Headlines - Dinakaran

போலிகள் உஷார்!

போலி தயாரிப்புகள் இந்திய சந்தையை ஆக்கிரமித்து வருவது கவலைக்குரிய விஷயம். இதனால் அரசுக்கும், நிறுவனங்களுக்கும் ஆண்டுக்கு ₹1.05 லட்சம் கோடி வருவாய் இழப்பு ஏற்படுவதாக ‘ஆதென்டிகேஷன் சொல்யூஷன் புரவைடர்ஸ் அசோசியேஷன்’ என்ற அமைப்பு தகவல் வெளியிteட்டுள்ளது. முக்கியமாக, மருந்து, உணவு மற்றும் ஜவுளி பொருட்களில் போலி தயாரிப்புகள் அதிகளவு இருப்பதாக அதிர்ச்சி தகவல் வெளியிட்டுள்ளது. முறையான ஆய்வு, கண்காணிப்பு மூலம் மட்டுமே இதனை கட்டுப்படுத்த முடியும் என்றும் அறிவுறுத்தியுள்ளது.மருத்து உற்பத்தி துறையில் அதிகளவு போலிகள் புழங்குவது பெரும் அச்சத்தை ஏற்படுத்துகிறது. இது நேரடியாக மனித உயிர்களுடன் விளையாடும் செயல். போலிகளை கட்டுப்படுத்த நவீன தொழில்நுட்பத்துடன் கூடிய பல்வேறு நடவடிக்கைகளை அரசு மேற்கொண்டு வருகிறது. ஆனாலும், போலிகளை ஓரளவுக்கு மேல் கட்டுப்படுத்த முடியவில்லை. இதனால் உணவு மற்றும் மருந்து களை நுகர்வோர் மிகவும் கவனமாக வாங்க வேண்டியது கட்டாயம். மருந்துகளில் போலிகளை கண்டுபிடிப்பது சிரமமானது தான் என்றாலும், சில வழிமுறைகளை பின்பற்றி கண்டறியலாம்.அதாவது, மருந்து பாட்டிலின் மூடியில் ஏதாவது கீறல் உள்ளதா என்பதை சரிபார்க்க வேண்டும். அடிக்கடி வாங்கும் மருந்தின் விலை வழக்கமான விலையை விட குறைவாக இருந்தால் விசாரிக்க வேண்டும். சில நேரங்களில் மருந்து உட்கொண்ட பிறகு ஒவ்வாமை பிரச்னை ஏற்பட்டால், உடனே மருத்துவர்களை பார்ப்பது நல்லது.மேலும், உணவு பொருட்களின் மீது போலி ஸ்டிக்கர் ஒட்டி விற்பனை செய்யப்படுகிறது. அதிகாரிகள் அடிக்கடி ஆய்வு செய்வதன் மூலம் இவற்றை கட்டுப்படுத்தலாம். போலி தயாரிப்புகளை எப்படி கண்டுபிடிப்பது என்பது குறித்த விழிப்புணர்வு இல்லாததால், நுகர்வோருக்கு சிக்கல் ஏற்படுகிறது.சம்பந்தப்பட்ட அதிகாரிகளுக்கு தெரியாமல் போலி தயாரிப்புகளை சந்தையில் விற்பனை செய்வது அவ்வளவு எளிதான விஷயம் இல்லை என்கின்றனர் சமூக ஆர்வலர்கள். போலி தயாரிப்புகளுக்கு பின் மிகப்பெரிய நெட்வொர்க் செயல்படுகிறதாம். மருந்துகளில் போலி தயாரிப்புகளை கண்டுபிடிக்க ரகசிய குழு ஒன்றை அரசு அமைக்க வேண்டும். அந்த குழு போலி மருந்து, உணவு பொருட்கள் எங்கு தயாரிக்கப்படுகிறது? நாட்டின் எந்தெந்த பகுதிகளுக்கு அதிகமாக அனுப்பப்படுகிறது? சந்தையில் அவற்றை எவ்வாறு நுழைக்கின்றனர் என்பதை கண்டறிய வேண்டும். அவ்வாறு செய்தால் மட்டுமே போலி தயாரிப்புகளை கட்டுப்படுத்த முடியும்.உணவு, மருந்து தயாரிப்பில் போலிகள் இருப்பது மனித ஆரோக்கியத்திற்கும், எதிர்காலத்துக்கும் மிகப்பெரிய தீங்கு விளைவிக்கும். இதனால் இந்த விஷயத்தில் மத்திய, மாநில அரசுகள் அதிக கவனம் செலுத்துவது காலத்தின் கட்டாயம்.

விலையேற்றம் நியாயமா?

தமிழகத்தில் ஆவின் நிறுவனம் சுமார் 37 லட்சம் லிட்டர் பாலை கொள்முதல் செய்கிறது. அவை பதப்படுத்தப்பட்டு 250 மிலி, 500 மிலி, ஒரு லிட்டர் என பால் பாக்கெட்டுகளாக அடைக்கப்பட்டு நுகர்வோருக்கு விற்பனை செய்யப்படுகின்றன.  இந்நிலையில் பால் உற்பத்தியாளர்களை கணக்கில் காட்டி, தமிழக அரசு ஆவின் பால் விலையை அதிரடியாக உயர்த்தியுள்ளது. அதன்படி இருநிலை சமன்படுத்திய பால் (மெஜந்தா) ஒரு லிட்டர் 34லிருந்து 40 ஆகவும், சமன்படுத்திய பால் (நீலம்) ஒரு லிட்டர் 37லிருந்து 43ஆகவும் இன்று முதல் உயர்கிறது. நிலைப்படுத்திய பால் (பச்சை) ஒரு லிட்டர் 41 லிருந்து  47ஆகவும், நிறை கொழுப்பு பால் ஒரு லிட்டர் 45லிருந்து 51 ஆகவும் உயர்த்தப்பட்டுள்ளது. சராசரியாக எல்லா பாலின் விலையும் 6 உயர்த்தப்பட்டு விட்டது.இவ்விலை உயர்வின் பின்னணியில் எழும் மாற்றங்கள் சாமானிய மக்களை சங்கடப்படுத்தும். ஒவ்வொரு மாதமும் ஏழை, நடுத்தர குடும்பங்கள் பால் விலைக்கு 200 கூடுதலாக செலவிட நேரிடும். கடைகளில் டீ, காபி விலை உயர்வதற்கு  வாய்ப்புள்ளது. பால் விலையை காரணம் காட்டியே ஆவின் தயிர், மோர், ஐஸ்கிரீம், பால்கோவா உள்ளிட்ட ஆவின் தயாரிப்புகள் விலையும் தானாக உயர்ந்துவிடும். பால் தொடர்புடைய மறைமுக பொருட்களின் விலை உயர்வையும்  பொதுமக்கள் எதிர்கொண்டாக வேண்டும்.அதிமுக ஆட்சியில் கடந்த 8 ஆண்டுகளில் 3வது முறையாக இந்த விலை உயர்வு நடந்துள்ளது. கடந்த 2011ல் ஒரு லிட்டர் சமன்படுத்திய பால் 20.50க்கு விற்றது. இப்போது அதே பால் 40 ஆக உயர்ந்துள்ளது. இரு மடங்கு விலை உயர்வு  அதிமுக ஆட்சிக்காலத்திலேயே நடந்துள்ளது குறிப்பிடத்தக்கது.பால் உற்பத்தியாளர்களை வாழ வைக்கிறோம் என அரசின் சப்பைக்கட்டும் ஏற்றுக் கொள்ளக்கூடியதல்ல. ஏனெனில் அவர்களிடம் பசும்பால் கொள்முதல் விலையை ₹4 மட்டுமே உயர்த்தி விட்டு, நுகர்வோரிடம் 6 விலை உயர்த்தியிருப்பதில்  அரசின் வணிக நோக்கம் அப்பட்டமாக தெரிகிறது.விவசாயிகளுக்கும், பால் உற்பத்தியாளர்களுக்கும் கொள்முதல் விலையை அரசு உயர்த்தி கொடுப்பதில் ஆட்சேபணையில்லை. அதே சமயம் ஆவின் பால் நுகர்வோருக்கும் தரமான பாலை, குறைந்த விலையில் அளிப்பது அரசின் கடமையாகும்.  தமிழகம் முழுவதும் ஆவினில் காணப்படும் நிர்வாக சீர்கேடுகளை களைந்து, முடங்கி கிடக்கும் கூட்டுறவு சங்கங்களை உயிர்ப்பித்தாலே ஆவினில் லாபம் கொழிக்கும். அதை விடுத்து அரசு சாமானிய மக்களின் தலையில் விலையேற்றத்தை  திணிப்பது சரியல்ல. ஆவினில் இப்போதைய விலை உயர்வு, தனியார் பால் பாக்கெட்டுகளின் விலைக்கு இணையாக உள்ளது. இதனால் தமிழக அரசு மறைமுகமாக தனியார் பால் விற்பனையை ஊக்குவிக்கிறதோ என்ற சந்தேகமும் எழுகிறது.

விழிப்புணர்வு தேவை

தமிழகத்தில் இந்த ஆண்டு ஜனவரி 1ம் தேதி முதல் ஒரு முறை பயன்படுத்திவிட்டு தூக்கி எறியும் பிளாஸ்டிக் பொருட்கள் பயன்பாட்டுக்கு தடை விதிக்கப்பட்டது. ஆனால் இந்த தடையை மாநில அரசால் அமல்படுத்த முடியாது, இது மத்திய அரசு செயல்படுத்த வேண்டிய திட்டம் என்று பிளாஸ்டிக் பொருட்கள் உற்பத்தியாளர்கள் கூறுகின்றனர்.  ஏற்கனவே இந்த திட்டம் 25 மாநிலங்களில் அறிவிக்கப்பட்டு வெற்றி பெறவில்லை என்றும் அவர்கள் தங்களது நிலைக்கு வலு சேர்க்கின்றனர். இந்நிலையில் ஒரு முறை பயன்படுத்தி தூக்கி எறியும் பிளாஸ்டிக் பொருள் வைத்திருப்பவர்கள், விற்பவர்களுக்கு அபராதம் வசூலிக்கப்பட்டு வந்தது. அதுவும் சில வாரங்கள் தொடர்ந்தது அவ்வளவுதான் கிடப்பில் போடப்பட்டுவிட்டது.பிரதமர் மோடி தனது சுதந்திர தின உரையில் அக்டோபர் 2ம் தேதி முதல் ஒருமுறை பயன்படுத்தி விட்டு தூக்கி எறியும் பிளாஸ்டிக் பொருட்கள் பயன்பாட்டுக்கு தடை விதிப்பதாக அறிவித்துள்ளது ஆறுதல் அளிப்பதாக உள்ளது. நாடு முழுவதும் தினசரி 25,940 டன் பிளாஸ்டிக் குப்பை உருவாகுவதாக மத்திய அரசு நாடாளுமன்றத்தில் தெரிவித்துள்ளது. இதில் 4,059 டன் குப்பை குறிப்பிட்ட 60 பெரு நகரங்களில் குவிகிறது.நாடு முழுவதும் பிளாஸ்டிக் குப்பை உருவாக்கும் நகரங்களில் டெல்லி, சென்னை முதல் 2 இடங்களில் உள்ளது மத்திய மாசுக்கட்டுப்பாட்டு வாரியம் வெளியிட்ட ஆண்டறிக்கை மூலம் தெரியவந்துள்ளது. அதன்படி 2010-11ம் ஆண்டில் மேற்கொள்ளப்பட்ட ஆய்வு முடிவு அதில் வெளியிட்டுள்ளது. நாட்டிலேயே அதிகபட்சமாக டெல்லியில் நாள் ஒன்றுக்கு 690 டன் பிளாஸ்டிக் குப்பை உருவாகிறது. அதற்கடுத்தபடியாக சென்னையில் 429 டன் பிளாஸ்டிக் குப்பை உருவாகிறது. அடுத்த இடங்களில் கொல்கத்தா 426 டன், மும்பை 408 டன் குப்பையை உருவாக்குகின்றன.பிளாஸ்டிக் பொருளுக்கு தடை விதிக்கப்பட்டு 7 மாதங்கள் ஆகின்றன. ஆனால், முறையாக இந்த தடை உத்தரவு அமல்படுத்தப்படவில்லை. அதனால்தான் பிளாஸ்டிக் குப்பைகள் அதிகம் குவிகின்றன. பிளாஸ்டிக் பொருளால் ஏற்படும் தீமைகள் குறித்து மக்களிடையே விழிப்புணர்வு ஏற்படுத்த வேண்டும். குறிப்பாக பள்ளி, கல்லூரி அளவில் மாணவ, மாணவியரிடையே இது பற்றி விழிப்புணர்வு ஏற்படுத்தினால், எதிர்காலத்தில் இதன் பயன்பாடு குறையும் என்பதில் சந்ேதகம் இல்லை. ஒரு சட்டத்தை பிறப்பித்து அமல்படுத்தும் முன்பு, அது பற்றிய விழிப்புணர்வு மக்களிடையே ஏற்படுத்தினால்தான் அதன் உண்மையான நோக்கம் நிறைவேறும். அதிகாரத்தை மட்டும் வைத்து இதுபோன்ற பிரச்னையை தீர்க்க முடியாது. எனவே மக்கள் பங்களிப்புடன் பிளாஸ்டிக் பொருள் பயன்பாட்டைக் குறைக்க நடவடிக்கை எடுப்பதே சரியான தீர்வாக இருக்கும்.

