Politics - Dinakaran

கூட்டணி குறித்து மிக விரைவில் அறிவிப்பு: முரளிதரராவ் பேட்டி

சென்னை: கூட்டணி குறித்து மிக விரைவில் அறிவிப்பு வெளியிடப்படும் என பாஜக மேலிட பொறுப்பாளர் முரளிதரராவ் தெரிவித்துள்ளார். கூட்டணி குறித்து தலைவர்களை சந்தித்து பேச தமிழகம் வந்துள்ளோம், புல்வாமா தாக்குதல் நாட்டுக்கு விடப்பட்ட சவால், அதை அரசியலாக்க வேண்டாம் எனவும் தெரிவித்துள்ளார்.

காவல்துறையில் மிகப்பெரிய முறைகேடு நடந்துள்ளது: திமுக தலைவர் மு.க.ஸ்டாலின் குற்றசாட்டு

சென்னை: காவல்துறைக்கு டிஜிட்டல் ரேடியோ சிஸ்டம் டெண்டரில் மிகப்பெரிய ஊழல் நடந்திருப்பதாக ஸ்டாலின் அறிக்கையில் தெரிவித்துள்ளார். டிஜிபி ராஜேந்திரனும், முதல்வர் எடப்பாடியும் ரூ.88 கோடி ஊழல் செய்துள்ளனர் என ஸ்டாலின் குற்றம் சாட்டியுள்ளார். ரூ.38 கோடியில் செயல்படுத்த வேண்டிய திட்டத்துக்கு ரூ.88 கோடி செலவிடப்பட்டுள்ளதாக அவர் தெரிவித்துள்ளார். ஊழல் செய்யும் நோக்கத்தில் ஒருவரிடம் டிஜிட்டல் ரேடியோ ஒப்பந்தம் வழங்கப்பட்டுள்ளது என ஸ்டாலின் குற்றம் சாட்டியுள்ளார்.

பாஜக நெருக்கடிக்கு அதிமுக பணியுமா? தொகுதி பங்கீட்டில் இழுபறி; மீண்டும் பேச்சு நடத்த வருகிறார் பியூஷ் கோயல்

சென்னை: அதிமுக - பாரதிய ஜனதா கட்சிகளிடையே தொகுதி பங்கீட்டில் இழுபறி நீடிப்பதால் மீண்டும் பேச்சுவார்த்தை நடத்துவதற்காக மத்திய அமைச்சர் பியூஷ் கோயல் ஓரிரு நாட்களில் சென்னை வர உள்ளார். நாடாளுமன்ற தேர்தலில் அதிமுக - பாரதிய ஜனதா கட்சி கூட்டணி உறுதியாகிவிட்டாலும், தொகுதி பங்கீடு குறித்து இறுதி முடிவு எடுக்கப்படவில்லை. கடந்த வியாழக்கிழமை நள்ளிரவில் மத்திய அமைச்சர் பியூஷ் கோயல் முன்னிலையில் 3 மணி நேரம் நடைபெற்ற பேச்சுவார்த்தையிலும் தீர்வு காணப்படவில்லை. பாரதிய ஜனதா கட்சி 10-க்கும் மேற்பட்ட தொகுதிகளை கேட்கும் நிலையில் அதிமுக 8 தொகுதிகளுக்கு மேல் தர மறுத்துவிட்டதாக கூறப்படுகிறது. இரட்டை இலக்க எண்ணில் சீட் தர முடியாது. ஒற்றை இலக்க எண்ணில் தான் சீட் தர முடியும் என்று அதிமுக உறுதியாக கூறி விட்டது. அதுவும் நாங்கள் தரும் இடத்தில் தான் போட்டியிட வேண்டும். குறிப்பிட்டு தொகுதிகளை கேட்கக்கூடாது என்றது. அதிமுகவின் கண்டிஷனை கேட்டு பாஜ அதிர்ந்து போனது. ஆனால் சென்னை மற்றும் காஞ்சிபுரம் மாவட்டங்களில் அதிமுக விரும்பும் தொகுதிகளையே பாஜகவும் கேட்பதால் பேச்சுவார்த்தையில் இழுபறி நீடிக்கிறது. இருப்பினும் ஓரிரு நாட்களில் தொகுதி பங்கீடு பேச்சுவார்த்தை முடித்துவிடுவது என்பதில் பாஜக உறுதியுடன் உள்ளது. இதற்காக மத்திய அமைச்சர் பியூஷ் கோயல் மீண்டும் சென்னை வந்து பேச்சுவார்த்தை நடத்த உள்ளார். அதிமுக - பாஜக தொகுதி பங்கீடு உறுதியானதும் கூட்டணியில் இடம்பெறும் கட்சிகளுக்கு தொகுதிகளை ஒதுக்க 2 கட்சி தலைவர்களும் முடிவு செய்துள்ளனர். இதனால் அடுத்த வாரத்தில் அதிமுக கூட்டணி இறுதி வடிவம் பெறும் என எதிர்பார்க்கப்படுகிறது.

மத்தியிலும், மாநிலத்திலும் ஆட்சி மாற்றத்தை வேண்டி மக்களை தேடி வந்துள்ளேன்: திமுக தலைவர் ஸ்டாலின் பேச்சு

தேனி: மே மாதத்துக்கு பிறகு திமுக அங்கம் பெரும் புதிய மத்திய அரசு அமையும் என தேனி அருகே வடபுதுப்பட்டி ஊராட்சி சபை கூட்டத்தில் திமுக தலைவர் ஸ்டாலின் பேசியுள்ளார். மத்தியிலும், மாநிலத்திலும் ஆட்சி மாற்றத்தை வேண்டி மக்களை தேடி வந்துள்ளேன் எனவும் ஸ்டாலின் கூறியுள்ளார். மேலும் திருவாரூர், திருப்பரங்குன்றம் உள்பட 21 தொகுதியில் தேர்தலை எதிர்பார்த்து கொண்டு இருக்கிறோம் என ஸ்டாலின் கூறியுள்ளார்.

