Tamilnadu - Dinakaran

சபரிமலை விவகாரத்தில் தான் கருத்து சொல்வது சரியாக இருக்காது : கமல்

சென்னை : காங்கிரசுடன் கூட்டணியா என்பது குறித்து இப்போது கூற முடியாது என்று மக்கள் நீதி மய்யம் தலைவர் கமல் பேட்டி அளித்துள்ளார். சபரிமலை விவகாரத்தில் தான் கருத்து சொல்வது சரியாக இருக்காது என்று கூறிய கமல், சபரிமலையில் நடக்கும் போராட்டம் அரசியல் என்றும் சபரிமலை விவகாரத்தில் உச்சநீதிமன்றத்தின் தீர்ப்பை மக்கள் மதிக்கவில்லை என்றும் கமல் கூறினார். மேலும் மக்களவை தேர்தலில் மக்கள் நீதி மய்யம் போட்டியிடுவது குறித்து கட்சியினரிடம் பேசிய பிறகு முடிவு எடுக்கப்படும் என்றும் கமல் குறிப்பிட்டார்.

பெங்களூரு தேசிய நெடுஞ்சாலையில் காரும், லாரியும் மோதி விபத்து : 4 பெண்கள் பலி

கிருஷ்ணகிரி : கிருஷ்ணகிரி மாவட்டம் ஓசூர் அருகே கோபசத்திரத்தில் பெங்களூரு தேசிய நெடுஞ்சாலையில் காரும், லாரியும் மோதிய விபத்தில் 4 பெண்கள் சம்பவ இடத்திலேயே உயிரிழந்தனர். மேலும் இந்த விபத்தில் 5 பேர் படுகாயம் அடைந்துள்ளனர். இந்நிலையில் இந்த விபத்து சம்பவம் குறித்து போலீசார் தீவிர விசாரணை நடத்தி வருகின்றனர்.

மதுரை அருகே பேருந்துக்காக நின்றவர்கள் மீது கார் மோதி விபத்து : 4 பேர் உயிரிழப்பு

மதுரை : மதுரை வாடிப்பட்டி அருகே பேருந்துக்காக நின்று கொண்டிருந்தவர்கள் மீது கார் மோதிய விபத்தில் 4 பேர் உயிரிழந்துள்ளனர். மதுரை மாவட்டம் வாடிப்பட்டி அருகே உள்ள வடுகப்பட்டி கிராமத்தை சேர்ந்த மரத்தி, லட்சுமி, வசந்தி மற்றும் அவரது 8 மாத கைக்குழந்தை ஆத்விக் ஆகியோர் மதுரை செல்வதற்காக மதுரை-திண்டுக்கல் நெடுஞ்சாலையில் சாலையோரமாக நின்றுள்ளனர். அப்போது மதுரையில் இருந்து பல்லடம் நோக்கி மின்னல் வேகத்தில் சென்ற காரின் இடதுபக்க டயர் பஞ்சர் ஆனது. இதனால் தாறுமாறாக ஓடிய கார் சாலையோரத்தில் நின்றவர்கள் மீது மோதியது. இந்த விபத்தில் லட்சுமி, மரத்தி சம்பவ இடத்திலேயே தூக்கி வீசப்பட்டு உயிரிழந்தனர். மேலும் பலத்த காயத்துடன் ரத்த வெள்ளத்தில் கிடந்த வசந்தி, அவரது மகன் ஆத்விக் ஆகியோரை அருகில் இருந்தவர்கள் மீட்டு வாடிப்பட்டி அரசு மருத்துவமனைக்கு அனுப்பி வைத்தனர். ஆனால் மருத்துவமனைக்கு செல்லும் வழியிலேயே இருவரும் உயிரிழந்துள்ளனர். ஒரே குடும்பத்தை சேர்ந்த 4 உயிரிழந்துள்ளதால் வடுகப்பட்டி கிராமத்தினர் சோகத்தில் மூழ்கியுள்ளனர். விபத்து குறித்து தகவலறிந்த வாடிப்பட்டி போலீஸ் இன்ஸ்பெக்டர் ரெஜினா, சப்-இன்ஸ்பெக்டர் பழனிசாமி ஆகியோர் சம்பவ இடம் விரைந்து சென்று விசாரணை நடத்தி வருகின்றனர்.

7வது ஊதியக்குழு பரிந்துரையின் பேரில் அரசு ஊழியர்களின் கோரிக்கைகள் நிறைவேற்றம் : முதல்வர்

சேலம் : 7வது ஊதியக்குழு பரிந்துரையின் பேரில் அரசு ஊழியர்களுக்கு சம்பளம் உயர்த்தப்பட்டுள்ளது என்று சேலத்தில் முதலமைச்சர் பழனிசாமி தெரிவித்துள்ளார். மேலும் அரசின் நிலையை அரசு ஊழியர்கள் புரிந்து கொள்ள வேண்டும் என்றும் முதல்வர் வலியுறுத்தினார். டெங்கு கொசு உற்பத்தியாகாமல் இருக்க மக்கள் ஒத்துழைப்பு அளிக்க வேண்டும் என்றும் முதல்வர் வேண்டுகோள் விடுத்தார்.