கடன் உயிரை குடிக்கும்

கடன் பட்டார் நெஞ்சம் போல் கலங்கினான் இலங்கை வேந்தன், என்று கம்பராமாயணத்தில் கடன் தரும் தொல்லை குறித்து கம்பர் மிக தெளிவாக கோடிட்டு காட்டியுள்ளார். ஆனால் இப்போது வங்கி கடன் முதல் தனியார் வழங்கும் விரைவு வட்டிக்கடன் வரை வாங்காதவர்கள் இல்லை என்று கண்ணை மூடிக்கொண்டு சொல்லிவிடலாம். காலை முதல் இரவு வரை செல்போனில் வங்கி சேவை ஊழியர்கள் தொடர்பு கொண்டு ஆன்லைனிலேயே ₹10 லட்சம் வரை 5 நிமிடங்களில் கடன் தருகிறோம் என்று தூண்டில் போடுகிறார்கள். மேலும் வீட்டுக்கடன், பராமரிப்பு கடன், மருத்துவ கடன் என்று பல வகையில் மாத சம்பளக்காரர்களை கடன் என்னும் புயல்காற்றில் சிக்கவைத்துவிடுகிறார்கள். கடன் வாங்காமல் காலத்தை தள்ள வேண்டும் என்று கொள்கையோடு வாழ்பவர்களை கூட இவர்கள் அசைத்துபார்த்துவிடுகிறார்கள். ஏற்கனவே கடன் வாங்கியவர்கள், ஆசையை தூண்டும் வகையில் பேசும்போது, நாமும் தான் கடன் வாங்கி மகளின் திருமணத்தை நடத்துவோமே, நகரத்தின் மையத்தில் ஒரு பிளாட் வாங்கி விடுவோமே என்ற எண்ணம் தோன்றுகிறது. ஆனால் மாதந்தோறும் தவணை கட்டும் போதும், அசல் இல்லாமல் வட்டி மட்டுமே கட்டிக்கொண்டு வரும் போது தான் காலத்துக்கும் இந்த சுமை தொடரும் போல இருக்கிறதே, அதற்கு தகுந்தாற்போன்று வருமானம் உயரவில்லையே என்று  கையைபிசைந்து கவலைப்படுவோர் ஏராளம். பொதுவாக விவசாயிகள் தான் கடன் சுமை தாங்க முடியாமல் தற்கொலை செய்து கொள்ளும் முடிவுக்கு செல்கிறார்கள் என்றால் தற்போது தொழிலபதிபர்கள் முதல் பிரபலங்கள் வரை கடன் சுமை தாங்காமல் தற்கொலை என்னும் விபரீத முடிவை தேடிக்கொள்கிறார்கள். இது போன்ற சம்பவங்களை சாதாரணமாக எடுத்துக்கொள்ள கூடாது. இது தனி மனிதனின் பிரச்னை என்று விட்டுவிடவும் முடியாது. இதை சமூக பிரச்னையாகத்தான் அணுக வேண்டும். ஒருவரின் மாத வருமானத்தை கணக்கிட்டு வங்கிகள் அவசரத்துக்கு கடன் கொடுக்கலாம். ஆனால் அவனது சக்திக்கு மீறிய கடன் தொகையை அவன் மீது திணிப்பதை ஏற்க முடியாது. வங்கிகள் தங்கள் தொழிலை மேம்படுத்த, கடனை அள்ளி வழங்கிவிடுகிறது. ஆனால் அதை வட்டியும், அசலுமாக திருப்பி செலுத்துவதற்குள் கடன் வாங்கியவர்கள் படும்பாடு சொல்லிமாளாது. கடன் சுமையால் குடும்ப நிம்மதி இழந்து, தனது மகிழ்ச்சியை இழந்து, சுயசிந்தனை இழந்து சமூகத்தில் அவமானத்துக்கு ஆளாகும் போது அவன் எடுக்கும் விபரீத முடிவு தற்கொலை. இது போன்ற சம்பவங்கள் நிகழாமல் தவிர்க்க இருப்பதை கொண்டு மகிழ்ச்சியாக வாழும் முறையை பழக வேண்டும். இல்லாவிட்டால் கடன் அன்பை முறிப்பது மட்டுமல்ல உயிரையும் குடிக்கும்.

சரியா, தவறா?

உடல் உறுப்புகள் தானம் கிடைக்காததால், உலகம் முழுவதும் ஆண்டுக்கு 10 லட்சம் பேர் கொடையாளிகளின் தயவுக்காக காத்திருக்கின்றனர். ஆனால், அரசு வேலையை போன்று வெறும் 3,500 பேருக்கு மட்டும்தான் இந்த அதிர்ஷ்டம், அதாவது உடலுறுப்பு தானம் கிடைக்கிறது. இதில் பலர் மேல் நாட்டைச் சேர்ந்தவர்கள். உயிர்பிரிந்த உடலில் உள்ள பாகங்களை கூட மற்றவர்களுக்கு தானமாக அளிக்க பலர் மறுக்கின்றனர். உறுப்பு தானம் கிடைக்காததால், பலர் துன்பப்பட்டு உயிரை இழக்கின்றனர்.இதுபோன்ற நிலையை மாற்றி, யாருக்கு எந்த உடலுறுப்பு தேவைப்பட்டாலும் உடனடியாக கிடைக்கக் கூடிய ஒரு சூழ்நிலையை ஏற்படுத்த, மருத்துவ விஞ்ஞானிகள் பெரும் ஆராய்ச்சியில் ஈடுபட்டுள்ளனர். ஸ்பெயின் நாட்டைச் சேர்ந்த விஞ்ஞானி ஜூவன் கார்லோஸ் இஸ்பிசுவா சீனாவில் உள்ள ஒரு ஆய்வகத்தில் தன்னுடைய நவீன ஆய்வை மேற்கொண்டுள்ளார். இவரது தலைமையிலான குழுவின் நவீன ஆய்வு மனித குலத்துக்கு பெரிதும் கைகொடுக்கும் என்று எதிர்பார்க்கப்படுகிறது.அதாவது குரங்கின் உடலில், அதன் இயற்கையான மரபணுவை செயல்படவிடாமல் செய்து, அதன் உடலில் மனித குருத்தணுவை செலுத்தி வளரச் செய்வது. குருத்தணுக்கள் என்பது மனித உடலுறுப்பை வடிவமைப்பது, அதன் செயல்பாடுகள் போன்றவற்றை செய்பவை. இந்த குருத்தணுவை குரங்கின் உடலில் செலுத்தும்போது, அதன் உடலில் மனித உறுப்புகள்தான் வளரும். இந்த ஆராய்ச்சி வெற்றி பெற்றால், எதிர்க்காலத்தில் உடலுறுப்பு தானத்துக்காக யாரும் காத்திருக்க வேண்டிய நிலை இருக்காது. ஆய்வகங்களில் வளர்க்கப்படும் குரங்குகளில், நமது ரத்த மாதிரிக்கு ஏற்ற குரங்கை கட்டிக் கொண்டு வந்தால்போதும், அதில் இருந்து பாதிக்கப்பட்டவரின் உடலில் உள்ள உறுப்பை அகற்றிவிட்டு, குரங்கின் உடம்பில் வளர்ந்திருக்கும் பாகத்தை பொருத்தி விட முடியும்.இதில் குறிப்பிடத்தக்க வெற்றியை பெற்றிருப்பதாக விஞ்ஞானிகள் தெரிவித்தாலும், மனித ஆய்வாளர்கள் ஒருபுறம் எச்சரிக்கை விடுத்துள்ளதையும் புறந்தள்ளிவிட முடியாது. இதுபோன்ற ஆராய்ச்சிகள், இயற்கையை மீறி செயல்பட நினைக்கும் விஷயங்களாகும். ஒரு பிரச்னைக்கு, இரண்டு பிரச்னைகளை கொண்டு வந்துவிடக் கூடாது என்கின்றனர் அவர்கள். இந்த விஷயத்தில் வெற்றி பெற வேண்டும் என்று மருத்துவ ஆய்வாளர்கள் உலகம் முழுவதும் எதிர்பார்த்து வரும் நிலையில், அது சரியா, தவறா என்ற விவாதமும் தொடங்கி உள்ளது.2. ஒரே நாள் உள்ள நிலையில் அத்திவரதர் தரிசனத்தை நீட்டிக்கக்கோரி உயர் நீதிமன்றத்தில் பொதுநல வழக்கு: 2 நீதிபதிகள் அமர்வு இன்று விசாரிக்கிறதுசென்னை: அத்திவரதர் சிலையை 40 ஆண்டுகளுக்கு ஒரு முறை குளத்தில் இருந்து எடுத்து, 48 நாட்கள் தரிசனத்திற்கு வைக்க வேண்டும் என்று எந்த ஆகம விதிகளும் இல்லாத நிலையில், அத்திவரதர் தரிசன உற்சவத்தை நீட்டிக்க உத்தரவிட வேண்டும் எனக்கோரி சென்னை உயர் நீதிமன்றத்தில் புதிய பொது நல மனு தாக்கல் செய்யப்பட்டுள்ளது. இந்த மனு இன்று விசாரணைக்கு வரவுள்ளது. காஞ்சிபுரம் வரதராஜ பெருமாள் கோயிலில் உள்ள அனந்தசரஸ் குளத்தில் இருந்து 40 ஆண்டுகளுக்கு ஒரு முறை எடுக்கப்படும் அத்திவரதர் சிலை கடந்த ஜூலை 1ம் தேதி எடுக்கப்பட்டு, பக்தர்கள் தரிசனத்திற்கு வைக்கப்பட்டுள்ளது. ஆகஸ்ட் 17 ம் தேதியுடன் அத்திவரதர் தரிசனம் முடிவடைய உள்ளது. இந்நிலையில், சென்னை உயர் நீதிமன்றத்தில் தென்னிந்திய ஹிந்து மகா சபா தலைவர் வசந்தகுமார் ஒரு மனுவை தாக்கல் செய்துள்ளார். அந்த மனுவில், ‘‘கடந்த 1703ம் ஆண்டு கோயில் நிர்வாகிகள் அனந்தசரஸ் குளத்தை சுத்தப்படுத்தியபோது, அத்திவரதர் சிலை கண்டெடுக்கப்பட்டது. அதன்பின்பு, 1937ம் ஆண்டு சிலை மீண்டும் எடுக்கப்பட்டு 40 நாட்கள் பூஜை செய்யப்பட்டது. பின்னர் 42 ஆண்டுகளுக்கு பிறகு 1979ல் மீண்டும் சிலை எடுக்கப்பட்ட போது, 13 ஆயிரம் பக்தர்கள் தரிசனம் செய்தனர். பக்தர்கள் கூட்டம் அதிகமாக இருந்ததால், தரிசன நாட்கள் 40ல் இருந்து 48 ஆக அதிகரிக்கப்பட்டது.தற்போது, ஒரு நாளைக்கு 5 லட்சம் பக்தர்கள் தரிசனம் செய்து வருகிறார்கள். இதுவரை 60 லட்சத்துக்கும் மேற்பட்டோர் அத்திவரதரை தரிசம் செய்துள்ளனர். அதே நேரத்தில் லட்சக்கணக்கான பக்தர்கள் தரிசனம் செய்ய முடியாமல் ஏமாற்றத்துடன் திரும்பி வருகின்றனர். அத்திவரதரை 48 நாட்களுக்கு பின் மீண்டும் குளத்தில் வைக்க வேண்டும் என்ற எந்த ஆகம விதியும் இல்லை. எனவே, எந்த ஒரு ஆகம விதியும் இல்லாத நிலையில், தரிசன நாட்களை நீட்டிக்கும்படி அறநிலையத் துறைக்கு உத்தரவிட வேண்டும்.இவ்வாறு மனுவில் கூறப்பட்டுள்ளது. இந்த மனு நீதிபதிகள் மணிக்குமார், சுப்பிரமணியம் பிரசாத் ஆகியோர் அடங்கிய  அமர்வில் இன்று விசாரணைக்கு பட்டியலிடப்பட்டுள்ளது. 1979ல் மீண்டும் சிலை எடுக்கப்பட்டபோது பக்தர்கள் கூட்டம் அதிகமாக இருந்ததால் தரிசன நாட்கள் 40ல் இருந்து 48 ஆக அதிகரிக்கப்பட்டது.

