Sports - Dinakaran

இவர்கள் சாதிக்கப் பிறந்த மாற்றுத்திறனாளிகள்... பயற்சிக்கு தரமான மைதானங்கள் இல்லை

நெல்லை: மனித சமூகத்தில் ஒவ்வொருவருக்கும் ஒவ்வொரு படைப்புத்திறனும், தனித் திறமைகளும் உண்டு. அதே போலத் தான் மாற்றுத் திறனாளிகள். இவர்கள் மாற்றுத் திறனாளிகளாக இருந்தாலும் தங்கள் திறமைகளை வெளிக் கொணர வேண்டும் என்ற உத்வேகத்தில், கிரிக்கெட்டில் சாதனை படைக்க வேண்டும் என்ற ஒரே நோக்கத்தில் ஆர்வத்துடன் விளையாடி வருகின்றனர். பார்வையற்றோர் கிரிக்கெட் விளையாட்டிற்காக மாநில அளவிலும், மாவட்ட அளவிலும் பார்வையற்றோர் கிரிக்கெட் கழகம் உள்ளது. தமிழகத்தில் மட்டும் 14 பார்வையற்றோர் கிரிக்கெட் அணிகளும், 200 கிரிக்கெட் வீரர்களும் உள்ளனர். இதில் 140 பேர் கிரிக்கெட் சங்கத்தில் பதிவு செய்த வீரர்கள். சக மனிதர்களை போல் தம்மாலும் கிரிக்கெட் விளையாட முடியும் என இவர்கள் மார்தட்டி வருகின்றனர். பொதுவாக கிரிக்கெட் விளையாட்டில் உள்ள அனைத்து விதிகளும் பார்வையற்றோர் கிரிக்கெட் விளையாட்டிற்கும் பின்பற்றப்படுகின்றன. இவர்களுக்கான கிரிக்கெட் பந்து மட்டும் மாறுபட்டதாகும். அதுபோல் பந்து வீச்சிலும் தரையில் தவழ்ந்து வரும் வகையில் மாற்றம் உள்ளது. இவ்வகை பந்துகள் பைபர் பிளாஸ்டிக்கில் உள்பகுதியில் பால்ரஸ் குண்டுகள் போடப்பட்டிருக்கும். இதனால் பந்து தரையில் தவழ்ந்து வரும்போது ஏற்படும் சத்தத்தை கவனத்தில் கொண்டு வீரர்கள் பந்தை மட்டையால் அடித்து விளையாடுவார்கள். போட்டியில் பங்கேற்கும் பார்வையற்றோர் பி1, பி2, பி3 என அவர்களின் பார்வைத் திறனை வைத்து 3 பிரிவுகளாக பிரிக்கப்படுகின்றனர். பி1 பிரிவில் உள்ளவர்கள் முழு பார்வை திறன் குன்றியவர்கள், பி2 பிரிவில் 3 மீட்டர் வரை பார்வை திறன் உள்ளவர்கள், பி3 பிரிவில் உள்ளவர்கள் 6 மீட்டர் வரை பார்வை திறன் உள்ளவர்கள்.ஒவ்வெரு பிரிவிலும் பி1ல் 4 பேர், பி2 3 பேர், பி3 4 பேர் என அணிக்கு 11 பேர் தேர்வு செய்யப்படுகின்றனர். மாற்று வீரர்களாக ஒவ்வொரு பிரிவிலும் ஒருவர் வீதம் 3 பேர் விளையாட்டில் பங்கேற்கின்றனர். பொதுவான கிரிக்கெட் விளையாட்டில் பின்பற்றப்படும் விதிகளின் படி ரன்கள் வழங்கப்படுகின்றன. ஆனால் முழு பார்வை திறன் குறைந்தவர்கள் ஒரு ரன் அடித்தால் 2 ஆக வழங்கப்படுவது தனி சிறப்பாகும். பந்துகளை வீசும்போது பேட்ஸ்மேன் நிற்கும் கிரீஸ் உள்ளே விழுந்தால் நோபாலாக எடுத்துக் கொள்ளப்படும். குறைகளை மறந்து மனத்திடத்துடன் சாதிக்க வேண்டும் என்ற சிந்தனை தூண்டுதலால் பார்வையற்றோர் கிரிக்கெட் விளையாட்டில் ஆர்வத்துடன் வீரர்கள் விளையாடி மகிழ்கின்றனர்.இதுகுறித்து தமிழ்நாடு பார்வையற்றோர் கிரிக்கெட் சங்க செயலர் மகேந்திரன் கூறுகையில், நாங்கள், இந்திய பார்வையற்ற கிரிக்கெட் அசோசியேஷனில் உறுப்பினராக உள்ளோம். தமிழ்நாடு கிரிக்கெட் அசோசியேஷன் மூலம் இந்திய கிரிக்கெட் கட்டுப்பாட்டு வாரியத்துடன் (பிசிசிஐ) இணைக்கவும் நடவடிக்கை எடுக்கப்பட்டு வருகிறது. வீரர்கள் சாதாரண மைதானங்களில்தான் பயிற்சி மேற்கொள்கின்றனர். நல்ல அறிவியல் தொழில்நுட்ப அடிப்படையிலான மைதானங்களில் பயிற்சி மேற்கொள்ள முடிவதில்லை. இதனால் தேசிய, உலக அளவிலான போட்டிகளில் மிளிர முடியாத நிலை உள்ளது. என்றார். பார்வையற்றோர் முன்னாள் மாணவர்கள் சங்க செயலாளர் சந்தானம் கூறுகையில்; பார்வையற்றோர் கிரிக்கெட் கழகம் மூலம் தமிழகம் முழுவதும் போட்டிகள் நடத்தப்பட்டு வீரர்கள் உற்சாகப்படுத்தப்படுகின்றனர். அவர்களும் தங்களின் குறைகளை மறந்து விளையாட்டில் முழு மகிழ்ச்சியுடன் விளையாடுகின்றனர். எனினும் வீரர்கள் பயிற்சி பெற தரமான மைதானங்கள் இல்லை, என்றார்.

