Nilgiri - Dinakaran

மலர் கண்காட்சி காண அலைமோதிய மக்கள் கூட்டம்

ஊட்டி, மே 19 : மலர் கண்காட்சியின் 2வது நாளாக நேற்று ஊட்டியில் சுற்றுலா பயணிகள் குவிந்ததால் தாவரவியல் பூங்கா களைகட்டியது. மலர் கண்காட்சி நேற்று முன்தினம் ஊட்டியில் உள்ள அரசு தாவரவியல் பூங்காவில் துவங்கியது. நேற்று முன்தினம் மட்டும் மலர் கண்காட்சியை 25 ஆயிரம் சுற்றுலா பயணிகள் கண்டு ரசித்துள்ளனர். நெரிசலை கட்டுப்படுத்த போலீசார் பல சாலைகளை ஒரு வழிப்பாதைகளாக மாற்றினர். மேலும், வண்ண வண்ண மலர்களால் அலங்கரிக்கப்பட்டு வைக்கப்பட்டுள்ள பாராளுமன்றம், கூடை மற்றும் 30 ஆயிரம் தொட்டிகளில் பல்வேறு மலர் அலங்காரங்களை கண்டு வியந்தனர். சுற்றுலா பயணிகளை மகிழ்விக்க நேற்றும் தாவரவியல் பூங்காவில் பல்வேறு கலை நிகழ்ச்சிகள், இசை கச்சேரி ஆகியவை நடந்தது. இதனை கண்டு சுற்றுலா பயணிகள் மகிழ்ந்தனர். நேற்று மதிய உணவிற்காக ஊட்டி நகரில் சுற்றுலா பயணிகள் குவிந்தனர். இதனால் நகரின் முக்கிய சாலைகளிலும் போக்குவரத்து நெரிசல் ஏற்பட்டது. அனைத்து ஓட்டல்களிலும் மக்கள் கூட்டம் அலைமோதியது. 2வது நாளான நேற்று சுற்றுலா பயணிகள் வரத்த பல மடங்கு உயர்ந்தது. அனைத்து சாலைகளிலும் போக்குவரத்து நெரிசல் காணப்பட்டது.

ஊட்டி நகரை இணைக்கும் மாற்றுப்பாதை பழுது

ஊட்டி, மே 19: ஊட்டியில். கோடைசீசன் தொடங்கி உள்ள நிலையில் நகருக்குள் வாகன நெரிசல் ஏற்படாமல் இருக்க, சுற்றுலா பயணிகள் எளிதாக நகருக்குள் வர போக்குவரத்தில் மாற்றம் செய்யப்பட்டுள்ளது. குறிப்பாக, குன்னூர் வழித்தடத்தில் வரும் அனைத்து வாகனங்களும் லவ்டேல் சந்திப்பில் இருந்து காந்திநகர், ஸ்டெர்லிங், மஞ்சனக்கொைர வழியாக பெர்ன்ஹில் வந்தடைந்து அங்கிருந்து நகருக்குள் வாகனங்கள் செல்லும் வகையில் போக்குவரத்தில் மாற்றம் செய்யப்பட்டுள்ளது. வாகனங்கள் அதிகம் வந்தால், இவ்வழித்தடத்தில் வாகனங்கள் செல்ல அனுமதிக்கப்படுகிறது. இம்முறையும் அதேபோல், வாகனங்கள் அனைத்தும் லவ்டேல் சந்திப்பில் இருந்து மஞ்சனக்கொரை வழியாக ஊட்டி நகருக்கு திருப்பிவிடப்படுகிறது. ஆனால், இச்சாலை மிகவும் பழுதடைந்துள்ளது. பெரும்பாலான இடங்களில் பெரிய அளவிலான பள்ளங்கள் ஏற்பட்டுள்ளது. சில இடங்களில் சேறும் சகதியுமாக மாறியுள்ளது. சாலையோரங்களில் முட்புதர்களும் வளர்ந்துள்ளன. இதனால், இவ்வழித்தடத்தில் வாகனங்களை ஓட்டிச் செல்ல சுற்றுலா பயணிகள் மற்றும் ஓட்டுநர்கள் சிரமப்பட்டு வருகின்றனர். எனவே, இச்சாலையை போர்க்கால அடிப்படையில் நகராட்சி நிர்வாகம் சீரமைக்க வேண்டும். முதற்கட்டமாக பள்ளங்களை மூட நடவடிக்கை எடுக்க வேண்டும் என சுற்றுலா பயணிகளும், உள்ளூர் மக்களும் வலியுறுத்தியுள்ளனர்.

ஊட்டி ராஜ்பவனில் பழங்குடியின மக்களின் நடன நிகழ்ச்சி

ஊட்டி, மே 19: ஊட்டியில் உள்ள ராஜ்பவன் மாளிகையில் கோடை விழாவின் ஒரு பகுதியாக பழங்குடியின மக்களின் பாரம்பரிய நடன நிகழ்ச்சி நடந்தது. தஞ்சாவூர் தென்னக பண்பாட்டு மையம் மற்றும் நீலகிரி மாவட்ட நிர்வாகமும் இணைந்து கோடை விழா கலை நிகழ்ச்சிகளை நடத்தி வருகிறது. இதன் ஒரு பகுதியாக நேற்று ஊட்டியில் உள்ள ராஜ்பவன் மாளிகையில் பழங்குடியின மக்களின் கலை நிகழ்ச்சிகள் மற்றும் பாரம்பரிய நடன நிகழ்ச்சிகள் நடந்தது. நிகழ்ச்சிக்கு தமிழக கவர்னர் பன்வாரிலால் புரோகித் தலைமை வகித்தார். கூடுதல் முதன்மை செயலாளர் ராஜகோபால் முன்னிலை வகித்தார். நிகழ்ச்சியில், நீலகிரி மாவட்டத்தில் வாழும், தோடர், கோத்தர், பெட்ட குரும்பர், முள் குரும்பர், இருளர் பழங்குடியின மக்களின் நடன நிகழ்ச்சி நடந்தது. தொடர்ந்து, படுகர் இன மக்களின் நடன நிகழ்ச்சியும் நடந்தது. நிகழ்ச்சியில் முள் குரும்பர்களின் கோலாட்டம் எருமாடு அச்சுதா தலைமையில் நடந்தது. தோடர் நடனம் சத்யராஜ் தலைமையிலும், இருளர் நடனம் மாதன் தலைமையிலும், கோத்தகர் நடனம் உதயகுமார் தலைமையிலும் நடந்தது.  இதனை கவர்னர் மற்றும் அதிகாரிகள் கண்டு ரசித்தனர். இந்நிகழ்ச்சியில், தமிழக வேளாண்துறை செயலர் ககன்தீப் சிங்பேடி, கலெக்டர் இன்னசென்ட் திவ்யா, மாவட்ட நீதிபதி வடமலை, மகளிர் நீதிமன்ற நீதிபதி முரளிதரன், நீதிபதி சுரேஷ்குமார் உட்பட பலர் கலந்து கொண்டனர்.

