Nagapattinam - Dinakaran

ஞானபுரீஸ்வரர் கோயில் பெருவிழா

மயிலாடுதுறை, மே 19:  மயிலாடுதுறை  தருமபுரம் ஆதீனத்தில் ஞானாம்பிகை சமேத ஞானபுரீஸ்வரர் கோயில் உள்ளது.  இக்கோயிலில் ஆண்டுபெறுவிழா 11 நாட்கள் நடைபெறும். 11 நாட்களும்  திருநெறிய தெய்வத்தமிழ் மாநாடும் நடைபெறும். அதன்படி  ஞானபுரீஸ்வரர் கோயில் ஆண்டுபெருவிழா கொடியேற்றத்துடன் தொடங்கி வரும் (25ம்  தேதி) வரை நடைபெறுகிறது. அதனை முன்னிட்டு ஞானாம்பிகை சமேத  ஞானபுரீஸ்வரர் விநாயகர், முருகன் பஞ்சமூர்த்திகளுடன் சிறப்பு அலங்காரத்தில்  கொடிமரம் முன்பு எழுந்தருளினர். பின்னர் வழிபாடு நடத்தி சிறப்பு பூஜைகள் செய்து குருமகா  சன்னிதானம் முன்னிலையில் காலை 10.30 மணியளவில் கொடியேற்றம் நடைபெற்றது.  இதில் சிவபுரம்வேதசிவாகம பாடசாலை நிறுவனர் சாமிநாத சிவாச்சாரியார் உட்பட  திரளான பக்தர்கள் கலந்து கொண்டனர். 11 நாட்கள் நடைபெறும் பெருவிழா மற்றும்  திருநெறிய தெய்வத்தமிழ் மாநாட்டில் தினமும் சமயச்சொற்பொழிவு, கருத்தரங்கம்,  சமய பயிற்சி வகுப்பு, திருமுறை இன்னிசை நிகழ்ச்சிகள் நடைபெறுகிறது.

நாகையில் கஞ்சா விற்ற வாலிபர் கைது

கீழ்வேளூர், மே 19:நாகையில் கஞ்சா விற்ற வாலிபர் கைது செய்யப்பட்டனர். நாகை எஸ்.பி. விஜயகுமார் உத்தரவின் பேரில்  நாகை வெளிப்பாளையம் போலீசார் நாகை பப்ளிக் ஆபீஸ் ரோடு, தேவி தியேட்டர் பகுதியில் தீவிர ரோந்து பணியில்  ஈடுபட்டிருந்தனர். அப்போது  நாகை வெளிப்பாளையம் வ.ஊ.சி. தெருவை சேர்ந்த தேவதாஸ் மகன் தென்றல் (எ) தென்றலரசு (35) என்பவர் கஞ்சா விற்பனை செய்தது தெரியவந்தது. இதையடுத்து  தென்றலை கைது செய்த போலீசார் அவரிடமிருந்து 1.100 கி.கி. கஞ்சா பறிமுதல் செய்தனர்.

மாணவர் சேர்க்கைக்கு அரசு பள்ளிகளில் பணம் வசூலிப்பதாக குற்றச்சாட்டு பள்ளி கல்வித்துறை நடவடிக்கை எடுக்குமா?

வேதாண்யம், மே 19:  வேதாரண்யம் தாலுகாவில் அரசு  மேல் நிலைப்பள்ளியில் பிளஸ் 1 வகுப்பு மாணவர் சேர்க்கைக்கு பாடவாரியாக பணம்  வசூல் நடைபெறுவதாகவும், 10 மற்றும் 12ம் வகுப்பு மாணவ, மாணவிகளுக்கு மாற்று சான்றிதழ் வழங்கவும் பணம் வசூலிப்பதாக பெற்றோர்கள் குற்றம் சாட்டியுள்ளனர். வேதாரண்யம் தாலுகாவில் தலைஞாயிறு, வேதாரண்யம், தோப்புத்துறை, ஆயக்காரன்புலம், தாணிக்கோட்டகம், தகட்டூர், புஷ்பவனம், வௌ்ளப்பள்ளம், நாகக்குடையான் உள்ளிட்ட 20க்கும் மேற்பட்ட மேல்நிலைப்பள்ளிகள் உள்ளன. ஆண்டு தோறும் இப்பள்ளிகளில் 10 ஆரத்திற்கும் மேற்பட்ட மாணவ, மாணவிகள் படித்து வருகின்றனர். இந்த ஆண்டு 10ம் வகுப்பு தேரிய மாணவ, மாணவிகள் மேல்நிலைப்பள்ளியில் பிளஸ் 1 வகுப்பில் சேர்வதற்கு மேல்நிலைப்பள்ளிகளில் விண்ணப்பங்கள் வாங்கி வருகின்றனர். இதில் பல்வேறு பள்ளிகளில் கணினி அறிவியல், அறிவியல், உயிரியல், வணகவியல் உள்ளிட்ட பாடபிரிவுகளில் சேருவதற்கு 1000 முதல் 5000 வரை வசூல் நடைபெறுவதாக பெற்றோர்கள் குற்றம் சாட்டுகின்றனர். அதேபோல் பிளஸ் 2 முடித்தவர்களுக்கு மாற்று சான்றிதழ் பெறவும் பணம் வசூலிக்கப்படுகிறது. அரசு அனைத்து பள்ளிகளுக்கும் அனைத்து வசதிகளையும் அரசே செய்து கொடுக்கிறது. ஆனால் வசதி செய்து கொடுக்கும் அளவிற்கு மேல்நிலைப்பள்ளிக்கு போதுமான ஆசிரியர்களை நியமிப்பது இல்லை. பல  மேல்நிலைப்பள்ளிகளில் பல ஆண்டுகளாக பல பாடபிரிவுகளுக்கு ஆசிரியர் இல்லாமலே பெற்றோர் ஆசிரியர் கழகத்தின் மூலம் ஆசிரியர்களை நியமித்து  அவர்களுக்கு ஊதியம் பெற்றோர் ஆசிரியர் கழகத்தின் மூலம் மாணவ, மாணவிகளிடம் வசூல் செய்த தொகையிலிருந்து சம்பளத்தை வழங்குகின்றனர். அரசு தனியார் பள்ளிகளின் கட்டண  கொள்ளைகளை தடுக்க அனைத்தும் இலவசமாக வழங்கியும், ஆங்கில கல்வியை இலவசமாக வழங்கி வருகிறது.  ஆனால் போதுமான ஆசிரியர்கள் நியமிக்காததால் பல பள்ளிகளில் மாணவ, மாணவிகளிடம் இருந்து நன்கொடை வசூல் செய்யும் கட்டாயத்திற்கு பெற்றோர் ஆசிரியர் கழகத்தினர் தள்ளப்படுகின்றனர். இப்பகுதியில் உள்ள பெரும்பாலான பள்ளிகள் நூறு சதவீத தேர்ச்சி பெற்று வருகிறது. இருந்த போதிலும் ஆசிரியர் பற்றாக்குறையால் பெற்றோர் ஆசிரியர் கழகம் மூலம் நியமிக்கப்படும் பகுதிநேர ஆசிரியர்களுக்கு சம்பளம் வழங்குவதற்கு மாணவ, மாணவிகளிடம் பணம் வசூல் செய்வது மிகுந்த வேதனை அளிக்கிறது.  அரசு பள்ளியில் ஆங்கில வழி கல்வி சேருவதற்கும் பத்து மற்றும் பனிரெண்டாம் வகுப்பு பணம் வசூல் செய்யப்படுகிறது. இந்த விஷயத்தில் பள்ளிக்கல்வித்துறை ஆய்வு நடத்தி சம்பந்தப்பட்ட பள்ளி ஆசிரியர்கள் மீது நடவடிக்கை எடுக்க வேண்டும் என கோரிக்கை விடுக்கப்பட்டுள்ளது. இதுகுறித்து பள்ளி நிர்வாகத்தினர் கூறும் போது, பள்ளி வளர்ச்சி நிதிக்கு பயன்படுத்தவும் பல்வேறு பள்ளிகளில் மேல்நிலைபள்ளிகளுக்கு ஆசிரியர் பற்றாக்குறை இருப்பதால் பெற்றோர் ஆசிரியர் கழகத்தின் மூலம் ஆசிரியர்கள் நியமனம் செய்யப்பட்டு அவர்களுக்கு ஊதியம் வழங்கப்படுவதாகவும்   தெரிவித்தனர்.

