Selam - Dinakaran

பனி, சுட்டெரிக்கும் வெயிலால் செடியிலேயே கருகும் குண்டுமல்லி மொட்டுகள்

ஓமலூர்,  பிப்.15: ஓமலூர், காடையாம்பட்டி வட்டாரத்தில் அதிகாலை பனிப்பொழிவும்,  பகலில் கடும் வெயில் சுட்டெரிப்பதாலும் குண்டுமல்லி மொட்டுகள் செடியிலேயே  கருகி வீணாகிறது. சேலம் மாவட்டம் ஓமலூர், கஞ்சநாயக்கன்பட்டி,  பூசாரிப்பட்டி, மூக்கனூர், குண்டுக்கல், தீவட்டிப்பட்டி, காடையாம்பட்டி  ஆகிய பகுதிகளில் உள்ள விவசாயிகள் கிணற்று பாசனத்தின் மூலம் செவ்வந்தி,  குண்டுமல்லி, சன்னமல்லி, சாமந்தி, சாமந்தி, மரிக்கொழுந்து, துளசி உள்ளிட்ட  பல்வேறு வகையான பூக்களை அதிகம் சாகுபடி செய்துள்ளனர். ேபாதிய  மழையில்லாததால், தற்போது கிணறுகளில் தண்ணீர் குறைந்துள்ளது. தவிர, அதிகாலை  நேரத்தில் பனிப்பொழிவு, பகலில் கடும் வெயில் சுட்டெரிப்பதால் பூக்கள்  விளைச்சல் பாதிக்கப்பட்டுள்ளது. இதுகுறித்து விவசாயிகள் கூறியதாவது: ஓமலூர், காடையாம்பட்டி வட்டாரத்தில் அதிக அளவில் குண்டுமல்லி சாகுபடி செய்துள்ளனர். ஒரு முறை நடவு செய்து  பராமரித்து வந்தால், சுமார்  10 ஆண்டுகளுக்கு பூக்கள் பூக்கும். ஓமலூர், காடையாம்பட்டியில் விளையும் பூக்களை சேலம் பூமார்க்கெட்டிற்கு விற்பனைக்கு அனுப்புகின்றனர். தற்போது குண்டுமல்லி சீசன் தொடங்கியுள்ளது. ஆனால், அதிகாலை நேரத்தில் பனிப்பொழிவும், பகல் நேரத்தில்  கடும் வெயிலும் அடிப்பதால் சீதோஷ்ண நிலை மாற்றமடைந்துள்ளது. இதன் காரணமாக, குண்டுமல்லி செடிகளில் மொட்டுகள் மலரும் முன்பாகவே கருகி கொட்டி விடுகிறது. இதனால், பூ விளைச்சல் பாதிக்கப்பட்டுள்ளது. எனவே, தோட்டக்கலைத்துறை அதிகாரிகள் பூக்களை பாதுகாக்க செய்ய வேண்டியவை குறித்த ஆலோசனைகளை வழங்க வேண்டும். இவ்வாறு விவசாயிகள் தெரிவித்தனர்.

ஆத்தூர் அருகே போலி வாரிசு சான்று மூலம் ₹50 லட்சம், 50 பவுன் மோசடி

 ஆத்தூர், பிப்.15:ஆத்தூர் அருகே ேபாலி வாரிசு சான்று மூலம், இறந்தவரின் பெயரில் கூட்டுறவு வங்கியில் இருந்த ₹50 லட்சம் ரொக்கம் மற்றும் 50 பவுன் நகையை ேமாசடி செய்ததாக வந்த புகாரை விசாரிக்க, ஆத்தூர் தாசில்தாருக்கு கலெக்டர் உத்தரவிட்டுள்ளார்.சேலம்  கலெக்டர் அலுவலகத்தில், கடந்த திங்கட்கிழமை நடந்த மக்கள் குறைதீர் நாள்  கூட்டத்தில் கலெக்டர் ரோகிணியிடம், ஆத்தூர் அடுத்த மல்லியகரை நடுவீதியை சேர்ந்த மகாலட்சுமி  என்பவர் கொடுத்த புகார் மனுவில் கூறியுள்ளதாவது: ஆத்தூர் அருகே வளையமாதேவி கிராமத்தில் வசித்து வந்த எனது தந்தை தங்கவேல், கடந்த 2017ம் ஆண்டு ஜூன் மாதம் 19ம்தேதி இறந்து விட்டார். அப்போது, ஆத்தூர் தாலுகா அலுவலகத்தில் தலைமையிடத்து துணைத் தாசில்தாராக இருந்த சேகர் என்பவர்,  எனது தாய் கதம்பரோஜா மற்றும் எனது பெயரை விட்டு விட்டு, எனது தந்தையின் 2வது மனைவியான முத்தம்மாள், அவரது மகள் ரம்யா, மகன்கள் ரமேஷ், ராமச்சந்திரன் ஆகியோருக்கு போலியாக வாரிசு சான்று வழங்கி  உள்ளார். அந்த போலி சான்றை பயன்படுத்தி, வளையமாதேவி  கிராமத்தில் உள்ள கூட்டுறவு வங்கியில், எனது தந்தை பெயரில் இருந்த ₹50 லட்சம் ரொக்கம் மற்றும் 50 பவுன் தங்க நகைகளை முத்தம்மாள் மற்றும் அவரது மகள், மகன்கள் முறைகேடாக எடுத்துள்ளனர். எனவே, தலைமையிடத்து துணை தாசில்தார்  வழங்கிய போலி வாரிசு சான்றிதழை ரத்து செய்ய உத்தரவிட வேண்டும். இவ்வாறு  மனுவில் கூறியிருந்தார். இந்த மனுவின் மீது விசாரணை நடத்தும்படி, ஆத்தூர் தாசில்தார் செல்வத்துக்கு கலெக்டர் ரோகிணி உத்தரவிட்டுள்ளார்.

