Politics - Dinakaran

மக்களவை தேர்தலுக்கான 7-ம் கட்ட வாக்குப்பதிவு 59 தொகுதிகளிலும் நிறைவு: 23-ம் தேதி வாக்கு எண்ணிக்கை

பீகார்: நாடு முழுவதும் கடந்த 2 மாதமாக நடந்து வந்த மக்களவை தேர்தல் முடிவடைந்தது. நாட்டின் 17-வது மக்களவை தேர்தலுக்கான வாக்குப்பதிவு, கடந்த ஏப்ரல் 11-ம் தேதி தொடங்கி 7 கட்டங்களாக நடைபெற்றது. கடந்த 12-ம் தேதியுடன் 6  கட்டத் தேர்தல் நடந்து முடிந்துள்ள நிலையில், 7 மாநிலங்கள் மற்றும் ஒரு யூனியன் பிரதேசம், பீகாரில் 8, ஜார்க்கண்டில் 3, மத்தியப் பிரதேசத்தில் 8, பஞ்சாபில் 13, சண்டீகரில் 1, உத்தரப் பிரதேசத்தில் 13, இமாசல பிரதேசத்தில் 4, மேற்கு  வங்கத்தில் 9 தொகுதிகள் என மொத்தம் 59 தொகுதிகளுக்கு, 7-வது மற்றும் இறுதி கட்டத் தேர்தலுக்கான வாக்குப்பதிவு இன்று காலை 7 மணிக்கு தொடங்கி மாலை 6 மணியுடன் நிறைவடைந்தது. தமிழகத்தில் 38 நாடாளுமன்ற தொகுதிக்கும், 18 சட்டமன்ற தொகுதிக்கான இடைத்தேர்தல் கடந்த மாதம் 18ம் தேதி நடைபெற்றது. வேலூர் நாடாளுமன்ற தொகுதியில் மட்டும் தேர்தல் ரத்து செய்யப்பட்டது. இந்நிலையில், தமிழகத்தில் மேலும்  காலியாக இருந்த சூலூர், அரவக்குறிச்சி, திருப்பரங்குன்றம், ஓட்டப்பிடாரம் ஆகிய 4 சட்டமன்ற தொகுதிக்கான இடைத்தேர்தல் இன்று நடைபெற்று முடிந்தது. இந்த 4 தொகுதியில் திமுக, அதிமுக, அமமுக, மக்கள் நீதி மய்யம், நாம் தமிழர்  கட்சி மற்றும் சுயேச்சை வேட்பாளர்கள் போட்டியிடுகின்றனர். சூலூர் தொகுதியில் 22 பேரும், திருப்பரங்குன்றம் தொகுதியில் 37 பேரும், ஓட்டப்பிடாரம் தொகுதியில் 15 பேரும், அரவக்குறிச்சி தொகுதியில் 63 பேர் என மொத்தம் 137 பேர்  போட்டியிடுகின்றனர் என்பது குறிப்பிடத்தக்கது. இன்று நடைபெற்ற 7-வது மற்றும் இறுதி கட்டத் தேர்தல் களத்தில் பிரதமர் மோடி உள்பட 918 வேட்பாளர்கள் களத்தில் இருந்தனர். இதில், உத்தரப் பிரதேசத்தில் நடக்கும் 13 தொகுதிகளில் வாரணாசியில் பிரதமர் மோடியை எதிர்த்து காங்கிரஸ்  சார்பில் அஜய் ராயும், சமாஜ்வாதி - பகுஜன் சமாஜ் கூட்டணி சார்பில் ஷாலினி யாதவும் போட்டியிடுகிறார்கள். மத்திய அமைச்சர்  மனோஜ் சின்ஹா, பாஜ மாநிலத் தலைவர் மகேந்திரநாத் பாண்டே ஆகியோர் மீண்டும் களத்தில் உள்ளனர்.  பஞ்சாப் மாநிலத்தில் 13 தொகுதிகளில் சிரோமணி அகாலி தளம் கட்சியின் தலைவர் சுக்பீர் சிங் பாதல், அவருடைய மனைவியும், மத்திய அமைச்சருமான ஹர்சிம்ரத் கவுர் பாதல், மற்றொரு மத்திய அமைச்சர் ஹர்தீப் சிங் புரி, நடிகர் சன்னி  தியோல் உள்ளிட்டோர் முக்கிய வேட்பாளர்கள். யூனியன் பிரதேசமான சண்டீகரில், பாஜ சிட்டிங் எம்பி கிரண் கெருக்கும், முன்னாள்  ரயில்வே அமைச்சரும், காங்கிரஸ் மூத்த தலைவருமான பவன் குமார் பன்சாலுக்கும் இடையே போட்டி  நிலவுகிறது. மேற்கு வங்கத்தில் திரிணாமுல் காங்கிரஸ், மார்க்சிஸ்ட், காங்கிரஸ், பாஜ என நான்குமுனைப் போட்டி நிலவி வருகிறது. மத்திய அமைச்சர்களான ரவிசங்கர் பிரசாத், ராம் கிருபால் யாதவ், ஆர்.கே.சிங், அஸ்வனி குமார் சவுபே  ஆகியோர் போட்டியிடுகின்றனர். ரவிசங்கர் பிரசாத் போட்டியிடும் பாட்னா சாகிப் தொகுதியில், அவரை எதிர்த்து பாஜவில் இருந்து விலகிய நடிகர் சத்ருகன் சின்ஹா, காங்கிரஸ் சார்பில் போட்டியிடுகிறார்.இதற்கிடையே, மாநில முதல்வர்கள், மத்திய அமைச்சர்கள், அரசியல் தலைவர்கள் தனது வாக்கினை பதிவு செய்தனர். லக்னோவில் உத்தரப்பிரதேச முதல்வர் யோகி ஆதித்யாநாத், பீகார் முதலமைச்சர் நிதிஷ் குமார்,  மத்திய சட்ட  அமைச்சரும் பாஜக மூத்த தலைவருமான ரவி சங்கர் பிரசாத், பிகார் துணை முதலமைச்சர் சுஷில் மோடி, முன்னாள் முதல்வர் ஜிதன் ராம் மாஞ்சி உள்ளிட்ட தலைவர்களும் தங்கள் வாக்குகளைப் பதிவு செய்தனர். மேற்கு வங்கத்தில் மாநில  பாஜக துணைத் தலைவர் சந்திர குமார் போஸ், கொல்கத்தாவில் உள்ள கல்லூரி ஒன்றில் அமைக்கப்பட்டிருந்த வாக்குச்சாவடியில் வாக்களித்தார். திரிணாமூல் காங்கிரஸ் தலைவர்களில் ஒருவருமான அபிஷேக் பானர்ஜி, இந்திய கிரிக்கெட்  அணியின் நட்சத்திர வீரரான ஹர்பஜன் சிங், பஞ்சாபின் ஜலந்தர் நகருக்கு அருகில் உள்ள கார்கில் கிராமத்தில் உள்ள வாக்குச் சாவடிக்கு காலையிலேயே வந்த ஹர்பஜன் சிங், வரிசையில் நின்று தனது வாக்கினை பதிவு செய்தார்.  இந்நிலையில், நாடு முழுவதும் கடந்த 2 மாதமாக நடந்து வந்த மக்களவை தேர்தல் முடிவடைந்தது. தேர்தல் முடிவுகள் வரும் 23-ம் தேதி வெளியாக உள்ளது. அன்றைய தினமே பாஜக தலைமையில் மீண்டும் நரேந்திர மோடி பிரதமராக  வருவாரா? இல்லை காங்கிரஸ் தலைமையிலான கூட்டணி வெற்றி பெறுமா? என தெரியவரும். இறுதிக்கட்ட தேர்தல் 6 மணி நிலவரம்: 7-ம் கட்ட மக்களவை தேர்தலில் மாலை 6 மணி நிலவரப்படி, உத்தரப்பிரதேசம் 54.37% வாக்குகளும், இமாச்சல்பிரதேசம் 66.18% வாக்குகளும்,  ஜார்கண்ட் 70.5% வாக்குகளும், சத்திஸ்கர் 63.57% வாக்குகளும், பஞ்சாப் 58.81% வாக்குகளும், மேற்குவங்கம் 73.05 % வாக்குகளும் , பீகார் 49.92% வாக்குகளும், மத்திய பிரதேசம் 69.38% வாக்குகளும் பதிவாகியுள்ளது.

