Karur - Dinakaran

தவறான ஆவணங்களோடு செயல்படும் மணத்தட்டை மணல் குவாரிக்கு தடை விதிக்க வேண்டும்

கரூர், அக்.16 :  தவறான ஆவணங்களோடு செயல்படும் மணத்தட்டை மணல் குவாரி இயங்க தடை விதிக்க வேண்டும் என்று சுற்றுச்சூழல் பாதுகாப்பு இயக்கம் வலியுறுத்தி உள்ளது. காவிரி ஆறு பாதுகாப்பு இயக்கம், தமிழ்நாடு சுற்றுச்சூழல் பாதுகாப்பு இயக்க ஒருங்கிணைப்பாளர் முகிலன் கலெக்டர் அலுவலகத்திற்கு மனு அளிக்க வந்தார்.  முன்னதாக அவர் நிருபர்களுக்கு அளித்த பேட்டி: கரூர் மாவட்டம் மணத்தட்டையில் தற்போது மணல் குவாரி இயங்கி வருகிறது. இது மணப்பாறை கூட்டுகுடிநீர் திட்டம் 430மீ தூரத்தில் இருப்பதால் அனுமதித்தது சட்டவிரோதம். செல்லுபடியாகாது என மதுரை ஐகோர்ட் ஆணையர்குழு பார்வையிட்டு அறிக்கை தாக்கல் செய்துள்ளது.  மேலும் ராஜேந்திரம் மணல் கிடங்குக்கு அனுமதி கொடுக்கவில்லை என அதிகாரிகளும் தெரிவித்துள்ளனர். இதுகுறித்து நடவடிக்கை எடுக்கக்கோரி கடந்த 9ம்தேதி நேரில் கலெக்டரிடம் மனுஅளித்தும் நடவடிக்கை இல்லை. சமூக சொத்து கொள்ளையடிப்பதை தடுத்துநிறுத்த, குளித்தலை, மணப்பாறை குடிநீர் ஆதாரத்தை பாதுகாக்கவும் 12ம்தேதி குவாரியை முற்றுகையிட சென்றவர்களை தடுத்து பேச்சுவார்த்தைக்கு வருமாறு போலீசார் அழைத்தனர். அப்போது பதில் ஏதும் கூறாமல் கைதுசெய்து மண்டபத்தில் அடைத்தனர். மேலும் அவர்கள் பிணையில் விடமுடியாத பிரிவுகளில் 2 பெண்கள் உள்பட 14பேரை கைது செய்து சிறையில் அடைத்தனர். எவ்வித நிபந்தனையும் இன்றி அவர்களை விடுதலை செய்யவேண்டும். தவறான ஆவணங்களைக்காட்டி இயங்கும் மணத்தட்டை மணல்குவாரி இயங்க தடை விதிக்கவேண்டும். அனுமதியின்றி இயங்கும் மணல் கிடங்கை மூடவேண்டும். ஆட்சியாளர்களின் தவறான நோக்கத்திற்கு அதிகாரிகள் துணைபோவதை தடுத்துநிறுத்த வேண்டும். பொய்யான புகாரை அதாவது தன்னை பணி செய்ய விடாமல் தடுத்ததாக அளித்த பொதுப்பணித்துறை அதிகாரி மீது நடவடிக்கை எடுக்க வேண்டும். யாரைக்காப்பாற்ற இவ்வாறு நடந்து கொள்கின்றனர் என தெரியவில்லை. இவ்வாறு அவர் கூறினார்.

குந்தாணிபாளையம் மக்களுக்கு இலவச மனைப்பட்டா வழங்க வேண்டும்

கரூர், அக். 16: கரூர் மாவட்ட கலெக்டர் அலுவலகத்தில் நேற்று மக்கள் குறைதீர் கூட்டம் கலெக்டர் அன்பழகன் தலைமையில் நடந்தது. இதில் நத்தமேடு குந்தாணிபாளையம் பகுதியில் வசித்து வரும் பொதுமக்களில் சிலர் வழங்கிய மனுவில் கூறியிருப்பதாவது: இப்பகுதியில் கடந்த 18 ஆண்டுகளாக வசித்து வருகிறோம். குறிப்பிட்ட இடத்தில் வசித்து வந்த நிலையில், அந்த இடத்துக்கும் உரிமை கொண்டாடப்படுவதால் எங்களுக்கு குடியிருக்க இடமின்றி சிரமப்பட்டு வருகிறோம். எனவே, எங்களின் நிலை அறிந்து வீட்டுமனைப்பட்டா வழங்க நடவடிக்கை எடுக்க வேண்டும் என மனுவில் தெரிவித்துள்ளனர். கரூர் லாலாப்பேட்டையை சேர்ந்த மாற்றுத்திறனாளி நாகராஜ் என்பவர் வழங்கிய மனுவில், லாலாப்பேட்டை சிந்தலவாடி ஊராட்சி எல்லையில் அரசு ஆரம்ப சுகாதார நிலையம் செயல்பட்டு வருகிறது. கிருஷ்ணராயபுரம் தாலுகாவை சேர்ந்த கள்ளப்பள்ளி, சிந்தலவாடி, மகாதானபுரம், பிள்ளாபாளையம் போன்ற பல்வேறு பகுதிகளை சேர்ந்த பொதுமக்கள் வந்து செல்கின்றனர். மேலும், மாதத்திற்கு 10க்கும் மேற்பட்ட பிரசவம் நடைபெறுகிறது. மற்ற சுகாதார நிலையங்களை விட இங்குதான் அதிகளவு பொதுமக்கள் வந்து செல்கின்றனர். ஆனால், இந்த மருத்துவமனையில்  வசதிகள் மிகவும் குறைவாகவே உள்ளது. எனவே, இந்த ஆரம்ப சுகாதார நிலையத்தை மேம்படுத்தப்பட்ட சுகாதார நிலையமாக மாற்ற நடவடிக்கை எடுக்க வேண்டும் என மனுவில் தெரிவித்துள்ளார்.கரூர் மாவட்டம் கிருஷ்ணராயபுரம் தாலுகா குறிக்காரன்பட்டி பகுதியினர் இந்திய கம்யூனிஸ்ட் கட்சியினருடன் வழங்கிய மனுவில், குறிக்காரன்பட்டியில் அரசு ஆரம்ப பள்ளி மற்றும் அங்கன்வாடி மையம் உள்ளது. ஆரம்ப பள்ளியில் 70க்கும் மேற்பட்ட மாணவ, மாணவிகள் பயின்று வருகின்றனர். அங்கன்வாடி மையத்திலும் அதிகளவு குழந்தைகள் உள்ளனர். ஆனால், பள்ளியில் ஆவணங்களை பாதுகாக்க பீரோ போன்ற அடிப்படை வசதிகள் இல்லை. மேலும், அருகில் உள்ள அங்கன்வாடி மையமும் சுற்றுச் சுவரின்றி உள்ளது. சாலையோரம் இரண்டுமே செயல்படுவதால் பாதுகாப்பற்ற நிலை உள்ளது. எனவே, பள்ளிக்கும், அங்கன்வாடி மையத்திற்கும் சுற்றுச்சுவர் எழுப்ப நடவடிக்கை எடுக்க வேண்டும் என மனுவில் தெரிவித்துள்ளனர். புலியூர் அடுத்த கொல்லபாளையம் தெருவை சேர்ந்த கந்தசாமி என்பவர் தனது 11வயது மகளுடன் வழங்கிய மனுவில்,எனது 11 வயது மகளின் இருதயம் இடம் மாறியுள்ளது. அவருக்கு இருதய மாற்று அறுவை சிகிச்சை செய்ய வேண்டும் என மருத்துவர்கள் தெரிவித்துள்ளனர். அறுவை சிகிச்சைக்காக கோவை தனியார் மருத்துவமனைக்கு அழைத்துச் சென்றோம். ரூ.3லட்சம் வரை செலவாகும் என மருத்துவர்கள் தெரிவித்துள்ளனர். குடும்பத்தில் நான் மட்டுமே கூலி தொழில் செய்து வருகிறேன். எந்தவித வசதியும் இல்லை. எனவே, அறுவை சிகிச்சை மேற்கொள்ள கருணை உதவித்தொகை வழங்க நடவடிக்கை எடுக்க வேண்டும் என மனுவில் தெரிவித்துள்ளார்.

