Namakkal - Dinakaran

நாமக்கல் நாடாளுமன்ற தொகுதியில் 2.65 லட்சம் வாக்கு வித்தியாசத்தில் கொமதேக வேட்பாளர் வெற்றி

நாமக்கல், மே 24: நாமக்கல் நாடாளுமன்ற தொகுதியில் திமுக கூட்டணி சார்பில் போட்டியிட்ட கொமதேக வேட்பாளர் சின்ராஜ், அவரை எதிர்த்து போட்டியிட்ட அதிமுக வேட்பாளர் காளியப்பனை விட 2.65 லட்சம் வாக்குகள் கூடுதலாக பெற்று வெற்றிபெற்றார். நாமக்கல் நாடளுமன்ற தொகுதிக்கு, கடந்த மாதம் 18ம் தேதி தேர்தல் நடைபெற்றது. நாமக்கல் நாடாளுமன்ற தொகுதியில் நாமக்கல், ராசிபுரம், சேந்தமங்கலம், திருச்செங்கோடு, பரமத்திவேலூர், சேலம் மாவட்டத்தில் உள்ள சங்ககிரி என 6 சட்டமன்ற தொகுதிகள் உள்ளன. நாமக்கல் நாடாளுமன்ற தொகுதியில் 5,55,803 ஆண் வாக்காளர்கள், 5,73,764 பெண் வாக்காளர்கள், 43 மூன்றாம் பாலின வாக்காளர்கள் என மொத்தம் 14,13,246 பேர் உள்ளனர்.நாமக்கல் தொகுதியில் திமுக கூட்டணியில் கொமதேகவை சேர்ந்த சின்ராஜ்,  காளியப்பன் (அதிமுக), சாமிநாதன் (அமமுக), தங்கவேல் (மநீம), பாஸ்கர் (நாம் தமிழர் கட்சி) மற்றும் 24 சுயேச்சைகள் என 29 பேர் போட்டியிட்டனர். கடந்த மாதம் நடைபெற்ற தேர்தலில் தபால் வாக்குகள் உள்பட 11,33,984  வாக்குகள் பதிவாகியிருந்தது. தேர்தலுக்கு பின் வாக்கு இயந்திரங்கள், திருச்செங்கோடு விவேகானந்தா கல்லூரியில் உள்ள மையத்தில் வைக்கப்பட்டிருந்தது. நேற்று காலை மாவட்ட தேர்தல் அலுவலர் கலெக்டர் ஆசியாமரியம், தேர்தல் பொது பார்வையாளர் வாணி மோகன் மற்றும் அரசியல் கட்சியின் வேட்பாளர்கள், சுயேட்சை வேட்பாளர்கள் முன்னிலையில் திறக்கப்பட்டு வாக்கு எண்ணிக்கை நடந்தது. வாக்கு எண்ணிக்கை 23 சுற்றுகள் நடந்தது. இதில் திமுக கூட்டணி வேட்பாளர் சின்ராஜ் (கொமதேக) 6,26,293 வாக்குகள் பெற்றார். இவரை எதிர்த்து போட்டியிட்ட அதிமுக வேட்பாளர் காளியப்பன் 3,61,293 வாக்குகளே பெற்றார். திமுக வேட்பாளர் சின்ராஜ் 2,65,000 வாக்குகள் கூடுதலாக பெற்று வெற்றி பெற்றார். தவிர, நாம் தமிழர் கட்சி வேட்பாளர் பாஸ்கர் 38,531  வாக்குகளும், மக்கள் நீதி மய்யம் தங்கவேல் 30,947 வாக்குகளும், அமமுக  வேட்பாளர் சாமிநாதன் 23,347 வாக்குகளும் பெற்றிருந்தனர். நோட்டாவுக்கு 15,073 வாக்குகள் பதிவாகியிருந்தது. வாக்கு எண்ணிக்கை முடிந்ததை அடுத்து, வேட்பாளர் சின்ராஜூக்கு வெற்றி பெற்றதற்கான சான்றிதழ் வழங்கப்பட்டது. நாமக்கல் நாடாளுமன்ற தேர்தல் பொது பார்வையாளர் வாணி மோகன் முன்னிலையில், மாவட்ட தேர்தல் அலுவலர் கலெக்டர் ஆசியா மரியம் சான்றிதழை வழங்கினர். அதை வெற்றி பெற்ற வேட்பாளர் சின்ராஜ் பெற்றுக்கொண்டார். அவருடன் கொமதேக பொதுச்செயலாளர் ஈஸ்வரன், நாமக்கல் கிழக்கு மாவட்ட திமுக பொறுப்பாளர் காந்திசெல்வன், சூரியமூர்த்தி மற்றும் கட்சியினர் உடனிருந்தனர்.

கொமதேக வேட்பாளர் வெற்றி சேந்தமங்கலத்தில் திமுகவினர் பட்டாசு வெடித்து கொண்டாட்டம்

சேந்தமங்கலம், மே 24:  நாமக்கல் நாடாளுமன்ற தொகுதியில் திமுக கூட்டணி சார்பில் போட்டியிட்ட கொமதேக வேட்பாளர் சின்ராஜ், அதிமுக வேட்பாளரை விட 2.65 லட்சம் வாக்குகள் அதிகம் பெற்று வெற்றிபெற்றார். இதையடுத்து சேந்தமங்கலத்தில் திமுக மற்றும் கூட்டணி கட்சியினர் பட்டாசு வெடித்து கொண்டாடினர்.நாடாளுமன்ற தேர்தலில் திமுக கூட்டணி மகத்தான வெற்றி பெற்றது. நாமக்கல் நாடாளுமன்ற தொகுதியில் திமுக சார்பில் போட்டியிட்ட கொமதேக வேட்பாளர் சின்ராஜ், அதிமுக வேட்பாளர் காளியப்பனை விட 2.65 லட்சம் வாக்குகள் கூடுதலாக பெற்று வெற்றி பெற்றார். இதையடுத்து சேந்தமங்கலம், காளப்பநாயக்கன்பட்டி, கொல்லிமலை சோளக்காடு ஆகிய பகுதிகளில் திமுக மற்றும் கூட்டணி கட்சியினர் கூடி பட்டாசு வெடித்தும், பொது மக்களுக்கு இனிப்பு வழங்கி கொண்டாடினர்.இந்நிகழ்ச்சியில் முன்னாள் எம்எல்ஏ பொன்னுசாமி, ஒன்றிய செயலாளர் அசோக்குமார், நகர செயலாளர் தனபாலன், பேரூர் செயலாளர் நடேசன், கொல்லிமலை ஒன்றிய செயலாளர் பழனிமுருகன் உள்ளிட்ட பலா; கலந்து கொண்டனர். புதன்சந்தையில் ஒன்றிய பொறுப்பாளர் துரை ராமசாமி, புதுச்சத்திரத்தில் வடக்கு ஒன்றிய பொறுப்பாளர் கௌதம் ஆகியோர் தலைமையில் திமுக மற்றும் கூட்டணி கட்சியினர் பட்டாசு வெடித்தும், பொதுமக்களுக்கு இனிப்புகள் வழங்கி கொண்டாடினர்.

