Selam - Dinakaran

தேர்தலை காரணம் காட்டி கைவிரித்த அதிகாரிகள் சான்றிதழ்கள் கிடைக்காமல் பறிபோகும் 25சதவீத இட ஒதுக்கீடு

கிராமங்களில் பரிதவிக்கும் பெற்றோர் விண்ணப்ப தேதியை நீட்டிக்க கோரிக்கைசேலம், மே 17: நாடாளுமன்றத் தேர்தலை காரணம் காட்டி அதிகாரிகள், உரிய சான்றிதழ்களை வழங்காததால், 25 சதவீத இட ஒதுக்கீட்டில் கிராமத்து குழந்தைகளை பள்ளியில் சேர்ப்பது தடைபட்டுள்ளது என்று ெபற்றோர் வேதனை தெரிவித்துள்ளனர். குழந்தைகளுக்கான இலவச மற்றும் கட்டாய கல்வி உரிமை சட்டம், கடந்த 2009ம் ஆண்டு கொண்டு வரப்பட்டது. இந்த சட்டத்தின்படி, சிறுபான்மையற்ற தனியார் சுயநிதிப் பள்ளிகளில் நுழைவு நிலை வகுப்பில், வாய்ப்பு மறுக்கப்பட்ட மற்றும் நலிவடைந்த பிரிவினரின் குழந்தைகள் 25 சதவீதம் சேர்க்கப்பட வேண்டும் என்று பள்ளிக்கல்வித்துறை உத்தரவிட்டுள்ளது. இதன்படி நடப்பாண்டுக்கான (2019-20) மாணவர் சேர்க்கை, கடந்த ஏப்ரல் மாதம் 24ம்தேதி தொடங்கியது. நாளை (18ம்தேதி) விண்ணப்பிக்க கடைசி நாளாக அறிவிக்கப்பட்டுள்ளது. இந்நிலையில், கிராமப்புறங்களில் தேர்தலை காரணம் காட்டி, அதிகாரிகள் சான்றிதழ்கள் தர மறுத்ததால், தங்கள் குழந்ைதகளுக்கான வாய்ப்புகள் தடைபட்டுள்ளது என்று பெற்றோர் புகார் தெரிவித்துள்ளனர்.இது குறித்து ெபற்றோர் கூறியதாவது:25 சதவீத இட ஒதுக்கீட்டில் குழந்தைகளை தனியார் பள்ளிகளில் சேர்க்க, இணையதளத்தில் மட்டுமே விண்ணப்பிக்க வேண்டும் என்று அறிவிக்கப்பட்டுள்ளது. அப்போது விண்ணப்பத்துடன் ஆதார் அட்டை, வாய்ப்பு மறுக்கப்பட்ட பிரிவினருக்கான சாதி சான்றிதழ், பிறப்புச்சான்றிதழ், இருப்பிடச் சான்றிதழ், வருமானச் சான்றிதழ் போன்றவற்றையும் பதிவேற்றம் செய்ய வேண்டும். ஆனால், நடப்பாண்டு கிராமப்புறங்களை ெபாறுத்தவரை இது போன்ற சான்றிதழ்கள் ேகட்டு விண்ணப்பித்த பெரும்பாலானவர்களுக்கு, இதுவரை கிடைக்கவில்லை. ஏப்ரல் 18ம்தேதிக்கு முன்பு வரை, விண்ணப்பித்தவர்கள் இது குறித்து சம்மந்தப்பட்ட விஏஓ, ஆர்.ஐ, தாசில்தார், ஆர்டிஓ ஆகியோரை தொடர்பு கொண்டு கேட்டோம். அப்போது தேர்தல் வேலைகள் இருப்பதால் சான்றிதழ்கள் கிடைப்பது தாமதமாகும் என்றனர். தேர்தல் முடிந்த பிறகு கேட்டால் சர்வர் பிரச்னை உள்ளிட்ட பல்வேறு காரணங்களை கூறுகின்றனர். இதில் மலைவாழ் மற்றும் பழங்குடியின குழந்தைகளுக்கு ஏற்கனவே பல்வேறு காரணங்களை கூறி, சாதிசான்றிதழ் வழங்காமல் அலைக்கழித்து வருகின்றனர். இந்த முறை தேர்தலை காரணம் காட்டியே, சான்றிதழ் வழங்குவதை அதிகாரிகள் தவிர்த்து விட்டனர். இதனால் எங்கள் குழந்தைகளுக்கு கிடைக்க வேண்டிய வாய்ப்பு தடைபட்டுள்ளது. இதை கருத்தில் கொண்டு நாளையுடன் (18ம்தேதி) நிறைவு பெறும் விண்ணப்ப தேதியை, மேலும் சில வாரங்களுக்கு நீட்டிக்க வேண்டும். முக்கியமாக கிராமப்புறங்களில் கலெக்டர் நேரடி ஆய்வு செய்து, சான்றிதழ்களை உடனடியாக வழங்க உரிய நடவடிக்கை எடுக்க வேண்டும். இவ்வாறு பெற்றோர் கூறினர்.

