Sivagangai - Dinakaran

செவிலியர் தின விழா

காரைக்குடி, மே 19: காரை க்குடி காவேரி மருத்துவமனை மற்றும் இந்திய மருத்துவகழகம் காரைக்குடி கிளை சார்பில் செவிலியர் தினம் கொண்டாப்பட்டது. காவேரி மருத்துவமனை செயல் இயக்குநர் டாக்டர் சலீம் வரவேற்றார். மாவட்ட மருத்துவ இணை இயக்குநர் இளங்கோமகேஸ்வரன் தலைமை வகித்து பேசுகையில், செவிலியர்கள் தான் ஒவ்வொரு மருத்துவமனையின் தூண்கள். பல்வேறு பிரச்சனைகளுக்கு மத்தியிலும் இரவு, பகல் பாராமல் நோயாளிகளுக்கு சிறந்த முறையில் செவிலியர்களே சிகிச்சை அளிக்கின்றனர் என பேசினார். பின்னர் கலைநிகழ்ச்சிகள் நடத்தப்பட்டது. இந்திய மருத்துவ கழக காரைக்குடி கிளை பொருளாளர் டாக்டர் சந்திரமோகன் உள்பட பலர் கலந்து கொண்டனர். காவேரி மருத்துவமனை நிர்வாகி டாக்டர் காமாட்சி சந்திரன் நன்றி கூறினார்.

மானாமதுரையில் கார் மோதி காவலாளி பலி

மானாமதுரை, மே 19: நான்குவழிச்சாலையை கடக்க முயன்ற காவலாளி கார் மோதி பலியானார். மானாமதுரை கேப்பர்பட்டினம் பகுதியை சேர்ந்தவர் ஜெயராஜ்(60). இவர் புதுபஸ்ஸ்டாண்டு அருகே உள்ள தனியார் கடையில் காவலாளியாக பணிபுரிந்தார். நேற்று அதிகாலை புதுபஸ்ஸ்டாண்டில் உள்ள டீக்கடையில் டீகுடித்துவிட்டு மீண்டும் தான் வேலை பார்க்கும் கடைக்கு செல்வதற்காக சைக்கிளில் மதுரை-ராமேஸ்வரம் நான்குவழிச்சாலையை கடக்க முயன்றார். அப்போது மதுரையில் இருந்து ராமேஸ்வரம் நோக்கி சென்ற கார் அவர் மீது மோதியது. இதில் அவர் சம்பவ இடத்திலேயே இறந்தார். புகாரின்பேரில் மானாமதுரை போலீசார் வழக்குபதிவு செய்து கார் டிரைவர் நாமக்கல் டவுனை சேர்ந்த பாண்டியை(36) கைது செய்தனர்.

நாட்டரசன்கோட்டை கண்ணுடையநாயகி கோயில் தேரோட்டம்

சிவகங்கை, மே 19: சிவகங்கை அருகே நாட்டரசன்கோட்டை கண்ணுடையநாயகி அம்மன் கோயில் வைகாசி விசாக திருவிழா தேரோட்டம் நேற்று நடந்தது. நாட்டரசன்கோட்டையில் சிவகங்கை தேவஸ்தானம் சமஸ்தானத்திற்குட்பட்ட பிரசித்தி பெற்ற கண்ணுடையநாயகி அம்மன் கோயில் உள்ளது. இங்கு ஆண்டுதோறும் வைகாசி மாதம் விசாக திருவிழா 10நாட்கள் விமரிசையாக நடைபெறும். இந்த ஆண்டு மே 10ம் தேதி காலை கொடியேற்றம் மற்றும் காப்பு கட்டுதல் நிகழ்ச்சியுடன் விழா தொடங்கியது. விழாவின் 7ம் திருநாள் இரவு தங்கரதம், 8ம் திருநாள் இரவு வெள்ளிரத நிகழ்ச்சி நடந்தது. 9ம் திருநாளான நேற்று காலை 10.30மணிக்கு மேல் தேரோட்ட நிகழ்ச்சி நடந்தது. தேரோடும் வீதியில் ஆயிரக்கணக்கான பக்தர்கள் தேரை வடம்பிடித்து இழுத்து வந்தனர். சுமார் ஒரு மணியளவில் தேர் நிலையை வந்தடைந்தது. பத்து நாட்கள் நடைபெறும் திருவிழா இன்றுடன் நிறைவடைகிறது. தினந்தோறும் பல்வேறு அலங்காரங்களில் அம்மன் காட்சியளித்தல், முயல் குத்துதல் மற்றும் கலை நிகழ்ச்சிகளும் நடைபெற்றன. விழாவுக்கான ஏற்பாடுகளை விழாவுக்கான ஏற்பாடுகளை சிவகங்கை தேவஸ்தான சமஸ்தான நிர்வாகிகள் மற்றும் விழாக்குழுவினர் செய்தனர்.

ஊரணியை தூர்வார கோரிக்கை

சிங்கம்புணரி, மே 19: சிங்கம்புணரி அருகே மதுராபுரி ஊராட்சிக்கு உட்பட்ட பால்குண்டு குடிநீர் ஊரணி உள்ளது. இந்த குடிதண்ணீர் ஊரணி ஐநூத்திப்பட்டி, வேங்கைபட்டி, மதுராபுரி, உள்ளிட்ட 10க்கும் மேற்பட்ட கிராம மக்கள் குடிநீர் தேவைக்கு பயன்படுத்தி வந்தனர். மேலும் இப்பகுதியில் நிலத்தடி நீர்மட்டம் உயர இந்த ஊரணி முக்கிய பங்கு வகிக்கிறது. தற்போது இந்த ஊரணியில் தண்ணீர் வற்றியுள்ளதால் சேறும், சகதியுமாக உள்ளது. கடந்த 10 ஆண்டுகளுக்கும் மேலாக தூர்வாரப்படாமல் உள்ளதால் நீர் தேக்கக்கூடிய பரப்பு சுறுங்கி வருகிறது.  இந்த ஊரணியை தூர்வார ஒன்றிய நிர்வாகம் உரிய நடவடிக்கை எடுக்க வேண்டுமென அப்பகுதி மக்கள் கோரிக்கை விடுத்துள்ளனர்.