நாமக்கல் தொகுதியில் சுற்று வாரியாக ஓட்டு விவரம்

நாமக்கல், மே 24: நாமக்கல் நாடாளுமன்ற தேர்தல் வாக்கு எண்ணிக்கையின் போது, தொடர்ந்து 22 சுற்றுகளில் முன்னிலை வகித்த திமுக கூட்டணி கொமதேக வேட்பாளர் சின்ராஜ், தன்னை எதிர்த்து போட்டியிட்ட அதிமுக வேட்பாளரை 2.65 லட்சம் ஓட்டுகள் வித்தியாசத்தில் தோற்கடித்து வெற்றி பெற்றார்.நாமக்கல் நாடாளுமன்ற தேர்தலில் திமுக கூட்டணி சார்பில் கொமதேக வேட்பாளர் சின்ராஜ், அதிமுக சார்பில் காளியப்பன் உள்பட 29 பேர் போட்டியிட்டனர். நேற்று காலை 8 மணிக்கு வாக்கு எண்ணிக்கை தொடங்கியது. முதல் சுற்று முடிவில் திமுக வேட்பாளர் சின்ராஜ் (கொமதேக)  33,022 வாக்குகளும், அதிமுக வேட்பாளர் காளியப்பன் 17,916 வாக்கும் பெற்றார். இரண்டாவது சுற்றில் திமுக சின்ராஜ் 33,181, அதிமுக காளியப்பன் 18,680, முன்றாவது சுற்றில் திமுக சின்ராஜ் 32,298, அதிமுக காளியப்பன் 18,126,  நான்காவது சுற்றில் திமுக சின்ராஜ் 32,720,  அதிமுக  காளியப்பன் 18,936, 5வது சுற்றில் திமுக சின்ராஜ் 29,805, அதிமுக காளியப்பன் 19,519, 6வது சுற்றில் திமுக சின்ராஜ் 32,726, அதிமுக காளியப்பன் 19,393  வாக்குகள் பெற்றனர். 7வது சுற்றில் திமுக சின்ராஜ் 31,496, அதிமுக காளியப்பன் 17,209, 8வது சுற்றில் திமுக சின்ராஜ் 29,727, அதிமுக காளியப்பன் 1 ,707 வாக்குகளும் பெற்றார். அப்போது அதிமுக காளியப்பனை விட, திமுக சின்ராஜ் 1,09,489 வாக்குகள் கூடுதலாக பெற்று முன்னிலை வகித்தார். 9வது சுற்றில் திமுக சின்ராஜ் 31,143, அதிமுக காளியப்பன் 16,923,  10வது சுற்றில் திமுக சின்ராஜ் 31,558, அதிமுக காளியப்பன் 17,313,  11வது சுற்றில் திமுக சின்ராஜ் 29,631, அதிமுக காளியப்பன் 17,822, 12வது சுற்றில் திமுக சின்ராஜ் 30,905, அதிமுக காளியப்பன் 20,117, 13வது சுற்றில் திமுக சின்ராஜ் 32,477, அதிமுக காளியப்பன் 18,489 வாக்குகளும் பெற்றிருந்தனர்.14வது சுற்றில் திமுக சின்ராஜ் 31,671, அதிமுக காளியப்பன் 17,441ம் பெற்றார். அப்போது அதிமுக காளியப்பனை விட, சின்ராஜ் 2,01,230 வாக்குகள் கூடுதலாக பெற்றிருந்தார். தொடர்ந்து 15வது சுற்றில் திமுக சின்ராஜ் 29,154, அதிமுக காளியப்பன் 17,597ம், 16வது சுற்றில் திமுக சின்ராஜ் 33,189, அதிமுக காளியப்பன் 18,349ம் பெற்றனர்.17வது சுற்றில் திமுக சின்ராஜ் 30,323, அதிமுக காளியப்பன் 16,651ம், 18வது சுற்றில் திமுக சின்ராஜ்  33,175, அதிமுக காளியப்பன் 18,262ம், 19வது சுற்றில் திமுக சின்ராஜ் 24,798, அதிமுக காளியப்பன் 14,400, 20வது சுற்றில் திமுக சின்ராஜ் 16,508, அதிமுக காளியப்பன் 10,443, 21வது சுற்றில் திமுக சின்ராஜ் 7,697, அதிமுக காளியப்பன் 5,581, 22வது சுற்றில் திமுக சின்ராஜ் 4,628, அதிமுக காளியப்பன் 4,175, 23வது சுற்றில் திமுக சின்ராஜ் 886, அதிமுக காளியப்பன் 994 வாக்குகளும் பெற்றனர்.வாக்கு எண்ணிக்கை நடந்த 23 சுற்றில் 22 சுற்றுகளில் திமுக வேட்பாளர் சின்ராஜ் முன்னிலையில் இருந்து வந்தார். இறுதிச்சுற்றில் மட்டும் அதிமுக காளியப்பன் 108 வாக்குகள் கூடுதலாக பெற்றிருந்தார். ஆனால் ஒட்டு மொத்தமாக வேட்பாளர் சின்ராஜ், 2.65 லட்சம் வாக்குகள் கூடுதலாக பெற்று, அதிமுக வேட்பாளரை படுதோல்வி அடையச்செய்தார்.

