Krishnagiri - Dinakaran

மத்திய அரசின், இந்திய பள்ளிகள் விளையாட்டுக் குழுமத்தின் சார்பில், கிருஷ்ணகிரி மாவட்டம், காவேரிப்பட்டணம், அரசு ஆண்கள் மேல்நிலைப்பள்ளியில், 14 வயதுக்குட்பட்ட தமிழ்நாடு ஆண்கள் கையுந்து பந்து மாநில அணிக்கான தேர்வு

காவேரிப்பட்டணம், அக்.12:  மத்திய அரசின், இந்திய பள்ளிகள் விளையாட்டுக் குழுமத்தின் சார்பில், கிருஷ்ணகிரி மாவட்டம், காவேரிப்பட்டணம், அரசு ஆண்கள் மேல்நிலைப்பள்ளியில், 14 வயதுக்குட்பட்ட தமிழ்நாடு ஆண்கள் கையுந்து பந்து மாநில அணிக்கான தேர்வு நடைபெற்றது. நிகழ்ச்சிக்கு தலைமை ஆசிரியர் வெங்கட்ராஜிலு தலைமை தாங்கினார். உடற்கல்வி ஆசிரியர் பவுன்ராஜ், சுரேஷ்பாபு முன்னிலை வகித்தனர். சிறப்பு விருந்தினராக மாவட்ட உடற்கல்வி ஆய்வாளர் வளர்மதி கலந்து கொண்டு தமிழக அணி தேர்வினை துவக்கி வைத்தார். அண்ணாதுரை, ராகவன், சுரேஷ், ஜலேந்திரன், மலர், பொற்கொடி, பீமாபாய் ஆகியோர் தேர்வுகுழு உறுப்பினர்களாக செயல்பட்டனர்.  இதில் தமிழகம் முழுவதிலிருந்து 225 விளையாட்டு வீரர்கள் கலந்து கொண்டனர். இவர்களில் சிறப்பாக செயல்பட்ட 15 பேர் மாநில அணிக்கு தேர்வு செய்யப்பட்டனர். இவர்கள் அடுத்த மாதம் சிக்கிம் மாநிலத்தில் நடைபெறும் தேசிய விளையாட்டுப் போட்டிகளில் தமிழகத்தின் சார்பாக கலந்து கொள்வார்கள். தேர்வு செய்யப்பட்ட விளையாட்டு வீரர்களுக்கு முதன்மைக் கல்வி அலுவலர் மகேஸ்வரி மற்றும் மாவட்ட கல்வி அலுவலர் ராஜா ஆகியோர் வாழ்த்து தெரிவித்தனர். கிருஷ்ணகிரி மாவட்டத்தில் இப்போட்டி நடைபெறுவது இதுவே முதன்முறை என்பது குறிப்பிடத்தக்கது.

மாமரத்தில் பழ ஈக்களின் தாக்கத்தை கட்டுப்படுத்தும் தொழில்நுட்பம் வேளாண் கல்லூரி மாணவர்கள் விளக்கம்

கிருஷ்ணகிரி, அக்.12: மாமரத்தில் பழ ஈக்களின் தாக்கத்தை கட்டுப்படுத்துவது எப்படி? என்பது குறித்து வேளாண் கல்லூரி மாணவர்கள் செயல் விளக்கம் அளித்தனர்.கிருஷ்ணகிரி அருகே மிட்டஅள்ளிபுதூர் கிராமத்தில் மாமரத்தில் சேதம் விளைவிக்க கூடிய பழ ஈயின் தாக்கத்தை கட்டுப்படுத்தும் செயல் விளக்க முகாம் நடைபெற்றது. திருவண்ணாமலை வேளாண்மை கல்லூரி மாணவர்கள் பங்கேற்று, பயிற்சி அளித்தனர். அப்போது, அவர்கள் கூறியதாவது:பழ ஈ பொறியானது ஏக்கருக்கு 6 வீதம் பரிந்துரைக்கப்படுகிறது. இதில் மெத்தில் இயூஜினால் என்னும் ஆண் பழ ஈக்களை கவரும் திரவம் பயன்படுத்தப்படுகிறது. மேலும், இப்பொறியில் உள்ள பாட்டிலில் மெத்தில் இயூஜினாலுடன் 2-3 மில்லி மாலதியான் பூச்சிக்கொல்லி கலக்கப்படுகிறது. பொறிகளை 3 முதல் 6 அடி உயரத்தில் கீழ் நோக்கி இருக்கும் கிளைகளில் கட்ட வேண்டும். பொறிகளை நேரடியாக வெயிலின் தாக்கத்தில் இருந்து பாதுகாத்தல் அவசியம். மாமரங்கள் பூக்கும் தருவாயில் பழ ஈ பொறிகளை மரத்தில் கட்டுவதால் அதிகளவில் பழ ஈக்கள் கட்டுப்படுத்தப்படுகிறது.இவ்வாறு மாணவர்கள் தெரிவித்தனர்.மேலும், பையூர் மண்டல ஆராய்ச்சி நிலையத்தில் பட்டா, சிட்டா, புகைப்படங்களை காட்டி பழ ஈ பொறியை இலவசமாக பெற்றுக் கொள்ளலாம் என மாணவர்கள் கூறினர். கையுந்து பந்து அணிக்கு வீரர்கள் தேர்வு போட்டி

