Puducherry - Dinakaran

திமுக வேட்பாளர் கவுதமசிகாமணி வெற்றி

கள்ளக்குறிச்சி, மே 24: கள்ளக்குறிச்சி மக்களவை தொகுதி வாக்குப்பதிவு கடந்த மாதம் 18ம் தேதி நடந்தது. கள்ளக்குறிச்சி மக்களவை தொகுதியில் உள்ள ரிஷிவந்தியம், சங்கராபுரம், கள்ளக்குறிச்சி, டெங்குவெள்ளி, ஆத்தூர், ஏற்காடு என 6 சட்டமன்ற தொகுதியில் உள்ள வாக்காளர்கள் வாக்களித்தனர். கள்ளக்குறிச்சி தொகுதியில் கவுதமசிகாமணி (திமுக), சுதீஷ் (தேமுதிக), கோமுகி மணியன் (அமமுக), கணேஷ் (மநீம), சர்புதீன் (நாம் தமிழர் கட்சி) உள்பட 24 பேர் போட்டியிட்டனர். நேற்று காலை 8 மணிக்கு கள்ளக்குறிச்சி ஏகேடி பொறியியல் கல்லூரியில் வாக்கு எண்ணிக்கை தொடங்கியது. முதலில் தபால் வாக்குகள் எண்ணப்பட்டது. இதில் மொத்தம் 12,40,375 வாக்குகள் பதிவானது. தபால் வாக்குகள் 5952 ஆகும். இதில் திமுக வேட்பாளர் 72,1713 வாக்குகளும், தேமுதிக வேட்பாளர் 3,21,794 வாக்குகளும், அமமுக வேட்பாளர் 50,179 வாக்குகளும், மக்கள் நீதிமய்யம் கட்சி வேட்பாளர் 14,587 வாக்குகளும், நாம் தமிழர் கட்சி வேட்பாளர் 30,246 வாக்குகளும் பெற்றனர். இதில் நோட்டா 11,576. இதில் திமுக வேட்பாளர் கவுதமசிகாமணி தேமுதிக வேட்பாளரை விட 3,99,919 வாக்கு வித்தியாசத்தில் வெற்றிபெற்றார். தொடர்ந்து அவருக்கு  தேர்தல் நடத்தும் அலுவலர் அனுசுயாதேவி தேர்தல் மேற்பார்வையாளர் சிவலோகி கலாசத் முன்னிலையில் சான்றிதழ் வழங்கினார். அப்போது பொன்முடி எம்எல்ஏ, மாவட்ட செயலாளர் அங்கையற்கண்ணி, எம்எல்ஏக்கள் உதயசூரியன், வசந்தம் கார்த்திகேயன், முன்னாள் எம்எல்ஏ மூக்கப்பன் ஆகியோர் உடன் இருந்தனர்.

விபத்தில் வாலிபர் பலி

வானூர், மே 24: புதுச்சேரி அருகே அரும்பார்த்தபுரம் பகுதியை சேர்ந்தவர் பன்னீர்செல்வம் (35). இவர் காரில் சென்ைன சென்றுவிட்டு நேற்று அதிகாலை 3 மணியளவில் வீட்டுக்கு திரும்பி வந்து கொண்டிருந்தார். அப்போது விழுப்புரம் மாவட்டம் வானூர் தாலுகா துருவை கிராமம் அருகே புறவழிச்சாலையில் வந்தபோது, கட்டுப்பாட்டை இழந்த கார் சாலையில் கவிழ்ந்தது. இதில் பன்னீர்செல்வம் படுகாயம் அடைந்து சம்பவ இடத்திலேயே இறந்துவிட்டார். தகவல் அறிந்த வானூர் போலீசார் சடலத்தை கைப்பற்றி பிரேத பரிசோதனைக்காக புதுச்சேரி ஜிப்மர் மருத்துவமனைக்கு அனுப்பி வைத்தனர்.

அனுமதியில்லாத குடிநீர் இணைப்புகள் துண்டிப்பு

பண்ருட்டி, மே 24:  பண்ருட்டி  அருகே விசூர், மேல்மாம்பட்டு, குடியிருப்பு உள்ளிட்ட பல்வேறு கிராமங்களில்  நேற்று முன்தினம் வட்டார வளர்ச்சி அலுவலர் சீனுவாசன் தலைமையில் கொண்ட   குழுவினர் ஆய்வு மேற்கொண்டனர். அப்போது ஊராட்சியில் அனுமதிபெறாமல்  குடிநீர் இணைப்புகள் இருப்பதை அறிந்து அவற்றை துண்டிக்குமாறு  சம்பந்தப்பட்ட ஊழியர்களுக்கு பிடிஓ உத்தரவிட்டார்.இதன் பேரில்அனுமதி பெறாத 45  இணைப்புகள் துண்டிக்கப்பட்டது. அப்போது, துணை வட்டார வளர்ச்சி  அலுவலர் சந்தோஷ்குமார், தமிழ்செல்வி, ஊராட்சி  செயலாளர் இளவரசன், வடிவேல்  உள்ளிட்டோர் உடனிருந்தனர்.

2 குழந்தைகளுடன் தாய் மாயம்

திண்டிவனம், மே 24: திண்டிவனத்தை அடுத்த தாதாபுரம் கிராமத்தை சேர்ந்தவர் சண்முகம்(40). தனியார் தொழிற்சாலையில் பணிபுரிந்து வருகிறார். இவரது மனைவி கீதா(37). இவர்களுக்கு 7 ஆண்டுகளுக்கு முன் திருமணமாகி நிரஞ்சனா(6), நிஷால்(4) என குழந்தைகள் உள்ளனர். சம்பவத்தன்று கோயிலுக்கு செல்வதாக கூறிவிட்டு இரண்டு குழந்தைகளுடன் சென்ற கீதா அதன் பிறகு வீடு திரும்பவில்லை. இதனால் அதிர்ச்சி அடைந்த சண்முகம், உறவினர்கள், நண்பர்கள் வீடுகளில் தேடியும் காணவில்லை. இது குறித்து சண்முகம் கொடுத்த புகாரின்பேரில் வெள்ளிமேடுபேட்டை போலீசார் வழக்கு பதிந்து விசாரணை நடத்தி வருகின்றனர்.

பாழடைந்து காணப்படும் அரசு குடியிருப்புகள்

சங்கராபுரம், மே 24: சங்கராபுரத்தில் வேளாண்மை துறை அலுவலகம் இயங்கி வருகிறது. வேளாண்மைத்துறையில் பணியாற்றும் அதிகாரிகளுக்கு குடியிருப்பு சங்கராபுரம்-கள்ளக்குறிச்சி சாலையில் மத்திய கூட்டுறவு வங்கிக்கு அருகில் கட்டப்பட்டது. இந்த நிலையில், வேளாண்மை குடியிருப்பு தற்போது பழுதடைந்த நிலையில் உள்ளதால் அந்த குடியிருப்பில் சில வருடங்களாக யாரும் குடியிருக்கவில்லை. இதனால் இக்கட்டிடம்  சமூக விரோதிகளின் கூடாரமாக மாறி வருகிறது.இக்கட்டிடத்தை இடித்துவிட்டு புதிய கட்டிடத்தை கட்ட வேண்டும். இல்லையென்றால் இந்த இடம் சங்கராபுரம் மைய பகுதியாக உள்ளதால் புதிய நியாய விலை கடை கட்ட நடவடிக்கை எடுக்க வேண்டும் என கோரிக்கை விடுத்துள்ளனர்.