நடிகர், நடிகைகள் கண்டனம்

சென்னை : காஷ்மீரில் தீவிரவாதிகள் தாக்குதலில் 40 துணை ராணுவ வீரர்கள் பலியான சம்பவத்துக்கு நடிகர், நடிகைகள் கண்டனம் தெரிவித்துள்ளனர். காஷ்மீரில் புல்வாமா மாவட்டத்தில் துணை ராணுவ வீரர்கள் சென்ற பஸ் மீது வெடிகுண்டுகள் நிரப்பிய வாகனத்தை மோத செய்து தீவிரவாதிகள் தாக்குதல் நடத்தினர். இதில் 40 வீரர்கள் பலியாகினர். இந்த சம்பவத்தை நடிகர், நடிகைகள், இயக்குனர்கள் டிவிட்டரில் கண்டித்துள்ளனர். அதன் விவரம்: ரஜினிகாந்த்: காஷ்மீர் புல்வாமாவில்  தீவிரவாதிகள் நடத்திய வன்முறை தாக்குதல்களை நான் வன்மையாக கண்டிக்கிறேன். பொறுத்தது போதும்...இதுபோன்ற காட்டுமிராண்டித்தனமான செயல்களுக்கு முற்றுப்புள்ளி வைக்க வேண்டிய நேரம் வந்துவிட்டது. உயிரிழந்த அனைத்து ஜவான்களின் குடும்பங்களுக்கும் எனது ஆழ்ந்த இரங்கலை தெரிவித்துக் கொள்கிறேன். கமல்ஹாசன்: ஜம்மு-காஷ்மீர் ஆளுநரின் ஆலோசகர் விஜயகுமாரை தொடர்பு கொண்டு பேசினேன். நாடு இருக்கும் இந்த இக்கட்டான சூழலில் ஒவ்வொரு இந்திய குடிமகனும் உங்களின் மற்றும் உங்கள் குழுவினரின் பணிகளோடு தோளோடு தோளாக இருப்போம் என உறுதி அளித்தேன். விஷால்: புல்வாமாவில் தீவிரவாதிகள் நடத்திய கொடூர தாக்குதல் கண்டிக்கத்தக்கது. நாட்டுக்காக வீரர்கள் தங்களது உயிரை தியாகம் செய்துள்ளனர். பலியான வீரர்களின் குடும்பத்துக்கு ஆழ்ந்த இரங்கல்.மகேஷ்பாபு: இந்த தாக்குதல் பற்றி அறிந்ததும் கவலை அடைந்தேன். வீரர்களின் குடும்பத்துக்கு இரங்கல் தெரிவிக்கிறேன். அவர்களின் மன வலிமைக்காக பிரார்த்திக்கிறேன்.சூர்யா: இந்த தாக்குதலால் இதயம் நொறுங்கியிருக்கிறது. கடுமையாக கண்டிக்கத்தக்கது. ஜெயம் ரவி: பயங்கரவாத தாக்குதல் நெஞ்சை பதற செய்கிறது. பலியானவர்களின் குடும்பத்துக்கு இரங்கல். அவர்களின் வலிமைக்கு பிரார்த்திப்போம். பிரகாஷ்ராஜ்: இந்த சம்பவம் அதிர்ச்சியை தந்துள்ளது. உயிரிழந்த வீரர்களின் குடும்பத்துக்கு துணையாக நிற்க வேண்டிய தருணம் இது. இந்த நேரத்தில் குற்றம் சுமத்தும் அரசியல் விளையாட்டு வேண்டாம். அரசும் மக்களும் ஒருங்கிணைந்து நல்ல தீர்வுக்கு வழி தேட வேண்டும். ராதிகா: இது மோசமான தாக்குதல். இந்த நேரத்தில் வீரர்களின் குடும்பத்துக்காக மனம் வருந்துகிறேன். பூஜா ஹெக்டே: அன்பை வெளிப்படுத்தும் நாளில் வெறுப்பை கக்கும் இந்த கொடூர தாக்குதல் நடத்தப்பட்டுள்ளது. நமது அன்பை பலியான வீரர்களின் குடும்பத்துக்கு வெளிப்படுத்தும் நேரமிது. அத்துடன் அவர்களின் வாழ்க்கையில் ஒளியை கொண்டு வர முயற்சிப்போம்.

சொல்லிட்டாங்க...

எதிர்க்கட்சிகள் காஷ்மீர் தாக்குதலை அரசியல் ஆக்க வேண்டாம். வேற்றுமை மறந்து ஒற்றுமையாக ஒருங்கிணைந்து தீவிரவாதிகளை எதிர்க்க வேண்டும்.காஷ்மீரில் நடந்தது மிகப் பெரிய சோகமான நிகழ்வு. இது அரசியல் செய்வதற்கான நேரமல்ல.பாரதிய ஜனதாவோடு கூட்டணி வைக்கலாம், வைக்கக்கூடாது என அதிமுகவிலேயே இருவேறு கருத்துக்கள் நிலவி வருகிறது.தமிழகத்தின் நலனுக்காக நாடாளுமன்றத்தில் அதிமுக குரல் கொடுத்தது. அதற்கும் அதிமுக கூட்டணி அமைப்பதற்கும் எந்த சம்பந்தமும் இல்லை.

அதிமுக கூட்டணி ஓரிரு நாளில் முடிவு

சென்னை: அதிமுக கூட்டணி ஓரிரு நாளில் முடிவு செய்யப்பட்டு அறிவிக்கப்படும் என்று துணை முதல்வர் ஓ.பன்னீர்செல்வம் கூறினார். அதிமுக ஒருங்கிணைப்பாளரும், தமிழக துணை முதல்வருமான ஓ.பன்னீர்செல்வம் சென்னையில் நேற்று நிருபர்களுக்கு பேட்டி அளித்தார். அவர் கூறியதாவது: மக்களவை தேர்தல் கூட்டணி குறித்து அதிமுக சார்பில் தேசிய கட்சிகளுடனும், மாநில கட்சிகளுடனும் தொடர்ந்து பேச்சுவார்த்தை நடத்தி வருகிறோம். இன்னும் ஓரிரு நாளில் நல்ல முடிவு வரும். அதிமுகவில் விருப்ப மனு அளித்தவர்களிடம் இன்னும் ஒரு சில தினங்களில் நேர்காணல் நடைபெறும். அதன்பிறகு அதிமுக வேட்பாளர் பட்டியல் வெளியிடப்படும். மக்களவை தேர்தலில் நடிகர் ரஜினிகாந்த் ஆதரவை கேட்பீர்களா? என்று நிருபர்கள் கேட்டதற்கு பதில் அளிக்கவில்லை.