சூலூர் இடைத்தேர்தலில் 148வது மையத்தில் வாக்குப்பதிவு நிறுத்தம்

சூலூர்: சூலூர் இடைத்தேர்தலில் 148வது மையத்தில் வாக்குப்பதிவு தற்காலிகமாக நிறுத்தப்பட்டுள்ளது. முதல் இயந்திரம் இருக்கும் இடத்தில் 2வது இயந்திரம் வைக்கப்பட்டதாக முகவர்கள் புகார் தெரிவித்துள்ளனர். வாக்கு இயந்திரங்கள் இடம்மாற்றி வைக்கப்பட்டதாக முகவர்கள் அளித்த புகாரில் வாக்குப்பதிவு நிறுத்தப்பட்டுள்ளது.

அரவக்குறிச்சியில் செய்தியாளர்களுக்கு போலீஸ் மிரட்டல்

கரூர்: அரவக்குறிச்சியில் வாக்காளர்களுக்கு அதிமுகவினர் பணம் கொடுத்ததை அம்பலப்படுத்திய செய்தியாளர்களுக்கு போலீஸ் மிரட்டல் விடுத்துள்ளனர். செய்தியை சேகரிக்க விடாமல் வாக்குச்சாவடியில் இருந்து நிருபர்களை அப்புறப்படுத்த போலீஸ் முயற்சிப்பதாக தகவல் வெளியாகியுள்ளது.

வாக்காளர்களுக்கு அதிமுக ரூ.300 கோடி வரை பணம் வழங்கி உள்ளதாக தங்க தமிழ்செல்வன் குற்றச்சாட்டு

சென்னை: வாக்காளர்களுக்கு அதிமுக ரூ.300 கோடி வரை பணம் வழங்கி உள்ளதாக அமமுக வேட்பாளர் தங்க தமிழ்செல்வன் குற்றம் சாட்டியுள்ளார். பலமுறை புகார் அளித்தும் தேர்தல் ஆணையம் நடவடிக்கை எடுக்கவில்லை எனவும் தெரிவித்தார். மத்தியில் பாஜக ஆட்சி அமைய ஒருபோதும் ஆதரவு தரமாட்டோம் எனவும் தெரிவித்தார்.

அரவக்குறிச்சி இடைத்தேர்தலில் 52.68% வாக்குப்பதிவு

கரூர்: அரவக்குறிச்சி இடைத்தேர்தலில் மதியம் 1 மணி நிலவரப்படி 52.68 சதவீத வாக்குகள் பதிவாகியுள்ளது. திருப்பரங்குன்றம் இடைத்தேர்தலில் பிற்பகல் 1 மணி நிலவரப்படி 41.52 சதவீத வாக்குகள் பதிவாகியுள்ளது.

தன் மீது காலணி வீசப்பட்டதையும் காந்தியின் வரலாற்று நிகழ்வையும் சுட்டிக்காட்டி கமல்ஹாசன் பேட்டி

சென்னை: தன் மீது காலணி வீசப்பட்டதையும் காந்தியின் வரலாற்று நிகழ்வையும் சுட்டிக்காட்டி கமல்ஹாசன் பேட்டியளித்துள்ளார். சென்னை வேளச்சேரியில் 'ஒத்த செருப்பு' திரைப்பட நிகழ்ச்சியில் மக்கள் நீதி மய்யம் தலைவர் கமல்ஹாசன் பேட்டியளித்துள்ளார். என் மீது செருப்பு வீசியவருக்கு தான் அவமானமே தவிர எனக்கு இல்லை என தெரிவித்துள்ளார்.

வாக்களிக்க வெளியூர்களில் இருந்து அரவக்குறிச்சி தொகுதிக்கு 4 பேருந்துகளில் வந்தவர்களிடம் விசாரணை

கரூர்: அரவக்குறிச்சி தொகுதிக்குட்பட்ட பள்ளப்பட்டியில் பேருந்துகளை நிறுத்தி போலீசார் விசாரணை நடத்துகின்றனர். வாக்களிக்க வெளியூர்களில் இருந்து அரவக்குறிச்சி தொகுதிக்கு 4 பேருந்துகளில் வந்தவர்களிடம் விசாரணை நடத்துகின்றனர். பேருந்தில் வந்த பயணிகளிடம் வாக்காளர் அடையாள அட்டைகளை கைப்பற்றி விசாரணை நடைபெறுகிறது.

அரவக்குறிச்சி இடைத்தேர்தலில் திமுக வெற்றி பெறுவது உறுதி : செந்தில் பாலாஜி

கரூர் : தேர்தல் நடத்தும் அலுவலர் மற்றும் காவல்துறையினர் ஆளுங்கட்சிக்கு ஆதரவாக செயல்படுகின்றனர் என்று செந்தில் பாலாஜி குற்றம் சாட்டியுள்ளார். அரவக்குறிச்சி இடைத்தேர்தலில் 50 ஆயிரம் வாக்குகள் வித்தியாசத்தில் திமுக வெற்றி பெறுவது உறுதி என்று அரவக்குறிச்சி தொகுதி திமுக வேட்பாளர் செந்தில் பாலாஜி செய்தியாளர்களிடம் தகவல் தெரிவித்தார்.

ஓட்டப்பிடாரம் தொகுதிக்குட்பட்ட அயிரவன்பட்டி வாக்குச்சாவடியில் வாக்குப்பதிவு நிறுத்தம்

தூத்துக்குடி: ஓட்டப்பிடாரம் தொகுதிக்குட்பட்ட அயிரவன்பட்டி வாக்குச்சாவடியில் வாக்குப்பதிவு நிறுத்தப்பட்டுள்ளது. திடீரென வாக்குப்பதிவு இயந்திரம் பழுதானதால் நிறுத்தி வைக்கப்பட்டுள்ளது.

கருமத்தம்பட்டியில் தாமதமாக வாக்குப்பதிவு தொடங்கியது

சூலூர்: கருமத்தம்பட்டியில் வேறு வாக்குப்பதிவு இயந்திரம் கொண்டுவரப்பட்டு தாமதமாக வாக்குப்பதிவு தொடங்கியது. வாக்குப்பதிவு இயந்திரத்தில் ஏற்பட்ட கோளாறினால் வாக்குப்பதிவு தொடங்காமல் இருந்தது நிலையில்  வேறு வாக்குப்பதிவு இயந்திரம் கொண்டுவரப்பட்டு தொடங்கியது.