கஞ்சா கடத்திய 2 பேர் கைது

பாலக்காடு, மே 19 :  கம்பம் தேனி பகுதிகளை சேர்ந்தவர்கள் ஜெயகுமார் (27), விக்னேஷ்வரன் (25) ஆகிய இருவரும் கோவையிலிருந்து பாலக்காடு நோக்கி வந்த அரசு பஸ்சில் நேற்று பயணித்துள்ளார். கேரள-தமிழக வாளையார் டோல்கேட் அருகே பாலக்காடு கலால்துறை அதிகாரிகள் வாகன சோதனையில் ஈடுபட்டிருந்தனர். அப்போது, ஜெயகுமார், விக்னேஷ்வரனும் பஸ்சில் தப்பிக்க முயற்றனர், அப்போது அதிகாரிகள் அவர்களை தடுத்து, விசாரணை நடத்தியதில் 6.2 கிலோ கஞ்சா தமிழகத்திலிருந்து கேரளாவிற்கு கடத்திவந்தது தெரியவந்தது, பின் இருவரையும்  கலால்துறை அதிகாரிகள் கைது செய்தனர். சர்க்யூட் பஸ் எண்ணிக்கை 28 ஆக உயர்வுஊட்டி, மே 19: சுற்றுலா பயணிகள் வரத்து அதிகரித்துள்ள நிலையில், சுற்றுலா தலங்களை குறைந்த கட்டணத்தில் பார்வையிட ஏற்றவாறு போக்குவரத்து கழகம் பார்க் அண்ட் ரெய்டு மற்றும் சர்க்யூட் பஸ்களின் எண்ணிக்கையை 28 ஆக அதிகரிக்கப்பட்டுள்ளது. ஊட்டிக்கு சுற்றுலா பயணிகள் வந்து சென்ற போதிலும், மே மாதம் விடுமுறையின் போது அதிகளவு சுற்றுலா பயணிகள் வருகின்றனர். சுற்றுலா பயணிகள் நலன் கருதியும், தனியார் பஸ்களில் வரும் சுற்றுலா பயணிகள் பஸ்கள் நகருக்குள் அனுமதிக்கப்படாததாலும், அந்த பஸ்களில் வரும் சுற்றுலா பயணிகள் அனைத்து சுற்றுலா தலங்களுக்கும் செல்ல ஏற்றவாறு போக்குவரத்து கழகம் சர்க்யூட் பஸ் மற்றும் பார்க் அண்ட் ரெய்டு பஸ்களை அறிமுகம் இயக்கி வருகிறது. குறைந்த கட்டணத்தில் அனைத்து சுற்றுலா தலங்களையும் ஒரே நாளில் சுற்றிப் பார்க்கலாம் என்பதால் சுற்றுலா பயணிகளிடம் வரவேற்பு அதிகம் உள்ளது. சர்க்யூட் பஸ்கள் தற்போது 28 ஆக உயர்த்தப்பட்டுள்ளது. அனைத்து சுற்றுலா தலங்களையும் இந்த பஸ்கள் வலம் வருகின்றன. இதுமட்டுமின்றி பார்க் அன்ட் ரெய்டு பஸ்கள் தாவரவியல் பூங்கா, படகு இல்லம், ரோஜா பூங்கா ஆகிய பகுதிகளுக்கு செல்கிறது. இந்த பஸ்கள் ஆவின் தனியார் பஸ் நிறுத்தம், காந்தல் மற்றும் கால்ப்லிங்ஸ் தனியார் பஸ் நிறுத்தம் வரை சென்று வருவதால் சுற்றுலா பயணிகள் சிரமம் இன்றியும், குறைந்த கட்டணத்திலும் அனைத்து சுற்றுலா தலங்களை கண்டு ரசித்து வருகின்றனர். மேலும், வெளி மாவட்டங்களுக்கு செல்லும் சுற்றுலா பயணிகள் வசதிக்காக ஊட்டியில் இருந்து கோவைக்கு 40 சிறப்பு பஸ்கள் இயக்கப்பட்டு வருகின்றன. 5 நிமிடங்களுக்கு ஒரு முறை வெளி மாவட்டங்களுக்கு சிறப்பு பஸ்கள் இயக்கப்பட்டு வருகிறது. பூங்கா மற்றும் படகு இல்லம் இடையோ பார்க் அன்ட் ரெய்டு பஸ்களும் இயக்கப்பட்டு வருகிறது.

பிளாஸ்டிக் கூரை வெப்பம் தாங்காமல் மலர்கள் கருகியது

ஊட்டி, மே 19:  ஊட்டி மலர் கண்காட்சி மாடங்களில் வைப்பதற்காக பல்வேறு மலர் செடிகள் ெதாட்டிகளில் நடவு செய்யப்படம். இம்முறை 35 ஆயிரம் மலர் தொட்டிகள் தயார் செய்யப்பட்டது. அந்த தொட்டிகளில் உள்ள மலர்கள் மட்டுமின்றி, ஹாலாந்து நாட்டில் இருந்து கொண்டு வரப்பட்ட துலிப்ஸ், ஆர்கிட் போன்ற மலர்களும் மாடங்களில் வைக்கப்பட்டது. நூற்றாண்டு பழமை வாய்ந்த மாடங்களை ரூ.36 லட்சம் செலவில் புனரமைக்கப்பட்டது. ஏற்கனவே இருந்த பழைய மாடத்தை அகற்றிவிட்டு புதிதாக மாடம் அமைக்கப்பட்டது. ேமலும், மாடத்தின் மேற்கூரை பாலி கார்பனேட் எனப்படும் கண்ணாடி போன்ற பிளாஸ்டிக் கூரை போடப்பட்டது. பார்ப்பதற்கு மிகவும் அழகாக மாடம் தற்போது காட்சியளித்தாலும், பிளாஸ்டிக் கூரை அப்படியே வெப்பத்தை ஈர்த்து விடுகிறது. இந்த வெப்பம் மலர்களின் மீது விழுவதால், மலர்கள் கருகிவிட்டன. பொதுவாக மாடங்களில் வைக்கப்படும் தொட்டிகள் 15 நாட்களுக்கு மேல் அப்படியே இருக்கும். ஆனால், இம்முறை மாடங்களில் வைக்கப்பட்டுள்ள மலர் அலங்காரம் ஒரே நாளில் பாதித்துள்ளது. நுழைவு வாயிலில் ரோஜா மலர்களை கொண்டு வைக்கப்பட்டுள்ள அலங்காரத்தில் உள்ள அனைத்து மலர்களும் காய்ந்து போய்விட்டன. இதனால், இங்கு வரும் சுற்றுலா பயணிகள் முகம் சுழிக்கின்றனர். மேலும், இந்த மலர்களை மாற்ற வேண்டும் எனவும் கோரிக்கை எழுந்துள்ளது. அதிகாரிகள் கூறுகையில், நாங்கள் மலர்கள் தெளிவாக தெரிய வேண்டும் என்பதற்காக மாடங்கள் புதுப்பித்தோம். பிளாஸ்டிக் கூரையால் மலர்கள் பாதிக்காது என நினைத்தோம். ஆனால், மலர்கள் பாதிக்கப்பட்டுள்ளது. எனவே, பாதிக்கப்பட்ட மலர்கள் மாற்றப்படும். அதேசமயம், வெப்பம் உள் வாங்காமல் இருக்க பிளாஸ்டிக் கூரை மீது நைலான் வளை போடுவது குறித்து ஆலோசித்து வருகிறோம், என்றனர்.

