Headlines - Dinakaran

விஸ்வரூப வெற்றி

17 வது மக்களவை தேர்தல் முடிவுகள் வெளிவந்து விட்டன. மிகப்பிரமாண்ட வெற்றியுடன் மீண்டும் ஆட்சியை தக்க வைத்துக்கொண்டார் பிரதமர் மோடி. முன்னாள் பிரதமர்கள் நேரு, இந்திராவுக்கு பிறகு தனிப்பெரும்பான்மையுடன் இரண்டாம் முறையாக மீண்டும் ஆட்சியில் அமரும் பிரதமர் என்ற பெருமையும் மோடிக்கு கிடைத்து இருக்கிறது.இந்த வெற்றி நிச்சயம் எளிதில் வந்ததில்லை. காங்கிரஸ் உள்ளிட்ட 22 எதிர்கட்சிகளின் கடும் எதிர்ப்பை, அவர்களின் பிரசாரத்தை கடந்து வந்திருக்கிறது. இதற்கு மோடி, பா.ஜ தலைவர் அமித்ஷாவின் கடின உழைப்பை பாராட்டத்தான் வேண்டும். குறிப்பாக கடந்த ஆண்டு இறுதியில் நடந்த மத்தியபிரதேசம், ராஜஸ்தான், சட்டீஸ்கர் சட்டப்பேரவை தேர்தலில் வெற்றி பெற்று ஆட்சியை பிடித்த காங்கிரஸ் இந்த மக்களவை தேர்தலில் அங்குள்ள அனைத்து தொகுதிகளிலும் கிட்டத்தட்ட துடைத்து எறியப்பட்டு இருக்கிறது. அதே போல் பீகார், மகாராஷ்டிரா, டெல்லி, கர்நாடகா, அசாம், குஜராத்திலும் பா.ஜவுக்கு வெற்றி கிடைத்திருப்பதை மறுக்க முடியாது. இதற்கு மோடி, அமித் ஷா வழிகாட்டுதல்படி வீடுவீடாக வாக்காளர்களை சந்தித்து வெற்றியை தேடித்தந்த பா.ஜ தொண்டர்களும் ஒரு காரணம். அதே சமயம் காங்கிரஸ் தலைவர் ராகுல்காந்தியின் கடும் போராட்டத்தையும் ஒதுக்க முடியாது. தனி ஒரு நபராக அத்தனை மாநிலங்களிலும் காங்கிரஸ் பிரசாரத்தை தன் தோளில் சுமந்து முன்னெடுத்துச்சென்றார். அது வெற்றி பெறவில்லை என்றாலும் நிச்சயம் காங்கிரஸ் கட்சியை அடுத்த கட்டத்திற்கு கொண்டு செல்ல இந்த அனுபவம் உதவும். அதே சமயம் கர்நாடகா தவிர தென்மாநிலங்கள் மீண்டும் ஒருமுறை பா.ஜனதாவை புறக்கணித்து இருப்பதை கவனிக்க வேண்டும். தென்மாநில மக்களின் நம்பிக்கையை பெறுவதில் இந்த 5 ஆண்டுகள் மோடி மற்றும் அமித்ஷா கூட்டணி அதிக கவனம் செலுத்துவார்கள் என்று நம்பலாம். ஆந்திராவில் ஜெகன்மோகன்ரெட்டி அலை வீசியிருக்கிறது. தந்தை ராஜசேகரரெட்டியை போல் மகன் ஜெகனும் தெலுங்குதேசம் தலைவர் சந்திரபாபுநாயுடுவை வீழ்த்தியிருக்கிறார்.தமிழகம் இந்த தேர்தலில் குறிப்பிடத்தக்க அசைவை நிகழ்த்தி காட்டியிருக்கிறது. கலைஞர், ஜெயலலிதா மறைவிற்கு பின் ஒட்டுமொத்த தமிழகமும் திமுக தலைவர் மு.க.ஸ்டாலினின் உழைப்பை, தலைமையை ஏற்றுக்கொண்டுள்ளது. அவரது கடின முயற்சியால் திமுக கூட்டணி தமிழகம், புதுவையில் தேர்தல் நடந்த 39 தொகுதிகளில் 38 தொகுதிகளில் பிரமாண்ட வெற்றியை பெற்று இருக்கிறது. மத்தியில் மோடியைப்போல், தமிழகத்தில் தனிப்பெரும் தலைவராக மு.க.ஸ்டாலின் உருவாகி இருப்பதை இந்த தேர்தல் முடிவுகள் எடுத்துக்காட்டியிருக்கிறது.

வெற்றி மேல் வெற்றி

மீண்டும் ஒரு வெற்றிகரமான சாதனையை நிகழ்த்தியிருக்கிறது இஸ்ரோ. பூமியை கண்காணிப்பதற்காக வடிவமைக்கப்பட்ட ரிசாட் 2பி என்ற செயற்கைகோளை சுமந்தபடி பிஎஸ்எல்வி சி 46 ராக்கெட் வெற்றிகரமாக விண்ணில் பாய்ந்ததற்காக இஸ்ரோவுக்கு மீண்டும் ஒருமுறை பாராட்டுகள். விண்வெளி உலகில் அசாத்திய சாதனைகளை செய்வதில் பலம் படைத்த, பணம் படைத்த நாடுகளை விடவும் இந்தியா முந்தி நிற்பதற்கு இஸ்ரோதான் காரணம். இந்த ஆண்டிலேயே இது 3வது ராக்கெட். மாதம் இரண்டு செயற்கைகோள்களையும் விண்ணில் ஏவ இஸ்ரோ தயாராக இருக்கிறது என்றால் நமது விஞ்ஞானிகளின் உழைப்பு எவ்வளவு அசாத்தியமான ஒன்று என்பதை புரிந்து கொள்ள முடியும். ாிசாட் 2 பி பூமியை கண்காணிப்பதற்காக வடிவமைக்கப்பட்ட செயற்கைகோள் என்று சொல்லப்பட்டாலும், வன பாதுகாப்பு, பேரிடர் மேலாண்மை, மற்றும் ராணுவ பயன்பாட்டுக்கு இந்த செயற்கைக்கோள் பயன்படும். 5 ஆண்டுகள் இதன் மூலம் இஸ்ரோ சாதிக்கும். பி.எஸ்.எல்.வி. சி-46 ராக்கெட் ஹரிகோட்டாவிலிருந்து ஏவப்படும் 72வது ராக்கெட் ஆகும். இஸ்ரோ சாா்பில் 353 செயற்கை கோள்கள் விண்ணில் ஏவப்பட்டுள்ளன. விண்வெளி ஆராய்ச்சியை மேம்படுத்துவதுடன், விண்வெளி தொடர்பான தகவல்களை பொதுமக்கள் தெரிந்துகொள்வதற்காக ராக்கெட் ஏவுவதை பார்வையிட அனுமதிக்கப்பட்டனர்.இஸ்ரோ சார்பில் ஏவப்பட்ட ரிசாட் 2பி செயற்கைகோளில் நவீன ரேடார் பயன்படுத்தப்பட்டுள்ளது. இதனால் இரவு, பகல் உள்பட எந்தவித சூழலிலும் துல்லியமாக படம் எடுக்க முடியும். முற்றிலுமாக நமது நாட்டின் பாதுகாப்பை கருத்தில் கொண்டு ரிசாட் 2பி ஏவப்பட்டுள்ளது. புவிகண்காணிப்பு மற்றும் பாதுகாப்பு பயன்பாட்டிற்கு உதவியாக இருக்கும். மேலும் உளவுப்பணிக்காக பயன்படுத்தப்பட உள்ளது. குறிப்பாக இந்தியாவின் எல்லைப்பணிகளை கண்காணிக்கவும், எதிரிகளின் நடமாட்டத்தை இரவு நேரத்தில் கூட துல்லியமாக படம் பிடித்து அனுப்பும் பணிகளை இந்த செயற்கைகோள் மேற்கொள்ளும். காஷ்மீர் பாதுகாப்பு பணிக்கு இந்த செயற்கைகோள் முக்கிய பங்காற்றும். இனிவரும் காலம் விண்வெளி போர் காலம். இந்த துறையில் தற்போது உலக அளவில் இந்தியாதான் முதலிடம். பலநாடுகள் பல ஆயிரம் கோடியை கொட்டி முயற்சி மேற்கொண்டாலும் விண்வெளி சாதனைகள் அவர்கள் நினைத்த இலக்கை எட்டமுடியவில்லை. ஆனால் இஸ்ரோவின் அதீத முயற்சியால் இந்தியா வெற்றிமேல் வெற்றி படைத்து வருகிறது. அறிவியல் மற்றும் தொழில்நுட்பத்தில் முதலிடம் பிடித்த நாடுகள் கூட இந்தியாவின் விண்வெளி சாதனையை கண்டு வியந்து போய் நிற்கிறது. இது நமக்கு பெருமைதான்.

மீண்டும் விலையேற்றம்

சர்வதேச மார்க்கெட்டில் கச்சா எண்ணெய் விலை கணிசமாக உயர்ந்த பிறகும், இந்தியாவில் பெட்ரோல், டீசல் விலை உயர்வு தேர்தலுக்காக தற்காலிகமாக நிறுத்திவைக்கப்பட்டிருந்தது. தற்போது, மக்களவை தேர்தல் முடிவடைந்துவிட்ட நிலையில், பெட்ரோல், டீசல் விலை கிடுகிடுவென உயரும் நிலை உருவாகியுள்ளது. மிகப்பெரிய அளவில் இல்லாவிட்டாலும்  ஓரளவுக்கு விலை ஏற்றம் அமலுக்கு வந்துள்ளது. அதன்படி, பெட்ரோல் விலையில் லிட்டருக்கு 8 - 10 பைசாவும், டீசல் விலையில் 15 - 16 பைசாவும் உயர்த்தப்பட்டுள்ளது. சென்னையில் நேற்று பெட்ரோல் விலை 73.72 ரூபாயில் இருந்து பத்து பைசா அதிகரித்து 73.82 ரூபாயாகவும், டீசல் விலை 69.72 ரூபாயில் இருந்து 16 பைசா அதிகரித்து 69.88 ரூபாயாகவும் இருந்தது.ஈரானின் கச்சா எண்ணெய் ஏற்றுமதிக்கு அமெரிக்கா தடை விதித்ததால் சர்வதேச அளவில் பெட்ரோல், டீசலுக்கு தட்டுப்பாடு ஏற்படும் சூழல் உருவாகியுள்ளது. அத்துடன், ஈரான் மீது அமெரிக்கா போர் தொடுக்கலாம் என்ற பதற்றமும் தற்போது நிலவி வருகிறது. அதற்கேற்ப ஈரானின் அண்டை நாடுகளில் அமெரிக்கா தனது போர்த்தளவாடங்களை நிலைநிறுத்தி வருகிறது. ஈரானும் அமெரிக்காவின் சவாலை எதிர்கொள்ள தயாராகி வருகிறது. இந்த குழப்பமான சூழல் காரணமாக இனி வரும் நாட்களில் கச்சா எண்ணெய் விலை மேலும் உயர்ந்தால், நம் நாட்டில் பெட்ரோல், டீசல் விலையில் அது எதிரொலிக்கும். இந்த விலை உயர்வினால் பொதுமக்கள் அதிகம் பாதிக்கப்படாத வகையில் இருக்கவேண்டுமெனில், பெட்ரோல், டீசல் போன்றவைகளின் மீது விதிக்கும் விற்பனை வரியை மாநில அரசுகள் குறைக்கவேண்டும். ஆனால், தமிழகம் உள்பட எந்த மாநில அரசும் தனது வரி வருவாயை குறைக்க தயாராக இல்லை.  கடந்த நிதியாண்டில், பெட்ரோலிய பொருட்களின் மீதான விற்பனை வரியின் மூலம் மாநில அரசுகளுக்கு ரூ.55,400 கோடி வருவாய் கிடைத்துள்ளது. இது, நடப்பு நிதியாண்டில் ரூ.60 ஆயிரம் கோடியாக உயரும் என எதிர்பார்க்கப்படுகிறது. இந்த சூழ்நிலையில், மாநில அரசுகளின் வரி குறைப்பு என்பது சாத்தியம் இல்லாத ஒன்று. அனைத்து மாநிலங்களும் ஒரே மாதிரியான விற்பனை வரியை விதிக்கும்படி, மாநில அரசுகளை மத்திய அரசு நிர்ப்பந்தப்படுத்தினால் மட்டுமே வரி குறைப்பு சாத்தியம். அத்துடன், பெட்ரோல், டீசல் விலையை மத்திய அரசின் ஜி.எஸ்.டி. வரிக்குள் கொண்டுவந்தால் இன்னும் பெருமளவில் விலை குறைய வாய்ப்புள்ளது. மத்திய - மாநில அரசுகள் தங்களது வரி வருவாயை இழக்க தயாராக இல்லாத காரணத்தால், பெட்ரோல், டீசல் விலை உயர்வை தடுக்க முடியாத சூழல் உள்ளது. இனி, தொடர்ந்து ஏறுமுகம்தான்.