உலக கோப்பையில் விளையாட கேதார் ஜாதவ் தயார்: பிசிசிஐ அறிவிப்பு

மும்பை: ஐசிசி உலக கோப்பை ஒருநாள் போட்டித் தொடரில் விளையாட, இந்திய அணி ஆல் ரவுண்டர் கேதார் ஜாதவ் முழு உடல்தகுதியுடன் தயார் என கிரிக்கெட் வாரியம் அறிவித்துள்ளது. ஐபிஎல் டி20 தொடரின் 12வது சீசனில் சென்னை அணிக்காக விளையாடிய கேதார் ஜாதவ், கிங்ஸ் லெவன் பஞ்சாப் அணிக்கு எதிரான லீக் ஆட்டத்தில் பீல்டிங் செய்தபோது இடது தோள்பட்டையில் பலத்த காயம் அடைந்தார். தொடரில் இருந்து விலகி ஓய்வெடுத்து வந்த அவர், உலக கோப்பையில் விளையாடுவது கேள்விக்குறியாக இருந்தது.இந்த நிலையில், கேதார் முழு உடல்தகுதியுடன் உலக கோப்பையில் களமிறங்கத் தயாராக உள்ளதாக பிசிசிஐ நேற்று அறிவித்தது. மே 22ம் தேதி லண்டன் பயணமாகும் இந்திய அணியுடன் அவர் இணைந்துகொள்வது உறுதி செய்யப்பட்டுள்ளது. ஆல் ரவுண்டரான கேதார் பேட்டிங் வரிசைக்கு கூடுதல் வலு சேர்ப்பதுடன், பந்துவீச்சிலும் சிறப்பாக பங்களிப்பார் என எதிர்பார்க்கலாம். மே25ம் தேதி நியூசிலாந்து அணிக்கு எதிராக நடக்க உள்ள பயிற்சி ஆட்டத்தில் கேதாருக்கு வாய்ப்பளிக்கப்படும் என தெரிகிறது.

ஜோகோவிச் முன்னேற்றம்: இத்தாலி ஓபன் டென்னிஸ் பைனலில் கோன்ட்டா

ரோம்: இத்தாலி சர்வதேச டென்னிஸ் தொடரின் மகளிர் ஒற்றையர் பிரிவு இறுதிப் போட்டியில் விளையாட, இங்கிலாந்து வீராங்கனை ஜோகன்னா கோன்ட்டா தகுதி பெற்றார். அரை இறுதியில் நெதர்லாந்தின் கிகி பெர்டன்சுடன் (6வது ரேங்க்) நேற்று மோதிய கோன்ட்டா (42வது ரேங்க்) 5-7 என்ற கணக்கில் முதல் செட்டை இழந்து பின்தங்கினார். இரண்டாவது செட்டில் கடுமையாகப் போராடிய அவர் 7-5 என வென்று பதிலடி கொடுக்க சமநிலை ஏற்பட்டது. அதே வேகத்துடன் 3வது செட்டில் பெர்டன்சின் சர்வீஸ் ஆட்டங்களை முறியடித்து புள்ளிகளைக் குவித்த கோன்டா 5-7, 7-5, 6-2 என்ற செட் கணக்கில் போராடி வென்று பைனலுக்கு முன்னேறினார். விறுவிறுப்பான இப்போட்டி 2 மணி, 49 நிமிடத்துக்கு நீடித்தது. செக் குடியரசின் கரோலினா பிளிஸ்கோவா - மரியா சக்கரி (கிரீஸ்) இடையே நடைபெறும் 2வது அரை இறுதியில் வெற்றி பெறும் வீராங்கனையுடன் பைனலில் கோன்ட்டா மோதுகிறார். ஆண்கள் ஒற்றையர் பிரிவு கால் இறுதியில் நம்பர் 1 வீரர் நோவாக் ஜோகோவிச் 4-6, 7-6 (8-6), 6-4 என்ற செட் கணக்கில் 3 மணி நேரம் போராடி ஜுவன் மார்டின் டெல்போட்ரோவை (அர்ஜென்டினா) வீழ்த்தினார். இந்த போட்டியில் டெல்போட்ரோவுக்கு 2 முறை மேட்ச் பாயின்ட் கிடைத்தும், ஜோகோவிச் தனது அனுபவ ஆட்டத்தை வெளிப்படுத்தி தோல்வியின் பிடியில் இருந்து மீண்டது குறிப்பிடத்தக்கது. அரை இறுதி ஆட்டங்களில் ரபேல் நடால் (ஸ்பெயின்) -ஸ்டெபனாஸ் சிட்சிபாஸ் (கிரீஸ்), ஜோகோவிச் (செர்பியா) - டீகோ ஷ்வார்ட்ஸ்மேன் (அர்ஜென்டினா) மோதுகின்றனர்.

சில்லி பாயிண்ட்...

* ‘மகளுக்கு திடீர் உடல்நலக் குறைவு ஏற்பட்டதால் நள்ளிரவில் அவளை மருத்துவமனையில் சேர்த்து, காலை 8.00 மணி வரை தூங்காமல் விழித்திருந்த பிறகு வீட்டுக்குத் திரும்பினேன். இரண்டு மணி நேரம் மட்டுமே தூங்கி எழுந்து நேரடியாக ஸ்டேடியத்துக்கு வந்து சதம் விளாசியது மிகுந்த மகிழ்ச்சி அளிக்கிறது. இந்த வெற்றி எனக்கு மட்டுமல்ல, எனது குடும்பத்துக்கும் ரொம்பவே ஸ்பெஷல்’ என்று இங்கிலாந்து தொடக்க வீரர் ஜேசன் ராய் தெரிவித்துள்ளார்.* ஸ்லோவேனியா சர்வதேச பேட்மின்டன் தொடரின் ஆண்கள் ஒற்றையர் பிரிவில் இந்திய வீரர் சவுரவ் வர்மா சாம்பியன் பட்டம் வென்றார். இறுதிப் போட்டியில் ஜப்பானின் மினோரு கோகாவுடன் மோதிய சவுரவ் வர்மா 21-17, 21-12 என்ற நேர் செட்களில் வீழ்த்தி தங்கப் பதக்கத்தை முத்தமிட்டார்.* உலக கோப்பை தொடரின் விளையாட உள்ள இந்திய அணி வீரர்களுக்கு பயிற்சி முகாம் ஏதும் ஏற்பாடு செய்யப்படவில்லை. பெரும்பாலான வீரர்கள் ஐபிஎல் டி20 தொடரில் விளையாடியதால், நன்கு ஓய்வெடுத்துக் கொண்டு இங்கிலாந்து செல்லத் தயாரானால் போதும் என்று கிரிக்கெட் வாரியம் தரப்பில் அறிவுறுத்தப்பட்டுள்ளதாக தகவல் வெளியாகி உள்ளது.