சொல்லிட்டாங்க...

* எண்ணெய் சுத்திகரிப்பு ஆலை விரிவாக்கம் என உழவை அழிக்கும் மத்திய அரசு, எஞ்சிய நிலங்களையும் சீரழிக்க குழாய் பாதை திட்டத்தை செயல்படுத்த துடிக்கிறது. - பாமக நிறுவனர் ராமதாஸ்* மத்தியில் யார் பிரதமராக வருவார் என்பதை இப்போது உறுதி செய்ய முடியாது.  - கர்நாடக முதல்வர் குமாரசாமி* தமிழக அரசு அதிகாரிகள் கவலையின்றி அலட்சியப்போக்குடன் செயல்படுவதால், கெயில் நிறுவனம் விருப்பம்போல விளைநிலங்களை சீரழிக்கும் பணியை செய்து வருகிறது. - மதிமுக பொதுச்செயலாளர் வைகோ* கலவரத்தை தடுக்க வேண்டிய தேர்தல் ஆணையம் கமலின் கருத்து சுதந்திரத்தை தடுக்கும் வகையில் பிரசாரத்திற்கு தடை விதித்துள்ளது. - இந்திய கம்யூனிஸ்ட் மாநில துணை செயலாளர் சுப்பராயன்

இந்திரா காந்தியை போல நானும் கொல்லப்படலாம்: பாஜ மீது கெஜ்ரிவால் பகீர் புகார்

புதுடெல்லி: ‘‘முன்னாள் பிரதமர் இந்திரா காந்தியை போல், நானும் எனது பாதுகாவலர்களால் ஒருநாள் படுகொலை செய்யப்படுவேன். எனது உயிருக்கு பாஜ குறி வைத்துள்ளது,’’ என டெல்லி முதல்வர் அரவிந்த் கெஜ்ரிவால் திடுக்கிடும் குற்றச்சாட்டை கூறியுள்ளார். டெல்லி முதல்வரும், ஆம் ஆத்மி கட்சித் தலைவருமான அரவிந்த் கெஜ்ரிவாலுக்கும் பாஜ.வுக்கும் இடையே கடும் கருத்து வேறுபாடு நிலவுகிறது. இந்நிலையில், கடந்த வாரம் டெல்லியில் உள்ள மோதி நகரில் திறந்த ஜீப்பில் தேர்தல் பிரசாரத்தில் ஈடுபட்ட கெஜ்ரிவாலை ஒருவர் கன்னத்தில் அறைந்து பரபரப்பு ஏற்படுத்தினார். இதன் பின்னணியில் பாஜ இருப்பதாக ஆம் ஆத்மி குற்றம்சாட்டியது.இந்நிலையில், பஞ்சாப் மாநிலத்தில் இன்று தேர்தல் நடக்கும் 13 மக்களவை தொகுதிகளில், ‘ஜனநாயக ஜனதா கட்சி’யுடன் கூட்டணி அமைத்து ஆம் ஆத்மி போட்டியிடுகிறது. அதற்கான பிரசாரத்துக்காக இரு தினங்களுக்கு முன் பஞ்சாப் சென்ற கெஜ்ரிவால், அங்குள்ள செய்தி சேனலுக்கு பேட்டி அளித்தார். அதில் அவர் கூறியிருப்பதாவது: முன்னாள் பிரதமர் இந்திரா காந்தியை அவரது பாதுகாவலர்கள் கொன்றனர். அதேபோல், எனது பாதுகாவலர்களை பயன்படுத்தி, என்றாவது ஒரு நாள் என்னை படுகொலை செய்ய பாஜ கருதுகிறது. மத்திய அரசால் நியமிக்கப்பட்ட எனது பாதுகாவலர்கள், பாஜ.வுக்குதான் சாதகமாக பணியாற்றுவார்கள். எனது உயிருக்கு பாஜ குறி வைத்துள்ளது. நான் கொல்லப்பட்டதும், ‘கட்சி அதிருப்தி தொண்டர் கொலை செய்தார்’ என போலீசார் கூறுவார்கள். காங்கிரசில் அதிருப்தி தொண்டர் ஒருவர் இருந்தால், அவர் பஞ்சாப் முதல்வர் அமரீந்தர் சிங்கை கன்னத்தில் அறைவார் என அர்த்தமாகுமா? பாஜ அதிருப்தியாளர் பிரதமர் நரேந்திர மோடி மீது தாக்குதல் நடத்துவாரா? என்று கூறியுள்ளார். கெஜ்ரிவாலின் இந்த குற்றச்சாட்டை பாஜ மறுத்துள்ளது.டெல்லி போலீஸ் விளக்கம்:கெஜ்ரிவாலின் குற்றச்சாட்டு குறித்து டெல்லி போலீசின் கூடுதல் மக்கள் தொடர்பு அதிகாரி அனில் மிட்டல் கூறுகையில், ‘‘தொழில் ரீதியாக திறமையான பயிற்சி பெற்ற அதிகாரிகளும், காவலர்களும் தான் பாதுகாப்பு பிரிவில் சேர்க்கப்படுகிறார்கள். அவர்கள், தங்களுக்கு வழங்கப்பட்ட பாதுகாப்பு பணியில் அர்ப்பணிப்புடன் செயல்படுவதை தலையாய கடமையாக  கருதுவார்கள். நாட்டின் முக்கிய தலைவர்களுக்கும், அரசியல் கட்சி தலைவர்களுக்கும் எந்தளவுக்கு முக்கியத்துவம் அளித்து பாதுகாப்பு அளிக்கப்படுகிறதோ, அதற்கு இணையாக டெல்லி முதல்வருக்கும் கடமை உணர்வுமிக்க காவலர்கள் பாதுகாப்புக்கு அமர்த்தப்பட்டு உள்ளனர்,’’ என்றார்.