நிலம் காக்க போராட்டம்

உலகிற்கே உணவு கொடுக்கும் உன்னத பணியை செய்து வரும் விவசாயிகளின் தற்போதைய நிலை மிகுந்த கவலை அளிக்கிறது. விளைநிலங்கள் எப்போது வீட்டு மனைகளாக மாறியதோ, அப்போதே விவசாயத்தின் அழிவு தொடங்கி விட்டது. விவசாயம் செய்வதே அரிதாகி வரும் நிலையில், தங்களது நிலத்தை காக்க போராட வேண்டிய நிலைக்கு விவசாயிகள் தள்ளப்பட்டுள்ளனர். வங்கியில் கோடிக்கணக்கில் பணம் வாங்கி விட்டு வெளிநாடுகளில் ஜாலியாக உலா வருகின்றனர். ஆனால், விவசாயத்துக்கு கொடுத்த கடனை கேட்டு வங்கிகள் கொடுத்த டார்ச்சரால், விவசாயிகள் தற்கொலை செய்து கொண்ட சம்பவங்களுக்கு இங்கு பஞ்சமில்லை. நாடு முழுவதும் விவசாயிகளின் வாழ்வாதார போராட்டம் தொடர்ந்து கொண்டுதான் இருக்கின்றன. தற்போது தமிழகத்தில் ஹைட்ரோ கார்பன் திட்டத்தை எதிர்த்து போராட்டம் நடந்து வருகிறது. விவசாயம் செய்வதற்கே போராட்டம், வழக்குகளை சந்திக்க வேண்டிய சூழல் இருந்தால், வேளாண் துறையில் எப்படி முன்னேற்றம் வரும்? மக்களுக்கு தேவையான உணவுக்காகத்தான் விவசாயிகள் போராடுகின்றனர் என்பதை அரசு புரிந்து கொள்ள வேண்டும். விவசாயிகள் வேளாண் புரட்சிக்காக போராட வேண்டிய நிலைமாறி, தங்களது நிலத்தை காக்க போராட்டம் நடத்த வேண்டிய நிலையில் உள்ளனர். இது ஒருபுறம் இருக்க, வறட்சியின் கோர தாண்டவமும் தலைவிரித்தாடுகிறது. கோடை வெப்பத்துக்கு பயிர்கள், தென்னை, பாக்கு மரங்கள் கருகி வருகின்றன. கூலி ஆட்களுக்கு கூட பணம் கொடுக்க முடியாத நிலையில் விவசாயிகள் திண்டாடி வருகின்றனர். இதனாலே ஒவ்வொரு ஆண்டும் விவசாயிகளின் எண்ணிக்கை குறைந்து கொண்டே வருகிறது. விவசாயத்தை விட்டு விட்டு, மாற்றுத்தொழில் தேடி நகரை நோக்கி வந்த வண்ணம் உள்ளனர். இதே நிலை தொடர்ந்தால் உணவுக்காக நாம் பிறரிடம் கையேந்த வேண்டிய நிலை ஏற்படும். டிஜிட்டல் உலகத்தில் வாழ்வாதாரம் காக்கும் வேளாண் துறை மட்டும் வளராமல் இருக்க என்ன காரணம்?விவசாய உற்பத்தியை பெருக்கி வளம்மிக்க நாடாக மாற்ற பல்வேறு நாடுகள் முயற்சி செய்து வருகின்றன. ஆனால், இங்கு நிலைமை தலைகீழாக உள்ளது. விவசாயத்தை மேம்படுத்த பல புதிய திட்டங்களை கொண்டு வர வேண்டும். அந்த திட்டங்கள் குக்கிராமங்கள் வரை சென்றடைய வேண்டும். விவசாயிகள் சந்திக்கும் பிரச்னைகளை கண்டறிந்து, அதற்கு தகுந்தாற்போல் திட்டங்களை வகுக்க வேண்டும். விவசாயம் செழிக்க வேண்டும் என்றால், முதலில் விவசாயிகளின் விளைபொருட்களுக்கு உரிய விலை கிடைக்க வழிமுறைகளை ஏற்படுத்த வேண்டும். அரசின் உதவிகள் அனைத்து விவசாயிகளுக்கும் பாகுபாடின்றி கிடைக்க வேண்டும். முக்கியமாக எளிதான வங்கிக்கடன் திட்டம் கண்டிப்பாக தேவை. நாட்டின் வளர்ச்சிக்கு விவசாயம் மிக முக்கியமானது என்பதால், விவசாயம் குறித்த விழிப்புணர்வை அதிகப்படுத்த வேண்டும். தற்போது படித்த இளைஞர்கள் விவசாயம் செய்து வருகின்றனர். அவர்களை ஊக்குவித்து விவசாயத்தை காக்க வேண்டிய பொறுப்பு அரசுக்கு உள்ளது.

பாவச்செயல்

கொ ச்சியிலிருந்து பெங்களூருக்கு எரிவாயு குழாய் கொண்டு செல்ல மேற்கு மாவட்ட விளைநிலங்களில் குழாய் அமைக்க கெயில் நிறுவனம் முயற்சித்தபோது, விவசாயிகள் போராடியதால் அப்போது முதல்வராக இருந்த மறைந்த ஜெயலலிதா, கெயில் நிறுவனத்துக்குத் தடை விதித்தார். உச்ச நீதிமன்றம் வரையில் சென்று கெயில் நிறுவனம் அனுமதி பெற்றிருந்தாலும், கோவை, திருப்பூர், ஈரோடு, தருமபுரி மாவட்டங்களில் இன்னமும் விவசாயிகள் போராடி வருகின்றனர். காவிரி பாசன மாவட்டங்களில் 5,000 சதுர கி.மீ பரப்பளவில் 6 ஹைட்ரோ கார்பன் திட்டங்கள், கடலூர் மற்றும் நாகை மாவட்டங்களில் 45 கிராமங்களில் 57,345 ஏக்கர் விளைநிலங்களை கையகப்படுத்தி பெட்ரோ கெமிக்கல் முதலீட்டு மண்டலம், 600 ஏக்கர் பரப்பளவில் நரிமணம் எண்ணெய் சுத்திகரிப்பு ஆலை விரிவாக்கம் என விவசாயத்தை முற்றிலும் அழிக்கும் செயல் அரங்கேறி வருகிறது என்று  வாழ்வாதாரத்தை இழந்து தவிக்கும் விவசாயிகள் எதிர்ப்பு குரல் கொடுத்து வருகின்றனர். நாகப்பட்டினம் மாவட்டத்தில் குறுவை நடவு செய்யப்பட்டுள்ள வயல்களில் காவல்துறை துணையுடன் குழாய்ப்பாதை அமைக்கும் பணிகளை கெயில் - ஓ.என்.ஜி.சி நிறுவனங்கள் மேற்கொள்ளத் தொடங்கியுள்ளன. இதற்கு விவசாயிகள் கடும் எதிர்ப்பு தெரிவித்து வருகின்றனர். சீர்காழியை அடுத்த பழையப்பாளையம் என்ற இடத்தில் மாதானம் திட்டம் என்ற பெயரில் கடந்த 6 ஆண்டுகளுக்கு முன் அதிக எண்ணிக்கையில் எண்ணெய் கிணறுகளை ஓஎன்ஜிசி நிறுவனம் அமைத்தது. அங்கிருந்து எடுக்கப்படும் கச்சா எண்ணெய்யை நரிமனத்தில் உள்ள எண்ணெய் சுத்திகரிப்பு நிலையத்திற்கு கொண்டு செல்ல சீர்காழியை அடுத்த மாதானத்தில் இருந்து தரங்கம்பாடி அருகே உள்ள மேமாத்தூர் வரையில் 29 கி.மீ. நீளத்திற்கு குழாய்ப் பாதை அமைக்கும் பணியில் ஓ.என்.ஜி.சி - கெயில் நிறுவனங்கள் தற்போது இறங்கியுள்ளன.குழாய்ப் பாதை முழுவதும் விளை நிலங்களில் அமைக்கப்படுகிறது. அந்த விளைநிலங்களில் அண்மையில் தான் குறுவை நெல் நடவு செய்யப்பட்டது. அவற்றை அழித்து விட்டு குழாய்ப்பாதையை அமைக்கும் பணிகள் மேற்கொள்ளப்பட்டு வருகின்றன. இதனால், 30 ஆயிரம் ஏக்கருக்கும் கூடுதலான விளைநிலங்கள் பாதிக்கப்படும். விவசாயிகள் வாழ்வாதாரம் இழப்பார்கள். நமது நாடு விவசாயம் சார்ந்த நாடு. கிராமங்கள் விவசாயத்தையே பிரதான தொழிலாகக் கொண்டுள்ளன. இந்த நிலையில், இவர்களின் வாழ்வாதாரங்களை அழித்து எதை சாதிக்கப்போகிறது மத்திய அரசு என்ற கேள்வியை விவசாயிகள் எழுப்பியுள்ளார்கள். இந்த நிலையிலாவது விவசாயிகளின் குரலுக்கு செவிசாய்த்து இந்தத் திட்டத்தை உடனடியாக கைவிட மத்திய அரசு நிறுவனங்கள் முன்வர வேண்டும். அதற்கான நடவடிக்கையை மாநில அரசு எடுக்க வேண்டும். இல்லை என்றால், விவசாய சமுதாயத்தையே அழித்த பழி பாவச் செயலுக்கு பொறுப்பு ஏற்க வேண்டிய நிலை மத்திய, மாநில அரசுகளுக்கு ஏற்படும் என்பதில் சந்தேகம் இல்லை.