தீயணைப்பு வீரர்களுக்கு குடியிருப்பு கட்டித்தர வலியுறுத்தல்

சங்கராபுரம், மே 24: சங்கராபுரம் தாலுகா பகுதியில் நூற்றுக்கும் மேற்பட்ட கிராமங்கள் உள்ளன. இப்பகுதியில் எங்கு தீ விபத்து நடந்தாலும் அங்கு உடனடியாக சங்கராபுரம் தீயணைப்பு படையினர் சென்று தீயை அணைப்பர்.இந்த தீயணைப்பு நிலையத்தில் பணியாற்றும் வீரர்கள் தங்க குடியிருப்பு வசதி இல்லை. தற்போது கடந்த இரண்டு ஆணடுகளாக தீயணைப்பு நிலையம் அரசு இடத்தில் இயங்கி வருகிறது. தீயணைப்பு நிலையத்துக்கான இடம் போக மேலும் இடவசதி இங்கு அதிக அளவில் உள்ளது. இங்கு பணியாற்றும் தீயணைப்பு வீரர்கள் வெளியூர்களில் இருந்து பணிக்கு வருவதால் மிகவும் சிரமப்படுகிறார்கள். எனவே, சங்கராபுரம் தீயணைப்பு நிலையம் உள்ள இடத்தில் தீயணைப்பு வீரர்களுக்கு குடியிருப்பு கட்டித்தர நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.

சாலையில் லாரி கவிழ்ந்து விபத்து ₹1 லட்சம் முட்டைகள் உடைந்து சேதம்

உளுந்தூர்பேட்டை, மே 24: நாமக்கல் மாவட்டத்தில் இருந்து முட்டை லோடு ஏற்றிக்கொண்டு ஒரு லாரி சென்னை நோக்கி வந்து கொண்டிருந்தது. நேற்று உளுந்தூர்பேட்டை அடுத்த ஒலையனூர் என்ற இடம் அருகே வந்து கொண்டிருந்தபோது, திடீரென லாரியின் முன்பக்க டயர் வெடித்து விபத்துக்குள்ளானது. இதனால் லாரி நடுரோட்டில் கவிழ்ந்து விபத்துக்குள்ளானது. இதில் லாரியை ஓட்டி வந்த கண்ணன் லேசான காயத்துடன் உயிர் தப்பினார். லாரியில் வந்த ரூ.ஒரு லட்சம் மதிப்பிலான முட்டைகள் நடுரோட்டில் கீழே விழுந்து உடைந்து சேதமானது. இந்த விபத்தால் சேலம்-உளுந்தூர்பேட்டை தேசிய நெடுஞ்சாலையில் போக்குவரத்து பாதிப்பு ஏற்பட்டது. தகவல் அறிந்து சம்பவ இடத்துக்கு வந்த உளுந்தூர்பேட்டை போலீசார், விபத்துக்குள்ளான லாரியை அங்கிருந்து அப்புறப்படுத்தி போக்குவரத்தை சரி செய்தனர். முட்டை லோடு ஏற்றி வந்த லாரி உளுந்தூர்பேட்டை பகுதியில் கவிழ்ந்து விபத்துக்குள்ளானது அறிந்த அப்பகுதியை சேர்ந்த சிலர் உடைந்த முட்டைகள் மட்டுமன்றி லேசாக உடைப்பு ஏற்பட்ட முட்டைகளையும் அள்ளிச் சென்றனர்.

மணல் கடத்திய மினி லாரி பறிமுதல்

காலாப்பட்டு, மே 24: வானூர் அருகே கொடூர் கிராமத்தில் உள்ள ஏரியில் மணல் கடத்தப்படுவதாக கோட்டக்குப்பம் போலீசாருக்கு ரகசிய தகவல் கிடைத்தது. அதன்பேரில் இன்ஸ்பெக்டர் சரவணன் தலைமையிலான போலீசார் அங்கு ரோந்து பணியில் ஈடுபட்டனர். அப்போது ஒரு மினி லாரியில் மணல் ஏற்றி வந்த ஆசாமி, போலீசாரை கண்டவுடன் தப்ப முயன்றார். போலீசார் அவரை பிடித்து விசாரணை நடத்தியபோது, கொடூர் பகுதியை சேர்ந்த மோகன் மகன் சசிகுமார் (30) என்பதும், ஏரியில் இருந்து திருட்டுத்தனமாக மணல் அள்ளி விற்பனைக்கு கொண்டு சென்றதும் தெரியவந்தது.இதையடுத்து சசிகுமார் மீது போலீசார் வழக்கு பதிந்து மினி லாரியை பறிமுதல் செய்தனர்.

இளம்பெண் மாயம்

திருவெண்ணெய்நல்லூர், மே 24: திருவெண்ணெய்நல்லூர் அடுத்துள்ள கிராமத்தை சேர்ந்த இளம் பெண் ஒருவர், ஏனாதிமங்கலம் கிராமத்தில் உள்ள அரசு பள்ளியில் 12ம் வகுப்பு படித்து அரசு பொதுதேர்வில் தோல்வியடைந்துள்ளார். இந்நிலையில், சம்பவத்தன்று நர்சிங் கல்லூரி சேர்க்கைக்காக சென்று வருவதாக வீட்டில் கூறிவிட்டு சென்றவர் பல மணிநேரம் ஆகியும் வீடு திரும்பவில்லை. இதையடுத்து அவரது பெற்றோர் பல இடங்களில் தேடியும் கிடைக்காததால் அவரது தாய் திருவெண்ணெய்நல்லூர்போலீசில் புகார் கொடுத்துள்ளார். அதன்பேரில் இன்ஸ்பெக்டர் ஜெயலட்சுமி வழக்கு பதிவு செய்து விசாரணை நடத்தி வருகிறார்.

அகற்றப்பட்ட சிசிடிவி கேமராக்களை மீண்டும் பொருத்த கோரிக்கை

திண்டிவனம், மே 24:  திண்டிவனம்-மயிலம் சாலையில், சாலை விரிவாக்க பணி நடைபெற்று முடிவடைந்துள்ளது. மேம்பாலம் முதல் ஜக்காம்பேட்டை வரையிலான குறுகிய சாலையை தேசிய நெடுஞ்சாலை துறையால் விரிவாக்கம் செய்யப்பட்டது. விரிவாக்கம் செய்யப்பட்டு சென்டர் மீடியன் அமைக்கப்பட்டு பணிகள் அனைத்தும் முடிவடைந்துள்ளது. இதற்கு முன்னதாக சாலையின் இரு புறங்களிலும் சிசிடிவி கேமராக்கள் பொருத்தப்பட்டு இருந்தது. சாலை விரிவாக்க பணிகள் நடைபெற்றபோது அகற்றப்பட்ட சிசிடிவி கேமராக்கள் மீண்டும் பொருத்தப்படுமா என பொதுமக்களிடம் அதிக எதிர்பார்ப்பு உள்ளது. திண்டிவனத்தில் அனைத்து இடங்களிலும் சிசிடிவி கேமராக்கள் பொருத்தப்பட்டுள்ளது. இதனால் குற்ற செயல்களில் ஈடுபடுவோர் எண்ணிக்கை வெகுவாக குறைந்துள்ளது. மேலும் பல இடங்களில் கண்காணிப்பு கேமராக்கள் சேதமடைந்து காணப்படுகிறது. எனவே, சேதமடைந்த சிசிடிவி கேமராக்களையும் பழுது நீக்க வேண்டும், மயிலம் சாலையில் அகற்றப்பட்ட கேமராக்களையும் மீண்டும் பொருத்த வேண்டும் என பொதுமக்கள் கோரிக்கை விடுத்துள்ளனர்.

