Madurai - Dinakaran

மதுரை மாவட்டத்தில் திமுக கிளை கழக தேர்தலில் போட்டியிட இளைஞர்கள் ஆர்வம்

மதுரை, பிப். 28: மதுரை மாவட்டத்தில் திமுக உள்கட்சி கிளை தேர்தலில் விருப்ப மனு வாங்குவது தொடங்கியது. இதில் இளைஞர்கள் உள்பட பலர் ஆர்வத்துடன் மனு அளித்தனர்.திமுக உள்கட்சி தேர்தல் நடத்தப்படுகிறது. மதுரை வடக்கு மாவட்டத்தில் ஒன்றியம் வாரியாக கிளை தேர்தலில் போட்டியிட விரும்புவோரிடம் மனு வாங்குவது நேற்று தொடங்கியது. மதுரை கிழக்கு ஒன்றியம் கருப்பாயூரணியில் விருப்ப மனுக்கள் பெறப்பட்டன. தலைமை கழக பிரதிநிதி சைதை மகேஷ்குமார், மாவட்ட செயலாளர் மூர்த்தி எம்.எல்.ஏ. முன்னிலையில் மனுக்கள் பெறப்பட்டன.தொடர்ந்து அனைத்து கிளைகளுக்கும் மனுக்கள் பெறப்பட்டன. இளைஞர்கள் உள்ளிட்ட பலரும் ஆர்வத்துடன் தேர்தலில் போட்டியிட விருப்ப மனு அளித்தனர். இதில் மதுரை கிழக்கு ஒன்றிய செயலாளர் ஏ.பி.ரகுபதி, மாவட்ட நிர்வாகிகள் வெங்கடேசன், சேகர். நேரு. இளைஞரணி ஜி.பி.ராஜா, பாலாண்டி, அண்ணாமலை, மதிவாணன், கருப்பாயூரணி சுரேஷ், வடிவேல் முருகன்., அய்யப்பன், வினோத், கலாநிதி உள்ளிட்ட பல்ர் பங்கேற்றனர். இன்று மதுரை மேற்கு ஒன்றியத்தில் மனு வாங்கப்படுகிறது.மதுரை தெற்கு மாவட்ட திமுக சார்பில் உள்கட்சி தேர்தல் பணிகள் துவங்கியுள்ளன. நேற்று திருமங்கலம் ஒன்றியத்தில் கட்சியினரிடம் மனுக்கள் பெறப்பட்டன. இதன் துவக்க நிகழ்ச்சியாக திருமங்கலத்தை அடுத்த செக்காணுரணியில் நடந்தது. தலைமை கழக பிரதிநிதி சைதை மகேஷ்குமார், தோ்தல் பணிக்குழு செயலாளர் சேடபட்டி முத்தையா, மாவட்ட செயலாளர்கள் மணிமாறன், மூா்த்தி எம்எல்ஏ ஆகியோர் கட்சியினரிடம் மனுக்களை பெற்றனர். நிர்வாகிகள் மிகவும் ஆர்வத்துடன் மனுக்களை கொடுத்தனர்.இதில் தலைமை செயற்குழு உறுப்பினர் ஏர்போர்ட் பாண்டி, மாவட்ட துணை செயலாளர் பாலாஜி, பொருளாளர் பொடா நாகராஜ், இளைஞரணி அமைப்பாளர் மதன்குமார், திருமங்கலம் ஒன்றிய செயலாளர் தனபாண்டி உள்ளிட்டோர் கலந்து கொண்டனர். தொடர்ந்து திருமங்கலம் ஒன்றியத்தின் பல்வேறு கிராமங்களுக்கு சென்று இவர்கள் கட்சியினரிடம் மனுக்களை பெற்றனர்.

மேலூர் அருகே அச்சுறுத்தும் மின்வயர் இடையூறாக மின்கம்பம்

மேலூர், பிப்.28: மேலூர் அருகே சாலையின் குறுக்கே மின் கம்பங்களாலும், தாழ்வாக செல்லும் மின் வயர்களாலும் கிராம மக்கள் தொடர்ந்து அவதிப்பட்டு வருகின்றனர்.கொட்டாம்பட்டி ஒன்றியம் சேக்கிபட்டி ஊராட்சியில் மந்தகுளம் நெடுமலை செல்லும் வழியில் உள்ள சின்னன்ணன் கோயில் அருகே சில மாதங்களுக்கு முன்பு பெய்த மழையின் காரணமாக மின் வயர்கள் தொய்வடைந்து கைக்கு எட்டும் தூரத்தில் தொங்குகிறது. இதை சரி செய்ய கோரிக்கை விடுத்தும் மின்வாரியம் கண்டுகொள்ளவில்லை.இதனால் அதிக தென்னை தோப்புகள் உள்ள இப்பகுதியில் மாட்டு வண்டியில் கூட காய்களை ஏற்றி செல்ல முடியாத நிலை உள்ளது. லாரிகள் இப்பகுதியில் வர முடியாமல் போகவே, விவசாயிகள் தங்கள் தேங்காயை விற்க முடியாமல் உள்ளனர். இதேபோல் சேக்கிபட்டி கோயில் திருவிழாவின் போது சுவாமியின் சப்பரத்தை கொண்டு செல்லும் வழியில் உயரம் குறைவான மின்கம்பம் உள்ளதால், ஒவ்வொரு பகுதியாக மின்சாரத்தை நிறுத்தி, அந்த மின்வயர்களை அவிழ்த்து விட்டே சப்பரம் செல்லும் நிலை உள்ளது.தற்போது திருவிழா துவங்கி உள்ளதால், உடன் சப்பரம் செல்லும் பாதையில் உள்ள மின் வயர்களை உயரத்தில் கட்ட வேண்டும் என்ற கோரிக்கை வலுவடைந்துள்ளது. இப்பகுதி மக்களின் நீண்ட நாள் கோரிக்கையான இதனை, மின்வாரியம் ஏனோ கண்டு கொள்ளாமலேயே உள்ளது. மேலும் மேற்கு தெருவில் உள்ள மானாவாரி நிலங்களில் 20 வருடங்களுக்கு முன்பு குடியேறியவர்களின் குடியிருப்பு தற்போது 500ஆக உயர்ந்துள்ளது. ஆரம்பத்தில் இப்பகுதியில் ஊன்றிய மின்கம்பங்கள் தற்போது சாலையின் நடுவிற்கு வந்து விட்டது. இதனால் அப்பகுதியில் டூவீலர்கள் செல்வதற்கே அவதியாக உள்ளது. கார், ஆம்புலன்ஸ் போன்றவைகள் அதற்குள் செல்வதற்கே வழியில்லாததால், உடல் நலக்குறைவு ஏற்பட்டவர்களை தூக்கி வந்தே வாகனத்தில் ஏற்ற வேண்டிய நிலை இன்றும் தொடர்கிறது. இதுபற்றி இப்பகுதி மக்கள் பலமுறை மின்வாரியத்திடம் புகார் கூறியும், நடவடிக்கை எடுக்க வில்லை. தற்போது கோயில் திருவிழா துவங்கி உள்ளதால், உடனடியாக தாழ்வாக செல்லும் மின்வயர்களை சரி செய்ய வேண்டும் என சேக்கிபட்டி பகுதி மக்கள் மீண்டும் கோரிக்கை விடுத்துள்ளனர்.