தொடரை வென்றது இங்கிலாந்து ஜேசன் ராய் அதிரடி சதம்: பாகிஸ்தான் ஏமாற்றம்

நாட்டிங்காம்: பாகிஸ்தான் அணியுடனான 4வது ஒருநாள் போட்டியில், 3 விக்கெட் வித்தியாசத்தில் போராடி வென்ற இங்கிலாந்து அணி 3-0 என முன்னிலை பெற்றதுடன் தொடரையும் கைப்பற்றி அசத்தியது. டிரென்ட் பிரிட்ஜ் மைதானத்தில் நேற்று முன்தினம் நடந்த இப்போட்டியில், டாசில் வென்ற இங்கிலாந்து முதலில் பந்துவீசியது. பாகிஸ்தான் 50 ஓவர் முடிவில் 7 விக்கெட் இழப்புக்கு 340 ரன் குவித்தது. பகார் ஸமான் 57 ரன், ஹபீஸ் 59 ரன், பாபர் ஆஸம் 115 ரன், சோயிப் மாலிக் 41, கேப்டன் சர்பராஸ் அகமது 21 ரன் விளாசினர். இங்கிலாந்து பந்துவீச்சில் டாம் கரன் 4, மார்க் வுட் 2, ஜோப்ரா ஆர்ச்சர் 1 விக்கெட் வீழ்த்தினர். அடுத்து 50 ஓவரில் 341 ரன் எடுத்தால் வெற்றி என்ற கடினமான இலக்குடன் களமிறங்கிய இங்கிலாந்து அணிக்கு, தொடக்க வீரர்கள் ஜேசன் ராய் - ஜேம்ஸ் வின்ஸ் இருவரும் முதல் விக்கெட்டுக்கு 94 ரன் சேர்த்து வலுவான அடித்தளம் அமைத்தனர். வின்ஸ் 43 ரன் (39 பந்து, 6 பவுண்டரி) விளாசி அவுட்டானார். அடுத்து ஜேசன் ராய் - ஜோ ரூட் ஜோடி 2வது விக்கெட்டுக்கு 107 ரன் சேர்த்தது. அதிரடியாக விளையாடிய ராய் 114 ரன் (89 பந்து, 11 பவுண்டரி, 4 சிக்சர்) விளாசி முகமது ஹஸ்னைன் பந்துவீச்சில் சர்பராஸ் வசம் பிடிபட்டார். ஜோ ரூட் 36 ரன்னில் ஆட்டமிழக்க, அடுத்து வந்த கேப்டன் ஜோஸ் பட்லர், மொயீன் அலி இருவரும் டக் அவுட்டாகி ஏமாற்றமளித்தனர்.27.3 ஓவரில் ஒரு விக்கெட் இழப்புக்கு 201 ரன் எடுத்திருந்த இங்கிலாந்து, 30.2 ஓவரில் 216 ரன்னுக்கு 5 விக்கெட் இழந்து தடுமாறியது. எனினும், பென் ஸ்டோக்ஸ் உறுதியுடன் போராட, ஆட்டம் பரபரப்பானது. டென்லி 17 ரன், டாம் கரன் 31 ரன் எடுத்து பெவிலியன் திரும்பினர். இங்கிலாந்து அணி 49.3 ஓவரில் 7 விக்கெட் இழப்புக்கு 341 ரன் எடுத்து வெற்றியை வசப்படுத்தியது. ஸ்டோக்ஸ் 71 ரன் (64 பந்து, 5 பவுண்டரி, 3 சிக்சர்), அடில் ரஷித் 12 ரன்னுடன் ஆட்டமிழக்காமல் இருந்தனர்.பாகிஸ்தான் பந்துவீச்சில் இமத் வாசிம், முகமது ஹஸ்னைன் தலா 2, ஜுனைத் கான், ஹசன் அலி, சோயிப் மாலிக் தலா 1 விக்கெட் வீழ்த்தினர். ஜேசன் ராய் ஆட்ட நாயகன் விருது பெற்றார். இங்கிலாந்து அணி 3-0 என முன்னிலை பெற்றதுடன் தொடரையும் கைப்பற்றி அசத்தியது (முதல் போட்டி மழையால் ரத்து). 5வது மற்றும் கடைசி ஒருநாள் போட்டி லீட்ஸ் மைதானத்தில் இன்று நடைபெறுகிறது.

முத்தரப்பு தொடரில் வங்கதேசம் சாம்பியன்: வெஸ்ட் இண்டீசை வீழ்த்தி சாதனை

டப்ளின்: அயர்லாந்தில் நடைபெற்ற முத்தரப்பு ஒருநாள் போட்டித் தொடரில், வங்கதேச அணி சாம்பியன் பட்டம் வென்று சாதனை படைத்தது. அயர்லாந்தில் நடைபெற்ற இத்தொடரில் வங்கதேசம், வெஸ்ட் இண்டீஸ், அயர்லாந்து அணிகள் மோதின. லீக் சுற்றின் முடிவில் வங்கதேசம் (14 புள்ளி), வெஸ்ட் இண்டீஸ் (9 புள்ளி) அணிகள் பைனலுக்கு முன்னேறிய நிலையில், அயர்லாந்து (2 புள்ளி) கடைசி இடம் பிடித்து தொடரில் இருந்து வெளியேறியது. கோப்பை யாருக்கு என்பதை தீர்மானிப்பதற்கான பைனலில் வங்கதேசம் - வெஸ்ட் இண்டீஸ் அணிகள் நேற்று முன்தினம் மோதின. டப்ளின் மைதானத்தில் நடந்த இப்போட்டியில், டாசில் வென்ற வங்கதேசம் முதலில் பந்துவீசியது. வெஸ்ட் இண்டீஸ் 20.1 ஓவரில் விக்கெட் இழப்பின்றி 131 ரன் எடுத்த நிலையில், மழை காரணமாக ஆட்டம் தடைபட்டது. நீண்ட தாமதத்துக்குப் பின்னர் ஆட்டம் தொடங்கிய நிலையில், தலா 24 ஓவர் கொண்ட போட்டியாக நடுவர்கள் அறிவித்தனர். ஷாய் ஹோப் 74 ரன் (64 பந்து, 6 பவுண்டரி, 3 சிக்சர்) விளாசி மிராஸ் பந்துவீச்சில் மொசாடெக் வசம் பிடிபட்டார். வெஸ்ட் இண்டீஸ் 24 ஓவர் முடிவில் 1 விக்கெட் இழப்புக்கு 152 ரன் குவித்தது. சுனில் அம்ப்ரிஸ் 69 ரன் (78 பந்து, 7 பவுண்டரி), டேரன் பிராவோ 3 ரன்னுடன் ஆட்டமிழக்காமல் இருந்தனர். இதைத் தொடர்ந்து, டக்வொர்த்/லூயிஸ் விதிப்படி வங்கதேசம் 24 ஓவரில் 210 ரன் எடுத்தால் வெற்றி என இலக்கு நிர்ணயிக்கப்பட்டது. தமிம் இக்பால் 18, சப்பிர் ரகுமான் (0) ஏமாற்றமளித்த நிலையில், சிறப்பாக விளையாடிய சவும்யா சர்க்கார் 66 ரன் (41 பந்து, 9 பவுண்டரி, 3 சிக்சர்) விளாசி பெவிலியன் திரும்பினார்.ரன் வேகத்தை உயர்த்தும் முயற்சியில் முஷ்பிகுர் ரகிம் 36 ரன் (22 பந்து, 2 பவுண்டரி, 2 சிக்சர்), முகமது மிதும் 17 ரன் எடுத்து விக்கெட்டை பறிகொடுத்தனர். எனினும், கடைசி கட்டத்தில் அதிரடியாக சிக்சர்களைப் பறக்கவிட்ட மொசாடெக் உசேன் வெஸ்ட் இண்டீஸ் பந்துவீச்சை தவிடு பொடியாக்கினார். வங்கதேசம் 22.5 ஓவரில் 5 விக்கெட் இழப்புக்கு 213 ரன் எடுத்து அபாரமாக வென்றது. மகமதுல்லா 19 ரன், மொசாடெக் உசேன் 52 ரன்னுடன் (24 பந்து, 2 பவுண்டரி, 5 சிக்சர்) ஆட்டமிழக்காமல் இருந்தனர். மொசாடெக் ஆட்ட நாயகன் விருது பெற்றார். வங்கதேச அணி முதல் முறையாக 2க்கு மேற்பட்ட அணிகள் பங்கேற்கும் தொடரின் பைனலில் சாம்பியன் பட்டம் வென்று சாதனை படைத்தது. உலக கோப்பைக்கு தொடருக்கு முன்பாக கிடைத்துள்ள இந்த சிறப்பான வெற்றியால் வங்கதேச வீரர்கள் மிகுந்த உற்சாகம் அடைந்துள்ளனர்.