கட்சி பாகுபாடின்றி பணியாற்றுவேன்

நாமக்கல், மே 24: தொகுதியின் வளர்ச்சிக்காக  சாதி, மதம், கட்சி பாகுபாடு இன்றி பணியாற்றுவேன் என நாமக்கல் நாடாளுமன்ற தொகுதியில் வெற்றி பெற்ற கொமதேக வேட்பாளர் சின்ராஜ் உறுதியளித்தார்.  நாமக்கல் நாடாளுமன்ற தொகுதியில், திமுக கூட்டணியில் போட்டியிட்ட கொங்குநாடு மக்கள் தேசிய கட்சி வேட்பாளர் சின்ராஜ், 6 லட்சத்து 26 ஆயிரத்து 293 வாக்குகள் பெற்று வெற்றி பெற்றார். கட்சியின் பொதுச்செயலாளர் ஈஸ்வரன், கிழக்கு மாவட்ட திமுக பொறுப்பாளர் காந்திசெல்வன் ஆகியோருடன் சென்று, மாவட்ட தேர்தல் அலுவலர் கலெக்டர் ஆசியாமரியத்திடம், வெற்றி சான்றிதழ் பெற்ற சின்ராஜ் கூறியதாவது: தேர்தல் நேரத்தின் போது அளித்த அனைத்து வாக்குறுதிகளையும் நிறைவேற்றுவேன். நாமக்கல் நாடாளுமன்ற தொகுதியில் உள்ள 6 சட்டமன்ற தொகுதியிலும், மக்கள் பிரச்னைகள் குறித்து குழு அமைத்து, ஆராய்ந்து அவற்றை நிறைவேற்றுவேன். குறிப்பாக குடிநீர் பிரச்னை, சாலை வசதிக்கு முக்கியத்துவம் அளிக்கப்படும். எம்பி பதவி மூலம் எனக்கு கிடைக்கும் சம்பளத்தை, தொகுதியின் வளர்ச்சிக்கு பயன்படுத்துவேன். மத்திய, மாநில அரசுகளை வலியுறுத்தி, தொகுதியின் வளர்ச்சிக்காக பாடுபடுவேன். சாதி, மதம், கட்சி பாகுபாடு இன்றி பணியாற்றுவேன். எனக்கு வாக்களித்த பொதுமக்கள் மற்றும் வெற்றிக்கு பாடுபட்ட கூட்டணி கட்சியினர் அனைவருக்கும் நன்றி தெரிவித்துக்கொள்கிறேன். இவ்வாறு சின்ராஜ் தெரிவித்தார். சின்ராஜ் வெற்றி பெற்றதை தொடர்ந்து, திமுக மற்றும் கூட்டணி கட்சியினர்  மாவட்டத்தின் பல்வேறு இடங்களில் பட்டாசு வெடித்து கொண்டாடினர். திருச்செங்கோடு வாக்கு எண்ணும் மையத்தில் இருந்து காரில் நாமக்கல்லுக்கு வந்த சின்ராஜூக்கு, வழிநெடுக பொதுமக்கள் மற்றும் கூட்டணி கட்சியினர் உறசாக வரவேற்பு அளித்தனர்.

நாமகிரிப்பேட்டையில் சாமந்தி பூ விளைச்சல் அமோகம்

நாமகிரிப்பேட்டை, மே 23:  நாமகிரிப்பேட்டை சுற்றுவட்டார பகுதியில் சாமந்தி பூ விளைச்சல் அமோகமாக உள்ளது. ஆனால் மார்க்கெட்டில் விலை சரிந்ததால் விவசாயிகள் வேதனையடைந்துள்ளனர். நாமகிரிப்பேட்டை, மெட்டால்லா, செல்லிப்பாளையம், ஆயில்பட்டி, பிலிப்பாக்குட்டை, திம்மநாயக்கன்பட்டி, வேப்பிலைக்குட்டை ஆகிய பகுதிகளை சேர்ந்த விவசாயிகள் அதிக அளவில் சாமந்தி பூ  சாகுபடி செய்துள்ளனர். இங்கு விளையும் சாமந்தி பூக்களை சேலம், நாமக்கல், திருச்சி, ஈரோடு, ஆத்தூர் ஆகிய பகுதிகளுக்கு விற்பனைக்கு அனுப்புகின்றனர். தற்போது மார்க்கெட்டில் சாமந்தி பூக்களின் விலை சரிந்துள்ளதால் விவசாயிகள் கவலையடைந்துள்ளனர். இதுகுறித்து விவசாயி ஆனந்த்  கூறியதாவது: சாமந்தி பூ ஒரு ஏக்கரில் சாகுபடி செய்ய ₹60 ஆயிரம் முதல் ₹70 ஆயிரம்  வரை செலவாகிறது. நாற்று நட்டு 5 மாதத்தில் செடியில் பூக்கள் அறுவடைக்கு தயாராகும். ஒரு ஏக்கரில் உள்ள செடியில் நாளொன்றுக்கு 400 முதல் 450 கிலோ வரை சாமந்திபூவை, தொடர்ந்து 3  மாதத்திற்கு அறுவடை செய்யலாம். தற்போது சாமந்தி பூ விளைச்சல் அமோகமாக உள்ளது. ஆனால், சேலம் பூ மார்க்கெட்டில் கடந்த வாரம் ₹60க்கு விற்பனையான ஒரு கிலோ சாமந்தி பூ, தற்போது ₹20க்கு தான் விற்பனை ஆகிறது. தவிர, பூ மார்க்கெட்டுக்கு 10 சதவீதம்  கமிஷன், வண்டி வாடகை, பூ பறிக்க ஆட்கூலி என ஒரு கிலோ சாமந்தி பூவுக்கு ₹12  வரை கொடுக்க வேண்டியுள்ளதால் விலை கட்டுப்படியாவதில்லை. இவ்வாறு அவர் தெரிவித்தார்.

புதன்சந்தையில் ஆடுகள் விலை சரிவு

சேந்தமங்கலம், மே 23:  நாமக்கல் மாவட்டம், புதன்சந்தையில் வாரந்தோறும் ஆட்டுச்சந்தை கூடுகிறது. சுற்றுவட்டார கிராமங்களை சேர்ந்த விவசாயிகள் மற்றும் கால்நடை வளர்ப்போர் ஆடு, கிடா மற்றும் குட்டி ஆகியவற்றை சந்தைக்கு விற்பனைக்கு ஓட்டி வருகின்றனர். இதை வாங்க நாமக்கல், சேந்தமங்கலம், எருமப்பட்டி, பவித்திரம், புதுச்சத்திரம் உள்ளிட்ட பல்வேறு பகுதிகளில் இருந்து வியாபாரிகள் மற்றும் இறைச்சிக் கடைக்காரர்கள் வருகின்றனர். நேற்று கூடிய சந்தைக்கு அதிக அளவில் ஆடுகள் விற்பனைக்கு  வந்திருந்தது. கடந்த வாரம் ₹5,500க்கும் விற்பனையான 10 கிலோ எடைகொண்ட இறைச்சி ஆடு,  இந்த வாரம் ₹5,200க்கும், ₹4,700க்கு விற்பனையான வளர்ப்பு ஆடு, இந்த வாரம் ₹4,400க்கும், பிறந்து ஒருமாதமே ஆன பெண் குட்டி ஆடு ₹1,100க்கும், கிடா குட்டி ₹1,200க்கும் விற்பனையானது. புதுச்சத்திரம் சுற்றுவட்டார பகுதிகளில் உள்ள மாரியம்மன் கோயில்களில் பண்டிகை நிறைவடைந்ததால், நேற்று சந்தையில் ஆடுகள் விலை ₹300 வரை விலை குறைந்ததாக வியாபாரிகள் தெரிவித்தனர்.

