Kanchipuram - Dinakaran

கோயில் உண்டியலை உடைத்து கொள்ளை

மதுராந்தகம், பிப்.15: மதுராந்தகம் அடுத்த மொறப்பாக்கம் கிராமத்தில் கோயில் உண்டியலை உடைத்து, மர்மநபர்கள் கொள்ளையடித்து சென்றனர்.மதுராந்தகம் அடுத்த மொறப்பாக்கம் கிராமத்தில் வாலவட்ட மாரியம்மன் கோயில் உள்ளது. இந்த கோயிலை இளங்கோ என்பவர் நிர்வகித்து வருகிறார். நேற்று முன்தினம் இரவு பூஜை முடிந்ததும், பூசாரி கோயிலை பூட்டிவிட்டு சென்றார்.நேற்று காலை கிராம மக்கள் கோயில் வழியாக சென்றனர். அப்போது, கோயில் எதிரில் உள்ள உண்டியல் உடைக்கப்பட்டு இருந்ததை கண்டு அதிர்ச்சியடைந்தனர். இதை அறிந்ததும் பொதுமக்கள் அங்கு திரண்டனர். இதனால், அங்கு பரபரப்பு ஏற்பட்டது. தகவலறிந்து மதுராந்தகம் போலீசார் சம்பவ இடத்துக்கு சென்று விசாரித்தனர். அப்போது கோயில் உண்டியலை உடைத்து, அதில் இருந்த சுமார் ₹40 ஆயிரத்தை மர்மநபர்கள் கொள்ளையடித்து சென்றது தெரிந்தது. தொடர்ந்து போலீசார், வழக்குப்பதிவு செய்து, மர்மநபர்களை வலைவீசி தேடி வருகின்றனர்.

அறிஞர் அண்ணா பட்டு கூட்டுறவு சங்கத்தில் ஊழல் புகார் எதிரொலி நிர்வாகக் குழுவை ஏன் கலைக்கக் கூடாது?: துணை இயக்குனர் நோட்டீஸ்

காஞ்சிபுரம், பிப்.15: காஞ்சிபுரம் அறிஞர் அண்ணா பட்டு கூட்டுறவு சங்கத்தில் நடந்த ஊழல் புகார் எதிரொலியாக நிர்வாகக்குழுவை ஏன் தகுதி நீக்கம் செய்யக்கூடாது என  கேட்டு கைத்தறித் துறை துணை இயக்குநர் நோட்டிஸ் அனுப்பியுள்ளார். இதனால், நெசவாளர்கள் மகிழ்ச்சியடைந்துள்ளனர்.கைத்தறித் துறை கட்டுப்பாட்டில் இயங்கும் காஞ்சிபுரம் அறிஞர் அண்ணா பட்டு கூட்டுறவு சங்கத்தில் 2,800க்கும் மேற்பட்ட நெசவாளர்கள் உறுப்பினர்களாக உள்ளனர். கடந்த 2017-18 ஆண்டுகளில் சங்க வரவு செலவுகளில் குளறுபடி  நடந்ததாக கூறப்படுகிறது.இதில், ₹2.1 கோடி சங்க விளம்பர செலவு, 97 முறை வெளியூர் பயண செலவு, விருந்தினர் உபசரிப்பு செலவு என மிகுதியாக தணிக்கை அறிக்கையில் கணக்கு காட்டப்பட்டுள்ளது. மொத்தம் விளம்பர செலவினத்தில் மட்டும் ₹1.5 கோடிக்கு முறைகேடு நடந்துள்ளதாக சங்க உறுப்பினர்கள் குற்றம்சாட்டினர்.இதற்கிடையில், சங்கத்தில் ₹60 கோடி லாபம் இட்டி இருந்தாலும் பொங்கல் போனஸ் கடந்த ஆண்டு தரப்பட்ட 45 பைசாவை, 24 பைசாவாக குறைக்கப்பட்டது. இதனால், நெசவாளர்கள் கடும் அதிர்ச்சியடைந்தனர்.இதனால், ஆண்டுக்கு ஒருமுறை நடக்கும் மகாசபை எனும் பேரவைக் கூட்டத்தில் சங்கத்தில் நடந்த ஊழல்கள், பொங்கல் போனஸ் குறைக்கப்பட்டது ஆகியவை குறித்து நெசவாளர்கள் சரமாரியாக குற்றஞ்சாட்டினர். இதையொட்டி மகாசபை 3 முறை தள்ளிவைக்கப்பட்டது.இதைதொடர்ந்து, அண்ணா பட்டு கூட்டுறவு சங்கத்தின் ஊழல்கள் குறித்து விசாரிக்க இணை இயக்குநர் சாரதி சுப்புராஜ் தலைமையில் குழு அமைத்து, விசாரணை நடந்தது.இதுதொடர்பான அறிக்கை கடந்த சில நாட்களுக்கு முன் கைத்தறித்துறை இயக்குநர் முனியநாதனிடம் சமர்ப்பிக்கப்பட்டது. இதற்கிடையில், சங்கத்தின் தனி அலுவலரும், மேலாண் இயக்குநருமான பிரகாசம்  கடந்த 31ம் சஸ்பெண்ட் செய்யப்பட்டார்.இந்நிலையில் 3 முறை தள்ளிவைக்கப்பட்ட பொதுப் பேரவைகூட்டம் காஞ்சிபுரம் காந்தி ரோட்டில் உள்ள சங்க அலுவலகத்தில் நேற்று நடைபெற்றது. இதில் நெசவாளர்களின் கோரிக்கையை ஏற்று பொங்கல் போனஸ் 44 பைசா தருவதற்கு ஒப்புதல் அளிக்கப்பட்டது. இதனால் பல்வேறு போராட்டங்களை நடத்தி வந்த நெசவாளர்கள் மகிழ்ச்சி அடைந்தனர்.மேலும், ஊழல் நடந்ததற்கான முகாந்திரம் உள்ளதால், காஞ்சிபுரம் அறிஞர் அண்ணா பட்டு கூட்டுறவு சங்க நிர்வாகக் குழுவை ஏன் தகுதி நீக்கம் செய்யக்கூடாது என்றும், இதுகுறித்து 15 நாட்களுக்குள்  உரிய பதில் அளிக்க வேண்டும் என நிர்வாகக் குழுவுக்கு விளக்கம் கேட்டு கைத்தறித்துறை துணை இயக்குநர் செல்வம் நோட்டிஸ் அனுப்பியுள்ளார்.ஏற்கெனவே சங்கத்தின் மேலாண் இயக்குநரும், தனி அலுவலுமான பிரகாசம் ஒய்வு பெறும் நாளில் சஸ்பெண்ட் செய்யப்பட்ட நிலையில் இந்த நடவடிக்கை எடுக்கப்பட்டுள்ளது. குறிப்பிடத்தக்கது.இதற்கு சங்க உறுப்பினர்கள் வரவேற்பளித்தனர். இதுகுறித்து சங்க உறுப்பினர் ராஜேந்திரன் கூறியதாவது, 3 முறை தள்ளிவைக்கப்பட்ட மகாசபை கூட்டம் நடைபெற்றுள்ளது. இதில் 44 பைசா பொங்கல் போனஸ் தரப்படும் என்ற அறிவித்ததற்குநன்றியை தெரிவித்து கொள்கிறேன்.சங்கத்தின் ஊழல் குறித்து நடவடிக்கை எடுக்க வேண்டும். நிர்வாகக்குழவை கலைக்க வேண்டும் என்ற கோரிக்கையை வலியுறுத்தி வந்தோம். தற்போது நிர்வாகக் குழுவை ஏன் தகுதி நீக்கம் செய்யக்கூடாது  என நோட்டிஸ் அனுப்பிவுள்ளதாக வந்த தகவல் நெசவாளர்களுக்கு மகிழ்ச்சி அளிக்கிறது என்றார்.