போதிய குடிநீர் வழங்கக்கோரி மனு

சிவகங்கை, மே 17: சிவகங்கை நகரில் போதிய குடிநீர் வழங்க வேண்டும் ஏஐடியுசி சார்பில்  நகராட்சி நிர்வாகத்திடம் வலியுறுத்தப்பட்டுள்ளது. இதுகுறித்து ஏஐடியுசி சார்பில் அளிக்கப்பட்டுள்ள மனுவில் கூறியிருப்பதாவது:சிவகங்கை நகரில் நகராட்சி நிர்வாகத்தால் அமைக்கப்பட்டுள்ள நீர் வழங்கும் குழாய்கள் பழுது காரணமாக நீர் சரிவர கிடைப்பதில்லை. காவிரி கூட்டுக்குடிநீர் திட்டம் மூலம் வழங்கப்படும் நீரும் முறையாக விநியோகம் செய்யப்படுவதில்லை. கோடை காலமான தற்போது பொதுமக்கள் போதிய நீரின்றி கடும் அவதியடைந்து வருகின்றனர். குழாய்கள் பழுதையும், குடிநீர் விநியோகத்தையும் சரி செய்ய நடவடிக்கை எடுக்க வேண்டும். மேலும் வார்டுகளில் அமைக்கப்பட்டு பழுதாகி செயல்படாமல் உள்ள சிறு மின் விசை பம்புகளை(சின்டெக்ஸ் குடிநீர் தொட்டி) சரி செய்ய வேண்டும். இதற்கான போதிய நடவடிக்கைகளை மாவட்ட நிர்வாகம், நகராட்சி நிர்வாகம் எடுக்க வேண்டும். இவ்வாறு மனுவில் தெரிவிக்கப்பட்டுள்ளது.

பணி நியமன ஆணை வழங்கும் விழா

காரைக்குடி, மே 17: காரைக்குடி அழகப்பா பல்கலைக்கழக மேலாண்மை நிறுவனத்தில் எம்.பி.ஏ. இறுதியாண்டு மாணவர்களுக்கான வளாக நேர்காணல் தேர்வு தனியார் நிறுவனங்கள் மற்றும் வங்கிகள் சார்பில் நடத்தப்பட்டது. இதில் 59 மாணவ, மாணவிகள் தேர்வு செய்யப்பட்டனர். இவர்களுக்கு பணி நியமன ஆணையை பல்கலைக்கழக துணைவேந்தர் ராஜேந்திரன் வழங்கினார். மேலாண்மை நிறுவன இயக்குநர் ராஜமோகன், பதிவாளர் குருமல்லேஷ் பிரபு உள்பட பலர் கலந்து கொண்டனர்.

பருவமழைக்கு முன் நீர்பிடிப்பு பகுதிகளில் கருவேல மரங்களை அகற்ற வேண்டும் விவசாய சங்கம் கோரிக்கை

மானாமதுரை, மே 17: உயர்நீதிமன்ற உத்தரவுப்படி கருவேல மரங்களை பருவமழைக்கு முன் துரிதமாக அகற்ற மாவட்ட நிர்வாகம் நடவடிக்கை எடுக்கவேண்டும் என்று தமிழ்நாடு விவசாயிகள் சங்கத்தினர் கோரிக்கை விடுத்துள்ளனர்.தமிழ்நாடு விவசாயிகள் சங்கத்தின் மானாமதுரை ஒன்றிய பேரவைக் கூட்டம்  ஒன்றிய செயலாளர் ஆண்டி தலைமையில் நடந்தது. இக்கூட்டத்தில் மாவட்டத்தலைவர் ஜெயராமன், மாவட்ட செயலாளர் ஆறுமுகம், ஆட்டோ தொழிலாளர் சங்க மாவட்ட செயலாளர் விஜயகுமார், தமுகஎகச மாவட்டக்குழு உறுப்பபினர் ராஜாராமன் ஆகியோர் கலந்து கொண்டனர். கூட்டத்தில் ஒன்றியத்தலைவராக ராமமூர்த்தி, ஒன்றிய செயலாளராக முத்துராமலிங்கம், ஒன்றிய பொருளாளராக வெள்ளமுத்து, ஒன்றிய துணைச் செயலாளர்களாக பெலிக்ஸ்சகாயராஜ், பிச்சை, ஒன்றிய துணைத் தலைவர்களாக பரமாத்மா, பாண்டி ஆகியோர் தேர்வு செய்யப்பட்டனர்.மழைநீர், ஆற்றுநீரை தேக்கிவைக்கும் கண்மாய், ஊரணி, குளம், குட்டை, வரத்துக்கால்வாய்களில் கடந்த சில ஆண்டுகளாக கருவேல மரங்கள் அதிகரித்துள்ளது. இதனால் இம்மாவட்டம் தொடர்ந்து பல ஆண்டுகளாக  வறட்சியால் பாதிக்கப்பட்டு வருகின்றது. இதனால் கிராமப்புற விவசாயம் பொய்த்துபோனது. விவசாயம் பொய்த்து போனதால் கிராமப்புறங்களில் மக்கள் வறுமையால் வாடுகிறார்கள். வறட்சியால் கிராமப்புறத்து விவசாயிகள் திருப்பூர், கோவை, சென்னை போன்ற வெளியூர்களுக்கு தினக்கூலி தொழிலாளர்களாக வேலைதேடி சென்று கொண்டிருக்கிறார்கள். வேலைவாய்ப்பு இல்லாததால் கிராமப்புற விவசாயிகளின் பொருளாதாரம் பாதிக்கப்பட்டு வாங்கும் சக்தி குறைந்து வருகிறது. தொடர் வறட்சிக்கு கருவேல மரங்களே காரணம் என்று மத்திய அரசின் தேசிய ஆய்வகத்தகவலாகும். இந்த தகவலை மையமாக வைத்து மார்க்சிஸ்ட் கம்யூனிஸ்ட் கட்சி, வைகோ ஆகியோர் உயர்நீதிமன்றத்தில் வழக்கும் தாக்கல் செய்தனர். ஆனால் வழக்கு முடிவு எட்டப்படாமல் அரசு அப்படியே கிடப்பில் போட்டு வைத்துள்ளது. இதனால் மாவட்டத்தில் பெரும்பாலான பகுதிகளிலும், வைகை ஆற்றிலும் கருவேல மரங்கள் வளர்ந்து மண்டிக்கிடக்கிறது. ஆகவே உயர்நீதிமன்ற உத்தரவுப்படி கருவேல மரங்களை பருவமழைக்கு முன் அகற்றுவதற்கு மாவட்ட நிர்வாகம் உரிய நடவடிக்கை எடுக்கவேண்டும் என்று தீர்மானம் நிறைவேற்றி உள்ளனர்.