சென்னை இரண்டாவது விமான நிலைய பணிகளை விரைவுபடுத்த வேண்டும்: ராமதாஸ் வலியுறுத்தல்

சென்னை: சென்னை இரண்டாவது விமான நிலைய பணிகளை விரைவுபடுத்த வேண்டும் என்று ராமதாஸ் வலியுறுத்தியுள்ளார். பாமக நிறுவனர் ராமதாஸ் நேற்று வெளியிட்டுள்ள அறிக்கை: சென்னை மாநகரம் அனைத்து வழிகளிலும் வளர்ச்சியடைந்து வருகிறது. சென்னை மாநகருக்கு வந்து செல்லும் விமானங்களின் எண்ணிக்கை நாளுக்கு நாள் அதிகரித்து வருகிறது. இந்நிலையில், விமான  நிலைய நெரிசலை தவிர்ப்பதற்காக இரண்டாவது விமான நிலையத்தை அமைப்பது அவசியமாகிறது. சென்னையில் இரண்டாவது விமான நிலையம் அமைப்பதற்கான திட்டம் 12 ஆண்டுகளுக்கு முன்பே தயாரிக்கப்பட்டு விட்டது. சென்னை, ஐதராபாத், பெங்களூர், கொச்சி, விசாகப்பட்டினம் உள்ளிட்ட நகரங்களில் பசுமைவெளி விமான நிலையங்களை அமைக்க ஒரே நேரத்தில் திட்டமிடப்பட்டது. கொச்சி, ஐதராபாத், பெங்களூர் ஆகிய விமான நிலையங்கள் பத்தாண்டுகளுக்கு முன்பே திறக்கப்பட்டு விட்டன. விசாகப்பட்டினம் பசுமைவெளி விமான நிலையம் வரும் 2022ம் ஆண்டில் தொடங்கப்பட இருக்கிறது.ஆனால், சென்னையில் இரண்டாவது விமான நிலையம் அமைக்கும் முயற்சியில் எந்த முன்னேற்றமும் ஏற்படவில்லை. சென்னையில் இரண்டாவது விமான நிலையம் அமைக்கும் பணிகளை விரைவுபடுத்த  வேண்டும் என்று தொடர்ந்து வலியுறுத்தி வருகிறேன். இந்திய விமான நிலையங்கள் ஆணையத்தின் தலைவராக இருந்த ராமலிங்கத்தை பலமுறை எனது வீட்டுக்கு அழைத்தும், தொலைபேசியில் அழைத்தும் இதுகுறித்து விவாதித்துள்ளேன். அவரும் இந்த விஷயத்தில் ஆர்வம் காட்டினார். எனினும், அரசுத் தரப்பில் ஒத்துழைப்பு இல்லாததுதான் விமான நிலையம் அமையாததற்கு காரணம். சென்னையில் பசுமைவெளி விமான நிலையம் ஸ்ரீபெரும்புதூர் அருகே அமைக்கப்படும் என்று அறிவிக்கப்பட்டிருந்தது. ஆனால், நிலம் கையகப்படுத்துதல் உள்ளிட்ட பல்வேறு காரணங்களால் ஸ்ரீபெரும்புதூர் பசுமைவெளி விமான நிலையம் அமைக்கும் திட்டம் இன்றுவரை கைகூடவில்லை. இந்தியாவில் சாதாரண நகரங்களில் கூட இரண்டாவது விமான நிலையம் அமைக்கப்பட்டுவிட்டது. ஆனால், இந்தியாவின் நான்காவது பெரிய நகரமான சென்னையில் இன்னும் புதிய விமான நிலையம் அமைக்கப்படாதது தமிழகத்தின் தொழில் மற்றும் பொருளாதார வளர்ச்சிக்கு மிகப்பெரிய முட்டுக்கட்டையாக அமையும். தமிழகத்திற்கு தொழில் முதலீட்டை பெருக்குவதற்காக உலக முதலீட்டாளர்கள் மாநாடு உள்ளிட்ட முயற்சிகள் மேற்கொள்ளப்பட்டு வரும் நிலையில், அவற்றுக்கு உறுதுணையாக இரண்டாவது விமான நிலையத்தை அமைப்பது உள்ளிட்ட கட்டமைப்பு வசதிகள் மேம்படுத்தப்பட வேண்டியது அவசியம். ஒரு கட்டத்தில் கும்மிடிப்பூண்டி, உத்திரமேரூர், மதுராந்தகம், ஸ்ரீபெரும்புதூர் ஆகிய 4 பகுதிகளில் நிலம் தேர்வு செய்யப்பட்டு விட்டதாகவும், அவற்றில் ஒன்றில் விமான நிலையம் அமைக்கப்படும் என மத்திய அரசு அறிவித்திருந்தது. கடைசியாக கிடைத்த தகவல்களின்படி மதுராந்தகத்தை அடுத்த மாமண்டூர் அருகே 3500 ஏக்கரில் இரண்டாவது விமான நிலையம் அமைக்கப்பட இருப்பதாக தெரிகிறது. தமிழகத்தின் வளர்ச்சிக்கு இரண்டாவது விமான நிலையம் அவசிய, அவசர தேவை என்பதால் அதற்கான பணிகளை மத்திய, மாநில அரசுகள் விரைவுபடுத்த வேண்டும். அடுத்த 5 ஆண்டுகளில் அனைத்து கட்டுமான மற்றும் தொழில்நுட்ப பணிகளையும் முடித்து சென்னையின் இரண்டாவது  விமான நிலையத்தை செயல்பாட்டுக்கு கொண்டு வரவும் அரசுகள் நடவடிக்கை மேற்கொள்ள வேண்டும்.

சட்டக்கல்வி சாதனை

பி ளஸ் 2 முடித்த மாணவ,  மாணவிகள் அடுத்து என்ன படிக்கலாம் என்று ஆலோசிக்கும்போது 80  சதவீதத்துக்கும் மேல் சட்டக்கல்வி பட்டப்படிப்பையே தேர்வு செய்துள்ளார்கள்.  இளம் மாணவ, மாணவியர்களுக்கு சட்டத்தின் மீது திடீரென எப்படி வந்தது  பற்றுதல் என்று எண்ணிப்பார்த்தால், அன்றாட நிகழ்வுகள் முதல் அரசியல் வரை  அனைத்து உரிமைக்கும் நீதிமன்ற கதவை தட்ட வேண்டிய நிலை தற்போது நாட்டில்  நிகழ்கிறது. செய்தித்தாளை புரட்டினால் பெருமளவில் நீதிமன்ற செய்திகள்,  அதிரடி தீர்ப்புகள், வழிகாட்டுதல்கள், ஆலோசனைகள், அறிவுரைகள் என்று சட்டம்தான் கோலோச்சி வருகிறது. கிராமம் முதல் நகரம் வரை விதிமுறைகள்  வகுக்கப்பட்டு நடைமுறைப்படுத்தப்பட்டு வருகிறது. சொத்து வாங்குதல், சொத்து  விற்றல் ஆகியவற்றில் உள்ள சட்டசிக்கல், குற்றங்களுக்கான சட்டம், தண்டனை  உள்பட வாகனம் வாங்கினாலும், அதை சாலையில் பயன்படுத்தினாலும் சட்டம் அதில்  சம்பந்தப்பட்டிருக்கிறது. எனவே சாதாரண மனிதன் கூட சட்டத்தை  தெரிந்துவைத்துக்கொள்ள வேண்டிய அவசியம் ஏற்பட்டுள்ளது. இதை ஒரு பாடமாக  படித்து பட்டம் பெற்றால், சட்டம் தெரிந்து கொள்வது மட்டுமின்றி தொழிலாகவும்  மாறிவிடும் என்று மாணவ, மாணவிகள் எண்ணுகிறார்கள். மேலும், தங்கள் கண்  முன்பே நடக்கும் அநீதிகளை தட்டிக்கேட்கவும், நீதி பெறவும் சட்டத்துணையுடன்  போராட அவர்கள் துடிக்கிறார்கள். இதையடுத்து பிளஸ் 2 முடித்த மாணவர்கள்  தமிழகம் முழுவதும் உள்ள சட்டக்கல்லூரியை ஈக்களாய் மொய்த்து விண்ணப்பங்களை  பெற்று செல்கிறார்கள். சட்டக்கல்வியின் மீதான ஆர்வம் கடந்த 3 ஆண்டில்  மாணவர்களுக்கு 3 மடங்கு உயர்ந்துள்ளதாக தகவல்கள் தெரிவிக்கின்றன. சட்டக்கல்வியில்  5 ஆண்டு பட்டப்படிப்பும், 3 ஆண்டு எல்எல்பி படிப்பும் உள்ளது. பிளஸ் 2  முடித்து சட்டக்கல்லூரியில் சேரும் மாணவர்கள் 5 ஆண்டு படிக்க வேண்டும்.  ஏற்கனவே இளங்கலை, முதுகலை முடித்தவர்கள் 3 ஆண்டு படிப்பில் நேரடியாக  சேர்ந்துபடிக்கலாம். தமிழகத்தில் டாக்டர் அம்பேத்கர் சட்டப்பல்கலையின் கட்டுப்பாட்டில் உள்ள சட்டக்கல்லூரிகளில் விண்ணப்ப வினியோகம்  தொடங்கியுள்ளது. நேரடியாகவும், ஆன்லைன் மூலமாகவும் இதற்கு  விண்ணப்பிக்கலாம். கலந்தாய்வு மூலம் சேர்க்கை நடைபெற இருக்கிறது. இதே  போல் இன்ஜினியரிங் படிப்புக்கும் மவுசு குறையவில்லை. கடந்த 16 நாட்களில் 2  லட்சத்துக்கும் அதிகமானோர் ஆன்லைன் மூலம் விண்ணப்பித்துள்ளனர். ஜூன் 3ம்  தேதி ரேண்டம் எண் வெளியிட திட்டமிடப்பட்டுள்ளது. இதே போன்று கலை மற்றும்  அறிவியல் கல்லூரிகளிலும் மாணவர்கள் சேர்க்கை சுறுசுறுப்படைந்துள்ளது  குறிப்பிடத்தக்கது.

எல்லாமே லேட்

தமிழக அரசு, இந்த ஆண்டு பல்வேறு வகுப்புகளுக்கான பாடப் புத்தகங்களை மாற்றி உள்ளது. காலத்துக்கு ஏற்ப மாற வேண்டியது அவசியம். இவ்வளவு காலம் தாழ்த்தியாவது அரசு சுதாரித்ததே பெரிய விஷயம். சிபிஎஸ்இ பாடத்திட்டத்துக்கு இணையாக கல்வித்திட்டம் மாற்றி அமைக்கப்பட்டுள்ளதாக அரசு அதிகாரிகள் தெரிவிக்கின்றனர். எல்லாம் சரிதான்; பள்ளிகள் திறக்க இன்னும் 15 நாட்கள்தான் உள்ளன. ஆனால், இப்போதுதான் புத்தகமே விற்பனைக்கு வந்துள்ளதாக அரசு அறிவித்துள்ளது.புது புத்தகங்கள் வரும்போது, அதை எவ்வளவு விரைவாக கொண்டு வர வேண்டுமோ, அவ்வளவு விரைவாக கொண்டு வந்தால்தான் ஆசிரியர்களும், மாணவர்களும் அதற்கு தயாராக முடியும். அதேபோல், மாணவர்களுக்கு உதவும் வகையில், புத்தகங்களுக்கு தேவையான விடைப்புத்தகங்களையும் தனியார்கள் வெளியிட முடியும். ஆனால், 15 நாட்களுக்கு முன்பு புத்தகத்தை வெளியிட்டுவிட்டு, அதையும் எல்லா இடங்களிலும் கிடைக்கச் செய்யாமல் மிக குறிப்பிட்ட இடங்களில், அதுவும் பெரிய நகரங்களில் மட்டுமே கிடைக்கச் செய்வது பெரும் கேலிக்கூத்து. கேட்டால், பள்ளிகள் மூலமாகவே மாணவர்களுக்கு பாடப்புத்தகங்கள் விநியோகிக்க இருப்பதாக கூறப்படுவது, அதைவிட பெரிய கேலிக்கூத்து.ஏனெனில், பள்ளிகளிடம் கூட அதிகாரிகள் பாரபட்சம் காட்டுகின்றனர். பணக்கார பள்ளிகள் என்றால் உடனடியாக விநியோகம். சாதாரண பள்ளிகள் என்றால், எல்லாவற்றுக்கும் போக எஞ்சியிருந்தால் கிடைக்கும். அது மட்டுமின்றி, பணக்கார பள்ளிகளில் போதுமான அளவு பணத்தை தயாராக வைத்துக் கொண்டு, பில்லுக்கும், ‘மேற்படி’ பில்லுக்கும் கூட சேர்த்து கட்டிவிடுகின்றனர். ஏழை மாணவர்கள் படிக்கும் பள்ளிகளில் பள்ளிகள் திறந்து, பின்பு அவர்களிடம் பணத்தை வசூலித்துவிட்டு கட்டினால், புத்தகம் இல்லை என்ற பதில்தான் வரும்.ஆனால், மே மாத தொடக்கத்திலேயே புத்தகத்தை போதுமான அளவுக்கு அச்சடித்து வெளிக் கொண்டு வந்திருப்பதுடன், அனைத்து கடைகளிலும் அதை கிடைக்கச் செய்திருந்தால், மாணவர்களுக்கு கற்றுத்தரும் ஆர்வத்தில் இருக்கும் ஆசிரியர்கள், முன்கூட்டியே தங்கள் துறை புத்தகங்களை வாங்கி படித்து தயாராகி இருப்பார்கள். ஆர்வமுள்ள மாணவர்களும் புத்தகங்களை வாங்கி, தயாராகி இருப்பார்கள். இனியாவது உடனடியாக சுதாரித்துக் கொண்டு, அனைத்து மாவட்டங்களிலும் உள்ள சாதாரண கடைகளிலும் பள்ளி பாடப்புத்தகங்கள் கிடைக்கச் செய்ய நடவடிக்கை எடுக்க வேண்டும்.