கைப்பந்து கூட்டமைப்பு சார்பில் பயிற்சியாளர்களுக்கு பயிற்சி முகாம்

சென்னை: இந்திய கைப்பந்து கூட்டமைப்பு சார்பில் முதல்நிலை கைப்பந்து பயிற்சியாளர்களுக்கான பயிற்சி முகாம் சென்னையில் நடைப்பெற்றது. இந்திய வாலிபால் கூட்டமைப்பு சார்பில்  கைப்பந்து முதல்நிலை பயிற்சியாளர்களுக்கான பயிற்சி முகாம் மே 13ம் தேதி தொடங்கியது. சென்னை நேரு விளையாட்டரங்களில் நடைப்பெற்ற இந்த  5 நாட்கள் பயிற்சி முகாம் நேற்று முன்தினம் முடிவடைந்தது. பயிற்சி முகாமில் தமிழகத்தை ேசர்ந்த 2 பேர் உட்பட  36 பயிற்சியாளர்களும், 5 ஹாங்காங்கை சேர்ந்த  பயிற்சியாளர்களும் என மொத்தம் 43 பேர் பங்கேற்றனர். இவர்களில் 12 பேர் பெண்கள். அர்ஜூனா, துரோணாச்சார்யா விருது பெற்ற, பயிற்சி மையத்தின் இயக்குநர்களான   ஜி.ஈ.தரன்,  ஏ.ராமாராவ், தமிழ்நாடு வாலிபால் சங்கத்தின் நிர்வாகி  பி.பாலசந்திரன் ஆகியோர் பயிற்சியாளர்களுக்கு பயற்சியின் நுணுக்கங்ளை கற்றுதந்தனர்.  இவர்கள் சர்வதேச வாலிபால்  கூட்டமைப்பின் அங்கீகாரம் பெற்றவர்கள். பயிற்சி பெற்றவர்களுக்கு நேற்று முன்தினம் மாலை நடைபெற்ற விழாவில் சான்றிதழ்கள் வழங்கப்பட்டன.

சென்னையில் தொடங்கியது மாநில அளவிலான ஃபிஸ்ட் பால் போட்டி

சென்னை: சென்னையில் 3வது மாநில அளவிலான  ஃபிஸ்ட்பால் போட்டி  நேற்று முன்தினம் தொடங்கியது.  போட்டியை ஃபிஸ்ட்பால் அகில இந்திய பொதுச் செயலாளர் பால விநாயகம்,  கே.ஆர்.எம் பள்ளி முதல்வர் சிவசக்தி பாலன் ஆகியோர் தொடங்கி வைத்தனர். சென்னை பெரம்பூரில் நேற்று முன்தினம் இந்தப் போட்டியில்  தமிழகத்தின் 16 மாவட்டங்களை  சேர்ந்த 320 வீரர், வீராங்கனைகள் பங்கேற்றுள்ளனர். தமிழ்நாடு ஃபிஸ்ட்பால் சங்கமும், சென்னை மாவட்ட ஃபிஸ்ட்பால் சங்கமும் இணைந்து நடத்தும் இந்தப்போட்டி தொடர்ந்து 3 நாள் நடைபெறும் இன்று மாலை இறுதிப் போட்டிகள் நடைபெற உள்ளன. இந்தப்போட்டியில் சிறப்பாக விளையாடும் வீரர்கள், வீராங்கனைகள் தேர்வு செய்யப்பட்டு தமிழ்நாடு அணியில் சேர்க்கப்படுவர். அவர்கள்  விரைவில் ராஜஸ்தானில் நடைபெற உள்ள  தேசிய அளவிலான போட்டியில் தமிழ்நாடு  சார்பில்  பங்கேற்பார்கள்.

தேசிய நீச்சல் சம்மேளனம் தலைவராக ஜெயபிரகாஷ் தேர்வு

சென்னை: தேசிய நீச்சல் சம்மேளனம்(எஸ்எப்ஐ) புதிய நிர்வாகிகள் தேர்வு செய்வதற்கான பொதுக்குழு கூட்டம் சென்னையில் வெள்ளிக்கிழமை நடைப்பெற்றது. அதில் தமிழகத்தைச் சேர்ந்த ஆர்.என்.ஜெயபிரகாஷ் சங்கத்தின் புதிய தலைவராக போட்டியின்றி தேர்வு செய்யப்பட்டார். சுமார் 50 ஆண்டுகளாக செயல்பட்டு வரும் இச்சங்கத்தின் தலைவராக தமிழகத்தைச் சேர்ந்தவர் தேர்வு செய்யப்படுவது இதுவே முதல்முறையாகும். இதுவரை  சங்கத்தின் துணைத் தலைவர் பொறுப்பில் ஜெயபிரகாஷ் இருந்தார். பொதுச் செயலாளராக குஜராத்தைச் சேர்ந்த  சோக்‌ஷி மோனலும்,  பொருளாளராக தெலங்கானாவைச் சேர்ந்த மேகலா ராமகிருஷ்ணாவும், துணைத் தலைவர்களாக  கேரளாவைச் சேர்ந்த ராஜீவ் சுகுமாறன் உட்பட 5 பேரும்,  இணைச் செயலாளராக கர்நாடகாவைச் சேர்ந்த மோகன் சதீஷ்குமார் உட்பட 3 பேரும் தேர்வு செய்யப்பட்டனர்.தேர்வுக்கு பின்னர் செய்தியாளர்களிடம் பேசிய ஜெயபிரகாஷ், ‘ சுமார் 120 கோடி மக்கள் தொகை கொண்ட நாட்டில் கிரிக்கெட்டை தவிர்த்து தொழில்முறை விளையாட்டு வீரர்களாக சுமார் 5ஆயிரம் பேர்தான் இருக்கிறன்றனர். பள்ளியில் படிக்கும் விளையாட்டில் தீவிரம் காட்டுகின்றனர். விளையாட்டு இட ஒதுக்கீ–்ட்டில் கல்லூரிகளில் இடம் பிடித்ததும் விளையாடுவதை விட்டு விடுகின்றனர். படிப்பில் காட்டும் ஆர்வத்தை விளையாட்டுகளிலும் காட்ட வேண்டும். விளையாட்டை தொழிலாக கொண்ட வீரர்கள், வீராங்கனைகள் உருவாக வேண்டும். அதற்கான  முன்முயற்சிகளை சங்கம் மேற்கொள்ளும். வரும் 2024ல் நடைபெறும் ஒலிம்பிக் போட்டியில் 5 முதல் 10 நீச்சல் வீரர்கள் பங்கேற்பதற்கான நடவடிக்கைகளை உடனடியாக தொடங்குவோம்’ என்றார்.

