Special - Dinakaran

அமில மழையினால் ஏற்படும் பாதிப்புகள்

* தகவல் பலகை

அமிலமழை பெய்யும் என்பது உண்மையே. உலகின் பல பகுதிகளிலும் இந்நிகழ்வு நடைபெற்றுள்ளது. தூய்மையான நீரின் பிஎச்.மதிப்பு7 ஆகும். 7க்கு குறைவாக இருந்தால் அமிலத்தன்மையோடும், 7க்கு அதிகமாக இருந்தால் காரத்தன்மையோடும் இருக்கும். அமிலமழைநீரில் கந்தக அமிலம் மற்றும் நைட்ரிக் அமிலம் அதிகளவு கலந்திருக்கும்.
மோட்டார் வாகனங்கள், தொழிற்சாலைகளில் இருந்து வெளிப்படும் கந்தகடைஆக்சைடு, நைட்ரஜன்சல்பைடு போன்றவையே அமிலமழைக்கு முக்கிய காரணமாகும். இந்த வாயுவோடு மேகத்தில் உள்ள நீர்த்துளி வினைபுரிந்து கந்தக ட்ரைஆக்சைடாக மாறுவதும் பின்னர் கந்தக அமிலமாக மாறுவதும் வேகமாக நடைபெறுகிறது. எனவே இந்த இடத்தில் பெய்யும் மழை அமிலமழையாக பொழிகிறது.மும்பை செம்பூர் பகுதியில் பெய்த அமிலமழையின் பிஎச்.மதிப்பு 3.5ஆக இருந்துள்ளது. இந்த அமில மழையின் நீர் மனிதனுக்கு நுரையீரல் சம்பந்தமான பல நோய்களை உருவாக்கும். உலோகக்குழாய்களில் தொடர்ந்து அனுப்பப்படும் நீரும் அமிலத்தன்மையோடு காணப்படும். இந்நீரை மனிதன் தொடர்ந்து பயன்படுத்தினால் சிறுநீரகப் பாதிப்புகள், எலும்பு பலவீனப்படுதல் போன்ற பாதிப்புகள் வரலாம். குழந்தைகளுக்கு பேதி ஏற்படும்.

டிரான்ஸ்பர், கூடுதல் சீட் ஒதுக்கீட்டில் கல்லூரிக் கல்வி இயக்ககத்தில் பல கோடி முறைகேடு: முன்தேதியிட்டு கையெழுத்தாகும் ஆவணங்கள்

சிறப்பு செய்தி
கல்லூரிக் கல்வி இயக்ககத்தில் ஆசிரியர் பணியிட மாறுதல், கல்லூரிகளில் கூடுதல் சீட் ஒதுக்கீடு செய்வதில் பல கோடி முறைகேடு நடந்துள்ளதாக குற்றச்சாட்டு எழுந்துள்ளது.  தமிழகத்தில் கல்லூரிக்கல்வி இயக்ககத்தின் கீழ் 91 அரசுக் கலைக்கல்லூரிகள், 7 கல்வியியல் கல்லூரிகள், 40 பல்கலைக்கழக உறுப்புக்கல்லூரிகள், 3 உடற்கல்வி கல்லூரிகள், 162 அரசு உதவிெபறும் கல்லூரிகள் உள்ளன. இதுதவிர 1,243 தனியார் கல்லூரிகள் சேர்த்து கல்லூரிக்கல்வி இயக்கத்தின்கீழ் தமிழகத்தில் 1,543 கல்லூரிகள் செயல்படுகின்றன. இவற்றில் 138 அரசுக் கல்லூரிகளில் 11 ஆயிரத்துக்கும் அதிகமான ஆசிரியர்கள் பணியாற்றி வருகின்றனர். மேலும், அரசுக்கல்லூரிகள், அரசு உதவிபெறும் கல்லூரிகளில் ஆசிரியர்கள் நியமனம், பணியிட மாறுதல், மாணவர் சேர்க்கையின் எண்ணிக்கைக்கு ஏற்ப இடங்களை அதிகரித்தல், ஆசிரியர்களுக்கான சம்பளப் பட்டுவாடா உள்பட பல்வேறு பணிகளை கல்லூரிக்கல்வி இயக்ககம் மேற்கொண்டு வருகிறது. இந்நிலையில் அரசுக்கல்லூரி ஆசிரியர் பணியிட மாறுதல், கல்லூரிகளில் கூடுதல் இடங்கள் ஒதுக்கீடு செய்வதில் முறைகேடு நடந்துள்ளதாக குற்றச்சாட்டு எழுந்துள்ளது.  இதுதொடர்பாக, ஆசிரியர்கள் தரப்பில் கூறியதாவது: அரசுக்கல்லூரிகளில் பணியாற்றும் ஆசிரியர்களில் பெரும்பாலானோர் குழந்தைகளின் கல்விக்காக சொந்த ஊருக்கு அருகில் உள்ள மாநகரத்தில் இயங்கும் கல்லூரியில் பணியாற்றவே விரும்புகிறார்கள். தமிழகத்தில் எந்த கல்லூரியில் பணிக்கு சேர்ந்தாலும் சில ஆண்டுகளுக்குள் பணியிட மாறுதல் பெற முயற்சி மேற்கொள்கிறார்கள். இதற்காக கல்லூரி அளவிலும், மண்டல அளவிலும் ஏஜென்ட்டாக சிலர் செயல்படுகிறார்கள்.  ஆசிரியர்கள், ஆசிரியர் அல்லாத பணியாளர்கள், வெளியாட்கள் என பாரபட்சம் இல்லாமல் உயர்கல்வித்துறை சார்ந்த பொறுப்புகளில் உள்ளவர்களும் இதற்காக இந்த முறைகேட்டில் வசூல் வேட்டை நடத்துகிறார்கள். குறைந்தபட்சம் 2 லட்சம் முதல் குறிப்பிட்ட இடத்துக்கான டிமாண்டை பொறுத்து, காலிப்பணியிடத்தின் விலையை ஏற்றிக்கொண்டே செல்கிறார்கள். கல்லூரி ஆசிரியர் பணியிட மாறுதல் கலந்தாய்வு மிகவும் ரகசியமாக நடத்தப்படுகிறது. இதுதொடர்பாக அறிவிப்பு வெளியிடப்படாது. கலந்தாய்வில் பங்கேற்பவர்களுக்கு மட்டுமே அதுதொடர்பாக தகவல் தெரிவிக்கப்படும். கலந்தாய்வு நடப்பதற்கு முன்னதாக பணம் கொடுத்தவரால் தேர்வு செய்யப்பட்ட கல்லூரி இடம் பணியிட மாறுதல் இடங்களின் பட்டியலில் இருந்து நீக்கப்படும். டிமாண்ட் இல்லாத காலிப்பணியிடங்கள் மட்டுமே பட்டியலில் காட்டப்படும். காலிப்பணியிடங்களை மறைத்து முறைகேடு செய்வதை கண்டித்து, கலந்தாய்வில் பங்கேற்ற ஆசிரியர்கள் தரப்பில் போராட்டம் நடத்தியுள்ளோம். தமிழகத்தில் ஆண்டு ஒன்றுக்கு 400 முதல்  500 ஆசிரியர்கள் பணியிட மாறுதலில் செல்கிறார்கள். இதன்மூலம் பல கோடி ரூபாய்  முறைகேடு நடந்துள்ளது.அதேபோல் அரசுக் கலை, அறிவியல் கல்லூரிகளில் முக்கிய பொறுப்பில் உள்ளவர்கள், அதிகாரத்தில் உள்ளவர்களுக்கு என, சீட் ஒதுக்கப்படுகிறது. அதேநேரத்தில், மாணவர் சேர்க்கைக்காக விண்ணப்பித்தவர்கள் அலைக்கழிக்கப்படுகின்றனர். சில சமயங்களில் கூடுதல் எண்ணிக்கை மாணவர் சேர்க்கை நடத்தப்பட்டு கல்லூரிக்கல்வி இயக்ககம் சார்பில், முன்தேதியிட்டு ஒப்புதல் வழங்கப்படுகிறது. இது தொடர்பாக கவர்னர் அலுவலகத்திற்கும் தொடர்பு இருக்கிறதா என்ற சந்தேகம் எழுகிறது. இதற்காக மாணவர்களின் கல்லூரி கட்டணம் போக, சீட்டுக்காக கூடுதலாக வசூலிக்கப்பட்ட தொகை பல்வேறு நிலைகளில் உள்ளவர்களால் பங்கிட்டுக்கொள்ளப்படுகிறது. இவற்றை கட்டுப்படுத்த ஒற்றைசாளர முறையில் மாணவர் சேர்க்கை நடத்த வேண்டும். இவ்வாறு ஆசிரியர்கள் கூறினர்.கவர்னர் நடவடிக்கை எப்போது?ஆசிரியர் தரப்பில் கூறுகையில்: உயர் கல்வித்துறையில் நடைபெறும் பல்வேறு முறைகேடுகள் தொடர்பாக, தமிழகத்தில் உள்ள பல்கலைக்கழகங்களின் வேந்தருக்கும், தமிழக கவர்னருக்கும் புகார் மனுக்களை அனுப்பியுள்ளோம். அவரை நேரில் சந்திக்க நேரம் கேட்டுள்ளோம். ஆனால் இதுவரை கவர்னர் எங்களை சந்திக்க நேரம் கொடுக்கவில்லை. எங்களின் மனுக்களின் மீதும் நடவடிக்கை எடுக்கவில்லை. இதனால் இந்த முறைகேடுகளில் கவர்னர் அலுவலகத்திற்கும் தொடர்பு இருக்கிறதா என்ற சந்தேகம் எழுகிறது என்றனர்.

தங்கம் வழங்கும் ஏடிஎம் இயந்திரங்கள்

முன்பெல்லாம் வங்கிகளில் பணம் வரவு செலவிற்காக நேரில் சென்று காத்திருக்கும் நிலை இருந்தது. நேர விரயத்தை தடுப்பது, வங்கிப் பணி சுமைகளை குறைப்பது உள்ளிட்டவற்றிற்காக ஆட்டோமேட்டிக் டெல்லர் மெஷின் எனும் ஏடிஎம் மையங்கள் பயன்பாட்டிற்கு வந்தன. இதனால் 24 மணி நேரமும் பணப்பரிவர்த்தனைகளை செய்ய முடிகிறது. இதற்கான கார்டு ஒவ்வொரு கணக்குதாரர்க்கும் வழங்கப்படுகிறது. இது பாலிவினைல் குளோரைடு எனும் பிளாஸ்டிக்கினால் தயாரிக்கப்பட்டிருக்கும். ஒவ்வொரு அட்டையின் முகப்பிலும் 16 இலக்க எண் கொடுக்கப்பட்டிருக்கும். முதல் எண் 4ல் துவங்கினால் விஷா கார்டு, 5ல் துவங்கினால் மாஸ்டர் கார்டு என்று ஒவ்வொரு பிரிவாக வகைப்படுத்தப்பட்டிருக்கும். 7 முதல் 15வது எண் வரை உள்ள எண்கள் வங்கி, கணக்கு எண் உள்ளிட்டவற்றுடனும், 16வது இலக்க எண் காலாவதி மற்றும் பயன்படுத்துதல் போன்றவற்றுடன் தொடர்புபடுத்தப்பட்டிருக்கும். ஆன்லைன் வர்த்தகத்தின் போது கார்டின் சிவிவி.எண் கேட்கப்படும். இது அட்டையின் பின்பக்கம் காந்த பட்டைக்குக் கீழே கையெப்பமிடப்பட்ட பகுதி அருகில் உள்ள மூன்று இலக்க எண் ஆகும்.இதனை கார்டு வெரிபிகேசன் வேல்யூ என்று அழைக்கிறார்கள்.ஏடிஎம் பரிவர்த்தனைக்காக ஒவ்வொரு வங்கியும் வெவ்வேறு வங்கிகளுடன் உடன்பாடு செய்திருக்கும். இதனால் மற்ற வங்கி கார்டுகளையும் ஒரே இயந்திரத்தில் பயன்படுத்த முடியும். இதற்கான வாடிக்கையாளர்க்கு வழங்கப்பட்ட தொகையை வங்கிகள் பரிமாறிக் கொள்ளும். ஏடிஎம் இயந்திரத்தில் ஜிபிஎஸ் கருவி பொருத்தப்பட்டிருக்கும். எனவே அதனை வீட்டிற்கு தூக்கிக் கொண்டு போக முடியாது. பின்னாலேயே போலீஸ் வந்து விடும். பணத்தை பெற மட்டுமல்ல. பணம் செலுத்துதல், மினி ஸ்டேட் பெறுதல் என்று தற்போது பயன்பாடு சற்று விரிவடைந்துள்ளது.இருப்பினும் அபுதாபி உள்ளிட்ட நாடுகளில் தங்கம் வழங்கும் ஏடிஎம் மையங்கள் வந்துவிட்டன. இதில் 320 வகையான தங்கப்பொருட்களை பெற முடியும். அமெரிக்கா, ஜெர்மனி போன்ற நாடுகளில் இவ்வகை ஏடிஎம் மையங்கள் உண்டு.1967ல் லண்டனில் முதல் ஏடிஎம் மையம் நிறுவப்பட்டது. அப்போது 6 இலக்க ரகசிய எண்களே வழங்கப்பட்டது. வாடிக்கையாளர்கள் இதனை நினைவுபடுத்தி வைக்க சிரமப்பட்டதால் 4 இலக்கமாக மாற்றப்பட்டது. இருப்பினும் சுவிட்சர்லாந்து உள்ளிட்ட நாடுகளில் 6 இலக்க ரகசிய எண்களே பயன்படுத்தப்படுகின்றன. இந்தியா, அமெரிக்கா போன்ற நாடுகளில் ஏடிஎம் என்றும், கனடா போன்ற நாடுகளில் கேஷ் மிஷின் என்றும், நியூசிலாந்து, இங்கிலாந்தில் கேஸ்பாய்ண்ட் என்றும் இது வெவ்வேறு பெயர்களில் அழைக்கப்படுகிறது. இந்தியாவில் 1987ல் கொல்கத்தாவில் இந்த இயந்திரம் பயன்பாட்டிற்கு வந்தது. முதல் நடமாடும் இயந்திரம் 2004ல் கேரளா படகில் அமைக்கப்பட்டது.இருப்பினும் தற்போது பல வங்கிகள் தங்கள் வாகனங்களிலேயே ஏடிஎம் களை நிறுவி பொதுமக்கள் கூடும் இடங்களில் நிறுத்தி சேவையாற்றி வருகின்றன. பழநி தைப்பூசம் போன்ற நேரங்களில் இதுபோன்றவற்றை நீங்கள் பார்த்திருக்கலாம்.எலக்ட்ரானிக் சாவி போன்ற செயல்படும் இந்த அட்டையின் பாதுகாப்பு அம்சமே ரகசிய எண்தான். அதனால்தான் அதனை ரகசிய எண் என்று அழைக்கிறார்கள். இணையவழி திருட்டுக்களும், தவறுகளும் தற்போது வெகுவாய் அதிகரித்துள்ளது. எனவே எக்காரணம் கொண்டும் இதை யாரிடமும் சொல்லக் கூடாது. மீறினால் சில நொடிகளில் உங்கள் பணம் அத்தனையும் பிறரால் துடைத்து எடுக்கப்படும்.