அடிக்கடி ஏற்படும் விபத்துக்களை தடுக்க ராசிபுரம் ரயில்வே மேம்பாலத்தில் சென்டர்மீடியன் அமைக்க கோரிக்கை

ராசிபுரம்,மே 23: ராசிபுரம் ரயில்வே மேம்பாலத்தில் சென்டர்மீடியன் அமைக்காததால், தாறுமாறாக செல்லும் வாகனங்களால் அடிக்கடி விபத்துக்கள் ஏற்படுகிறது. சேலம்-நாமக்கல் ரயில் பாதை, ராசிபுரம் வழியாக செல்கிறது. இதையடுத்து ராசிபுரம்- சேலம் மற்றும் ராசிபுரம்  நாமக்கல் சாலைகளில் 2 இடங்களில் ரயில்வே மேம்பாலம் கட்டப்பட்டுள்ளது. இந்த இரண்டு மேம்பாலங்கள் மிகவும் குறுகலாகவும்,  அபாயகரமான வளைவுகளையும் கொண்டுள்ளன. ரயில்வே மேம்பாலத்தின் மீது டூவீலர் முதல் பஸ், லாரி என கனரக வாகனங்கள் அனைத்தும் அதிவேகமாகவும், தாறுமாறாகவும் வந்து செல்வதால் அடிக்கடி விபத்துக்கள் ஏற்படுகிறது. மேலும், பாலத்தின் மேலே எதிரே வரும் வாகனங்கள் தெரியாத அளவிற்கு மேடு பள்ளமாக உள்ளது. பாலத்தில் ஏற்படும் விபத்துக்களை தடுக்க, சென்டர் மீடியன் அமைக்க வேண்டும் என பலமுறை கோரிக்கை விடுத்தும், அதிகாரிகள் கண்டுகொள்ளவில்லை. மாறாக இரும்பு தடுப்புகளை ஒரு சில இடத்தில் வைத்துள்ளனர். இதை இரவு நேரத்தில் வரும் கனரக வாகனங்கள் மோதி, கீழே தள்ளி விட்டு சென்று விடுகின்றன. எனவே, அதிகாரிகள் நடவடிக்கை எடுத்து, ராசிபுரத்தில் இருந்து நாமக்கல் மற்றும் சேலம் செல்லும் வழியில் உள்ள ரயில்வே மேம்பாலத்தில், கான்கிரீட் சென்டர்மீடியன் அமைக்க வேண்டும் என வாகன ஓட்டிகள் கோரிக்கை விடுத்துள்ளனர்.

ராசிபுரத்தில் திமுக முகவர்கள் ஆலோசனை கூட்டம்

ராசிபுரம், மே 23: நாமக்கல் நாடாளுமன்ற தொகுதி வாக்கு எண்ணும் மையத்தில் பணியாற்றவுள்ள, திமுக மற்றும் கூட்டணி கட்சி முகவர்களுக்கான ஆலோசனை கூட்டம், நேற்று ராசிபுரத்தில் நடந்தது. நாமக்கல் கிழக்கு மாவட்ட திமுக பொறுப்பாளரும், முன்னாள் மத்திய இணை அமைச்சருமான காந்திசெல்வன் தலைமை வகித்தார். மேற்கு மாவட்ட திமுக செயலாளர் மூர்த்தி எம்எல்ஏ மற்றும் கொமதேக வேட்பாளர் சின்ராஜ் ஆகியோர் முன்னிலை வகித்தனர். முன்னதாக கொமதேக மாவட்ட செயலாளர் மாதேஸ்வரன் வரவேற்று பேசினார். கூட்டத்தில் வாக்கு எண்ணும் மையத்தில் முகவராக பணியாற்ற உள்ள திமுக கூட்டணி கட்சியினர் பின்பற்ற வேண்டிய விதிமுறைகள் குறித்து விரிவாக எடுத்துரைக்கப்பட்டது. இதில் மாவட்ட, ஒன்றிய, நகர, பேரூர் செயலாளர்கள், கூட்டணி கட்சி நிர்வாகிகள் மற்றும் வாக்கு எண்ணும் பணியாற்ற உள்ள முகவர்கள் கலந்துகொண்டனர்.

ராசிபுரம் பாவை கல்வி நிறுவனங்களில் ஹெச்.சி.எல் நிறுவன வேலைவாய்ப்பு முகாம்

ராசிபுரம்,மே 23: நாமக்கல் மாவட்டம் ராசிபுரம்   பாவை  கல்வி நிறுவனங்களில் ஹெச்.சி.எல் மென்பொருள் நிறுவனத்தின் சார்பில்,   2017  -2018 மற்றும் 2018 -2019-ம் கல்வியாண்டில் பிளஸ்2 முடித்த மாணவ,   மாணவிகளுக்கான வேலை வாய்ப்பு முகாம் நேற்று முன்தினம் தொடங்கியது. வரும்   29ம் தேதி வரை நடக்கிறது. பிளஸ்2 பொதுத்தேர்வில் 60 சதவீதம் மற்றும் அதற்கு   மேல்  மதிப்பெண் பெற்றவர்கள், இந்த வேலை வாயப்பு முகாமில் கலந்து   கொள்ளலாம். இந்த வேலைவாய்ப்பு  முகாமில் தேர்வு செய்யப்படும் மாணவ,  மாணவிகளுக்கு, 12 மாதம்  பயிற்சி வழங்கப்பட உள்ளது. பயிற்சி காலத்தில்  உதவித்தொகையாக ₹10 ஆயிரம் வழங்கப்படும். பயிற்சி முடிந்தவுடன் ஆரம்ப  ஊதியமாக  ஆண்டுக்கு ₹2.25 லட்சம் வரை ஹெச்.சி.எல் நிறுவனம் வழங்கும். வேலையில்  சேர்ந்த பிறகு, ஹெச்.சி.எல் நிறுவனத்தில் வேலை பார்த்துக்கொண்டே சாஸ்திரா   பல்கலைக்கழகத்தில் மூன்று ஆண்டு பிசிஏ., அல்லது பிட்ஸ் பிலானில் 4 ஆண்டுகள் பிஎஸ்சி., பட்டப்படிப்பை தொடரலாம். மேற்கூறிய உயர் கல்வி கட்டணத்தில் ஹெச்.சி.எல் நிறுவனமும் பங்கேற்கும். இதுகுறித்து பாவை   கல்வி நிறுவனங்களின் தலைவர் நடராஜன் கூறியதாவது: பாவை பொறியியல்   கல்லூரியில் ஹெச்.சி.எல் நிறுவனத்தில் சேர்வதற்கான வேலைவாய்ப்பு முகாம்  நடைபெறுகிறது. இந்த அரிய வாய்ப்பினை  பிளஸ்2 முடித்த மாணவ, மாணவிகள்   பயன்படுத்திக் கொள்ளவேண்டும் என்றார்.   