பத்திரிக்கையாளர் சந்திப்பில் மோடி மவுனம் பற்றி தலைவர்கள் கிண்டல்

புதுடெல்லி:  டெல்லியில் உள்ள பாஜ தலைமை அலுவலகத்தில் பிரதமர் நரேந்திர மோடியும், பாஜ தலைவர் அமித் ஷாவும் நேற்று முன்தினம் மாலை செய்தியாளர்களை சந்தித்தனர். பிரதமராக பொறுப்பேற்ற பிறகு கடந்த 5 ஆண்டுகளில் மோடி கலந்து கொண்ட முதல் செய்தியாளர்கள் கூட்டம் இது என்பதால் பெரும் எதிர்பார்ப்பு நிலவியது. ஆனால், மோடி எந்த கேள்விக்கும் பதில் அளிக்கவில்லை. இதை எதிர்க்கட்சி தலைவர்கள் சரமாரியாக கிண்டல் செய்துள்ளனர். காங்கிரஸ் தலைவர் ராகுல் டிவிட்டர் பதிவில், ‘கேள்வி கேட்க விரும்பிய நிருபர்களுக்கு கதவுகள் அடைக்கப்பட்டதாக தகவல். நீங்கள் தலைகாட்டியதே, பாதி போராட்டத்துக்கு வந்தது மாதிரி. அடுத்த முறை சில கேள்விகளுக்கு பதில் அளிக்க, அமித்ஷா உங்களை அனுமதிப்பார்’ என்று கூறியுள்ளார். சமாஜ்வாடி தலைவர் அகிலேஷ் யாதவ் டிவிட்டர் பதிவில், கண், காது, வாய் மூடி அமர்ந்திருக்கும் 3 குரங்குகளின் படத்தை வெளியிட்டு தனது கருத்தை பதிவு செய்துள்ளார். அதில், ‘பிரதமரின் முதல் பத்திரிக்கையாளர் சந்திப்பை பார்த்தீர்களா? இதுதான் மன் கி பாத் கடைசி நிகழ்ச்சி’ என குறிப்பிட்டுள்ளார். காஷ்மீர் முன்னாள் முதல்வர் உமர் அப்துல்லா டிவிட்டரில் விடுத்துள்ள செய்தியில், ‘பத்திரிக்கையாளர் வேடத்தில் அமர்ந்திருந்த பா.ஜ தொண்டர்களுக்கு நன்றி தெரிவிக்க அமித் ஷா மறக்கவில்லை,’ என கூறி ‘நானும் காவலாளி’ என்ற பிரசாரத்தில் பத்திரிக்கையாளர்களும் இணைந்து விட்டனர் என அமித்ஷா கூறிய செய்தியையும் இணைத்திருந்தார். இந்திய கம்யூனிஸ்ட் மூத்த தலைவர் டி.ராஜா கூறுகையில், ‘‘பிரதமர் மீதான குற்றச்சாட்டுக்கு, அவர்தான் பதில் அளிக்க வேண்டும். அவர்கள் ஏதையோ மறைப்பதுபோல் தெரிகிறது,’’ என்றார். முன்னாள் மத்திய அமைச்சர் ப.சிதம்பரம் கூறுகையில், ‘தேர்தல் முடிவு தவறாக இருந்தால் பழியை ஏற்க வேண்டிய நபர் அமித்ஷா என்ற தகவலை தெரிவிப்பதற்காகவே பிரதமர் மோடி, இந்த பத்திரிக்கையாளர் சந்திப்பில் கலந்து கொண்டார் என நினைக்கிறேன்,’’ என்றார். மகாராஷ்டிரா நவநிர்மாண் சேனா தலைவர் ராஜ் தாக்கரே கூறுகையில், ‘‘இது மோடியின் ‘மவுன் கி பாத்’ (மவுன பேச்சு)’’ என்றார். மோடியின் இந்த பத்திரிகையாளர் சந்திப்பு, சமூக வலைதளங்களிலும் நெட்டிசன்களால் கடும் விமர்சனத்துக்கும், கேலிக்கும் உள்ளாகி இருக்கிறது. மீம்ஸ்களால் மோடியை வாட்டி வருகின்றனர்.

மோடி, அமித் ஷாவுக்கு ஆதரவான முடிவுகளால் தேர்தல் ஆணையர் லவசா போர்க்கொடி: ‘ஆணைய கூட்டங்களில் பங்கேற்க மாட்டேன்’ என கடிதம்