அரசு அருங்காட்சியகத்தில் கல்லூரி மாணவர்களுக்கு தொல்லெழுத்து பயிலரங்கம்

கிருஷ்ணகிரி, அக்.12: கிருஷ்ணகிரி அரசு அருங்காட்சியகத்தில் கல்லூரி மாணவர்களுக்கு தொல்லெழுத்து பயிலரங்கம் நடந்தது. கிருஷ்ணகிரி அரசு அருங்காட்சியகத்தில் கிருஷ்ணகிரி அரசு ஆடவர் கலைக்கல்லூரியில் வரலாற்றுத்துறையில் பயிலும் 50 மாணவர்களுக்கு தொல்லெழுத்து பயிலரங்கம் நடந்தப்பட்டது. முதல் நாள், அருங்காட்சியகத்தின் காப்பாட்சியர் கோவிந்தராஜ், இந்தியாவின் வரலாற்றுக்கு முற்பட்ட காலம், தமிழ் எழுத்துக்கள் தோன்றிய காலம், அதன் வடிவம் குறித்து விளக்கினார். அத்துடன் பிராமி என்னும் 2 ஆயிரம் ஆண்டுக்கு முற்பட்ட தமிழ் எழுத்துக்களை தாமே எழுத பயிற்சி அளித்தார். கடந்த 2 ஆயிரம் ஆண்டுகளாக தமிழ் எழுத்துக்கள் எவ்வாறு மாற்றமடைந்து, தற்போதைய நிலையை அடைந்துள்ளது என்பது குறித்து விளக்கினார். 2ம் நாள், தமிழில் இருந்து பிரிந்து வளர்ந்த வட்டெழுத்து குறித்தும், பிற்கால கல்வெட்டுக்களில் காணப்படும் கிரந்த எழுத்துக்களை எவ்வாறு படிப்பது என்பது குறித்தும் பயிற்சி அளித்தார். பழங்கால தமிழ் எண்கள் கல்வெட்டுகளில் எழுதப்பட்டிருக்கும் விதம் குறித்தும் விளக்கப்பட்டது. 3ம் நாள் கல்வெட்டுக்களை படியெடுப்பது குறித்து செய்முறை பயிற்சி அளிக்கப்பட்டது. இதில் மாணவர்கள் போச்சம்பள்ளியில் இருந்து கொண்டுவரப்பட்ட கி.பி.13ம் நூற்றாண்டைச் சேர்ந்த ஒய்சாள மன்னர் சோமேஸ்வரன் காலத்தில் திருவனந்தீஸ்வரமுடைய நாயனார் கோயிலத்தில் தானம் வழங்கப்பட்ட செய்தியைக் குறிக்கும் கல்வெட்டை தாமே படியெடுத்து, அதில் உள்ள எழுத்துக்களை படிக்க கற்றுக்கொண்டனர். இப்பயிற்சியை அருங்காட்சியக பணியாளர்கள் கிருஷ்ணன், செல்வகுமார் ஆகியோர் ஒருங்கிணைத்தனர். பயிற்சி பெற்ற மாணவர்களுக்கு சான்றிதழ்கள் வழங்கப்பட்டது. நிகழ்ச்சியில் கல்லூரி பேராசிரியர் வெங்கடேஸ்வரன் கலந்துகொண்டு வாழ்த்தி பேசினார். 

பிரம்ம கமலம் பூத்து குலுங்கியது

கிருஷ்ணகிரி, அக்.12:   விதை, கிழங்கு, தண்டு ஆகியவற்றிலிருந்து புதியதாக முளைக்கும் தாவர வகைகளைப் பார்த்திருப்போம். பிரம்ம கமலம் என்றழைக்கப்படும் அபூர்வ மலர் வகை தாவரத்தின் இலையை வெட்டி வைத்தாலே முளைத்துவிடும். இலையின் பக்கவாட்டில் சிறுசிறு கணுக்கள் தோன்றி, அவற்றிலிருந்து புது இலைகள் உருவாகும். அவற்றின் கணுக்களில் புதிய மொட்டுக்கள் உருவாகி, மலர்களாய் மலரும். இந்த மலர்கள் ஆண்டுக்கு ஒரு முறைதான் பூக்கும். அதுவும் நள்ளிரவில் பூத்து, ஓரிரு நாட்களில் உதிர்ந்து போகும் தன்மை கொண்டதாகும். இந்த மலர் வெள்ளை நட்சத்திரம் போல் ஒரு தட்டு அளவிற்கு காணப்படும். இந்த வித்தியாசமான மலர் இமயமலையை சேர்ந்தது. பிரம்மனின் நாபிக்கமலத்தில் இருந்து தோன்றுவது போல் அமைத்திருப்பதால், பிரம்ம கமலம் என்றழைக்கின்றனர். மருத்துவ குணமும், தெய்வீக தன்மையும் வாய்ந்த இந்த அதிசய மலரை, அது மலரும் நேரத்தில் கண்டு தரிசித்தால் நல்ல பலன்கள் கிடைக்கும் என நம்பப்படுகிறது. கிருஷ்ணகிரி ஜக்கப்பன் நகர் 8வது குறுக்கு தெருவைச் சேர்ந்த ஓய்வுபெற்ற மின்சார வாரிய ஊழியரான மணி(60) என்பவரது வீட்டில் நேற்று முன்தினம் நள்ளிரவு பிரம்ம கமலம் செடியில் 8 பூக்கள் பூத்து குலுங்கியது. இதுகுறித்து தகவல் அறிந்த அக்கம் பக்கத்தினர் அந்த அதிசய பூவை ஆர்வத்துடன் வந்து பார்த்து சென்றனர்.

சாலையை விரிவு படுத்த திமுக., எம்எல்ஏ கோரிக்கை

கிருஷ்ணகிரி, அக்.12: கிருஷ்ணகிரி திமுக எம்எல்ஏ., செங்குட்டுவன் வெளியிட்டுள்ள அறிக்கை: கிருஷ்ணகிரி லண்டன்பேட்டையில் இருந்து ராயக்கோட்டை செல்லும் சாலையில், ஏராளமான அரசு அலுவலகங்கள், அலுவலர்கள் குடியிருப்புகள், பெட்ரோல் பங்க்குகள், வணிக வளாகங்கள் உள்ளிட்டவை செயல்பட்டு வருகிறது. இதனால் ஆயிரக்கணக்கான வாகனங்கள், ஆட்டோக்கள், இருசக்கர வாகனங்கள் இந்த சாலையில் சென்று வருவதால் கடுமையான போக்குவரத்து நெருக்கடி ஏற்படுகிறது. 6 வழிச்சாலை மேம்பாலம் அருகில் கடும் போக்குவரத்து நெருக்கடி ஏற்படுகிறது. எனவே, ராயக்கோட்டை 6 வழிச்சாலை மேம்பாலம் முதல் தாலுகா போலீஸ் ஸ்டேஷன் வரை உள்ள சாலையை நான்கு வழிச்சாலை அளவிற்கு விரிவுப்படுத்தி, சாலையில் சென்டர் மீடியன் அமைத்து பொதுமக்களுக்கும், வாகன ஓட்டிகளுக்கும் இடையூறு இல்லாமல் சென்று வர போதிய வசதி செய்து கொடுக்கும்படி நெடுஞ்சாலைத்துறை மற்றும் கலெக்டரை கேட்டுக்கொள்கிறேன். இவ்வாறு அவர் தெரிவித்துள்ளார்.