வெளிநாடுகளுக்குச் செல்லும் இந்திய ரயில்களைத் தெரியுமா..?

புதுடெல்லி: நாளொன்றுக்கு 2.25 கோடிபயணிகளையும், 25 லட்சம் டன் சரக்குகளையும் இந்தியன் ரயில்வே சுமந்துசெல்கிறது. இந்தியாவில் சுமார் 64ஆயிரத்து 105கிமீ.ரயில்பாதையும், 6ஆயிரத்து 909 ரயில் நிலையங்களும் உள்ளன. உலகின் நான்காவது பெரிய ரயில்வே நெட்ஒர்க் இது. (அமெரிக்கா, ரஷ்யா, சீனா ஆகியவை முதல் 3இடங்களை வகிக்கின்றன). இந்தியாவில் மிக அதிக பணியாளர்கள் பணிபுரியும் நிறுவனம்(சுமார்16லட்சம்பேர்). இந்தியாவில் ரயில் தொடர்பில்லாத இரண்டு மாநிலங்கள் சிக்கிம், மேகாலயா. நாட்டின் மிக நீண்ட தூரம் பயணிக்கும் ரயிலாக திப்ரூகர்(அசாம்)-கன்னியாகுமரி விவேக் எக்ஸ்பிரஸ் விளங்குகிறது. மொத்தம் 4ஆயிரத்து 286கிமீ.யை 82மணிநேரத்தில் கடக்கிறது. 2011ல் இது அறிமுகப்படுத்தப்பட்டது. அதற்கு முன்புவரை ஜம்முதாவி-கன்னியாகுமரி ஹிமசாகர் எக்ஸ்பிரஸே மிகநீண்ட தொலைவு பயணிக்கும் ரயிலாக இருந்தது. இந்தியாவின் முதல்ரயில்நிலையம் மும்பை சத்ரபதி சிவாஜி டெர்னிமல்ஆகும்.(பழையபெயர் விக்டோரியா டெர்மினல்). சர்வதேச ரயில்களாக தார்எக்ஸ்பிரஸ், சம்கேதா,மைத்ரி எக்ஸ்பிரஸ் விளங்குகிறது. இதில் தார் எக்ஸ்பிரஸ் இந்தியாவின் ஜோத்பூர்-பாகிஸ்தானின் கராச்சி இடையே பயணிக்கிறது. சம்கேதா எக்ஸ்பிரஸ் இந்தியாவின் அட்டாரி-பாகிஸ்தானின் வாகா எல்லையை இணைக்கிறது. மைத்ரி எக்ஸ்பிரஸ் கொல்கத்தா-வங்காளதேசத்தை இணைக்கிறது.

மாற்றுத்திறனாளிகளுக்கு ஓய்வூதியத்துடன் சலுகை

மாற்றுத்திறனாளிகளுக்கு ஓய்வூதியத்துடன் சலுகை
வருவாய்த்துறை சார்பில் மத்திய அரசின் இந்திராகாந்தி தேசிய மாற்றுத்திறனாளிகள் ஓய்வூதியத் திட்டம் செயல்படுத்தப்பட்டு வருகிறது. இதில் மாதம் ரூ.ஆயிரம் வழங்கப்படும். தீபாவளி, பொங்கலுக்கு நபர்க்கு ஒரு இலவசவேட்டி அல்லது சேலை வழங்கப்படும். மதிய உணவுத்திட்டத்தில் பங்கெடுப்போர்க்கு மாதத்திற்கு 2 கிலோ இலவச அரிசி அல்லது மதியஉணவுத்திட்டத்தில் பங்கெடுக்காதவர்களுக்கு மாதத்திற்கு 4 கிலோ அரிசி வழங்கப்படுகிறது. நிபந்தனைகள்: 18 வயது மற்றும் அதற்கு மேற்பட்டிருக்க வேண்டும். முழுவதும் கண் பார்வையற்றவர்களுக்கு வயது வரம்பு இல்லை. ரூ.5 ஆயிரத்திற்கு மேல் சொத்து இல்லாதவராக இருக்க வேண்டும்.
உழைத்து வாழ இயலாதவராக இருக்க வேண்டும். வருமானம் இல்லாதவராக இருக்க வேண்டும். 18வயதிற்கு மேற்பட்ட மகன் அல்லது பேரன் இருந்தாலும் வறுமைக்கோட்டு பட்டியலில் இருக்க வேண்டும். மாற்றுத்திறனாளி என்பதற்கான தேசிய அடையாள அட்டை வைத்திருக்க வேண்டும்.இணைக்க வேண்டிய ஆவணம்: மனுவுடன் புகைப்படம், குடும்ப அட்டை நகல், வருமானம், இருப்பிடச் சான்று, மாற்றுத்திறனாளி தேசிய அடையாள அட்டை நகல் ஆகியவற்றை இணைக்க வேண்டும்.தொடர்புமுகவரி: சம்பந்தப்பட்ட வட்டாட்சியர், தனி வட்டாட்சியர் (சமூக பாதுகாப்புத்திட்டம்), தனி துணை ஆட்சியர் (மக்கள் குறைதீர்வு) கலெக்டர் அலுவலக வளாகம், திண்டுக்கல் என்ற முகவரிக்கு தொடர்பு கொள்ளலாம்.செவித்திறன் குறைந்தோருக்கு தொழிற்பயிற்சியும், வேலைவாய்ப்பும்பேச்சுத்திறன் மற்றும் காதுகேட்கும் திறன் இழந்தவர்களுக்கு பயிற்சி(ஆண்கள்) அரசு தொழிற்பயிற்சி நிலையம், கிண்டியில் பொருத்துநர் பிரிவில் இலவசமாக இரண்டாண்டுகள் பயிற்சி அளிக்கப்படுகிறது. மாத உதவித் தொகையாக ரூ.100வழங்கப்படுகிறது.நிபந்தனைகள்: பேச்சுத்திறன் மற்றும் செவித்திறன் குறையுடையோர் 10ம் வகுப்பு தேறியிருக்க வேண்டும். 18வயது பூர்த்தியடைந்திருக்க வேண்டும். விண்ணப்பத்துடன் மாற்றுத்திறனாளிகள் அடையாள அட்டை, குடும்ப அட்டை நகல் இணைக்க வேண்டும்.தொடர்பு முகவரி: முதல்வர், அரசினர் தொழிற்பயிற்சி நிலையம், கிண்டி, சென்னை&32 என்ற முகவரிக்கோ திண்டுக்கல் மாவட்ட மாற்றுத்திறனாளிகள் அலுவலகத்திற்கோ தொடர்பு கொள்ளலாம். கல்வி நிறுவனங்களில் உள்ள ஆசிரியர் பணியல்லாத பணியிடங்களை செவித்திறன் குறையுடையோர்க்கு ஒதுக்கீடு செய்யப்படுகிறது. அரசு மற்றும் நிதிஉதவி பெறும் கல்வி நிறுவனங்களில் மொத்த எண்ணிக்கையில் இரண்டு சதவீத பணியிடங்கள் இதற்காக ஒதுக்கீடு செய்யப்படும். நிபந்தனைகள்: பதவிக்குத் தேவையான கல்வித்தகுதிகள் பெற்றிருக்க வேண்டும். வேலைவாய்ப்பு அலுவலக பதிவேட்டில் இடம் பெற்றிருக்க வேண்டும். தொடர்புமுகவரி: மாவட்ட மாற்றுத்திறனாளிகள் நல அலுவலர், கலெக்டர் அலுவலக வளாகம், திண்டுக்கல் என்ற முகவரிக்கு நேரிலோ (0451) 2460099 என்ற எண்ணிற்கோ தொடர்பு கொள்ளலாம்.ஒன்றுக்கு மேற்பட்ட ஊனமுள்ள மாற்றுதிறனாளிக்கு கூடுதல் உதவி ஒன்றுக்கும் மேற்பட்ட ஊனமுற்றோரின் மேம்பாட்டிற்கான தேசிய நிறுவனம் சார்பில் (இந்திய அரசு சமூகநீதி மற்றும் அதிகாரம் அளித்தலுக்கான அமைச்சகம்) ஒன்றும் மேற்பட்ட ஊனமுற்ற மாற்றுத்திறனாளிகளுக்கு தேவையான மறுவாழ்வு அளிக்கப்படுகிறது.இதன்படி அவர்களுக்கான பயிற்சி, மருத்துவம், சேவைகள், மறுவாழ்வு உளவியல், தொழிற்பயிற்சி, பேச்சு, கேட்டல், தொடர்பான பயிற்சி, சிறப்புக்கல்வி, செயற்கை அவயங்கள் மற்றும் முடநீக்கு சாதனங்கள் பொருத்துதல், உதவி உபகரணங்கள், உணர்வு உறுப்புகள் குறைபாட்டிற்கான ஒருங்கிணைப்பு பயிற்சி மற்றும் சமுதாயம் சார்ந்த மறுவாழ்வு பணிகள் அளிக்கப்படுகிறது.விதிமுறைகள்: ஒன்றுக்கு மேற்பட்ட ஊனங்கள் உள்ள மாற்றுத்திறனாளிகள் இத்திட்டத்தில் பயன்பெறலாம்.கண் பார்வை யின்மையோடு இணைந்த காது கேளாமை, மூளை முடக்குவாதம், ஆட்டிசம் (புறஉலகச்சிந்தனை இல்லாமை), மனவளர்ச்சி குன்றுதலோடு இணைந்த காதுகேளாமை, காது கேளாமையோடு இணைந்த மூளை முடக்குவாதம் பாதிப்பு உள்ளவர்கள் தொடர்பு கொள்ளலாம்.தொடர்புமுகவரி: ஒன்றுக்கும் மேற்பட்ட ஊனமுற்றோரின் மேம்பாட்டிற்கான தேசிய நிறுவனம் (இந்திய அரசு சமூகநீதி மற்றும் அதிகாரம் அளித்தலுக்கான அமைச்சகம்), கிழக்கு கடற்கரை சாலை, முட்டுக்காடு, கோவளம் அருகில், சென்னை-603 112 என்ற முகவரியிலோ (044) 27472113, 27472046, 27472389 ஆகிய எண்களிலோ தொடர்பு கொள்ளலாம்.

அறிவோம் ஆயிரம் !!

