Nagapattinam - Dinakaran

தனிப்படை வேட்டையில் கள்ளச்சாராயம் விற்ற 39 பேர் கைது

கீழ்வேளூர், பிப்.15: தனிப்படை நடத்திய சாராய வேட்டையில் கள்ளச்சாரயம் விற்ற 39 பேர் கைது செய்யப்பட்டனர்.நாகை எஸ்.பி. விஜயகுமார் உத்தரவின் போரில் கீழ்வேளூர் காவல் நிலையத்திற்கு உட்பட்ட கிராமங்களில் கள்ளசாராயம் விற்பனை செய்பவர்களின் மீது நடவடிக்கை எடுக்க 5 இன்ஸ்பெக்டர்கள், 5 சப் இன்ஸ்பெக்டர்கள் கொண்ட 10 குழுக்கள் கீழ்வேளூர் காவல் நிலையம் முழுவதும் சென்று சாரயா வேட்டை நடத்தினர்.அப்போது தொடர்ந்து கள்ளசாராயம் விற்ற 39 பேரை கைது செய்த தனிப்படை போலீசார் அவர்களிடம் இருந்து 2840 லிட்டர் பாண்டி சாராயம் பறிமுதல் செய்யப்பட்டது.

கலெக்டர் அலுவலகம் அருகே நடந்தது குருக்கத்தி அரசு பள்ளியில் தேசிய பாதுகாப்பு வார விழா

கீழ்வேளூர், பிப்.15: நாகை மாவட்டம் கீழ்வேளூரை அடுத்த குருக்கத்தி அரசு மேல்நிலைப் பள்ளியில் ஓஎன்ஜிசி சார்பில் 46 வது தேசிய பாதுகாப்பு வாரம் கொண்டாடப்பட்டது. நிகழ்ச்சிக்கு முதன்மை பொறியாளர் சுரேஷ் தலைமை தாங்கினார். பெற்றோர் ஆசிரியர் கழக தலைவர் ஞானசேகரன் முன்னிலை வகித்தார். பள்ளியின் தலைமை ஆசிரியர் மல்லிகா வரவேற்றார். நிகழ்ச்சியில் ஓ.என்.ஜி.சி.யின் பொது மேலாளர் தங்கராஜ் கலந்து கொண்டு பள்ளி குழந்தைகள் பாதுகாப்பு கருத்தரங்கம் மற்றும் கட்டுரை மற்றும் ஓவியப் போட்டியை தொடங்கி வைத்து உபகரணங்களை வழங்கி பேசினார். முதன்மை பொறியாளர் மணி, பொறியாளர் தியாகராஜன், மற்றும் பொற்றோர் ஆசிரியர் கழக நிர்வாகிகள், ஆசிரியர்கள், மாணவ, மாணவிகள் கலந்து கொண்டனர்.    

தர ஊதியம் வழங்க கோரி சாலை பணியாளர்கள் ஆர்ப்பாட்டம்

நாகை, பிப். 15: தமிழ்நாடு நெடுஞ்சாலைத் துறை சாலைப் பணியாளர்கள் சங்கம் சார்பில் சாலைப் பணியாளர்கள் 41 மாத பணி நீக்க காலத்தை பணிக்காலமாக அறிவித்து ஆணை வழங்க வேண்டும், சாலை பணியாளர்களுக்கு தொழில்நுட்பட கல்வித் திறன் பெறா ஊழியர்களுக்கான ஊதியம், தர ஊதியம் வழங்க வேண்டும், சாலைப் பணியாளர்களுக்கு நிரந்தர ஊதிய தொகுப்பில் மாத ஊதியம் வழங்க வேண்டும், பணி நீக்க காலத்தில் இறந்த பணியாளர்கள் வாரிசுகளுக்கு விதிமுறைகளை தளர்த்தி பணி வழங்கவேண்டும். சாலை பராமரிப்பு பணியை தனியாருக்கு கொடுப்பதை கைவிட்டு அரசே ஏற்று நடத்த வேண்டும் என வலியுறுத்தி நாகை கோட்ட பொறியாளர் அலுவலகம் முன் கருப்பு கொடி ஏந்தி மாவட்ட தலைவர் கணேசன் தலைமையில் நடைபெற்றது. ஆர்ப்பாட்டத்தில் நாகை மாவட்ட செயலாளர் உதயக்குமார், மாநில செயற்குழு உறுப்பினர் பாலமுரளி, மாவட்ட பொருளாளர் ரவிச்சந்திரன், நாகை வட்ட தலைவர் தமிழ்செல்வம், அரசு ஊழியர் சங்க மாவட்ட தலைவர் உள்ளிட்ட ஏராளமானோர் கலந்து கொண்டனர்.    

காரைக்காலில் கயிலாசநாதர் தேவஸ்தான அலுவலகம், பசுமடம் திறப்பு

காரைக்கால், பிப்.15: காரைக்கால் கயிலாசநாதர் கோயில் தேவஸ்தான அலுவலகம் மற்றும் பசுமடம் திறப்பு விழா நேற்று சிறப்பாக நடைபெற்றது.காரைக்கால் கயிலாசநாதசுவாமி, நித்யகல்யாணப் பெருமாள் வகையறா தேவஸ்தானத்திற்கு, காரைக்கால் அம்மையார் கோயில் அருகே, புதியதாக அமைக்கப்பட்ட அலுவலக கட்டிடம் மற்றும் கயிலாசநாதர் கோயில் தண்டபாணி சன்னதி அருகே புதிதாக அமைக்கப்பட்ட பசுமடம் திறப்பு விழா நேற்று நடைபெற்றது. இவ்விழாவில், காரைக்கால் தெற்கு தொகுதி எம்.எல்.ஏ அசனா சிறப்பு விருந்தினராக கலந்து கொண்டு, அலுவலகம் கட்டிடம் மற்றும் பசுமடத்தை திறந்து வைத்தார். விழாவில், மாவட்ட கலெக்டரும், கோயில்கள் நிர்வாக அதிகாரியுமான விக்ராந்த் ராஜா, காரை நகராட்சி ஆணையர் சுபாஷ், கோயில் அறங்காவல் குழு தலைவர் கேசவன், துணைத் தலைவர் ஆறுமுகம், செயலாளார் பக்கிரிசாமி பொருளாளர் ரஞ்சன் கார்த்திகேயன், உறுப்பினர் பிரகாஷ் மற்றும் பலர் கலந்து கொண்டனர்.    