திமுக கூட்டணி கட்சியினர் கொண்டாட்டம்

விழுப்புரம், மே 24: நேற்று நடந்த மக்களவை தேர்தல் வாக்கு எண்ணிக்கை முடிவில், விழுப்புரம், கள்ளக்குறிச்சி தொகுதியில் திமுக வேட்பாளர்கள் வெற்றி பெற்றனர். இதையடுத்து திமுக மற்றும் கூட்டணி கட்சியினர் இனிப்பு வழங்கியும், பட்டாசு வெடித்தும் கொண்டாடினர்.  மக்களவை தேர்தல் நடக்கும் தேதிகளை கடந்த மார்ச் 10ம் தேதி தலைமை தேர்தல் ஆணையம் அறிவித்தது. அதன்படி நாடு முழுவதும் கடந்த ஏப்ரல் மாதம் 11ம் தேதி முதல் கடந்த 19ம் தேதி வரை 7 கட்டங்களாக மக்களவை தேர்தலுக்கான வாக்குப்பதிவு நடந்தது. தமிழகத்தில் வேலூரை தவிர்த்து 38 மக்களவை தொகுதிகளுக்கான வாக்குப்பதிவும், 18 சட்டமன்ற தொகுதி இடைத்தேர்தலுக்கான வாக்குப்பதிவும் கடந்த மாதம் 18ம் தேதி ஒரே கட்டமாக நடத்தி முடிக்கப்பட்டது. இதை தொடர்ந்து 4 சட்டமன்ற தொகுதிக்கான இடைத்தேர்தல் கடந்த 19ம் தேதி முடிவடைந்தது. விழுப்புரம் மாவட்டத்தில் விழுப்புரம், கள்ளக்குறிச்சி ஆகிய மக்களவை தொகுதிகளுக்கு தேர்தல் நடந்தது. மாவட்டம் முழுவதும் 11 சட்டமன்ற தொகுதிகளிலும் 3,227 வாக்குச்சாவடிகளில் வாக்குப்பதிவு நடந்தது. விழுப்புரம் மாவட்டம் முழுவதும் 77.96 சதவீதம் வாக்குகள் பதிவாகின. விழுப்புரம் மக்களவை தொகுதியில் மட்டும் 78.31 சதவீத வாக்குகள் பதிவாகின. மாவட்டம் முழுவதும் மொத்தமுள்ள வாக்காளர்களில் ஆண்கள் 13,48,376 பேர், பெண்கள் 13,46,064 பேர் என மொத்தம் 26,94,828 வாக்காளர்களில், 21,00,799 பேர் வாக்களித்தனர். அதில் ஆண்கள் 10,38,564 பேரும், பெண்கள் 10,62,102 பேரும் வாக்களித்தனர். ஆண்களை விட 23,568 பெண்கள் அதிகளவு வாக்களித்திருந்தனர். கள்ளக்குறிச்சி மக்களவை தொகுதியில் மொத்தம் 1198141 பேர் வாக்களித்தனர். இதில் ஆண்கள் 5,80579 பேரும், பெண்கள் 617408 பேரும், இதர 77 பேர் அடங்குவர். வாக்கு சதவீதம் 78.33 ஆகும். விழுப்புரம் மக்களவை தொகுதியில், திமுக சார்பில் ரவிக்குமார், பாமக சார்பில் வடிவேல் ராவணன் உள்பட 14 பேர் போட்டியிட்டனர். கள்ளக்குறிச்சி மக்களவை தொகுதியில் திமுக சார்பில் டாக்டர் கவுதம சிகாமணி, தேமுதிக சார்பில் சுதீஷ், அமமுக சார்பில் கோமுகி மணியன் உள்பட 24 பேர் போட்டியிட்டனர். இந்த நிலையில், மக்களவை தொகுதிகளில் பதிவான வாக்குகள் நேற்று காலை 8 மணி முதல் எண்ணப்பட்டது.விழுப்புரம் தொகுதிக்கு விழுப்புரம் கீழ்பெரும்பாக்கம் அறிஞர் அண்ணா அரசு கலை கல்லூரியிலும், கள்ளக்குறிச்சி தொகுதிக்கு அங்குள்ள ஏகேடி கல்லூரியிலும் வாக்கு எண்ணிக்கை நடந்தது. வாக்கு எண்ணிக்கை மையத்தில் துணை ராணுவம், ஆயுதப்படை, உள்ளூர் போலீசார் என மூன்றடுக்கு போலீஸ் பாதுகாப்புகள் போடப்பட்டிருந்தது. ஒவ்வொரு சுற்று வாக்கு எண்ணிக்கையும் மேஜை வாரியாக ஒலிபெருக்கியில் அறிவிக்கப்பட்டது. ஒவ்வொரு சுற்று முடிவிலும் சட்டமன்ற தொகுதி வாரியாக வேட்பாளர்கள் பெற்ற வாக்குகள் பற்றிய விவரங்கள் அறிவிப்பு பலகையில் எழுதி வைக்கப்பட்டது. விழுப்புரத்தில் 25 சுற்றுகளும், கள்ளக்குறிச்சியில்24 சுற்றுகளும் வாக்குகள் எண்ணப்பட்டது. முதல் சுற்றில் இருந்தே திமுக வேட்பாளர்கள் முன்னிலை பெற்று வந்தனர். ஒவ்வொரு சுற்று முடிவிலும் திமுக வேட்பாளர்கள் முன்னிலை ெபற்று வந்ததால், திமுக மற்றும் கூட்டணி கட்சியினர் உற்சாகமடைந்தனர்.இறுதியாக விழுப்புரத்தில் திமுக வேட்பாளர் ரவிக்குமார்1,28,018 வாக்குகள் வித்தியாசத்திலும், கள்ளக்குறிச்சியில் திமுக வேட்பாளர் டாக்டர் கவுதம சிகாமணி3,99,919 வாக்குகள் வித்தியாசத்திலும் வெற்றி பெற்றதாக அறிவிக்கப்பட்டனர்.இதையடுத்து திமுக மற்றும் கூட்டணி கட்சியினர் இனிப்புகள் வழங்கியும், பட்டாசு வெடித்தும் தங்கள் மகிழ்ச்சியை வெளிப்படுத்தினர். வாக்கு எண்ணிக்கையையொட்டி எஸ்பி ஜெயக்குமார் தலைமையில் ஏராளமான போலீசார் பாதுகாப்பு பணியில் ஈடுபட்டிருந்தனர். திருவெண்ணெய்நல்லூர்: திருவெண்ணெய்நல்லூர் திமுக நகரம் சார்பில் நாடாளுமன்ற தேர்தலில் திமுக வெற்றி பெற்றதை தொடர்ந்து நேற்று மாலை கடைவீதியில் முன்னாள் பேரூராட்சி  மன்ற தலைவர் வைத்தியநாதன் தலைமையில் பட்டாசு வெடித்து பொதுமக்களுக்கு  இனிப்பு வழங்கப்பட்டது. இதில் மாவட்ட பிரதிநிதி வழக்கறிஞர் சுரேஷ்பாபு,  இந்திய கம்யூனிஸ்ட் நகர செயலாளர் டி.எஸ்.முருகன், பொருளாளர் சோமு, நகர துணை  செயலாளர் தில்லைகாமராஜ், நகர இளைஞரணி அமைப்பாளர் சுரேஷ், மாவட்ட வழக்கறிஞர்  அணி துணை அமைப்பாளர் கார்த்திகேயன், ஆதிதிராவிட நல குழு அமைப்பாளர்  பாக்கியராஜ், முன்னாள் நகர செயலாளர் சிவப்புசெல்வம் மற்றும் சிடிபாலு, ரமேஷ், நக்கீரன் உள்பட பலர் கலந்துகொண்டனர்.