தியாகராஜ சுவாமி கோயிலில் தேரோட்டம்

கீழ்வேளூர், மே19:  நாகை மாவட்டம் திருக்குவளையை அடுத்த திருவாய்மூர் நன்மாழியாள் சமேத தியாகராஜ சுவாமி கோயில்  வைகாசி விசாகப் பெருவிழா  கடந்த 8ம் தேதி அனுக்ஞை, விக்னேஷ்வர பூஜையுடன் தொடங்கியது. அதைத் தொடர்ந்து 9ம்தேதி கொடிஏற்றமும் நடைபெற்றது. அதைத் தொடர்ந்து தினம் தோறும் சுவாமி வீதி உலா காட்சி நடைபெற்றது.  12ம் தேதி தியாகராஜார் வசந்த விழா நடைபெற்றது.  முக்கிய நிகழ்ச்சியான திருத் தேர் திருவிழா நேற்று முன்தினம் காலை நடைபெற்றது. கீழ வீதியில் இருந்து தேர் புறப்பட்டு தெற்கு வீதி, மேலவீதி, வடக்கு வீதி வழியாக மீண்டும் கீழ வீதி வந்து சேர்ந்தது. தேரை ஏராளமான பக்தர்கள் வடம் பிடித்து இழுத்தனர். விழா ஏற்பாடுகளை கோயில் நிர்வாகிகள்,  அப்பர் சுவாமிகள் வழிப்பாட்டு  மன்றம், கிராமவாசிகள் செய்திருந்தனர்.

டிரைவர்களுக்குள் முன்விரோதம் 3 வேன் கண்ணாடிகளை அடித்து நொறுக்கிய 3 வாலிபர்கள் கைது நாகை பழைய பஸ் நிலையத்தில் பரபரப்பு

கீழ்வேளூர், மே 19:  நாகை பழைய பஸ் நிலையத்தில், டிரைவர்களுக்குள் ஏற்பட்ட முன்விரோதத்தில் 3 வேன் கண்ணாடிகளை அடித்து நொறுக்கிய 3 பேர் கைது செய்யப்பட்டனர். நாகை பழைய பேருந்து நிலையம் அருகே  மறைமலை அடிகளார் வாடகை ஓட்டுநர் உரிமையாளர் சங்கம் உள்ளது. இந்த சங்கத்தில் சுமார் 100க்கும் மேற்பட்ட வாடகை கார் மற்றும் வேன்கள் இயக்கப்பட்டு வருகிறது. இதேப்போல் சொந்த வாகனங்களை வைத்து ஓட்டும் ஓட்டுநர்கள்  கடந்த வாரம்  ரயில் நிலையம் முன் நெல்லுக்கடை மாரியம்மன் கோயில் திருவிழாவிற்கு மோர் பந்தல் வைக்க பந்தல் அமைத்துள்ளனர். அந்த பந்தலை உடன் பிரிக்காமல்  வைத்திருந்தனர். இது வாடகை  வேன், கார் நிறுத்துவதற்காக இடையூறாக இருந்தது. இதையடுத்து மறைமலை அடிகளார் சங்கத்தின்ர் கடந்த இரண்டு நாட்களுக்கு முன் கொட்டகையை அப்புறப்படுத்த கூறியுள்ளனர்.  இதனால் இரு தரப்புக்கும் இடையே முன்விரோதம் ஏற்பட்டதாக கூறப்படுகிறது.  இந்நிலையில் நேற்று முந்தினம் இரவு சில மர்ம நபர்கள் கற்கள், கடப்பாரை, அரிவாள் போன்ற ஆயுதங்களை கொண்டு பாலகிருஷ்ணன், காளிதாஸ், மகேந்தின் ஆகியோரின் 3 வேன்களின் கண்ணாடிகளை உடைத்தும், வேனில் பயணிகள் அமரும் இருக்கைகளை கிழித்தும், சங்க கொட்டகையின் மேற்கூரையை சேதப்படுத்தியும், சங்க பெயர் பலகையை உடைத்தும் சேதப்படுத்தினர். அதிகாலை வந்த ஓட்டுநர், உரிமையார்கள் பார்த்து அதிர்ச்சி அடைந்தனர். இதுகுறித்து மறைமலை அடிகளார் வாடகை ஓட்டுநர், உரிமையாளர் நல சங்கத்தின்  நிர்வாகிகள் சேதப்படுத்தியவர்கள் மீது உரிய நடவடிக்கை எடுக்க வேண்டும் என்று புகார் கொடுத்துள்ளனர். நாகை டவுன் காவல் நிலையத்தில் இருந்து 200 மீட்டர் தொலைவில் வாகனங்களை உடைத்து சேதப்படுத்தியும், சங்க கொட்டகையின் மேற்கூரையை சேதப்படுத்திய சம்பவம் பெரும் பரபரப்பை ஏற்படுத்தியுள்ளது. இந்த சம்பவத்தில், நாகை எஸ்.பி. விஜயகுமார் உத்தரவின் பேரில் ஏஎஸ்பி பத்திரிநாராயணன் மேற்பார்வையில் நாகை டவுன் சப்-இன்ஸ்பெக்டர் அடைக்கல ஆரோக்கியசாமி டேவிட் சங்க அலுவலகம் மற்றும் வேன்களை சேதப்படுத்திய  நாகை கீரைக்கொள்ளை தெருவை சேர்ந்த  காளிதாஸ் மகன் பாலுமகேந்திரன் (36), நாகை வடக்கு பால்பண்ணைச் சேரியை சேர்ந்த  கென்னடி மகன் காத்திக்குமார் (36),  நாகை சிக்கல்பத்தை சேர்ந்த கல்யாணசுந்தரம் மகன் கார்த்தி (19) ஆகிய மூன்று கார் டிரைவர்களை கைது செய்து விசாரித்து வருகின்றனர்.

