Sivagangai - Dinakaran

பள்ளியில் விளையாட்டு விழா

காரைக்குடி, பிப். 14: காரைக்குடி அருகே, கோட்டையூர் முத்தையா அழகப்பா பள்ளி 45வது ஆண்டு விளையாட்டு விழா நடந்தது. பள்ளி முதல்வர் பாலசுப்பிரமணியன் வரவேற்றார். பள்ளி தாளாளர் அண்ணாமலை, உமையாள் அண்ணாமலை ஆகியோர் தலைமை வகித்தனர். என்சிசி 9வது பட்டாலியன் கமாண்டிங் ஆபீசர் கர்னல் அஜய்ஜோஷி துவக்கி வைத்தார். மாவட்ட உடற்கல்வி ஆய்வாளர் சூரன், வனத்துறை அதிகாரி மணிவண்ணன், உடற்கல்வி இயக்குநர் விஸ்வலிங்கம் ஆகியோர் வெற்றி பெற்றவர்களுக்கு பரிசு வழங்கினர். விழாவில் மாற்றுத்திறனாளிகள் பள்ளி மாணவர்கள் 38 பேர் கலந்து கொண்டு தங்களின் விளையாட்டு திறமைகளை வெளிப்படுத்தினர். இரண்டு வீல் சேர்கள் வழங்கப்பட்டது. மாணவர் விமல் நன்றி கூறினார்.

பெற்றோர்களுக்கு மாணவர்கள் பாதபூஜை

திருப்புத்தூர், பிப். 14: திருப்புத்தூர் அருகே, கீழச்சிவல்பட்டி ஆர்.எம்.மெய்யப்பச் செட்டியார் மெட்ரிக் பள்ளியில் மாணவர்கள் பெற்றோர்களுக்குப் பாதபூஜை செய்தனர்.திருப்புத்தூர் அருகே, கீழச்சிவல்பட்டியில் ஆர்.எம்.மெய்யப்பச் செட்டியார் மெட்ரிக் பள்ளி உள்ளது. இந்த பள்ளியில் பத்தாம் வகுப்பு அரசுத் பொதுத்தேர்வு எழுத உள்ள மாணவர்கள், நேற்று பள்ளி வளாகத்தில் தங்களது பெற்றோர்களுக்கு பால் மற்றும் மலர்கள் கொண்டு பாதபூஜை செய்தனர். இந்நிகழ்ச்சியில் பள்ளி முதல்வர் மகாலிங்கம் பேசுகையில், ‘மாணவர்களின் நல்லொழுக்கம், பெற்றோர்களை மதித்தல், பெற்றோர்களும் மாணவ, மாணவியரிடம் நல்ல நண்பர்களாகப் பழகுதல், பெற்றோர்களுக்குத் தரும் மரியாதை ஆகியவை குறித்து பேசினார். தொடர்ந்து பள்ளித் தாளாளர் எஸ்.எம்.பழனியப்பன், பள்ளிச் செயலர் குணாளன் ஆகியோர் மாணவர் மற்றும் பெற்றோரை வாழ்த்திப் பேசினர். ஆசிரியர்கள் மணி, சுரேகா, காளீஸ்வரி, ஜெய்சி கௌசல்யா ஆகியோர் கலந்து கொண்டனர். அறிவியல் ஆசிரியர் பழனியப்பன் நன்றி கூறினார்.

கடன் தருவதாக ஏமாற்றும் போலி நிறுவனங்கள் அதிகரிப்பு

பரமக்குடி, பிப்.14: பரமக்குடி பகுதியில் போலியாக இயங்கி வரும் நிதி நிறுவனங்கள் லோன் கொடுப்பதாக கூறி பெண்களை ஏமாற்றும் சம்பவங்கள் அதிகரித்து வருகிறது.ராமநாதபுரம் மாவட்டத்தில் பல இடங்களில் நிதி நிறுவனங்கள் என்ற பெயரில் புதிது புதிதாக தொடங்கப்பட்டு உள்ளது. இந்த நிறுவனங்கள் தனிநபர், தொழில், தங்கநகை, தினசரி, மாதம், வார சீட்டுகள் எனற பெயரில் பொதுமக்களிடம் குறிப்பாக பெண்களை குறிவைத்து பணம் பறித்து வருகின்றனர். பரமக்குடியில் கண்ட இடங்களில் பெரிய பெரிய நிறுவனங்களின் பெயர்களிலும், புதிய பெயர்களிலும் சிறிய கட்டிடங்களை வாடகைக்கு எடுத்து பணம் கொடுப்பதும், கட்டவில்லை என்றால் சொத்துக்களையும், நகைகளையும் பறித்து வருகின்றனர்.இதுபோன்ற ஏமாற்றுபவர்களை நம்பி மகளிர் மன்றத்தை சேர்ந்த பெண்கள் கூட்டாக பணம் பெறுவதற்கு நிதி நிறுவனங்களுக்கு முன் கால் கடுக்க காத்து கிடக்கின்றனர். பணம் பெற்று குறைந்த காலத்தில் இருமடங்காக தருவதாக கூறி, மக்களை ஏமாற்றும் நோக்கில், குற்றப்பின்னணி கொண்டவர்கள் இதுபோன்ற செயல்களில் ஈடுபட்டு வருகின்றனர். பொதுமக்கள் நிதி நிறுவனங்களை நம்பி ஏமாறாமல் இருக்க பொருளாதார குற்றப்பிரிவு போலீசார் மகளிர் மன்றங்களை சேர்ந்த பெண்களுக்கு விழிப்புணர்வு ஏற்படுத்த நடவடிக்கை எடுக்கவேண்டும் என சமூக ஆர்வலர்கள் வலியுறுத்தியுள்ளனர்.இதுகுறித்து சமூக ஆர்வலர்கள் தெரிவிக்கையில், “ராமநாதபுரம் மாவட்டத்தில் பரமக்குடி பகுதியில் பல இடங்களில் நிதிநிறுவனங்களுக்கு முன் பெண்கள் பணத்திற்காக காத்திருப்பது கண்கூடாக பார்க்க முடிகிறது. நிதி நிறுவனம் என்ற பெயரில் பணத்தை கொடுத்து விட்டு வீடு,சொத்துக்களை எழுதி வாங்கி கொள்கின்றனர். பணத்தை குருகிய காலத்தில் இரண்டு மடங்காக தருவதாக ஆசை வார்த்தை கூறி பணத்தை பொற்றுகொள்ளும் சம்பவம் அதிகரித்து வருகிறது. பணத்தை முதலீடு செய்வதற்கு முன் தீர விசாரிக்க வேண்டும். அரசு நிதி நிறுவனம் மற்றும் அரசு வங்கிகளில் முதலிடு செய்யவேண்டும்’’ என்றார்.