இளம்பெண்ணை மானபங்கம் செய்த சகோதரர்களை கைது செய்வதில் அலட்சியம்

கெங்கவல்லி, மே 17:  வீரகனூரில் இளம்பெண்ணை மானபங்கம் செய்த அரசு ஊழியர் மற்றும் அவரது தம்பியை போலீசார் கைது செய்யாமல் காலம் தாழ்த்துவதாக பாதிக்கப்பட்ட பெண் புகார் தெரிவித்துள்ளார். கெங்கவல்லி தாலுகா, வீரகனூர் அண்ணா நகரை சேர்ந்தவர் முருகன்(30). இவர் அந்தியூர் கன்சல்டிங் கம்பெனியில் பணியாற்றி   வருகிறார். இவரது மனைவி  மாதேஸ்வரி(25). இவர்களது வீட்டின் அருகில் வசிப்பவர் வையாபுரி மகன்  அங்கமுத்து(47). இவர் கெங்கவல்லி மின்வாரியத்தில் ஒயர்மேனாக பணியாற்றி  வருகிறார்.  இவரது தம்பி செந்தில்குமார்(41). இவர்களது வீட்டிற்கு இடையே  3 அடியில் பொது வழித்தடம் உள்ளது. அந்த வழித்தடத்தில் அங்கமுத்து கழிப்பறை  கட்டி வருகிறார். கழிப்பறை கட்ட தோண்டிய குழியில், தற்போது மழைநீர்  தேங்கியுள்ளதால், மாதேஸ்வரி வீட்டின் சுவரில் ஓதம் காணப்பட்டது.  இதுகுறித்து அங்கமுத்து மனைவியிடம் மாதேஸ்வரி  கேட்டுள்ளார். இந்நிலையில்,  கடந்த 5 தேதி அங்கமுத்து மற்றும் அவரது தம்பி செந்தில்குமார், குடிபோதையில் வந்து வீட்டில் தனியாக இருந்த மாதேஸ்வரியை தகாத  வார்த்தைகளில் திட்டி, சேலை யை பிடித்து இழுத்து மானபங்கம் செய்து, செருப்பால்  அடித்துள்ளனர். இதனால் மயங்கி விழுந்த மாதேஸ்வரியை, அக்கம்பக்கத்தினர்  மீட்டு ஆத்தூர் அரசு மருத்துவமனையில் சேர்த்தனர். இதுகுறித்து அவர் அளித்த புகாரின் பேரில், விசாரணை நடத்திய வீரகனூர் போலீசார், கடந்த 8ம் தேதி,  மானபங்கம் மற்றும் கொலை முயற்சி, கெட்ட  வார்த்தையில் திட்டியது உள்ளிட்ட 5 பிரிவுகளின் கீழ், அங்கமுத்து, அவரது தம்பி செந்தில்குமார் ஆகியோர் மீது வழக்கு பதிவு செய்தனர். ஆனால், இதுவரை  அவர்களை கைது செய்யவில்லை. வீரகனூர் காவல் நிலையத்திற்கு  சென்று, மாதேஸ்வரி கேட்ட போது, அங்கமுத்து மற்றும் செந்தில்குமார் ஊரில் இல்லை என போலீசார்  தெரிவித்தனர். ஆனால், அங்கமுத்துவோ கெங்கவல்லி மின்வாரிய அலுவலகத்திற்கு  தினமும் பணிக்கு சென்று வருகிறார். எனவே, அவரை போலீசார் கைது செய்யாவிட்டால், எஸ்பியிடம் நேரில் புகார் தெரிவிக்க உள்ளதாக மாதேஸ்வரி தெரிவித்தார்.

உத்தரவை மதிக்காத சிபிஎஸ்இ பள்ளிகள்

25 சதவீத இட ஒதுக்கீட்டில் சிபிஎஸ்இ பள்ளிகளிலும் குழந்தைகளை சேர்க்கலாம் என்று அரசு அறிவித்துள்ளது. கடந்தாண்டு இது குறித்து சம்மந்தப்பட்ட பள்ளி நிர்வாகங்களிடம் கேட்டபோது, தமிழக அரசின் உத்தரவு, எங்களுக்கு பொருந்தாது என்று மறுத்துவிட்டனர். இதனால் எந்தவொரு மாணவருக்கும், சிபிஎஸ்இ பள்ளிகளில் 25சதவீத ஒதுக்கீட்டில் இடம் கிடைத்ததாக தெரியவில்லை. நடப்பாண்டில் இது குறித்து தமிழக கல்வித்துறை ெதளிவான அறிக்கையை வெளியிட்டுள்ளது. ஆனால், அரசு உத்தரவை மதித்து, தங்கள் பள்ளிகளில் 25சதவீத ஒதுக்கீட்டில் மாணவர்களை சேர்க்கலாம் என்ற அறிவிப்பை கூட,  சிபிஎஸ்இ பள்ளிகள் வைக்கவில்லை. எனவே அரசின் உத்தரவு, இந்த பள்ளிகளுக்கு ஏன் பொருந்தவில்லை? என்பதை ெதளிவாக விளக்க வேண்டும் என்று பெற்றோர் கோரிக்கை வைத்துள்ளனர்.

ஏர்கன் துப்பாக்கி சுட்டதில் சிறுவன் முதுகில் பால்ரஸ் குண்டு பாய்ந்து படுகாயம்

சேலம், மே 17: சேலத்தில், ஏர்கன் துப்பாக்கி சுட்டதில் விளையாடிக் கொண்டிருந்த சிறுவன் மீது பால்ரஸ் குண்டு பாய்ந்து படுகாயமடைந்த சம்பவம் பரபரப்பை ஏற்படுத்தி உள்ளது. சேலம் பொன்னம்மாபேட்டை செங்கல்அணை கவுண்டர் காடு பகுதியை சேர்ந்தவர் செல்வம். இவரது மகன் கார்த்திக்(17), பிளஸ்1 படித்துள்ளார். நேற்று அதே பகுதியை சேர்ந்த ஆசைதம்பி எ்ன்பவரது மகன்களான தமிழ்செல்வன், வேலு, வசந்தகுமார் ஆகியோருடன் விளையாடிக் கொண்டிருந்தார். அப்போது, வேலு(19) ஏர்கன் துப்பாக்கியை வைத்து விளையாடினார். திடீரென துப்பாக்கி திடீரென வெடித்ததில், அதிலிருந்து வெளியே வந்த பால்ரஸ் குண்டு, அங்கு விளையாடிக்கொண்டிருந்த கார்த்திக்கின் முதுகில் பாய்ந்தது. உடனே முதுகில் இருந்து ரத்தம் வெளியேறியது. இதை பார்த்து, அங்கு விளையாடிக்கொண்டிருந்த சிறுவர்கள் அலறினர். சத்தத்தை கேட்ட அருகில் இருந்தவர்கள், கார்த்திக்கை மீட்டு அங்குள்ள தனியார் மருத்துவமனையில் சிகிச்சைக்காக சேர்த்தனர். அங்கு சிறுவனின் முதுகில் பாய்ந்த பால்ரஸ் குண்டை அகற்ற, டாக்டர்கள் தீவிர சிகிச்சை அளித்து வருகின்றனர். தகவலறிந்த அம்மாப்பேட்டை போலீசார், சம்பவ இடத்திற்கு விரைந்து சென்று விசாரணை மேற்கொண்டனர். மேலும், ஏர்கன் துப்பாக்கிக்கு லைசென்ஸ் உள்ளதா என்பது குறித்தும், சிறுவன் கையில் எப்படி துப்பாக்கி சென்றது என்பது குறித்தும் விசாரித்து வருகின்றனர்.