7 மாதமாக போராட்டத்தில் ஈடுபட்ட ரேஷன் கடை ஊழியர்கள் பணிக்கு திரும்பினர்

காரைக்கால், மே 17: கடந்த 25 மாத சம்பளம் கேட்டு, 7 மாதமாக போராட்டத்தில் ஈடுபட்டு வந்த ரேஷன்கடை ஊழியர்கள் பணிக்கு திரும்பினர். புதுச்சேரி காரைக்கால் கூட்டுறவு ரேஷன்கடை ஊழியர்கள், தங்களுக்கு வழங்க வேண்டிய 25, மாத சம்பளத்தை கேட்டு, கடந்த 7 மாதமாக பலகட்ட போராட்டங்கள் நடத்தி வந்தனர். இந்நிலையில் புதுச்சேரி கூட்டுறவு துறை அமைச்சர் கந்தசாமி, பொதுமக்களுக்கு இலவச அரிசி வழங்க வேன்டிய சூழ்நிலையில் இருப்பதால், ஊழியர்கள் பணிக்கு திரும்ப வேண்டும் என்றும், முதல் கட்டமாக, 3 மாத ஊதியம் வழங்குவதாக உறுதி அளித்து சம்பளமும் போடப்பட்டது. இந்நிலையில், காரைக்காலில் நேற்று முன்தினம் 7 மாதமாக போராட்டத்தில் ஈடுபட்டு வந்த ரேஷன்கடை ஊழியர்கள், காரைக்கால் கூட்டுறவு ரேசன்கடை ஊழியர்கள் போராட்டகுழு சங்க செயலாளர் மனோகர் தலைமையில் பணிக்கு திரும்பினர். தொடர்ந்து, திருநள்ளாறு தொகுதியில் இலவச அரிசியை அவர்கள் வழங்கினர்.

திருநள்ளாறு தொகுதியில் சிவப்பு அட்டைதாரர்களுக்கு இலவச அரிசி விநியோகம்

காரைக்கால், மே 17:  காரைக்கால் திருநள்ளாறு தொகுதியில், சிவப்பு நிற ரேஷன் அட்டைதாரர்களுக்கு தலா 20 கிலோ இலவச அரிசி விநியோகம் தொடங்கியது. புதுச்சேரி அரசு மஞ்சள் மற்றும் சிகப்புநிற ரேஷன் அட்டைதாரர்களுக்கு மாதந்தோறும் 20 கிலோ இலவச அரிசி வழங்கி வந்தது. முதல்வர் மற்றும் கவர்னர்களுக்கிடையே ஏற்பட்ட அதிகார போட்டி காரணமாக, வறுமைக் கோட்டுக்கு கீழ் உள்ளோருக்கான சிவப்பு நிற குடும்ப அட்டைதாரர்களுக்கு, 20 கிலோ இலவச அரிசியும், மஞ்சள் நிற அட்டைதாரர்களுக்கு 10 கிலோ அரிசிக்கான தொகை வங்கியில் செலுத்தும் வகையில் கவர்னர் கடந்த ஒரு மாதத்துக்கு முன் அனுமதி அளித்தார். தேர்தல் நடத்தை விதியால் அரிசி வழங்குமுறை தடைபட்டது. தொடர்ந்து, தேர்தல் பிரசாரத்தின்போது தேர்தலுக்குப் பின் இலவச அரிசி வழங்கப்படும் என முதல்வர் நாராயணசாமி கூறியிருந்தார். தேர்தல் ஆணையமும் அரிசி வழங்குவதற்கு தடையில்லை எனக் கூறியதையடுத்து, கடலூர் மற்றும் காஞ்சிபுரம் பகுதியிலிருந்து புதுச்சேரி மாநிலத்துக்குத் தேவையான இலவச அரிசியை வரவழைக்க புதுச்சேரி அரசு ஏற்பாடு செய்தது. இதையொட்டி, காரைக்கால் மாவட்டத்தில் குடிமை பொருள் வழங்கல் துறையில் சுமார் 30 ஆயிரம்  சிவப்பு நிற அட்டை உள்ள நிலையில், இவர்களுக்கு ஜனவரி மாதத்துக்கான 20 கிலோ அரிசி வழங்கும் வகையில் முதல்கட்டமாக 50 டன் அரிசி காரைக்காலுக்கு கடந்த வாரம் வந்து சேர்ந்தது. முதல்கட்டமாக திருநள்ளாறு தொகுதிக்குட்பட்ட அம்பகரத்தூர், நல்லம்பல், செல்லூர், தேனூர், பேட்டை ஆகிய பகுதிகளில் நேற்று முன்தினம் சிவப்பு அட்டைக்கு 20 கிலோ வீதம் வழங்கப்பட்டது. மற்ற பகுதியினருக்கு படிப்படியாக அரிசி வருவதை கொண்டு வழங்கப்படும் என குடிமைப்பொருள் வழங்கல் துறை நிர்வாகம் தெரிவித்துள்ளது.