அதிமுக ஆட்சி அகற்றப்பட வேண்டும்: மு.க.ஸ்டாலின் பேச்சு

செம்பட்டி: தமிழகத்தில் ஆட்சி அகற்றப்பட வேண்டும் என திமுக தலைவர் மு.க.ஸ்டாலின் பேசினார். திண்டுக்கல் மாவட்டம் நிலக்கோட்டையில் வாக்குச்சாவடி திமுக முகவர் கூட்டம் நேற்று மாலை நடந்தது. கூட்டத்தில் திமுக தலைவர் மு.க.ஸ்டாலின் பேசியதாவது: தமிழகத்தில் 18 எம்எல்ஏக்களின் பதவியை, சபாநாயகர் தனது அதிகாரத்தை பயன்படுத்தி பறித்தார். அந்த தொகுதி எம்எல்ஏக்கள் தகுதி நீக்கம் செய்யப்பட்டனர். ஓசூர் தொகுதி சட்டசபையை காலியாக உள்ளதாக அறிவிக்க வேண்டும். ஆனால் சபாநாயகர் இன்னும் அறிவிக்கவில்லை. நாடாளுமன்ற தேர்தல் வருகிறதா அல்லது மீண்டும் 234 தொகுதிகளுக்கும் சட்டசபை தேர்தல் வர உள்ளதா என்பது தெரியவில்லை. அதிமுக அரசு மைனாரிட்டி ஆட்சியாக நடந்து வருகிறது. உடனடியாக அதிமுக ஆட்சியை அகற்ற வேண்டிய சூழல் உள்ளது. பொதுமக்களே அதிகம் எதிர்பார்த்து உள்ளனர்.அதிமுக ஆட்சியில் முதல்வர் எடப்பாடி பழனிசாமி, பினாமிகளுக்கு ஒப்பந்தங்களை கொடுக்கிறார். குட்கா ஊழல், திட்டப்பணிகளுக்கு லஞ்சம் என சகட்டுமேனிக்கு ஊழல் நடக்கிறது. இவற்றையெல்லாம் தாண்டி கொடநாட்டில் கொலை நடந்தது. அதை மறைப்பதற்காக 5 கொலைகள் நடந்தன. ஜெயலலிதாவிடம் பணிவாக இருந்தவர், சசிகலாவிடம் தவழ்ந்து சென்று பதவியை பிடித்தவர் முதல்வர். விரைவில் சிறைக்கு செல்ல உள்ளார்.இவ்வாறு அவர் பேசினார். பள்ளப்பட்டியில் தி.மு.க. சார்பில் ஊராட்சி சபை கூட்டம் நேற்று நடந்தது. கூட்டத்திற்கு தி.மு.க.  தலைவர் மு.க.ஸ்டாலின் தலைமை வகித்து பேசியதாவது: தமிழகம் முழுவதும் 90 சதவீதத்திற்கு மேல் கூட்டங்களை நடத்தி உள்ளோம். குறிப்பிட்ட சில இடங்களுக்கு மட்டுமே நான் செல்ல முடிந்தது. கடந்த ஜனவரி 3ம் தேதி இந்த பயணத்தை தொடங்கினோம். தமிழ்நாட்டில் மட்டுமல்ல; இந்தியாவில் மட்டுமல்ல; வேறு எங்குமே இது மாதிரியான கிராம சபை கூட்டத்தை யாருமே நடத்தியது கிடையாது. மக்களுக்கு பயன்படக்கூடிய, பயனளிக்கக்கூடிய வகையில் இதுபோன்ற கூட்டத்தை தி.மு.க. நடத்தி வருகிறது. மத்தியில் மோடி தலைமையிலும், தமிழகத்தில் அதிமுக தலைமையிலும் ஒரு கொடுமையான ஆட்சி நடக்கிறது. 5 வருட ஆட்சி முடிய போகும் நிலையில், 2 ஆயிரம் ரூபாய் கொடுக்கிறோம் என மாறி, மாறி அறிவிக்கின்றனர். இது ஓட்டுகளை பெறுவதற்காக வெளியிடப்படும் அறிவிப்புகள்தான். தொழிற்சாலைகளை தொடங்கவில்லை. படித்த பட்டதாரிகளுக்கு வேலை கிடைக்கவில்லை.  பெண்களுக்காக எத்தனையோ சிறப்பான அறிவிப்புகளை வெளியிட்டுள்ளது தி.மு.க. ஆட்சியில்தான். பெண்களுக்கு சொத்தில் சம உரிமை, ஆரம்ப பள்ளிக்கூடங்களில் பெண்களையே ஆசிரியர்களாக நியமிப்பது போன்ற திட்டங்கள், மகளிர் சுய உதவி குழுக்களுக்கான சுழல் நிதி போன்ற அருமையான திட்டங்களை கொண்டு வந்தோம். தி.மு.க. ஆட்சிக்கு வந்த பின்னரே விவசாயிகளுக்கு கடன், இலவச மின்சாரம் போன்ற உதவிகளை வழங்கினோம். கிராமங்களில் அடிப்படை தேவைகளை நிறைவேற்ற, உள்ளாட்சி தேர்தல் நடத்த வேண்டியது அவசிய தேவையாகும். திமுக ஆட்சிக்கு வந்ததும், முதல் வேலையாக உள்ளாட்சி தேர்தல் நடத்தப்படும்.இவ்வாறு அவர் பேசினார்.கூட்டத்தில், நிலக்கோட்டை ஒன்றியத்தின் பல்வேறு கிராம ஊராட்சிகளை சேர்ந்த 25 பேருக்கும் மேற்பட்ட பெண்கள், குடிநீர், கழிவுநீர் கால்வாய், திருமண மண்டபம் வசதிகள் கோரி மனு அளித்தனர். கூட்டத்தில், மாநில துணை பொதுச்செயலாளரும், முன்னாள் அமைச்சருமான ஐ.பெரியசாமி, திண்டுக்கல் மாவட்டச் செயலாளர்கள் ஐ.பி.செந்தில்குமார், அர.சக்கரபாணி உள்பட பலர் கலந்து கொண்டனர்.உயிரிழந்த 40 வீரர்களுக்கு 2 நிமிட மவுன அஞ்சலிஊராட்சி சபை கூட்டம் தொடங்குவதற்கு முன்பு காஷ்மீரில் தற்கொலை படை தாக்கியதில் உயிரிழந்த ராணுவ வீரர்களுக்கு 2 நிமிடம் மவுன அஞ்சலி செலுத்தப்பட்டது. இதன்பின், மு.க.ஸ்டாலின் பேசுகையில், ``தீவிரவாதிகள் நடத்திய பயங்கர தாக்குதலில் சி.ஆர்.பி.எப். வீரர்கள் 40 பேர் பலியானதற்கு, அஞ்சலி செலுத்த வேண்டிய நிலையில் நாம் உள்ளோம். குறிப்பாக, தமிழ்நாட்டை சேர்ந்த 2 பேரை இழந்த குடும்பத்துக்கு, இந்த ஊராட்சி சபை சார்பில் ஆழ்ந்த இரங்கலை தெரிவித்துக்கொள்கிறோம்’’ என்று குறிப்பிட்டார். அப்போது, அனைவருமே ஒருவித சோகத்துடன் காணப்பட்டனர்.

அரசியலில் எல்லாமே கலப்படம்தான்: தம்பிதுரை பேட்டி

கரூர்: அரசியலில் எல்லாமே கலப்படம்தான்’ என்று தம்பிதுரை கூறினார். கரூரில் நேற்று, மக்களவை துணை சபாநாயகர் தம்பிதுரை நிருபர்களிடம் கூறியதாவது: அதிமுகவில் யார் வேண்டுமானாலும் சீட் கேட்டு விண்ணப்பிக்கலாம். ஆனால் யாருக்கும் கியாரண்டி கிடையாது. ஒருவேளை சுகாதாரத்துறை அமைச்சர் விஜயபாஸ்கரின் தந்தை சின்னதம்பிக்கு கரூர் தொகுதியை கட்சி ஒதுக்கினால் அவரது வெற்றிக்காக பாடுபடுவேன். இதில் கருத்து வேறுபாடு இல்லை. தேர்தல் கூட்டணி குறித்து முடிவெடுக்க அதிமுகவில் குழு உள்ளது. அந்த குழுவில் நான் இல்லை. எனவே கூட்டணி குறித்து நான் எதுவும் கூற முடியாது. தமிழகத்தின் நலனுக்காக நாடாளுமன்றத்தில் அதிமுக குரல் கொடுத்தது. அதற்கும் கூட்டணிக்கும் எந்த சம்பந்தமும் இல்லை. இவ்வாறு தம்பிதுரை கூறினார். திருப்பூர் பொதுக்கூட்டத்தில் பிரதமர் மோடி, எதிர்க்கட்சிகள் கலப்பட கூட்டணி அமைத்திருப்பதாக பேசியது குறித்து கேட்டபோது, அரசியலில் எல்லாமே கலப்படம்தான் என்று தம்பிதுரை கூறினார்.

