Thanjavoor - Dinakaran

ஹைட்ரோ கார்பன் திட்டத்திற்கு எதிராக விழிப்புணர்வு பிரசாரம் விவசாய தொழிலாளர் சங்கம் முடிவு

தஞ்சை, மே 19:  தமிழ் மாநில விவசாய தொழிலாளர் சங்கத்தின் தஞ்சாவூர் மாவட்ட பொதுக்குழு கூட்டம் நேற்று  ஏஐடியூசி அலுவலகத்தில் நடைபெற்றது. மாவட்ட தலைவர் கோவிந்தராசு தலைமை வகித்தார். இந்த கூட்டத்தில் எதிர்கால பணிகள் மற்றும் நடந்துள்ள பணிகள் குறித்து மாவட்ட செயலாளர் பக்கிரிசாமி பேசினார். மாநில நிர்வாகக்குழு முடிவுகளை விளக்கி மாநில பொருளாளர் சந்திரகுமார் பேசினார். இந்திய கம்யூனிஸ்ட் கட்சியின் மாவட்ட செயலாளர் பாரதி, விவசாய தொழிலாளர் சங்க அமைப்பின் மாவட்ட பொருளாளர் .குருசாமி உள்ளிட்ட மாவட்ட நிர்வாகிகள், மாவட்டக்குழு உறுப்பினர்கள் கலந்து கொண்டனர்.கூட்டத்தில், ஜூன் முதல் வாரத்தில் ஹைட்ரோகார்பன் திட்டத்துக்கு எதிராக கிராமங்கள் தோறும் விழிப்புணர்வு பிரசாரம் செய்வது, தகுதியான விவசாய தொழிலாளர்களுக்கு குடிமனை பட்டா வழங்கக்கோரி மாவட்டம் முழுமையாக கிராம நிர்வாக அலுவலகங்களில் கோரிக்கை மனு அளிப்பது. கல்லணை தொடங்கி அணைக்கரை வரை உள்ள நீர் ஆதார மையங்களை அடையாளம் கண்டு புனரமைத்து பாதுகாக்க வேண்டும். நூறு நாள் வேலைதிட்டத்தை முறையாக நடைமுறைப்படுத்தாமல் கிராமப்புற விவசாய கூலித்தொழிலாளர்களை அலைக்கழிக்கும் அதிகாரிகள் மீது உரிய நடவடிக்கை எடுக்க வேண்டும் என்பது உள்ளிட்ட தீர்மானங்கள் நிறைவேற்றப்பட்டன.

திருக்காட்டுப்பள்ளி கடைவீதியில் 100 கிலோ பிளாஸ்டிக் பைகள் பறிமுதல்

திருக்காட்டுப்பள்ளி, மே 19: திருக்காட்டுப்பள்ளி கடைவீதியில் பல கடைகளில் தமிழக அரசால் தடை விதிக்கப்பட்டுள்ள பிளாஸ்டிக் பைகளை விற்பனை செய்வதாக பேரூராட்சி செயல் அலுவலருக்கு தகவல் வந்தது. இதையடுத்து நேற்று திருக்காட்டுப்பள்ளி பேரூராட்சி சுகாதார ஆய்வாளர் தமிழ்வாணன் மற்றும் பணியாளர்கள் கடைகளில் ஆய்வு செய்தனர். அப்போது பல கடைகளில் தடை செய்யப்பட்ட பிளாஸ்டிக் பொருட்கள் விற்பனை செய்வது தெரியவந்தது. இதையடுத்து சுமார் 100 கிலோ தடைசெய்யப்பட்ட பிளாஸ்டிக் பொருட்களை பறிமுதல் செய்தனர். அவற்றை விற்பனை செய்த கடைகாரர்களிடமிருந்து ரூ.9 ஆயிரம் அபராதமாக வசூலிக்கப்பட்டது. மேலும் இனி தடை செய்யப்பட்ட பிளாஸ்டிக் பொருட்களை விற்பனை செய்யவோ, பயன்படுத்தவோ கூடாது என்று எச்சரிக்கை செய்யப்பட்டது.