டெங்கு நோய் ஒழிப்பு உறுதிமொழி ஏற்பு

நாகை, மே17:  நாகை நகராட்சி எல்லையில் டெங்கு நோய் பரவாமல் இருக்க தீவிரமாக பணியாற்றி வருகின்றனர். இதன் ஒருபகுதியாக டெங்கு நோய் ஒழிப்பு உறுதிமொழி நாகை நகராட்சி அலுவலகத்தில் நேற்று எடுத்துக் கொள்ளப்பட்டது. நகராட்சி பொறுப்பு ஆணையர் ரவிச்சந்திரன் உத்தரவின்பேரில் சுற்றுப்புறத்தை தூய்மையாக வைப்போம். டெங்கு நோயை பரப்பும் ஏடிஎஸ் கொசுபுழுவை ஒழிப்போம். தேங்காய் சிறட்டை, தேவையில்லாத டயர்கள் உள்ளிட்டவற்றை அழிப்போம் என்பது உள்ளிட்ட உறுதிமொழிகள் எடுத்துக்கொள்ளப்பட்டது. நகர்நல அலுவலர் பிரபு, சுகாதார ஆய்வாளர்கள் அரசகுமார், செல்லத்துரை, சுகாதாரப் பணியாளர்கள் கலந்து கொண்டனர்.

திருநள்ளாறு தர்பாரண்யேஸ்வரர் கோயிலில் மழை வேண்டி வருண ஜெபம்

காரைக்கால், மே 17:  காரைக்கால் திருநள்ளாறு தர்பாரண்யேஸ்வரர் கோயிலில், சனி பகவான் தனி சன்னதி கொண்டு அருள்பாலித்து வருகிறார். இக்கோயிலில், மழை வேண்டி நேற்று வருண ஜெபம் நடத்தப்பட்டது. இதையொட்டி, கோயில் வளாகத்தில் உள்ள நந்தி பகவானை சுற்றி புதிதாக தொட்டி போன்று சுவர் கட்டப்பட்டு, விக்னேஸ்வர பூஜை நடத்தப்பட்டு மஞ்சள் பொடி, மாப்பொடி, திரவியப் பொடி உள்ளிட்ட பொருட்களால் நந்தி பகவானுக்கு சிறப்பு அபிஷேகம் செய்யப்பட்டது. தொடர்ந்து தேவாரம், வேதமந்திரங்கள், நாதஸ்வரம் இசைக்க கோயிலில் உள்ள கிணற்று நீரால் நந்தி பகவான் பாதி அளவு மூழ்கும் வகையில் நிரப்பப்பட்டு மகா தீபாராதனை காட்டப்பட்டது. காரைக்கால் சுந்தராம்பாள் சமேத கைலாசநாதர் கோயிலில் உலக நலன் மற்றும் மழை வேண்டி ஏகாதச ருத்ர ஹோமம் நடத்தப்படுவது வழக்கம்.  சுந்தராம்பாள்  உடனமர்  கைலாசநாதர் அர்த்த ஜாம வழிபாட்டு மன்றத்தினர் சார்பில் நடத்தப்படும் இந்நிகழ்வு நேற்று நடைபெற்றது. இந்நிகழ்ச்சியையொட்டி  காலை 5 மணிக்கு மகா கணபதி ஹோமம், 7 மணிக்கு விக்னேஸ்வர பூஜை தொடர்ந்து கலசங்கள் வைக்கப்பட்டு ஏகாதச ருத்ர ஹோமம் தொடங்கி நடைபெற்றது. பின்னர் மகா பூர்ணாஹுதி, தீபாராதனை நடைபெற்றது. ஹோமத்தில் வைக்கப்பட்ட புனிதநீரைக் கொண்டு சுவாமிகளுக்கு மகா ஸ்தபன அபிஷேகம் நடத்தப்பட்டது. நிகழ்ச்சியில், ஏராளாமான பக்தர்கள் கலந்து கொண்டனர்.

வேதாரண்யம் கடலோர காவல் நிலையத்தில் மண்ணில் புதைந்து வீணாகும் பழுதான ரோந்து வாகனங்கள்முறையாக ஏலம் விடப்படுமா?

வேதாரண்யம்,  மே 17: வேதாரண்யம் கடலோர காவல் நிலையத்தில் மண்ணில் புதைந்து வீணாகும் பழுதான ரோந்து வாகனங்களை முறையாக ஏலம் விட கோரிக்கை விடுக்கப்பட்டுள்ளது. வேதாரண்யத்தில் கடலோர காவல் குழுமம்   உள்ளது.  அங்கு ஒரு துணை கண்காணிப்பாளர், இன்ஸ்பெக்டர், காவலர்கள் என 20க்கும் மேற்பட்டோர் பணியாற்றி வந்தனர்.  இங்கு பணிபுரியும் காவலர்கள் நாள்தோறும் கடற்கரை ஓரங்களில் ரோந்து பணி மேற்கொண்டு அன்னியர்களின் நடமாட்டம் குறித்து கண்காணிப்பது, கடத்தல் தடுப்பு நடவடிக்கை மேற்கொள்வது உள்ளிட்ட பணிகளை செய்து வருகின்றனர்.  இவர்களுக்கு ரோந்து செல்வதற்காக வானங்கள் ஒதுக்கப்படுகின்றனர்.  தற்போது நாள்தோறும் மூன்று   வாகனங்கள் ரோந்து பணி மேற்கொண்டு வருகின்றனர்.  கடந்த 5 ஆண்டுகளுக்கு முன் ரோந்து பணி மேற்கொண்ட மூன்று வாகனங்கள் பழுதடைந்து விட்டது.   அதனை கடலோர காவல்படை துணைக் கண்காணிப்பு அலுவலர்  அலுவலகத்தின் அருகே நிறுத்தப்பட்டது.  தற்போது இந்த வாகனங்கள் நிறுத்தி உள்ள இடத்தில் கருவை காடுகள் மண்டி வாகனமே தெரியாத அளவிற்கு உள்ளது.  மேலும் வாகனம் முற்றிலும்  துருபிடித்து மக்கி சிதைந்து வருகிறது.  அரசு வாகனங்கள் வீணாகி மண்ணோடு மண்ணாக போவது மிகுந்த வேதனை அளிக்கிறது.   இந்த வாகனங்களை பழுதடைந்தவுடன், பழுதை நீக்கி பயன்பாட்டிற்கு கொண்டு வரலாம் அல்லது பயன்படுத்த முடியாவிட்டால் அரசின் வழக்கமான முடிவின் படி இந்த வாகனங்களை உரிய ஏலத்தில் விடலாம்.  அப்படி உரிய நேரத்தில் ஏலமிட்டால் ஏலத்தில எடுக்கும் பொதுமக்களுக்கும் பயனுள்ளதாக இருக்கும். அரசுக்கும் கூடுதல் வருமானம் கிடைக்க வேண்டும். எனவே கருவைக் காட்டுக்குள் புதையுண்டு போய்யுள்ள வானங்களை அகற்றி ஏலமிட  காவல் துறையினர் நடவடிக்கை எடுக்க வேண்டும் என சமூக ஆர்வலர்கள் கோரிக்கை விடுத்துள்ளனர்.