கார் மோதி ஒருவர் பலி

மேலூர், பிப்.28: மேலூர் நான்கு வழிச்சாலையில் பின்னால் வந்த கார் மோதியதில் டூவீலரில் சென்றவர் பலியானார்.மதுரை திருப்பாலை அருகே திருமலாபுரத்தை சேர்ந்தவர் குணசேகரன்(48). நேற்று இவர் நண்பருடன் டூவீலரில் மேலூருக்கு வந்துள்ளார். பின் இருவரும் நான்கு வழிச்சாலையில் மதுரைக்கு திரும்பிக் கொண்டிருந்தனர்.தெற்கு தெரு அருகில் இவர்களின் பின்னால் வந்த கார் திடீரென டூவீலரின் பின்னால் மோதியது. இதில் சம்பவ இடத்திலேயே குணசேகரன் பலியானார். அவரது நண்பர் காயங்களுடன் மதுரை அரசு மருத்துவமனைக்கு கொண்டு செல்லப்பட்டார். வழக்குபதிவு செய்து மேலூர் போலீசார் விசாரித்து வருகின்றனர்.

வாகன ஓட்டிகளுக்கு நிம்மதி பிளஸ் 1, பிளஸ் 2 தேர்வு மையங்களுக்கான கல்வி அலுவலர்கள் கூட்டம்

மதுரை, பிப்.28: பிளஸ் 2 தேர்வு மார்ச் 2ம் தேதி துவங்குகிறது. இத்தேர்வு 120 மையங்களில் நடக்கிறது. மதுரை மாவட்டத்தில் 316 பள்ளிகளில் இருந்து 17 ஆயிரத்து 89 மாணவர்கள், 19 ஆயிரத்து 204 மாணவிகள் என மொத்தம் 36 ஆயிரத்து 293 பேர் எழுதுகின்றனர். இதேபோல் பிளஸ் 1 தேர்வு மார்ச் 4ம் தேதி துவங்குகிறது. இத்தேர்வு 120 மையங்களில் நடக்கிறது. இத்தேர்வை மதுரை மாவட்டத்தில் 323 பள்ளிகளில் இருந்து 17 ஆயிரத்து 924 மாணவர்கள், 18 ஆயிரத்து 980 மாணவிகள் என மொத்தம் 36 ஆயிரத்து 904 பேர் எழுதுகின்றனர்.இந்த தேர்வுகள் ெதாடர்பான கல்வி அலுவலர்கள் பங்கேற்ற கூட்டம், மதுரை சேதுபதி மேல்நிலைப் பள்ளியில் நேற்று காலை நடந்தது. கூட்டத்திற்கு கள்ளர் சீரமைப்புத்துறை இணை இயக்குனர் குமார் தலைமை வகித்தார். மாவட்ட முதன்மைக்கல்வி அலுவலர் சுவாமிநாதன் முன்னிலை வகித்தார்.கூட்டத்தில் மாவட்ட கல்வி அலுவலர்கள் வளர்மதி (மதுரை), மீனாவதி (மேலூர்), முத்தையா (உசிலம்பட்டி), இந்திராணி (திருமங்கலம்), பிளஸ் 1, பிளஸ் 2 தேர்வு மையங்களுக்கான முதன்மை கண்காணிப்பாளர்கள், வினாத்தாள் கட்டுப்பாட்டு அலுவலர்கள், துறை அலுவலர்கள் மற்றும் வழித்தட அலுவலர்கள் ஆகியோர் கலந்து கொண்டனர். கூட்டத்தில் முதன்மை கல்வி அலுவலரின் நேர்முக உதவியாளர்களும் பங்கேற்றனர்.

கலெக்டர் அலுவலகத்தில் ஒய்வூதியர்கள் குறைகளை தெரிவிக்க விண்ணப்பிக்கலாம்

மதுரை, பிப்.28: கலெக்டர் வினய் விடுத்துள்ள அறிக்கையில் கூறியுள்ளதாவது, ‘‘மதுரை மாவட்டத்தில் அரசு அலுவலகத்தில் பணியாற்றி ஓய்வு பெற்றவர்களுக்கான ஓய்வூதியர் குறைதீர் நாள் கூட்டம் வரும் மார்ச் 18ம் தேதி கலெக்டர் அலுவலகத்தில் காலையில் நடைபெற உள்ளது. இதற்காக ஓய்வூதியர்கள் தங்களது பலன்கள் பெறுவதில் உள்ள குறைகளைக் குறிப்பிட்டு, அதற்கான விண்ணப்பம், தொடர்புடையை ஆவணங்களுடன் 2 நகல்கள் வழங்க வேண்டும்.அதில், ஓய்வூதியர் பெயர், குடும்ப ஓய்வூதியம் பெறுபவர் உறவுமுறை குறிப்பிட வேண்டும். ஓய்வூதிய புத்தக எண். கருவூலகத்தின் பெயர். பிரச்சனை தொடர்பாக சென்னை மாநில கணக்காயருக்கு அனுப்பப்பட்டிருந்தால், அதன் விபரம், கோரிக்கைகள், குறைகளை நிவர்த்தி செய்ய வேண்டிய அலுவலர் மற்றும் அலுவலகத்தின் முகவரி, தொலைபேசி எண் உள்ளடங்கிய விபரத்தினை விண்ணப்பத்தில் தெரிவிக்க வேண்டும்.பூர்த்தி செய்யப்பட்ட விண்ணப்பத்தினை வரும் மார்ச் 8ம் தேதிக்குள் மதுரை கலெக்டர் அலுவலகத்தில் சமர்ப்பிக்க வேண்டும். விண்ணப்பங்கள் சம்பந்தப்பட்ட துறைகளுக்கு அனுப்பி தற்போதைய நிலை குறித்து தகவல் பெறப்படும். குறைகளையும் களைய நடவடிக்கை எடுக்கப்படும். இதில் மதுரை மாவட்டத்தில் பணியாற்றி ஓய்வு பெற்ற அரசு ஊழியர்கள் மட்டுமே பங்குபெற வேண்டும். வெளி மாவட்டத்தில் பணியாற்றியவர்கள் விண்ணப்பிக்க வேண்டாம். விண்ணப்பதாரர்கள் கண்டிப்பாக வரும் 18ம் தேதி நடைபெறும் குறைதீர் கூட்டத்தில் கலந்து கொள்ள வேண்டும். இவ்வாறு அவர் தெரிவித்துள்ளார்.