புதுடெல்லி: பிரதமர் மோடி, பாஜ தலைவர் அமித்ஷா மீதான தேர்தல் நடத்தை விதிமுறை மீறல் புகார்கள் மீது எடுக்கப்பட்ட முடிவுகளால் அதிருப்தி அடைந்துள்ள தேர்தல் ஆணையர் அசோக் லவசா, ‘இனிமேல் நடக்கும் நடத்தை விதிமுறை மீறல் ஆலோசனை கூட்டங்களில் பங்கேற்க மாட்டேன்’ என அறிவித்திருப்பது பெரும் பரபரப்பை ஏற்படுத்தியுள்ளது. மக்களவை தேர்தலை முன்னிட்டு, கடந்த இரு மாதங்களாக நாடு முழுவதும் பிரசாரங்கள் நடந்தன. இதில் அரசியல் கட்சி தலைவர்கள் பலர் சர்ச்சைக்குரிய கருத்துகளை தெரிவித்தனர். இது குறித்து தேர்தல் ஆணையத்திடம் அரசியல் கட்சிகள் பரஸ்பரம் ஏராளமான புகார்களை அளித்தன. இந்த புகார்களை குழுக்கள் அமைத்து தேர்தல் ஆணையம் விசாரித்து நடவடிக்கை எடுத்து வந்தது. பிரதமர் மோடி, பா.ஜ தலைவர் அமித்ஷா ஆகியோரும் தேர்தல் பிரசாரங்களில் தெரிவித்த சில கருத்துக்கள் தேர்தல் நடத்தை விதிமுறைகளுக்கு எதிரானது என தேர்தல் ஆணையத்திடம் எதிர்க்கட்சிகள் புகார் செய்தன. மகாராஷ்டிராவில்  நடந்த தேர்தல் பிரசாரத்தில் பேசிய பிரதமர் மோடி, ‘முதல் முறையாக வாக்களிப்பவர்கள் தங்கள் வாக்குகளை, பாகிஸ்தானின் பாலக்கோட்டில் தாக்குதல் நடத்திய வீரர்களுக்கு  அர்ப்பணிக்க வேண்டும்’ என்று கூறினார். இது குறித்தும் தேர்தல் ஆணையத்திடம் புகார் செய்யப்பட்டது. மேற்கு வங்கத்தில் நடந்த பிரசாரத்தில் பேசிய பாஜ தலைவர் அமித் ஷா, ‘ராணுவ வீரர்கள் மோடியின் படை’ என குறிப்பிட்டார். இது குறித்தும் தேர்தல் ஆணையத்தில் புகார் செய்யப்பட்டது. இது போன்ற புகார்களை ஆய்வு செய்யும்போது, தலைமை தேர்தல் ஆணையரும், 2 தேர்தல் ஆணையர்களும் ஒரேவிதமான முடிவுக்கு முன்னுரிமை அளிக்க வேண்டும்,  மாறுபட்ட கருத்துகள் தெரிவிக்கப்பட்டால் பெரும்பான்மை கருத்து அடிப்படையில் முடிவெடுக்க வேண்டும் என தேர்தல் ஆணையம் சட்டம் கூறுகிறது. பிரதமர் மோடி, அமித்ஷா மீதான புகார்களை விசாரித்த தேர்தல் ஆணையம், இருவரும் தேர்தல் நடத்தை விதிமுறையை மீறவில்லை என தெரிவித்தது.   ஆனால், மோடி மற்றும் அமித்ஷாவுக்கு எதிரான புகார்களில் தேர்தல் ஆணையர் அசோக் லவசா 11 முறை மாறுபட்ட கருத்துகளை தெரிவித்துள்ளார். இருவரின் மீதும் நடத்தை விதிமுறை மீறல் சட்டப்படி நடவடிக்கை எடுக்க வேண்டும் என இவர் கூறியது நிராகரிக்கப்பட்டது. தலைமை தேர்தல் ஆணையரும், மற்றொரு ஆணையரும் மோடி, அமித் ஷாவுக்கு ஆதரவாக தங்கள் கருத்தை பதிவு செய்ததால், பெரும்பான்மை அடிப்படையில் அவர்களின் உத்தரவு அமல்படுத்தப்பட்டது. இதனால் அதிருப்தி அடைந்துள்ள அசோக் லவசா, தலைமை தேர்தல் ஆணையர் சுனில் அரோராவுக்கு கடந்த 4ம் தேதி ஒரு கடிதம் எழுதினார். அதில், ‘மைனாரிட்டி கருத்து அடிப்படையில் நான் கூறுவது பதிவு செய்யப்படுவதில்லை. இதனால், தேர்தல் ஆணையர்களின் கூட்டத்தில் நான்  பங்கேற்பது அர்த்தமற்றதாகிறது. எனவே, இனிமேல் நடக்கும் தேர்தல் நடத்தை விதிமுறை மீறல் தொடர்பான கூட்டங்களில் இருந்து விலகி இருக்க நான் நிர்பந்திக்கப்பட்டு உள்ளேன்’ என கூறியுள்ளார். இது தொடர்பான தகவல் ஊடகங்களில் வெளியானதால், தேர்தல் ஆணையர்கள் இடையே கருத்து வேறுபாடு, மோதல் ஏற்பட்டு இருப்பதாக பரபரப்பு ஏற்பட்டுள்ளது. மக்களவை தேர்தல் இறுதிக்கட்டத்தை எட்டியுள்ள நிலையில், தேர்தல் ஆணையர் அசோக் லவசா தெரிவித்துள்ள அதிருப்தி, தேர்தல் ஆணையத்துக்கு தர்மசங்கடத்தை ஏற்படுத்தியுள்ளது. விரும்பத் தகாத சம்பவம் தலைமை ஆணையர் வருத்தம்:தேர்தல் ஆணையர் அசோக் லவசா விவகாரம் குறித்து தலைமை தேர்தல் ஆணையர் சுனில் அரோரா நேற்று விடுத்துள்ள அறிக்கையில், ‘தேர்தல் நடத்தை விதிமுறை தொடர்பான ஆலோசனை கூட்டங்களில் இருந்து விலகி இருக்க, தேர்தல் ஆணையர் அசோக் லவசா முடிவு செய்துள்ளதாக வெளியான தகவல் விரும்பத்தகாதது, தவிர்க்க கூடியது. மக்களவை தேர்தலை நடத்துவதில் எழும் பிரச்னைகளை ஆலோசிக்க குழுக்கள் அமைக்க ஒருமனதாக முடிவு செய்யப்பட்டது. நடத்தை விதிமுறை மீறல் புகார்களை விசாரிக்கும்போது, தேர்தல் ஆணையத்தின் 3 ஆணையர்கள் தெரிவிக்கும் கருத்துக்கள் ஒரேவிதமாக இருக்க வேண்டும் என எதிர்பார்க்க முடியாது. இதற்கு முன்பும் மாறுபட்ட கருத்துக்கள் தெரிவிக்கப்பட்டு உள்ளன. ஆனால், தேர்தல் ஆணையத்தின் வரையறைக்கு உட்பட்டே இறுதி முடிவுகள் இருந்தன’ என கூறியுள்ளார்.விசாரணை நடத்த காங். வலியுறுத்தல்:காங்கிரஸ் தகவல் தொடர்பாளர் ரன்தீப் சுர்ஜிவாலா நேற்று விடுத்துள்ள அறிக்கையில், ‘மூன்று தேர்தல் ஆணையர்களில் ஒருவரான அசோக் லவசா, பிரதமர் மோடி - அமித் ஷாவுக்கு எதிராக பலமுறை மாறுபட்ட கருத்துகளை தெரிவித்துள்ளார். தேர்தல் நடத்தை விதிமுறை மீறல் தொடர்பாக இருவருக்கும் நோட்டீஸ் அனுப்பும்படி லவசா கூறியும், அவருடைய கருத்து பதிவு செய்யப்படவில்லை. மாறாக  மோடி, அமித் ஷாவுக்கு தேர்தல் ஆணையம் நற்சான்றிதழ் வழங்கியுள்ளது. அரசியல் சாசன அமைப்பாக இருக்கும் தேர்தல் ஆணையம், மைனாரிட்டி கருத்தையும் பதிவு செய்ய வேண்டும். ஆனால், மோடியையும், அமித் ஷாவையும் பாதுகாப்பதற்காக அரசியல் சாசன விதிமுறைகள் நசுக்கப்பட்டுள்ளன,’ என கூறியுள்ளார். மூத்த காங்கிரஸ் தலைவர் அகமது படேல் கூறுகையில், ‘‘தேர்தல் ஆணையர் அசோக் லவசா எழுப்பிய குற்றச்சாட்டு குறித்து நம்பகமான விசாரணை நடத்தப்பட வேண்டும். அவர் எழுப்பியுள்ள பிரச்னையால், தேர்தல் நடைமுறையின் புனிதத்தன்மைக்கும், தேர்தல் ஆணையத்தின் ஒற்றுமைக்கும் ஆபத்து ஏற்பட்டுள்ளது,’’ என்றார்.

தேர்தல் நடத்தை விதிமுறைகளை மீறி நகை, பணம் பட்டுவாடா நாட்டிலேயே அதிகபட்சமாக தமிழகத்தில் 950 கோடி பறிமுதல்: 2வது இடம்-குஜராத் 552 கோடி 3வது இடம்-டெல்லி 426 கோடி