கொல்லிமலையில் ₹1.25 கோடியில் ஆரம்ப சுகாதார நிலையம் கட்டுமான பணிகள் தீவிரம்

சேந்தமங்கலம், மே 23:  கொல்லிமலை சோளக்காட்டில் ₹1.25 கோடியில் புதிதாக அரசு ஆரம்ப சுகாதார நிலையம் கட்டும் பணி நடந்து வருகிறது. கொல்லிமலை ஊராட்சி ஒன்றியத்தில் 14 ஊராட்சிகள் உள்ளது.  இதிலுள்ள 305 கிராமங்களில் 45 ஆயிரத்திற்கும் மேற்பட்ட மலைவாழ் மக்கள் வசித்து வருகின்றனர். இங்குள்ள செம்மேடு, பவர்காடு, தேனூர்பட்டி ஆகிய இடங்களில் அரசு ஆரம்ப சுகாதார நிலையமும், 16 இடங்களில் துணை சுகாதார நிலையங்களும் அமைக்கப்பட்டுள்ளது. ஆனால், கொல்லிமலை மலைவாழ் மக்கள் உயர் மருத்துவ சிகிச்சை பெற வேண்டுமானால், நாமக்கல், ராசிபுரம், சேலம் உள்ளிட்ட நகர் பகுதிகளுக்கு செல்ல வேண்டி உள்ளது. இப்பகுதி மக்கள் செம்மேடு ஆரம்ப சுகாதார நிலையத்தை, அரசு மருத்துவமனையாக தரம் உயர்ந்த வேண்டும் என  நீண்ட நாட்களாக கோரிக்கை விடுத்து வந்தனர். இந்நிலையில், கடந்த சில ஆண்டுகளுக்கு முன்பு வாழவந்திநாடு, செம்மேடு அரசு ஆரம்ப சுகாதார நிலையங்கள்,  அரசு மருத்துவமனையாக தரம் உயர்த்தப்பட்டு, இங்கு அறுவை அரங்கம், இசிஜி, விஷமுறிவு மருத்துவம், எலும்பு முறிவு மருத்துவம் உள்ளிட்ட பல்வேறு பிரிவுகள் கொண்டு வரப்பட்டது. இதனிடையே, இங்கு செயல்பட்டு வந்த அரசு ஆரம்ப சுகாதார நிலையம், சோளக்காட்டிற்கு இடமாற்றம் செய்யப்பட்டு, தற்காலிமாக எல்லைக்கிராய் சமுதாய கூடத்தில் செயல்பட்டு வருகிறது. சோளங்காடு சந்தை அருகே ஆரம்ப சுகாதார நிலையம் கட்ட இடம் தேர்வு செய்யப்பட்டு, ₹1.25 கோடி மதிப்பில் புதிதாக கட்டிடம் கட்டும் பணி நடந்து வருகிறது. ஆரம்ப சுகாதார நிலைய கட்டிடம், படுக்கை வசதி அறை, அறுவை அரங்கம், மருத்துவர் பரிசோதனை அறை, மருந்தகம், அலுவலர்கள் குடியிருப்பு உள்ளிட்ட கட்டிடங்கள் கட்டும் பணி தீவிரமாக நடைபெற்று வருகிறது. ஓரிரு மாதங்களில் பணிகள் முடிக்கப்பட்டு, பயன்பட்டிற்கு கொண்டு வரப்படும் என அதிகாரிகள் தெரிவித்தனர்.

இ-சேவை மையத்தில் விண்ணப்பித்தவர்களுக்கு சான்றிதழ் கிடைப்பதில் சிக்கல்

நாமக்கல்,  மே 23: வியாழன், வெள்ளிக்கிழமை நாடாளுன்ற தேர்தல் வாக்கு எண்ணும் பணியும்,  தொடர்ந்து சனி, ஞாயிறு விடுமுறை வருவதால், இ-சேவை மையங்களில்  விண்ணப்பத்தவர்களுக்கு சான்றிதழ்கள் கிடைப்பதில் சிக்கல் ஏற்பட்டுள்ளது. மத்திய,  மாநில அரசுகளின் சேவைகளை பெற, தமிழ்நாடு மின்னாளுமை முகமை இயக்ககம்,  தமிழ்நாடு அரசு கேபிள் டிவி வழியாக அரசு இசேவை மையத்தை செயல்படுத்தி  வருகிறது. இந்த சேவை மையத்தில் பிறப்பு சான்றிதழ், வருமான சான்றிதழ், ஜாதி  சான்றிதழ், ஆதார் பதிவு செய்தல், வண்ண வாக்காளர் அட்டை அச்சிடுதல்  உட்பட80க்கும் மேற்பட்ட சேவைகள் வழங்கப்படுகிறது. தற்போது பத்து  மற்றும் பிளஸ்2 பொதுத்தேர்வு முடிவுகள் வெளியாகி, உயர்நிலைப்பள்ளிகள்  மற்றும் உயர்கல்வியில் சேர்க்கை நடந்து வருகிறது. இதற்கு தேவையான  சான்றிதழ்களை பெறுவதாக மாணவ, மாணவிகள் அதிகளவில் விண்ணப்பித்து  வருகின்றனர். தேர்தல் அறிவித்தது முதலே இ-சேவை மையங்களி–்ல சான்றிழ்  பெறுவதில் தாமதம் ஏற்பட்டு வருகிறது. தற்போது தொடர்ச்சியாக 6 நாட்கள் விடுமுறை வருவதால் சான்று கேட்டு விண்ணப்பித்தவர்கள் அதிர்ச்சியடைந்துள்ளனர். இதுகுறித்து  பொதுமக்கள் கூறியதாவது: நாமக்கல் மாவட்டத்தில்  கலெக்டர் அலுவலகம்,  தாலுகா அலுவலகங்களில் இ-சேவை மையங்கள் செயல்பட்டு வருகிறது. நாடாளுமன்ற  தேர்தல் வாக்கு எண்ணும் பணி இன்று (23ம்தேதி) நடக்கிறது. இதற்கான  முன்னேற்பாடு பணிகளில் வருவாய்த்துறை அதிகாரிகள் கடந்த 2 நாட்களாக ஈடுபட்டு  வருகின்றனர். நாளை மற்றும் நாளை மறுநாள் வாக்கு எண்ணிக்கை நடைபெறும்.  தொடர்ந்து 4வது சனிக்கிழமை மற்றும் ஞாயிற்று கிழமை ஆகிய விடுமுறை நாட்கள்  வருகிறது. இதனால் இ- சேவை மையங்களில் சான்றிதழ் வழங்கும் பணி முற்றிலுமாக  முடங்கும் நிலை ஏற்பட்டுள்ளது. மாணவர்களின் நலன் கருதி, மாவட்டம் நிர்வாகம்  நடவடிக்கை எடுத்து, சான்றிதழ்கள் கிடைக்க வழிவகை செய்ய வேண்டும். இவ்வாறு  அவர்கள் கோரிக்கை விடுத்துள்ளனர்.

