Madurai - Dinakaran

மேலூர் அருகே சக்திவேல் முருகன் கோயிலில் 30ம் ஆண்டு வைகாசி விழா

மேலூர், மே 19: மேலூர் அருகில் உள்ள ஆட்டுக்குளம் உலகநாதபுரத்தில் அமைந்துள்ள சக்திவேல் முருகன் கோயிலில் 30ம் ஆண்டு வைகாசி விசாக விழா சிறப்பாக நடைபெற்றது. இந்த கோயிலில் ஆண்டு தோறும் வைகாசி விசாக திருவிழா சிறப்பாக நடைபெறுவது வழக்கம். 30ம் ஆண்டான இந்த ஆண்டும் விழா சிறப்பாக நடைபெற்றது. புதுக்கண்மாய் கருங்கல்லில் இருந்து பால்குடம், காவடி, சந்தனகுடம் ஏந்திய பக்தர்கள் கிராமத்தின் பல்வேறு சாலைகளின் வழியாக 2 கி.மீ. தூரம் ஊர்வலமாக வந்து கோயிலை அடைந்தனர்.பின்னர் அங்கு முருகனுக்கு அபிஷேக ஆராதனைகள் நடைபெற்றது. பக்தர்களுக்கு அன்னதானம் வழங்கப்பட்டது. முன்னதாக நேற்று முன்தினம் இரவில் புலவர் சோமநாதன் தலைமையில், நடராஜன் குருக்கள் முன்னிலையில் நூற்றுக்கணக்கான பெண்கள் கலந்து கொண்ட திருவிளக்கு பூஜை நடைபெற்றது. ஏற்பாடுகளை கோயில் நிர்வாக கமிட்டி தலைவர் ரெகுநாதன், செயலாளர் பழனியப்பன், பொருளாளர் சோமன், தணிக்கையாளர் சிவஞானம் மற்றும் நகரத்தார்கள் செய்திருந்தனர்.

டாஸ்மாக் கடையை உடைத்து பாட்டில்கள் திருட்டு

மதுரை, மே 19: மதுரை அருகே டாஸ்மாக் கடையை உடைத்து ரூ.71 ஆயிரம் மதிப்புள்ள பாட்டில்களை திருடிய மர்ம நபர்களை போலீசார் தேடி வருகின்றனர். மதுரை தாசில்தார் நகரைச் சேர்ந்தவர் ராதாகிருஷ்ணன். இவர் வரிச்சியூர் டாஸ்மாக் கடையில் மேற்பார்வையாளராக பணியாற்றி வருகிறார். இவர் கடந்த 16ம் தேதி கடையை பூட்டி விட்டு 17ம் தேதி கடையை திறக்க சென்றார். அப்போது கடையின் முன் பக்க கிரில்கேட் கதவு உடைக்கப்பட்டு இருந்தது. உள்ளே சென்று பார்த்தபோது, பாட்டில்கள் சிதறி கிடந்தது. ரூ.71 ஆயிரத்து 400 மதிப்புள்ள பாட்டில்கள் கொள்ளையடிக்கப்பட்டு இருப்பது தெரியவந்தது. இதுகுறித்து அவர் கருப்பாயூரணி போலீசில் புகார் கொடுத்தார். போலீசார் விசாரித்து வருகின்றனர். 

சோழவந்தான் அருகே தலையாரிக்கு கத்திக் குத்து 3 பேருக்கு வலை

சோழவந்தான், மே 19: சோழவந்தான் அருகே முன்விரோதத்தில் தலையாரிக்கு கத்திக்குத்து விழுந்தது. இதுதொடர்பாக மூன்று பேரை போலீசார் தேடி வருகின்றனர். சோழவந்தான் அருகே முள்ளிப்பள்ளம் கிராமத்தை சேர்ந்தவர் பழனிக்குமார் (34). இவர் நீரேத்தான் கிராம தலையாரியாக பணிபுரிகிறார். இவருக்கும் இதே கிராமத்தைச் சேர்ந்த சிவா (32) என்பருக்கும் முன்விரோதம் இருந்து வந்ததாக கூறப்படுகிறது. இந்நிலையில் நேற்று முன்தினம் முள்ளிப்பள்ளத்தில் சிவா, பழனிக்குமாரை கத்தியால் கை, கால். கழுத்து பகுதியில் குத்திவிட்டு தப்பி ஓடிவிட்டார். காயமடைந்த பழனிகுமார் மதுரை அரசு மருத்துவமனையில் சிகிச்சை பெறுகிறார். இதுகுறித்து காடுபட்டி போலீசார் வழக்கு பதிவு செய்து, தலைமறைவான சிவா மற்றும் அவரது தந்தை ரவி, சகோதரர் குமார் ஆகியோரை தேடி வருகின்றனர்.

பட்ட மேற்படிப்பு அனுமதி தொடர்பாக மதுரை மருத்துவக் கல்லூரியில் எம்.சி.ஐ. அதிகாரி ஆய்வு