தெளிவு வேண்டும்

இந்தியாவின் அழகு மிக்க மாநிலமும், மதிப்பு மிக்க மாநிலமும், அதிக ரத்தம் சிந்திய மாநிலமும் காஷ்மீர் தான். இந்தியா, பாகிஸ்தான் பிரிவினைக்குப்பின், சுதந்திரம் பெற்ற பிறகு அதிக உயிர்பலி இடம் பெற்ற மாநிலம் காஷ்மீர் தான்.  மொத்தத்தில் ரத்த பூமி. அந்த பூமியில் அமைதியை உருவாக்க எடுக்கப்பட்ட அத்தனை நடவடிக்கைகளும் ஒவ்வொரு முறையும் ஏதாவது ஒரு வழியில் தோல்வியில்தான் முடிந்திருக்கின்றன. இப்போது மாநில அந்தஸ்தை பறித்து காஷ்மீர்,  லடாக் என்று இரண்டு யூனியன் பிரதேசங்களாக பிரித்ததோடு, அந்த மாநிலத்திற்கு அளிக்கப்பட்ட 370வது அரசியல் சாசன சிறப்பு அந்தஸ்தையும் மத்திய அரசு ரத்து செய்து புதிய முயற்சியை மேற்கொண்டு இருக்கிறது. காஷ்மீர் அமைதிக்காக  எடுக்கப்பட்ட நடவடிக்கை என்று மத்திய அரசு கூறிக்கொண்டாலும், அதை அமல்படுத்திய விதம், அரசியல் தலைவர்கள் வீட்டுக்காவலில் வைக்கப்பட்டு இருக்கும் நிலை, தொடர்ந்து தடை உத்தரவு நீட்டிப்பு, தகவல் தொடர்பு துண்டிப்பு என்று  ஒட்டுமொத்த காஷ்மீரும் முடக்கப்பட்டு இருப்பது விமர்சனம் செய்யப்பட்டு வருகிறது. ஊடகங்கள் கூட உள்ளே நுழைய முடியவில்லை.  அத்தனை கெடுபிடிகள். காஷ்மீருக்குள் யாரும் நுழைய கூட அனுமதி இல்லை.  அந்த மாநில மக்கள் கூட அங்கு போகவும் முடியவில்லை, அங்கிருந்து வரவும் முடியவில்லை.  ஒட்டுமொத்தத்தில் ஒருவிதமான அவசரநிலை அமல்படுத்தப்பட்டது போன்று இருக்கிறது காஷ்மீர். அரசின் முயற்சிகளுக்கு கால அவகாசம் கொடுக்கலாம் என்று கூறி உச்ச நீதிமன்றமும் கைவிரித்து விட்டது.காஷ்மீரில் ெகடுபிடிகள்  அமல்படுத்தும் விதம் குறித்தும், அங்கு நடக்கும் அசம்பாவிதங்கள் குறித்தும் அனைத்து அரசியல் தலைவர்கள் போல், காங்கிரஸ் தலைவர் ராகுல்காந்தியும் விமர்சனம் செய்தார். அதற்குள் பிடித்துக்கொண்டார் அம்மாநில கவர்னர் சத்யபால்  மாலிக். பொறுப்பில்லாமல் பேசக்கூடாது என்று எச்சரித்த அவர், ‘’மாநிலம் அமைதிப்பூங்காவாக திகழ்கிறது. வேண்டுமானால் தனி விமானம் அனுப்புகிறேன் வந்து பார்த்துவிட்டு செல்லுங்கள்’’ என்றார்.ராகுலும் பதிலுக்கு, ‘’தனி விமானம் ஒன்றும் வேண்டாம். அனைத்து எதிர்க்கட்சி தலைவர்களையும் அழைத்து வருகிறேன். பொதுமக்களை எந்தவித கெடுபிடியும் இல்லாமல் சந்திக்க அனுமதிக்க வேண்டும்’’ என்றார். உடனே மாலிக், ‘’இல்லை  இல்லை. ராகுல் ஏகப்பட்ட நிபந்தனைகள் விதிக்கிறார். அவரை காஷ்மீருக்குள் அனுமதிக்க முடியாது’’ என்று பதில் கூறினார். ராகுல் விடவில்லை. ‘’டியர் மாலிக் ஜி, எனது கருத்துக்கு நீங்கள் கூறிய பதிலை பார்த்தேன். உங்கள் அழைப்பை ஏற்று  காஷ்மீருக்கு வந்து மக்களைப் பார்க்க விரும்புகிறேன். எந்த நிபந்தனைகளும் இல்லாமல் வரத் தயார். எப்போது வரட்டும்?” என்று பதில் கேள்வி கேட்டுள்ளார். அரசியல் வாத, பிரதிவாதங்கள் காஷ்மீர் நிலவரத்தை முன்வைத்து நடந்தாலும்  அங்குள்ள உண்மை நிலைமை இதுவரை யாருக்கும் தெரியவில்லை. இன்று சுதந்திர இந்தியாவின் 73வது சுதந்திர தின விழா. காஷ்மீர் மாநில மக்கள் எந்தவித சுதந்திரமும் இல்லாமல் ராணுவ நெருக்கடிக்குள் சிறைவைக்கப்பட்டு இருந்தால்  அது நமது ஜனநாயகத்திற்கு மிகப்பெரிய கரும்புள்ளி. எனவே மிக விரைவில் காஷ்மீரில் ஊரடங்கு நீக்கப்பட்டு இயல்புநிலை திரும்ப மத்திய அரசு நடவடிக்கை எடுக்க வேண்டும். அதுதான் சுதந்திரத்தின் அழகு.

இயற்கை தந்த பாடம்

தென்மேற்கு பருவமழை இந்த ஆண்டு சற்று தாமதமாக துவங்கினாலும், நீலகிரி மக்களின் வாழ்வாதாரத்தை தலைகீழாக புரட்டிப்போட்டு விட்டது. இங்குள்ள அவலாஞ்சியில் கடந்த ஆகஸ்ட் 7ம்தேதி ஒரே நாளில்  82 செ.மீ மழை கொட்டி தீர்த்தது. அதே நாளில், அப்பர்பவானியில் 30 செ.மீ, கூடலூரில் 24.1  செ.மீ மழை பதிவானது. மறுநாள் அவலாஞ்சியில் மீண்டும் 91 செ.மீ மழை  பதிவாகி, பெரும் ஆச்சரியத்தை  ஏற்படுத்தியது. இது, நீலகிரி மாவட்டத்தில் கடந்த 101 ஆண்டுகளில் இல்லாத  பெருமழை ஆகும்.  நீர் வழித்தடங்கள் முற்றிலும் மனித ஆக்கிரமிப்பால் சிறைப்பிடிக்கப்பட்டு விட்டதால், ஊருக்குள் வெள்ளம் புகுந்துவிட்டது. 30க்கும் மேற்பட்ட இடங்களில் நிலச்சரிவு. இதன்காரணமாக, கடந்த ஒரே வாரத்தில் ஆறு ேபர் உயிரிழப்பு. 50 கிராமங்களை வெள்ளம் சூழ்ந்துவிட்டது. வீடுகளை விட்டு மக்கள் வெளியே வர முடியாத நிலை. ஊட்டி, குந்தா, கூடலூர் மற்றும் பந்தலூர் பகுதிகளில் இருந்து வெளியேற்றப்பட்ட மக்கள் 2,400 பேர் முகாம்களில் தங்க வைக்கப்பட்டுள்ளனர். வீடுகள் சேதம், விளைநிலங்கள் நாசம் என நீலகிரி மக்கள் படும் துயரத்துக்கு அளவே இல்லை. குறிப்பாக, கூடலூர் பகுதி மக்களுக்கு கடும் பாதிப்பு.  ஊட்டி- கூடலூர் இடையே அனுபாபுரம் சாலையில் பெரும் மண்சரிவு ஏற்பட்டதுடன், தார்ச்சாலை இரண்டாக பிளந்தது. போக்குவரத்து அடியோடு துண்டிக்கப்பட்டது. சீரமைப்பு பணிகள் இன்னும் நிறைவடையவில்லை. தென்னிந்தியாவின் தண்ணீர் தொட்டியாக விளங்கும் நீலகிரிக்கு இன்று சிவப்பு எச்சரிக்கை விடப்பட்டுள்ளது. ஒரு குளிர்பிரதேசத்தை, இயற்கையை நாசப்படுத்தி, செயற்கையான கட்டிடங்கள் உட்பட பல வகையில் காடு, மலையை வெப்ப மண்டலமாக மாற்றிய காரணத்தால, மனித வாழ்வுக்கு இன்று பெரும் அச்சுறுத்தல் ஏற்பட்டுள்ளது. இயற்கை, தனக்கென எதையும் வைத்துக்கொள்வதில்லை. நாம் கொடுப்பதைத்தான் அது, நமக்கு திருப்பி தருகிறது. இயற்கையை நேசிப்போம், பராமரிப்போம், பாதுகாப்போம், ஒன்றிணைந்து வாழ்வோம். இயற்கையின் சீற்றத்தில் இருந்து விடுதலை பெறுவோம். இந்த அறிவுரையோடு மட்டும் நின்றுவிடக்கூடாது. மழை வெள்ள பாதிப்பால் துடி துடிக்கும் நீலகிரி மக்களையும், அவர்களது உடமைகளையும் போர்க்கால அடிப்படையில் மீட்கவேண்டியது தமிழக அரசின் கடமை. நீலகிரி மாவட்டத்தில் துணை முதல்வர் ஓ.பன்னீர்செல்வம் ஆய்வுக்கூட்டம் நடத்தி முடித்துள்ளார். நிவாரண பணிகளுக்கு மத்திய அரசிடம் நிதியுதவி கோரப்படும் என முதல்வர் அறிவித்துள்ளார். வெறும் அறிவிப்போடு நின்றுவிடாமல், களத்தில் இறங்கி, நீலகிரி மக்களை காக்கவேண்டியது அரசாங்கத்தின் தலையாய கடமை.