கூட்டணி கட்சிகளால்அதிமுகவுக்கு பலம் இல்லை: அன்வர்ராஜா எம்.பி. பேட்டி

ராமநாதபுரம்:  கூட்டணி கட்சிகளால் அதிமுகவுக்கு பலமில்லை’ என்று அன்வர்ராஜா எம்.பி. தெரிவித்து இருக்கிறார்.  ராமநாதபுரம் மாவட்ட அரசு தலைமை மருத்துவமனைக்கு எம்.பி. தொகுதி நிதியிலிருந்து பேட்டரி காரை அன்வர்ராஜா எம்.பி. நேற்று வழங்கினார். பின்னர் அவர் நிருபர்களிடம் கூறியதாவது: கூட்டணிக்கும், கொள்கைக்கும் சம்பந்தமே இல்லை. கூட்டணியை பொறுத்தவரை தேர்தலுக்கு முன், தேர்தலுக்கு பின் என உள்ளது. தேர்தலில் வாக்குகளை சிதறவிடாமல் நாடாளுமன்றத்தில் எம்.பி.க்கள் எண்ணிக்கையை கூட்டுவதற்காகத்தான் கூட்டணி. எந்த கட்சிகளோடு கூட்டணி என்பது பற்றி தலைவர்கள் பேசிக்கொண்டிருக்கின்றனர். அதிமுகவுக்கு கூட்டணி கட்சிகளால் பலம் இல்லை. எங்களோடு கூட்டணி சேரும் கட்சிகளுக்குத்தான் பலன். மத்தியில் எந்த கட்சி ஆட்சிக்கு வந்தாலும் தமிழ்நாட்டின் உரிமைகளை போராடித்தான் பெற வேண்டியுள்ளது. நாடாளுமன்றத்தை முடக்கி போராடியதால்தான் மத்திய அரசு காவிரி மேலாண்மை வாரியம் அமைத்தது. இவ்வாறு அன்வர்ராஜா கூறினார்.

தமிழகத்தில் வலுவான பாஜ கூட்டணி அமையும்: மத்திய சட்ட அமைச்சர் ரவிசங்கர் பிரசாத் நம்பிக்கை

அவனியாபுரம்: தமிழகத்தில் பாஜ கூட்டணி வலுவாக அமையும் என மத்திய சட்டத்துறை அமைச்சர் ரவிசங்கர் பிரசாத் தெரிவித்தார். மதுரை விமானநிலையத்தில் நேற்று அவர் நிருபர்களிடம் கூறியதாவது:ஜம்மு காஷ்மீரில் உயிரிழந்த பாதுகாப்பு படை வீரர்களின் தியாகம் வீண் போகாது. உலக நாடுகள் இந்த தாக்குதலுக்கு கண்டனம் தெரிவித்துள்ளன. மற்ற நாடுகளிடமிருந்து பாகிஸ்தான்  தனிமைப்படுத்தப்பட்டுள்ளது. தகுந்த பதிலடி கொடுப்போம். தமிழகத்தின் வளர்ச்சிக்கு பாஜ பல்வேறு திட்டங்களை, குறிப்பாக எய்ம்ஸ், ஸ்மார்ட் சிட்டி, முத்ரா கடன் உள்ளிட்ட திட்டங்களை செயல்படுத்தியுள்ளது. மத்திய அரசு, தூய்மை இந்தியா திட்டத்தில் 10 கோடி கழிப்பிடங்களை நாடு முழுவதும் கட்டியுள்ளது. தமிழகத்தில்  52 லட்சம்  கழிப்பறைகள் கட்டப்பட்டுள்ளன. முத்ரா கடன் திட்டத்தில் 17 கோடி ேபருக்கு ரூ.7.50 லட்சம் கோடி வழங்கப்பட்டுள்ளது அதில் ரூ.2 லட்சம் கோடி தமிழகத்திற்கு வழங்கப்பட்டுள்ளது. தேசிய ஜனநாயக கூட்டணிக்கும் - காங்கிரஸ் தலைமையிலான மெகா கூட்டணிக்கும் இடையே  கடும் போட்டி நிலவும். தமிழகத்தில் விரைவில் கூட்டணியை முடிவு செய்வோம். இந்த கூட்டணி வலுவாக அமையும்.  இவ்வாறு அவர் கூறினார்.

சிறை நிரப்புதல், உண்ணாவிரதம், கருப்புக்கொடி கிரண்பேடிக்கு எதிராக தொடர் போராட்டம்: முதல்வர் நாராயணசாமி அறிவிப்பு

புதுச்சேரி: புதுச்சேரி கவர்னர் மக்கள் விரோத செயல்பாடுகளை கண்டித்து கவர்னர் மாளிகை முன் முதல்வர் நாராயணசாமி, அமைச்சர்கள் நடத்தும் காலவரையற்ற தர்ணா நேற்று 3வது  நாளாக தொடர்ந்தது.மாநில வளர்ச்சிக்கு கவர்னர் கிரண்பேடி தொடர்ந்து முட்டுக்கட்டை  போட்டு வருவதாக கூறி  நாராயணசாமி, அமைச்சர்கள் மற்றும் எம்எல்ஏக்கள்  13ம் தேதியில் இருந்து கவர்னர் மாளிகை முன் தர்ணா போராட்டத்தை தொடங்கினர். இவர்களை கண்டுகொள்ளாமல் நேற்றுமுன்தினம் ராஜ்நிவாசில் இருந்து கவர்னர்  கிரண்பேடி வெளியேறி, சென்னை சென்றார். பின்னர், அங்கிருந்து டெல்லி புறப்பட்டு சென்றார். முதல்வர், அமைச்சர்களை புறக்கணித்து வெளியேறியது பொதுமக்களிடையே அதிர்ச்சியை ஏற்படுத்தியுள்ளது.   இந்தநிலையில், நேற்று 3-வது நாளாக  ேபாராட்டம் நீடித்தது. போராட்டம் நடைபெறும்  இடத்துக்கு அகில இந்திய காங்கிரஸ் செயலாளரும், மேலிட பொறுப்பாளருமான சஞ்சய்  தத் நேற்று மதியம் 12.30 மணியளவில் வருகை தந்தார். அப்போது, மாநில அரசு கொண்டு வரும் மக்கள் பணிகள், வளர்ச்சி திட்டங்களை  கவர்னர் கிரண்பேடி திட்டமிட்டு தடுத்து வருவதாக அவர் தெரிவித்தார். இதுபற்றி சஞ்சய் தத் கூறியதாவது:  முதல்வர்,  அமைச்சர்கள், எம்.எல்.ஏ.க்கள் அறவழியில் போராட்டம் நடத்தி வருகின்றனர். ஜனநாயகத்தை காக்கும் இந்த போராட்டம் தொடர வேண்டும்.  மக்களால் தேர்வு செய்யப்பட்ட அரசை கிரண்பேடி முடக்கி வருகிறார்.  உடனடியாக ஹெல்மெட் சட்டத்தை கொண்டு வந்து, அபராதம் விதித்து  அரசுக்கு கெட்ட பெயர் ஏற்படுத்த வேண்டும் என்று செயல்படுகிறார். உண்மையில் மக்கள் மீதான அக்கறை கிரண்பேடிக்கு இல்லை. மோடியும் பேடியும், ரங்கசாமியும் புதுச்சேரி மக்களுக்கு  எதிரானவர்கள்.  இதனை மக்கள் நன்கு உணர்ந்துள்ளனர். வரும் நாடாளுமன்ற தேர்தலில் ராகுல்காந்தி பிரதமர் ஆவது உறுதி. அதன்பிறகு மக்கள் விரோத கிரண்பேடி டிஸ்மிஸ் செய்யப்படுவார்.  இவ்வாறு அவர்  கூறினார். இதனிடையே, போராட்டத்தை அடுத்த கட்டத்துக்கு கொண்டு செல்வது குறித்து முதல்வர் நாராயணசாமி அமைச்சர்கள், எம்.எல்.ஏ.க்கள், கூட்டணி கட்சி தலைவர்களுடன் மாலையில் ஆலோசனை நடத்தினார். இதுபற்றி நாராயணசாமி கூறுகையில், காங்கிரஸ் மற்றும் கூட்டணி கட்சி சார்பில் உண்ணாவிரதம், சிறை நிரப்பும்  போராட்டம் என போராட்டம் தீவிரப்படுத்தப்படவுள்ளது. நாளை (இன்று) மாலை 12 மையங்களில் ஆர்ப்பாட்டம் நடைபெறும். நாளை (17ம் தேதி) 30 தொகுதிகளில்  கருப்பு கொடி ஏற்றப்படும். 18ம் தேதி கிரண்பேடியை கண்டித்து குடியரசு  தலைவர், பிரதமர் ஆகியோருக்கு கடிதம் அனுப்பும் போராட்டம் நடக்கவுள்ளது. 19ம் தேதி மாசிமக  திருவிழாவை யொட்டி போராட்டம் கிடையாது. 20ம் தேதி 12 மையங்களில்  சிறைநிரப்பும் போராட்டம் நடைபெறவுள்ளது. 21ம்தேதி மாபெரும் உண்ணாவிரத போராட்டம் நடைபெறவுள்ளது’’ என்று அறிவித்தார்.