கரூர் கலெக்டர் அலுவலகத்தில் காலியான தொட்டியில் குடிநீர் நிரப்பப்படுமா?

கரூர், அக். 16: கரூர் கலெக்டர் அலுவலகத்தில் காலியாக உள்ள குடிநீர் தொட்டியில் தண்ணீர் நிரப்ப வேண்டும் என்று பொதுமக்கள் கோரிக்கை விடுத்துள்ளனர். கரூர் தாந்தோணிமலையில் கலெக்டர் அலுவலகம் உள்ளது. இங்கு வாரந்தோறும் திங்கள்கிழமை மக்கள் குறைதீர் நாள் கூட்டம் நடைபெற்று வருகிறது. இந்த நாட்களில் மாவட்டத்தின் பல்வேறு பகுதிகளில் இருந்து நூற்றுக்கணக்கான பொதுமக்கள் தங்களின் கோரிக்கை சம்பந்தமான மனுக்களை அளித்து வருகின்றனர். இதேபோல், மற்ற நாட்களிலும், ஆதார் உட்பட பல்வேறு சேவை பணிகளுக்காக ஏராளமான பொதுமக்கள் வந்து செல்கின்றனர். ஆனால், கலெக்டர் அலுவலக வளாகத்தில் பொதுமக்களுக்கு முக்கிய தேவையான குடிநீர் வசதி இல்லாமல் உள்ளது. கடந்த சில மாதங்களுக்கு முன்பு சுட்டெரிக்கும் வெயில் வாட்டிய நிலையில், மாவட்ட நிர்வாகத்தின் ஏற்பாட்டின் பேரில், சின்டெக்ஸ் டேங்க் வைக்கப்பட்டு குடிநீர் வசதி செய்து தரப்பட்டது. தற்போது அந்த டேங்கில் துளி தண்ணீர் கூட வருவதில்லை. தற்போது வெயிலின் தாக்கம் குறைந்தாலும் கலெக்டர் அலுவலகத்துக்கு வந்து செல்லும் மக்களுக்கு குடிநீர் தேவை அதிகமாக உள்ளது.எனவே, இதனை கவனத்தில் கொண்டு, பொதுமக்கள் பயன்படுத்தும் வகையில் சின்டெக்ஸ் டேங்கில் தண்ணீர் வசதி கொண்டு வருவதற்கான ஏற்பாடுகளை சம்பந்தப்பட்ட அதிகாரிகள் மேற்கொள்ள வேண்டும் என அனைத்து தரப்பினர்களும் எதிர்பார்க்கின்றனர்.நேற்று நடைபெற்ற மக்கள் குறைதீர் நாள் கூட்டத்தில் கூட, நூற்றுக்கணக்கான பொதுமக்கள் வந்து சென்றனர். ஆனால், அலுவலக வெளிப்பகுதியில் வைக்கப்பட்டிருந்த டேங்கில் தண்ணீர் நிரப்பப்படாமல் உள்ளதால் குடிநீருக்காக ஏராளமான பொதுமக்கள் தேடி அலைந்தனர். இதுகுறித்து அதிகாரிகள் கண்காணித்து தண்ணீர் பிரச்னையை தீர்க்க தேவையான ஏற்பாடுகளை அதிகாரிகள் மேற்கொள்ள வேண்டும் என கோரிக்கை விடுக்கப்பட்டுள்ளது.

புகழூரான் வாய்க்காலில் காகித கழிவு கலப்பதால் குடிநீர் மாசு

கரூர், அக். 16: புகழூரான் வாய்க்காலில் காகித கழிவு கலப்பதை தடுக்க நடவடிக்கை எடுக்க வேண்டும் என்று கலெக்டரிடம் கோரிக்கை விடுக்கப்பட்டுள்ளது. கரூர் மாவட்ட கலெக்டர் அலுவலகத்தில் கலெக்டர் அன்பழகன் தலைமையில் நேற்று மக்கள் குறைதீர் கூட்டம் நடைபெற்றது. கூட்டத்தில் மாவட்டத்தின் பல்வேறு பகுதிகளில் இருந்து கோரிக்கை சம்பந்தமான மனுக்களை பொதுமக்கள் கலெக்டரிடம் வழங்கினர். இதில், மண்மங்கலம் தாலுகா காவிரி ஆறு பாதுகாப்பு இயக்கம் மற்றும் புகளூர் பாசன விவசாயிகள் சங்கத்தினர் வழங்கிய மனுவில், புகளூர் வாய்க்காலில் மழைக்காலங்களில் காகித ஆலை விஷக்கழிவு நீர் முழுவதுமாக திறந்து விடப்படுகிறது. தற்போது 15 நாள் வாய்க்காலில் ஆலை கழிவு நீர் வருகிறது. மேலும், வளமான புகளூர் வாய்க்கால் மற்றும் வாங்கல் வாய்க்கால், நெரூர் வாய்க்காலில் கலந்து இந்த வாய்க்கால் பாசனம் வளமாக பூமியாக இருந்தது. தற்போது, கலர் மாறி வருவதால் கோரையை தவிர மற்ற பயிர்கள் வளராத நிலை ஏற்பட்டுள்ளது. தற்போது தோட்டக்குறிச்சியில் இருந்து நெரூர் வரை ஆடு, மாடு, மக்களுக்கு குடிநீர் கிடைக்க முடியாத நிலை உள்ளது. எனவே, மாவட்ட கலெக்டர் புகழூரான் வாய்க்காலில் காகித கழிவு வராமல் தடுக்க நடவடிக்கை எடுக்க வேண்டும் என மனுவில் தெரிவித்துள்ளனர்.