காரைக்குடி பகுதியில் திருட்டு சம்பவங்கள் தொடர்ந்து அதிகரிப்பு

காரைக்குடி, பிப். 14: காரைக்குடி பகுதியில் முன்பின் அறிமுகம் இல்லாத வெளி மாநில நபர்கள் கட்டுமான தொழிலாளர்கள் என்ற பெயரில் அதிகளவில் நடமாடுவதால், பொதுமக்கள் அச்சத்தில் உள்ளனர்.காரைக்குடி பகுதியில் பல்வேறு கல்வி நிறுவனங்கள் உள்ளதால், மாவட்டத்தில் வளர்ச்சி அடைந்த பகுதியாக உள்ளது. இப்பகுதியில் குடும்பத்தில் உள்ள கணவன், மனைவி இருவரும் வேலைக்கு செல்வதால் பெரும்பாலான வீடுகளில் முதியோர்களே உள்ளனர். இதனை தங்களுக்கு சாதகமாக பயன்படுத்தி கொண்டு திருடர்கள் பகல் நேரங்களில் தங்களின் கைவரிசையை காட்டி வருகின்றனர். தற்போது இப்பகுதியில் கட்டுமானப் பணிகள் அதிகளவில் நடக்கிறது. இப்பணிகளில் உள்ளூர் தொழிலாளர்களை விட வடமாநில தொழிலாளர்களே வேலை பார்க்கின்றனர்.வடமாநில தொழிலாளர்களுக்கு கூலி குறைவு என்பதாலும், இங்கு தொழிலாளர்கள் பற்றாக்குறை உள்ளதாலும், கட்டிட கான்டிராக்டர்கள் கட்டுமான பணிகளுக்கு ஒப்பந்த அடிப்படையில் வடமாநிலங்களில் இருந்து அதிகளவில் ஆட்களை அழைத்து வருகின்றனர். ஆயிரக்கணக்கான வடமாநில தொழிலாளர்கள் இப்பகுதியில் முகாமிட்டு வேலைபார்த்து வருகின்றனர். தவிர காரைக்குடி அருகே உள்ள புதுவயலில் உள்ள அரிசி ஆலைகள், காரைக்குடியில் உள்ள பேக்கரி மற்றும் சிறிய, பெரிய அளவிலான தொழிற்சாலைகளில் வடமாநிலத்தவர்களே வேலை பார்க்கின்றனர்.இப்பகுதியில் பகல் மற்றும் இரவு நேரங்களில் சிறு சிறு திருடு மற்றும் வழிப்பறி ஆங்காங்கே நடக்கிறது. எனவே தொழிலாளர்கள் என்ற போர்வையில் வடமாநிலங்களை சேர்ந்த சமூக விரோதிகளும் ஊடுருவி இருக்கலாம் என பொதுமக்கள் அச்சம் தெரிவித்துள்ளனர். வெளிமாநில ஆசாமிகள் குறித்து உள்ளூர் ஸ்டேசன்களில் முறையான பதிவுகள் இருக்க வேண்டும். ஆனால் போலீசார் இவர்களை கண்டுகொள்ளாததால் இவர்கள் குறித்த விவரம் தெரியாத நிலை உள்ளது.சமூக ஆர்வலர்கள் கூறுகையில், வடமாநிலத்தை சேர்ந்த தொழிலாளர்கள் இப்பகுதியில் வீடு வாடகைக்கு எடுத்து தங்கி பல்வேறு பணிகளுக்கு செல்கின்றனர். இப்பகுதியில் சமீபகாலமாக வீடுகளின் வெளியே இருக்கும் லைட், கேஸ் சிலிண்டர்கள் திருடு போவது வாடிக்கையாக உள்ளது. தவிர ஆடு, மாடு போன்ற கால்நடைக­ளும் அடிக்கடி திருடு போகிறது. சிறிய அளவில் நடைபெறும் திருடு என்பதால் போலீசில் யாரும் புகார் தருவது இல்லை.எனவே காவல் துறையினர் வெளிமாநிலத்தை சேர்ந்தவர்களின் விபரங்கள் குறித்து விசாரணை செய்ய வேண்டும். அவர்களின் நடமாட்டத்தை கண்காணிக்க வேண்டும். வழக்கமாக ஏதாவது ஒரு அசம்பாவிதம் நடந்த பிறகே சுதாரிக்கும் போலீசார் அதுபோன்று நடக்காதற்கு முன்பு சுதாரிக்க வேண்டும் என்றார்.