காங்கிரஸ் வெற்றி கிரண்பேடிக்கு காணிக்கை

புதுச்சேரி, மே 24: புதுச்சேரி மக்களவை தொகுதியில் போட்டியிட்ட காங்கிரஸ் வேட்பாளர் வைத்திலிங்கம் அமோக வெற்றி பெற்றுள்ளார். மத்தியில் காங்கிரஸ் வெற்றி வாய்ப்பை இழந்தாலும் புதுச்சேரி தொகுதியில் பெற்றுள்ள வெற்றியையும், தட்டாஞ்சாவடி இடைத்தேர்தலில் கூட்டணி கட்சியான திமுக பெற்றுள்ள வெற்றியையும் காங்கிரஸ் மற்றும் திமுக உள்ளிட்ட கூட்டணி கட்சியினர் கொண்டாடி வருகின்றனர். இந்நிலையில் காங்., வெற்றி குறித்து ஏனாமில் சுற்றுலாத்துறை அமைச்சர் மல்லாடி கிருஷ்ணாராவ் நிருபர்களிடம் கூறும்போது, புதுச்சேரி மக்களவை தொகுதியில் காங்கிரஸ் வெற்றியை கிரண்பேடிக்கு காணிக்கை ஆக்குகிறேன். மக்களுக்கு அவர் பல தொல்லைகள் கொடுத்தார். அவருக்கு என்ஆர் காங்கிரஸ் துணை போனது. இவர்கள் இருவருக்கும் மக்கள் சரியான பாடம் புகட்டியுள்ளனர் என்றார்.

திமுக எம்எல்ஏக்களின் பலம் 3 ஆக உயர்ந்தது

புதுச்சேரி, மே 24:  தட்டாஞ்சாவடி இடைத்தேர்தலில் திமுக வெற்றிபெற்றதன் மூலம் புதுவை சட்டசபையில் அக்கட்சி எம்எல்ஏக்களின் பலம் 3 ஆக உயர்ந்துள்ளது. இதன்மூலம் காங்கிரஸ் ஆட்சிக்கு ஆபத்து இல்லாத நிலை ஏற்பட்டுள்ளது. புதுச்சேரி சட்டசபை 30 தொகுதிகளை உள்ளடக்கியது. இதில் ஆளுங்கட்சியான காங்கிரஸ் 15, கூட்டணி கட்சியான திமுக 2 உறுப்பினர்களை பெற்றுள்ளது. மாகே சுயேட்சை வேட்பாளர் ராமகிருஷ்ணன் ஆட்சிக்கு ஆதரவான நிலைப்பாட்டில் உள்ளார். இதுதவிர எதிர்க்கட்சி வரிசையில் ரங்கசாமியின் என்ஆர் காங்கிரஸ் 8 தொகுதிகளை பெற்றிருந்தது. அதிமுக 4 உறுப்பினர்களையும் பெற்றுள்ளது. இதுதவிர மத்திய உள்துறை அமைச்சகத்தால் நியமிக்கப்பட்ட பாஜகவைச் சேர்ந்த 3 நியமன எம்எல்ஏக்களும் உள்ளனர்.இந்த நிலையில் மக்களவை தொகுதி காங்கிரஸ் வேட்பாளராக, சபாநாயகர்  வைத்திலிங்கத்தை அக்கட்சி தலைமை அறிவித்தது. இதையடுத்து தனது சபாநாயகர் பதவியை ராஜினமா செய்தார். தற்போது மக்களவை தேர்தலில் வைத்திலிங்கம் வெற்றி பெற்றுள்ளார்.இதையடுத்து அவர் தனது எம்பி பதவி அல்லது காமராஜர் சட்டமன்ற தொகுதி எம்எல்ஏ பதவி ஆகியவற்றில் ஏதாவது ஒன்றை ராஜினாமா செய்ய வேண்டிய கட்டாயத்தில் உள்ளார். காங்கிரசுக்கு மத்தியில் குறைவான எம்பிக்களே இருப்பதால் வைத்திலிங்கம் தனது எம்எல்ஏ பதவியை விரைவில் ராஜினாமா செய்வார் என்று தெரிகிறது.இதன்மூலம் புதுச்சேரி சட்டசபையில் ஆளுங்கட்சியின் பலம் 14 ஆக குறையும். அதேசமயம் தற்போது இந்த இடைத்தேர்தலில் திமுக வேட்பாளர் வெங்கடேசன் வெற்றிபெற்றதன் மூலம் காங்கிரஸ்- திமுக கூட்டணி பலம் சுயேட்சை ஆதரவின்றி 17 ஆக உயர்ந்துள்ளது. (வைத்திலிங்கம் தனது எம்எல்ஏ பதவியை ராஜினாமா செய்யும் பட்சத்தில்தான் காங்., திமுக கூட்டணி பலம் 17 என்பது குறிப்பிடத்தக்கது). மொத்தத்தில் தற்போது புதுவை சட்டசபையில்  திமுக உறுப்பினர்களின் எண்ணிக்கை 3 ஆக அதிகரித்துள்ளது. திமுக வேட்பாளர் வெங்கடேசன் வெற்றி பெற்றதன் மூலம், காமராஜர் நகர் தொகுதி எம்எல்ஏ பதவியை வைத்திலிங்கம் ராஜினாமா செய்தாலும் ஆட்சிக்கு ஆபத்து இல்லாத நிலை ஏற்பட்டுள்ளது. தற்போது நடந்து முடிந்த மக்களவை தேர்தலில் இந்த தொகுதியில் காங்கிரஸ் 9,991 வாக்குகள் முன்னிலை பெற்றிருந்தது. எனவே இடைத்தேர்தல் நடந்தாலும் அங்கு அக்கட்சியே மீண்டும் வெற்றிபெறும் நிலை உள்ளதால் புதுவையில் காங்கிரசின் கை  ஓங்கியுள்ளதாகவே அரசியல் நோக்கர்கள் கருதுகின்றனர்.