ஓசூர் அருகே புளியந்தோப்பில் யானைகள் முகாம்

ஓசூர், அக்.12: ஓசூர் அருகே புளியந்தோப்பில் யானைகள் முகாமிட்டுள்ளதால் விவசாயிகள் பீதிக்குள்ளாகியுள்ளனர். கிருஷ்ணகிரி மாவட்டம் ஓசூர் அருகே போடூர்  வனப்பகுதியில் கடந்த 5 நாட்களாக 15 காட்டுயானைள் முகாமிட்டுள்ளன. பகலில் பொழுதில் வனப்பகுதியில் ஓய்வெடுக்கும் இந்த யானைகள், இரவானதும் ஊருக்குள் புகுந்து, விளை நிலங்களை சேதப்படுத்தி  வருகின்றன. கடந்த 2 நாட்களாக ஆலியாளம் கிராமத்தையொட்டியுள்ள தோட்டத்திற்குள் புகுந்து நெற்பயிரை தின்றும்,மிதித்தும் சேதப்படுத்தின. தற்போது, ஓசூர் அருகே தென்பெண்ணை ஆற்றங்கரையோரம் உள்ள விவசாய நிலங்களில் நெல், அவரை, துவரை, வெண்டை, சோளம், கத்தரி, தக்காளி,பீன்ஸ் உள்ளிட்ட பயிர்கள் அறுவடைக்கு தயாராக உள்ளன. மேலும், நெல் மற்றும் சோளம் உள்ளிட்ட தானிய பயிர்களில் கதிர் வரும் சமயத்தில் யானைகள் சேதப்படுத்தி வருவதால் விவசாயிகள் பெரும் நஷ்டத்திற்குள்ளாகும் நிலைக்கு தள்ளப்பட்டுள்ளனர். இந்நிலையில், 15 யானைகளும் தற்போது இரண்டு பிரிவுகாளாக பிரிந்துள்ளன. இந்த யானைகள் பகல் வேளையிலேயே ஊரை ஒட்டியுள்ள வனப்பகுதியில் உலா வருவதை கண்டு கிராம மக்கள் பீதிக்குள்ளாகியுள்ளனர். நேற்று மதியம் இந்த யானைகள் சானமாவு வனப்பகுதி அருகே தனியார் புளியந்தோப்புக்குள் முகாமிட்டிருப்பதை கண்டு அந்த வழியாக சென்றவர்கள் ஓட்டம் பிடித்தனர். இதுகுறித்த தகவலின்பேரில், அப்பகுதிக்கு வனத்துறையினர் விரைந்து சென்று யானைகள் ஊருக்குள் வருவதை கட்டுப்படுத்தும் வகையில் கண்காணிப்பு பணியை முடுக்கி விட்டுள்ளனர். இதுகுறித்து கிராம மக்கள் கூறுகையில், மழைக்காலம் தொடங்கியுள்ள நிலையில், பயிர்கள் அனைத்தும் செழித்து காணப்படுகின்றன. அதனை சுவைப்பதற்காக இப்பகுதியில் யானை கூட்டம் முகாமிட்டிருக்கின்றன. இந்த யானைகளால் தினசரி பயிர் சேதம் ஏற்பட்டு வருகிறது. எனவே, முன்னெச்சரிக்கை நடவடிக்கையாக யானை கூட்டத்தை அப்புறப்படுத்த வேண்டும். மேலும், மழைக்காலம் முடிந்து பனிக்காலம் தொடங்கி விட்டால் யானைகளின் அட்டகாசத்திற்கு அளவே இல்லாமல் போய் விடும். இரவு நேரத்தில் தோட்டங்களுக்குள் நுழையும் யானைகள், கடும் பனி மூட்டம் காரணமாக நேரம் செல்வதே தெரியாமல் அங்கேயே முகாமிட்டிருக்கும். பனி மூட்டத்திற்குள் மறைந்திருக்கும் யானைகள் தெரிய வாய்ப்பில்லாத நிலையில் பயிர் சேததத்துடன், உயிர் சேதம் அபாயமும் அதிகரித்துள்ளது. எனவே, யானைகளை விரட்டியடிக்க நடவடிக்கை எடுக்க வேண்டும் என்றனர்.

இன்ஸ்பெக்டருக்கு பிடிவாரண்ட்

சேலம், அக்.12:  சேலம் அரிசிப்பாளையம் சாமிநாதபுரம் பகுதியில், தனியாருக்கு சொந்தமான குடோனில் இருந்த ₹8 லட்சம் மதிப்புள்ள எல்இடி டிவிக்களை, அதே பகுதியை சேர்ந்த சிலர் திருடிச்சென்று விட்டனர். இதுகுறித்த புகாரின் பேரில் சபீர் என்பவர் உள்பட 6 பேர், கைது செய்யப்பட்டனர். இந்த வழக்கு சேலம் 2வது நீதித்துறை நடுவர் நீதிமன்றத்தில் நடந்து வருகிறது. இவ்வழக்கின் விசாரணை அதிகாரியான அப்போதைய இன்ஸ்பெக்டர் சரவணனுக்கு, சாட்சியம் அளிக்க சம்மன் அனுப்பப்பட்டது. தற்போது அவர் கமுதியில் பணியாற்றி வருகிறார். சம்மனை பெற்றுக்கொண்ட அவர் சாட்சியம் அளிக்கவரவில்லை. இதையடுத்து இன்ஸ்பெக்டர் சரவணனுக்கு சாட்சி வாரண்ட் பிறப்பித்து, நீதித்துறை நடுவர் சிவா உத்தரவிட்டார்.

அரசு பஸ்சில் ஓசி பயணம் ; 1419 பேருக்கு அபராதம்

சேலம், அக். 12: தமிழ்நாடு அரசு போக்குவரத்து கழகம் சேலம் கோட்டத்துக்கு உட்பட்ட சேலம், தர்மபுரி, நாமக்கல், கிருஷ்ணகிரியில் அரசு பஸ்களில் அதிகாரிகள் வழித்தட பரிசோதனை செய்து வருகின்றனர். இதில், செப்டம்பர் மாதத்தில் பயணச்சீட்டு எடுக்காதவர்களிடம் இருந்து ₹1.59 லட்சம் அபராதம் வசூலிக்கப்பட்டுள்ளது. இது குறித்து சேலம் மண்டல அரசு போக்குவரத்து கழக அதிகாரிகள் கூறுகையில், “அரசு பஸ்களில் வழித்தட பரிசோதனை மற்றும் கூட்டுபரிசோதனை மேற்கொள்ளப்பட்டது. இதில், பயணச்சீட்டு எடுக்காமல் பயணம் செய்தவர்களிடம் இருந்து அபராதம் வசூலிக்கப்பட்டது. இதன்படி, கடந்த மாதத்தில் 1419 பேரிடம் இருந்து ₹ ஒரு லட்சத்து 59 ஆயிரம் வசூலிக்கப்பட்டுள்ளது, என்றனர். 