கும்பகோணத்தில் பள்ளி வாகனங்கள் ஆய்வு 6 வாகனங்கள் தகுதி நீக்கம்

கும்பகோணம், மே 19:  கும்பகோணம் வட்டார போக்குவரத்துக்கு உட்பட்ட பள்ளி வாகனங்கள் ஆய்வு பணி கும்பகோணம் அரசு ஆடவர் கல்லூரி மைதானத்தில் நடைபெற்றது. வட்டார போக்குவரத்து அலுவலர் அருணாச்சலம் தலைமையில் , வட்டார போக்குவரத்து ஆய்வாளர் வெங்கிடுசாமி,  தீயணைப்பு நிலைய அலுவலர் முத்துகுமார், போக்குவரத்து காவல் பிரிவு இன்ஸ்பெக்டர் ஜெயசந்திரன் மற்றும் அதிகாரிகள் கலந்து கொண்டு ஆய்வு நடத்தினர். இதில் 44 பள்ளிகளில் உள்ள 118 வாகனங்கள் ஆய்வுக்கு உட்படுத்தப்பட்டது. இதில் பள்ளி வாகனங்களில் பாதுகாப்பு வசதிகள் அனைத்தும் சரியாக உள்ளதா, ஓட்டுனர்கள் உரிமம், அவர்களுக்கான அடையாள அட்டை, வாகனத்தில் அவசர வழிகள், காற்றோட்டமுள்ள ஜன்னல்கள், வாகனத்தில் எளிதில் வெளியில் வரக்கூடிய அளவில் இருக்கைகள், தரைதளம், முதலுதவி பெட்டி, படிக்கட்டுகள், வேக்கட்டுப்பாட்டுகருவி, தீயணைப்பு கருவிகள் உள்ளிட்ட அனைத்து ஆவணங்கள் குறித்து ஆய்வு செய்யப்பட்டது.அதனை தொடர்ந்து   வட்டார போக்குவரத்து அலுவலர் அருணாச்சலம் நிருபர்களிடம்  கூறுகையில், கும்பகோணம் சரகத்திற்கு உட்பட்ட 44 பள்ளிகளில் 159   பள்ளி வாகனங்கள் உள்ளன. இதில் நேற்று நடைபெற்ற ஆய்வில் 118 பள்ளி வாகனங்கள் ஆய்வு  மேற்கொள்ளப்பட்டது. ஆய்வில் வாகனங்களில் ஆபத்தின் போது வாகனத்தில் இருந்து வெளியேற அவசர வழிகள் உள்ளதா, தீயணைப்பு கருவிகள் உள்ளதா அவை சரியாக செயல்படுகிறதா என்பது குறித்து ஆய்வு செய்யப்பட்டது. இந்த  ஆய்வில் 6 வாகனங்களில் உரிய பாதுகாப்பு கருவிகள், அவசர வழிகள் உள்ளிட்டவை இல்லாததால் அந்த வாகனங்கள் தகுதிநீக்கம் செய்யப்பட்டது. மற்ற 112 வாகனங்களுக்கு அனுமதி வழங்கப்பட்டுள்ளது. மேலும் 41 வாகனங்கள் பள்ளி நிர்வாகத்தினர் பராமரிப்பு செய்வதற்காக கொண்டு சென்றுள்ளனர். பழுது செய்வதற்காக சென்ற வாகனங்களும், இந்த ஆய்வின் போது  தகுதி நீக்கம் செய்யப்பட்ட வாகனங்களை பராமரிப்பு செய்தும் வருகிற மே மாதம் 31ம் தேதிக்குள் மறு ஆய்வுக்கு உட்படுத்த வேண்டும் என்றார்.

நாதன்கோவில் ஜெகநாதபெருமாள் கோயிலில் விசாக திருவிழா கொடியேற்றம் 27ம்தேதி தேரோட்டம்

கும்பகோணம்,மே 19:  கும்பகோணம் அருகே நாதன்கோவிலில் உள்ள ஜெகநாதபெருமாள் கோயிலில் வைகாசி பெரு விழாவை முன்னிட்டு நேற்று  கொடியேற்றம் நடைபெற்றது. 108 வைணவ திவ்ய தேசங்களில் சோழநாட்டு திருப்பதிகளில் 40ல் நடுநாயகமாகத் திகழ்வது நந்திபுர விண்ணகரம் என்னும் நாதன்கோவில் சேத்திரமாகும். நாதன்கோவில் கிராமத்தில் உள்ள இத்தலத்தில் கோயில் கொண்டுள்ள செண்பகவல்லி சமேத ஜெகந்நாதப் பெருமாளை பிரம்மன், மார்க்கண்டேயர், சிபி சக்கரவர்த்தி ஆகியோர் வழிபட்டு பேறு அடைந்த தலமாகும்.நந்திக்கு சாபவிமோசனம் செய்த ஒரு புராண தலம் என்ற சிறப்பும் உடையது. நந்தி பெயரிலேயே தீர்த்தம் உடைய சிறப்பு பெற்ற தலம். பஞ்சாயுதபாணியாய் எழுந்தருளியிருக்கும் இப்பெருமானை திருமங்கை ஆழ்வார் 10 பாசுரங்கள் வாயிலாக மங்களாசாசனம் செய்துள்ளார்.இக்கோயிலில் ஆண்டுதோறும் நடைபெறும் வைகாசி விசாக பெருவிழா நேற்று காலை  கொடியேற்றத்துடன் துவங்கியது. இதையொட்டி சிறப்பலங்காரத்தில் ஸ்ரீதேவி பூதேவியுடன் ஜெகன்நாதப்பெருமாள் கொடிமரத்தின் முன்பு காட்சியளித்தனர். இதில் ஏராளமான பக்தர்கள் கலந்து கொண்டனர். தொடர்ந்து  பல்வேறு வாகனங்களில் வரும் 27ம்தேதி வரை விழா நாட்களில் சுவாமி பல்வேறு வாகனங்களில் புறப்பாடு நடைபெறுகிறது.முக்கிய விழாவான வரும் 24  ம்தேதி மாலை 4  மணிக்கு திருக்கல்யாண உற்சவம், 26  ம் தேதி காலை 8.30 மணிக்கு திருத்தேரோட்டமும், 27ம்தேதி  மாலை 6  மணிக்கு புஷ்ப யாக நிகழ்ச்சியும் நடைபெறுகிறது.வைகாசி விசாக பெருவிழாவை முன்னிட்டு 10 நாட்களும் சுவாமி உள்பிரகார புறப்பாடு நிகழ்ச்சியும், திருமஞ்சனமும், நாலாயிர திவ்ய பிரபந்தசேவை நிகழ்சியும் நடைபெறவுள்ளது. இதற்கான ஏற்பாடுகளை ஜெகந்நாதப் பெருமாள் கைங்கார்ய சபா மற்றும் கோயில் நிர்வாகத்தினர், பக்தர்கள்  செய்து வருகின்றனர்.