இயற்கை காப்போம்

காற்று, தண்ணீர், உணவு - இவையின்றி பூமியில் உயிரினங்கள் இல்லை. அதிகரித்து வரும் மக்கள்தொகை பெருக்கத்தின் வேகத்துடன் ஒப்பிடும் போது, இந்த மூன்றும், இன்னும் எத்தனை காலத்துக்கு நமக்கு குறைவின்றிக் கிடைக்கும் என்கிற அச்சுறுத்தல் எழுகிறது. இந்த நிகழ்கால அச்சம், நம் எதிர்காலத்தின் மீது கேள்விக்குறியை வீசுகிறது.அதிகரித்து வரும் மக்கள் தொகை பெருக்கத்துக்கு ஏற்ப உணவு உற்பத்தி செய்யமுடியாத அபாய நிலையை மனிதர்கள் விரைவில் சந்திக்கவேண்டியிருக்கும் என ஐக்கிய நாடுகள் சபை சில தினங்களுக்கு முன் எச்சரிக்கை மணி அடித்துள்ளது. உண்மைதான். வளர்ச்சி என்கிற பெயரில் உலகம் முழுவதும் காடுகள் அழிக்கப்படுகின்றது. விளைநிலங்கள் சூறையாடப்படுகின்றன.வீடு, தொழிற்சாலைகள் கட்ட, சாலைகள் அமைக்க, எரிவாயு குழாய்கள் பதிக்க... என காரணங்கள் பல காட்டி, விவசாய நிலங்களின் பரப்பளவை நாளுக்கு நாள் சுருக்கிக் கொண்டிருக்கிறோம். இதனால் உணவு உற்பத்தி செய்வதற்கான நிலப்பரப்பு குறைகிறது. மக்கள் தொகை வளர்ச்சிக்கு ஏற்ப உணவு உற்பத்திக்கான நிலப்பரப்பை முதலில் அதிகப்படுத்த வேண்டும். ஆனால், நிலைமை தலைகீழாக இருக்கிறது. ஒவ்வொரு ஆண்டும் விவசாயிகளின் எண்ணிக்கை குறைந்து கொண்டே வருகிறது. நிலத்தை காக்கவே போராட வேண்டியுள்ளதால், விவசாயம் செய்வது பெரும் சவாலாக உள்ளது. இதனால் விவசாயம் அழியும் நிலை ஏற்பட்டுள்ளது.விவசாயிகளுக்கு பல்வேறு திட்டங்கள் அறிவிக்கப்படுகிறது. ஆனாலும், அவர்களின் வாழ்வாதாரம் உயரவில்லை. விவசாயத்தை காப்பாற்றத் தவறினால், அடுத்த தலைமுறை உணவுக்காக அலைய வேண்டிய சூழ்நிலை உருவாகும். சாலைகள் அமைப்பதற்காக மரங்கள் வெட்டப்படுகின்றன. வெட்டிய மரங்களுக்கு பதிலாக கூடுதல் மரக்கன்றுகளை நடுவதில்லை. இதனால் நச்சு வாயுக்கள் வளிமண்டலத்தில் அதிகரிக்கிறது. கார்பன் டை ஆக்ஸைட் எனப்படும் இந்த கரியமில வாயு தான் பூமியை வெப்பமடைய செய்வதில் முக்கிய பங்கு வகிக்கிறது.தொழிற்சாலைகள் வெளியேற்றும் புகை, வாகனங்கள் வெளியிடும் புகை ஆகியவற்றால் வளிமண்டலத்தில் கார்பன் டை ஆக்ைஸட் அளவு அதிகரித்து கொண்டே செல்கிறது. இது தொடர்ந்தால் காற்று மண்டலத்தில் கார்பனின் அளவு 540 முதல் 970 பிபிஎம் (parts per Million) அளவு உயர்ந்து விடும் என விஞ்ஞானிகள் எச்சரிக்கின்றனர். அவ்வாறு உயர்ந்தால் பூமிக்கு பெரும் அழிவு ஏற்படும்.நாட்டின் முன்னேற்றத்திற்கும், மேம்பாட்டிற்கும் வன வளம் மிக முக்கியம். பருவமழைக் காலங்களில் பெய்யும் மழை நீரை சேமித்து வைக்கும் வங்கிகளாக காடுகள் இருக்கின்றன. இயற்கை வளங்களை காப்போம் என அறிவுறுத்தும் அரசுகள், வளர்ச்சி என்ற பெயரில் வனங்களையும், மலைகளையும், மரங்களையும் அழிக்கத் துணைபோவது வேதனைக்குரியது.தமிழகத்தில் மிக சமீபத்தில் நிலவிய கோர குடிநீர் பற்றாக்குறை பிரச்னை... ஒரு பாடம். பற்றாக்குறை பட்டியல் முடிந்து விடவில்லை. இன்று தண்ணீர். நாளை காற்று, அடுத்து உணவு. தூய காற்றுக்கும், உணவுக்கும் திண்டாட வேண்டிய நாள் வெகுதூரத்தில் இல்லை. இயற்கையை இன்று நாம் பாதுகாத்தால்... நாளை அது நம்மை பாதுகாக்கும் என்ற விதியை மனதில் பதிப்பது, இன்றைய தேதியில் மிக முக்கியம்.

சவாலாகும் நீர்மேலாண்மை

தெ ன்மேற்கு பருவமழை தீவிரமடைந்துள்ள நிலையில், கேரளா, கர்நாடகா, மகாராஷ்டிரா உள்ளிட்ட மாநிலங்கள் வெள்ளத்தில் மிதக்கின்றன. தமிழகத்திலும் நீலகிரி மாவட்டத்தில் மழையின் பாதிப்புகள் அதிகம். வெள்ளம் திரண்டு வந்தால் முல்லை பெரியாறு அணையே உடைந்துவிடும் என அடிக்கடி அங்குள்ள பொதுமக்களையும், தமிழகத்தையும் கேரளா அச்சுறுத்தி கொண்டிருந்தது. காவிரியில் ஒரு சொட்டு தண்ணீர் கூட திறந்துவிட மாட்டோம் என பிடிவாதம் பிடித்த கர்நாடகா, இன்று ஒரு லட்சத்து 35 ஆயிரம் கன அடி தண்ணீரை திறந்து விட்டுள்ளது. காவிரி ஆற்றில் வெள்ளம் கரைபுரண்டோடுகிறது. இன்னும் 10 நாளில் மேட்டூர் அணையே நிரம்பிவிடும் நிலை உள்ளது.கர்நாடகாவிலும், கேரளாவிலும் பாயும் வெள்ளத்தை ஒன்று கடலில் கொண்டு போய் சேர்க்க வேண்டும் அல்லது தமிழகத்தின் ஆறுகளுக்கு தண்ணீர் தந்தே ஆகவேண்டும் என்ற சூழல் ஏற்பட்டுள்ளது. இரு மாநிலங்களிலும் இருந்து பாய்ந்து வரும் தண்ணீரை தமிழகம் எப்படி சேமிக்கப் போகிறது என்பதே நம் முன் நிற்கிற கேள்வி.கடந்த மாதம் வரை வறட்சி மாவட்டமாக அறிவிக்க வேண்டும் என்கிற கூக்குரல் தமிழகத்தின் ஒவ்வொரு மாவட்டத்திலும் ஒலித்தது. தற்போது மேற்கு தொடர்ச்சி மலையோர மாவட்டங்களில் பெய்து வரும் மழை, விவசாயிகளுக்கு நம்பிக்கை அளிப்பதாக உள்ளது. மழை இன்னமும் ஒரு வாரம் தொடர்ச்சியாக நீடித்தால் சில அணைகள் நிரம்பும் நிலை காணப்படுகிறது. இவ்வாண்டு சென்னையின் வறட்சியை கண்டு உலகம் முழுக்க உள்ள தமிழர்கள் கண்ணீர் விட்டனர். சென்னையில் பல ஓட்டல்கள் மூடப்பட்டன. தண்ணீர் இல்லாததால் ஆயிரக்கணக்கான தொழிலாளர்கள் வேலையிழந்தனர். ஜோலார்பேட்டையில் இருந்து ரயிலில் சென்னைக்கு தண்ணீர் அனுப்பப்பட்ட அவலமும் அரங்கேறியது. இச்சூழலில் தற்போது பெய்து வரும் மழையும், வெளிமாநிலங்களில் இருந்து வரும் வெள்ளநீரும், தண்ணீர் சேமிப்பின் அவசியத்தை உணர்த்துகின்றன. கடந்த சில ஆண்டுகளுக்கு பிறகு தமிழகத்தில் இப்போதுதான் ஆட்சியாளர்கள் உருப்படியாக ஒரு வேலையை குடிமராமத்து என்ற பெயரில் தொடங்கி நடத்தி வருகின்றனர். அதை கண்காணிக்க ஐஏஎஸ் அதிகாரிகள் குழுவும் நியமிக்கப்பட்டுள்ளது. ஒப்புக்கு அவர்கள் நியமனம் என்றில்லாமல், தமிழகத்திற்கு தற்போது கிடைத்துள்ள தண்ணீரை முடிந்தவரை சேமிக்க திட்டமிடுவது அவசியமாகும். வீணாக கடலுக்கு செல்லும் தண்ணீரை தடுத்து, ஆங்காங்கே நீர்நிலைகளில் அவற்றை தேக்க வேண்டும்.அணைகளில் இருக்கும் தண்ணீரை காரணமே இல்லாமல், 2 மாதங்களுக்குள் காலி செய்யாமல், தேவைக்கேற்ப திறந்துவிட வேண்டும். தேசிய ஊரக வேலைவாய்ப்பு திட்டம் போன்று பெயரளவுக்கு பணிகள் கூடவே கூடாது. இன்றைய ஆட்சியாளர்களுக்கு இயற்கை இப்போது விடுத்துள்ள சவால் நீர் மேலாண்மை என்றே கருத வேண்டும்.

நீதி தவறலாமா?