ஐம்பொன் சிலைகள் மாயமான விவகாரம் சிலை கடத்தல் பிரிவுக்கு வழக்கை மாற்ற முடிவு

சேலம், அக்.12:  சேலம் அம்மாபேட்டையில் புகழ்பெற்ற ராமலிங்க சவுடேஸ்வரி அம்மன் கோயில் உள்ளது. இந்து சமய அறநிலையத்துறை கட்டுப்பாட்டில் இருக்கும் இந்த கோயிலை டிரஸ்டிகள் கவனித்து வருகின்றனர். இந்நிலையில், அந்த அமைப்பில் நிர்வாகியாக இருந்த வக்கீல் கிருஷ்ணமூர்த்தி என்பவர் அம்மாபேட்டை போலீசில் புகார் செய்தார். அதில், கடந்த 2014ம் ஆண்டு கோயில் கும்பாபிஷேகம் நடைபெற்றது. அதன்பிறகு கோயிலில் இருந்த நடராஜர் ஐம்பொன் சிலை, ஐம்பொன் பாவை விளக்கு, 2 கோபுர கலசம் ஆகியவற்றை காணவில்லை’ என தெரிவித்திருந்தார்.இதுகுறித்து உதவி கமிஷனர் கணேசன் வழக்கு பதிவு செய்து விசாரணை நடத்தி வருகிறார். இந்த கோயில் இந்து சமய அறநிலையத்துறை கட்டுப்பாட்டில் இருந்து வந்தாலும், ஐம்பொன் சிலை காணாமல் போனது குறித்து அதிகாரிகள் கண்டு கொள்ளவே இல்லை. இதுகுறித்து இணை ஆணையர் வரதராஜனிடம் கேட்டபோது, ‘எனக்கு இதுபற்றி எதுவுமே தெரியாது. கோவில் நிர்வாகிகளை விசாரணைக்கு வருமாறு கூறியிருக்கிறேன்’ என்றார்.இந்த வழக்கை சிலை கடத்தல் தடுப்பு பிரிவுக்கு மாற்றுவதற்கான நடவடிக்கை எடுக்கப்பட்டு வருகிறது. முதற்கட்ட விசாரணை முடிந்தவுடன் வழக்கு மாற்றப்படும் என உதவி கமிஷனர் கணேசன் கூறினார்.தமிழகத்தில் பழமையான கோயில்களில் உள்ள ஐம்பொன் சிலைகள், சாமி சிலைகள் ஆகியவை கடத்தப்பட்டு வெளிநாடுகளுக்கு விற்பனை செய்யப்பட்டு வருவது சமீபத்தில் கண்டறியப்பட்டது. இதற்காக சிலை கடத்தல் தடுப்பு பிரிவு ஐஜி பொன் மாணிக்கவேல் தலைமையில் தீவிர நடவடிக்கை எடுக்கப்பட்டு வருகிறது. வெளிநாடுகளில் இருந்து ஐம்பொன் சிலைகளையும் மீட்டு வருகின்றனர்.தற்போது சிலை கடத்தல் தடுப்பு பிரிவு போலீசாரின் பிடி இறுகி வருவதால், ஆங்காங்கே சிலைகள் காணாமல் போனது தொடர்பாக தொடர்ந்து புகார்கள் வந்த வண்ணம் உள்ளது.  அதேபோல தான், ராமலிங்க சவுடேஸ்வரி அம்மன் கோயில் ஐம்பொன் சிலைகள் காணாமல் போனதாக தற்போது புகார் வந்துள்ளது. இதுதொடர்பாக கோயிலை நிர்வகித்த முன்னாள் நிர்வாகிகள், இந்து சமய அறநிலையத்துறை அதிகாரிகளிடம் விசாரணை நடத்த போலீசார் திட்டமிட்டு உள்ளனர். இதனால் அம்மாப்பேட்டை பகுதியில் பரபரப்பு ஏற்பட்டுள்ளது.

மா, தென்னை காய்ந்ததால் வெளி மாநிலங்களுக்கு குடிபெயரும் விவசாயிகள்

கிருஷ்ணகிரி, அக்.12:  கிருஷ்ணகிரி மாவட்டத்தில் வறட்சியால் பாதிக்கப்பட்ட மா, தென்னை விவசாயிகளுக்கு இழப்பீடு வழங்க வேண்டுமென தமிழ்நாடு விவசாயிகள் சங்கம் கோரிக்கை விடுத்துள்ளது.பர்கூர் ஒன்றியத்திற்குட்பட்ட ஒரப்பம் கிராமத்தில் தமிழ்நாடு விவசாயிகள் சங்க புதிய கிளை தொடக்க விழா நடைபெற்றது. நிகழ்ச்சிக்கு சங்க தலைவர் ராமசாமி தலைமை வகித்தார். புதிய கிளையினை விவசாயிகள் சங்கத்தின் மாநில குழு உறுப்பினர் கண்ணு துவக்கி வைத்து பேசினார். அப்போது அவர் விவசாய சங்க செயல்முறை குறித்து விளக்கம் அளித்தார். அத்துடன் பருவமழை பொய்த்து போனதால் மானாவாரி விவசாயம் முழுவதும் பாதிக்கப்பட்டுள்ளது. தென்னை, மா மரங்கள் காய்ந்துவிட்டன. வாழ்வாதாரம் தேடி ஏழை விவசாயிகள், வெளி மாநிலங்களுக்க குடிபெயர்கின்றனர். இந்த நிலைபாட்டை மாற்ற அரசு உரிய நடவடிக்கை எடுக்க வேண்டும் என்றார்.கூட்டத்தில், வறட்சியால் பாதிக்கப்பட்ட மா, தென்னை மரங்களுக்கு இழப்பீடு வழங்கி, அவர்களுக்கு புதிய மரக்கன்றுகளை வழங்க வேண்டுமென வலியுறுத்தப்பட்டது. மேலும், தேசிய நெடுஞ்சாலையில் அதிக விபத்துகள் நிகழ்வதால் ஒரப்பம் அருகே ஒரு மேம்பாலம் அமைக்க வேண்டும்; எண்ணேகொள்புதூரில் இருந்து படேதலாவ் ஏரிக்கு கால்வாய் அமைக்க வேண்டும்; வேளாண்மை கூட்டுறவு சங்கத்தில் புதிய கடன் உடனடியாக வழங்க வேண்டும் என்பது உள்ளிட்ட பல்வேறு தீர்மானங்கள் நிறைவேற்றப்பட்டன. மேலும் சங்க தலைவராக ராமசாமி, துணைத்தலைவராக வேலு, செயலாளராக ஆறுமுகம், துணை செயலாளராக சிவன், பொருளாளராக குமார் ஆகியோர் தேர்வு செய்யப்பட்டனர். கூட்டத்தில் சிபிஐ ஒன்றிய செயலாளர் நாராயணன், வட்ட குழு உறுப்பினர் மாரியப்பன் உள்ளிட்ட பலர் கலந்துகொண்டனர்.