வேளாண் அலுவலகங்கள் மூலம் மானியத்தில் இடுபொருட்கள் விவசாயிகள் வலியுறுத்தல்

சிவகங்கை, மே 17:  சிவகங்கை மாவட்டத்தில் சுமார் 1 லட்சத்து 20ஆயிரம் ஹெக்டேர் நிலத்தில் விவசாயம் செய்யப்பட்டு வருகிறது. அதிகப்படியாக நெல், கரும்பு, வாழை உள்ளிட்ட பயிர்கள் இங்கு விளைவிக்கப்படுகின்றன. கடந்த சில ஆண்டுகளாக போதிய மழை இல்லாமல் வறட்சி நிலவி வருகிறது. இருப்பினும் மானாவாரி பயிர்கள் மற்றும் கிணறு பம்புசெட் மூலம் விவசாயம் செய்யும் விவசாயிகள் பல்வேறு பயிர்களை ஆண்டு முழுவதும் விளைவித்து வருகின்றனர். விவசாயத்திற்கு தேவையான வட்டார வேளாண் அலுவலகங்களில் நெல் விதைகள், பல்வேறு வகையான தெளிப்பான், பூச்சி மருந்து உள்ளிட்ட இடுபொருட்கள் மானியத்தில் வழங்கப்படுகிறது. ஆனால் விவசாயிகளுக்கு தேவையான விதைகளை மானியத்தில் வழங்காமல் வேறு விதைகளை வழங்குகின்றனர். ஆண்டுதோறும் இளையான்குடி பகுதியில் அதிகப்படியாக ஜோதிரக நெல் விதை தேவை. தேவகோட்டை பகுதியில் ஏடிபிடி டீலக்ஸ் ரக நெல் விதை தேவை. இதுபோல் மானாமதுரையில் ஏடிபி 45, ஐஆர் 36, கல்சர் உள்ளிட்ட ரகங்கள் தேவையுள்ளது. விதை ரகங்களுக்கு அரசு மானியம் வழங்குகிறது. ஆனால் இந்த ரக விதைகள் தேவையான அளவு வழங்கப்படுவதில்லை. இதுபோல் உளுந்து விதைகள் இருப்பு வைக்கப்படுவதில்லை. தொடர்ந்து ஆண்டுதோறும் விவசாயிகளுக்கு தேவைப்படும் விதை நெல் ரகங்கள் வேளாண் அலுவலகங்களில் போதிய அளவு இல்லாமல் வெளி மார்க்கெட்டில் விதை வாங்கி விவசாயம் செய்ய வேண்டிய நிலை ஏற்படுகிறது என விவசாயிகள் குற்றம்சாட்டுகின்றனர். விவசாயிகள் கூறியதாவது, ‘தொடர்ந்து சில ஆண்டுகளாக மழை பெய்யும் என்ற நம்பிக்கையில் விவசாயத்திற்கான ஆரம்ப கட்ட வேலைகள் தொடங்கி போதிய மழை இல்லாமல் அவைகள் வீணாகிப்போனது. இதனால் விவசாயிகளுக்கு கூடுதல் நஷ்டம் ஏற்பட்டது. இருப்பினும் இருக்கும் நீரை வைத்தும், கிணறு பம்புசெட் வைத்திருப்பவர்கள் தொடர்ந்து விவசாயம் செய்து வருகின்றனர். ஆனால் விவசாயிகள் அதிகம் பயன்படுத்தும், தேவையான விதைகளை வழங்காமல் தேவையற்ற விதைகளை மானியத்தில் தருகிறோம் என்கின்றனர். இதனால் விவசாயிகள் கூடுதல் பணம் செலவழித்து தனியார் நிறுவனங்களில் வாங்க வேண்டிய நிலை உள்ளது. வட்டார வேளாண் அலுவலகங்கள் மூலம் விவசாயிகளுக்கு தேவையான இடுபொருட்கள், மானியங்களில் கிடைப்பதற்கு போதிய நடவடிக்கை எடுக்க வேண்டும் என்றனர்.

காளையார்கோவில் அருகே குளமாக மாறிய சாலை

காளையார்கோவில், மே 17:  காளையார்கோவில் அருகே உள்ள மூர்த்திநகர், சோமசுந்தரநகர் செல்லும் தார்ச்சாலை சிறுமழைக்கே குளமாக மாறி வருகிறது.காளையார்கோவில் அருகே காரைக்குடி செல்லும் நெடுஞ்சாலையில் மூர்த்திநகர், சோமசுந்தரநகருக்கு செல்லும் தார்ச்சாலை 10 ஆண்டுகளுக்கு முன் அமைக்கப்பட்டது. தற்போது தார் இருந்த இடமே தெரியாமல் ஜல்லிகள் மட்டுமே சாலையில் தெரிகின்றன. இந்தச் சாலையை மூர்த்திநகர் மற்றும் சோமசுந்தரநகரிலிருந்து ஆயிரத்திற்கும் மேற்பட்ட பொதுமக்கள் பயன்படுத்தி வருகின்றனர் . மேலும் 10 மீட்டருக்கு ஒரு இடத்தில் சாலை கடுமையாக சேதமடைந்துள்ளது. தற்போது பெய்த சிறுமழைக்கே சாலையை பயன்படுத்த முடியாத அளவுக்கு குளம் போல் தண்ணீர் தேங்கி விடுகிறது. இதனால் அப்பகுதியில்செல்லும் ஸ்கூல் வேன் மற்றும் டூவீலர் வாகனங்கள் விபத்தைச்  சந்திக்கும் சூழ்நிலை ஏற்பட்டுள்ளது. பள்ளத்தில் தண்ணீர் தேங்கியிருப்பதை அறியாமல் நேற்று இரண்டு  கீழே விழுந்து காயமடைந்தனர்.இதுகுறித்து அப்பகுதி மக்கள் கூறுகையில், வெயில் காலத்தில் இச்சாலையில் சென்றால் ஜல்லிக்கற்கள் பாதங்களைப் பதம் பார்க்கின்றன. இதே போல மழைக்காலங்களில் தண்ணீர் வெளியேற வழியில்லாமல் சகதியாக மாறி வழுக்கி விடுகிறது. பல ஆண்டுகளுக்கு முன்பு அமைக்கப்பட்ட சாலை இதுவரையிலும் எந்த மராமத்து பணியும் நடைபெறவில்லை. இதுகுறித்து சம்பந்தப்பட்ட அதிகாரிகளிடம் பல முறை மனுக் கொடுத்தும் எந்த நடவடிக்கையும் இல்லை. எனவே, சிவகங்கை மாவட்ட நிர்வாகம் நடவடிக்கை எடுக்க வேண்டும் என்று  கூறினர்.