அனுமதியற்ற பாரில் ரகளை வாலிபருக்கு அரிவாள் வெட்டு 6 பேர் கைது : ஒருவருக்கு வலை

கரூர், அக்.16:  கரூர் அருகே அனுமதியின்றி நடத்திய பாரில் ஏற்பட்ட பயங்கர ரகளையில் ஒருவருக்கு அரிவாள் வெட்டு விழுந்தது. 7 பேரை பிடித்து போலீசார் விசாரணை நடத்தி வருகின்றனர். கரூர் அருகே உள்ள ஆத்தூர் பிரிவு சாலையில் டாஸ்மாக் மதுக்கடை இயங்கி வந்தது. நெடுஞ்சாலைகளில் உள்ள பார்கள் அகற்றப்பட்டபோது இங்கிருந்த அரசு மதுக்கடை மற்றும் பார் அகற்றப்பட்டது. எனினும் கடந்த ஓராண்டுக்கும் மேலாக அனுமதியின்றி மதுவிற்பனை செய்யும் பார் நடத்தப்பட்டு வந்தது. இக்கடையை குளித்தலை ஐநூற்றுமங்கலம் பாலமுருகன் என்பவர் நடத்தி வருகிறார். இவரது அண்ணன் சிவா (28) தம்பிக்கு துணையாக கடையில் இருந்து வருகிறார்.  இந்நிலையில் நேற்று முன்தினம் இரவு சிலர் மதுகுடித்தபோது கடையில் மயங்கி கிடந்த ஒருவரை தண்ணீர் ஊற்றி சிவா அங்கிருந்து கிளம்ப சொன்னதாக தெரிகிறது. இதனை சக குடிமகன்கள் கண்டித்தனர். இதனால் நேற்று காலை கடைக்கு சிலர் வந்து இந்த சம்பவம் குறித்து தட்டிக்கேட்டனர். அப்போது அவர்களுக்கும் கடைநடத்துவோருக்கும் இடையே கடும் மோதல் ஏற்பட்டது. அப்போது கடை இங்கு இருக்கக்கூடாது மாற்றவேண்டும் என கோரிவரும் சிலரும் இதில் கலந்து கொண்டனர். சிமென்ட் டேபிள்களை அவர்கள் உடைத்து, கடையின் ஜன்னலையும் பிடித்து இழுத்தனர். இதனால் ஆத்திரம் அடைந்த சிவா பெரிய அரிவாளை எடுத்து வந்து வீசினார். இதில் புன்னம் பகுதியை சேர்ந்த பழனிச்சாமி(35) என்பவருக்கு தலையில் வெட்டு விழுந்ததது. இதுபற்றி அறிந்த டவுன் போலீசார் அங்கு விரைந்தனர். போலீசைக்கண்டதும் அனைவரும் ஓட்டம் பிடித்தனர். இதில் 6 பேரைகைது செய்து விசாரணை நடத்தி வருகின்றனர். மேலும் ஓருவரை தேடி வருகின்றனர். காயம் அடைந்த பழனிச்சாமி கரூர் அரசு மருத்துவமனையில் அனுமதிக்கப்பட்டுள்ளார். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

மர்ம காய்ச்சலுக்கு பெண் பலி

கரூர், அக.16:   கரூர் அருகே மர்ம காய்ச்சலுக்கு பெண் பலியானார். கரூர் அருகே உள்ள அருகம்பாளையம் தங்கநகரை சேர்ந்த பெருமாள் மனைவி ராஜாமணி(42). வீட்டில் தறி வைத்து நடத்தி வருகின்றனர். கடந்த 3 நாட்களாக ராஜாமணிக்கு காய்ச்சல் இருந்து வந்தது. நேற்று முன்தினம் கரூர் அரசு மருத்துவமனையில் சேர்த்துள்ளனர். நேற்று சிகிச்சை பலனின்றி இறந்தார். காய்ச்சலுக்காக மருத்துவமனையில் சேர்த்தோம். ஆனால் இசிஜி எடுத்து பரிசோதனை செய்துகொண்டிந்தனர். நேரடியாக சிகிச்சை அளிக்கவில்லை. அவ்வாறு சிகிச்சை அளித்திருந்தால் பிழைத்திருப்பார் என உறவினர்கள் கூறினர்.

குளித்தலை தொகுதியில் வாக்காளர் பட்டியல் திருத்த முகாம்

குளித்தலை, அக்.16: குளித்தலை தொகுதியில் நடந்த வாக்காளர் சேர்த்தல், நீக்கல் சிறப்பு முகாமை எம்எல்ஏ ராமர் ஆய்வு செய்தார்.குளித்தலை தொகுதியில் குளித்தலை, தோகைமலை, கிருஷ்ணராயபுரம் கிழக்கு ஒன்றியம் மற்றும் மருதூர் நங்கவரம் பேரூராட்சி ஆகிய பகுதியில் மொத்தம் 269 வாக்குசாவடிகள் உள்ளன.தேர்தல் ஆணையம் மூன்று கட்டங்களாக வாக்காளர் சேர்த்தல், நீக்கல், முகவரி மாற்றம் குறித்து சிறப்பு முகாம் நடத்தியது. அதில் 3ம் கட்டமாக நடைபெற்ற வாக்காளர் சேர்த்தல் முகாம் குளித்தலை தொகுதிக்குட்பட்ட 269 வாக்குசாவடிகளில் நடைபெற்றது. இந்த சிறப்பு முகாமில் 18 வயது பூர்த்தியடைந்த ஏராளமான ஆண்கள், பெண்கள் ஆர்வத்துடன் தங்களுடைய ஓட்டுரிமையை நிலைநாட்ட ஆர்வத்துடன் விண்ணப்பங்கள் அளித்தனர். இந்த சிறப்பு முகாம் நடைபெற்ற குளித்தலை ஆண்கள் மேல்நிலைப்பள்ளி வாக்கு சாவடிக்கு எம்.எல்.ஏ ராமர் நேரில் சென்று வாக்காளர் பெயர் சேர்த்தல், நீக்கல் முகவரி மாற்றம் குறித்து, அந்தந்த வாக்குசாவடி அலுவலரிடம் விளக்கம் கேட்டு ஆய்வு செய்தார். அப்போது முன்னாள் எம்.எல்.ஏ மாணிக்கம், ஒன்றிய செயலாளர்கள் உமாபதி, சந்திரன் நிர்வாகிகள் மெடிக்கல் மாணிக்கம், வக்கீல் சாகுல்அமீது, தமிழரசன், சலாவுதீன், சரவணன், பிரசாந்த், அருண்மொழி, முருகேசன், மாணிக்கம் உள்பட பலர் உடனிருந்தனர்.