நாகையில் தரமற்ற பதநீர் விற்பனையா? அதிகாரி ஆய்வு

நாகை, மே17: நாகையில் விற்பனை செய்யப்பட்ட தரமற்ற பதநீர்களை உணவு பதுகாப்பு அலுவலர்கள் நேற்று ஆய்வு செய்தனர். நாகை அரசு தொழிற்பயிற்சி மையத்திற்கு அருகே விற்பனை செய்யப்படும் பதநீர் சுகாதாரமானதாகவும், தரமானதாகவும் இல்லை என்று புகார்கள் வந்தது. இதையடுத்து நாகை மாவட்ட உணவு பாதுகாப்பு நியமன அலுவலர் வரலெட்சுமி உத்தரவின்பேரில் நேற்று நாகை நகராட்சி உணவு பாதுகாப்பு அலுவலர் அன்பழகன்  ஆய்வு மேற்கொண்டார். சாலையோரத்தில் இரண்டு சக்கர வாகனத்தில் வைத்து விற்பனை செய்யப்பட்டது. அப்பொழுது திரும்ப உபயோகிக்கக் கூடாத, ஒருமுறை மட்டுமே பயன்படுத்தி தூக்கி எறியப்பட வேண்டிய பிளாஸ்டிக் பாட்டில்களில் வைத்து விற்பனை மேற்கொள்ளப்படுவது கண்டறியப்பட்டது. எனவே அதை அகற்றி விட்டு கண்ணாடி பாட்டில்களிலோ , எவர் சில்வர் பாத்திரங்களிலோ வைத்து விற்பனை செய்ய வேண்டும்.மேலும் உணவை கையாள்பவர் தன் சுத்தத்தை மேற்கொள்ள வேண்டும். இயற்கையாக கிடைக்கும் பதநீர் தவிர்த்து செயற்கையாக ஜீனி மற்றும் சாக்கரின் கலந்து பதநீர் போன்ற திரவத்தை தயாரித்து பதநீர் என கூறி விற்பனை செய்பவர்கள் மீது கடும் நடவடிக்கை எடுக்கப்படும். உணவு பாதுகாப்புத்துறை வழங்கும் பதிவுச் சான்று உடனே பெற்றுக்கொள்ள வேண்டும். தரமற்ற மற்றும் சுகாதரமற்ற முறையில் பதநீர் விற்பனை செய்யப்படுவது கண்டறியப்பட்டால் உணவு பாதுகாப்பு மற்றும் தர நிர்ணய சட்டத்தின்படி கடும் நடவடிக்கை எடுக்கப்படும் என்று கூறினார்.

நாகை நகராட்சி 16வது வார்டில் பாசிப்படர்ந்த குடிநீர் விநியோகம் சீரமைப்பு

நாகை, மே17: தினகரன் செய்தி எதிரொலியால் நாகையில் பாசிப்படர்ந்த குடிநீர் விநியோகம் செய்யும் பகுதிகள் ஆய்வு செய்யப்பட்டு அதிகாரிகள் அதை சீர்செய்தனர். நாகை நகராட்சிக்கு உட்பட்ட 16வது வார்டில் சங்கரன்பிள்ளையார் கோயில் தெரு, மேலவாக்காங்கரை தெரு, சிவன்மடவாளகம், சிவன் மேலவீதி உள்ளிட்ட பகுதிகளில் துர்நாற்றத்துடன் பாசிப்படர்ந்த குடிநீர் விநியோகம் செய்யப்படுவதாக தினகரன் நாளிதழில் படத்துடன் செய்தி கடந்த 14ம் தேதி வெளிவந்தது. இதன் எதிரொலியாக  பொறுப்பு ஆணையர் ரவிச்சந்திரன் உத்தரவின் பேரில் நகராட்சி பணியாளர்கள் சம்பவ இடத்திற்கு சென்று ஆய்வுகள் நடத்தினர். இதில் அந்த பகுதியில் வீடுகள் சீர் செய்தபோது குழி தோண்டியதில் குடிநீர் விநியோகம் செய்யும் குழாயில் லேசாக உடைப்பு ஏற்பட்டது கண்டுபிடிக்கப்பட்டது. அந்த உடைப்பில் கழிவு நீர் கலந்து பாசிப்படர்ந்த குடிநீர் செல்வது கண்டுபிடிக்கப்பட்டது. உடனே அந்த பகுதியில் குடிநீர் குழாயில் ஏற்பட்ட உடைப்பு சீர் செய்யப்பட்டது. மேலும் அங்கிருந்து விநியோகம் செய்யப்படும் குடிநீர் முழுவதும் வெளியேற்றப்பட்டு குழாய்கள் சுத்தம் செய்யப்பட்டு பொதுமக்களுக்கு நேற்று முதல் குடிநீர் சீராக விநியோகம் செய்யப்பட்டது.

மீனவர்களுக்கு வழங்குவது போல் ஐஸ்கட்டி உற்பத்தியாளர்களுக்கும் நிவாரணம் வழங்க வேண்டும் 10 ஆண்டு கால கோரிக்கைக்கு விரைவில் தீர்வு கிடைக்குமா?