நாமக்கல் வழியே கரூர்-சென்னைக்கு பகல் நேர ரயில்

நாமக்கல், மே 23: கரூரில் இருந்து சென்னைக்கு  நாமக்கல் வழியே பகல் நேர எக்ஸ்பிரஸ் ரயில் இயக்க வேண்டும் என பயணிகள் கோரிக்கை விடுத்துள்ளனர். சேலம் ரயில்வே கோட்டத்திற்கு உட்பட்ட சேலம்-கரூர் இடையே 86 கிலோ மீட்டருக்கு புதிதாக அகல ரயில்பாதை அமைக்கப்பட்டவுடன், முதல் ரயிலாக பெங்களூரு-நாகர்கோவில் எக்ஸ்பிரஸ் அறிவிக்கப்பட்டது. இந்த ரயில் தினமும் மாலை 5 மணிக்கு பெங்களூருவில் புறப்பட்டு, சேலம், நாமக்கல், கரூர், திண்டுக்கல், மதுரை, திருநெல்ேவலி வழியாக நாகர்கோவிலை மறுநாள் காலை 8 மணிக்கு சென்றடைகிறது. இதேபோல், சேலம்-கரூர் பயணிகள் ரயில், சென்னை-பழனி எக்ஸ்பிரஸ், சென்னை-மதுரை துரந்தோ ஆகிய ரயில்கள் இயக்கப்பட்டு வருகிறது.இந்த வழித்தடத்தில், கரூர்- சென்னை இடையே எக்ஸ்பிரஸ் ரயிலை இயக்கிட வேண்டும் என ரயில் பயணிகள் நலக்குழுவினரும் தொடர்ந்து கோரிக்கை விடுத்து வருகின்றனர். இந்த சூழலில் தற்போது சேலம்-கரூர் பாதையை மின்மயமாக்கும் பணி முடிவடைந்து,  சோதனை ஓட்டமும் நடந்துள்ளது. இதையடுத்து இந்த வழித்தடத்தில் மின்சார இன்ஜின் ரயிலை இயக்க முடிவு செய்யப்பட்டுள்ளது. முதல் கட்டமாக தூத்துக்குடி- மைசூர், நெல்லை- ஜபல்பூர் எக்ஸ்பிரஸ் ரயில்கள், இந்த வழித்தடத்தில் மின்சார இன்ஜினில் இயக்கப்படுகிறது. மேலும், இம்மார்க்கத்தில் கூடுதல் ரயில்களை இயக்க ரயில்வே அதிகாரிகள் திட்டமிட்டு வருகின்றனர். புதிதாக கரூர்-ெசன்னை இடையே பகல் நேர எக்ஸ்பிரஸ் ரயிலை இயக்க வேண்டும் என ரயில்வே பயணிகள் கோரிக்கை விடுத்துள்ளனர். பகல் நேரத்தில் விருத்தாசலம் வழித்தடத்தில் கரூரில் இருந்து நாமக்கல் வழிேய சென்னை சென்றடையும் வண்ணம் இந்த ரயிலை இயக்கிட வேண்டும் என கோரிக்கை விடுவிக்கப்பட்டுள்ளது. இதுதொடர்பாக சேலம் ரயில்வே கோட்டத்தில் பயணிகள், அரசியல் கட்சிகள் கோரிக்கை மனுக்களை கொடுத்துள்ளனர். புதிதாக கரூர்- சென்னைக்கு பகல் நேர எக்ஸ்பிரஸ் ரயிலை இயக்க நடவடிக்கை மேற்கொள்ள வேண்டும் என பயணிகளின் கோரிக்கையாக உள்ளது.

ராசிபுரம் நகராட்சியில் சாக்கடை கழிவுநீர் தேங்கியுள்ளதால் விவசாய நிலங்களில் கடும் பாதிப்பு

ராசிபுரம், மே 23: ராசிபுரம் நகராட்சி பகுதியில் இருந்து வரும் சாக்கடை கழிவுநீர் தேங்கி உள்ளதால், விளைநிலங்கள் பயிர் செய்ய முடியாதபடி பாதிக்கப்பட்டுள்ளது.  ராசிபுரம் நகராட்சிக்குட்பட்ட கட்டூர் சாலையில் உள்ள நைனாசெட்டியார்  பகுதியில் ஏராளமான குடியிருப்புகள், தனியார் பள்ளிகள் மற்றும் விவசாய நிலங்கள் உள்ளது. இங்குள்ள விவசாயிகள் நெல், சோளம், கம்பு, வாழை உள்ளிட்டவற்றை பயிரிட்டு வருகின்றனர். கடந்த 10 ஆண்டுகளாக, நகராட்சி 3வது வார்டு, புதிய பேருந்து நிலையம்,  கடை வீதி உள்ளிட்ட பகுதிகளில் இருந்து வரும் சாக்கடை கழிவுநீர், விவசாய நிலங்களில்  தேங்கியுள்ளது. இதனால், மண் வளம் பாதித்து விவசாய  பணிகள் பெரிதும் பாதிக்கப்பட்டுள்ளது. புதைகுழி போல் சேறும், சகதியுமாக மாறியுள்ளது. இதனால் சோளம்  விளைந்த நிலத்தில், தற்போது கோரை புற்கள் மட்டுமே வளர்கிறது. மேலும், சாக்கடை கழிவுநீர் தேங்கியுள்ளதால் விஷ ஜந்துகளான பாம்பு, தேள், பூரான் உள்ளிட்டவை, இரவு  நேரங்களில் சாலை மற்றும் அருகில் உள்ள குடியிருப்பு பகுதிக்கு படையெடுக்கின்றன. இது தவிர, அப்பகுதி மக்கள் சிலர் குப்பை கழிவுகளை அங்கு கொட்டுவதால், சுகாதார சீர்கேடு ஏற்பட்டுள்ளது. சமீபத்தில் கோடை மழை பெய்ததால் மழைநீரும், சாக்கடை கழிவுநீருடன் கலந்து சாலைகளில் வழிந்தோடுகிறது. இதுகுறித்து நகராட்சி நிர்வாகத்திடம் புகார்  தெரிவித்தும், அதிகாரிகள் நடவடிக்கை எடுக்க வில்லை என விவசாயிகள் மற்றும் பொதுமக்கள் புகார் தெரிவித்துள்ளனர்.