கடமை தவறினால்...?

நா டு முழுவதும் சாலை விபத்து மற்றும் அதில் உயிரிழப்போர் எண்ணிக்கை  ஆண்டுதோறும் அதிகரிக்கிறது. சாலைவிபத்தில் சிக்குவோரை மீட்பது, சிகிச்சை அளிப்பது உள்ளிட்ட பணிகளுக்காக மத்திய அரசு ஆண்டுக்கு ரூ.3.8 லட்சம் கோடி செலவிடுகிறது. பிற மாநிலங்களைவிட, தமிழகத்தில் வாகனங்களின் எண்ணிக்கையும், விபத்துகளின் எண்ணிக்கையும் பல மடங்கு அதிகரித்து  வருகிறது. தமிழகத்தில் கடந்த 2017ம் ஆண்டில் 9,231 சாலைவிபத்துகள் நடந்துள்ளன. இதில், 9,881 பேர் உயிரிழந்துள்ளனர். 2018ம் ஆண்டில் ஜனவரி முதல் ஜூலை வரை ஏழு மாதத்தில் 6,996 சாலை விபத்துகள் நடந்துள்ளன. இதில், 7,526 பேர் உயிரிழந்துள்ளனர். ஜூலை மாதத்திற்கு பிறகு அரசு சார்பில் அதிகாரப்பூர்வ புள்ளிவிவரம் வெளியிடப்படவில்லை.  இந்தியா முழுவதும் நடக்கும் சாலைவிபத்துகளில் தமிழகத்தின் பங்கு 14.9 சதவீதமாக உள்ளது. உயிரிழப்பில் 11.4 சதவீதமாக உள்ளது. அதிவேகம், அதிக பாரம், செல்போன் பேசியபடி வாகனம் இயக்குதல், மது அருந்திவிட்டு வாகனம் இயக்குதல், 18 வயதிற்கும் குறைவானவர்கள் வாகனங்களை இயக்குதல், சாலை பராமரிப்பின்மை உள்ளிட்ட பல்வேறு காரணங்களால், சாலைவிபத்தில் உயிரிழப்பு அதிகரிக்கிறது. 80  சதவீத சாலை விபத்துகளுக்கு ஓட்டுனர்களின் கவனக்குறைவே முக்கிய காரணம் என தெரியவந்துள்ளது. போக்குவரத்து விதிமீறலில் ஈடுபடுவோருக்கு கடுமையான தண்டனை வழங்குதல், சாலைகளை முறையாக பராமரித்தல் ஆகியவற்றால் மட்டுமே சாலை விபத்துகளை குறைக்க முடியும். சாலைபாதுகாப்பு என்பதை ஒவ்வொரு தனி மனிதரும் ஒழுக்க நெறியாக பின்பற்றினால் விபத்துகளும், உயிரிழப்புகளும் பெருமளவு குறையும். கோவை  மேட்டுப்பாளையம் அருகே கடந்த 2010ம் ஆண்டு சாலைவிபத்தில் காயம் அடைந்த  கணேசன், ரகு ஆகியோர் தலா ரூ.10 லட்சம் இழப்பீடு ெதாகை கேட்டு, மாவட்ட  நீதிமன்றத்தில் வழக்கு ெதாடர்ந்தனர். முறையே ரூ.1.17 லட்சம் மற்றும்  ரூ.87,750 இழப்பீடு வழங்க நீதிமன்றம் உத்தரவிட்டது. ‘‘இது போதாது, தலா ரூ.10  லட்சம் இழப்பீடு வழங்க உத்தரவிடவேண்டும்’’’’ எனக்கூறி இருவரும் சென்னை  ஐகோர்ட்டில் மேல்முறையீடு ெசய்தனர். ஆனால், இம்மனுவை ஐகோர்ட் தள்ளுபடி  செய்துவிட்டது. காரணம், போக்குவரத்து விதிகளை மீறி கணேசன், ரகு  உள்பட 4 பேர் ஒரே பைக்கில் பயணித்துள்ளனர். இதன்காரணமாகவே விபத்து  நடந்துள்ளது. அதனால், இழப்பீட்டு தொகைைய உயர்த்தி வழங்க உத்தரவிட முடியாது  என சென்னை ஐகோர்ட் அதிரடியாக உத்தரவிட்டது. போக்குவரத்து விதிமீறல்  இல்லாமல் பயணித்திருந்தால், இழப்பீட்டு ெதாகை நிச்சயம் அதிகமாக  கிடைத்திருக்கும். போக்குவரத்து விதிகளை முறையாக கடைபிடிப்பது வாகன  ஓட்டிகளின் கடமை. சாலைகளை முறையாக பராமரிப்பது தமிழக அரசின் கடமை. கடமை  தவறினால் எல்லாம் வீண்.

கவலைப்படாத அரசு

‘நீரின்றி அமையாது உலகு’ என்கிறார் வள்ளுவர். உண்மைதான். உலகின் அனைத்து ஜீவராசிகளுக்கும் அது அவசியம், தமிழகத்தை பொறுத்தவரை தற்போது பெருநகரம் துவங்கி குக்கிராமம் வரை வேறுபாடின்றி மிரட்டக் கூடிய ஒரே பிரச்னை தண்ணீர். குடிக்க, குளிக்கக்கூட போதிய தண்ணீர் கிடைக்காமல் கண்ணீர் விடுபவர்கள், அவதிப்படுபவர்கள் இந்தியாவில் பல கோடி பேர் என்கின்றனர். அதுவும் கோடைக்காலத்தில் கேட்கவே வேண்டாம்.நம் நாடு விவசாயத்தை அடிப்படையாக கொண்டது. விவசாயம் செழிப்பதற்காகத்தான் ஆறுகள், கண்மாய்கள், கிணறுகள் உருவாக்கப்பட்டன. இவற்றை சரிவர தூர்வாராததால் நிலத்தடி நீர்மட்டம் அதலபாதாளத்துக்கு சென்றுவிட்டது. 50 அடியில் தண்ணீர் வந்த காலம் மலையேறி, தற்போது ஆயிரம் அடிக்கு போர்வெல் இறக்கிக் கொண்டிருக்கிறார்கள்.தண்ணீர் பிரச்னையால் விவசாயத்தை கைவிட வேண்டிய நிலைக்கு விவசாயிகள் தள்ளப்படுகின்றனர். டிஜிட்டல் உலகத்தில் உணவு உள்ளிட்ட சில பொருட்கள் மாத்திரை வடிவில் கொண்டு வரப்பட்டுள்ளது. ஆனால், தண்ணீரை அப்படி மாற்ற முடியாது. இன்று குடிநீர் ஒரு குடம் ₹10, 15க்கு விலை கொடுத்து வாங்கிக் குடிக்க வேண்டிய நெருக்கடியில் மக்கள் தவிக்கின்றனர். இயற்கை வளம்  கொட்டிக்கிடந்தும் தண்ணீருக்காக மக்கள் தவம் கிடக்கும் அவல நிலை ஏன்? காடுகளை, நிலங்களை, சாலையோர மரங்களை சாலை மற்றும் நகர் விரிவாக்கம் என்ற பெயரில் அழித்து விட்டோம். இயற்கையாக கிடைத்த தண்ணீர் என்றைக்கு வியாபாரமாக மாறியதோ, அன்றைக்கே தண்ணீர் தட்டுப்பாடு தலைவிரித்தாட துவங்கி விட்டது. நிலத்தடி நீர்மட்டத்தை உயர்த்த தமிழக அரசு எந்தவித முயற்சிகளும் மேற்கொள்ளவில்லை.மழை நீரை தடுப்பணைகள் கட்டி சேகரிக்க வேண்டும். வைகை அணை நீர்த்தேக்க பகுதிகளில் பல அடிக்கு மண் மேவிக் கிடக்கிறது. இங்கு தூர்வாரினாலே கூடுதல் நீர் சேர்க்கலாம். வாழ்வாதார பிரச்னை என்பதால் இனியாவது அரசு அதிக முக்கியத்துவம் கொடுத்து தண்ணீர் பிரச்னையில் கூடுதல் அக்கறை காட்ட வேண்டும். மழை நீர் சேகரிப்பு திட்டத்தை முழுவீச்சில் செயல்படுத்த வேண்டும். இல்லாவிடில், 2050ம் ஆண்டில் பூமியில் தண்ணீர் கிடைக்குமா? அப்படி கிடைத்தாலும் தங்கத்துக்கு நிகராக தண்ணீர் விலை ஏறினால், ஏழை, நடுத்தர மக்களால் வாங்க முடியுமா? வாழ முடியுமா? இப்படி பல கேள்விகள் நம் முன் எழும்பி மிரட்டுகின்றன.நகரம் முதல் கிராமம் வரை தண்ணீரை சேமிக்கும் முறைகள் குறித்து எளிமையான புதிய திட்டங்களை அரசு கொண்டு வரவேண்டும். இல்லையென்றால், பெட்ரோல், டீசலை வெளிநாடுகளில் இருந்து வாங்குவது போல, தண்ணீரையும் வெளிநாடுகளில் இருந்து வாங்க வேண்டிய நிலை வந்து விடும். இன்னும் சில ஆண்டுகளில் விலை உயர்ந்த உணவு பட்டியலில் முதல் இடத்தில் தண்ணீர் இருக்கும் வாய்ப்புகள் உள்ளதாக ஆய்வுகள் தெரிவிக்கின்றன. அடிகுழாயில் இரவு, பகலாக காத்திருப்பு, பல கிமீ தூரம் குடங்களுடன் நடந்து செல்வது... என்று இடத்துக்கு இடம் தண்ணீருக்காக மக்களின் பரிதவிப்பு தொடர்கிறது. மக்களின் இன்னல்களை புரிந்து கொண்டு தண்ணீர் பிரச்னைக்கான நிரந்தர தீர்வு காண வேண்டிய கடமை அரசுக்கு உள்ளது.

மீண்டும் திணிப்பா?