விசாரணை கைதி சாவு

மதுரை, பிப்.28: கோர்ட் வாய்தாவுக்கு சென்று திரும்பிய விசாரணை கைதி, நெஞ்சு வலியால் உயிரிழந்தார். மதுரை கோமதிபுரத்தை சேர்ந்தவர் மோகன்காந்தி. இவர் மீது அண்ணாநகர் காவல் நிலையத்தில் மோசடி வழக்கு உள்ளது. இவ்வழக்கு தொடர்பாக கைது செய்யப்பட்ட மோகன்காந்தி, விசாரணை கைதியாக, மதுரை மத்திய சிறையில் அடைக்கப்பட்டுள்ளார். இந்நிலையில், இவரை நேற்று மதுரை மாவட்ட நீதிமன்றத்தில் வாய்தாவுக்கு ஆஜர்படுத்த கரிமேடு போலீசார் கொண்டு வந்தனர். நீதிமன்றத்தில் ஆஜர்படுத்தி விட்டு, மீண்டும் சிறையில் அடைப்பதற்காக போலீசார், மத்திய சிறைக்கு கொண்டு சென்றனர். அப்போது, மோகன்காந்தி, தனக்கு நெஞ்சு வலிப்பதாக கூறினார். அவரை, மதுரை அரசு மருத்துவமனைக்கு கொண்டு வந்தனர். ஆனால், வரும் வழியில் மோகன்காந்தி உயிரிழந்தார். இது குறித்து, கரிமேடு போலீசார் வழக்குப்பதிந்து, விசாரித்து வருகின்றனர். இறந்த மோகன்காந்திக்கு மனைவி மற்றும் அக்காள் உள்ளனர்.மையங்கள் ஆய்வு மதுரை மாவட்டத்தில் பிளஸ் 1, பிளஸ் 2 தேர்வு 120 மையங்களில் நடக்கிறது. இந்த வினாத்தாள் கட்டுப்பாட்டு மையங்களை, பள்ளி கல்வித்துறை ஆணையாளர் சுஜி தாமஸ் நேற்று ஆய்வு செய்தார். அப்போது மதுரை மாவட்ட நோடல் அதிகாரி குமார் (கள்ளர் சீரமைப்புத்துறை இணை இயக்குனர்), மாவட்ட முதன்மை கல்வி அலுவலர் சுவாமிநாதன் ஆகியோர் உடன் சென்றனர். இந்த ஆய்வில் 4 மாவட்ட கல்வி அதிகாரிகளும், மாவட்ட முதன்மைக்கல்வி அலுவலரின் நேர்முக உதவியாளர்களும் கலந்து கொண்டனர்.

சுற்றுச்சூழலை பாதுகாக்கக் கோரி வாலிபர் சைக்கிள் பிரச்சார பயணம்

மதுரை, பிப்.28: சுற்றுச்சூழலை பாதுகாக்க கோரி, வங்காளதேசத்தைச் சேர்ந்த பட்டதாரி வாலிபர் சைக்கிளில் விழிப்புணர்வு பிரச்சாரம் மேற்கொண்டு வருகிறார். பூமி வெப்ப மயமாதலை தடுக்கும் வகையில், சுற்றுச்சுழல் மாசை தடுக்கக் கோரி வங்காளதேசத்தைச் சேர்ந்த முகமது ஜாகீருல் இஸ்லாம்(27) என்ற வாலிபர் சைக்கிளில் விழிப்புணர்வு பிரச்சாரம் மேற்கொள்ள முடிவு செய்தார். இதற்காக அவர் கடந்தாண்டு செப்.21ம் தேதி டாக்காவில் இருந்து தனது சைக்கிள் பயணத்தை துவக்கினார். வங்காளதேசத்தில் பல்வேறு நகரங்கள் வழியாக இந்தியாவின் மேற்கு வங்காளம், ஜார்கண்ட், பீகார், உ.பி. மத்திய பிரதேசம், ஆந்திரா வழியாக தமிழ்நாடு வந்து பல்வேறு இடங்களுக்கு சென்ற அவர், நேற்று மதுரை வந்தார். கலெக்டர் அலுவலகம், காந்தி மியூசியம், மாட்டுத்தாவணி ஆகிய பகுதிகளில் தனது பயணம் குறித்து பொதுமக்களிடம் விளக்கி கூறினார். பின்பு, அவர் நிருபர்களிடம் கூறும்போது, ‘‘புவியியல் பட்டதாரியான நான், பூமியின் இயற்கையை நாம் பாதுகாக்க வேண்டும். மாசு அதிகமானால், பொதுமக்களுக்கு கடும் பாதிப்பு ஏற்படும். இதற்காக பூமி மாசுபடுவதை தடுக்கவும். அதனை பாதுகாப்பது தொடர்பாகவும் சைக்கிள் பிரச்சாரம் மேற்கொண்டு வருகிறேன். மதுரையில் இருந்து, கன்னியாகுமரி வரை சென்று, கேரளா மற்றும் கர்நாடக சென்று, சென்னை செல்கிறேன். பின்பு கப்பல் மூலம், இலங்கை சென்று, பிரச்சாரத்தை மேற்கொண்டு, அதன்பின்பு, நாடு திரும்ப திட்டமிட்டுள்ளேன்’’ என்றார்.