புதுச்சேரி ஆளுநர் கிரண்பேடிக்கு எதிராக காரைக்காலில் திமுக-காங்கிரஸ் கட்சியினர் கண்டன ஆர்ப்பாட்டம்

காரைக்கால், பிப்.15: மக்களுக்கு எதிராக செயல்படும் புதுச்சேரி ஆளுநரை, புதுச்சேரியை விட்டு வெளியே போக வலியுறுத்தி, காரைக்காலில் திமுக-காங்கிரஸ் கூட்டணி கட்சியினர் நேற்று கண்டன ஆர்ப்பாட்டம் நடத்தினர்.காரைக்கால் மாவட்ட  கலெக்டர் அலுவலகம் அருகே, மாதா கோவில் வீதியில் நடந்த இந்த ஆர்ப்பாட்டத்திற்கு, புதுச்சேரி முன்னாள் அமைச்சர் நாஜிம் தலைமை வகித்தார். திமுக சார்பில், அமுதா ஆறுமுகம், சங்கர், ரிப்பாஷ், வீரதாசன், ஆனந்தராஜ், காங்கிரஸ் சார்பில், மாவட்ட தலைவர் பாஸ்கரன் மற்றும் நிர்வாகிகள் அரசன், சந்திரமோகன் உள்ளிட்ட பலரும், திமுக சார்பில் ஆனந்தராஜ், ரிபாஷ் உள்ளிட்ட பலரும், மார்க்சிஸ்ட் கம்யூனிஸ்ட் கட்சி சார்பில் வின்சென்ட் உள்ளிட்ட கூட்டணி கட்சியை சேர்ந்த சுமார் 200க்கும் மேற்பட்டோர் கலந்து கொண்டனர்.தொடர்ந்து, காரைக்கால் டாக்கர் அம்பேத்கர் வீதி, மாதாகோவில் சந்திப்பில் அனைவரும் சாலை மறியல் செய்ய முயற்சித்தபோது, போலீசார் அவர்களை தடுத்து நிறுத்தினர். இதனால், அனைவரும் அதே சாலையில் சுமார் ஒரு மணிநேரம்  அமர்ந்து, ஆளுநருக்கு எதிராக கண்டன கோஷங்கள் எழுப்பினர்.    போராட்டத்தின் முடிவில், முன்னாள் அமைச்சர் நாஜிம் நிருபர்களுக்கு அளித்த பேட்டி: புதுச்சேரி ஆளுநர் கிரண்பேடி மக்களையும், மக்களால் தேர்ந்தெடுக்கப்பட்ட ஆட்சியாளர்களையும் ஆட்டிப்படைத்து வருகிறார். இதனை மக்கள் உற்று நோக்கி வருகின்றனர். கிரண்பேடி ஆளுநராக வந்த நாள் முதல் மக்களையும், மக்கள் நலத் திட்டங்களை பாழ்படுத்தி வருகிறார்.மக்கள் ஆட்சி நடைபெறும் இடத்தில், ஒரு திட்டம் நிறைவேற்ற வேண்டுமென்றால், ஆளும் கட்சியுடன் ஆலோசனை நடத்தி முடிவு எடுக்க வேண்டுமே தவிர, தன்னிச்சையாக முடிவெடுத்து, மக்களுக்கு பாதுகாப்பு தர வேண்டிய ஆளுநர் சாலையில் இறங்கி அவர்களை அச்சுறுத்தி வருவது கண்டனத்துக்குரியது. இந்த போக்கு மக்கள் மத்தியில் கொந்தளிப்பை ஏற்படுத்தியுள்ளது. காங்கிரஸ், -திமுக கூட்டணி ஆளுநரின் அதிராக போக்கை இனியும்  அனுமதிக்க மாட்டோம். இதே நிலை நீடித்தால் தமிழகத்தில் புதுச்சேரியை இணைக்க வேண்டுமென மக்கள் போராட்ட களத்தில் இறங்கியது போல், ஆளுநருக்கு எதிராக மீண்டும் ஒரு போராட்டம் வெடிக்கும். இவ்வாறு அவர் கூறினார்.    

இலுப்பூர் வீரப்ப சுவாமி கோயில் கும்பாபிஷேகம்

கீழ்வேளூர், பிப்.15: நாகை மாவட்டம் கீழ்வேளூரை அடுத்த இலுப்பூர்  வீரப்ப சுவாமி கோயில் மகா கும்பாபிஷேகம் இன்று காலை நடைபெறுகிறது. கும்பாபிஷேகத்தை முன்னிட்டு நேற்று  இரவு அனுக்ஞை, விக்னேஸ்வர பூஜையுடன் தொடங்கியது. அதைத் தொடர்ந்து இன்று காலை சங்கல்பம், யாகபூஜையும், வேள்வி வழபாடு நடைபெற்று மகாகும்பாபிஷேகம் நடைபெறுகிறது. அதைத் தொடர்ந்து வரும் 19ம் தேதி பால்பொங்கல் வைத்தலும், சிறப்பு அபிஷேகமும் நடைபெற்ற உள்ளது. விழா ஏற்பாடுகளை மருளாளிகள், கிராம வாசிகள்  செய்து வருகின்றனர்.