சிறுமியை கடத்தி பலாத்காரம் போக்சோ சட்டத்தில் தொழிலாளி கைது

சேலம், பிப்.15: சேலத்தில் சிறுமியை கடத்தி சென்று பலாத்காரம் செய்த தொழிலாளி போக்சோ சட்டத்தில் கைது செய்யப்பட்டார். சேலம் மாவட்டம் கே.ஆர்.தோப்பூரைச் சேர்ந்தவர் ஜெயராமன். இவரது மகன் ரமேஷ்(25) கொத்தனாராக வேலை செய்து வருகிறார். இவர் கடந்த 7 மாதமாக, களரம்பட்டி பகுதியில் புதிய வீடு கட்டும் வேலையில் ஈடுபட்டு வந்தார். அப்போது அதே பகுதியை சேர்ந்த 16 வயது சிறுமியுடன் பழக்கம் ஏற்பட்டது. பின்னர் அந்த சிறுமியை ஆசை வார்த்தை கூறி கடத்திச் சென்று விட்டார். இதுகுறித்து சிறுமியின் பெற்றோர் கொடுத்த புகாரின் பேரில், டவுன் மகளிர் போலீசார் கொத்தனார் ரமேசை தேடி வந்தனர். இந்நிலையில் நேற்று கே.ஆர்.தோப்பூரில் வைத்து ரமேசை கைது செய்தனர். அவருடன் இருந்த சிறுமியை மீட்டனர். சிறுமியை கேரளாவுக்கு கடத்தி சென்ற ரமேஷ், அவரை திருமணம் செய்ததுடன், பலாத்காரத்திலும் ஈடுபட்டது தெரியவந்தது. அவர் மீது கடத்தல், போக்சோ, கொலை மிரட்டல் ஆகிய பிரிவுகளின் கீழ் வழக்கு பதிவு செய்து கைது செய்த போலீசார், பின்னர் கோர்ட்டில் ஆஜர்படுத்தி சிறையில் அடைத்தனர்.

நரசிங்கபுரம் நகராட்சியில் குடிநீர் வழங்கும் இயந்திரத்தை உடைக்க மர்ம நபர்கள் முயற்சி

ஆத்தூர், பிப்.15: நரசிங்கபுரம் நகராட்சி 2வது வார்டில் புதிதாக அமைக்கப்பட்ட  சுத்திகரிக்கப்பட்ட குடிநீர் வழங்கும் இயந்திரத்தை, நள்ளிரவு மர்ம நபர்கள் சேதப்படுத்தியதால் பரபரப்பு ஏற்பட்டது. நரசிங்கபுரம் நகராட்சி சார்பில், 2வது வார்டு சிவன் கோயில் தெருவில், பொதுமக்களுக்கு ₹7க்கு 20 லிட்டர்  சுத்திகரிக்கப்பட்ட குடிநீர் வழங்குவதற்கான இயந்திரம் ₹15 லட்சம் செலவில்  அமைக்கப்பட்டுள்ளது. இந்த இயந்திரத்தை கடந்த 12ம்தேதி இரவு, மர்ம  நபர்கள் சிலர் உடைக்க முயற்சி செய்துள்ளனர். இதுகுறித்து நகராட்சி  சார்பில் கொடுத்த புகாரின் பேரில், ஆத்தூர் டவுன் போலீசார் வழக்கு பதிவு செய்து விசாரணை நடத்தி வருகின்றனர். இந்த இயந்திரத்தின் மூலம், பொதுமக்களுக்கு தினமும்  ஆயிரம் லிட்டர் குடிநீர் விநியோகிக்கப்பட்டு வருகிறது. இதனால் உள்ளூர் கேன்  குடிநீர் விநியோகத்தில் ஈடுபடுபவர்களுக்கு வியாபாரம் முற்றிலுமாக  முடங்கியுள்ளது. இதனால், கேன் குடிநீர் உற்பத்தியாளர்கள் இந்த இயந்திரத்தை  உடைக்க முயன்றனரா என போலீசார் விசாரணை நடத்தி  வருகிறார்கள். இந்நிலையில், நேற்று குடிநீர் சுத்திகரிப்பு இயந்திரம்  அமைக்கப்பட்டுள்ள இடத்தில் சிசிடிவி கேமரா பொருத்தப்பட்டது. நகராட்சியில்  மற்ற வார்டுகளில் குடிநீர் சுத்திகரிப்பு நிலையம் அமைக்கும் ேபாதும், சிசிடிவி கேமரா பொருத்தப்படும் என நகராட்சி நிர்வாகத்தினர் தெரிவித்தனர்.

காடையாம்பட்டி அருகே குடிநீர் கேட்டு கலெக்டரை கிராம மக்கள் முற்றுகை

காடையாம்பட்டி, பிப். 15:  காடையாம்பட்டி அடுத்த பண்ணப்பட்டி கிராமத்தில் உள்ள  20க்கும் மேற்பட்ட குக்கிராமங்களில் ஆயிரத்திற்கும் மேற்பட்ட குடும்பத்தினர் வசித்து வருகின்றனர். தற்போது குடிநீர் பற்றாக்குறை ஏற்பட்டுள்ளதால், கிராம மக்கள் குடிநீருக்காக அலைந்து வருகின்றனர். மேலும், காசு கொடுத்து கேன் குடிநீர்  வாங்கி பயன்படுத்தி வருகின்றனர். இதுகுறித்து பல முறை ஊராட்சி நிர்வாகத்திடம் மனு கொடுத்தும், அதிகாரிகள் நடவடிக்கை எடுக்கவில்லை. இந்நிலையில் நேற்று, சேலம் கலெக்டர் ரோகிணி, பண்ணப்பட்டி ஊராட்சி அலுவலகத்துக்கு வந்ததை அறிந்த மக்கள், குடிநீர் கேட்டு கலெக்டரை முற்றுகையிட முயன்றனர். இதனால் அங்கு பரபரப்பு ஏற்பட்டது. அப்போது பாதுகாப்பு பணியில் இருந்த போலீசார், அவர்களை தடுத்து ஒவ்வொருவராக கலெக்டரை சந்திக்க அனுப்பி வைத்தனர். உள்ளே சென்ற பெண்கள், தண்ணீர் இல்லாமல் படும் கஷ்டங்களை கலெக்டரிடம் கூறி மனுக்களை கொடுத்தனர். மேலும், குடிநீர் கேட்டால் ஊராட்சி செயலாளர் மற்றும் டேங்க் ஆப்ரேட்டர் அவதூறாக பேசுவதாக தெரிவித்தனர். அப்போது, முறையான குடிநீர் வழங்க நடவடிக்கை எடுப்பதாக கலெக்டர் உறுதியளித்தார். பின்னர் ஒன்றிய அதிகாரிகளை அழைத்த கலெக்டர், பிரச்னைக்குரிய உடையார் தெருவில் குடிநீர் விநியோகிப்பவரை உடனடியாக மாற்றும்படி அதிகாரிகளுக்கு உத்தரவிட்டார். இதனால் சமாதானமடைந்த பெண்கள், அங்கிருந்து களைந்து சென்றனர்.