சென்னையில் டைவிங் பயிற்சி முகாம்

சென்னை: மாநில அளவிலான டைவிங் நீச்சல் வீரர்களுக்கான சிறப்பு பயிற்சி முகாம் சென்னையில் மே 29ம் தேதி வரை நடைபெறுகிறது. தமிழ்நாடு விளையாட்டு மேம்பாட்டு ஆணையம் சார்பில் இந்த ஆண்டுக்கான டைவிங் அகாடமியில் சேருவதற்கான நீச்சல் வீரர், வீராங்கனைகளை தேர்வு செய்யும் முகாம் மே 13ம் தேதி நடைப்பெற்றது. இதில் 8 முதல் 12 வயதுக்குட்பட்ட சுமார் 100 சிறுவர், சிறுமிகள் பங்கேற்றனர். அவர்களில் சிறப்பாக டைவிங் செய்த 48 பேர் தேர்வு  செய்யப்பட்டனர். அவர்களுக்கு டைவிங் அகாடமி மூலமாக மே 14ம் தேதி முதல் முதல் கட்ட பயிற்சி தொடங்கியது. பயிற்சி முகாமில் பங்கேற்றுள்ள டைவிங் வீரர், வீராங்கனைகளுக்கு தேவையான தங்குமிடம், உணவு உள்ளிட்ட வசதிகள்  அகாடமி மூலம் செய்துக் கொடுக்கப்படுகிறது. இந்த ஆண்டு தேர்வு பெற்றவர்கள் மட்டுமின்றி கடந்த ஆண்டுகளில் தேர்வு செய்யப்பட்டவர்களுக்கும் இந்த பயிற்சி முகாமில் பங்கேற்றுள்ளனர். தமிழகத்தின் பல்வேறு மாவட்டங்களைச் சேர்ந்தவர்கள் பங்கேற்கும் இந்த பயிற்சி முகாம் மே 29ம்தேதி முடிகிறது.

மாநில அளவிலான செஸ் போட்டி சென்னையில் நாளை தொடக்கம்

சென்னை: மாநில அளவிலான 32வது செஸ் சாம்பியன்ஷிப் போட்டி  சென்னையில் நாளை  தொடங்குகிறது. இது குறித்து சென்னை மாவட்ட சதுரங்க விளையாட்டு சங்கத்தின் தலைவர் கணசேன், ‘எங்கள் மாவட்ட சங்கம் சார்பில் இந்த போட்டியை நடத்துகிறோம். இந்தப்போட்டி மே 20ம் தேதி முதல் மே 24ம் தேதி வரை நடைபெறும். ஒன்பது வயதுக்கு உட்பட்டவர்களுக்கான இந்தப் போட்டியில் பங்கேற்க இதுவரை சுமார் 300 சிறுவர், சிறுமிகள் பதிவு செய்துளளனர். பெயர்களை பதிவு செய்ய ஞாயிறு கடைசிநாள் என்பதால் இந்த எண்ணிக்கை அதிகரிக்கும்’ என்றார்.

முத்தரப்பு கிரிக்கெட் தொடர் வெஸ்ட் இண்டீசை வீழ்த்தி வங்கதேசம் சாம்பியன்

டப்ளின்: அயர்லாந்து, வங்கதேசம், வெஸ்ட் இண்டீஸ் அணிகள் பங்கேற்ற முத்தரப்பு ஒருநாள் கிரிக்கெட் தொடர் அயர்லாந்தில் நடந்துவந்தது. இதில் லீக் போட்டியில் ஒவ்வொரு அணியுடன் மற்ற அணி தலா 2 போட்டிகளில் மோதின. லீக் சுற்றில் வங்கதேசம் 4 போட்டியில் 3ல் வெற்றி, ஒரு போட்டி ரத்து என 14 புள்ளிகளுடன் முதலிடமும், வெஸ்ட் இண்டீஸ் 2 போட்டியில் வெற்றி, 2ல் தோல்வி என 9 புள்ளிகளுடன் 2வது இடமும் பிடித்து இறுதி போட்டிக்கு தகுதி பெற்றன.நேற்று இறுதி போட்டி டப்ளின் மைதானத்தில் நடந்தது. டாஸ் வென்ற வங்கதேசம் பந்து வீச்சை தேர்வு செய்தது. இதையடுத்து வெஸ்ட் இண்டீசின் சாய் ஹோப்,சுனில் அப்ரிஸ் பேட்டிங்கை தொடங்கினர். 20.1 ஓவரில் விக்கெட் இழப்பின்றி 131 ரன்கள் எடுத்திருந்த போது மழை குறுக்கிட்டது. மழையால் சுமார் 4மணி நேரம் ஆட்டம் பாதிக்கப்பட்டது. இதனால் போட்டி 24 ஓவர்களாக குறைக்கப்பட்டது. தொடர்ந்து பேட்டிங் செய்த வெஸ்ட் இண்டீஸ் 24 ஓவரில் ஒரு விக்கெட் இழப்பிற்கு 152 ரன்கள் எடுத்தது.  சாய் ஹோப் 64 பந்தில் 74 ரன் எடுத்து ஆட்டம் இழந்தார். அம்ரிஸ் 78 பந்தில் 69, பிராவோ 3 ரன்னில் ஆட்டம் இழக்காமல் களத்தில் இருந்தனர்.இதையடுத்து வங்கதேச அணிக்கு டக்வெர்த் லீவிஸ் விதிப்படி 24 ஓவரில் 210 ரன்கள் இலக்கு நிர்ணயிக்கப்பட்டது. தொடக்க வீரர் தமீம் இக்பால் 18 ரன்னில் ஆட்டம் இழக்க மற்றொரு வீரர் சவுமியா சர்க்கார் 41 பந்தில் 9 பவுண்டரி, 3 சிக்சருடன் 66 ரன் எடுத்தார். பின்னர் வந்த சபீர் ரகுமான் 0, முஸ்பிகுர் ரகிம் 22 பந்தில் 36, முகமது மிதுன் 17 ரன்னில் ஆட்டம் இழந்தனர்.மொசாடெக் ஹூசைன் ஆட்டம் இழக்காமல் 24 பந்தில் 2 பவுண்டரி, 5 சிக்சருடன் 52 ரன் எடுக்க வங்கதேசம் 22.5 ஓவரில் 5 விக்கெட் இழப்பிற்கு 213 ரன்கள் எடுத்து 5 விக்கெட் வித்தியாசத்தில் வெற்றிபெற்று சாம்பியன் பட்டம் வென்றது.  மொசாடெக் ஹூசைன் ஆட்டநாயகன் விருதும், வெஸ்ட் இண்டீசின்  சாய் ஹோப் தொடர் நாயகன் விருதும் பெற்றனர். ஏற்கனவே லீக் சுற்றில் 2 போட்டியிலும் வங்கதேசம் வெஸ்ட் இண்டீசை வீழ்த்தி இருந்தது குறிப்பிடத்தக்கது.