கஜா புயலால் பாதிப்பு விடுபட்டோருக்கும் நிவாரணம் வழங்க கோரி சாலை மறியல் திமுக ஊராட்சி சபை கூட்டத்தில் அறிவிப்பு

வேதாரண்யம், பிப்.15: கஜா புயலால் பாதித்த விடுபட்டோருக்கும் நிவாரணம் வழங்க வலியுறுத்தி திமுக ஊராட்சி சபை கூட்டத்தில் அறிவிக்கப்பட்டது.வேதாரண்யம் தாலுகா வண்டுவாஞ்சேரியில் திமுக ஊராட்சி சபை கூட்டம் மாவட்ட செயலாளர் கவுதமன் தலைமையில் நடந்தது. கூட்டத்தில்  ஒன்றிய கழக செயலாளர் குமரவேல்,  எம்எல்ஏ காமராஜ், மாவட்ட விவசாய அணி அமைப்பாளர் பழனியப்பன், மாவட்ட விவசாய தொழிலாளர் அணி அமைப்பாளர் துரைராஜ், மாவட்ட வர்த்தக அணி துணை அமைப்பாளர் முருகையன் மாவட்ட தொண்டரணி அமைப்பாளர் அருள் மாவட்ட தகவல் தொழில் நுட்ப அணி பாரிபாலன் ஒன்றிய இளைஞரணி அமைப்பாளர் ஆசைதம்பி ஊராட்சி செயலாளர் சோழன்நம்பி குமார் மற்றும் பொதுமக்கள் கலந்து கொண்டனர்.    கூட்டத்தில் எங்கள் பகுதியில் 500க்கும் மேற்பட்ட தென்ணை விவசாயிகள் கஜா புயலால் பாதிக்கப்பட்டு உள்ளனர்.  இவர்கள் அனைவரும் தோப்பு புறம்போக்கு பகுதியில் தென்ணை விவசாயம் மேற்கொண்டு அரசுக்கு தீர்வை தொகையும் கட்டி வருகிறோம்.  ஆனால் எங்களுக்கு அரசு இதுவரை நிவாரணம் கொடுக்கவில்லை. புயல் பாதித்து வாழ்வாதாரத்தை இழந்து நிற்கும் எங்களுக்கு அரசு விதி மற்றும் பல்வேறு நடைமுறைகளை காரணம் காட்டி நிவாரணம் மறுக்கப்படுகிறது. எனவே மற்ற தென்னை விவசாயிகளுக்கு நிவாரணம் வழங்கியதுபோல எங்களுக்கும் நிவாரணம் வழங்க வேண்டும்.  இல்லையென்றால் விரையில் நிவாரணம் கேட்டு சாலை மறியல் போராட்டம் நடத்த உள்ளோம். உள்ளிட்ட பல்வேறு கோரிக்கைகளை வலியுறுத்தி   பொதுமக்கள்  ஏராளமான மனுக்களை அளித்தனர்.   

வேதாரண்யம் அருகே கோடியம்மன் கோயிலில் உண்டியல் திருட்டு

வேதாரண்யம், பிப்.15: வேதாரண்யம் தாலுகா தாணிக்கோட்டகத்தில் கோடியம்மன் கோயில் உண்டியலை மர்ம நபர்கள் திருடி சென்ற சம்பவம் பரபரப்பை ஏற்படுத்தி உள்ளது.தாணிக்கோட்டகம் பகுதியில் பிரசித்தி பெற்ற ஸ்ரீகோடியம்மன் முனியதம்பிரான் கோயில் உள்ளது.  இக்கோயில் பூசாரி பரமசிவம் வழக்கம்போல் நேற்று முன்தினம் கோயிலை பூட்டி விட்டு சென்றார். நேற்று காலை பூஜை செய்ய கோயிலுக்கு சென்றபோது.இக்கோயிலின் பின்பக்க கதவு உடைக்கப்பட்டிருந்தது கண்டு அதிர்ச்சி அடைந்தார். உள்ளே சென்று பார்த்தபோது கோயிலுக்குள் வைக்கப்பட்டிருந்த சுமார் 4 அடி உயரமுள்ள உலோகத்தாலான உண்டியலை காணவில்லை. இந்த உண்டியலில் சுமார் ரூ.10 ஆயிரம் இருக்கும் என கூறப்படுகிறது.    வழக்கமாக இக்கோயிலின் ஆண்டு பெருவிழாவின்போது அதாவது ஆண்டுக்கு ஒருமுறை மட்டுமே உண்டியல் திறக்கப்பட்டு காணிக்கைகள் எண்ணப்படுவது வழக்கம். உண்டியலைத் திருடிச் சென்ற மர்ம நபர்கள் கோயிலுனுள் பொருத்தப்பட்டிருந்த கண்காணிப்பு கேமராவையும் துண்டித்து சென்றனர்.  இதுகுறித்து வாய்மேடு போலீசார் வழக்குப் பதிவு செய்து விசாரித்து வருகின்றனர்.