10, பிளஸ்2 அரசு பொதுதேர்வில் மாணவர்கள் அதிகளவு மதிப்பெண் பெற யாகம்

அலங்காநல்லூர். பிப்.28: அலங்காநல்லூர் ஐயப்பன் கோவிலில் 10 மற்றும் பிளஸ்2 அரசு பொது தேர்வு எழுதும் மாணவ,மாணவிகளுக்காக லெட்சுமி ஹயக்கிரிவர் யாகம் நடந்தது. இதில் பல்வேறு பகுதிகளிலிருந்து வந்திருந்த மாணவர்கள் கலந்து கொண்டனர். ஐயப்பன் சன்னதி முன்பாக உள்ள யாகசாலையில் புனித தீர்த்தம் அடங்கிய கும்பகலசம் வைத்து யாகம் நடந்தது. தொடர்ந்து லெட்சுமி ஹயக்கிரீவருக்கு பால், பழம், பன்னீர், சந்தனம் உள்ளிட்ட 16 வகையான திரவியங்களாலும், மலர்களாலும் அபிஷேகம், அர்ச்சனைகள் செய்யப்பட்டது. பின்னர் யாகசாலையில் வைத்து பூஜை செய்யப்பட்ட எழுதுபொருட்கள் மாணவ, மாணவிகளுக்கு வழங்கப்பட்டது. தொடர்ந்து பூஜை மலர்களும், விபுதி பிரசாதம் மற்றும் அன்னதானமும் வழங்கப்பட்டது. இதற்கான ஏற்பாடுகளை கோவில் நிர்வாகி சீனிவாசன் மற்றும் அலங்காநல்லூர் வட்டார ஐயப்ப, முருக பக்தர்கள் செய்திருந்தனர்.

தனியார் கார் நிறுவனத்தில் ரூ.5 லட்சம் கையாடல் செய்த கேசியர் கைது

திருப்பரங்குன்றம், பிப்.28: தனியார் கார் நிறுவனத்தில் 5 லட்சம் ரூபாய் கையாடல் செய்த கேசியர் கைது செய்யப்பட்டார். திருப்பரங்குன்றம் அருகில் உள்ள தனியார் கார் விற்பனை செய்யும் நிறுவனத்தில் கேசியராக வேலை பார்த்து வருபவர் மதுரையைச் சேர்ந்த நாகரத்தினம்(32). இவர் கடந்த 2017ம் ஆண்டு முதல் வாடிக்கையாளர்கள் செலுத்தும் இன்சூரன்ஸ் தொகையை இன்சூரன்ஸ் நிறுவன கணக்கில் செலுத்தாமல் கையாடல் செய்துள்ளதை தணிக்கையின் போது கணக்கு மேலாளர் கோபாலகிருஷ்ணன் கண்டுபிடித்ததாக தெரிகிறது. மொத்தம் ரூ.5 லட்சத்து 16 ஆயிரத்து 406ஐ கேசியர் நாகரத்தினம் கையாடல் செய்ததாக கோபாலகிருஷ்ணன் அளித்த புகாரின் பேரில், ஆஸ்டின்பட்டி போலீசார் வழக்குப்பதிந்து நாகரத்தினத்தை கைது செய்தனர்.

சிலைக்கு மரியாதை காதலுக்கு பெற்றோர் எதிர்ப்பு விஷம் குடித்த கல்லூரி மாணவி சாவு

வாடிப்பட்டி, பிப்.28: காதலுக்கு பெற்றோர் எதிர்ப்பு தெரிவித்ததால் மதுரையை சேர்ந்த காதல் ஜோடி விஷம் குடித்து தற்கொலைக்கு முயன்றதில் கல்லூரி மாணவி பரிதாபமாக இறந்தார். காதலனுக்கு தொடர்ந்து சிகிச்சை அளிக்கப்படுகிறது. மதுரை மதிச்சியம் வடக்கு தெருவை சேர்ந்தவர் கருப்பையா. இவரது மகன் நவீன்குமார்(20). கேட்டரிங் படித்துள்ளார். இந்நிலையில் நவீன்குமாரும், பக்கத்து வீட்டை சேர்ந்த வேல்முருகன் மகள் நிவேதா (18) ஆகியோரும் காதலித்ததாக தெரிகிறது. நிவேதா கல்லூரியில் முதலாமாண்டு படித்து வந்தார். இவர்களது காதல் பெற்றோருக்கு தெரிய வரவே இருவர் வீட்டிலும் எதிர்ப்பு தெரிவித்துள்ளனர். இதனால் மனமுடைந்த இருவரும் நேற்று வாடிப்பட்டி அருகே மதுரை-திண்டுக்கல் நான்கு வழிச்சாலையில் கட்டக்குளம் பிரிவு பகுதியில் விஷம் குடித்த நிலையில் மயங்கி கிடந்தனர். இதனை பார்த்தவர்கள் 108 ஆம்புலன்ஸ் மூலம் வாடிப்பட்டி அரசு மருத்துவமனைக்கு அனுப்பி வைத்தனர். அங்கு முதலுதவி கொடுத்த மருத்துவர்கள் மேல் சிகிச்சைக்காக மதுரை அரசு மருத்துவமனைக்கு அனுப்பி வைத்தனர்.  அங்கு சிகிச்சை பலனின்றி நிவேதா பரிதாபமாக இறந்தார். நவீன்குமார் உயிருக்கு ஆபத்தான நிலையில் தொடர்ந்து சிகிச்சை பெற்று வருகிறார். இதுகுறித்து வாடிப்பட்டி போலீசார் விசாரணை நடத்தி வருகின்றனர்.