திருப்போரூர் ஒன்றியம் நெல்லிக்குப்பம் ஊராட்சி அம்மாப்பேட்டை கிராமத்தில் தனி வாக்குச்சாவடி மையம்: வாக்காளர்கள் வலியுறுத்தல்

திருப்போரூர், பிப்.15: நெல்லிக்குப்பம் ஊராட்சி அம்மாப்பேட்டை கிராமத்தில் தனி வாக்குச்சாவடி மையம்அமைக்க வேண்டும் என வாக்காளர்கள் வலியுறுத்துகின்றனர்.திருப்போரூர் ஒன்றியம் நெல்லிக்குப்பம் ஊராட்சியில் நெல்லிக்குப்பம், அகரம், அம்மாப்பேட்டை ஆகிய கிராமங்கள் உள்ளன. இந்த 3 கிராமங்களுக்கும் சேர்த்து நெல்லிக்குப்பம் அரசு பள்ளி வாக்குச்சாவடி மையமாக உள்ளது. அம்மாப்பேட்டை கிராமத்தில் ஏற்கனவே 400 குடியிருப்புகள் இருந்த நிலையில், தற்போது புதிதாக தனியார் அடுக்குமாடி குடியிருப்பு உருவாகி உள்ளது. இதில் 800க்கும் மேற்பட்ட வீடுகள் உள்ளன. இவர்களும் தற்போது புதிய வா் காளர் பட்டியலில் இடம் பெற்றுள்ளனர். நெல்லிக்குப்பம் ஊராட்சியில் மொத்தமுள்ள 2300 வாக்காளர்களில், 1200க்கும் மேற்பட்டோர் அம்மாப்பேட்டை கிராமத்தில் உள்ளதாக புதிய வாக்காளர் பட்டியல் மூலம் தெரியவந்துள்ளது.எனவே, அம்மாப்பேட்டை கிராமத்தில் புதிய வாக்குச்சாவடி மையம் அமைக்க வேண்டும் என வாக்களர்கள் கூறுகின்றனர்.அம்மாப்பேட்டை கிராமத்தில் இருந்து பிரதான ஊராட்சியான நெல்லிக்குப்பம் 3 கிமீ தூரம் உள்ளது. இதனால் நீண்ட தூரம் சென்று வாக்களிக்க விரும்பாத வாக்காளர்கள், வாக்களிப்பதில் அக்கறை காட்டுவதில்லை.  இதையொட்டி வாக்குப்பதிவு குறையும் நிலை ஏற்பட்டுள்ளது.எனவே, அம்மாப்பேட்டை கிராமத்தில் புதிய வாக்குச்சாவடி மையம் ஏற்படுத்த வேண்டும் என வலியுறுத்தப்படுகிறது.

திமுக பிரமுகர் கொலையில் திருவள்ளூர் கோர்ட்டில் மேலும் 5 பேர் சரண்

சென்னை, பிப். 15: பெரும்புதூர் அருகே பிள்ளைப்பாக்கம் பள்ளத் தெருவை சேர்ந்தவர் ரமேஷ் (48). திமுக செயலாளர். ரியல் எஸ்டேட் தொழிலும் செய்து வந்தார். இவரது மனைவி மாரி. இவர்களுக்கு ஒரு மகன், ஒரு மகள் உள்ளனர். கடந்த 3 நாட்களுக்கு முன் ரமேஷ், பெரும்புதூர் - குன்றத்தூர் சாலை கட்சிப்பட்டு பகுதியில் உள்ள அவரது அலுவலகத்தில் வரவு செலவு கணக்குகளை பார்த்து கொண்டிருந்தார். அப்போது ஆட்டோ, பைக்குகளில் வந்த 10 பேர் கும்பல், அலுவலகத்தில் இருந்த ரமேஷை சரமாரியாக வெட்டி கொன்றுவிட்டு தப்பியது. புகாரின்படி, பெரும்புதூர் இன்ஸ்பெக்டர் விநாயகம் வழக்குப்பதிவு செய்து விசாரித்தார். அதில், பெரும்புதூர் அடுத்த கிளாய் பகுதியை சேர்ந்த குல்லா (எ) விஸ்வநாதனும், அவரது கூட்டாளிகளும் ரமேஷை கொலை செய்தது தெரிந்தது. இதையடுத்து தனிப்படை போலீசார், குற்றவாளிகளை வலைவீசி தேடி வந்தனர். இதற்கிடையில், குல்லா (எ) விஸ்வநாதன் (24), சுரேந்தர் (25), சத்யா (27), செந்தில்குமார் (28) ஆகியோர், நேற்று கடந்த 2 நாட்களுக்கு முன், திருச்சி கோர்ட்டில் சரணடைந்தனர்.இந்நிலையில், அதே பகுதியை சேர்ந்த வி.சந்துரு (22), அசோக் (எ) ரத்தினகுமார் (22), வி.பாலச்சந்துரு (21), கே.அஜீத்குமார் (எ) படையப்பா (21), எம்.மகேஷ் (21) ஆகியோர் நேற்று மாலை திருவள்ளூர் மாஜிஸ்திரேட் நீதிமன்றம் எண் 1ல் சரணடைந்தனர்.அவர்களை 15 நாள் நீதிமன்ற காவலில் வைக்க நீதிபதி உத்தரவிட்டார். இதையடுத்து 5 போரையும் போலீசார் புழல் சிறையில் அடைத்தனர்.சரணடைந்தவர்களை போலீஸ் காவலில் எடுத்து விசாரிக்க போலீசார் முடிவு செய்துள்ளனர்.

மூசிவாக்கத்தில் தனிநபர் ஆக்கிரமித்த அரசு நிலத்தை மீட்கக்கோரி விவசாயிகள் உண்ணாவிரதம்: கோட்டாட்சியர் அலுவலகத்தில் பரபரப்பு

மதுராந்தகம், பிப்.15: படாளம் அருகே உள்ள மூசிவாக்கம் கிராமத்தில் தனிநபர் ஆக்கிரமித்த அரசு நிலத்தை மீட்க கோரி, மதுராந்தகம் கோட்டாட்சியர் அலுவலகம் அருகே, நேற்று விவசாயிகள் மற்றும் பொதுமக்கள் உண்ணாவிரத போராட்டத்தில் ஈடுபட்டனர்.மதுராந்தகம் அடுத்த படாளம் அருகே மூசிவாக்கம் கிராமத்தில் உள்ள சுமார் 20 சென்ட் அரசு இடத்தை, அப்பகுதியை சேர்ந்த தனிநபர் முறைகேடாக ஆக்கிரமிப்பு செய்து, பல ஆண்டுகளாக அனுபவித்து வருகிறார்.இதுகுறித்து, அந்த ஊர் மக்கள், சம்பந்தப்பட்ட அதிகாரிகளிடம் புகார் தெரிவித்தனர். ஆனால், அதிகாரிகள் எவ்வித நடவடிக்கையும் எடுக்காமல், கண்டும் காணாமல் இருப்பதாக கூறப்படுகிறது.இந்நிலையில், தனிநபர் ஆக்கிரமிப்பு செய்த அரசு நிலத்தை மீட்க கோரி, தமிழ்நாடு விவசாய தொழிலாளர் சங்கம் சார்பில் மதுராந்தகம் கோட்டாட்சிய்ர் அலுவலகம் அருகே நேற்று உண்ணாவிரத போராட்டத்தில் ஈடுபட்டனர். விவசாய தொழிலாளர் சங்க கிளை தலைவர் மோகன் தலைமை தாங்கினார். சங்க நிர்வாகிகள் துர்கா, அமுதா, மாரியம்மாள், ஆறுமுகம் ஆகியோர் முன்னிலை வகித்தனர். மார்க்சிஸ்ட் கம்யூனிஸ்ட் மாவட்ட குழு உறுப்பினர் கிருஷ்ணராஜ், விவசாய தொழிலாளர் சங்க மாவட்ட செயலாளர் சண்முகம், மாவட்ட துணை செயலாளர் ராஜா, மதுராந்தகம் வட்ட செயலாளர் வாசுதேவன், மாசிலாமணி, பொன்னுசாமி உள்பட ஆண்கள், பெண்கள் என 50க்கும் மேற்பட்டோர் உண்ணாவிரதப் போராட்டத்தில் கலந்து கொண்டனர்.இதுகுறித்து, போராட்டத்தில் ஈடுபட்டவர்கள் கூறுகையில், கிராமத்தில் உள்ள சர்வே எண் 149ல் அடங்கியுள்ள 20 சென்ட் அரசு நிலத்தை, தனிநபர் ஆக்கிரமித்து வேலி போட்டு வைத்துள்ளார். அந்த ஆக்கிரமிப்பை அகற்றி, அரசு நிலத்தை மீட்க வேண்டும் என வருவாய் துறை அதிகாரிகளிடம் பலமுறை மனு அளித்தோம் ஆனால் நடவடிக்கை இல்லை.அதே கோரிக்கையை வலியுறுத்தி தற்போது இந்த உண்ணாவிரத போராட்டத்தில் ஈடுபட்டுள்ளோம். இனியாவது அரசு அதிகாரிகள், அந்த நிலத்தை மீட்டு கிராம மக்களிடம் ஒப்படைக்க வேண்டும் என்றனர்.