ஆயக்காரன்புலம் கைகாட்டியில் பஸ் நிறுத்தம் அருகே சாலை படுமோசம்

வேதாரண்யம், பிப்.15: வேதாரண்யம் தாலுகா ஆயக்காரன்புலம் கைகாட்டி பேருந்து நிறுத்தம் அருகே புதிதாக கட்டப்பட்ட பாலத்தின் இருபுறமும் பிரதான சாலை குண்டும் குழியுமாக உள்ளதால் வாகன ஓட்டிகள் கடும் அவதிக்குள்ளாகின்றனர்.நாகை மாவட்டம் வேதாரண்யம் தாலுகா ஆயக்காரன்புலம் கைகாட்டி பேருந்து நிறுத்தம் அருகே மாணங்கொண்டான் ஆற்றின் குறுக்கே சுமார் ரூ.2 கோடி செலவில் உயர்மட்ட பாலம் கடந்த ஆண்டு கட்டிமுடிக்கப்பட்டது.  இன்னும் திறப்பு விழா காணாமல் உள்ள இப்பாலத்தின் எதிரே வேதாரண்யம் - திருத்துறைபூண்டி பிரதான சாலையில் தண்ணீர் வடிவதற்காக போடப்பட்டிருந்த பழைய குழாய் பாலங்களை அகற்றி விட்டு காங்கீரீட் பாலம் கட்டப்பட்டது.  பால வேலைகளினால் சேதம் அடைந்த பிரதான சாலையில் பாலத்தின் இருபுறமும் குண்டும் குழியுமாக காட்சி அளிக்கிறது.  இந்த பிரதான சாலையில் செல்லும் வாகன ஓட்டிகளும் இந்த மரண பல்லங்களினால் நாள்தோறும் விபத்துகள் ஏற்படுகிறது.  பாலம் வேலை முடிந்து பல நாட்கள் ஆகியும் இந்த சாலையின் இருபுறமும் உள்ள பள்ளங்கள் சீர்செய்யபடாமல் உள்ளது.      மேலும் இந்த பாலத்தின் அருகில் செல்லும் கொள்ளிடம் கூட்டு குடிநீர் திட்ட குழாயும் அடிக்கடி உடைப்பு ஏற்பட்டு தண்ணீர் வீணாகிறது. எனவே பொதுமக்களின் நலன்கருதி போர்கால அடிப்படையில் சாலையை சரிசெய்து குடிநீர் குழாய் ஏற்பட்டுள்ள உடைப்பையும் சரிசெய்ய வேண்டும் என பொதுமக்கள் கோரிக்கை விடுத்துள்ளனர்.

இலவச பட்டா கேட்டு கலெக்டரிடம் மனு

நாகை, பிப். 15: இலவச பட்டா கேட்டு நாகை கலெக்டரிடம் நுகர்வோர் பாதுகாப்பு உரிமைகள் நல சங்கம் மனு அளித்துள்ளது.நாகை, திருவாரூர் மாவட்ட  நுகர்வோர் பாதுகாப்பு உரிமைகள் நலச்சங்க  தலைவர் பாஸ்கர் நாகை கலெக்டருக்கு அனுப்பியுள்ள மனுவில் கூறியிருப்பதாவதுநாகை நகராட்சிக்குட்பட்ட 4வது வார்டில் வசித்து வரும் 20 குடும்பத்தினர் இலவச பட்டா வாங்க தகுதியானவர்களாக உள்ளனர்.  இவர்களுக்கு பட்டா வழங்கப்படும் என்று கூறி விட்டு இதுவரை இலவச பட்ட வழங்கவில்லை. அந்த இடத்தில் குடியிருக்கும் 20 பேரும் மிகவும் வறுமை நிலையில் உள்ளவர்கள். மாவட்ட கலெக்டர் உரிய நடவடிக்கை எடுத்து உடனே இலவச பட்டா வழங்கிட வேண்டும் இவ்வாறு அந்த மனுவில் கூறப்பட்டுள்ளது.     

ரூ.700க்கு பதில் 400க்கு விற்பதால் மக்கள் அச்சம் மயிலாடுதுறையில் கலப்பட பனைவெல்லம் விற்பனையா?