கல்லூரி மாணவிகளுக்கு கோலாட்ட பயிற்சி

கிருஷ்ணகிரி, அக்.12:   கிருஷ்ணகிரி அரசு மகளிர் கலைக்கல்லூரியில் கல்லூரி மற்றும் திருவையாறு தமிழ் அய்யா கல்விக்கழகம், அவ்வை அறக்கட்டளை இணைந்து மண்ணின் மனம், தமிழக நாட்டுப்புற ஆடற்கலைகளான கும்மி, கோலாட்டம், ஒயிலாட்டம் குறித்து பயிற்சி நடந்தது. கல்லூரியின் முதல்வர் ஜெயந்தி தலைமை வகித்தார். தமிழ்த்துறை தலைவர் கீதா முன்னிலை வகித்தார். திருவையாறு தமிழ் அய்யா கல்விக்கழக இயக்குனர் கலைவேந்தன் அறிமுகவுரையாற்றினார். முகாமில், அனைத்து துறையைச் சேர்ந்த 100 மாணவிகளுக்கு கும்மி, கோலாட்டம், ஒயிலாட்டம் ஆகிய கலைகள் குறித்து பயிற்சி அளிக்கப்பட்டது. இவர்களுக்கு திருச்சி கலைக்காவேரி நுண்கலைக் கல்லூரி நடனத்துறை உதவி பேராசிரியர் அபர்ணாப்ரித்தா, கலைக்காவேரி நந்தி மீனா, ஜோன்மேனகா, தஞ்சாவூர் நாதஸ்வரக் கலைஞர் புலியூர் பாலு, மனோஜிப்பட்டி தவில் இசை கலைஞர் நாகராஜ் ஆகியோர் பயிற்சி அளித்தனர். இதில் பங்கேற்று பயிற்சி பெற்றவர்களுக்கு நாட்டுப்புற ஆடற்கலைத் திலகம் என்ற விருதும், சான்றிதழும் வழங்கப்பட்டன. சிறப்பாக செயல்பட்ட 10 மாணவிகளுக்கு பதக்கம் வழங்கப்பட்டது. தொடர்ந்து பல்துறை ஆற்றலை வளர்க்கும் சிறந்த கல்லூரிகளுக்கான கலைச்செம்மல் விருதினை, தமிழ்த்துறை தலைவர் கீதா பெற்றுக்கொண்டார். தமிழ்த்துறை உதவி பேராசிரியர் சிவகாமி நன்றி கூறினார்.

போச்சம்பள்ளியில் கோஷ்டி பூசல் கூட்டுறவு சங்க பதவியை பிடிக்க அதிமுகவினரிடையே கடும் போட்டி

போச்சம்பள்ளி, அக்.12: போச்சம்பள்ளியில், கூட்டுறவு சங்க பதவியை பிடிக்க முன்னாள் அமைச்சர், எம்எல்ஏ ஆதரவாளர்களிடையே கடும் போட்டி ஏற்பட்டுள்ள நிலையில், தேர்தல் அதிகாரி “ஜகா” வாங்கியதால் பரபரப்பு ஏற்பட்டுள்ளது.கிருஷ்ணகிரி மாவட்டம் போச்சம்பள்ளியை தலைமையிடமாக கொண்டு, கிருஷ்ணகிரி வட்ட வேளாண் உற்பத்தியாளர்கள் கூட்டுறவு விற்பனை சங்கம் செயல்பட்டு வருகிறது. இந்த சங்கத்திற்கான  நிர்வாகக்குழு உறுப்பினர் தேர்தலுக்கான வேட்புமனு தாக்கல் கடந்த 6ம் தேதி தொடங்கியது. இதில், முன்னாள் அமைச்சர் முனுசாமி கோஷ்டியைச் சேர்ந்த  அதிமுக மாணவரணி மாவட்ட செயலாளர் தங்கமுத்து தலைமையில் ஒரு அணியாகவும், பர்கூர் எம்எல்ஏ ராஜேந்திரன் ஆதரவு பெற்ற பர்கூர் ஒன்றிய துணை செயலாளர் சக்ரவர்த்தி தலைமையில் ஒரு அணியாகவும் வேட்புமனு தாக்கல் செய்தனர். மேலும், திமுக தரப்பில் மாவட்ட பொருளாளர் ராஜேந்திரன் உள்ளிட்ட 4 பேரும் வேட்புமனு தாக்கல் செய்தனர். நிர்வாகக்குழு உறுப்பினர் பதவிக்கான தேர்தல் 11ம் தேதி(நேற்று) நடத்தப்பட்டு, 12ம் தேதி(இன்று) முடிவு அறிவிக்கப்படும் என தெரிவிக்கப்பட்டிருந்தது. ஆனால், சம்பந்தப்பட்ட தேர்தல் அதிகாரியே நேற்று காலை குறிப்பிட்ட நேரத்திற்கு வந்து சேரவில்லை. இதனால், பரபரப்பு தொற்றிக்கொண்டது. இப்போட்டியில் யார்? யார்? வாபஸ் பெறுவர். வேட்பாளர் யார் என்று தெரியாத நிலையில் அதிமுகவினர் பரிதவித்தனர். அதிகாரிகள் வராததால் அலுவலகம் பூட்டியே கிடந்தது. இந்நிலையில், கே.பி.முனுசாமியின் ஆதரவாளர்களுக்கு பதவி கொடுக்க ஏற்பாடு செய்யப்படுவதாக தகவல் வெளியானது. அதனைத் தொடர்ந்து கே.பி.முனுசாமி அணியினரும், எம்எல்ஏ அணியினரும் பேச்சுவார்த்தையில் ஈடுபட்டனர். தங்கமுத்து-சக்ரவர்த்தி தரப்பில் கடும் போட்டி ஏற்பட்டுள்ள நிலையில், பர்கூர் ஒன்றிய அதிமுக செயலாளர் ஜெயபாலும் மனு தாக்கல் செய்துள்ளதாகவும், தனக்கு வாய்ப்பு வழங்க வேண்டுமென முன்னாள் அமைச்சர் கே.பி.முனுசாமியை கேட்டுக்கொண்டுள்ளதாகவும் தகவல் வெளியானது. அதிமுகவைச் சேர்ந்தவர்கள் இரு அணிகளாக தனித்தனியாக வேட்புமனு தாக்கல் செய்துள்ள நிலையில், மேலும் ஒரு அதிமுக பிரமுகர் மனுதாக்கல் செய்திருப்பதாக தகவல் வெளியாகியிருப்பது, அக்கட்சியினரிடையே அதிர்ச்சியை ஏற்படுத்தியுள்ளது. இந்நிலையில், தேர்தல் பணியில் அதிகாரியே “ஜகா” வாங்கியதால் பரபரப்பு நிலவியது.