காதலர் தின கொண்டாட்டம் : மாமல்லபுரத்தில் உற்சாகம்

மாமல்லபுரம், பிப்.15: கிறிஸ்தவ பாதிரியார் வாலன்டைன் நினைவாக பிப்ரவரி மாதம் 14ம் தேதி காதலர்கள் தினமாக உலகம் முழுவதும் கொண்டாடப்படுகிறது.சென்னையை ஒட்டிய கடற்கரை நகரமான மாமல்லபுரம் சாதாரண நாட்களில் காதலர்களின் சொர்க்கபுரியாக திகழ்வது வழக்கம். இந்நிலையில், காதலர் தினத்தையொட்டி நேற்று காதல் ஜோடிகளின் முற்றுகையில் சிக்கித் தவித்தது.இந்நிலையில் காதலர் தினமான நேற்று சென்னை, காஞ்சிபுரம், திருவள்ளூர் மாவட்டங்கள் மட்டுமின்றி பல்வேறு மாவட்டங்களில் இருந்து காதல் ஜோடிகள் பைக், கார், பஸ்களில் வந்து குவிந்தனர். இதனால் மாமல்லபுரத்தில் எங்கு திரும்பினாலும் காதல் ஜோடிகளின் உற்சாக துள்ளல்களையே பார்க்க முடிந்தது.மாமல்லபுரத்தின் கலை நயம் மிக்க சிற்பங்களை காதலர்கள் கட்டிப்பிடித்தபடியும், கைகோர்த்தபடியும் ரசித்தனர். மேலும் சில காதலர்கள் வெட்டவெளியில் முத்தங்களை பரிமாறிக் கொண்டனர். மாமல்லபுரத்தில் பிரசித்தி பெற்ற கற்சிற்பங்களையும், கழுத்தில் அணியும் டாலர்களையும் காதல் சின்னமாக ஒருவருக்கொருவர் வாங்கி பரிமாறிக் கொண்டனர்.மேலும் கடற்கரை கோயில், ஐந்து ரதம், அர்ச்சுனன் தபசு உள்ளிட்ட புராதனச் சின்னங்களின் முன் நின்றபடி செல்பி எடுத்து மகிழ்ந்தனர்.நேற்று மாமல்லபுரம் முழுவதும் சுற்றுலாப் பயணிகளுக்கு பதிலாக காதல் ஜோடிகளே அதிகம் தென்பட்டனர் என்பது குறிப்பிடத்தக்கது.

வேளச்சேரி - தாம்பரம் பிரதான சாலையில் பரபரப்பு நள்ளிரவில் டிரான்ஸ்பார்மர் மீது வாகனம் மோதி விபத்து: சாலையில் ஆயில் கொட்டியதால் வழுக்கி விழுந்த வாகன ஓட்டிகள்

வேளச்சேரி, பிப்.15 : வேளச்சேரி பிரதான சாலையில் இருந்த மின் டிரான்ஸ்பார்மர் மீது அடையாளம் தெரியாத வாகனம் மோதியது. இதில் வாகனத்தில் இருந்து ஆயில் கசிவு கொட்டியதால் வாகன ஓட்டிகள் பலர் வழுக்கி விழுந்ததில் காயம் அடைந்தனர். இதனால் அப்பகுதியில் கடும் போக்குவரத்து நெரிசல் ஏற்பட்டது.வேளச்சேரி - தாம்பரம் பிரதான சாலையில், பள்ளிக்கரணை அருகே பாரதிதாசன் நகர் இணையும் பகுதியில், சாலையின் நடுவே போக்குவரத்துக்கு இடையூறாக ஒரு மின் டிரான்ஸ்பார்மர் உள்ளது.இந்த டிரான்ஸ்பார்மரை அகற்றி சாலையோரமாக மாற்றியமைக்க வேண்டும் என பொதுமக்கள், மின்வாரிய அதிகாரிகளுக்கு தொடர்ந்து வலியுறுத்தி வந்தனர். ஆனால், இதுவரை எவ்வித நடவடிக்கையும் எடுக்கவில்லை.இந்நிலையில், நேற்று முன்தினம் இரவு, சாலையின் நடுவே உள்ள மின் டிரான்ஸ்பார்மர் மீது அடையாளம் தெரியாத வாகனம் மோதியது. இதில், அந்த வாகனத்தில் இருந்து ஆயில் கசிவு ஏற்பட்டு சாலை முழுவதும் கொட்டி பரவியது.இதனால் அவ்வழியே சென்ற இருசக்கர வாகன ஓட்டிகள் பலர் வழுக்கி விழுந்து காயம் அடைந்தனர். கார்களும், கட்டுப்பாட்டை இழந்து தாறுமாறாக ஓடின. இதனால் அங்கு கடும் வாகன நெரிசல் ஏற்பட்டது.தகவலறிந்து பள்ளிக்கரணை போலீசார் சம்பவ இடத்துக்கு சென்று, பொதுமக்களின் உதவியுடன், சாலையில் பரவி இருந்த ஆயில் மீது மணலை கொட்டி சரி செய்தனர். இதனை தொடர்ந்து மின்வாரிய அதிகாரிகள், அங்கு சென்று, மின் இணைப்பைத் துண்டித்து டிரான்ஸ்பார்மரை பழுது பார்த்தனர். பின்னர் சுமார் ஒருமணி நேரத்துக்கு பின் போக்குவரத்து சீரானது. இதனால் அப்பகுதியில் பெரும் பரபரப்பு ஏற்பட்டது.

செல்போன் டவருக்கு எதிர்ப்பு

சென்னை, பிப். 15: செங்குன்றம் அடுத்த தீர்த்தங்கரையம்பட்டு ஊராட்சிக்கு உட்பட்ட கோட்டூர் கோமதி அம்மன் நகரில் 2000க்கும் மேற்பட்ட குடியிருப்புகளில், ஒரு லட்சத்துக்கு மேற்பட்ட மக்கள் வசிக்கிறார்கள்.கோமதி அம்மன் நகர் குடியிருப்பு பகுதியில் தனியார் செல்போன் நிறுவன சார்பில், டவர் (கோபுரம்) அமைப்பதற்காக நேற்று முன்தினம் பணிகள் துவங்கப்பட்டன. இதற்கு எதிர்ப்பு தெரிவித்த மக்கள், அப்பகுதியில் செல்போன் டவர் அமைக்க கூடாது. டவரில் இருந்து வெளியேறும் கதிர் வீச்சால், கர்ப்பிணிகள், குழந்ைதகள் ஆகியோர் பாதிக்கப்படுவார்கள் என ஆர்ப்பாட்டத்தில் ஈடுபட்டனர். தகவலறிந்து செங்குன்றம் போலீசார் சம்பவ இடத்துக்கு சென்று, பொதுமக்களிடம் சமரசம் பேசி, உரிய நடவடிக்கை எடுப்பதாக கூறினர். இதையடுத்து அனைவரும் கலைந்து சென்றனர்.