தமிழகம் வானம் பார்த்த பூமி. மழை பொய்த்தால் வறட்சிதான். விவசாயம் பாதிக்கப்படுவதோடு, குடிநீர் பிரச்னையும் தலைதூக்கும். தமிழகத்தில் இரு பருவ மழைகளால் சராசரியாக ஆண்டுதோறும் சுமார் 900 மி.மீ. மழை பெய்கிறது. இந்த நீர்  ஆதாரத்தை சேமிக்க தவறியதே பிரச்னைக்கு காரணம் என்பதை காலம் உணர்த்திய பாடமாகக் கருதி, நீர்நிலைகளை சீரமைக்கவும் பராமரிக்கவும் பொதுமக்கள் இடையே விழிப்புணர்வு ஏற்பட்டுள்ளது. மழை நீர் சேமிக்கவும் மக்கள் ஆர்வம்  காட்டுகின்றனர். சென்னையில் கடந்த 4 மாதங்களாக கடும் குடிநீர் தட்டுப்பாடு ஏற்பட்டுள்ளது. தலைநகருக்கு குடிநீர் தந்துவந்த புழல், செம்பரம்பாக்கம், பூண்டி போன்ற ஏரிகள் முற்றிலும் வறண்டுவிட்டன. குடிநீர் தட்டுப்பாட்டால் மக்களின் இயல்பு வாழ்வில் பெரும் பாதிப்பு ஏற்பட்டுள்ளது. இதற்கு ஏரிகள் சரியான நேரத்தில், சரியான முறையில் தூர்வாரப்படாததும், நீர் பிடிப்பு பகுதிகளில் உள்ள ஆக்ரமிப்புகளை அகற்றாததும்தான் காரணம் என்று குற்றச்சாட்டுகள் எழுந்தன. இதை சென்னை உயர் நீதிமன்றமும் தானாக முன்வந்து வழக்காக விசாரித்து வருகிறது.இவ்வளவு பிரச்னைக்கு இடையில், சென்னைக்கு குடிநீர் ஆதாரமாக விளங்கும் 4,500 ஏக்கர் பரந்து விரிந்துள்ள புழல் ஏரியின் நீர்பிடிப்பு பகுதியில் சிட்கோ, 60 ஏக்கர் நிலத்தை கையகப்படுத்தும் பணியில் இறங்கியுள்ளது. சிறு தொழில் வளர்ச்சி மற்றும் வேலைவாய்ப்புகளை உருவாக்க சிட்கோ மண்டலத்தை அமைக்க அரசு திட்டமிட்டு அதன் அடிப்படையில் புழல் ஏரியின் நீர்பிடிப்பு பகுதியில் நிலத்தை ஆர்ஜிதம் செய்யும் பணி தொடங்கப்பட்டுள்ளது. ஏரியின் நீர் பிடிப்பு பகுதியில் கட்டிடங்கள் கட்டப்பட்டால் ஏரிக்கு வரும் தண்ணீர் வரத்து தடைபட்டுவிடும். இதனால், புழல் ஏரி மெல்ல சாகும் நிலைக்கு தள்ளப்படும். ஆந்திராவிலிருந்து கிருஷ்ணா நதி தண்ணீர் வரும்போது ஏரிக்குள் தண்ணீர்  வரத்துக்கு தடை ஏற்பட்டுவிடும். ஏரிக்கு நீர் பிடிப்பு பகுதிதான் மிக முக்கியம். ஆனால், அந்த பகுதியையே அரசு தற்போது ஆர்ஜிதம் செய்துவருவது மக்கள் மத்தியில் எதிர்ப்பை ஏற்படுத்தியுள்ளது காமன்வெல்த் விளையாட்டுப் போட்டி டெல்லியில் நடந்தபோது, தற்காலிக பேருந்து நிலையம் யமுனை நதிக் கரையில் அமைக்கப்பட்டது. விளையாட்டுப் போட்டிகள் முடிந்த பின்னரும் அதை டெல்லி நிர்வாகம் பயன்படுத்தத் தொடங்கியது.  இதை எதிர்த்து நீதிமன்றத்தில் பொது நலன் வழக்கு தொடரப்பட்டது. அதில், நீர் நிலைகளில் மாசு ஏற்படுத்தும் எந்த செயலையும் அனுமதிக்க முடியாது என்றும் நீர் நிலைகளை பாதுகாக்க வேண்டும் என்றும் அறிவுறுத்தி பேருந்து நிலையத்தை உடனடியாக அகற்ற நீதிமன்றம் உத்தரவிட்டது குறிப்பிடத்தக்கது. இதை எல்லாம் கவனத்தில் கொள்ளாமல் புழல் ஏரியின் நீர் பிடிப்பு பகுதியில் சிட்கோ 60 ஏக்கர் நிலத்தை கையகப்படுத்த முயற்சிப்பது எந்தவிதத்திலும் நியாயம் இல்லை. நீர் ஆதாரம் பாதிக்கப்பட்டால் மக்களின் இயல்பு வாழ்க்கையோடு வாழ்வாதாரமும் பாதிக்கப்படும். எனவே இந்த முயற்சியை அரசு உடனடியாக கைவிட வேண்டும்.

மருத்துவ போலிகள்

எம்பிபிஎஸ் பட்டம் பெற்றவர்கள் மருத்துவராக பதிவு செய்து தொழில் நடத்த முடியும் என்ற சட்டம் உள்ளது. ஆனால் கிராமங்களிலும், புறநகர்களிலும் கிளினிக் திறந்து வைத்து தங்கள் பெயருக்கு பின்னால் பட்டத்தை அவர்களாகவே போட்டுக்கொண்டு தங்களுக்கு தெரிந்த மருந்துகளை வைத்துக்கொண்டு மருத்துவம் பார்க்க தொடங்கிவிடுகின்றனர். இது போன்ற போலி டாக்டர்கள் 57.3 சதவீதம் பேர் இருப்பதாக உலக சுகாதார நிறுவனம் ஆய்வறிக்கையில் வெளியிட்டுள்ளது. இதை கடந்த ஆண்டு மறுத்த அரசு தற்போது ஆய்வறிக்கை தகவல் உண்மை தான் என்று ஒப்புக்கொண்டுள்ளது. பிளஸ் 2 முடித்த நபர் சில மருந்துகளை அரைகுறையாக தெரிந்து கொண்டு பெயருக்கு பின்னால் எம்பிபிஎஸ் பட்டம் போட்டுக்கொண்டு தைரியமாக மருத்துவம் பார்க்க தொடங்கிவிடுகிறார். உடல்நலம் பாதிக்கப்பட்ட ஒருவர் அவசரமாக மருத்துவம் பார்க்கவரும் போது, இவர் உண்மையான டாக்டரா என்று ஆராய்ச்சி செய்து கொண்டிருக்க முடியாது. இப்படி போலி வைத்தியம் செய்பவர் எப்போதாவது பெரிய பிரச்னை ஏற்பட்டால் மட்டுமே சிக்குகிறார். இல்லாவிட்டால் அவர் பிழைப்பு மிக அருமையாக செல்கிறது. போலி டாக்டர்களை அடையாளம் காணும் வகையில் அவர்களது சான்றிதழ்கள் கிளினிக்கில் மாட்டி வைத்திருக்க வேண்டும் என்று உத்தரவுபிறப்பிக்கப்பட்டது. போலி சான்றிதழ் தயாரித்து அது போன்று மாட்டிவைத்தால், அது நிஜமா, போலியா என்று யார் கண்டுபிடிப்பது. அலோபதி மருத்துவத்துறையில் பலபேர் இணையதளம் மூலம் மருந்துகளை தெரிந்து கொண்டு டாக்டர் போலவே செயல்பட தொடங்கிவிடுகிறார்கள். பெரும்பாலும் இவர்கள் தரும் மருந்துகள் அனைத்தும் சாதாரண ஜூரம், அலர்ஜி, அஜீரணம், சளி ஆகியவற்றை நிவர்த்தி செய்யக்கூடியவை. சில போலி டாக்டர்கள் ஊசியும் போடுகிறார்கள். இவர்கள் நடவடிக்கைகள் அனைத்தும் படித்த டாக்டர்களை போன்று கச்சிதமாக பொருந்தியிருப்பதால் யாருக்கும் சந்தேகம் வருவது கிடையாது. போலி டாக்டர்களை கண்டுபிடிக்கும் நடவடிக்கையை துரிதப்படுத்த வேண்டும். சுகாதாரத்துறையில் இதற்காக ஒரு குழு அமைக்கப்பட்டு, முழு நேர ஆய்வு, சோதனையில் அவர்கள் ஈடுபட வேண்டும். மாவட்ட அளவிலும் குழு அமைத்து நகரம், கிராமங்களில் உள்ள மருத்துவமனைகள், தனியார் கிளினிக்குகளில் சோதனை மேற்கொள்ள வேண்டும். போலி டாக்டர்கள் மீது சட்டப்படி வழக்குபதிவு செய்து அதிகபட்ச தண்டனை வழங்க வழி வகுக்க வேண்டும். பணம் சம்பாதிப்பதற்காக அப்பாவி மக்களின் உயிரோடு விளையாடும் மருத்துவ போலிகள் மீது கடுமையான சட்டம் பாய வேண்டும் என்பதே சமூக ஆர்வலர்களின் கோரிக்கை.

எங்கே போகிறது?

நெ ப்ட், ஆர்டிஜிஎஸ் பணப்பரிவர்த்தனைகளுக்கு 24 மணி நேர அனுமதி வழங்கி ரிசர்வ் வங்கி உத்தரவிட்டுள்ளது. இது வரவேற்கத்தக்க ஒன்று. தற்போது காலை 8 மணி முதல் இரவு 7 மணி வரையில் மட்டுமே இந்த அனுமதி இருந்ததால், அவசர பணப்பரிமாற்றத்துக்கு வேறு சில வழிகளை வாடிக்கையாளர்கள் தேர்ந்தெடுத்துக் கொண்டிருந்தனர். அதற்கு முற்றுப்புள்ளி வைக்க ரிசர்வ் வங்கி இந்த அனுமதியை வழங்கியது, பாராட்டத்தக்க ஒன்று.என்னதான் தகவல் தொழில்நுட்பம் வளர்ந்து, வங்கி சேவைகள் அனைத்தும் மின்னணு மயமாக்கப்பட்டாலும், இன்னமும் கூட சில ‘பக்’ எனப்படும் கம்ப்யூட்டர் தவறின் தொல்லைகள் இருக்கத்தான் செய்கின்றன. யூ.பி.ஐ பேமண்ட் வழிமுறையில் ஏதாவது சில காரணங்களால் எதிர் நபருக்கு பணம் கட்ட முடியவில்லை என்றால், உடனடியாக பணம் கட்டிய நபருக்கு அது கணக்கில் சென்று சேர வேண்டும். ஆனால், பல சமயங்களில் இது 3 நாட்களுக்கு மேலும், சில சமயங்களில் ஒரு மாதத்துக்கு மேலும் கூட ஆகிறது. இதனால்தான் வங்கி வாடிக்கையாளர்களில் பலர், இன்னமும் அவசரக் காலங்களில் வங்கிக்கு நேரடியாக சென்று சேவைகளை பெறவே விரும்புகின்றனர். இதுபோன்ற ‘பக்’குகளை உடனடியாக சரி செய்ய வேண்டியது அவசியம்.மின்னணு பரிமாற்றத்தை பணக்காரர்கள் மட்டுமே செய்வதில்லை. சாதாரண ஏழை மக்கள் கூட இதை செய்து வருகின்றனர். அவர்களுக்கு செலுத்திய பணம் போகாமல், எங்கோ சென்று முடங்கினால், அடுத்த முறை அதை பயன்படுத்தவே தயங்குவார்கள். இது நெப்ட், ஆர்டிஜிஎஸ்.சில் கூட சில சமயங்களில் இந்த சிக்கல்களை வாடிக்கையாளர்கள் எதிர்க்கொள்கின்றனர்.உடனடியாக இதை சரி செய்து வாடிக்கையாளர்களின் நம்பிக்கையை பெறுவதன் மூலமே, மின்னணு பணப்பரிமாற்றம் மத்திய அரசு நினைத்த அளவுக்கு இருக்கும். இல்லாவிட்டால், வாடிக்கையாளர்கள் பணத்தை கையில் எடுத்து பயன்படுத்துவதை தடுக்க இயலாது என்பது, வங்கிக்கு வரும் புகார்கள் மூலம் தெரிந்து கொள்ளலாம். இதுபோன்ற சமயங்களில் சம்பந்தப்பட்ட வங்கிகளே முதல்கட்டமாக வாடிக்கையாளர்களின் பணத்தை செலுத்திவிட்டு, அவரது கணக்கில் திரும்ப வேண்டிய பணத்தை தன் கணக்குக்கு மாற்றிக் கொள்வது போன்ற ஏற்பாட்டை செய்யலாம். எந்த வங்கி இந்த ஏற்பாட்டை கொண்டு வந்தாலும், வாடிக்கையாளர்கள் அதன் பக்கம் சாய்வது நிச்சயம்.