மதுரை, மே 19: மதுரை அரசு மருத்துவக்கல்லூரியில் சிறுநீரக அறுவை சிகிச்சை பிரிவில் பட்ட மேற்படிப்புக்கு (எம்.சி.ஹெச்) 4 மாணர்கள் சேர்க்கைக்கான அனுமதி கிடைத்துள்ள நிலையில், ரத்தநாள அறுவை சிகிச்சையில் பட்ட மேற்படிப்புக்கு அனுமதி வழங்குவது தொடர்பான ஆய்வு நடந்தது.  மதுரை அரசு மருத்துவக்கல்லூரி தமிழக அளவில் இரண்டாவது இடத்தில் உள்ள பழமையான கல்லூரி. இக்கல்லூரியில் எம்பிபிஎஸ் படிப்பில் 150 மாணவர்கள் சேர்க்கை தற்போது நடந்துகொண்டிருக்கிறது. இதை 250 ஆக உயர்த்த பல்ேவறு நடவடிக்கைகள் எடுக்கப்பட்டு வருகிறது. இந்நிலையில், பல்வேறு துறைகளில் பட்ட மேற்படிப்புக்கு அனுமதி கேட்டு இந்திய மருத்துவக் கவுன்சிலிடம் கோரிக்கை வைக்கப்பட்டுள்ளது. நரம்பியல் மெடிசன் துறையில் (டி.எம்)3 இடங்களும், இருதய நோய் சிகிச்சை துறையில் (டி.எம்) 4 இடங்களும், குடல் அறுவை சிகிச்சை(எம்.சி.ஹெச்) துறைக்கு 4 இடங்களும், ரத்தநாள அறுவை சிகிச்ைச துறைக்கு (எம்.சி.ஹெச்)4 இடங்கள், இருதய அறுவை சிகிச்சை (எம்.சி.ஹெச்) 6 இடங்களுக்கும் அனுமதி கேட்டு இந்திய மருத்துவக் கவுன்சிலுக்கு கடிதம் அனுப்பப்பட்டு பல ஆண்டுகளாகிறது. ஆய்வுக்கு வருவதாக கூறிவரும் இந்திய மருத்துவ கவுன்சில் அதிகாரிகள் சிறுசிறு குறைகளை சுட்டிக்காட்டி அனுமதி தர தாமதம் செய்து வருவதாக கூறப்படுகிறது.  இந்நிலையில் ரத்தநாள அறுவை சிகிச்சை துறையில் பட்டமேற்படிப்புக்கு கேட்கப்பட்ட 4 இடங்களுக்கு அனுமதி அளிப்பது தொடர்பான ஆய்வுக்காக இந்நிய மருத்துவ கவுன்சில் அதிகாரிகள் நேற்று முன்தினம் மருத்துவக்கல்லூரியில் ஆய்வு மேற்கொண்டனர். ஆய்வின் போது, டீன் வனிதா, மருத்துவக்கண்காணிப்பாளர் ராஜா, நிலைய மருத்துவ அதிகாரி லதா உள்ளிட்ட சம்பந்தப்பட்ட துறை அதிகாரிகள் உடனிருந்தனர். காலை 11 மணி முதல் மாலை 4 மணி வரை ஆய்வு நடந்தது. 6க்கு 4 கிடைத்ததுபேராசிரியர் ஒருவர் கூறும்போது, சமீபத்தில், சிறுநீரக அறுவை சிகிச்சை துறைக்கு கேட்கப்பட்ட 6 இடங்களில். 4 இடங்களுக்கு மாணவர் சேர்க்கை நடத்திக்கொள்ள இந்திய மருத்துவக்கவுன்சில் அனுமதி கொடுத்துவிட்டது. இதேபோல் ரத்தநாள அறுவை சிகிச்சை துறைக்கும் இந்தாண்டு அனுமதி கிடைத்துவிடும் என எதிர்பார்க்கிறோம். வரும் 2019-2020ம் கல்வி ஆண்டில் இந்த இரு துறைகளிலும், மதுரை அரசு மருத்துவக் கல்லூரியில் 8 மாணவர் கள் பட்ட மேற்படிப்பு படிக்க உள்ளனர்’’ என்றார்.

தபால்ஓட்டு போட்ட போலீசார்!

திருப்பரங்குன்றம் இடைத்தேர்தல் நாளை மறுநாள் நடக்கிறது. தேர்தலுக்கு இன்னும் இரு நாட்களே இருக்கும் நிலையில், உச்சக்கட்ட பிரசாரத்துடன், தேர்தல் பணிகளும் வேகமடைந்துள்ளன. இதற்கிடையில் திருப்பரங்குனறம் தொகுதியில் இடைத்தேர்தலுக்கான பாதுகாப்பு பணியில் ஈடுபடுத்தப்படும் போலீசாரில் 236 பேருக்கு தபால் ஓட்டுகள் தரப்பட்டுள்ளது. இதையொட்டி நேற்று மதுரை தெற்கு தாலுகா அலுவலகத்தில் தபால் ஓட்டுகளை பெட்டியில் அளிப்பதற்கான சிறப்பு முகாம் நடந்தது. சீல் வைக்கப்பட்ட பெட்டியில் ஏராளமான போலீசார் தங்கள் தபால் ஓட்டுகளை வழங்கினர். சிலர் தபால் ஓட்டுக்கான சீட்டுகளை பெற்றுச் சென்றனர். இவர்கள் அடுத்தடுத்த நாட்களில் தங்கள் ஓட்டுகளை வழங்கலாம். திருப்பரங்குன்றம் தொகுதிக்கான தேர்தல் நடத்தும் அதிகாரி பஞ்சவர்ணம், உதவி தேர்தல் நடத்தும் அதிகாரி நாகராஜன் ஆகியோர் கூறும்போது, ‘‘236 போலீசாருக்கு ஓட்டுகள் தரப்பட்டுள்ளன. தெற்கு தாலுகா அலுவலக சிறப்பு முகாமிலும் பலர் ஓட்டளித்துள்ளனர். தொடர்ந்து, கலெக்டர் அலுவலகத்தில் உள்ள மாவட்ட வழங்கல் அலுவலகத்தில் தபால் ஓட்டுகளுக்கான சீலிட்ட பெட்டி வைக்கப்படும். அதில் ஓட்டுகளை போடலாம். தபாலிலும் இந்த அலுவலகத்திற்கு ஓட்டுகளை அனுப்பி வைக்கலாம். 22ம் தேதி இறுதி நேரம் வரையிலும் தபாலில் ஓட்டுகளை அனுப்பி வைக்கலாம்’’ என்றனர். ஒண்ணுகூடிட்டாங்கய்யா...ஒண்ணுகூடிட்டாங்கய்யா...திருப்பரஙகுன்றம் பதினாறுகால் மண்டபம் முன்பு நேற்று சுயேட்சை வேட்பாளர்கள் மொத்தமாக ஒரே மேடையில் பிரச்சாரம் செய்தனர். திருப்பரங்குன்றம் தொகுதியில் திமுக, அதிமுக, அமமுக, மக்கள் நீதி மய்யம் உட்பட மொத்தம் 37 வேட்பாளர்கள் போட்டியிடுகின்றனர்.  இதில் சுயேச்சை வேட்பாளர்களான ஆறுமுகம், பூவநாதன், நாகராஜ், உக்கிரபாண்டி, செல்லப்பாண்டியன், சேகர் ஆகியோர் ஒன்றாக இணைந்து ஒரே மேடையில் தோன்றி நேற்று பிரச்சாரம் மேற்கொண்டனர். இதில் பேசிய வேட்பாளர்கள் தேர்தல் விதிமுறை மீறல் குறித்த புகார்களை தேர்தல் ஆணையம் கண்டுகொள்ளவில்லை என குற்றம்சாட்டினர்.  ஒரே மேடையில் சுயேச்சை வேட்பாளர்கள் பிரச்சாரம் செய்தது வேடிக்கையாக பொதுமக்கள் பார்த்து சென்றனர்.