காஞ்சிபுரம் மாவட்டத்தை சேர்ந்த 43 எஸ்ஐக்கள் பணியிடமாற்றம்

காஞ்சிபுரம், பிப்.15:  காஞ்சிபுரம் மாவட்டத்தில் இருந்து 43 க்கள் திருவள்ளூர் மாவட்டத்துக்கும், திருவள்ளூர் மாவட்டத்தில் இருந்து 24 எஸ்ஐக்களை காஞ்சிபுரம் மாவட்டத்துக்கும் இடமாற்றம் செய்து காஞ்சிபுரம் சரக டிஐஜி தேன்மொழி உத்தரவிட்டுள்ளார்.காஞ்சிபுரம் தாலுகா எஸ்ஐ அழகேசன், பாலுசெட்டிச்சத்திரம் சுப்பிரமணியன், அனைத்து மகளிர் காவல் நிலையம் மகாலட்சுமி, பெரும்புதூர்விஜயகாந்த், சுங்குவார்சத்திரம் ஏழுமலை, சோமங்கலம் பாஸ்கரன், ஒரகடம் குணசேகரன், மங்களபிரியா, பெரும்புதூர் அனைத்து மகளிர் காவல் நிலையம் பார்வதி, செங்கல்பட்டு டவுன் வாசுதேவன், செங்கல்பட்டு தாலுகா வெங்கடேசன், படாளம் அன்பு உள்பட 43 எஸ்ஐக்கள் திருவள்ளூர் மாவட்டத்துக்கு பணியிடமாற்றம் செய்யப்பட்டுள்ளனர்.மாவட்ட எஸ்பி, இடமாற்றம் செய்யப்பட்டவர்களுக்கு உரிய பணியிடம் ஒதுக்கி உத்தரவு வழங்க வேண்டும்.மேலும் இடமாற்றம் செய்யப்பட்டவர்கள் பணியில் இணைந்த தகவலை உடனடியாக உயர் அதிகாரிகளுக்கு தெரிவிக்க வேண்டும் என தெரிவிக்கப்பட்டுள்ளது.

மிக்சி, எடை மெஷினில் மறைத்து கடத்திய ₹18 லட்சம் மதிப்பு தங்கம் பறிமுதல்: கேரள வாலிபர்கள் 2 பேர் சிக்கினர்

சென்னை, பிப். 15: துபாயில் இருந்து எமரேட்ஸ் ஏர்லைன்ஸ் விமானம் நேற்று அதிகாலை 2.30 மணிக்கு சென்னை வந்தது. அதில் வந்த பயணிகளை சுங்க அதிகாரிகள் சோதனையிட்டனர். அப்போது, கேரள மாநிலத்தை சேர்ந்த குத்தூஸ் (29), ஹைதுரூஸ் (32) ஆகியோர் சுற்றுலா பயணியாக துபாய் சென்று திரும்பினர்.  அவர்கள் மீது அதிகாரிகளுக்கு சந்தேகம் ஏற்பட்டது. அவர்களை நிறுத்தி உடமைகளை சோதனையிட்டபோது, அதில் எதுவும் இல்லை. சந்தேகம் தீராத அதிகாரிகள், அவர்கள் வைத்திருந்த மிக்சி மற்றும் எடை மெஷினை பிரித்து பார்த்தனர். அப்போது, தங்கக் கட்டிகளை உருக்கி, உதிரி பாகங்கள் வடிவில் கடத்தியது தெரிந்தது. அவற்றின் மொத்த எடை 530 கிராம். இதன் சர்வதேச மதிப்பு ₹18 லட்சம். இதையடுத்து தங்கத்தை பறிமுதல் செய்து 2 பேரையும் கைது செய்தனர். தொடர்ந்து அதிகாரிகள் விசாரணை நடத்தி வருகின்றனர்.

சண்டையை படம் பிடித்ததால் ஆத்திரம் போலீஸ்காரரை தாக்கி செல்போன் உடைப்பு: கானத்தூரில் பரபரப்பு

துரைப்பாக்கம், பிப். 15: சென்னை கிழக்கு கடற்கரை சாலை கானத்தூரை சேர்ந்தவர்கள் சிவா (25), அன்பரசன் (24). இவர்கள் இருவருக்கும் இடையே நேற்று முன்தினம் திடீரென வாய் தகராறு ஏற்பட்டது. இவர்களுக்குள் மோதல் உருவாகும் நிலை ஏற்பட்டதால், அக்கம் பக்கத்தினர் இதுபற்றி கானத்தூர் போலீசாருக்கு தகவல் கொடுத்தனர்.அதன்பேரில், ஏட்டு முருகராஜ் சம்பவ இடத்துக்கு சென்று, இரு தரப்பையும் சமாதானம் செய்து, கலைந்து செல்லும்படி கூறினார். ஆனாலும், அவர்கள் சண்டை தொடர்ந்தது. இதையடுத்து ஏட்டு முருகராஜ், அங்கு நடந்த காட்சிகளை ஆதாரத்திற்காக தனது செல்போனில் படம் பிடித்தார்.இதை பார்த்து ஆத்திரமடைந்த இருதரப்பினரும், முருகராஜிடம் தகராறில் ஈடுபட்டு, அவரது செல்போனை பறித்து உடைத்தனர். இதை தட்டிக்கேட்ட அவரையும் சரமாரியாக தாக்கியதாக தெரிகிறது.இதுகுறித்து கானத்தூர் போலீசில், ஏட்டு முருகராஜ் புகார் அளித்தார். அதன்பேரில், போலீசார் சம்பவ இடத்துக்கு சென்று விசாரிக்கின்றனர். கடந்த வாரம் இதே பகுதியில் நடந்த தகராறின்போது, ரோந்து வானத்தில் சென்ற இன்ஸ்பெக்டர் கார் மீது ஒரு கும்பல் கற்களை வீசி தாக்குதல் நடத்தியது குறிப்பிடத்தக்கது. கானத்தூர் பகுதியில் போலீசார் தாக்கப்படுவதோடு, வாகனங்களும் உடைக்கப்படும் சம்பவம் சக போலீசார் மத்தியில் அதிர்ச்சியை  ஏற்படுத்தியுள்ளது.

காஞ்சிபுரம் பவளவிழா மாளிகையில் அண்ணா, கலைஞர் சிலை திறப்பு விழா: மு.க.ஸ்டாலின் திறந்து வைத்தார்