காரைக்குடி சந்தையில் உச்சத்தை தொட்டது காய்கறிகள் விலை முள்ளங்கி, கோஸ் ரூ.80க்கு விற்பனை

காரைக்குடி, மே 17:  காரைக்குடி பகுதியில் உள்ள வாரச்சந்தையில் வரத்து குறைவால் காய்கறிகள் விலை உயர்ந்துள்ளது. நேற்று முள்ளங்கி, முட்டைகோஸ் கிலோ ரூ.80க்கு விற்றது. காரைக்குடியில் வாரச்சந்தை வாரத்தில் மூன்று நாட்கள் நடைபெறும். திங்கட்கிழமை தோறும் கணேசபுரம் பகுதியிலும், அடுத்து கழனிவாசல் வாட்டர் டேங்க் பகுதியிலும், சனிக்கிழமை வைரவபுரம் பகுதியிலும் சந்தை கூடுவது வழக்கம். கடந்த ஒரு மாதமாக கோடை வெயில் வாட்டி வருவதாலும், போதிய மழை இல்லாததாலும், காய்கறிகள் விலை பல மடங்கு உயர்ந்துள்ளது. ஒவ்வொரு சந்தையிலும் கிட்டத்தட்ட 500க்கும் மேற்பட்ட காய்கறி கடைகள் இருக்கும். கடந்த மாதம் ஒரு கிலோ தக்காளி 20 ரூபாய்க்கு விற்ற நிலையில், தற்போது ஒரு கிலோ 50 ரூபாய்க்கு விற்கப்படுகிறது. கடந்த மாதம் 25 ரூபாய்க்கு விற்ற சிறிய வெங்காயம் 50 ரூபாய்க்கு விற்கப்படுகிறது, ஒரு கிலோ கத்தரிக்காய் விலை 60 ரூபாய்க்கும், வெண்டைக்காய் விலை 60 ரூபாய்க்கும், கொத்தமல்லி, புதினா, இஞ்சி போன்ற அத்தியாவசிய பொருட்கள் விலையும் பலமடங்கு உயர்ந்துள்ளது. அதிகபட்சமாக முட்டைகோஸ் கிலோ ஒன்று 80 ரூபாய்க்கும், முள்ளங்கி கிலோ 80 ரூபாய்க்கும், ரூபாய்க்கும் விற்கப்படுகிறது. இது கடந்த மாதத்தைக் காட்டிலும் பல மடங்கு அதிகமாக உள்ளது. சிறு மற்றும் நடுத்தர குடும்பத்திற்கு இக்காய்கறி விலை பெரும் அதிர்ச்சியை ஏற்படுத்தியுள்ளது. காய்கறி வியாபாரி ஒருவர் கூறுகையில், கடந்த மூன்று மாதங்களுக்கு மேலாக பல பகுதிகளிலும் மழை இல்லை. நிலத்தடி நீர்மட்டமும் அதல பாதாளத்திற்கு சென்று விட்டது. கோடையின் வெப்பம் நாளுக்கு நாள் அதிகரித்து வருவதால், பயிர்கள் வெப்பம் தாங்காமல் அழிந்து வருகின்றன. ஆதலால் விலைவாசி உயர்வு தவிர்க்க முடியாத ஆகிவிட்டது என்றார்.

மருத்துவ குணம் வாய்ந்த பிரண்டை கொடிகள் சிவகங்கையில் சேகரிப்பு வெளி மாவட்டத்தினர் ஆர்வம்

சிவகங்கை, மே 17:  சிவகங்கை மாவட்டத்தில் மருத்துவ குணம் வாய்ந்த பிரண்டை கொடிகளை விற்பனைக்காக திண்டுக்கல் மாவட்ட கிராமத்தினர் சேகரித்து வருகின்றனர். பிரண்டை கொடி வெப்பமான இடங்களில் வளர்கிறது. கொடி வகையைச் சார்ந்தது. பிரண்டை புண், காயங்களை ஆற்றும் ஒரு சிறந்த மூலிகை. சதைப்பற்றான நாற்கோண வடிவத் தண்டுகளையுடையது. விதை கொடி மூலம் படர்ந்து செல்கிறது. காரத்தன்மையும், எரிப்புக் குணமும் கொண்ட பிரண்டை மூலம், வயிற்றுப்புண் குணமாகுதல், வாயு அகற்றல், பசி மிகுதல், போன்ற பல்வேறு நன்மைகள் கிடைக்கும். ஆஸ்துமா, எலும்புருக்கி, நீரிழிவு நோய்களையும் குணமடைய செய்யும். இத்தனை சிறப்புடைய பிரண்டை சிவகங்கை மாவட்டத்தில் சாலையோரங்கள், காடுகளில் படர்ந்து தானாக வளர்ந்துள்ளது. இதனை சேகரிக்க திண்டுக்கல் மாவட்டத்தில் உள்ள கிராமப் பகுதியை சேர்ந்த பலர் சிவகங்கை மாவட்டத்தில் முகாமிட்டுள்ளனர். சிவகங்கை அருகே இளையான்குடி சாலை, ஊத்திக்குளம், பையூர், காட்டுக்குடியிருப்பு உள்ளிட்ட பிரண்டை அதிகம் கிடைக்கக்கூடிய பகுதிகளில் தற்போது பிரண்டையை பறித்து சேகரித்து வருகின்றனர். சேகரித்த பிரண்டையை சில நாட்களுக்கு ஒரு முறை மொத்தமாக வேன்களில் ஏற்றி செல்கின்றனர். இளம் பிரண்டையை எடுத்து சென்று சிறு சிறு துண்டுகளாக நறுக்கி கிலோ ரூ.15முதல் ரூ.20வரை விற்கின்றனர் நிழலில் உலர்த்தி பொடி செய்து கூடுதல் விலைக்கு சித்த மருந்து தயாரிப்பவர்களிடம் விற்பனை செய்கின்றனர். பிரண்டை சேகரிப்பவர்கள் கூறியதாவது: பிரண்டை பல்வேறு மருத்துவ குணம் கொண்டது. நகரங்களில் பிரண்டையை அதிக விலைக்கு விற்பனை செய்து விடலாம். நாங்கள் சித்த மருத்துவத்திற்கு பயன்படுத்துபவர்களுக்காக சேகரிக்கிறோம். கோடை காலங்களில் விவசாய கூலி வேலை இல்லாத நிலையில் பிரண்டை சேகரிப்பை வைத்து பிழைத்து வருகிறோம் என்றனர்.