கரூர் கலெக்டர் அலுவலகத்தில் மக்கள் குறைதீர் கூட்டம் 258 மனுக்கள் குவிந்தன

கரூர், அக். 16: கரூர் மாவட்ட கலெக்டர் அலுவலகத்தில் நேற்று மக்கள் குறைதீர் நாள் கூட்டம் நடைபெற்றது. கரூர் மாவட்ட கலெக்டர் அன்பழகன் தலைமை வகித்து, மாவட்டத்தின் பல்வேறு பகுதிகளில் இருந்து முதியோர், விதவை, மாற்றுத்திறானிகள் உதவித்தொகை, வீட்டு மனைப்பட்டா, தொழில்கடன், குடிநீர் வசதி போன்ற பல்வேறு கோரிக்கைகள் சம்பந்தமாக வரப்பெற்ற 258 மனுக்களை பெற்று சம்பந்தப்பட்ட துறை அதிகாரிகளிடம் வழங்கி நடவடிக்கை மேற்கொள்ள உத்தரவிட்டார். இம்முகாமில், டிஆர்ஓ சூர்யபிரகாஷ், மக்கள் குறைதீர்க்கும் தனித்துணை கலெக்டர் மீனாட்சி, பிற்படுத்தப்பட்டோர் மற்றும் சிறுபான்மை நல அலுவலர் குமரேசன், மாவட்ட ஆதி திராவிடர் நல அலுவலர் லீலாவதி மற்றும் அரசு அலுவலர்கள் கலந்து கொண்டனர்.

சுத்தமான உணவு வகைகளை மட்டுமே பயன்படுத்துவோம்

க.பரமத்தி, அக்.16:  சுத்தமான சுகாதாரமான உணவு வகைகளை மட்டுமே பயன்படுத்துவோம் என கார்வழி தொடக்கப்பள்ளி மாணவர்கள் உறுதிமொழி எடுத்து கொண்டனர். மாவட்ட முதன்மை கல்வி அலுவலர் தங்கவேல் வழிகாட்டுதலின்படி க.பரமத்தி ஒன்றியம் கார்வழி ஊராட்சி ஒன்றிய தொடக்கப்பள்ளியில் உலக கைகள் கழுவும் தினவிழா நடைபெற்றது. விழாவில் பள்ளி ஆசிரியர் தங்கராஜ் வரவேற்றார். அன்னையர் குழு உறுப்பினர் புவனேஸ்வரி பங்கேற்று பல்வேறு போட்டிகளில் வெற்றி பெற்றவர்களுக்கு பரிசு வழங்கினார். பள்ளித் தலைமை ஆசிரியர் வாசுதேவன் தலைமை வகித்து பேசுகையில், கைகள் கழுவுதல் பற்றிய செயல் முறை விளக்க பயிற்சியினை மாணவ, மாணவிகளுக்கு அளித்தார். இதைத்தொடர்ந்து அனைத்து மாணவர்களும் முறையாக கை கழுவினர். பின்னர் அசுத்தமான சுகாதாரமான உணவு வகைகளை மட்டுமே பயன்படுத்துவோம் என மாணவர்கள் அனைவரும் உறுதிமொழி எடுத்து கொண்டனர். பின்னர் அப்துல்கலாம் பிறந்தநாளையொட்டி பல்வேறு போட்டிகள் நடத்தப்பட்டு மாணவ, மாணவிகளுக்கு பரிசுகள் வழங்கப்பட்டது. விழாவில் பள்ளி மாணவ, மாணவிகள் பெற்றோர்கள் உள்பட பலர் கலந்து கொண்டனர். கரூர், அக். 16: கரூர் மாவட்ட கலெக்டர் அன்பழகன் விடுத்துள்ள செய்திக்குறிப்பு: மருத்துவ பணியாளர் தேர்வு வாரியத்தால் அறிவிக்கப்பட்ட ரேடியோதெரபி டெக்னீசியன் பணி காலியிடங்களுக்கு தகுதி வாய்ந்த பதிவுதாரர்கள் அடங்கிய பட்டியல் தயாரிக்கப்பட உள்ளது. இந்த பணியிடங்களுக்கு பிஎஸ்சி ரேடியோ தெரபி டெக்னீசியன் கல்வித்தகுதி பெற்றிருக்க வேண்டும். இந்த காலிப்பணியிடத்திற்கு வயது வரம்பு 1.7.2018 அன்று தாழ்த்தப்பட்ட வருப்பினர், பழங்குடியினர், மிகவும் பிற்படுத்தப்பட்டோர், பிற்படுத்தப்பட்டோர் உச்ச வயது வரம்பு இல்லை. பகிரங்க போட்டியாளர்களுக்கு (ஒசி) உச்ச வயது வரம்பு 30 ஆகும். ரேடியோதெரபி டெக்னீசியன் காலிப்பணியிடம் இந்த கல்வித்தகுதிக்கு உட்பட்ட பதிவுதாரர்கள் அக்டோபர் 17ம்தேதி புதன்கிழமை காலை 10 மணிக்கு மேல் 5மணிக்குள் அனைத்து அசல் கல்விச்சான்றுகள், சாதிச் சான்று, ஆதார் அட்டை, குடும்ப அட்டை ஆகியவற்றுடன் கரூர் வெண்ணைமலையில் உள மாவட்ட வேலை வாய்ப்பு அலுவலகத்திற்கு நேரில் வர வேண்டும் .