ஹெல்மெட் உஷார்

ஹெ ல்மெட் அணிவது கட்டாயம் என்று தினமும் போலீசார் அறிவுரை கூறி னாலும், பிடித்து அபராதம் விதித்தாலும் அத்துமீறல் தொடர்ந்து கொண்டு தான் இருக்கிறது. 100 சதவீதம் ஹெல்மெட் அணிவதை உறுதி செய்ய முடியாமல் போலீசாரும் திணறி வருகிறார்கள்.  ஹெல்மெட் அணிவது தொடர்பான வழக்கை விசாரித்து வரும் சென்னை உயர் நீதிமன்றமும் இந்த விவகாரத்தில் போக்குவரத்து போலீசாருக்கு உத்தரவு மேல் உத்தரவு போட்டு வருகிறது. இந்த நிலையில் தான் மோட்டார் வாகன சட்ட விதிமீறல் குறித்து புகார் அளிக்க புதிய செயலி உருவாக்கப்பட்டுள்ளது. இந்த செயலி மூலம் 96 புகார்கள் இதுவரை பெறப்பட்டுள்ளன. உச்சநீதிமன்ற உத்தரவுப்படி 2018ல் மட்டும் ஹெல்மெட் அணியாமல் பைக் ஓட்டியவர்கள் மீது 14 லட்சத்து 6 ஆயிரத்து 491 வழக்குகள் பதிவு செய்யப்பட்டுள்ளன. ‘சீட் பெல்ட்’ அணியாததற்காக 39 லட்சத்து 2 பேர் மீது வழக்குப்பதிவு செய்யப்பட்டுள்ளது. இருப்பினும் அத்துமீறல் தொடர்கிறது.இந்த வழக்கு விசாரணைக்கு வந்த போது “மோட்டார் வாகன விதிமீறல்கள் தொடர்பான வழக்குகளில் அபராதம் விதிக்கும் அதிகாரம் போக்குவரத்து சப்-இன்ஸ்பெக்டருக்கு மட்டும் உள்ளது. மோட்டார் வாகன விதிமீறல் தொடர்பான குற்றத்துக்கு விதிக்கப்படும் அபராத தொகையை உயர்த்த 2011ம் ஆண்டே போக்குவரத்து ஆணையர் அரசாணை பிறப்பித்துள்ளார். எனவே, ஹெல்மெட் அணியாதவர்கள், மோட்டார் வாகன விதிமீறல்களில் ஈடுபடுவோருக்கு விதிக்கப்படும் அபராத தொகையை உயர்த்துவது தொடர்பாக பிறப்பிக்கப்பட்ட அரசாணையை ஒரு வாரத்தில் அமல்படுத்த வேண்டும்” என்று உயர் நீதிமன்ற நீதிபதிகள் உத்தரவிட்டனர்.இதை ஏற்று ஹெல்மெட் அணியாதவர்கள் அபராதம் 100ல் இருந்து 1000 ரூபாயாக அதிரடியாக உயர்த்தப்பட்டுள்ளது. இதற்கான அறிவிப்பை போக்குவரத்து போலீசார் வெளியிட்டுள்ளனர். ஓட்டுனர் மட்டுமல்லாமல் பின்னால் அமர்ந்து செல்பவரும் கட்டாயம் ஹெல்மெட் அணிய வேண்டும் என உத்தரவிட்டுள்ளது. அப்படி அணியாவிட்டால் இனி 1000 அபராதம் என காவல்துறை சார்பில் தெரிவிக்கப்பட்டுள்ளது. வீட்டிலிருந்து புறப்படும் போது உயிர் காக்கும் ஹெல்மெட் அணிவதை கட்டாய பழக்கமாகக் கொள்ள வேண்டும் என போலீஸ் அறிவுறுத்தியுள்ளனர். அபராதம் உயர்ந்து விட்டது. 100 தினமும் எளிது. ஆனால் 1000 அபராதம் என்பது அனைவருக்கும் எளிதல்ல. எனவே இனிமேல் ஹெல்மெட் தொடர்பான ஒரு ஒழுங்குமுறை நிச்சயம் உருவாகும். போக்குவரத்து போலீசாரின் முயற்சிக்கு நிச்சயம் பொதுமக்களும் ஒத்துழைப்பு அளிக்க வேண்டும். தலை கவசம் அணிவோம், தலையை காப்போம்.

பறக்கும் தங்கம்

அரபு நாடுகளில் சர்வதேச  நிதிச்சந்தைகளுக்கு பதில் தங்கத்தில் முதலீடு செய்வது அதிகரித்துள்ளது. இதனால், சர்வதேச சந்தையில் தங்கத்தின் விலை அதிகரித்து வருகிறது. மேலும், அமெரிக்க டாலரின் மதிப்பு குறைந்து வருவதால், பாதுகாப்பாக தங்கத்தில் முதலீடு செய்வதும் அதிகரித்து வருகிறது. இதன் காரணமாகவும் தங்கத்தின் விலை அதிகரித்து வருகிறது. இதன் எதிரொலியாக இந்தியாவிலும் முன் எப்போதும் இல்லாத அளவுக்கு தங்கத்தின் விலை உயர்ந்து வருகிறது. நடப்பு மாதத்தில் ஒரு பவுன் தங்கத்தின் விலை 27 ஆயிரத்தை தாண்டிவிட்டது.சென்னையில் நேற்று முன்தினம் 22 காரட் தங்கம் சவரனுக்கு 27,344-க்கு விற்கப்பட்டது. நேற்று காலை நிலவரப்படி, சென்னையில் 22 காரட் ஆபரண தங்கத்தின் விலை சவரனுக்கு 336 ரூபாய் உயர்ந்தது. கிராமுக்கு 3,460 ஆகவும், சவரனுக்கு 27,680 ஆகவும் விற்பனை செய்யப்பட்டது. சென்னையில் 24 காரட் தூய தங்கத்தின் விலை கிராமுக்கு 3,633 ஆகவும், சவரனுக்கு 29,064 ஆகவும் விற்பனை செய்யப்படுகிறது. சென்னையில் கடந்த 1921ம் ஆண்டு ஒரு பவுன் தங்கத்தின் விலை 21 ஆக இருந்தது.  இது, 2000-ம் ஆண்டில் 3,320 ஆனது. 2002-ம் ஆண்டில் 3,368, 2003 முதல்  2005-ம் ஆண்டு வரை 4,000-க்குள் இருந்தது. 2006ம் ஆண்டு 6,160-ஐ  தொட்டது. 2007ம் ஆண்டு 7,076, 2008ம் ஆண்டு 8,072 என இருந்த  தங்கத்தின் விலை, 2009ம் ஆண்டு ஜனவரியில், முதல் முறையாக ஒரு பவுன் 10  ஆயிரத்தை தாண்டியது. அதே ஆண்டு பிப்ரவரி மாதத்தில் 11,232 ஆனது. 2010-ம்  ஆண்டு ஜனவரியில் தங்கம் விலை ஒரு பவுன் 12,104 ஆனது. ஜூன் மாதம்  14,000, டிசம்பர் மாதம் 15,000-த்தை தாண்டியது. கடந்த 2019 ஜனவரி மாதம் வரலாற்றிலேயே முதல் முறையாக ஒரு சவரன் தங்கம் விலை 25 ஆயிரத்தை தாண்டி விற்பனையானது. நடப்பாண்டில், கடந்த ஜூன் மாதம் 26 ஆயிரத்தையும், ஜூலை இறுதியில் 27 ஆயிரத்தையும் கடந்து விட்டது. தொடர் விலை ஏற்றம் காரணமாக, உள்ளூர் தங்கத்தின் தேவை 20 சதவீதம் குறைந்துள்ளது. இதனால், தங்கம் இறக்குமதியும் 22 சதவீதம் குறைந்துள்ளது என்கிறார்கள் நகை வியாபாரிகள். இனி வரக்கூடிய மாதங்கள் முகூர்த்த  மாதங்கள் என்பதால் தங்கம் விலை தொடர்ந்து உயரும் என்றே தெரிகிறது. இந்த  விலை உயர்வை எதிர்கொள்ள முடியாமல் ஏழை மற்றும் நடுத்தர மக்கள் திக்குமுக்காடுகின்றனர். இனி, தங்கம், ஏழைகளுக்கு எட்டாக்கனியாகிவிடும் நாள் வெகுதூரத்தில் இல்லை.

முற்றுப்புள்ளி எப்போது?

ஈவ் டீசிங், பலாத்காரம், வன்கொடுமை,  கொலை ஆகியவற்றால் பாதிக்கப்படும் பெண்களின் எண்ணிக்கை இந்தியாவில் நாளுக்கு நாள் அதிகரித்த வண்ணம் உள்ளது. உத்தரப்பிரதேச மாநிலம், உன்னாவ் பகுதியில் 17 வயது சிறுமி பாலியல்  பலாத்காரத்துக்கு ஆளான சம்பவம் நாட்டையே உலுக்கியது. நியாயம் கிடைக்க எவ்வளவு இழப்புகளை அச்சிறுமி சந்தித்துள்ளார் என்பது மிகுந்த மனவேதனையை ஏற்படுத்துகிறது. உன்னாவ் சம்பவத்தில் காவல்துறையின் செயல்பாடு பெரும்  அதிர்ச்சியையும், கேள்வியையும் எழுப்பியுள்ளது. பெண்களுக்கு எதிரான குற்றங்களை தடுக்க தேசிய மகளிர் ஆணைய சட்டம், வரதட்சணை கொடுமை, போக்சோ (சிறுவர்களுக்கு மட்டும்) உள்ளிட்ட பல்வேறு சட்டங்கள் இருந்தும், பெண்கள், சிறுமிகள் மீதான வன்கொடுமைகள் அதிகரித்து  வருகிறது. இதில் குடும்ப வன்முறைகளும் அடங்கும். பெண்களுக்கு எதிரான செயல்களில் ஈடுபட்டால் கடுமையான தண்டனை உடனே கிடைக்கும் என்பதை உறுதி செய்தாலே பெண்கொடுமைகள் கணிசமாக குறைந்து விடும்.தமிழகத்தில் பொள்ளாச்சி சம்பவம் தொடங்கி பல்வேறு பகுதிகளில் பெண்கள், சிறுமிகளுக்கு எதிரான வன்முறைகள் நடந்து வருகின்றன. பாலியல் சம்பந்தமாக புகார் அளித்தால் எதிர்காலம் பாதிக்கப்படும் என்ற அச்சம் காரணமாக ஒரு சில  சம்பவங்கள் மட்டுமே வெளியே வருகிறது. பெண்களின் பாதுகாப்பு விஷயத்தில் காவல்துறையின் பங்கு மிக முக்கியம் என்பதால், அலட்சியம் செய்யாமல், நேர்மையாக செயல்பட வேண்டிய பொறுப்பு காவல்துறைக்கு அதிகம் உள்ளது.இது ஒருபுறமிருக்க, நவீன ஸ்கேன் வசதி மூலம் கண்டறிந்து, கருவிலேயே பெண் சிசுவை அழிக்கக்கூடிய கொடுமைகளும் அரங்கேறி வருகின்றன. உத்தரகாண்ட் மாநிலம், உத்தரகாசி மாவட்டத்தில் உள்ள 16 கிராமங்களில் கடந்த 6  மாதங்களாக ஒரு பெண் குழந்தை கூட பிறக்கவில்லை என அதிர்ச்சி தகவல் சில தினங்களுக்கு முன் வெளியாகியது. கருவிலேயே ஆணா, பெண்ணா என அறிந்து பெண் சிசுக்கள் கொல்லப்பட்டதா என்பது குறித்து விசாரணை நடைபெற்று  வருகிறது.பல மாநிலங்களில் பெண் குழந்தைகளின் பிறப்பு விகிதம் குறைந்து வருகிறது. இதே நிலை தொடர்ந்தால் பல்வேறு சமுதாய பிரச்னைகளை அடுத்த தலைமுறை சந்திக்க வேண்டியிருக்கும். குழந்தை பருவத்தில் இருந்தே ஆண், பெண் என  பாகுபாடு இல்லாமல் சிறுவர்களை வளர்க்க வேண்டியது பெற்றோரின் கடமை.உன்னாவ் போல் இனியொரு சம்பவம் நடக்கக்கூடாது. அதற்கான பொறுப்பு அரசுக்கு மட்டுமல்ல... ஒவ்வொரு ஆணுக்கும் உண்டு. பெண்களின் முன்னேற்றத்திற்காக பல்வேறு திட்டங்களை அறிவிக்கும் மத்திய, மாநில அரசுகள், முதலில்  அவர்களின் பாதுகாப்பு விஷயத்தில் அதிக கவனம் செலுத்த வேண்டும்.