கூடுதல் பஸ் இயக்க கோரிக்கை

குன்னூர், மே 19 : நீலகிரி மாவட்டத்தில் தற்போது கோடை சீசன் துவங்கியுள்ளதால் ஏராளமான சுற்றுலா பயணிகள் வருகின்றனர். தற்போது ஊட்டியில் மலர்கண்காட்சி 21ம் தேதி வரை நடைபெறுகிறது. இதனை காண பல்வேறு மாநிலங்களிலிருந்தும், வெளிநாடுகளிலிருந்தும், வெளிமாவட்டங்களிலிருந்தும் ஏராளமான சுற்றுலா பயணிகள் குவிந்து வருகின்றனர். அரசுப்போக்குவரத்துக்கழகம் சார்பில் பஸ்கள் குறைவாகவே இயக்கி வருகின்றனர். மேலும், நீலகிரியிலுள்ள கிராமப்புறங்களுக்கு செல்லும் பேருந்துகள் சமவெளி பகுதிகளுக்கு இயக்கப்படுவதால், கிராமப்புற பகுதிகளுக்கு பேருந்துகள் சரியாக இயக்கப்படுதில்லை. கோவையிலிருந்து ஊட்டிக்கும், ஊட்டியிலிருந்து  கோவைக்கும், குன்னூரிலிருந்து கோவைக்கும் பஸ்கள் குறைவாகவே இயக்கப்படுவதால், சுற்றுலா பயணிகள் மட்டுமின்றி உள்ளுர் பொதுமக்கள் பேருந்துகளில் இடம் கிடைக்காமல் சிரமப்பட்டு வருகின்றனர். எனவே கோடை சீசன் கருதி அரசுப்போக்குவரத்துக்கழகம் சார்பில் கூடுதல் பஸ்கள் இயக்க வேண்டும் என பொதுமக்கள் கோரிக்கை விடுத்துள்ளனர்.

கண்டி மகாலிங்கையா கோயில் கும்பாபிஷேகம்

மஞ்சூர்,  மே 19: மஞ்சூர் அருகே உள்ள கண்டியில் மகாலிங்கையா கோயில் உள்ளது.  பழமைவாய்ந்த இக்கோயிலின் புனரமைப்பு பணிகள் கடந்த சில மாதங்களாக நடைபெற்று  வந்தது. திருப்பணிகள் நிறைவு பெற்றதை தொடர்ந்து நேற்று முன்தினம் கோயிலின்  குடமுழுக்கு நடந்தது. முன்னதாக கணபதி பூஜையுடன் பல்வேறு ஹோமங்கள்  நடத்தப்பட்டது. தொடர்ந்து 108 குடங்களில் புனித நீர் ஊர்வலமாக கொண்டு  வரப்பட்டு கோபுர கலசங்களில் ஊற்றி கும்பாபிஷேகம் நடத்தப்பட்டது. இதை  தொடர்ந்து மூலவருக்கு அபிஷேகம், சிறப்பு பூஜைகளுடன் மகா தீபாராதனை நடந்தது.  இதேபோல் அருகில் உள்ள ராமர் கோயிலுக்கும் கும்பாபிஷேகம் நடத்தப்பட்டது.  தொடர்ந்து அன்னதானம் வழங்கப்பட்டது. விழாவை முன்னிட்டு மகாலிங்கையா பஜனை  சபை சார்பில் ‘ஜென ஒந்து அடதே’ என்ற படுக சமூக நாடகம் மற்றும் நடனம்  கலைநிகழ்ச்சிகள் நடந்தது. விழாவில் ஊட்டி எம்.எல்.ஏ. கணேசன் உள்பட 14  ஊர்களை சேர்ந்த படுகரின மக்கள் கலந்து கொண்டனர். விழாவிற்கான ஏற்பாடுகளை  முள்ளிமலை ஊர் தலைவர் போஜன் தலைமையில் பொதுமக்கள் செய்திருந்தனர்.

கேரள மாநிலம் வடகராவை அடுத்த நாதாபுரம் பகுதியை சேர்ந்த சந்திரன் பலி

பாலக்காடு, மே 19:   கேரள மாநிலம் வடகராவை அடுத்த நாதாபுரம் பகுதியை சேர்ந்த சந்திரன் (47). கட்டடத் தொழிலாளி. இவர் பாலக்காடு கோழிக்கோடு தேசிய சாலையில் புதுப்பாரியம் பகுதியில் சாலையின் குறுக்கே பாலம் கட்ட கான்கிரீட் தூண்கள் அமைப்பதற்கான பணி நடைபெற்றுகொண்டுஇருந்து. அப்போது கம்பிகள் சாய்ந்து சந்திரன் சிக்கித் தவித்தார். இவற்றை பார்த்த சக ஊழியர்கள் சந்திரனை மீட்டு சிகிச்சைக்காக பாலக்காடு அரசு மருத்துவமனையில் சேர்தனர். சிகிச்சை பலனின்றி நேற்று அவர் உயிரிழந்தார். பாலக்காடு ஹேமாம்பிகாநகர் போலீசார் வழக்குப்பதிவு செய்து விசாரணை மேற்கொண்டுள்ளனர். இறந்த சந்திரனுக்கு, பிந்து என்ற மனைவியும், சந்தனா, ஸ்னேகா இரு மகள்கள் உள்ளனர் என்பது குறிப்பிடத்தக்கது.

