Krishnagiri - Dinakaran

சாதனையாளர்களை உருவாக்கிய டி.கே.சாமி மெட்ரிக்குலேசன் பள்ளி

கிருஷ்ணகிரி மார்க்கெட் செல்லும் சாலையில், புதுப்பேட்டை கார்னேசன் வளாகத்தில் 47 வருடங்களுக்கு முன்பு மாவட்டத்தில் முதன்முதலாக, நிறுவனர் நாதனின் முயற்சியால் இப்பள்ளி உருவாக்கப்பட்டது. அவருக்கு பிறகு நிர்வாக இயக்குநர் பிரான்சிஸ்சேவியர், தாளாளர் பிரபாசேவியர் ஆகியோரின் சீரிய மேற்பார்வையில் இப்பள்ளி சிறப்பாக செயல்பட்டு வருகிறது. சாதனையாளர்களை உருவாக்கி வரும் பள்ளியாக இப்பள்ளி திகழ்ந்து வருகிறது. இதுகுறித்து நிர்வாக இயக்குநர்கள் கூறியது: ஏழை, எளிய, நடுத்தர குடும்பத்தினை சேர்ந்த குழந்தைகள், சிறப்பான முறையில் குறைந்த கல்வி கட்டணத்தில் சீரிய கல்வியை பெற வேண்டும் என்பது எங்கள் பள்ளியின் முக்கிய நோக்கம். மாநகரின் மையப்பகுதியில் இயற்கை காற்றோட்டத்தில் சிறப்பாக செயல்பட்டு வருகிறது. 47 வருடங்களாக சிறப்பான முறையில் சிறந்த பயிற்சியின் முலம் ஒழுக்கம், சிறப்பான கல்வியை வழங்கி வருகிறோம். கடந்த 20 வருடங்களாக, தொடர்ந்து பத்தாம் வகுப்பு அரசு பொதுத்தேர்வில் 100 சதவீதம் தேர்ச்சியை பெற்று கொடுக்கும் பள்ளியாக திகழ்கிறது. கல்வியில் அனுபவம், திறமையை கொண்ட ஆசிரிய, ஆசிரியைகளால் சிறப்பான பயிற்சி வழங்கப்படுகிறது. அனைத்து பாட பிரிவுகளுக்கும் தனித்தனி ஆய்வக வசதி உள்ளது. கல்வியில் பின்தங்கிய மாணவ, மாணவிகளுக்கு தனி கவனம் செலுத்தி, அவர்களை அதிக மதிப்பெண்கள் பெற வைப்பதே இப்பள்ளியின் நோக்கம். மேலும் எல்கேஜி முதல் ஐந்தாம் வகுப்பு வரை உள்ள குழந்தைகளுக்கு எளிமையான ஆங்கில பயிற்சியை, புலமை பெற்ற ஆசிரியர்கள் மூலம் பயிற்சியளிக்கப்பட்டு வருகிறது. மேலும், படிப்பு மட்டும் இல்லாமல் விளையாட்டுக்கும் முக்கியத்துவம் கொடுக்கப்படுகிறது. கபடி, கோ-கோ, சிலம்பம், மற்றும் மனம் இறுக்கம் இல்லாமல் இருக்க யோகா கற்றுக்கொடுக்கப்படுகிறது. ஆண்டுதோறும் ஆண்டு விழா, விளையாட்டு விழா, பெற்றோர்-ஆசிரியர் கலந்தாய்வு கூட்டம்  போன்றவை நடத்தப்பட்டு வருகிறது. இதனால், பெற்றோர்களுக்கும், ஆசிரியர்களுக்கும் ஒரு புரிந்துணர்வு ஏற்படுகிறது. உங்கள் குழந்தைகள் எதிர்காலத்தில் சிறந்த சாதனையாளர்களாக உருவாக எங்கள் டி.கே.சாமி மெட்ரிக்குலேஷன் பள்ளிக்கு வருகை தாருங்கள். எல்கேஜி முதல் பத்தாம் வகுப்பு வரை, தற்போது சேர்க்கை நடந்து வருகிறது. இவ்வாறு நிர்வாக இயக்குநர்கள் கூறினர்.

பிளஸ்1 துணைத்தேர்வுக்கு தட்கல் முறையில் பதிவு செய்ய இன்று கடைசி நாள்

கிருஷ்ணகிரி, மே 17:  கிருஷ்ணகிரி மாவட்ட முதன்மை கல்வி அலுவலர் மகேஸ்வரி வெளியிட்டுள்ள செய்திக்குறிப்பு: மார்ச் 2019ல் நடந்த மேல்நிலை முதலாம் ஆண்டு பொதுத்தேர்வில், தேர்ச்சி பெறாதவர்கள் மற்றும் வருகை புரியாதவர்கள், வரும் ஜூன் மாதம் நடைபெறவுள்ள சிறப்பு துணைத் தேர்வெழுத நிர்ணயிக்கப்பட்ட கடைசி தேதிக்குள் விண்ணப்பிக்க இயலாமல், தற்போது விண்ணப்பிக்க விரும்பும் தனித்தேர்வர்கள் சிறப்பு அனுமதி திட்டத்தின் கீழ் (தட்கல்) விண்ணப்பிக்கலாம்.   தேர்வெழுத விரும்பும் கிருஷ்ணகிரி மாவட்டத்தை சேர்ந்த தனித்தேர்வர்கள், சிஇஓ அலுவலகத்தில் தங்களது விண்ணப்பத்தை இன்றைக்குள்(17ம்தேதி) பதிவு செய்ய வேண்டும். பதிவு செய்ய வரும் போது, தமது மதிப்பெண் பட்டியலின் நகலினையும், தேர்விற்கு வருகை புரியாதவர்கள் தேர்வுக்கூட நுழைவுச் சீட்டினையும் எடுத்து வந்து, பதிவு செய்யும் அலுவலரிடம்   காண்பிக்க வேண்டும். தேர்வு கட்டணமாக ஒரு பாடத்திற்கு ₹50, இதரக் கட்டணம் ₹35, கூடுதலாக சிறப்பு அனுமதி கட்டணமாக ₹1000 மற்றும் பதிவு கட்டணமாக ₹50 சேர்த்து சிஇஓ அலுவலகத்தில் பணமாக செலுத்த வேண்டும். தேர்வுக்கூட அனுமதி சீட்டுகளை இணையதளத்தில் பதிவிறக்கம் செய்து கொள்ள வேண்டும்.  இணையதளத்தில் வெளியிடப்பட்ட அறிவுரைகளின்படி வயது வரம்பு, கல்வித் தகுதி மற்றும் பாடங்கள் வகைப்பாடு அறிந்து, அதன்படி விண்ணப்பிக்க வேண்டும். தனித்தேர்வர்களுக்கு தற்போது வழங்கப்படும் அனுமதி முற்றிலும் தற்காலிகமானது. தனித்தேர்வர்களின் விண்ணப்பம் மற்றும் தகுதி குறித்து ஆய்வு செய்யப்பட்ட பின்னரே, தேர்வு முடிவுகள் வெளியிடப்படும். இவ்வாறு செய்திக்குறிப்பில் தெரிவிக்கப்பட்டுள்ளது.