சீராக குடிநீர் கிடைக்க ஆழ்குழாய் கிணறு கூடுதலாக அமைக்க நடவடிக்கை வேண்டும்

கரூர், அக். 16:  மொஞ்சனூர் கிராம மக்களுக்கு குடிநீர் சீராக விநியோகம் செய்ய கூடுதலாக ஆழ்குழாய் கிணறு அமைக்க நடவடிக்கை எடுக்க வேண்டும் என்று கலெக்டரிடம் மனு அளிக்கப்பட்டது.கரூர் மாவட்ட கலெக்டர் அலுவலகத்தில் நடந்த மக்கள் குறைதீர் கூட்டத்தில், அரவக்குறிச்சி தாலுகா மொஞ்சனூர் கிராம மக்கள் சிலர் வழங்கிய மனுவில், இந்த பகுதியில் ஏராளமான குடும்பத்தினர் வசித்து வருகிறோம். ஆனால், ஆழ்குழாய் இல்லாத காரணத்தினால் தண்ணீர் வசதி சரிவர கிடைக்கவில்லை. எனவே, எங்கள் பகுதிக்கு கூடுதலாக ஆழ்துழாய் கிணறு அமைக்க நடவடிக்கை எடுக்க வேண்டும். மேலும், பெரும்பாலான மக்களுக்கு வீட்டு மனைப்பட்டாவும் இல்லை. எனவே மனை பட்டா வழங்க நடவடிக்கை எடுக்க வேண்டும். மேலும், கடந்த சில மாதங்களுக்கு முன்பு வரை வெள்ளக்கோயில் முதல் தென்னிலை வரை விடப்பட்ட பேருந்தும், காங்கேயம் முதல் தொட்டம்பட்டி வரையில் வந்து சென்ற பேருந்தும் தற்போது இயக்கப்படாததால் நாங்கள் பேருந்து வசதி கிடைக்காமல் கடுமையாக அவதிப்படுகிறோம். எனவே, இதுகுறித்து ஆய்வு மேற்கொண்டு தேவையான ஏற்பாடுகளை செய்துதர வேண்டும் என மனுவில் தெரிவித்துள்ளனர்.

தகுதி வாய்ந்த சைக்கிள் வழங்க விளையாட்டு வீரர் கோரிக்கை

கரூர், அக்.16:  கரூர் கலெக்டர் அலுவலகத்தில் நேற்று நடந்த மக்கள் குறைதீர் கூட்டத்தில் குளித்தலை பகுதியை சேர்ந்த விளையாட்டு வீரர் கதிர்வேல் வழங்கிய மனுவில் தெரிவித்துள்ளதாவது: கரூர் மாவட்டம் குளித்தலை அடுத்த வேலங்காட்டுப்பட்டியில் குடும்பத்துடன் வசித்து வருகிறேன். 10ம் வகுப்பு வரை படித்துள்ள நான், சிறுவயது முதலே சைக்கிள் போட்டியில் கலந்து கொள்வதில் ஆர்வம் கொண்டிருந்தேன். கடந்த 2016ம் ஆண்டு ராமநாதபுரம் மாவட்டத்தில் தமிழக அளவில் நடந்த சைக்கிள் போட்டியில் கலந்து கொண்டு தங்கப்பதக்கம் பெற்றேன். தொடர்ந்து 2017ம் ஆண்டு திண்டுக்கல்லில் நடைபெற்ற போட்டியில் கலந்து கொண்டு தங்கப்பதக்கம் வென்றேன். மும்பையில் நடந்த போட்டியில் 3ம் பரிசு பெற்றுள்ளேன். தொடர்ந்து பல்வேறு போட்டிகளில் கலந்து கொண்டு வெற்றி பெற்றுள்ளேன். 2018ம் ஆண்டு அக்டோபர் இறுதியில் நடைபெறவுள்ள தமிழக அளவிலான சைக்கிள் போட்டியிலும், நவம்பர் மாதத்தில் தேசிய அளவிலான சைக்கிள் போட்டியிலும் கலந்து கொள்ள உள்ளேன். நான் ஏழ்மையான குடும்பத்தை சேர்ந்தவன். தற்போது உள்ள சைக்கிளை பயன்படுத்த முடியாத நிலையில், தகுதி வாய்ந்த சைக்கிள் போட்டியில் பங்கேற்க தேவைப்படுகிறது. எனவே, எனக்கு விலை உயர்ந்த சைக்கிள் கிடைக்க நடவடிக்கை எடுக்க வேண்டும் என மனுவில்  தெரிவித்துள்ளார்.

நவராத்திரி விழாவையொட்டி கொலு பொம்மைகள் விற்பனை மும்முரம்

கரூர், அக்.12: நவராத்திரி விழா தொடங்கியுள்ளது. நவராத்திரியையொட்டி கொலு பாம்மைகள் விற்பனை மும்முரமாக நடைபெற்று வருகிறது. கொலு புதிதாக வீடுகளில் வைப்பவர்களும், வீடுகளில் ஏற்கனவே கொலு வைப்பவர்கள் கூடுதலாகவும் கொலு பொம்மைகளை வாங்கி வருகின்றனர். மண்ணால் செய்யப்பட்டு வர்ணம் தீட்டப்பட்ட கொலுபொம்மைகள் செட்டாகவும், தனியாகவும் விற்பனை செய்யப்படுகிறது. கரூர் பசுதீசுவரர்கோயில் முன்புறம், கரூர் காமராஜ் மார்க்கெட் பகுதியில் கொலு பொம்மைகள் விற்பனை மும்முரமாக நடைபெற்று வருகிறது.

மணல் எடுக்கும் தொழில் முடங்கியதால் மாட்டுக்கு தீவனம் வாங்கவே வழியில்லை

குளித்தலை, அக்.12:  குளித்தலை பகுதியில் மணல் எடுக்கும் தொழில் முடங்கியதால் மாட்டுக்கு தீவனம் வாங்கவே வழியில்லை என்று மாட்டு வண்டி உரிமையாளர்கள் வேதனை தெரிவித்துள்ளனர்.கரூர் மாவட்டம், குளித்தலை பகுதி மாட்டுவண்டி உரிமையாளர்கள் சங்கம் சார்பில் சங்கத்தலைவர் கோபால் தமிழ்நாடு மணல் குவாரி இயக்க திட்ட இயக்குநருக்கு கோரிக்கை மனு அனுப்பியுள்ளார். அதில் குறிப்பிட்டுள்ளதாவது:கரூர் மாவட்டம், குளித்தலை பகுதியில் நாங்கள் பரம்பரையாக மாட்டு வண்டியில் மணல் எடுத்து வருகிறோம். கடந்த ஓராண்டுக்கு மேல் அரசு மணல் எடுக்க அனுமதி இல்லாமல் சுமார் 100க்கும் மேற்பட்ட மாட்டு வண்டி தொழிலாளர்களின் வாழ்வாதாரம் பாதிக்கப்பட்டு மிகவும் வறுமையில் வாழ்ந்து வருகிறோம். கடந்த ஓராண்டாக பலமுறை கரூர் மாவட்ட கலெக்டரை சந்தித்து மனு கொடுத்தோம். ஆனால் அவர் மணலுக்கும், எங்களுக்கும் எந்த தொடர்பும் இல்லை எனக்கூறி தவிர்த்து விட்டார். அதனை தொடர்ந்து ஆற்றுப்பாதுகாப்பு பொதுப்பணித்துறை செயற்பொறியாளரை சந்தித்தோம். குளித்தலை உதவி செயற்பொறியாளரை பலமுறை சந்தித்து கோரிக்கை வைத்தோம் பதில் கூற மறுத்துவிட்டார். ஓராண்டுக்கு மேல் எந்த தொழிலும் இல்லாமல் மாடுகளுக்கு வேண்டிய தீவன பொருட்கள் கூட வாங்கி போட வழி இல்லாமலும் வறுமையில் உள்ளதால் வாழ்வாதாரம் முற்றிலும் முடங்கிப்போய் உள்ளது. எனவே எங்களின் நியாயமான கோரிக்கையை ஏற்று அரசு வழிகாட்டுதலின்படி குளித்தலை பகுதியில் மாட்டு வண்டியில் மணல் எடுக்க அனுமதிக்க உத்திரவிட வேண்டும் என கோரிக்கை மனுவில் குறிப்பிட்டுள்ளார்.மாட்டுவண்டி உரிமையாளர்கள் வேதனை