மாற்றுத்திறன் வாக்காளர் ஓட்டு போட பயிற்சி

திருப்பரங்குன்றம் தாலுகா அலுவலகத்தில் மாற்றுத்திறனாளிகளுக்கு பயிற்சி அளிக்கப்பட்டது. திருப்பரங்குன்றம் தாலுகா அலுவலகத்தில் நேற்று காலை பார்வையற்ற மாற்றுத்திறனாளிகள் எவ்வாறு  வாக்களிப்பது என்பது  குறித்த பயிற்சி அளிக்கப்பட்டது.  மாற்றுத்திறனாளிகள் நலத்துறை மூலம்  இந்த பயிற்சி அளிக்கப்பட்டது. திருப்பரங்குன்றம் தொகுதியில் வசிக்கும்  மாற்றுத்திறனாளிகள் வாக்களிக்க வசதியாக அவனியாபுரம், திருப்பரங்குன்றம் ஆகிய இரு பகுதிகளுக்கு வாகன வசதி செய்யப்பட்டுள்ளதாகவும், அந்த வாகனத்தை இயக்கும் டிரைவர்களின் தொடர்பு எண்கள் பயிற்சிக்கு வந்தவர்களுக்கு வழங்கப்பட்டது. திருப்பரங்குன்றம் தாலுகா அலுவலகத்தில் நேற்று பார்வையற்ற மாற்றுத்திறனாளிகளுக்கு எவ்வாறு வாக்களிப்பது குறித்த பயிற்சி அளிக்கப்பட்டது.வெளியூர் ‘புள்ளிகள்’ இன்று கிளம்பிடணும்திருப்பரங்குன்றம் தொகுதிக்கு கடந்த ஏப்.9ம் தேதி இடைத்தேர்தல் தேதி அறிவிக்கப்பட்டது. நாளை மறுநாள் இடைத்தேர்தல் நடைபெற உள்ளது.  இந்த இடைத்தேர்தல் பணிகளுக்காக பல்வேறு அரசியல் கட்சிகளை சேர்ந்த வெளியூரை சேர்ந்த ஏராளமான நிர்வாகிகள் மற்றும் அமைச்சர்கள் தொகுதிக்குள் முகாமிட்டு தேர்தல் பணிகளை கவனித்து வந்தனர். இந்த நிலையில் தேர்தல் விதிமுறை அமலில் உள்ளதால் இன்று மாலை 5 மணியுடன் பிரச்சாரம் நிறைவு பெறுகின்றது. அதன் பின்னர் வெளியூர் ஆட்கள் தொகுதிக்குள் இருக்க அனுமதி இல்லை. எனவே இன்று மாலையுடன் வெளியூர் ஆட்கள் வெளியேற உத்தரவு பிறப்பிக்கப்பட்டுள்ளது.

கமல்ஹாசனை பகிரங்கமாக மிரட்டிய அமைச்சர் ராஜேந்திரபாலாஜி மீது நடவடிக்கை எடுக்க வேண்டும் மநீம நிர்வாகி போலீஸ் கமிஷனரிடம் புகார்

மதுரை, மே 17: மக்கள் நீதி மய்யம் மதுரை மத்திய மாவட்ட செயலாளர் வக்கீல் அழகர். இவர் நேற்று போலீஸ் கமிஷனர் டேவிட்சன் தேவாசீர்வாதத்திடம் அளித்த புகார் மனு: மக்கள் நீதி மய்யம் கட்சி சார்பில் மக்களவை தேர்தலில் மதுரை தொகுதி வேட்பாளராக போட்டியிட்டுள்ளேன். கடந்த 12ம் தேதி கட்சியின் தலைவர் கமல்ஹாசன் கரூர் மாவட்டம் அவரக்குறிச்சி சட்டமன்ற தொகுதிக்கு உட்பட்ட பள்ளப்பட்டி அண்ணாநகரில் தேர்தல் பிரசாரத்தின் போது, பொதுமக்களிடையே யாருடைய மனதும் புண்படாத வகையில் முழுமையாகவும், விளக்கமாகவும், சாதாரணமாகவும் அவருடைய கருத்தை பேசினார். அதற்கு யார் வேண்டுமானாலும் மறுப்பு தெரிவிக்கலாம். ஆனால் கடந்த 13ம் தேதி தூத்துக்குடி மாவட்டம் ஓட்டப்பிடாரம் தொகுதி சட்டமன்ற இடைதேர்தலின் போது நடந்த செய்தியாளர்கள் சந்திப்பில் தமிழக பால்வளத்துறை அமைச்சர் ராஜேந்திரபாலாஜி, கமல்ஹாசன் பரப்புரையை முழுமையாக கேட்காமல் கண்ணியக் குறைவாகவும், வன்முறையை தூண்டும் வகையிலும், சட்டம் ஒழுங்கு கெடுக்கும் வகையிலும், பகிரங்கமாக மிரட்டல் விடுத்துள்ளார். கமல்ஹாசனின் ‘நாக்கை அறுக்க வேண்டும்’ என்று தனது பதிலை பகிரங்கமாக பதிவு செய்துள்ளார். அமைச்சரின் பேட்டி வரம்பு மீறி உள்ளது.  அரசியல் சட்டத்திற்கு எதிராகவும், வன்முறையை தூண்டும் வகையிலும் உள்ளது. எனவே அமைச்சர் ராஜேந்திர பாலாஜி மீது குற்றச்செயல்களுக்காக வழக்கு பதிவு செய்து சட்ட நடவடிக்கை எடுக்க வேண்டும். இவ்வாறு மனுவில் தெரிவித்துள்ளார்.

108 ஆம்புலன்ஸில் குழந்தை பிறந்தது

மதுரை, மே 17: பிரசவத்திற்கு 108 ஆம்புலன்ஸில் மருத்துவமனை சென்ற பெண்ணுக்கு குழந்தை பிறந்தது. மதுரை வெள்ளரிப்பட்டி அருகே உள்ள பெருமாள்பட்டியை சேர்ந்தவர் பிரியா. இவருக்கு நேற்று மதியம் பிரசவ வலி ஏற்பட்டதால் 108 ஆம்புலன்ஸ் அழைக்கப்பட்டது. ஊருக்கு வந்த 108 ஆம்புலன்ஸ் பிரியாவை அரசு மருத்துவமனைக்கு அழைத்துச் சென்றது. மருத்துவமனைக்கு அழைத்து செல்லும் வழியிலேயே 108 ஆம்புலன்சில் சுகப்பிரசவத்தில் பிரியாவிற்கு அழகான பெண் குழந்தை பிறந்தது. ஆம்புலன்ஸ் வாகனத்தில் இருந்த அவசர மருத்துவ உதவியாளர் தேவிகா, ஆம்புலன்ஸ் ஓட்டுனர் கண்ணதாசன் உள்ளிட்ட இருவரும் பிரசவம் பார்த்தனர்.  சுகப்பிரசவம் ஆன தாய் பிரியா மற்றும் பிறந்த குழந்தை நலமாக உள்ளனர். இருவரும் மேலூர் அரசு மருத்துவமனையில் மேல் சிகிச்சைக்கு அனுமதிக்கப்பட்டனர்.