மாவட்டத்தில் தலைவிரித்தாடும் குடிநீர் பஞ்சம் ₹750 கொடுத்து டிராக்டர் தண்ணீர் வாங்கும் மக்கள் கந்திகுப்பம் கிராமத்தில் அவலம்

கிருஷ்ணகிரி, மே 17: கந்திகுப்பம் கிராமத்தில் தலைவிரித்தாடும் குடிநீர் பிரச்னையால், ஒரு டிராக்டர் தண்ணீரை ₹750 என விலை கொடுத்து வாங்கி பொதுமக்கள் பயன்படுத்தி வருகின்றனர். பர்கூர் ஒன்றியத்தில் உள்ள கந்திகுப்பம் கிராமத்தில், ஆயிரத்திற்கும் மேற்பட்ட குடும்பத்தினர் வசித்து வருகின்றனர். இக்கிராம மக்களுக்கு ஒகேனக்கல் கூட்டு குடிநீர் திட்டம் மற்றும் ஆழ்துளை குழாய்கள் மூலம் குடிநீர் வழங்கப்பட்டு வருகிறது. இக்கிராமத்தில் விநாயகர் தெரு, ஓம்சக்தி கோயில் தெருவில் உள்ள மக்களுக்கு, கடந்த 6 மாதங்களாக சீரான குடிநீர் விநியோகம் செய்யப்படவில்லை. இதனால், அப்பகுதி மக்கள் கடும் அவதியடைந்து  வருகின்றனர். இதுகுறித்து அப்பகுதி மக்கள் கூறியது: எங்கள் பகுதியில் அரசு துணை சுகாதார நிலையத்திற்கு வரும் மக்களின் பயன்பாட்டிற்காக, கடந்த 2015-16ம் ஆண்டு 14வது நிதிக்குழு மானியம் மூலம் ₹25,500 மதிப்பில் சின்டெக்ஸ் தொட்டி அமைக்கப்பட்டது. குடிநீர் தொட்டிக்கு கூட்டு குடிநீர் திட்டம் மூலம் குழாய் அமைக்கப்பட்ட நிலையில், தண்ணீர் விநியோகம் செய்யப்படவில்லை. மேலும், கடந்த சில மாதங்களுக்கு முன்பு ஒகேனக்கல் கூட்டு குடிநீர் திட்டம் மூலம், பொதுக்குழாய் அமைத்து ஓரிரு நாட்கள் குடிநீர் வழங்கினர். இந்நிலையில், திடீரென பொது குழாய்களும் அகற்றப்பட்டது. இதனால், 2 கி.மீ தூரம் சென்று குடிநீர் எடுத்து வருகிறோம். ஒரு சில நாட்களில் அங்கும் தண்ணீர் வருவதில்லை. இதனால், தற்போது 4 வீடுகளை சேர்ந்தவர்கள் ஒன்றிணைந்து, ஒரு டிராக்டர் தண்ணீர் ₹750 என விலைக்கு வாங்கி பகிர்ந்து பயன்படுத்தி கொள்கிறோம். கோடை வெயிலின் தாக்கம் காரணமாக முதியவர்கள், பெண்கள் நீண்ட தூரம் சென்று குடிநீர் எடுத்து வர முடிவதில்லை. எனவே, இப்பகுதியில் பொது குழாய் அமைத்து தண்ணீர் வழங்க நடவடிக்கை எடுக்க வேண்டும். ஏற்கனவே அமைக்கப்பட்டுள்ள சின்டெக்ஸ் தொட்டியிலும், தண்ணீர் விட நடவடிக்கை எடுக்க வேண்டும். இவ்வாறு பொதுமக்கள் கூறினர். அங்கன்வாடிக்கும் தண்ணீர் இல்லை: கந்திகுப்பம் கிராமத்தில் உள்ள அங்கன்வாடி மையத்தில், தற்போது 15 குழந்தைகள் படித்து வருகின்றனர். இதற்கு குடிநீர் வழங்க ஊராட்சி மூலம் சின்டெக்ஸ் தொட்டி அமைக்கப்பட்டது. மேலும், ஒகேனக்கல் கூட்டு குடிநீர் திட்ட குழாயிலிருந்து இணைப்பு கொடுக்கப்பட்டுள்ளது. ஆனால், பயன்பாட்டிற்கு வந்த ஒருநாள் மட்டுமே தண்ணீர் வழங்கப்பட்ட நிலையில், உடனடியாக இணைப்பு துண்டிக்கப்பட்டு, இதுவரை குடிநீர் விநியோகம் செய்யப்படவில்லை.

பர்கூர் அருகே மினி லாரி மீது கார் மோதி 5 பேர் படுகாயம்

கிருஷ்ணகிரி, மே 17:  பர்கூரில் இருந்து கிருஷ்ணகிரி நோக்கி கார் ஒன்று வந்து கொண்டிருந்தது. கிருஷ்ணகிரி-சென்னை தேசிய நெடுஞ்சாலையில் மருதேப்பள்ளி கூட்ரோடு பகுதியில் வந்து கொண்டிருந்தபோது, காரின் டயர் வெடித்தது. இதில் டிரைவரின் கட்டுப்பாட்டை இழந்த கார், தடுப்பு சுவர்களை தாண்டி எதிர்திசைக்கு சென்றது. அப்போது, அவ்வழியே பாலகுறி கிராமத்தில் இருந்து தேங்காய் பாரம் ஏற்றிக் கொண்டு வந்த மினிலாரி மீது கார் மோதியது. இதில், காரும், மினி லாரியும் சாலையோரம் பள்ளத்தில் கவிழ்ந்தன. இந்த விபத்தில், காரில் இருந்த 2 பேரும், மினிலாரியில் இருந்த செட்டிப்பள்ளி கிராமத்தை சேர்ந்த திருப்பதி, திம்மராயன், அம்மாசி ஆகியோர் உட்பட 5 பேர் படுகாயம் அடைந்தனர். காயமடைந்தவர்களை, தேசிய நெடுஞ்சாலை ரோந்து போலீசார் மற்றும் கந்திகுப்பம் போலீசார் மீட்டு, கிருஷ்ணகிரி அரசு மருத்துவமனைக்கு அனுப்பி வைத்தனர். இதுகுறித்து கந்திகுப்பம் போலீசார் விசாரித்து வருகின்றனர்.