மத்திய அரசை கண்டித்து ஆர்ப்பாட்டம்

மதுரை, பிப்.28:  டெல்லியில் நடந்த வன்முறையை தடுக்கத் தவறிய மத்திய பாஜ அரசை கண்டித்து தவ்ஹீத் ஜமாஅத் சார்பில் மதுரை கோரிப்பாளையத்தில் நேற்று ஆர்ப்பாட்டம் நடந்தது. மாவட்டத் தலைவர் ஹபிபுல்லா தலைமை வகித்தார். இதில் மாநில துணைத் தலைவர் அப்துல் ரஹ்மான் கண்டன உரையாற்றுகையில், “டெல்லியில் நடைபெற்றது கலவரம் அல்ல, திட்டமிட்ட வன்முறை. குடியுரிமை திருத்த சட்டத்திற்கு எதிராக அறவழியில் போராடிய மக்கள் மீது கொலை வெறித்தாக்குதல் நடத்தப்படும் என பாஜ தலைவர் வெளிப்படையாக அறிவித்த  நிலையில், இந்த சம்பவம் நடைபெற்றிருக்கிறது. மக்களை பாதுகாக்க வேண்டிய காவல்துறையும், கலவரக்காரர்களுடன் கைகோர்த்து செயல்பட்டிருப்பது கண்டிக்கத்தக்கது. வெளியூர்களிலிருந்து ஆட்கள் வரவழைக்கப்பட்டு, குறிவைத்து தாக்கியிருக்கிறார்கள். கடைகள் சூறையாடப்பட்டு, பொருட்கள் கொள்ளை அடிக்கப்பட்டிருக்கின்றன. வழிபாட்டுத்தலங்கள் தீவைத்து எரிக்கப்பட்டுள்ளன. தெருவில் நடந்து சென்ற அப்பாவி மக்கள் அடித்து கொல்லப்பட்டிருக்கிறார்கள். மூன்று நாட்கள் தொடர்ந்து நடைபெற்ற இந்த தாக்குதலை, காவல்துறை வேடிக்கை பார்த்துள்ளது. வன்முறையின் மூலம் அறவழிப்போராட்டங்களை ஒடுக்க முடியாது. நாட்டில் எத்தகைய வன்முறைக்கும், மதத்திற்கும் இங்கு மக்கள் இடமளிக்கமாட்டார்கள். பாதிக்கப்பட்ட மக்களை சந்தித்து மோடி இதுவரை ஆறுதல் தெரிவிக்கவில்லை” என்றார். இதில் மாவட்டச் செயலாளர் அம்ஜத்கான், மாவட்ட பொருளாளர் மன்சூர் அகமது, மாவட்ட துணைத்தலைவர் ஜெய்னுல் ஆபீதீன், மாவட்ட துணைச் செயலாளர்கள் காமில்பாஷா, ஹசன் பாஷா, நைனார் முகம்மது, ஜாகீர்உசேன், கலீல் ரகுமான் உள்ளிட்டோர் கலந்து கொண்டனர். ஆர்ப்பாட்டத்தில் 500க்கும் மேற்பட்ட பெண்கள் உள்பட ஆயிரக்கணக்கானோர் கலந்து கொண்டு, மத்திய அரசுக்கு எதிராக கோஷங்கள் எழுப்பினர்.

ஆவினில் 17 இயக்குநர் பதவிக்கு 43 பேர் மனு தாக்கல் இன்று வேட்பு மனு பரிசீலனை

மதுரை, பிப்.28:  மதுரை ஆவினில் 17 இயக்குநர் பதவிக்கு 43 பேர் வேட்பு மனு தாக்கல் செய்துள்ளனர். இன்று வேட்பு மனுக்கள் பரிசீலனை நடைபெறுகிறது. மதுரை மற்றும் தேனி மாவட்டத்தை உள்ளடக்கிய மதுரை ஆவினுக்கு 17 பேர்  இயக்குநர்களாக கடந்த 2018ல் தேர்வு செய்யப்பட்டனர். துணை முதல்வர் ஓ.பன்னீர் செல்வம் தம்பி ஓ.ராஜா ஆவின் சேர்மனாக தேர்வு செய்யப்பட்டார். இந்நிலையில்,  கடந்தாண்டு ஆக.22ம் தேதி மதுரையிலிருந்து தேனி மாவட்டத்திற்கு என ஆவின் தனியாக பிரிக்கப்பட்டது. இதனால், மதுரையிலிருந்த சேர்மன் ஓ.ராஜா உள்ளிட்ட 6 இயக்குநர்கள் தேனி ஆவினுக்கு சென்றனர். இதன்பிறகு மீதியுள்ள 11 பேர் இயக்குநர்களாக இருந்தனர். இந்நிலையில், மதுரை ஆவினுக்கு இயக்குநராக இல்லாத முன்னாள் எம்எல்ஏ தமிழரசன்,  தேர்தல் நடத்தாமல் தலைவராக நியமிக்கப்பட்டார். அவரது பெயர் வாக்காளர் பட்டியலில் இல்லை. ஆளுங்கட்சியை சேர்ந்தவர் என்பதால் அவரை தலைவராக நியமித்தனர். அவரது நியமனத்தை எதிர்த்து ஐகோர்ட் கிளையில் வழக்கு தொடரப்பட்டது. அதில், தமிழரசன் நியமனம் செல்லாது. தேர்தல் மூலம் புதிய நிர்வாகக்குழுவை தேர்வு செய்ய வேண்டும் என ஐகோர்ட் கிளை உத்தரவிட்டது. இதனைத்தொடர்ந்து மதுரை ஆவினுக்கு புதிதாக 17 இயக்குநர்கள் தேர்வு செய்ய வேண்டும். இதில் 3 இயக்குநர்கள் ஆதிதிராவிடர், பழங்குடியினர் பிரிவுக்கும், 5 பெண்கள், 9 பொது என்ற இடஒதுக்கீடு அடிப்படையில் இயக்குநர்கள் தேர்வு செய்ய வேண்டும்.  புதிய இயக்குநர்கள் தேர்வு செய்வதற்கான வேட்பு மனு தாக்கல் நேற்று மதுரை ஆவினில் நடந்தது.  தேர்தல் நடத்தும் அதிகாரியாக துணை பதிவாளர் கணேசன் தலைமையில் அதிகாரிகள் அழகுராஜ், முருகன் ஆகியோர் இருந்தனர். இவர்களிடம் அதிமுக சார்பில் முன்னாள் எம்எல்ஏ தமிழரசன் தலைமையில் 17 பேர் ஊர்வலமாக வந்து, வேட்பு மனு தாக்கல் செய்தனர். அதேபோன்று, பால் உற்பத்தியாளர்கள் நலச்சங்கம் சார்பிலும் தனியாக மனு தாக்கல் செய்யப்பட்டது. இதனால், மொத்தம் 43 பேர் வேட்பு மனு தாக்கல் செய்தனர்.  மனுக்கள் மீதான பரிசீலனை இன்று காலை 11 மணிக்கு நடைபெறுகிறது. தள்ளுபடி செய்யப்பட்ட மனுக்கள் குறித்த விபரம் இன்று மாலை 5 மணிக்கு வெளியிடப்படுகிறது. வேட்பு மனுக்கள் நாளை (பிப்.29) மாலை 4 மணி வரை திரும்ப பெறலாம். 5 மணிக்குள் இறுதி வேட்பாளர் பட்டியல் வெளியிடப்படும். போட்டியிருந்தால், மார்ச் 4ம் தேதி காலை 8 மணி முதல் மாலை 5 மணி வரை தேர்தல் நடைபெறும். மார்ச் 5ம் தேதி காலை 10 மணிக்கு வாக்கு எண்ணிக்கை நடைபெறும். அன்று வெற்றி பெற்ற வேட்பாளர் விபரம் அறிவிக்கப்படும். அதனை தொடர்ந்து மார்ச் 9ம் தேதி தலைவர், துணை தலைவர் தேர்தல் நடைபெறுகிறது. 