சென்னை: தேர்தல் தேதி அறிவிக்கப்பட்டதும், தேர்தல் நடத்தை விதிமுறை அமலுக்கு வந்தது. அதன்படி அனுமதி இல்லாமல் பணம், நகை எடுத்துச்செல்ல தேர்தல் ஆணையம் கடும் கட்டுப்பாடுகளை விதித்தது. இதையும் மீறி பணம், நகைகளை எடுத்துச் சென்றதாக தமிழகத்தில் மட்டும் ₹950 கோடி சிக்கியுள்ளது. அந்த வகையில் தமிழகம் இந்தியாவிலேயே தமிழகம் முதலிடம் வகிக்கிறது. ₹552 கோடி கைப்பற்றப்பட்டு குஜராத் 2வது இடத்திலும், ₹426 கைப்பற்றப்பட்டு டெல்லி 3வது இடத்திலும் உள்ளது. நாடு முழுவதும் மக்களவை பொதுத்தேர்தல் குறித்தான அதிகாரப்பூர்வ அறிவிப்பை இந்திய தலைமை தேர்தல் ஆணையர் சுனில் அரோரா கடந்த மார்ச் மாதம் 10ம் தேதி அறிவித்தார். அதன்படி, நாடு முழுவதும் 7 கட்டங்களாக தேர்தல் நடைபெறும் என்று அறிவிக்கப்பட்டது. தமிழகத்தில் 2வது கட்டமாக, கடந்த ஏப்ரல் 18ம் தேதி நடைபெற்றது. பின்னர் 4 சட்டமன்ற தொகுதிக்கான இடைத்தேர்தல் மட்டும் கடைசி கட்டமாக மே 19ம் தேதி (இன்று) நடைபெறும் என்று அறிவிக்கப்பட்டது.அதன்படி, தேர்தல் நடத்தை விதிமுறைகள் இந்தியா முழுவதும் கடந்த மார்ச் 10ம் தேதி மாலையில் இருந்து நடைமுறையில் உள்ளது. பிரதமர், முதல்வர், அமைச்சர்கள், எம்பி, எம்எல்ஏக்கள் கட்சி பணிகளில் மட்டுமே ஈடுபட வேண்டும். அரசு பணிகளில் ஈடுபடக்கூடாது என்று உத்தரவிடப்பட்டது. மேலும், அனுமதி இல்லாமல் வாகனங்களில் ₹50 ஆயிரத்துக்கும் மேல் எடுத்துச் செல்லக்கூடாது, தங்கம், வெள்ளி, பரிசு பொருட்கள் மற்றும் மதுபானங்கள் வாகனங்களில் போதிய ஆவணங்கள் இல்லாமல் எடுத்துச் செல்லக்கூடாது என்று தேர்தல் ஆணையம் உத்தரவிட்டது. அனுமதி இல்லாமல் இப்படி எடுத்துச் செல்லும் பணம் மற்றும் நகைகள் வாக்காளர்களுக்கு கொடுக்க பயன்படுத்தப்படலாம் என்பதால் தேர்தல் ஆணையம் இந்த நடவடிக்கை எடுத்து வந்தது. தமிழகத்திலும் தேர்தல் நடத்தை விதிமுறைகள் கடந்த மார்ச் 10ம் தேதியில் இருந்து அமலுக்கு வந்துள்ளதாக தமிழக தலைமை தேர்தல் அதிகாரி சத்யபிரதா சாஹு கூறினார். வாகனங்களை சோதனையிடுவதற்காக பறக்கும் படை, கண்காணிப்பு குழுக்கள் அமைக்கப்பட்டது. அதன்படி கடந்த 75 நாட்களாக தேர்தல் பறக்கும் படையினர், கண்காணிப்பு குழுவினர், வருமான வரித்துறையினர் நாடு முழுவதும் 24 மணி நேரமும் சோதனையில் ஈடுபட்டனர். தற்போது, கடைசி கட்ட தேர்தல் இன்று நடைபெற உள்ளது. அதன்படி, நேற்றுடன் இதுபோன்ற வாகன சோதனை ஓரளவுக்கு முடிவுக்கு வந்துவிட்டது. நாளை முதல் வாகனங்கள் சோதனை நடத்த வாய்ப்பு இல்லை. இந்த நிலையில், கடந்த மார்ச் 10ம் தேதி முதல் நேற்று முன்தினம் வரை (17ம் தேதி) நாடு முழுவதும் தேர்தல் ஆணையம் கைப்பற்றியுள்ள பணம், நகை, மதுபானங்கள் உள்ளிட்ட விவரங்களை நேற்று வெளியிட்டுள்ளது. அதன்படி, இந்தியா முழுவதும் பணம், நகை, மதுபானம், பரிசு பொருட்கள் என மொத்தமாக ₹3439.38 கோடி பறிமுதல் செய்யப்பட்டுள்ளது. பணமாக ₹836.70 கோடி, மதுபானம் ₹291.18 கோடி, போதை பொருட்கள் ₹1267.71 கோடி, தங்கம், வெள்ளி ₹985.67 கோடி, பரிசு பொருட்கள் ₹58.13 கோடி கைப்பற்றப்பட்டுள்ளது.இதில் அதிகபட்சமாக தமிழகத்தில்தான் பணம் மற்றும் தங்க நகை கைப்பற்றப்பட்டுள்ளதாகவும் இந்திய தேர்தல் ஆணையம் அறிவித்துள்ளது. அதன்படி தமிழகத்தில் மட்டும் பணம், நகையாக மொத்தம் ₹950.08 கோடி சிக்கியுள்ளது. 2வது இடத்தில் குஜராத் மாநிலம் உள்ளது. அங்கு ₹552.62 கோடி கைப்பற்றப்பட்டுள்ளது. 3வது இடத்தில் டெல்லி உள்ளது. அங்கு ₹426.1 கோடி கைப்பற்றப்பட்டுள்ளது. அதேபோன்று பணமாக மட்டும் கைப்பற்றியதிலும் தமிழகம்தான் முதலிடத்தில் உள்ளது. ₹227.93 கோடி பணம் பறிமுதல் செய்யப்பட்டுள்ளது. இதில் பறக்கும் படையினர் மற்றும் வருமான வரித்துறையினர் கைப்பற்றியதும் அடங்கும். 2வது இடத்தில் ஆந்திராவும் (₹139.21 கோடி), 3வது இடத்தில் தெலுங்கானா (₹70.98 கோடி) சிக்கியுள்ளது. அனுமதி இல்லாமல் தங்கம் மற்றும் வெள்ளி எடுத்துச் சென்றதிலும் தமிழகம்தான் முதலிடத்தில் உள்ளது. அதன்படி, தமிழகத்தில் ₹709.67 கோடி (3113 கிலோ) மதிப்புள்ள தங்கம், வெள்ளி சிக்கியுள்ளது. 2வது இடத்தில் உத்தரபிரதேசம் (₹71.79 கோடி), 3வது இடத்தில் மகாராஷ்டிரம் (₹71.21 கோடி) பறிமுதல் செய்யப்பட்டுள்ளது. தமிழகத்தில், அதிகபட்சமாக ₹950 கோடி பறிமுதல் செய்யப்பட்டாலும் சிறு வியாபரிகள், தங்க வியாபாரிகள், ஏடிஎம் இயந்திரத்துக்கு பணம் எடுத்துச் சென்றவர்களிடம் தான் தேர்தல் ஆணையம் தங்கள் கைவரிசையை காட்டியது. அடுத்து, எதிர்க்கட்சிகளை குறிவைத்தே வருமான வரி சோதனையும் நடத்தப்பட்டது. பண நடமாட்டம் அதிகம் நடந்ததாக புகார் கூறியும், ஆளுங்கட்சியான அதிமுக பிரமுகர்களை தேர்தல் ஆணையம் கண்டுகொள்ளவில்லை என்பது குறிப்பிடத்தக்கது.

‘பாஜ.வில் இருந்து பிரக்யா சிங்கை நீக்க வேண்டும்’

புதுடெல்லி:  பிரக்யா சிங்குக்கு  சமூக சீர்திருத்தவாதி கைலாஷ் சத்யார்த்தி கடும் கண்டனம் தெரிவித்துள்ளார். போபால் மக்களவை தொகுதி பாஜ வேட்பாளரான பிரக்யா சிங் தாகூர், `மகாத்மா காந்தியை சுட்டுக் கொன்ற கோட்சே ஒரு தேசபக்தர்’ என்றார். இதற்கு நாடு முழுவதும் பலத்த எதிர்ப்பு கிளம்பியது. பிரதமர் மோடியும் பிரக்யாவை கண்டித்தார். இந்நிலையில், நோபல் பரிசு பெற்ற சமூக சீர்திருத்தவாதியான கைலாஷ் சத்யார்த்தி நேற்று வெளியிட்ட டிவிட்டர் பதிவில், ‘காந்தியின் உடலைதான் கோட்சே கொன்றார். ஆனால், பிரக்யா போன்றவர்கள் இந்தியாவின் ஆன்மாவை கொன்று வருகின்றனர். அகிம்சை, அமைதி, சகிப்புத்தன்மையை கொன்று விட்டனர். காந்தி அரசியலுக்கு அப்பாற்பட்டவர். எனவே, பிரக்யாவை பாஜ.விலிருந்து நீக்க வேண்டும்’ என கூறியுள்ளார்.