மயிலாடுதுறை பிப்.15: நாகை மாவட்டம் மயிலாடுதுறையில் கலப்பட பனைவெல்லம் விற்பனை செய்யப்படுகிறதா என்று பொதுமக்கள் அச்சம் தெரிவித்துள்ளனர்.நவீன காலத்தில் வெள்ளைச் சர்க்கரை எனப்படும் சீனியால் மனிதனது மூட்டுக்களில் உள்ள நீர் குறைந்து குறிப்பிட்ட வயதில் மூட்டுவலி ஏற்படுவதாக மருத்துவர்கள் கண்டுபிடித்து அதை பரப்பி வருகின்றனர், கரும்பிலிருந்து சீனியை தயாரிக்கும்போதும் அவற்றை வெண்மை நிறமாக்கும்போதும், சீனியில் உள்ள அழுக்கை நீக்குவதற்கும் குறிப்பிட்ட ரசாயனப் பொருட்களை கட்டாயம் கலந்தே ஆகவேண்டிய சூழல் உள்ளது. இந்த ரசாயனப் பொருட்கள் சீனியில் கலந்து அதுவே மனிதனது அன்றாட உணவுப்பொருட்களில் எந்த வடிவத்திலாவது கலந்து விடுகிறது.  சீனி இல்லாத வாழ்க்கையே இல்லை என்ற நிலைக்குத் தள்ளப்பட்டுள்ளனர்.  80 வயதிற்குமேல் மூட்டுவலி வந்த நிலை மாறி 40 வயதிற்குள் மூட்டு வலி ஏற்பட்டு விடுகிறது. டாக்டரிடம் சென்றால் மூட்டில் உள்ள பசை காலியாகி விட்டது. அவற்றை சரிசெய்வதற்கு தேயைான பசைக்கு மீண்டும் ரசாயனம் கலந்து மாத்திரைகளையே விழுங்க வேண்டியுள்ளது.  இதனால் குறிப்பிட்ட காலத்தில் கால், கை நடமாட்டம் குறைந்து படுத்தபடுக்கையாகி விடுகின்றனர்.  இதிலிருந்து தப்பிப்பதற்கு சீனியை தவிர்க்க வேண்டும், அதற்கு பதிலாக நாட்டுச் சர்க்கரையை உபயோகப்படுத்த வேண்டும். அதிலும் வண்ணம் மங்கலாக உள்ள சர்க்கரை மட்டுமே எந்த பக்க விளைவுகளை ஏற்படுத்தாது என்று நாட்டு சர்க்கரையை பயன்படுத்த வலியுறுத்துகின்றனர். இதனை உபயோகப்படுத்தப்படும் போது மூட்டில் உள்ள பசைக்கு எந்தவித ஆபத்தும் இருக்காது என்று மருத்துவர்கள் தெரிவித்துள்ளனர்.  அடிக்கடி சித்த மருத்துவர்கள் மக்களுக்கு விழிப்புணர்வை ஏற்படுத்தி வருவதால் மக்கள் சீனியை படிப்படியாகத் தவிர்த்து வருகின்றனர்.    ஒருகிலோ நாட்டுச் சாக்கரை விலை ரூ.60 என்றும் இயற்கை முறையில் சுத்திகரிக்கப்பட்ட சர்க்கரை கிலோ ரூ.100 என்ற விலைக்கு விற்பனை செய்யப்படுகிறது. இவற்றை குறிப்பிட்ட அளவில் வாங்கி பயன்படுத்தி வருகின்றனர்.  இதனால் நாட்டுச் சர்க்கரை மற்றும் நாட்டுவெல்லத்தின் தேவை அதிகரித்து வருகிறது.  நாட்டு சர்க்கரையை விட அதிக நன்மை கொண்டது பனை வெல்லம். இன்றைக்கும் கிராம பகுதிகளில் கருப்பட்டி எனப்படும் பனைவெல்லத்தை பல்வேறு மருத்துவபயன்பாட்டில் கலந்து வருகிறார்கள். தென் மாவட்டங்களில் உற்பத்தியாகி அது விற்பனைக்கு தமிழகம் முழுவதும் அனுப்பி வைக்கப்படுகிறது.  பனைவெல்லமானது மளிகை கடையில் ரூ.150 என்றும் மற்றும் காதி வஸ்திராலயம் போன்றவற்றில் ரூ.300முதல் விற்பனை செய்யப்படுகிறது.  ஒவ்வொரு கடைக்கும் விலை வித்தியாசம் உள்ளது.  இந்நிலையில் திருநெல்வேலியிலிருந்து பனைவெல்லம், பனங்கற்கண்டு மற்றும் சுக்குப் பனைவெல்லம் போன்றவ்றை விற்பனை செய்ய வடமாவட்டங்களுக்கு அதிகளவில் விற்பனையாளர்கள் சாலை ஓரத்தில் கடைவிரித்துள்ளனர்.  அவர்களிடம் சென்று கேட்டால் ஒருகிலோ பனைவெல்லம் ரூ.150 என்றும் ஒரு ரகம் ரூ.240, 400 என்றும் விலை கூறுகின்றனர். கேட்டால் பனைவெல்லம் பல்வேறு ரகங்களில் உள்ளது. ஒரு கிலோ ரூ.700 வரை விற்பனையாகிறது, அதன் தரத்திற்கேற்ற படி விலை உள்ளது என்கின்றனர். அனைத்துமே பனைவெல்லம் தானா இதில் ஏதேனும் கலப்படம் உண்டா என்று பொதுமக்கள் குழப்பத்தில் உள்ளனர்.  இயற்கை விவசாயப் பொருட்கள் விற்பனை மையங்களில் கிலோ ரூ.400 என்ற விலைக்கு விற்பனை செய்கின்றனர். இதுபோன்ற விற்பனை விலை நிலவரம் குறித்து பனைவெல்லம் தயாரிப்போர் அல்லது காதிவஸ்திராலய அதிகாரிகள்தான் விளக்க வேண்டும். மக்கள் மீண்டும் கடந்த காலத்தில் உபயோகப்படுத்திய உணவுப் பொருட்களுக்கு மாறும் வேளையை கலப்படக்காரர்கள் உபயோகப்படுத்தக் கூடாது என்பதால் பனைவெல்லம்  குறித்து முழுமையான அறிக்கையை அரசோ சம்பந்தப்பட்ட துறையினரோ விளக்க வேண்டும் என்று பொதுமக்கள் எதிர்பார்க்கின்றனர்.பதில் கூற மறுப்புபனைவெல்லத்தில் தரம் பிரிக்கப்படுவது குறித்து அங்குள்ள விற்பனையாளர்களிடம் கேட்டபோது, முறையான பதில் கூற மறுக்கின்றனர். எனவே ஒரிஜினல் ரூ.700 விற்பக்கப்படும் ரகம் ஏன் இங்கு கொண்டு வர மறுக்கின்றனர் என பொதுமக்கள் கேள்வி எழுப்பி உள்ளனர்.

காவிரி படுகையை வேளாண் மண்டலமாக அறிவிக்க கோரி ஆர்ப்பாட்டம்

வேதாரண்யம், பிப்.14: வேதாரண்யம் கரியாப்பட்டினம் வருவாய் அலுவலகம் முன், காவிரி படுகையை பாதுகாக்கப்பட்ட வேளாண் மண்டலமாக அறிவிக்க கோரியும், இப்பகுதியில் ஹைட்ரோ கார்பன் எடுக்க கொடுத்த அனுமதியை மத்திரய அரசு ரத்து செய்ய கோரி காவிரி தமிழ்தேச விவசாயிகள் சங்கம் சார்பில் கண்டன ஆர்ப்பாட்டம் நடைபெற்றது.  சங்க தலைவர் சுப்பிரமணியன் தலைமை வகித்தார்.  ஆர்ப்பாட்டத்தில் சங்க பொறுப்பாளர்கள் உட்பட விவசாயிகள் பொது மக்கள் கலந்து கொண்டனர்.  மத்திய அரசை கண்டித்து கோஷங்கள் எழுப்பினர். ஆர்ப்பாட்டத்தில் காவிரி படுகையை பாதுகாக்கப்பட்ட வேலாண் மண்டலமாக அறிவிக்க வலியுறுத்தி பல்வேறு கருத்துக்களை தெரிவித்தனர்.