10வது வெற்றியை பதிவு செய்த காங்கிரஸ்

புதுச்சேரி, மே 24: 1967ம் ஆண்டு முதல் 2014ம் ஆண்டு வரை புதுச்சேரி மக்களவை தொகுதி ஒரு இடைத்தேர்தல் உட்பட 13 முறை நாடாளுமன்ற தேர்தலை சந்தித்திருக்கிறது. இதில் அதிகபட்சமாக காங்கிரஸ் 9 முறையும், திமுக, அதிமுக, என்ஆர் காங்., பாமக தலா ஒரு முறையும் வெற்றி பெற்றுள்ளன. இந்நிலையில் புதுச்சேரி மக்களை தொகுதிக்கு 14வது முறையாக நடந்த நாடாளுமன்ற தேர்தலில் காங்கிரஸ் சார்பில் போட்டியிட்ட முன்னாள் சபாநாயகர் வைத்திலிங்கம் அதிக வாக்குகள் வித்தியாசத்தில் அமோக வெற்றி பெற்றுள்ளார். இதன் மூலம் புதுவை மக்களவை தொகுதி காங்கிரஸ் கட்சி தனது 10வது வெற்றியை பதிவு செய்துள்ளது.

தட்டாஞ்சாவடி வாக்கு எண்ணிக்கை தொடங்கியதில் காலதாமதம்

புதுச்சேரி, மே 24: தட்டாஞ்சாவடி சட்டமன்ற இடைத்தேர்தல் வாக்கு எண்ணிக்கையானது இயந்திரத்தில் சீல் இல்லாததால் அரை மணி நேரம் தாமதமாக வாக்கு எண்ணிக்கை தொடங்கியது.  புதுவை மக்களவை தொகுதியுடன் தட்டாஞ்சாவடி சட்டமன்ற தொகுதிக்கும் இடைத்தேர்தல் நடந்தது. இத்தேர்தலில் திமுக வேட்பாளர் வெங்கடேசன், என்ஆர் காங்கிரஸ் வேட்பாளர் நெடுஞ்செழியன், நாம் தமிழர் கட்சி கவுரி, புதுச்சேரி வளர்ச்சிக்கட்சி ரவிசங்கர், தமிழக வாழ்வுரிமை கட்சி தர், அமமுக முருகசாமி, சுயேட்சைகள் மண்ணாதன், தமிழ்மல்லன் ஆகிய 8 பேர் போட்டியிட்டனர். இந்த இடைத்தேர்தலுக்கான வாக்கு எண்ணிக்கை லாஸ்பேட்டை மோதிலால் நேரு அரசு பாலிடெக்னிக் கல்லூரியில் நேற்று எண்ணப்பட்டன. முதல் சுற்று வாக்கு எண்ணிக்கைக்காக 12 டேபிள்களிலும் 12 பூத் வாக்குப்பதிவு இயந்திரங்கள் எடுத்து வரப்பட்டன. அப்போது 9/2 சுப்பையாநகர் வாக்குச்சாவடியில் பதிவான வாக்கு இயந்திரத்தில் 3 சீல்களுக்கு பதிலாக ஒரு சீல் மட்டுமே இருந்தது. மேலும், அதனுடன் இணைக்கப்பட்ட சீட்டில் வாக்குச்சாவடி அதிகாரியின் கையெழுத்தும், முகவர்களுக்கு வழங்கப்பட்ட அதிகாரியின் கையெழுத்து மாதிரியும் வேறுபட்டு இருந்தது. அதேபோல், 9/5 விவிபி நகர் வாக்குச்வாசாவடியில் பதிவான மின்னணு வாக்குப்பதிவு இயந்திரத்தில் பதிவான மொத்த வாக்கு ஒப்புகை சீட்டில் 874 என்றும், முகவர் கையில் கொடுக்கப்பட்ட ஒப்புகை சீட்டில் 844 என்றும் குறிப்பிடப்பட்டு இருந்தது. இதனை இந்திய கம்யூ., முன்னாள் அமைச்சர் விஸ்வநாதன், உதவி தேர்தல் நடத்தும் அதிகாரிகளின் கவனத்துக்கு எடுத்துச் சென்றனர். இதனால் வாக்குகளை எண்ணுவதில் குழப்பம் ஏற்பட்டது. இதுபற்றி தலைமை தேர்தல் அதிகாரியை தொடர்பு கொண்டு அதிகாரிகள் தெரிவித்தனர். அந்த 2 பூத் வாக்கு இயந்திரங்களையும் தனியாக வைத்து விட்டு, மற்ற இயந்திரங்களை எண்ண உத்தரவிட்டார். இதனை தொடர்ந்து, மற்ற வாக்கு இயந்திரங்களில் பதிவான வாக்குகள் எண்ணப்பட்டன.இந்த குழப்பத்தால் தட்டாஞ்சாவடி இடைத்தேர்தலுக்கான தபால் வாக்குகள் எண்ணும்பணி அரை மணி நேரம் தாமதமாக காலை 8.30 மணிக்கு தொடங்கியது.