கிருஷ்ணகிரியில் துணிகரம் ஆசிரியை வீட்டில் நகை, பணம் கொள்ளை

கிருஷ்ணகிரி, அக்.12: கிருஷ்ணகிரி ஆசிரியை வீட்டில் புகுந்து நகை, பணத்தை மர்ம ஆசாமிகள் கொள்ளையடித்துச் சென்றனர். அவர்கள் விட்டுச்சென்ற கைக்கடிகாரத்தை கைப்பற்றி போலீசார் விசாரித்து வருகின்றனர்.கிருஷ்ணகிரி அக்ரஹாரம் முல்லைநகர் பகுதியைச் சேர்ந்தவர் ஜான்பீட்டர் (47). ஆவினில் ஊழியரான இவரது மனைவி ஷீலா(40), கிருஷ்ணகிரியில் உள்ள அரசு பள்ளியில் ஆசிரியையாக பணியாற்றி வருகிறார். நேற்று முன்தினம் காலை வழக்கம்போல் இருவரும் வேலைக்கு சென்று விட்டனர். மாலை 6 மணிக்கு பணி முடிந்து திரும்பியபோது, வீட்டின் கேட் மற்றும் முன்பக்க கதவின் பூட்டுகள் உடைக்கப்பட்டு திறந்து கிடந்தது. இதனைக்கண்டு அதிர்ச்சியடைந்த இருவரும் வீட்டிற்குள் சென்று பார்த்தனர். அங்கிருந்த 2 பீரோக்களும் உடைக்கப்பட்டு பொருட்கள் சிதறிக் கிடந்தது. மேலும், பீரோவில் வைத்திருந்த 7 பவுன் நகை, ₹3 லட்சம் ரொக்க பணத்தை காணவில் லை. வீட்டை நோட்டமிட்டு பட்டப்பகலில் பூட்டை உடைத்து உள்ளே புகுந்த மர்மநபர்கள், நகை, பணத்தை கொள்ளையடித்துச் சென்றிருப்பது தெரியவந்தது. இதுகுறித்து கிருஷ்ணகிரி தாலுகா போலீசில் இருவரும் புகார் அளித்தனர். இததன்பேரில், போலீசார் வழக்கு பதிவு செய்துள்ளனர். மேலும், தடயவியல் நிபுணர்களை வரவழைத்து வீட்டில் பதிவாகியுள்ள கைரேகைகளை சேகரித்தனர். இதில், கொள்ளையன் ஒருவன் தன்னுடைய வாட்ச்சை விட்டுச் சென்றிருப்பது தெரியவந்தது. அதனை கைப்பற்றி போலீசார் தீவிர விசாரணை நடத்தி வருகின்றனர். அரசு பள்ளி ஆசிரியை வீட்டில் நகை, பணம் கொள்ளையடிக்கப்பட்ட சம்பவம் அப்பகுதியில் பரபரப்பை ஏற்படுத்தி உள்ளது.

தொழிற்சாலை கழிவுகளால் மூச்சுத்திணறல் வீடுகளில் கருப்பு கொடி கட்டி எதிர்ப்பு

ஓசூர், அக்.12:  ஓசூர் அருகே தொழிற்சாலை கழிவுகளால் அவதிக்குள்ளாகி வரும் மக்கள் தங்களது வீடுகளில் கருப்பு கொடி கட்டி எதிர்ப்பு தெரிவித்து போராட்டத்தில் ஈடுபட்டனர். கிருஷ்ணகிரி மாவட்டம் ஓசூர் துளசியம்மா நகரில் 300க்கும் மேற்பட்ட வீடுகள் உள்ளன. இந்த பகுதியில் இருந்து 2 கிலோ மீட்டர் தொலைவில் சிப்காட் அமைந்துள்ளது. இங்குள்ள தொழிற்சாலைகளில் பல்வேறு வாகனங்களின் உதிரி பாகம், டயர் உள்ளிட்டவைகள் தயாரிக்கப்படுகிறது. இந்நிலையில், இந்த தொழிற்சாலைகளின் கழிவுகளை கொண்டு வந்து இரவு நேரங்களில் ஓசூர் துளசியம்மா நகரில் மர்மநபர்களால் கொட்டப் பட்டு, தீவைக்கப்படுகிறது. இதனால் நச்சுத்தன்மையுடன் கூடிய புகை வெறியேறி, அப்பகுதி மக்கள் மூச்சுதிணறல், கண் எரிச்சல் உள்ளிட்ட பல்வேறு இன்னல்களுக்கு ஆளாகின்றனர். இதுகுறித்து சம்பந்தப்பட்ட அதிகாரிகளுக்கு புகார் அளித்தும் எந்த நடவடிக்கையும் எடுக்கப்படவில்லை. இதனால் ஆத்திரமடைந்த அப்பகுதி மக்கள் நேற்று தங்களது வீடுகளில் கருப்பு கொடி கட்டி போராட்டத்தில் ஈடுபட்டனர். இதனால், பரபரப்பு ஏற்பட்டது. இதுகுறித்து அப்பகுதி மக்கள் கூறுகையில், தொழிற்சாலை கழிவுகளை கொட்டி தீ வைப்பதை சிலர் வாடிக்கையாக கொண்டுள்ளனர். இதனால், இரவில் புகைமூட்டம் காணப்படுவதால் மூச்சுதிணறல் ஏற்படுகிறது. வயதானவர்களும், குழந்தைகளும் கண் எரிச்சல் உள்ளிட்டவற்றால் அவதிப்படுகின்றனர். இதுகுறித்து பலமுறை புகார் அளித்தும் சம்பந்தப்பட்ட அதிகாரிகள் கண்டுகொள்ளவில்லை. எனவ, உடனடியாக சம்பந்தப்பட்ட அதிகாரிகள் தலையிட்டு, குடியிருப்பு பகுதியில் கழிவுகளை கொட்டாத வகையில் நடவடிக்கை எடுக்க வேண்டும் என்றனர்.