மின்வாரிய பணிகளுக்கு லஞ்சம்

சிவகங்கை, பிப்.14: காளையார்கோவில் துணை மின் நிலைய கட்டுப்பாட்டில் உள்ள ஊர்களில் மின் வாரியம் தொடர்பான பணிகளுக்கு அதிகப்படியான பணம் வசூல் செய்வதாக புகார் எழுந்துள்ளது.காளையார்கோவில் துணை மின் நிலைய கட்டுப்பாட்டில் நாட்டரசன்கோட்டை பேரூராட்சி உள்ளிட்ட நூற்றுக்கும் மேற்பட்ட கிராமங்கள் உள்ளன. இப்பகுதி கிராமத்தினர் நாட்டரசன்கோட்டை பிரிவு அலுவலகம், காளையார்கோவில் மின்வாரிய அலுவலகங்களிலேயே மின்வாரியம் தொடர்பான அனைத்து பணிகளுக்கும் செல்ல வேண்டும். புதிய வீடுகளுக்கு தற்காலிக மின் இணைப்புகள் பெறுவது, அதை மீண்டும் நிரந்தர மின் இணைப்பாக மாற்றுவது, மீட்டரை இடமாற்றம் செய்வது, மின் கம்பத்தில் வரும் வயர் உள்ளிட்ட மின்சாதன பொருட்கள் பழுதடைந்தால் மாற்றுவது உள்ளிட்டவற்றிற்க்கு மின்வாரிய அலுவலகத்தில் பணம் செலுத்தி அதன் அடிப்படையில் மின்வாரிய ஊழியர்கள்(போர்மேன், லைன் மேன்) பணி செய்ய வேண்டும்.ஆனால் காளையார்கோவில் துணை மின் நிலைய கட்டுப்பாட்டில் இயங்கி வரும் காளையார்கோவில் மின்வாரிய அலுவலகம், நாட்டரசன்கோட்டை பிரிவு அலுவலகம் உள்ளிட்டவற்றில் பணிபுரியும் ஊழியர்கள் அரசு நிர்ணயித்த கட்டணம் தவிர ஒவ்வொரு பணிக்கும் தாங்களாக ஒரு குறிப்பிட்ட பணம் லஞ்சமாக நிர்ணயம் செய்கின்றனர். அதை கொடுத்தால் மட்டுமே வந்து பணி செய்வது, இல்லையெனில் ஏதேனும் காரணம் கூறி தாமதப்படுத்துவது அல்லது அலுவலர்களிடம் தவறான காரணங்களை கூறி அப்பணியை நிறுத்தி வைப்பது உள்ளிட்ட செயல்களில் ஈடுபடுகின்றனர்.கட்டுமானப்பணிகள் நடைபெறும் போது தற்காலிக மின் இணைப்பு வழங்கிய நிலையில், பின்னர் பணிகள் முடிந்த பிறகு சாதாரண மின் கட்டணம் செலுத்தும் முறைக்கு மின் இணைப்பை மாற்ற வேண்டும். ஆனால் இதை செய்ய சம்பந்தப்பட்டவர் விண்ணப்பம் கொடுத்து பல மாதங்கள் ஆனாலும் செய்வதில்லை. இதனால் கட்டுமானப் பணிக்கான கட்டணத்தை (சாதாரண கட்டணத்தைவிட பல மடங்கு அதிகம்) பல மாதங்கள் செலுத்த வேண்டிய நிலைக்கு தள்ளப்பட்டுள்ளனர். இதுபோல் வீட்டில் இருந்து மின் கம்பத்திற்கு செல்லும் வயர் மாற்றம் உள்ளிட்ட பல்வேறு பணிகளுக்கும் கூடுதல் தொகை நிர்ணயம் செய்து வசூலிக்கின்றனர்.பாதிக்கப்பட்டவர்கள் கூறியதாவது: காளையார்கோவில் துணை மின் நிலைய கட்டுப்பாட்டில் உள்ள அலுவலகங்களில் பணிபுரியும் மின் வாரிய ஊழியர்கள் ஒவ்வொன்றிற்கும் லஞ்சம் நிர்ணயம் செய்து வசூலிப்பது குறித்து மின் வாரிய உயர் அலுவலர்களுக்கு தெரிவித்தும் எந்த நடவடிக்கையும் இல்லை. ஆண்டுக்கணக்கில் இதுபோல் குற்றச்சாட்டு இருந்தும் உயர் அலுவலர்கள் கண்டுகொள்ளாமல் இருப்பதால் தொடர்ந்து துணிச்சலாக லஞ்சம் கேட்டு வருகின்றனர். சம்பந்தப்பட்ட ஊழியர்கள் மீது நடவடிக்கை எடுக்க வேண்டும் என்றனர்.

அரசனூரில் மின்தடை

சிவகங்கை, பிப்.14: சிவகங்கை அருகே அரசனூர் துணைமின் நிலையத்தில் இருந்து மின்சாரம் பெறும் பகுதிகளுக்கு நாளை (பிப்.15) மின் விநியோகம் நிறுத்தப்பட உள்ளது.அரசனூர் துணை மின்நிலையத்தில் மாதாந்திர பராமரிப்பு பணிகள் நடைபெறுவதையொட்டி அரசனூர், இலுப்பக்குடி, திருமாஞ்சோலை, படமாத்தூர், கண்ணாரிருப்பு, கானூர், பச்சேரி, மைக்கேல்பட்டணம், பில்லூர், பெத்தனேந்தல், களத்தூர், ஏனாதி உட்பட இந்த துணை மின்நிலையத்திலிருந்து மின் விநியோகம் செய்யப்படும் பகுதிகளுக்கு நாளை காலை 9 மணியில் இருந்து மாலை 5மணி வரை மின் விநியோகம் நிறுத்தப்பட உள்ளது. துணை மின்நிலைய உதவி பொறியாளர் அலுவலகம் சார்பில் தெரிவிக்கப்பட்டுள்ளது.

ஊர்ப்புற நூலகர்கள் வலியுறுத்தல்

சிவகங்கை, பிப்.14: தமிழ்நாடு பொது நூலகத்துறையின் கீழ் பணிபுரியும் ஊர்ப்புற நூலகர்களுக்கு காலமுறை ஊதியம் வழங்க வேண்டும் என அவர்கள் கோரிக்கை விடுத்துள்ளனர்.பள்ளி கல்வித்துறையின் கீழ் இயங்கும் தமிழ்நாடு அரசு பொது நூலகத் துறையில் ஊர்ப்புற நூலகர்கள் பணியாற்றி வருகின்றனர். ஆயிரத்து 800 ஊர்ப்புற நூலக பணியிடம் உருவாக்கப்பட்டு கடந்த 22 ஆண்டுகளுக்கு மேலாகியும் பணி விதிகள் உருவாக்கப்படாததால், இதுவரை காலமுறை ஊதியம் வழங்கப்படாமல் சிறப்பு காலமுறை ஊதிய விகிதத்திலேயே பணியாற்ற வேண்டிய நிலை உள்ளது. இதனால் பணி வரன்முறை, பதவி உயர்வு உள்ளிட்ட எவ்வித பலன்களும கிடைப்பதில்லை. காலமுறை ஊதிய விகிதத்திற்கு மாற்ற வேண்டும் என கடந்த 10 ஆண்டுகளுக்கும் மேலாக அரசிடம் மனுக்கள் அளித்தும், ஆர்ப்பாட்டம் நடத்தியும் இதுவரை எந்த நடவடிக்கையும் இல்லை.இந்நிலையில் தற்போதைய சட்டமன்ற கூட்டத் தொடரில் இதற்கான அறிவிப்பு வெளியிட வேண்டும் என ஊர்ப்புற நூலகர்கள் வலியுறுத்தியுள்ளனர்.அவர்கள் கூறியதாவது: அதிகபட்சமாக ரூ.7 ஆயிரம் ஊதியம் மட்டுமே வழங்கப்படுகிறது. இந்தப்பணத்தை வைத்து எப்படி வாழ முடியும். போதிய ஊதியம் இல்லாமல் தொடர்ந்து பாதிக்கப்பட்டு வருகிறோம். பணி ஓய்வு பெறும் போது அளிக்கப்படும் பணப்பலன், ஓய்வூதியம் உள்ளிட்ட எவ்வித பலனும் கிடையாது. இதுகுறித்து பல முறை வலியுறுத்தியும் எவ்வித நடவடிக்கையும் இல்லை. எனவே இந்த சட்டமன்ற கூட்டத்தொடரில் ஊர்ப்புற நூலகர்களுக்கு காலமுறை ஊதியம் வழங்குவதற்கான அறிவிப்பு வெளியிட வேண்டும் என்றனர்.