மானாமதுரை வாரச்சந்தையில் கார்பைட் கல் வைத்து பழுத்த மாம்பழம் விற்பனை அமோகம் ‘கல்’ வைப்போர் மீது ‘கண்’ வைக்க கோரிக்கை

மானாமதுரை, மே 17: மானாமதுரை வாரச்சந்தையில் கார்பைட் கல்லால் பழுக்க வைத்த மாம்பழம் விற்பனை களைகட்டியுள்ளது. பொதுமக்கள் உடல் ஆரோக்கியத்துக்கு சிக்கலை ஏற்படுத்தும் கல் மாம்பழ விற்பனையாளர்கள் மீது நடவடிக்கை எடுக்கவேண்டுமென பொதுமக்கள் கோரிக்கை விடுத்துள்ளனர். இந்தாண்டு கோடை வெயில் கொளுத்துவதால் மாம்பழங்களின் விளைச்சல் அதிகரித்துள்ளது. மாம்பழ சீசன் தொடங்கியதை அடுத்து கிருஷ்ணகிரி, தர்மபுரி, சேலம், ஈரோடு பகுதியில் இருந்து மதுரையில் உள்ள பழமண்டிகளுக்கு மாம்பழங்கள் லாரிகளில் வருகிறது. முக்கனிகளில் மாம்பழத்திற்கு சுவை அதிகம் என்பதால் குழந்தைகள் உள்ள வீடுகளில் இவற்றை அதிகளவில் வாங்குகின்றனர். மாங்காய் தனியாகவும், பழுக்கும் தருவாயில் உள்ள பழங்கள் தனியாகவும் பிரித்து குடோன்களில் வியாபாரிகள் இருப்பு வைத்துள்ளனர். மானாமதுரையில் வியாழக்கிழமையன்று நடக்கும் வாரச்சந்தையில் விலையும் நடுத்தரமாக இருப்பதால் நல்ல வியாபாரம் நடக்கிறது. இதனை வாய்ப்பாக பயன்படுத்தி இரண்டு, மூன்று நாட்களில் பழத்தை விற்பனை செய்யும் வகையில், கார்பைட் கல்லை சிறு துகள்களாக்கி, பேப்பரில் பொட்டலமாக கட்டி, மாங்காய் குவியலுக்குள் வைத்து விடுகின்றனர். இதனால் இயற்கையாக பழுக்கும் பழத்தைவிட, கார்பைட் கல் மூலம் பழுக்கும் பழங்கள் சுவை மற்றும் வாசனை குறைந்தும், உடலில் அஜீரணம், வயிற்றுப்போக்கு உள்ளிட்ட பிரச்னையை ஏற்படுத்தும். மேலும் தற்போது மானாமதுரையில் பழைய பஸ்ஸ்டாண்டு, புது பஸ்ஸ்டாண்டு, வாரச்சந்தைரோடு, பேரூராட்சி காம்ப்ளக்ஸ் பகுதியிலும் தள்ளுவண்டிகளிலும், ரோட்டோரங்களிலும் கல் மாம்பழ விற்பனை அதிகரித்துள்ளது. இது குறித்து கண்ணன் என்பவர் கூறுகையில், கடந்தாண்டு கல் மாம்பழங்கள் விற்பனை நடந்தபோது உணவு கலப்படத்தடுப்பு அதிகாரிகள் கடைகளில் சோதனை மேற்கொண்டு கார்பைட் கல் மூலம் பழுக்க வைத்த பழங்களை பறிமுதல் செய்தனர். இந்தாண்டு வாரச்சந்தையில் கல்வைத்த மாம்பழம் கிலோ ரூ.20 முதல் 30க்கு கிடைக்கிறது. உண்மையில் மார்க்கெட் விலை ரூ.90 இருக்கும் நிலையில் முழுமையாக வளர்ச்சியடைந்த, அழுகிய, கல்வைத்த மாம்பழங்கள் மலிவுவிலைக்கு விற்கப்படுகிறது. இதனை வாங்கி உண்பவர்களில் குழந்தைகளுக்கு வயிற்றுபோக்கு, வலி, வாந்தி ஏற்படுகிறது. எனவே உணவு பாதுகாப்புத்துறையினர் மூலம் அடிக்கடி சோதனை மேற்கொண்டு சுகாதாரமான பழங்கள் பொதுமக்களுக்கு கிடைக்க நடவடிக்கை எடுக்க வேண்டும் என்றார்.

குரூப் -1 தேர்வு தேர்ச்சி

சிவகங்கை, மே 17: சிவகங்கை துரோணா ஐ.ஏ.எஸ் அகாடமியில் பயின்றவர் குரூப் ஒன் தேர்வில் தேர்ச்சி பெற்று உதவி வனப்பாதுகாப்பு அலுவலராக பணி நியமனம் பெற்றார். சிவகங்கை மற்றும் காரைக்குடியில் துரோணா ஐஏஎஸ் அகடமி நிறுவனம் செயல்பட்டு வருகிறது. இங்கு குரூப் வகை தேர்வு, போலீஸ் தேர்வு உள்ளிட்ட அரசுப்பணிகளுக்கான பல்வேறு தேர்வுகளுக்கு பயிற்சியளிக்கப்படுகிறது. இங்கு பயின்ற வேலூர் கிராமத்தைச் சேர்ந்த வினோத்ராஜ் நடந்து முடிந்த குரூப் ஒன் தேர்வில் தேர்ச்சி பெற்று உதவி வனப்பாதுகாப்பு அலுவலராக பணி நியமனம் பெற்றார். வினேத்ராஜை பயிற்சி மைய ஒருங்கிணைப்பாளர் மற்றும் பயிற்றுநர்கள் வாழ்த்தினர். கிராமப்புற மாணவர்களுக்கு சிறப்பான பயிற்சி மூலம் பல மாணவர்களை அரசுப்பணியில் அமர்த்திக் கொண்டிருக்கும் துரோணா பயிற்சி மையத்திற்கு நன்றியை தெரிவித்துக் கொள்வதாக வினோத்ராஜ் தெரிவித்தார்.

சிவகங்கையில் நாளை மின்தடை

சிவகங்கை, மே 17: சிவகங்கையில் நாளை(மே.18) மின் தடை செய்யப்பட உள்ளது.  சிவகங்கை கூட்டு மின் தொகுப்பு துணை மின்நிலையத்தில் மாதாந்திர பராமரிப்பு பணிகள் நடைபெறுவதையொட்டி சிவகங்கை, புதுப்பட்டி, இடையமேலூர், தமறாக்கி, மலம்பட்டி, மேலப்பூங்குடி, வாணியங்குடி, கீழக்கண்டனி, சுந்தரநடப்பு, சோழபுரம் உட்பட இந்த துணை மின்நிலையத்திலிருந்து மின் விநியோகம் செய்யப்படும் பகுதிகளுக்கு நாளை காலை 9 மணியிலிருந்து மாலை 5 மணி வரை மின் விநியோகம் நிறுத்தப்பட உள்ளது. இவ்வாறு சிவகங்கை மின் பகிர்மான செயற்பொறியாளர் அலுவலகம் சார்பில் தெரிவிக்கப்பட்டுள்ளது.