தொடர் விடுமுறையால் ஊட்டியில் குவிந்த சுற்றுலா பயணிகள்

ஊட்டி :  ஆயுத பூஜை விடுமுறை மற்றும் கர்நாடக மாநிலத்தில் தசரா பண்டிகை விடுமுறை என  தொடர் விடுமுறை வந்ததால் நீலகிரியில் சுற்றுலா பயணிகள் குவிந்துள்ளனர். ஊட்டி சுற்றுலா தலங்களில் கடந்த இரண்டு நாட்களாக மக்கள் கூட்டம் அலைமோதுவதால் வியாபாரிகள் மகிழ்ச்சி அடைந்துள்ளனர்.   தமிழகத்தில் பூஜை விடுமுறை என்பதாலும், கர்நாடக மாநிலத்தில் தசார  பண்டிகை விடுமுறை, பள்ளிகளுக்கு காலாண்டு விடுமுறை என தொடர் விடுமுறை  வந்துள்ள நிலையில், ஊட்டி வரும் சுற்றுலா பயணிகள் எண்ணிக்கை பல மடங்கு  அதிகரித்துள்ளது.  நேற்று முன்தினம் முதலே வெளியூர் மற்றும் கர்நாடக மாநில  சுற்றுலா பயணிகள் ஊட்டியை மொய்க்க துவங்கியுள்ளனர். சுற்றுலா பயணிகள்  வருகை அதிகரித்துள்ள நிலையில், இங்குள்ள காட்டேஜ்கள் மற்றும் லாட்ஜ்கள்  நிரம்பியுள்ளன. இரண்டாம் சீசன் என்பதால், லாட்ஜ் மற்றும் காட்டேஜ்களின் அறை  கட்டணம் உயர்த்தப்பட்ட போதிலும் ஏராளமான சுற்றுலா பயணிகள் ஊட்டியில்  முகாமிட்டுள்ளனர்.  சுற்றுலா தலங்கள், ஓட்டல்கள், கடைவீதிகளில் சுற்றுலா  பயணிகள் கூட்டம் அதிகம் காணப்படுவதால் ஊட்டி கடை கட்டியுள்ளது. இதனால் கமர்சியல் சாலை ஒரு  வழிபாதையாக  நேற்று மாற்றப்பட்டது. சுற்றுலா பயணிகள் வாகனங்களால், ஊட்டி  நகரின் பல்வேறு சாலைகளில் நேற்று  போக்குவரத்து நெரிசல் ஏற்பட்டது.  அதேேபான்று, தொட்டபெட்டா செல்லும் சாலையிலும் போக்குவரத்து நெரிசல்  ஏற்பட்டது. சுற்றுலா பயணிகள் வருகை அதிகரித்துள்ள நிலையில், உள்ளூர்  வியாபாரிகள் மகிழ்ச்சியடைந்துள்ளனர்.

தேசிய நெடுஞ்சாலையோரம் உயிர் பலி வாங்க காத்திருக்கும் கிணறு

கிருஷ்ணகிரி :  பர்கூர் அருகே தேசிய நெடுஞ்சாலையோரம் உயிர்பலி வாங்க காத்திருக்கும் தரைமட்ட கிணற்றுக்கு தடுப்புச்சுவர் அமைக்க வேண்டும் என கோரிக்கை விடுக்கப்பட்டுள்ளது. கிருஷ்ணகிரி-சென்னை தேசிய நெடுஞ்சாலையில் தினமும் ஆயிரக்கணக்கான  வாகனங்கள் வந்து, செல்கின்றன. தேசிய நெடுஞ்சாலை என்பதால், அதிவேகத்தில் செல்லும் வாகனங்களால், அவ்வப்போது விபத்துகளில் உயிரிழப்புகள் ஏற்படுவது வாடிக்கையாக உள்ளது. இந்நிலையில்  பர்கூர் அருகே உள்ள அண்ணா நகர் என்ற இடத்தில், தேசிய நெடுஞ்சாலையின் ஓரம்  சுமார் 50 அடி ஆழமுள்ள தரைமட்ட கிணறு உள்ளது. ஆனால், இந்த கிணற்றுக்கு தடுப்புச்சுவர் இல்லாமல், செடி, கொடிகள்,  மரங்கள் வளர்ந்து புதர் மண்டி காணப்படுகிறது. இதனால், சாலையில் வேகமாக  வரும் வாகனங்கள் எதிர்பாராத விதமாக சாலையை விட்டு விலகினால், இந்த  கிணற்றில் விழும் அபாயம் உள்ளது. எனவே, அசம்பாவிதங்கள் நிகழும் முன்பாக, இந்த கிணறு உள்ள இடத்தில் இரும்பு வேலி அமைக்க வேண்டும்.  அல்லது கான்கிரீட் தடுப்புச்சுவர் அமைக்க வேண்டும் என இப்பகுதி பொதுமக்கள் கோரிக்கை விடுத்துள்ளனர். 