என்ஆர் காங். தொகுதிகளிலும் முன்னிலை பெற்ற காங்கிரஸ்

புதுச்சேரி, மே 24: புதுச்சேரி மக்களவை தேர்தலில் வெற்றி பெற்றுள்ள காங்கிரஸ் வேட்பாளர் வைத்திலிங்கம், என்ஆர் காங்கிரஸ் எம்எல்ஏக்களின் தொகுதிகளிலும் அதிக வாக்குகள் பெற்று ரங்கசாமிக்கு அதிர்ச்சி வைத்தியம் கொடுத்துள்ளார்.புதுவையில் கடந்த 2016-ல் நடந்த சட்டமன்ற பொதுத்தேர்தலில் காங்கிரஸ்- திமுக கூட்டணி வெற்றிபெற்று ஆட்சியை பிடித்தது. முதல்வராக நாராயணசாமி பதவியேற்றார். அப்போது மத்திய பாஜக அரசால் கவர்னராக நியமிக்கப்பட்ட கிரண்பேடி புதுவையில் தனது அதிகாரத்தை செலுத்த தொடங்கினார். இதையடுத்து கவர்னருக்கும், அமைச்சரவைக்கும் இடையே மோதல் வெடித்தது. கடந்த 2 ஆண்டுகளாக அவ்வப்போது மோதல் இருந்து வருகிறது. இதன் காரணமாக பல்வேறு மக்கள் நலத்திட்டங்கள் பாதிக்கப்பட்டன.இதைத்தொடர்ந்து கவர்னர் மாளிகை முன்பு தனது அமைச்சர்களுடன் முதல்வர் நாராயணசாமி தர்ணாவில் ஈடுபட்ட சம்பவம் புதுச்சேரி அரசியலில் பரபரப்பை ஏற்படுத்தியிருந்தது. இந்த நிலையில் மக்களவை தேர்தல் முடிவுகள் நேற்று வெளியாகின. இதில் முதல்கட்டமாக நடைபெற்ற 12 சட்டமன்ற தொகுதிகளின் வாக்கு எண்ணிக்கையின் முடிவுகள் அறிவிக்கப்பட்டது. இதில் என்ஆர் காங்கிரஸ் தொகுதிகளான மங்கலம், மண்ணாடிப்பட்டு, கதிர்காமம், நெடுங்காடு, காரைக்கால் வடக்கு மற்றும் அதன் கூட்டணி கட்சியான அதிமுகவின் கோட்டையாக விளங்கும் உப்பளம், மாகே சுயேட்சை தொகுதி ஆகியவற்றில் காங்கிரஸ் வேட்பாளர் வைத்திலிங்கம் ஒவ்வொரு சுற்றிலும் என்ஆர் காங்கிரசைவிட அதிக வாக்குகள் பெற்று ரங்கசாமிக்கு அதிர்ச்சி வைத்தியம் கொடுத்தார். இதேபோல் காங்கிரஸ் எம்எல்ஏக்கள் உள்ள தொகுதிகளிலும் தனது செல்வாக்கை அக்கட்சி இழக்காமல் அனைத்து சுற்றிலும் முன்னிலை வகித்தது. காங்கிரசுக்கு அதிக வாக்குகள் பெற்றுக் கொடுத்த தொகுதிகளின் பட்டியலில் மாநில காங்கிரஸ் தலைவர் நமச்சிவாயம் தொகுதியான வில்லியனூரில் 13,391 வாக்குகள் கூடுதலாக கிடைத்து முதலிடத்தில் உள்ளது. முதல்வர் தொகுதியான நெல்லித்தோப்பு 13,146 வாக்குகள் பெற்று 2வது இடத்திலும், அமைச்சர் மல்லாடியின் கோட்டையாக விளங்கும் ஏனாம் 12,678 வாக்குகளை பெற்றுக் கொடுத்து 3வது இடத்திலும் உள்ளன. மக்களவை தேர்தலுக்கு முன்புவரை மாநிலத்தை ஆட்சி செய்த காங்கிரஸ் மீது மக்களுக்கு அதிருப்தி இருந்ததாக தகவல் பரவிய நிலையில், இந்த தேர்தல் முடிவு புதுச்சேரி அரசியலில் பரபரப்பை ஏற்படுத்தி உள்ளது. மக்களால் தேர்ந்தெடுக்கப்பட்ட பிரதிநிதிகளுக்கு எதிராக கவர்னர் கிரண்பேடி மேற்கொண்ட நடவடிக்கைகளை மக்கள் ஏற்கவில்லை என்பது இதன்மூலம் நிரூபணமாகி இருப்பதாக காங்கிரஸ் தெரிவித்துள்ளது.

வாக்குப்பதிவு இயந்திரம் மாறியதால் வாக்குவாதம்

தட்டாஞ்சாவடி இடைத்தேர்தலுக்கான முதல் சுற்று வாக்கு எண்ணிக்கை முடிந்த நிலையில் 2வது சுற்று வாக்கு எண்ணிக்கை தொடங்கியது. அப்போது புதுப்பேட்டை வாக்குச்சாவடியில் மக்களவை தேர்தலில் பதிவான மின்னணு வாக்குப்பதிவு இயந்திரம் தவறுதலாக இடைத்தேர்தல் வாக்கு எண்ணிக்கைக்கு கொண்டு வரப்பட்டது தெரியவந்தது. இதையடுத்து அந்த இயந்திரத்தை தவிர்த்து மற்ற பூத்களில் பதிவான வாக்குகள் எண்ணப்பட்டன. புதுப்பேட்டை பூத்தில் பதிவாகியிருந்த வாக்குகள் 844. இதனால் அந்த வாக்குகளை எண்ணாமலே திமுக வேட்பாளரின் வெற்றி உறுதியானது. இந்நிலையில் திடீரென ஆவேசமடைந்த என்ஆர் காங்கிரஸ் முகவர்கள், புதுப்பேட்டை பூத் வாக்கு இயந்திரம் எங்கே? அதனுடன் சேர்த்து 3வது சுற்றில் ஏன் எண்ணப்படவில்லை? என கேட்டு தேர்தல் நடத்தும் அதிகாரிகளிடம் வாக்குவாதம் செய்தனர். இதனால் அங்கு பரபரப்பு ஏற்பட்டது.

தட்டாஞ்சாவடி சட்டமன்ற இடைத்தேர்தலில் திமுக வெற்றி

புதுச்சேரி, மே 24: புதுவை தட்டாஞ்சாவடி சட்டமன்ற இடைத்தேர்தலில் திமுக வேட்பாளர் 1539 வாக்கு வித்தியாசத்தில் வெற்றி பெற்றார். புதுச்சேரி தட்டாஞ்சாவடி என்ஆர் காங்கிரஸ் எம்எல்ஏ அசோக் ஆனந்த் சொத்து குவிப்பு வழக்கில் நீதிமன்றத்தால் தண்டனை பெற்றார். இதனால் அவர் தகுதி நீக்கம் செய்யப்பட்டார். இதையடுத்து அத்தொகுதிக்கு மக்களவை தேர்தலுடன் இடைத்தேர்தல் அறிவிக்கப்பட்டது. அதன்படி ஏப்ரல் 18ம் தேதி வாக்குப்பதிவு நடைபெற்று முடிந்தது.இந்த இடைத்தேர்தலில் வெங்கடேசன் (திமுக), நெடுஞ்செழியன் (என்ஆர் காங்கிரஸ்), கவுரி (நாம் தமிழர் கட்சி), முருகசாமி (அமமுக) உள்பட 8 வேட்பாளர்கள் ேபாட்டியிட்டனர். மொத்தமுள்ள 29,320 வாக்குகளில் 22,985 பதிவானது. இந்த இடைத்தேர்தலுக்கான வாக்கு எண்ணிக்கை லாஸ்பேட்டையில் உள்ள மோதிலால் நேரு அரசு பாலிடெக்னிக் கல்லூரியில் நேற்று காலை 8 மணிக்கு துவங்கியது. முதலில் தபால் ஓட்டுகள் எண்ணப்பட்டன. இதில் என்ஆர் காங்., வேட்பாளர் நெடுஞ்செழியனை விட 29 வாக்குகள் திமுக வேட்பாளர் வெங்கடேசன் பெற்றார். வெங்கடேசன் 81 வாக்குகளும், நெடுஞ்செழியன் 52 வாக்குகளும் பெற்றனர். அடுத்து, முதல் சுற்றில் 12 பூத்களின் வாக்கு எண்ணிக்கை நடைபெற்றது. இதில் என்ஆர் காங்., வேட்பாளர் நெடுஞ்செழியன், திமுக வேட்பாளர் வெங்கடேசனை விட 172 வாக்குகள் அதிகம் பெற்றிருந்தார். 2வது சுற்றில் திமுக வேட்பாளர் வெங்கடேசன் முந்தினார். என்ஆர் காங்., வேட்பாளர் நெடுஞ்செழியனை விட அவர் 1088 வாக்குகள் கூடுதலாக பெற்றார். இறுதி சுற்றிலும் திமுக வேட்பாளர் வெங்கடேசன் 445 வாக்குகள் அதிகம் பெற்றார். முடிவில் என்ஆர் காங்., வேட்பாளர் நெடுஞ்செழியனை விட திமுக வேட்பாளர் வெங்கடேசன் 1539 வாக்குகள் அதிகம் பெற்று வெற்றி பெற்றார். அவர் பெற்ற மொத்த வாக்குகள் 10,906. நெடுஞ்செழியன் 9367 வாக்குகள் பெற்றுள்ளார். தட்டாஞ்சாவடி தொகுதி ரங்கசாமியின் நீண்டகால கோட்டையாக இருந்தது. இந்த வெற்றியின் மூலம் என்ஆர் காங்கிரசின் கோட்டையை தகர்த்து திமுக இத்தொகுதியை கைப்பற்றியுள்ளது குறிப்பிடத்தக்கது.