முன்விரோத தகராறில் ஒருவர் கைது

திருவையாறு,மே 19:   திருவையாறு அடுத்த கல்ணபுரம் வள்ளலார் நகரைச் சேர்ந்த பெரியசாமி மகன் ராஜேஷ் (31). பொன்னாவரை மெயின்ரோட்டை சேர்ந்த சுப்ரமணியன் மகன் வினோத்(30). இருவருக்கும் முன்விரோதம் இருந்து வந்தது. சம்பவத்தன்று  கல்யாணபுரம் பொன்னாவரை ரோட்டில் வினோத், ராஜேஷை தகாத வார்த்தையால் திட்டி அடித்துள்ளார். இதில் காயமடைந்த ராஜேஷ் கொடுத்த புகாரின்பேரில் திருவையாறு சப்இன்ஸ்பெக்டர் ரவிச்சந்திரன் வழக்கு பதிவு செய்து வினோத்தை கைது செய்து விசாரணை நடத்தி வருகிறார்.

பந்தநல்லூரில் குடிநீர் வழங்காததை கண்டித்து கிராமமக்கள் சாலைமறியல்

கும்பகோணம், மே 19: பந்தநல்லூர் சாலை கீழகாட்டூர் கிராம மக்கள் தங்களுக்கு ஊராட்சி நிர்வாகம் குடிநீர் வழங்காததை கண்டித்து நேற்று சாலைமறியலில் ஈடுபட்டனர். கும்பகோணம் அடுத்த பந்தநல்லூர் சாலையிலுள்ள கீழக்காட்டூர் கிராமத்தில் கடந்த பல நாட்களாக குடிநீர் வினியோகம் இல்லை.  இதனால் கிராம மக்கள் பல கிலோ மீட்டர் தூரம் சென்று குடிநீர் எடுத்து வந்து உபயோகித்து வந்தனர். இதுகுறித்து ஊராட்சி நிர்வாகத்திடம் கேட்டபோது, போதிய அளவில் மின்சாரம் வரவில்லை, குறைந்த அழுத்தம் மின்சாரம் வருவதால், மோட்டார் இயங்காததால் குடிநீர்  வழங்கவில்லை என்று பதில் கூறினர். இதனால் ஆத்திரமடைந்த கீழக்காட்டூர் கிராம மக்கள் நூற்றுக்கும் மேற்பட்டோர் திருப்பனந்தாள்- பந்தநல்லூர் சாலையில் மறியல்  போராட்டத்தில் ஈடுபட்டனர்.சுமார் 1 மணி நேரத்திற்கு மேலாக நடந்த போராட்டத்தால் போக்குவரத்து பாதித்தது. இதையடுத்து பந்தநல்லூர் போலீசார், போராட்டக்காரர்களிடம் பேச்சுவார்த்தை நடத்தி, குடிநீர் வழங்க உடனடியாக ஏற்பாடுகள் செய்து தரப்படும் என உத்தரவாதம் அளித்ததனர். இதனை ஏற்றுக்கொண்ட பொதுமக்கள் சாலைமறியலை கைவிட்டனர்.

குடந்தை, பேராவூரணியில் டெங்கு ஒழிப்பு விழிப்புணர்வு நிகழ்ச்சி

கும்பகோணம், மே 17:  கும்பகோணம் அடுத்த திருவலஞ்சுழி கிராமத்தில் வட்டார பொது சுகாதாரத்துறை சார்பில் உலக டெங்கு தின விழிப்புணர்வு நிகழ்ச்சி நடந்தது. பட்டீஸ்வரம் வட்டார சுகாதார மேற்பார்வையாளா் சங்கரன் தலைமை வகித்து டெங்கு மனிதன் போன்று வேடமிட்டு பாடல்கள் பாடி விழிப்புணா–்வு ஏற்படுத்தினார். பின்னர் அவர் பேசுகையில், தற்போது கோடையின் தாக்கம் அதிகமாக இருப்பதன் காரணத்தால் நாம் நம் வீட்டின் தேவைக்காக குடிநீரை பல்வேறு பாத்திரங்களில் சேமித்து வைக்கிறோம். பல்வேறு வேலைகளுக்காக நீரை சேமித்து வைக்கிறோம். அவ்வாறு சேமித்து வைக்கும் நீரில் டெங்கு காய்ச்சலை உண்டாக்கும் கொசுக்கள் அமா்ந்து ஒரு நாளைக்கு பல நூற்றுக்கணக்கான முட்டையிடும். 7ம் நாள் முதிர்ந்த கொசுக்களாக மாறி காய்ச்சல் உள்ள ஒருவரை கடித்து மற்றவா–்களை கடிக்கும்போது ஒருவரிடமிருந்து மற்றவருக்கு பரவுகிறது. எனவே அனைவரும் தண்ணீர் சேமிக்கும் பாத்திரங்களை மூடி பாதுகாக்க வேண்டும். அனைத்து ஆரம்ப சுகாதார நிலையங்கள் மற்றும் அரசு மருத்துவமனைகளில் டெங்கு காய்ச்சலை கண்டறியும் ரத்த பரிசோதனை இலவசமாக செய்யப்படுகிறது. இதை பொதுமக்கள் பயன்படுத்தி கொள்ள வேண்டும் என்றார். சுகாதார ஆய்வாளர்கள் விஜயேந்திரன், வீரமணி, சிவக்குமார், செந்தில்குமார், சவுந்தர்ராஜன், கோமதி மற்றும் திருவலஞ்சுழி ஊராட்சி மன்ற செயலாளர் குமார் பங்கேற்றனர். ஊராட்சி உதவியாளா் ராஜேஷ் நன்றி கூறினார்.பேராவூரணி: பொது சுகாதாரம் மற்றும் நோய் தடுப்புத்துறை சார்பில் பேராவூரணி வட்டாரம் செருவாவிடுதி, குறிச்சி, காலகம், பின்னவாசல் ஆகிய ஆரம்ப சுகாதார நிலையங்களில் தேசிய டெங்கு ஒழிப்பு விழிப்புணர்வு முகாம் நடந்தது. வட்டார மருத்துவ அலுவலர் சவுந்தர்ராஜன், டாக்டர்கள் ரஞ்சித், அறிவானந்தம், சேது, சரண்யா, நிஷானி மற்றும் பலர் பங்கேற்றனர்.