நங்கவள்ளி அருகே அரசுத்துறை கண்காட்சியில் தெர்மாகோல் பயன்பாடு

நங்கவள்ளி,  பிப்.15: நங்கவள்ளி அருகே சின்னசோரகையில் சிறப்பு மனுநீதி  முகாம் நேற்று  நடைபெற்றது. இதில் அமைக்கப்பட்ட கண்காட்சி அரங்கில், தடை செய்யப்பட்ட தெர்மாகோல் பயன்படுத்தி  இருந்ததை கலெக்டர் கண்டித்தார்.சேலம் மாவட்டம்  நங்கவள்ளி அருகே, சின்னசோரகையில் வருவாய் துறை சார்பில், சிறப்பு  மனுநீதி முகாம் கலெக்டர் ரோகிணி தலைமையில் நடந்தது. இதில் பல்வேறு  அரசுத்துறைகள் சார்பில், சுற்றுவட்டார பகுதியை சேர்ந்த பயனாளிகள் 60  பேருக்கு ₹4.25 லட்சம் நலத்திட்ட உதவி வழங்கப்பட்டது. முன்னதாக முகாம்  நடந்த திடலுக்கு வந்த கலெக்டர், அங்கு பல்வேறு அரசுத்துறைகள் சார்பில்  அமைக்கபட்டிருந்த கண்காட்சி அரங்குகளை பார்வையிட்டு, செய்முறை விளக்கங்களை  கேட்டறிந்தார். அப்போது நங்கவள்ளி ஒருங்கிணைந்த குழந்தைகள் வளர்ச்சி திட்டம்  சார்பில் அமைக்கப்பட்டிருந்த அரங்கில், அரசால் தடை செய்யப்பட்ட தெர்மாகோல்  பயன்படுத்தி இருந்தனர். இதை பார்த்த கலெக்டர் ரோகிணி, உடனடியாக அத்துறை  அதிகாரிகளை அழைத்து, தெர்மாகோல் சீட் அரசால் தடை செய்யப்பட்டுள்ளது. நாம்  அனைவருக்கும் முன் உதாரணமாக திகழ வேண்டும் என்றவர், அவற்றை உடனடியாக  அகற்றும்படி எச்சரித்து விட்டு சென்றார். இதையடுத்து அத்துறை அலுவலர்கள்  தெர்மாகோல் சீட்டை அங்கிருந்து அகற்றினர். இந்த முகாமில் அரசுத்துறை  அலுவலர்கள் மற்றும் பொதுமக்கள் திரளாக கலந்துகொண்டனர். 

சாலை பாதுகாப்பு வார விழா போட்டிகள் செந்தில் பப்ளிக் பள்ளி மாணவர்கள் வெற்றி

சேலம், பிப்.15:  ேசலம் சாரதா மேல்நிலைப்பள்ளியில்  30வது சாலை பாதுகாப்பு வார விழாவையொட்டி, மண்டல அளவிலான போட்டிகள் நடந்தது. இதில் செந்தில் பப்ளிக் பள்ளியை சேர்ந்த 8ம் வகுப்பு மாணவர்கள் கலந்துகொண்டனர். தமிழ் பேச்சுப்போட்டியில் சிதம்பரவேல் ஆகாஷ் இரண்டாமிடம், தமிழ் வாசகங்கள் எழுதும் போட்டியில் ரிதன்யா முதலிடம், தமிழ் கட்டுரைப்போட்டியில் யுகாசினி இரண்டாமிடம், ஓவியப்போட்டியில் யுத்தா முதலிடம் பெற்று மாவட்ட அளவிலான போட்டிக்கு தேர்வாகினர். தொடர்ந்து கோட்டை மகளிர் மேல்நிலைப்பள்ளியில் மாவட்ட அளவிலான போட்டிகள் நடந்தது. இதில் பேச்சுப்போட்டியில் சிதம்பரவேல் ஆகாஷ், வாசகங்கள் எழுதும் போட்டியில் ரிதன்யா, ஓவியப்போட்டியில் யுக்தா ஆகிய மூவரும் இரண்டமிடத்தை பெற்றனர்.  இவர்களுக்கு கலெக்டர் ரோகிணி பரிசு மற்றும் சான்றிதழ்களை வழங்கினார். சாதனை படைத்த மாணவ, மாணவிகளையும், பயிற்சி அளித்த ஆசிரியர்களையும் செந்தில் குழுமத் தலைவர் கந்தசாமி, துணைத் தலைவர் மணிமேகலை கந்தசாமி, செயலாளர் தனசேகரன், தாளாளர் தீப்தி தனசேகரன், முதன்மை நிர்வாக அதிகாரி சுந்தரேசன், முதன்மை முதல்வர் சீனிவாசன், முதுல்வர் மனோகரன், துணை முதல்வர் நளினி, பொறுப்பாசிரியர்கள் மற்றும் இருபால் ஆசிரியர்கள் பாராட்டினர்.     