இடைப்பாடி, மேட்டூரில் தனியார் பள்ளி வாகனங்கள் ஆய்வு 23 பஸ்களுக்கு தகுதிச்சான்று ரத்து

மேட்டூர், மே 17:  மேட்டூர், இடைப்பாடியில் தனியார் பள்ளிகளின் வாகனங்களை வட்டார போக்குவரத்து அலுவலர்கள் வருடாந்திர ஆய்வு செய்தனர். இதில் 23 பஸ்களுக்கு தகுதிச்சான்று ரத்து செய்யப்பட்டது. மேட்டூரில் தனியார் பள்ளிகளின் வாகனங்களின் தகுதி குறித்து, முதல்கட்ட ஆய்வு நேற்று நடைபெற்றது. மேட்டூர் ஆர்டிஓ லலிதா முன்னிலையில், மேட்டூர் வட்டார போக்குவரத்து அலுவலர் சிங்காரவேலன், வட்டார போக்குவரத்து ஆய்வாளர் முரளி ஆகியோர் வாகனங்களை சோதனையிட்டனர். வாகனங்களின் பிளாட்பாரத்தின் உறுதித்தன்மை, படிக்கட்டுகள், முதலுதவி பெட்டிகள், அவசர கால கதவுகளின் இயக்கம் மற்றும் உறுதித்தன்மை உட்பட 16 வகையான பாதுகாப்பு அம்சங்களை ஆய்வு செய்தனர். முதல்கட்ட ஆய்வில், மேட்டூரில் உள்ள தனியார் பள்ளிகளின் 83 பஸ்கள் பங்கேற்றன. இதில் 5 பஸ்கள் பல்வேறு குறைபாடுகளுடன் இருந்ததால் அவற்றின் தகுதிச்சான்றுகள் ரத்து செய்யப்பட்டன.இடைப்பாடி: இடைப்பாடி மறறும் சங்ககிரியில் உள்ள தனியார் பள்ளிகளில், 267 வாகனங்கள் இயக்கப்பட்டு வருகிறது. நேற்று இடைப்பாடி அடுத்த மொரசப்பட்டி அமலா மெட்ரிக் பள்ளி வளாகத்தில், 76 தனியார் பள்ளிகளின் வாகனங்கள் ஆய்வு செய்யப்பட்டது. சங்ககிரி ஆர்டிஓ அமிர்தலிங்கம்,  வட்டார போக்குவரத்து அலுவலர் அங்கமுத்து, இன்ஸ்பெக்டர் ராஜேந்திரன், இடைப்பாடி இன்ஸ்பெக்டர் செந்தில் ஆகியோர் ஆய்வு மேற்கொண்டனர். 90 வாகனங்கள் ஆய்வு செய்யப்பட்டதில், 18 பஸ்கள் பல்வேறு குறைபாடுகளுடன் இருந்ததால், அவற்றின் தகுதிச்சான்றுகள் ரத்து செய்யப்பட்டன. அவற்றை சரி செய்து, அடுத்த ஆய்வின் போது காண்பித்து சான்று பெறும்படி அதிகாரிகள் அறிவுறுத்தினர்.

நிலத்தகராறில் தொழிலாளியை தாக்கிய 4பேர் மீது வழக்கு பதிவு

தாரமங்கலம், மே 17:  தாரமங்கலம்  அருகிலுள்ள செலவடைநந்தன்வளவு பகுதியை சேர்ந்தவர் குழந்தைவேல்(45). அதே பகுதியை  சேர்ந்த கோவிந்தசாமி(40). இருவரும் நெசவுத்தொழில் செய்து வருகின்றனர். இருவருக்கும்  இடையே நிலத்தகராறு மற்றும் கைத்தறி  சம்மந்தமாக முன்விரோதம் இருந்து வந்துள்ளது. இந்நிலையில், நேற்று முன்தினம் கோவிந்தசாமி  வீட்டிற்கு சென்ற குழந்தைவேல், அவரது மனைவி அலமேலு மற்றும் லோகநாதன்(24),  வேலுமணி(21) ஆகியோர் தடி மற்றும் இரும்பு கம்பிகளை கொண்டு கோவிந்தசாமியை  சரமாரியாக தாக்கினர். இதில் படுகாயமடைந்த அவரை,  அக்கம்பக்கத்தினர்  மீட்டு ஓமலூர் அரசு மருத்துவமனையில் சேர்த்தனர். இதுகுறித்து தாரமங்கலம்  போலீசார் வழக்கு பதிவு செய்து, தலைமறைவாக உளள குழந்தைவேல் உள்ளிட்ட 4 பேரையும்  தேடி வருகின்றனர்.

போலீசாரால் தேடப்பட்ட பிரபல ரவுடி அதிரடி கைது

சேலம், மே 17: சேலத்தில் போலீசாரால் தேடப்பட்டு வந்த பிரபல ரவுடி அதிரடியாக கைது செய்யப்பட்டார். சேலம் கிச்சிப்பாளையத்தை சேர்ந்தவர் செல்லதுரை(35). பிரபல ரவுடியான இவர் மீது கொலை, ஆள்கடத்தல் உள்பட 15க்கும் மேற்பட்ட வழக்குகள் உள்ளன. இந்நிலையில் கடந்த 15 நாட்களுக்கு முன், இவர் பதுக்கி வைத்திருந்த 3 டன் ரேஷன் அரிசியை, உணவு கடத்தல் தடுப்பு பிரிவு போலீசார் பறிமுதல் செய்தனர். மேலும் வெளிமாநில மதுவை பதுக்கி வைத்து விற்பனை செய்ததாக, கிச்சிப்பாளையம் போலீசார் வழக்கு பதிவு செய்து அவரை தேடி வந்தனர். இதனிடையே, சென்னை உயர்நீதிமன்றத்தில் ரவுடி செல்லதுரை முன்ஜாமீன் பெற்றார். அதே நேரத்தில் அவர் மீது கட்டப்பஞ்சாயத்து, வட்டிக்கு பணம் கொடுத்து மிரட்டுதல் போன்ற புகார்கள், போலீசுக்கு வந்த வண்ணம் இருந்தன.  இதையடுத்து செல்லதுரையை போலீசார் தேடி வந்த நிலையில், நேற்று காலை கிச்சிப்பாளையம் போலீசார் அவரை கைது செய்தனர். மோகன் என்பவரிடம் கத்தியை காட்டி மிரட்டி பணம், செல்போனை பறித்த வழக்கில் அவர் கைது செய்யப்பட்டார். இவரின் எதிர்தரப்பு ரவுடிகளான ஜீசஸ், சிலம்பரசன் ஆகியோரும் ஏற்கனவே கைது செய்யப்பட்டு, சிறையில் அடைக்கப்பட்டுள்ளது குறிப்பிடத்தக்கது.

