Ramanathapuram - Dinakaran

மரத்திலிருந்து விழுந்து சூப்பர்வைசர் பலி

ராமநாதபுரம்,  மே 19:   ராமநாதபுரம் அருகே தேரிருவேலி கிராமத்தை சேர்ந்தவர் ஆனந்தன்(33). இவர் ராமநாதபுரம் மாவட்ட அரசு தலைமை மருத்துவமனையில் தனியார் நிறுவன ஒப்பந்தப் பணியாளர்களின் சூப்பர்வைசராக உள்ளார். நேற்று காலையில் வீட்டின் அருகே உள்ள புளியமரத்தில் ஏறி பழம் பறித்துள்ளார். அப்போது எதிர்பாராதவிதமாக கிளை முறிந்து கீழே விழுந்துவிட்டார். மயக்க நிலையில் இருந்தவரை உடனடியாக ராமநாதபுரம் அரசு மருத்துவமனைக்கு கொண்டு வந்தனர். அவரை பரிசோதனை செய்த டாக்டர் இறந்துவிட்டதாக தெரிவித்தனர். தகவலறிந்த தேரிருவேலி போலீசார் வழக்குப்பதிவு செய்து விசாரணை நடத்தி வருகின்றனர்.

முருகனுக்கு ஒரு நாள் திருநாள் வைகாசி விசாக திருவிழா

ராமநாதபுரம், மே 19: ராமநாதபுரம் நகரில் குண்டுக்கரை முருகன் கோயிலில் வைகாசி விசாகத்  தேரோட்டம் காலையில் நடைபெற்றது. சேதுபதிநகர் வேலவர் கோயில், கழுவூரணி  வேலவர் கோயில், குயவன்குடி சுப்பையா கோயில், திருப்புல்லாணி பஞ்சந்தாங்கி  முருகன் கோயில், குப்பச்சி வலசை முருகன் கோயில் ஆகியவற்றில் பால்குடம் எடுத்து ஆயிரக்கணக்கான பக்தர்கள் நேர்த்திக்கடன் செலுத்தினர். அனைத்து  கோயில்களிலும் அன்னதானமும்  வழங்கப்பட்டது. வெளிப்பட்டணம்  ஆதிரெத்தினேஸ்வரர் கோயிலில் நடைபெற்ற சிறப்பு பூஜையில் ஏராளமானோர்  கலந்துகொண்டு தரிசனம் செய்தனர். தேவிபட்டிணத்தில் உள்ள முருகன் கோயிலில்  பக்தர்கள் பூக்குழி இறங்கி நேர்த்திக்கடன் செலுத்தினர். மாவட்டத்தில்  சத்திரக்குடி, பரமக்குடி, கமுதி உள்ளிட்ட இடங்களிலும் முருகன் கோயில்களில்  சிறப்புப் பூஜைகள் நடைபெற்றன.

கேணிக்கரை நான்குமுனை சந்திப்பில் மினி லாரி, ஆம்னி வேன் மோதல் 6 பேர் படுகாயம்

ராமநாதபுரம், மே 19: ராமநாதபுரம் கேணிக்கரை நான்குமுனை சந்திப்பில் நேற்று  அதிகாலை வைக்கோல் ஏற்ற சென்ற மினி லாரியும், ஆம்னி வேனும் மோதிய விபத்தில் 6 பேர் காயமடைந்தனர். ராமநாதபுரம் மகாசக்தி நகர் பகுதியை சேர்ந்தவர் சரவணன்(38). இவர் மினி லாரியில் ராமநாதபுரம் பஸ்ஸடாண்ட் வழியாக   தேவிபட்டிணத்திற்கு வைக்கோல் ஏற்றுவதற்காக 4 தொழிலாளர்களுடன் சென்றுள்ளார். ஓம்சக்தி நகர் பகுதியை சேர்ந்த மகாலிங்கம் என்பவர் ஆம்னி வேனில்  கேணிக்கரை வழியாக அரண்மனைக்கு சென்று  கொண்டிருந்தார். அப்போது கேணிக்கரை சந்திப்பில் எதிர்பாராதவிதமாக மோதி விபத்துக்குள்ளானது. இதில் லாரி கவிழ்ந்தது. இச்சம்பவத்தில் லாரி டிரைவர் சரவணன், உடன்  சென்ற பசும்பொன் நகரை சேர்ந்த சேகர்(43), சரவணன்(38), ராஜூ (56), முருகன் (40) மற்றும் ஆம்னி டிரைவர் மகாலிங்கம் (48) ஆகியோர் படுகாயமடைந்தனர். காயமடைந்த அனைவரும் ராமநாதபுரம் மாவட்ட தலைமை அரசு மருத்துவமனையில் சிகிச்சைக்கு சேர்க்கப்பட்டு அனைவருக்கும்  தீவிர சிகிச்சை அளிக்கப்பட்டு வருகிறது. விபத்து குறித்து கேணிக்கரை போலீசார் வழக்குப்பதிவு செய்து  விசாரணை நடத்தி வருகின்றனர்.