பெண் கொலை வழக்கில் கொலையாளியை பிடிக்க தனிப்படை

சத்தியமங்கலம், மே 19:    சத்தியமங்கலம் அருகே உள்ள சிக்கரசம்பாளையம் பிரிவு காலனியை சேர்ந்தவர் ஆறுமுகம் (எ) ரங்கன். விவசாயக் கூலித் தொழிலாளியான இவருக்கு லட்சுமி (25) என்ற மனைவியும், புனிதா என்ற மகளும், சபரி வாசன் என்ற மகனும் உள்ளனர். லட்சுமி சத்தியமங்கலம் அரசு மருத்துவமனை அருகே உள்ள தனியார் பனியன் கம்பெனியில் தினசரி கூலி தொழிலாளியாக வேலை செய்து வந்தார். நேற்று முன் தினம் இரவு லட்சுமி வேலைக்கு சென்று விட்டு இரவு 8 மணி அளவில் சத்தியமங்கலத்தில் இருந்து பஸ் ஏறி சிக்கரசம்பாளையம் பிரிவில் வந்து இறங்கி வீட்டிற்கு செல்வதற்காக சத்தியமங்கலம் - மைசூர் தேசிய நெடுஞ்சாலையில் சாலையோரம் நடந்து சென்றுள்ளார்.  அப்போது அவ்வழியே பைக்கில் வந்த நபர்கள் லட்சுமியை பிடித்து திடீரென கழுத்தை கத்தியால் அறுத்து விட்டு கத்தியை வீசி விட்டு தப்பி சென்றனர். கழுத்தில் பலத்த காயமடைந்த லட்சுமி சம்பவ இடத்திலேயே ரத்த வெள்ளத்தில் துடிதுடித்து உயிரிழந்தார். இதை கண்ட அப்பகுதி பொதுமக்கள் உடனடியாக சத்தியமங்கலம் போலீசாருக்கு தகவல் தெரிவித்தனர். சம்பவ இடத்திற்கு விரைந்து சென்ற போலீசார் உடலை மீட்டு பிரேத பரிசோதனைக்கு சத்தியமங்கலம் அரசு மருத்துவமனைக்கு அனுப்பினர்.  ஈரோடு எஸ்.பி. சக்தி கணேசன் உத்தரவின்பேரில் சத்தியமங்கலம் டிஎஸ்பி சுப்பையா, இன்ஸ்பெக்டர் மோகன்ராஜ், தாளவாடி இன்ஸ்பெக்டர் அன்பரசு, பங்களாப்புதூர் இன்ஸ்பெக்டர் நெப்போலியன் ஆகியோர் அடங்கிய தனிப்படை அமைக்கப்பட்டு கொலையாளியை தேடி வருகின்றனர். கொலை செய்யப்பட்ட இடத்தில் புதிய கத்தி கிடைத்துள்ளது. அந்த கத்தி சத்தியமங்கலத்தில் உள்ள ஒரு தனியார் டிபார்ட்மெண்ட் ஸ்டோரில் வாங்கியது தெரிய வந்துள்ளது. போலீசார் லட்சுமிக்கும் கொலை செய்த நபருக்கும் கள்ளத்தொடர்பு காரணமாக கொலை செய்யப்பட்டு இருக்கலாம் என்ற கோணத்தில் விசாரணை நடத்தி வருகின்றனர்.  நேற்று காலை லட்சுமியின் உடல் பிரேத பரிசோதனைக்காக சத்தியமங்கலம் அரசு மருத்துவமனையில் இருந்து கோவை அரசு மருத்துவமனைக்கு அனுப்பி வைக்கப்பட்டு அங்கு பிரேத பரிசோதனை செய்யப்பட்டு உடல் அவரது உறவினர்களிடம் ஒப்படைக்கப்பட்டது.

சிங்காரா மின் நிலையத்தை பார்வையிட்ட கவர்னர்

ஊட்டி, மே 19: ஊட்டி அருகே உள்ள சிங்காராவில் தமிழ்நாடு மின்சார வாரியத்தின் கட்டுப்பாட்டில் இரு மின் நிலையம் உள்ளது. 1932ம் ஆண்டு ஒருங்கிணைந்த மெட்ராஸ் மகாணம் சார்பில் சிங்காரா பகுதியில் கட்டப்பட்ட மின் நிலையத்தில் 70 மெகாவாட் மின்சாரம் உற்பத்தி செய்யப்பட்டு வருகிறது. 1997ல் புதிதாக மின் நிலையம் கட்டப்பட்டது. இந்த மின் நிலையம் மலையை குடைந்து 16 கி.மீ., தூரம் டனல் வழியாக தண்ணீர் கொண்டு சென்று இந்த மின் நிலையத்தில் மின் உற்பத்தி செய்யப்பட்டு வருகிறது. மிகவும் பாதுகாப்பான பகுதியாக அறிவிக்கப்பட்ட இந்த மின் நிலையத்தை எளிதில் யாரும் சென்று பார்க்க முடியாது.  இந்நிலையில், நேற்று தமிழக கவர்னர் பன்வாரிலால் புரோகித், சிங்கரா மின் நிலையத்திற்கு சென்றார். அங்கு மின் உற்பத்தி செய்யும் முறைகள் குறித்து கேட்டறிந்தார். தொடர்ந்து, மின்வாரிய அதிகாரிகளுடன் உரையாடினார். மின் உற்பத்தி செய்யும் முறைகள் மற்றும் எவ்வாறு சிங்காரா மின் நிலையம் கட்டப்பட்டது என்பது குறித்து குந்தா மின்வாரிய மேற்பார்வை பொறியாளர் ரகு விளக்கி கூறினார். கவர்னருடன் நீலகிரி மாவட்ட கலெக்டர் இன்னசென்ட் திவ்யா, எஸ்பி., சண்முகப்பிரியா ஆகியோர் உடன் இருந்தனர். கதகளி நாட்டியம் பாலக்காடு மாவட்டம்  கிருஷ்ணபுரம் அருகே உள்ள பெருமாங்கோடு விஷ்ணு கோயில் வளாகத்தில் அமைந்துள்ள சாஸ்தா கோயில் பிரதிஷ்டா தினவிழாவையொட்டி குசேலவிரதம் என்ற தலைப்பில் கதகளி நாட்டியம் நேற்று முன்தினம் கோயில் கலையரங்கில் நடந்தது.

பந்தலூரில் காற்றுடன் மழை

பந்தலூர், மே 19 :  பந்தலூர் அருகே கொளப்பள்ளி மற்றும் நெல்லியாளம், அம்பலமூலா உள்ளிட்ட பல பகுதிகளில் காற்றுடன் கூடிய மழைபெய்தது. கொளப்பள்ளி பகுதித்தில் நேற்று சூறைக்காற்றுடன் மழை பெய்தது அப்போது கொளப்பள்ளி குறிஞ்சி நகரை சேர்ந்த சொல்தேவன் (44) என்பருடைய கழிப்பறை  சிமென்ட் சீட் கூரை சூறைக்காற்றுடன் கூடிய மழைக்கு தூக்கி எறியப்பட்டு உடைந்து சேதமானது. அசம்பாவிதம் ஏதும் ஏற்படவில்லை அதேபோல் அப்பகுதியை சேர்ந்த கூலித்தொழிலாளி விஜயலட்சுமி (45) இடி, மின்னல் தாக்கி வீட்டின் சுவரில் வெடிப்பு ஏற்பட்டது. மேலும், மின் சாதனப்பொருட்கள் சேதமானது. மேலும், ஏலமன்னா பகுதியில் மின்கம்பத்தில் மரம் விழுந்து சுற்றுவட்டாரப்பகுதிகளில் மின்தடை ஏற்பட்டது. சம்பவம் இடத்தை பந்தலூர் வருவாய்துறையின் நேரில் சென்று ஆய்வு செய்தனர்.