பாகிஸ்தானுக்கு எதிரான 4வது ஒருநாள் போட்டி ஜேசன் ராய் அதிரடி சதத்தால் இங்கிலாந்து அபார வெற்றி

நாட்டிங்காம்: பாகிஸ்தான் கிரிக்கெட் அணி இங்கிலாந்தில் சுற்றுப்பயணம் செய்து விளையாடி வருகிறது. முதலில் நடந்த ஒரேஒரு டி.20 போட்டியில் இங்கிலாந்து வெற்றிபெற்ற நிலையில், 5 போட்டிகள் கொண்ட ஒருநாள் தொடரில் தற்போது விளையாடி வருகிறது. இதில் முதல் போட்டி மழையால் ரத்தான நிலையில், 2வதுபோட்டியில் 12 ரன் வித்தியாசத்திலும், 3வதுபோட்டியில்,6 விக்கெட் வித்தியாசத்திலும் இங்கிலாந்து  வெற்றிபெற்றது.இந்நிலையில் 4வது ஒருநாள் போட்டி நேற்று நாட்டிங்காமில் நடந்தது. டாஸ் வென்ற இங்கிலாந்து கேப்டன் பட்லர் பந்து வீச்சை தேர்வு செய்தார். இதனால் முதலில் பேட்டிங் செய்த பாகிஸ்தான் 50 ஓவரில் 7 விக்கெட் இழப்பிற்கு 340 ரன்கள் எடுத்தது. தொடக்க வீரர் பகார் ஸமான் 50பந்தில் 57 ரன், முகமது ஹபீஸ் 55 பந்தில் 59 ரன், சோயிப் மாலிக் 26 பந்தில் 41 ரன்கள் எடுத்தனர். அதிகபட்சமாக பாபர் அஸம் 112 பந்தில் 13 பவுண்டரி, ஒரு சிக்சருடன் 115 ரன்கள் விளாசினார். கேப்டன் சர்ப்ராஸ் அகமது 21 ரன்னில் (14பந்து) ஆட்டம் இழக்காமல் இருந்தார். இங்கிலாந்து தரப்பில் டாம் குர்ரன் 4, மார்க் வுட் 2 விக்கெட் எடுத்தனர்.பின்னர் 341 ரன்கள் இலக்கை துரத்திய இங்கிலாந்து அணியில் தொடக்க வீரர் வின்ஸ் 39 பந்தில் 43, ஜோரூட் 41 பந்தில் 36 ரன் எடுத்து ஆட்டம் இழந்தனர். அடுத்து வந்த கேப்டன் பட்லர், மொயின் அலிஆகியோர் டக்அவுட் ஆக மற்றொரு தொடக்க வீரர் ஜேசன் ராய் 89 பந்தில் 11 பவுண்டரி, 4 சிக்சருடன் 114 ரன் எடுத்து ஆட்டம் இழந்தார். 49.3 ஓவரில் இங்கிலாந்து 7 விக்கெட் இழப்பிற்கு 341 ரன்கள் எடுத்து 3 விக்கெட் வித்தியாசத்தில் வெற்றிபெற்றது. ஆல்ரவுண்டர் பென் ஸ்டோக்ஸ் 64 பந்தில் 5பவுண்டரி, 3சிக்சருடன் 71 ரன் எடுத்து ஆட்டம் இழக்காமல் இருந்தார். இந்த வெற்றி மூலம் 3-0 என இங்கிலாந்து தொடரை கைப்பற்றியது. சதம்விளாசிய ஜேசன் ராய் ஆட்டநாயகன் விருது பெற்றார். கடைசி போட்டி நாளை நடக்கிறது.

இத்தாலி ஓபன் டென்னிஸ் அரை இறுதியில் பெர்டனஸ் : ஒசாகா, பெடரர் விலகல்

ரோம்: இத்தாலி சர்வதேச டென்னிஸ் தொடரின் மகளிர் ஒற்றையர் பிரிவு அரை இறுதியில் விளையாட, நெதர்லாந்து வீராங்கனை கிகி பெர்டன்ஸ் தகுதி பெற்றார். கால் இறுதியில் பெர்டன்சுடன் நேற்று மோதுவதாக இருந்த நம்பர் 1 வீராங்கனை நவோமி ஒசாகா (ஜப்பான்), காயம் காரணமாக போட்டியில் இருந்து விலகுவதாக அறிவித்தார். இதைத் தொடர்ந்து பெர்டன்ஸ் அரை இறுதிக்கு முன்னேறினார். முன்னணி வீராங்கனைகள் விக்டோரியா அசரென்கா (பெலாரஸ்), கரோலினா பிளிஸ்கோவா (செக் குடியரசு), மரியா சக்கரி (கிரீஸ்), கிறிஸ்டினா மிளாடெனோவிச் (பிரான்ஸ்), ஜோகன்னா கோன்டா (இங்கிலாந்து) ஆகியோர் கால் இறுதிக்கு தகுதி பெற்றுள்ளனர். ஆண்கள் ஒற்றையர் பிரிவு கால் இறுதியில் கிரீஸ் வீரர் ஸ்டெபனோஸ் சிட்சிபாசுடன் மோதவிருந்த நட்சத்திர வீரர் ரோஜர் பெடரர் (சுவிஸ்), காயம் காரணமாக விலகினார். மற்றொரு கால் இறுதியில் அர்ஜென்டினாவின் டீகோ ஸ்வார்ட்ஸ்மேன் 6-4, 6-2 என்ற நேர் செட்களில் ஜப்பான் வீரர் ஜெய் நிஷிகோரியை வீழ்த்தினார்.