அனுமதியின்றி மணல் ஏற்றி வந்த மினிவேன் பறிமுதல் இருவர் கைது

தரங்கம்பாடி பிப்.14.  நாகை மாவட்டம், திருக்கடையூரில் அனுமதி இல்லாமல் சவுடு மண் எடுத்து வந்த மினி லாரியை பறிமுதல் செய்து 2 பேரை பொறையார் போலீசார் கைது செய்தனர்.பொறையார் போலீஸ் இன்ஸ்பெக்டர் ஜெகதீஸ்வரன் மற்றும் போலீசார் திருக்கடையூர் ஆரம்ப சுகாதார நிலையத்திற்கு எதிரே நேற்று முன்தினம் இரவு வாகன சோதனையில் ஈடுபட்டனர். அப்போது வேகமாக வந்த ஒரு மினிவேனை நிறுத்தி சோதனையிட்டதில், அனுமதி இல்லாமல் சவுடு மண் எடுத்துவந்தது தெரியவந்தது. இதுகுறித்து வழக்கு பதிவு செய்து வேனை பறிமுதல் செய்தனர்.  மேலும் வேனில் இருந்த அன்னப்பன்பேட்டை பகுதியை சேர்ந்த அன்பரசன்(21), அரவிந்தன் (20) ஆகியோரையும் கைது செய்தனர். மேலும் தப்பி ஓடிய வேன் டிரைவர் ரஞ்சித்தை தேடி வருகின்றனர்.

மயிலாடுதுறை அருகே ஜமாத் இடத்தை ஆக்கிரமித்து கட்டிட பணி கலெக்டரிடம் புகார் மனு

மயிலாடுதுறை, பிப்.14: மயிலாடுதுறை அருகே ஜமாத் இடத்தை ஆக்கிரமித்து கட்டிடம் கட்டுவதை ஜமாத்தார்கள் தடுத்ததால் புகார் மனு அளித்தனர். நாகை மாவட்டம் மயிலாடுதுறை அருகே  வடகரை பள்ளிவாசலுக்கு, 2017ம் ஆண்டு அதே பகுதியை சேர்ந்த முகமதாபீவி (60) என்பவர் தனக்கு சொந்தமான இடம் 317 சதுர அடி நிலத்தை வடகரை பள்ளிவாசலுக்கு தானமாக எழுதி கொடுத்துள்ளார். அந்த இடத்தில் அரங்கக்குடியை சேர்ந்த முகம்மது காசிம்(58) என்ற  நபர் திடீரென கடந்த வாரம்\ முகமதுபீவி எழுதி கொடுத்த 317 சதுரடி இடத்தில் கட்டிடம் கட்ட துவங்கினார். உடனே வடகரை பள்ளி ஜமாத்தார்கள் அதை தடுத்தனர். இதுகுறித்து மயிலாடுதுறை உரிமையியல் நீதிமன்றத்தில் முகமது காசிம் வழக்கு தொடுத்திருந்தார்.  வழக்கு நிலுவையில் உள்ளது.பள்ளிவாசலுக்கு சொந்தமான இடத்தில் கட்டிடம் கட்டக்கூடாது என்று பள்ளிவாசல் ஜமாத்தார்கள்  தரங்கம்பாடி தாசில்தாரிடம் மனு அளித்தனர். இந்த மனுகுறித்து கடந்த 12ம் தேதி தரங்கம்பாடி தாசில்தார் அலுவலகத்தில் நடைபெற்ற அமைதிக் கூட்டத்தின் முடிவில் நீதிமன்றத்தில் வழக்கு இருப்பதால் இரண்டு தரப்பினரும் பிரச்னைக்குரிய இடத்தில் எந்த பணியும் செய்யக் கூடாது என்று முடிவாகியது.இந்நிலையில் நேற்று காரை திடீரென நூற்றுக்கும் மேற்பட்ட நபர்களை வைத்து பிரச்னைக்குறிய  இடத்தில் முகமது காசிம் கட்டுமானப் பணிகளை தொடர்ந்தார். இதுகுறித்து  பள்ளிவாசல் முத்தவல்லி முகமது ரபீக் ஜமாஅத் தார்களுடன் செம்பனார்கோவில் போலீசில் புகார் அளித்தனர். போலீசார் சம்பவ இடத்திற்கு சென்று கட்டுமான பணியை நிறுத்தினர். இருந்தும் நேற்று மதியம் மீண்டும் கட்டுமான பணி நடைபெற்றதால் பள்ளிவாசல் ஜமாத்தார்கள் மற்றும் முக்கிய முக்கிய பிரமுகர்கள் ஒன்றுசேர்ந்து மயிலாடுதுறை டிஎஸ்பி வெங்கட்ராமனிடம் இதுகுறித்து புகார் மனு ஒன்றை அளித்தனர். மேலும் மயிலாடுதுறை ஆர்டிஓ, நாகை மாவட்ட கலெக்டர், தமிழக முதல்வர் முதல்வர் தனிப்பிரிவுக்கு புகார் மனு அனுப்பி உள்ளனர்.

புத்தூர் அரசு கல்லூரியில் விளையாட்டு போட்டி

தமிழ்த்துறை மாணவிகள் கபடியில் முதலிடம் கொள்ளிடம், பிப்.14:  புத்தூர் அரசு கலைக்கல்லூரியில் நடந்த விளையாட்டு போட்டியில் தமிழ் துறை மாணவிகள் கபடி போட்டியில் முதலிடம் பிடித்தனர்.நாகை மாவட்டம் கொள்ளிடம் அருகே புத்தூர் எம்.ஜி.ஆர் அரசு கலை மற்றும் அறிவியல் கல்லூரியில் அனைத்து துறைகளை சேர்ந்த மாணவ, மாணவிகளுக்கான கைபந்து போட்டி நேற்று நடைபெற்றது. விளையாட்டு போட்டியை கல்லூரி முதல்வர் சாந்தி தலைமை ஏற்று துவக்கி வைத்தார். உடற்கல்வி ஆசிரியர் பிரபாகர் மற்றும் ஆசிரியர்கள் கலந்து கொண்டனர். கைப்பந்து போட்டியில் மாணவிகள் முதலிடம் பிடித்தனர். இதேபோல் பெண்கள் பிரிவுக்கான கபாடி போட்டியிலும் தமிழ்த்துறையை சேர்ந்த மாணவிகளே வெற்றி பெற்றனர்.