நூறு நாள் வேலை திட்டத்தில் 150 நாட்கள் பணியை உடன் வழங்க வேண்டும் கிராமமக்கள் வலியுறுத்தல்

சிவகங்கை, மே 17:  சிவகங்கை மாவட்டத்தில் தேசிய ஊரக வேலை உறுதி திட்டத்தில் (நூறு நாள் வேலை திட்டம்) 150 நாட்கள் பணி வழங்க உடனடி நடவடிக்கை எடுக்க வேண்டும் என கிராம மக்கள் கோரிக்கை விடுத்துள்ளனர். தேசிய ஊரக வேலை உறுதி திட்டம் நகராட்சி, பேரூராட்சிகள் தவிர்த்து ஊராட்சிகளில் மட்டும் செயல்படுத்தப்படுகிறது. சிவகங்கை மாவட்டத்தில் உள்ள பல்வேறு ஊராட்சிகளில் இத்திட்டப்பணிகள் நடந்து வருகிறது. இத்திட்டத்தின் கீழ் ஆயிரக்கணக்கான கிராம மக்கள் வேலை செய்து வருகின்றனர். குளங்கள், கண்மாய்கள், நீர்வரத்து கால்வாய் தூர் வாருவது, சாலைகளை ஒட்டியுள்ள பகுதிகளில் பிடிமானத்திற்காக மண் கொட்டுவது, சாலையை சரி செய்தல், சாலையோரம் மரக்கன்று நடுதல் உள்ளிட்ட பல்வேறு பணிகள் இத்திட்டத்தில் செய்யப்படுகிறது.  தனியார் விவசாய வேலைகளுக்கு நூறுநாள் வேலை திட்ட வேலையாட்களை பயன்படுத்துவதும் நடந்து வருகிறது. அரசு சார்ந்த திட்ட பணிகளுக்கு பணி தொடங்கும் முன்னரும் பணி முடிந்த பின்னரும் அளவீடு செய்ய வேண்டும். அளவீடு பணிகளை பணித்தள பொறுப்பாளர்கள் மேற்கொள்கின்றனர். கொடுக்கப்பட்ட அளவீட்டின்படி முழுமையான பணிகள் செய்யப்பட்டிருந்தால், முழுமையான கூலி கொடுக்க வேண்டும். நூறுநாள் வேலை திட்டப்பணிகளில் ஈடுபடும் வேலையாட்களுக்கு ஒரு நாள் கூலியாக மத்திய அரசு ரூ.248, மாநில அரசு ரூ.224 வழங்கப்படும் என அறிவிப்பு செய்துள்ளது. ஆனால் அவ்வாறு வழங்கப்படுவதில்லை. இந்நிலையில் 2016-2017ம் ஆண்டு, பருவமழை பொய்த்ததால் தேசிய ஊரக வேலை உறுதித் திட்டத்தின் கீழ் வேலை நாட்களை 100 நாட்களிலிருந்து, 150 நாட்களாக உயர்த்தி அரசாணை வெளியிடப்பட்டது. அதன்படி, சிவகங்கை மாவட்டத்தில், கிராம ஊராட்சிப் பகுதிகளில் இத்திட்ட பணிகளில் உள்ள குடும்பங்கள் மற்றும் தூய்மை காவலர்கள், கூடுதலாக அனுமதிக்கப்பட்டுள்ள, 50 நாட்களுக்கும் பணிகள் செய்யலாம் என அரசு சார்பில் அறிவிக்கப்பட்டது. ஆனால் 150 நாட்கள் பணிகள் வழங்குவது இதுவரை அமல்படுத்த வில்லை. எனவே இத்திட்டத்தில் கூடுதலாக அனுமதிக்கப்பட்டுள்ள வேலை நாட்களுக்கு பணிகள் வழங்க உடனடி நடவடிக்கை எடுக்க வேண்டும் என கோரிக்கை எழுந்துள்ளது. விவசாய தொழிலாளர் சங்க நிர்வாகி கூறியதாவது: நூறு நாட்கள் வேலை வழங்குவதே முழுமையாக அமல்படுத்தப்படுவது இல்லை. பல யூனியன்களில் குறைவான நாட்களே வேலை வழங்கப்படுகிறது. இந்நிலையில் 150 நாட்கள் வேலை வழங்க அரசு உத்தரவிட்டுள்ளது. முழுமையான சம்பளம் என்பதெல்லாம் வெறும் அறிவிப்போடு நிற்கிறது. ஆண்டுதோறும் 150 நாட்கள் பணி வழங்குதல், அரசு அறிவித்த அதிகபட்ச சம்பளம் ஆகியன முழுமையாக அமல்படுத்தப்படுகிறதா என்பதை கண்காணிக்க நடவடிக்கை எடுக்க வேண்டும். கூடுதல் நாட்கள் பணி வழங்கும் நடவடிக்கையை உடன் தொடங்க வேண்டும் என்றார்.

வருஷநாடு பகுதியில் கனமழை பொதுமக்கள் மகிழ்ச்சி

வருஷநாடு, மே 16: வருஷநாட்டில் நேற்று இரண்டு மணி நேரம் பெய்த கனமழையால் பொதுமக்கள், விவசாயிகள் மிகவும் மகிழ்ச்சி அடைந்துள்ளனர். கடந்த சில நாட்களாக வருஷநாடு பகுதியில் வெயிலின் தாக்கம் அதிகரித்து வந்த நிலையில் திடீரென கன மழை பெய்தது பொதுமக்கள் மத்தியில் பெரும் வரவேற்பு பெற்றுள்ளது. பள்ளி மாணவ மாணவிகளும் மழையில் நனைந்தபடி விளையாடினர். பொதுமக்கள் கூறுகையில், ‘சித்திரை, மாதத்தில் மழை பெய்வது வழக்கமான ஒன்றுதான். சில ஆண்டுகளாக சித்திரை, வைகாசி, மாதங்களில் மழை பெய்யவில்லை. இந்தாண்டு மழை பெய்து வருவது நல்லது. இந்நிலையில் கோடை விவசாயம் செய்வதற்கும், மானாவாரி நிலங்களில் பயிரிடுவதற்கும் உகந்ததாக அமையும் என விவசாயிகள் தெரிவித்தனர். வைகை ஆற்று கரையோரம் உள்ள விவசாயிகள் தொடர்ந்து மழை பெய்து வந்தால் குடிநீர் பஞ்சம் அகலும் என்று எதிர்பார்ப்போடு உள்ளோம். மழை கூடுதலாகப் பெய்வதற்கு வருசநாடு எழில்மிகு வைகை சங்கத்தின் சார்பாகவும் தீவிர பிரார்த்தனைக் கூட்டங்கள் தெய்வீக வழிபாடு போன்றவை நடைபெற்று வருகிறது எனவும் தெரிவித்தனர்.