திருமங்கலம் விடத்தகுளம் சாலையில் ஓடும் கழிவுநீர்

திருமங்கலம், மே 17: திருமங்கலம் விடத்தகுளம் ரோட்டில் தேவர்சிலை அருகே கடந்த மூன்று நாள்களாக பெருக்கெடுத்து ஓடும் கழிவுநீரால் சுகாதார சீர்கேடு எழுந்துள்ளது. திருமங்கலம் விடத்தகுளம் ரோட்டில் தேவர்சிலை அருகே திருமண மண்டபத்தையொட்டி கடந்த மூன்று நாள்களாக கழிவுநீர் பெருக்கெடுத்து ஓடுகிறது. இதனால் இந்த வழியாக செல்லும் பொதுமக்கள் கடும் சிரமத்திற்கு உள்ளாகி வருகின்றனர். துர்நாற்றம் வீசும் கழிவுநீரால் இந்த பகுதியில் சுகாதார சீர்கேடு எழுந்துள்ளது. இது குறித்து பொதுமக்கள் நகராட்சியில் புகார் செய்தனர். நகராட்சி ஊழியர்கள் வந்து கழிவுநீர் உடைந்து வெளியேறும் பகுதியில் அடைப்பை சரிசெய்தனர். அவர்கள் சென்ற சிறிது நேரத்திற்குள் மீண்டும் கழிவுநீர் வெளியேறத்துவங்கியது. இதனால் விடத்தகுளத்தை கடந்து செல்லும் மக்கள் மூக்கை பொத்தியபடியே சென்றுவருகின்றனர். இது குறித்து நகராட்சியில் கேட்டபோது, விடத்தகுளம் ரோட்டில் திருமண மண்டபத்தின் முன்பு பெருக்கெடுத்த கழிவுநீர் அடைப்பை சரிசெய்தோம். மீண்டும் அடைப்பு ஏற்பட்டு கழிவுநீர் வெளியேறுகிறது. இந்த பகுதியில் உள்ள ஓட்டல்களில் கழிவுநீரை சுத்திகரிக்காமல் அப்படியே வெளியேற்றிவிடுகின்றனர். இதனால் கழிவுகள் அடைத்து குழாய் உடைகிறது. ஓட்டல்கள், திருமணமண்டபங்களில் சேம்பர் தொட்டி அமைத்து கழிவுகளை பில்டர் செய்து தண்ணீரை மட்டுமே வெளியேற்ற வேண்டும். ஆனால் திருமங்கலத்தில் பெருவாரியான நிறுவனங்கள் இதனை செய்வதில்லை. கழிவுகளுடன் கழிவுநீரையும் வெளியே விடுவதால் குழாய்களில் உடைப்பு ஏற்பட்டு கழிவுநீர் வெளியேறுகிறது. மீண்டும் அதனை சரிசெய்வோம் என்றனர்.

வீட்டு கதவை உடைத்து நகை, பணம் திருட்டு

மதுரை, மே 17: மதுரையில் வீட்டின் கதவை உடைத்து நகை, பணம் மற்றும் வெள்ளி பொருட்களை திருடிய மர்ம கும்பலை போலீசார் தேடி வருகின்றனர். மதுரை தாசில்தார்நகரை சேர்ந்தவர் நடராஜன். இவர் நெல்லை மருத்துவக்கல்லூரியில் படிக்கும் தனது மகளை பார்க்க கடந்த 6ம் தேதி வீட்டை பூட்டிவிட்டு சென்றார். நேற்று முன்தினம் வீடு திரும்பினார். அப்போது வீட்டின் பின் பக்கம் கதவு உடைக்கப்பட்டு இருப்பதை கண்டு அதிர்ச்சியடைந்தார். உள்ளே சென்று பார்த்த போது பீரோவில் இருந்த 2 பவுன் நகை, ரூ.59 ஆயிரம் ரொக்கம், ஒரு கிலோ வெள்ளி பொருட்கள் திருடு போனது தெரியவந்தது. இதுகுறித்து அவர் அண்ணாநகர் போலீசில் புகார் கொடுத்தார். புகாரின் பேரில் போலீசார் வழக்குப்பதிவு செய்து விசாரித்து வருகின்றனர். 

வேளாண்மை அதிகாரி விபத்தில் உயிரிழப்பு

திருமங்கலம், மே 17: திருமங்கலம் அருகே உறவினர் வீட்டு திருமணத்திற்கு வந்த வேளாண்மை அதிகாரி விபத்தில் சிக்கி உயிரிழந்தார்.துாத்துக்குடி மாவட்டம் கோவில்பட்டி வேலாயுதபுரத்தை சேர்ந்தவர் சிவசுப்பிரமணி (52). கோவில்பட்டியில் உள்ள வேளாண்மை அலுவலகத்தில் உதவி வேளாண்மை அலுவலராக பணிபுரிந்து வந்தார். திருமங்கலம் அருகேயுள்ள மேலக்கோட்டையில் இவரது உறவினர் வீட்டு திருமணம் நேற்று நடந்தது. இதில் கலந்து கொள்ள நேற்று முன்தினம் இரவு 10 மணிக்கு சிவசுப்பிரமணி வந்தார். மேலக்கோட்டை விலக்கில் பஸ்சை விட்டு இறங்கி மதுரை விருதுநகர் நான்குவழிச்சாலையை கடக்க முயன்றார். அப்போது விருதுநகரிலிருந்து மதுரை நோக்கி சென்ற கார் இவர் மீது மோதியது. இதில் தூக்கி வீசப்பட்டு படுகாயமடைந்தார். மதுரையில் தனியார் மருத்துவமனையில் அனுமதிக்கப்பட்ட சிவசுப்பிரமணி நேற்று காலை உயிரிழந்தார். மகள் சரவணதேவி கொடுத்த புகாரில் திருமங்கலம் தாலுகா போலீசார் விசாரணை நடத்தி சிவகாசியை சேர்ந்த கார் டிரைவர் ரகசெல்வினை கைது செய்தனர்.

வெயிலின் தாக்கம் இருக்கும் திருவாதவூரில் திருமறைநாதர் திருக்கல்யாணம்

மேலூர், மே 17: திருவாதவூர் திருமறைநாதர் வேதநாயகி அம்பாள் திருக்கல்யாணம் நேற்று நடைபெற்றது. மதுரை மீனாட்சி அம்மன் கோயிலின் உபகோயிலான மேலூர் திருவாதவூர் வேதநாயகி அம்பாள் உடனுறை திருமறைநாத சுவாமி கோயிலில் ஆண்டுதோறும் வைகாசி விழா சிறப்பாக நடைபெறுவது வழக்கம். இவ்விழா கடந்த மே 9ல் கொடியேற்றத்துடன் துவங்கியது. அதனை தொடர்ந்து மே 13ல் பஞ்ச மூர்த்திகளுடன் சுவாமி மேலூருக்கு எழுந்தருளும் மாங்கொட்டை திருவிழா நடைபெற்றது. நேற்று கோவிலின் உள்மண்டபத்தில் திருமறைநாதர் வேதநாயகி அம்பாள் திருக்கல்யாணம் நடைபெற்றது. இதில் ஏராளமான பக்தர்கள் கலந்துகொண்டு சுவாமி தரிசனம் செய்தனர். இன்று காலை திருத்தேரோட்டம் நடைபெற உள்ளது. விழா ஏற்பாடுகளை தக்கார் கருமுத்து கண்ணன், இணை ஆணையர் நடராஜன், பேஸ்கார் திரவியகுமார் செய்திருந்தனர்.