வாழப்பாடி அருகே சூறைக்காற்றுக்கு மரம் முறிந்து விழுந்து கோயில், வீடுகள் சேதம்

வாழப்பாடி, மே 17: வாழப்பாடி அருகே சூறைக்காற்றுக்கு மரம் முறிந்து விழுந்ததில் கோயில், வீடுகள் சேதமடைந்தது. வாழப்பாடி சுற்றுவட்டார பகுதிகளில், நேற்று மாலை சூறைக்காற்றுடன் மழை பெய்தது. அப்போது திருமனூர் ஊராட்சி ஊர்நாடு பஜனை மடம்  ஓம்சக்தி கோயில் அருகே இருந்த நூறு ஆண்டுகள் பழமையான ஆலமரத்தின் பெரிய கிளை, சூறைக்காற்றுக்கு முறிந்து கோயில் மற்றும் அருகில் உள்ள வீடுகள் மீது விழுந்தது. இதில் கோயில் சுவர், இரண்டு வீடுகள் மற்றும் முத்துக்குமார் என்பவரது டூவீலர் ஆகியவை சேதமடைந்தது. அதிர்ஷ்டவசமாக உயிர்ச்சேதம் எதுவும் ஏற்படவில்லை. எஞ்சியுள்ள ஆலமரம் எந்த நேரத்திலும் விழக்கூடிய நிலையில் உள்ளதால், அதிகாரிகள் பாதுகாப்பாக மரத்தை அகற்ற நடவடிக்கை எடுக்க வேண்டும் என, அப்பகுதி மக்கள் கோரிக்கை விடுத்துள்ளனர். 

இடங்கணசாலை பேரூராட்சியில் டிராக்டர் மூலம் குடிநீர் வினியோகம் புதிதாக தொட்டிகள் கட்ட கோரிக்கை

இளம்பிள்ளை, மே 17:  தொடர் போராட்டங்களை அடுத்து இடங்கணசாலை பேரூராட்சியில் டிராக்டர் மூலம் நேற்று குடிநீர் விநியோகம் செய்யப்பட்டது. இளம்பிள்ளை அடுத்த இடங்கணசாலை பேரூராட்சியில் உள்ள 18 வார்டுகளிலும், குடிநீர் கடும் தட்டுப்பாடு நிலவுகிறது. தற்போது கத்திரி வெயில் வாட்டியெடுப்பதால், குடிநீர் தட்டுப்பாடு அதிகரித்துள்ளது. பேரூராட்சிக்குட்பட்ட கே.கே.நகர், இ.மேட்டுக்காடு, மாட்டையாம்பட்டி, காடையாம்பட்டி, மோட்டுர், முருகன் நகர், காந்தி நகர், புவனகணபதி கோயில் தெரு, தூதனூர்  உள்ளிட்ட  பகுதிகளை சேர்ந்த பொதுமக்கள் குடிநீர் கேட்டு காலி குடங்களுடன் வந்து அடுத்தடுத்து 3 நாட்கள் பேரூராட்சி அலுவலகத்தை முற்றுகையிட்டும், சாலை மறியலில் ஈடுபட்டனர்.இதையடுத்து இடங்கணசாலை பேரூராட்சி நிர்வாகம் சார்பில், நேற்று பல்வேறு வார்டுகளில் டிராக்டர் மூலம் குடிநீர் விநியோகம் செய்யப்பட்டது.இதனிடையே, சேலம் பேரூராட்சிகள் இணை இயக்குனர் முருகனிடம், பொதுக்கள் அளித்த கோரிக்கை மனுவில், இடங்கணசாலை பேரூராட்சி 13 மற்றும் 14வது வார்டு மோட்டூர், புவனகணபதி கோயில் தெரு, முருகன்நகர், பலகாரத்தோட்டம் உள்ளிட்ட பகுதிகளில் 500க்கும் மேற்பட்ட குடும்பத்தினர் வசிக்கின்றனர். இங்கு மினி டேங்க் மூலம் குடிநீர் விநியோகிப்பதால் பெரிதும் சிரமம் ஏற்படுகிறது. எனவே, தனியாக 2 லட்சம் லிட்டர் கொள்ளளவு கொண்ட புதிய மேல்நிலை நீர்த்தேக்கத் தொட்டி கட்டி, சீரான குடிநீர் விநியோகம் செய்ய வேண்டும் என தெரிவித்திருந்தனர்.

ஆபாச படமெடுத்து மிரட்டிய ரவுடி மீது குண்டர் சட்டம் பாய்ந்தது

சேலம், மே 17:  சேலத்தில் பெண்ணை ஆபாச படம் எடுத்து மிரட்டிய ரவுடி மீது குண்டர் சட்டம் பாய்ந்தது. வீராணம் அருகே தைலானூர் பகுதியை சேர்ந்தவர் பச்சியப்பன். இவரது மகன் வெங்கடேசன்(30). ரவுடியான இவர், தனது கூட்டாளி மணிகண்டனுடன் சேர்ந்து மார்ச் 22ம் தேதி கொண்டலாம்பட்டி பட்டர் பிளை மேம்பாலம் அடியில், சர்வீஸ் ரோட்டில் பைக்கில் வந்த ஆண், பெண்ணை கத்தியை காட்டி மிரட்டினர். பின்னர், அவர்களிடம் இருந்து  தங்க நகையை பறித்துக் கொண்டு, அந்த பெண்ணை ஆபாசமாக செல்போனில் படமெடுத்து மிரட்டினர். இதுபற்றி கொண்டலாம்பட்டி போலீசார் வழக்குப்பதிவு செய்து, வெங்கடேசனை கைது செய்து சேலம் மத்திய சிறையில் அடைத்தனர்.தொடர்ந்து குற்றச்செயலில் ஈடுபட்டு வந்ததால், இவரை குண்டர் சட்டத்தில் அடைக்க, கொண்டலாம்பட்டி இன்ஸ்பெக்டர் புஷ்பராணி, மாநகர போலீஸ் கமிஷனர் சங்கருக்கு பரிந்துரை செய்தார். இதனை ஏற்றுக்கொண்ட கமிஷனர், வெங்கடேசனை குண்டர் சட்டத்தில் அடைக்க உத்தரவிட்டார். இதற்கான நகலை, மத்தியசிறையில் அடைக்கப்பட்டுள்ள வெங்கடேசனிடம் போலீசார் வழங்கினர். இவர் ஏற்கனவே கடந்த 2016ம் ஆண்டு, குண்டர் சட்டத்தில் கைது செய்யப்பட்டுள்ளார். தற்போது மீண்டும் 2வது முறையாக அவர் மீது குண்டர் சட்டம் பாய்ந்தது. 