விஎம்கேவி பொறியியல் கல்லூரியில் போஷ் நிறுவனத்தின் கூட்டு பயிற்சி

சேலம்,  பிப்.15:   சேலம் விநாயகா மிஷன்ஸ் ஆராய்ச்சி நிறுவன நிகர்நிலை பல்கலைக்கழகத்தை  சார்ந்த உறுப்பு கல்லூரியான, விநாயகா மிஷன்ஸ் கிருபானந்த வாரியார்  பொறியியல் கல்லூரியுடன், பெங்களூரு போஷ் லிமிடெட் இணைந்து, பொறியியல்  கல்லூரி மாணவர்களின் தனித்திறனை மேம்படுத்துதல், ஆட்டோமொபல் நிறுவனங்களின்  வேலை வாய்ப்புகளை பெறுவதற்கான தொழிற்சார்ந்த பயிற்சிகளை வழங்க  புரிந்துணர்வு ஒப்பந்தம் மேற்கொள்ளப்பட்டது. இந்த தொழிற்பயிற்சி  மையத்தின் துவக்க விழா, விநாயகா மிஷன்ஸ்  பொறியியல் கல்லூரியில் நடந்தது.  விநாயகா மிஷன்ஸ் ஆராய்ச்சி நிறுவன நிகர்நிலை பல்கலைக்கழகத்தின் நிறுவன  வேந்தரின் துணைவியார் அன்னபூரணி சண்முகசுந்தரம் குத்துவிளக்கேற்றி  துவக்கி வைத்தார். விழாவில், சிறப்பு விருந்தினராக பெங்களூரு ேபாஷ் நிறுவனத்தின் தொழில்நுட்ப சேவை பொதுமேலாளர் ஆனந்தகுமார் கலந்துகொண்டு,  நிறுவனத்தில் உள்ள அதிநவீன வசதிகளை பற்றியும், இதை மாணவர்கள் எவ்வாறு பயன்படுத்தலாம் எனவும் எடுத்துரைத்தார். விநாயகா  மிஷன்ஸ் நிகர்நிலை பல்கலைக்கழகத்தின் துணைவேந்தர்  பேராசிரியர் சுதிர், மாணவ,மாணவிகளுக்கு அறிவுரை வழங்கினார். முன்னதாக துணை முதல்வர் குமரேசன் வரவேற்றார். துறைத் தலைவர் ராஜன் நன்றி கூறினார். விழா ஏற்பாடுகளை துறை ஒருங்கிணைப்பாளர் ராஜா மற்றும் மாணவ, மாணவிகள் செய்திருந்தனர்.

கல்வராயன் மலையில் மூங்கில்களை முறித்து சேதப்படுத்தும் கும்பல்

ஆத்தூர்,  பிப்.15: கல்வராயன் மலையில் மூங்கில் மரங்களை சேதப்படுத்தும் சமூக விரோத கும்பல் மீது நடவடிக்கை எடுக்க ேவண்டும் என, சமூக ஆர்வலர்கள் கோரிக்கை விடுத்துள்ளனர். பெத்தநாயக்கன்பாளையம் தாலுகா கல்வராயன்  மலைப்பகுதியில், ஏராளமான மூங்கில் மரங்கள் உள்ளன. வனத்துறையின் சார்பில் மூங்கில் உற்பத்தி  செய்யப்பட்டு, பராமரிக்கப்பட்டு வருகிறது. கல்வராயன் மலையில் உள்ள  கிராமங்களுக்கு செல்லும் பகுதியில் உள்ள மலைப்பாங்கான சாலைகளின்  இருபுறமும், ஏராளமான மூங்கில்கள் விளைந்துள்ளன. கடந்த சில வாரங்களாக, சமூக விரோத கும்பல், இரவு நேரங்களில் மூங்கிலை  உடைத்து வீணாக்கும் செயலில் ஈடுபட்டு வருகிறார்கள். இதுகுறித்து  சமூக ஆர்வலர்கள் கூறுகையில், ‘கல்வராயன் மலையில் சாலையின் இருபுறமும் நன்கு விளைந்த மூங்கில் மரங்கள் உள்ளன. கடந்த சில  வாரங்களாக சமூக விரோத கும்பல் இந்த மூங்கில்களை முறித்து போட்டு வீணடித்து  வருகிறார்கள். இதுகுறித்து பல முறை வனத்துறை அதிகாரிகளுக்கு தகவல்  தெரிவித்தும், அவர்கள் எவ்வித நடவடிக்கையும் எடுக்கவில்லை. எனவே, மாவட்ட நிர்வாகம் தக்க நடவடிக்கை  எடுத்து கல்வராயன் மலையில் உள்ள மூங்கில் மரங்களை காக்க நடவடிக்கை எடுக்க வேண்டும்,’ என்றனர்.

வீரகனூர் அருகே லாரி மீது டூவீலர் மோதி புது மாப்பிள்ளை பலி

கெங்கவல்லி,  பிப்.15: சேலம்  மாவட்டம், வீரகனூர் அருகே கிழக்கு ராஜாபாளையம், நத்தக்காடு பகுதியை  சேர்ந்த கருவேப்பிலை வியாபாரி ஆனந்தன்(25). இவருக்கு, கடந்த 3 மாதத்திற்கு  முன் சிவலட்சுமி (23) என்ற பெண்ணுடன் திருமணம் ஆனது. நேற்று  முன்தினம் இரவு 8 மணியளவில், டூவீலரில் தலைவாசலுக்கு சென்றுவிட்டு,  மீண்டும் கிழக்கு ராஜாபாளையம் நோக்கி வந்து கொண்டிருந்தார். அப்போது  இலுப்பநத்தம் பகுதியில் சாலையோரம் நிறுத்தப்பட்டிருந்த லாரி மீது,  ஆனந்தனின் டூவீலர் மோதியது. இதில் படுகாயமடைந்த அவர்,  சம்பவ இடத்திலேயே பரிதாபமாக உயிரிழந்தார். இதுகுறித்து தகவலறிந்து,  சம்பவ இடத்துக்கு வந்த வீரகனூர் போலீசார், ஆனந்தன் உடலை கைப்பற்றி பிரேத  பரிசோதனைக்காக ஆத்தூர் அரசு மருத்துவமனைக்கு அனுப்பி வைத்தனர். மேலும், விபத்து  குறித்து  விசாரணை நடத்தி வருகின்றனர். திருமணமாகி 3  மாதத்தில் புதுமாப்பிள்ளை விபத்தில் இறந்த சம்பவம், அப்பகுதியில் சோகத்தை  ஏற்படுத்தி உள்ளது.

திமுக செயல்வீரர்கள் கூட்டம்

மேட்டூர், பிப்.15: நங்கவள்ளி ஒன்றிய திமுக செயல்வீரர்கள் கூட்டம்,  நேற்று மேட்டூர் அடுத்த ராமன் நகரில் நடைபெற்றது. ஒன்றிய அவைத்தலைவர்  ராஜூ தலைமை வகித்தார். மேற்கு மாவட்ட அவைத்தலைவர் முன்னாள் எம்எல்ஏ கோபால், மேற்கு மாவட்ட துணை செயலாளர் சம்பத்குமார்  ஆகியோர் முன்னிலை வகித்தனர். ஒன்றிய செயலாளர் ரவிச்சந்திரன்  வரவேற்று பேசினார். இதில், சேலம் மேற்கு மாவட்ட திமுக செயலாளர் எஸ்.ஆர் சிவலிங்கம்,  தர்மபுரி நாடாளுமன்ற தொகுதி பொறுப்பாளர் இளங்கேவன், மாவட்ட  செயலாளர் தடங்கம் சுப்ரமணி ஆகியோர் சிறப்புரையாற்றினர். வரும் நாடாளுமன்ற தேர்தலில் திமுக வெற்றிக்கு வாக்குசேகரிக்கும் விதம்,. வாக்கு பதிவு மற்றும் வாக்கு எண்ணிகையின் போது விழிப்புடன் செயல்பட வேண்டிய விதம் குறித்து விரிவாக  விவாதிக்கப்பட்டது. இந்த கூட்டத்தில் பேரூர் செயலாளர்கள்  அல்லிமுத்து, பொன்னுவேல், கோனூர் கிராம  செயலாளர் சண்முகம் மற்றும் திமுக நிர்வாகிகள் ஏராளமானோர் பங்கேற்றனர்.