பரபரப்பான நிலையில் இன்று 4 தொகுதி இடைத்தேர்தல் தமிழகத்தில் ஆட்சி மாற்றம் ஏற்படுமா?: சட்டப்பேரவையில் அதிமுகவுக்கு பெரும்பான்மை இல்லாததால் சிக்கல்

சென்னை: தமிழக பேரவையில் அதிமுகவுக்கு பெரும்பான்மை இல்லாத நிலையில், 4 சட்டமன்ற தொகுதிக்கான இடைத்தேர்தல் இன்று நடைபெறுகிறது. இந்த தேர்தல் முடிவுகள் தமிழகத்தில் ஆட்சி மாற்றத்தை ஏற்படுத்தும் என்பதால் அதிக பரபரப்பை ஏற்படுத்தியுள்ளது. தமிழகத்தில், காலியாக உள்ள அரவக்குறிச்சி, திருப்பரங்குன்றம், சூலூர், ஓட்டப்பிடாரம் ஆகிய 4 சட்டமன்ற தொகுதிகள் மற்றும் மறுவாக்குப்பதிவு நடைபெறும் 13 வாக்குச்சாவடிகளில் இன்று காலை 7 மணிக்கு வாக்குப்பதிவு தொடங்கி மாலை 6 மணி வரை நடைபெறுகிறது. தமிழகத்தில் இன்று நடைபெறும் 4 தொகுதிக்கான இடைத்தேர்தல் மிகவும் முக்கியத்துவம் வாய்ந்ததாக கருதப்படுகிறது. காரணம், தமிழகத்தில் மொத்தம் 22 சட்டமன்ற தொகுதிகள் காலியாக இருந்தது. அதில் 18 இடங்களுக்கு கடந்த ஏப்ரல் 18ம் தேதி இடைத்தேர்தல் நடைபெற்றது. மேலும் 4 தொகுதிகளுக்கு இன்று தேர்தல் நடைபெறுகிறது. தற்போது தமிழகத்தில் ஆளுங்கட்சியாக உள்ள அதிமுகவுக்கு இந்த 22 தொகுதிகளில் குறைந்தபட்சம் 9 அல்லது 10 இடங்களில் வெற்றிபெற்றால் மட்டுமே ஆட்சியை தக்கவைக்க முடியும் என்ற சூழ்நிலை உள்ளது. ஆனால் நடந்து முடிந்த 18 சட்டமன்ற தொகுதிகளில் 4 இடங்களில்தான் அதிமுக வெற்றிபெற வாய்ப்புள்ளதாக கருத்துக்கணிப்புகள் தெரிவிக்கின்றன. அதனால், இன்று நடைபெறும் அரவக்குறிச்சி, சூலூர், ஓட்டப்பிடாரம், திருப்பரங்குன்றம் ஆகிய 4 தொகுதிகளிலும் அதிமுக வெற்றிபெற்றே ஆக வேண்டும் என்ற சூழ்நிலை ஏற்பட்டுள்ளது. இதனால் அந்த தொகுதியில் உள்ள வாக்காளர்களுக்கு அதிமுக சார்பில் ₹2 ஆயிரம் முதல் ₹5 ஆயிரம் வரை கொடுக்கப்பட்டுள்ளதாக கூறப்படுகிறது. அதேபோன்று, டி.டி.வி.தினகரனும் தன் கட்சியின் செல்வாக்கை நிரூபிக்க இந்த தொகுதிகளில் வெற்றிபெற வேண்டும் என்று திட்டமிட்டு செயல்பட்டு வருகிறார். அவரும் வாக்காளர்களுக்கு பணம் கொடுத்துள்ளார்.ஆனால், அதிமுக ஆட்சியால் தமிழக மக்கள் பல பிரச்னைகளை அனுபவித்து வருவதாக கூறுகிறார்கள். குறிப்பாக நீட் தேர்வில் இருந்து தமிழகத்திற்கு விலக்கு கிடைக்கவில்லை. ஸ்டெர்லைட் ஆலையை மீண்டும் திறக்க முயற்சி செய்வது, விவசாய கடனை ரத்து செய்ய மறுத்து வருவது, தஞ்சாவூர் மற்றும் டெல்டா பகுதியில் கஜா புயல் பாதிப்பில் போதிய நிவாரணம் கிடைக்கவில்லை, பிரதமர் மோடி வந்து பார்க்காதது, மீண்டும் ஹைட்ரோ கார்பன் திட்டம் கொண்டு வர முயற்சி, இளைஞர்களுக்கு வேலைவாய்ப்பு இல்லாமல் போனது, ஜிஎஸ்டி வரியால் சிறு குறு தொழில்கள் பாதிப்பு என தொடர்ந்து தமிழகத்திற்கு விரோதமாக மத்திய அரசு நடந்து வருகிறது. இதை ஆளும் அதிமுக அரசும் எதிர்க்காமல், பிரதமர் மோடிக்கு ஆதரவு அளித்து வருவது மக்களிடம் ஒரு கொந்தளிப்பை ஏற்படுத்தி வருகிறது. இதனால் தமிழகத்தில் ஆட்சி மாற்றம் வர வேண்டும் என்று பொதுமக்களும் நினைக்கிறார்கள். அதனால் இந்த 4 தொகுதி தேர்தலில் தங்கள் வாக்குகள் மூலம் ஆளும் மத்திய, மாநில அரசுக்கு பதில் அளிக்க திட்டமிட்டுள்ளதாக அப்பகுதி மக்கள் கூறுகிறார்கள். சமீபத்தில் நடந்து முடிந்த மக்களவை தேர்தல் பிரசாரத்தில் கூட, முதல்வர் எடப்பாடி கடந்த 7 ஆண்டுகளாக தமிழகத்தில் அதிமுக ஆட்சி செய்த சாதனைகளை கூறி வாக்கு கேட்கவில்லை. மாறாக, மோடி மீண்டும் பிரதமர் ஆனால் தமிழகத்தில் பல்வேறு திட்டங்களை கொண்டு வர முடியும் என்கிறார். சில அமைச்சர்கள், மோடி தான் எங்களுக்கு டேடி என்று பேசினர்.கடந்த 5 ஆண்டு ஆதரவு கொடுத்தபோதே ஒரு திட்டமும் கொண்டு வர முடியாமல், தமிழக மக்களுக்கு எதிரான திட்டங்களைதான் மத்திய அரசு தமிழக மக்களுக்கு செய்து வருகிறது. இந்த நிலையில் மீண்டும் மோடி ஆட்சிக்கு வந்தால் எப்படி தமிழகத்துக்கு நல்லது கிடைக்கும் என்று எதிர்க்கட்சிகளும், பொதுமக்களும் கேள்வி எழுப்பினர். இதுபோன்ற பரபரப்பான சூழ்நிலையில்தான் இன்று 4 சட்டமன்ற தொகுதிக்கான இடைத்தேர்தல் நடைபெறுகிறது. தமிழகத்தில் மொத்தமுள்ள 234 தொகுதிகளில் 230 தொகுதிகளில் அதிகாரத்தையும் இந்த 4 தொகுதி மக்கள் அளிக்கபோகும் வாக்கில்தான் உள்ளது என்பதால் இன்று நடைபெறும் இடைத்தேர்தல் முக்கியத்துவம் வாய்ந்ததாக கருதப்படுகிறது. இதுகுறித்து எதிர்க்கட்சி தலைவர்கள் கூறும்போது, இந்த 4 தொகுதி மக்கள் மீண்டும் அதிமுகவுக்கு வாக்களித்தால் தமிழகத்தை இன்னும் 30 வருஷத்துக்கு பின்நோக்கி அழைத்து சென்றுவிடும் என்றும் எச்சரித்துள்ளனர். இதுபோன்ற பரபரப்பான சூழ்நிலையில் இன்று நடைபெறும் 4 தொகுதி இடைத்தேர்தலில் வாக்களிக்க அப்பகுதி மக்கள் வாக்களிக்க தயாராகி விட்டார்கள். இதன் அடிப்படையில், தமிழகத்தில் நிச்சயம் ஆட்சி மாற்றம் ஏற்பட அதிக வாய்ப்புள்ளதாகவே அரசியல் நிபுணர்களும் கருதுகிறார்கள்.