அமெரிக்காவில் சிகிச்சை முடிந்து விஜயகாந்த் இன்று சென்னை திரும்புகிறார்: தேமுதிகவினர் உற்சாக வரவேற்புக்கு ஏற்பாடு

சென்னை: அமெரிக்காவில் சிகிச்சை முடிந்து விஜயகாந்த் இன்று அதிகாலை சென்னை திரும்புகிறார். தேமுதிக தலைவர் விஜயகாந்த் உடல் நலக்குறைவால் அவதிப்பட்டு வந்தார். அவருக்கு குரல் வளமும் கடுமையாக பாதிக்கப்பட்டது. இதைத் தொடர்ந்து அவர் அமெரிக்காவில் ஜூலை 7ம் தேதி முதல் ஆகஸ்ட் 20ம் தேதி வரை முதல்கட்டமாக சிகிச்சை பெற்றார். தொடர்ந்து, இரண்டாம் கட்டமாக கடந்த டிசம்பர் 18ம் தேதி விஜயகாந்த் அமெரிக்கா சென்றார். அவரது மனைவி பிரேமலதாவும் உடன் சென்றார். இடையில் அவரது உடல்நிலை குறித்து வதந்திகளும் பரவியது. அதற்கு முற்றுப்புள்ளி வைக்கும் வகையில் அவ்வப்போது புகைப்படங்களை வெளியிட்டு தேமுதிகவினரை விஜயகாந்த் உற்சாகப்படுத்தி வந்தார். கடைசியாக தனது திருமண நாளில் பிரேமலதாவுடன் இருக்கும் படம் வெளியானது. அதில் விஜயகாந்த் உற்சாகமாக காட்சியளித்தார். தற்போது, அவரது உடல்நிலை சீரானதை தொடர்ந்து அவர் இன்று அதிகாலையில் அமெரிக்காவில் இருந்து சென்னை திரும்புகிறார். சென்னை வரும் அவர் உடனடியாக வீட்டுக்கு புறப்பட்டு செல்லவில்லை. விமான நிலையத்தில் உள்ள விஐபிக்கள் தங்கும் அறையில் தங்குகிறார். இதற்காக அவர் மத்திய, மாநில அரசுகளிடம் சிறப்பு அனுமதி வாங்கி இருப்பதாக கூறப்படுகிறது. காலையில் அவர் வீடு திரும்ப திட்டமிட்டுள்ளார். அப்போது அவருக்கு தேமுதிகவினர் சார்பில் பிரமாண்ட வரவேற்பு அளிக்க ஏற்பாடு செய்யப்பட்டுள்ளது. அதாவது, நாடாளுமன்ற தேர்தல் வரும் நேரத்தில் விஜயகாந்த் உடல்நிலை நன்றாக உள்ளது. விஜயகாந்த் குறித்து மக்களிடம் அனுதாபம் ஏற்படுத்தவும் இதுபோன்ற வரவேற்புக்கு தேமுதிகவினர் ஏற்பாடு செய்துள்ளதாக கூறப்படுகிறது. மேலும் தொண்டர்கள் மத்தியில் அவர் உரையாற்றவும் திட்டமிட்டுள்ளார். வீட்டில் ஓய்வு எடுக்கும் விஜயகாந்த், ஓரிரு நாளில் நாடாளுமன்ற தேர்தல் தொடர்பாக பேச்சுவார்த்தை நடத்துவார் என்றும் கூறப்படுகிறது. பேச்சுவார்த்தையில் உடன்பாடு ஏற்பட்டால் உடனடியாக வேட்பாளர் பெயரை அறிவிக்கவும் தேமுதிக தயாராக இருந்து வருகிறது.

தலா 2000 வழங்கும் திட்டத்தில் வறுமை கோட்டுக்கு கீழ் உள்ளவர்கள் எண்ணிக்கை 60 லட்சமானது எப்படி? தமிழக காங்கிரஸ் தலைவர் கே.எஸ்.அழகிரி கேள்வி