அயிலாங்குடி பெரிய கண்மாயில் மீன் வளர்க்க அனுமதி கோரி வழக்கு 4 வாரத்தில் நடவடிக்கை எடுக்க கலெக்டருக்கு ஐகோர்ட் உத்தரவு

ஒப்பந்தத்தின் அடிப்படையில்மதுரை, மே 17: 2014ல் போடப்பட்ட ஒப்பந்தத்தின் அடிப்படையில் பெரிய கண்மாயில் மீன் வளர்க்க அனுமதிக்க வேண்டும் என ெதாடரப்பட்ட வழக்கில், 4 வாரத்தில் உரிய நடவடிக்கை எடுக்க கலெக்டருக்கு ஐகோர்ட் மதுரை உத்தரவிட்டது.  மதுரை மாவட்டம் ஒய்.கொடிக்குளத்தை அடுத்த அயிலாங்குடியை சேர்ந்தவர் சித்தம்மாள் ஐகோர்ட் மதுரை கிளையில் தாக்கல் செய்த மனு:மதுரை மாவட்டம் அயிலாங்குடி பெரிய கண்மாயை 2014ம் ஆண்டு முதல் 2019ம் ஆண்டு வரை 5 ஆண்டுகளுக்கு குத்தகைக்கு எடுத்தோம். அன்று முதல் 3 ஆண்டுகள் அந்த கண்மாயில் மீன் குஞ்சுகளை விட்டு வளர்த்து வந்தோம். ஆனால், கடந்த 2 ஆண்டுகளாக முறையாக மழை இல்லாததால், பெரிய கண்மாயில் மீன்கள் வளர்க்க முடியவில்லை. இதனால் நஷ்டம் ஏற்பட்டு வந்தது.இந்நிலையில், 2018-19ம் ஆண்டுக்கான குத்தகை தொகையாக ரூ.1 லட்சத்து 78 ஆயிரத்து 281ம், நல வாரிய நிதியாக ரூ.8 ஆயிரத்து 858ம் செலுத்து உள்ளோம். இதற்கிடையே கண்மாய்கள் பராமரிப்பு தொடர்பான வழக்கில் நீர்நிலைகளில் மீன்கள் வளர்க்கக்கூடாது என ஐகோர்ட் மதுரை கிளை உத்தரவிட்டதாகக்கூறி, கண்மாயில் நாங்கள் மீன்கள் வளர்க்க விடாமல் அதிகாரிகள் தடுத்து வருகின்றனர். ஆனால், இந்த கண்மாயை பொறுத்தவரையில் தண்ணீரை வெளியேற்றுவதில்லை. தண்ணீர் இருக்கும் போதே மீன்களை பிடித்து விடுகிறோம். எனவே விதிகளை மீறாமல் செயல்பட்டு வரும் எங்களையும் மீன்கள் வளர்க்கக்கூடாது என அதிகாரிகள் தடுக்கிறார்கள்.எனவே 2014ம் ஆண்டில் போடப்பட்ட ஒப்பந்தத்தின் அடிப்படையில், அயிலாங்குடி பெரிய கண்மாயில் நாங்கள் மீன் வளர்க்க அனுமதிக்க வேண்டும். தவறும்பட்சத்தில் நாங்கள் செலுத்திய ரூ.1 லட்சத்து 87 ஆயிரத்து 139ஐ 12 சதவீத வட்டியுடன் திரும்ப வழங்க உத்தரவிட வேண்டும். இவ்வாறு மனுவில் கூறியிருந்தார். இந்த மனு நீதிபதிகள் ஜெ.நிஷா பானு, எம்.தண்டபாணி ஆகியோர் முன்பு நேற்று விசாரணைக்கு வந்தது. விசாரணையின் முடிவில், மனுதாரரின் கோரிக்கை குறித்து 4 வாரத்தில் உரிய நடவடிக்கை எடுக்க கலெக்டருக்கு நீதிபதிகள் உத்தரவிட்டனர்.

வாடிப்பட்டி அருகே தொழிற்சாலைக்குள் புகுந்த 4 அடி இருதலை மணியன்

வாடிப்பட்டி, மே 17: வாடிப்பட்டி அருகே மாட்டுத்தீவன தொழிற்சாலைக்குள் புகுந்த இருதலை மணியன் பாம்பு பத்திரமாக மீட்கப்பட்டு வனத்துறையினரிடம் ஒப்படைக்கப்பட்டது.  வாடிப்பட்டி அருகே போடிநாயக்கன்பட்டி கோட்டைமேடு செல்லும் சாலையில் மாடு மற்றும் கோழி தீவனம் மூலப்பொருள் தயாரிக்கும் தொழிற்சாலை உள்ளது. இங்கு நேற்று பணியாளர்கள் மாட்டுதீவனம் தயாரிக்கும் பணியில் ஈடுபட்டிருந்தனர். அப்போது சாக்குமூட்டைகள் அடுக்கி வைத்திருந்த இடத்தில் சுமார் 4 அடி நீளமுள்ள அரியவகை இருதலைமணியன் பாம்பு இருப்பதை கண்டனர். பின் அதை தொழிலாளர்களே பிடித்து  பாதுகாப்பாக சாக்கு பைக்குள் அடைத்து வைத்தனர்.சோழவந்தான் வனத்துறை அலுவலகத்திற்கு தகவல் தெரிவித்தனர். சம்பவ இடத்திற்கு வந்த வனத்துறையினரிடம் ஆலை நிர்வாகி திருமுருகன் மற்றும் பணியாளர்கள் இருதலை மணியன் பாம்பை ஒப்படைத்தனர். பாம்பை பெற்ற வனத்துறையினர் குலசேகரன்கோட்டை அருகே கோம்பைக்கரடு சிறுமலை வனப்பகுதியில் விட்டனர். ஏற்கனவே இந்த தொழிற்சாலைக்குள் கடந்த சில ஆண்டுகளுக்கு முன் இருதலைமணியன் பாம்பு பிடிபட்டது குறிப்பிடத்தக்கது.