கெலவரப்பள்ளி அணைக்கு நீர்வரத்து அதிகரிப்பு

ஓசூர், மே 17: ஓசூர் கெலவரப்பள்ளி அணைக்கு 568 கனஅடியாக நீர்வரத்து அதிகரித்துள்ளது. அணையிலிருந்து 568 கனஅடி நீர் அப்படியே வெளியேற்றப்படுகிறது. கர்நாடகாவில் தென்பெண்ணையாற்று நீர்பிடிப்பு பகுதிகளில் பலத்த மழை பெய்து வருகிறது. இதன் காரணமாக, கிருஷ்ணகிரி மாவட்டம், ஓசூர் அருகே உள்ள கெலவரப்பள்ளி அணைக்கு நீர்வரத்து தொடர்ந்து 5வது நாளாக அதிகரித்துள்ளது. கெலவரப்பள்ளி அணையின் மொத்த கொள்ளளவு 44.28 அடியாகும். தற்போது அணையின் நீர்மட்டம் 41.98 அடியாக உள்ளது. நேற்று முன்தினம் அணைக்கு, விநாடிக்கு 408 கனஅடியாக வந்த தண்ணீர், அப்படியே வெளியேற்றப்பட்ட நிலையில், நேற்று அணைக்கு மேலும் நீர்வரத்து அதிகரித்து, விநாடிக்கு 568 கனஅடி தண்ணீர் வந்துகொண்டிருக்கிறது. அணையின் பாதுகாப்பு கருதி, அணையில் இருந்து இரண்டு மற்றும் மூன்றாம் மதகுகளிலிருந்து 568 கனஅடி தண்ணீரும் அப்படியே வெளியேற்றப்படுகிறது. இதனால், தொடர்ந்து 5வது நாளாக கெலவரப்பள்ளி, தொரப்பள்ளி அக்ரஹாரம், மோரனப்பள்ளி, பாத்தகோட்டா, ஆழியாளம், கோபசந்திரம் உள்ளிட்ட இடங்களில் தென்பெண்ணை ஆற்றில் தண்ணீர் பெருக்கெடுத்து ஓடுகிறது. 

கிருஷ்ணகிரி மாவட்டத்தில் பள்ளி, கல்லூரி பஸ்கள் ஆய்வு

கிருஷ்ணகிரி, மே 15: கிருஷ்ணகிரி மாவட்டத்தில், நேற்று (14ம் தேதி) நடந்த பள்ளி, கல்லூரி வாகன தணிக்கையின் போது 17 வாகனங்களின் தகுதி சான்று ரத்து செய்யப்பட்டது. கிருஷ்ணகிரி மாவட்டத்தில் 732 பள்ளி, கல்லூரி வாகனங்கள் உள்ளது. இந்த வாகனங்களை தணிக்கை செய்யும் பணி 4 கட்டங்களாக மேற்கொள்ளப்படவுள்ளது. முதற்கட்டமாக நேற்று கிருஷ்ணகிரி ஆயுதபடை காவல் மைதான வளாகத்தில் பள்ளி வாகன சிறப்பு விதி 2012ன்படி, வருடாந்திர வாகன தணிக்கை வட்டார போக்குவரத்து அலுவலர் செந்தில்வேலன் தலைமையில், வாகன ஆய்வு குழுவினர் நேரில் பார்வையிட்டு தணிக்கை மேற்கொண்டனர்.இது குறித்து வட்டார போக்குவரத்து அலுவலர் கூறியதாவது: கிருஷ்ணகிரி மாவட்டத்தில் பள்ளி, கல்லூரி வாகனங்கள் 732 உள்ளன. இம்மாதம் (மே மாதம்) இறுதி வரை நான்கு கட்டங்களாக வாகனங்களின் கட்டமைப்பு மற்றும் பாதுகாப்பு அம்சங்களான முதலுதவி பெட்டி, தீயணைப்பு கருவி, படிகட்டுகளின் அளவு, அவசர கால வழி, ஓட்டுநர் இருக்கை, மோட்டார் வாகன விதிகள் குறித்த விழிப்புணர்வு ஸ்டிக்கர்கள் ஒட்டும் பணி, தொலைபேசி எண்கள், பள்ளியின் பெயர், காவல்துறை, தீயணைப்புத்துறை தொடர்பு எண்கள், வாகனத்தை சுற்றி பாதுகாப்பு வளையம், மாணவ, மாணவியர்கள் இருக்கை போன்ற பாதுகாப்பு அம்சங்கள் ஆய்வு செய்யப்பட்டுள்ளது. நேற்று மட்டும் 238 வாகனங்கள் ஆய்வு செய்யப்பட்டதில், 17 வாகனங்களில் பாதுகாப்பு குறைபாடுகள் இருந்தது கண்டுபிடிக்கப்பட்டு, உடனடியாக தகுதி சான்று ரத்து செய்யப்பட்டுள்ளது. பாதுகாப்பு குறைபாடு ஏற்படும் போது பள்ளி நிர்வாகத்திடம் உடனடியாக தகவல் தெரிவித்து, குறைபாடுகளை நிவர்த்தி செய்துகொள்ள ஓட்டுநர்களுக்கு அறிவுறுத்தப்பட்டுள்ளது. எனவே, பள்ளி வாகன ஓட்டுநர்கள் மிகுந்த கவனத்துடன் போக்குவரத்து விதிகளை கடைபிடித்து வாகனங்களை இயக்க வேண்டும். இவ்வாறு அவர் கூறினார். இந்த தணிக்கையில் மோட்டார் வாகன ஆய்வாளர்கள் குமார், செந்தில்குமார், மாவட்ட கல்வி அலுவலர் ராஜா, மாவட்ட முதன்மை கல்வி அலுவலரின் நேர்முக உதவியாளர் சங்கர்ராஜ், பள்ளி கல்வி ஆய்வாளர் ஜெயராமன், தீயணைப்பு அலுவலர் ஆறுமுகம் உள்ளிட்டோர் கலந்துகொண்டனர்.

போச்சம்பள்ளி பகுதியில் நிலத்தடி நீர் உறிஞ்சி விற்பனை அதிகாரிகள் நடவடிக்கை எடுக்க கோரிக்கை

போச்சம்பள்ளி மே 15: போச்சம்பள்ளி சுற்று வட்டார பகுதிகளில் தண்ணீர் உறிஞ்சி விற்பனை செய்யப்படுகிறது. இதனால் நிலத்தடி நீர்வளம் பாதிக்கப்படுவதால் விவசாயிகள் வேதனை அடைந்துள்ளனர். போச்சம்பள்ளி சுற்றுவட்டார பகுதிகளில் பருவமழை பொய்த்து போனதால் ஏரி, குளம், குட்டை உள்ளிட்ட நீர் ஆதாரங்கள் முற்றிலும் வறண்டு காணப்படுகிறது. வரலாறு காணாத அளவிற்கு வறட்சி ஏற்பட்டு பல இடங்களில் தண்ணீர் பற்றாக்குறை ஏற்பட்டுள்ளது. இதனால் தென்னை, மா மரங்கள் காய்ந்து வருகிறது. தண்ணீரை விலை கொடுத்து வாங்கி காய்ந்த மரங்களுக்கு ஊற்றி விவசாயிகள் அதனை காப்பாற்றி வருகின்றனர். இதை பயன்படுத்தி சிலர் இப்பகுதியில் தண்ணீர் உள்ள நிலங்களில் ஆழ்துளை கிணறு அமைத்து தண்ணீர் எடுத்து விற்பனை செய்து வருகின்றனர். வறட்சியால் பாதிக்கப்பட்ட பகுதிகளுக்கு தண்ணீரை டிராக்டர் மூலம் எடுத்து சென்று ₹500 முதல் ₹600வரை விற்பனை செய்து வருகின்றனர். நாள் ஒன்றுக்கு சுமார் 10 லட்சம் லிட்டர் தண்ணீர் வரை உறிஞ்சி விற்பனை செய்யப்படுவதால், நிலத்தடி நீர்மட்டம் குறைந்து வருகிறது. தண்ணீரை உறிஞ்சுவதால் வருங்காலங்களில் தண்ணீருக்கு மேலும் கஷ்டபடும் நிலை உருவாகும். எனவே, அதிகாரிகள் நடவடிக்கை எடுத்து தண்ணீர் உறிஞ்சி விற்பனை செய்வதை தடுக்க வேண்டும் விவசாயிகள் கோரிக்கை விடுத்துள்ளனர்.