மாநகராட்சி அலட்சிய போக்கு மலைபோல் தேங்கியுள்ள குப்பைகளால் சுகாதார கேடு

திருப்பூர் : பின்னலாடைத் தொழில் நகரமான திருப்பூரில் ஆயுதபூஜைக் கொண்டாட்டத்தைத் தொடர்ந்து எல்லா பகுதிகளிலும் குப்பைகள் மலைபோல் தேங்கியிருக்கின்றன. இந்த குப்பைகளை அப்புறப்படுத்தாததால் சுகாதார சீர்கேடும், துர்நாற்றமும் நகரத்தை நாறடித்து வருகிறது. திருப்பூரில் ஐந்தாயிரத்திற்கும் மேற்பட்ட பனியன் நிறுவனங்கள் உள்ளன. பனியன் தொழில் சார்ந்த சாய ஆலைகள் 700கும் மேல் உள்ளன. இது தவிர பல்வேறு உபதொழில்களும் பல நூற்றுக்கணக்கில் செயல்படுகின்றன. வேறு பல தொழில் நகரங்களைப் போல் அல்லாது, திருப்பூரைப் பொறுத்தவரை மக்களின் குடியிருப்புகளுக்கு உள்ளேயே பின்னலாடைத் தொழிலகங்களும் பின்னிப் பிணைந்து அமைந்துள்ளன. இதனால் வீட்டு உபயோக கழிவுகள், குப்பைகள் மட்டுமின்றி, தொழிற்சாலை குப்பைகளும் இங்கு அதிக அளவில் உற்பத்தியாகின்றன.  சராசரியாக நாளொன்றுக்கு நகரில் ஆயிரம் டன் குப்பைகள் உற்பத்தியாகின்றன. அதேசமயம் தொழில் நகரம் என்ற முறையில் இங்கு ஆயுதபூஜைக் கொண்டாட்டம் பிரசித்தம். அனைத்து பனியன் தொழிலகங்கள் மட்டுமின்றி குடியிருப்புகளிலும் விமரிசையாகக் கொண்டாடப்படுவது வழக்கம். அதன்படி, இந்த ஆண்டும் ஆயுதபூஜை சிறப்பாகக் கொண்டாடப்பட்டது.  இந்த கொண்டாட்டத்திற்கு முன்பாகவே தொழிலகங்களை சுத்தப்படுத்துவது, வர்ணம் பூசுவது போன்ற பணிகள் மேற்கொள்ளப்படும். அப்போது தொழிலகங்களில் தேங்கிய கழிவுகளை முறையாக அப்புறப்படுத்தாமல் அந்தந்த பகுதிகளிலேயே குப்பை கொட்டும் இடங்களில் குவித்து விடுகின்றனர். இதுதவிர கொண்டாட்டத்திற்குப் பிறகும் வாழை மரங்கள், இதர உபபொருட்கள், கழிவுகளையும் குப்பை கொட்டும் இடங்களில் கொட்டி விடுகின்றனர்.  நேற்று முன்தினம் (18ம் தேதி) ஆயுதபூஜை கொண்டாடப்பட்ட நிலையில், இன்னும் பல இடங்களில் அகற்றப்படாமல் நகரின் அனைத்துப் பகுதிகளிலும் குப்பைகள் மலைபோல் தேங்கியுள்ளன. மொத்தமுள்ள 60 வார்டுகளில் இரண்டு மண்டலங்களைச் சேர்ந்த 30 வார்டுகள் தனியார் வசம் ஒப்படைக்கப்பட்டுள்ளன. மீதமுள்ள இரண்டு மண்டலங்களிலும் போதுமான துப்புரவுப் பணியாளர்கள் இல்லை. தனியாரைப் பொறுத்தவரை போதிய துப்புரவுப் பணியாளர்களை நியமிக்காமல் உள்ளனர்.  மொத்தம் 2 ஆயிரத்திற்கும் மேற்பட்ட துப்புரவுப் பணியாளர்கள் இருந்தால்தான் இந்த நகரைத் தூய்மையாக வைத்திருக்க முடியும். ஆனால் மாநகராட்சியில் இருப்பதோ ஆயிரத்திற்கும் கீழ், இந்த நிலையில் மலைபோல் தேங்கிய ஆயுதபூஜை குப்பைகளை அகற்றுவதற்கு மாநகராட்சி நிர்வாகம் எந்த விசேஷ ஏற்பாட்டையும செய்யவில்லை. வழக்கம் போல் பல பகுதிகளிலும் குப்பைகள் வீதிகள் தோறும் பரவிக் கிடக்கின்றன. இதனால் சுகாதார சீர்கேடும், தொற்று நோய்த் தாக்குதலும் ஏற்படுவதற்கான அச்சுறுத்தல் உள்ளது.  எனவே இந்த விஷயத்தில் அலட்சியமாகச் செயல்படாமல் மாநகராட்சி நிர்வாகம் துரித கதியில் செயல்பட்டு தேங்கிய குப்பைகளை உடனடியாக அகற்ற வேண்டும். குறிப்பாக வழக்கமான நாட்களில் குறைந்தபட்சம் உள்ளூர் கவுன்சிலர்கள் இதில் ஓரளவு கவனம் செலுத்துவார்கள். பொது மக்களும் கவுன்சிலர்களிடம் முறையிட வாய்ப்பிருந்தது. தற்போது, உள்ளாட்சி தேர்தல் நடத்தாததால் அதுவும் இல்லாத நிலை ஏற்பட்டுள்ளது. ஆளுங்கட்சியை சேர்ந்தவர்களோ, ஏதோ தங்களுக்கு சம்பந்தம் இல்லாத பிரச்சனை போல் கண்டுகொள்ளாமல் இருக்கின்றனர். அதிகாரிகள் தான் இதில் நடவடிக்கை எடுக்க வேண்டும். எனவே துரிதகதியில் செயல்பட்டு பின்னலாடை நகரத்தை தூய்மைப்படுத்த வேண்டும். இல்லாவிட்டால் சுகாதார சீர்கேடடைந்த, அசுத்தமான நகரமாகவே இந்த டாலர் நகரம் நாறிக் கொண்டிருக்கும் என்பதில் சந்தேகமில்லை.

தக்காளி செடிகளுக்கு கொடிகட்டும் பணி தீவிரம்

பொள்ளாச்சி :  பொள்ளாச்சி பகுதியில் தக்காளி சாகுபடி செய்யும் விவசாயிகள், தக்காளி செடி மண்ணில் விழுந்து அழுகி விடாமல் இருக்கவும், மழையிலிருந்து பாதுகாக்கவும் கொடிகட்டும் பணியில் தீவிரமாக ஈடுபட்டு வருகின்றனர். பொள்ளாச்சி சுற்றுவட்டார பகுதிகளில் தென்னைக்கு அடுத்தபடியாக மானாவாரி பயிர்களே அதிகம் விதைக்கப்படுகிறது. காய்கறிகளில் தக்காளி விதைப்பில் விவசாயிகள் ஆர்வம் காட்டுகின்றனர். வடக்கிபாளையம், புரவிபாளையம், ஜமீன் காளியாபுரம், பெரும்பதி, கோவிந்தனூர், மாப்பிள்ளைகவுண்டன்புதூர், சூலக்கல், நெகமம், கோமங்கலம், தேவனூர் புதூர் உள்ளிட்ட பகுதிகளில் அதிகளவிலான விவசாயிகள் தக்காளி சாகுபடியில் ஈடுபடுகின்றனர்.    கடந்த ஜூலை மற்றும் ஆகஸ்ட் மாதத்தில் பெய்த தென்மேற்கு பருவமழையை தொடர்ந்து கிராமங்களில் தக்காளி விதைப்பு அதிகளவில் இருந்தது. இந்நிலையில் கடந்த வாரத்த்தில் அவ்வப்போது பெய்த மழையால் பல கிராமங்களில் விதைக்கப்பட்ட தக்காளிகள், செடியிலிருந்து சரிந்து மண்ணோடு கலந்து அழுகியது. இதனால் விவசாயிகளுக்கு நஷ்டம் ஏற்பட்டது.   இந்நிலையில் மழை பெய்தால் செடி கீழே சாயாமல் இருக்கவும், தக்காளியை காத்துகொள்ளவும் செடிகளில் கொடி கட்டி தொங்கவிடும் பணிகளில் தக்காளி விவசாயிகள் தீவிரமாக ஈடுபட்டு வருகின்றனர். இதில் பெரும்பாலும் வடக்கிபாளையம், பொன்னாபுரம் பகுதியில் உள்ள விவசாயிகள் இப்பணியில் ஈடுபட்டுள்ளனர். சில வாரங்களுக்கு பிறகு பொள்ளாச்சி மார்க்கெட்டில் தக்காளிக்கு தற்போது கூடுதல் விலை கிடைக்கிறது. இதனால் விவசாயிகள் தங்கள் விளை நிலங்களில் சாகுபடிசெய்து நன்கு விளைந்துள்ள தக்காளியை காத்துகொள்ள கொடிகட்டி வருகின்றனர்.

பழவூர் நாறும்பூநாதர் சுவாமி கோவிலில் ஐஜி பொன்.மாணிக்கவேல் தலைமையில் ஆய்வு

நெல்லை : பழவூர் நாறும்பூநாதர் சுவாமி கோவிலில் சிலை கடத்தல் தடுப்பு பிரிவு ஐஜி பொன்.மாணிக்கவேல் தலைமையில் ஆய்வு மேற்கொள்ளப்பட்டு வருகிறது. 2005ல் திருட்டு போன 13 சிலைகளில், மீட்டெடுக்கப்பட்ட 9 சிலைகளின் உண்மை தன்மை குறித்து தொல்லியல் துறையினருடன் ஆய்வு நடத்தி வருகின்றனர்.