சென்னை: வறுமை கோட்டுக்கு கீழ் உள்ளவர்களின் எண்ணிக்கை 60 லட்சமாக உயர்ந்தது எப்படி என்றும், அதிமுகவினரை பயனாளிகளாக சேர்ப்பது குறித்து தேர்தல் ஆணையத்திடம் புகார் அளிக்கப்படும் என்றும் கே.எஸ்.அழகிரி கூறியுள்ளார்.இதுகுறித்து, தமிழக காங்கிரஸ் தலைவர் கே.எஸ்.அழகிரி நேற்று வெளியிட்டுள்ள அறிக்கை: நாடாளுமன்றத்தில் மத்திய பாஜ அரசை எதிர்த்து குரல் கொடுக்கிற துணிவற்று அதிமுக அரசு உள்ளது. தமிழகத்தில் ஏற்பட்ட வெள்ளம், புயல், வறட்சி பாதிப்பிற்காக மத்திய அரசிடம் தமிழக அரசு கேட்ட மொத்த தொகை 1 லட்சத்து 20 ஆயிரத்து 450 கோடி. இதில் மோடி அரசு வழங்கியது வெறும் 3,700 கோடி. தமிழகத்தை மாற்றாந்தாய் மனப்பான்மையோடு பாஜ அரசு வஞ்சிக்கிறது என்பதற்கு இதைவிட வேறு புள்ளி விவரங்கள் தேவையில்லை. இதையும் எடப்பாடி அரசின் சாதனையாக சொல்லலாமா?அடுத்த தேர்தலில் எப்படியாவது வெற்றி பெற்றுவிட வேண்டும் என்ற நோக்கத்தில் ரூ.1200 கோடி ஒதுக்கீட்டில், வறுமைக் கோட்டிற்கு கீழுள்ள 60 லட்சம் குடும்பங்களுக்கு தலா 2 ஆயிரம் வழங்கப்படும் என்று எடப்பாடி அரசு அறிவித்துள்ளது. இந்த ஆண்டில் தமிழக அரசு சமர்ப்பித்த நிதிநிலை அறிக்கையில் வறுமைக் கோட்டிற்கு கீழே உள்ளவர்கள் 28.32 லட்சம் குடும்பங்கள்தான் உள்ளன என்று கூறப்பட்டிருந்தது. அந்த எண்ணிக்கை திடீரென 60 லட்சமாக எப்படி உயர்ந்தது? மக்கள் வரிப் பணத்திலிருந்து வாக்கு வங்கியை விரிவுபடுத்தி அரசியல் ஆதாயம் தேடுகிற நோக்கத்தில் அதிமுகவினரையே பகிரங்கமாக பயனாளிகளாக சேர்ப்பதற்கு எடுக்கப்படும் முயற்சிகளை வன்மையாக கண்டிக்கிறேன். இதுகுறித்து தமிழக தேர்தல் ஆணையத்திடம் புகார் தெரிவிக்கப்படும். அறிவிக்கப்பட்டுள்ள 60 லட்சம் பயனாளிகளின் பட்டியலை ஆன்லைனில் வெளியிட வேண்டும். கிராமசபை கூட்டங்களில் பொதுமக்களின் பார்வைக்கு வைக்க வேண்டும்.  இவ்வாறு அவர் கூறியுள்ளார்.

அதிமுக அரசின் 2ம் ஆண்டு நிறைவு: சாதனை மலரை வெளியிட்டார் முதல்வர் எடப்பாடி

சென்னை: அதிமுக அரசின் இரண்டாம் ஆண்டு நிறைவு சாதனை மலரை முதல்வர் எடப்பாடி பழனிசாமி வெளியிட, துணை முதல்வர் ஓ.பன்னீர்செல்வம் பெற்றுக்கொண்டார்.முதல்வர் எடப்பாடி பழனிசாமி  தலைமையிலான அரசு பொறுப்பேற்று நேற்றுடன் இரண்டு ஆண்டுகள் நிறைவு பெற்றுள்ளது. இதையொட்டி, செய்தி மக்கள் தொடர்பு துறையின் சார்பில் தயாரிக்கப்பட்ட ஜெயலலிதா அரசின் - சாதனைகள் ஈராண்டு தொடரும் பல்லாண்டு என்ற இரண்டாண்டு சாதனை மலர், எம்.ஜி.ஆர். நூற்றாண்டு விழாவில் முதல்வர் ஆற்றிய உரைகளின் தொகுப்புகள், சட்டப்பேரவையில் ஆற்றிய உரைகளின் தொகுப்பு மற்றும் பல்வேறு  நிகழ்ச்சிகளில் ஆற்றிய உரைகளின் தொகுப்புகள், பொன்மொழிகள், இரண்டாண்டு சாதனைகளின் குறும்படம் மற்றும் காலப் பேழை புத்தகம் ஆகியவற்றை தலைமை செயலகத்தில் நேற்று முதல்வர் எடப்பாடி பழனிசாமி வெளியிட துணை முதல்வர் ஓ.பன்னீர்செல்வம் பெற்றுக்கொண்டார். அப்போது அமைச்சர்கள் உடனிருந்தனர்.இதை தொடர்ந்து தமிழ்நாடு அரசின் இரண்டாண்டு சாதனைகளின் குறும்பட குறுந்தகட்டினை முதல்வர் எடப்பாடி வெளியிட, செய்தி மற்றும் விளம்பரத்துறை அமைச்சர் கடம்பூர் ராஜு பெற்றுக் கொண்டார். காலப்பேழை புத்தகத்தை முதல்வர் வெளியிட தலைமை செயலாளர் கிரிஜா வைத்தியநாதன் பெற்றுக்கொண்டார். நிகழ்ச்சியில், தமிழ் வளர்ச்சி மற்றும் செய்தித்துறை செயலாளர் இரா.வெங்கடேசன் வரவேற்றார். செய்தி மக்கள் தொடர்புத்துறை இயக்குநர் சங்கர் நன்றி கூறினார். செய்தி மக்கள் தொடர்புத்துறை கூடுதல் இயக்குநர்கள் எழிலழகன் (செய்தி), ரவீந்திரன் (மக்கள் தொடர்பு), இணை இயக்குநர்கள், துணை இயக்குநர்கள் உட்பட அரசு அலுவலர்கள் கலந்து கொண்டனர்.

நள்ளிரவு வரை அதிமுக கூட்டணி பேச்சு 17 தொகுதிகளை கேட்டு பாஜ பிடிவாதம்: மார்ச் 1ம் தேதிக்குள் முடிக்க கெடு