போச்சம்பள்ளி பகுதிகளில் கால்நடைகளுக்கு தீவன பற்றாக்குறை

போச்சம்பள்ளி மே 15: போச்சம்பள்ளி சுற்று வட்டார பகுதிகளில் கால்நடைகக்கு தீவன தட்டுப்பாடு ஏற்பட்டுள்ளதால், வெளி மாவட்டங்களில் இருந்து வைக்கோல் கொண்டு வரப்பட்டு, விற்பனை செய்யப்படுகிறது. போச்சம்பள்ளி சுற்று வட்டார பகுதிகளில் தென்மேற்கு பருவமழை போதிய அளவில்  பெய்யாததால், கால்நடைகளுக்கு தீவன தட்டுப்பாடு ஏற்பட்டுள்ளது. கடந்த காலங்களில் நெல் சாகுபடி செய்வதன் மூலம் கிடைக்கும் வைக்கோலை, கால்நடைகளுக்கு தீவனமாக வழங்கி வந்தனர். இந்நிலையில், தற்போது நிலவி வரும் வறட்சியால் அறுவடை செய்யப்பட்ட நெல்லில் இருந்து கிடைக்கும் வைக்கோல் கால்நடைகளுக்கு பற்றாக்குறையாக உள்ளது. இதனால், விவசாயிகள் தங்கள் கால்நடைகளுக்காக திருவண்ணாமலை மாவட்டங்களில் இருந்து வாகனங்கள் மூலம் வைக்கோலை விலை கொடுத்து வாங்கி வந்தனர். இதையறிந்த வியாபாரிகள் வைக்கோல் விலையை ஏற்றி விட்டனர். கடந்த மாதங்களில் ₹150க்கு விற்பனை செய்யப்பட்ட ஒரு கட்டு வைக்கோல் தற்போது ₹250க்கு விற்பனை செய்யப்படுகிறது. வறட்சியை பயன்படுத்தி விலையேற்றப்பட்டதால், கால்நடைகளை வைத்துள்ள விவசாயிகள் கவலை அடைந்துள்ளனர்.

மரச்செக்கு எண்ணெய்யில் கலப்படம்

போச்சம்பள்ளி, மே 15: மரச்செக்கு எண்ணையிலும் கலப்படம் உள்ளதால், அதிகாரிகள் சோதனை செய்து நடவடிக்கை எடுக்க வேண்டும் என கோரிக்கை விடுக்கப்பட்டுள்ளது. சமீபகாலமாக மக்கள் காய்கறிகள், பழங்கள், கீரை வகைகள், செக்கு எண்ணெய் உள்ளிட்ட உணவு முறைக்கு மக்கள் மாறி வருகின்றனர். உடலுக்கு கெடுதல் இல்லை என்பதால் இயற்கை முறை உணவு பொருட்களின் மீது நாட்டம் கொண்டுள்ளனர். இதில் அதிகம் மரச்செக்கு எண்ணைக்கு மவுசு ஏற்பட்டுள்ளது.தற்போது பல்வேறு பகுதிகளில் மரச்செக்கு எண்ணெய் பிரபலமடையத் தொடங்கி உள்ளது.இதற்கு காரணம் வெளியே கிடைக்கும் எண்ணெய் வகைகளில் பெரும்பாலும் கலப்படம் நிறைந்துள்ளதால்,  மரச்செக்கு எண்ணையை மக்கள் பயன்படுத்தி வருகின்றனர். இந்நிலையில், கிருஷ்ணகிரி  மாவட்டத்தில் பல்வேறு இடங்களில் செக்கு எண்ணெய் என்று சொல்லி விற்பனை செய்படுகிறது.ஆனால், தயாரிப்பு தேதி, காலாவதி தேதி குறிப்பிடாமல் உள்ளது.இதனால் எண்ணையை வாங்கி பயன்படுத்தும் மக்களிள் உடல் நலம் பாதிக்கும் அபாயம் உள்ளது. எனவே, மாவட்ட உணவு பாதுகாப்பு அதிகாரிகள் மரச்செக்கு எண்ணெய் தயாரிக்கும் நிறுவனங்களில் சோதனை நடத்தி கலப்பட எண்ணெய்யை பறிமுதல் செய்ய வேண்டும் என கோரிக்கை விடுக்கப்பட்டுள்ளது. இதுகுறித்து பொது மக்கள் கூறியதாவது: தற்போது நாங்கள் முன்னோர் காலத்தில் சமையலுக்கு பயன்படுத்திய மரச்செக்கு எண்ணெய்யை பயன் படுத்தி வருகிறோம். இந்த எண்ணெய்  உடலுக்கு ஏற்றதாக உள்ளது. ஆனால் சிலர் போலி எண்ணெய்யை பாட்டிகளில் அடைத்து மரச்செக்கு எண்ணெய் என விற்பனை செய்கின்றனர். இதில் தயாரிப்பு தேதி மற்றும் காலாவதி தேதி குறிப்பிடாமல் விற்பனை செய்து மக்களை ஏமாற்றி வருகிறார்கள். எனவே, மக்களை ஏமாற்றும் போலி எண்ணெய் விற்பனை நிலையங்களில் சோதனை செய்து தடை செய்ய வேண்டும் என்றனர்.