அப்புறப்படுத்தும் பணிகள் மும்முரம் மாநகராட்சியில் 600 டன் குப்பைக்கழிவு

* அப்புறப்படுத்தும் பணிகள் மும்முரம்சேலம் : ஆயுத பூஜையையொட்டி சேலம் மாநகர பகுதியில் 600 டன் அளவுக்கு ஆங்காங்கே குப்பைக்கழிவுகள் மலைபோல் குவிந்து கிடக்கிறது. இதை அப்புறப்படுத்தும் பணியில் துப்புரவு பணியாளர்கள் மும்முரமாக ஈடுபட்டுள்ளனர்.சேலம் மாநகராட்சியில் உள்ள 60 வார்டுகளில், சுமார் 8 லட்சத்திற்கும் மேற்பட்ட மக்கள் வசித்து வருகின்றனர். சாதாரண நாட்களில், மாநகர பகுதியில் 400 முதல் 450 டன் அளவுக்கு குப்பைகள் சேகரமாகின்றன. நடப்பாண்டு ஆயுதபூஜை கொண்டாட்டத்தையொட்டி வீடுகள், வணிக நிறுவனங்களை சுத்தப்படுத்தி, அதில் சேர்ந்த குப்பைகளை பொதுமக்கள் குப்பைத்தொட்டி, சாலையோரம் கொட்டியுள்ளனர். இதனால், ஒவ்வொரு தெருவிலும் டன் கணக்கில் பிளாஸ்டிக் கழிவுகள், துணிமணிகள், காய்கறி கழிவுகள், வாழை மரக்கன்றுகள், சாம்பல் பூசணி உள்ளிட்டவை மலை போல் குவிந்துள்ளன.  மாநகராட்சி நிர்வாகத்தின் உத்தரவை மீறி வணிக நிறுவனங்கள், தொழில் நிறுவனங்கள் நடுரோட்டில் திருஷ்டி பூசணிக்காய்களை உடைத்துள்ளன. இதனால், முக்கிய சந்திப்புக்களில் ஆயிரக்கணக்கான பூசணிக்காய்கள் உடைக்கப்பட்டுள்ளன. இதனால் வாகனங்களில் சென்றவர்கள் கடும் அவதிக்குள்ளாகினர். ஒரு சில இடங்களில் பூசணிக்காய் வழுக்கியதில், வாகனத்தில் சென்றவர்கள் கீழே விழுந்து காயமடைந்தனர். மாநகராட்சி பகுதியில், நேற்று ஒரே நாளில் 800 டன் அளவுக்கு குப்பைகள் சேர்ந்தன. காலையில் இருந்தே குப்பைக் கழிவுகளை அகற்றும் பணியில், துப்புரவு பணியாளர்கள் மும்முரமாக ஈடுபட்டனர். 2 மடங்கு குப்பைகள் சேர்ந்ததால், துப்புரவு பணியாளர்கள் மிகுந்த சிரமத்திற்கு ஆளாகினர்.

தொடர் விடுமுறை எதிரொலி : திருப்பதியில் இலவச தரிசனத்திற்காக பக்தர்கள் 20 மணிநேரம் காத்திருப்பு

திருப்பதி: திருப்பதி ஏழுமலையான் கோவிலில் தொடர் விடுமுறை மற்றும் வார இறுதிநாள் என்பதால் லட்சக்கணக்கான பக்தர்கள் குவிந்துள்ளனர். திருப்பதி கோவிலில் உள்ள ஓய்வு அறையில் பக்தர்கள் நீண்ட நேரம் காத்திருக்கின்றனர். அலைமோதும் பக்தர்கள் கூட்டத்தால் இலவச தரிசனத்திற்காக பக்தர்கள் 20 மணிநேரம் காத்திருக்கின்றனர்.

திருச்சியில் சூரிய ஒளி மின்னாற்றல் பூங்கா அமைக்க ஸ்மார்ட் சிட்டி திட்டத்தின் கீழ் ஒப்புதல்

திருச்சி : திருச்சியில் இரண்டரை மெகாவாட் சூரிய ஒளி மின்னாற்றல் பூங்கா அமைக்க ஸ்மார்ட் சிட்டி திட்டத்தின் கீழ் ஒப்புதல் கிடைத்துள்ளதாக தகவல் வெளியாகியுள்ளது. ஸ்மார்ட் சிட்டி திட்டத்தின் கீழ் திருச்சி மாநகராட்சியில் 18 திட்டங்களைச் செயல்படுத்த திட்டமிட்டனர். பஞ்சப்பூரில் 15 ஏக்கரில் மின்னாற்றல் பூங்கா உள்ளிட்ட 18 திட்டங்கள் குறித்து முன்மொழிவுகள் அனுப்பப்பட்டன.  இந்நிலையில் இந்தத் திட்டத்துக்கு நிர்வாக மற்றும் தொழில்நுட்ப ஒப்புதல் கிடைத்துள்ளதாகத் திருச்சி மாநகராட்சி ஆணையர் ரவிச்சந்திரன் தெரிவித்துள்ளார். இதையடுத்து திருச்சியில் சுமார் 13 கோடி ரூபாய் மதிப்பீட்டில் இரண்டரை மெகாவாட் திறனுள்ள சூரிய ஒளி மின்னாற்றல் பூங்கா அமைய உள்ளது. ஒரு மாதக்காலத்துக்குள் இதற்கான டெண்டர் கோரப்படும் என்று அவர் குறிப்பிட்டார். மேலும் இங்கு உற்பத்தி செய்யும் மின்சாரம் தமிழ்நாடு மின்னுற்பத்தி மற்றும் பகிர்மானக் கழகத்தின் தொகுப்பில் சேர்க்கப்படும் என்று அவர் தெரிவித்துள்ளார்.

கோவை விரைவு ரயிலில் வெடிகுண்டு மிரட்டல் விடுத்த நபர் போலீசாரிடம் பிடிபட்டார்

சென்னை : கோவை விரைவு ரயிலில் வெடிகுண்டு வைத்திருப்பதாக மிரட்டல் விடுத்தவர் போலீசாரிடம் சிக்கினார். வெடிகுண்டு மிரட்டல் விடுத்ததாக வடபழனியை சேர்ந்த நவீன்குமாரை பிடித்து காவல்துறையினர் விசாரணை நடத்தி வருகின்றனர்.