மக்களவை தேர்தல் முடிந்த நிலையில் மீண்டும் விவாத பொருளாக மாறியிருக்கிறது ஹைட்ரோ கார்பன் திட்டம். பூமிக்கடியில் புதைந்திருக்கும் ஹைட்ரோ கார்பன் நாடு முழுவதும் 31 இடங்களில் கண்டறியப்பட்ட நிலையில், தமிழகத்தின் நெடுவாசலும் அதில் ஒன்றாகும். கடந்த 12 ஆண்டுகளுக்கு முன்னரே நெடுவாசலில் இதற்கான ஆய்வு பணிகள் நடந்தன. பின்னர் நெடுவாசலில் தமிழகத்தையே ஈர்க்கும் வகையில் போராட்டங்களும் நடந்தன.தமிழகத்தில் காவிரி படுகைகள் ஆண்டாண்டு காலமாக நெல் சாகுபடிக்கு பெயர்போனது. இப்போது மத்திய, மாநில அரசுகள் விவசாய நிலங்களை ஹைட்ரோ கார்பன் திட்டம் என்ற பெயரில் தனியார் நிறுவனங்களுக்கு காவு கொடுக்க நினைக்கின்றன. விழுப்புரம், புதுவையில் இத்திட்டத்திற்கு வேதாந்தா மற்றும் ஓஎன்ஜிசி நிறுவனங்களுக்கு மத்திய அரசு அனுமதி கடிதமும் அளித்துவிட்டது. இதற்கான கிணறுகள் திருவாரூர், நாகப்பட்டினம், கடலூர் உள்ளிட்ட மாவட்டங்களில் பல இடங்களில் அமைக்கப்பட உள்ளது.கர்நாடகாவில் வெள்ளமே வந்தாலும், காவிரி ஆற்றில் அது கடைமடை பகுதிகளுக்கு வந்து சேருவதில்லை. தமிழக ஆட்சியாளர்களின் நீர்மேலாண்மையும் அத்தகைய அவலட்சணத்தில்தான் உள்ளது. காவிரி டெல்டா பாசன பகுதியில் விவசாயம் மெல்ல மெல்ல பொய்க்கும் நிலையில், அதற்கு துணைபோகும் ஆட்சியாளர்கள் அங்குள்ள பெரும்பாலான நிலங்களை ஹைட்ரோ கார்பன் திட்டத்திற்கு தாரைவார்க்க நினைக்கின்றனர். தமிழகத்தை பொறுத்தவரை நிலவளம் மற்றும் நீர்வளம் பாதிக்கும் மரபு சாரா திட்டங்களுக்கு கடந்த 2015ம் ஆண்டில் நிரந்தர தடை அமல்படுத்தப்பட்டுள்ளது. ஆனால்  தமிழக ஆட்சியாளர்கள் ஹைட்ரோ கார்பன் திட்டத்திற்கு வழக்கம்போல் மத்திய அரசுக்கு தலையாட்ட தொடங்கியுள்ளனர். இதற்கு அதிமுக கூட்டணி கட்சிகளும் சம்மதம் தெரிவித்திருப்பதாக கூறப்படுகிறது.இத்திட்டத்தின் கீழ் பூமிக்கடியில் 6 ஆயிரம் அடிக்கு ஆழ்துளையிட்டு ஹைட்ரோ கார்பன் எடுக்கப்பட உள்ளது. இதன் காரணமாக பூமிக்கடியில் கடல் நீர் புகும் வாய்ப்புகள் அதிகம். தமிழகத்தில் லட்சக்கணக்கான ஏக்கர் நிலங்கள் உப்பு நிலங்களாக மாறிவிடும். கடலூர் உள்ளிட்ட மாவட்டங்களில் ஏற்கனவே தண்ணீர் உப்பாக மாறிவரும் நிலையில், இத்திட்டம் அமலுக்கு வந்தால் விவசாய நிலங்கள் நிச்சயம் பாழ்பட்டு போகும். திருவாரூர், நாகப்பட்டினம் மாவட்டங்களில் டைட் காஸ் எனப்படும் மரபு சாரா எண்ணெய் எடுக்கவும் அனுமதி அளிக்கப்பட்டுள்ளது. இத்திட்டங்களுக்கு பொதுமக்கள் தொடக்கம் முதலே எதிர்ப்பு தெரிவித்து வந்தாலும், அவையெல்லாம் செவிடன் காதில் ஊதிய சங்காகவே ஒலிக்கிறது. கூடங்குளத்தில் அணுமின் நிலையங்கள், தேனியில் நியூட்ரினோ திட்டம், தூத்துக்குடியில் ஸ்டெர்லைட் என பல திட்டங்களுக்கான எதிர்ப்புகளை தமிழக அரசு காதில் வாங்கி கொண்டதாகவே தெரியவில்லை. பொதுமக்களின் எதிர்ப்புகளை தொடர்ந்து பொருட்படுத்தாத அரசுகள், அதற்குரிய பலனை விரைவில் எதிர்கொள்ள வேண்டியது வரும்.

தேவை நேர்மை

தமிழகத்தில் மக்களவை தேர்தலும் சட்டசபைக்கு 18 தொகுதிகளில் இடைத்தேர்தலும் கடந்த மாதம் 18ம் தேதி நடந்து முடிந்துவிட்டாலும் பரபரப்புக்கும், சர்ச்சைக்கும் குறைவு இல்லாமல் இருக்கிறது. தேர்தலில் பதிவான வாக்குகளுடன் வாக்குப்பதிவு இயந்திரங்கள்  அனைத்தும் 45 மையங்களில் 4 அடுக்கு பாதுகாப்புடன் வைக்கப்பட்டுள்ளது. வரும் 19ம் தேதி ஓட்டப்பிடாரம், அரவக்குறிச்சி, சூலூர், திருப்பரங்குன்றம் ஆகிய 4 சட்டசபை தொகுதிகளுக்கான இடைத்தேர்தல் மற்றும் 13 ஓட்டுச்சாவடிகளில் மறுவாக்குப்பதிவும் நடைபெறுகிறது. இந்த தேர்தலில் பதிவான வாக்குப்பதிவு இயந்திரங்களும் பாதுகாப்பாக வைக்கப்பட்டு, இந்த மாதம் 23ம் தேதி காலை 8 மணிக்கு வாக்குகள் எண்ணப்படும். வாக்குப் பதிவு இயந்திரங்கள் அனைத்தும் சீல் வைக்கப்பட்டுள்ள அறைகளில் பாதுகாப்பாக வைக்கப்பட்டு இருந்தாலும், அதையும் மீறி மதுரை தொகுதியில் பதிவான வாக்குப்பெட்டிகள் வைக்கப்பட்டுள்ள அறைக்குள் பெண்  அதிகாரி ஒருவர் நுழைந்து அங்குள்ள ஆவணங்களை நகல் எடுத்த சம்பவம் சர்ச்சையை ஏற்படுத்தியது. அடுத்து, கரூர் தொகுதியில் பாதுகாப்பு குறைபாடுகள் இருப்பதாக ஒரு வேட்பாளர் புகார் அளித்துள்ளார். இதுதவிர, கடந்த  சில தினங்களுக்கு முன் தேனி தொகுதியில் 50 வாக்குப் பதிவு  இயந்திரங்களை கொண்டு வந்தது பெரும் சர்ச்சையை ஏற்படுத்தியது. இந்த சர்ச்சை குறித்து தமிழக தலைமை தேர்தல் அதிகாரி அளித்த விளக்கத்தில், “46 வாக்குச்சாவடிகளில் மாதிரி வாக்குகளை அழிக்காததால் மறுவாக்குப்பதிவு நடத்த வாய்ப்பு உள்ளதால் 50 வாக்குப்பதிவு இயந்திரங்கள் கோவையில் இருந்து தேனிக்கு கொண்டு  வந்ததாக கூறினார். ஆனால், தேர்தல் ஆணையம் 13 வாக்குச்சாவடிகளில் மட்டும் மறுவாக்குப்பதிவு நடத்த அறிவிப்பு வெளியிட்டது. இதுபோன்ற குளறுபடிகளால், வாக்கு எண்ணிக்கை வரை தமிழகத்துக்கு சிறப்பு தேர்தல்  அதிகாரி ஒருவரை நியமிக்க வேண்டும் என்று திமுக தலைவர் மு.க.ஸ்டாலின் இந்திய தலைமை தேர்தல் ஆணையருக்கு கோரிக்கை வைத்தார்.இதைத் தொடர்ந்து மற்ற எதிர்க்கட்சி தலைவர்களும், தமிழகத்தில் வாக்கு எண்ணிக்கையாவது குளறுபடி இல்லாமல் நடைபெறுமா? என்ற சந்தேகத்தை எழுப்பினர். ஆனால் ஆளுங்கட்சி சார்பில், தேர்தல் ஆணையத்தின்  தற்போதைய நடவடிக்கைகள் அனைத்துக்கும் ஆதரவு அளித்து வருகிறது. இது சந்தேகத்தை மேலும் அதிகரித்துள்ளது.இந்த பரபரப்பான சூழ்நிலையில், தமிழகத்தில் வாக்கு எண்ணிக்கை அன்று கூடுதல் பாதுகாப்புக்கு ஏற்பாடு செய்யப்பட்டுள்ளதாகவும், இதற்காக கூடுதல் துணை ராணுவ வீரர்கள் அழைக்கப்பட்டுள்ளதாகவும் தலைமை தேர்தல் அதிகாரி கூறியுள்ளார். தமிழகத்தில் வரும் 19ம் தேதி 4 சட்டசபை தொகுதிகளிலும் 13 வாக்குச்சாவடிகளில் மறுவாக்குப்பதிவும் நடைபெற உள்ளது. இதற்காக கூடுதல் பாதுகாப்பு ஏற்பாடுகள் செய்யப்பட்டுள்ளன. அதேபோல், 23ம் தேதி நடைபெறும் வாக்கு எண்ணிக்கையின்போதும் அசம்பாவிதங்கள் நடக்காமலும் சர்ச்சைக்குரிய  விவகாரங்கள் நடக்காமல் தடுக்கவும் முன்னெச்சரிக்கை நடவடிக்கையாக துணை ராணுவம் வரவழைக்கப்பட்டு உள்ளதாகவும் தேர்தல் ஆணையம் விளக்கம் அளித்துள்ளது. எல்லாம் சரிதான், வாக்கு எண்ணிக்கை அமைதியாகவும்,  சர்ச்சைக்கு இடமளிக்காத வகையிலும், நேர்மையாகவும் நடந்து முடிவுகள் அறிவிக்க வேண்டும் என்பதே ஜனநாயகத்தின் மீது நம்பிக்கை வைத்துள்ளவர்களின் எதிர்பார்ப்பாக உள்ளது.

இதிலுமா கொள்ளை?

தமிழகம் முழுவதும் கத்திரிக்கு முன்பேவெயிலின் சுமையில் சிக்கிக்கொண்ட மக்கள், தற்போது கடும் குடிநீர் பஞ்சத்தில் திக்குமுக்காடிப்போய்வுள்ளனர். மக்களவை, தேர்தல், இடைத்தேர்தல் என்று மக்கள் பிரதிநிதிகள் பிரசாரத்தில் மும்முரமாக இருக்கின்றனர். குடிநீர் வினியோகம் குறித்து குடிநீர் வாரியமோ, அரசோ கவனம் கொள்ளாத நிலையில் தனியார் குடிநீர் டேங்கர் லாரிகள் மக்களின் பஞ்சத்தை தங்களுக்கு சாதகமாக மாற்றி கொள்ளை லாபம் பார்த்து வருகிறார்கள். இதை அரசோ, அதிகாரிகளோ கண்டுகொள்ளவில்லை என்பது மக்களின் குற்றச்சாட்டாக உள்ளது. சென்னையில் தினமும் 850 மில்லியன் லிட்டர் குடிநீர் தேவைப்படுகிறது. ஆனால் மெட்ரோ குடிநீர் நிர்வாகத்தால் 550 மில்லியன் லிட்டர் மட்டுமே வினியோகிக்க முடிகிறது. இதனால் பல பகுதிகளில் மக்கள் காலி குடங்களுடன் தெருத்தெருவாக அலையவேண்டிய நிலை ஏற்பட்டுள்ளது. இரவு, பகல் பாராமல் மூன்று சக்கர சைக்கிளில் காலி குடங்களை வைத்துக்கொண்டு வெகு தூரம் பயணித்து தண்ணீரை சேகரித்து வரும் அவல நிலைக்கு மக்கள் தள்ளப்பட்டுள்ளனர். சென்ைனயில் குடிநீர் வினியோகத்தை தனியார் நிறுவன ேடங்கர் லாரிகள் மூலம் குடிநீர் வாரியம் செய்துவருகிறது. ஆனால் தனியார் டேங்கர்கள் குடிநீர் தட்டுப்பாட்டை தங்களுக்கு சாதகமாக பயன்படுத்தி கொண்டு பகல்கொள்ளையில் ஈடுபட்டுள்ளது. ஏற்கனவே பல பகுதிகளில் மக்கள் தங்கள் சக்திக்கு மீறி குடிநீர் கேன்களை 30 முதல் 50 வரை விலை கொடுத்து வாங்கி குடிக்கவும், சமைக்கவும் பயன்படுத்தி வரும் நிலையில், ஏழைகள் வசிக்கும் குடிசை பகுதிகளில் குடிநீர் வினியோகம் செய்ய வேண்டிய டேங்கர் லாரிகள் ‘ஓட்டல், கட்டுமான நிறுவனம் உள்ளிட்ட பெரிய நிறுவனங்களுக்கு ‘பிளாக்கில் தண்ணீரை விற்பனை செய்து அவர்களிடம் இருந்து கொள்ளை லாபம் பார்த்துவிடுகிறார்கள்’. இவர்களை கண்காணிக்கவோ, தட்டிக்கேட்கவோ யாரும் இல்லாத நிலையில் குடிநீர் டேங்கர்களை எதிர்பார்த்து ஏமாந்து போகும் மக்கள் காலி குடங்களுடன் பல நாட்கள் காத்துக்கிடக்க வேண்டிய நிலை ஏற்பட்டுள்ளது. இப்படி மக்கள் அவதிப்படும் நிலையில், குடிநீர் வினியோகம் செய்யும் தனியார் ஒப்பந்ததாரர்கள் தங்கள் பொறுப்புணர்ந்து நடந்து கொள்ளாமல் சுயநலத்துடன் பணம் சம்பாதிக்கும் நோக்கத்தில் செயல்படுவது கண்டனத்துக்குரியது. குடிநீர் வாரியம் மற்றும் அதிகாரிகள் இந்த விவகாரத்தில் உடனே தலையிட்டு, எந்தெந்த பகுதிக்கு எத்தனை டேங்கர் லாரிகளில் குடிநீர் வினியோகம் செய்யப்பட்டது. அந்தந்த பகுதிகளில் குடிநீர் சரியாக சென்றடைந்ததா என்று கண்காணிக்க வேண்டும். பெரிய நிறுவனங்களிடம் அதிக பணம் வாங்கி கொண்டு குடிநீரை அப்படி விற்றுவிடும் டேங்கர் லாரி வினியோகஸ்தர்கள் மீது கடும் நடவடிக்கை எடுக்க வேண்டும் என்று பொதுமக்கள் ஆதங்கத்துடன் தெரிவிக்கின்றனர்.