கல்லூரியில் இளைஞர் தினவிழா

காரைக்குடி, பிப். 14: காரைக்குடி அருகே, அமராவதிபுதூர் சாரதா நிகேதன் மகளிர் கல்லூரியில் இளைஞர் தினவிழா கொண்டாப்பட்டது. கலாச்சார மன்ற ஒருங்கிணைப்பாளர் மீனலோச்சனி வரவேற்றார். கல்லூரி தாளாளர் மத்சுவாமி ஆத்மானந்த மகாராஜ் அருளாசி வழங்கினார். கல்லூரி முதல்வர் செல்வராணி தலைமை வகித்தார். மதுரை ராமகிருஷ்ண மடத்தை சேர்ந்த மத் சுவாமி தத்பிரபானந்த மகாராஜ் விவேகானந்தரின் வாழ்வியல் கொள்கைகள் குறித்து மாணவிகளுக்கு விளக்கினார். சாரதா நிகேதன் டிராஸ்ட் நிர்வாகிகள் மாதாஜி சுந்தரிஅம்மா, சகோதரி ஷாலினி, தேவகோட்டை இமயம் சரவணன் உள்பட பலர் கலந்து கொண்டனர். பரதநாட்டியம், பேச்சுப்போட்டி, நடிப்பு, சமையல், நாடகம் உள்பட பல்வேறு போட்டிகள் நடத்தப்பட்டு பரிசு வழங்கப்பட்டது. கலாச்சார மன்ற ஒருங்கிணைப்பாளர் சிவசங்கரிரம்யா நன்றி கூறினார்.காலமுறை ஊதியம் வழங்க வேண்டும்

பாகம்பிரியாள் கோயிலில் பிப்.22ல் கும்பாபிஷேகம்

சிவகங்கை, பிப்.14: சிவகங்கை அருகே திருமலையிலுள்ள பாகம்பிரியாள், மலைக்கொழுந்தீஸ்வரர் கோவிலில் கும்பாபிஷேகம் நடந்தது.சிவகங்கையில் சிவகங்கை சமஸ்தானம், தேவஸ்தானத்திற்குட்பட்ட பாகம்பிரியாள், மலைக்கொழுந்தீஸ்வரர் கோவில் உள்ளது. குடவரைக்கோவிலையும் கொண்டுள்ள இக்கோவில் பல நூற்றாண்டு வரலாற்று பாரம்பரியம் மிக்கது. இக்கோவிலில் கும்பாபிஷேகம் செய்வதற்கான கோவில் பராமரிப்பு பணிகள் கடந்த ஓர் ஆண்டுக்கும் மேலாக நடந்து வந்த நிலையில் தற்போது அனைத்து பணிகளும் முடிவடைந்துள்ளது.பிப்.18 காலை 10மணிக்கு அனுக்ஞை, கணபதி ஹோமத்துடன் கும்பாபிஷேகப் பணிகள் தொடங்குகின்றன. பிப்.20, மாலை 3 மணி முதல் வாஸ்து சாந்தி, முதல் கால யாகபூஜை நடக்கிறது. பிப்.21, காலை.8.45 மணிக்கு விசேஷசந்தி, இரண்டாம் கால யாகபூஜை, மூன்றாம் கால யாகபூஜை நடக்கிறது. பிப்.22, காலை 8.45மணி முதல் 9.45மணிக்குள் மகா கும்பாபிஷேகம் நடக்க உள்ளது. கும்பாபிஷேகத்திற்கான ஏற்பாட்டு பணிகளை விழாக்குழுவினர் மற்றும் கிராமத்தினர் செய்து வருகின்றனர்.

திமுக ஊராட்சி சபைக் கூட்டம்

சிவகங்கை, பிப். 14: திருப்புவனம் கிழக்கு, மேற்கு ஒன்றிய திமுக சார்பில் மடப்புரம், பூவந்தி, பாப்பாகுடி, ஏனாதி, கணக்கன்குடி, பெத்தானேந்தல், கானூர், மழவராயனேந்தல், திருப்பாச்சேதி, லாடனேந்தல் ஆகிய ஊராட்சிகளில் திமுக சார்பில் ஊராட்சி சபைக் கூட்டம் நடைபெற்றது. இந்த கூட்டங்களில் ஒன்றியச் செயலாளர்கள் கடம்பசாமி, வசந்தி சேங்கைமாறன் தலைமை வகித்தனர் சிவகங்கை மக்களவை தொகுதி பொறுப்பாளர் பொன்.முத்துராமலிங்கம், மாவட்ட துணைச்செயலாளர் சேங்கைமாறன் மனுக்களை பெற்றனர்.இதில் சாலை, குடிநீர், பஸ், கண்மாய் மராமத்து, முதியோர் உதவித்தொகை கோரி விடுத்திருந்தனர். முதியோர் தொகை நிறுத்தப்பட்டவர்களுக்கும் புதிதாக மனு செய்தவர்களுக்கும் வழங்க நடவடிக்கை எடுக்க வேண்டும் என்பது உள்ளிட்ட பல்வேறு கோரிக்கை மனுக்களை கிராம மக்கள் அளித்திருந்தனர்.இந்நிகழ்ச்சியில் திருப்புவனம் நகர் செயலாளர் நாகூர்கனி, மாவட்ட பிரதிநிதிகள் ராமலிங்கம், ஈஸ்வரன், பிரகாஸ், மாவட்ட இளைஞரணி துணை அமைப்பாளர் பொற்கோ, மீனவரணி அமைப்பாளர் அண்ணாமலை, ஒன்றிய இளைஞரணி அமைப்பாளர்கள் அறிவுக்கரசு, தேவதாஸ், ஒன்றிய நிர்வாகிகள் மகேந்திரன், கெங்குராமன், சேதுபாண்டியன் மற்றும் ஏராளமானோர் கலந்து கொண்டனர்.