மத்தியில் காங்கிரஸ் ஆட்சி அமைய மதச்சார்பற்ற ஜனதா தளம் முழு ஆதரவு கொடுக்கும்: முதல்வர் குமாரசாமி உறுதி

பெங்களூரு: மக்களவை தேர்தல் முடிவு வெளியாகிய பின் மத்தியில் காங்கிரஸ்  தலைமையில் அமையும் கூட்டணி அரசுக்கு மதச்சார்பற்ற ஜனதா தளம் முழு ஆதரவு தரும் என்று கர்நாடக முதல்வர் எச்.டி.குமாரசாமி கூறியுள்ளார்.முன்னாள்  பிரதமர் எச்.டி.தேவகவுடாவின் 87வது பிறந்த நாளை முன்னிட்டு அவருடன்  திருப்பதிக்கு சென்று சாமி தரிசனம் செய்து திரும்பியபின் செய்தியாளர்களிடம்  கர்நாடக முதல்வர் குமாரசாமி கூறியதாவது: கர்நாடக மாநிலத்தில் மக்களவைக்கு இரு கட்டமாக நடந்த  தேர்தலில் மொத்தம் உள்ள 28 தொகுதிகளில் மஜத  - காங்கிரஸ் கூட்டணி 18 முதல் 20  தொகுதிகளில் வெற்றி பெறும். மஜத - காங்கிரஸ் கூட்டணி ஆட்சி அமைக்க இரு கட்சிகளும் முடிவு செய்தபோது, மக்களவை தேர்தலில் காங்கிரஸ் கட்சியுடன் கூட்டணி அமைப்பதுடன் மத்தியில் காங்கிரசுக்கு முழு ஆதரவு கொடுப்பது என்று முடிவு செய்யப்பட்டுள்ளது. அதன்படி வரும் மக்களவை தேர்தல் முடிவு எப்படி அமைந்தாலும் காங்கிரசுக்கு முழு ஒத்துழைப்பு கொடுப்போம். காங்கிரஸ் தலைமையிலான ஐக்கிய முற்போக்கு கூட்டணி அதிக தொகுதிகளில் வெற்றி பெற்று ஆட்சி அமைத்தாலும் சரி, ஆட்சி அமைக்க முடியாமல் எதிர்க்கட்சியில் அமரும் சூழ்நிலை வந்தாலும் காங்கிரசுக்கு முழு ஆதரவும், ஒத்துழைப்பும் கொடுப்போம்.  இதில் எந்த மாற்றமும் கிடையாது. மத்தியில் யார் பிரதமராக வருவார் என்பதை இப்போது உறுதி செய்ய முடியாது. மஜதவின் ஆதரவு காங்கிரஸ் கட்சிக்கு மட்டுமே  என்றார். பேட்டியின் போது உடனிருந்த முன்னாள் பிரதமர் தேவகவுடாவும் இதை  உறுதி செய்தார்.

மகனுக்கு நெருக்கடி ஆண்டாள் கோயிலில் ஓபிஎஸ் தரிசனம்

திருவில்லிபுத்தூர்: தேனி மக்களவை தொகுதி அதிமுக வேட்பாளரான ஓபிஎஸ் மகன் ரவீந்திரநாத்குமார் எம்பி என, வாக்கு எண்ணிக்கைக்கு முன்பே, குச்சனூர் கோயில் கல்வெட்டில் குறிப்பிட்டதையடுத்து துணை முதல்வர் ஓ.பன்னீர்செல்வம் குடும்பத்தினருடன், திருவில்லிபுத்தூர் ஆண்டாள் கோயிலுக்கு நேற்று காலை 8 மணிக்கு வந்தார். கோயில் வளாகத்தில் உள்ள மூல கருடாழ்வாரை தரிசனம் செய்தார். தொடர்ந்து ஆண்டாள் சன்னதியில் கொடிமரத்தை தொட்டு வணங்கிய ஓபிஎஸ், காராம்பசுவிற்கு தாமரை மாலை அணிவித்து வணங்கினார். பின் ஆண்டாள், ரெங்கமன்னாரை தரிசனம் செய்தார். பின்னர் குடும்பத்தினருடன், திருவில்லிபுத்தூர் அருகே செண்பகத்தோப்பில் உள்ள குலதெய்வ கோயிலான பேச்சியம்மன் கோயிலுக்கு சென்றார். அங்கு உச்சிக்கால பூஜையில் ஓபிஎஸ் கலந்து கொண்டார்.

இடைத்தேர்தல் நடைபெற உள்ள 4 தொகுதிகளில் இரவில் பணப்பட்டுவாடா: தலைமை தேர்தல் அதிகாரியிடம் திமுக புகார்

சென்னை: திமுக அமைப்பு செயலாளர் ஆர்.எஸ்.பாரதி தலைமை செயலகத்தில் தமிழக தலைமை தேர்தல் அதிகாரி சத்யபிரதா சாகுவை சந்தித்து மனு ஒன்றை அளித்தார். அதில் கூறியிருப்பதாவது: வாக்காளர்களை வரவழைத்து பணப்பட்டுவாடா நடைபெற்று கொண்டிருக்கிறது. பணத்தை எடுத்து வரும் வாகனம் மின்சாரத்துறையின் வாகனம் ஆகும். 1 மணி நேரம் மின் நிறுத்தம் செய்து, மின்சாரத்துறையின் வாகனத்தை எடுத்து செல்வது போல பணத்தை கொண்டு சென்றுள்ளனர்.ஓட்டப்பிடாரத்திலும், அரவக்குறிச்சியிலும் தான் இது போன்ற சம்பவங்கள் நடைபெற்றதாக முதலில் தெரியவந்தது. இதே போல் சூலூர், திருப்பரங்குன்றத்தில் பணப்பட்டுவாடா நடைபெற்றுள்ளது. குறிப்பிட்ட 7 அமைச்சர்கள் ஓட்டப்பிடாரத்துக்கு பக்கத்தில் ஓட்டினால் போல் தான் பார்டி ஆபிஸ் உள்ளது. சட்டத்தில் இருந்து தப்புவதற்காக இது போன்று பணப்பட்டுவாடாவில் ஈடுபட்டு வருகின்றனர். இவ்வாறு அவர் கூறினார்.