காஞ்சிபுரம், பிப்.15: காஞ்சிபுரம் மாவட்டத்தில் உள்ள திமுக அலுவலகமான கலைஞர் பவளவிழா மாளிகையில் முன்னாள் தலைவர் கலைஞர் கருணாநிதி மற்றும் அண்ணா திருவுருவ சிலைகள் திறப்பு விழாவில் திமுக தலைவர் மு.க.ஸ்டாலின் கலந்து கொண்டு சிலைகளை திறந்து வைத்தார்.காஞ்சிபுரம் தெற்கு மாவட்ட திமுக சார்பில் திருக்கச்சி நம்பி தெருவில் உள்ள காஞ்சிபுரம் மாவட்ட திமுக அலுவலகமான கலைஞர் பவளவிழா மாளிகையில், மறைந்த அக்கட்சியின் முன்னாள் தலைவர் கலைஞர் கருணாநிதியின் முழு திருஉருவச் சிலை மற்றும் அறிஞர் அண்ணா சிலை திறப்பு விழா நேற்று மாலை நடைபெற்றது.தெற்கு மாவட்ட திமுக செயலாளர் க.சுந்தர் எம்எல்ஏ தலைமை தாங்கினார். காஞ்சிபுரம் நகர செயலாளர் சன்பிராண்ட் ஆறுமுகம் வரவேற்றார். மாவட்ட அவைத்தலைவர் சுகுமார், தலைமை செயற்குழு உறுப்பினர் சேகரன், மாணவரணி செயலாளர் வக்கீல் எழிலரசன் எம்எல்ஏ, மாவட்ட துணைச் செயலாளர்கள் வெளிக்காடு ஏழுமலை, தசரதன், வசந்தமாலா ஆகியோர் முன்னிலை வகித்தனர்.நிகழ்ச்சியில் திமுக தலைவர் மு.க.ஸ்டாலின் கலந்துகொண்டு தலைவர் கலைஞர் கருணாநிதி, அண்ணா சிலைகளை திறந்து வைத்து சிறப்புரையாற்றினார்.தொடர்ந்து, அமைப்புச் செயலாளர் ஆர்.எஸ்.பாரதி எம்பி, எம்எல்ஏக்கள் புகழேந்தி, ஆர்.டி.அரசு, தலைமை செயற்குழு உறுப்பினர்கள் நாகன், விஸ்வநாதன், நெசவாளர் அணி அன்பழகன், தொண்டர் அணி சுகுமாரன், தலைமை பொதுக்குழு உறுப்பினர் செங்குட்டுவன், மாநில வர்த்தக அணி துணை செயலாளர் வி.எஸ்.ராமகிருஷ்ணன் ஆகியோர் உரையாற்றினர். நிகழ்ச்சியில் ஒன்றிய - நகர செயலாளர்கள் பி.எம்.குமார், குமணன், சிறுவேடல் செல்வம், சத்தியசாய், கண்ணன், தம்பு, கே.எஸ்.ராமச்சந்திரன், ஏழுமலை, ஞானசேகரன், சேகர், சாலவாக்கம் குமார், சரவணன், தர், தலைமை பொதுக்குழு உறுப்பினர்கள் முனுசாமி, ராமலிங்கம், மோகன்தாஸ், ஜனனி கிருஷ்ணமூர்த்தி மற்றும் இளைஞரணி அமைப்பாளர் அப்துல் மாலிக், யுவராஜ், மணி, எழிலரசன், டாக்டர் சோபன்குமார், மாணவரணி அமைப்பாளர் அபுசாலி, ஏ.வி.சுரேஷ்குமார், ராம்பிரசாத், ஒன்றிய மற்றும் பேரூர் செயலாளர்கள் பாண்டியன், பாரிவள்ளல், உசேன், விஜயகணபதி, இனியரசு, எம்.எஸ்.சுகுமார், தசரதன் காஞ்சிபுரம் நகர நிர்வாகிகள் சந்துரு, ஜெகநாதன், கருணாநிதி, கன்னியம்மாள் தேவராஜன், வெங்கடேசன், சரவணன், கணேஷ் உள்பட பலர் கலந்து கொண்டனர்.முன்னதாக காஞ்சிபுரம் மாவட்டம் வாலாஜாபாத் வடக்கு ஒன்றியம் சார்பில் சேக்காங்குளம் பகுதியில் கல்வெட்டு மற்றும் கொடிக்கம்பம் திறப்பு விழா நடைபெற்றது. தெற்கு மாவட்டச் செயலாளர் க.சுந்தர் எம்எல்ஏ தலைமையில், திமுக தலைவர் மு.க.ஸ்டாலின் 20 அடி உயர கல்வெட்டு திறந்துவைத்து, 95 அடி உயர கம்பத்தில் திமுக கொடியேற்றினார்.இந்தக் கல்வெட்டில் தலைவர் கலைஞரின் அரிய புகைப்படங்கள் மற்றும் ஐம்பெரும் முழக்கங்கள் இடம்பெற்றிருந்தன. இதற்கான நிகழ்ச்சி ஏற்பாடுகளை வாலாஜாபாத் வடக்கு ஒன்றியச் செயலாளர் சிறுவேடல் செல்வம் செய்திருந்தார்.இதேபோல், காஞ்சிபுரம் வடக்கு ஒன்றியம் சார்பில் பொன்னேரிக்கரை பகுதியில் 90அடி உயர கம்பத்தில் திமுக தலைவர் மு.க.ஸ்டாலின் கொடியேற்றி வைத்தார். இதற்கான ஏற்பாடுகளை காஞ்சிபுரம் வடக்கு ஒன்றிய செயலாளர் பி.எம்.குமார் செய்திருந்தார்.காஞ்சிபுரம் நகர திமுக சார்பில் ரங்கசாமி குளம் பகுதியில் 18அடி உயர கல்வெட்டை திறந்து வைத்த மு.க.ஸ்டாலின், 86 அடி உயர கம்பத்தில் திமுக கொடியேற்றினார். இதற்கான ஏற்பாடுகளை நகர செயலாளர் சன்பிராண்ட் ஆறுமுகம், நிர்வாகி எஸ்கேபி சீனிவாசன், எஸ்கேபி சந்தோஷ்குமார், எஸ்கேபி கார்த்திக் ஆகியோர் செய்திருந்தனர்.

மு.க.ஸ்டாலினுக்கு இன்று எழுச்சிமிகு வரவேற்பு: தொமுச கவுன்சில் தலைவர் அறிக்கை

காஞ்சிபுரம், பிப்.14: காஞ்சிபுரம் மாவட்ட தொமுச கவுன்சில் தலைவர் இளங்கோவன் அறிக்கை.காஞ்சிபுரம் கலைஞர் பவளவிழா மாளிகையில் கலைஞர் திருஉருவச்சிலையை திமுக தலைவர் மு.க.ஸ்டாலின் திறந்துவைக்கிறார்.  இந்த விழாவுக்கு வருகைதரும் திமுக தலைவர் மு.க.ஸ்டாலினுக்கு இன்று மாலை 5 மணியளவில் காந்தி ரோடு, பெரியார் நினைவுத்தூண் அருகில் தொமுச சார்பில் எழுச்சிமிகு வரவேற்பு அளிக்கப்படுகிறது.இதில் தொமுச பேரவை செயலாளர் பொன்னுராம், செயலாளர் சுந்தரவரதன், தலைவர் இளங்கோவன், துணைத்தலைவர் ரவி, அரசு, ஜானகிராமன், கணேசன், போக்குவரத்து தொமுச சுதாகரன், ராமதாஸ், மேகநாதன், தமிழ்நாடு சிவில் சப்ளை தொமுச ராமலிங்கம், செந்தமிழ்செல்வன், நரேந்திரன், மதியழகன், அலுவலக தொமுச லாரன்ஸ், ரவிக்குமார், டாஸ்மாக் தொமுச ஏழுமலை, கமலநாதன், வரதன், ஜெயராமன் உள்பட 2 ஆயிரத்துக்கும் மேற்பட்ட தொமுசவினர் கலந்துகொள்கின்றனர் என அறிக்கையில் கூறப்பட்டுள்ளது.