சென்னை: கூட்டணிக்குள் உள் ஒதுக்கீடாக 17 தொகுதிகளை கேட்டு பாஜ அடம் பிடிப்பதால், அதிமுக-பாஜ தொகுதி பங்கீட்டில் இழுபறி ஏற்பட்டுள்ளது. பேச்சுவார்த்தையில் எந்த உடன்பாடும் ஏற்படாததால் நள்ளிரவு வரை பஞ்சாயத்து நடத்திய மத்திய அமைச்சர் ஏமாற்றுத்துடன் டெல்லி திரும்பினார். அதேநேரத்தில் மார்ச் 1ம் தேதி பிரதமர் மோடி வருவதற்குள் கூட்டணியை முடிவு செய்ய வேண்டும் என்று மிரட்டியதாகவும் தகவல் வெளியாகி பரபரப்பை ஏற்படுத்தியுள்ளன. நாடாளுமன்ற தேர்தல் தேதி இந்த மாத இறுதி அல்லது அடுத்த மாதம் துவக்கத்தில் அறிவிக்கப்படும் என கூறப்படுகிறது. இதனால், தேசிய மற்றும் மாநில கட்சிகள் தேர்தல் பணிகளில் மும்முரம் காட்டி வருகின்றனர். தமிழகத்தை பொறுத்தவரை அதிமுக-பாஜ இடையே கூட்டணி பேச்சுவார்த்தை நடந்து வருகிறது. மூத்த அமைச்சர்கள் பாஜவுடன் ரகசிய பேச்சுவார்த்தையை நடத்தி வந்தனர்.பாஜ அதிக இடங்களை கேட்டது. இதற்கு அதிமுக தரப்பில் கடும் எதிர்ப்பு தெரிவிக்கப்பட்டது. இரட்டை இலக்க எண்ணில் சீட் தர முடியாது. ஒற்றை இலக்க எண்ணில் தான் சீட் தர முடியும் என்று அதிமுக உறுதியாக கூறி விட்டது. அதுவும் நாங்கள் தரும் இடத்தில் தான் போட்டியிட வேண்டும். குறிப்பிட்டு தொகுதிகளை கேட்கக்கூடாது என்றது. அதிமுகவின் கண்டிஷனை கேட்டு பாஜ அதிர்ந்து போனது. இதனால் அதிமுக, பாஜ கூட்டணியில் கடும் சிக்கல் உருவானது. இது குறித்து பாஜ மாநில தலைமை கட்சி மேலிடத்துக்கு தகவல் தெரிவித்தது. இதைத் தொடர்ந்து கட்சி மேலிடம் சார்பில் பேச்சுவார்த்தை நடத்துவதற்காக மத்திய அமைச்சரும், தமிழக மக்களவை தேர்தல் பொறுப்பாளருமான பியூஸ் கோயல் விமானம் மூலம் நேற்று முன்தினம் இரவு 8.40 மணிக்கு சென்னை வந்தார். 8.40 மணி முதல் 9.20 விமான நிலையத்தில் உள்ள விஐபி அறையில் தமிழக தேர்தல் கூட்டணி தொடர்பாக மாநில தலைவர் தமிழிசை மற்றும் மத்திய அமைச்சர் பொன். ராதாகிருஷ்ணன் ஆகியோருடன் ஆலோசனை நடத்தினார். பின்னர், ஆழ்வார்பேட்டையில் உள்ள தொழில் அதிபர் பொள்ளாச்சி மகாலிங்கம் வீட்டிற்கு சென்றனர். அங்கு அதிமுக தொகுதி பங்கீட்டு குழுவில் உள்ள அமைச்சர்கள் தங்கமணி, எஸ்.பி.வேலுமணி மற்றும் வைத்திலிங்கம், கே.பி.முனுசாமி ஆகியோருடன் ேபச்சுவார்த்தை நடத்தினர். அப்போது மக்களவை தேர்தலில் பாஜவுக்கு எத்தனை சீட் கொடுப்பது என்பது தொடர்பாக அவர்கள் நள்ளிரவு வரை அதாவது நேற்று அதிகாலை 1 மணி வரை தொகுதி பங்கீடு குறித்து விவாதித்தனர்.இந்த பேச்சுவார்த்தையின்போது, அதிமுக சார்பில் பாமக உள்ளிட்ட கூட்டணி கட்சிகளுக்கும் சேர்த்து 32 தொகுதிகள் கேட்கப்பட்டன. இதற்கு பாஜ சார்பில் கடும் எதிர்ப்பு தெரிவித்து, தங்களுடைய கூட்டணி கட்சிகளுடன் சேர்த்து தங்களுக்கு 17 தொகுதிகளும் வேண்டும் என அடம் பிடித்தது. இந்த பேச்சுவார்த்தையின்போது பேசப்பட்ட தொகுதி பங்கீடு குறித்து பரபரப்பு தகவல்கள் வெளியாகி உள்ளது. இதன் விவரம் வருமாறு:அதிமுக-பாஜ கூட்டணி அமைவது உறுதியாகி உள்ளது. அதாவது, அதிமுக-பாமக ஒரு அணியாகவும் பாஜ, தேமுதிக, புதிய தமிழகம், புதிய நீதிக்கட்சி, இந்திய ஜனநாயக கட்சி ஆகியவை ஒரு அணியாகவும் செயல்பட்டு வருகின்றனர். அதிமுகவும், பாஜவும் தங்களது அணிக்காக சீட் கேட்டு பேச்சுவார்த்தை நடத்தப்பட்டது. இதில், பாஜ சார்பில் பாஜவுக்கு 10 தொகுதிகள், தேமுதிகவுக்கு 4, மற்ற 3 கட்சிகளும் தலா ஒரு தொகுதி கேட்கப்பட்டது. மேலும், பாமகாவுக்கு 4 இடமும், மீதமுள்ள 19 தொகுதிகளை அதிமுக எடுத்துக்கொள்ளட்டும் என்று பாஜ சார்பில் தெரிவிக்கப்பட்டது. இதற்கு கடும் எதிர்ப்பு தெரிவித்த அதிமுக தலைவர்கள், மொத்தமுள்ள 40 தொகுதிகளில் பாஜ மற்றும் தேமுதிகவுக்கு-8, பாமக-6, என்.ஆர். காங்கிரஸ்-1 தொகுதிகளையும் கொடுத்து மீதமுள்ள 25 தொகுதிகளில் நாங்கள் போட்டியிடுகிறோம். புதிய தமிழகம் தென்காசி தொகுதியில் அதிமுக சின்னத்தில் போட்டியிட வேண்டும் என்று அதிமுக பிரதிநிதிகள் சார்பில் தெரிவிக்கப்பட்டது.ஏனென்றால் தற்போது மக்களவையில் அதிமுக சார்பில் 37 உறுப்பினர்கள் உள்ளனர். இதில், பெரும்பாலான தொகுதிகளை பாஜ கேட்கின்றனர். அவ்வாறு கொடுத்தால் அதிமுக செல்வாக்கு சரிந்து போகிவிடும் என்று அதிமுக மூத்த தலைவர்கள் தெரிவிக்கின்றனர். இதனால், அதிமுக-பாஜ தொகுதி பங்கீட்டில் இழுபறி ஏற்பட்டுள்ளது. இதற்கிடையில், பாமகவுக்கு என்ன தொகுதி கொடுக்கிறீர்களோ அதே தொகுதிகள்தான் தங்களுக்கு கொடுக்க வேண்டும் என்று தேமுதிக சார்பில் தெரிவிக்கப்பட்டுள்ளது. இதனால், தொகுதி பங்கீட்டில் உச்சக்கட்ட குழப்பம் ஏற்பட்டுள்ளது. அமெரிக்காவில் இருந்து இன்று சென்னை திரும்பும் விஜய்காந்திடம் பேசி சமரசம் செய்ய பாஜ தலைவர்கள் முயற்சியில் ஈடுபடுவார்கள். ஆனால், பாமகவுக்கு கொடுக்கும் தொகுதிகளை எங்களுக்கு கொடுக்காவிட்டால் நாங்கள் வெளியேறி விடுவோம் என தேமுதிக கூறியுள்ளதாக தெரிகிறது. இதனால், பாமகவுக்கு கொடுக்கப்படும் சீட்டுகளை குறைத்து வழங்க பேச்சுவார்த்தை நடத்துமாறு அதிமுக தலைவர்களுக்கு பாஜ அசைன்மென்ட் கொடுத்துள்ளது. நள்ளிரவு வரை நீடித்த பேச்சுவார்த்தையில் உறுதியான உடன்பாடு எதுவும் எட்டப்படாததால், பியூஸ் கோயல் அதிகாலை டெல்லி புறப்பட்டு சென்றார். பேச்சுவார்த்தை முடிந்து வெளியே வந்த பொன்.ராதாகிருஷ்ணன் கூறுகையில், பேச்சுவார்த்தை திருப்தி அளிப்பதாக உள்ளது என்றார். தமிழிசை கூறுகையில், கூட்டணி பேச்சுவார்த்தை நல்ல திசையில் செல்கிறது. விரைவில் நல்ல செய்தி அறிவிப்போம் என்றார். பேச்சுவார்த்தையில் உறுதியான ஒரு முடிவு எட்டப்படாவிட்டாலும், அதிமுக - பாஜ கூட்டணி என்பது தற்போது உறுதியாகி உள்ளது. ஆனாலும், தொகுதி பங்கீட்டில் இழுபறி உள்ளது. இதுவும் இன்னும் ஒரு வாரத்தில் முடிவடைந்து விடும் என்று கூறப்படுகிறது. அதையடுத்து, மார்ச் 1ம் தேதி பிரதமர் மோடி தமிழகம் வருகிறார். அப்போது அதிமுக - பாஜ கூட்டணியில் எந்தெந்த தொகுதி என்பது குறித்த இறுதி முடிவு எடுக்கப்பட்டு அறிவிக்கப்பட உள்ளது.