பாபர் ஆஸம் அபார சதம் இங்கிலாந்து அணிக்கு 341 ரன் இலக்கு

நாட்டிங்காம் : பாகிஸ்தான் அணியுடனான 4வது ஒருநாள் போட்டியில், இங்கிலாந்து அணிக்கு 341 ரன் இலக்கு நிர்ணயிக்கப்பட்டது. டிரென்ட் பிரிட்ஜ் மைதானத்தில் நேற்று நடந்த இப்போட்டியில், டாசில் வென்ற இங்கிலாந்து முதலில் பந்துவீசியது. இமாம் உல் ஹக், பகார் ஸமான் இருவரும் பாகிஸ்தான் இன்னிங்சை தொடங்கினர். இமாம் உல் ஹக் 3 ரன் எடுத்த நிலையில், மார்க் வுட் வீசிய பந்து முழங்கையில் பலமாகத் தாக்கியதால் காயம் அடைந்த இமாம் பெவிலியன் திரும்பினார் (ரிடயர்டு ஹர்ட்). அடுத்து வந்த பகார் ஸமானுடன் பாபர் ஆஸம் இணைந்தார். பகார் 57 ரன் (50 பந்து, 5 பவுண்டரி, 2 சிக்சர்) விளாசி ஆட்டமிழந்தார். சிறப்பாக விளையாடிய பாபர் - ஹபீஸ் ஜோடி 2வது விக்கெட்டுக்கு 104 ரன் சேர்த்தது. ஹபீஸ் 59 ரன் (55 பந்து, 2 பவுண்டரி, 3 சிக்சர்), பாபர் ஆஸம் 115 ரன் (112 பந்து, 13 பவுண்டரி, 1 சிக்சர்) விளாசி விக்கெட்டை பறிகொடுத்தனர்.ஆசிப் அலி 17, இமத் வாசிம் 12 ரன்னில் வெளியேற, சோயிப் மாலிக் 41 ரன் (26 பந்து, 4 பவுண்டரி) விளாசி ஆட்டமிழந்தார். ஹசன் அலி 1 ரன் எடுத்து டாம் கரன் பந்துவீச்சில் டென்லி வசம் பிடிபட்டார். இங்கிலாந்து அணி 50 ஓவர் முடிவில் 7 விக்கெட் இழப்புக்கு 340 ரன் குவித்தது. கேப்டன் சர்பராஸ் அகமது 21 ரன், இமாம் உல் ஹக் 6 ரன்னுடன் ஆட்டமிழக்காமல் இருந்தனர். இங்கிலாந்து பந்துவீச்சில் டாம் கரன் 4, மார்க் வுட் 2, ஜோப்ரா ஆர்ச்சர் 1 விக்கெட் வீழ்த்தினர். இதைத் தொடர்ந்து, 50 ஓவரில் 341 ரன் எடுத்தால் வெற்றி என்ற கடினமான இலக்குடன் இங்கிலாந்து களமிறங்கியது.

முத்தரப்பு தொடர் பைனல் மழையால் ஆட்டம் பாதிப்பு

டப்ளின்: வெஸ்ட் இண்டீஸ் - வங்கதேச அணிகள் மோதிய முத்தரப்பு ஒருநாள் போட்டித் தொடரின் இறுதிப் போட்டி, கனமழை காரணமாக பாதிக்கப்பட்டது. அயர்லாந்தில் நடைபெற்று வரும் இந்த தொடரில் வங்கதேசம், வெஸ்ட் இண்டீஸ், அயர்லாந்து அணிகள் மோதின. லீக் சுற்றின் முடிவில் வங்கதேசம் 4 போட்டியில் 14 புள்ளிகளுடன் முதலிடம் பிடித்து இறுதிப் போட்டிக்கு தகுதி பெற்றது. வெஸ்ட் இண்டீஸ் 9 புள்ளிகளுடன் 2வது இடம் பிடித்து பைனலுக்கு முன்னேறிய நிலையில், அயர்லாந்து 2 புள்ளிகளுடன் கடைசி இடம் பிடித்து தொடரில் இருந்து வெளியேறியது. இந்த நிலையில், கோப்பை யாருக்கு என்பதை தீர்மானிப்பதற்கான பைனலில் வங்கதேசம் - வெஸ்ட் இண்டீஸ் அணிகள் நேற்று மோதின. டப்ளின் மைதானத்தில் நேற்று நடந்த இப்போட்டியில், டாசில் வென்ற வங்கதேசம் முதலில் பந்துவீசியது. வெஸ்ட் இண்டீஸ் தொடக்க வீரர்களாக ஷாய் ஹோப், சுனில் அம்ப்ரிஸ் களமிறங்கினர். சிறப்பாக விளையாடிய இருவரும் அரை சதம் அடித்து அசத்தினர். வெஸ்ட் இண்டீஸ் 20.1 ஓவரில் விக்கெட் இழப்பின்றி 131 ரன் எடுத்த நிலையில், மழை காரணமாக ஆட்டம் தடைபட்டது. ஹோப் 68 ரன் (56 பந்து, 6 பவுண்டரி, 3 சிக்சர்), அம்ப்ரிஸ் 59 ரன்னுடன் (65 பந்து, 6 பவுண்டரி) ஆட்டமிழக்காமல் இருந்தனர்.

ட்வீட் கார்னர்... மர்ரேவுக்கு ‘சர்’ பட்டம்!

இங்கிலாந்து டென்னிஸ் நட்சத்திரம் ஆண்டி மர்ரே (32 வயது), அந்நாட்டின் உயரிய விருதான ‘சர்’ பட்டம் வழங்கி கவுரவிக்கப்பட்டார். விம்பிள்டன் கிராண்ட் ஸ்லாம் டென்னிஸ் தொடரில் 2வது முறையாக சாம்பியன் பட்டம் மற்றும் ஒலிம்பிக்சில் 2வது முறையாக தங்கப் பதக்கம் வென்று சாதனை படைத்ததைத் தொடர்ந்து, கடந்த 2016ம் ஆண்டு அவருக்கு இந்த விருது அறிவிக்கப்பட்டிருந்தது. இந்த நிலையில், பக்கிங்காம் அரண்மனையில் நேற்று முன்தினம் இரவு நடந்த வண்ணமயமான விழாவில் இளவரசர் சார்லஸிடம் இருந்து விருதினை பெற்றுக் கொண்டார். மனைவியுடன் உற்சாகமாக போஸ் கொடுக்கிறார் ஆண்டி மர்ரே. அவர் தனது ட்விட்டர் பக்கத்தில் பதிவிட்டுள்ள இந்த புகைப்படங்கள் வைரலாகி உள்ளன.