வேதகிரீஸ்வரருக்கு 2008 குடம் பாலாபிஷேகம்: கழுகுகள் மீண்டும் வர பிரார்த்தனை

திருக்குழுக்குன்றம், பிப். 14: திருக்கழுக்குன்றத்தில் பிரசித்தி பெற்ற வேதகிரீஸ்வரர் மலைக்கோயில் உள்ளது. உலக முக்கியத்துவம் வாய்ந்த சிவத்தலங்களில் ஒன்றாக இக்கோயில் விளங்குகிறது. அப்பர், சுந்தரர், மாணிக்க வாசகர், திருஞானசம்பந்தர் ஆகியோரால் ஒருங்கே பாடல் பெற்ற ஒரே தலமாகும்.1500 ஆண்டுகளுக்கு மேல் பழமை வாய்ந்த இக்கோயிலுக்கு தொன்றுதொட்டு நாள்தோறும் 2 கழுகுகள் வந்து வேதகிரீஸ்வரரை வழிபட்டு, அங்கு வைக்கப்படும் உணவை உண்டு செல்வது வழக்கமான ஒரு நிகழ்வாக இருந்து வந்தது. அந்த கழுகுகள், இங்கு வந்து குன்றின் =மேல் அமர்ந்து உணவருந்தி செல்வதால், இந்த ஊருக்கு திருக்கழுக்குன்றம் என்ற பெயர் வந்ததாக வரலாறு உள்ளது.ஆனால், கடந்த சில ஆண்டுகளாக, இங்கு கழுகுகள் வராமல் இருப்பது பக்தர்களுக்கு மிகுந்த வேதனை அளிக்கிறது. இதில், தெய்வகுற்றம் இருக்குமோ என பத்தர்களும், கோயில் நிர்வாகமும் சிறப்பு பூஜை செய்ய முடிவு செய்யப்பட்டது.இந்நிலையில், திருக்கழுக்குன்றம் வேதமலைவல பெருவிழா குழு மற்றும் அகஸ்திய கிருபா அமைப்பினர் சார்பில் கழுகுகள் மீண்டும் வருவதற்காக வேண்டுதல் நடத்தியும், உலக நன்மைக்காகவும், 2008 பெண்கள் பங்கேற்ற பால் குட ஊர்வலம் மற்றும் கூட்டுப் பிராத்தனை நடந்தது. வேதமலைவல பெருவிழா குழுத் தலைவர் துரை தலைமை தாங்கினார். செயலாளர் அன்புச்செழியன் முன்னிலை வகித்தார். திருக்கழுக்குன்றம் ஆமை மண்டபத்தில் இருந்து புறப்பட்ட பால் குட ஊர்வலம் சன்னதி தெரு வழியாக அடிவாரம் வந்து, பின்னர்  மலைக்கோயிலுக்கு சென்று வேத மந்திரங்கள் முழங்க, வேதகிரீஸ்வரருக்கு 2008 குடம் பாலாபிஷேகம் செய்தனர்.

சொத்து தகராறில் தம்பதிக்கு மண்டை உடைப்பு: உறவினர் உள்பட 4 பேர் காயம்

செய்யூர், பிப் 14: செய்யூர் பகுதியில் இரு குடும்பங்களுக்கு இடையே ஏற்பட்ட சொத்து தகராறில் கணவன், மனைவிக்கு மண்டை உடைந்தது. உறவினர் உள்பட 4 பேர் காயமடைந்தனர்.செய்யூர் பஜார் வீதியை  சேர்ந்தவர் வீரமணி (37). இவரது மனைவி காமாட்சி. இவர்களுக்கும், உறவினர் விஜயகுமார் என்பவருக்கும் இடையே பூர்வீக சொத்து சம்பந்தமாக நீண்ட நாட்களாக தகராறு இருந்து வந்தது.இந்நிலையில் நேற்று மாலை சொத்து சம்பந்தமாக இரு தரப்புக்கும் இடையே தகராறு ஏற்பட்டது. இதில் ஆத்திரமடைந்த விஜயகுமார், அவரது நண்பர்கள் விஜயராஜ்,  தினேஷ்குமார், பாஞ்சாலை ஆகியோர் வீரமணியையும், அவரது மனைவி காமாட்சியையும் உருட்டுக்கட்டையால் சரமாரியாக தாக்கினர். இதில் இருவருக்கும் மண்டை உடைந்தது. அவர்களும், பதிலுக்கு தாக்கியதில் 4 பேரும் லேசான காயமடைந்தனர். இதை பார்த்த அக்கம்பக்கத்தினர், படுகாயமடைந்த கணவன், மனைவியை மீட்டு செங்கல்பட்டு அரசு மருத்துவமனையில் சேர்்த்தனர். அங்கு அவர்களுக்கு சிகிச்சை அளிக்கப்படுகிறது. புகாரின்படி செய்யூர் போலீசார் வழக்குப்பதிவு செய்து விசாரிக்கின்றனர்.

தாம்பரம் பகுதியில் பூமிக்கு அடியில் மின்கம்பிகள் அமைக்கும் பணி விரைந்து முடிக்கப்படும்: அமைச்சர் தங்கமணி தகவல்

சென்னை, பிப். 14: தாம்பரம் மற்றும் சென்னை மாநகராட்சிக்கு உட்பட்ட பகுதியில் பூமிக்கு அடியில் மின்கம்பிகள் அமைக்கும் பணி விரைந்து முடிக்கப்படும் என்று அமைச்சர் தங்கமணி சட்டப்பேரவையில் கூறினார்.சட்டப்பேரவையில் நேற்று கேள்வி நேரத்தின்போது சோழிங்கநல்லூர் அரவிந்த் ரமேஷ் (திமுக) பேசும்போது, “சோழிங்கநல்லூர் தொகுதிக்கு உட்பட்ட பகுதிகளில் அதிக குடியிருப்புகள் உள்ளன. குறைவான மின்அழுத்தம் உள்ள பகுதியாக உள்ளது. துணை மின்நிலையங்கள் அமைக்கப்பட வேண்டும். குடியிருப்புக்கு மேல் உள்ள மின்கம்பிகளை பூமிக்கு அடியில் புதைவடங்களாக மாற்றி அமைக்க வேண்டும். சென்னை மாநகராட்சியுடன் இணைக்கப்பட்ட பகுதிகளிலும் இதே பிரச்னை உள்ளது. இதை செய்து தர அரசு முன்வருமா?” என்றார்.மின்துறை அமைச்சர் தங்கமணி: சோழிங்கநல்லூர் தொகுதி மட்டுமல்லாமல், சென்னை மாநகராட்சியில் இணைக்கப்பட்ட பகுதிகளில் இதே பிரச்னைகள் உள்ளன. வீடு கட்டும்போது ஆபத்து தெரியாமல் கட்டிவிடுகின்றனர். அதன்பிறகு ஆபத்து என்கிறார்கள்.சென்னை முழுவதும் 13,500 கிலோ மீட்டர் மின் கம்பிகளை பூமிக்கு அடியில் புதைவடங்களாக அமைக்கும் பணி நடைபெறுகிறது. இதில் 6000 கிலோ மீட்டர் பணி முடிவடைந்து விட்டது. இன்னும் 6,500 கி.மீ. தூரம் பணிகள் நடைபெற வேண்டும். சில காரணங்களுக்காக 2 ஆண்டுகளாக வழக்கு இருந்ததால் பணிகளில் தாமதம் இருந்தது. தற்போது பணிகள் வேகமாக நடைபெற்று வருகின்றன.தாம்பரம் எஸ்.ஆர்.ராஜா (திமுக): தாம்பரம், சென்னை ஒட்டியுள்ள பெரிய நகரம். சென்னையின் நுழைவாயிலாக இருக்கும் நகரம் ஆகும். மக்கள், வியாபாரிகள் அதிகம் உள்ளனர். தாம்பரத்தில் இருந்து தினசரி 7 முதல் 8 லட்சம் பேர் பஸ், ரயில் நிலையங்களுக்கு வந்து செல்கிறார்கள். எனவே இந்த பகுதிகளில் மின்கம்பிகளை பூமிக்கு அடியில் புதைக்காமல் இருப்பதால் பல உயிரிழப்புகள் ஏற்பட்டன. ஆகவே, உடனடியாக தாம்பரம் நகராட்சிக்கு உட்பட்ட பகுதிகளில் உள்ள மின் கம்பிகளை பூமிக்கு அடியில் மாற்றித் தர வேண்டும்.அமைச்சர் தங்கமணி: தாம்பரம் டிவிஷனில் மட்டும் 1,230 கி.மீ. அளவிற்கு புதைவடங்கள் போட வேண்டியிருக்கிறது. அதற்கு இப்போது ₹443 கோடி அளவிற்கு டெண்டர் கோரப்பட்டிருக்கிறது. டெண்டர் பணிகள் முடிவடைந்தவுடன் மின்கம்பிகள் பூமிக்கு அடியில் புதைக்க நடவடிக்கை எடுக்கப்படும்.இவ்வாறு விவாதம் நடைபெற்றது.