சாலைகளில் சுற்றித்திரியும் மாடுகளால் விபத்து அபாயம்

கிருஷ்ணகிரி, அக்.11: கிருஷ்ணகிரி நகரப் பகுதியில், சாலைகளில் சுற்றித்திரியும் மாடுகளால் வாகன ஓட்டிகள் கடும் அவதிக்குள்ளாகி வருகின்றனர். அவற்றை அகற்ற வேண்டும் என பொதுமக்கள் தரப்பில் கோரிக்கை விடுக்கப்பட்டுள்ளது. கிருஷ்ணகிரி நகர பகுதியான கே.தியேட்டர் ரோடு, ரவுண்டானா, பழையபேட்டை ரோடு, பெங்களூர் சாலை உள்ளிட்ட பகுதிகள் எப்போதும் போக்குவரத்து நெரிசல் மிகுந்து காணப்படும். இதில், கே.தியேட்டர் ரோடு, சந்தைப்பேட்டையில் சரக்கு வாகனங்கள் அதிகம் சென்று வரும். சந்தைகள்  அமைந்துள்ளதால் காய்கறி, பழங்கள், பூ உள்ளிட்டவற்ைற வாங்க மக்கள் அதிகளவில் வரும்போது போக்குவரத்து பாதிப்பு ஏற்பட்டு நீண்ட நேரத்திற்கு வாகன ஓட்டிகள் காத்திருக்கும் அவல நிலை உள்ளது. கடந்த சில நாட்களாக சந்தைபேட்டையில் 20க்கும் மேற்பட்ட மாடுகள் சாலையில் குறுக்கும், நெடுக்குமாக சுற்றி திரிகின்றன. இதனால் போக்குவரத்து நெரிசல் ஏற்படுவதோடு வாகன ஓட்டிகளும் விபத்தில் சிக்கும் அபாயம் உள்ளது. சாலையோரங்களில் உள்ள கடைகளில் காய்கறிகளை சாப்பிட வரும் மாடுகளால் வியாபாரிகள் அவதிக்குள்ளாகின்றனர். சாலைகளில் சுற்றித்திரியும் மாடுகளை விரட்ட அதிகாரிகள் உடனடி நடவடிக்கை எடுக்க வேண்டும் என பொதுமக்கள் தரப்பில் கோரிக்கை விடுக்கப்பட்டுள்ளது.

மலை கிராமங்களுக்கு பஸ் வசதி ஏற்படுத்த கோரிக்கை

கிருஷ்ணகிரி, அக்.11: கிருஷ்ணகிரி மாவட்டம் தளி ஒன்றியம் கோட்டையூர் ஊராட்சி அத்திநத்தம் கிராமத்தை சேர்ந்த மக்கள்,  கலெக்டர் அலுவலகத்தில் அளித்த கோரிக்கை மனுவில் கூறியுள்ளதாவது: அத்திநத்தம், சிவபுரம், ஜோடுகெரே, போடூர் மற்றும் நூரொந்து சுவாமி மலை  உள்ளிட்ட மலைகிராமங்களில் 600க்கும் மேற்பட்ட குடும்பத்தினர் வசிக்கின்றனர். அஞ்செட்டி,  தேன்கனிக்கோட்டைக்கு செல்ல வேண்டிய நிலை உள்ளது. பேருந்து வசதி இல்லாத  காரணத்தால், மாணவர்கள் நடுநிலைப்பள்ளியுடன் கல்வியை கைவிடும் நிலை  ஏற்படுகிறது. மாணவிகள் பலருக்கு 8ம் வகுப்பு படித்தவுடன் இளம்வயதில்  திருமணம் செய்து வைத்து விடுகின்றனர். எங்களது குழந்தைகளின் எதிர்காலத்தை  கருத்தில் கொண்டு பேருந்து வசதி ஏற்படுத்தி தரக்கோரி பலமுறை மனு அளித்தும்  எவ்வித நடவடிக்கையும் எடுக்கப்படவில்லை. மாணவர்களின் மேற்படிப்பிற்கு  உதவிடும் வகையில் மலைகிராமத்திற்கு பேருந்து வசதி ஏற்படுத்தி தர வேண்டும். இவ்வாறு மனுவில் தெரிவிக்கப்பட்டுள்ளது.

தகவல் உரிமை சட்டம் பற்றி மக்களிடம் விழிப்புணர்வு

கிருஷ்ணகிரி, அக்.11: தகவல் ஆணையம் ஆண்டுதோறும் அக்டோபர் 5ம் தேதி முதல் 12ம் தேதி  வரை தகவல் பெறும் உரிமை சட்ட வாரவிழாவை கொண்டாடுகிறது. அதனடிப்படையில் நடப்பாண்டு நலிவுற்ற நாட்டுப்புறக் கலைஞர்களை கொண்டு மாவட்டம் முழுவதும் தகவல் அறியும் உரிமைச் சட்டம் குறித்த விழிப்புணர்வு கலை நிகழ்ச்சிகள் நடத்தப்படுகிறது. கிருஷ்ணகிரியில் இந்நிகழ்ச்சியை கலெக்டரின் நேர்முக உதவியாளர் (பொ) ராமமூர்த்தி கொடியசைத்து துவக்கி வைத்தார். புதிய பஸ் நிலையத்தில் கலை நிகழ்ச்சி நடத்தப்பட்டது. சென்னை மாற்று ஊடக மையம், புதுக்குரல் கலைக்குழு சார்பில் ஒருங்கிணைப்பாளர் சங்கர், மேலாளர் சாக்கன் ஆகியோரது தலைமையில், தகவல் பெறும் உரிமை சட்டத்தை எப்படி பயன்படுத்துவது என்பது குறித்து தாரை தப்பட்டையுடன் பாட்டு பாடி, நடனம் ஆடி பொதுமக்களிடையே விழிப்புணர்வு ஏற்படுத்தினர். இதே போல் ஓசூர் பஸ் நிலையம், சூளகிரி பஸ் நிலையம் மற்றும் பொதுமக்கள் அதிகம் கூடும் இடங்களில் இந்த கலை நிகழ்ச்சிகள் நடத்தப்பட்டது. 