பித்தப்பை கற்களை தடுக்கும் சிறுதானியங்கள்சிறுதானியங்கள் உடல்நலத்திற்கு கேடு விளைவிக்கும் நுண்கிருமிகளின் வளர்ச்சியினை தடுக்கிறது. பெருங்குடலின் செயல்பாட்டை சீராக்குகிறது. உடல்நலத்திற்கு ஏதுவான கிருமிகளின் வளர்ச்சியை தூண்டுகின்றன. உடல் சுறுசுறுப்பிற்கு காரணமான செராட்டினின் உற்பத்திக்கு உதவுகின்றன. சிறுதானியங்களில் அதிகளவு காணப்படும் மெக்னீசியம், தீவிர ஆஸ்துமா மற்றும் ஒற்றை தலைவலியை தடுக்கிறது. சிறுதானியங்கள் ரத்தஅழுத்தத்தை சீராக்குவதால் இதயநோய்களில் இருந்து பாதுகாப்பளிக்கின்றன. சிறுதானியங்களில் உள்ள நியாசின் (வைட்டமின்பி3) ரத்ததத்தில் அதிகளவு கொழுப்பு சேர்வதை குறைக்கிறது. அன்றாடம் சிறுதானியங்களை பயன்படுத்துவோர்க்கு இரண்டாம்வகை அதாவது இனிசுலின் சார்ந்த சர்க்கரை நோய் வருவதில்லை. சிறுதானியங்களை அதிகளவில் உணவு பயன்பாட்டில் சேர்க்கும் போது ரத்தத்தில் சர்க்கரையின் அளவை கட்டுப்பாட்டிற்குள் வைத்திருக்க உதவுகிறது. ஊட்டச்சத்து குறைவினால் குழந்தைகளுக்கு ஏற்படும் நோய்கள் வராமல் தடுப்பதற்கு உதவுகின்றன. சிறுதானிய பயன்பாட்டினால் பெண்களுக்கு பித்தப்பையில் கற்கள் வருவது தடுக்கப்படுகிறது. அதிகளவு நார்ச்சத்து மிகுந்த சிறுதானியங்கள் புற்றுநோய் வருவதை தடுக்கின்றன. உடல்பருமன் கொண்டவர்கள் சிறுதானியங்களை பயன்படுத்தும் போது உடல்எடை சீராகக்குறைகிறது. பைட்டோகெமிக்கல்ஸ் மற்றும் பைட்டிக்அமிலம் ஆகியவை சிறுதானியங்களில் காணப்படுவதால் சிறுதானியங்களை உட்கொள்வோர்க்கு நோய்கள் வராமல் தடுக்கப்படுகின்றன. அது போலவே பைட்டேட் புற்றுநோய் வராமல் காக்க உதவுகின்றது.உடல் எடையை சமநிலையில் வைத்திருக்கும் தைராய்டு சுரப்பிகள்நம் உடலின் எடையைச் சமநிலையில் வைத்திருக்க உதவுவது தைராய்டு சுரப்பியாகும். ஏனென்றால் தைராய்டு சுரப்பி மெட்டோபோலிச பணியில் பெரும்பங்கு வகிக்கிறது. தைராய்டில் சுரக்கும் தைராக்சின் எனப்படும் திரவம் பிராணவாயுவை கிரகித்து கரியமிலவாயுவை வெளியேற்றுவதற்கு துணைபுரிகின்றது. இந்த தைராக்சினில் பற்றாக்குறை ஏற்பட்டால் மனப்போராட்டம், வார்த்தை கோளாறு, உலர்ந்ததோல், உஷ்ணக்குறைவு ஆகிய பாதிப்புகள் ஏற்படும்.ஆனால் தைராய்டு அதிகமாக சுரந்தால் இவற்றிற்கு எதிரிடையான கோளாறுகள் ஏற்படும். நோயாளிகளின் எடை குறையும். நரம்புத்தளர்ச்சி, சோர்வு ஆகியவை ஏற்படும். நாடித்துடிப்பு அதிகரித்து எல்லா வேலைகளையும் படபடப்புடன் செய்யும்படியாக இருக்கும். உடலின் கொழுப்புச்சத்துகள் வற்றி உடலின் எடை குறைந்து விடும்.அளவுக்கதிகமான மெட்டோபோலிசம் எடையை குறைத்து விடுவது உண்மை என்றாலும், ஒல்லியாக இருக்கும் மனிதர்களுக்கு இது பொருந்துவதில்லை.இந்த தைராய்டுகளின் அளவுக்கதிகமான இயக்கத்தை டாக்டர் மூலம் சோதனை செய்தே கட்டுப்படுத்த வேண்டும். மேலும் தைராய்டுளை அதிகம் தூண்டாத உணவுப் பொருட்களை சாப்பிடலாம். எதற்கெடுத்தாலும் கவலைப்பட்டால் உடலின் மெட்டோபாலிசம் பாதிக்கப்படும். அதாவது சக்தி உற்பத்தியாகி சேமித்து வைக்கப்படுவது குறையும். கவலை அதிகம் கொள்வதால் உடலிலுள்ள சக்தி திரவமாக மாறிவிடுகிறது. இந்நிலை ரத்தஓட்டத்தை பாதிப்பதுடன் ரசாயன சுரப்பிகளையும் பாதிக்கும்.உணவு உண்ணும்போது கவலையுடன் உண்பதால் அவை ஜீரணிக்கப்படாமல் வீணாவதுடன் பல்வேறு கோளாறுகளையும் ஏற்படுத்துகின்றன. அதனால்தான் சாப்பிடும்போது எல்லா கவலைகளையும் மறந்து அமைதியாக சாப்பிட வேண்டும் என்று நம் முன்னோர்கள் வலியுறுத்தியுள்ளனர்.ரத்தம் மூலம் உடல் வெப்பம் சீராகிறதுரத்தம் உணவு, தண்ணீர், பிராணவாயுவை திசுக்களுக்கு எடுத்து செல்கிறது. கழிவுப்பொருட்களை கழிவு நீக்கும் உறுப்புகளுக்கு எடுத்து செல்கிறது. நோய்க்கிருமிகளை எதிர்க்கிறது. சுரப்பிகள் சுரப்பு மற்றும் என்சைம்களை விநியோகிக்கிறது. உடல் முழுமைக்கும் ஒரேவிதமான வெப்பத்தை தருகிறது. எங்காவது ரத்தப்போக்கு ஏற்பட்டால் உறைவதின் மூலம் ரத்தஇழப்பை தடுக்கும். இவ்வாறு ரத்தம் பல்வேறு செயல்பாடுகளை செய்து உடலை காத்து வருகிறது.ஒருவர் நோயுற்றோ, விபத்திற்கு உள்ளாகியோ மிகுந்த ரத்தச்சேதம் ஏற்பட்டு விட்ட நிலையிலே மாற்று ரத்தம் செலுத்த வேண்டிய அவசியம் ஏற்படுகிறது. அதுபோன்ற நேரங்களிலே எல்லோருடைய ரத்தத்தையும் செலுத்தி விட முடியாது.சம்பந்தப்பட்டவரின் ரத்தம் எந்த வகை என்பதை அறிந்தே அவருக்கு ரத்தம் செலுத்தப்படுகிறது. ரத்தச் சிவப்பணுக்களில் உள்ள அக்குளுடினோஜன் என்னும் பொருளை பொறுத்து ரத்தம் நான்கு வகைகளாக பிரிக்கப்படுகிறது.ஏ பிரிவு ரத்த நோயாளிக்கு ஏ மற்றும் ஓ பிரிவு ரத்த வகைகளை செலுத்தலாம்.பி பிரிவு ரத்தவகைக்கு பி மற்றும் ஓ பிரிவு ரத்தம் ஏற்று கொள்ளக்கூடியது. ஏபி பிரிவிற்கு எல்லா வகை ரத்தப்பிரிவையும் செலுத்தலாம்.ஓ பிரிவு ரத்த பிரிவினர்க்கு ஓ வகை ரத்தம் மட்டுமே சேரும். இதனால் ஓ பிரிவு ரத்தமுள்ளவர்களை அனைவருக்கும் கொடுக்கக்கூடிய ரத்தவகை உடையவர்கள் என்றும் (யுனிவர்சல் டோனர்) என்றும், ஏபி பிரிவினர்க்கு அனைவரிடம் இருந்தும் பெற்று கொள்ளக்கூடிய ரத்தவகை உடையவர்கள் என்றும் கூறுவர்.

தகவல் பலகை

குளிர்காலத்தில் நம் மூச்சு புகை போல வெளியேறுவது ஏன்?பொதுவாக நாம் வெளிவிடும் மூச்சுக்காற்றில் கார்பன்டை ஆக்சைடும், நீராவியும் நிரம்பியுள்ளன. நாம் வெளிவிடும் மூச்சுக்காற்று 40 டிகிரி செல்சியஸ் வெப்பநிலையில் உள்ளது. வெளிப்புற வெப்பநிலையோ மூச்சுக்காற்றைவிட சற்று குறைவாகவே அமைந்திருக்கும். அந்த வெப்பநிலையில் நமது மூச்சுக்காற்று வெளிக்காற்றோடு கலந்து விடும். எனவே அது நமது கண்ணுக்கு புலப்படாது. ஆனால் குளிர்காலம், குளிர்பிரதேசங்களில் வெளிக்காற்றின் வெப்பநிலை மிகவும் குறைவாகவே இருக்கும். அந்தவேளையில் நமது மூச்சுக்காற்று வெளியேறியவுடன் தனது வெப்பநிலையில் 10 டிகிரி சென்டிகிரேட் குறையும். எனவே அதில் உள்ள நீராவியும், கார்பன்டை ஆக்சைடும் மிகச்சிறிய நீர்த்திவலைகளாக மாறிவிடும். அவை வெளிக்காற்றில் உடனடியாக கலக்காமல் மிதந்து செல்லும். அந்த நீர்த்திவலைகளே நமது கண்களுக்கு புகைபோல தோன்றுகின்றன.மூக்கில் இருந்து ரத்தம் வருவது ஏன்? மூக்கில் இருந்து ரத்தம் வந்தால் தலையை முன்பக்கமாக சற்றே குனிந்து தலையை வைத்துக் கொள்ள வேண்டும். பின்பக்கம் சாயக்கூடாது. அவ்வாறு செய்தால் மூக்கில் உள்ள ரத்தம் தொண்டை வழியாக வயிற்றுக்குள் சென்றுவிடும். இதனால் வாந்தி உணர்வு ஏற்பட்டுவிடும்.முன்பக்கம் சாயும்போது மூக்கினுள் உள்ள ரத்தம் வெளியேறிவிடும். பின்பு கட்டைவிரல் ஆட்காட்டி விரலால் மூக்கைமூடி கொண்டு மூக்கின் மையப்பகுதியில் எலும்பு முடியும் பகுதிக்கு சற்று கீழேவிரல்களை வைத்து அழுத்த வேண்டும்.5முதல் 10நிமிடம் இவ்வாறு செய்தால் ரத்தம் நின்று விடும். ரத்தம் நிற்காவிட்டால் மூக்கின் மேல் ஒரு மெல்லிய துணியில் ஐஸ்கட்டியை வைத்தால் ரத்தம் வடிவது நின்று விடும். ரத்தம் நின்றதும் மூக்கைப்பிடித்து திருப்பவோ, சீந்தவோ கூடாது. இதுபோன்ற செய்கையினால் ரத்தம் மீண்டும் வர வாய்ப்புள்ளது.மூக்கின் வறட்சி, உயர்ரத்தஅழுத்தத்தினால் மூக்கின்வழியே ரத்தம் வருகிறது. தமனி கெட்டிப்பட்டுவிடுவதனால் ரத்தத்தின்அடர்த்தி குறைவதாலும் இதுபோன்று ரத்தம் வெளியேறும்.வாழையின் குளுக்கோஸ் சத்து குழந்தைகளுக்கு ஏற்றதுவாழை எல்லா பருவத்திலும் கிடைக்கும். உடல் வளர்ச்சிக்கு அவசியமான எல்லா சத்துக்களும் இதில் அடங்கி உள்ளன. ஒரு பெரிய வாழைப்பழம், 20 திராட்சை, 4 பேரீச்சம்பழம், 2 அத்திப்பழம், ஒரு சிறிய ஆப்பிள், ஒரு கோப்பை ஆரஞ்சுசாறு ஆகியவற்றிற்கு சமமாகும். குளுக்கோஸ் சத்து அதிகம் இருப்பதால் வளரும் குழந்தைகள் நல்ல பலன் பெற முடியும். வாழையில் மலைவாழை, நேந்திரம், ரஸ்தாளி, பூவன், பேயன் என்று பல்வேறு வகைகள் உண்டு.பயன்கள்: இளமையின் இயற்கை ரகசியமாக போற்றப்படுகிறது பழம் இது. திசுக்களை புதுப்பிக்க உதவும். உடம்பின் வளர்சிதை மாற்றத்தில் முக்கிய பங்கு வகிக்கும். பெருங்குடல் இயக்கத்தை இயல்பாக்க வாழைப்பழம் உதவும். இதனால் மலம் கழித்தல் எளிதாகும். மூட்டுவலி, முழங்கால் வீக்கம் இருந்தால் வாழைப்பழத்தை தொடர்ந்து 3 முதல் 4 நாட்கள் உணவாக கொள்ளலாம். சமைத்த வாழைப்பூவை தயிருடன் சேர்த்து உண்ண மாதவிடாய்க்கால வலி, மிதமிஞ்சிய ரத்தப்போக்கு கட்டுப்படும். நன்கு பழுத்த வாழைப்பழத்தை அடித்து கலக்கி மென்னையான பசை போல் செய்து கொள்ள வேண்டும். இதை காயங்களில் பரவலாகப்பூசி துணிக்கட்டு போடலாம். இதனால் உடனடி நிவாரணம் கிடைக்கும். சிப்ஸ் தயாரித்தும் உண்ணலாம். வாழைப்பழம் குழந்தைகளுக்கும், நோய்களுக்கும் நிறைவான உணவாக இருக்கும். குளிர்சாதனப்பெட்டியில் வைக்க கூடாது. ஏனென்றால் அதன் குறைவான வெப்பநிலை பழங்களை முழுமையாக பழுக்க விடாமல் செய்துவிடும்.