அங்கேயும் தகிப்பு

இறந்த தலைவர்களை பற்றி யாரும் விமர்சனம் செய்வது இல்லை. அந்த விதியை மீறி, முன்னாள் பிரதமர் ராஜிவ் மீது திடீரென ஊழல்வாதி என்று விமர்சித்துள்ளார் பிரதமர் மோடி. அதுவும் ரபேல் போர் விமான ஒப்பந்த பேரத்தில் தர்க்கரீதியாக பல்வேறு குற்றச்சாட்டுகளை காங்கிரஸ் சுமத்தியபோதெல்லாம், பதில் சொல்ல முடியாமல் அமைதிக் காத்த மோடி, மக்களவை தேர்தலில் 5 கட்டங்கள் முடிந்துவிட்ட நிலையில், திடீரென ராஜிவை வம்புக்கு இழுத்துள்ளார்.போபர்ஸ் பீரங்கி பேரத்தில், ராஜிவ் மீது எந்த குற்றச்சாட்டும் சுமத்தப்படவில்லை. அவர் ஊழல் செய்ததாக எந்த ஆதாரமும் இல்லை. போபர்ஸ் பீரங்கி பேரத்தில் ஊழல் நடந்ததாக எதிர்க்கட்சிகள் சுமத்திய குற்றச்சாட்டுக்கு பின்னர் நடந்த தேர்தலிலும் கூட இப்பிரச்னை எதிரொலிக்கவில்லை. ஆனால், 5 கட்ட தேர்தல் முடிந்த பின்னர் திடீரென மோடிக்கு, போபர்ஸ் ஞாபகம் வந்ததுதான் ஏனென்னு தெரியவில்லை.அடுத்ததாக ஐ.என்.எஸ். விராத் போர்க் கப்பலை தங்களுடைய சுற்றுலா வாகனமாக ராஜிவ் குடும்பத்தினர் பயன்படுத்தினர் என்று அவர் இறந்து 28 ஆண்டுகளுக்கு பிறகு மோடி குற்றச்சாட்டை சுமத்துகிறார். இறந்த ஒரு இளந்தலைவர் மீது, அவர் வாழ்ந்த காலத்திலேயே எடுபடாத ஒரு குற்றச்சாட்டை மோடி முன்வைத்தார். ஆனால், அது எதிர்பார்த்த அளவுக்கு வெடிக்காமல், மழையில் நனைந்த பட்டாசாகவே, இப்போது ஐ.என்.எஸ்.விராத்தை இழுத்துள்ளார். இந்த குற்றச்சாட்டும் கூட ராஜிவ் வாழ்ந்த காலத்திலேயே கூறப்படாத ஒரு குற்றச்சாட்டு. ‘நான் ஆட்சிக்கு வந்த பின்னர்தான் பொருளாதாரம் நிமிர்ந்தது, கருப்பு பணம் வளைந்தது, ஜிஎஸ்டி உயர்ந்தது’ என்று பேசிய மோடி, அதைப்பற்றி ஏன் கூட்டங்களில் வாய் திறக்காமல் சவுகரியமாக குர்தா பாக்கெட்டில் ஒளித்து வைப்பது ஏன் என்று கேட்கின்றனர் காங்கிரசார். விமானப்படை விமானங்களிலேயே, பறந்து, பறந்து போகும் மோடி, விமானப்படையை தன் டாக்சியாக பயன்படுத்தினார் என்று சொல்லலாமா என்றும் கேட்கின்றனர் காங்கிரசார். இந்த குற்றச்சாட்டுகளை அனைத்தையும் ராகுலை வெறுப்பேற்றி, அவர் தன்னை திட்ட வேண்டும், அதன் மூலம் மக்களிடம் அனுதாபத்தை பெற வேண்டும் என்று மோடி நினைப்பதாகவும் அக்கட்சியினர் கூறுகின்றனர்.மோடியின் குற்றச்சாட்டுகள் எல்லாவற்றுக்கும் ராகுல் அளித்த பதில், ‘எல்லாம் முடிந்துவிட்டது மோடிஜி. உங்கள் கர்மா காத்திருக்கிறது’ என்பதுதான்.

அலட்சியத்தின் உச்சம்

மதுரை அண்ணா பஸ் நிலையம் அருகே உள்ள அரசு பொது மருத்துவமனையில் விபத்துக்கான அவசர சிகிச்சைப் பிரிவு இயங்குகிறது. இங்கு வென்டிலேட்டர் வசதியுடன் 15 படுக்கைகள் உள்ளன. நேற்றுமுன்தினம் (மே 7) மாலை பலத்த காற்றுடன் பெய்த மழையால் நகரின் பல பகுதிகளில் சுமார் 2 மணிநேரம் மின்தடை ஏற்பட்டது.இந்த திடீர் மின்தடையால் மருத்துவமனை அவசர சிகிச்சைப் பிரிவில் இருந்த வென்டிலேட்டர்கள் இயங்கவில்லை. அங்கு சிகிச்சையில் இருந்த 15 நோயாளிகளுக்கும் ஆக்சிஜன் பற்றாக்குறையால் மூச்சுத் திணறல் ஏற்பட்டது. இதில், மதுரை மாவட்டம் மேலூரைச் சேர்ந்த மல்லிகா (55), திண்டுக்கல் மாவட்டம், ஒட்டன்சத்திரத்தை சேர்ந்த பழனியம்மாள் (60), விருதுநகர் மாவட்டம், திருவில்லிபுத்தூரை சேர்ந்த ரவீந்திரன் (52) ஆகிய 3 பேர் மூச்சுத்திணறி பரிதாபமாக உயிரிழந்தனர்.இந்தச் சம்பவம் தமிழகம் முழுவதும் பெரும் அதிர்வலைகளை ஏற்படுத்தியிருக்கிறது. நடந்த சம்பவம் குறித்த விசாரணைக்கு தமிழக அரசு உத்தரவிட்டிருக்கிறது. விசாரணைகளாலோ, விசாரணை முடிவுகளாலோ நடந்த துயரத்தை ஒருபோதும் ஈடுசெய்ய இயலாது. ஆபத்தான நிலையில், அவசரச் சிகிச்சையில் இருக்கிற ஒரு நோயாளிக்கு, உயிர் காக்கும் பணியைச் செய்பவையே வென்டிலேட்டர் எனப்படுகிற செயற்கை சுவாசக் கருவிகள். ஆக்சிஜன் இல்லாமல் உடல் உறுப்புகள் ஓரிரு வினாடிகள் கூட இயங்குவது சிரமம். உடல் இயங்கத் தேவையான ஆக்சிஜனை பிரித்தெடுத்து வழங்குவது நுரையீரலின் முக்கியப் பணி. உடல்நலம் கடுமையாக பாதிக்கப்பட்ட நோயாளிகளுக்கு, நுரையீரல் செய்கிற வேலையை வென்டிலேட்டர் கருவி செய்கிறது.உயிர்காக்கும் சிகிச்சை தரப்படுகிற அவசர சிகிச்சைப் பிரிவை எவ்வளவு கவனமாக பராமரித்திருக்க வேண்டும்? கண்காணித்திருக்க வேண்டும்? மின்தடை ஏற்படுகிற சூழல் ஏற்பட்டாலும், வென்டிலேட்டர் கருவிகள் தொடர்ந்து தடையின்றி இயங்கும் வகையில் சிறப்பு முன்னேற்பாடுகள் செய்திருக்கவேண்டும்? தென்மாவட்டங்களின் மிகப்பெரிய மதுரை அரசு மருத்துவமனையிலேயே இந்த நிலைமை என்றால்... இன்னும் சிறிய நகரங்கள், குக்கிராமங்களில் இருக்கிற அரசு மருத்துவமனைகள், ஆரம்ப சுகாதார நிலையங்களின் கதி? மக்களின் உடல்நலம் மீது அரசு காட்டுகிற அலட்சியத்தின் உச்சத்தை நமது அரசு மருத்துவமனைகளும், ஆரம்ப சுகாதார நிலையங்களும் முகத்திலறைவது போல அடிக்கடி சுட்டிக் காட்டிக் கொண்டிருக்கின்றன. உள்ளம் நிறைய கனவுகளுடன், தலைப் பிரசவத்துக்காக சிகிச்சைக்கு வந்த இளம்பெண், எச்ஐவி நோயாளியாகித் திரும்பிய சோகமும் அரசு மருத்துமனையில் தானே நடந்தது? பிரவச வார்டுகளில் பிஞ்சுக் குழந்தைகள் திருடப்படுகிற சம்பவங்களும் இங்கு தானே தொடர்கிறது?அடித்தட்டு மக்கள்தானே... என்கிற அரசின், அரசு அதிகாரிகளின் அலட்சியப்போக்கு, நாளொரு துயர சம்பவமாக நமது  மருத்துவமனை வார்டுகளுக்குள் புதிது புதிதாக பதிவாகிக் கொண்டிருக்கிறது. ஆனாலும் மக்கள் நம்பிக்ைக இழந்து விடவில்லை. கலப்படமற்ற நம்பிக்கையுடன் இன்னமும், அரசு மருத்துவமனைகளின் அழுக்கு வார்டுகளுக்குள் அப்பாவி மக்கள் நிறைந்து கிடக்கிறார்கள். அவர்கள் வைத்துள்ள நம்பிக்கையை இனியாவது பாதுகாக்குமா அரசு?