குடிநீர் கேட்டு காலி குடங்களுடன் அரசு அலுவலகங்களை முற்றுகையிட்ட மக்கள்

ஓமலூர், மே 15: ஓமலூர் அருகே ஒரு மாதமாக குடிநீர் வழங்காத ஊராட்சி நிர்வாகத்தை கண்டித்து பொதுமக்கள் காலி குடங்களுடன் சாலை மறியல் போராட்டத்தில் ஈடுபட்டனர். சேலம் மாவட்டம் ஓமலூர் அடுத்த நல்லாகவுண்டம்பட்டி ஊராட்சியில் புது நல்லாகவுண்டம்பட்டி, பழைய நல்லாகவுண்டம்பட்டி, செட்டியார்கடை, பச்சாயிகோயில், தட்டாங்காடு உள்ளிட்ட பல்வேறு கிராமங்கள் உள்ளன. இந்த கிராமங்களில் சுமார் 5ஆயிரத்திற்கும் மேற்பட்ட குடும்பங்கள் வசித்து வருகின்றனர். கிராம மக்களுக்கு, இதே பகுதியில் உள்ள நீர் ஆதாரங்களை கொண்டு குடிநீர் வழங்கப்பட்டு வந்தது. தற்போது கோடையில் கடும் வறட்சி நிலவி வருவதால் நிலத்தடி நீர்மட்டம் குறைந்து, இந்த பகுதியில் உள்ள பெரும்பாலான கிணறுகள் மற்றும் ஆள்துளை கிணறுகள் வற்றியது. இதனால் கடந்த ஒரு மாதமாக இப்பகுதி மக்களுக்கு குடிநீர் விநியோகம் செய்யப்படவில்லை. இதுகுறித்து பொதுமக்கள் நல்லாகவுண்டம்பட்டி ஊராட்சி நிர்வாகம் மற்றும் ஓமலூர் ஊராட்சி ஒன்றிய நிர்வாகத்திடம் பல முறை புகார் தெரிவித்தும் அதிகாரிகள் கண்டுகொள்ளவில்லை.இதனால் ஆத்திரமடைந்த அப்பகுதி மக்கள், நேற்று ஆனைகவுண்டம்பட்டியில் இருந்து பழையூர் செல்லும் சாலையில், முள்செடிகளை வெட்டிபோட்டு, காலி குடங்களை வைத்து மறியல் போராட்டத்தில் ஈடுபட்டனர். இதுகுறித்து தகவல் அறிந்து சம்பவ இடத்துக்கு வந்த ஓமலூர் போலீசார், பொதுமக்களிடம் சமரச பேச்சுவார்த்தை நடத்தினர்.  கோடைகாலம் முடியும் வரை மாற்று ஏற்பாடு செய்து குடிநீர் வழங்கப்படும் என உறுதியளித்ததை அடுத்து, மறியலை கைவிட்டு, பொதுமக்கள் அங்கிருந்து கலைந்து சென்றனர்.  இதனால் இப்பகுதியில் 2 மணிநேரம் போக்குவரத்து பாதிக்கப்பட்டது. இடைப்பாடி:  சேலம் மாவட்டம் இடைப்பாடி அருகேயுள்ள செட்டிமாங்குறிச்சி ஊராட்சியில் உள்ள கொத்தாப்பாளையம் பகுதியில் 300க்கும் மேற்பட்ட குடும்பத்தினர் வசித்து வருகின்றனர். இவர்களுக்கு ராசிபுரம், இருப்பாலி கூட்டு குடிநீர் திட்டத்தின் மூலம் 2 நாட்களுக்கு ஒருமுறை குடிநீர் விநியோகம் செய்யப்பட்டு வந்தது. இந்நிலையில் அங்கிருக்கும் சிலர், அப்பகுதியில் கோயில் கட்டுவதற்கு கொத்தாப்பாளையம் கூட்டுகுடிநீர் இணைப்பை துண்டித்து, தண்ணீர் எடுத்து வருவதால், கடந்த ஓராண்டாக சரிவர குடிநீர் விநியோகம் செய்யப்படவில்லை. இதுகுறித்து அதிகாரிகளிடம் பலமுறை மனு அளித்தும் எவ்வித நடவடிக்கையும் எடுக்கவில்லை. இதனை கண்டித்து அப்பகுதியை சேர்ந்த 100க்கும் மேற்பட்ட பெண்கள், காலி குடங்களுடன் வந்து இடைப்பாடி ஊராட்சி ஒன்றிய அலுவலகத்தை முற்றுகையிட்டனர். பொதுமக்களிடம் அதிகாரிகள் பேச்சுவார்த்தை நடத்தி, குடிநீர் வழங்கிட உரிய நடவடிக்கை எடுக்கப்படும் என்று உறுதியளித்தனர். இதையடுத்து பெண்கள் முற்றுகையை கைவிட்டு கலைந்து சென்றனர். இதனால் அப்பகுதியில் சிறிது நேரம் பரபரப்பு ஏற்பட்டது.இளம்பிள்ளை: சேலம் மாவட்டம் இடங்கணசாலை பேரூராட்சி கேகே நகர், தூதனூர், மாட்டையாமபட்டி, இ. மேட்டுக்காடு ஆகிய பகுதி மக்களுக்கு கடந்த ஒரு மாதமாக குடிநீர் விநியோகம் செய்யப்படவில்லை. இதனால் குடிநீர் இன்றி மக்கள் பெரிதும் சிரமப்பட்டனர். பலமுறை அதிகாரிகளிடம் மனு கொடுத்தும், எவ்வித நடவடிக்கை எடுக்கவில்லை. இதனால் ஆத்திரமடைந்த பொதுமக்கள், இடங்கணசாலை பேரூராட்சி அலுவலகத்தை காலி குடங்களுடன் முற்றுகையிட்டனர். இதனால் அங்கு பரபரப்பு ஏற்பட்டது.பொதுமக்களிடம் பேரூராட்சிகள் இணை இயக்குனர் முருகன் பேச்சுவார்த்தை நடத்தினார். குடிநீர் பிரச்னை விரைவில் தீர்க்கப்படும் எனவும், அதுவரை லாரி மற்றும் டிராக்டர்  மூலம் குடிநீர் வழங்கப்படும் என உறுதியளித்தார். இதனால் சமாதானம் அடைந்த பொதுமக்கள் முற்றுகையை கைவிட்டு, அங்கிருந்து கலைந்து சென்றனர். இடங்கணசாலை பேரூராட்சியில் கடந்த இரண்டு நாட்களாக குடிநீர் கேட்டு காலி குடங்களுடன் பொதுமக்கள் முற்றுகையிட்டு போராட்டம் நடத்தி வருகின்றனர். மாவட்ட நிர்வாகம் நடவடிக்கை எடுத்து குடிநீர் பிரச்னைக்கு தீர்வுகான வேண்டும் என பல்வேறு கிராம மக்கள் கோரிக்கை விடுத்துள்ளனர்.