நாகை, மே17: மீன்பிடி தடைகாலத்தில் மீனவர்களுக்கு நிவாரணம் வழங்குவதுபோல் மீன் பதப்படுத்தும் ஐஸ்கட்டி உற்பத்தியாளர்களுக்கும் நிவாரணம் வழங்க வேண்டும் என்று நாகை மாவட்ட ஐஸ் உற்பத்தியாளர்கள் எதிர்பார்க்கின்றனர். நாகை மாவட்டம் என்றால் முக்கியமான தொழில் கடல் சார்ந்தது ஆகும். மீன்பிடித்தல், படகுகள் தயாரித்தல், கருவாடு உற்பத்தி செய்தல், பிடித்த மீன்களை பதப்படுத்த ஐஸ் கட்டி உற்பத்தி செய்தல் உள்ளிட்டவையே நாகை மாவட்டத்தை பொருத்தவரை பிரதான தொழில் ஆகும். மீன்பிடி தொழிலை மட்டும் நம்பி நாகை மாவட்டத்தில் பழையார், தரங்கம்பாடி,  அக்கரைப்பேட்டை, கீச்சாங்குப்பம் மற்றும் கோடியக்கரை ஆகிய இடங்கள் உள்ளது. மீன்பிடிக்க ஆழ் கடல் பகுதிக்கு செல்லும் மீனவர்கள் கரைக்கு திரும்புவதற்கு குறைந்தபட்சம் 10 நாட்கள் ஆகும். அவ்வாறு ஆழ்கடலில் பிடிக்கப்படும் மீன்களை பதப்படுத்துவதற்காக கடலுக்கு செல்லும் போதே ஐஸ் கட்டிகளை மீனவர்கள் வாங்கி செல்வார்கள். இதற்காக நாகை மாவட்ட  கடலோர பகுதிகளில் 50க்கும் மேற்பட்ட ஐஸ் உற்பத்தி நிலையங்கள் இயங்கி வருகிறது. ஒவ்வொரு ஐஸ் உற்பத்தி நிலையில் இருந்து நாள் ஒன்றுக்கு 700 டன் வரை ஐஸ் உற்பத்தி செய்யப்படுகிறது. இதை விசைப்படகுகளுக்கு மொத்தமாக மீன்களை கொள்முதல் செய்யும் வியாபாரிகளுக்கு விற்பனை செய்யப்படுகிறது. மீன்கள் இனப்பெருக்க காலமான  ஏப்ரல் 15 முதல் ஜூன் 15 ம் தேதி வரை 61 நாட்களுக்கு விசைப்படகு மீனவர்கள் மீன்பிடிக்க தடைவிதிக்கப்பட்டுள்ளது. இந்த காலத்தில் மீனவர்கள் கடலுக்கு மீன்பிடிக்க செல்ல மாட்டார்கள். இந்த காலத்தில் கடல் சார்ந்த எல்லா தொழில்களும் பாதிக்கப்படும். இதில் ஐஸ் உற்பத்தி தொழில் அதிக அளவில் பாதிக்கப்படும். இந்த காலத்தில் மீனவர்களுக்கு நிவாரணம் வழங்குவது போல் ஐஸ் உற்பத்தியாளர்களுக்கும், அதை சார்ந்த தொழிலாளர்களுக்கும் நிவாரணம் வழங்க வேண்டும். மேலும் மானியத்துடன் வங்கி கடன் வழங்க வேண்டும் என்று தெரிவிக்கின்றனர்.

நாகையில்கொலை முயற்சி வழக்கில் சிக்கியவருக்கு குண்டாஸ்

நாகை, மே 16: நாகையில் கொலை முயற்சி வழக்கில் தொடர்புடைய வாலிபரை போலீசார் குண்டர் சட்டத்தின் கீழ் கைது செய்தனர். நாகை காடம்பாடி புதிய நம்பியார் நகர் சுனாமி குடியிருப்பை சேர்ந்தவர் ரவிக்குமார்(24). இவர் மீது நாகை உட்கோட்டத்தில் கொலை உள்ளிட்ட பல்வேறு வழக்குகள் உள்ளது. இந்நிலையில் நாகை வெளிப்பாளையம் போலீஸ் எல்லையில் கொலை முயற்சி வழக்கில் ஈடுபட்டார். இதையடுத்து அவரை குண்டர் சட்டத்தின் கீழ் கைது செய்ய நாகை எஸ்பி விஜயகுமார் பரிந்துரை செய்தார். இதையடுத்து கலெக்டர் சுரேஷ்குமார் உத்தரவின்படி ரவிக்குமாரை நேற்று முன்தினம் குண்டர் சட்டத்தின் கீழ் கைது செய்து திருச்சி மத்திய சிறையில் அடைத்தனர்.

இலங்கையில் குண்டு வெடிப்பு எதிரொலி வேதாரண்யம் கடலோர பகுதியில் போலீசார் தீவிர கண்காணிப்பு இலங்கை தமிழர்களின் வீடுகளிலும் சோதனை

வேதாரண்யம்,மே  16: வேதாரண்யம் தாலுகா கடற்கரையோர கிராமங்களில் இலங்கையில் குண்டு வெடிப்பு சமபவங்களின் எதிரொலியாக கடந்த 25 நாட்களாக தீவிர கண்காணிப்பு ரோந்து பணி நடைபெறுகிறது. இலங்கையில் ஈஸ்டர் பண்டிகை   அடுத்தடுத்து நடந்த 8 குண்டு வெடிப்பு சம்பவங்களில் 250க்கும் மேற்பட்டவர்கள் பலியானார்கள் 500க்கும் மேற்பட்டோர் படுகாயமடைந்தனர். ஈஸ்டர் பண்டிகையையொட்டி நடந்த இந்த குண்டு வெடிப்பு சம்பவங்களில் இலங்கையில் அசாதாரண சூழல் ஏற்பட்டுள்ளது.  இதன் எதிரொலியாக தமிழகத்தின் கடலோர பகுதிகளில் பாதுகாப்பு பலப்படுத்தப்பட்டுள்ளது. இலங்கைக்கு அருகாமையில் கோடியக்கரை இருப்பதால் குண்டுவெடிப்பு சம்பந்தப்பட்ட தீவிரவாதிகள் கோடியக்கரை கடலோர பகுதி வழியாக தமிழகத்துக்குள் ஊடுருவ வாய்ப்புள்ளதாக கருதி வேதாரண்யம், ஆறுகாட்டுதுறை, மணியன்தீவு, புஷ்பவனம், வௌ்ளப்பள்ளம், வேட்டைக்காரனிருப்பு, நாலுவேதபதி, பெரியகுத்தகை, கோடியக்கரை  உள்ளிட்ட  கடலோர கிராமங்களில் கடலோர காவல் குழும போலீசார், வேதாரண்யம் சட்ட ஒழுங்கு போலீசார் கடந்த 25 நாட்களாக தீவிர ரோந்து பணியில் ஈடுபட்டு வருகின்றனர்.மேலும் தமிழகத்தின் பல்வேறு மாவட்டங்களிலிருந்து கியூ  பிராஞ்ச்  போலீசார் கடற்கரை முழுவதும் இரவு பகலாக கண்காணிப்பு பணியில் ஈடுபட்டுள்ளனர். வேதாரண்யம் கடற்கரை வழியாக சந்தேகத்துக்கு இடமளிக்கும் வகையில்  ஆட்கள் வந்தாலும் அல்லது வெளிநாட்டு படகு நடமாட்டம் இருந்தாலோ உடனே காவல் துறைக்கு தகவல் தெரிவிக்க வேண்டும் என மீனவர்களிடம்    போலீசார் அறிவுறுத்தி உள்ளனர். மேலும் கோடியக்கரை, வேதாரண்யம், புஷ்பவனம், செம்போடை ஆகிய பகுதிகளில் பல ஆண்டுகளாக தங்கி உள்ள இலங்கை தமிழர்களின் வீடுகளில் உள்ள நபர்களின் ஆவணங்கள் மற்றும் அவர்களது விபரங்கள் சரியாக உள்ளனவா என்று சோதனை செய்தனர். மேலும் வேதாரண்யம் தாலுகாவிலுள்ள  11 சோதனை சாவடிகளிலும், வாகன தணிக்கையும் தீவிரமாக நடைபெறுகிறது.  சட்டம் ஒழுங்கு போலீசார், கடலோர காவல்படை போலீசார், கியூ பிராஞ்ச் போலீசார் என அனைத்து உளவுத்துறை போலீஸ்சார்களும் கடற்கரை பகுதிகளில் தொடர்ந்து கண்காணிப்பு பணிகளில் ஈடுபட்டு வருகின்றனர்.  தொடர் கண்காணிப்பில் வேதாரண்யம் கடற்கரை பகுதிகளில் இருப்பதால் இப்பகுதியில் பெரும் பரபரப்பு ஏற்பட்டுள்ளது.