இறந்த பிறகும் உலகை பார்க்கலாம்

இந்தியாவில் ஒவ்வொரு ஆண்டும் ஆக.25 முதல் செப்.8ம் தேதி வரை தேசிய கண்தான இருவாரவிழா கொண்டாடப்படுகிறது. பார்வையின்மையை கட்டுப்படுத்தும்விதமாக இது அனுசரிக்கப்பட்டு வருகிறது. கண்பார்வை இழப்பு இந்தியாவில் அதிகம். சுமார் ஒன்றரை கோடி பேர் பார்வை குறைபாட்டினால் பாதிக்கப்பட்டுள்ளனர். இதில் 60 சதவீதம் பேர் 12 வயதிற்கு உட்பட்டவர்கள் என்பதுதான் வேதனை.40 லட்சத்திற்கும்மேல் கார்னியா குறைபாட்டினால் பாதிக்கப்பட்டு கருவிழிக்காக ‘காத்துக்கொண்டுள்ளனர்’. ஆனால் கிடைக்கும் கருவிழிகளோ ஆண்டிற்கு 19 ஆயிரம் மட்டும்தான். இதனால் ‘உலகை பார்க்கும் வாய்ப்பு இருந்தும்’ லட்சக்கணக்கானோர் தொடர்ந்து இருளிலே பரிதவித்து வருகின்றனர். பற்றாக்குறை இருப்பதால்தான் ஒரு கண்ணிற்காவது பார்வை கிடைக்கட்டுமே என்ற நோக்கில் ஒருவர்க்கு ஒரு கருவிழி வீதம் பொருத்தப்பட்டு வருகிறது. கார்னியா பாதித்தால் ஏன் பார்வை தெரிவதில்லை? ஏனென்றால் கார்னியா எனப்படும் விழிவெண்படலம் பாதிக்கப்பட்டால் ஒளிக்கதிர்கள் உள்ளே செல்வது தடுக்கப்பட்டுவிடும். இதனால் விழித்திரையில் பிம்பம் படியாமல் பார்வை குறைபாடு ஏற்படுகிறது. தொற்றுநோய் கிருமிகள், விபத்து, ஊட்டச்சத்துகுறைவு, கண்சிகிச்சை குறைபாடு மற்றும் பிறவியிலேயே இப்பிரச்னை ஏற்படலாம். கண்தானத்தைப் பொறுத்தளவில் ஒருவயது நிரம்பிய குழந்தை முதல் எந்தவயதினரும் செய்யலாம். கண்ணாடி அணிந்தவர்களும் கண்ணில் கண்புரை நீக்க அறுவைச் சிகிச்சை(காட்ராக்ட்) செய்தவர்களும்கூட தானம் அளிக்கலாம். எய்ட்ஸ், மஞ்சள்காமாலை, வெறிநாய்க்கடி, பாம்புக்கடி, புற்றுநோய், மூளைக்கட்டி போன்றவற்றால் இறந்தவர்களின் கண்கள் தானமாகப் பெற முடியாது.இறந்தவர்களின் கண்களை அப்படியே எடுத்து மற்றவர்களுக்கு பொருத்தப்படுகிறது என்று பலரும் தவறாக நினைக்கிறார்கள். இது உண்மையல்ல. கண்ணில் உள்ள கார்னியா எனும் கருவிழியை மட்டுமே எடுத்து பார்வையிழந்தவர்களுக்கு பொருத்தப்படுகிறது. கண்தானம் பெற்றபிறகு இமைகளை மூடி தைத்துவிடுவதால் முகம் விகாரமாக தோன்றாது.பதிவுசெய்யாதவர்களிடம் இருந்து கூட கண்கள் தானமாகப் பெறப்படுகிறது. இதற்கு இறந்தவரின் மகன், மகள் ஆகியோரின் ஒப்புதல் இருந்தால் போதுமானது. இறந்து சுமார் 6 மணி நேரத்திற்குள் இவற்றைப் பெற்று 48 மணிநேரத்திற்குள் மற்றவர்களுக்குப் பொருத்திவிட வேண்டும்.மருத்துவர்குழு வரும்வரை கண்களில் சுத்தமான தண்ணீர்விட்டு இமைகளை மூடிவைக்க வேண்டும். அல்லது சுத்தமான ஈரத்துணியை போட்டு வைக்கலாம். இது கார்னியா குளிர்ச்சியாக இருக்க உதவும். தலையணை வைத்து இறந்தவர்களின் தலையை உயர்த்தி வைக்க வேண்டும். மின்விசிறியை அணைத்து வைக்க வேண்டும். 15 முதல் 20 நிமிடத்திற்குள் கண்கள்தானமாக எடுத்துக்கொள்ளப்படும். தானம் அளிக்க விரும்பும் உறவினர்கள் அருகில் உள்ள அரசுமருத்துவமனை, கண் வங்கிகளுக்குத் தொடர்பு கொண்டு தெரிவித்தால் போதும்.மக்கள்தொகையின் அடிப்படையில் இந்தியாவைவிட இலங்கை பல மடங்கு குறைவு. ஆனால் இந்தியாவிற்கு தேவையான கண்கள் அதிகம் இலங்கையில் இருந்தே பெறப்படுகிறது. காரணம், இலங்கையில் கண்தானம் கட்டாயமாக்கப்பட்டிருப்பதுதான். நம் நாட்டிலும் இதுபோன்ற விழிப்புணர்வை ஏற்படுத்த வேண்டும்.

தெரிஞ்சுக்கலாம் வாங்க...

பொதுவாக மண் உலர்ந்திருக்கும் நிலையில் ஸ்ட்ரெப்டோமைசெட்டிஸ் எனும் பாக்டீரியாக்கள் இணைந்து கிடக்கின்றன. மழைநீரானது மண்ணில் விழுந்தவுடன் இந்த பாக்டீரியாக்கள் பிளவுற்று ஜியோஸ்மன், மீதைல் ஐசோபோர்நியால் என்னும் வேதிப்பொருட்களை வெளிப்படுத்துகிறது. இந்த வேதிப்பொருட்களே மண் வாசனைக்கு காரணம்.மிளகில் பப்பாளி விதைகள் கலப்படமாகப் பயன்படுத்தப்படுகிறது. சுருங்கி, பசும்பழுப்பு அல்லது கரும்பழுப்பு நிறத்தில் தோற்றமளிப்பதால் பார்த்த உடனே இவற்றை எளிதாக கண்டுபிடித்து விடலாம். மேலும் கருமிளகை கடித்தால் ஏற்படும் காரகுணம் பப்பாளிவிதையை கடித்தால் ஏற்படாது. இதை வைத்தும் உணர்ந்து கொள்ளலாம்.மஞ்சள்தூளில் நிறமேற்றப்பட்ட மரத்தூள் கலப்படமாக பயன்படுத்தப்படுகிறது. கண்ணாடி டம்ளரில் இந்த மஞ்சளை போட்டு தண்ணீர் ஊற்றி கலக்கினால் மஞ்சள் கரையும். மரத்தூள் தண்ணீரில் மிதக்கும். இதை வைத்து கலப்படம் என்பதை உணர்ந்து கொள்ளலாம்.காப்புரிமை என்பது தான்புதியதாக கண்டுபிடித்த, உருவாக்கிய ஒன்றை பதிவு செய்து கொள்வது ஆகும் இதன் மூலம் மற்றவர்கள் இவர்களின் கண்டுபிடிப்பை பயன்படுத்துதல், விற்பனை செய்தல் போன்றவற்றைத் தவிர்க்கலாம். காப்புரிமை என்பது கண்டுபிடிப்பாளர்கள் தங்கள் கண்டுபிடிப்புகளின் விபரங்களை பொதுமக்களுடன் பகிர்வதற்காக அரசு வழங்கும் வரையறுக்கப்பட்ட சொத்துரிமை ஆகும். பிற சொத்துரிமை போன்றே இதை விற்கலாம். உரிமம் வழங்கலாம். அடமானம் வைக்கலாம். பிறருக்கென நியமிக்கலாம், மாற்றலாம், அளிக்கலாம் அல்லது எளிதில் கைவிடலாம்.பாம்புகள் அதன் வயிற்றின் மூலம் அதிர்வுகளை உணரும். எனவே புதர் பகுதியில் நடக்கும் போது செருப்புகளை உராசி கொண்டு சப்தம் எழுப்பியபடி நடப்பது நல்லது. புதர், கழிவு குவியல்கள் பாம்பிற்கு பிடித்தமான இடம். எனவே புதர், சருகு குப்பைகள் இல்லாமல் பராமரிக்க வேண்டும். வீட்டைச் சுற்றி குழி, பொந்து இருந்தால் உடன் அவற்றை மூடி விட வேண்டும்.தபால் பட்டுவாடாவை விரைவாகச் செய்து முடிக்க அஞ்சல்குறியீடு உதவுகிறது. இந்தியாவில் நடைமுறையில் உள்ள போஸ்டல் குறியீடு போஸ்டல் இன்டெக்ஸ் நம்பர் என்று அழைக்கப்படுகிறது. பின்கோடில் 6 இலக்க எண்கள் இருக்கும். பின்கோடு அமைப்பு 1972 ஆக.15ல் நடைமுறைக்கு வந்தது.

விமானத்தில் பிறக்கும் குழந்தைக்கு எந்தநாட்டு குடியுரிமை வழங்கப்படும்?

பயண நேரங்களை குறைத்ததில் விமானங்களின் பங்கு அலாதியானது. தரை கடந்த இவ்வகை பயணங்கள் இன்றைக்கும் பலருக்கும் ஆச்சரியங்களையே ஏற்படுத்தி வருகின்றன. விமானம் குறித்த தெரியாத சில விபரங்களை தற்போது அறிவோம்.விமானிகள் இருக்கும் அறை ‘காக்பிட்’ என்று அழைக்கப்படுகிறது. இதில் மற்றவர்கள் அவ்வளவு சீக்கிரம் நுழைந்து விட முடியாது. இந்த கதவை திறக்க சீக்ரெட் கோட் நம்பர் உண்டு. ஒவ்வொரு பயணத்திலுமே இந்த எண் மாற்றப்படும்.விமானம் பறக்கும் போது யாராவது இந்த எண்ணை அழுத்தி நுழைய முயன்றால் கேமரா மூலம் பைலட் தெரிந்து கொள்வார். ஊழியர் என்றால் அனுமதிப்பார். மற்றவர்கள் என்றால் கதவை திறக்க முடியாத அளவிற்கு லாக் செய்து கொள்ளும் வசதி காக்பிட்டில் உண்டு.அதிக உயரத்தில் பறக்கும் போது ஆக்சிஜன் மாஸ்க் அணிந்து கொள்ள வேண்டியதிருக்கும். அதில் சில சிரமங்கள் ஏற்படலாம் என்பதற்காகவே தாடி, மீசையுடன் பைலட்டுகளை விமானங்களை இயக்க அனுமதிப்பதில்லை. குறிப்பிட்ட உயரத்தை அடைந்ததும் விமானம் இயக்க அதிக சக்தி தேவைப்படாது. மலைப்பகுதியில் இறங்கும் வாகனங்கள் போல குறைவான ஆற்றலே இதற்கு போதுமானது.  விமானத்தில் நான்கு இஞ்சின்கள் இருக்கும். எனவே நடுவானில் பழுதாகிவிட்டால் விபத்து ஏற்பட்டுவிடுமோ என்ற அச்சம் தேவையில்லை. விமான ஓடுபாதையில் கால்நடையோ, பிற விமானமோ அதீத பலத்துடன் வீசும் பக்கவாட்டு காற்றோ இருந்தால் தரை இறங்க முடியாது. எனவே மீண்டும் டேக் ஆப் ஆகி வட்டமடித்து கொண்டு இருக்கும். நடுவானில் குழந்தை பிறந்தால் அந்த குழந்தைக்கு எந்த நாட்டு குடியுரிமை வழங்கப்படும் என்று எண்ணம் பலருக்கும் ஏற்படும். இதை மூன்று வகையில் தீர்மானிக்கிறார்கள். பதிவு பெற்ற விமானத்தின் நாடு, எந்த நாட்டின் மேலே பறக்கிறதோ அந்த நாடு அல்லது எந்த நாட்டில் தரையிறங்குகிறதோ அந்த நாடு என்ற விதிமுறையை உருவாக்கி இருக்கிறார்கள். பெரும்பாலும் விமானம் பதிவு செய்யப்பட்ட நாடே கணக்கிடப்படுகிறது. மின்னல், சூறாவளி, பறவைகள் போன்றவை தாக்காதவாறு தற்போதைய விமானங்கள் அதிநவீன தொழில்நுட்பத்துடன் உள்ளன. விமானம் விபத்திற்கு உள்ளாகும் போது சட்டென்று பலருக்கும் பாராசூட் கொடுக்க முடியாது. அதில் இறங்க பயிற்சியும் இருக்காது என்பதால் இம்முறை கடைபிடிப்பதில்லை. மேலும் மிதமான வேகத்தில் பறக்கும் விமானத்தில் இருந்தே பாராசூட்டில் குதிக்க முடியும். மேலும் 16 ஆயிரம் அடிக்கு குறைவாக இருந்தால் மட்டுமே பாராசூட்டுடன் வெளியேற முடியும். விமானத்தில் கடைசி 5 இருக்கையில் இருப்பவர்களுக்கு விபத்துகளில் இருந்து தப்பிக்கும் வாய்ப்பு 50 சதவீதம் உள்ளது.

பல வண்ண நம்பர் பிளேட்டுக்கான காரணம் என்ன தெரியுமா....?