ஆங்காங்கே குழியாக காணப்படுகிறது ‘கண்டமாகி’ வரும் பாம்பன் சாலை பாலம்

ராமேஸ்வரம் : பாம்பன் சாலைப் பாலத்தில் புதிதாக போடப்பட்ட தார்ச்சாலை கற்கள் பெயர்ந்து சேதமடைந்து வருகிறது. இதனை உடனே சீரமைக்க வேண்டும் என மக்கள் வலியுறுத்தி  உள்ளனர். பாம்பன் சாலைப்பாலத்தில் இரண்டு ஆண்டுகளுக்கு முன்பு தேசிய நெடுஞ்சாலைத்துறையினரால் ரூ.பல கோடி செலவில் மராமத்து பணிகள் செய்யப்பட்டது. அப்போது பாலத்தின் மேல் சேதமடைந்த நிலையில் இருந்த சிமென்ட் கான்கிரீட் சாலையின் மேல் புதிதாக தார்ச்சாலையும் அமைக்கப்பட்டது. இந்த சாலை வழுக்கும் தன்மையுடன் இருந்ததால் பாலத்தில் வேகமாக வரும் வாகனங்கள் அடிக்கடி விபத்துக்குள்ளாகி வந்தது.  கார், பஸ், இருசக்கர வாகன ஓட்டிகளும் பாலத்தில் வாகனங்களை ஓட்டுவதற்கு மிகவும் சிரமப்பட்டு வந்தனர். பொதுமக்கள் தரப்பில் இருந்து அடிக்கடி புகார் எழுந்ததால் புதிதாக அமைக்கப்பட்ட வழுக்கும் தன்மை கொண்ட சாலை முற்றிலும் அகற்றப்பட்டு புதிதாக தார்ச்சாலை போடப்பட்டது. பணிகள் முடிந்து இரண்டு ஆண்டுகள் ஆகிவிட்ட நிலையில் புதிய தார்ச்சாலையில் பல இடங்களில் கற்கள் பெயர்ந்து சேதமடைந்து வருகிறது. சாலையின் பள்ளமான பகுதியில் மழைநீர் தேங்கி நிற்பதால் வாகனங்கள் செல்லச்செல்ல சிறிது சிறிதாக ஜல்லிக்கற்கள் பெயர்ந்து வட்ட வடிவில் பள்ளம் ஏற்பட்டுள்ளது. இதனால் கான்கிரீட் சாலையில் இருந்த கற்கள் வெளிய தெரிகிறது. நாளாகநாளாக இதன் மேல் வாகனங்கள் சென்றால் சிமென்ட் கான்கிரீட் தளமும் பெயர்ந்து சாலையில் ஓட்டை ஏற்பட்டு விடும். பாம்பன் பாலத்தின் தார்ச்சாலையில் பல இடங்களில் இது போல் ஜல்லி கற்கள் பெயர்ந்து சாலை சேதமடைந்து வருகிறது. சம்பந்தப்பட்ட துறை அதிகாரிகள் உடனடியாக நடவடிக்கை எடுத்து சேதமடைந்து வரும் தார்ச்சாலையை சீரமைக்க வேண்டும் என பொதுமக்களும், சுற்றுலா பயணிகளும் வலியுறுத்தியுள்ளனர்.

தஞ்சையில் மாமன்னன் ராஜராஜ சோழனின் 1033வது சதய விழா கோலாகலம் : ஆயிரக்கணக்கானோர் பங்கேற்பு

தஞ்சாவூர் : தஞ்சாவூரை தலைநகரமாக கொண்டு ஆட்சி செய்த மாமன்னன் ராஜராஜ சோழனின் 1033வது பிறந்தநாளை சதய விழாவாக தஞ்சை மக்கள் வெகு விமர்சையாக கொண்டாடி வருகின்றனர். மூன்று நாட்கள் கொண்டாடும் இந்த விழாவானது தேவார, திருவாசக இசையுடன் தொடங்கி நடைபெற்று வருகிறது. சதய விழாவை முன்னிட்டு அரசு சார்பில் தஞ்சை பெரிய கோயிலில் இருந்து மேளதாகங்களுடன் ஊர்வலமாக வந்து ராஜராஜ சோழனின் சிலைக்கு மாலை அணிவித்து மரியாதை செலுத்தினர். ஐப்பசி மாதம் சதய நட்சத்திரத்தில் பிறந்த மாமன்னன் ராஜராஜ சோழனை நினைவுக்கூறும் வகையில் இந்த விழாவானது ஆண்டுதோறும் கோலாகலமாக கொண்டாடப்பட்டு வருகிறது. இந்த விழாவை காண தஞ்சை மாவட்ட மக்கள் மட்டுமின்றி அனைத்து பகுதிகளில் இருந்தும் ஆயிரக்கணக்கானோர் மக்கள் வருகை தந்துள்ளனர். மாவட்ட நிர்வாகம், கோயில் நிர்வாகத்தினர் விழா ஏற்பாடுகள் மற்றும் பக்தர்களுக்கான அடிப்படை வசதிகளை செய்துள்ளனர். சதய விழாவையடுதத்து தஞ்சை முழுவதும் வண்ண விளக்குகளால் அலங்கரிப்பட்டுள்ளன. நாட்டுபுற கலைஞர்களின் இசை நிகழ்ச்சிகள் மற்றும் பல்வேறு மங்கல இசைகளுடன் சதய விழா கோலாகலமாக நடைபெற்று வருகிறது. 60 ஆண்டுகளுக்கு பிறகு சுமார் ரூ.150 கோடி மதிப்புள்ள ராஜராஜ சோழன் மற்றும் லோக மாதேவி சிலைகள் மீட்கப்பட்டதால், இம்முறை விழா வெகுசிறப்பாக நடைபெறுகிறது. இதனை முன்னிட்டு இன்று உள்ளூர் விடுமுறை அறிவிக்கப்பட்டுள்ளது. 500க்கும் மேற்பட்ட போலீசார் பாதுகாப்பு பணியில் ஈடுபட்டுள்ளனர். 48 வகையான திரவியங்கள் கொண்டு அபிஷேக, ஆராதனையுடன் சதய நிறைவு விழா நாளை நடைபெறுகிறது.