உலக திறனாய்வு போட்டியில் காலணிகள் வழங்காததால் வீரர்கள் விழுந்து காயம்

மதுரை, பிப்.28:  மதுரையில் நடந்த உலக திறனாய்வு போட்டியில் பங்கேற்ற மாணவ, மாணவிகளுக்கு காலணிகள் (ஷூ) வழங்காததால் ஓடும் போது பலரும் கீழே விழுந்து காயமடைந்தனர்.  மதுரை மாவட்டம் சார்பில்  உலகத்தரத்திற்கு இணையான விளையாட்டு வீரர்களை கண்டறியும் பொருட்டு பள்ளியில் 6, 7, 8ம் வகுப்பு மாணவ, மாணவிகளுக்கான உலகத் திறனாய்வு  திட்ட தடகள போட்டி ரேஸ்கோர்ஸ் மைதானத்தில் நடந்தது. தமிழ்நாடு விளையாட்டு மேம்பாட்டு ஆணைய மதுரை கிளை சார்பில் நடந்த போட்டியை மாவட்ட விளையாட்டு அலுவலர் லெனின் துவக்கி வைத்தார். பள்ளி கல்வித்துறையின் விளையாட்டுப் பிரிவை சேர்ந்த உடற்கல்வி ஆய்வாளர் (பொ) செங்கதீர் தலைமை வகித்தார். மதுரை, உசிலம்பட்டி, மேலூர் ஆகிய 3 கல்வி மாவட்டங்களுக்கு தடகள போட்டிகள் நடந்தன. மதுரை கல்வி மாவட்டத்திற்கு ரேஸ்கோர்ஸ் மைதானத்தில் துவங்கியது. உசிலம்பட்டி கல்வி மாவட்டத்திற்கு உசிலம்பட்டி அரசு மேல்நிலைப் பள்ளியிலும், மேலூர் கல்வி மாவட்டத்திற்கு மேலூர் அரசு ஆண்கள் மேல்நிலைப் பள்ளியிலும் நடந்தன. இதில் 100மீ., 200மீ., 400மீ., தூர ஓட்டப்பந்தயங்கள், நீளம் தாண்டுதல், உயரம் தாண்டுதல், குண்டு எறிதல் போன்ற தடகள போட்டிகளில் மாணவ, மாணவிகள் கலந்து கொண்டனர். விளையாட்டு மேம்பாட்டு ஆணையம் சார்பில் இதில் பங்கேற்கும் வீரர்களுக்கு டி-ஷர்ட் வழங்கப்படுகிறது. காலணிகள் (ஷூ) வழங்காததால் வெயிலின் தாக்கம் காரணமாக பலரும் கீழே விழுந்து காயமடைந்தனர். ஆம்புலன்ஸ் மதியம் 12 மணிக்கு தாமதமாகத்தான் வந்தது. அதுவரை காயம் அடைந்தவர்களுக்கு முதலுதவி கூட வழங்க முடியவில்லை என வீரர்கள் புலம்பினர்.

விவசாய சங்க தேர்தலை நடத்த வேண்டும் குறைதீர் கூட்டத்தில் வலியுறுத்தல்

மதுரை, பிப்.27: மதுரை மாவட்டத்தில் உள்ள விவசாய சங்கத்திற்கு கடந்த 6 ஆண்டாக தேர்தல் நடத்தவில்லை. தேர்தலை உடனே நடத்த வேண்டும் என விவசாயிகள் குறைதீர் கூட்டத்தில் வலியுறுத்தப்பட்டது. மதுரை மாவட்ட விவசாயிகள் குறைதீர் நாள் கூட்டம் நேற்று கலெக்டர் அலுவலகத்தில் நடந்தது. கலெக்டர் வினய் தலைமை வகித்து, விவசாயிகளிடம் கோரிக்கை மனுக்களை வாங்கினார். கூட்டத்தில் விவசாயிகள் பேசும்போது, ‘‘மாவட்டத்தில் நெல் அறுவடை நடந்து வருகிறது. தேவையான இடத்தில் தற்போது நெல் கொள்முதல் மையம் அமைக்கப்பட்டுள்ளது. ஆனால், அந்த மூட்டைகளை கொள்முதல் செய்ய ஊழியர்கள் இல்லை. இதனால், ஊழியர் பற்றாக்குறையால், நெல் கொள்முதல் செய்ய முடியாமல், விவசாயிகள் தங்களது நெல்லை மையத்தில் குவித்து வைத்துள்ளனர்.அறுவடையான நெல்லின் ஈரப்பதம் குறைந்து, விவசாயிகள் குறைந்த விலையில் விற்பனை செய்ய வேண்டிய இக்கட்டான நிலையில் உள்ளனர். கொள்முதல் செய்யப்பட்ட நெல்லுக்கான விலையை நுகர்பொருள் வாணிப கழகம் உரிய காலத்தில் பணம் பட்டுவாடா செய்யாமல் மாதக் கணக்கில் இழுத்தடிக்கிறது.மாவட்டத்தில், ஒவ்வொரு பாசனக் கால்வாய்க்கு ஒரு விவசாய சங்கம் உள்ளது. இந்த சங்கங்களுக்கு தேர்தல் நடத்தி கடந்த 6 ஆண்டுகளுக்கு மேல் ஆகி விட்டது. இத்தேர்தலை கலெக்டர் நடத்த வேண்டும். நிர்வாகிகள் இல்லாததால், விவசாய பாசனம் தொடர்பாக குற்றச்சாட்டுகள், கோரிக்கைகளை அதிகாரிகளிடம் முறையாக எடுத்து கூற முடியவில்லை. தேர்தல் நடத்தாமல், தற்போதும் இழுத்தடிப்பு வேலை நடைபெறுகிறது. உடனே சங்கத்திற்கான தேர்தலை நடத்த வேண்டும் என கோரிக்கை விடுத்து பேசினர்.பின்னர் கலெக்டர் பேசும்போது, ‘‘நெல் கொள்முதல் மையத்தில் நெல்லை உரிய நேரத்தில் கொள்முதல் செய்ய போதிய ஆட்கள் நியமிக்கப்பட்டுள்ளோம். இனிமேல் காலதாமதம் இருக்காது. அதேபோன்று கொள்முதலுக்கான பணம் விரைவில் வழங்க நடவடிக்கை எடுக்கப்படும். விவசாய சங்க தேர்தல் தொடர்பாக ஆலோசனை செய்து முடிவு எடுக்கப்படும்’’ என்றார்.பின்பு வேளாண்மை விற்பனை மையம், தோட்டக்கலைத் துறை, வேளாண் பொறியியல் பிரிவு அதிகாரிகள் தங்களது துறையில் உள்ள வேளாண் தொடர்பான திட்ட பணிகள் குறித்து எடுத்து கூறினர். இதில் வேளாண்மைத் துறை, பொதுப்பணித் துறை, கூட்டுறவுத்துறை உள்ளிட்ட துறை அதிகாரிகள் கலந்து கொண்டனர்.