குறட்டை விட்ட அரசு

தமிழகத்தில் கிராமங்கள் முதல் மாநகராட்சி வரை எத்தனையோ நல்ல திட்டங்கள் நிதியின்றி முடங்கி கிடக்கின்றன. ஆனால் மத்திய அரசின் நிதியை வாங்கி வைத்துக் கொண்டு காலமெல்லாம் உறங்கிவிட்டு, கடைசியில் திருப்பி அனுப்பும் தமிழக அரசை என்னவென்று சொல்வது? மத்திய அரசின் தணிக்கை அறிக்கையின்படி கடந்த 5 ஆண்டு காலத்தில் தமிழக அரசு 1.22 லட்சம் கோடி நிதியை செலவழிக்காமல் திருப்பி அனுப்பிய அதிர்ச்சி தகவல்கள் வெளியாகியுள்ளன. அதிலும் அதிகபட்சமாக கடந்த 2017-18ம் ஆண்டில் மட்டுமே 28,029 கோடி நிதியை திருப்ப அனுப்பிய அவலம் அரங்கேறியுள்ளது. கடந்த 2013-14 நிதியாண்டு தொடங்கி 2017-18ம் ஆண்டு வரை, 5 ஆண்டுகளில் மொத்தம் 1.22 லட்சம் கோடி ரூபாயை தமிழக அரசு செலவழிக்காமல் வீணடித்துள்ளது. அதாவது ஒரு ஆண்டிற்கு சராசரியாக 24,502 கோடியை மத்திய அரசுக்கு தமிழகம் திருப்பி அனுப்பியுள்ளது. தமிழகத்தில் மோசமான நிதி நிர்வாகம் நடப்பதற்கு இதைவிட சிறந்த உதாரணங்கள் தேவைப்படாது.முன்னாள் முதல்வர் ஜெயலலிதா மறைவுக்கு பின்னர், அதிமுக பிளவுபட்டதன் காரணமாக ஆட்சியாளர்களுக்கு பொதுமக்களையோ, அரசு நிர்வாகத்தையோ, திட்டங்களையோ கவனிக்க கூட நேரமில்லை. எப்போது பார்த்தாலும் ஆட்சியை தக்க வைக்கவும், கட்சியை காப்பாற்றவுமே போராடுகின்றனர். இதன் விளைவு அரசு நிர்வாகம் சின்னாபின்னமாகி காட்சியளிக்கிறது. தமிழக நெடுஞ்சாலைத்துறை நில ஆர்ஜிதம், கையகப்படுத்துதல் ஆகியவற்றில் ஏற்பட்ட தாமதத்தால் 1,022 கோடி திருப்பி அனுப்பியதை கூட மன்னித்து விடலாம். ஆனால் பள்ளிக்கல்வித்துறை சர்வ சிக்‌ஷா அபியான் திட்டம் மற்றும் மேல்நிலை கல்வி மேம்பாட்டு திட்டத்தின் கீழ் வந்த ஆயிரக்கணக்கான கோடியை திரும்ப அனுப்பியதை என்னவென்று சொல்வது? தமிழகத்தில் பல அரசு பள்ளிகளில் குடிநீர், கட்டிடம், விளையாட்டு உபகரணங்கள் என அடிப்படை வசதிகள் இல்லை. போதிய கழிப்பறை வசதியில்லாமல் எத்தனை மகளிர் பள்ளிகள் அவலமாக காட்சியளிக்கின்றன. பிரதமர் வீட்டு வசதி திட்டத்தின் கீழ் ஒரு வீடு கிடைக்காதா என அரசு அலுவலகங்களில் காத்துக் கிடக்கும் ஏழைகளின் எண்ணிக்கை கணக்கிலடங்காது. ஆனால் தமிழக அரசோ பிரதமர் வீட்டு வசதி திட்டத்தின்கீழ் வீடு இல்லாத ஆதிதிராவிடர்கள், பழங்குடியினருக்கு வீடு கட்டி தரும் திட்டத்திற்கு வந்த தொகையில் 2 ஆயிரம் கோடியை திருப்பி அனுப்பிவிட்டு வேடிக்கை பார்க்கிறது. சுய உதவிக்குழுக்களுக்கான மத்திய நிதி, தொழில் முனைவோர் ஊக்குவிப்பு நிதி, கிராம ஊராட்சிகளுக்கான மேம்பாட்டு நிதிகளை வாங்கி வைத்து கொண்டு குறட்டை விட்ட மாநில அரசை, மக்கள் கேள்வி கேட்கும் காலம் விரைவில் வரும்.

எச்சரிக்கை அவசியம்

உலகில் தீவிரவாதம், பயங்கரவாதம் போன்றவை தலைதூக்கி ஒட்டுமொத்த மனித சமுதாயத்திற்கும் பாதிப்பை ஏற்படுத்தி வருகிறது. பயங்கரவாதத்தை வேரோடு ஒழிக்க பல நாடுகள் படாதபாடுபட்டு வருகின்றன. நாட்டின் வளர்ச்சிக்கும் மக்களின் அமைதிக்கும் தடைக் கல்லாக விளங்கும் தீவிரவாதத்தை ஒடுக்க ஒவ்வொரு நாடும் அதன் பாதிப்புக்கு ஏற்ப நடவடிக்கை எடுத்து வருகின்றன. இந்தியாவில் தீவிரவாதம், வேர்விட்டு தற்போது துளிர்விட முயற்சிக்கிறது. ஜம்மு-காஷ்மீரில் அப்பாவி வாலிபர்கள், இளைஞர்கள் தீவிரவாதிகளின் மூளைச் சலவையால் ராணுவத்தினர் மீது கல்வீசி தாக்குதல் நடத்துகின்றனர். இதனால் மாநிலத்தின் வளர்ச்சி பாதிக்கப்படுவதோடு இளைஞர் சமுதாயமும் தவறான பாதையில் செல்கின்றது. இதை ஒடுக்க மத்திய அரசு தற்போது முயற்சி மேற்கொண்டுள்ளது. அதற்காகத்தான் உபா சட்டத்தைத் திருத்தியுள்ளது. ஒரு தீவிரவாத அமைப்புக்கு தடை விதித்தால், அந்த அமைப்பில் உள்ளவர்கள் மற்றொரு பெயரில் செயல்படத் தொடங்குகின்றனர். தற்போது தீவிரவாத வழக்குகளை தேசிய புலனாய்வு அமைப்பு (என்.ஐ.ஏ) விசாரித்து வருகிறது. இதற்கு கூடுதல் அதிகாரம் வழங்கும் வகையில், கடந்த 1967ம் ஆண்டு இயற்றப்பட்ட சட்ட விரோத நடவடிக்கை தடுப்பு சட்டத்தில் (உபா) திருத்தங்கள் கொண்டு வரப்பட்டன. இதன் மூலம், எந்த ஒரு நபர் தீவிரவாத செயலில் ஈடுபட்டாலும் அல்லது தீவிரவாத அமைப்புகளுக்கு ஆதரவாக செயல்பட்டாலும், அவரை தீவிரவாதியாக அறிவித்து அவரது சொத்துக்கள் பறிமுதல் செய்யும் வகையில் திருத்தம் செய்யப்பட்டது. இந்த சட்டத் திருத்தம் நாடாளுமன்றத்தில் நிறைவேற்றப்பட்டுவிட்டது.  மாநிலங்களவையில் விவாதத்தின்போது, தனி நபரை தீவிரவாதியாக அறிவிப்பதற்கு வழிவகுக்கும் சட்டம் தவறாக பயன்படுத்த வாய்ப்புகள் உள்ளன. இதனால், இந்த சட்டத் திருத்த மசோதாவை தேர்வுக் குழுவுக்கு அனுப்ப வேண்டும் என எதிர்க்கட்சிகள் வலியுறுத்தின. இந்த சட்ட திருத்தத்தில் நான்கு கட்ட ஆய்வுகள் மேற்கொள்ளப்படும், மனித உரிமைகள் மீறப்படாது என்று மத்திய அரசு உறுதி அளித்துள்ளது. இந்த சட்டத்தை அமல்படுத்தும்போது, எதிர்க்கட்சிகள் தெரிவித்த அச்சத்தை எல்லாம் கவனத்தில் கொள்ள வேண்டும். எந்தக்காரணத்தையும் முன்னிட்டு நிரபராதி யாரும் பாதிக்கப்பட்டுவிடக் கூடாது. அதேபோல், ஒரு குறிப்பிட்ட பிரிவினரை மட்டும் குறிவைத்து நடவடிக்கை எடுக்கக் கூடாது என்பதில் உறுதியுடன் இருக்க வேண்டும். அதுவே ஜனநாயகத்தில் சிறந்த நேர்மையான செயலாகும்.