வீடுகளுக்கு சுத்தம் செய்ய அட்வைஸ் தெருக்களைக் கண்டு கொள்ளாத காரைக்குடி நகராட்சி நிர்வாகம்

காரைக்குடி : வீடுகளைச் சுத்தமாக வைக்க வேண்டும் என அட்வைஸ் செய்யும் காரைக்கு நகராட்சி நிர்வாகம் தெருக்களை சுத்தம் செய்ய நடவடிக்கை எடுப்பது இல்லை. இதனால் தெருக்களில் குவிந்து கிடக்கும் குப்பை, புதர்கள் கொசு உற்பத்தி மையங்களாக மாறி வருகிறது. காரைக்குடி நகராட்சி உட்பட்ட 36 வார்டுகளில் 500க்கும் மேற்பட்ட தெருக்கள் உள்ளன. இப்பகுதிகளில் 31 ஆயிரத்துக்கும் மேற்பட்ட வீடுகள் உள்ளன. தினமும் 48 டன் வரை குப்பைகள் சேகரிக்கப்பட்டு, தேவகோட்டை ரஸ்தா பகுதியில் உள்ள குப்பைக் கிடங்கில் கொட்டப்படுகிறது.  நகராட்சி பகுதிகளில் உள்ள வீடுகளில் தினமும் குப்பை வாங்குவதற்கு என நகராட்சி சார்பில் 170க்கும் மேற்பட்ட துப்புரவு பணியாளர்கள் உள்ளனர். குப்பை வாங்கும் பணி தனியார் வசம் ஒப்படைக்கப்பட்டுள்ளது. இவர்களுக்கு 10 ஆயிரத்துக்கும் மேற்பட்ட வீடுகள் ஒதுக்கப்பட்டுள்ளன. இவர்கள் 120க்கும் மேற்பட்ட துப்புரவு பணியாளர்களைக் கொண்டு குப்பை வாங்கும் பணியை செய்து வருகின்றனர். இந்த நிறுவனத்துக்கு மாதத்திற்கு ரூ. 16 லட்சத்துக்கு மேல்  நகராட்சி மூலம் தரப்படுகிறது. துப்புரவு பணியாளர்கள் வீடுகளில் சேகரமாகும் குப்பைகளை மட்டுமே வாங்குகின்றனர். ஆனால், தெருக்களைச் சுத்தம் செய்வது இல்லை. இதனால் தெருக்கள் முழுவதும் புதர் மண்டியும், குப்பைகள் குவிந்தும் காணப்படுகிறது. காரைக்குடி நகராட்சி பகுதி முழுவதும் ஆங்காங்கே  காய்ச்சல் பரவி பலர் பாதிக்கப்பட்டு வருகின்றனர். இந்நிலையில் தெரு குப்பைகளை அகற்ற நகராட்சி நிர்வாகம் இதுவரை நடவடிக்கை எடுக்கவில்லை.  வீடு. வீடாக வரும் அதிகாரிகள் வீட்டில் உள்ள குப்பைகளை அகற்ற வேண்டும். தண்ணீர் தேக்கி வைக்கக் கூடாது என மக்களுக்கு அறிவுரை கூறுகின்றனர்.ஆனால், தெருக்களில் குவிந்து கிடக்கும் குப்பை, புதர்களில் கொசு உற்பத்தி அமோகமாக நடந்து வருவதை கண்டு கொள்ளவில்லை. இவற்றை அப்புறப்படுத்தி தெருக்களை சுத்தமாக வைக்காத நகராட்சியின் மீது யார் நடவடிக்கை எடுப்பது என சமூக ஆர்வலர்கள் கேள்வி எழுப்பியுள்ளனர். இதுகுறித்து சமூக ஆர்வலர்கள் கூறுகையில், `` துப்புரவு பணியாளர்கள் முன்பு காலை நேரங்களில் ஒவ்வொரு டிவிஷனுக்கு என ஒதுக்கப்பட்ட தெருக்களை சுத்தப்படுத்தி, குப்பையை வாங்கவேண்டும். பின்பு மதிய நேரங்களில் அனைத்து துப்புரவு பணியாளர்களும் ஒன்றாக சேர்ந்து ஒரு வார்டு பகுதியை சுத்தம் (மாஸ் கிளினிங்) செய்வார்கள்.  இது போன்று ஒவ்வொரு வார்டு பகுதியாக சுத்தப்படுத்தப்படும். இதில் தெருக்களில் உள்ள கால்வாய்கள், சாலையோரங்களில் உள்ள செடிகளை அகற்றுவது, தெருக்களில் குவிந்து கிடக்கும் குப்பைகளை அப்புறப்படுத்துவது மற்றும் கொசு மருந்து அடிப்பது போன்ற பணிகளை மேற்கொள்ள வேண்டும். தெருக்களின் இடையே உள்ள சிறிய சத்துகளையும் சுத்தப்படுத்த  வேண்டும். இதன் மூலம் அந்த வார்டு முழுவதும் சுத்தப்படுத்தப்பட்டு சுகாதாரம் பேணப்படும். இதுபோன்று ஒவ்வொரு வார்டாக பணிகள் மேற்கொள்ளப்பட வேண்டும். ஆனால், இப்பணி கடந்த பல வருடங்களாக இந்த பணிகள் கிடப்பில் போடப்பட்டுள்ளன. இதனால் தெருக்கள் முழுவதும் செடிகள், முட்புதர்கள் மற்றும் குப்பை மண்டி கிடக்கிறது. இதுஅதிகாரிகளின் பார்வையில் பட்டும் கண்டுகொள்ளாத நிலையே உள்ளது. மேலும் 500க்கும் மேற்பட்டோர் காய்ச்சலால் பாதிக்கப்பட்டும் அதிகாரிகள் பாராமுகமாகவே செயல்படுகின்றனர். தெருக்களை சுத்தம் செய்யாமல் டெங்குவை கட்டுப்படுத்துவது எப்படி என தெரியவில்லை. நகராட்சி துப்புரவு பணிகளை கண்காணிக்க சப்கலெக்டர் தலைமையில் தனி டீம் இருந்தும் பயனற்ற நிலையே உள்ளது. எனவே, கிடப்பில் போடப்பட்ட மாஸ் கிளினிக் பணியைமீண்டும் செயல்படுத்த வேண்டும். இதனை ஒவ்வொரு மாதமும் நடைமுறை படுத்த வேண்டும்’’ என்றனர்.