தீக்குளித்த மெக்கானிக் சாவு

அலங்காநல்லூர், பிப்.27: அலங்காநல்லூர் அருகே குலமங்கலம் ஆதிதிராவிடர் காலனியை சேர்ந்த டூவீலர் மெக்கானிக் சேவாக். இவர் நேற்று முன்தினம் இவரது சகோதரர் இருசக்கர வாகனத்தை எடுத்துக் கொண்டு அப்பகுதியில் உள்ள கண்மாய்க்கு சென்றுள்ளார். பின்னர் அந்த வாகனத்தில் இருந்த பெட்ரோலை உடல் முழுவதும் ஊற்றிக்கொண்டு தீ வைத்துள்ளார்.இதில் பலத்த காயமடைந்த அவரை மதுரை அரசு மருத்துவமனையில் சேர்த்தனர். அங்கு சிகிச்சை பலனின்றி நேற்று சேவாக் இறந்து விட்டார். இதுதொடர்பாக அலங்காநல்லூர் போலீசார் வழக்குப்பதிவு செய்து விசாரித்து வருகின்றனர்.

சேடபட்டி அருகே 3 கிலோ கஞ்சா பறிமுதல் 3 பேர் கைது

பேரையூர், பிப்.27: சேடபட்டி போலீசார் நேற்று அப்பகுதியில் போதைப்பொருள் தடுப்பது சம்மந்தமாக ரோந்து பணியில் ஈடுபட்டு கொண்டிருந்தனர். அப்போது பெருங்காமநல்லூர் அருகே சென்ற ஆம்னி காரை வழிமறித்து சோதனை செய்ததில், அதில் 3 கிலோ கஞ்சா மற்றும் ரூ.18 ஆயிரம் ரொக்கப்பணம், கார் ஆகியவைகளை போலீசார் பறிமுதல் செய்தனர். இந்த காரில் கஞ்சா கொண்டு வந்த அழகுரெட்டியபட்டியைச் சேர்ந்த பாண்டி மகன் ரவி(28), அர்ஜூன் மகன் பிரகாஷ்(26), பெருமாள் மகன் சின்னச்சாமி(22) ஆகியோரை போலீசார் கைது செய்து சிறையில் அடைந்தனர்.

கால்நடைகள் தாகம் தீர்க்க காவிரி கூட்டுக்குடிநீர் குழாய் உடைப்பு வீணாகும் குடிநீரால் மக்கள் பாதிப்பு

திருமங்கலம், பிப்.27: திருமங்கலம் சுற்றுவட்டார பகுதிகளில் கால்நடைகளுக்காக காவிரி கூட்டுக் குடிநீர் குழாய்கள் உடைக்கப்பட்டு வருவது அதிகாரிகளுக்கு பிரச்னையை ஏற்படுத்தி வருகிறது.திருமங்கலம் நகராட்சி மற்றும் ஒன்றிய பகுதிகளுக்கு கரூர் மாவட்டத்திலிருந்து காவிரி கூட்டுக்குடிநீர் குழாய் வழியாக வருகிறது. மதுரை மாவட்டத்தில் சோழவந்தானில் இருந்து பைப்லைன் அமைக்கப்பட்டு கரடிக்கல், உரப்பனூர், சாத்தங்குடி, பொன்னமங்கலம், ஆலம்பட்டி, திரளி உள்ளிட்ட பல்வேறு கிராமங்களுக்கு காவிரி குடிநீர் விநியோகம் செய்யப்படுகிறது.இதேபோல் திருமங்கலம் நகராட்சி பகுதிக்கும் காவிரி குடிநீர் வழங்கப்பட்டு வருகிறது. நகராட்சி பகுதியில் குடிநீர் இணைப்பு இல்லாத வீடுகளுக்கு எல்லாம் தற்போது இணைப்புகள் வழங்கப்பட்டு வருகிறது. கோடை காலம் துவங்கியுள்ள நிலையில் குடிநீர் தேவை அதிகரித்துள்ளது. இதன் காரணமாக நகராட்சி மற்றும் கிராம பகுதிகளில் கூடுதலாக குடிநீர் விநியோகம் வழங்கப்பட்டு வருகிறது.சோழவந்தான் ரோடு வழியாக வரும் காவிரி குடிநீர் அழுத்தம் காரணமாக ஆங்காங்கே பைப்லைன் உடைகிறது. இது தவிர கிராமங்களில் ஆடு, மாடு உள்ளிட்ட கால்நடை வளர்ப்போர் அவற்றின் தாகத்தினை தீர்க்கவும் கூட்டுக்குடிநீர் குழாய்களை உடைத்து விடும் சம்பவங்கள் தொடர்கதையாகி வருகிறது.குழாய் உடைந்தால் நகர் மற்றும் கிராம பகுதிகளில் குடிநீர் சப்ளை பாதிக்கப்படுகிறது. ஒரு முறை குழாய் உடைந்தால் அதனை சரி செய்ய ஓரிறுநாள்கள் ஆனாலும், அவற்றின் செலவு அதிகளவில் இருப்பதால் ஊராட்சி மற்றும் நகராட்சி நிர்வாகத்தினர் திணறி வருகின்றனர். இது குடிநீர் அதிகாரிகளுக்கு தீராத தலைவலியை ஏற்படுத்தி வருகிறது. குழாய் உடைப்பு குறித்து ஒரு சில பகுதிகளில் போலீசாரிடம் புகார்கள் தெரிவிக்கப்பட்டுள்ளதாக அதிகாரிகள் தெரிவித்தனர். தற்போது தினசரி கூட்டுக் குடிநீர் திட்ட அதிகாரிகள் குழாய்களை கண்காணிக்கும் பணியில் தீவிரம் காட்டி வருகின்றனர். இது குறித்து குடிநீர்வடிகால் வாரிய அதிகாரிகள் கூறுகையில், கோடைகாலம் முடியும் வரையில் குழாய் உடைப்பு பிரச்னை தொடரும். இதனை சமாளிப்பது எங்களுக்கு சவாலான ஒன்றுதான் என்றனர்.