கொங்கணாபுரம் அருகே விசைத்தறி உரிமையாளர் வீட்டில் 3 பவுன் நகை, ₹37 ஆயிரம் திருட்டு

இடைப்பாடி, மே 15: கொங்கணாபுரம் அருகே விசைத்தறி உரிமையாளர் வீட்டில் 3 பவுன் நகை மற்றும் ₹37 ஆயிரம் ரொக்கம் ஆகியவற்றை மர்மநபர்கள் கொள்ளையடித்து  சென்றது குறித்து போலீசார் விசாரிக்கின்றனர். இடைப்பாடி தாலுகா கொங்கணாபுரம் அருகே உள்ள பள்ளிப்பட்டி கிரிவெள்ளிக்காடு பகுதியை சேர்ந்த முத்துசாமி மகன் சந்திரன்(48). இவர் விசைத்தறி வைத்து தொழில் செய்து வருகிறார். இவரது அண்ணன் திருப்பதி, புதிதாக வீடுகட்டி வருகிறார். இதனால் அவரது வீட்டில் இருந்த பீரோ, மற்றும் பொருட்களை, தம்பி சந்திரன் வீட்டில் வைத்துள்ளார். இந்நிலையில் நேற்று காலை சந்திரன் மற்றும் குடும்பத்தினர் வீ ட்டை பூட்டிவிட்டு அருகில் உள்ள விசைத்தறி கூடத்துக்கு சென்றுவிட்டனர். மதியம் 3 மணியளவில் வீட்டிற்கு வந்த போது, வீட்டின் பூட்டு உடைக்கப்பட்டு கதவு திறந்து கிடந்தது கண்டு அதிர்ச்சியடைந்தனர். வீ்ட்டினுள் உள்ள சென்று பார்த்த போது பீரோவில் வைத்திருந்த 3 பவுன் நகை மற்றும்  ₹37ஆயிரம் ரொக்கம் ஆகியவை திருடு போயிருந்தது.  இதுகுறித்து சந்திரன், கொங்கணாபுரம் போலீசில் புகார் செய்தார். இன்ஸ்பெக்டர் சண்முகம் சம்பவம் நடந்த வீட்டிற்கு சென்று விசாரணை நடத்தினார். மேலும் மேப்ப நாய் மற்றும் கைரேகை நிபுணர்கள் வரவழைக்கப்பட்டு சோதனையிடப்பட்டது. திருட்டில் ஈடுபட்ட மர்ம நபர்கள் குறித்து போலீசார் விசாரிக்கின்றனர்.

ஓமலூரில் தனியார் பள்ளிகளின் 137 வாகனங்கள் ஆண்டாய்வு

ஓமலூர், மே 15: ஓமலூரில் நேற்று தனியார் பள்ளிகளின் 137 வாகனங்கள் ஆண்டாய்வு செய்யப்பட்டது. இதில் குறைபாடுகளுடன் இருந்த 10 பேருந்துகள் தகுதி நீக்கம் செய்யப்பட்டது. ஓமலூர் மோட்டார் வாகன ஆய்வாளர் சரகதிற்கு உட்பட்ட பகுதிகளில், சுமார் 30க்கும் மேற்பட்ட தனியார் பள்ளிகள் இயங்கி வருகிறது. இந்த பள்ளிகள் சார்பில் 239 பஸ், வேன் உள்ளிட்ட வாகனங்கள் இயக்கப்பட்டு வருகிறது. சென்னை உயர்நீதிமன்ற உத்தரவின்படி மாவட்டம்தோறும் ஆண்டுதோறும் தனியார் பள்ளிகளின் வாகனங்கள் ஆண்டாய்வு நடத்தப்பட்டு வருகிறது. அதன்படி நேற்று ஓமலூரில் முதற்கட்டமாக 137 பஸ்கள் ஆய்வு செய்யப்பட்டது. ஓமலூர் மோட்டார் வாகன ஆய்வாளர் அலுவலகம் சார்பில் நடந்த முகாமில், தனியார் பள்ளி பஸ்கள் இயக்குவதற்கு தகுதியாக உள்ளதா என்று மேட்டூர் ஆர்டிஓ  லலிதா தலைமையில் ஆய்வு நடைபெற்றது. இதில் டி.எஸ்.பி சரவணன் முன்னிலையில், சேலம் மேற்கு மண்டல மோட்டார் வாகன அலுவலர் தாமோதரன், ஓமலூர் மோட்டார் வாகன ஆய்வாளர் முருகேசன் ஆகியோர் அனைத்து பேருந்துகளை ஆய்வு செய்தனர். இதில், தீ தடுப்பு உபகரணம், பிரேக், டயர்கள், அவரசவழி, முதல் உதவி சிகிச்சை உபகரணங்கள், பேருந்தின் தரைகள், படிகள் உள்ளிட்டவைகளை ஆய்வு செய்யப்பட்டது. இந்த ஆய்வில்  பல்வேறு குறைபாடுகளுடன் இருந்த 10 பேருந்துகளை தகுதி நீக்கம் செய்தனர்.  மேலும் ஓட்டுனர் உரிமம், ஓட்டுனர் அனுபவங்கள், பேருந்துகளின் உரிய ஆவனங்கள், பராமரிப்புகள் உள்ளிட்டவைகளையும் ஆய்வு செய்தனர். மேலும் பஸ் ஓட்டுனர்கள் கடைப்பிடிக்க வேண்டிய விழிப்புணர்வு கையேடும் வழங்கப்பட்டது.  ஓமலூர் சரகத்தில் கடந்தாண்டு விபத்து இல்லாமல் ஓட்டிய பள்ளி பேருந்து ஓட்டுனர்களுக்கு பாராட்டு தெரிவித்த ஆர்டிஓ  லலிதா, வரும் ஆண்டிலும் விபத்தில்லாமல் வாகனத்தை இயக்க வேண்டும் என்று அறிவுரை வழங்கினார்.