ராமநாதபுரம் ஜிஹெச்சில் நவீன வசதிகளுடன் மகப்பேறு கட்டிடம் செயற்பொறியாளர் ஆய்வு

ராமநாதபுரம், மே 17: ராமநாதபுரம் மாவட்ட அரசு தலைமை மருத்துவமனை வளாகத்தில் மகப்பேறு மற்றும் குழந்தைகள் நலப்பிரிவிற்கு தனியாக அனைத்து வசதிகளும் கூடிய 5 அடுக்கு வளாகம் கட்டும் பணிகள் நடந்து வருகிறது. கடந்தாண்டு டிசம்பர் மாதம் பணிகளுக்கான அடிக்கல் நாட்டப்பட்டது. இந்தாண்டு பிப்ரவரி மாதம் பணிகள் துவங்கப்பட்டு நடைபெற்று வருகிறது. மாவட்ட மருத்துவமனை வளாகத்தில் தற்போதைய குழந்தைகள் நல வார்டுக்கு எதிரே உள்ள இடத்தில் சுமார் 77,600 சதுர அடியில் அதி நவீன மருத்துவ சிகிச்சை அளிக்க கூடிய வகையில், மகப்பெறு மற்றும் குழந்தைகள் நலப்பிரிவு கட்டிடம் கட்டும் பணி தற்போது தீவிரமாக நடந்து வருகிறது. முதல் தளத்திற்கான பணிகளை பொதுப்பணித் துறை மருத்துவ பிரிவு செயற்பொறியாளர் சங்கரலிங்கம் ஆய்வு செய்தார்.அவர் கூறுகையில், ‘மாவட்ட மருத்துவமனையில் ரூ.18 கோடி மதிப்பீட்டில் மகப்பேறு மற்றும் குழந்தைகள் நலம் இரண்டும் ஒரே வளாகத்தில் தரை மற்றும் 5 தளங்களுடன் அமைகிறது. நோயாளிகளின் அவசர சேவைக்காக 2 லிப்ட், சக்கர நாற்காலி கொண்டு செல்ல சறுக்கு சாலை, அவசர தேவைக்காக மாடிப்படிகள் உள்ளது. தரை தளத்தில் வெளிநோயாளிகள் பிரிவு, பிரசவத்திற்கான அவசர பிரிவு, மெடிக்கல், லேப் உள்ளிட்டவைகளும், முதல் தளத்தில் பிரசவகாலத்திற்கு முன் கவனிப்பு மற்றும் அவசரகால சிகிச்சை பிரிவு.இரண்டாவது தளத்தில் அதிதீவிர சிகிச்சை பிரிவு மற்றும் 2அறுவை அரங்குகளும், 3வது தளத்தில் அறுவை சிகிச்சைக்கு பின் கவனிப்பு பிரிவு, குடும்பநல பிரிவு, முதலமைச்சரின் விரிவான மருத்துவ காப்பீடு பிரிவும் நவீன தொழில்நுட்ப வசதிகளுடன் ஏற்படுத்தப்படவுள்ளது. 4வது தளத்தில் அறுவை சிகிச்சைக்கு பின் கவனிப்பு பிரிவு, பச்சிளம் குழந்தைகள் தீவிர சிகிச்சை பிரிவுகளும், 5வது தளத்தில் பேறுகால முன்கவனிப்பு பிரிவு ஆகியவையும் அமைய உள்ளது. 21 மாதத்திற்குள் இப்பணிகள் குறித்த காலத்தில் பணிகள் முடிவடையும். பெண்கள் கருதரித்தல் பரிசோதனை முதல் குழந்தை பிறந்த பின்பும் தேவையான சிகிச்சை அளிக்கும் வகையில் அனைத்து நவீன சிகிச்சை கருவிகள் உள்ளடக்கிய அரசு மருத்துவமனையாக அமையும்’என்றார். ஆய்வின் போது உதவி செயற்பொறியாளர் ஜெயதுரை, உதவி பொறியாளர் ஜவகர் மற்றும் அலுவலர்கள் உடனிருந்தனர்.

கூட்டுறவு தேர்தல் முறைகேடு வழக்கு வழக்கு போட்டவர்களிடம் சிறப்புக்குழு விசாரணை

ராமநாதபுரம், மே 17: தமிழகத்தில் கடந்த 2018ம் ஆண்டு கூட்டுறவு சங்கத் தேர்தல்கள் நடத்தப்பட்டன. பல இடங்களில் நேர்மையான முறையில் தேர்தல் நடைபெறவில்லை என கட்சிகள் நீதிமன்றத்தில் வழக்கு போட்டன. வழக்குகளை விசாரித்த நீதிமன்றம் கூட்டுறவு சங்கத் தேர்தல் தொடர்பான வழக்குகளை 4 மண்டலங்களாகப் பிரித்து விசாரிக்க ஓய்வு பெற்ற நீதிபதிகள் தலைமையில் குழு அமைத்து உத்தரவிட்டது.தெற்கு மண்டலக் குழுவில் ராமநாதபுரம், மதுரை, விருதுநகர், சிவகங்கை, தேனி, திண்டுக்கல், நெல்லை, தூத்துக்குடி, கன்னியாகுமரி மாவட்டங்கள் உள்ளன. குழுவின் தலைவராக ஓய்வு பெற்ற நீதிபதி ராமநாதனும், மதுரை, விருதுநகர் மாவட்ட கலெக்டர்கள் மற்றும் அந்த மாவட்ட கூட்டுறவு இணைப் பதிவாளர்களும் இடம்பெற்றுள்ளனர்.ராமநாதபுரம் மாவட்டத்தில் நேற்று இரண்டாவது முறையாக நடைபெற்ற விசாரணையில் ஓய்வுபெற்ற நீதிபதி ராமநாதன் முன்னிலையில், கூட்டுறவு சங்க புகார் தொடர்பான வழக்குகளில் ராமநாதபுரம் 11, கன்னியாகுமரி 2, தூத்துக்குடி 1, சிவகங்கை 10 என மொத்தம் 24 வழக்குகள் எடுத்துக் கொள்ளப்பட்டன. வழக்கு தொடுத்தவர்கள் வக்கீல்களுடன் வந்திருந்தனர்.சம்பந்தப்பட்ட கூட்டுறவு சங்கங்கள் சார்பில் தேர்தல் அலுவலர்கள், வக்கீல்கள் ஆஜராகினர். விசாரணைக்கு பின் ஒரு சில வழக்குகளில் முடிவு எட்டப்பட்டதாகவும், மற்ற வழக்குகள் வரும் 28 மற்றும் 29ம் தேதிகளில் திருநெல்வேலியில் நடைபெறும் அடுத்த விசாரணையில் எடுத்துக்கொள்ளப்படும் என தெரிவித்தனர். கூட்டுறவு தேர்தல் தொடர்பான வழக்கு விசாரணையில் திமுக, அமமுக உள்ளிட்ட கட்சியின் பிரமுகர்கள் பலரும் கலந்து கொண்டனர். குழுவில் உறுப்பினராக உள்ள கலெக்டர்கள் யாரும் பங்கேற்கவில்லை.

கமுதி பேருந்து நிலையத்தில் பயணிகளுக்கு பயன்படாத தண்ணீர் தொட்டி

கமுதி, மே 17: கமுதி பேருந்து நிலையத்தில் குடிநீர் தொட்டி பயனற்ற நிலையில் உள்ளது. கமுதி பேருந்து நிலையத்தில் 500 லிட்டருக்கு மேல் கொள்ளளவு உடைய குடிநீர் தொட்டி உள்ளது. இது நீண்ட நாட்களாக பைப்புகள் பழுதடைந்து பயனற்ற நிலையில் உள்ளது. இதில் குடிநீரை ஊற்றி வைக்காமல் இதன் அருகே இரண்டு குடங்களில் குடிநீர் ஊற்றி வைக்கப்படுகிறது. வெளியூர் செல்லும் பொதுமக்கள் குடிநீர் இல்லாமல் தண்ணீர் பாட்டில் வாங்கிச் செல்கின்றனர். நீண்ட நாட்களாக எந்த பயனும் இல்லாமல் தண்ணீர் தொட்டி உள்ளது. இதனால் அரசு பணம் வீணடிக்கப்பட்டுள்ளது. எனவே பேரூராட்சி நிர்வாகம் இதனை சரி செய்து குடிநீர் வசதி செய்து தர வேண்டுமென்று பொதுமக்கள் கோரிக்கை வைத்துள்ளனர்.