மின் நுகர்வோருக்கு அபராதம்

மதுரை, பிப். 26: மதுரை வடக்கு பெருநகர் கோட்டத்தை சேர்ந்த கே.கே.நகர் மின் பிரிவு அலுவலகத்திற்குட்பட்ட மின் இணைப்புகள், செயற்பொறியாளர் மலர்விழியால் ஆய்வு செய்யப்பட்டது. இதில் வடக்கு கோட்டத்திற்குட்பட்ட 15 மின் பொறியாளர்கள் மற்றும் அலுவலர்கள் ஈடுபட்டனர். ஆய்வின் மூலம், மின்சாரத்தை தவறான முறையில் உபயோகம் செய்த நுகர்வோர்களிடம் இருந்து ரூ.13 ஆயிரத்து 958 வசூல் ெசய்யப்பட்டது. மேலும் இக்குழுவினர் ஆய்வு மூலமாக மொத்தம் ரூ.33 ஆயிரத்து 318 வசூலானது.

அனுமதியின்றி செயல்பட்டு வரும் யானைகள் மறுவாழ்வு முகாமிற்கு தடை கோரி ஐகோர்ட்டில் வழக்கு மத்திய, மாநில அரசுகளுக்கு நோட்டீஸ்

மதுரை, பிப். 27: திருச்சி எம்.ஆர்.பாளையத்தில் அனுமதியின்றி செயல்படும் யானைகள் மறுவாழ்வு முகாமிற்கு தடை கோரிய வழக்கில் மத்திய, மாநில அரசுகளுக்கு நோட்டீஸ் அனுப்ப ஐகோர்ட் கிளை உத்தரவிட்டுள்ளது.புதுச்சேரி மாநிலம் புதிய மாஹி சாலக்கராவைச் சேர்ந்த தீபக் நம்பியார், ஐகோர்ட் மதுரை கிளையில் தாக்கல் செய்த மனு:திருச்சி மாவட்டம் எம்.ஆர்.பாளையத்தில் யானைகள் மீட்பு மற்றும் மறுவாழ்வு முகாம் உள்ளது. இந்த முகாமிற்கு சட்டப்படி மத்திய சுற்றுச்சூழல் மற்றும் வனத்துறை இயக்குநர் ஜெனரல் மற்றும் மத்திய மிருக காட்சி சாலை ஆணையரகத்தின் அனுமதி பெறப்படவில்லை. வனத்துறைக்கு சொந்தமான இடத்தை வனத்துறை அல்லாத இதர வகையில் பயன்படுத்துவதற்கான உரிய அனுமதியும் பெறவில்லை. வனத்துறை நிலத்தில் பலவித பயன்பாட்டிற்கான கட்டிடங்கள் கட்டப்பட்டுள்ளன.வனத்துறைக்காக ஒதுக்கப்படும் நிதி, இதற்காக செலவிடப்படுகிறது. இதனால், வனத்துறை சார்ந்த பணிகளுக்கு செலவிட முடியாத நிலை ஏற்பட்டுள்ளது. அனுமதி ெபறாத முகாமில் எப்படி யானைகள் பாதுகாப்புடன் இருக்க முடியும். எனவே, உரிய அனுமதியின்றி சட்டவிரோத யானைகள் மறுவாழ்வு முகாம் செயல்படத் தடை விதிக்க வேண்டும். இந்த முகாமிற்காக மத்திய, மாநில அரசுகளின் நிதியை ஒதுக்கத் தடை விதிக்க வேண்டும். அங்குள்ள யானைகளின் நலன் கருதி அவற்றை உரிய நபர்களிடம் ஒப்படைக்கவும் உத்தரவிட வேண்டும்.இவ்வாறு மனுவில் கூறியிருந்தார்.இந்த மனு நீதிபதிகள் எம்.துரைச்சுவாமி, டி.ரவீந்திரன் ஆகியோர் முன் நேற்று விசாரணைக்கு வந்தது. மனுதாரர் வக்கீல் ராமு ஆஜரானார். மனுவை விசாரித்த நீதிபதிகள் மத்திய சுற்றுச்சூழல் மற்றும் வனத்துறை செயலர், முதன்மை தலைமை வன பாதுகாவலர், எம்.ஆர்.பாளையம் யானைகள் முகாம் அலுவலர் ஆகியோருக்கு நோட்டீஸ் அனுப்ப உத்தரவிட்டு விசாரணையை 2 வாரம் தள்ளி வைத்தனர்.

நடத்தையில் சந்தேகம் மனைவியை குத்திக்கொன்ற கணவர் மதுரை அருகே பயங்கரம்

மதுரை, பிப். 26: நடத்தையில் சந்தேகப்பட்டு, மனைவியை கத்தியால் சரமாரி குத்திக்கொன்ற கணவரை போலீசார் கைது செய்தனர். மதுரை அருகே நடந்த இச்சம்பவம், அப்பகுதியில் பரபரப்பை ஏற்படுத்தியுள்ளது.மதுரை மாவட்டம் சிலைமான் புளியங்குளத்தை சேர்ந்தவர் கண்ணன்(35). கூலித்தொழிலாளி. இவரது மனைவி உமா மகேஸ்வரி(32). இவர்களுக்கு 2 குழந்தைகள் உள்ளனர்.மனைவியின் நடத்தையில் கண்ணன் சந்தேகப்பட்டதாக கூறப்படுகிறது. இதனால் கணவன்- மனைவிக்கிடையே அடிக்கடி தகராறு ஏற்பட்டு வந்தது.இந்நிலையில், நேற்று மாலையில் கணவன்,மனைவிக்குள் தகராறு ஏற்பட்டது. இதில் ஆத்திரமடைந்த கண்ணன், மனைவியை கத்தியால் சரமாரி குத்தினார். இதில் படுகாயமடைந்து உயிருக்கு போராடிய உமாமகேஸ்வரியை அக்கம், பக்கத்தினர் மதுரை அரசு மருத்துவமனையில் சிகிச்சைக்கு சேர்த்தனர். இங்கு சிகிச்சை பலனின்றி நேற்றிரவு உமா மகேஸ்வரி இறந்தார்.இதுகுறித்து சிலைமான் போலீசார் வழக்குப்பதிவு செய்து, கண்ணனை கைது செய்து, விசாரித்து வருகின்றனர். மதுரை அருகே நடந்த இச்சம்பவம், அப்பகுதியில் பரபரப்பை ஏற்படுத்தியுள்ளது.