வாகனங்களின்  தனித்துவ அடையாளமாக நம்பர் பிளேட் உள்ளது. வாகனங்களை இனங்காணுதலில் உள்ள  சிரமங்களை குறைக்க இதுபோன்ற முறை கடைபிடிக்கப்பட்டு வருகிறது. பார்ப்பதற்கு  வெறும் எண் போல தெரிந்தாலும் இதில் பல்வேறு நுணுக்கங்கள்  கையாளப்படுகின்றன. அந்தந்த மாநிலத்தை குறிக்கும் வகையில் முதல்  எழுத்துக்கள் ஆங்கிலத்தில் இருக்கும். உதாரணமாக நம் மாநிலத்திற்கு TN  என்று துவங்கும். பின்பு அந்தந்த ஆர்டிஓ.அலுவலக எண் வரும். உதாரணமாக  திண்டுக்கல்லைப் பொறுத்தளவில் 57, மதுரை தெற்கு 58,  பெரியகுளத்திற்கு (தேனி) 60 என்று இருக்கும். அதனைத் தொடர்ந்து Aல் துவங்கி  1,2,3 என்று 9999 வரை ஒவ்வொரு வாகனத்திற்கும் நம்பர் வழங்கப்படும். பின்பு  AA, AB என்று துவங்கி AZ வரை 1 முதல் 9999 வரை நம்பர்கள் அளிக்கப்படும். என்றைக்கு  ZZ 9999 நம்பர் வருகிறதோ, அதன் பின்பு ஆர்டிஓ. அலுவலக எண் மாற்றப்பட்டு  முன்பு போல Aல் இருந்து மீண்டும் பதிவுகள் துவங்கும். அரசு பேருந்துகளைப் பொறுத்தளவில் TN 57க்குப் பிறகு N என்ற ஆங்கில எழுத்து மட்டுமே பயன்படுத்தி நம்பர்கள் வழங்கப்படுகிறது. இப்போது நம்பர் பிளேட்களின் வகைகளைப் பார்ப்போம். வெள்ளைப் பின்னணியில்  கருப்பு எழுத்தில் நம்பர்கள் எழுதப்பட்டிருந்தால் அது சொந்த  பயன்பாட்டிற்கான வாகனம். பயணிகளையோ, பொருட்களையோ அதில் ஏற்றக் கூடாது. இதேபோல் மஞ்சள் பின்னணியில் கருப்பு எழுத்தில் நம்பர் எழுதப்பட்டிருந்தால்  அது வாடகை வாகனம். ஆட்டோ, டாக்சி, லாரி உள்ளிட்ட பல்வேறு வாகனங்களைச்  சொல்லலாம். நீலக் கலர் பின்னணியில் வெள்ளை எழுத்துக்கள் உள்ள  வாகனங்கள் வெளிநாட்டு தூதர்களுக்கான வாகனம். டில்லி போன்ற இடங்களில் இதுபோன்ற வண்டிகளை அதிகம் பார்க்கலாம். கறுப்பு பின்னணியில் மஞ்சள் வண்ண  எண்கள் இருந்தால் அது வர்த்தகத்திற்கான வாகனம். தொழிற்சாலை உள்ளிட்ட  தனிப்பட்ட தேவைக்கான வண்டி அது. சிவப்பு கலர் பின்னணியில் வெள்ளை  அல்லது கோல்டன் கலரில் நம்பர்கள் எழுதி இருந்தால் அது ஜனாதிபதி, கவர்னர்  போன்ற உயர் அரசு பதவியில் உள்ளவர்கள் பயன்படுத்தும் வாகனம். சில  வாகனங்களின் எண்களுக்கு முன்னதாக மேல்நோக்கிய அம்புக்குறியும்  வழக்கத்திற்கு மாறான எண்களுடனும் காணப்படும். இந்த வகை வாகனங்கள்  ராணுவத்திற்குச் சொந்தமானது. என்சிசி உள்ளிட்ட துறைகளிலும் இதுபோன்ற நம்பர்  பிளேட்கள் பயன்படுத்தப்படுகிறது. சரி. ஒரு வண்டியின் நம்பரை வைத்து  அது எந்த ஊரில் பதிவு செய்யப்பட்டது. உரிமையாளர்யார், அது எந்தவகையான  வாகனம் என்பதை கண்டுபிடிக்க முடியுமா..? முடியும். இதற்காக உங்கள்  மொபைலில் உள்ள பிளே ஸ்டோர் மூலம் VAHAN REGISTRATION DETAILS ஐ கிளிக்  செய்து RTO VEHICLE INFORMATION எனும் செயலியை டவுன்லோடு செய்ய வேண்டும்.  பின்பு இதை கிளிக் செய்து சர்ச் எனும் இடத்தை கிளிக் செய்து நம்பரை  பதிவிட்டால் விபரங்கள் கொட்டும். உரிமையாளர் பெயர், கார், டூவீலர்  போன்ற எந்த வகையான வாகனம், பெட்ரோல், டீசலில் இயங்குகிறதா, என்ன கலர்,  எத்தனையாவது உரிமையாளர், சிசி. எவ்வளவு உள்ளிட்ட பல தகவல்கள் வரும். இதை  அப்படியே மற்றவர்களுக்கு வாட்ஸ்அப்பிற்கு அனுப்பும் வசதியும் இருக்கிறது. மேலும் ஒவ்வொரு ஊரிலும் பெட்ரோல், டீசல் விலை, பிரபலங்கள் வைத்துள்ள கார் வகை உள்ளிட்ட பல தகவல்களும் இந்த செயலியில் உண்டு.

பாலியல் மற்றும் இனவிருத்தி சுகாதார விழிப்புணர்வு தினம் இன்று!(12-02-2019)..

ஒவ்வோர் ஆண்டும் பிப்ரவரி 12-ம் நாள் பாலியல் மற்றும் இனவிருத்தி சுகாதார விழிப்புணர்வு தினம் (Sexual and Reproductive Health Awareness Day) கடைபிடிக்கப்படுகிறது. பாலியல் மற்றும் இனப்பெருக்கப் பிரச்னைகள் பற்றிய கல்வியை மக்களுக்குப் புகட்டி பால்வினை நோய் பரவலைக் குறைப்பதற்கான விழிப்புணர்வை மக்களிடையே ஏற்படுத்தும் விதமாக இந்த தினம் அனுசரிக்கப்படுகிறது.பால்வினைத் தொற்று நோய்கள் பெரியளவிலான பொது சுகாதாரப் பிரச்னைகளில் ஒன்றாகத் தொடர்ந்து இருந்து வருகின்றன. இந்த பிரச்னைகளைத் தடுப்பதற்கு சுகாதார விழிப்புணர்வு நிகழ்வுகள், பிரச்சாரங்கள் மேற்கொள்வதோடு, அந்த பிரச்னைகள் தீவிரமடையாதவாறு தடுத்து உயிர்களைக் காப்பதை முக்கிய நோக்கமாகக் கொண்டு இந்த தினம் அனுசரிக்கப்படுகிறது.பால்வினை சுகாதாரம் என்பது ஒரு நபரின் உடல், மனம் மற்றும் சமூகநல நிலை போன்றவற்றை உள்ளடக்கியது என்கிறது உலக சுகாதார நிறுவனம். பாலுறவை நேர் சிந்தனையோடும் கண்ணியத்தோடும் அணுக வேண்டும். இன்பம் அளிப்பதோடு பாதுகாப்பான அனுபவமாகவும் அந்த பாலுறவு இருக்க வேண்டியது அவசியம். ஆனால் அதில் வற்புறுத்தலும், பாரபட்சமும், வன்முறையும் கண்டிப்பாக இருக்கக் கூடாது.பால்வினை சுகாதாரம் என்பது பரந்துபட்ட ஒன்றாகும். அதற்குள் பல சவால்களும் பிரச்னைகளும் அடங்கியுள்ளன. பால்வினை சுகாதாரம் சம்பந்தமான மனித உரிமைகள், உடலுறவு இன்பம், பாலுணர்வு மற்றும் நிறைவு, பால்வினைத் தொற்று நோய்கள், இனப்பெருக்கப் பாதைத் தொற்று மற்றும் எச்.ஐ.வி/எய்ட்ஸ் போன்ற நோய்கள், வன்முறை, பெண்ணுறுப்பு சிதைத்தல், பாலியல் செயலிழப்பு, பாலியல் சுகாதாரத்தோடு தொடர்புடைய மனநலம் போன்ற அனைத்துமே கவனம் செலுத்தப்பட வேண்டிய முக்கிய பிரச்னைகளாக இருக்கிறது.பாலியல் மற்றும் இனவிருத்தி சம்பந்தப்பட்ட சுகாதாரப் பிரச்னைகள் குறித்த கேள்விகளுக்கு உடனடியாக பதிலளிக்கவும், அந்தரங்க ஆலோசனை சேவைகளுக்காகவும் தேசிய மக்கள் தொகை நிலைத்தன்மை நிதியம் ஒரு தொலைபேசி இணைப்பைத் தொடங்கியுள்ளது. இனப்பெருக்க சுகாதாரம், குடும்பக் கட்டுப்பாடு மற்றும் குழந்தைகள் நலம் பற்றிய அதிகாரப்பூர்வமான தொலைபேசி தகவலைப் பெற விரும்புபவர்கள் 1800-11-6555 என்ற எண்ணில் தொடர்பு கொள்ளலாம். இத்தொலைபேசி உதவி தினமும் காலை 9 மணி முதல் இரவு 9 மணி வரை கிடைக்கிறது.பால்வினை சுகாதாரம், பால்வினை நோய்கள், கருத்தடை, கர்ப்பம், மலட்டுத்தன்மை, கருக்கலைப்பு, பின் மாதவிடாய் நிலை, பருவமடைதல் குறித்த கேள்விகளுக்கு பதில் அளிப்பதோடு, ஆண்கள் மற்றும் பெண்களின் இனப்பெருக்க மண்டலம் செயல்படும் விதம் குறித்தும் உயர் அதிகாரிகள், மருத்துவர்கள் அடங்கிய ஒரு குழு விளக்கமளிக்கின்றது.இந்தியா போன்ற நாடுகளில் பால்வினை நோய்கள் என்பது ஒரு சமூக விலக்கான பிரச்னையாகவே தற்போதுவரை கருதப்பட்டு வருகிறது. மேற்சொன்ன தொலைபேசி இணைப்பு இது போன்ற தவறான கருத்துகளைப் போக்கும் முயற்சியில் ஈடுபட்டு வருகிறது. நட்பு வட்டம், வலைத்தளம், வாய்வழி செய்தி பரிமாற்றத்தைக் காட்டிலும் சரியானதொரு இடத்திலிருந்து பெறும் ஆலோசனையாக இருப்பதால் பொதுமக்கள் இச்சேவையை உரிய முறையில் பயன்படுத்திக் கொள்வது நல்லது.