நம்புதாளை ஆரம்ப சுகாதார நிலையத்தில் செவிலியர்கள் இல்லாததால் கர்ப்பிணிகள் அவதி

தொண்டி, மே 17: நம்புதாளை ஊராட்சியில் உள்ள ஆரம்ப சுகாதார நிலையத்தில் செவிலியர் இல்லாததால், இப்பகுதி மக்கள் கடும் அவதிப்பட்டு வருகின்றனர். தனியார் மருத்துவமனையை அணுகுவதால் அதிக செலவு செய்வதாக புகார் தெரிவிக்கின்றனர். உடன் செவிலியரை நியமிக்க பொதுமக்கள் கோரிக்கை விடுத்துள்ளனர்.தொண்டி அருகே உள்ள நம்புதாளை ஊராட்சிக்கு உட்பட்ட பகுததியில் 12 ஆயிரத்திற்கும் மேற்பட்டோர் வசித்து வருகின்றனர். திருவாடானை தாலுகாவில் அதிக மக்கள் தொகை கொண்ட ஊராட்சி இதுவாகும். இப்பகுதி மக்களுக்கென ஆரம்ப சுகாதார நிலையம் உள்ளது. இங்கு பணிபுரிந்த செவிலியர் கடந்த சில மாதங்களுக்கு முன்பு பணி மாறுதலில் சென்று விட்டார். அவ்வப்போது செவிலியர் வந்து போன நிலையில் ஒரு மாதமாக இங்கு செ விலியர் வருவது கிடையாது.கர்ப்பிணிகள் மற்றும் அரசு நலத்திட்ட உதவிகள் பெறுவோர் தொண்டிக்கு செல்ல வேண்டியுள்ளது. மேலும் இரவு நேரத்தில் உடல் நிலை பாதிக்கப்படுவோர் மிகவும் சிரமப்படுகின்றனர். தனியார் மருத்துவமனைக்கு செல்வதால் அதிக செ லவு செய்வதாகவும் குற்றம்சாட்டுகின்றனர். கிராமங்களில் செவிலியர்கள் உள்ள நிலையில் பெரிய ஊராட்சியில் செவிலியர் நியமிக்காதது தனியார் மருத்துவமனைகளுடன் அதிகாரிகள் கூட்டு சேர்ந்துள்ளதாக சந்தேகம் எழுகிறது. உடன் நம்புதாளைக்கென தனியாக செவிலியர் நியமிக்க நடவடிக்கை எடுக்க பொதுமக்கள் கோரிக்கை விடுததுள்ளனர்.இதுகுறித்து நம்புதாளை ஜீயாத்கான் கூறியது, கர்ப்பிணி தாய்மார்கள் அந்தந்த ஊராட்சியில் உள்ள சுகாதார நிலையத்தில் பதிவு செய்யவேண்டும் என்பது விதி. அதற்கு இங்கு ஆள் இல்லாமல் தொண்டிக்கு அலைய வேண்டிய நிலை உள்ளது. மேலும் இரவு நேரத்தில் உடல் நிலை பாதிக்கப்பட்டவர்கள் மற்றும் முதியவர்கள் அரசு மருத்துவமனை இல்லாததால் கடும் சிரமப்பட்டு வருகின்றனர். தனியார் மருத்துவமனையிலும் அதிகம் செலவாகிறது. மாற்றுப்பணிக்கு வந்த செவிலியரும் தற்போது வருவதில்லை. நோயாளிகளின் நலனை கருத்தில் கொண்டு உடனடியாக இப்பகுதிக்கு செவிலியரை நியமிக்க வேண்டும் என்றார்.

மாவட்டம் மேய்ச்சல் நிலம் கருகி விட்டதால் கால்நடைகளின் தீவனத்திற்கு சிக்கல் கஷ்டப்படும் விவசாயிகள்

ஆர்.எஸ்.மங்கலம், மே 17: ஆர்.எஸ்.மங்கலம் சுற்றுவட்டாரப் பகுதிகளில் மழை தண்ணீர் இல்லாததால், வயல்வெளிகளில் பச்சை புல், புதர்கள் கூட முளைக்காததால் ஆடு, மாடுகள் மேய்ச்சலுக்கு அலைமோதுகிறது. ஆர்.எஸ்.மங்கலம் தாலுகா பகுதி முழுவதும் கடந்த 4 ஆண்டாக மழை இல்லாத காரணத்தால் விவசாயம் முற்றிலும் பாதிக்கப்பட்டது. இதனால் வருவாய் இழந்த விவசாயிகள் தங்கள் குடும்பங்களை காப்பாற்ற ஆடுகள் மற்றும் பசு மாடுகளையும் வாங்கி வளர்த்து வருகின்றனர். ஆனால் அந்த ஆடு, மாடுகளுக்கு சரியான முறையில் பசும் புற்கள் மற்றும் தீவனங்களை கொடுக்க முடியாமல் விவசாயிகள் திண்டாடி வருகின்றனர். வேறு வழி இல்லாமல் வயல்வெளிகளில் ஆடு, மாடுகளை மேய்ச்சலுக்கு விரட்டி அனுப்பி விடுகின்றனர். ஆனாலும் கண்மாய், குளம் குட்டை, வயல்வெளிகள் எங்குமே மேய்ச்சலுக்கு புதர்கள் இல்லை. இதனால் ஆடுகளும் மாடுகளும், வயல்வெளிகளில் கருகி சருகாக உள்ள புல், புதர்களை அலைந்து தின்னும் அவல நிலை ஏற்பட்டுள்ளது. இப்பகுதியில் மனிதனுக்கு கால்நடைகளுக்கும் கூட உணவு பஞ்சம் வந்து விட்டதாக பொதுமக்கள் கண்ணீருடன் கூறுகின்றனர்.

சிறிய காயங்களுக்கு கூட மதுரைக்கு விரட்டும் அரசு டாக்டர்கள் பரமக்குடி மருத்துவமனை மீது பொதுமக்கள் புகார்