அதிமுக அரசில் ஊழல், கைது நடவடிக்கை தொடர்கிறது

கரூர், அக்.12: அதிமுக அரசில் ஊழல், கைது நடவடிக்கை தொடர்கிறது என்று பாஜக குற்றம் சாட்டியுள்ளது. கரூர் பாராளுமன்ற தொகுதி பாஜக இளைஞர் அணி நிர்வாகிகள் கூட்டம் நேற்று நடைபெற்றது. இதில் பங்கேற்ற பாஜக இளைஞரணி மாநில தலைவர் வினோஜ்செல்வம் நிருபர்களுக்கு அளித்த பேட்டி: சட்டமன்ற தேர்தலில் பாஜகவுக்கு ஆதரவு உள்ளது. ஒரு கருத்துக்கணிப்பை வைத்து பேச முடியாது. ஹைட்ரோ கார்பன் போன்ற எந்த திட்டங்களும் மக்களுக்கு எதிராகவோ, திணிக்கவோ இல்லை. தீங்கு ஏற்படும் திட்டங்களை மத்திய அரசு செயல்படுத்தாது. எச்.ராஜா, கருணாஸ் பேசியதை சுட்டிக்காட்டி ஒருவரை மட்டும் கைது செய்வது பாரபட்சம் என்கிறார்கள். இருவர் பேசியதற்கும் வித்தியாசம் இருக்கிறது.கவர்னர் பற்றி எழுதியதற்காக நக்கீரன்கோபால் மீது நடவடிக்கை எடுத்தது மாநில அரசும், போலீசும்தான். அதிமுக அரசில் ஊழல் , கைது நடவடிக்கை என தொடர்கிறது. ஆதாரங்கள் சிக்கும்போது கவர்னர் நடவடிக்கை எடுப்பார்.ஊழல் அரசை நீக்க வேண்டிய அவசியம் மத்திய அரசுக்கு இல்லை. ஏற்கனவே இந்த அரசைதான் பாஜக இயக்குகிறது என்கிறார்கள், அது உண்மையல்ல. எம்எல்ஏக்கள் நீக்கம் தொடர்பான வழக்கு கோர்ட்டில் உள்ளது. கோர்ட்டு தீர்ப்பின் அடிப்படையில் தான் முடிவு ஏற்படும். மத்திய அமைச்சர் நிதின்கட்கரி கூறிய கருத்தை திரித்து வெளியிட்டுவிட்டார்கள். அதனை அவர் தெளிவுப்படுத்தியிருக்கிறார். இவ்வாறு அவர் கூறினார்.

மின்கம்பி அறுந்து 2 மாடுகள் பலி அதிகாரிகள் வராததால் மறியல்

கடவூர், அக்.12:  கடவூர் அடுத்த மேலப்பகுதி ஊராட்சி வெறியம்பட்டியை சேர்ந்தவர் பிச்சை (60). இவருக்கு சொந்தமான கறவை மாடுகளை வீட்டருகே கட்டி வைத்திருந்தார்.  நேற்று சிந்தாமணிபட்டி துணை மின்நிலையத்திலிருந்து தேவர்மலைக்கு சென்ற உயர் மின் அழுத்த கம்பி திடீரென அறுந்து மாடுகள் மீது விழுந்தது. இதில் இரண்டு கறவை மாடுகள் துடி துடித்து இறந்தன. சம்பவம் நடந்து வெகு நேரமாகியும் சம்மந்தப்பட்ட அதிகாரிகள் யாரும் வராததால் அப்பகுதி மக்கள் திருச்சி-பாளையம் சாலையில் மறியல் செய்தனர். இதனை அடுத்து வருவாய் ஆய்வாளர் டேவிட், சிந்தாமணிபட்டி சிறப்பு சப்-இன்ஸ்பெக்டர் தங்கவேல், விஏஓ மணிவேல் ஆகியோர் மறியலில் ஈடுபட்டோரிடம் பேச்சுவார்த்தை நடத்தி நடவடிக்கை எடுப்பதாக கூறியதை அடுத்து போராட்டத்தை கைவிட்டனர். இதனால் சுமார் அரை மணி போக்குவரத்து பாதிக்கப்பட்டது. இதனை அடுத்து கால்நடை மருத்துவர் ஜெகதீசன் மாடுகளை ஆய்வு செய்தார்.