மானாமதுரையில் முதியோரைஅலைக்கழிக்கும் தேசியமயமாக்கப்பட்ட வங்கி

மானாமதுரை, பிப்.14: மானாமதுரையில் உள்ள தேசியமயமாக்கப்பட்ட வங்கியில் முதியோர்களுக்கு உரிய தகவல்களை அளிக்காமல் அலைக்கழிப்பதாகவும், வங்கி கணக்கு புத்தகத்தை கூட வரவு வைத்து கொடுக்காமல் மெத்தனமாக இருப்பதாக புகார் எழுந்துள்ளது.மானாமதுரை நகரில் பத்துக்கும் மேற்பட்ட வங்கிகள் உள்ளன. இவற்றில் தேசியமயமாக்கப்பட்ட வங்கிகளில் முதியோர்களுக்கு ஓய்வூதியம், அரசு உதவித்தொகை உள்ளிட்டவைகள் வழங்கப்படுகின்றன.பணமதிப்பு இழப்பு பிரச்னைக்குப்பின் ஏடிஎம் மையங்கள் பூட்டியநிலையில் இருப்பதால் முதியோர்கள் ஓய்வூதியத் தொகையை பெற வங்கிகளுக்கு நேரில் செல்ல வேண்டிய நிலை இருப்பதால் வங்கிகளில் மணிக்கணக்கில் காத்துக் கிடக்கின்றனர். வங்கிகளில் முதியோருக்கு தனி இருக்கைகள் இல்லை. இதனால் தரையில் அமரவேண்டிய நிலை உள்ளது. பணம் பெறுவது, வங்கிக்கணக்கு புத்தகத்தை பணம் எவ்வளவு இருக்கிறது என்று தெரிந்து கொள்வதற்கும், புத்தகத்தை வரவு செலவு பரிவர்த்தனைகளை பதிவு தொடர்பாக எந்தவித உதவியும் செய்ய மறுப்பதாக புகார் எழுந்துள்ளது.இதுகுறித்து சரவணக்குமார் கூறுகையில், `` வங்கியில் எங்களுக்கு என தனியாக வரிசை இல்லை. மேலும் அமருவதற்கு இருக்கை இல்லை. பணப்பரிவர்த்தனை தொடர்பாக கணக்கு புத்தகங்களில் வரவு வைத்து கொடுக்குமாறு கேட்டால் அலட்சியமாக பேசுகிறார்கள். எனவே, தேசியமயமாக்கப்பட்ட வங்கிகளில் முதியோர்களுக்கு உதவ உதவியாளர்களை நியமிக்க வங்கி நிர்வாகங்கள் முன்வரவேண்டும்’’ என்றார்.

சிவகங்கையில் நாளை வேலை வாய்ப்பு முகாம்

சிவகங்கை, பிப். 14: சிவகங்கை மாவட்ட வேலைவாய்ப்பு அலுவலகத்தில் நாளை தனியார் வேலைவாய்ப்பு முகாம் நடக்க உள்ளது.மாவட்ட வேலைவாய்ப்பு அலுவலர் மணிகணேஷ் தெரிவித்ததாவது: வேலைவாய்ப்பற்ற இளைஞர்களின் வேலைவாய்ப்பு மற்றும் வாழ்வாதாரத்தை மேம்படுத்தும் பொருட்டு ஒவ்வொரு வெள்ளிக் கிழமையும் “வேலைவாய்ப்பு வெள்ளி” என்ற தலைப்பின் கீழ் தனியார்துறை வேலைவாய்ப்பு முகாம் சிவகங்கை மாவட்ட வேலைவாய்ப்பு அலுவலகத்தில் நடைபெற்று வருகிறது. அதன் அடிப்படையில் நாளை, காலை 10 மணி அளவில் சிவகங்கை மாவட்ட வேலைவாய்ப்பு அலுவலக வளாகத்தில் தனியார் நிறுவனம் பங்கேற்று பத்தாம் வகுப்பு முதல் பட்டப்படிப்பு மற்றும் ஐடிஐ, டிப்ளமோ படித்த பணியாளர்களை தேர்வு செய்ய உள்ளனர்.பயிற்சியின் போது உதவித்தொகை மற்றும் இதர சலுகைகளும் வழங்கப்படும். விருப்பமுள்ளவர்கள் தங்களது கல்விச்சான்று, குடும்ப அட்டை, வேலைவாய்ப்பு அடையாள அட்டை, ஆதார் அட்டை ஆகியவற்றுடன் இம்முகாமில் கலந்து கொண்டு பயன்பெறலாம். முகாமில் பணிவாய்ப்பு பெறுவோருக்கு வேலைவாய்ப்பு அலுவலக பதிவு மூப்பு ரத்து செய்யப்படமாட்டது. இவ்வாறு தெரிவித்தார்.

மாவட்டத்தில் சப்இன்ஸ்பெக்டர்கள் இடமாற்றம்

சிவகங்கை, பிப். 14: சிவகங்கை மாவட்டத்தில் பணிபுரியும் 5 எஸ்ஐக்களை வேறு இடங்களுக்கு பணியிடமாறுதல் செய்து எஸ்பி ஜெயச்சந்திரன் உத்தரவிட்டுள்ளார்.சிவகங்கை டவுன் போலீஸ் ஸ்டேசனில் பணிபுரிந்த எஸ்ஐ பூமிநாதன் மாவட்ட குற்ற பதிவேடுகள் (சிசிடிஎன்எஸ்) பிரிவிற்கு மாறுதல் செய்யப்பட்டார். சிவகங்கை தாலுகா போலீஸ் ஸ்டேசனில் எஸ்ஐயாக பணிபுரிந்த முத்துப்பாலு, நெகுப்பை போலீஸ் ஸ்டேசனில் எஸ்ஐ.யாக பணிபுரிந்த சக்திவேல், திருப்பத்தூர் போலீஸ் ஸ்டேசனில் எஸ்ஐயாக பணிபுரிந்த சண்முகம், காளையார்கோவில் போலீஸ் ஸ்டேசனில் எஸ்ஐயாக பணிபுரிந்த பாண்டியன் ஆகிய நால்வரும் சிவகங்கை மாவட்ட தனிப்பிரிவிற்கு மாறுதல் செய்யப்பட்டனர்.