பரமக்குடி, மே 17: பரமக்குடி அரசு மருத்துவமனைக்கு விபத்தில் காயம்பட்டு வரும் நபர்களுக்கு அவசர சிகிச்சை கொடுத்து உயிரை காப்பாற்றுவதற்கு பதிலாக, முதலுதவி என்ற பெயரில் ஊசி மருந்து கொடுத்து. மதுரை அரசு மருத்துவமனைக்கு மேல் சிகிச்சை என்ற பெயரில் பரிந்துரைக்கும் கொடுமை தொடர்கிறது.பரமக்குடி அரசு மருத்துவமனையில் தினமும் 500க்கும் மேற்பட்ட வெளிபுற நோயாளிகளும், 100க்கும் அதிகமான உள்புற நோயாளிகளும் சிகிச்சை பெற்று வருகின்றனர். காலை 7 மணி முதல் 12 வரையிலும், மாலை 3 மணி முதல் 5 மணி வரையும். ஞாற்றுக் கிழமைகளில் காலை 7 மணி முதல் 12 வரை பொதுமக்களுக்கு சிகிச்சை அளிக்கப்பட்டு வருகிறது. இந்நிலையில், பரமக்குடி அரசு மருத்துவமனையில் பணிபுரியும் மருத்துவர்கள் வெளிபுற நோயாளிகளை சோதனை செய்து பார்த்து சிகிச்சை அளிப்பதில்லை என்று கூறப்படுகிறது. அதற்கு பதிலாக சிகிச்சை என்ற பெயரில் மருத்து மாத்திரை எழுதி கொடுத்து விட்டு நேரம் முடிந்த பின்னர் தங்களின் கிளினிக் சென்று விடுகின்றனர்.தேசிய நெடுஞ்சாலையை ஒட்டி மருத்துவமனை உள்ளதாலும், சுற்றுப்புறங்களில் அதிகமான கிராமங்களை கொண்டுள்ளதால், தினமும் விபத்துகளில் சிக்கி உயிருக்கு போராடிய நிலையில் பொதுமக்கள் வருகின்றனர். சில நேரங்களில் பணியில் உள்ள டாக்டர்கள் இல்லாததால் உயிரிழப்பு ஏற்பட்டு வருகிறது. மருத்துவம் பார்ப்பதற்கான உயிர்காக்கும் மருத்துவ கருவிகள் இல்லாமல் பலர் உயிரிழந்து வருகின்றனர்.சாதாரண விபத்துகளில் சிக்கி கால், கைகளில் காயம்பட்டு வரும் நபர்களுக்கு முதல் உதவி செய்து விட்டு, உடன் மதுரைக்கு கொண்டு செல்ல வேண்டும் என எழுதி கொடுத்து விடும் பழக்கம், பரமக்குடி அரசு மருத்துவமனையில் ஆண்டாண்டு காலமாக தொடர்ந்து வருகிறது. சாதாரண காய்ச்சல் என்றாலும் மர்ம காய்ச்சல் அதனால், மதுரைக்கு செல்லுங்கள் என்று அனுப்பி வைத்து வருகின்றனர் என பொதுமக்கள் மருத்துவர்கள் மீது புகார் தெரிவித்து வருகின்றனர்.இதுகுறித்து பொதுமக்கள் கூறும்போது, ‘‘பரமக்குடி அரசு மருத்துவமனையில் தொடர்ச்சியாக காய்ச்சல், தலைவலி உள்ளிட்ட சில சிறு நோய்கள் வந்தாலும் கூட, மதுரை அரசு மருத்துவமனைக்கு மேல் சிகிச்சைக்காக டாக்டர்கள் பரிந்துரை செய்து விடுகின்றனர். ஆனால் சின்னசின்ன நோய்களுக்கு சிகிச்சை கொடுக்காமல் மதுரை க்கு அனுப்புவதாக கூறி மதுரை மருத்துவமனையில் சிகிச்சை அளிப்பதில் பாகுபாடு காட்டி வருவதால், அங்கிருந்து தனியார் மருத்துவமனைக்கு செல்லவேண்டிய நிலைக்கு பொதுமக்கள் தள்ளப்படுகின்றனர். ஆகவே பரமக்குடி அரசு மருத்துவமனையை தரம் உயர்த்தி, அனைத்து பிரிவுகளுக்கான சிகிச்சையையும் பரமக்குடியில் பெற்றுக் கொள்ள மாவட்ட நிர்வாகம் நடவடிக்கை எடுக்கவேண்டும் என்றனர். டாக்டர் தரப்பில் கூறும்போது, ‘இங்கு வரும் நோயாளிகள் சிறு வயிற்றுவலி, நெஞ்சுவலி என்றாலே மதுரைக்கு பரிந்துரை செய்யுங்கள். அங்கேயே சிகிச்சை பெற்றுக்கொள்கிறோம் என கூறுவதால், வேறு வழியின்றி நாங்கள் மதுரைக்கு அனுப்பி வைக்க வேண்டியுள்ளது’’ என்றனர்.

கடலாடி தாலுகாவில் புதிய சாலை பணி படுமோசம் கலெக்டரிடம் கிராமத்தினர் புகார்

ராமநாதபுரம், மே 17: கடலாடி தாலுகா மேலச்செல்வனூர் அருகே வெள்ளாங்குளம் மற்றும் சுற்றியுள்ள 7 கிராமத்தை சேர்ந்தவர்கள் கிராமத் தலைவர் வெங்கடாச்சலம் தலைமையில் கலெக்டரிடம் அளித்த மனுவில், ‘கடலாடி, சாயல்குடி மாநில நெடுஞ்சாலையிலிருந்து இணைப்பு சாலையாக மீனங்குடி கிராமம் வரை பிரதம மந்திரி கிராம சாலைகள் திட்டத்தின் மூலம் பணி நடைபெற்று வருகிறது. சாலையில் தார் போடும் பணிகளை மிஷின் மூலம் செய்யாததால், சாலையில் உள்ள குண்டும் குழிகளுக்கு முறையாக தார்,ஜல்லி போய் சேராமல் சில நாட்களிலேயே சாலை சேதமடைந்து விடும் வாய்ப்புள்ளது. மூன்று கி.மீ., சாலையை முறையான இயந்திரத்தை வைத்து அமைக்க வேண்டும்.இதுதொடர்பாக சம்பந்தப்பட்ட அதிகாரிகள், ஒப்பந்ததாரரிடம் பலமுறை எடுத்துக் கூறியும் நடவடிக்கை எடுக்க வில்லை. சாலையை முறையாக போடுவதற்கு உரிய நடவடிக்கை எடுக்க வேண்டும் என மனுவில் தெரிவித்துள்ளனர்.அவர்கள் கூறுகையில், மீனாங்குடி கருங்குளம், மேலச்செல்வனூர், ஊராட்சிகளில் 10க்கும் மேற்பட்ட கிராமங்கள் உள்ளன. கடலாடி சாயல்குடி நெடுஞ்சாலையிலிருந்து கிராமங்களை இணைக்கும் சாலை டெண்டர் விடப்பட்டு பல மாதங்களாகியும். கடந்த மூன்று மாதங்களுக்கு முன் பணிகள் தொடங்கப்பட்டது. பணிகள் ஆரம்பம் முதலே முறையாக போடவில்லை. ஜல்லிகள் போட்டு தார் பரப்பும் போது அதற்கான இயந்திரங்கள் மூலம் செய்யாமல் ஆட்களை மூலம் பரப்பி வருகின்றனர். இதனால் ரோட்டில் உள்ள பள்ளங்களுக்கு முறையாக தார் ஜல்லி சேராது. சிறிது நாட்களிலேயே சேதமடைந்து விடும். வரும் மழை காலத்தில் குண்டு குழியுமான சாலையை மக்கள் பயன்படுத்த வேண்டிய நிலை ஏற்படும். சாலைப் பணிகளை முறையாக ஆய்வு செய்து பணிகளை தொடர நடவடிக்கை எடுக்க வேண்டும் என்றனர்.