சேலம் ரயில்வே ஸ்டேஷனில் பயணிகளுக்கு இடையூறு 21பேருக்கு அபராதம்

சேலம், மே 15: சேலம் ரயில்வே ஸ்டேஷனில் பயணிகளுக்கு தொந்தரவு கொடுத்த 21பேருக்கு ₹ 12 ஆயிரத்து 750 அபராதம் விதிக்கப்பட்டது.சேலம் ரயில்வே கோட்ட பகுதியில் இயங்கும் ரயில்களில், பயணிகளுக்கு தொந்தரவு கொடுக்கும் வகையில் தின்பண்டங்களை விற்பனை செய்வோர் மீதும், ரயில்வே ஸ்டேஷன் மற்றும் ரயில்களில் அசுத்தம் செய்வோர் மீதும் ரயில்வே பாதுகாப்பு படையினர் நடவடிக்கை எடுத்து வருகின்றனர். இதன் ஒரு பகுதியாக சேலம் ரயில்வே ஸ்டேஷனில் நேற்று பாதுகாப்பு படையினர் தீவிர சோதனை நடத்தினர். இதில்,  அனுமதியின்றி வியாபாரம் செய்ததாக  13 பேரும், பயணிகளுக்கு தொந்தரவு செய்ததாக 6 பேரும்  என்பது உள்பட மொத்தம் 21பேர் சிக்கினர். இந்த 21 பேரையும் போலீசர் கைது செய்தனர்.  21 பேருக்கும் மொத்தமாக ₹ 12 ஆயிரத்து 750 அபராதம் விதிக்கப்பட்டது. இது போன்ற சோதனை தொடர்ந்து நடத்தப்படும் என ரயில்வே பாதுகாப்பு படை அதிகாரிகள் தெரிவித்தனர்.

காடையாம்பட்டி அருகே தாயை அடித்து உதைத்த மகன் கைது

காடையாம்பட்டி, மே 15: காடையாம்பட்டி அருகே கொங்குப்பட்டி ஊராட்சி தாசனுர் பகுதியை சேர்ந்த சென்றாயன் மனைவி பச்சியம்மாள் (60). இவரது மகன் மணி (27) வேலைக்கு செல்லாமல் தினமும் மது குடித்து வந்தார். இந் நிலையில் தாய் பச்சியம்மாளிடம் குடிக்க பணம் கேட்டு தகராறு செய்துள்ளார். அப்போது பணம் கொடுக்க மறுத்த அவரது தாயை அடித்து உதைத்துள்ளார்.இதில் காயமடைந்த பச்சியம்மாளை மீட்டு ஓமலூர் அரசு மருத்துவமனையில் சேர்த்தனர். அங்கு அவருக்கு சிகிச்சை அளிக்கப்பட்டு வருகிறது. இது குறித்து பச்சியம்மாள் தீவட்டிப்பட்டி போலீசில் புகார் செய்தார். இதன் பேரில் தாயை தாக்கிய மணியை கைது செய்து ஓமலுர் நீதிமன்றத்தில் ஆஜர்படுத்தி கிளைச்சிறையில் அடைத்தனர்.

வாழப்பாடி பகுதியில் தொடர் மின்வெட்டு

வாழப்பாடி, மே 15:  சேலம் மாவட்டம் வாழப்பாடி சுற்றுவட்டார பகுதிகளான வாழப்பாடி கொட்டவாடி, புதுப்பாளையம், சின்ன கிருஷ்ணாபுரம், பேளூர், துக்கியாம்பாளையம், அத்தனூர்பட்டி உள்பட பல கிராமங்களில், கடந்த சில நாட்களாக தினமும் 3 மணி நேரம் மின்சாரம் தடை செய்யப்படுகிறது. இதனால் பொதுமக்கள் கடுமையாக பாதிக்கப்படுகின்றனர்.கோடை வெயிலின் உக்கிரம் தாங்காமல் மக்கள் சிரமப்படும் வேலை, மின்தடையால் மக்கள் வீடுகளை விட்டு வெளியேறி மரத்தடியில் தஞ்சமடைகின்றனர். விவசாயிகள் தண்ணீர் பாய்ச்ச முடியாமல் சிரமப்படுகின்றனர். அதிகாரிகள் நடவடிக்கை எடுத்து மின்தடையை தவிர்க்க வேண்டும் என பொதுமக்கள் கோரிக்கை விடுத்துள்ளனர்.

கெங்கவல்லி அருகே நடந்த வாலிபர் கொலையில் மேலும் ஒருவர் கைது

கெங்கவல்லி, மே 15: கெங்கவல்லி அருகே நிலத்தகராறில் வாலிபர் கொலை செய்யப்பட்ட வழக்கில் மேலும் ஒருவரை போலீசார் நேற்று கைது செய்தனர். தலைமறைவாக உள்ள பெண் உள்பட 3 பேரை  தேடி வருகின்றனர். சேலம் மாவட்டம் கெங்கவல்லி அருகே உள்ள நடுவலூரை சேர்ந்த செந்தில்குமார் (37). இவர் தனியார் விதைப்பண்ணையில் சூப்பர்வைசராக பணியாற்றி வந்தார்.  இவர் வீட்டின் அருகில் வசிக்கும், கேஸ் கம்பெனியில் லாரி டிரைவராக பணியாற்றி வரும் மணிகண்டனுக்கும் (43) இடையே வீட்டின் அருகில் உள்ள ஒன்றரை அடி வழித்தட பிரச்னை நீண்ட நாட்களாக இருந்து வந்தது. இந்நிலையில் கடந்த மாதம் 25ம் தேதி மணிகண்டன் மற்றும் அவரது உறவினர் தஞ்சாவூரை சேர்ந்த கூலிப்படை சேர்ந்த மூன்று பேர் அடங்கிய 8 பேர் கொண்ட கும்பல், வீட்டில் தனியாக இருந்த செந்தில்குமாரை கத்தியால் குத்தி கொலை செய்தனர். இதுகுறித்து விசாரணை நடத்திய ஆத்தூர் டிஎஸ்பி ராஜூ தலைமையில் 5 தனிப்படையை போலீசார் அமைத்து, மணிகண்டன் உள்ளிட்டேரை தீவிரமாக தேடிவந்தனர்.இந்நிலையில் தஞ்சாவூரில் பதுங்கியிருந்த மணிகண்டன்,  பல்வேறு குற்றங்களில் ஈடுபட்ட கூலிப்படை தலைவன் அருண்குமார்(32), அவரது கூட்டாளி கண்ணன்(20), சீட்டிங் மணி என்கிற தமிழ்ச்செல்வன்(30) ஆகிய 4 பேரை போலீசார் கைது செய்தனர். இந்த சம்பவத்தில் தொடர்புடைய மணிகண்டனின் மனைவி ராதா, அவரது மகன் அஜய் மணிகண்டன், தம்பி செந்தில்குமார், சின்னதுரை ஆகிய 4 பேரை போலீசார் தீவிரமாக தேடி வந்தனர்.இந்நிலையில் கூடமலை அருகே உள்ள சின்ன கரட்டூர் பகுதியில் உறவினர் செல்லமுத்து வீட்டில் செந்தில்குமார் பதுங்கி இருப்பதாக போலீசாருக்கு ரகசிய தகவல் கிடைத்தது. அதன்பேரில் நேற்று கெங்கவல்லி இன்ஸ்பெக்டர் (பொறுப்பு) பவுலேஸ், எஸ்ஐ லட்சுமணன் மற்றும் போலீசார் சின்னகரட்டூர் சென்று செந்தில்குமாரை கைது செய்து, நீதிமன்றத்தில் ஆஜர்படுத்தி சிறையில் அடைத்தனர்.