சீர்காழி குடியிருப்பு பகுதியில் செல்போன் டவர் அமைக்க மக்கள் எதிர்ப்பு

சீர்காழி, பிப்.14: சீர்காழி தென்பாதியில் தனியாருக்கு சொந்தமான கட்டிடத்தில் செல்போன் டவர் அமைக்கும் பணி கடந்த சில நாட்களுக்கு முன் தொடங்கி நடைபெற்று வந்தது. இதனை அறிந்த அப்பகுதியை சேர்ந்தவர்கள் குடியிருப்பு பகுதியில் செல்போன் டவர் அமைக்க கூடாது என எதிர்ப்பு தெரிவித்து டவர் அமைக்கும் இடத்தை  100க்கும் மேற்பட்டோர் முற்றுகையிட்டனர். இதனை தொடர்ந்து செல்போன் டவர் அமைக்க கூடாது என வலியுறுத்தி தென்பாதி பகுதியை சேர்ந்த பொதுமக்கள் நாகை கலெக்டர் அலுவலகம், சீர்காழி தாசில்தார் அலுவலகம், சீர்காழி நகராட்சி அலுவலகம், சீர்காழி தீயணைப்பு துறை அலுவலகம், தமிழ்நாடு மின்சாரவாரிய அலுவலகம் ஆகிய அலுவலகங்களில் கோரிக்கை மனு அளித்தனர்.மனுவில் சீர்காழி தென்பாதியில் தனியாருக்கு சொந்தமான கட்டிடத்தில் ஒப்பந்த அடிப்படையில் தனியார் செல்போன்டவர் அமைக்கப்படுகிறது. இந்த டவர் அமையவுள்ள இடத்தில் 100க்கும் மேற்பட்ட குடும்பத்தினர் வசித்து வருகின்றனர். குடியிருப்பு பகுதிகளிலிருந்து செல்போன் டவர் 500 மீ தூரத்திற்குள் அமைக்க கூடாது என்ற விதிமுறைகளும் உள்ளது. இதனை மீறி செல்போன் டவர் அமைக்கப்பட்டு வருகிறது. செல்போன் டவர் அமைக்கப்படும் கட்டிடம் எதிரே பள்ளிக்கூடம், திரையரங்கம் இருப்பதால் பல்வேறு பிரச்னைகள் ஏற்பட வாய்ப்புள்ளது. அமைக்கப்பட இருக்கும் அதிவேக 4ஜி நெட்வொர்க் டவர் அமைக்கப்படுவதால் கதிர்வீச்சின் தாக்கம் அதிகமாக ஏற்பட்டு பல்வேறு நோய்கள் ஏற்பட வாய்ப்புள்ளது. எனவே பொதுமக்கள் நலன் கருதி செல்போன் டவரை வேறு இடத்திற்கு மாற்ற வேண்டுமென அந்த மனுவில் கூறியுள்ளனர்.

காரைக்கால் நகராட்சி சார்பில் நகர்புற வாழ்வாதார இயக்க பாரம்பரிய உணவு திருவிழா

காரைக்கால், பிப்.14: காரைக்கால் நகராட்சி சார்பில், நகர்ப்புற வாழ்வாதார இயக்கத்தின் பாரம்பரிய உணவு திருவிழா சிறப்பாக நடைபெற்றது.காரைக்கால் நகராட்சி சார்பில், தேசிய நகர்ப்புற வாழ்வாதார இயக்க நிகழ்ச்சிகள், காரைக்கால் காமராஜர் திடலில் கடந்த 11ம் தேதி தொடங்கியது. 5 நாள் நடைபெறும் இந்நிகழ்ச்சியில், பதிவுபெற்ற மகளிர் சுயஉதவிக் குழுவினர் பல்வேறு அரங்குகள் அமைத்து, சுய உதவிக் குழுவினரால் தயார் செய்யப்பட்ட கைவினைப் பொருட்கள் கண்காட்சி மற்றும் விற்பனை நடைபெற்றது. 2ம் நாள் நிகழ்ச்சியாக தெருவோர வியாபாரிகள் மற்றும் சுய உதவிக் குழுக்கள் பங்குபெற்ற சுகாதார மற்றும் பாரம்பரிய முறையில் தயாரிக்கப்பட்ட உணவுத் திருவிழா நடைபெற்றது.இத்திருவிழாவில், முளைகட்டிய தானிய வகையில் தயார் செய்யப்பட்ட வடை, கட்லெட், தோசை, சுண்டல் மற்றும் சூப் வகைகளும், நெல்லிக்காய். சோளம், ஊறுகாய், ஐஸ் கிரீம் உள்ளிட்ட பல்வேறு உணவுப் பொருட்கள் காட்சிப்படுத்தப்பட்டு விற்பனை செய்யப்பட்டன. தொடர்ந்து, மாவட்ட துணை கலெக்டர் (பேரிடர் மேலாண்மை) பாஸ்கரன், நகராட்சி ஆணையர் சுபாஷ், மகளிர் மற்றும் குழந்தைகள் மேம்பாட்டுத் துறை அதிகாரி சத்யா ஆகியோரை கொண்ட நடுவர் குழுவினர் சிறந்த உணவு பொருட்களை தேர்வு செய்தனர்.இந்நிகழ்ச்சி நாளை (15ம் தேதி) வரை நடைபெறும் என்றும், தினமும் மாலை வேலைவாய்ப்பு முகாம், வழிகாட்டி முகாம் உள்ளிட்ட பல்வேறு நிகழ்ச்சிகளும், 15ம் தேதி மாலை பரிசளிப்பு நிகழ்ச்சிகள் நடைபெறும் என, நகராட்சி ஆணையர் சுபாஷ் தெரிவித்துள்ளார்.