புதுச்சேரி மக்களவை தொகுதியில் காங். வைத்திலிங்கம் அமோக வெற்றி

புதுச்சேரி,  மே 24:   புதுச்சேரி மக்களவை தொகுதியில் காங்கிரஸ் வேட்பாளர் வைத்திலிங்கம் அமோக வெற்றி பெற்றார். முதல் சுற்றில் இருந்தே அவர் தொடர்ந்து முன்னிலை பெற்றிருந்தார். நாடு முழுவதும் 17வது மக்களவை தேர்தல் 7 கட்டமாக நடைபெற்றது. இதில் 2ம் கட்டமாக புதுச்சேரியில் உள்ள ஒரு மக்களவை தொகுதிக்கு ஏப்ரல் 18ல் தேர்தல் நடந்தது. இதில் காங்கிரஸ் கட்சியில் வைத்திலிங்கம், என்ஆர் காங்கிரஸ் சார்பில் டாக்டர் நாராயணசாமி உள்பட 18 பேர் போட்டியிட்டனர். புதுச்சேரி, காரைக்கால், மாகே, ஏனாம் என 4 பிராந்தியங்களிலும் நடைபெற்ற இத்தேர்தலில் 7,90,082 வாக்குகள் பதிவாயின. மொத்த வாக்குகள் 9,73,161. 970 வாக்குச்சாவடிகளில் 2,421 வாக்குப்பதிவு இயந்திரங்கள், 1147 கட்டுப்பாட்டு இயந்திரங்கள், 1209 விவிபாட் இயந்திரங்கள் பயன்படுத்தப்பட்டன. புதுச்சேரி பிராந்தியத்தில் உள்ள 23 தொகுதிகளில் பயன்படுத்தப்பட்ட வாக்குப்பதிவு இயந்திரங்கள் அனைத்து சீல் வைக்கப்பட்டு லாஸ்பேட்டை மோதிலால் நேரு அரசு பாலிடெக்னிக் கல்லூரி, அரசு மகளிர் பாலிடெக்னிக் கல்லூரி ஆகிய 2 மையங்களில் உள்ள பாதுகாப்பு அறையில் வைக்கப்பட்டன.  காரைக்காலில் 5 தொகுதிகளில் பயன்படுத்தப்பட்ட வாக்குப்பதிவு இயந்திரங்கள் அறிஞர் அண்ணா கலைக்கல்லூரி, பட்டமேற்படிப்பு மையத்திலும், மாகே, ஏனாமில் பதிவான வாக்குகள் அந்தந்த பகுதியிலுள்ள மையத்திலும் வைக்கப்பட்டன.அங்கு 3 அடுக்கு பாதுகாப்பு போடப்பட்டது. துப்பாக்கி ஏந்திய போலீசார் மற்றும் துணை ராணுவப்படையினர் 24 மணி நேரமும் பாதுகாப்பு பணியில் ஈடுபட்டனர். புதுவையில் 2 மையங்களிலும், காரைக்காலில் 2 மையங்களிலும் மாகே, ஏனாமில் தலா ஒரு மையம் என மொத்தம் 6 மையங்களில் வாக்கு எண்ணிக்கை நேற்று நடந்தது. ஒவ்வொரு தொகுதியிலும் தலா 5 விவிபாட் இயந்திரங்கள் குலுக்கல் முறையில் தேர்வு செய்யப்பட்டு எண்ணப்பட்டன. 35 நாட்கள் காத்திருப்புக்குப்பின் வாக்கு எண்ணிக்கை நேற்று காலை 8 மணிக்கு தொடங்கியது. தேர்தல் பணியில் புதுச்சேரியில் மட்டும் 95 மேஜைகளில் வாக்குகள் எண்ணப்பட்டன. மொத்தம் 8 உதவி தேர்தல் நடத்தும் அதிகாரிகள் மேற்பார்வையில் வாக்குகள் எண்ணப்பட்டன. அவர்களுக்கு தலா 3 தொகுதிகள் வீதம் ஒதுக்கப்பட்டு இருந்தது. வாக்கு எண்ணும் அறையில் ஒரு சுற்றுக்கு 12 மேஜைகள் அதாவது 12 வாக்குச்சாவடிகளில் பதிவான வாக்குகள் எண்ணப்பட்டன. தபால் வாக்குகளின் வாக்குப்பெட்டி வாக்கு எண்ணிக்கை அறைக்குள் காலை 7.30 மணியளவில் கொண்டு வரப்பட்டது. 8 மணியளவில் தபால் வாக்குகள் எண்ணப்பட்டன. அதில் காங்கிரஸ் முன்னிலை பெற்றது. அதன்பிறகு மின்னணு வாக்குப்பதிவு இயந்திரங்களில் பதிவான வாக்குகள் எண்ணப்பட்டன. முதல்கட்டமாக மண்ணாடிப்பட்டு, மங்கலம், கதிர்காமம், காமராஜர் நகர், லாஸ்பேட்டை, உப்பளம், நெல்லித்தோப்பு,  ஏம்பலம், நெடுங்காடு, காரைக்கால் வடக்கு, மாகே, ஏனாம் ஆகிய 12 தொகுதிகள் எண்ணப்பட்டன.2வது கட்டமாக திருபுவனை, வில்லியனூர், இந்திராநகர், முத்தியால்பேட்ைட, காலாப்பட்டு, உருளையன்பேட்டை, அரியாங்குப்பம், நெட்டப்பாக்கம், திருநள்ளாறு, காரைக்கால் தெற்கு ஆகிய 10 தொகுதிகள் பிற்பகல் 3 மணிக்கு பிறகு எண்ணப்பட்டன. 3வது கட்டமாக ஊசுடு, உழவர்கரை, தட்டாஞ்சாவடி, ராஜ்பவன், முதலியார்பேட்டை, மணவெளி, பாகூர், நிரவி திருபட்டினம் ஆகிய 8 தொகுதிகளில் பதிவான வாக்குகள் இரவு 9 மணிக்கு பிறகு எண்ணப்பட்டன. முதல் சுற்றில் இருந்து காங்கிரஸ் வேட்பாளர் வைத்திலிங்கம் முன்னிலை பெற்றிருந்தார். இறுதியில் காங்கிரஸ் வேட்பாளர் வைத்திலிங்கம்  வாக்கு வித்தியாசத்தில்  அமோக வெற்றி பெற்றார். அவர் மொத்தம் வாக்குகள் பெற்றார். எதிர்த்து போட்டியிட்ட என்ஆர் காங்கிரஸ் வேட்பாளர் நாராயணசாமி வாக்குகள் பெற்றார்.