மாருதி சுஸுகி

நாட்டின் மிகப்பெரிய கார் உற்பத்தி நிறுவனமான மாருதி சுஸுகி இந்தியா லிமிடெட் நிறுவனம், வருகிற 2020-ம் ஆண்டிற்குள் தனது பேட்டரி காரை அறிமுகம் செய்ய உள்ளதாக தெரிவித்துள்ளது.  இதைத்தொடர்ந்து, வேகன்ஆர் மாடல் காரில், முதல் பேட்டரி காரை தயாரித்து சோதனை ஓட்டமாக பரிசோதித்து வருகிறது. இதற்காக 50-க்கும் மேற்பட்ட கார்கள் தயாரிக்கப்பட்டுள்ளன. 72  வோல்ட் உள்ள 10-25 kWh லித்தியம்-அயன் பேட்டரி இந்த கார்களில் பயன்படுத்தப்பட்டு வருகின்றன. இதன் சோதனை ஓட்டம் முடிவடைந்த பின்னர் மாருதியின், முதல் பேட்டரி கார்  சந்தையில் விற்பனைக்கு வந்துவிடும். நிஸான் லீப் சமீப காலமாக கார் விற்பனையில் சக்கைப்போடு போடும் நிஸான் நிறுவனம், கிக்ஸ் என்னும் இரண்டாம் தலைமுறை லீப் பேட்டரி காரை அறிமுகம் செய்ய உள்ளது. இந்த நிறுவனத்தின்  பேட்டரி ரக கார்கள், உலக நாடுகளில் விற்பனைக்கு வந்துவிட்டது. மேலும், இந்நிறுவனத்தின் பேட்டரி கார்களே தற்போதுவரை அதிகம் விற்பனையாகும் கார்களில் முதல் இடத்தில் உள்ளது.  இந்த ஆண்டு இறுதிக்குள் இந்நிறுவனம் தனது பேட்டரி கார்களை இந்தியாவிலும் அறிமுகம் செய்ய இருப்பதாக அறிவித்துள்ளது. அதன்படி, மணிக்கு 100 கிமீ வேகத்தில் செல்லும், 150  குதிரைத்திறன் உடைய கார்களை சந்தையில் அறிமுகம் செய்ய உள்ளது. இந்த கார், 168 முதல் 258 கிமீ வரை மைலேஜ் தரக்கூடிய வகையில் இருக்கும் என நிஸான் அறிவித்துள்ளது.ஆடி ஈ-டிரான் மிகவும் எதிர்பார்க்கப்பட்ட ஆடி ஈ-டிரான் பேட்டரி கார் இந்த வருடத்திலேயே சந்தையில் களமிறங்க உள்ளது. போட்டி கார் தயாரிப்பு நிறுவனங்களுக்கு கடுமையான சவாலை கொடுக்கும்  வகையில் இந்த மாடல் உருவாக்கப்பட்டுள்ளது. எஸ்யூவி ரக மாடலில் வெளியாக இருக்கும் இந்த கார் 125kW ரேர் மோட்டார் மற்றும் 140 kW ஆகிய மோட்டார்களுடன் இயங்க உள்ளது.  இதனால், 561 என்எம் டார்க் திறனுடன் 300 முதல் 408 குதிரை திறனை வெளிப்படுத்த உள்ளது. மேலும், இதன் சிங்கிள் சார்ஜ் மூலம் 400 கிமீ தூரம் வரை பயணிக்க முடியும். இதன் அதிநவீன  மோட்டார்கள் 6.6 செகண்ட்ஸில் 100 கிமீ வேகத்தை தொடும் அளவுக்கு சக்தி வாய்ந்தவை என்பது குறிப்பிடத்தக்கது. டாடா டியாகோ உள்நாட்டு தயாரிப்பான டாடா கார் நிறுவனம் டியாகோ என்னும் பேட்டரி கார் மாடலை சந்தையில் விற்பனை செய்ய உள்ளது. கடந்த 2018-ம் ஆண்டில் நடைபெற்ற ஆட்டோ எக்ஸ்போவில்  டியாகோ பேட்டரி காரை டாடா நிறுவனம் அறிமுகம் செய்தது. டாடா இண்டிகாவைப்போல் இருக்கும் அதன் தோற்றம் சிறியளவில் இருந்தது பார்வையாளர்களை வெகுவாக கவர்ந்தது. இந்த  காரில் 30kW மின்மோட்டார் பொருத்தப்பட்டுள்ளது. ரெனால்ட் கிவிட் இந்திய சந்தையில் அறிமுகமாக இருக்கும் ரெனால்ட் பேட்டரி ரக கார், ஏற்கனவே பாரிஸ் நகரில் நடைபெற்ற 2018ம் ஆண்டு கார் கண்காட்சியில் இடம்பெற்றுவிட்டது. சீனாவில் தயாரிக்கப்பட்டு  வரும் இந்த மாடல் கார், இந்த வருடத்திலேயே இந்தியாவிலும் அறிமுகமாகிவிடும் என எதிர்பார்க்கப்படுகிறது. மேலும், இந்த காரில் பொருத்தப்பட்டுள்ள அதிநவீன வசதிகள் மற்ற பேட்டரி  கார்களைப்போலவே நவீன தொழில்நுட்பத்தை கொண்டவையாக இருக்கிறது. மஹிந்திரா ஈ-கேயூவி 100 நாட்டின் மிகப்பெரிய வாகன உற்பத்தி நிறுவனமான மஹிந்திரா, தனது பேட்டரி காரான மஹிந்திரா ஈ-கேயூவி100 மாடலை கடந்த 2018ம் ஆண்டு ஆட்டோ எக்ஸ்போவில் அறிமுகம் செய்தது.  இந்த மாடலை இந்த ஆண்டு அரையிறுதிக்குள் விற்பனைக்கு கொண்டுவர இருப்பதாக அந்நிறுவனம் அறிவித்துள்ளது. இந்த காரில், 72v லித்தியம் -அயன் பேட்டரி பொருத்தப்பட்டுள்ளது.  மேலும், இந்த காரில் 30kW (40.79) திறனை வெளிப்படுத்தும் மோட்டார் நிறுவப்பட்டுள்ளது. இது, 100 கி.மீ வேகத்தில் செல்லக்கூடியது. இந்த மாடலை தொடர்ந்து, எக்ஸ்யூவி 300 பேட்டரி  காரையும் சந்தையில் அறிமுகம் செய்ய உள்ளது மஹிந்திரா. இந்த மாடல் காரானது, தற்போது பெட்ரோல் மற்றும் டீசல் இன்ஜினில் விற்பனை செய்யப்பட்டு வருகிறது. மஹிந்திரா நிறுவனம்  இந்த மாடல் பேட்டரி காரை வரும் 2020-ம் ஆண்டுக்குள் அறிமுகம் செய்ய உள்ளது. அதிக மைலேஜ் கொடுக்கும் விதமாக இந்த காரில் இரு விதமான பேட்டரிகள் நிறுவப்படுகிறது.  இதன்காரணமாக, எக்ஸ்யூவி300 மாடல் 250 கி.மீ தூரம் வரை மைலேஜ் கொடுக்கும் என அறிவிக்கப்பட்டுள்ளது. டாடா டிகோர் டாட்டா நிறுவனத்தின் மற்றொரு பேட்டரி கார் தயாரிப்பான டாடா டிகோர் என்ற மாடலையும் சந்தையில் அறிமுகம் செய்ய உள்ளது டாடா நிறுவனம். இதன் அறிமுக தேதி தற்போதுவரை  அறிவிக்கப்படவில்லை. ஆனால், இது அடுத்த வருடத்தின் இறுதிக்குள் வெளிவந்துவிடும் என எதிர்பார்க்கப்படுகிறது. இந்த காரில் எலக்ட்ரா ஈவி என்னும் மோட்டார் பொருத்தப்பட்டுள்ளது. இது,  30kW (40.79) திறனை வெளிப்படுத்தும். இந்த காரை சாதாரண ஏசி பிளக் பாயிண்டில் வைத்து சார்ஜ் செய்யும்போது ஆறு மணி நேரத்திலும், டிசி அதிவேக சார்ஜர் போர்டில் வைத்து சார்ஜ்  செய்யும்போது ஒன்றரை மணி நேரத்திலும் முழுமையாக சார்ஜ் ஆகிவிடும். அவ்வாறு முழுமையாக சார்ஜ் செய்யப்பட்ட இந்த காரில், 130 கி.மீ வரை பயணிக்க முடியும்.எம்ஜி எலக்ட்ரிக் எம்ஜி கார் தயாரிப்பு நிறுவனம் தனது எஸ்யூவி ரக, முதல் பேட்டரி காரை இந்தியாவில் 2020-ம் ஆண்டுக்குள் அறிமுகம் செய்ய இருக்கிறது. தற்போது அறிமுகமாக இருக்கும் புதிய பேட்டரி  காரின் முழுமையான தகவல் அறியப்படாத நிலையில், அந்த நிறுவனத்தின் ஈ இஸட்எஸ் அல்லது ஈஆர்எக்ஸ்எஸ்5 மாடலை அறிமுகம் செய்யலாம் என எதிர்பார்க்கப்படுகிறது. ஹூண்டாய் கோனா கொரியன் கார் தயாரிப்பு நிறுவனமான ஹூண்டாய் தனது, கோனா என்னும் எலக்ட்ரிக் எஸ்யூவி மாடலை இந்தியாவில் முதன் முறையாக சமீபத்தில் அறிமுகம் செய்தது. கோனா எலக்ட்ரிக்  காரை ஒருமுறை முழுமையாக ரீசார்ஜ் செய்தால் 350 கிமீ வரை பயணிக்க முடியும். இந்த காரை 100kw திறனுடைய டிசி குயிக் சார்ஜர் மூலம் சார்ஜ் செய்யும்போது ஒரு மணி நேரத்திலும்,  சாதாரண ஏசி பாயிண்டில் சார்ஜ் செய்யும்போது குறைந்தது 6 மணி நேரத்திலும் முழுமையாக சார்ஜ் ஆகிவிடும். இந்த கார், இந்தியாவுக்கு புதிது என்றாலும், இந்த மாடல் கார், வெளிநாடுகளில்  பெட்ரோல், டீசல் ஆகிய இரு மாடல்களில் கிடைக்கின்றன. ஆனால், இந்தியாவில் எலக்ட்ரிக் மாடல்தான் முதலில் அறிமுகம் ஆக உள்ளது. இது, ஏரோடைனமிக்ஸ் வடிவமைப்பில் இருப்பதால்,  பேட்டரி ஆற்றல் விரயமாவது தடுத்து லாங் டியூரேஷன் பேட்டரி லைப் கொடுக்கிறது. இந்த காரில் பொருத்தப்பட்டுள்ள மிக சக்தி வாய்ந்த மின்மோட்டார் 131 பிஎச்பி பவரையும், 395 டார்க்யூ  திறனையும் வெளிப்படுத்தும். மணிக்கு 167 கிமீ வேகம் வரை செல்லும்.

ரயிலில் அபாய சங்கிலியை இழுத்தவர்களை எப்படி கண்டுபிடிக்கிறார்கள்?

ரயில் பயணத்தின்போது அவசர நேரங்களில் ரயில்களை நிறுத்த பைலட்(டிரைவர்), கார்டுகளை தேடிச் சென்று தகவல் சொல்ல முடியாது. எனவே அபாய சங்கிலி பயன்படுத்தப்படுகிறது. ஆரம்பத்தில் கோச்சின் இருபக்கமும் அதிகளவில் பயன்படுத்தப்பட்டன. ஆனால் தவறான பயன்பாடுகளே அதிகமாக இருந்தது. இதனால் பயண நேரம் அதிகரித்ததுடன், மற்ற ரயில்களுக்கும் இடையூறு ஏற்பட்டது. இதனால் இவற்றின் எண்ணிக்கை வெகுவாய் குறைக்கப்பட்டு தற்போது பெட்டியின் ஒரு பக்கம் மட்டுமே வைக்கப்படுகிறது. இது எப்படி செயல்படுகிறது என்று முதலில் பார்ப்போம். ரயிலின் சக்கரத்தின் அருகே பிரேக்பைப்பில் இந்த சங்கிலி இணைப்பு பிணைக்கப்பட்டிருக்கும். சங்கிலியை இழுத்ததும் பிரேக் குழாயில் இருந்து காற்று அழுத்தத்துடன் வெளியேறும். காற்று அழுத்தம் குறைவைதால் ரயிலின் வேகம் குறையும். இதைப்பார்த்ததும் பைலட் ரயிலை நிறுத்துவார். அதிவேகத்தில் சென்று கொண்டிருக்கும் போது இழுத்தால் ரயில் நிற்க 3 முதல் 4 நிமிடங்கள் எடுத்துக் கொள்ளும். எந்த கோச்சில் இருந்து சங்கிலி இழுக்கப்பட்டது என்று எப்படி தெரிந்து கொள்கிறார்கள்.? ஒவ்வொரு பெட்டியிலும் எமர்ஜென்சி கண்ணாடி இருக்கும். சங்கிலி இழுபட்டதும் அதில் உள்ள விளக்கு எரிவதுடன், ஒலியும் எழும்பும். இதை வைத்து ரயில்வே பாதுகாப்பு போலீசார், கார்டு உள்ளிட்டோர் சம்பந்தப்பட்ட பெட்டிக்கு வந்து விசாரணை நடத்தி விபரங்களை தெரிந்து கொள்வர். இதை எந்தமாதிரியான சூழ்நிலையில் இழுக்கலாம்.? பயணி யாராவது தவறிவிழுந்தால், ஸ்டேஷனில் உடன் வந்தவர்கள் ரயிலில் ஏற பரிதவிக்கும் போது, மாற்றுத்திறனாளிகள், வயதானவர்கள் ஏற உரிய நேரம் தராமல் ரயில் கிளம்ப முற்படும் போது, திருட்டு, அவசரகால சிகிச்சை தேவைப்படும் நேரங்கள் போன்ற ஏற்கத்தக்க நேரங்களில் இவற்றை இழுக்கலாம். தேவையில்லாமல் இவற்றை இழுத்து பயணத்திற்கு இடையூறு செய்தால் அதிகபட்சம் ஒருவருட சிறை மற்றும் ரூ.ஆயிரம் அபராதம் செலுத்த நேரிடும். இழுக்கப்பட்ட சங்கிலியை மறுபடியும் ரீசெட் செய்து பிறகு ரயில் மீண்டும் கிளம்பும்.

டிராக்டரின் பின் சக்கரம் பெரியதாக இருப்பது ஏன்?

டிராக்டருக்கு பின்னால் இருக்கக்கூடிய இரண்டு சக்கரங்கள் முன் சக்கரங்களை விட மிகப்பெரியதாக இருக்கும். டிராக்டரில் உள்ள இஞ்சின் வெயிட் அதிகமாக இருக்கும். அதனால் அதனை ஈடுகட்ட பின் சக்கரங்கள் பெரியதாக இருக்கிறது. இதனால் இஞ்சினில் இருந்து வரும் ஆற்றல் பின் சக்கரங்களுக்கு எவ்வித இயந்திர இழப்பும் இன்றி சென்று உந்தித்தள்ளும். முன் சக்கரங்களை விட பின் சக்கரங்கள் நிலத்தில் அதிகளவில் தொட்டு கொண்டு இருப்பதால் வாய்க்கால், வரப்பு, சீரற்ற பாதையில் செல்லும் போது எளிதில் சாயாது. மேலும் சேறு உள்ளிட்ட இடங்களில் புதையாது, பெரிய சக்கரம் என்பதால் நிலத்திற்கும், டிராக்டரின் கீழ் பகுதிக்கும் உள்ள இடைவெளி (க்ரவுண்ட் க்ளியரன்ஸ்) அதிகமாக இருக்கும். இதனால் வரப்புகளை தாண்டும் போது டிராக்டரின் கீழ் பாகம் உரசாது. பெரிய சக்கரம் என்பதால் குறைவான சுற்றுகளில் அதிக தூரம் கடக்க முடியும். மேலும் பின் சக்கரங்களுக்கு பின்னால் உழவு கருவிகள் உள்ளிட்ட இதர விவசாய தொழில்நுட்ப இயந்திரங்களை பொருத்தி கொள்ளவும் முடியும்.

மற்ற வாகனங்களை போல கப்பல் வேகமாக செல்ல முடிவதில்லை ஏன்?