வரலாறு காணாத மழையால் வெள்ளத்தில் மிதந்த தேவாரம்

உத்தமபாளையம், : தேவாரம் வெள்ளத்திற்கு மிக முக்கிய காரணமாக கால்வாய்களுக்குள் வரக்கூடிய வரத்து வாய்க்கால்கள் அனைத்தும் ஆக்கிரமிப்பின் பிடியில் உள்ளதாக பொதுமக்கள் புகார் தெரிவித்துள்ளனர். தேவாரத்தில் கடந்த 1979ம் ஆண்டு பெரிய அளவில் பேய்மழை பெய்துள்ளனது. இதனால் இங்குள்ள மிக முக்கியமான பிள்ளையார்த்து, பெரம்புவெட்டி ஓடையின் வழியே காட்டாற்று வெள்ளம் பெருக்கெடுத்து ஓடியது. அப்போது வீடுகளுக்குள் வெள்ளம் புகுந்தது. இதன்பின்பு 40 ஆண்டுகளுக்கு பிறகு நேற்று கொட்டி தீர்த்த பேய் மழையால் தேவாரம் சந்தைதெரு, மூணான்டிபட்டி, வடக்குதெருஉள்ளிட்ட பகுதிகளில் உள்ள வீடுகளுக்குள் வெள்ளம் புகுந்தது. இதனால் பொதுமக்கள் அச்சத்தின் உச்சத்தில் உள்ளனர். மறுபுறம் மலையடிவாரத்தை ஒட்டிய பகுதிகளில் அதிகமான மழை கொட்டியது. இங்குள்ள முக்கிய கண்மாய்களாக தேவாரம் பெரியதேவியம்மன், டி.ரெங்கநாதபுரம் சின்னதேவியம்மன், செட்டிகுளம், புதுக்குளம் போன்ற கண்மாய்கள் உள்ளன. மலையடிவாரத்தில் பெய்யக்கூடிய மழையை பெரம்புவெட்டி ஓடை, சாக்குலூத்துஓடை, வட்டஓடை, பிள்ளையார்த்து ஓடை, பதினெட்டாம்படி ஓடை, சுத்தகங்கை ஓடை, கன்னிமார்ஓடை உள்ளிட்ட 7 ஓடைகளின் வழியே தண்ணீர் வரும் இந்த ஓடைகள் பெரும்பாலும் 60 முதல் 120 அடி அகலம் வரை இருந்ததாக பொதுமக்கள் கூறினர். தற்போது இவை அனைத்தும் 10 முதல் 20 அடியே உள்ளன.

இவை அனைத்தும் ஆக்கிரமிப்பாளர்களின் பிடியில் உள்ளதால் கனமழை கொட்டினால் வெள்ளமாக மாறி ஊருக்குள் வரக்கூடிய நிலை உண்டாகி உள்ளது. எனவே, தேவாரம் வருவாய்த்துறை, பொதுப்பணித்துறை, மஞ்சளாறு வடிநிலக்கோட்ட அதிகாரிகள் இணைந்து ஆக்கிரமிப்புகளை அகற்றிட தேவையான நடவடிக்கை எடுக்கவேண்டும். இதுகுறித்து பொதுமக்கள் கூறுகையில், `` தேவாரம் வெள்ளத்திற்கு காரணமே ஓடைகள் ஆக்கிரமிப்புதான். இதனாலேயே வெள்ளம் திசைமாறி ஊருக்குள்ளும், வீடுகளுக்குள்ளும் செல்கிறது. இவற்றை அகற்றிட தேவையான நடவடிக்கையில் மாவட்ட நிர்வாகம் எடுக்க வேண்டும்’’ என்றனர்.ஆபத்தான இடங்களை  கண்காணித்து வருகிறோம் உதவி ஆட்சியர் தகவல் : தேவாரத்தில் கனமழையினால் வெள்ளம் பாதித்த இடங்களை உத்தமபாளையம் வருவாய் கோட்ட உதவி ஆட்சியர் வைத்திநாதன் பார்வையிட்டார். அங்கு பாதிக்கப்பட்ட மக்களிடம் குறைகளை கேட்டார். அப்போது ஊருக்குள் தண்ணீர்வராமல் உரிய நடவடிக்கை எடுக்கவேண்டும் என பொதுமக்கள் கோரிக்கை விடுத்தனர்.இதனை அடுத்து அவர் கூறுகையில், தேவாரத்தில் நிரம்பி உள்ள 8 கண்மாய்களை கண்காணித்து வருகிறோம். இதில் ஏதேனும் உடைப்பு ஏற்படாமல் இருக்க அனைத்து துறை அதிகாரிகளும் எச்சரிக்கை செய்யப்பட்டுள்ளனர். பாதிக்கப்பட்ட இடங்களில் மக்கள் மிக பாதுகாப்பாக உள்ளனர். இருந்தாலும் மழை தொடர்வதால் இரவில் 24 மணிநேரமும் அதிகாரிகள் அலார்ட் செய்யப்பட்டுள்ளனர். மிக மேடான இடங்களில் பொக்லைன் மூலம் எடுத்து தண்ணீர் விரைவாக செல்ல நடவடிக்கை எடுக்கப்பட்டுள்ளது’’ என்றார். வருவாய் ஆய்வாளர்கள் முத்தமிழ், கம்பம் பரமசிவம் உள்ளிட்டவர்கள் உடன் இருந்தனர்.போடி அருகே கண்மாய் கரை உடைந்ததால் மக்கள் பீதிபோடி அருகே சிலமலையிலுள்ள சூலப்புரம் மேற்கு பகுதியில் நேற்றுமுன்தினம் விடிய, விடிய மழை பெய்தது. இதனால் குதுவல் கண்மாய் நிரம்பி கரை நடைந்தது. மேலும் தண்ணீர் வரத்து அதிகரித்தால் தண்ணீர் ஊருக்குள் புகுந்து விடும் என்ற அச்சம் மக்களிடையே ஏற்பட்டது. அவர்கள் கொடுத்த தகவலின் அடிப்படையில் உடைந்த கண்மாய் கரையை உடனடியாக சீரமைக்க போடி ஊராட்சி ஒன்றிய ஆணையாளர் பாரமணிக்கு தகவல் தெரிவிக்கப்பட்டது. இதையடுத்து சீரமைப்பு பணி நடந்து வருகிறது. இப்பணியினை டிஆர்ஓ கந்தசாமி நேரில் சென்று பார்வையிட்டார்.