பாணாபுரீஸ்வரர் கோயிலில் வைகாசி விசாக திருக்கல்யாண உற்சவம்

கும்பகோணம், மே 17:  கும்பகோணம் பாணபுரீஸ்வரர் கோயிலில் வைகாசி விசாகத்தையொட்டி திருக்கல்யாண உற்சவம் நடந்தது. கும்பகோணத்தில் பாணபுரீஸ்வரர் கோயில் உள்ளது. உலக புகழ்பெற்ற மகாமகம் திருவிழாவுடன் தொடர்புடைய 12 சிவாலயங்களில் ஒன்றாகும். இந்த கோயிலில் வைகாசி விசாக பிரம்மோற்சவ விழா 30 ஆண்டுகளுக்கு முன் நடந்தது. இந்நிலையில் இந்தாண்டு பிரம்மோற்சவ விழா 10 நாட்கள் நடக்கிறது. இதையொட்டி கடந்த 9ம் தேதி கொடியேற்றம் நடந்தது. இதைதொடர்ந்து தினம்தோறும் பல்வேறு வாகனங்களில் சுவாமி வீதியுலா நடந்து வருகிறது. முக்கிய விழாவான நேற்று முன்தினம் இரவு திருக்கல்யாண உற்சவம் நடந்தது. இதில் திரளான பக்தர்கள் பங்கேற்று சுவாமி தரிசனம் செய்தனர். இன்று (17ம் தேதி) தேரோட்டம் நடககிறது. நாளை கோயில் குளத்தில் தீர்த்தவாரி நடக்கிறது.

அம்ரூத் திட்டத்தின்கீழ் பூங்கா அமைக்கும் பணி அதிகாரிகள் ஆய்வு

தஞ்சை, மே 17:  தஞ்சையில் உள்ள 2 வார்டுகளில் ரூ.2.64 லட்சம் மதிப்பில் அம்ரூத் திட்டத்தின்கீழ் பூங்காக்கள் அமைக்கும் பணியை தமிழ்நாடு நகர்ப்புற நிதி மற்றும் தொழில் வளர்ச்சி நிறுவன தர கட்டுப்பாட்டு அலுவலர் சம்பத் ஆய்வு செய்தார்.தஞ்சை மாநகராட்சியில் மொத்தம் 51 வார்டுகள் உள்ளன. இதில் 16, 17ம் வார்டுகளில் அம்ரூத் திட்டத்தின்கீழ் தமிழ்நாடு நகர்ப்புற நிதி மற்றும் தொழில் வளர்ச்சி நிறுவனம் மூலம் 6 பூங்காக்கள் அமைக்கப்பட்டு வருகிறது. கேஎம்எஸ் நகர், ஸ்ரீராம் நகர், அருளானந்த நகர் 8வது தெரு, சாந்தி நகர், ரயில் நகர் ஆகிய இடங்களில் பூங்கா அமைக்கும் பணிகள் விறுவிறுப்பாக நடந்து வருகிறது. புல்தரை, நீர் ஊற்று, சிறுவர்கள் விளையாட ஊஞ்சல், சீசா, பெரியோர் நடைபயிற்சி மேற்கொள்ள நடைபாதை உள்ளிட்டவை அமைக்கப்பட்டு வருகிறது. மொத்தம் 6 பூங்காக்களும் ரூ.2.64 கோடியில் கட்டமைக்கப்பட்டு வருகிறது. இப்பணிகளை தமிழ்நாடு நகர்ப்புற நிதி மற்றும் தொழில் வளர்ச்சி நிறுவன தர கட்டுப்பாட்டு அலுவலர் சம்பத் நேற்று ஆய்வு செய்தார். அப்போது மாநகராட்சி உதவி பொறியாளர்கள் கார்த்திகேயன், ரமேஷ், சந்திரபோஸ், சித்ரா உடனிருந்தனர்.