கடல் வழி பயணங்கள்தான் உலகின் பல்வேறு கண்டுபிடிப்புகளுக்கும், காலனித்துவ அடிமைத்தனத்திற்கும் வழி வகுத்துள்ளது. வரலாற்றின் ஆரம்பநிலை வெகுதூர பயணங்கள் பெரும்பாலும் கடல்வழியே நிகழ்ந்திருக்கிறது. மற்ற துறைகளை போலவே கப்பல்களிலும் பல்வேறு தொழில்நுட்ப மாற்றங்கள் ஏற்பட்டுள்ளன. தற்போது ஏற்றுமதி, இறக்குமதி, பயணங்கள், போர் உள்ளிட்ட பல்வேறு பயன்பாட்டிற்கும் நவீன கப்பல்கள் உறுதுணையாக இருக்கின்றன. இருந்தாலும் பல ஆயிரம் டன் கப்பல்கள் மிதப்பது குறித்து இன்னமும் பலருக்கும் ஒரு ஆச்சரியம் இருந்து கொண்டே இருக்கிறது. கப்பல் ஆர்க்கிமிடீஸ் தத்துவத்திலே மிதக்கிறது. அதாவது திடப்பொருளின் எடை, வெளியேறும் திரவப்பொருளின் எடைக்கு சமம் என்ற கணக்கீட்டிலே இந்த கப்பல்கள் இயங்குகின்றன. இதை மிதப்பு விசை என்கிறார்கள். இந்த விசை எப்போதும் மேல்நோக்கியே இருக்கும். கப்பல்கள் நீரில் செல்லும் போது குறிப்பிட்ட அளவு நீரை பக்கவாட்டில் தள்ளும். விலகிய அந்நீர் மீண்டும் பழைய இடத்திற்கு வந்து மேல்நோக்கி விசையுடன் செயல்படும். அதனால் கப்பல்கள் மிதக்கின்றன. தரைவழி பயணம் போல கப்பல்களால் அவ்வளவு வேகம் பயணிக்க முடியாது. காரணம், காற்றை விட அதிக அடர்த்தியான நீரில் கப்பல்கள் குறிப்பிட்ட அளவு மூழ்கிக் கொண்டே இருப்பதுதான். இந்த அடர்த்தியை மீறி பயணிக்க அதிக ஆற்றல் தேவைப்படும். எனவே குறைவான வேகத்திலே செல்கின்றன. கப்பல்கள் குறிப்பிட்ட அளவு மூழ்கியபடி இருந்தால்தான் மிதக்கவும், சமநிலையிலும் இருக்கும். இதற்காக ஏராளமான அளவிற்கு தண்ணீர் உள்ளே சேகரிக்கப்பட்டிருக்கும். துறைமுகங்களில் ஆயிரக்கணக்கான டன் சரக்குகளை இறக்கும் போது எடை குறைந்து  நிர்ணயித்த அளவிற்கு மேல் எழுப்ப துவங்கும். இதனால் சமநிலை மாறி பக்கவாட்டில் அலைபாய நேரிடும். எனவே சரக்குகளை இறக்கியதின் மூலம் இழந்த எடைக்கு ஈடாக நீரை கப்பலில் நிரப்புவர். இதனால் கப்பல் இயல்பான நிலையில் நிற்கும்.மீண்டும் சரக்கு ஏற்றும் போதுஇந்நீரை வெளியேற்றுவர். துறைமுகங்களில் கப்பலின் பக்கவாட்டில் இருந்து நீர் அதிகளவு வெளியேறுவது இந்த காரணத்தினால்தான்.

இந்தியர்களை கொல்கிறதா மன அழுத்தம்?

நன்றி குங்குமம்அதிகநேரம் உழைப்பது உலகளவில் இந்தியர்களின் பெருமை. அதேசமயம், மூளையின் ஒவ்வொரு இன்ச்சிலும் ஏராளமான கமிட்மென்டுகளை நிறைப்பதால் மனஅழுத்தம் அதிகரித்து திடுக் மரணங்களும், நோய்களும் இந்தியர்களைத் துரத்தி வருகின்றன! தினசரி 12 மணி நேரத்துக்கும் மேலாக அலுவலக வேலைகள் உடல்நலனைக் காவு வாங்குவதோடு மகிழ்ச்சிக்கும் வேட்டு வைக்கின்றன என்பதை ஆய்வாளர்கள் ஒருவழியாக ஒப்புக்கொண்டுவிட்டனர். கிடுகிடு வேகத்தில் அதிகரிக்கும் இதயநோய், நீரிழிவு, உளவியல் பிரச்னைகள் அனைத்துக்கும் காரணம், வேலைப்பளுதான் என உலகளவிலான பல்வேறு ஆய்வறிக்கைகள் தகவல் கூறுகின்றன. அன்லிமிட்டெட் வேலை காரணமாக கடந்த 25 ஆண்டுகளில் இந்தியாவில் அதிகரித்துள்ள இதயநோயின் அளவு 34%. உலக சுகாதார அமைப்பின்(WHO) அறிக்கைப்படி 1971 - 2000 காலகட்டத்தில் அதிகரித்துள்ள நீரிழிவு நோயின் அளவு 12%. 19 ஆயிரம் இந்திய இளைஞர்கள் வாரத்திற்கு 52 மணிநேரம் பணிபுரிவது மேன் பவர் குழும ஆய்வில் தெரியவந்திருக்கிறது. மன அழுத்தத்தில் தடுமாறும் 95% இந்தியர்களுக்கு 40 வயதுக்குள்ளாகவே இதயநோய் தாக்குதல்கள் தொடங்கிவிடுவதை உறுதிப்படுத்தியுள்ளது இந்தியன் ஹார்ட் அசோசியேஷன் அறிக்கை (2018). இதில் மக்களுக்கு வழிகாட்டும் டாக்டர்களும் அடக்கம்!மன அழுத்தம் சார்ந்த பிரச்னைகளால் 2030ம் ஆண்டு இந்தியாவில் ஏற்படும் பொருளாதார இழப்பு 4.58 ட்ரில்லியன் டாலர்களாக இருக்கும் என்கிறது 2014ம் ஆண்டு வெளியான உலக வணிக அமைப்பு (WEF) மற்றும் ஹார்வர்ட் மருத்துவப்பள்ளி அறிக்கை. ஒருவரின் அலுவலகச்சூழல் அவரின் மரணத்திற்கு ஐந்தாவது காரணம் என விளக்கியுள்ளது ஸ்டான்ஃபோர்டு ஆராய்ச்சியாளர் ஜெஃப்ரி பெஃபர் எழுதிய ‘Dying for a paycheck’ என்ற நூல்.ஆபீஸில் பணியாளர்களின் மன அழுத்தம் போக்க கஃபே, ஜிம், நூலகம் என வசதிகளை அறிமுகப்படுத்தினாலும் நாள் ஒன்றுக்கு 13 மணிநேரம் வேலைசெய்யும்போது உங்களை ரிலாக்ஸ் செய்துகொள்ள எப்படி நேரம் கிடைக்கும்? ஜப்பான், தென்கொரியாவில் அதிகரிக்கும் மன அழுத்த தற்கொலைகளை தடுக்க மாலை 6 மணிக்கு மேல் பணியாளர்கள் ஆபீசில் இருக்கக்கூடாது என அந்நாட்டு அரசுகள் சட்டத்திருத்தங்களே கொண்டு வந்துள்ளன. தாராளமய பொருளாதாரத்தில் வேலை நெருக்கடி என்பது இயல்பானதாக மாற்றப்பட்டு அதனை நாம் ஏற்றுக்கொள்ளும் சமரசம்தான் மன அழுத்த தற்கொலைகளில் முடிகிறது.

மனஅழுத்தம் காரணமாக இந்தியர்கள் பேங்க் பேலன்ஸை உயர்த்தி நாற்பது வயதில் ஓய்வுபெறுவது அதிகரிக்கத் தொடங்கியுள்ளது இந்தப் பிரச்னையால்தான் என்கிறது ‘நியூயார்க் டைம்ஸ்’ நாளிதழ். ஆறு நாட்கள் வேலை என்பதை மாற்றி 5 நாட்கள் வேலை என்பதை உலகிலுள்ள பல்வேறு நிறுவனங்கள் கடைப்பிடிக்கத் தொடங்கியுள்ளன. நியூசிலாந்தைச் சேர்ந்த பர்பெக்சுவல் கார்டியன் நிறுவனம், 4 நாட்கள் மட்டுமே வேலை என அறிவித்து பாராட்டுகளைப் பெற்றுள்ளது. அமெரிக்காவின் டவர்பெடல் போர்ட்ஸ் நிறுவனம் (ஸ்டீபன் ஆர்ஸ்டல்), காலை 8 முதல் நண்பகல் 1 மணிவரை வேலை என ஐந்து நாட்களின் நேரங்களை மாற்றி பணியாளர்களின் மனதையும் லாபத்தையும் வென்றுள்ளது. வேலைப்பளு நெருக்கடியை மாற்றி உடல்நலனையும் மனநலனையும் பாதுகாக்க நாம் விழித்துக்கொள்ள வேண்டிய நேரம் இதுவே   
                          
-கோமாளி

குவிக் ரைட் ஆப்

நன்றி குங்குமம் தலைப்புதான் மேட்டரே!‘போற வழில என்னை டிராப் பண்ணிடுங்க...’ என காலையில் அலுவலகத்துக்கு பரபரப்பாக நாம் செல்கையில் யாராவது லிஃப்ட் கேட்கிறார்கள் இல்லையா... இதன் பின்னணியில் ‘லேட்டாக வந்தால் சம்பளத்தில் கைவைப்பேன்...’ என ஹெச்.ஆரில் தொடங்கி ‘நீயெல்லாம் வீட்லயே இருக்க வேண்டியதுதானே..?’ எனத் திட்டி ஃபைலை முகத்தில் வீசும் நிர்வாகி வரை பலரும் இருக்கிறார்கள் அல்லவா..?இதையெல்லாம் மனதில் வைத்துதான் பெங்களூரு நகர ‘iDisha Info Labs Pvt Ltd’ நிறுவன குழு ‘QuickRide’ App-ஐ டிசைன் செய்துள்ளனர். கேஎன்எம்.ராவ், ஷோபனா, நவீன், விஷால் லாவ்தி என நால்வர் அடங்கிய குழுதான் இதை வடிவமைத்திருக்கிறார்கள். ‘‘எங்க முதல் குறிக்கோளே டிராஃபிக் மற்றும் காற்று மாசை இந்தியாவுல கட்டுப்படுத்தறதுதான். உதாரணமா, இரண்டு கார்ல ஒவ்வொருத்தர் பயணம் செய்யறதுக்கு பதிலா ஒரே கார்ல இரண்டு பேரும் டிராவல் செய்தா ஓரளவு டிராஃபிக்கும் காற்று மாசும் குறையுமில்லையா..? ஒரே ஆபீஸ்ல வேலை பார்க்கிறவங்க, இல்லைனா ஒரே தெருவுல இருந்து வெவ்வேறு அலுவலகங்களுக்கு போறவங்க ஒரே வண்டில போனா பெட்ரோலும் மிச்சமாகுமே..? சாலைகள்ல வண்டிகள் எண்ணிக்கையும் குறையுமே..? இதையெல்லாம் யோசிச்சுதான் இந்த appஐ டிசைன் செய்தோம்...’’ கோரசாக சொல்லும் இவர்களுக்கு முதலில் பாதுகாப்பு முறைகள்தான் பெரும் சவாலாக இருந்திருக்கின்றன.எனவே,அலுவலக மெயில் ஐடி இருந்தால்தான் ஒரு நபர் தனக்கான கணக்கை குயிக் ரைடில் தொடங்க முடியும் என்ற கண்டிஷனை வைத்திருக்கிறார்கள்.இதில் உறுப்பினர்களாக வேண்டியவர்களிடம் கார் அல்லது பைக் இருக்க வேண்டும். அப்போதுதான் லிஃப்ட் கொடுப்பவராகவோ லிஃப்ட் கேட்பவராகவோ மாற முடியும். இந்த app இல் கணக்காளர்களின் வண்டி எண், அலுவலக முகவரி, போன் நம்பர் என அனைத்தும் இருப்பதால் பாதுகாப்பு குறித்து அச்சப்பட வேண்டியதில்லை. இதன் மூலம் எரிபொரு ளுக்காக நாம் செலவழிக்கும் தொகை கணிசமாகக் குறைகிறது.இந்த அடிப்படையிலேயே இன்று Carpool, RideShare, Waze, Bikepool என நிறைய apps இந்தியாவில் இயங்குகின்றன.

‘‘கடந்த ஆறு மாதங்களா இந்த appஐ பயன்படுத்தறேன். என் அலுவலகத்தை சேர்ந்தவங்களே எனக்கு கஸ்டமர்களா இருக்காங்க. இப்ப எனக்குனு தனி கிளப்பே இருக்கு! இதுவரை நான் பார்க்காத பக்கத்து தெரு ஆட்கள் எல்லாம் இப்ப நண்பர்களா ஆகிட்டாங்க!’’ எனப் புன்னகைக்கிறார் சாஃப்ட்வேர் ஆர்க்கிடெக்ட்  சிவதாணு. இதை ஆமோதிக்கிறார் ஐடி ஊழியரான ராம் கணேஷ். ‘‘இதுவரை 480 ரைட் ஷேர் பண்ணியிருக்கேன்.  நம்மால எவ்வளவு கிலோ கார்பன் டை ஆக்சைடு குறைஞ்சிருக்குனு ஆரம்பிச்சு எத்தனை ஃப்ரெண்ட்ஸ் நமக்கு கிடைச்சிருக்காங்கனு எல்லா விவரங்களும் appல வந்துடும்!’’ என்கிறார் ராம் கணேஷ்.    
-ஷாலினி நியூட்டன்

சர்வதேச புற்றுநோய் தினம் !!