காஞ்சிபுரத்தில் இன்று கலைஞர் சிலை மு.க.ஸ்டாலின் திறந்து வைக்கிறார்

காஞ்சிபுரம், பிப்.14: காஞ்சிபுரம் தெற்கு மாவட்ட திமுக சார்பில் திருக்கச்சி நம்பி தெருவில் உள்ள காஞ்சிபுரம் மாவட்ட திமுக அலுவலகமான கலைஞர் பவளவிழா மாளிகையில் முன்னாள் திமுக தலைவர் கலைஞர் கருணாநிதியின் முழு உருவ திருஉருவச் சிலை, அண்ணா சிலைகளை திமுக தலைவர் மு.க. ஸ்டாலின்  திறந்து வைக்கிறார். இதனைத் தொடர்ந்து காஞ்சிபுரம் தேரடியில் பிரமாண்ட பொதுக்கூட்டம் நடைபெறுகிறது.காஞ்சிபுரம் தெற்கு மாவட்ட திமுக செயலாளர் க.சுந்தர் எம்எல்ஏ தலைமை தாங்குகிறார். காஞ்சிபுரம் நகர செயலாளர் சன்பிராண்ட் ஆறுமுகம் வரவேற்கிறார். மாவட்ட அவைத்தலைவர் சுகுமார், தலைமை செயற்குழு உறுப்பினர் சேகரன், மாணவரணி செயலாளர் வக்கீல் எழிலரசன் எம்எல்ஏ, மாவட்ட துணைச்செயலாளர்கள் வெளிக்காடு ஏழுமலை, தசரதன், வசந்தமாலா ஆகியோர் முன்னிலை வகிக்கின்றனர்.மேலும் அமைப்புச் செயலாளர் ஆர்.எஸ்.பாரதி எம்பி, எம்எல்ஏக்கள் புகழேந்தி, ஆர்.டி.அரசு, தலைமை செயற்குழு உறுப்பினர்கள் நாகன், விஸ்வநாதன், நெசவாளர் அணி அன்பழகன், தொண்டர் அணி சுகுமாரன், தலைமை பொதுக்குழு உறுப்பினர் செங்குட்டுவன், மாநில வர்த்தக அணி துணைசெயலாளர் வி.எஸ்.ராமகிருஷ்ணன் ஆகியோர் உரையாற்ற உள்ளனர். இந்நிலையில், காஞ்சிபுரத்தில் இன்று சிலைகள் திறக்கப்படுவது மற்றும் பிரமாண்ட பொதுக் கூட்டம் நடப்பதையொட்டி, மாவட்ட செயலாளர் க.சுந்தர், நேற்று கலைஞர் பவள விழா மாளிகை மற்றும் பொதுக் கூட்டம் நடக்கும் இடத்தை ஆய்வு செய்தார்.தொடர்ந்து காஞ்சிபுரம் வருகை தரும் திமுக தலைவர் மு.க.ஸ்டாலினுக்கு சிறப்பான வரவேற்பு அளிக்க வேண்டும். அவர் வரும் வழி நெடுகிலும் திமுக கொடி, தோரணங்கள் அமைப்பது குறித்து, தொண்டர்களுடன் ஆலோசனை நடத்தினார்.

கல்லூரி மாணவி தற்கொலை முயற்சி

திருப்போரூர், பிப்.14: கல்லூரியின் 3வது மாடியில் இருந்து குதித்து, மாணவி தற்கொலைக்கு முயன்றார்.திருக்கழுக்குன்றம், புது மேட்டுத் தெருவைச் சேர்ந்தவர் தயாளன். இவரது மகள் லோகநாயகி (19). கேளம்பாக்கத்தில் உள்ள ஒரு தனியார் கல்லூரியில் முதலாண்டுபடிக்கிறார்.கல்லூரியில் கடந்த 11ம் தேதி தேர்வு முடிவுகள் வெளிவந்ததாக கூறப்படுகிறது. இதில் லோகநாயகி 4 பாடங்களில் தோல்வி அடைந்ததாக தெரிகிறது. இதனால் மனமுடைந்து காணப்பட்ட லோகநாயகி நேற்று காலை 9.30 மணிக்கு கல்லூரிக்கு வந்தார்.அப்போது திடீரென அவசரமாக வெளியே செல்வதாக கூறிச்சென்ற அவர், 3வது மாடிக்குச் சென்று அங்கிருந்து கீழே குதித்தார். இதை பார்த்து அதிர்ச்சியடைந்த கல்லூரியின் பாதுகாவலர்கள் ஓடிவந்து ரத்த வெள்ளத்தில் கிடந்த லோகநாயகியை மீட்டு, அருகில் உள்ள தனியார் மருத்துவமனையில் சேர்த்தனர்.கீழே குதித்ததில் மாணவிக்கு முதுகுத் தண்டு மற்றும் இடுப்பு எலும்பு பலத்த சேதமடைந்துள்ளதாக தெரிந்தது. அவருக்கு தொடர்ந்து சிகிச்சை அளிக்கப்டுகிறது. இதற்கிடையில் அவரது பெற்றோருக்கு தகவல் கொடுக்கப்பட்டது.புகாரின்படி கேளம்பாக்கம் போலீசார் விசாரிக்கின்றனர்.

சென்னை விமான நிலையத்தில் ₹7 லட்சம் கடத்தல் தங்கம் பறிமுதல்: வாலிபர் கைது

சென்னை, பிப். 14: சென்னை விமான நிலையத்தில் ₹7 லட்சம் கடத்தல் தங்கத்தை பறிமுதல் செய்த அதிகாரிகள், வாலிபரை கைது செய்து செய்தனர்.மலேசியா தலைநகர் கோலாலம்பூரில் இருந்து ஏர்ஏசியா விமானம் நேற்று முன்தினம் இரவு  11 மணிக்கு சென்னை சர்வதேச விமான நிலையத்துக்கு வந்தது. அதில் வந்த பயணிகளை விமான நிலைய சுங்கத்துறை அதிகாரிகள்  சோதனையிட்டனர்.  அப்போது சென்னையை சேர்ந்த  அல்லாப்பிச்சை   (37)  என்பவர் மலேசியாவுக்கு  சுற்றுலா பயணியாக சென்று திரும்பினார். அவர் மீது அதிகாரிகளுக்கு சந்தேகம் ஏற்பட்டது. அவரை நிறுத்தி சோதனையிட்டனர்.  அவர் கொண்டு வந்த உடமைகளில் எதுவும் இல்லை.ஆனாலும் சந்தேகம் தீராத அதிகாரிகள் அவரை தனியறைக்கு அழைத்துச் சென்று தீவிரமாக சோதித்தனர். அப்போது, அவரது உள்ளாடையில்  ஒரு ரப்பர் ஸ்பாஞ்ச் சுருட்டி வைத்திருந்ததை கண்டுபிடித்தனர். அதை அதிகாரிகள் எடுத்து பிரித்து பார்த்தபோது, ₹7 லட்சம் மதிப்புள்ள  200 கிராம்  தங்க கட்டிகள் என தெரிந்தது.தங்க கட்டிகளை பறிமுதல் செய்த அதிகாரிகள், அல்லாப்பிச்சையை கைது செய்து தங்க கட்டிகளை யாருக்காக கடத்தி வந்தார், இதற்கு முன்பு இதுபோல் கடத்தலில் ஈடுபட்டிருக்கிறாரா? என தீவிரமாக விசாரிக்கின்றனர்.  