நரியம்பாளையத்தில் தார்சாலை அமைப்பு

பட்டுக்கோட்டை, மே 17:  தினகரன் செய்தி எதிரொலியால் பட்டுக்கோட்டை நரியம்பாளையத்தி–்ல் தார்ச்சாலை அமைக்கப்பட்டுள்ளது. பட்டுக்கோட்டை நகராட்சிக்கு உட்பட்ட பல்வேறு வார்டுகளில் பழைய தார்சாலைகளை புதிய தார்சாலைகளாக மாற்றும் பணி  நடந்தது. இதேபோல் பட்டுக்கோட்டை நகராட்சி 1வது வார்டு நரியம்பாளையம் வடக்கு பகுதியில் புதிய தார்சாலையாக மாற்றுவதற்கு கப்பிக்கல் கொட்டப்பட்டு 8 மாதங்களுக்கு மேலாகிவிட்டது. இதேபோல் பல வார்டுகளில் புதிய தார்சாலைகளாக மாற்றுவதற்கு கப்பிக்கல் கொட்டப்பட்டு பல மாதமாகிவிட்டது.  ஒரு சில வார்டுகளில் புதிய தார்சாலைகள் அமைக்கப்பட்டாலும் பல வார்டுகளில் இன்னும் சாலைகளில் கப்பிக்கல் பல மாதங்களாக கொட்டப்பட்டுள்ளதால் இருசக்கர வாகனங்களில் செல்லும் பலர் நிலை தடுமாறி கீழே விழுந்து  படுகாயமடைகின்றனர் என்று பொதுமக்கள் புகார் தெரிவித்து வருகின்றனர். இதுகுறித்து பலமுறை சம்மந்தப்பட்ட நகராட்சி அதிகாரிகளிடம் தெரிவித்தும் நடவடிக்கை எடுக்காமல் உள்ளனர் என்று சமூக ஆர்வலர்கள், பொதுமக்கள் குற்றம்சாட்டி வருகின்றனர். ஒரு சில வார்டுகளில் புதிய தார்சாலை அமைக்கும் பணி முடிந்திருந்தாலும் கூட இன்னும் பல வார்டுகளில் கப்பிக்கல் அப்படியே கொட்டப்பட்டுள்ளது. எனவே போர்க்கால அடிப்படையில் உடனடியாக பணிகளை முடித்து புதிய தார்சாலையை அமைத்துத்தர வேண்டுமென சமீபத்தில் தினகரனில் படத்துடன் செய்தி வெளியானது. அதன் எதிரொலியாக நகராட்சி அதிகாரிகள் உடனடியாக நடவடிக்கை எடுத்து நரியம்பாளையம் வடக்கு பகுதியில் தார்சாலை அமைத்தனர். இதுகுறித்து அப்பகுதியை சேர்ந்த பொதுமக்கள், சமூக ஆர்வலர்கள் கூறுகையில், செய்தி வெளியிட்ட தினகரன் நாளிதழுக்கும், நடவடிக்கை எடுத்த நகராட்சி அதிகாரிகளுக்கும் நன்றியை தெரிவித்து கொள்கிறோம். மேலும் நகரத்தில் கப்பிக்கல் கொட்டி இன்னும் போடப்படாத தார்சாலைகளையும் விரைவில்  அமைக்க வேண்டும் என்றனர்.

மகளிர் குழுவுக்கு கட்ட பணம் இல்லை வீட்டுக்கு பூட்டு போட்டதால் அதிர்ச்சியில் முதியவர் சாவு

திருவையாறு, மே 17:  திருவையாறு அடுத்த கண்டியூர் ரஹிம்நகர் பாப் காலனியை சேர்ந்தவர் சாகுல் ஹமீது (58). இவரது மனைவி ஜம்ருத்பேகம் (50). இவர்களது மகள் சமுருன்னிஷா (33). இந்நிலையில் திருவையாறில் இயங்கி வரும் ஒரு தனியார் மகளிர் குழுவில் ரூ.10 ஆயிரத்தை கடனாக ஜம்ருத்பேகம் வாங்கியுள்ளார். இதற்காக ஒவ்வொரு வாரமும் ரூ.500 கட்டி வருகிறார். இந்நிலையில் நேற்று குழு பணம் கட்டவில்லை. இதனால் தனியார் மகளிர் குழுவின் பணியாளர், சாகுல் ஹமீது வீட்டுக்கு வந்தார். பின்னர் பணம் கட்டாததால் சாகுல் ஹமீதுவை வீட்டிலிருந்து வெளியேற்றினார். இதையடுத்து சாகுல் ஹமீது வீட்டை பூட்டி விட்டு பணியாளர் சென்றுவிட்டார். இதனால் மனமுடைந்த சாகுல் ஹமீது திடீரென அதிர்ச்சியில் இறந்தார். திருவையாறு போலீசார் விசாரணை நடத்தி வருகி–்ன்றனர்.

வேளாண் இயக்கத்தின்கீழ் மதுக்கூரில் விஞ்ஞான முறையில் மண் மாதிரி சேகரிப்பு பணி தீவிரம்

பட்டுக்கோட்டை, மே 17:  மதுக்கூர் வட்டாரத்தில் தேசிய நீடித்த நிலையான வேளாண்மை இயக்கத்தின்கீழ் விஞ்ஞான முறையில் ஜிபிஎஸ் செயலி மூலம் மண்மாதிரி சேகரிப்பு பணி தீவிரமாக நடந்து வருகிறது.  மதுக்கூர் வட்டார வேளாண்மை உதவி இயக்குநர் திலகவதி வெளியிட்டுள்ள செய்திக்குறிப்பு: மத்திய அரசின் தேசிய நீடித்த நிலையான வேளாண்மை இயக்கத்தின்கீழ் கடந்த 4 ஆண்டுகளில் சேகரிக்கப்பட்ட மண் மாதிரிகளின் பரிசோதனை முடிவுகளை ஆய்வு செய்து மதிப்பிடும் வகையில் ஒவ்வொரு வருவாய் கிராமங்களிலும் 3 இடங்களிலும் 50 சென்டி மீட்டர் நீளம், 50 சென்டி மீட்டர் அகலம் மற்றும் 50 செ.மீ ஆழம் கொண்ட குழிகள் எடுக்கப்பட்டு விஞ்ஞான முறைப்படி ஒரு குழிக்கு 2 மண் மாதிரிகள் வீதம் மண் ஆய்வுக்கு சேகரிக்கப்படுகிறது. இத்துடன் அதே கிராமத்தில் மண்ணின் மேற்பரப்பிலிருந்து 15 செ.மீ ஆழத்தில் வெவ்வேறு இடங்களில் 10 மண்மாதிரி சேகரிக்கப்படுகிறது. கிராமங்களில் ஜிபிஎஸ் செயலி மூலம் அட்சரேகை, தீர்க்கரேகை குறியிடப்பட்டு தேர்வு செய்யப்பட்ட இடங்களில் குழிகள் எடுக்கப்பட்டு சேகரிக்கப்பட்ட மண்மாதிரிகள் ஆடுதுறை மண் பரிசோதனை நிலையத்துக்கு தேவையான ஆவணங்களுடன் அனுப்பப்படவுள்ளது.  இம்முறையில் குறிப்பிட்ட இடங்களை ஜிபிஎஸ் செயலி மூலம் கண்டறிந்து மண்மாதிரிகள் எடுக்கப்படுவதால் பரிசோதனை முடிவுகளை துல்லியமாக பெற முடியும். எனவே இம்முறையை கையாண்டு வேளாண்மைத்துறை சார்ந்த அலுவலர்கள், மதுக்கூர் வட்டாரத்துக்கு உட்பட்ட 48 வருவாய் கிராமங்களிலும் மண்மாதிரி சேகரிப்பு பணியில் முழுவீச்சில் ஈடுபட்டு வருகின்றனர். இவ்வாறு அதில் தெரிவிக்கப்பட்டுள்ளது.