தாவரவியல் பூங்கா கண்ணாடி மாளிகை மூடல்

ஊட்டி, மே 19:  தாவரவியல் பூங்காவில் உள்ள கண்ணாடி மாளிகை செல்ல தடை விதிக்கப்பட்டுள்ளதால் சுற்றுலா பயணிகள் ஏமாற்றம் அடைந்துள்ளனர். ஊட்டி அரசு தாவரவியல் பூங்காவிற்கு நாள் தோறும் ஏராளமான சுற்றுலா பயணிகள் வருகின்றனர். இங்கு வரும் சுற்றுலா பயணிகள் அங்குள்ள மாடங்கள் வைக்கப்பட்டுள்ள மலர் அலங்காரம், இத்தாலியன் பூங்கா, புதிய பூங்கா போன்றவைகளை கண்டு ரசித்து செல்கின்றனர். குறிப்பாக, பூங்காவில் உள்ள கண்ணாடி மாளிகைக்குள் சென்று புகைப்படங்களை எடுத்துச் செல்வது வழக்கம். இந்நிலையில், கண்ணாடி மாளிகையில் ஏராளமான தொட்டிகளில் மலர் செடிகள் வைக்கப்பட்டுள்ளது. பல வடிவங்களில் அங்கு அலங்காரமும் செய்யப்பட்டுள்ளது.இந்நிலையில், இந்த மலர் அலங்காரங்களை காணச் செல்லும் சுற்றுலா பயணிகள் சிலர் புகைப்படம் எடுக்கும் மோகத்தில் தொட்டிகளை தட்டி விடுவதாக கூறப்படுகிறது. மேலும், மக்கள் கூட்டம் அதிகமாக வரும் நிலையில், ஒருவருக்கொருவர் முண்டியடித்துக் கொண்டு உள்ளே செல்வதாலும் தொட்டிகள் பாதிக்கும் அபாயம் ஏற்பட்டுள்ளது. இதனால், நேற்று காலை கண்ணாடி மாளிகை மூடப்பட்டது. கண்ணாடி மாளிகை வரை வந்த சுற்றுலா பயணிகள் அனைவரும், அதன் முன் பகுதியில் நின்று புகைப்படம் எடுத்துச் சென்றனர். உள்ளே செல்ல முடியாத நிலையில், ஏமாற்றத்துடன் திரும்பினர்.

இரண்டு குழந்தைகளுடன் தாய் தற்கொலை முயற்சி

திருப்பூர்,மே19:  திருப்பூர் சாமுண்டிபுரம் பிரதான சாலை பகுதியை சேர்ந்தவர் அருண்குமார். இவரது மனைவி பிரதீபா (35). இருவரும் பனியன் நிறுவனத்தில் வேலை பார்த்து வருகின்றனர். இவர்களுக்கு ஒரு மகன் மற்றும் மகள் உள்ளனர். நேற்று முன்தினம் காலை அருண்குமார் வழக்கம்போல வேலைக்கு சென்று விட்டார். அதன் பின்னர் திடீரென அவரது வீட்டில் 10 வயது மகன் கூச்சல் போடும் சத்தம் கேட்டுள்ளது. இதனால் அதிர்ச்சியடைந்த அக்கம்பக்கத்தினர் விரைந்து சென்று அங்கு பார்த்த போது வீட்டில் பிரதீபா துப்பட்டாவை கழுத்தில் மாட்டி கொண்டு தூக்கில் தொங்கிய நிலையில் இருந்துள்ளார்.அவருடைய மகன் மற்றும் மகளும் மயக்க நிலையில் இருந்ததாக தெரிகிறது. இதையடுத்து அக்கம் பக்கத்தினர் 3 பேரையும் மீட்டு திருப்பூர் அரசு மருத்துவமனைக்கு அனுப்பி வைத்தனர். சிறிது நேரத்தில் அருண்குமாரின் மகனும், மகளும் சகஜ நிலைக்கு திரும்பினார்கள். ஆனால் பிரதீபா மட்டும் மேல்சிகிச்சைக்காக குமார்நகரில் உள்ள தனியார் மருத்துவமனையில் தீவிர சிகிச்சை பிரிவில் அனுமதிக்கப்பட்டு சிகிச்சை பெற்று வருகிறார்.இதுகுறித்து தகலவறிந்த 15 வேலம்பாளையம் போலீசார் சம்பந்தப்பட்ட மருத்துவமனைக்கு சென்று சம்பவம் தொடர்பாக விசாரணை நடத்தினார்கள். இதில் பிரதீபா வேலை பார்க்கும் நிறுவனத்தில் அவருடன் வேலை செய்யும் ஒருவரிடம் இருந்து ரூ.10 ஆயிரம் கடன் வாங்கியதாக கூறப்படுகிறது. இந்த விவகாரம் அவருடைய கணவர் அருண்குமாருக்கு தெரிய வந்துள்ளது. இதுதொடர்பாக இரவு தம்பதிக்கிடையே தகராறு ஏற்பட்டுள்ளது. நேற்று முன்தினம் காலை அருண்குமார் வேலைக்கு சென்ற உடன் 3 பேரும் தூக்குப் போட்டு தற்கொலை செய்து கொள்ளலாம் என்று கூறியதாக தெரிகிறது. பின்னர் 2 குழந்தைகளையும் வீட்டில் இருந்த கம்பியில் தனித்தனி துப்பட்டாவில் தொங்க விட்டுள்ளார்.  பின்னர் அவரும் மற்றொரு துப்பட்டாவில் தூக்குப்போட்டுள்ளார். ஆனால் துப்பட்டா அறுந்து விழுந்ததால் 2 குழந்தைகளும் கீழே விழுந்தனர். சிறிது நேரம் கழித்து மயக்கம் தெளிந்த அருண்குமாரின் மகன் கூச்சல் போட்டதை தொடர்ந்து அக்கம்பக்கத்தினர் அங்கு சென்று 3 பேரையும் மீட்டு மருத்துவமனைக்கு அனுப்பி வைத்தது போலீஸ் விசாரணையில் தெரிய வந்துள்ளது.