பர்கூர் அரசு இன்ஜினியரிங் கல்லூரியில் பகுதி நேர பி.இ., பி.டெக் விண்ணப்பிக்க அழைப்பு

கிருஷ்ணகிரி, மே 15: கிருஷ்ணகிரி மாவட்டம் பர்கூர் அரசு இன்ஜினியரிங் கல்லூரியில், பகுதி நேர பி.இ., பி.டெக் பட்டப்படிப்பிற்கு விண்ணப்பங்கள் வரவேற்கப்படுகிறது. இது குறித்து கல்லூரி முதல்வர் சந்திரசேகரன் வெளியிட்டுள்ள செய்திக்குறிப்பு: பர்கூர் அரசு இன்ஜினியரிங் கல்லூரி உட்பட நமது மாநிலத்தில் செயல்பட்டு வரும் 6 அரசு இன்ஜினியரிங் கல்லூரிகள் மற்றும் 3 அரசு உதவிபெறும் இன்ஜினியரிங் கல்லூரிகளில் பகுதி நேர பி.இ., பி.டெக்., பட்டப்படிப்பிற்கு கடந்த 6 முதல் இணையத்தில் விண்ணப்பப் பதிவேற்றம் நடந்து வருகிறது. இக்கல்லூரியில் பகுதி நேர பி.இ., மின்னியல் மற்றும் மின்னனுவியல் படிப்பு 40 மாணவர்களுடன் கடந்த 2002ம் ஆண்டு முதல் செயல்பட்டு வருகிறது. இப்படிப்பில் சேர பட்டய இன்ஜினியரிங் படிப்புடன் இரண்டு ஆண்டு பணி அனுபவம் பெற்றிருக்க வேண்டும். மேலும் விவரங்களுக்கு விண்ணப்பதாரர்கள் www.ptbe-tnea.com என்ற இணையத்தில் விண்ணப்பம் பதிவேற்றம் செய்ய கடைசி நாள் வருகிற ஜூன் 4ம் தேதி ஆகும். இணையத்தில் பதிவேற்றம் செய்யப்பட்ட விண்ணப்பத்தினை ஜூன் மாதம் 7ம் தேதிக்குள் மேற் காணும் இணையத்தில் உள்ள முகவரியில் சென்று சேரும் வகையில் அனுப்ப வேண்டும். இவ்வாறு கல்லூரி முதல்வர் சந்திரசேகரன் தெரிவித்துள்ளார்.

ஓசூர் பகுதியில் விளைச்சல் குறைவால் செண்டுமல்லி விலை உயர்ந்தது

ஓசூர், மே 15: ஓசூர் பகுதியில் செண்டு மல்லி பூ விளைச்சல் குறைவால் விலை உயர்ந்துள்ளது. இதனால் விவசாயிகள் மகிழ்ச்சி அடைந்துள்ளனர். கிருஷ்ணகிரி மாவட்டம் ஓசூர், தேன்கனிக்கோட்டை பகுதியில் விவசாயம் பிரதானமாக உள்ளது. ராகி, சோளம், நெல், அவரை, துவரை, கேரட், பிட்ரூட், முள்ளங்கி, சுரைக்காய், கத்தரிக்காய் உள்ளிட்ட காய்கறிகள் மற்றும் சாமந்தி, செண்டுமல்லி, ரோஜா, பட்டன் ரோஜா உள்ளிட்ட பூக்களையும் பயிரிடுகின்றனர். தற்போது முகூர்த்த நாட்கள் என்பதால் செண்டு மல்லி பூ விலை உயர்ந்துள்ளது. ஆனால் ஓசூர், தேன்கனிக்கோட்டை தாலுகாவில் 500 ஏக்கருக்கும் மேல் செண்டு மல்லி பயிரிடப்பட்டுள்ளது. ஆனால் போதிய தண்ணீரின்றி பல தோட்டங்களில் பயிரிட்ட செண்டு மல்லி காய்ந்து விட்டன. இதனால் பூக்கள் விளைச்சல் பாதிக்கப்பட்டுள்ளது. இதன் காரணமாக பூ விளைச்சல் எதிர்பார்ப்பை விட குறைந்துள்ளது. பூக்கள் விளைச்சல் குறைவால், விலை அதிகரித்துள்ளது. தற்போது பெங்களுர், மைசூர் மற்றும் தமிழகத்தின் பல்வேறு பகுதிகளுக்கு செண்டு மல்லி பூக்களை விவசாயிகள் அனுப்பி வருகின்றனர். செண்டு மல்லி ஒரு வாரம் வரை வைத்திருந்தாலும் பூக்கள் வாடாது என்தால் பொதுமக்கள் அதிக விலை கொடுத்து வாங்கி செல்கின்றனர். கடந்த சில வாரங்களுக்கு முன்பு ஒரு கிலோ ₹5 முதல் ₹10 வரை தான் விற்பனையானது. தற்போது ஒரு கிலோ ₹90 முதல் 100 வரை விற்பனையாகிறது. இதனால் விவசாயிகள் மகிழச்சி அடைந்துள்ளனர்.

கிருஷ்ணகிரி மாவட்டத்தில் கால்நடை மருந்தகங்களில்

தண்ணீர் தொட்டிகிருஷ்ணகிரி, மே 15: கிருஷ்ணகிரி மாவட்டத்தில், சிகிச்சைக்காக அழைத்து வரும் கால்நடைகளுக்கு கால்நடை மருந்தகங்களில் தண்ணீர் தொட்டி அமைக்கப்பட்டுள்ளது. இது குறித்து கிருஷ்ணகிரி கால்நடை பராமரிப்புத்துறை மண்டல இணை இயக்குநர் டாக்டர். மரியசுந்தரம் வெளியிட்டுள்ள செய்திக்குறிப்பு: கிருஷ்ணகிரி மாவட்டத்தில், கோடை வெயிலின் தாக்கம் பகல் நேரங்களில் அதிகமாக உள்ளது. இதனால் கால்நடைகளை பாதுகாக்கும் பொருட்டு காலை 11 மணி முதல் மாலை 4 மணி வரை கால்நடைகளை மேய்ச்சலுக்கு அழைத்து செல்ல வேண்டாம். தேவைப்பட்டால் நிழல் அதிகமாக உள்ள பகுதிகளில் மேயவிடலாம் என அறிவுறுத்தப்படுகிறது. மேலும், கிருஷ்ணகிரி மண்டலத்தில் உள்ள அனைத்து கால்நடை மருத்துவமனைகள் மற்றும் கால்நடை மருந்தகங்களில் கோடை காலத்தில் ஏற்பட்டுள்ள வறட்சியால் நிலையான மற்றும் தற்காலிக தண்ணீர் தொட்டிகள் அமைக்கப்பட்டுள்ளது. சிகிச்சைக்கு அழைத்து வரும் கால்நடைகளுக்கு தேவையான தண்ணீர் குறைவின்றி விநியோகம் செய்யப்படுகிறது. அத்துடன் கால்நடை வளர்ப்போர் அருகில் உள்ள கால்நடை நிலையங்களில் வைக்கப்பட்டுள்ள தண்ணீர் தொட்டிகளில் உள்ள நீரை சிகிச்சைக்கு அழைத்து வரும் கால்நடைகளுக்கு பயன்படுத்திக்கொள்ள கேட்டுக்கொள்கிறேன். இவ்வாறு மண்டல இணை இயக்குநர் டாக்டர். மரியசுந்தரம் தெரிவித்துள்ளார்.