உள்ளாட்சி பிரதிநிதிகள் இல்லாமல் அடிப்படை வசதியின்றி களையிழந்த கிராமங்கள்

பரமக்குடி, மே 17: உள்ளாட்சி பிரதிநிதிகளின் பதவிகாலம் முடிந்து, இரண்டரை ஆண்டு நிறைவுபெற்ற நிலையில், உள்ளாட்சி அமைப்புகளில் வளர்ச்சி பணிகள் முற்றிலும் முடங்கியுள்ளதால் அடிப்படை வசதிகள் இல்லாமல் பொதுமக்கள் கடுமையாக பாதிக்கப்பட்டு வருகின்றனர்.ராமநாதபுரம் மாவட்டத்தில், 2011 அக்.25ம் தேதி உள்ளாட்சி தேர்தலில் வெற்றி பெற்றவர்கள், பல பதவிகளில் பொறுப்பு ஏற்றுக்கொண்டனர். கடந்த 2016 ஆக். 4ம் தேதியுடன் அவர்களின் பதவிக்காலம் முடிவடைந்தது. இதற்கிடையே, அதே மாதத்தில் உள்ளாட்சி தேர்தல் அறிவிக்கப்பட்டது. போட்டியிட ஏராளமானோர் மனு தாக்கல் செய்தநிலையில், இடஒதுக்கீடு முறையாக பின்பற்ற வில்லை என வழக்கு தொடர்பாக தேர்தல் ரத்து செய்யப்பட்டது.இதையொட்டி உள்ளாட்சி அதிகாரம், அரசு அதிகாரிகளின் வசம் சென்றது. கிராமங்களில் அடிப்படை வசதிகள் இல்லாமல் கிராமவாசிகள் பாதிக்கப்பட்டு வருவதால் நீதிமன்றம் உள்ளாட்சி தேர்தலை உடனடியாக நடத்த வேண்டும் என தமிழக அரசுக்கு உத்தரவிட்டும் ஏதோ காரணம் காட்டி தேர்தலை நடத்தாமல் காலம் கடத்தி வருகின்றனர். இரண்டரை வருடங்களாக உள்ளாட்சி பிரதிநிதிகள் இல்லாமல் ஊராட்சி பணிகள் நடந்து வருகிறது. இதனால் நகர் மற்றும் கிராமங்களில் அடிப்படை வளர்ச்சி பணிகள் பாதிக்கப்பட்டுள்ளது. ஊராட்சி நிர்வாகத்திற்கு பொறுப்பாளர்கள் இல்லாததால், கழிப்பறை, குடிநீர், தெருவிளக்கு உள்ளிட்ட அடிப்படை வசதிகள் கிடைக்காமல் பொதுமக்கள் அவதிக்குள்ளாகி வருகின்றனர். புகார் கொடுத்தால் எந்த நடவடிக்கையும் எடுக்காமல் காலம் கடத்தி வருகின்றனர் என பல தரப்பினரும் குற்றம்சாட்டி வருகின்றனர். ஊராட்சி வங்கி கணக்கில் பணம் இல்லாவிட்டாலும் பதவியில் இருந்தவர்கள் செலவு செய்து விட்டு பின்னர் பணத்தை பெற்றுகொண்டனர். தற்போது ஊராட்சிகளில் பல்வேறு பிரச்னைகள் இருந்தும்,தீர்வு காண்பதில் சிரமம் உள்ளது.இதுகுறித்து முன்னாள் பஞ்சாயத்து தலைவர் ஒருவர் கூறுகையில், ‘‘உள்ளாட்சி பொறுப்புகளுக்கான அங்கம் இல்லாததால், ஊராட்சிகளுக்கான நிதி ஓதுக்கீடு குறைக்கப்பட்டுள்ளது. இதனால் புதிய தெரு சாலை அமைத்தல், சிமென்ட் சாலை போடுதல், குடிநீர் தொட்டிகள் புனரமைத்தல் போன்ற பணிகள் இரண்டரை ஆண்டுகளாக நடைபெறாமல் உள்ளது. அடிப்படையான தேவைகள் இல்லாமல் பல கிராமங்கள் களையிழந்து காணப்படுகிறது. பிரதிநிதிகளாக நாங்கள் இருந்தபோது, ஊராட்சியின் தேவைகளை உடனுக்குடன் தகவல் கொடுத்து அதிகாரிகளிடம் பேசி செய்து வந்தோம். ஆனால் தற்போது யாரிடம் தேவைகளை கேட்பது என்று தெரியவில்லை. ஆகையால் உள்ளாட்சி தேர்தலை உடன் நடத்தவேண்டும்’’ என்றார்.

கீழக்கரை பகுதியில் மின்தடையால் தூங்க முடிய வில்லை பொதுமக்கள் வேதனை

கீழக்கரை, மே 17: கீழக்கரையில் உள்ள பல மின்மாற்றிகளில் நடுத்தெருவில் வைத்திருக்கும் 12வது மின்மாற்றியும் ஒன்று (டிரான்ஸ்பார்மர்) இந்த மின் மாற்றியில் கடந்த பல வருடங்களாக இரவில் அடிக்கடி மின்தடை ஏற்பட்டு வந்தது. சாலை தெருவில் 26வது புது மின்மாற்றி அமைத்து 12ல் இருந்து 50 சதவிகித மின் இணைப்புகள் அந்த மின்மாற்றிக்கு மாற்றியதால் இரவில் மின்தடை ஏற்படாமல் நடுத்தெரு மக்கள் நிம்மதியாக இருந்தனர்.இந்நிலையில் சாலை தெருவில் 26வது மின்மாற்றியுள்ள 50 சதவிகித மின் இணைப்புகளை மீண்டும் நடுத்தெருவில் உள்ள 12வது மின் மாற்றியில் மின் இணைப்புகளை இணைத்து விட்டனர். இதனால் மீண்டும் நடுத்தெருவில் உள்ள மக்கள் இரவில் மினசாரம் தடைபட்டு கடும் சிரமத்திற்கு உள்ளாகின்றனர்.நுகர்வோர் பாதுகாப்பு கழக செயலாளர் செய்யது இபுராகிம் கூறுகையில், ‘வீடுகளின் இணைப்புகளுக்கு மின்சாரம் குறைவாக வருவதாக கூறியும் மின்வாரிய ஊழியர்களை ஒரு சிலர் கவனித்ததால் அந்த மின்மாற்றியில் உள்ள 50 சதவிகித மின் இணைப்புகளை நடுத்தெரு மக்கள் எதிர்ப்பு தெரிவித்தும் 12வது மின்மாற்றியில் இணைத்து விட்டனர். இதனால் தற்போது இப்பகுதியில் இரவு அடிக்கடி மின்தடை ஏற்படுகிறது. ஊழியர்கள் வந்து சரி செய்து விட்டு சென்றாலும் அடுத்தடுத்து மின் தடை ஏற்படுகிறது. இதனால் பல வீடுகளில் இரவு முழுவதும் மின்சாரம் இல்லாமல் சிரமத்திற்குள்ளாகி வருகின்றனர். முஸ்லீம்கள் அதிகமாக உள்ள இப்பகுதியில் அடிக்கடி மின்சாரம் தடைபடுவதால், அதிகாலை 2.30 மணியளவில் எழுந்து ரமலான் நோன்பு வைக்க முடியாமல் கடும் சிரமப்படுகின்றனர்.மேலும் வெயில் காலம் என்பதால் பலர் வீட்டில் நிம்மதியாக தூங்க முடியாமால் சிரமப்படுகின்றனர். ஆகவே மாவட்ட நிர்வாகம் இப்பகுதி மக்களின் நலனை கருத்தில் கொண்டு இந்த மின் மாற்றியில் தற்போது கூடுதலாக கொடுக்கப்பட்ட மின் இணைப்புகளை மீண்டும் வேறு மின்மாற்றிக்கு மாற்றி அமைக்க நடவடிக்கை எடுக்க வேண்டும்’என்றார்.