கிழக்கு மாவட்ட திமுக சார்பில் நெய்காரப்பட்டியில் ஊராட்சி சபை கூட்டம்

சேலம், பிப்.15: சேலம் கிழக்கு மாவட்ட திமுக சார்பில், நெய்காரப்பட்டியில் ஊராட்சி சபை கூட்டம் நேற்று நடந்தது.  சேலம் கிழக்கு மாவட்ட திமுக சார்பில், பனமரத்துப்பட்டி ஒன்றியத்திற்குட்பட்ட நெய்க்காரப்பட்டியில் ஊராட்சி சபை கூட்டம் நேற்று நடந்தது. கூட்டத்திற்கு, ஒன்றிய செயலாளர் பாரப்பட்டி சுரேஷ்குமார் தலைமை வகித்தார். ஊராட்சி செயலர் கந்தசாமி முன்னிலை வகித்தார். இதில், கொள்கை பரப்பு இணை செயலாளர் சந்திரகுமார், மருத்துவரணி மாநில துணை செயலாளர் கோகுல் கிருபாசங்கர் ஆகியோர் கலந்து கொண்டனர். கூட்டத்தில் கலந்து ெகாண்டவர்கள், சமத்துவபுரத்திற்கு சாலை உள்ளிட்ட அடிப்படை வசதிகளை செய்து தர வேண்டும். ஊராட்சி முழுவதும் உள்ள சாக்கடைகளை சீரமைத்து, குடிநீர் வசதி ஏற்படுத்த வேண்டும். நெய்க்காரப்பட்டி ஸ்டேஷனில் மீண்டும் பயணிகள் ரயில் நின்று செல்ல நடவடிக்கை எடுக்க வேண்டும் என பல்வேறு கோரிக்கைகளை வலியுறுத்தினர். இதில், ஒன்றிய பொருளாளர் வெங்கடாசலம், துணை செயலாளர் ராஜா, இளைஞரணி அமைப்பாளர் சந்திரமோகன், துணை அமைப்பாளர் சங்கர், நிர்வாகிகள் கார்த்தி, முத்து சதீஷ், பைபாஸ் மணிகண்டன், செல்வம், சுரேஷ் உள்ளிட்ட பலர் கலந்து கொண்டனர்.

வனப்பகுதியில் தீ வைத்தால் சிறை தண்டனை விதிப்பு

சேலம், பிப்.15: வனத்தில் தீ வைத்தால் சிறை தண்டனை கிடைக்கும் என்று அதிகாரிகள் எச்சரிக்கை விடுத்துள்ளனர்.  தமிழகம் முழுவதும் தற்போது வெயிலின் தாக்கம் துவங்கியுள்ளது. இதனால் வனப்பகுதியில் தீ விபத்துக்கள் ஏற்படாமல் தடுக்க முன்னெச்சரிக்கை நடவடிக்கையாக, தமிழகம் முழுவதும் தீ தடுப்பு காவலர்கள் ஒப்பந்த அடிப்படையில் நியமிக்கப்பட்டுள்ளனர். இவர்கள் வனப்பகுதியில் காய்ந்த சருகுகளை அப்புறப்படுத்தல், ரோந்து செல்லுதல் போன்ற பணிகளை மேற்கொண்டு வருகின்றனர். இந்நிலையில், சேலம் மண்டலத்துக்கு உட்பட்ட சேலம் தெற்கு, வடக்கு, ஏற்காடு, டேனிஷ்ப்பேட்டை, மேட்டூர், தம்மம்பட்டி, வாழப்பாடி, ஆத்தூர், நாமக்கல் வனசரகத்துக்கு பகுதிகளில் உள்ள வனக்கிராமங்களில் தீ தடுப்பு குறித்து விழிப்புணர்வை வனத்துறையினர் ஏற்படுத்தி வருகின்றனர். மேலும், வனத்துக்குள் எளிதில் தீ பிடிக்கும் பொருட்களை கொண்டு செல்ல வேண்டாம் என எச்சரித்து வருகின்றனர். இது குறித்து வனத்துறை அதிகாரிகள் கூறுகையில், ‘வனப்பகுதியில் தீ விபத்து ஏற்படுவதை தவிர்க்க, தற்போது  வனப்பகுதியில் தீ தடுப்பு கோடுகள் வெட்டப்பட்டு வருகிறது. வனத்தையொட்டியுள்ள கிராமங்களில் தீ தடுப்பு குறித்த விழிப்புணர்வை வனத்துறையினர் ஏற்படுத்தி வருகின்றனர். வனப்பகுதியில் தீ வைப்போருக்கு வனப்பாதுகாப்பு சட்டத்தின் கீழ் 6 மாதம் முதல் 3 ஆண்டுகள் வரை சிறை தண்டனை கிடைக்கும்,’ என்றனர்.