முறையான தகவல் தெரிவிக்காமல் உலகத்திறனாய்வு விளையாட்டு போட்டி

சிவகங்கை, பிப்.14: சிவகங்கை மாவட்டத்தில் உலகத்திறன் மிக்க விளையாட்டு வீரர்களை கண்டறியும் பொருட்டு ஆறு முதல் 8ம் வகுப்பு வரை படிக்கும் மாணவ, மாணவிகளுக்கு தமிழ்நாடு விளையாட்டு மேம்பாட்டு ஆணையம் சார்பில் தடகள போட்டிகள் நடந்தன. பிப்.12ல் தேவகோட்டை கல்வி மாவட்டத்திற்கு காரைக்குடி அழகப்பா உடற்கல்வியியல் கல்லூரியிலும், பிப்.13ல் சிவகங்கை கல்வி மாவட்ட மாணவர்களுக்கு சிவகங்கையில் உள்ள மாவட்ட திறந்தவெளி விளையாட்டரங்கிலும், போட்டிகள் நடந்தன. 100மீ, 200மீ, 400மீ ஓட்டம், நீளம் தாண்டுதல், உயரம் தாண்டுதல், குண்டு எறிதல் ஆகிய தடகள போட்டிகள் இதில் இடம் பெற்றன.இந்நிலையில் இந்த போட்டிகள் நடைபெறவது குறித்து பள்ளிகளுக்கு சுற்றறிக்கை அனுப்ப வில்லை.இதனால் போட்டிகள் நடைபெறுவதே பள்ளி தலைமையாசிரியர், ஆசிரியர்களுக்கு தெரியவில்லை. இதனால் மிகக்குறைவான எண்ணிக்கையிலான பள்ளிகள் மட்டுமே போட்டிகளில் பங்கேற்றுள்ளன. ஆசிரியர்கள் கூறியதாவது: போட்டிக்கான சரியான தகவல் சுற்றறிக்கை மூலம் பள்ளிகளுக்கு அனுப்ப வேண்டும் என விதிமுறை உள்ளது. ஆனால் பத்திரிக்கை செய்தியை மட்டுமே வைத்து போட்டியில் பங்கேற்க வேண்டிய நிலை உள்ளது. ஒரு மாணவர் இரண்டு போட்டிகளில் பங்கேற்கலாம் என விதிமுறை இருந்தது. ஆனால் ஒரு போட்டியில் மட்டுமே பங்கேற்க அனுமதிக்கப்பட்டனர். மாணவர்கள் பல்வேறு போட்டிகளில் பங்களிப்பு செய்ய தயார் படுத்தியிருப்போம். ஆனால் ஒரு போட்டியில் தான் பங்கேற்க வேண்டும் என போட்டி நடைபெறும் நாளுக்கு முதல் நாள் தெரிவிக்கின்றனர். இதனால் குழப்பம் ஏற்படுகிறது. இதுபோல் முன்பு ஆண்களுக்கு 800 மீ, பெண்களுக்கு 600 மீ ஓட்டம் நடத்தப்பட்டது. ஆனால் கடந்த ஆண்டும் தற்போதும் ஆண் மற்றும் பெண்கள் இருவருக்குமே 400மீ ஓட்டம் மட்டுமே நடத்தப்பட்டது. சரியான தகவல் இல்லாமல் குறிப்பிட்ட பள்ளிகளுக்கு மட்டுமே தகவல் தெரிவிக்கப்படுகிறது. அதனால் அப்பள்ளி மாணவர் மட்டுமே அதிகப்படியான போட்டியில் வெற்றி பெற்றது போல் தோற்றத்தை உருவாக்குகின்றனர். அரசு அதிகாரிகளே இதுபோல் செய்து அரசு, அரசு உதவிபெறும் பள்ளிகளை புறக்கணிப்பது கண்டிக்கத்தக்கது என்றனர்.

மக்கள் குறைதீர்க்கும் கூட்டங்களில் மனு கொடுத்தால் அதிகாரிகள் யாரும் கண்டு கொள்வதில்லை பொதுமக்கள் குற்றச்சாட்டு

சிவகங்கை, பிப்.14: சிவகங்கை மாவட்டத்தில் பல்வேறு பெயர்களில் குறைதீர் மனுக்கள் பெறும் கூட்டம் நடத்தினாலும் குறைகள் பெரும்பாலும் தீர்க்கப்படாத நிலையே காணப்படுகிறது.வாரந்தோறும் திங்கள் கிழமை கலெக்டர் அலுவலகத்தில் குறைதீர் கூட்டம் நடத்தப்படுகிறது. இவை தவிர அதிமுக அமைச்சர்கள் கலந்துகொள்ளும் விழாக்களிலும் பொதுமக்களை அழைத்து வந்து மனுக்கள் வாங்குகின்றனர். அவ்வப்போது அம்மா திட்ட முகாம் நடத்தப்படுகிறது. திங்கள் கிழமை கலெக்டர் அலுவலகத்தில் நடக்கும் குறைதீர் கூட்டத்தில் காலை 10 மணியிலிருந்து மதியம் வரை சுமார் 300க்கும் மேற்பட்ட கோரிக்கை மனுக்கள் பெறப்படுகிறது. அமைச்சர்கள் கலந்துகொள்ளும் நிகழ்ச்சிகளிலும் நூற்றுக்கணக்கான மனுக்கள் பெறப்படுகின்றன. கோடைகாலத்தில் குடிநீர் கிடைக்காமல் கிராமம் கிராமமாக அலைவது, உப்பு நீரை குடிப்பது, சுத்திகரிக்கப்படாத ஆழ்குழாய் போர்வெல் நீரை குடிப்பது என குடிநீர் கிடைக்காமல் ஏராளமான கிராமத்தினர் அவதியடைவதாக மனுக்கள் அளிக்கப்படுகிறது.இந்த குடிநீரும் கிடைக்காமல் ஆற்றுக்குள் பள்ளம் தோண்டி பல மணி நேரம் காத்திருந்து குடிநீர் எடுக்கும் கிராமத்தினரும் தங்கள் பிரச்னைக்கு தீர்வுகான காத்திருக்கின்றனர். சாலை வசதி, கண்மாய், கால்வாய், அரசு இடம் ஆக்கிரமிப்பு, சுடுகாடு பாதை ஆக்கிரமிப்பு, சுடுகாட்டிற்கு பட்டா போட்டு எடுத்துக்கொண்ட தனியார் என பல்வேறு பொதுக்குறைகளை சரிசெய்ய மனு அளிக்கின்றனர்.தனிநபர் பிரச்னைகளான முதியோர், விதவை, மாற்றுத்திறனாளி உதவித்தொகை, ரேசன் கார்டு வழங்க வேண்டும் என கோரிக்கை வைத்தும் மனு அளிக்கின்றனர். ஆனால் எத்தனையோ முறை மனு அளித்தும் குடிநீர் பிரச்னைகள் அனைத்தும் தீர்க்கப்படாமல் அப்படியே உள்ளன. இடம் ஆக்கிரமிப்பு குறித்த மனுக்களை வருவாய்த்துறையினர் கண்டுகொள்வதில்லை. அளிக்கப்படும் மனுக்களில் பெரும்பாலான மனுக்கள் ஏற்கனவே எந்த அலுவலகத்தில் தீர்வு கிடைக்காமல் உயர் அலுவலகத்தில் வந்தார்களோ அதே அலுவலகத்திற்கு அனுப்பப்படுகிறது. மனு கொடுத்து, மனு கொடுத்து அலையும் மக்களுக்கு ஏமாற்றமே மிஞ்சியுள்ளது.அரசியல் கட்சி பிரமுகர் ஒருவர் கூறியதாவது: மக்களின் பொதுப்பிரச்னைகளுக்காக மனு கொடுத்தால் எதையும் கண்டுகொள்வதில்லை. குடிநீர் பிரச்னையால் சிவகங்கை மாவட்டத்தில் உள்ள ஏராளமான கிராமத்தினர் கடுமையாக பாதிக்கப்பட்டுள்ளனர். இது குறித்து புகார் அளித்தால் அங்கு சென்று பார்ப்பது கூட கிடையாது. ஆழ் குழாய் குடிநீருடன் சுத்திகரிப்பு உபகரணங்கள் அமைக்காமல் அந்த நீரை குடித்தால் உடல் பாதிப்புகள் ஏற்படுகிறது. ஆனால் அது குறித்தும் கண்டுகொள்வதில்லை. இடஆக்கிரமிப்பு நடவடிக்கையில் வருவாய்த் துறையினருக்கும் பங்கு இருப்பதால் அவர்கள் கண்டும் காணாமல் உள்ளனர். மாவட்ட நிர்வாகத்திடம் அளித்த மனுக்களுக்கு உருப்படியாக தீர்வு காணும் நடவடிக்கையில் ஈடுபட வேண்டும் என்றார்.