கடலாடி கோயில் திருவிழாவில் 4 பிரிவுகளில் மாட்டுவண்டி பந்தயம் ஆப்பனூர், தூத்துக்குடி முதலிடம்

சாயல்குடி, மே 17: கடலாடி வனப்பேச்சியம்மன் கோயில், பொங்கல் திருவிழாவையொட்டி நான்கு பிரிவுகளாக மாட்டுவண்டி பந்தயம் நடந்தது.கடலாடி கொண்டையுடைய அய்யனார், வனப்பேச்சியம்மன், ராக்காச்சி அம்மன் கோயில் 9ம் ஆண்டு வருடாபிஷேகம் விழா நடந்தது. இதை முன்னிட்டு பூச்சிட்டு, சின்னமாடு, நடுமாடு, பெரியமாடு என நான்கு பிரிவுகளாக மாட்டுவண்டி பந்தயம் நடந்தது.கடலாடி-சாயல்குடி சாலையில் சுமார் 7 கிலோ மீட்டர் தூரம் வரையிலான பெரியமாடுகள் போட்டியில் 6 மாட்டுவண்டிகள் கலந்துகொண்டது. இதில் சித்திரங்குடி ராமமூர்த்தி மாடுகள் முதலிடத்தையும், திருநெல்வேலி மாவட்டம், கடம்பூர் கருணாகர ராஜா மாடுகள் இரண்டாம் இடத்தையும், மருதூர் நாச்சியார் மாடுகள் மூன்றாம் இடத்தையும் பெற்றன.சுமார் 5 கிலோ மீட்டர் தூரம் நடந்த நடுமாடு மாடுகள் பந்தயத்தில் 14 மாட்டுவண்டிகள் கலந்துகொண்டது. கடம்பூர் கருணாகர ராஜா மாடுகள் முதல் இடத்தையும், மதுரை மேலூர் மாடுகள் இரண்டாம் இடத்தையும், தங்கமாள்புரம் கார்த்திக் மாடுகள் மூன்றாம் இடத்தையும் பெற்றது. 4 கிலோ மீட்டர் சின்ன மாடு பந்தயத்தில் ஆப்பனூர் வேல்முருகன் மாடுகள் முதலிடத்தையும், எ.பாடுவனேந்தல் மாணிக்கவள்ளி மாடுகள் இரண்டாமிடத்தையும், எம்.கரிசல்குளம் வனப்பேச்சியம்மன் மாடுகள் மூன்றாமிடத்தையும் பெற்றது.3 கிலோ மீட்டர் தூரம் நடைபெற்ற பூச்சிட்டு எனப்படும் புதிய மாட்டுவண்டி பந்தய போட்டியில் தூத்துக்குடி மாவட்டம், சிந்தலக்கட்டை ராஜேஸ் மாடுகள் முதலிடத்தையும், ஒச்சதேவன்கோட்டை தங்கராஜ் மாடுகள் இரண்டாமிடத்தையும், எ.பாடுவனேந்தல் மகாதேவி மாடுகள் மூன்றாம் இடத்தையும் பெற்றன. நான்கு பிரிவு போட்டிகளிலும் முதல் மூன்று இடங்களை பிடித்த மாடுகளின் உரிமையாளர்களுக்கும், சாரதிகளுக்கும் ரொக்க பணமும், குத்துவிளக்குகளும் பரிசுகளாக வழங்கப்பட்டது.

தொண்டி அருகே இறந்து கரை ஒதுங்கிய ஆமை

தொண்டி, மே 16: தொண்டி அருகே இறந்த நிலையில் கரை ஒதுங்கிய கடல் ஆமையை வனத்துறையினர் கைப்பற்றி பிரேத பரிசோதனை செய்து புதைத்தனர். கடலில் அரியவகை உயிரினங்களான கடல் ஆமை, கடல்குதிரை, கடல் பசு, திமிங்கலம் உள்ளிட்ட பல்வேறு உயிரினங்களை பிடிப்பதற்கு அரசு தடை விதித்துள்ளது. மீனவர்கள் இவ்வகை உயிரினங்களை பிடித்தால் கடுமையான தண்டனை விதிக்கப்படும். மேலும் வலைகளில் சிக்கினால் கூட அவற்றை கடலில் விட்டு விட வேண்டும் என்பதுசட்டம். இந்நிலையில் நேற்று தொண்டி அருகே பிவிபட்டினம் கடல் பகுதியில் கடல் ஆமை ஒன்று இறந்து கரை ஒதுங்கியுள்ளதாக வனத்துறையிருக்கு தகவல் கிடைத்து. இதையடுத்து விரைந்து சென்ற அவர்கள் ஆமையை கைப்பற்றி பிரேத பரிசோதனை செய்து புதைத்தனர். இதுகுறித்து வனத்துறையினர் கூறுகையில், கடல் ஆமையில் 5 வகை இனம் உண்டு. இது அழுங்காமை இனத்தை சேர்ந்தது. பெண் ஆமையாகும். 10 கிலோ எடை உள்ளது. வலையில் சிக்கியோ, படகில் அடிபட்டோ இறந்திருக்கலாம் என்றனர்.