சீர்காழி அருகே சேதமடைந்த உப்பனாறு பாலம் சீரமைக்கப்படுமா? திமுக ஊராட்சி சபை கூட்டத்தில் புகார்

சீர்காழி, பிப்.14:சீர்காழி அருகே வெள்ளப்பள்ளத்தில் சேதமடைந்த உப்பனாறு பாலத்தில் விரைவில் சீரமைக்க வேண்டும் என்று திமுக ஊராட்சி சபை கூட்டத்தில் வலியுறுத்தப்பட்டது.சீர்காழி அருகே வெள்ளப்பள்ளம் கிராமத்தில் திமுக சார்பில் கிராமசபை கூட்டம் நடைபெற்றது. நாகை மாவட்ட பொறுப்பாளர் நிவேதா முருகன் தலைமை வகித்தார். முன்னாள் எம்எல்ஏக்கள் பன்னீர்செல்வம், சித்திக் மாவட்ட பொருளாளர் ரவி, மாவட்ட இளைஞரணி அமைப்பாளர் அலெக்சாண்டர் முன்னிலை வகித்தனர். ஒன்றிய செயலாளர் சசிகுமார் வரவேற்றார். மாநில இளைஞரணி துனை அமைப்பாளர் துரை சிறப்புரையாற்றினரர்.கூட்டத்தில் வெள்ளப்பள்ளம் உப்பனாற்றில் அமைப்பட்ட இரும்புபாலம் பழதடைந்துள்ளது. இதனால் வெள்ளப்பள்ளம் கிராமம் துண்டிக்கப்பட வாய்ப்பு உள்ளது. பொதுமக்களின் நலன் கருதி சேதமடைந்த பாலத்தை உடனே சீரமைக்க வேண்டும். சாலை, குடிநீர், மின்சார வசதி வெள்ளப்பள்ளம் கிராமத்திற்கு செய்து தர வேண்டும். 100 நாள் சம்பளத்தை உயர்த்தி வழங்க வேண்டும். மகளிர் சுயஉதவி கட்டிடத்தை சீரமைக்க வேண்டும் உள்ளிட்ட தீர்மானம் நிறைவேற்றப்பட்டனர். இதில் மாவட்ட பொறியாளர் அணி அமைப்பாளர் கலைவாணன் மாவட்ட இளைஞரணி துணை அமைப்பாளர் ஜீபையர் அகமது ஒன்றிய செயலாளர் பிரபாகரன் அவைத் தலைவர் அன்பழகன், முன்னாள் ஒன்றிய செயலாளர் வீரமணி, முன்னாள் ஒன்றிய குழு தலைவர் விஜேஸ்வரன், முன்னாள் கவுன்சிலர் முருகன் கலந்து கொண்டனர்.ஊராட்சி செயலாளர் வெங்கடேசன் நன்றி கூறினார்

முதலுதவி விழிப்புணர்வு கூட்டம்

கொள்ளிடம், பிப்.14: கொள்ளிடம் அருகே புத்தூர் எம்.ஜி.ஆர் அரசு கலை மற்றும் அறிவியல் கல்லூரியில் கிளைகள் செஞ்சிலுவை சங்கம் சார்பில் முதலுதவி விழிப்புணர்வு கூட்டம் நடைபெற்றது. கல்லூரி முதல்வர் சாந்தி தலைமை வகித்தார். திட்ட அலுவலர் வடிவேலன் வரவேற்றார். இளைஞர் செஞ்சிலுவை சங்க மாவட்ட ஒருங்கிணைபாளரும் முதலுதவி பயிற்றுநருமான பாண்டியன் கலந்து கொண்டு முதலுதவி என்ற தலைப்பில் கருத்துரை வழங்கினார். கூட்டத்தில் ஆசிரியர்கள், மாணவர்கள் மற்றும் ஊழியர்கள் உள்பட பலர் கலந்து கொண்டனர். முடிவில் மாணவி சிந்து நன்றி கூறினார்.

கொள்ளிடம் ஊராட்சி ஒன்றியத்தில் ஊராட்சி வளர்ச்சித் திட்ட குழு உறுப்பினர்களுக்கு பயிற்சி

கொள்ளிடம், பிப்.14: நாகை மாவட்டம் கொள்ளிடம் ஊராட்சி ஒன்றிய அலுவலகத்தில் வட்டார அளவிலான 42 ஊராட்சிகளை சேர்ந்த மகளிர் சுய உதவிக்குழு கிராம பஞ்சாயத்துக் குழு வறுமை ஒழிப்பு சங்கம் மற்றும் ஊராட்சி செயலர் ஆகியோர்களுக்கு கிராம ஊராட்சி வளர்ச்சி திட்டகுழு பயிற்சி முகாம் நேற்று நடைபெற்றது. முகாமிற்கு ஒன்றிய ஆணையர் அன்பரசு தலைமை வகித்து முகாமை துவக்கி வைத்து பேசியதாவது:ஒவ்வொரு ஊராட்சியைச் சேர்ந்த கிராம ஊராட்சி வளர்ச்சி திட்ட குழுவை சேர்ந்த 6 பேர் வீதம் 42 ஊராட்சியை சேர்ந்த 252 பேர் இப்பயிற்சியில் பங்கேற்றனர். இவர்கள் ஊராட்சியின் வறுமை ஒழிப்பு குழுவின் அங்கத்தினர்களாக இருந்து சமூக வரைபடம், வளவரை படம், தயார் செய்து நடை பயணம் மேற்கொண்டு அடிப்படை தகவல்களை சேகரித்து 5 வருடத்திற்கான திட்டம் தயாரிக்கின்றனர். பின்னர் அதனை கிராம சபா கூட்டத்தில் வைத்து ஒப்புதல் பெறப்பட்டு இதனை வளைதளத்தில் பதிவு செய்யப்பட்டு படிப்படியாக நிறைவேற்றி வைக்கப்படுகிறது என்றார். பயிற்றுநர்கள் செல்வம், விஜயா, வட்டார வளர்ச்சி அலுவலர்கள், ஒன்றிய பொறியாளர்கள் உள்பட பலர் கலந்து கொண்டனர்.