கூடலூர் பகுதியில் வீணாகும் குடிநீர்

கூடலூர், மே 16: கூடலூர் நகராட்சிப்பகுதியில் உள்ள ஒருசில நகராட்சி பொதுக்குழாய்களில் தண்ணீர் அடைக்கும் மூடிகள் இல்லாததால் இரவு முழுவதும் குடிநீர் வீணாகிறது. கூடலூர் நகராட்சியில் உள்ள இருபத்தியோரு வார்டு பொதுமக்களுக்கும், லோயர்கேம்ப் கூட்டுக்குடிநீர் திட்டம் முலம் சுத்திகரிக்கப்பட்ட குடிநீர் வழங்கப்பட்டு வருகிறது. குடிநீர் சப்ளை குறைவாக உள்ள தெருக்களில் ஆங்காங்கே நகராட்சி நிர்வாகம் மூலம் ஆழ்துளைக்கிணறு அமைத்து மின் மோட்டாருடன் கூடிய குடிநீர் மேல்நிலைத்தொட்டி அமைத்து தண்ணீர் நிரப்புகிறது. பொதுமக்கள் தேவைக்கு ஏற்ப தொட்டியிலிருந்து தண்ணீரை பிடித்துக்கொள்கின்றனர். தற்போது கோடைகாலம் தண்ணீர் பற்றாக்குறை என்பதால் குடிநீரை வீணாக்காமல் சிக்கனமாக பயன்படுத்த வேண்டும் என பொதுமக்களுக்கு அரசு வேண்டுகோள் விடுத்துள்ளது. ஆனால் தெருக்குழாய்களில் பொதுமக்கள் தண்ணீர் பிடித்தபின், குழாயை அடைக்காததால், குழாயிலிருந்து வீணாகும் தண்ணீரை நிறுத்த கூடலூர் நகராட்சி நிர்வாகம் எந்த ஒரு நடவடிக்கையும் எடுத்ததாக தெரியவில்லை.கூடலூர் 6வது வார்டு அருந்ததியர் தெருவில் உள்ள நகராட்சி தெருக்குழாய்களில் பொதுமக்கள் தேவைக்கு தண்ணீர் பிடித்தபின் அடைக்காமல் விட்டுவிடுகின்றனர். இதனால் பலமணி நேரம் சப்ளை செய்யப்படும் குடி தண்ணீர் இரவு முழுவதும் வீணாகிறது. தண்ணீர் தட்டுப்பாடு நிறைந்துள்ள நேரத்தில், தண்ணீர் வீணாவதை தடுக்க கூடலூர் நகராட்சி நிர்வாகம் முன்வரவேண்டும் என பொதுமக்கள் கோரிக்கை விடுத்துள்ளனர்.

உத்தமபாளையம் பகுதியில் கோடைகால பயிர் செய்ய விவசாயிகள் தயக்கம்

உத்தமபாளையம், மே 16: உத்தமபாளையம் பகுதிகளில் கோடைகால பயிர் செய்ய விவசாயிகள் தயக்கம் காட்டி வருகின்றனர். வேளாண்மைத்துறை அதிகாரிகளும் மெத்தனம் காட்டுவதாக புகார் எழுந்துள்ளது. கம்பம் பள்ளதாக்கில் உத்தமபாளையம், அனுமந்தன்பட்டி, ராயப்பன்பட்டி, ராமசாமிநாயக்கன்பட்டி, ஆனைமலையன்பட்டி, மூலப்பத்து உள்ளிட்ட இடங்களில் இரண்டாம் போகம் அறுவடை செய்யப்பட்டுவிட்டது. இந்நிலையில் ஒவ்வொரு வருடமும் கோடைகால பயிராக பாசிப்பயறு, அதிகமாக விதைக்கப்படுவதுண்டு. குறிப்பாக ஒரு காலத்தில் தக்கப்பூண்டு, சணம்பு, சூர்யகாந்தி உள்ளிட்ட விவசாயம் நடக்கும். இப்போது நடப்பதில்லை. இதற்கு காரணம் வேளாண்மைத்துறை போதிய ஊக்கமும், உரிய ஆலோசனைகளும் தராமல் இழுத்தடிக்கும் நிலையில் உள்ளனர்.இதனால் விவசாயிகள் விதைப்பு நடவடிக்கையில் ஈடுபடாமல் உள்ளனர். தற்போது அறுவடை முடிந்து ஒருமாதத்திற்கும் மேலாகியும் கோடைப்பயிர்கள் விதைப்பில் இன்னும் விவசாயிகள் மத்தியில் ஆர்வம் இல்லை. இதனால் கோடைக்கால பயிர்கள் சுத்தமாக இல்லை. ஒரு சில இடங்களில் மட்டுமே விதைக்கப்படும் நிலை உள்ளது. மறுபுறம் உத்தமபாளையம் வேளாண்மைத்துறை அதிகாரிகள் உரிய நடவடிக்கை இல்லாத நிலையில் விவசாயிகளும் ஆர்வம் இழந்து காணப்படுகின்றனர்.கோடைக்கால பயிர்களின் உற்பத்தியும் குறையும் ஆபத்து மாவட்டம் முழுவதுமே உண்டாகி உள்ளது. தேனியில் உள்ள மாவட்ட அளவிலான இணை இயக்குநர் மற்றும் அதிகாரிகள் இதனைப்பற்றிய ஆர்வம் காட்டாத நிலையும் விவசாயிகளை ஊக்குவிக்காத நிலையும் உள்ளது எதற்காக என்பது புரியவில்லை. மத்திய, மாநில அரசுகள் அதிகளவில் மானியங்களை தருகின்றன. இதனை விவசாயிகள் மத்தியில் கொண்டுபோய் சேர்ப்பதில் உரிய அக்கறையை மாவட்ட அளவில், வட்டார அளவில் உள்ள அதிகாரிகள் கவனம் செலுத்தினால் மட்டுமே கோடைக்கால பயிர்கள் விவசாயம் பெருகும் என விவசாயிகள் கூறுகின்றனர்.இதுகுறித்து விவசாயிகள் கூறுகையில், ‘கோடைக்கால பயிர்கள் விவசாய பயிர்கள் உற்பத்தி பெருக்கத்திற்கும், விவசாய தரிசு நிலங்கள் குறைவிற்கும் வழிவகுக்கும். வட்டார அளவில் உள்ள வேளாண்மைத்துறை அதிகாரிகள் இதில் உரிய ஆலோசனைகள் வழங்குவதில்லை. மாறாக பீல்டுக்கு செல்கிறோம் என சொல்கிறார்கள். ஆனால் எந்த பீல்டுக்கு தினமும் செல்கிறார்கள் என்றே தெரியவில்லை. இதனால் வேளாண்மை பயிர்கள் உற்பத்தி குறைந்து வருகிறது. குறிப்பாக கோடைக்கால பயிர்கள் மிக மோசமாக சரிந்து வருகிறது’ என்றனர்.