தீ விபத்தில் பெண் சாவு

பந்தலூர், மே 19 :  பந்தலூர் அருகே அத்திக்குன்னா அடுத்த அத்திமாநகர் பகுதியை சேர்ந்தவர் ராஜசேகர்(41) கூலித்தொழிலாளி, இவருடைய மனைவி பாக்கியம் (35) கடந்த 10ம் தேதி வீட்டில் ஸ்டவ் அடுப்பு மூலம் சமையல் செய்த போது,  உடையில் தீப்பற்றியது. அப்போது, அவரின் அலறல் சத்தம் கேட்டு அக்கம் பக்கத்தினர் அவரை மீட்டு, சிகிச்சைக்காக கோவை அரசு மருத்துவமனையில் சேர்த்தனர். இந்நிலையில் நேற்று அங்கிருந்து மேல் சிகிச்சைக்காக கேரள மாநிலம் கோழிகோடு அரசு மருத்துவமனைக்கு கொண்டு செல்லும் வழியில் பரிதாபமாக உயிரிழந்தார். இவருக்கு இரண்டு குழந்தைகள் உள்ளனர். இச்சம்பவம் குறித்து தேவாலா போலீசார் விசாரிக்கின்றனர்.

பவானி ஆற்றில் தண்ணீர் திருட்டு

ஈரோடு, மே 19: ஈரோடு மாவட்டத்தில் முக்கிய நீராதாரமாக விளங்கும் பவானி ஆற்றில் தண்ணீர் திருடப்பட்டு வருவதால், குடிநீர் தட்டுப்பாடு ஏற்படும் அபாயம் ஏற்பட்டுள்ளது. ஈரோடு மாவட்டத்தின் முக்கிய நீராதரமாக பவானிசாகர் அணையில் இருந்து, பவானி ஆற்றிலும், பாசன வாய்க்கால்களிலும் தண்ணீர் திறந்து விடப்படுகிறது. இதன் மூலம் பல ஹெக்டேர் விளை நிலங்களும், உள்ளாட்சி அமைப்புகளும் பயன்பெற்று வருகின்றன. இந்நிலையில் நடப்பாண்டு கோடை வெயில் சுட்டெரித்து வருவதாலும் குளம், குட்டைகள் உள்ள நீர் வறண்டு போகும் நிலை உருவாகியுள்ளது. இதில் தற்போது பவானி ஆற்றில் குடிநீருக்காக திறக்கப்பட்டுள்ளதால், ஆற்றில் குறைந்தளவு தண்ணீர் ஓடுகிறது. இந்த தண்ணீரை சிலர் மின் மோட்டார் மற்றும் ஆயில் மோட்டார்கள் மூலம் ஆற்றில் குழாய்களை பொருத்தி நேரடியாக தண்ணீரை திருடி வருகின்றனர். இன்னும் ஒரு சிலர் நீரினை உறிஞ்சி திருட்டு தனமாக வணிக ரீதியாகவும் விற்பனை செய்து வருகின்றனர். இதனால் கோடை காலத்தில் குடிநீர் தட்டுப்பாடு ஏற்படும் நிலை உருவாகி உள்ளது. எனவே, தண்ணீரை திருடுவோர்கள் மீது நடவடிக்கை எடுத்து மோட்டார்களை பறிமுதல் செய்ய மாவட்ட நிர்வாகமும், பொதுப்பணித்துறை அதிகாரிகளும் முன் வர வேண்டும் என பொதுமக்களும், விவசாயிகளும் கோரிக்கை விடுத்துள்ளனர்.

பைக்கில் இருந்து விழுந்த காவலாளி பலி

ஈரோடு,  மே 19: ஈரோடு பெரியசடையம்பாளையம் திருப்பதி கார்டன் பகுதியை சேர்ந்தவர்  தர்மராஜ் (65). இவர் திண்டலில் உள்ள தனியார் கல்லூரியில் வாட்ச்மேனாக  பணியாற்றி வந்தார். நேற்று முன்தினம் இரவு பணியை முடித்து கொண்டு டூவீலரில்  தனது வீட்டிற்கு சென்று கொண்டிருந்தார். சென்னிமலை ரோடு ஜீவா நகர் அருகே  வந்தபோது, எதிர்பாரதவிதமாக பைக்கில் இருந்து தவறி ரோட்டில் விழுந்தார்.  இதில் பலத்த காயம் அடைந்த அவரை அக்கம் பக்கத்தினர் மீட்டு ஈரோடு அரசு  மருத்துவமனையில் சேர்த்தனர். பின்னர் மேல் சிகிச்சைக்காக ஈரோட்டில் உள்ள  தனியார் மருத்துவமனையில் சேர்த்தனர். அங்கு சிகிச்சை பலனின்றி நேற்று  அதிகாலை பரிதாபமாக உயிரிழந்தார். இதுகுறித்து ஈரோடு தாலுகா போலீசார் வழக்கு  பதிவு செய்து விசாரணை நடத்தி வருகின்றனர்.

குன்னூர்-மேட்டுப்பாளையம் சாலையில் குட்டியுடன் யானை முகாம்

குன்னூர், மே 17:   குன்னூர் பகுதியில் உள்ள வனத்தில் தற்போது வறட்சி ஏற்பட்டுள்ளதால் காட்டு யானைகள் தண்ணீர், இரை தேடி குடியிருப்பு பகுதிகளுக்கு வருகின்றன. அப்போது சில சமயங்களில் மனித விலங்கு  மோதல் ஏற்படுகிறது. இதனால் உயிரிழப்பும் ஏற்படுகிறது. இதை தடுக்கும்  வகையில் வனத்துறையினர் சார்பில் பல்வேறு விழிப்புணர்வு நடவடிக்கைகள் எடுத்து வருகின்றனர். இந்நிலையில், குன்னூர்-மேட்டுப்பாளையம் மலைப்பாதையில் கே.என்.ஆர், பகுதியில் குட்டியுடன் யானை ஒன்று முகாமிட்டுள்ளது. இங்கு வரக்கூடிய சுற்றுலா பயணிகள் ஆர்வத்துடன் யனையை கண்டுசெல்கின்றனர். இதைஅறிந்து வந்த குன்னூர் வனத்துறையினர் யானை விரட்டும் பணியில் ஈடுப்பட்டுள்ளனர். இருந்த போதிலும் யானை வனத்திற்கு செல்லமால் இப்பகுதியிலேயே தொடர்ந்து முகாமிட்டுள்ளது. இதுகுறித்து வனத்துறையினர் கூறுகையில், ‘இந்த சாலையை கடந்து செல்லும் சுற்றுலா பயணிகள் வாகனங்களை நிறுத்தி புகைப்படம் எடுத்து யானையை துன்புறுத்த வேண்டாம்’ என்றனர்.