பொக்லைன் மோதி நாட்டு வைத்தியர் பலி

ஒரத்தநாடு, மே 17:  ஒரத்தநாடு அருகே நெய்வாசல் சமத்துவபுரத்தை சேர்ந்தவர் அய்யாபிள்ளை (64). நாட்டு வைத்தியர். இவர் நேற்று காலை அப்பகுதியில் நடந்து சென்று கொண்டிருந்தார். அப்போது அந்த வழியாக வந்த பொக்லைன் இயந்திரம், அய்யாப்பிள்ளை மீது மோதியது. இதில் சக்கரம் ஏறி அந்த இடத்திலேயே பலியானார். தகவல் அறிந்ததும் ஒரத்தநாடு போலீசார் வந்து பொக்லைன் இயந்திர டிரைவரான புதுக்கோட்டை பாப்பான்விடுதியை சேர்ந்த ராேஜஸ்வரனை (25) கைது செய்தனர்.

கும்பகோணம் பகுதியில் முன்னறிவிப்பில்லாத மின்தடையால் தொழில் பட்டறைகள் இயங்கவில்லை தொழிலாளர்கள் வணிகர்கள் பாதிப்பு

கும்பகோணம், மே 17: கும்பகோணம் சுற்றுவட்டார பகுதியில் அறிவிக்கப்படாத தொடர் மின்தடையால் தொழில் பட்டறைகளை இயக்க முடியவில்லை. இதனால் தொழிலாளர்கள், வணிகர்கள் பாதிக்கப்பட்டு வருகின்றனர். கும்பகோணம் அடுத்த அண்ணலக்கிரஹாரம், அரியத்திடல் உள்ளிட்ட பகுதியில் 500க்கும் மேற்பட்ட குடியிருப்புகள், 30க்கும் மேற்பட்ட சில்வர் பாத்திரம் தயாரிக்கும் பட்டறை, வாகன பழுதுபார்க்கும் பட்டறை, மருத்துவமனைகள் மற்றும் 100க்கும் மேற்பட்ட வணிக நிறுவனங்கள் இயங்கி வருகிறது. இந்நிலையில் இந்த பகுதிகளில் கடந்த 10 நாட்களுக்கு மேலாக தினம்தோறும் பகலில் அறிவிக்கப்படாமல் 5 முறையும், இரவு நேரங்களிலும் மின்வெட்டு ஏற்படுகிறது. இதனால் பொதுமக்கள் அவதிப்பட்டு வருகின்றனர். அறிவிக்கப்படாத மின்வெட்டால் பட்டறைகளை தொடர்ந்து இயக்க முடியாத நிலை ஏற்பட்டுள்ளது. இதனால் பல லட்சம் ரூபாய் நஷ்டம் ஏற்பட்டுள்ளது. இந்த தொழிலை நம்பியுள்ள 1000க்கும் மேற்பட்டோர் வாழ்வாதாரம் இல்லாமல் தவித்து வருகின்றனர். இதுகுறித்து மின்சாரத்துறை அலுவலரிடம் கேட்டால், போதியளவு மின்சாரம் வராததால் இருக்கும் மின்சாரத்தை நிறுத்தி வழங்க சொல்லியுள்ளனர். இன்னும் சில நாட்களுக்குமேல் தொடர்ந்து மின்சாரம் வருமா என்பது சந்தேகமாக உள்ளது என்று பதில் கூறுகிறார்கள். எனவே அறிவிக்கப்படாத மின்வெட்டை தவிர்க்க வேண்டும். தொடர்ந்து மின்தடை ஏற்பட்டால் போராட்டம் நடத்துவோம் என்று பொதுமக்கள் தெரிவித்துள்ளனர்.

மெலட்டூர், சுரைக்காயூரில் புயலால் வேரோடு விழுந்த தேக்கு மரங்கள் கடத்தல் கண்டுகொள்ளாத மாவட்ட நிர்வாகம்