ஓசூர் அருகே ரிங் ரோட்டில் குவியும் குப்பை கழிவுகள்

ஓசூர், மே 15: ஓசூர் அருகே ரிங் ரோடு பகுதியில் குவிக்கப்பட்டு வரும் குப்பை கழிவுகளால் விபத்து அபாயம் அதிகரித்துள்ளதாக குற்றச்சாட்டு எழுந்துள்ளது. ஓசூர் முனிஸ்வர் நகர் உள்ளிட்ட பகுப்பை கழிவுகள் ரிங்ரோடில் கொட்டு வதால் சுகாதார சீர்கேடு ஏற்படும் அபாயம் ஏற்பட்டுள்ளது. ஓசூர் முனீஸ்வர் நகர் பகுதியில் 3 ஆயிரத்திற்கும் மேற்பட்ட குடியிருப்புகள் உள்ளன. இப்பகுதியில் வசித்து வருவோர்களில் சிலர் குப்பை கழிவுகளை மூட்டை, மூட்டையாக அருகில் உள்ள ரிங் ரோட்டில் கொட்டுகின்றனர். இதனை கால்நடைகள் கிளறி விடுவதால் சாலையில் சிதறுவது வாடிக்கையாக உள்ளது. மேலும் சிலர் பழைய சாதம், சாம்பார், மாமிச கழிவுகளை கொட்டிவிட்டு செல்வதால் கடும் துர்வாடை வீசுகிறது. இதனால், சுகாதார சீர்கேடு அபாயமும் ஏற்பட்டுள்ளது. மேலும், ரிங் ரோட்டில் குவிக்கப்படும் குப்பை கழிவுகளால் அப்பகுதியில் விபத்து அபாயமும் அதிகரித்துள்ளதாக குற்றச்சாட்டு எழுந்துள்ளது. எனவே, உடனடியாக இந்த பகுதியில் உள்ள குப்பை கழிவுகளை அகற்றி சுகாதாரம் பேண நடவடிக்கை எடுக்க வேண்டுமென பொதுமக்கள் கோரிக்கை விடுத்துள்ளனர்.

ஜூனில் நடத்துவதால் களையிழக்கும் பரிதாபம் கோடை விடுமுறையின் போதே மாங்கனி கண்காட்சிக்கு ஏற்பாடு

கிருஷ்ணகிரி, மே 15: கிருஷ்ணகிரியில் ஒவ்வொரு ஆண்டும் நடைபெறும் அகில இந்திய மாங்கனி கண்காட்சியை விரைவில் தொடங்க வேண்டுமென பொதுமக்கள் கோரிக்கை விடுத்துள்ளனர். கிருஷ்ணகிரி மாவட்டத்தில் சுமார் 40 ஆயிரம் ஹெக்டேரில் விவசாயிகள் மா சாகுபடி செய்து வருகின்றனர். இங்கு விளையும் மா வகைகள் பல்வேறு மாநிலங்களுக்கும், வெளிநாடுகளுக்கும் ஏற்றுமதி செய்யப்படுகிறது. இதேபோல், வளைகுடா நாடுகளுக்கு மாங்கூழ் ஏற்றுமதி செய்யும் பணியில், 50க்கும் மேற்பட்ட மாங்கூழ் உற்பத்தி செய்யும் தொழிற்சாலைகள் செயல்பட்டு வருகின்றன. மா விவசாயிகளை ஊக்குவிக்கும் வகையில், ஒவ்வொரு ஆண்டும் கிருஷ்ணகிரியில் அகில இந்திய மாங்கனி கண்காட்சி நடைபெறுவது வழக்கம். இதில், விவசாயிகள் தங்களது விளைநிலத்தில் சாகுபடி செய்யப்படும் மா வகைகளை கண்காட்சிக்கு வைப்பர். அத்துடன் மாங்காய் மற்றும் மாம்பழத்தில் இருந்து தயாரிக்கப்படும் பொருட்களை கண்காட்சியாகவும், விற்பனைக்காகவும் வைப்பர். மேலும், பொழுதுபோக்கு நிகழ்ச்சிகளும் ஏராளமாக நடைபெறும். ஒவ்வொரு ஆண்டும் ஜூன் மாதம் தொடங்கி சுமார் ஒரு மாதம் இக்கண்காட்சி நடத்தப்படும். ஆனால், ஜூன் மாதம் பள்ளி மற்றும் கல்லூரிகள் துவங்கிவிடுவதாலும், மழை காலம் என்பதாலும், மா சீசன் முடிந்து விடுவதாலும், ஆண்டுக்கு ஆண்டு இந்த கண்காட்சியை காண வரும் மக்களின் எண்ணிக்கை குறைந்தவாறு உள்ளது. எனவே, இந்த கண்காட்சியை ஜூன் மாதத்திற்கு முன்னதாகவே, விரைவில் துவங்க வேண்டும் என பொதுமக்கள் மற்றும் சமூக ஆர்வலர்கள் கோரிக்கை விடுத்துள்ளனர்.