தபால் ஓட்டு போட்டாச்சு... இரண்டு பெண்களிடம் ஏழு பவுன் நகை பறிப்பு

மதுரை, மே 17: மதுரையில் போலீஸ்காரரின் மாமியார், இன்ஜினியர் மனைவி ஆகியோரிடம் 7 பவுன் நகையை பறித்த கும்பலை போலீசார் தேடி வருகின்றனர். மதுரை ஒத்தக்கடை பாரதிநகர் பகுதியை சேர்ந்தவர் ஈஸ்வரமூர்த்தி. இவர் இந்தோ திபெத் பார்டரில் போலீசாக வேலை பார்த்து வருகிறார். கடந்த மாதம் விடுமுறையில் மதுரை வந்துள்ளார். ஏப்.18ம் தேதி தனது குடும்பத்துடன் சித்திரை திருவிழாவில் கள்ளழகரை தரிசனம் செய்ய தல்லாகுளம் பகுதிக்கு வந்தனர். அப்போது அவரது மாமியார் கழுத்தில் அணிந்திருந்த 2 பவுன் நகையை கூட்ட நெரிசலில் மர்ம நபர் பறித்துக் கொண்டு தப்பினார். இதுகுறித்து ஈஸ்வர மூர்த்தி தல்லாகுளம் போலீசில் புகார் கொடுத்தார். புகாரின் பேரில் போலீசார் வழக்குப்பதிவு செய்து விசாரித்து வருகின்றனர்.மதுரை உத்தங்குடி டி.எம்.நகரைச் சேர்ந்தவர் கண்ணன். இவர் இன்ஜினியராக வேலை பார்த்து வருகிறார். நேற்று முன்தினம் டூவீலரில் விஸ்வநாதபுரத்தில் உள்ள மாமியார் வீட்டிற்கு சென்று விட்டு, மனைவி மற்றும் குழந்தைகளுடன் சர்வேயர் காலனி பகுதியில் வந்த கொண்டு இருந்தார். அப்போது இவரது டூவீலருக்கு பின்னால் மற்றொரு டூவீலரில் வந்த 2 பேர், கண்ணன் மனைவியின் கழுத்தில் அணிந்திருந்த 5 பவுன் நகையை பறித்துக் கொண்டு தப்பினர். இதுகுறித்து கண்ணன் புதூர் போலீசில் புகார் கொடுத்தார். புகாரின் பேரில் போலீசார் வழக்குப்பதிவு செய்து விசாரித்து வருகின்றனர்.

வாக்கு எண்ணும் மையத்தில் காலை 8 மணிக்குள் தபால் ஓட்டு

வாக்கும் எண்ணும் மே 23ம் தேதியன்று காலை 8 மணிக்குள் தபால்  வாக்குகளை மையத்தில் ஒப்படைக்கும்படி அஞ்சல் துறைக்கு தேர்தல் அதிகாரிகள்  கடிதம் அனுப்பியுள்ளனர்.  தமிழகத்தில் 38 மக்களவை தேர்தல், 18  சட்டசபைக்கான இடைத்தேர்தல் ஏப்.18ல் நடந்தது. தொடர்ந்து திருப்பரங்குன்றம்  உள்ளிட்ட 4 சட்டசபைக்கான இடைத்தேர்தல் வரும் மே 19ல் நடக்கவுள்ளது. இதற்கான  வாக்கு எண்ணிக்கை மே 23ல் நடக்கிறது. அதேநேரம் தேர்தல் பணியில் அரசு  ஊழியர்கள், ஆசிரியர்கள், போலீசார் என 10 ஆயிரத்திற்கும் மேற்பட்டவர்கள்  ஈடுபட்டனர். இவர்கள் வாக்கு அளிப்பதற்கு வசதியாக தபால் ஓட்டுச்சீட்டுகள்  வழங்கப்பட்டன. மேலும் தபால் ஓட்டுக்களை செலுத்துவதற்கு சிறப்பு ஏற்பாடுகள்  செய்யப்பட்டுள்ளன. தேர்தலுக்கு முன்பாகவே பலரும் தபால் ஓட்டுக்களை செலுத்தி  விட்டனர். ஒரு சிலர் தங்கள் தபால் ஓட்டுக்களை தேர்தலுக்கு பின்பு தபாலில்  அனுப்பி வருகின்றனர். அதேபோல் எல்லையில் பாதுகாப்பு பணியில் ஈடுபட்டு  கொண்டு இருக்கும் ராணுவவீரர்களுக்கு ஆன்லைனில் தபால் ஓட்டுச்சீட்டுக்கள்  அனுப்பப்பட்டது. அதன்பேரில் அவர்கள் ஓட்டுச்சீட்டுக்களை பதிவிறக்கம்  செய்து, விரும்பிய சின்னத்தில் முத்திரையிட்டு தபாலில் அனுப்பி  வருகின்றனர். தபால் ஓட்டுகளை பொறுத்தவரை, வாக்கு எண்ணும் நாளான வரும் மே  23ம் தேதி காலை 8 மணிக்குள் மையத்திற்கு வந்து சேர்ந்து விட வேண்டும்.  அதன்பின்பு வரும் தபால் ஓட்டுகள் எண்ணிக்கைக்கு எடுத்து  கொள்ளப்படாது.  எனவே அந்தந்த மாவட்ட தேர்தல் பிரிவு அதிகாரிகள்  அஞ்சல்துறைக்கு கடிதங்கள்  அனுப்பியுள்ளனர். அதில் தபாலில் வரும் தபால் ஓட்டுகளை 23ம் தேதி காலை 8  மணிக்குள் வாக்கு எண்ணும் மையத்தில் சேர்க்கும்படி அறிவுறுத்தியுள்ளனர்.  ஓட்டு இயந்திரங்களில்  மாதிரி வாக்குப்பதிவு திருப்பரங்குன்றம் தொகுதிக்கு வருகின்ற 19ம் தேதி இடைத்தேர்தல் நடைபெறவுள்ளது. இந்த தேர்தல் மொத்தம் 297 வாக்குச்சாவடிகளில் நடைபெறவுள்ளது. இதற்கான வாக்குப்பதிவு இயந்திரங்கள் திருப்பரங்குன்றம் தாலுகா அலுவலகத்தில் தயார் நிலையில் உள்ளது. இந்த வாக்குப்பதிவு இயந்திரத்தில் நேற்று மாதிரி வாக்குப்பதிவு வேட்பாளர்களின் முகவர்கள் முன்னிலையில் தாலுகா அலுவலகத்தில் நடைபெற்றது. அப்போது தேர்தல் நடத்தும் அலுவலர் பஞ்சவர்ணம்,  தாசில்தார் நாகராஜன், துணை தாசில்தார் மீனாட்சிசுந்தரம் ஆகியேர் உடன் இருந்தனர். வாக்குபதிவு இயந்திரங்கள் அனைத்தும் பாதுகாப்பான அறையில் பலத்த போலீஸ் பாதுகாப்புடன் வைக்கப்பட்டுள்ளது.திருப்பரங்குன்றம் தொகுதியில் பிரசாரம் செய்ய அனுமதி மறுப்புதிருப்பரங்குன்றம் தொகுதியில் பிரச்சாரம் செய்யவிடாமல் போலீசார் தடுப்பதாக கூறி 15 சுயேட்சை வேட்பாளர்கள் தேர்தல் அதிகாரியிடம் புகார் மனு கொடுத்தனர்.  திருப்பரங்குன்றம் இடைத்தேர்தலில் நேதாஜி முற்போக்கு கட்சியை சேர்ந்த பூவநாதன் சுயேட்சை வேட்பாளராக படகோட்டி உடன் பாய்மரப்படகு சின்னத்தில் போட்டியிடுகிறார். இவர் தனது ஆதரவாளர்களுடன் நேற்று தொகுதிக்கு உட்பட்ட பசுமலையில் உள்ள முக்கிய வீதிகளில் வீடு வீடாக சென்று வாக்காளர்களிடம் ஓட்டு கேட்டுள்ளார். அந்த தெருவில் அதிமுக எம்எல்ஏ ராஜன்செல்லப்பா வீடும் உள்ளது. அவரது வீட்டிலும் நோட்டீஸ் கொடுத்தனர். அவர்கள் பிரச்சாரம் செய்து கொண்டிருந்தபோது, போலீஸ் எஸ்ஐ சேகர் மற்றும் சில போலீசார் திடீரென்று வந்து, பிரச்சாரம் செய்யக் கூடாது; அனைவரும் உடனே செல்லுங்கள் என கூறி வேட்பாளரிடம் இருந்த நோட்டீசை பறித்து, கழிப்பறையில் வீசி எறிந்ததாக கூறப்படுகிறது. இதனை வேட்பாளர் எதிர்த்த போது, அவர்கள் மிரட்டி வலுக்கட்டாயமாக பிரச்சாரம் செய்ய கூடாது என விரட்டியதாக தெரிகிறது.  இதையடுத்து பூவநாதன் மற்றும் 15 சுயேட்சை வேட்பாளர்கள் திரண்டு மதுரை கலெக்டர் அலுவலகம் வந்தனர். கலெக்டர் இல்லாததால், தேர்தல் பிரிவு தாசில்தார் உதயசங்கரிடம் புகார் மனு கொடுத்தனர்.  இது குறித்து சுயேட்சை வேட்பாளர் பூவநாதன் கூறும்போது, ‘‘திருப்பரங்குன்றம் தொகுதியில், சுயேட்சைகளை பிரச்சாரம் செய்யவிடாமல் போலீசார் திட்டமிட்டு தடுக்கின்றனர்.  அரசியல் கட்சியினர் மட்டும்தான் பிரச்சாரம் செய்ய வேண்டுமா? எங்களது பிரச்சாரத்தை தடுத்த எஸ்ஐ சேகர், ஏட்டு ராஜ்குமார் மற்றும் போலீசார் மீது நடவடிக்கை எடுக்க வேண்டும். இதுதொடர்பாக தொகுதியின் தேர்தல் அதிகாரியிடம் புகார் மனு கொடுத்தும் நடவடிக்கை இல்லை. கலெக்டரிடம் புகார் கொடுத்துள்ளோம். நடவடிக்கை இல்லை என்றால் நீதிமன்றத்திற்கு செல்வோம்’’ என்றார்.     