ராஜீவ் காந்தி நினைவு நாள் காங்கிரஸ் அமைதி ஊர்வலம்

குமாரபாளையம், மே 23: முன்னாள் பிரதமர் ராஜீவ் காந்தியின் 28வது நினைவு நாளை முன்னிட்டு, குமாரபாளையத்தில் காங்கிரஸ் கட்சியினர் நேற்று அமைதி பேரணி நடத்தினர். முன்னதாக ராஜீவ் காந்தியின் உருவ படத்திற்கு மாலை அணிவித்து அஞ்சலி செலுத்தப்பட்டது. இதில், நாமக்கல் மேற்கு மாவட்ட காங்கிரஸ் தலைவர் தனகோபால், நகர தலைவர் ஜானகிராமன், துணைத்தலைவர் சுப்ரமணி, சிவக்குமார், சுப்ரமணி, சிவராஜ் உள்ளிட்டோர் கலந்து கொண்டனர். பின்னர், அனைவரும் தீவிரவாத எதிர்ப்பு உறுதிமொழியேற்றனர்.

திருச்செங்கோடு செங்குந்தர் கல்லூரியில் இளம் மாணவ விஞ்ஞானிகள் பயிலரங்கம்; 15 நாட்கள் நடந்தது

திருச்செங்கோடு, மே 23: கிராமப்புற மாணவர்களின் அறிவியல் திறன் மற்றும் பண்பாட்டை மேம்படுத்தும் விதமாக, இளம் மாணவ விஞ்ஞானிகள் பயிலரங்கம், திருச்செங்கோடு செங்குந்தர் கலை அறிவியல் கல்லூரியில் நடந்தது. தேசிய தொழில்நுட்ப அறிவியல் மாநில மன்றம் சார்பில் நடந்த இந்த பயிலரங்கு, 15 நாட்கள் நடந்தது. இதில் சேலம் மற்றும் நாமக்கல்  மாவட்டங்களை சேர்ந்த 80 மாணவர்கள் பங்கேற்றனர்.  அவர்கள் 25 அறிவியல் செயல் மாதிரிகளை உருவாக்கி இருந்தனர். பயிலரங்கு நிறைவு விழா கல்லூரியின் தலைவர்  தொழிலதிபர் ஜான்சன்ஸ் நடராஜன் தலைமையில் நடந்தது. முதல்வர் ரவிக்குமார் வரவேற்றார். கல்லூரி தாளாளர்  ராஜசேகரன் முன்னிலை வகித்தார். கல்லூரி டீன் பாலதண்டபாணி வாழ்த்திப்  பேசினார். சிறப்பு விருந்தினராக மாவட்ட கல்வி அதிகாரி ரமேஷ் கலந்து கொண்டு, மாணவர்களுக்கு பரிசு மற்றும் சான்றிதழ்களை வழங்கினார். ஒருங்கிணைப்பாளர்  வெங்கடாசலம் நன்றி கூறினார்.  

சேலம் லீ பஜாரில் 70 டன் மஞ்சள் ₹50 லட்சத்திற்கு ஏலம்

சேலம், மே 23: சேலம் லீ பஜார் மஞ்சள் மார்க்கெட்டில் நேற்று நடந்த ஏலத்தில் 70 டன் மஞ்சள் ₹0 லட்சத்திற்கு ஏலம் போனது. தமிழகத்தில் ஈரோடுக்கு அடுத்தப்படியாக சேலம் லீ பஜாரில் பெரிய மஞ்சள் மஞ்சள் மண்டி உள்ளது. இங்கு ஒவ்வொரு வாரமும் புதன்கிழமைகளில் மஞ்சள் ஏலம் நடக்கும். இந்த ஏலத்திற்கு சேலம், நாமக்கல், தர்மபுரி, கிருஷ்ணகிரி, விழுப்புரம், கள்ளக்குறிச்சி உள்ளிட்ட பகுதிகளை சேர்ந்த மஞ்சள் விவசாயிகள் விற்பனைக்கு கொண்டு வருகின்றனர்.இங்கு விற்பனைக்கு வரும் மஞ்சளை சேலம், கோவை, பெங்களூர், சென்னை உள்ளிட்ட பகுதிகளை மஞ்சள் வியாபாரிகள் ஏலம் எடுக்க வருகின்றனர். நேற்று நடந்த ஏலத்திற்கு 70 டன் மஞ்சள் விற்பனைக்கு வந்தது. இந்த மஞ்சள் ₹50 லட்சத்திற்கு ஏலம் போனது. ஒரு குவிண்டால் ₹7200 முதல் ₹8500க்கு ஏலம் போனதாக தெரிவிக்கப்பட்டது.

ஆதிதமிழர் பேரவை மாவட்ட செயற்குழு கூட்டம்

நாமக்கல், மே 23: நாமக்கல்லில் ஆதிதமிழர் பேரவை, மாவட்ட செயற்குழு கூட்டம் மாவட்ட செயலாளர் மணிமாறன் தலைமையில் நேற்று நடைபெற்றது. மாவட்டத் தலைவர் சுமன் வரவேற்றார். மாநில துணை பொதுச்செயலாளர் தமிழரசு, மாநில தகவல் தொழில்நுட்ப துணை செயலாளர் பிரபாகரன் ஆகியோர் சிறப்பு அழைப்பாளராக கலந்து கொண்டு பேசினர். கூட்டத்தில் பொள்ளாச்சி பாலியல் வன்கொடுமை சம்பவங்களுக்கு கண்டனம் தெரிவிக்கப்பட்டது. இதுபோன்ற சம்பவங்களை தடுக்க கடுமையான சட்டம் இயற்ற வேண்டும். செப்டம்பர் 15ம் தேதி ராசிபுரத்தில் ஆதி தமிழர் பேரவையின் மாவட்ட மகளிரணி மாநாடு நடத்தப்படும் என்பது உள்ளிட்ட தீர்மானங்கள் நிறைவேற்றப்பட்டன.