அரசலாற்றில் மணல் கடத்திய வாலிபர் கைது

நாகை, மே16: நாகை அரசலாற்றில் மணல் கடத்திய வாலிபரை போலீசார் நேற்று கைது செய்தனர். நாகை மாவட்டத்தில் தொடர்ந்து மணல் கடத்தப்படுவதாக புகார்கள் வந்தது. இதையடுத்து எஸ்பி விஜயகுமார் உத்தரவின் பேரில் திட்டச்சேரி போலீசார் விச்சூர் அருகே நேற்று முன்தினம் இரவு வாகன தணிக் கையில் ஈடுபட்டிருந்தனர். அப்போது அந்த வழியாக வந்த மினிலோடு ஆட்டோவை நிறுத்தி சோதனை நடத்தினர். இதில் உரிய அனுமதியின்றி அரசலாற்றில் மணல் கடத்தி வந்தது தெரியவந்தது. இதையடுத்து போலீசார் வாகனத்தை பறிமுதல் செய்தனர். மேலும் வாகனத்தை ஓட்டி வந்த பொறக்குடி தேவாதிநல்லூரை சேர்ந்த கார்த்திக்(25) கைது செய்தனர்.

வேதாரண்யம் அருகே அரசு பஸ் நடத்துனரை தாக்கிய 2 பேருக்கு வலை

வேதாரண்யம், மே 16: வேதாரண்யம் அருகே அரசு பஸ் நடத்துனரை தாக்கிய இருவரை போலீசார் தேடி வருகின்றனர். வேதாரண்யம தாலுகா மணக்காடு பகுதியை சேர்ந்தவர் குமார் (52). இவர் வேதாரண்யம் அரசு போக்குவரத்து கழகத்தில் நடத்துனராக பணியாற்றி வருகிறார்.  சம்பவத்தன்று ஓய்வில் வீட்டிற்கு சென்றவர் அங்குள்ள கோயில் திருவிழாவில் பங்கேற்று விட்டு வீட்டிற்கு வரும்போது இருவர் பைக்கில் அதி வேகமாக கூட்டத்திற்கு இடையே வந்தனர். இதை பார்த்த குமார் பைக்கில் வேகமாக செல்லவேண்டாம் என கூறியுள்ளார். இதில் ஆத்திரமடைந்து பைக்கில் வந்த மணக்காட்டை சேர்ந்த விநோத், டேவிட் ஆகிய இருவரும் நேற்று  குமார் வீட்டிற்கு சென்று தூங்கி கொண்டிருந்த குமாரை மண்வெட்டி மரப்பிடியால் தாக்கியதாக கூறப்படுகிறது.இதில் காயம் அடைந்த குமார் திருத்துறைப்பூண்டி அரசு மருத்துவமனையில் சிகிச்சை பெற்று வருகிறார்.  புகாரின் பேரில் கரியாப்பட்டினம் போலீஸ்சார் வழக்கு பதிவு செய்து தலைமறைவான வினோத், டேவிட் ஆகிய இருவரையும் தேடி வருகின்றனர்.

மயிலாடுதுறை கல்வி மாவட்டத்தில் 314 பள்ளி வாகனங்கள் ஆய்வு

மயிலாடுதுறை, மே 16: மயிலாடுதுறை கல்வி மாவட்டத்தில் 314 பள்ளி வாகனங்கள் விதிமுறைகளுக்கு உட்பட்டு உள்ளதா என ஆர்டிஓ ஆய்வு செய்தார். மயிலாடுதுறை கோட்டத்திற்கு உட்பட்ட பள்ளி வாகனங்கள் விதிமுறைப்படி இயக்கப்படுகிறதா என்பது குறித்து ஆர்டிஓ தலைமையில் வட்டார போக்குவரத்து அலுவலர் ஆய்வு மேற்கொண்டார். மயிலாடுதுறை கோட்டத்தில் மயிலாடுதுறை, சீர்காழி மோட்டார் வாகன ஆய்வாளர் அலுவலகத்திற்கு உட்பட்ட பள்ளிகளில் 314 வாகனங்கள் உள்ளது. இந்த வாகனங்கள் விதிமுறைகளுக்கு உட்பட்டு இயக்கப்படுகிறதா என்பது குறித்து மயிலாடுதுறை அருகே மேலையூரில் தனியார் பள்ளி மைதானத்தில் வாகனங்கள் ஆய்வு செய்யப்பட்டது. மயிலாடுதுறை ஆர்.டி.ஓ.கண்மணி தலைமையில் வட்டார போக்குவரத்து அலுவலர் அழகிரிசாமி, ஆய்வாளர்கள் சண்முகவேல், ராம்குமார் ஆகியோர் பள்ளி வாகனங்களில் முதல் உதவி பெட்டிகள், அவசரகால வழிகள் சரியாக இருக்கிறதா, தீயணைப்பு கருவிகள் உள்ளதா மற்றும் முறையாக பராமரிக்கப்பட்டு வருகிறதா என்பது குறித்து ஆய்வு செய்தனர்.  இதுகுறித்து ஆர்டிஓ அழகிரிசாமி கூறுகையில், மயிலாடுதுறை கோட்டத்திற்கு உட்பட்ட பள்ளிகளில் 314 வாகனங்கள் உள்ளது. இதில் 30 வாகனங்கள் பராமரிப்பு பணிகள் நடப்பதால் நேற்று 284 வாகனங்கள் ஆய்வு செய்யப்பட்டது. இதில் 26 வாகனங்களில் சில குறைபாடுகள் இருப்பது கண்டறியப்பட்டு நோட்டீஸ் வழங்கப்பட்டுள்ளது. இந்த 26 வாகனங்களில் உள்ள குறைபாடுகள் சரிசெய்யப்பட்டு வரும் 30ம் தேதிக்குள் மறுஆய்வு செய்யப்படும் என்றார்.