அதிகாரிகளின் மெத்தனத்தால் 2 நாட்களாக சாலையில் நின்ற ரேஷன் பொருள் லாரிகள்

உத்தமபாளையம் : உத்தமபாளையம் நுகர்பொருள் வாணிபகழக கிடங்கிற்கு வந்த ரேஷன் பொருட்கள் லாரிகள், அதிகாரிகள் மெத்தனத்தால் 2 நாட்களாக சாலையில் நிறுத்தி வைக்கப்பட்டுள்ளதாக புகார் எழுந்துள்ளது. இதனால் சாலையில் செல்ல முடியாமல் வாகன ஓட்டிகள் தவித்தனர். உத்தமபாளையத்தில் உணவு வழங்கல் துறையின் கீழ் இயங்கும் நுகர் பொருள் வாணிபக்கழக கிட்டங்கி செயல்படுகிறது. இங்கிருந்து தாலுகாவில் உள்ள 290க்கும் மேற்பட்ட ரேஷன் கடைகளுக்கு பொருட்கள் அனுப்பிவைக்கப்படுவது வழக்கமாக உள்ளது. இந்த மாதம் தீபாவளிக்கு முன்பே பொருட்கள் ரேஷன் கடைகளில் விநியோகம் செய்யும் வகையில் மொத்த வணிக கிட்டங்கிகளில் இருந்து ரேஷன் பொருட்கள்கள் லாரிகளில் அனுப்பி வைக்கப்பட்டது.நேற்று முன்தினம் ஆயுதபூஜை நாள் என்பதால் இதன் கண்காணிப்பாளர் மற்றும் ஊழியர்கள் பணிகளுக்கு வரவில்லை. இதனால் நேற்று முன்தினம் முதல் வாணிபகழக கிட்டங்கிக்கு வந்த லாரிகள் அனைத்தும் நீண்ட வரிசையில் நின்றன. இதனால் கோம்பை ரோடு, உ.அம்மாபட்டி சாலை உள்ளிட்ட இடங்களில் 20க்கும் மேற்பட்ட லாரிகள் சாலைகளில் நிறுத்தப்பட்டன. இதனால் இரவில் வாகனங்கள் செல்வதில் பிரச்னை ஏற்பட்டது. அத்துடன் டூவீலரில் செல்ல முடியாமல் பொதுமக்கள் தவித்தனர்.இதுகுறித்து பொதுமக்கள் கூறுகையில், `` கடந்த இரண்டு நாட்களாக சரக்குலாரிகள் ரேஷன் மூடைகளுடன் சாலைகளில் நிறுத்தி வைக்கப்பட்டன. அதிகாரிகள் மெத்தனமே இதற்கு காரணம். நேற்று மதியம் முதல்தான் கிட்டங்கிக்குள் ரேஷன் மூடைகள் இறக்கி வைக்கப்பட்டன’’ என்றனர்.

வடகாடு மலைப்பகுதியில் விவசாயத்திற்கான வாகனங்களை அனுமதிக்க மறுக்கும் வனத்துறை

* நடவடிக்கை கோரி கலெக்டரிடம் மனுஒட்டன்சத்திரம் : வடகாடு மலைப்பகுதியில் விவசாயத்திற்கு தேவையான வாகனங்களை வனத்துறை அதிகாரிகள் அனுமதிக்க மறுப்பதால் வாழ்வாதாரம் பாதிக்கப்படுவதாக கலெக்டருக்கு மனு அனுப்பப்பட்டது. ஒட்டன்சத்திரம் தாலுகா, வடகாடு மலைக்கிராமத்தில் சுமார் 2 ஆயிரத்திற்கும் மேற்பட்ட விவசாய குடும்பத்தினர் வசித்து வருகின்றனர். இப்பகுதியில் செடி பயிர்களான பீன்ஸ், காலிபிளவர், அவரை, தட்டைபயறு மற்றும் மரப் பயிர்களான மா, பலா, வாழை எலுமிச்சை, தென்னை போன்ற விவசாயம் செய்து வருகின்றனர்.இப்பகுதி விவசாயிகள் மாவட்ட கலெக்டருக்கு ஒரு கோரிக்கை மனு அனுப்பியுள்ளனர். அந்த மனுவில், ‘‘இங்குள்ள விவசாய நிலங்களை சீரமைக்க பொக்லைன் இயந்திரம், தண்ணீர் வசதிக்கு போர்வண்டி ஆகியவை அத்தியாவசியமாக தேவைப்படுகிறது. ஆனால் கடந்த ஒருமாத காலமாக மாவட்ட வன அலுவலரின் உத்தரவு என்று சொல்லி மேற்சொன்ன வாகனங்களை அனுமதிக்க மறுக்கின்றனர். வடகாடு ஊராட்சியானது அடர்ந்த வனப்பகுதி இல்லை. விலை உயர்ந்த மரங்கள் இல்லை, காய்கறி உற்பத்தி செய்யக்கூடிய விவசாய பகுதியாகும். இதனால் எங்கள் பகுதி விவசாயிகளின் வாழ்வாதாரம் பாதிக்கப்பட்டுள்ளது.வடகாடு மலைப்பகுதியில் உள்ள பட்டா நிலங்களை பராமரிப்பதற்காக கடந்த ஒரு மாதத்திற்கு முன்பு வரை அனைத்து வாகனங்களும் சென்று போர் போடப்பட்டது. பொக்லைன் வைத்து பட்டா நிலங்கள் சீரமைக்கப்பட்டது, வனத்துறையினர் வனங்கள் மற்றும் வனநிலங்களில் செய்யும் குற்றச்செயல்களை தடுக்காமல் பட்டா நிலங்களில் விவசாயிகள் செய்யும் வேலைகளை தடுத்து, வாழ்வாதாரத்தை பாதிக்கக்கூடிய வகையில் செயல்பட்டு வருகிறார்கள். இதுபற்றி வன அதிகாரிகளை கேட்கும்போது அலைக்கழிக்கும் நோக்கத்தில் காலை, மாலை என 2 வேளையுமாக உயர் அதிகாரிகளிடம் கேளுங்கள் என மக்களை சிரமமப்படுத்துகின்றனர்.ஒவ்வொரு வருடமும் பெய்யும் மழையால் வரப்புகள் மற்றும் வாய்க்கால் சேதாரமாகி விடுகிறது. இதனை சரி செய்ய இயந்திரங்கள் எங்களுக்கு அவசியம் தேவைப்படுகிறது. அதனை வனத்துறையினர் தடுக்கின்றனர். ஏற்கனவே வனவிலங்குகளால் பாதிக்கப்பட்டு வரும் நாங்கள் தற்போது வனத்துறையினர் கெடுபிடியால் விவசாயம் செய்ய முடியாத நிலை ஏற்பட்டுள்ளது. க்ஷஎனவே இவற்றைசரிபடுத்தி எங்கள் வாழ்வாதாரத்தை பாதுகாக்க வேண்டும்’’ இவ்வாறு அதில் கூறப்பட்டிருந்தது.

மதுரை அருகே சாலையோரம் நின்றவர்கள் மீது கார் மோதியதில் 2 பேர் பலி

மதுரை : வடுகப்பட்டியில் சாலையோரம் நின்றவர்கள் மீது கார் மோதியதில் 2 பேர் பலியாகினர். பேருந்துக்காக காத்திருந்தவர்கள் மீது கார் மோதி விபத்து நடந்துள்ளது.