ஊட்டி நகரில் டிரோன் கேமரா இயக்கி சோதனை

ஊட்டி, மே 17: மலர் கண்காட்சி இன்று துவங்க உள்ள நிலையில் போக்குவரத்து சீரமைப்பிற்காகவும், பாதுகாப்பிற்காகவும் காவல் துறை சார்பில் நேற்று ஊட்டி நகரில் டிரோன் கேமரா இயக்கி சோதனை செய்யப்பட்டது. நீலகிரியில்  ஏற்பட கூடிய ேபாக்குவரத்து நெரிசல்களை தவிர்க்கவும், பார்க்கிங் வசதிகளை ஏற்படுத்தவும் பல்வேறு நடவடிக்கைகளை நீலகிரி மாவட்ட காவல்துறை எடுத்துள்ளது. நகரில் பொருத்தப்பட்டுள்ள 22 கண்காணிப்பு கேமராக்கள் மூலம் கண்காணித்து மூன்று மொழிகளில் ஒலிபெருக்கிகள் மூலம் எச்சரிக்ைக செய்யப்பட்டு சீரமைப்பு பணிகள் மேற்கொள்ளப்பட்டு வருகிறது. இதனிடையே இன்று துவங்கி 21ம் தேதி வரை 5 நாட்கள் ஊட்டி அரசு தாவரவியல் பூங்காவில் 123வது மலர் கண்காட்சி நடைபெற உள்ளது. இக்கண்காட்சியின் போது ஆயிரக்கணக்கான சுற்றுலா பயணிகள் ஊட்டிக்கு வருகை புரிய உள்ளனர். மேலும் கண்காட்சியை துவக்கி வைக்க தமிழக ஆளுநர் பன்வாரிலால் புரோகித் வர உள்ளார். இதனை தொடர்ந்து சுமார் ஆயிரத்திற்கும் மேற்பட்ட போலீசார் பாதுகாப்பு பணியில் ஈடுபட உள்ளனர். ஊட்டி நகரில் போக்குவரத்து சீரமைப்பிற்காகவும், குற்ற செயல்களை தவிர்க்கவும், பாதுகாப்பை பலப்படுத்தவும் 5 ஹெலிகேம் (டிரோன்) கேமராக்கள் மூலம் கண்காணிக்கவும் காவல்துறை முடிவு செய்யப்பட்டது. நேற்று மாவட்ட எஸ்.பி., சண்முகப்பிரியா முன்னிலையில் சேரிங்கிராஸ் பகுதியில் சோதனை செய்து பார்க்கப்பட்டது. மலர் கண்காட்சி நடைபெறும் 5 நாட்களிலும் கண்காணிப்பு மேற்கொள்ளப்பட உள்ளது. இதுகுறித்து எஸ்.பி., சண்முகபிரியா கூறுகையில், ‘‘மலர் கண்காட்சியை துவக்கி வைக்க தமிழக ஆளுநர் வர உள்ளார். மேலும் ஆயிரக்கணக்கான சுற்றுலா பயணிகள் வருகை புரிய உள்ளனர். இதனை முன்னிட்டு 5 டிரோன் கேமராக்கள் மூலம் கண்காணிப்பு மேற்கொள்ளப்பட உள்ளது. தாவரவியல் பூங்கா, படகு இல்ல சாலை, லவ்டேல் சந்திப்பு, படகு இல்லம், பிங்கர்போஸ்ட் உள்ளிட்ட பகுதிகளில் டிரோன் மூலம் கண்காணிக்கப்பட உள்ளது,’’ என்றார்.