அலட்சியத்தின் உச்சம்

மதுரை அண்ணா பஸ் நிலையம் அருகே உள்ள அரசு பொது மருத்துவமனையில் விபத்துக்கான அவசர சிகிச்சைப் பிரிவு இயங்குகிறது. இங்கு வென்டிலேட்டர் வசதியுடன் 15 படுக்கைகள் உள்ளன. நேற்றுமுன்தினம் (மே 7) மாலை பலத்த காற்றுடன் பெய்த மழையால் நகரின் பல பகுதிகளில் சுமார் 2 மணிநேரம் மின்தடை ஏற்பட்டது.இந்த திடீர் மின்தடையால் மருத்துவமனை அவசர சிகிச்சைப் பிரிவில் இருந்த வென்டிலேட்டர்கள் இயங்கவில்லை. அங்கு சிகிச்சையில் இருந்த 15 நோயாளிகளுக்கும் ஆக்சிஜன் பற்றாக்குறையால் மூச்சுத் திணறல் ஏற்பட்டது. இதில், மதுரை மாவட்டம் மேலூரைச் சேர்ந்த மல்லிகா (55), திண்டுக்கல் மாவட்டம், ஒட்டன்சத்திரத்தை சேர்ந்த பழனியம்மாள் (60), விருதுநகர் மாவட்டம், திருவில்லிபுத்தூரை சேர்ந்த ரவீந்திரன் (52) ஆகிய 3 பேர் மூச்சுத்திணறி பரிதாபமாக உயிரிழந்தனர்.இந்தச் சம்பவம் தமிழகம் முழுவதும் பெரும் அதிர்வலைகளை ஏற்படுத்தியிருக்கிறது. நடந்த சம்பவம் குறித்த விசாரணைக்கு தமிழக அரசு உத்தரவிட்டிருக்கிறது. விசாரணைகளாலோ, விசாரணை முடிவுகளாலோ நடந்த துயரத்தை ஒருபோதும் ஈடுசெய்ய இயலாது. ஆபத்தான நிலையில், அவசரச் சிகிச்சையில் இருக்கிற ஒரு நோயாளிக்கு, உயிர் காக்கும் பணியைச் செய்பவையே வென்டிலேட்டர் எனப்படுகிற செயற்கை சுவாசக் கருவிகள். ஆக்சிஜன் இல்லாமல் உடல் உறுப்புகள் ஓரிரு வினாடிகள் கூட இயங்குவது சிரமம். உடல் இயங்கத் தேவையான ஆக்சிஜனை பிரித்தெடுத்து வழங்குவது நுரையீரலின் முக்கியப் பணி. உடல்நலம் கடுமையாக பாதிக்கப்பட்ட நோயாளிகளுக்கு, நுரையீரல் செய்கிற வேலையை வென்டிலேட்டர் கருவி செய்கிறது.உயிர்காக்கும் சிகிச்சை தரப்படுகிற அவசர சிகிச்சைப் பிரிவை எவ்வளவு கவனமாக பராமரித்திருக்க வேண்டும்? கண்காணித்திருக்க வேண்டும்? மின்தடை ஏற்படுகிற சூழல் ஏற்பட்டாலும், வென்டிலேட்டர் கருவிகள் தொடர்ந்து தடையின்றி இயங்கும் வகையில் சிறப்பு முன்னேற்பாடுகள் செய்திருக்கவேண்டும்? தென்மாவட்டங்களின் மிகப்பெரிய மதுரை அரசு மருத்துவமனையிலேயே இந்த நிலைமை என்றால்... இன்னும் சிறிய நகரங்கள், குக்கிராமங்களில் இருக்கிற அரசு மருத்துவமனைகள், ஆரம்ப சுகாதார நிலையங்களின் கதி? மக்களின் உடல்நலம் மீது அரசு காட்டுகிற அலட்சியத்தின் உச்சத்தை நமது அரசு மருத்துவமனைகளும், ஆரம்ப சுகாதார நிலையங்களும் முகத்திலறைவது போல அடிக்கடி சுட்டிக் காட்டிக் கொண்டிருக்கின்றன. உள்ளம் நிறைய கனவுகளுடன், தலைப் பிரசவத்துக்காக சிகிச்சைக்கு வந்த இளம்பெண், எச்ஐவி நோயாளியாகித் திரும்பிய சோகமும் அரசு மருத்துமனையில் தானே நடந்தது? பிரவச வார்டுகளில் பிஞ்சுக் குழந்தைகள் திருடப்படுகிற சம்பவங்களும் இங்கு தானே தொடர்கிறது?அடித்தட்டு மக்கள்தானே... என்கிற அரசின், அரசு அதிகாரிகளின் அலட்சியப்போக்கு, நாளொரு துயர சம்பவமாக நமது  மருத்துவமனை வார்டுகளுக்குள் புதிது புதிதாக பதிவாகிக் கொண்டிருக்கிறது. ஆனாலும் மக்கள் நம்பிக்ைக இழந்து விடவில்லை. கலப்படமற்ற நம்பிக்கையுடன் இன்னமும், அரசு மருத்துவமனைகளின் அழுக்கு வார்டுகளுக்குள் அப்பாவி மக்கள் நிறைந்து கிடக்கிறார்கள். அவர்கள் வைத்துள்ள நம்பிக்கையை இனியாவது பாதுகாக்குமா அரசு?

இதென்ன புதுக்குழப்பம்?

இந்தாண்டு பொறியியல் படிப்புகளில் சேர மே மாதம் 2ம்தேதி முதல் 31ம்தேதி வரை இணையதளம் மூலம் விண்ணப்பிக்கலாம் எனவும்  தமிழக அரசு அறிவித்தது. அதன்படி, இணையதளம் மூலம் 1,32,769  பேர், இணைய சேவை  மையங்கள் மூலம் 12,202 ேபர் என மொத்தம் 1,44,971 பேர்   விண்ணப்பித்துள்ளனர். நடப்பு கல்வியாண்டுக்கான பொறியியல் பொது கலந்தாய்வு ஜூன் 20ம்தேதி துவங்கி, ஜூலை 30-ம் தேதி  வரை  நடைபெற உள்ளது. இக்கலந்தாய்வுக்கான  மையக்குழுவைதமிழக அரசு சமீபத்தில் அறிவித்தது. இதில், தமிழக அரசின் உயர்கல்வி துறை செயலர், தொழில்நுட்ப இயக்குனரக இயக்குனர் ஆகியோர்  இடம்பெற்றுள்ளனர். இந்த அறிவிப்புக்கு எதிர்ப்பு ெதரிவித்து, பொறியியல் மாணவர் சேர்க்கை மைய தலைவர் பதவியை, அண்ணா பல்கலைக்கழக துணை வேந்தர் சூரப்பா ராஜினாமாசெய்தார். அத்துடன், இந்த ஆண்டுக்கான பொறியியல் கலந்தாய்வை அண்ணா  பல்கலைக்கழகம் நடத்தாது எனவும் அறிவித்தார். இதற்கிடையில், ‘கலந்தாய்வு பணிகளை மேற்கொள்ள தொழில்நுட்ப இயக்குனரகத்துக்கு போதிய  காலஅவகாசம் இல்லாத காரணத்தால், நடப்பு ஆண்டுக்கான கலந்தாய்வை மட்டும் அண்ணா  பல்கலைக்கழகம் வழக்கம்போல் நடத்திக்கொள்ள அனுமதி அளிக்கவேண்டும், அடுத்த ஆண்டு முதல் தொழில்நுட்ப இயக்குனரகம் கலந்தாய்வு நடத்த ஆட்சேபனை இல்லை’ என துணை  வேந்தர் சூரப்பா, தமிழக அரசுக்கு கடிதம் அனுப்பினார். ஆனால், தமிழக  அரசிடமிருந்து பதில் எதுவும் வரவில்லை. இந்த குழப்பத்துக்கு நடுவே,  புதுக்குழப்பமாக தனியார் அமைப்புகள் மூலம் பொது கலந்தாய்வு நடத்த திட்டமிட்டுள்ளதாகவும் தகவல்  வெளியாகியுள்ளது.  இப்படி மாறி மாறி, பல தெளிவற்ற அறிவிப்புகள் வெளிவருவதால் மாணவர்களும், பெற்றோரும் கடும் குழப்பத்தில் உள்ளனர். இந்த  ஆண்டுக்கான பொறியியல் கலந்தாய்வை யார்  நடத்துவது என்ற அதிகாரப்பூர்வ அறிவிப்பை, தமிழக அரசு வெளிப்படையாக அறிவிக்க வேண்டும். மாணவர்களின்  குழப்பத்துக்குமுற்றுப்புள்ளி வைக்க வேண்டும். கடந்த ஆண்டு,  இன்ஜினியரிங் கலந்தாய்வின் முடிவில், 89  ஆயிரம் இடங்கள் காலியாக இருந்தன. மொத்த இடங்களில் 50 சதவீதத்துக்கும் அதிகமான இடங்களில் மாணவர்கள் சேரவில்லை. இந்த ஆண்டு முழுமையாக இணையதளம் மூலம்  கலந்தாய்வு நடத்தப்படுவதால், தகுதியுள்ளவர்கள் மட்டுமே விண்ணப்பிக்க முடியும் என்ற நிலை உள்ளது. எனவே, கடந்த ஆண்டைப்போலவே இந்த ஆண்டும், 50 சதவீத இடங்கள் காலியாக இருக்கும் என்பதில் சந்ேதகம் இல்லை.

கவனிக்குமா அரசு?

தனது குடிமக்களுக்கு உரிய பாதுகாப்பளித்து, துன்பமான தருணங்களின் போது அவர்களுக்கு அரணாக நிற்பதே நல்ல அரசுக்கு அடையாளம் என்கிறார் வள்ளுவர். தமிழகத்தில் தொடர்ந்து அதிகரித்து வரும் கொலை, கொள்ளை, வழிப்பறி சம்பவங்களும், அதைத் தடுத்து ஒடுக்காமல் சட்டம் ஒழுங்கை காற்றில் பறக்க விடுவதும்... வள்ளுவம் சுட்டிக்காட்டுகிற நல்ல அரசுக்கு அழகல்ல.நகர் பகுதிகளில் எப்போதாவது நடக்கும் கொலை, கொள்ளைச் சம்பவங்கள் இப்போது சர்வசாதாரணமாக எங்கும் நடக்கிறது. இரவில் கொள்ளையடித்த காலம் மாறி, பகலிலேயே வீடு புகுந்து கொள்ளையடிக்கும் சம்பவங்கள் நடக்கின்றன. காவல்துறை நடவடிக்ைகக்கு அஞ்சி நடுங்கி, தலைமறைவாக ஒளிந்து திரியவேண்டிய ரவுடிகள், கும்பலாகக் கூடி பிறந்தநாள் கொண்டாடுவதும், ஆயுதங்களால் கேக் வெட்டி அதை வீடியோவாக வெளியிடுவதும் சட்டம் ஒழுங்கு எந்த லட்சணத்தில் இருக்கிறது என்பதற்கான நேரடி சாட்சி. மதுரை நகர் மற்றும் புறநகர் பகுதிகளில் ஒரே மாதத்தில் பத்து கொலைகள், கணக்கிலடங்கா கொள்ளைச் சம்பவங்கள் நடந்துள்ளன. கொள்ளையர்கள் நவீன யுத்திகளை கையாண்டு, கைவரிசை காட்டுகின்றனர். அப்படித்தான் செங்கல்பட்டு சுங்கச்சாவடி நகை கொள்ளை சம்பவம் நடந்திருக்கிறது.தமிழகத்தில் தொடர் கொள்ளைகளில் ஈடுபட்டு வரும் கும்பலும், வடமாநில கும்பலும் சேர்ந்து நேர்த்தியான முறையில் ‘ஸ்கெட்ச்’ போட்டு கொள்ளையடிக்கின்றனர். இதனால் சில முக்கிய வழக்குகளில் குற்றவாளிகளை பிடிப்பதில் சிரமம் ஏற்படுகிறது. உரிய வேலைவாய்ப்புகளை உருவாக்காததன் விளைவு, படித்த வேலையற்ற இளைஞர்கள், கூலிப்படைகளில் சேர்ந்து குற்றச்செயல்களில் ஈடுபடும் பயங்கர நிலைக்குக் காரணமாக அமைந்து விட்டது. இது ஒருபுறம் இருக்க, பெண்களுக்கு பாதுகாப்பற்ற மாநிலமாக தமிழகம் மாறி வருகிறது. பொள்ளாச்சியில் பல பெண்களை சீரழித்த சம்பவங்கள் பெரம்பலூர், ஈரோடு, திருச்சி என பல்வேறு இடங்களில் தொடர்கிறது. பொள்ளாச்சி அருகே தென்னந்தோப்பு ரிசார்ட்ஸில் இளம்பெண்களை ஆபாசமாக நடனமாட விட்டு, போதையில் தள்ளாடிய 150க்கும் மேற்பட்ட இளைஞர்கள் சிக்கியுள்ளனர். பொள்ளாச்சி, பெரம்பலூர் சம்பவங்களில் ஆட்சியாளர்களின் கனத்த மவுனம், வளரும் தலைமுறையின் எதிர்காலம் குறித்த அச்சத்தை ஏற்படுத்துகிறது.சட்டம் ஒழுங்கை மட்டுமல்ல, தனிமனித ஒழுக்கத்தை பாதுகாப்பதிலும் காவல்துறையின் பங்களிப்பு மிகவும் முக்கியம். குற்றச்சம்பவங்களை காவல்துறையினர் எப்படி கையாளுகின்றனர் என்பதை மக்கள் உன்னிப்பாக கவனித்து வருகின்றனர். ஸ்காட்லாந்து காவல்துறைக்கு இணையானது என பெயர் பெற்ற தமிழக காவல் துறையினர், அதிகாரத்தில் உள்ளவர்களின் தலையாட்டி பொம்மைகளாக மாறுவதே, இன்றைய விபரீதங்களுக்கு காரணம். அதிகரிக்கும் குற்றச்செயல்களை தடுத்து, பொதுமக்களின் அச்சத்தை போக்கி, அவர்களை பாதுகாக்க வேண்டிய கடமை காவல்துறைக்கும், அரசுக்கும் உள்ளது.