வறட்சியில் தண்ணீருக்கு அலையும் கால்நடைகள் கால்நடை வளர்ப்போர் கவலை

ஆண்டிபட்டி, மே 16: கடுமையான வறட்சியின் காரணமாக ஆண்டிபட்டி பகுதியில் நீர்நிலைகள் வறண்டு காணப்படுவதால் கால்நடைகள் தண்ணீரைத் தேடி அலைந்து வருகின்றன. இதனால் கால்நடை வளர்ப்பவர்கள் மிகுந்த கவலை அடைந்துள்ளனர்.தேனி மாவட்டத்தில் ஆண்டிபட்டி ஊராட்சி ஒன்றியம் விவசாயத்தையும் கால்நடை வளர்ப்பதையும் முக்கியத் தொழிலாக கொண்டுள்ளது. ஜி.கல்லுப்பட்டி, மரிக்குண்டு, தேக்கம்பட்டி, கண்டமனூர், வேலாயுதபுரம், தெப்பம்பட்டி, அம்மாபட்டி,பாலக்கோம்பை, வண்டியூர், ராஜதானி, சித்தார்பட்டி, கதிர், ஆசாரிபட்டி, ரோசனபட்டி, கன்னியப்பபிள்ளைபட்டி, ஏத்தகோயில், கதிர்வேல்புரம் உள்ளிட்ட 50க்கும் மேற்பட்ட கிராமங்கள் உள்ளன. கறவை மாடுகள், வெள்ளாடுகள, செம்மறி ஆடுகள், எருமை மாடுகள், தொழு மாடுகள், நாட்டு மாடுகள் என்று ஒரு லட்சத்திற்கும் மேற்பட்ட கால்நடைகளை வளர்த்து வருகின்றனர். ஆனால் கடந்த காலங்களில் கால்நடைகளுக்குத் தேவையான வசதிகள் இருந்ததால் கால்நடை வளர்ப்பதில் விவசாயிகளும் விவசாய சார்ந்த தொழிலாளர்களும் அதிக ஆர்வத்தில் கால்நடைகளை வளர்த்து வந்தனர். ஆனால் கடந்த சில வருடங்களாக இப்பகுதியில் போதிய மழைப்பொழிவு இல்லாததால் நீர்நிலைகள் வறண்டு காணப்படுகிறது. இதனால் கால்நடை வளர்ப்போர் எண்ணிக்கையும், கால்நடைகளின் எண்ணிக்கையும் குறைந்து வந்தது. இது மட்டுமின்றி கால்நடை வளர்ப்பவர்கள் பசுந்தீவனம் தண்ணீர் பிரச்னையால் கால்நடைகளை அடிமாட்டு ரேட்டுக்கு விற்பனை செய்தும் வந்தனர். தற்போது இதே நிலை நீடித்து வருவதால் கால்நடைகளுக்கு பசுந்தீவனம் தண்ணீர் உள்ளிட்ட வசதிகள் இல்லாததால் கால்நடை வளர்ப்போர் மத்தியில் பெரும் கவலையை ஏற்படுத்தியுள்ளது.

மூணாறில் குடியிருக்க வீடுகள் கேட்டு சி.ஐ.டி.யூ. தொழிற்சங்கம் தர்ணா

மூணாறு, மே 16: மூணாறு அருகே சின்னக்கானல் பகுதியில் நிலங்கள் மற்றும் வீடுகள் வேண்டும் என்று வலியுறுத்தி தொழிலாளர்கள் கிராம நிர்வாக அலுவலகம் முன்பு தர்ணா போராட்டத்தில் ஈடுப்பட்டனர். மூணாறு மற்றும் சின்னக்கானல் பகுதிகளில் உள்ள அனைத்து தொழிலாளர்களுக்கும் வீடும் நிலமும் தர கேரள அரசு நடவடிக்கை எடுக்க வேண்டும் என்று வலியுறுத்தி ஹைரேஞ் தோட்ட தொழிலாளிகள் சங்கமான சி.ஐ.டி.யூ. தலைமையில் சின்னக்கானல் கிராம அலுவலகம் முன்பு தர்ணா போராட்டம் நடைபெற்றது. இந்த போராட்டத்தை மார்க்சிஸ்ட் மாவட்ட செயலாளர் கே.கே.ஜெயச்சந்திரான் துவங்கி வைத்தார். நடந்து முடிந்த நாடாளுமன்ற தேர்தலில் ஐக்கிய ஜனநாயக கூட்டணியின் முக்கிய வாக்குறுதியாக அனைத்து தொழிலாளர்களுக்கு வீடு தரப்படும் என்றும் இதுகுறித்து முக்கிய தொழில் சங்ககளிடம் பேச்சுவார்த்தை நடத்தப்படும் என்றும் கூறியபடி இந்த பிரச்னைகளுக்கு உடனடியாக தீர்வு காண வேண்டும் என்று செயலாளர் கூறினார். சின்னக்கானல் பகுதியில் தொழிலாளர்கள் குடில் கட்டி போராட்டம் நடத்தி வந்த நிலையில் மாவட்ட துணை ஆட்சியர் இந்த விஷயத்தில் துணை ஆட்சியர் தலையிட்டு தொழிலாளர்களுக்கு சாதகமாக சில முடிவுகளை எடுத்தார் என்பது குறிப்பிடத்தக்கது.இந்நிலையில் சின்னக்கானல்-சூரியநல்லி பகுதி தொழிலாளர்கள் 1000 பேர் ஓன்று சேர்ந்து தங்களுக்கும் 5 சென்ட் நிலம் வேண்டும் என்று கோரிக்கை முன் வைத்து நடைபெற்ற இந்த போராட்டம் அப்பகுதியில் பரபரப்பை ஏற்படுத்தியுள்ளது.தேவிகுளம் பகுதியில் குட்டியார் வாலி பகுதியில் 2006ம் ஆண்டு கேரள அரசு 700 பேருக்கு நிலங்கள் தந்துள்ளது. இதுபோல சூரியநல்லி-சின்னக்கானல் பகுதியில் உள்ள தொழிலாளர்களுக்கும் வீடு இல்லாதவர்களுக்கும் வீடு மற்றும் நிலங்கள் அரசு தர நடவடிக்கை எடுக்க வேண்டும் என்று செயலாளர் ராஜூ கூறியுள்ளார். இந்த போராட்டத்தில் மார்க்சிஸ்ட் ஏரியா செயலாளர் என்.பி.சுனில் குமார், வி.எஸ்.அல்பின், சேனாபதி சசி, முத்துராஜ், வேலுசாமி, அழகர், போன்றோர் இந்த போராட்டத்தில் முக்கிய பங்கு வகித்தனர்.