வீரகனூர் கால்நடை சந்தையில் அடிப்படை வசதிகள்

கெங்கவல்லி, பிப்.15:  கெங்கவல்லி தாலுகா வீரகனூர் 7வது வார்டு பகுதியில் வாரந்தோறும் சனிக்கிழமை கால்நடை சந்தை நடைபெறுகிறது. சேலம் மாவட்டத்திலேயே 2வது மிகப்பெரிய சந்தை என்ற பெயர் பெற்றது. ஆனால், தற்போது சந்தையில் போதிய அடிப்படை வசதிகள் இல்லாததால் மாடுகள் வரத்து குறைந்துபோனது. இதுகுறித்து விவசாயிகள் மற்றும் வியாபாரிகள் கூறியதாவது: வீரகனூர் கால்நடை சந்தை, கடந்த 10 ஆண்டுகளுக்கு முன்பு அதிகாலை 3 மணிக்கு தொடங்கி மதியம் 4 மணி வரை நடைபெறும். நூற்றுக்கணக்கான மாடுகளும், ஆயிரக்கணக்கில் ஆடுகளும் சந்தையில் விற்பனை செய்யப்படும். ஆனால், சந்தையை நிர்வகித்து வரும் பேரூராட்சி நிர்வாகம் வருவாயை மட்டுமே வசூலித்தது. அடிப்படை வசதிகளை செய்து தரவில்லை. சந்தை வளாகத்தில் மாடுகள் தண்ணீர் குடிக்க புதிதாக தொட்டி கட்டவில்லை. மழை காலங்களில் சேறும், சகதியுமாக மாறிவிடும். இதனால் சந்தைக்கு கால்நடை வரத்து படிப்படியாக குறைந்துபோனது. தற்போது காலை 4 மணிக்கு கூடும் சந்தை, காலை 9 மணிக்குள் முடிவடைந்து விடுகிறது. மாடுகள் வரத்து குறைந்ததால் சந்தையை நடத்த ஏலம் எடுத்தவர்களுக்கு நஷ்டமே ஏற்படுகிறது. பேரூராட்சி நிர்வாகத்துக்கு முக்கிய நிதி ஆதாரமாக விளங்கும் சந்தையை, முறையாக அதிகாரிகள் நிர்வகிக்காததால், எதிர்வரும் காலத்தில் சந்தை இல்லாமல் ேபாகும் அபாயம் உள்ளது. எனவே, மாவட்ட நிர்வாகம் சந்தையை மேம்படுத்த உரிய நடவடிக்கை எடுக்க வேண்டும். இவ்வாறு அவர்கள் தெரிவித்தனர்.

கியோகிஷின் கராத்தே போட்டிகள் அரசு பள்ளி மாணவர்கள் மாநில அளவில் சாதனை

இடைப்பாடி, பிப்.15: சங்ககிரி மற்றும் பள்ளிபாளையத்தில், மாநில அளவிலான கியோகிஷின் கராத்தே போட்டிகள் நடந்தது. இதில் இடைப்பாடி, செட்டிமாங்குறிச்சி, சின்னமுத்தூர், கோனேரிப்பட்டி, ஆலச்சம்பாளையம், அடுவாப்பட்டி ஆகிய அரசு பள்ளிகளின் மாணவ, மாணவிகள் 200க்கும் மேற்பட்டோர் கலந்து கொண்டனர். மாணவிகள் பிரிவில் லாவண்யா கௌரி, நந்தினி, சுஜிதா, மீனா, தேவி அலமேலு, மகேஷ்வரி ஆகியோர் தங்கம் வென்றனர். சீனியர் மாணவர்கள் பிரிவில் பிரபாகரன், சின்னசாமி ஆகியோரும், சிறுவர் பிரிவில் விக்னேஷ், நிஷாந்த், காவியா ஆகியோரும் முதல் பரிசை வென்றனர். மாநில அளவில் சாதனை படைத்த மாணவ, மாணவிகளுக்கு இடைப்பாடி சர்வதேச கியோகுஷின் அமைப்பு சார்பில், பாராட்டு மற்றும் பரிசளிப்பு விழா நடந்தது.  விழாவுக்கு பீல்டு வில்வித்தை சங்க மாவட்ட தலைவர் முருகன் தலைமை வகித்தார். மாவட்ட ஆலோசகர் சண்முகம், கலைமகள் பள்ளி முதல்வர் மோகன் கிருபானந்த், கியோகிஷின் கராத்தே பயிற்சியாளர்கள் செங்கோட்டுவேல், ராஜா, சந்திரன், மாதேஸ்வரன் ஆகியோர் முன்னிலை வகித்தனர். மாணவ, மாணவிகளுக்கு மாவட்ட தலைவர் முருகன், முதல்வர் மோகன் கிருபானந்த் ஆகியோர் பரிசுகளை வழங்கினர். நிகழ்ச்சியில் ஆசிரியர்கள், கிராம மக்கள் கலந்துகொண்டனர்.

தமிழ்நாடு விவசாயிகள் சங்க பொதுக்கூட்டம்

சேலம், பிப்.14: தமிழ்நாடு விவசாயிகள் சங்கத்தின் 26வது மாநில மாநாடு சேலத்தில் நடந்தது. நேற்று 3வது நாளையொட்டி, செவ்வாய்பேட்டை நிலையம் அருகில் இருந்து விவசாய சங்கங்களின் பேரணி நடந்தது. பேரணி கலெக்டர் ஆபீஸ், திருவள்ளுவர் சிலை, குண்டுபோடும் ெதரு வழியாக கோட்டையில் நிறைவடைந்தது. பின்னர் கோட்டையில் நடந்த பொதுக்கூட்டத்துக்கு தமிழ்நாடு விவசாயிகள் சங்க மாநிலத்தலைவர் குணசேகரன் தலைமை வகித்தார். சிபிஐ மாநில செயலாளர் முத்தரசன் மாவட்ட செயலாளர் செல்வராஜ், மாநில துணைச்செயலாளர் சுப்பராயன், மாநில பொதுச்செயலாளர் துரைமாணிக்கம், மாநில துணைச்செயலாளர் வீரபாண்டியன் உள்பட பலர் கலந்து கொண்டனர். தென்பெண்ணை பாலாறு இணைப்பு திட்டத்தை உடனடியாக நிறைவேற்ற வேண்டும். பாலாற்றில் தமிழக உரிமையை காக்க வேண்டும். தென்னை வளர்ப்பை பாதுகாக்க வேண்டும். வீட்டு வசதி சங்கத்தில் உள்ள அனைத்து நிலுவைக்கடன்களை ரத்து செய்ய வேண்டும். பேராசிரியர் சாமிநாதன் குழுவின் பரிந்துரைகளை நிறைவேற்றவேண்டும். ஆலைக்கழிவுகளை சுத்திகரித்து வெளியேற்ற வேண்டும். நில உச்ச வரம்பு சட்டத்தை முழுமையாக அமல்படுத்த வேண்டும். கால்நடை வளர்ப்பினை ஊக்கப்படுத்த வேண்டும். தமிழக நீர்நிலைகளை மராமத்து பணிகள் செய்ய வேண்டும். வேளாண் பயிர் கடன்களை தள்ளுபடி செய்ய வேண்டும். காட்டுப்பன்றியை வனவிலங்கு பட்டியலில் இருந்து நீக்க வேண்டும் என்பன உள்ளிட்ட பல்வேறு தீர்மானங்கள் கூட்டத்தில் நிறைவேற்றப்பட்டன.