பாடம் கற்பார்களா

இந்தியாவிலேயே அதிகம் புயலால் பாதிக்கப்படும் ஒரே மாநிலம் ஒடிசா. கடந்த 1999ம் ஆண்டு நவம்பர் மாதம் 4ம் தேதி மணிக்கு 260 கிலோ மீட்டர் வேகத்தில் வீசிய புயலால் மாநிலத்தின் 5 மாவட்டங்கள் வெகுவாக பாதிக்கப்பட்டன. 9  ஆயிரத்து 887 பேர் உயிரிழந்தனர். ஒரு கோடியே 25 லட்சத்து 71 ஆயிரம் பேர் பாதிப்படைந்தனர்.அன்று முதல் புயல் பாதிப்புகளை சவாலாக ஏற்றுக் கொண்டு அரசும் அதிகாரிகளும் மேற்கொள்ளும் நடவடிக்கைகள் மெச்சத்தக்கவை. கடந்த 2013ம் ஆண்டு ‘பைலின்’ புயல் 260 கிலோ மீட்டர் வேகத்தில் ஒடிசாவை புரட்டிப்போட அப்போது மொத்தம் 23 பேர் மட்டுமே உயிரிழந்தனர். ஒடிசா அரசு மேற்கொண்ட சிறப்பான முன்னெச்சரிக்கை நடவடிக்கைகளால் உயிரிழப்பு குறைந்ததாக அப்போது ஐநா சபை பாராட்டியது. கடந்த ஆண்டு அக்டோபர் 11ல் டிட்லி புயல் ஒடிசாவை  தாக்கியபோது 8 பேரே உயிரிழந்தனர்.கடந்த 3ம் தேதி மணிக்கு 175 கிலோ மீட்டர் வேகத்தில் சூறாவளி மற்றும் கனமழையுடன் கரை கடந்தது பானி புயல். புயலின் போக்கை சரியாக கணித்த இந்திய வானிலை ஆய்வு மையம் தெரிவித்திருந்த முன்னெச்சரிக்கையால் ஒடிசா, மேற்கு  வங்கத்தில் முழுமையான முன்னெச்சரிக்கை பணிகள் மேற்கொள்ளப்பட்டிருந்தன. இந்நடவடிக்கைகளால் புயலின் கோர தாண்டவத்திற்கு 8 பேர் மட்டுமே பலியாகினர்.இதுகுறித்து ஐநாவுக்கான பேரிடர் மீட்பு குழு கூறுகையில், மிக அதீத புயலை அதிக உயிரிழப்பு இல்லாமல் இந்தியா எதிர்கொண்டுள்ளது. மிக துல்லியமாக முன்கூட்டியே இந்திய வானிலை மையம் புயல் நகர்வுகளை கண்காணித்து எச்சரிக்கை  விடுத்துள்ளது.இந்நேரத்தில் சென்னையை புரட்டிப்போட்ட மழை வெள்ள பாதிப்பு நினைவிற்கு வருகிறது.கடந்த 2015ம் ஆண்டு நவம்பர் மாதம் செம்பரம்பாக்கம் ஏரி முன்னறிவிப்பின்றி திறந்து விடப்பட்டதால் சென்னை மற்றும் புறநகர் பகுதிகள் பெரும்  வெள்ளக்காடானது. நவம்பர் இரண்டாவது வாரம் பெய்த பெருமழையின் போதே அரசு சுதாரித்துக் கொள்ளாததால் வந்த விளைவு, 18 லட்சத்திற்கும் மேற்பட்ட மக்கள் நிர்க்கதியாயினர். வெள்ளத்துக்கு மட்டும் சென்னையில் ஏற்பட்ட  உயிரிழப்புகள் 260-ஐ தாண்டியது.ஆண்டுகள் 3 உருண்டோடியும் அந்த பாதிப்புகளிலிருந்து அரசு இதுவரை பாடம் படித்துக் கொண்டதாக தெரியவில்ைல. நல்லவேளையாக தமிழகத்தை அச்சுறுத்திய பானி புயல் திசைமாறி ஒடிசாவிற்கு சென்றது. கஜா பாதிப்பிலிருந்தே தமிழகம்  மீளாத நிலையில் பானி தாக்கியிருந்தால் நிச்சயம் மாநிலமும் மக்களின் மனமும் நொறுங்கித்தான் போயிருக்கும். ஒடிசாவை பார்த்தாவது அதிகாரிகள் பாடம் படிக்க வேண்டிய நேரம் இது.

ஏன் இந்த தட்டுப்பாடு?

கோடை துவங்கும் முன்பே தண்ணீர் தட்டுப்பாடும், குடிநீர் பஞ்சமும் தமிழகம் மட்டுமின்றி அனைத்து மாநிலங்களிலும் பெரும் பிரச்னையாக விஸ்வரூபம் எடுக்கிறது. கடந்த ஆண்டுகளில் தமிழகத்திலும், சென்னையிலும் ஆங்காங்கே ஏரிகளில் சேகரித்துவைத்திருந்த தண்ணீரை சுத்தப்படுத்தி டேங்கர் லாரிகளில் வினியோகம் செய்து ஓரளவு தட்டுப்பாட்டை சமாளித்தனர். ஆனால் இந்த ஆண்டு இதற்கும் வாய்ப்பில்லாமல் போய்விட்டது.  தமிழகம் முழுவதும் நீராதாரங்கள் வறண்டுவிட்டன. நீர்நிலைகள் ஆக்கிரமிக்கப்பட்டதால் நிலத்தடி நீர் அதலபாதாளத்துக்கு சென்றுவிட்டது. போர்வெல் போட்டு உறிஞ்சினாலும் சகதி தான் வருகிறது. சென்னையில் அடுக்குமாடி குடியிருப்பு வாசிகள் ₹5000 வரை குடிநீருக்கு செலவு செய்ய வேண்டியுள்ளதால் ஆயிரக்கணக்கான மக்கள் சத்தமின்றி வீட்டை காலி செய்து கொண்டு புறநகர் பகுதிகளில் குடியேறி வருகிறார்கள். மக்கள் அன்றாட வேலைகளை மேற்கொள்ள முடியாமல் காலி குடங்களுடன் தண்ணீருக்கு அலைவதே முழுவேலையாகிவிட்டது. கழிவறை பயன்பாட்டுக்கும், குளிக்கவும் தண்ணீர் இல்லை. குடிக்க சுத்தமான நீரில்லை. வடகிழக்கு பருவமழை ஏமாற்றிவிட்டது. கிருஷ்ணா நதிநீர் திட்டத்தின் கீழ் கண்டலேறு அணையில் இருந்து பெறப்படும் தண்ணீர் முழுமையாக கிடைக்கவில்லை. பூண்டி, புழல், செம்பரம்பாக்கம், சோழவரம் ஏரிகள் வரலாறு காணாத வகையில் வறண்டு கிடக்கிறது. கோடைமழையாவது கை கொடுக்கும் என்று எதிர்பார்த்த நிலையில் அதற்கும் தற்போது வாய்ப்பில்லை என்றாகிவிட்டது. தேர்தல் நேரம் என்பதால் மக்கள் பிரதிநிதிகள் யாரும் பிரச்னையை தீர்க்க முன்வருவதில்லை. உள்ளாட்சி தேர்தல் நடந்திருந்தாலாவது கவுன்சிலர்களின் உதவியுடன் மக்கள் தங்கள் குறையை அதிகாரிகளிடம் கொண்டு சென்றிருப்பார்கள். இவ்வளவு பிரச்னைக்கு நடுவில் ஏழைகள், நடுத்தர குடும்பத்தினர் தண்ணீருக்காக படும் அவதி சொல்லிமாளாது. நகரத்தின் பல இடங்களில் இருசக்கர வாகனம், சைக்கிள், ஆட்டோ போன்றவற்றில் குடங்களை கட்டிக்கொண்டு எங்கெல்லாம் தண்ணீர் கிடைக்கிறதோ அங்கிருந்து கொண்டு வருகிறார்கள். அதிகாரிகள் குடிநீர் பிரச்னையை தீர்க்க முயற்சி மேற்கொண்டாலும் குடிநீர் ஆதாரமாக விளங்கும் ஏரிகள் வறண்டுவிட்டதால் கைபிசைந்து நிற்கிறார்கள். மாதவரம், ரெட்டேரி, அயனம்பாக்கம், அம்பத்தூர் ஏரிகளில் உள்ள தண்ணீர் பயன்படுத்த முடியாத அளவிற்கு கழிவுநீர் கலந்திருப்பதால் அதிநவீன தொழில்நுட்பம் பயன்படுத்தி அதை சுத்தப்படுத்த முடியுமா என்ற ஆலோசனையில் அதிகாரிகள் உள்ளனர். எந்த ஆண்டும் இல்லாத அளவிற்கு இந்த ஆண்டு குடிநீர் தட்டுப்பாடு தலைவிரித்தாடுவதற்கு மக்களாகிய நாமும் ஒரு காரணம். மழை காலங்களில் நீரை சேமிக்காமல் வீணாக கடலில் கலக்கவிட்டோம். நீர்நிலைகளை ஆக்கிரமித்து வீடுகள் கட்டிவிட்டோம். நீர்நிலைகள் ஆக்கிரமிப்பை அகற்றி, ஏரிகளை தூர்வாறி தண்ணீர் நிரப்பிவைக்க நடவடிக்கை எடுக்க வேண்டும் என்று நீதிமன்றம் பலமுறை கண்டித்தும் அரசும், அதிகாரிகளும் செயல்படுத்த தவறிவிட்டனர். தங்கள் சுயநலத்துக்காக, ஓட்டு வங்கிக்காக நீர்நிலைகளை ஆக்கிரமித்து மக்களை அங்கு குடியமரச்செய்த அரசியல் கட்சிகள், தற்போது தேர்தல் பிரசாரத்தில் தீவிரமாகிவிட்டனர். எனவே  குடிநீர் பஞ்சத்தில் இருந்து மக்களை மீட்பது யார் என்பது கேள்விக்குறியாகவே உள்ளது.