தொழிலாளர்களின் குழந்தைகளை தனியார் பள்ளியில் சேர்க்க விண்ணப்பங்கள் வரவேற்பு

கிருஷ்ணகிரி, மே 15: தொழிலாளர் நல வாரியத்தில், பதிவு பெற்ற தொழிலாளர்களின் குழந்தைகளை நன்மதிப்புள்ள தனியார் பள்ளிகளில் சேர்க்க விண்ணப்பங்கள் வரவேற்கப்படுகிறது. இது குறித்து, கிருஷ்ணகிரி தொழிலாளர் உதவி ஆணையர் (சமூக பாதுகாப்பு திட்டம்) முருகேசன் வெளியிட்டுள்ள செய்திக்குறிப்பு: தமிழ்நாடு அரசு தொழிலாளர் துறையின் கீழ், கட்டுமானத் தொழிலாளர்களுக்கு நலவாரியம் அமைத்து, அதில் கொத்தனார், பெயிண்டர், எலக்ட்ரீசியன், தச்சர் உள்ளிட்ட 53 வகையான கடடுமானப் பணிகளில் ஈடுபட்டுள்ள தொழிலாளர்கள் உறுப்பினர்களாக பதிவு செய்துள்ளனர். இவர்களது குழந்தைகள் தனியார் பள்ளிகளில் சேர்த்தல் தொடர்பாக தமிழக அரசாணை வெளியிட்டுள்ளது. அதன்படி, தமிழ்நாடு கட்டுமான தொழிலாளர்கள் நல வாரிய நிதியினை பயன்படுத்தி, அரசு, அரசு உதவி பெறும், நகராட்சி, ஊராட்சி பள்ளிகளில் 5ம் வகுப்பு வரை பயின்று, அறிவுக் கூர்மையான குழந்தைகளில் வட்டாரத்திற்கு ஒருவர் வீதம் தேர்வு செய்து, அவர்களுக்கு அந்தந்த பகுதிகளில் சிறந்த தனியார் பள்ளிகள் மூலம் 6ம் வகுப்பு முதல் 12ம் வகுப்பு வரை கல்வி வழங்கப்படும். அதே போல் அரசு, அரசு உதவி பெறும், நகராட்சி பள்ளிகளில் 10ம் வகுப்பு வரை பயின்று, அதிக மதிப்பெண் பெற்ற தொழிலாளர்களின் குழந்தைகளிலிருந்து மாவட்டத்திற்கு 10 குழந்தைகள் வீதம் (3 மாணவிகள் உள்பட) தேர்ந்தெடுத்து, அந்தந்த பகுதிகளில் சிறந்த தனியார் பள்ளிகள் மூலம் 11 மற்றும் 12ம் வகுப்பு கல்வி வழங்கவுள்ளது. பள்ளிக் கட்டணம், விடுதிக்கட்டணம் ₹15 ஆயிரம் மற்றும் பராமரிப்பு கட்டணம் ₹5 ஆயிரம் என ஒவ்வொரு மாணவருக்கும் ஆண்டொன்றுக்கு வழங்க அனுமதிக்கப்பட்டுள்ளது. அதன்படி, தற்போது 2019-20ம் கல்வியாண்டிற்கு, 6ம் வகுப்பு முதல் 10ம் வகுப்பு வரை கல்வி அளிக்க, தொடக்கக் கல்வித்துறையின் உதவியுடன் தனித்தேர்வு நடத்தி, அதில் அதிகபட்ச மதிப்பெண்கள் பெறும் மாணவ, மாணவியர் வட்டாரத்திற்கு ஒரு மாணவ, மாணவியர் வீதம் தேர்ந்தெடுக்கப்படுவர். முதல் மாணவன், மாணவி இத்திட்டத்தின்கீழ் பயன்பெற விரும்பாத நிலையில், அடுத்தடுத்த நிலையில் உள்ள மாணவ, மாணவியர் பரிசீலிக்கப்படுவர். இம் மாணவ, மாணவிகளை அமைப்புசாராத் தொழிலாளர்கள் நல வாரியங்களின் மாவட்ட கண்காணிப்புக்குழு மூலமாக தேர்ந்தெடுக்கப்படுவர். பிளஸ் 1, மற்றும் பிளஸ் 2 வகுப்புகளுக்கு கல்வி அளிக்க, 10ம் வகுப்பு பொதுத் தேர்வில் அதிகபட்ச மதிப்பெண் பெற்ற மாணவ, மாணவியர்களில் ஒரு மாவட்டத்திற்கு 10 பேர் வீதம் (3 மாணவிகள் உள்பட) தேர்ந்தெடுக்கப்படுவர். இத்திட்டத்தின்கீழ் பயன்பெற விரும்பும் பதிவு பெற்ற கட்டுமானத் தொழிலாளர்கள் தங்களது பதிவு விபரம் மற்றும் குழந்தைகளின் கல்வி தொடர்பான உரிய விபரங்களுடன் விருப்ப கடிதத்தினை நேரிலோ அல்லது அஞ்சல் மூலமாகவோ தொழிலாளர் உதவி ஆணையர் (சமூக பாதுகாப்பு திட்டம்) அலுவலகம், எல்ஐசி அலுவலகம் அருகில், சேலம் மெயின் ரோடு, கிருஷ்ணகிரி என்ற முகவரிக்கு வருகிற 24ம் தேதிக்குள் சேருமாறு அனுப்பப்பட வேண்டும் என கேட்டுக்கொள்கிறேன். இவ்வாறு தொழிலாளர் உதவி ஆணையர் முருகேசன் தெரிவித்துள்ளார்.

மருத்துவ காப்பீட்டு அடையாள அட்டை வழங்க வேண்டும் ஓய்வுபெற்ற அலுவலர் சங்கம் தீர்மானம்

கிருஷ்ணகிரி, மே 15: கிருஷ்ணகிரியில், மாவட்ட கிளை ஓய்வுபெற்ற அலுவலர் சங்க கூட்டம் தலைவர் சுப்பிரமணியம் தலைமையில் நடந்தது. மாவட்ட செயலாளர் மாதன், நாமக்கல்லில் கடந்த மாதம் 28ம் தேதி நடந்த 20ம் ஆண்டு நிறைவு விழா மாநாட்டு நிகழ்வுகள் மற்றும் வருகிற ஜூன் மாதம் 21ம் தேதி கொண்டாடப்படவுள்ள ஓய்வூதியர் எழுச்சி தினம் குறித்து பேசினார். நிர்வாகிகள் பழ.வெங்கடாஜலம், நந்தகோபால், கிருஷ்ணப்பா, மோகன், சந்திரசேகர் ஆகியோர் சிறப்புரையாற்றினர். சங்கத்தின் செயல்பாடுகள் மற்றும் தீர்மானங்களை முன்மொழிந்து மாவட்ட பொருளாளர் ஜெகன்நாதன் பேசினார். ஆதார கிளை பொருளாளர் சுந்தரம், சங்க நிதிநிலையினை மேம்படுத்துவது குறித்து ஆலோசனை வழங்கி பேசினார். இதில் ஏராளமானோர் பங்கேற்றனர். கூட்டத்தில், புதிய மருத்துவ காப்பீட்டு திட்டம் 2018ன் கீழ் ஓய்வூதிய சந்தாதாரர் அனைவருக்கும் மருத்துவ காப்பீட்டு அடையாள அட்டை வழங்கிட ஆவண செய்ய வேண்டுமாய் மாவட்ட கருவூல அலுவலரை கேட்டுக்கொள்வது. 80 வயது முடிந்த ஓய்வூதியர்களுக்கு காலதாமதமின்றி கூடுதல் ஓய்வூதியம் வழங்கிட வேண்டும் என கேட்டுக்கொள்வது. தமிழ்நாடு ஓய்வூதிய விதிகள் (ஒப்படைப்பு) படி ஒப்படைப்பு பிடித்தம் ஆரம்பித்த நாள் முதல் 15 ஆண்டுக்குள் நிறைவினை கணக்கிட்டு ரீஸ்டோர் செய்திட ஆவண செய்யுமாறு மாவட்ட கருவூல அலுவலரை கேட்டுக்கொள்வது. அரசாரணைப்படி, திருத்தி அமைக்கப்பட்ட ஓய்வூதிய பலன்களை காலதாமதமின்றி ஓய்வூதியர்களுக்கு வழங்கிட ஆவண செய்ய வேண்டும். மாவட்ட கருவூல அலுவலரால் 2 மாதத்திற்கு ஒருமுறை நடத்தப்படும் ஓய்வூதியர் குறை தீர்க்கும் நாள் கூட்டத்தை தவறாமல் நடத்துவதற்கு ஆவண செய்யுமாறு மாவட்ட கருவூல அலுவலரை கேட்டுக்கொள்வது என்பது உள்ளிட்ட பல்வேறு தீர்மானங்கள் நிறைவேற்றப்பட்டது.