பள்ளிபாளையம் அருகே சாலையில் பரவி கிடக்கும் ஜல்லிக்கற்களால் அபாயம்

பள்ளிபாளையம், மே 23:  பள்ளிபாளையம் அருகே கண்டிபுதூரில் தண்ணீர் தொட்டிக்கு சுழற்படிக்கட்டு கட்ட  கொட்டப்பட்ட ஜல்லிக்கற்கள் மற்றும் எம்.சாண்ட் சாலையில் பரவி கிடப்பதால், டூவீலர்களில் செல்பவர்கள் சறுக்கி விழுந்து அடிபடுகின்றனர். பள்ளிபாளையம் நகராட்சி கண்டிபுதூர் கிராமத்தில், நூற்றுக்கும் மேற்பட்ட குடும்பத்தினர் வசித்து வருகின்றனர். இப்பகுதி மக்களுக்கு குடிநீர் வழங்க, கிராமத்தில் மேல்நிலை நீர்த்தேக்கத் தொட்டி சுழற்படியுடன் கட்டப்பட்டது. இந்த படிகள் பழுதடைந்தால், சீரமைக்கும் பணி மேற்கொண்டனர். இதற்காக சிறு ஜல்லிக்கற்கள், எம்.சாண்ட் ஆகியவற்றை பயன்படுத்தியவர்கள், பணிகள் முடிந்ததும் எஞ்சிய ஜல்லிக்கற்கள், எம்.சாண்ட் ஆகியவற்றை அகற்றாமல் சாலையில் போட்டு விட்டுச்சென்றனர். இவை சாலை முழுவதும் பரவியுள்ளது. இதனால் டூவீலரில் செல்பவர்கள் சறுக்கி விழுந்து அடிபடுகின்றனர். எனவே, போக்குவரத்துக்கு இடையூறாக உள்ள கட்டுமான பொருட்களை உடனடியாக அகற்றவேண்டும் என அப்பகுதி மக்கள் கோரிக்கை விடுத்துள்ளனர்.

எலச்சிபாளையத்தில் தகவல் அறியும் சட்டம் குறித்த கருத்தரங்கம்

திருச்செங்கோடு, மே 23:  எலச்சிபாளையம் ஒன்றியத்தில் உள்ள கிராமங்களில் தகவல் அறியும் உரிமை சட்டம் குறித்த கருத்தரங்கம் நடைபெற்றது. நாமக்கல்  மக்கள்பாதை அமைப்பின் சார்பில், தகவல் அறியும் உரிமைச் சட்டம்  குறித்த பயிலரங்கம் மற்றும்  ஆலோசனை கூட்டம் நடைபெற்றது. இதில் ஈரோடு   சட்டபஞ்சாயத்து இயக்கம் கண்ணையன், சிறப்பு அழைப்பாளராக கலந்து கொண்டு,   தகவல் அறியும் உரிமைச்  சட்டம் குறித்து  விளக்கினார்.  மேலும்  இளைஞர்கள்  ஆண்டுக்கு 4 முறை நடைபெறும் கிராமசபை  கூட்டத்தில்  கலந்து கொண்டு, கிராம  நிர்வாகம், கிராமத்துக்கு ஒதுக்கப்பட்ட நிதி, வரவு செலவு, வளர்ச்சி   திட்டங்கள் குறித்த தீர்மானங்களை எவ்வாறு  நிறைவேற்றுவது என்பது குறித்து  விளக்கினார். கிராமங்களில் சாலை வசதி, குடிநீர் வசதி, சாக்கடை  வசதி போன்ற பொதுப்பணித்துறை  சார்ந்த தகவல்களை பெறுவது எப்படி என்றும்,   கிராமத்திற்கு ஒதுக்கப்படும் நிதி குறித்தும், நிதி முறைகேடு குறித்த  தகவல்களை எவ்வாறு பெற்று, புகார் கொடுக்க வேண்டும் என்றும் விளக்கினார். அதை தொடர்ந்து  இளைஞர்களின் சந்தேகங்களுக்கு பதிலளித்தார். முன்னதாக  நிகழ்ச்சி ஒருங்கிணைப்பாளர் ஆபிரகாம் வரவேற்றார்.  நாமக்கல் மாவட்ட மக்கள்  பாதை ஒருங்கிணைப்பாளர் கண்ணன் பேசினார்.  ஒன்றிய பொறுப்பாளர் தீபக்குமார்  நன்றி கூறினார். இதில் 75க்கும் மேற்பட்ட   இளைஞர்கள் கலந்துகொண்டனர்.

பீமரப்பட்டியில் பழுதான போர்வெல் குடிநீரின்றி மக்கள் அவதி

திருச்செங்கோடு, மே23:  திருச்செங்கோடு  தாலுகா மல்லசமுத்திரம் ஒன்றியம் பீமரப்பட்டி கிராமத்தில், நூற்றுக்கும் மேற்பட்ட குடும்பத்தினர் வசித்து வருகின்றனர். இப்பகுதியில் 10 ஆண்டுகளுக்கு முன் போர்வெல் அமைத்து, அடிபம்பு  பொருத்தினர். இந்நிலையில், கடந்த சில மாதங்களுக்கு  முன் அடிபம்பு பழுதடைந்தது. இதனால் குடிநீர் தட்டுப்பாடு ஏற்பட்டுள்ளது.  மக்கள் தண்ணீர் தேடி, காலி குடங்களுடன் விவசாய கிணறுகளுக்கு செல்ல வேண்டிய  நிலை ஏற்பட்டுள்ளது. பழுதடைந்த  அடிபம்பை சரி செய்யக்கோரி, பலமுறை அதிகாரிகளிடம் மனு  கொடுத்தும், நடவடிக்கை எடுக்கவில்லை. எனவே, கோடையில் நிலவும் தண்ணீர் பஞ்சத்தை கருத்தில் கொண்டு, பழுதடைந்த போர்வெல்லை சீரமைக்க ஊராட்சி அதிகாரிகள் நடவடிக்கை எடுக்க வேண்டும் என பொதுமக்கள்  கோரிக்கை விடுத்துள்ளனர்.