ஓசூரில் விலை வீழ்ச்சியால் சாலையோரம் கொட்டும் தக்காளியை அள்ள போட்டி

ஓசூர்,அக்.11: ஓசூரில் தக்காளி விலை கடுமையாக வீழ்ச்சியடைந்துள்ளதால், விவசாயிகள் சாலையோரம் அவற்றை கொட்டி விட்டு செல்கின்றனர். அதை எடுக்க மக்களிடையே கடும் போட்டி காணப்படுகிறது. கிருஷ்ணகிரி மாவட்டம் ஓசூர், தேன்கனிக்கோட்டை, சூளகிரி, போச்சம்பள்ளி தாலுகா பகுதியில் 2 ஆயிரம் ஏக்கர் பரப்பளவில் தக்காளி பயிரிடப்பட்டுள்ளது. கடந்த சில மாதங்களுக்கு முன் விலை அதிகரிப்பால் விவசாயிகளுக்கு நல்ல லாபம் கிடைத்தது. கிலோ 50 ரூபாய் வரை சென்றது. தற்போது ஒரு கிலோ 2, 5 ரூபாய்க்கு விற்பனையாகிறது. 20 கிலோ கூடை தோட்டத்தில் 40 ரூபாய்க்கு விலைபோகிறது. அதை சந்தைக்கு கொண்டு செல்ல ஒரு கூடைக்கு கூடுதலாக 10 ரூபாய் செலவாகிறது. தக்காளி பறிப்பதற்கான கூலி கொடுப்பதற்கு கூட விவசாயிகளுக்கு லாபம் கிடைக்கவில்லை. தக்காளியை தோட்டத்தில் போட்டு உரமாக்கலாம் என்றாலும் அது நீண்ட நாட்களாகும். இதனால் தக்காளி பயிரிடவே விவசாயிகள் அஞ்சும் நிலை உருவாகியுள்ளது.ஓசூரில் இருந்து தமிழகத்தின் பல்வேறு மாவட்டங்களுக்கும் தினசரி தக்காளி அனுப்பி வைக்கப்படுகிறது. அதுமட்டுமின்றி கொல்கத்தா, மகாராஷ்டிரா, டில்லி போன்ற மாநிலங்களுக்கும் தக்காளியை வியாபாரிகள் மொத்தமாக அனுப்புகின்றனர். ஆந்திர, கர்நாடக பகுதிகளில் தக்காளி விளைச்சல் அதிகமாக உள்ளதால், வெளிமாநிலங்களுக்கு செல்லும் தக்காளி கூட, தமிழகத்தை நோக்கி கொண்டு வரப்படுகிறது. நல்ல விளைச்சல், அதிகமான விலை என்றால் ஏக்கருக்கு 25 டன் வரை உற்பத்தியாகி ரூ4 லட்சம் வரை விவசாயிகளுக்கு லாபம் கிடைக்கும். ஆனால் தற்போது அந்த நிலை இல்லை. போதுமான விலை கிடைக்காததால், விவசாயிகள் சிலர் தக்காளியை செடிகளிலேயே விட்டு விடுகின்றனர். ஒரு சிலர் அவற்றை பறித்து விற்கமுடியாத நிலையில் சாலையோரம் கொட்டி செல்வதை காண முடிகிறது. அந்த தக்காளியை பொதுமக்கள் பலர் ேபாட்டி போட்டுக்கொண்டு பைகளில் அள்ளி வீட்டிற்கு எடுத்து செல்கின்றனர். ஆடு, மாடுகளும் வீணாக கொட்டப்பட்ட தக்காளியை தின்று வருகின்றன.இது குறித்து விவசாயிகள் கூறுகையில், ஓசூர் சுற்றுவட்டாரத்தில் விவசாயம் அழிந்து போகும் நிலை உள்ளது. கடந்த 6 மாதமாக தக்காளிக்கு போதுமான விலையின்றி விவசாயிகள் நஷ்டமடைந்து வருகின்றனர். தக்காளி கொண்டு உணவு பொருட்கள் தயாரிக்கும் ஆலைகள் குறைந்த விலைக்கு அவற்றை வாங்கி சென்று அதிக லாபம் பார்க்கின்றனர். ஆனால் எங்களுடைய பாடு வேதனையாக உள்ளது. ஓசூர் பகுதியில் தக்காளி குளிர்பதன கிடங்கு அமைக்க வேண்டும். தக்காளி ஜாம் தயாரிக்கும் ஆலை உருவாக்கப்பட வேண்டும். அவ்வாறான திட்டங்கள் வந்தால் விவசாய குடும்பங்கள் பயன்பெறும், என்றனர்.

தர்மபுரி அருகே கல்லூரி பேராசிரியை தூக்கிட்டு தற்கொலை

தர்மபுரி, அக். 11: தர்மபுரி அருகே கல்லூரி பேராசிரியை தற்கொலை செய்து கொண்டது குறித்து போலீசார் விசாரணை நடத்தி வருகின்றனர்.தர்மபுரி மாவட்டம் கிருஷ்ணாபுரம் அருகே கதிர்நாயக்கனஅள்ளியை சேர்ந்தவர் வேலாயுதம். இவருடைய மகள் கனிமொழி(27). இவர் எம்ஏ, பிஎட் பட்டதாரி. பென்னாகரம் அரசு கலைக் கல்லூரியில் பகுதிநேர பேராசிரியையாக கனிமொழி பணியாற்றி வந்தார். இன்னும் திருமணமாகவில்லை.இந்நிலையில் கடந்த 8ம் தேதி இரவு வீட்டில் தனது அறையில் தூக்கு போட்டு கனிமொழி தற்கொலை செய்து கொண்டார். இதனை மறுநாள் காலையில் பார்த்து அதிர்ச்சியடைந்த பெற்றோர், கிருஷ்ணாபுரம் போலீசாருக்கு தகவல் கொடுத்தனர். அதன்பேரில் சம்பவ இடம் வந்த போலீசார் சடலத்தை கைப்பற்றி, தர்மபுரி அரசு மருத்துவமனைக்கு அனுப்பி வைத்தனர். தொடர்ந்து கனிமொழி எதற்காக தற்கொலை செய்து கொண்டார் என போலீசார் விசாரணை நடத்தி வருகின்றனர்.

அனுமதியின்றி செயல்பட்ட 6 சாயப்பட்டறைகள் இடித்து அகற்றம்

சேலம், அக்.11: சேலம் மாநகர பகுதிகளில் அனுமதியின்றி செயல்பட்டு வந்த 6 சாயப்பட்டறைகள் நேற்று இடித்து அகற்றப்பட்டது. சேலம் மாநகர பகுதிகளில் மாசு கட்டுப்பாட்டு வாரியத்தின் அனுமதியின்றி, ஏராளமாள சாயப்பட்டறைகள் செயல்பட்டு வருவதுடன், கழிவுநீரை முறையாக சுத்திகரிப்பு செய்யாமல் வெளியே விடுவதாகவும் புகார் எழுந்தது. இதனையடுத்து நேற்று, களரம்பட்டி, சீலநாய்க்கன்பட்டி மற்றும் அமானி கொண்டலாம்பட்டி பகுதிகளில் மாசு கட்டுப்பாட்டு வாரிய அதிகாரிகள் திடீர் ஆய்வு மேற்கொண்டனர். அப்போது, களரம்பட்டி மெயின்ரோட்டில் குமார் சில்க் யார்ன் டையிங், அம்பாள் ஏரி ரோட்டில் செங்கோடன் டையிங் யூனிட் 1, 2 மற்றும் 3 என மூன்று பட்டறைகள், ஜிகே கரட்டூரில் பிரபு கலர்ஸ் மற்றும் காந்தி டையிங் என மொத்தம் 6 சாயப்பட்டறைகள் இடித்து அகற்றப்பட்டன. இதில்,  4 சாயப்பட்டறைகளின் மின்சார இணைப்பும் துண்டிக்கப்பட்டது.