பாலியல் வழக்கில் கைதான ஆத்தூர் தொழிலதிபர் மத்திய சிறையில் அடைப்பு

ஆத்தூர், பிப்.14: பிளஸ்2 மாணவியை பாலியல் பலாத்காரம் செய்த வழக்கில் கைதான ஆத்தூர் தொழிலதிபரை, போலீசார் நேற்று சேலம் மகளிர் நீதிமன்றத்தில் ஆஜர்படுத்தி, சிறையில் அடைத்தனர். சேலம் மாவட்டம் ஆத்தூர்  வடக்கு உடையார்பாளையத்தை சேர்ந்தவர் ெதாழிலதிபர் நடராஜன்(76). இவருக்கு  சொந்தமாக அதே பகுதியில் 30க்கும் மேற்பட்ட வீடுகள் உள்ளன. இதனை நடராஜன்  வாடகைக்கு விட்டுள்ளார். இதில் ஒரு வீட்டில், 17 வயது சிறுமி  தங்கியுள்ளார். அந்த சிறுமி தொழிலதிபர் வீட்டில் வீட்டு வேலை செய்தபோது பாலியல் ரீதியாக மாணவியை துன்புறுத்தி வந்துள்ளார்.கடந்த 2 மாதமாக அவரது  தொல்லை எல்லை மீறியுள்ளது. இதுதொடர்பாக, கடந்த திங்கட்கிழமை ஆத்தூர்  டவுன் போலீசில் மாணவி புகார் அளித்தார். அதில், நடராஜன் தன்னை பாலியல்  பலாத்காரம் செய்ததாகவும், அதை வீடியோ எடுத்து வைத்துள்ளதாகவும்  தெரிவித்திருந்தார். இதன் பேரில் வழக்கு பதிவு செய்து, நடராஜனை  கைது செய்த போலீசார், நேற்று முன்தினம் ஆத்தூர் நீதிமன்றத்தில் மாஜிஸ்திரேட்  சிவக்குமார் முன்னிலையில் ஆஜர்படுத்தினர். அவர், நடராஜனை சேலம் மகிளா நீதிமன்றத்தில் ஆஜர்படுத்த உத்தரவிட்டார்.  இதை தொடர்ந்து, போலீசார் நேற்று சேலம் மகிளா நீதிமன்றத்தில், நீதிபதி விஜயகுமாரி முன்னிலையில் நடராஜனை  ஆஜர்படுத்தினர். அவரை வரும் 27ம் தேதி வரை நீதிமன்ற காவலில் வைக்கும்படி, நீதிபதி உத்தரவிட்டார். இதையடுத்து நடராஜன் சேலம் மத்திய சிறையில் அடைக்கப்பட்டார்.

ரஜினி ரசிகரை வெட்டியது யார்? போலீஸ் தீவிர விசாரணை

சேலம், பிப்.14: சேலத்தில் ரஜினி ரசிகரை ஓட ஓட அரிவாளால் வெட்டியவர்கள் யார்? என்பதை கண்டுபிடிக்க முடியாமல் போலீசார் கடும் திணறலுக்கு ஆளாகியுள்ளனர்.சேலம் ஓமலூர் அருகேயுள்ள கருக்கல்வாடியை சேர்ந்தவர் ரஜினி பழனிசாமி (49). தீவிர ரஜினி ரசிகரான இவர் அழகாபுரம் போலீஸ் ஸ்டேஷன் எதிரே உள்ள டிராவல்ஸ் ஒன்றில் டிரைவராக பணியாற்றி வருகிறார். நேற்றுமுன்தினம் காலை 3 பேர் கொண்ட மர்ம கும்பல் அவரை ஓட ஓட வெட்டியது. இதில் சாக்கடைக்குள் விழுந்து ஒளிந்து கொண்டதால் உயிர் பிழைத்தார். தற்போது சேலம் அரசு மருத்துவமனையில் அவருக்கு தீவிர சிகிச்சை அளிக்கப்பட்டு வருகிறது.இவர் இரும்பாலை காவல் நிலையத்தில் பிரண்ட்ஸ் ஆப் போலீஸ் குழுவில் இருந்து வந்தார். திருட்டு பொருட்களை வாங்கிய விவகாரத்தில் சிக்கியதால், அவரை அதிலிருந்து போலீசார் நீக்கி விட்டனர். அதன்பிறகு போலீஸ் இன்பார்மராக மாறினார். அதே நேரத்தில் பல்வேறு அரசியல் கட்சி தலைவர்களை கொச்சை கொச்சையாக விமர்சனம் செய்து வந்தார். இதனால் சேலம் கிரைம் பிரிவில் அவர் மீது வழக்கு பதிவு செய்யப்பட்டு விசாரணை நடைபெற்று வருகிறது. அதேநேரத்தில் தன்னை கிரைம் பிரிவு எஸ்ஐ என எல்லோரிடமும் கூறி வந்துள்ள தகவலும் பரபரப்பை ஏற்படுத்தி உள்ளது.பழனிசாமி, தன்னை வெட்டியவர் வீரமணி என கூறியதால், வீரமணி என யாராவது இருக்கிறார்களா? என போலீசார் விசாரித்தனர். அதேபோல், பழனிசாமியின் செல்போனுக்கு பேசியவர், போலீசுக்கு நீ இன்பார்மராக இருக்கலாம்,  நாளைக்கு உன்னை வெட்டுவோம். போலீஸ் வந்து உன்னை காப்பாற்றுகிறதா பார்ப்போம்’ என கூறியதையும் அவர் பதிவு செய்து வைத்துள்ளார். அந்த எண் குறித்து போலீசார் விசாரணை நடத்தினர். ஆனால் அது நெட்கால் மூலம் வந்த அழைப்பு என தெரியவந்துள்ளது. இதனால் குற்றவாளிகளை அடையாளம் காண்பதில் போலீசாருக்கு பின்னடைவு ஏற்பட்டு உள்ளது. அவரால் காட்டி கொடுக்கப்பட்டவர்கள் வெட்டினார்களா? அல்லது தொடர்ந்து அவதூறாக பேசியதால் ஆத்திரமடைந்த யாராவது பேசினார்களா என்பது குறித்து போலீசார் விசாரணை நடத்தி வருகின்றனர். அவரது செல்போனுக்கு யாரெல்லாம் பேசினார்கள் என்ற தகவலையும் போலீசார் சேகரித்து வருகின்றனர்.