தேசிய திறனாய்வு தேர்வில் வெற்றி அரசு பள்ளி மாணவிகளுக்கு கல்வி அதிகாரிகள் பாராட்டு

கிருஷ்ணகிரி, மே 15: தேசிய திறனாய்வு தேர்வில் வெற்றி பெற்ற அரசு பள்ளி மாணவிகளுக்கு கல்வித்துறை அதிகாரிகள் பாராட்டு தெரிவித்தனர். கிருஷ்ணகிரி ஒன்றியம் பெத்ததாளப்பள்ளி ஊராட்சி ஒன்றிய நடுநிலைப்பள்ளியை சேர்ந்த மாணவிகள் விமலா, பவித்ரா ஆகியோர் தேசிய திறனாய்வு தேர்வு தேர்ச்சி பெற்றனர். இவர்கள் இருவரையும் கிருஷ்ணகிரி வட்டார கல்வி அலுவலர்கள் கிருஷ்ணதேஜஸ், ஜெயந்தி, வட்டார வளமைய மேற்பார்வையாளர் கோதண்டபாணி, வட்டார வளமைய ஆசிரியர்கள் பயிற்றுநர்கள், சிறப்பாசிரியர்கள், பள்ளியின் தலைமை ஆசிரியர் மற்றும் உதவி ஆசிரியர்கள் பாராட்டி, தங்கள் வாழ்த்துக்களை தெரிவித்துகொண்டனர்.

தளி அருகே கர்நாடக வாலிபரை கொன்று வீசிச்சென்ற மர்மகும்பல்

தேன்கனிக்கோட்டை, மே 15: கர்நாடக வாலிபரை அடித்துக்கொன்ற மர்மநபர்கள், அவரது உடலை தளி அருகே தனியார் நிலத்தில் வீசிச் சென்றுள்ளனர். இது குறித்து போலீசார் விசாரணை நடத்தி வருகின்றனர். கிருஷ்ணகிரி மாவட்டம் தளி-தேன்கனிக்கோட்டை சாலையில், சிலிபிலிமங்கலம் கிராமத்தில், நேற்று முன்தினம் தனியார் நிலத்தில் வாலிபர் ஒருவர் காயங்களுடன் இறந்து கிடப்பதாக, தளி போலீசாருக்கு தகவல் கிடைத்தது. இதன்பேரில், தேன்கனிக்கோட்டை டிஎஸ்பி சங்கீதா, தளி இன்ஸ்பெக்டர் சரவணன் மற்றும் போலீசார் விரைந்து சென்று சடலத்தை கைப்பற்றி விசாரணை நடத்தினர். அதில் இறந்து கிடந்தவருக்கு சுமார் 30 வயது இருக்கும். பச்சை கோடு போட்ட சட்டை, புளூ கலர் ஜீன்ஸ் பேண்ட் அணிந்திருந்தார். கழுத்து, கால் பகுதியில் ரத்த காயம் உள்ளது. இடது கால் முட்டியில் பழைய காயத்தழும்பும் உள்ளது. வலது கையில் அம்மா என்று கன்னடத்திலும், கோலி என்று ஆங்கிலத்திலும் பச்சை குத்தியுள்ளார். இதனால் அவர் கர்நாடகத்தை சேர்ந்தவராக இருக்கலாம் என போலீசார் சந்தேகிக்கின்றனர். அவரை அடித்து கொலை செய்த மர்ம நபர்கள், உடலை தனியார் நிலத்தில் வீசி சென்றிருப்பது தெரியவந்துள்ளது. இதையடுத்து அவரது புகைப்படத்தை  கர்நாடக மாநில போலீசாருக்கு அனுப்பி வைத்துள்ள தளி போலீசார், கொலை செய்யப்பட்ட வாலிபர் யார்? எந்த பகுதியை சேர்ந்தவர் எனவும், அவரை அடித்து  கொன்ற கொலையாளிகள் குறித்தும் தீவிர விசாரணை நடத்தி வருகின்றனர்.

போலீசாரை தாக்கிய 2 வாலிபர்கள் கைது

கிருஷ்ணகிரி, மே 15: கிருஷ்ணகிரி பகுதியில்,ரோந்து பணியில் ஈடுபட்ட போலீசாரை தாக்கிய 2 பேரை போலீசார் கைது செய்தனர். கிருஷ்ணகிரி டவுன் போலீஸ் ஸ்டேஷனில் கான்ஸ்டபிளாக பணியாற்றி வருபவர் திருப்பதி. இவர் நேற்று முன்தினம் இரவு பணியின் போது, ரோந்தில் ஈடுபட்டார். அப்போது ஜெக்கப்பன் நகர் 8வது குறுக்கு தெருவில் செல்லும்போது, 2 இளைஞர்கள் மதுபோதையில் இருசக்கர வாகனத்தில் சென்று கொண்டிருந்தனர்.அவர்களை நிறுத்தி விசாரித்த திருப்பதியை போதை வாலிபர்கள் தாக்கி உள்ளனர். இதுகுறித்து திருப்பதி, கிருஷ்ணகிரி தாலுகா போலீசில் புகாரளித்தார். விசாரணையில் அவர்கள் அதேபகுதியை சேர்ந்த அரவிந்த்குமார் (27), அவரது நண்பர் அன்பழகன் (27) என்பது தெரியவந்தது. இருவரையும் போலீசார் கைது செய்து சிறையில் அடைத்தனர்.

கந்திகுப்பம் அருகே மனைவியை தாக்கிய கணவர் கைது

கிருஷ்ணகிரி, மே 15: கந்திகுப்பம் அருகே, மனைவியை தாக்கிய கணவர் கைது செய்யப்பட்டார்.கிருஷ்ணகிரி மாவட்டம் கந்திகுப்பம் அருகே, வரட்டணபள்ளியை சேர்ந்தவர் நந்தினி (26), இவரது கணவர் அருண்குமார் (31). இருவரும் குடும்ப தகராறு காரணமாக பிரிந்து வாழ்ந்து வருகின்றனர். நந்தினி அவரது பெற்றோருடன் வசித்து வருகிறார். இந்நிலையில் நந்தினியின் கணவர் அருண்குமார் கடந்த 4 நாட்களுக்கு முன்பு வேறொரு திருமணம் செய்து கொண்டார். இதையறிந்த நந்தினி அருண்குமாரிடம் கேட்டபோது அருண்குமாரின் தந்தை சிவசெல்வம்(57), சகோதரர்கள் லோகேஷ்(26), சுபாஷ்(28) ஆகியோர் நந்தினியை சரமாரியாக தாக்கியுள்ளனர். இதில், பலத்த காயமடைந்த நந்தினி கிருஷ்ணகிரி அரசு மருத்துவமனையில் சிகிச்சை பெற்று வருகிறார். இது குறித்து நந்தினி கந்திகுப்பம் போலீசில் அளித்த புகாரின்பேரில் அருண்குமாரை போலீசார் கைது செய்தனர். மேலும், அருண்குமாரின் தந்தை மற்றும் சகோதரர்களை தேடி வருகின்றனர்.