மத்திய, மாநில ஆட்சிகளுக்கு முற்றுப்புள்ளி வைக்க நாம் முன்வர வேண்டும்; மு.க.ஸ்டாலின்

திண்டுக்கல்: திமுக அடையாளம் காட்டும் நபர் நாட்டின் பிரதமராக வருவார் என்று மு.க.ஸ்டாலின் தெரிவித்துள்ளார். மத்திய, மாநில ஆட்சிகளுக்கு முற்றுப்புள்ளி வைக்க நாம் முன்வர வேண்டும் என்று திண்டுக்கல் நிலக்கோட்டையில் வாக்குச்சாவடி தேர்தல் பணிக்குழு உறுப்பினர்கள் கூட்டத்தில் மு.க.ஸ்டாலின் தெரிவித்தார்.

திருவாரூர், திருப்பரங்குன்றம் இடைத்தேர்தலை உடனடியாக நடத்த கோரிய மனுவை தள்ளுபடி செய்தது உச்சநீதிமன்றம்

புதுடெல்லி : திருவாரூர், திருப்பரங்குன்றம் தொகுதிகளில் இடைத்தேர்தலை உடனடியாக நடத்த கோரிய மனுவை உச்சநீதிமன்றம் தள்ளுபடி செய்துள்ளது. மதுரையை சேர்ந்த கே.கே.ரமேஷ் என்பவர் தொடர்ந்த மனுவை தள்ளுபடி செய்த உச்சநீதிமன்றம், தேர்தல் தொடர்பான கோரிக்கைகளை தேர்தல் ஆணையம் பரிசீலிக்க அறிவுறுத்தியுள்ளது.முன்னாள் முதல்வர் கலைஞர் கருணாநிதியின் மறைவை தொடர்ந்து திருவாரூர் தொகுதி காலியாக அறிவிக்கப்பட்டது. இந்நிலையில் தமிழகத்தில் திருவாரூர் தொகுதிக்கு மட்டும் ஜனவரி 28ம் தேதி இடைத்தேர்தல் நடத்தப்படும் என தலைமை தேர்தல் ஆணையம் அறிவித்தது. இதையடுத்து திருவாரூரில் தேர்தல் நடத்தை விதிமுறைகள் உடனடியாக அமலுக்கு வந்தது. மேலும் தேர்தலுக்கு மனு தாக்கலும் செய்யப்பட்டு வேட்பாளர்கள் பிரச்சாரத்தில் ஈடுபடத்தொடங்கினர்.  இதையடுத்து கஜா புயல் பாதிப்பு காரணத்தினால் தற்போது தேர்தல் நடத்தும் சூழல் மேற்கண்ட தொகுதியில் கிடையாது எனவும், அதனால் தேர்தலை ஒத்திவைக்க வேண்டும் என உச்ச நீதிமன்றத்தில் கம்யூனிஸ்ட் கட்சியின் தேசிய செயலாளர் டி.ராஜா தரப்பில் வழக்கு தொடரப்பட்டது. இதேப்போல் தலைமை தேர்தல் ஆணையத்திலும் அவர் சார்பாக மனு தாக்கல் செய்யப்பட்டது.இதையடுத்து திருவாரூர் இடைத்தேர்தல் அதிரடியாக ரத்து செய்யப்பட்டது. அதேப்போல் இந்த வழக்கு விவகாரத்தில் தலைமை தேர்தல் ஆணையத்தின் விளக்கத்தை ஏற்றுக்கொண்ட உச்ச நீதிமன்றம் அதுதொடர்பான அனைத்து வழக்குகளையும் முடித்துவைத்து உத்தரவிட்டது. இந்நிலையில் கேகே.ரமேஷ் தரப்பில் ஆஜரான வழக்கறிஞர் உச்சநீதிமன்றத்தில் தாக்கல் செய்த மனுவில் 'தமிழகத்தில் காலியாக உள்ள திருவாரூர் மற்றும் திருப்பரங்குன்றம் ஆகிய இரண்டு தொகுதியின் இடைத்தேர்தலை உடனடியாக நடத்த வேண்டும். இதற்கு தலைமை தேர்தல் ஆணையத்திற்கு நீதிமன்றம் உத்தரவிட வேண்டும்' என்று கோரிக்கை விடுத்திருந்தார். இந்நிலையில் இந்த மனுவினை விசாரித்த உச்சநீதிமன்றம் மனுவை தள்ளுபடி செய்து தேர்தல் தொடர்பான கோரிக்கைகளை தேர்தல் ஆணையம் பரிசீலிக்க அறிவுறுத்தியுள்ளது.

இடைக்கால நிர்வாகியை நியமிக்க கோரி மத்திய உள்துறை அமைச்சருக்கு புதுச்சேரி சபாநாயகர் கடிதம்

புதுவை: புதுச்சேரிக்கு இடைக்கால நிர்வாகியை நியமிக்க வலியுறுத்தி ராஜ்நாத் சிங்குக்கு கடிதம் எழுதியுள்ளார். மத்திய உள்துறை அமைச்சர் ராஜ்நாத் சிங்குக்கு புதுச்சேரி சபாநாயகர் வைத்திலிங்கம் கடிதம் எழுதியுள்ளார். புதுச்சேரியில் அசாதாரண சூழல் நிலவுவதால் கடித்ததில் சபாநாயகர் வைத்திலிங்கம் தகவல் அளித்துள்ளார். புதுச்சேரி துணை நிலை ஆளுநர் டெல்லி சென்றுள்ள நிலையில் சபாநாயகர் கடிதம் எழுதியுள்ளார்.

புதுச்சேரி முதலமைச்சர் நாராயணசாமி மூன்றாவது நாளாக தர்ணா

புதுச்சேரி: புதுச்சேரியில் துணை நிலை ஆளுநரை கண்டித்து 3வது நாளாக முதலமைச்சர் நாராயணசாமி தலைமையில் போராட்டம் நடைபெற்று வருகிறது. புதுச்சேரி அரசின் சார்பில் துணை நிலை ஆளுநருக்கு அனுப்பப்பட்ட 36 முக்கிய திட்டங்களுக்கு அனுமதி அளிக்கப்படவில்லை என்று கூறி, அங்குள்ள துணை நிலை ஆளுநரின் மாளிகை முன்பு அமர்ந்து முதலமைச்சர் நாராயணசாமி, அமைச்சர்கள் மற்றும் எம்.எல்.ஏ.க்கள் 3வது நாளாக போராட்டத்தில் ஈடுபட்டு வருகின்றனர்.