காண்போரை மயக்கும் ரோஜா பூங்கா

ஊட்டி, மே 17: ஆண்டு  தோறும் இங்கு மே மாதம் ரோஜா கண்காட்சி நடத்தப்படுகிறது. இந்த ரோஜா  பூங்காவில், எங்கும் காண முடியாத ஊதா, பச்சை நிறங்களை கொண்ட ரோஜா  மலர்களும், ஹைபிரிட் ரோஜாக்கள், மினியேச்சர் ரோஜாக்கள் போன்ற வகைகளை  சேர்ந்த ரோஜா மலர்கள் உள்ளன. இது தவிர, ஊட்டி படகு இல்லம் எதிரே மரவியல்  பூங்கா உள்ளது. இந்த பூங்கா புதிதாக உருவாக்கப்பட்டாலும், இங்கு சுற்றுலா  பயணிகள் கண்டு களிக்க பல வகை மரங்கள் வைக்கப்பட்டுள்ளன. ரோஜா பூங்கா  மற்றும் மரவியல் பூங்காவிற்கு ஊட்டி மத்திய பஸ் நிலையம், ஏ.டி.சி., மற்றும்  சேரிங்கிராஸ் போன்ற பகுதிகளில் இருந்து எளிதாக ஆட்டோக்களின் மூலம்  செல்லலாம். மேற்கு தொடர்ச்சி மலைகள் மற்றும் கிழக்கு தொடர்ச்சி மலைகள்  சந்திக்கும் இடமும், இந்தியாவின் உயர்ந்த சிகரமுமான தொட்டபெட்டா காட்சி  முனை கடல் மட்டத்தில் இருந்து 2 ஆயிரத்து 623 மீட்டர் உயரம் கொண்டது. இங்கிருந்து  நீலகிரியின் பெரும்பாலான இடங்களை காணமுடியும். குறிப்பாக, சூரியன்  மேற்கில் மறைவதை காண்பது ஸ்பெஷல். தொட்டபெட்டா சிகரத்திற்கு ஊட்டியில்  இருந்து 10 கி.மீ., தூரம் உள்ளது. இதனை தனியார் கார்கள், சர்க்கீயூட்  பஸ்களில் சென்று காண முடியும். குன்னூர் சிம்ஸ் பூங்காவில், பல வகை  மரங்கள், மலர் செடிகள், சிறிய படகு இல்லம் ஆகியன உள்ளன. இந்த பூங்காவில்  உள்ள ருத்தராட்ச மரம் மிகவும் பிரசித்திப் பெற்றது. மேலும், இந்த  பூங்காவில் குறிஞ்சி மலர்கள், காட்டு சூரியகாந்தி பூ செடிகள் ஆகியன  சுற்றுலா பயணிகளை கவர்ந்து வருகிறது. இந்த பூங்காவில் ஆண்டுதோறும் மே மாதம்  நடக்கும் கோடை விழாவின் போது, பழக்கண்காட்சி நடத்தப்படுகிறது. இதில்,  ஏராளமான சுற்றுலா பயணிகள் கலந்துக் கொள்வது வழக்கம். 9 மணி முதல் மாலை 6  மணி வரை படகு சவாரி செய்யலாம். அதே போல், ஊட்டி அடுத்துள்ள பைக்காரா  அணையிலும் படகு சவாரி மேற்க்கொள்ளப்படுகிறது. இயற்கை எழில் கொஞ்சும்  மலைகளின் நடுவே உள்ள இந்த அணையில் சீறி பாய்ந்து செல்லும் படகுகளில் ஏறிச்  செல்ல சுற்றுலா பயணிகள் அதிகள் ஆர்வம் காட்டுகின்றனர். ஊட்டியில் இருந்து  22 கி.மீ., தொலையில் பைக்காரா படகு இல்லம் மற்றும் நீர் வீழ்ச்சி ஆகியவை  உள்ளன. இது தவிர, ஊட்டி - மைசூர் சாலையில் 13 கி.மீ., தொலைவில் சுற்றுலா  பயணிகள் கண்டு ரசிக்க கல்லட்டி நீர்வீழ்ச்சி, குன்னூரில் இருந்து 7 கி.மீ.,  தொலைவில் உள்ள லாஸ் நீர்வீழ்ச்சி, குன்னூர் - குந்தா செல்லும் சாலையில்  காட்டேரி நீர் வீழ்ச்சி, ஊட்டி - கூடலூர் செல்லும் வழித்தடத்தில் உள்ள  பைக்காரா நீர் வீழ்ச்சி, கோத்தகிரி - மேட்டுப்பாளையம் செல்லும்  வழித்தடத்தில் உள்ள கேத்ரின் நீர்விழ்ச்சி, மாயார் நீர் வீழ்ச்சி என பல  நீர் வீழ்ச்சிகள் சுற்றுலா பயணிகளை கவர்ந்து வருகிறது. மேலும்,  கோத்தகிரி அருகேயுள்ள கோடநாடு காட்சி முனை உள்ளது. கோத்தகிரியில் இருந்து  20.கி.மீ., தூரம் பயணித்தால் கோடநாடு காட்சி முனையை அடையலாம். இங்கிருந்து  தெங்குமரஹாடா, பவானி அணை மற்றும் ரங்கசாமி மலை ஆகியவைகளை காணலாம். கூடலூர்  அருகே ஊசி மலை காட்சி முனை, தவளை மலை காட்சி முனை ஆகியவைகள் உள்ளன.  கூடலூரில் இருந்து 10 கி.மீ.,ரும், ஊட்டியில் இருந்து 40 கி.மீ., தூரம்  பயணித்தால் இந்த காட்சி முனைகளை அடையலாம். மேலும், டால்பின் நோஸ் காட்சி  முனை, லேம்ஸ் ராக் காட்சி முனை ஆகியன உள்ளது. இவைகளை குன்னூர் பகுதியில்  இருந்து தனியார் வாகனங்கள் மற்றும் அரசு சர்க்கியூட் பஸ்களின் மூலம் சென்று  பார்க்கலாம். முதுமலை புலிகள் காப்பகத்தில் யானை சவாரி மற்றும்  ஜங்கிள் ரெய்டு ஆகியன உள்ளது. காலை மற்றும் மாலை நேரங்களில் அடர்ந்த  வனப்பகுதிகளுக்குள் சுற்றுலா பயணிகளை வனத்துறை அழைத்து சென்று யானை, புலி  மற்றும் சிறுத்தை போன்ற வன விலங்குகளை காண்பித்து வருகின்றனர். முதுமலைக்கு  மைசூரில் இருந்து எளிதாக வர முடியும். அதே போல் கோவை, சென்னை, மதுரை போன்ற  பகுதிகளில் இருந்து வரும் சுற்றுலா பயணிகள் ஊட்டி வந்த பின், ஊட்டியில்  இருந்து 30 கி.மீ., தொலைவில் உள்ள மசினகுடி பகுதிக்கு செல்ல வேண்டும்.  அங்கிருந்த கூடலூர் செல்லும் அரசு பஸ்களின் மூலம் தெப்பக்காடு பகுதிக்கு  சென்று முதுமலையை கண்டு ரசிக்கலாம். மேலும், மசினகுடி பகுதியில் உள்ள  தனியார் வாகனங்களில் முதுமலை சென்று அங்குள்ள இயற்கை அழகையும், வன  விலங்குகளையும் கண்டு ரசிக்கலாம்.  இந்த சுற்றுலா தலங்களையெல்லாம் காண  யுனஸ்கோவிடம் ‘பாரம்பரிய’ அந்தஸ்தை பெற்ற நீலகிரி மலை ரயில் மூலமே அதிகமான  சுற்றுலா பயணிகள் ஊட்டி வருகின்றனர்.

கூடலூரில் கொத்து கொத்தாக பூக்கும் நிஷாகந்தி பூக்கள்

கூடலூர், மே 17: கூடலூர் பகுதியில் கொத்துக் கொத்தாக பூத்துக்குலுங்கும் நிஷாகந்திப் பூக்களை சுற்றுலா பயணிகள் கண்டு ரசித்து செல்கின்றனர். கூடலூர் பஜார் அக்ரஹாரம் பகுதியில் இரவில் மட்டும் மலரும் நிஷாகந்தி பூக்கள் கொத்துக் கொத்தாக பூத்துக்குலுங்குகிறது. ஒரே செடியில் சுமார் 30க்கும் மேற்பட்ட வெண்ணிற மலர்கள் பூத்துள்ளதால் அப்பகுதி மக்கள் மற்றும் அவ்வழியாக செல்லும் சுற்றுலா பயணிகள் கண்டு ரசித்து செல்கின்றனர். இரவு 7 மணிக்கு மேல் மலரத்துவங்கும் இந்த பூ நள்ளிரவில் முழுமையாக விரிந்து  பின்னர் படிப்படியாக சுருங்கி காலையில் கருகிவிடும். ஒரு செடியில் வருடத்திற்கு ஒரு முறையே இது போன்ற மலர்கள் மலர்வது வழக்கம். இந்த மலர் மலர தொடங்கியதும் அந்த பகுதியை சுற்றிலும் நறுமணம் வீசுவதை உணர முடியும். இந்த மலரை சீனர்கள் அதிர்ஷ்ட மலராகக் கருதி தங்களது வீடுகளில் வளர்கின்றனர். பூக்களின் உள்ளே உள்ள மகரந்தம் மஹாவிஷ்னு பாற்கடலில் பள்ளி கொண்டது போல் காட்சியளிப்பது ஆச்சரியமான ஒன்றாகும். பெரும்பாலான செடிகளில் ஒன்று முதல் ஏழு பூக்கள் பூப்பது வாடிக்கை. ஆனால் அக்ரஹாரம் பகுதியில் இந்த வருடம் ஒரே செடியில் சுமார் 30க்கும் மேற்பட்ட மலர்கள் வெண்ணிறமாக பூத்து காட்சியளித்தன.