வியாபாரிகளிடம் கை குலுக்கி வாக்கு சேகரித்த ஸ்டாலின்

 திருப்பரங்குன்றம் தொகுதியில் நேற்று முக.ஸ்டாலின் தேர்தல் பிரச்சாரம் செய்த போது, மேல அனுப்பானடி காய்கறி மார்க்கெட்டுக்கு வந்தார். அங்கு வாகனத்திலிருந்து இறங்கிய ஸ்டாலின், மார்க்கெட்டுக்குள் நடந்தே சென்று வியாபாரிகளிடமும், பொதுமக்களிடமும் வாக்குகள் கேட்டு, ஆதரவு திரட்டினார். அப்போது காய்கறி வியாபாரிகள் ஸ்டாலினுடன் செல்பி எடுத்துக்கொண்டனர். மேலும் ஸ்டாலின் கைகளை பிடித்து குலுக்கியபடி தங்களது ஆதரவை தெரிவித்து மகிழ்ந்தனர். பின்னர் வியாபாரிகளிடம் காய்கறிகளின் விலைகளை கேட்டறிந்தார்.  

‘நைட் டூட்டி வேண்டாம்...’ பெண் அதிகாரிகள் எதிர்ப்பு

திருப்பரங்குன்றம் தொகுதியில் பணப்பட்டுவாடாவை தடுக்க தேர்தல் ஆணையத்தின்  உத்தரவின் பேரில் வாகன சோதனைகள் தீவிரப்படுத்தப்பட்டுள்ளன. ரூ.50  ஆயிரத்திற்கு மேல் உரிய ஆவணங்களின்றி பணம் கொண்டு சென்றால் பறிமுதல்  செய்யப்பட்டு வருகிறது. இதன்படி திருப்பரங்குன்றம் தொகுதியில் பறக்கும்படை  அமைத்து, வலம் வந்தபடி உள்ளனர். பறக்கும்படையில் ஒரு ஓட்டுநர்,  வட்டாட்சியர், வட்டார வளர்ச்சி அலுவலர் அளவிலான அதிகாரி, உதவி ஆய்வாளர்,  ஒரு காவலர் மற்றும் ஒரு ஒளிப்பதிவாளர் என 5 பேர் உள்ளனர். வரும் 19ம் தேதி  வரை இக்குழு சோதனைகளில் ஈடுபடும். 24 மணிநேரமும் ரோந்துப்பணி நடைபெறும்  வகையில் நாளொன்றிற்கு 3 ஷிப்ட்களில் பணியில் அமர்த்தப்பட்டுள்ளனர். காலை 8  மணி முதல் பிற்பகல் 2 மணி வரை 1 ஷிப்ட்டும், மதியம் 2 மணி முதல் இரவு 9 மணி  வரை 1 ஷிப்ட்டும், இரவு 9 மணி முதல் காலை 8 மணி வரை 1 ஷிப்ட்டும் என 24  மணி நேரத்திற்கு 3 ஷிப்ட்களில் அதிகாரிகள் பணியில் ஈடுபடுத்தப்பட்டுள்ளனர்.  இந்நிலையில் பறக்கும்படையில் ஏராளமான பெண் அதிகாரிகளும்  பணியமர்த்தப்பட்டுள்ளனர். இவர்களில் பலருக்கும் இரவு நேரங்களில் பணிநேரம்  வழங்கப்பட்டுள்ளதால் பெரும் அவதிக்குள்ளாகியுள்ளனர். பெண் அதிகாரி  ஒருவர் கூறும்போது, ‘‘24 மணி நேரத்தை முறையாக எட்டு மணி நேரமாக  பிரிக்கவில்லை. இரவு நேரங்களில் பெண்களை பணிக்கு வர உத்தரவிட்டுள்ளதால்  இரவு முழுக்க நெடுஞ்சாலைகளில் தனியே நிற்பதில் பல்வேறு சிரமங்கள் உள்ளன.  வாகனங்களை மோதுவது போல ஓட்டி வருவது, உடன் பெண் காவலர்கள் இல்லாமல்  இருப்பது, குடிபோதையில் வருபவர்களிடம் விசாரணை செய்வது என்பது உள்ளிட்ட  சொல்ல முடியாத சிரமங்களும் இருக்கின்றன. இயற்கை உபாதைக்கு செல்ல கூட  அச்சமாக உள்ளது. இதுகுறித்து பலமுறை கூறியும்  இரவு நேரங்களிலேயே பணி  போடுகின்றனர். பணியை செய்வதில் எங்களுக்கு எந்த சிரமமுமில்லை. ஆனால், பகல்  நேரங்களில் முறையாக எட்டு மணி நேரமாக பிரித்து போட்டால் தாராளமாக பணி செய்ய  தயாராகவுள்ளோம். அதை விடுத்து இரவு நேரங்களில் 12 மணி நேரம் பணிநேரம்  என்பது மிகவும் சிரமமாக உள்ளது’’ என்றார்