காடையாம்பட்டி அருகே தொழிலாளி தற்கொலை

காடையாம்பட்டி, மே 15: காடையாம்பட்டி அருகே கணவாய்ப்புதுர் ஊராட்சி கே.மோரூர் பகுதியை சேர்ந்தவர் பரமசிவம் (32) கூலி தொழிலாளி. இவருக்கு மஞ்சுளா (27) என்ற மனைவியும், 2 பெண் குழந்தை, ஒரு ஆண் குழந்தை உள்ளனர்.  மது குடிக்கும் பழக்கம் உள்ள பரமசிவம், அதே பகுதியில் பலரிடம் பணம் கடனாக வாங்கி மது குடித்து செலவு செய்துள்ளார். ஒரு கட்டத்தில் கடனை கட்ட முடியாமல் மனமுடைந்த அவர் வீட்டில் இருந்த பூச்சி மருந்தை குடித்து தற்கொலை செய்தார்.

ஜலகண்டாபுரம் கூட்டுறவு சங்கத்தில் ₹12 லட்சத்துக்கு கொப்பரை ஏலம்

ஜலகண்டாபுரம், மே 15: ஜலகண்டாபுரம் வேளாண் உற்பத்தியாளர்கள் கூட்டுறவு விற்பனை சங்கத்தில் நேற்று ₹12 லட்சத்திற்கு கொப்பரை ஏலம் நடந்தது. சேலம் மாவட்டம் ஜலகண்டாபுரத்தில் திருச்செங்கோடு வேளாண்மை உற்பத்தியாளர்கள் கூட்டுறவு விற்பனை சங்க கிளை சேவை மையம் செயல்பட்டு வருகிறது. நேற்று சங்கத்தில் கொப்பரை ஏலம் நடைபெற்றது.  ஜலகண்டாபுரம் மற்றும் சுற்றுவட்டார பகுதிகளை சேர்ந்த விவசாயிகள் 300 மூட்டை கொப்பரையை ஏல்ததுக்கு கொண்டு வந்திருந்தனர். சேலம், ஈரோடு, நாமக்கல் பகுதியை சேர்ந்த வியாபாரிகள் கலந்துகொண்டனர்.  தரம் வாரியாக பிரித்து கொப்பரை ஏலம் விடப்பட்டது. இதில் முதல் தர கொப்பரை கிலோ ₹64.70 முதல் ₹87 வரையும், இரண்டாம் தர கொப்பரை கிலோ ₹48.45 முதல் ₹56.40 வரையும் ஏலம் போனது. ஒட்டு மொத்தமாக விவசாயிகள் கொண்டுவந்த 300 மூட்டை கொப்பரை ₹12 லட்சத்திற்கு விற்பனையானது.

₹740க்கு பதிலாக ₹5 ஆயிரம் மின் கட்டணம் ஊழியரின் தவறான தகவலால் நுகர்வோர் அதிர்ச்சி

வாழப்பாடி, மே 15: வாழப்பாடி அருகே மின்கட்டணம் கணக்கிட வந்த ஊழியர் ₹740க்கு பதிலாக ₹5 ஆயிரம் என தெரிவித்ததால் நுகர்வோர் அதிர்ச்சியடைந்தார். இதுகுறித்து அதிகாரியிடம் நேரில் புகார் அவர் தெரிவித்தார். சேலம் மாவட்டம் வாழப்பாடி அருகே உள்ள கொட்டவாடியை சேர்ந்தவர் முருகானந்தம் (48). இவருக்கு மனைவி மற்றும் 3 மகள்கள் உள்ளனர். இவர் தனது வீட்டிற்கு கடந்த 5 மாதங்களுக்கு முன்பு பேளூர் மின்சார வாரிய அலுவலகத்தின் பதிவு செய்து மின் இணைப்பு பெற்றுள்ளார்.  இவரது வீட்டில் பிரிட்ஜ், டிவி, மூன்று பேன்கள், யுபிஎஸ் உள்ளிட்ட மின்சாதனங்களை பயன்படுத்தி வருகிறார். இந்நிலையில் நேற்று இவரது வீட்டிற்கு மின்கட்டணம் கணக்கிட வந்த மின்வாரிய ஊழியர், இந்த மாதம் மின்சார கட்டணம் ₹5 ஆயிரத்துக்கும்  மேல் வரும் என முருகானந்தத்திடம் தெரிவித்து உள்ளார். இதை கேட்டு முருகானந்தம் அதிர்ச்சியடைந்தார். இந்நிலையில் நேற்று மாலை ₹740 மின்கட்டணம் செலுத்த வேண்டும் என அவருடையை செல்போனுக்கு குறுஞ்செய்தி வந்துள்ளது.இதையடுத்து முருகானந்தம், மின்மீட்டரில் உள்ள அளவை செல்போனில் படம் பிடித்து எடுத்துசென்று, சிங்கிபுரம் மின்வாரிய அலுவலகத்தில் செயற்பொறியாளர் பொறுப்பு வனிதாவிடம் தெரிவித்துள்ளார். அவருடன் வக்கீல் பாலாஜி சென்றுள்ளார். புகாரை பெற்றுக்கொண்ட செயற்பொறியாளர், அதிகாரிகளை நேரில் அனுப்பி டிஜிட்டல் மீட்டரை ஆய்வு செய்து விசாரிப்பதாக உறுதியளித்தார்.