பெண்கள் தங்கும் விடுதிகளை முறைப்படி பதிய வேண்டும்

கரூர், அக்.12:  பெண்கள் தங்கும் விடுதிகளை முறைப்படி பதிவு செய்ய வேண்டும் என கலெக்டர் தெரிவித்துள்ளார். சமூகநலன், சத்துணவு திட்டத்துறையின் மூலம் வெளியிடப்பட்ட அரசாணைகளின் அடிப்படையில் கரூர் மாவட்டத்தில் உள்ள அரசு மற்றும் தனியார் நிறுவனங்களின் மூலம் நடத்தப்படும் பெண் குழந்தைகள், வளர்இளம் பெண்கள், சிறார்கள் மற்றும் பெண்கள் தங்கும் விடுதிகள், இல்லங்கள் ஆகியவை தமிழ்நாடு பெண்கள் மற்றும் குழந்தைகள் விடுதிகள், இல்லங்கள் நெறிமுறைப்படுத்தும் சட்டப்படி பதிவு செய்யப்பட்டு இயங்க வேண்டும் என தெரிவிக்கப்பட்டுள்ளது.இதுகுறித்த ஆய்வுக்கூட்டம் கலெக்டர் அலுவலகத்தில் நடைபெற்றது. கலெக்டர் அன்பழகன் தலைமை வகித்தார். அவர் பேசுகையில், கரூர் மாவட்டத்தில் செயல்பட்டு வரும் விடுதிகள், இல்லங்களுக்கான பதிவு பெறுதல் மற்றும் ஆய்வு மேற்கொள்ளுதல் குறித்து விவாதிக்கப்பட்டது. தொடர்ந்து பதிவு செய்யப்படாமல் மாவட்டத்தில் செயல்பட்டு வரும் அரசு மற்றும் அரசு சாரா நிறுவனங்கள், அறக்கட்டளைகள், சங்கங்கள் மதம் சார்ந்த நிறுவனங்கள் தொழிற்சாலைகள், ஆகிய தனியார் மற்றும் தனிநபரால் நடத்தப்பட்டு வரும் விடுதிகள், இல்லங்கள் தங்களது கருத்துருக்களை விரைந்து சம்பந்தப்பட்ட துறை அலுவலகத்திற்கு சமர்ப்பித்து தங்களது பதிவினை பெற்றுக்கொள்ள வேண்டும்.  மேலும், இதுகுறித்த தகவலுக்கு மாவட்ட குழந்தைகள் பாதுகாப்பு அலகு, சாமிகாம்ப்ளக்ஸ், வட்டார போக்குவரத்து அலுவலகம் எதிரில், மாவட்ட ஆட்சியரகம் அருகில் கரூர் என்ற முகவரியில் தொடர்பு கொண்டு பெற்றுக் கொள்ளலாம் என்றார்.

லெக்டர் அறிவுறுத்தல் பசுபதிபாளையம் குகை வழிப்பாதைக்கு அணுகுசாலை அமைக்கும் பணி தாமதம்

கரூர்,அக்.12:  கரூர் பசுபதிபாளையம் குகை வழிப்பாதைக்கு அணுகுசாலை அமைக்கும் பணி தாமதமாகிறது. விரைந்து முடிக்க பொதுமக்கள் கோரிக்கை விடுத்துள்ளனர். கரூர் பசுபதிபாளையத்தில் ரயில்வே லெவல் கிராசிங் உள்ளது. இந்த இடத்தில் அடிக்கடி ரயில்வே கேட்போடப்படுவதால் குகை வழிப்பாதை அமைக்க வேண்டும் என வடக்கு பகுதியில் வாழும் பொதுமக்கள் நீண்டகாலமாக கோரிக்கை விடுத்து வந்தனர். இந்த கோரிக்கையை ஏற்று குகைவழிப்பாதை அமைக்க மூன்று முறை பணி துவக்கவிழா நடைபெற்றது. இந்நிலையில் கடந்த சில மாதங்களுக்கு முன் ரயில்வே துறையினர், அவர்கள் பகுதியான இருப்புப்பாதை பகுதியில் குகைவழிப்பாதையை அமைக்கும் வேலையை முடித்தனர். அடுத்த கட்டமாக சுற்றுச்சுவர் மற்றும் அணுகுசாலை அமைக்கப்பட வேண்டும். பல மாதங்கள் ஆகியும் இந்த பணிகள் மந்தகதியிலேயே நடைபெற்று வருகிறது. இதனால் பொதுமக்கள் வழக்கம்போல ரயில்வேகேட் போடப்படும் நேரங்களில் காத்திருந்து சென்று வருகின்றனர். காலை மற்றும் மாலை நேரங்களில் பள்ளி கல்லூரி செல்பவர்களும், வேலைக்கு சென்று வருவோரும் மிகவும் அவதிப்படுகின்றனர். ரயில்வே துறை பணிமுடிந்த நிலையில் மீதமுள்ள பணிகளான அணுகுசாலை மற்றும் சுற்றுச்சுவர் கட்டும் வேலையை துரிதப்படுத்த வேண்டும். போக்குவரத்து நெரிசலுக்கு முற்றப்புள்ளி வைக்க வேண்டும் என பொதுமக்கள் எதிர்பார்க்கின்றனர். 

விரைந்து முடிக்க கோரிக்கை கொசு ஒழிப்பு பணி

கரூர்,அக்.12.  கள்ளபள்ளி ஊராட்சிபகுதியில் கொசுஒழிப்பு பணிகள் நடைபெற்று வருகிறது. குளித்தலை வருவாய்க்கோட்டாட்சியர் லியாகத் இப்பணிகளை ஆய்வு செய்தார். வீட்டை சுற்றியுள்ள தேவையற்ற பொருட்களை அகற்றவேண்டும். தண்ணீர் சேமிப்பு பாத்திரங்களை சுத்தமாகவும், மூடிவைத்தும்பயன்படுத்த வேண்டும், என பொதுமக்களிடம் அலுவலர்கள் தெரிவித்தனர். வட்டார வளர்ச்சி அலுவலர் பிரபாகரன், சுகாதார ஆய்வாளர் சிவானந்தம், கிராமநிர்வாக அலுவலர் லிங்கேசுவரன், ஊராட்சிசெயலர் லட்சுமணன் உள்ளிட்டோர் கலந்துகொண்டனர். வெற்றிலை சாகுபடி அமோகம் கரூர் அடுத்த தோட்டக்குறிச்சி பகுதியில் பயிரிடப்பட்டிருந்த வெற்றிலை கொடிக்கால் தோட்டத்தில் கொழுந்து வெற்றிலைகளை பறிக்கும் விவசாய பெண். 