கெங்கவல்லியில் பரபரப்பு ஒன்றிய அலுவலகத்தை பெண்கள் முற்றுகை

கெங்கவல்லி, பிப்.14:நடுவலூர் ஊராட்சியில் பொக்லைன் மூலம் நூறுநாள் வேலை திட்ட பணி மேற்கொண்டதை கண்டித்து, பிடிஓ எச்சரிக்கை விடுத்ததால் அதிர்ச்சியடைந்த பெண்கள், நேற்று மாலை கெங்கவல்லி ஒன்றிய அலுவலகத்தை முற்றுகையிட்டனர்.கெங்கவல்லி ஒன்றியத்தில் உள்ள 14 ஊராட்சிகளில், தேசிய ஊரக வேலை வாய்ப்பு திட்டத்தின் கீழ், கிராமப்புற மக்களுக்கு 100 நாள் வேலை வழங்கப்பட்டு வருகிறது. நடுவலூர் ஊராட்சியில், இந்த திட்டத்தில் பொது மக்களுக்கு பணி வழங்காமல், பொக்லைன் இயந்திரம் மூலம் பணிகளை மேற்கொள்வதாக, சேலம் கலெக்டர் ரோகிணிக்கு புகார்கள் சென்றது. இதையடுத்து கலெக்டரின் உத்தரவுவின் பேரில், கெங்கவல்லி வட்டார வளர்ச்சி அலுவலர் அசோகன், நேற்று காலை நடுவலூர் ஊராட்சியில் பணிகள் நடைபெறும் இடங்களை நேரில் பார்வையிட்டு ஆய்வு செய்தார், அப்போது அவர் அங்கு பணியில் ஈடுபட்டவர்களிடம், இப்பணிகளை நீங்கள் தான் செய்ய வேண்டும். பொக்லைன் மூலம் செய்வதற்கா திட்டம் அறிவிக்கப்பட்டது.இனிமேல் இதுபோல் புகார் வந்தால், நடுவலூர் ஊராட்சியில் நூறுநாள் வேலை திட்டப்பணிகள் நிறுத்தப்படும் என எச்சரித்து விட்டு சென்றார். அதிகாரி எச்சரித்தது போல், பணிகளை பாதியிலேயே நிறுத்தி விட்டால், என்ன செய்வது என அச்சமடைந்த பெண்கள் 50க்கும் மேற்பட்டோர், நேற்று மாலை கெங்கவல்லி ஒன்றிய அலுவலகத்துக்கு வந்து முற்றுகையிட்டனர். இதுகுறித்த தகவல் அறிந்து வட்டார வளர்ச்சி அலுவலர் அசோகன், பெண்களிடம் பேச்சுவார்த்தை நடத்தினார். இயந்திரம் பயன்படுத்தாமல், இனிமேல் மக்களை கொண்டு பணிகளை மேற்கொள்ள வேண்டும் எனக்கூறி, அவர்களை சமாதானம் செய்து அனுப்பி வைத்தார். இதனால் கெங்கவல்லி ஒன்றிய அலுவலகத்தில் சிறிது நேரம் பரபரப்பு ஏற்பட்டது.

நாமக்கல்லில் பரபரப்பு காரில் 40கிலோ கஞ்சா கடத்திய வாலிபர் கைது

நாமக்கல், பிப்.14: நாமக்கலில் காரில் 40 கிலோ கஞ்சா கடத்திய வாலிபரை போலீசார் கைது செய்தனர். தப்பி ஓடிய மற்றொருவரை தேடி வருகின்றனர்.நாமக்கல்லில் நேற்று மாலை, போக்குவரத்து சப்இன்ஸ்பெக்டர் சபாபதி மற்றும் போலீசார் நேதாஜி சிலை அருகில் பணியில் ஈடுபட்டிருந்தனர். அப்போது சேந்தமங்கலம் ரோட்டில் இருந்து வந்த ஒரு கார், ஒருவழி பாதையில் அத்துமீறி சென்றது. இதையடுத்து அந்த காரை போலீசார் தடுத்து நிறுத்தினர். போலீசாரை பார்த்ததும், காரில் இருந்த 2 பேரும் காரை நிறுத்தி விட்டு தப்பி ஓடினர். இதை கண்ட போக்குவரத்து போலீஸ்காரர் சவுந்தரராஜன் இருவரையும் விரட்டிச் சென்றார். ஆஞ்சநேயர் கோயில் அருகே வைத்து ஒருவரை மடக்கி பிடித்தார். மற்றொருவர் தப்பி ஓடி விட்டார். போக்குவரத்து சப்இன்ஸ்பெக்டர் சபாபதி, காரை சோதனை செய்தபோது, பின்சீட்டில் சாக்கு மூட்டைகளில் 40 கிலோ கஞ்சா இருப்பது தெரியவந்தது. இதையடுத்து, காரையும் பிடிபட்ட வாலிபரையும் காவல் நிலையத்திற்கு போலீசார் அழைத்து வந்தனர். போலீசாரின் விசாரணையில், பிடிபட்டவர் தர்மபுரி மாவட்டம் பாலக்கோட்டை சேர்ந்த பிரபாகரன்(25) என்பதும், தப்பி ஓடியவர் நாமக்கல் அருகே மணியனூரை சேர்ந்த சீனிவாசன்(30)  என்பதும் தெரியவந்தது. இது குறித்து நாமக்கல் போலீசார், சேலம் மாவட்ட போதைப்பொருள் தடுப்பு பிரிவுக்கு தகவல் தெரிவித்தனர். அவர்கள் நாமக்கல் வந்து, பிடிபட்ட பிரபாகரனை கைது செய்து விசாரித்து வருகின்றனர். பறிமுதல் செய்யப்பட்ட 40 கிலோ கஞ்சாவின் மதிப்பு ₹40 ஆயிரம் இருக்கும் என போலீசார் தெரிவித்தனர்.