திருப்புவனம் அருகே புவி வெப்பமாதல் கருத்தரங்கம்

திருப்புவனம், பிப். 13: திருப்புவனம் அருகே சிவகங்கை ரோட்டில் அரசனூரில் உள்ள பிரிஸ்ட் பல்கலைக்கழகத்தில் புவி வெப்பமயமாதலை தவிர்ப்பது குறித்து அறிவியல் விழிப்புணர்வு நிகழ்ச்சி நடந்தது. மாணவ, மாணவிகள் மற்றும் மக்களுக்கு விழிப்புணர்வு ஏற்படுத்தும் வகையில் இந்த அறிவியல் விழா நேற்று தொடங்கியது.விழாவில் இலவச இயற்கை வேளாண்மை பயிற்சி மற்றும் அறிவியல் கண்காட்சி என பல்வேறு நிகழ்வுகள் 12ம் தேதி முதல் 16ம் தேதி வரை ஐந்து நாட்கள் நடக்கிறது. துவக்க விழாவிற்கு தஞ்சாவூர் பிரிஸ்ட் பல்கலைக்கழக வேந்தர் முருகேசன் தலைமை வகித்தார். பிரிஸ்ட் பல்கலைக்கழக மதுரை வளாக இயக்குநர் கோயில்தாசன் மனோகரன் வரவேற்றார். மதுரை காமராஜர் பல்கலைக்கழக துணைவேந்தர் கிருஷ்ணன் துவக்கி  வைத்து வாழ்வியல் சூழல் குறித்த கருத்தரங்கின் ஆய்வில் பயிற்சி கையேட்டை   வெளியிட்டார். அழகப்பா உயிரியல் துறைத்தலைவர் கருத்தப் பாண்டியன் பெற்றுக்கண்டார். சட்டக் கல்லூரி இயக்குநர் சீனிவாசன் நன்றி கூறினார். மதுரை அரவிந்த் கண் மருத்துவமனை சுந்தரேசன் உட்பட பலர் பங்கேற்றனர்.

கண்டுகொள்ளாத மாத்துக்கண்மாய் தார்ச்சாலை

காளையார்கோவில், பிப். 13: காளயார்கோவில் அருகில் காளக்கண்மாய் ஊராட்சிக்கு உட்பட்ட மாத்துக்கண்மாய், முடுக்கூரணி மற்றும் அதனைச் சுற்றியுள்ள கிராமங்களுக்குச் செல்லும் தார்ச்சாலை மிகவும் மோசமான நிலையில் உள்ளதாக அப்பகுதி மக்கள் கூறுகின்றனர்.காளையார்கோவில் அருகில் ஆண்டிச்சியூரணி வழியாகச் செல்லும் காளக்கண்மாய் ஊராட்சிக்கு உட்பட்ட மாத்துக்கண்மாய், முடுக்கூரணி, கல்லுவலி மற்றும் அதனைச் சுற்றியுள்ள கிரமங்களுக்குச் செல்லும் தார்ச்சாலை மிகவும் மோசமான நிலையில் உள்ளது. இப்பகுதியில் அதிகளவு விவசாயம் செய்து வருகின்றனர். மேலும் விவசாயத்திற்குத் தேவையான இடு பொருட்கள், பள்ளிக்கூடம், மருத்துவமனை போன்ற அனைத்துத் தேவைகளுக்கும் இச்சாலையை அதிகளவு பகுதி மக்கள் பயன்படுத்தி வருகின்றனர். இருசக்கர வாகனங்கள் கூட செல்ல முடியாத அளவிற்கு மகவும் மோசமான நிலையில் உள்ள இச்சாலையில் அடிக்கடி விபத்துகள் ஏற்படுகின்றன.மேலும் கிராமங்கள் நிறைந்த அப்பகுதியில் பிரசவம், விபத்து மற்றும் அவசர தேவைகளுக்கு வாடகை கார், ஆட்டோ, போன்ற வாகனங்கள் வருவதற்கு தயக்கம் அடைகின்றனர். தற்போது அப்பகுதியில் இயங்கி வந்த மினிபஸ் ரோடு பள்ளம் மேடாக உள்ளதால் அடிக்கடி பழுது ஏற்படுகின்றது. இதனால் அப்குதியில் வருவதில்லை இதனால் இருசக்கர வாகனம் இருந்தால் மட்டுமே தங்கள் தேவைகளை பூர்த்தி செய்து கொள்ளும் நிலையில் அப்பகுதி கிராமமக்கள் உள்ளனர். எனவே அப்பகுதிக்குச் செல்லும் தார்ச்சாலையை தரமான சாலையாக அமைத்து தரவேண்டும் என்று பகுதி மக்கள் கோரிக்கை விடுத்துள்ளனர்.அப்பகுதியைச் சேர்ந்த மைக்கில் கூறுகையில், ‘ஆண்டிச்சியூரணியில் இருந்து முடுக்கூரணி, மாத்துக்கண்மாய், கருங்குளம் வரையில் உள்ள கிராமபொது மக்கள் அதிகளவு இச்சாலையைப் பயன்படுத்துகின்றனர் அடிக்கடி விபத்துக்கள் ஏற்படும். பலமுறை அதிகாரிகளிடமும் அரசியல் வாதிகளிடமும் புகார் அளித்துள்ளோம் எந்த நடவடிக்கையும் இல்லை சில வருடங்களுக்கு முன்பு போடப்பட்ட இச்சாலை சில மாதங்களிலே குண்டும் குழியுமாக மாறிவிட்டன. இதுவரைக்கும் எந்த மராமரத்துப் பணியும் நடக்கவில்லை’ என்றார்.