குடும்ப அட்டையில் தவறான பதிவை சரி செய்து

க.பரமத்தி, அக். 12: குடும்ப அட்டையில் இரு சிலிண்டர் என தவறான பதிவை சீரமைத்து மண்ணெண்ணை வழங்க நடவடிக்கை எடுக்காத நிலையால் ஓராண்டுக்கு மேலாக ஒன்றியம் முழுவதும் ஏழை எளியோர் கடும் அவதிக்குள்ளாகியுள்ளனர்.  கரூர் மாவட்டத்தில் ஏராளமான குடும்ப அட்டைகள் உள்ளன. இதில் அரவக்குறிச்சி வட்டத்தில் சுமார் 54 ஆயிரத்து மேற்பட்ட குடும்ப அட்டைகள் உள்ளன. இதன் கீழ் மொத்தம் 125 நியாய விலைக்கடைகளும் இதில் சுமார் 87 முழு நேர கடைகள் செயல்பட்டு வருகிறது. கீழ் இயங்கி வரும் நியாயவிலைக்கடைகளில் குடும்ப அட்டைகளில் சர்க்கரை கார்டு, மண்ணெண்ணெய் கார்டு, அரிசி கார்டு என பிரிக்கப்பட்டுள்ளது அரிசி கார்டு என்றால் மாதம் 20 கிலோ வரை அரிசி பெறலாம் இதேபோல் சர்க்கரை கூடுதலாகவும்; மண்ணெண்ணெய் தேவைப்படுவோர் அந்த கார்டுக்கு கூடுதல் அளவு மண்ணெண்ணெயும் பெற்று வருகின்றனர். ரேஷன் கடைகளில் அரிசியை தவிர துவரம், உளுத்தம்பருப்பு, பாமாயில், மசாலா பொருட்கள் அடங்கிய பாக்கெட் போன்றவை குறைந்த விலையில் முன்பு வழங்கப்பட்டு வந்தது. ஆனால் தற்போது அரிசியை தவிர பிற பொருட்கள் ரேஷனில் கிடைப்பது அரிதாக உள்ளது மேலும் கடந்த ஆண்டு குடும்ப அட்டையுடன் ஆதார் எண் இணைக்கும் போது ஒன்றியத்தில் உள்ள நியாய விலை கடையில் பயன் பெறும் ஏராளமானகுடும்ப அட்டை பயனாளிகளுக்கு 2 காஸ் சிலிண்டர் வைத்திருப்பதாக தவறாக பதிவு செய்யப்பட்டுள்ளது. இதனால் மண்ணெண்ணை வழங்க இயலாது. எனவே பாதிக்கப்பட்ட பொதுமக்களிடம் விற்பனையாளர் இதற்கு ஒரு சிலிண்டர் மட்டுமே இருப்பதாக காஸ் சிலிண்டர் நிறுவனத்தில் இருந்து சான்றிதழ் பெற்று அவற்றை அரவக்குறிச்சி வட்ட வழங்கல் அலுவலகத்தில் வழங்கும்படி பயனாளிகளை கேட்டு கொணட நிலையில் பொதுமக்களும் காஸ் சிலிண்டர் நிறுவனத்தில் உரிய ஆவணம் பெற்று அதனை அதிகாரிகளிடம் வழங்கினர்இதற்கிடையில் புதியதாக ஸ்மாட் குடும்பஅட்டைகள் வழங்கப்பட்டு பயன்பாட்டிற்கு வந்துள்ளது. இந்நிலையில் குடும்ப அட்டையில் தவறான பதிவால் ஓராண்டு 7மாதங்களை கடந்தும் மண்ணெண்ணை பெற முடியாமல் ஒன்றியம் முழுவதும் ஏழை எளியோர் கடும் அவதிக்குள்ளாகியுள்ளதாக பொதுமக்கள் புலமபி வருகின்றனர்.

தோகைமலையில் உற்பத்தியாளர் குழுவினருக்கு பயிற்சி

தோகைமலை, அக்.12:  தோகைமலையில் அட்மா திட்டத்தின் கீழ் உழவர் உற்பத்தியாளர் குழு உறுப்பினர்களுக்கு சிறப்பு பயிற்சி அளிக்கப்பட்டது. கரூர் மாவட்டம் வேளாண்மைத் துறை சார்பில் உழவர் உற்பத்தியாளர்கள் குழு உறுப்பினர்களுக்கு அட்மா திட்டத்தின் கீழ் சிறப்பு பயிற்சி அளிக்கப்பட்டது. தோகைமலையில் உள்ள கருப்பசாமி கோவில் அருகே நடந்த பயிற்சிக்கு வேளாண்மை துணை இயக்குநர் உமாராணி தலைமை வகித்து பேசுகையில், கூட்டு பண்ணையத்தில் குழுவாக உள்ள விவசாயிகளுக்கு விவசாய தொழில்நுட்ப இயந்திரங்கள் பெறுவதற்கு வங்கியின் மூலம் 100 சதவீதம் மானியத்தில் ரூ.5 லட்சம் வரை நிதி அளிக்கப்படுகிறது. மேலும் மானாவாரி திட்டத்தில் தடுப்பணைகள் அமைப்பதற்கும், உழவு மானியம் வழங்கவும் தோகைமலை ஊராட்சியை தேர்வு செய்யப்பட்டுள்ளது. ஆகவே இதில் அனைத்து விவசாயிகளும் கலந்து கொண்டு பயன்பெற வேண்டும் என தெரிவித்தார். மேலும் கூட்டுப்பண்ணையம், நுண்ணீர் பாசனம், உழவன் செவிலி போன்ற தலைப்புகளிலும் விவசாயிகளுக்கு பயிற்சி அளிக்கப்பட்டது. இந்த பயிற்சியில் வேளாண்மை அலுவலர்கள் அர்சுணன், ஜெயபாரதி, ஷீலாரோஷ், உதவிபொறியாளர் ராமு ஆகியோர் பயிற்சி அளித்தனர்.ஏற்பாட்டை வட்டார தொழில்நுட்ப மேலாளர் பாலசுப்ரமணியன் செய்திருந்தார். பயிர்களை சேதப்படுத்தும் மயில்களை கட்டுப்படுத்த விவசாயிகள் கோரிக்ைககரூர், அக்.12:  பயிர்களை சேதப்படுத்தும் மயில்களை கட்டுப்படுத்த வேண்டும் என விவசாயிகள் எதிர்பார்க்கின்றனர். கரூர் அருகே உள்ள நொய்யல், மரவாபாளையம், நடையனூர், கோம்புப்பாளையம், திருக்காடுதுறை, என்புகழூர், உள்ளிட்ட பல்வேறு பகுதிகளில் விவசாயிகள் நெல், கம்பு, சோளம், எள் வெற்றலை, வாழை, மக்காச்சோளம் பயிரிட்டுள்ளனர். இப்பகுதியில் ஏராளமான மயில்கள் முகாமிட்டு பயிர்களை சேதப்படுத்தி வருகின்றன. கடந்த 7ஆண்டுகளாக காவிரி பிரச்னையால் காவிரியாற்றில் தண்ணீர் இன்றி வாய்க்கால்கள் காய்ந்துகிடந்தன. இந்த ஆண்டு கர்நாடக அணைகள் நிரம்பியதால் வந்த நீரைப்பயன்படுத்தி பயிரிட்டுள்ளோம்., ஆயிரக்கணக்கான ஏக்கரில் பல்வேறு பயிர்களை விளைவித்தும் மயில்கள் சேதப்படுத்துவதால் பெரும் இழப்பு ஏற்படுகிறது. வனத்துறையினர் மயில்களை பிடித்து வனப்பகுதிகளுக்கு கொண்டுசென்று விடவேண்டும் என விவசாயிகள்கோரிக்கை விடுத்துள்ளனர்.