பில் ‘எக்ஸ்பிரஸ் பிரிவே’ எனும் திட்டம் செயல்படுத்தப்பட்டு வருகிறது.இதற்காக வாட்ஸ்-அப் குழு துவங்கப்பட்டு அதில் மாவட்ட போலீஸ் எஸ்பி, இன்ஸ்பெக்டர்கள், 108 ஆம்புலன்ஸ் ஊழியர்கள் ஆகியோர் உள்ளனர். விபத்து நடந்த இடத்தில் இருந்து எந்த மருத்துவமனைக்கு ஆம்புலன்ஸ் செல்ல உள்ளதோ அந்த சாலையில் போலீஸ் மூலம் போக்குவரத்து நெரிசல் இல்லாமல் செய்வது, சிக்னல்கள் கிளியர் செய்து வைப்பது உள்ளிட்ட பணிகள் மேற்கொள்ளப்படும்.இந்த திட்டம் ஈரோடு மாவட்டத்தில் கடந்த ஆண்டு டிசம்பர் மாதத்தில் இருந்து அமலில் இருந்து வருகிறது. திட்டம் துவங்கப்பட்டதில் இருந்து விபத்தில் சிக்கியவர்களை மருத்துவமனைக்கு கொண்டுசென்று சேர்க்கும் நேரமானது வெகுவாக குறைக்கப்பட்டு வருகிறது. இந்நிலையில், கடந்த மார்ச் மாதத்துடன் ஏப்ரல் மாதத்தை ஒப்பிடுகையில் மேலும் ஒரு நிமிடம் குறைக்கப்பட்டுள்ளதாக மாவட்ட காவல்துறை தெரிவித்துள்ளது.

சென்னிமலை முருகன் கோயில் உண்டியல் காணிக்கை ரூ.44.37 லட்சம்

சென்னிமலை, மே 17:சென்னிமலை முருகன் கோயிலில் நேற்று முன்தினம் உண்டியல் திறந்து எண்ணப்பட்டது. பண்ணாரி அம்மன் கோயில் துணை ஆணையர் பழனிக்குமார் தலைமையில், ஈரோடு இந்து சமய அறநிலையத்துறை உதவி ஆணையர் நந்தகுமார், பெருந்துறை கோயில் ஆய்வாளர் பாலசுந்தரி, சென்னிமலை கோயில் செயல் அலுவலர் அருள்குமார் ஆகியோர் முன்னிலையில் உண்டியல்கள் திறந்து எண்ணப்பட்டது. இதில், தைப்பூசத்திற்காக வைக்கப்பட்டிருந்த சிறப்பு 2 உண்டியல்கள் மற்றும் 8 நிரந்தர உண்டியலில் 43 லட்சத்து 19 ஆயிரத்து 906 ரூபாய் பணமும், திருப்பணி உண்டியலில் 1 லட்சத்து 17 ஆயிரத்து 745 ரூபாய் பணமும் காணிக்கையாக இருந்தது. இரு உண்டியல்களிலும் மொத்தம் 44 லட்சத்து 37 ஆயிரத்து 651 ரூபாய் பக்தர்களின் காணிக்கையாக இருந்தது. மேலும், நிரந்தர உண்டியலில் 170 கிராம் தங்கமும், 2,530 கிராம் வெள்ளியும் காணிக்கையாக இருந்தது. உண்டியல்கள் எண்ணும் பணியில் ஈரோடு மாவட்ட மத்திய கூட்டுறவு வங்கி பணியாளர்கள், கூட்டுறவு சங்க பணியாளர்கள் மற்றும் மகளிர் சுய உதவிக்குழுவினர் கலந்து கொண்டனர்.