கும்பகோணம், மே 17:  கஜா புயலின் தாக்கத்தால் மெலட்டூர், சுரைக்காயூரில் வேரோடு சாய்ந்து விழுந்த தேக்கு மரங்கள் கடத்தப்படுவதை தடுக்க வேண்டுமென மாவட்ட நிர்வாகத்துக்கு பொதுமக்கள் கோரிக்கை விடுத்துள்ளனர். கஜா புயல் கடந்தாண்டு நவம்பர் அதிகாலையில் கரையை கடந்தது. இதனால் தஞ்சை, நாகை, திருவாரூர் மாவட்டங்கள் அதிகளவில் பாதிக்கப்பட்டது. தஞ்சை மாவட்டத்தில் ஆயிரக்கணக்கான தென்னை, மா உள்ளிட்ட மரங்கள் வேரோடு முறிந்து விழுந்தது. இதேபோல் வெட்டாற்றின் கரையி–்ல் உள்ள தஞ்சை மாவட்டம் மெலட்டூர், சுரைக்காயூர் உள்ளிட்ட கிராமங்களில் தேக்கு மரங்களும் விழுந்தது. புயல் தாக்கி 6 மாதமாகியும் விழுந்து கிடக்கும் தேக்கு மரங்களை அகற்ற மாவட்ட நிர்வாகமும், வனத்துறையும் நடவடிக்கை எடுக்கவில்லை. இதனால் விழுந்து கிடக்கும் தேக்கு மரங்களை சிலர் வெட்டி கடத்தி செல்கின்றனர். மேலும் ஆற்றின் கரையோரங்கள் பொதுப்பணித்துறையின் நிர்வாகத்தில் இருப்பதால் அவர்களும்  கண்டுகொள்ளாமல் இருக்கின்றனர். எனவே மெலட்டூர், சுரைக்காயூர் பகுதி வெட்டாற்றின் கரையில் கஜா புயலின்போது சாய்ந்துள்ள தேக்கு மரங்கள் கடத்தப்படுவதை தடுத்து பாதுகாப்பாக வைக்க வேண்டுமென வனத்துறைக்கு பொதுமக்கள் கோரிக்கை விடுத்துள்ளனர்.  இதுகுறித்து சமூக ஆர்வலரான மெலட்டூ–்ர் கதிரேசன் கூறுகையில், ஆற்றின் கரைகளை பலப்படுத்தவும், காடுகளை உருவாக்கவும் பல ஆண்டுகளுக்கு முன் தேக்கு மரங்கள் நட்டு வைக்கப்பட்டது. சமீபத்தில் மரங்கள் நன்கு வளர்ந்திருந்தது. இந்நிலையில் கஜா புயலின்போது கரையோரங்களில் உள்ள பெரும்பாலான மரங்கள் அடியோடும், முறிந்தும் விழுந்து விட்டது. மரங்கள் விழுந்து 6 மாதங்களாக நிலையில் தற்போது சாய்ந்துள்ள மரங்களை மர்மநபர்கள் திருடி சென்று வருகின்றனர். இதனால் மாவட்ட நிர்வாகத்துக்கும், வனத்துறைக்கும் பல லட்ச ரூபாய் நஷ்டம் ஏற்பட்டுள்ளது. மாவட்ட நிர்வாகம் சார்பில் மரக்கன்றுகளை நட வேண்டுமென விழிப்புணர்வு செய்து வந்தாலும் மாவட்ட நிர்வாகமே இருக்கும் மரங்களை காப்பாற்றாமல் உள்ளது. எனவே கஜா புயலின்போது சாய்ந்துள்ள தேக்கு மரங்களை மீட்டு பாதுகாப்பாக வைக்க வேண்டும் அல்லது ஏலம் விட நடவடிக்கை எடுக்க வேண்டும் என்றார்.

தஞ்சை பழைய வீட்டுவசதி வாரிய குடியிருப்பை ஆக்கிரமித்த செடி, கொடிகள் விஷ ஜந்துக்களால் பொதுமக்கள் அச்சம்

தஞ்சை, மே 17:  தஞ்சை பழைய வீட்டு வசதி வாரிய குடியிருப்புகளை சுற்றிலும் செடி, கொடிகள் மண்டி கிடக்கிறது. இதனால் வீட்டுக்குள் புகும் விஷஜந்துக்களால் பொதுமக்கள் அச்சத்துடன் வாழ்ந்து வருகின்றனர். பில் மண்டியுள்ள முட்செடிகள் மற்றும் புதர்களால் பாம்புகள் படையெடுத்து வருவதை தடுக்க வேண்டும் என பொதுமக்கள் வலியுறுத்தியுள்ளனர். தஞ்சை- புதுக்கோட்டை சாலையில் பழைய வீட்டு வசதி வாரிய குடியிருப்பு உள்ளது. இங்கு 400க்கும் மேற்பட்ட வீடுகள் அமைந்துள்ளது. இதில் அரசு ஊழியர்கள் மட்டுமின்றி அரசு சார்ந்த நிறுவனங்களின் ஊழியர்களும் குடியிருந்து வருகின்றனர். 2 மற்றும் 3 மாடி கட்டிடங்களாக இருந்தாலும் தரைதளத்தில் வீடுகளுக்கு முன்பும், பின்பும் புதர் மண்டி கிடக்கிறது. முட்செடிகள் முளைத்து யாரும் உள்ளே செல்ல முடியாதவாறு வளர்ந்து உயர்ந்து நிற்கின்றன. இத்துடன் அந்தந்த வீடுகளிலிருந்து வெளியேற கூடிய கழிவுநீர் புதர் மண்டி கிடக்கும் இடங்களில் தேங்கி நிற்கிறது. மேலும் குடியிருப்பு மாடிகளில் உள்ள மேல்நிலை நீர்த்தேக்க தொட்டிகளில் இருந்து தினமும் தண்ணீர் வழிந்து முட்செடிகளில் கொட்டுவதால் அங்கு கொசு உற்பத்தியாகி தொற்றுநோய் ஏற்படும் அபாயம் ஏற்பட்டுள்ளது. இதனால் கடும் துர்நாற்றமும் வீசுகிறது. மேலும் அவ்வபோது புதர்மண்டி கிடக்கும் செடிகளில் இருந்து வீடுகளுக்குள் புகுந்து விடுவதால் குடியிருப்போர் தினமும் அச்சத்துடன் வசிக்கும் நிலைக்கு தள்ளப்பட்டுள்ளனர். கட்டிடங்கள் மற்றும் கட்டிடங்களை சுற்றியுள்ள பகுதிகளை பராமரித்து சுத்தமாக வைத்து கொள்ள வேண்டிய வீட்டுவசதி வாரிய நிர்வாகம் எந்தவித நடவடிக்கையும் எடுப்பதில்லையென பொதுமக்கள் குற்றம் சாட்டுகின்றனர். இந்த அவலநிலை குறித்து அவ்வபோது பொதுமக்கள் தகவல் தெரிவித்தாலும் அதிகாரிகள் யாரும் கண்டுகொள்வதில்லை. இதுகுறிதது மாநகராட்சி நிர்வாகமும் கவலைப்படுவதில்லையென குடியிருப்புவாசிகள் தெரிவித்துள்ளனர். எனவே பொதுமக்களுக்கு பெரும் அச்சுறுத்தலாக இருக்கும் முட்புதர்களை அகற்றியும், சுகாதாரத்தை பேண சம்பந்தப்பட்ட நிர்வாகம் நடவடிக்கை எடுக்க வேண்டுமென பொதுமக்கள் கோரிக்கை விடுத்துள்ளனர்.