பெரியபட்டணம் பகுதியில் கலவரத்தை தூண்டுவோர் மீது நடவடிக்கை எடுக்க வேண்டும் எஸ்பி, கலெக்டரிடம் மனு

ராமநாதபுரம், மே 16: பெரியபட்டணம் ஜமாத் தலைவர் முகம்மது மிராசா, நிர்வாகி செய்யது அகமது உள்ளிட்டோர் எஸ்பி ஓம்பிரகாஷ் மீனா மற்றும் கலெக்டர் அலுவலகத்தில் அளித்துள்ள மனுவில், ‘‘பெரியபட்டணத்தில் இந்துக்கள், இஸ்லாமியர் உள்ளிட்ட அனைவரும் சகோதர உறவுகளாக பழகி வாழ்ந்து வருகிறோம். கடந்த சில நாட்களாக பெரியபட்டிணம் பகுதியில் சில அசம்பாவித சம்பவங்கள் நடந்து வருகிறது. சிலர் தனிப்பட்ட பிரச்னையை மதப்பிரச்னையாக்கி கிராமத்தில் அமைதியைச் சீர்குலைக்கும் வகையில் செயல்பட்டு வருகின்றனர். சிலர் அப்பகுதியில் மதமோதலை உருவாக்கி பிரச்சனைகளை ஏற்படுத்த திட்டமிட்டு செயல்பட்டு வருகின்றனர். ஆகவே சம்பந்தப்பட்டோர் மீது மாவட்ட நிர்வாகமும், காவல்துறையும் சட்டரீதியாக நடவடிக்கை எடுக்க வேண்டும்’’என கூறப்பட்டிருந்தது.

தொண்டி அருகே செயின் திருடன் கைது

தொண்டி, மே 16: தொண்டி அருகே கொடிபங்கு பஸ் ஸ்டாப்பில் நின்ற பெண்ணிடம் செயினை பறித்து சென்றவரை போலீசார் கைது செய்துள்ளனர். தொண்டி அருகே கொடிபங்கு பஸ் ஸ்டாப்பில் இதே ஊரை சேர்ந்த மலர்விழி கடந்த சில நாட்களுக்கு முன்பு பஸ்சுக்காக காத்திருந்தார். அப்போது டூவீலரில் வந்த ஒருவன் கத்தியை காட்டி மிரட்டி மலர்விழி கழுத்தில் அணிந்திருந்த நான்கரை பவுன் நகையை பறித்து சென்றான். பகலில் நடைபெற்ற இச்சம்பவம் பொதுமக்கள் மத்தியில் கடும் அதிர்ச்சியை ஏற்படுத்தியது.இதையடுத்து திருவாடானை டிஎஸ்பி புகழேந்தி கணேஷ் உத்தரவின் பெயரில், தொண்டி எஸ்ஐ காமாட்சி நாதன் தலைமையில் தனிப்படை அமைக்கப்பட்டது, நேற்று முன்தினம் அறந்தாங்கியில் பதுங்கியிருந்த பசீர்அலியை பிடித்து விசாரித்ததில் இச்சம்பவத்தில் ஈடுபட்டது தெரியவந்தது. மேலும் கடந்த வருடம் சேமன்வயலை சேர்ந்த சண்முகத்திடம் ரூ.3 லட்சம் மற்றும் 4 பவுன் நகையை பறித்து சென்றதும் தெரியவந்தது. இதையடுத்து பசீர்அலியை போலீசார் கைது செய்து சிறையில் அடைத்தனர். மேலும் பணம் மற்றும் பொருள்களை பறிமுதல் செய்து உரியவர்களிடம் டிஎஸ்பி ஒப்படைத்தார்.

குடிநீர் தொட்டியிலிருந்து விழுந்த திருவாடானை கொத்தனார் பலி

காரைக்குடி, மே 16: மேல்நிலை குடிநீர் தொட்டியில் தூங்கியபோது தவறி கீழே விழுந்து கொத்தனார் பலியானது பற்றி போலீசார் விசாரித்து வருகின்றனர்். காரைக்குடி கழனிவாசல் பகுதியில் குடிநீர் மேல்நிலை தொட்டி பணி நடைபெற்று வருகிறது. இதில் கொத்தனாராக ராமநாதபுரம் மாவட்டம் திருவாடானை சேர்ந்த செந்தில் (45) பணிபுரிந்து வந்தார். நேற்று முன்தினம் இரவு மேல்நிலைத் தொட்டியில் மேல் தூங்கியுள்ளார். அப்போது உருண்டு கீழே விழுந்த அவர், பலத்த காயமடைந்ததால் சம்பவ இடத்திலேயே இறந்து கிடந்தார். இதுபற்றி காரைக்குடி வடக்கு போலீசார் வழக்குப்பதிந்து விசாரித்து வருகின்றனர்.

இலங்கையில் இஸ்லாமியர்கள் தாக்கப்படுவதை தடுக்க வேண்டும் தவ்கித் ஜமாத் கோரிக்கை

தொண்டி, மே 16: இலங்கையில் கடந்த சில நாட்களாக திட்டமிட்டு இஸ்லாமியர்கள் கடுமையாக தாக்கப்படுகின்றனர். மசூதிகள் சேதப்படுத்தப்படுகிறது. இதை உலக நாடுகள் தடுக்க வேண்டும். மேலும் இங்குள்ள முஸ்லீம்களுக்கு பாதுகாப்பு ஏற்பாடு செய்ய வேண்டும். இது குறித்து தமிழ்நாடு தவ்கித் ஜமாத் மாநில செயலாளர் முஹம்மது வெளியிட்டுள்ள அறிக்கையில், ‘‘இலங்கையில் உள்ள இஸ்லாமியர்கள் பாதுகாப்பில்லாத சூழ்நிலையில் உள்ளனர். இஸ்லாமியர்களை அழிக்க களம் இறங்கியுள்ள சிங்கள அரசு, முஸ்லிம்கள் தாக்கப்படுவதை வெளியே தெரியாத வகையில் தடுக்கும் விதமாக பேஸ்புக், வாட்ஸ்ஆப் உள்ளிட்ட சமூக வலை தளங்களுக்கு தடை விதித்து முடக்கியுள்ளனர். முஸ்லீம் வீடுகள் கடைகள் அடித்து நொறுக்கப்பட்டுள்ளது. இதை இலங்கை அரசும் வேடிக்கை பார்த்து வருகிறது. பள்ளி வாசல்கள், திருக்குரான்களை தீவைத்து கொளுத்தியுள்ளனர். முஸ்லீம்கள் தாக்குப்படுவது நிறுத்தப்பட வேண்டும். உலக நாடுகள் இதில் தலையிட்டு உடன் பாதுகாப்பு நடவடிக்கை எடுக்க வேண்டும். இதுகுறித்து சென்னையில் வரும் 18ம் தேதி இலங்கை தூதரகம் முன்பு ஆர்ப்பாட்டம் நடைபெறும்’’ என தெரிவிக்கப்பட்டுள்ளது.

கீழக்கரை கிழக்கு தெருவில் ஆபத்தான கழிவுநீர் மூடி மாற்றப்படுமா?