நாகை நீலாயதாட்சி அம்மன் கோயிலில் தேரோட்டம் திரளான பக்தர்கள் திரண்டனர்

நாகை,மே 16:  நாகை நீலாயதாட்சியம்மன் கோயில் வைகாசி விசாக தேரோட்டம் நேற்று நடந்தது. இதில் ஏராளமான பக்தர்கள் ஆரூரா, தியாகேசா என கோஷமிட்டு வடம் பிடித்து தேர் இழுத்தனர். சப்த விடங்களில் ஒன்றான நாகை காயரோகண சுவாமி உடனுறை நீலாயதாட்சியம்மன் கோயில் வைகாசி விசாக திருவிழா கடந்த 1ம் தேதி கொடியேற்றத்துடன் தொடங்கியது. இதை தொடர்ந்து விநாயகர் திருவிழா, சுப்பிரமணியர் திருவிழா சந்திரசேகர் திருவிழா ஆகியவை நடந்தது. இவ்வாறு தொடர்ந்து 14 நாட்கள் திருவிழா விமரிசையாக நடந்தது. விழாவின் முக்கிய நிகழ்ச்சியான 15ம் நாள் திருவிழாவில் திருத்தேரோட்டம் நேற்று காலை நடந்தது. இதில் தியாகேசர் உடனுறை நீலோத்தம்மாள் எழுத்தருளினர். இதை தொடர்ந்து பக்தர்கள் தேரை வடம்பிடித்து இழுத்தனர். அப்போது தியாகேசா, அரூரா என்று கோஷங்கள் எழுப்பினர். தொடர்ந்து பக்தர்கள் தேரில் அமர்ந்திருந்த தியாகராஜ சுவாமிக்கு பூஜைகள் செய்தனர். தேரின் முன்பு சிவ வாத்தியம் முழங்க நாகையின் முக்கிய வீதிகள் வழியாக ஆடி அசைந்து சென்றது. விழாவிற்கு நாகை, காரைக்கால் மற்றும் திருவாரூர் மாவட்டங்களில் இருந்து ஏராளமான பக்தர்கள் கலந்து கொண்டு அம்மனை தரிசித்தனர்.

கொள்ளிடம் அருகே மகாராஜபுரத்தில் குடிநீர் பஞ்சம் தீர்க்கப்படுமா? பொதுமக்கள் எதிர்பார்ப்பு

கொள்ளிடம், மே 16: நாகை மாவட்டம் கொள்ளிடம் ஒன்றியத்தை சேர்ந்த மகாராஜபுரம் ஊராட்சியில் கண்ணுக்கினியனார்கோயில், மெய்யாப்புக்கோட்டகம், குட்டியாண்டிதோப்பு, தேவநல்லூர், மகாராஜபுரம் ஆகிய கிராமங்கள் உள்ளன. இங்கு சுமார் 2 ஆயிரத்திற்கும் மேற்பட்ட குடியிருப்புகளில், 3500க்கும் மேற்பட்ட குடும்பங்களை சேர்ந்தவர்கள் வசித்து வருகின்றனர். கண்ணுக்கினியனார் கிராமத்தில் உள்ள ஒரு லட்சம் லிட்டர் கொள்ளளவு கொண்ட குடிநீர்த் தொட்டியிலும், தேவநல்லூரில் 25 ஆயிரம் லிட்டர் கொள்ளளவு கொண்ட மேல்நிலைநீர்த்தேக்கத் தொட்டியிலும்  கூட்டுகுடிநீர்த் திட்டத்தின் மூலம் வரும் நீர் அழுத்தம் குறைவின் காரணமாக தண்ணீர் தொட்டிகளில் ஏற்றி தேக்கி வைக்க முடியாத நிலை ஏற்பட்டுள்ளது. இதே போல் குட்டியாண்டிதோப்பு கிராமத்தில் புதியதாக 25 ஆயிரம் லிட்டர் கொள்ளளவு கொண்ட புதிய நீர்த்தேக்க தொட்டி 3 வருடங்களுக்கும் முன் கட்டப்பட்டு இதுவரை செயல்படாமல் உள்ளது. இதனால் மகாராஜபுரம் ஊராட்சியை சேர்ந்த அனைத்து கிராம மக்களும் குடிநீரின்றி தவித்து வருகின்றனர். இக்கிராமங்களை சேர்ந்த ஆண்கள் மற்றும் பெண்கள் தினந்தோறும் காலை மற்றும் வெயிலில் 2 கிலோ மீட்டர் தூரத்துக்கு நடந்து சென்று மாதானம், வடபாதி மற்றும் ஆலங்காடு ஆகிய கிராமங்களிலிருந்து பிளாஸ்டிக் குடங்களில் தண்ணீர் எடுத்து வந்து பயன்படுத்தி வருகின்றனர். இது குறித்து முன்னாள் ஊராட்சிமன்றர் தலைவருமான பட்டுரோஜா கூறுகையில், மகாராஜபுரம் ஊராட்சியில் கடும் குடிநீர்ப்பற்றாக்குறை ஏற்பட்டுள்ளதால் சிறப்பு கவனம் செலுத்தி குடிநீர் பஞ்சத்தை தீர்க்க அதிகாரிகள் உடனே நடவடிக்கை எடுக்க வேண்டும். மேலும் வடகால், திருக்கருகாவூர், கீராநல்லூர், கடவாசல், வழுதலைக்குடி, திருமுல்லைவாசல், பழையாறு அளக்குடி உள்ளிட்ட கடலோர கிராமங்களிலும் ஏற்பட்டுள்ள குடிநீர் பற்றாக்குறையை சமாளிக்க உள்ளாட்சித்துறை மூலம் சிறப்பு கவனம் செலுத்தி போர்க்கால நடவடிக்கை எடுக்க வேண்டும். இதுகுறித்து மாவட்ட கலெக்டருக்கு கோரிக்கை மனு அனுப்பியுள்ளதாகவும் தெரிவித்தார்.