உடலுக்கு தீங்கு விளைவிக்கும் கார்பைடு மாம்பழங்களை கண்டுபிடித்து அழிப்பது எப்போது?

புதுச்சேரி, மே 23:முக்கனிகளான மா, பலா, வாழையில் முதலிடத்தில் இருப்பது மாம்பழம் தான். தற்போது மாம்பழம் சீசன் தொடங்கி விட்டது. மாம்பழத்தின் ருசியை பிடிக்காதவர்கள் யாரும் இருக்க முடியாது. புதுச்சேரி பெரிய மார்க்கெட் மற்றும் பழக்கடைகளில் பல்வேறு ரக மாம்பழங்கள் விற்பனை மும்முரமாக நடந்து வருகிறது. ஆந்திரா, மரக்காணம் உள்ளிட்ட பகுதிகளில் இருந்து மாம்பழங்கள் வருகிறது. ஆந்திராவில் இருந்து வந்துள்ள பங்கனப்பள்ளி மாம்பழம் கிலோ ரூ.40 முதல் ரூ.60க்கும், மரக்காணம் கடப்பாக்கம் பகுதிகளில் இருந்து வந்துள்ள செந்தூரா மாம்பழங்கள் ரூ25க்கும், ஒட்டு மாங்காய் ரூ.20க்கும், இசிஆர் மரக்காணம் வெண்ணாங்கப்பட்டு பகுதியில் இருந்து வந்துள்ள ரெமோனியா மாம்பழம் ரூ.40க்கும், இமாம்பஸ் வகை மாம்பழகம் ரூ.100க்கும் விற்கப்படுகின்றன. மழை இல்லாததால் இந்தாண்டு விளைச்சல் குறைவு. இதனால் கடந்தாண்டை ஒப்பிடுகையில் இப்போது மாம்பழம் வரத்து குறைந்து விட்டது என வியாபாரிகள் தெரிவித்தனர். ருசிக்காக மாம்பழத்தை சாப்பிட்டாலும் அதில் வைட்டமின் ஏ, சி சத்துக்களும், இரும்புச்சத்தும் அடங்கியுள்ளன. பழைய காலத்தில் காற்று புகாத இருட்டு அறையில் மாங்காய்களை குவித்து வைத்து அதினுள் புகைமூட்டம் போட்டு பழுக்க வைப்பார்கள். வீட்டில் நாம் அரிசி, வைக்கோல் இடையே மாங்காய்களை வைத்து பழுக்க வைத்து சாப்பிடுவோம். இதுபோல் தானாக பழுக்கும் பழங்களில் மருத்துவ குணமும் நிறைந்துள்ளன. மாம்பழங்களில் இத்தனை சத்துக்கள் இருந்தாலும், கார்பைடு கல் மூலம் செயற்கையாக பழுக்க வைக்கப்பட்ட மாம்பழங்களால் உடலுக்கு பல்வேறு தீங்கு விளைவிக்கின்றன. இயற்கையாக பழுக்க 10 நாட்கள் வரை ஆகும் என்றால், இந்த கார்பைடு கல் மூலம் வெளியாகும் அசிட்டிலீன் வாயுவின் மூலம் 6 மணி நேரத்திற்கு உள்ளாகவே மாம்பழம் பழுத்து விடும். இந்த கார்பைடு கல் என்பது கேஸ் வெல்டிங் செய்யப்படுத்தும் ரசாயனம் ஆகும். மாம்பழம் மட்டுமின்றி வாழை, பப்பாளி, சப்போட்டா, அன்னாசி உள்ளிட்ட பழங்களும் கார்பைடு கல் மூலம் பழுக்க வைக்கப்படுகின்றன. கார்பைடு கற்களை சிறு, சிறு துண்டுகளாகவோ அல்லது பவுடராகவோ மாற்றி அதை பேப்பர்களில் மடித்து மாங்காய்களின் ஊடே வைத்து விடுகிறார்கள். கார்பைடு பவுடரில் இருந்து வெளியாகும் அசிட்டிலீன் ரசாயன வாயு விரைவாக பழுக்க வைக்கிறது.  இந்திய உணவு பாதுகாப்பு மற்றும் தர நிர்ணய சட்டத்தின்படி கார்பைடு கல் மூலம் பழுக்க வைப்பது தடை செய்யப்பட்டுள்ளது. ஆனாலும் அதை மீறி மொத்த வியாபாரிகள் சிலர்,  ஒரே நேரத்தில் விரைவாக அதிக லாபம் பார்க்க இதுபோல் செய்கின்றனர். மாங்காய் ரூ.20 முதல் ரூ.30 இருந்தால், ஒரே நாளில் பழுக்க வைப்பதன் மூலம் ரூ.50 முதல் 70 வரைக்கும் விற்று விடுகின்றனர். கார்பைடு மூலம் பழுக்க வைக்கப்பட்ட மாம்பழங்கள் மஞ்சள் நிறத்தில் பார்ப்பதற்கு அழகாக இருக்கும். ஆனால் தோல் மட்டும் பழுத்திருக்கும், உள்ளே பழுத்திருக்காது. தோலில் சிறு, சிறு கரும்புள்ளிகள் காணப்படும். தொட்டால் சூடாக இருக்கும். ருசி இருக்காது, புளிப்பாக இருக்கும். 2 அல்லது 3 நாளிலேயே அழுகி விடும். ஆனால் இயற்கையாக பழுத்த மாம்பழங்கள் மஞ்சள் நிறத்தில் இருந்தாலும், சற்று இளஞ்சிவப்பு நிறத்துடன் இருக்கும். கடைசியாகத்தான் காம்பு பகுதி பழுக்கும்.  கார்பைடு மூலம் பழுக்க வைக்கப்பட்ட மாம்பழங்கள் உண்பதன் மூலம் கல்லீரல், குடல், இரைப்பை, தோல் பாதிக்கப்படும். வயிற்றுப்போக்கு, வாந்தி, மயக்கம், வயிற்றுப்புண், தலைவலி, ஒவ்வாமை, நாளடைவில் புற்றுநோய் ஏற்படும். ஆகையால் உணவு பாதுகாப்பு அதிகாரிகள் ஆண்டுதோறும் மாம்பழ சீசனில் குடோன், பழக்கடைகளில் அதிரடி சோதனை நடத்துவது வழக்கம். கார்பைடு கல் மூலம் பழுக்க வைக்கப்பட்ட மாம்பழங்கள் கண்டறியப்பட்டால் அவற்றை பறிமுதல் செய்து அழிப்பார்கள். ஆனால், இந்தாண்டு மாம்பழ சீசன் தொடங்கி பல நாட்களாகியும் இன்னும் அதிகாரிகள் சோதனை நடத்துவதில்லை. இதனால் கார்பைடு மாம்பழங்களை மக்களிடத்தில் விற்றுவிட வாய்ப்பு இருக்கிறது. எனவே, அதிகாரிகள் உடனடியாக திடீர் சோதனைகள் நடத்த வேண்டுமென பொதுமக்கள், சமூக ஆர்வலர்கள் கோரிக்கை விடுத்துள்ளனர்.