பிப்ரவரி 4புற்றுநோயை ஆரம்பத்திலேயே கண்டுபிடித்து, மருத்துவம் செய்வதன் அவசியம் குறித்த விழிப்புணர்வை ஏற்படுத்துவது, புற்றுநோயால் ஏற்படும் சமூக ஒதுக்கத்தை நீக்குவது, புற்றுநோயை எதிர்த்து போராடுவது போன்றவற்றை முக்கிய நோக்கமாகக் கொண்டு ஒவ்வோர் ஆண்டும் பிப்ரவரி 4-ம் நாள் சர்வதேச புற்றுநோய் தினம் (Word Cancer Day) கடைபிடிக்கப்படுகிறது.தனி நபர், குடும்பம் மற்றும் சமுதாயத்தின் மீது ஏற்படும் புற்றுநோய் தாக்கத்தின் பளுவைக் குறைக்கும் நடவடிக்கைகளில் அனைவரும் ஒன்றிணைந்து செயல்படுவதற்கு மக்கள் அனைவரையும் வலிமைப்படுத்துவதும் இந்த தினத்தை அனுசரிப்பதன் முக்கிய நோக்கமாக உள்ளது. மரபியல் பிறழ்ச்சி போன்ற மரபியல் சார்ந்த காரணிகள், சூழலியல் காரணிகள் அல்லது அறியப்படாத காரணிகளாலும் புற்றுநோய் உருவாகலாம்.இவற்றில் சிலவற்றைத் தடுக்கலாம், சிலவற்றைத் தடுக்க இயலாது. ஆனால் சில புற்றுநோய்களை ஆரோக்கியமான வாழ்க்கை முறை மற்றும் புகையிலை, மது போன்ற ஆபத்துக் காரணிகளைத் தவிர்ப்பதன் மூலம் வராமல் தடுக்கலாம். வேதிச்சிகிச்சை, கதிர்வீச்சு மற்றும் அறுவை சிகிச்சைகள் போன்ற நவீன மருத்துவ முன்னேற்றங்களைக் கொண்டு புற்றுநோயைக் குணப்படுத்தலாம். முழுமையாக குணப்படுத்த முடியாவிட்டாலும், மருத்துவத்தின் மூலம் நோயாளியால் ஒரு நல்ல வாழ்க்கையை வாழ முடியும்.தற்போது உலகளவில் புற்றுநோய் மிகவும் பரவலாகக் காணப்படுகிறது. இது அதிகமாகப் பேசப்படும் ஒரு பயங்கரமான நோயாகவும், மரண பயத்தோடு இணைந்த நோயாகவும் கருதப்படுகிறது. புற்றுநோய்க்கு மருத்துவத்தின் மூலம் முழுமையான ஒரு தீர்வு கிடைக்காவிட்டாலும், ஆரோக்கியமான வாழ்க்கை முறைகளைக் கடைபிடிப்பதன் மூலம் இந்த நோயோடு இணைந்துள்ள சமூக மற்றும் சுற்றுச்சூழல் ஆபத்துக் காரணிகளை நம்மால் குறைக்க முடியும்.நோய் குறித்த சொந்த அனுபவங்களை மற்றவர்களோடு பகிர்ந்துகொள்வதன் மூலம் வாழ்க்கையை தன்னம்பிக்கையோடு எதிர்கொள்ள முடியும். ஆரம்ப கட்ட நோய் கண்டறிதல் மூலம் உரிய சிகிச்சைகள் அளித்து உயிர்களைக் காப்பாற்ற முடியும் என்பதை அனைவரும் புரிந்துகொள்வது அவசியம்.

பல்சுவை கதம்பம்!

குடும்பக் கட்டுப்பாடு!ஒரு பட்டிமன்றம். பட்டிமன்றத்தின் தலைப்பு, ‘குடும்பக் கட்டுப்பாடு’. நடுவராக இருந்தவர் ம.பொ.சிவஞானம். குடும்பக் கட்டுப்பாடு தேவை என்ற பக்கத்தில் கவிஞர் கண்ணதாசன் பேச இருந்தார்.கண்ணதாசனுக்கு முன்பாக அவரது சீடர் அரு.நாகப்பன் குருவையே எதிர்த்துப் பேசினார்.“கவியரசரை இந்த மேடையிலேயே ஏற அனுமதித்திருக்கக் கூடாது. குடும்பக் கட்டுப்பாடு தேவை என்று அவர் எப்படி பேசமுடியும்?அவருக்கு பதினான்கு குழந்தைகள் அல்லவா? முதலில் அவரை மேடையை விட்டு இறக்குங்கள்”பார்வையாளர்களிடையே பயங்கர சிரிப்பொலி.அடுத்து கண்ணதாசன் மைக்கை பிடித்தார்.“பதினான்கு குழந்தைகள் பெற்ற எனக்குதான் குடும்பக் கட்டுப்பாடின் அருமை தெரியும்” என்று ஆரம்பித்தார்.அரங்கில் கைத்தட்டல் சப்தம் அடங்க ஐந்து நிமிடங்கள் ஆனது.ஃபேஸ்புக் : சில தகவல்கள்!*ஃபேஸ்புக்கின் நிறுவனர் ஸூகர்பெர்க்குக்கு colour blind பிரச்சினை இருக்கிறது. சில வண்ணங்களை அவரது கண்களுக்கு அடையாளம் தெரியாது. அவருக்கு நன்கு பழக்கப்பட்ட நிறம் நீலம். எனவேதான் ஃபேஸ்புக் நீலமாக இருக்கிறது.* 2006ஆம் ஆண்டு கிறிஸ் புட்னாம் என்பவர் ஃபேஸ்புக்கை ஹாக்கிங் செய்தார். ஆயிரக்கணக்கில் ஃபேக் புரொஃபைல்களை உருவாக்கி தொல்லை கொடுத்தார். அவர் மீது ஃபேஸ்புக் நிர்வாகம் சட்டப்பூர்வமாக நடவடிக்கை எடுக்கவில்லை. மாறாக லட்சங்களை சம்பளமாக கொடுத்து வேலைக்கு அமர்த்திக் கொண்டது.* ஃபேஸ்புக்கில் எவ்வளவோ ஆபாசப் படங்கள் பதிவேற்றப் படுகின்றன. ‘ரிப்போர்ட்’ செய்தால் கூட பல நேரங்களில் கண்டுகொள்ளப் படுவதில்லை. ஆனால் ஒரு தாய், குழந்தைக்கு பாலூட்டும் படத்தை பதிவேற்றினால் மட்டும், ஒரே ஒரு ரிப்போர்ட் வந்தால்கூட உடனடியாக நீக்கிவிடுகிறார்கள்.* 2011ஆம் ஆண்டு ஐஸ்லாந்து தன்னுடைய சட்டத்தை திருத்தி எழுத ஃபேஸ்புக்கில் பரிந்துரைகளை வரவேற்றது. இதில் பரிந்துரைக்கப்பட்ட சில சட்டங்களை ஏற்றும் கொண்டது.* ஃபேஸ்புக் நிறுவனத்தில் ஸ்டீவ் சென் என்பவர் சில வாரங்கள் பணிபுரிந்தார். இங்கு கிடைத்த அனுபவத்தை வைத்து அவர் ஒரு புதிய இணையத்தளம் தொடங்கி உலகப்புகழ் பெற்றார். அந்த தளம்தான் YouTube* ஃபேஸ்புக்கில் போட்டோக்களை பகிரும் வசதி இருப்பதை அந்நிறுவனத்தின் நிறுவனர் மார்க் ஸூகர்பெர்க் விரும்பவில்லை. சீன் பார்க்கர் என்பவரின் வற்புறுத்தலின் பேரிலேயே வேண்டா வெறுப்பாக அந்த வசதியை கொண்டுவந்தார். இன்று போட்டோ ஷேரிங்குக்காகவே ஃபேஸ்புக்கில் கதியாக கிடப்பவர்கள் பல லட்சம் பேர்.*இணையத்தளங்களின் மாஃபியாவான கூகுளால் ஃபேஸ்புக்கை மட்டும் வாங்கவே முடியாது. ஏனெனில், கூகுளின் பரம எதிரியான மைக்ரோசாஃப்ட் நிறுவனம், ஃபேஸ்புக்கில் முதலீடு செய்திருக்கிறது.*உலகமெங்கும் நடக்கும் விவாகரத்துகளில் மூன்றாவது பெரிய காரணம் ஃபேஸ்புக்காம். கல்யாணம் ஆனவர்கள், ஃபேஸ்புக்கில் கொஞ்சம் கவனமாக நடந்துக்கோங்க.அழகா தெரியணுமா?* உயரமா, ஒல்லியா இருந்தீங்கன்னா குறுக்கே கோடு போட்ட டிரெஸ் போட்டுக்கங்க. பளிச்சுன்னு பெருசா டிசைன் பண்ணியிருக்குற டிரெஸ்னா கூட ஓக்கேதான்.*குண்டாவோ, கொஞ்சம் குள்ளமாவோ இருந்தீங்கன்னா முடிஞ்சவரை பிளெய்ன் காஸ்ட்யூம் யூஸ் பண்ணுங்க. டிசைன்ஸ் இருந்தாலும் மத்தவங்க கண்ணை உறுத்தாதமாதிரி லைட்டா இருந்தா பரவாயில்லை.*நீங்க கொஞ்சம் கலரா இருந்தீங்கன்னா லைட் கலர் டிரெஸ்ஸில் டக்கரா தெரிவீங்க.*கொஞ்சம் கலர் மட்டுன்னு வெச்சுக்கங்களேன். டார்க்கும் இல்லாம, லைட்டும் இல்லாம மீடியமான கலர்லே டிரெஸ் பண்ணுங்க. கருப்பா இருக்குறவங்க ப்ளூ கலர்லே டிரெஸ் பண்ணா டாப்பா தெரிவாங்க.க்ளீனிங் டிப்ஸ்!*அடிக்கடி வாஷ்பேஷன் அடைத்துக் கொண்டு இம்சைப் படுத்துகிறதா? ஒரு கப் வினிகர், ஒரு கைப்பிடி சோடா பைகார்பனேட் எடுத்து கலந்துக்கங்க. அப்படியே வாஷ்பேஷனில் கொட்டி, அதுக்கு மேலே ஃபோர்ஸா தண்ணியையும் கொட்டுங்க. அடைப்பு நீங்கிடும்.*வாஷிங்மெஷினில் தோய்த்தால் சட்டை காலர்களில் அழுக்கு சரியாக போவதில்லை என்பது இல்லத்தரசிகளின் வருத்தம். ஓர் ஈஸியான வழியிருக்கு. நாளைக்கு காலையில்தான் துவைக்கப் போறீங்கன்னா, முன்னாடி நாள் இரவு சட்டையில் அழுக்கு இருக்குற இடத்துலே டால்கம் பவுடரை தடவிடுங்க. காலையிலே துவைச்சுப் பாருங்க. ஆச்சரியப்படுவீங்க.*பாத்திரங்களின் உட்புறம் கறை பிடிச்சிடுதா? முதல் நாள் இரவு அதில் குளிர்ந்த நீரை நிரப்பி அதில் கொஞ்சம் ப்ளீச்சிங் பவுடர் போட்டுவிடுங்க. மறுநாள் காலை சோப்பு போட்டு கழுவினால் பளிச்சிடும்.பல்வலியா?பாடாய்படுத்தும் வலிகளில் தலைவலியும், பல்வலியும்தான் உச்சம். அதுவும் இரவு நேரங்களில் பல் வலிக்க ஆரம்பித்தால் தூக்கம் தொலைவது நிச்சயம்.காலையில் போய் டாக்டரை பார்த்துக் கொள்ளலாம். அதுவரை அட்ஜஸ்ட் செய்ய ரெண்டு பாட்டி வைத்தியம் இருக்கு. தெரிஞ்சுக்கங்க. தப்பில்லை.*எந்த பல்லில் வலி இருக்கோ அந்த பகுதியில் கொஞ்சம் சர்க்கரையை அள்ளிப்போட்டு அப்படியே வாயை குதப்பிக்கிட்டு இருங்க. ஒரு 20, 25 மிளகை நன்றாக பொடிசெய்து ஒரு டம்ளர் தண்ணீரில் கலந்துக்கங்க. இந்த தண்ணீரை நன்றாக காய்ச்ச வேண்டும். காய்ச்சி எடுத்தவுடன் வலி இருக்கும் பகுதியின் வெளிப்புறத்தில் இந்த தண்ணீரை வைத்து ஒத்தடம் கொடுத்தால் வலிகுறையும்.*ஒரு வெங்காயத்தை பொடிப்பொடியாக நறுக்கி, வலிக்கிற பல்லுக்கு அருகில் வைத்து அப்படியே கொஞ்சநேரம் வாயை மூடிக் கொண்டிருந்தாலும் பல்வலி குறையும்வழுக்கைப் பிரச்சினையா?*உங்கள் தாயுடைய தந்தைக்கு வழுக்கை இருந்திருந்தால், உங்களுக்கும் கட்டாயம் இருக்கும் என்பார்கள். ஆனால், ஆய்வாளர்கள் சொல்வது என்னவென்றால் தந்தைக்கு வழுக்கை இருந்தால் மகனுக்கும் ஏற்பட வாய்ப்பு அதிகம்.*வழுக்கைத் தலையர்களுக்கு அறிவு அதிகம் என்பது அவர்களுக்கு தன்னம்பிக்கை ஏற்படுத்த கிளப்பிவிடப்பட்ட புரளி. வழுக்கைக்கும், அறிவுக்கும் எந்த சம்பந்தமுமில்லை.*அடிக்கடி உணர்ச்சிவசப்படுபவர்களுக்கு முடிகொட்டும் என்பதும் மூடநம்பிக்கை.*வழுக்கைத் தலையர்கள் ஜொள்ளர்கள் என்று சொல்லப்படுவது அநியாயமான அவதூறு.*மொட்டை அடித்தால் முடிவளரும் என்பதற்கு எந்தவித ஆதாரமும் இல்லை.*தலைகீழாக தினமும் நின்றால் இரத்த ஓட்டம் அதிகரித்து முடிவளரும் என சொல்லப்படுவது அடிப்படையற்ற நம்பிக்கை.*ஹெல்மெட் அணிந்தால் முடி கொட்டும் என்பதற்கும் ஆதாரமாக எந்த புள்ளிவிபரமும் இல்லை.*முடி கொட்டும் பிரச்சினைக்கு Finastride (tablet), Zincovit (tablet), MinTop அல்லது Tugain - 5% minoxidil (தைலம் மாதிரி அப்படியே தலையில் தடவலாம்),  Kz Lotion - Ketoconazole Lotion 2% (ஷாம்பூ) போன்ற மருந்துகள் ஓரளவுக்கு நிவாரணம் தரலாம். ஆனால் முழுக்க வேலை செய்யும் என்று உத்தரவாதம் தருவதற்கில்லை.* நிரந்தரத் தீர்வு என்ன? இயற்கை நமக்கு எதை விதித்திருக்கிறதோ, அதை ஏற்றுக்கொண்டு வாழ்வதுதான்.தொகுப்பு : யுவகிருஷ்ணா