இளைஞர்கள் வேலைவாய்ப்பு பெற திருப்பரங்குன்றத்தில் தொழில் பூங்கா

திருப்பரங்குன்றம், மே 16: இளைஞர்களின் வேலைவாய்ப்புக்காக திருப்பரங்குன்றத்தில் தொழில் பூங்கா அமைக்கப்படும் என முக.ஸ்டாலின் தெரிவித்தார். திருப்பரங்குன்றம் தொகுதி திமுக வேட்பாளர் டாக்டர் சரவணனை ஆதரித்து, திமுக தலைவர் மு.க.ஸ்டாலின் நேற்று பிரச்சாரம் செய்தார். அப்போது தொகுதி தொடர்பான வளர்ச்சி திட்டங்கள் குறித்து பல்வேறு வாக்குறுதிகளை அளித்தார். அவர் பேசியதாவது: திருப்பரங்குன்றம் ெதாகுதியில் உள்ள விரகனூர் மதகு அணையில் கழிவுநீர் தேங்குவதால் பல்வேறு பாதிப்புகள் ஏற்படுகிறது. இதற்கு தீர்வு காணப்படும். ரிங்ரோடு-விரகனூர் சந்திப்பில் அடிக்கடி ஏற்படும் விபத்துக்களை தவிர்க்க உரிய நடவடிக்கை எடுக்கப்படும். விரகனூர், பனையூர் மற்றும் சாமநத்தம் உள்ளிட்ட கிராமங்களுக்கு கூடுதல் பஸ் வசதி மற்றும் குடிநீர் உள்ளிட்ட அடிப்படை வசதிகள் நிறைவேற்றித்தரப்படும். சவுராஷ்டிரா சமுதாய மக்களுக்காக திமுக ஆட்சி காலத்தில்தான் பல்வேறு திட்டங்கள் செயல்படுத்தப்பட்டன. டாக்டர் கலைஞர் முதல்வராக இருந்த ேபாதுதான், சவுராஷ்டிரா கல்லூரிக்கு 27 ஏக்கர் நிலம் கொடுத்தார். ெதற்குவாசலில் ரயில்வே மேம்பாலம் கட்டி, என்.எம்.சுப்புராம் என்று பெயர் சூட்டி சவுராஷ்டிரா சமூகத்தை பெருமைப்படுத்தினார். இதேபோல் வளையங்குளம் சுற்றுப்புற பகுதியில் உள்ள கிராமங்களில் மல்லிகை பூக்கள் அதிக அளவில் விளையும். ஆனால் இப்பூக்களை விளைவிக்கும் விவசாயிகளின் வாழ்க்கையில் மணம் வீசவில்லை. எனவே மல்லிகை விவசாயிகளுக்கு உரம், பூச்சி மருந்து மானிய விலையில் வழங்கப்படும். மேலும் பூவுக்கு கட்டுப்படியான விலை கிடைக்க நடவடிக்கை எடுக்கப்படும். திருப்பரங்குன்றம் தொகுதியில் உள்ள இளைஞர்களின் வேலை வாய்ப்புக்காக தொழில் பூங்கா அமைக்கப்படும். இதுபோன்ற இன்னும் பல திட்டங்கள் இத்தொகுதியின் வளர்ச்சிக்காக நிறைவேற்றப்படும். இந்த வாக்குறுதிகளை நிறைவேற்ற திருப்பரங்குன்றம் திமுக வேட்பாளர் டாக்டர் சரவணனை வெற்றி பெறச் செய்ய வேண்டும்’’ என்றார். பிரச்சாரத்தின் போது, திமுக முதன்மை செயலாளர் டி.ஆர்.பாலு, துணைப் பொதுச்செயலாளர் ஐ.பெரியசாமி, மாவட்ட செயலாளர்கள் மூர்த்தி, சேகர்பாபு, செந்தில்குமார், சாத்தூர் ராமச்சந்திரன், தங்கம் தென்னரசு, மணிமாறன் உள்ளிட்டோர் உடனிருந்தனர்.

டூவீலர் கவிழ்ந்து வாலிபர் சாவு

திருமங்கலம், மே 16: திருமங்கலம் அருகே டூவீலர் கவிழ்ந்து வாலிபர் உயிரிழந்தார். பேரையூர் அருகேயுள்ள பெருங்காமநல்லூரை சேர்ந்தவர் ஜீவானந்தம்(29). டிரைவர். கடந்த இரண்டு தினங்களுக்கு முன்பு மதுரைக்கு டூவீலரில் சென்றார். திருமங்கலத்தை அடுத்த தோப்பூரில் சென்றபோது டூவீலர் நிலைதடுமாறி கவிழ்ந்தது. இதில் தூகிவீசப்பட்டு ஜீவானந்தம் படுகாயமடைந்தார். மதுரை அரசு மருத்துவமனையில் அனுமதிக்கப்பட்டு சிகிச்சை பலனின்றி நேற்று உயிரிழந்தார். மனைவி தாரணி கொடுத்த புகாரில் ஆஸ்டின்பட்டி போலீசார் விசாரணை நடத்திவருகின்றனர்.