செங்கல்பட்டு அருகே பரபரப்பு ; பதற்றம் போலீஸ் டார்ச்சரால் வாலிபர் தற்கொலை

* உறவினர்கள் சாலை மறியல் *போலீசார் தடியடி * போர்க்களமாக மாறிய சென்னை - திருச்சி தேசிய நெடுஞ்சாலைசெங்கல்பட்டு, பிப்.14: கல்லூரி மாணவரிடம் பணம் கேட்டு போலீசார் டார்ச்சர் செய்ததால், மனமுடைந்த அவர் தூக்குப்போட்டு தற்கொலை செய்து கொண்டார். இதனால் ஆத்திரமடைந்த பொதுமக்கள் சாலை மறியலில் ஈடுபட்டனர். போலீசார் தடியடி நடத்தி அவர்களை களைய செய்தனர். இதனால் செங்கல்பட்டு பகுதியில் பரபரப்பும், கடும் போக்குவரத்து நெரிசலும் ஏற்பட்டது.செங்கல்பட்டு அடுத்த புலிப்பாக்கம் கிராமத்தை சேர்ந்தவர் வெங்கடேசன். இவரது மகன் ஜெயகுமார் (18). மதுராந்தகத்தில் உள்ள தனியார் பாலிடெக்னிக் கல்லூரியில் 2ம் ஆண்டு படித்து வந்தார்.கடந்த சில மாதங்களுக்கு முன் செங்கல்பட்டு தாலுகா போலீசார், ஜெயமார் மீது எஸ்சி, எஸ்டி சட்டத்தின் கீழ் வழக்குப்பதிவு செய்தனர். அதுதொடர்பாக, ஜெயகுமார் காவல் நிலையத்தில் கையெழுத்திட்டு வந்ததாக தெரிகிறது. இதைதொடர்ந்து, ஜெயகுமார் கல்லூரிக்கு பைக்கில் சென்று வரும்போது, போலீசார் இழிவுப்படுத்தி தகாத வார்த்தையால் திட்டியும், மற்ற குற்றாவாளிகளை கேட்டு அவருக்கு தொடர்ந்து டார்ச்சர் கொடுத்ததாக கூறப்படுகிறது. மேலும், அடிக்கடி பணம் கேட்டு மிரட்டி வந்ததாகவும், அதனால் கல்லூரிக்கு செல்ல மாட்டேன் என்றும் உறவினர்களிடம் ஜெயகுமார் கூறியுள்ளார். ஆனாலும் உறவினர்கள், அவருக்கு ஆறுதல் கூறி கல்லூரிக்கு அனுப்பி வைத்தனர்.இதைதொடர்ந்து, நேற்று முன்தினம் காலை ஜெயகுமார், வழக்கம்போல்  கல்லூரிக்கு பைக்கில் சென்றார். மாலையில் வீட்டுக்கு புறப்பட்டார். வீடு திரும்பி கொண்டிருந்தபோது, வழியில் தாலுகா போலீசார் அவரை மடக்கி இழிவாக பேசி மிரட்டியதாக கூறப்படுகிறது. இதனால் மிகுந்த மன உளைச்சலுடன் வீட்டுக்கு வந்த ஜெயகுமார், அறைக்கு சென்று கதவை பூட்டி கொண்டார்.நீண்ட நேரமாக அவர் வெளியே வராததால், சந்கேமடைந்த பெற்றோர் மற்றும் உறவினர்கள் கதவை வேகமாக தட்டினர். ஆனால் எந்த பதிலும் இல்லை. உடனே அவர்கள், கதவை உடைத்து உள்ளே சென்று பார்த்தபோது, மின்விசிறியில் ஜெயகுமார் தூக்கிட்டு சடலமாக கிடந்ததை கண்டு கதறி அழுதனர். தகவலறிந்து செங்கல்பட்டு தாலுகா போலீசார் சம்பவ இடத்துக்கு சென்று, சடலத்தை கைப்பற்றி பிரேத பரிசோதனைக்காக செங்கல்பட்டு அரசு மருத்துவமனைக்கு அனுப்பினர்.இதற்கிடையில், ஜெயகுமார் தற்கொலை செய்து கொண்டதை அறிந்த அப்பகுதி மக்கள், நேற்று காலை செங்கல்பட்டு - சென்னை செல்லும் புலிபாக்கம் கூட்டு சாலையில் திரண்டனர். அங்கு சாலை மறியலில் ஈடுபட்டனர். அவர்கள் ‘ஜெயகுமார் சாவுக்கு தாலுகா போலீஸ்தான் காரணம்’ என கூறி கோஷமிட்டனர்.இதையறிந்த செங்கல்பட்டு டிஎஸ்பி கந்தன், தாலுகா இன்ஸ்பெக்டர் இளங்கோவன் மற்றும் போலீசார் சம்பவ இடத்துக்கு சென்று, மறியலில் ஈடுபட்டவர்களிடம் சமரசம் பேசினர். பின்னர், செங்கல்பட்டு தாசில்தார் பாக்கியலட்சுமி, பொதுமக்களிடம் பேச்சுவார்த்தை நடத்தினார். அப்போது, ‘பணம் கேட்டு போலீசார், ஜெயகுமாரை மிரட்டினர். மேலும் தகாத வார்த்தையால் திட்டினர். எனவே போலீசார் மீது நடவடிக்கை எடுக்க வேண்டும்’’ என ஆவேசமாக கூறினர்.அதற்கு, ‘விசாரணை நடத்தி உரிய நடவடிக்கை எடுக்கப்படும்’’ என தாசில்தார் உறுதியளித்தார். இதை தொடர்ந்து அனைவரும் மறியலை கைவிட்டனர். இச்சம்பவத்தால் அப்பகுதியில் 3 மணி நேரம் போக்குவரத்து பாதிக்கப்பட்டது.இந்நிலையில், நேற்று மாலை ஜெயகுமாரின் உடல் பிரேத பரிசோதனை முடிந்து, அரசு மருத்துவமனையில் இருந்து புலிப்பாக்கத்தில் உள்ள அவரது வீட்டுக்கு கொண்டு செல்லப்பட்டது. அப்போது ஜெயகுமார் தற்கொலைக்கு காரணமான போலீசார் மீதும், அவர்களுக்கு உடந்தையாக இருந்தவர்கள் மீதும் நடவடிக்கை எடுக்க வலியுறுத்தி நூற்றுக்கு மேற்பட்டோர் புலிப்பாக்கம் அருகே சென்னை - திருச்சி தேசிய நெடுஞ்சாலையில் சாலை மறியலில் ஈடுபட்டனர். அப்போது, ஜெயகுமார் படத்துடன் கண்ணீர் அஞ்சலி பேனரை கையில் ஏந்தி கோஷமிட்டனர்.டிஎஸ்எபி கந்தன், இன்ஸ்பெக்டர்கள் இளங்கோவன், சவுந்தர்ராஜன் உள்பட 50க்கு மேற்பட்ட போலீசார், அங்கு சென்று, மறியலில் ஈடுபட்டவர்களை களைந்து செல்லும்படி கூறினர். அதற்கு, ஜெயகுமார் சாவில் சம்பந்தப்பட்டவர்களை கைது செய்ய வேண்டும் என கூறி கோஷமிட்டனர்.இதனால் ஆத்திரமடைந்த போலீசார், மறியலில் ஈடுபட்ட ஆண்கள், பெண்கள் என அனைவர் மீதும் தடியடி நடத்தினர். மேலும், கண்ணீர் அஞ்சலி பேனரையும் கிழித்து எறிந்தனர். இதில் மறியலில் ஈடுபட்ட அனைவரும் நாலாபுரமும் சிதறி ஓடினர். தலை தெறிக்க ஓடிய பொதுமக்கள், சாலையோரம் நின்று, தடியடி நடத்திய போலீசாரை கண்டித்து கோஷமிட்டனர். இதையொட்டி அங்கு பதற்றம் ஏற்பட்டது.பின்னர், பொதுமக்களிடம் சமரசம் பேசிய டிஎஸ்பி கந்தன், உரிய நடவடிக்கை எடுக்கப்படும் என உறுதியளித்தார். இதையடுத்து அவர்கள் போராட்டத்தை கைவிட்டனர். புலிப்பாக்கம் பகுதியில் பதற்றம் நிலவுவதால், அங்கு 200க்கு மேற்பட் போலீசார் குவிக்கப்பட்டனர். இச்சம்பவத்தால் சென்னை - திருச்சி தேசிய நெடுஞ்சாலையில் கடும் போக்குவரத்து நெரிசல் ஏற்பட்டு, சுமார் 10 கிமீ தூரத்துக்கு வாகனங்கள் அணி வகுத்து நின்றன.