அதிகார மெத்தனம்

கரூர் மாவட்டம் முதலைப்பட்டி ஊராட்சிக்கு சொந்தமான 39 ஏக்கர் சுற்றளவு நீர்நிலை குளத்தை சிலர் ஆக்கிரமித்து விவசாயம் செய்துள்ளனர். கிராமத்துக்கு நீராதாரமாக விளங்கும் குளத்தை ஆக்கிரமித்தவர்களை எதிர்த்து விவசாயி மதுரை உயர்நீதிமன்றத்தில் பொதுநல வழக்கு தொடர்ந்தார். இதனால் ஆத்திரமடைந்த ஆக்கிரமிப்பாளர்கள் வழக்கு தொடர்ந்த விவசாயி மற்றும் அவரது மகனை சரமாரியாக வெட்டி கொலை செய்தனர். இந்த சம்பவம் தொடர்பான செய்தி பத்திரிகையில் வந்ததை தொடர்ந்து தானாக முன்வந்து மதுரை உயர்நீதிமன்ற கிளை வழக்கு தாக்கல் செய்து விசாரித்தது. நீர்நிலைகளின் ஆக்கிரமிப்புகளை அகற்றுவதில் அதிகாரிகளின் மெத்தனப்போக்கே இது போன்ற கொடுமையான சம்பவங்கள் நடக்க காரணமாக அமைவதாக நீதிபதிகள் கண்டனம் தெரிவித்தனர். மழை வெள்ள காலங்களில் மழை நீர் குடியிருப்புக்குள் புகுந்து குட்டித்தீவாக மாறிவிடுகிறது. இதற்கு காரணம் நீரோட்ட பாதையை ஆக்கிரமித்து வீடுகள் கட்டுவது, நிறுவனங்கள் அமைப்பது என்று விதிமுறைகள் மீறுவதே ஆகும். இந்த தவறையெல்லாம் சுட்டிக்காட்டி நீதிமன்றத்தில் வழக்கு தொடர்ந்தால், மாநகராட்சி உள்பட சம்பந்தப்பட்ட அதிகாரிகள் ஆக்கிரமிப்பை அகற்றி நீர்நிலைகளை மீட்க வேண்டும் என்று உயர்நீதிமன்றம் உத்தரவிடுகிறது. ஆனால், நீதிமன்ற உத்தரவை நடைமுறை படுத்துவதிலும், நடவடிக்கை எடுப்பதிலும் அதிகாரிகள் அலட்சியம் காட்டுகின்றனர். அரசியல் தலையீடு இருப்பதால் அதிகாரிகள் அவர்கள் பின்னால் ஒளிந்து கொண்டு கடமையில் இருந்து தவறுகின்றனர். சம்பந்தப்பட்ட அதிகாரிகள் மீது நீதிமன்ற அவமதிப்பு வழக்கு தொடர்ந்தால், அதனால் அவர்களுக்கு கிடைக்கும் தண்டனை, எச்சரிக்கை, கண்டனம் ஆகியவற்றை சாதாரணமாக எடுத்துக்கொள்கின்றனர். எனவே, நீதிமன்றங்கள் அடிக்கடி பிறப்பிக்கும் உத்தரவுகளை அரசு அதிகாரிகள் மெத்தனம் காட்டாமல் நிறைவேற்றினால் போதும் அரசு இயந்திரம் மீது மக்களுக்கும் நம்பிக்கை பிறக்கும். நீர்நிலைகளை ஆக்கிரமித்தவர்களை தட்டிக்கேட்பவர்களை ெவட்டிக்கொல்வது போன்ற அராஜக செயல்களை வளரவிட்டால் ஜனநாயகத்தின் அச்சாணியை அசைத்துபார்த்துவிடும். நீராதாரமாக விளங்கும் நீர்நிலைகளை ஆக்கிரமித்தால் ஊருக்கு மட்டுமல்ல, நம் குடும்பத்துக்கும், சந்ததியினருக்கும் ஆபத்து என்பதை ஒவ்வொரு தனி மனிதரும் உணர வேண்டும். அதே சமயம், அரசு அதிகாரிகள், உடனுக்குடன் நடவடிக்கை எடுத்து சட்டப்படி நீதியை நிலைநாட்ட முன்வர வேண்டும் என்பதே மக்களின் கோரிக்கை.

உரிமைகள் பறிப்பு

நாடுமுழுவதும் மாநிலங்களுக்கு இடையிலான நதிநீர் பிரச்னையை தீர்த்து வைப்பது தொடர்பாக ஒரே தேசிய ஆணையத்தை ஏற்படுத்தும் மசோதா மக்களவையில் நிறைவேற்றப்பட்டுள்ளது. ஆனால், காவிரி நதி நீர் ஆணையம் வழக்கம்போல் செயல்படும் என்று மத்திய அமைச்சர் விளக்கம் அளித்துள்ளார். நீட் தேர்வு ெகாண்டு வரப்பட்டபோது, முதல் இரண்டு ஆண்டுகளுக்கு தமிழகத்துக்கு விலக்கு அளிக்கப்படும் என்று மத்திய அரசு தெரிவித்தது. இதில் இருந்து முழுமையாக விலக்கு வேண்டுமானால், அதற்கு சட்டப்பேரவையில் தீர்மானத்தை நிறைவேற்றி அனுப்பினால் பரிசீலிக்கப்படும் என்று கூறியது. ஆனால், ஒரு முறை அல்ல, இரண்டு முறை மசோதா நிறைவேற்றப்பட்டு, ஜனாதிபதியின் ஒப்புதலுக்காக அனுப்பி வைக்கப்பட்டபோதும், சத்தமில்லாமல் அதை மத்திய அரசு திருப்பி அனுப்பி உள்ளது. இதை இரண்டு ஆண்டுக்கு பின்னர் ஒப்புக் கொண்டுள்ளது தமிழக அரசு. அதாவது இனி எதுவும் செய்ய முடியாது என்ற நிலையில்.இதேபோல்தான் தேசிய நதிநீர் ஆணையமும். ஒரே ஆணையத்துக்கு சட்டம் கொண்டு வரப்பட்ட பின்னர், ஏற்கனவே இருக்கும் ஆணையங்கள் தானாகவே காலாவதி ஆகிவிடும். உச்ச நீதிமன்றத்துக்கு நிகரானது இந்த ஆணையத்தின் தீர்ப்புகள் என்று மத்திய அரசு கூறுகிறது. ஏற்கனவே தமிழகம் போராடி பெற்ற காவிரி ஆணையத்துக்கும் இதேதான் கூறப்பட்டது. ஆனால், காவிரி ஆணையம் பிறப்பித்த உத்தரவுப்படி இதுவரையில் கர்நாடகா முறையாக தண்ணீர் திறந்துவிட்டுள்ளதா? அம்மாநிலத்தில் மழை பெய்யும்போது மட்டும், ஏதோ போனால் போகிறது என்ற ரீதியில் தமிழகத்துக்கு கர்நாடகா தண்ணீர் திறந்துவிடுகிறது. இந்த சூழ்நிலையில், ஒரே ஆணையத்தின் தீர்ப்புகளை மாநில அரசுகள் எப்படி மதிக்கப் போகிறது? அடுத்தது அணைகள் பாதுகாப்பு. இந்த மசோதாவின் பின்னணியில் வேறொரு முக்கியமான அம்சம் உள்ளது. அதாவது, மத்திய, மாநில அளவில் அணைகள் பாதுகாப்புக்கு ஆணையங்கள் மற்றும் கமிட்டிகள் அமைக்கப்படும். இதன் மூலம் ஏற்கனவே மாநிலங்களிடம் உள்ள அதிகாரங்கள் பறிக்கப்பட்டு, மத்திய அரசின் கீழ் உள்ள ஆணையங்களுக்கு செல்லும்.எல்லா அதிகாரங்களையும், உரிமைகளையும் மாநிலங்களிடம் இருந்து பறித்து மத்திய அரசிடம் குவிக்கும் மசோதாக்களில் ஒரே தீர்ப்பாய மசோதாவும் ஒன்று என்று எதிக்கட்சிகள் கூறுவது நியாயமான குற்றச்சாட்டே.

அழுத்தம் தவிர்

ஆட்கொல்லி பட்டியலில் இன்றைய தேதிக்கு முதலிடத்தில் இருப்பது மன அழுத்தப் பிரச்னையே. வேலைக்கு செல்பவர்களுக்கு மட்டும் மன அழுத்தம் இருந்த காலம் மாறி, இப்போது பள்ளி, கல்லூரி மாணவர்களும் டென்ஷனில் திணறுகின்றனர். மன அழுத்தம் அதிகமானால் மாரடைப்பிற்கு பாதை போட்டு விடும். நெஞ்சுவலி, தூக்கமின்மை, தற்கொலை எண்ணம் என பல்வேறு பிரச்னைகளுக்கு மன அழுத்தம், அடித்தளம் அமைத்து கொடுப்பதாக மருத்துவர்கள் எச்சரிக்கின்றனர். நகரத்தில் இயந்திரகதியிலான வாழ்க்கையால், கூட்டுக்குடும்ப மகிழ்ச்சி காணாமல் போனது. குடிப்பழக்கம் உள்ளிட்ட பல்வேறு காரணங்களால் மன அழுத்தம் அதிகரிக்கிறது.கல்வி என்பது காலத்தின் கட்டாயம் என்றாலும், நவீன கல்வி முறைகளால் சிறுவயதில் இருந்தே அதிக மன அழுத்தத்தை மாணவர்கள் சந்திக்கின்றனர். ஆரோக்கியத்துடன் கூடிய கல்வியே வளமான வளர்ச்சிக்கு உதவும். சிறு வயதில் இருந்தே விளையாட்டின் மீதான ஆர்வத்தை ஊக்குவிக்க வேண்டும். இணையதளம் பயன்படுத்துவது தப்பில்லை. ஆனால், எவ்வளவு நேரம் பயன்படுத்துவது என்பதை அவர்களுக்கு சொல்லித் தரவேண்டும். சிறுவயதில் இருந்தே ‘கூண்டுக்கிளி’ வாழ்க்கை வாழ்வதால், விளையாட்டு மைதானங்களுடன் இன்றைய மாணவர்கள் பலர் தொடர்பற்றுப் போகின்றனர்.வெற்றியை எந்தளவுக்கு ஏற்றுக்கொள்கிறோமோ, அந்தளவுக்கு தோல்வியையும் ஏற்றுக்கொள்ளும் மனப்பக்குவத்தை வளர்க்க வேண்டும். தேர்வு என்றாலே ஒருவித அச்ச உணர்வு மாணவர்களுக்கு ஏற்படுகிறது. போட்டி நிறைந்த உலகத்தில் மாணவர்கள் தரமான கல்வி, நல்ல வேலை அமைய எதிர்நீச்சல் போட வேண்டியுள்ளதால், சிறுவயதில் இருந்தே எதையும் எதிர்கொள்ளும் ஆற்றலை வளர்க்க வேண்டியது அவசியம். இயந்திர வாழ்க்கையில் மன அழுத்தத்தை முழுமையாக குறைப்பது இயலாத ஒன்று. ஜிம், யோகா, நடைபயிற்சி உள்ளிட்ட ஏதாவது ஒரு உடற்பயிற்சியை கட்டாயமாக்குவது நல்லது.மன அழுத்தம் ஒருபுறமிருக்க, இதய நோய், மாரடைப்பு  இளைய சமுதாயத்தை மிரட்டி வருகிறது. நாட்டில் ஆண்டுதோறும் பல லட்சம் பேர் இதய நோயால் இறக்கின்றனர். கடந்த சில ஆண்டுகளில் 19 வயது முதல் 30 வயதுக்கு உட்பட்ட இளைய தலைமுறையினர் மாரடைப்புக்கு ஆளாவதாக வரும் புள்ளிவிவரங்கள் அதிர்ச்சியளிக்கின்றன. வாழ்க்கை முறை, உணவு முறைகளால் இதய நோய் ஏற்படுகிறது. மன அழுத்தம் தவிர்த்து, உயர் ரத்த அழுத்தம், உடல்பருமன், கொலஸ்ட்ரால், சர்க்கரை நோய் கட்டுக்குள் இல்லாமல் இருப்பது மற்றும் புகைப்பிடித்தல் உள்ளிட்ட காரணங்களாலும் மாரடைப்பு ஏற்படுகிறது. மன அழுத்த பிரச்னைகளைத் தவிர்க்க, வாழ்க்கையை எளிதாக அணுக, மாணவப் பருவத்தில் இருந்தே கற்றுக் கொடுக்கவேண்டியது காலத்தின் கட்டாயம். நமது உணவு மேஜையை ஆக்கிரமித்துள்ள துரித உணவுகளுக்கு விடைகொடுத்து விட்டு, பாரம்பரியமான, மருத்துவ குணமுள்ள சிறுதானிய உணவுகளை உட்கொள்ள பழக்கவேண்டும். சரியான உணவுமுறை, உடலுக்கு மட்டுமல்ல... மனதுக்கும் ஆரோக்கியம் தரும்.