ஆல் ரவுண்டர்கள் ஆதிக்கம் செலுத்துவார்கள்... : கிளைவ் லாயிட் கணிப்பு

உலக கோப்பை தொடரில் ஆல் ரவுண்டர்களின் ஆதிக்கமே கொடிகட்டிப் பறக்கும் என்று வெஸ்ட் இண்டீஸ் அணி முன்னாள் கேப்டன் கிளைவ் லாயிட் கூறியுள்ளார். 1975 மற்றும் 1979ல் உலக கோப்பையை வென்று சாதனை படைத்த வெஸ்ட் இண்டீஸ் அணியின் கேப்டனாக இருந்த லாயிட், 2019 உலக கோப்பை தொடர் குறித்து கூறியதாவது: இந்த தொடரில் விளையாட உள்ள பத்து அணிகளுமே பலம் வாய்ந்தவை தான். குறிப்பாக,  எல்லா அணிகளிலுமே உலகத் தரம் வாய்ந்த ஆல் ரவுண்டர்கள் அதிகம் உள்ளனர். இங்கிலாந்தில் உள்ள ஆடுகளங்கள் பெரும்பாலும் ரன் குவிப்புக்கே சாதகமாக  உள்ளன. இதனால் பந்துவீச்சாளர்களுக்கு மிகப் பெரிய சவால் காத்திருக்கிறது. அதனால் தான், ஆல் ரவுண்டர்களின் ஆதிக்கமே கொடிகட்டிப் பறக்கும் என்கிறேன். வெஸ்ட் இண்டீஸ் அணி சிறப்பாக செயல்படும் என்ற நம்பிக்கை உள்ளது. டி20 லீக் தொடர்களில் நன்கு விளையாடி பார்மில் உள்ள முன்னணி வீரர்கள் பலரையும் உலக கோப்பைக்கான அணிக்கு தேர்வு செய்துள்ளது சரியான நடவடிக்கை. கிறிஸ் கேல், ரஸ்ஸல் போன்றவர்கள் இடம் பெற்றுள்ளது அணியை மேலும் வலுவாக்கி உள்ளது. இங்கிலாந்து அணியும் பலமானதாக உருவெடுத்துள்ளது. தங்கள் அணி கோப்பையை வெல்லும் என்று அந்நாட்டு ரசிகர்கள் பெரிதும் எதிர்பார்க்கின்றனர். ஒருநாள் போட்டிகளுக்கான ஐசிசி தரவரிசையில் நம்பர் 1 அணியாக விளங்கும் இங்கிலாந்து, மற்ற அணிகளுக்கு கடும் நெருக்கடி கொடுக்கும். இவ்வாறு லாயிட் கூறியுள்ளார். வெஸ்ட் இண்டீஸ் அணி தனது முதல் லீக் ஆட்டத்தில் மே 31ம் தேதி பாகிஸ்தானை எதிர்கொள்கிறது (நாட்டிங்காம்). இந்தியா - வெஸ்ட் இண்டீஸ் மோதும் லீக் ஆட்டம் மான்செஸ்டரில் ஜூன் 27ம் தேதி நடைபெற உள்ளது.

விரலில் எலும்பு முறிவு நியூசி. வீரர் டாம் லாதம் களமிறங்குவது சந்தேகம்

வெலிங்டன்: உலக கோப்பை தொடருக்கான நியூசிலாந்து அணியில் இடம் பெற்றுள்ள விக்கெட் கீப்பர்/பேட்ஸ்மேன் டாம் லாதம், காயம் காரணமாக களமிறங்குவது கேள்விக்குறியாகி உள்ளது. பிரிஸ்பேனில் ஆஸ்திரேலியா லெவன் அணியுடன் நடந்த பயிற்சி போட்டியில் கீப்பிங் செய்தபோது லாதம் விரலில் எலும்பு முறிவு ஏற்பட்டது. காயம் முழுமையாகக் குணமடையாவிட்டாலும், நாளை இங்கிலாந்து பயணமாகும் நியூசிலாந்து அணியுடன் லாதமும் செல்வார் என அறிவிக்கப்பட்டுள்ளது.லண்டன் ஓவல் மைதானத்தில் மே 25ம் தேதி இந்திய அணியுடன் நடக்கும் பயிற்சி ஆட்டம், மே 28ம் தேதி பிரிஸ்டலில் வெஸ்ட் இண்டீஸ் அணியுடன் நடக்கும் பயிற்சி ஆட்டம் மற்றும், உலக கோப்பையில் ஜூன் 1ம் தேதி இலங்கைக்கு எதிரான முதல் லீக் ஆட்டம் (கார்டிப்) என 3 போட்டிகளில் லாதம் விளையாடுவது சந்தேகமே என நியூசிலாந்து கிரிக்கெட் வாரியம் தரப்பில் தகவல் வெளியாகி உள்ளது. லாதம் முழு உடல்தகுதி பெறாத நிலையில், அவருக்கு பதிலாக டாம் பிளெண்டல் அறிமுக வீரராக இடம் பெறுவார். 1987ல் டேனி மாரிசன் உலக கோப்பை தொடரில் தான் அறிமுகமானார். அதற்குப் பிறகு இந்த பெருமை பிளெண்டலுக்கு கிடைக்க உள்ளது.

உலக சாம்பியனுக்கு 28.04 கோடி முதல் பரிசு

துபாய்: ஐசிசி உலக கோப்பை ஒருநாள் போட்டித் தொடரில் சாம்பியன் பட்டம் வெல்லும் அணிக்கு முதல் பரிசாக 28.04 கோடி வழங்கப்படும் என அறிவிக்கப்பட்டுள்ளது. சர்வதேச கிரிக்கெட் கவுன்சில் நேற்று வெளியிட்ட அறிக்கையில், எதிர்வரும் உலக கோப்பை தொடரில் மொத்தப் பரிசுத் தொகையாக 70.11 கோடி வழங்கப்படும் என அறிவித்துள்ளது. பட்டம் வெல்லும் அணிக்கு 28.04 கோடி வழங்கப்படும். இறுதிப் போட்டியில் தோற்று 2வது இடம் பிடிக்கும் அணிக்கு 14.02 கோடியும், அரை இறுதியில் தோற்கும் அணிகளுக்கு தலா 5.60 கோடி கிடைக்கும். இது தவிர லீக் ஆட்டங்களில் வெற்றி பெறும் அணிகளுக்கும், சூப்பர் 6 சுற்றுக்கு முன்னேறும் அணிகளுக்கு தனித்தனியே ரொக்கப்பரிசுகள் வழங்கப்பட உள்ளன.