கீழக்கரை, மே 16: கீழக்கரை கிழக்கு தெருவில் சேதமடைந்த கழிவுநீர் மூடை மாற்ற வேண்டும் என்று பொதுமக்கள் கோரிக்கை விடுத்துள்ளனர். கீழக்கரை கிழக்குத் தெருவில் தொடக்கப்பள்ளி எதிரே நடுரோட்டில் உள்ள கழிவுநீர் கால்வாய் மூடி உடைந்துள்ளதால், விபத்து ஏற்படும் அபாயம் உள்ளது. ஆகவே நகராட்சி நிர்வாகம் உடன் நடவடிக்கை எடுக்க வேண்டும் என்று பொதுமக்கள் கோரிக்கை விடுத்துள்ளனர். கீழக்கரையில் உள்ள அனைத்து பகுதிகளிலும் நகராட்சி சார்பில் நடுரோட்டில் கழிவுநீர் கால்வாய் அமைத்து மூடி போட்டுள்ளனர். இந்நிலையில் கிழக்குத் தெருவில் தொடக்கப்பள்ளி எதிரே போட்ட கால்வாய் மூடி தரமற்ற நிலையில் இருந்தது. இதனால் ஆட்டோ மற்றும் டூவீலர்கள் போன்ற வாகனங்கள் மூடியில் ஏறி சென்றதால் கடந்த ஒன்றரை மாதங்களுக்கு முன் உடைந்து நொருங்கியது. இப்பகுதியில் செல்லும் வாகனங்கள் மற்றும் பள்ளி குழந்தைகள் உள்ளே விழுந்து விபத்து ஏற்படும் சூழல் நிலவுகிறது. ஆகவே நகராட்சி நிர்வாகம் உடன் நடவடிக்கை எடுக்க வேண்டும் என்று பொதுமக்கள் கோரிக்கை விடுத்துள்ளனர்.முன்னாள் நகராட்சி கவுன்சிலர் சாகுல் ஹமீது கூறுகையில், ‘கீழக்கரை கிழக்குத்தெரு கைரத்துல் ஜலாலியா தொடக்கப்பள்ளி எதிரே நகராட்சி நிர்வாகம் தரமற்ற கழிவுநீர் கால்வாய் மூடியை போட்டிருந்தது. இதனால் கடந்த ஒன்றரை மாதத்திற்கு முன் ஆட்டோ மற்றும் டூவீலர் போன்ற வாகனங்கள் ஏறி செல்வதை தாங்க முடியாமல் உடைந்து நொருங்கி விட்டது. இதுகுறித்து நகராட்சியில் பலமுறை புகார் செய்தும் நடவடிக்கை எடுக்கவில்லை. இந்நிலையில் கால்வாய் மூடி உடைந்து நொருங்கி கிடப்பதால் இப்பகுதியில், செல்லும் வாகனங்கள் மற்றும் பள்ளி குழந்தைகள் உள்ளே விழுந்து விபத்து ஏற்படும் முன்பு நகராட்சி நிர்வாகம் அந்த மூடியை மாற்ற நடவடிக்கை எடுக்க வேண்டும்’ என்றார்.

படிக்க வசதியின்றி வறுமையின் கொடுமையால் கொத்தடிமையாகும் மாணவர்கள்

பரமக்குடி, மே 16: பரமக்குடி சுற்றுவட்டார பகுதிகளில் வசிக்கும் பலரும் விவசாயத்தை நம்பியுள்ளனர். படிக்க பள்ளிக்கு போய் வீடு திரும்பியதும் வயல்வெளிகளுக்கு சென்று விவசாய பணிகளில் பெற்றோர்களுக்கு உதவியாக மாணவர்கள் இருந்து வருகின்றனர். கடன் பெற்று விவசாய பணிகளுக்கு செலவு செய்து விட்டு, போதிய விளைச்சல் இல்லாததால் கடனை திரும்ப செலுத்த முடியாமல் பலர் பரிதவித்து வருகின்றனர். இதேநிலையில் குழந்தைகளை படிக்க வைக்க முடியாததால், பெண் குழந்தைகளை திருமணத் திட்டம் என்ற பெயரில் முன்பணம் பெற்றுக்கொண்டு திருமணம் செய்யும் காலத்தில் குறிப்பிட்ட தொகை பெற்றுக்கொள்ள வேண்டும் என்ற ஒப்பந்தத்தின் அடிப்படையில் வெளியூர்களுக்கு வேலைக்கு அனுப்பி வைக்கின்றனர்.அதுபோல், பள்ளியில் படிக்கும் மாணவர்கள் எண்ணிக்கை குறைந்து வருவதாக அரசு பள்ளி ஆசிரியர்கள் குற்றம்சாட்டி வருகின்றனர். இதுகுறித்து விசாரித்தபோது, பள்ளியில் படிக்கும் மாணவர்களை, அவர்களின் பெற்றோர்கள் குடும்ப வறுமையை காட்டி, வேறு வழியின்றி படிக்க வைக்காமல் முன்பணம் வாங்கிக்கொண்டு வேலைக்கு அனுப்பியுள்ளனர். பரமக்குடி நகர் பகுதியில் வசித்து வரும் நெசவாளர் மற்றும் ஏழை குடும்பத்தினர் பலர் வறுமை காரணமாக குழந்தைகளை பள்ளிக்கு அனுப்பாமல் வேலைக்கு அனுப்புவதை வாடிக்கையாக வைத்துள்ளனர். இவ்வாறு அனுப்பப்படும் குழந்தை தொழிலாளர்களை தனியார் நிறுவனங்களில் கொத்தடிமைகளாக பயன்படுத்தி வருகின்றனர். பள்ளிக்கு செல்லாமல் இடைநிறுத்தம் செய்துள்ள மாணவர்களை கண்டறிந்து அவர்களை மீண்டும் பள்ளியில் சேர்க்க ஏற்பாடு செய்யவேண்டும். மேலும் குழந்தைகளை பள்ளிக்கு அனுப்பாமல் வேலைக்கு அனுப்பும் பெற்றோர்களை கண்டறிந்து கடுமையான தண்டனைக்கு உட்படுத்த வேண்டும். இடை நிற்றல் மாணவர்கள் விஷயத்தில் ஆசிரியர்கள் கவனத்துடன் செயல்பட வேண்டும். குழந்தைகளை வேலைக்கு பணி அமர்த்த அரசு தடைவிதித்துள்ள நிலையில் பல தனியார் நிறுவனங்கள் பெற்றோர்களுக்கு முன்பணம் கொடுத்து அவர்களின் குழந்தைகளை வேலைக்கு அனுப்பும் சட்டவிரோத செயல்கள் தொடர்வதால், இதற்கு முற்றுப்புள்ளி வைக்க சமந்தப்பட்ட அதிகாரிகள் நடவடிக்கை எடுக்க முன்வரவேண்டும் என்பது சமூக ஆர்வலர்களின் கோரிக்கையாக உள்ளது.