பள்ளி ஆசிரியர் மீது தாக்குதல் ஒருவர் கைது

காரைக்குடி, பிப். 13: காரைக்குடி பர்மா காலனி அவ்வையார் தெருவைச் சேர்ந்தவர் சுப்பிரமணியன் (49) இவர் ஆலங்குடியார் வீதி நகராட்சி துவக்கப்பள்ளியில் ஆசிரியராக பணியாற்றி வருகிறார். நேற்று மதியம்  காலவாய்பொட்டல் கக்கன் தெருவைச் சேர்ந்த மெய்யர் மகன் சேது (18), கணேசபுரத்தைச் சேர்ந்த ரவி மகன் ஹிரிஹரன் (18) ஆகியோர் பள்ளிசுற்றுச்சுவரில் போஸ்டர் ஒட்டினர். இதை சுப்பிரமணியன் தட்டிக்கேட்டார்.இதனால் ஆத்திரமடைந்த இருவரும் பள்ளியிள் உள்ளே நுழைந்து தரக்குறைவாக பேசி சுப்பிரமணியனை தாக்கினர். இதுகுறித்து சுப்பிரமணியன் காரைக்குடி தெற்கு போலீசில் கொடுத்த புகாரின் பேரில் போலீசார் வழக்குப்பதிந்து சேதுவை கைது செய்தனர். தலைமறைவான ஹரிஹரனை தேடி வருகின்றனர்.

கிட் அண்டு கிம் பொறியியல் கல்லூரியில் அழகப்ப செட்டியார் கல்லூரி முன்னாள் மாணவர்கள் சந்திப்பு

காரைக்குடி, பிப். 13: காரைக்குடி கிட் அண்டு கிம் பொறியியல் மற்றும் மேலாண்மை கல்லூரி வளாகத்தில் அழகப்ப செட்டியார் அரசு பொறியியல் கல்லூரியில் 1964-1969ல் படித்த முன்னாள் மாணவர்கள் சந்திப்பு நிகழ்ச்சி நடந்தது.கிட் அண்டு கிம் கல்லூரி இயக்குநர் அண்ணாமலை வரவேற்றார். கல்வி குழும தலைவர் அய்யப்பன் தலைமை வகித்தார். கலெக்டர் ஜெயகாந்தன் விழாவை துவக்கி வைத்தார். அழகப்ப செட்டியார் பொறியியல் கல்லூரி முதல்வர் இளங்கோ, முன்னாள் மாணவர்கள் சங்க தலைவர் ஜோதிகுமார், செயலாளர் அபுபக்கர், கல்லூரி ஆலோசகர் கலியமூர்த்தி, முதல்வர் மாரிமுத்து உள்பட பலர் கலந்து கொண்டனர்.

இறந்த விவசாயிகள் குடும்பத்திற்கு இழப்பீடு பெற்றுத்தர நடவடிக்கை இல்லை

சிவகங்கை, பிப். 13: சிவகங்கை மாவட்டத்தில் 2016-17ல் வறட்சியால் பயிர்கள் பாதிக்கப்பட்ட அதிர்ச்சியில் இறந்த விவசாயிகள் குடும்பத்திற்கு இதுவரை இழப்பீடு பெற்றுத்தர நடவடிக்கை இல்லையென குற்றச்சாட்டு எழுந்துள்ளது.மாவட்டத்தில் வடகிழக்கு பருவமழை காலத்தில் அதிகப்படியாக விவசாயம் செய்யப்படும் நெல் பயிரே, பிரதான விவசாய பியிராக உள்ளது. கடந்த 2016ம் ஆண்டு தென்மேற்கு பருவமழை காலத்தில் லேசான மழை மட்டுமே இருந்தது. வட கிழக்கு பருவமழை காலத்தில் சில இடங்களில் பெய்த கனமழையை நம்பி உழுவது, விதைப்பு உள்ளிட்ட முதற்கட்ட பணிகளை செய்த விவசாயிகள் பின்னர் மழை இல்லாததால் கடுமையாக பாதிக்கப்பட்டனர்.விதைப்பு செய்த பயிர்கள் பல இடங்களில் முளைக்காமலேயே போனது. முளைத்த பயிர்கள் கருகி கால்நடைகளுக்கு இரையானது. மாவட்டம் முழுவதும் சில பகுதிகள் கூட விளையாமல் 64 ஆயிரம் எக்டேரில் சாகுபடி செய்யப்பட்ட அனைத்து பயிர்களும் கருகி முழுமையான வறட்சி பாதிப்பு ஏற்பட்டது. வறட்சியால் பயிர்கள் கருகியதை தாங்க முடியாத அதிர்ச்சியில் 2016 மற்றும் 2017ம் ஆண்டு தொடக்கத்தில் மானாமதுரை அருகே கணபதியேந்தல் கருப்பையா, காளையார்கோவில் அருகே நெடுங்குளம் முடியப்பன் (75), இளையான்குடி அருகே தெற்குசமுத்திரம் பஞ்சவர்ணம் (60), முனைவென்றி செல்வக்குமார் (41), துகவூர் சுப்பிரமணியன் (70) ஆகிய ஐந்து விவசாயிகள் மரணமடைந்தனர்.இது வரை இறந்த விவசாயிகள் குடும்பத்திற்கு இழப்பீடு எதுவும் வழங்கப்படவில்லை. தமிழ்நாடு விவசாயிகள் சங்க நிர்வாகிகள் கூறுகையில், ‘பயிர் கருகியதால் அதிர்ச்சியால் இறந்த விவசாயிகளின் குடும்பங்களுக்கு உரிய இழப்பீடு வழங்க வேண்டும் என தொடர்ந்து கோரிக்கை மனு அளிக்கப்பட்டது. ஆனால் இரண்டு ஆண்டிற்கு மேல் ஆன நிலையிலும் இதுவரை எந்த நடவடிக்கையும் இல்லை. இறந்தவர்கள் குடும்பங்களுக்கு உரிய இழப்பீடு வழங்க நடவடிக்கை எடுக்க வேண்டும்’ என்றனர்.