இந்து மக்கள் கட்சி நிர்வாகி தாக்குதல் மர்மநபர்களுக்கு வலைவீச்சு

தஞ்சை, மே 16: தஞ்சை மானம்புச்சாவடி கீழத்தெருவை சேர்ந்தவர் பிரபு (39). இந்து மக்கள் கட்சி நகர அமைப்பாளர். இவர் நேற்று முன்தினம் இரவு விளார் சாலையில் பைக்கில் சென்று கொண்டிருந்தார். அப்போது அடையாளம் தெரியாத 3 பேர் இவரை தாக்கியனர். இதில் காயமடைந்த பிரபு, தஞ்சை மருத்துவக்கல்லூரி மருத்துவமனையில் சிகிச்சை பெற்று வருகிறார். இதுகுறித்து தஞ்சை கிழக்கு போலீசில் பிரபு புகார் செய்தார். அதில் மக்கள் நீதி மையம் கட்சியினர் தன்னை தாக்கியதாக தெரிவித்திருந்தார். தஞ்சை கிழக்கு போலீசார் வழக்குப்பதிந்து விசாரணை நடத்தி வருகின்றனர்.

அதிக மகசூல் பெற தென்னைக்கு உரமிடும் வழிமுறை விவசாயிகளுக்கு ஆலோசனை

சேதுபாவாசத்திரம், மே 16: அதிக மகசூல் பெற தென்னை மரங்களுக்கு இட வேண்டிய உர அளவுகள் குறித்து விவசாயிகளுக்கு ஆலோசனை வழங்கப்பட்டுள்ளது.  சேதுபாவாசத்திர வட்டார வேளாண்மை உதவி இயக்குனர் சையது இப்ராஹிம் வெளியிட்டுள்ள செய்திக்குறிப்பு: தென்னைக்கு உரமிடுவதற்கு ஏதுவாக தற்போது கடைமடை பகுதிகளில் ஓரளவு மழை பெய்து வருகிறது. இதை பயன்படுத்தி நாட்டுரக (நெட்டை ரகம்) தென்னைகளுக்கு நடவு செய்தது முதல் ஒரு வருட கன்றுக்கு தொழு உரம் 10 கிலோ, யூரியா 325 கிராம், சூப்பர் மற்றும் பொட்டாஷ் தலா 500 கிராம், வேப்பம்புண்ணாக்கு ஒன்றரை கிலோ இட வேண்டும். 2 ஆண்டு கன்றுக்கு தொழு உரம் 20 கிலோ, யூரியா 650 கிராம், சூப்பர் மற்றும் பொட்டாஷ் தலா ஒரு கிலோ, வேப்பம்புண்ணாக்கு இரண்டரை கிலோ, மூன்று வருட கன்றுக்கு தொழு உரம் 30 கிலோ, யூரியா 975 கிராம், சூப்பர் மற்றும் பொட்டாஷ் தலா ஒன்றரை கிலோ, வேப்பம்புண்ணாக்கு மூன்றே முக்கால் கிலோ இட வேண்டும். நான்கு வருட கன்றுக்கு தொழு உரம் 40 கிலோ, யூரியா ஒரு கிலோ 300 கிராம், சூப்பர் மற்றும் பொட்டாஷ் தலா 2 கிலோ, வேப்பம்புண்ணாக்கு 5 கிலோ, ஐந்து வருட கன்றுக்கு தொழு உரம் 50 கிலோ, யூரியா ஒரு கிலோ 300 கிராம், சூப்பர் மற்றும் பொட்டாஷ் தலா 2 கிலோ, வேப்பம்புண்ணாக்கு 5 கிலோ இட வேண்டும்.வீரிய ஒட்டு (நெட்டை இன்ட் குட்டை மற்றும் குட்டை இன்ட் நெட்டை) ரக தென்னைகளுக்கு ஒரு வருட கன்றுக்கு தொழு உரம் 15 கிலோ, யூரியா 500 கிராம், சூப்பர் 375 கிராம், பொட்டாஷ் 750 கிராம், வேப்பம்புண்ணாக்கு ஒன்றரை கிலோவும், இரண்டு வருட கன்றுக்கு தொழு உரம் 30 கிலோ, யூரியா ஒரு கிலோ, சூப்பர் 750 கிராம், பொட்டாஷ் ஒன்றரை கிலோ, வேப்பம்புண்ணாக்கு இரண்டரை கிலோ இட வேண்டும். மூன்று வருட கன்றுக்கு தொழு உரம் 45 கிலோ, யூரியா ஒன்றரை கிலோ, சூப்பர் ஒரு கிலோ 150 கிராம், பொட்டாஷ் 2 கிலோ 250 கிராம், வேப்பம்புண்ணாக்கு மூன்றே முக்கால் கிலோ, நான்கு வருடம் மற்றும் அதற்கு மேற்பட்ட வயதுடைய மரம் ஒன்றுக்கு தொழு உரம் 60 கிலோ, யூரியா இரண்டே கால் கிலோ, சூப்பர் ஒன்றரை கிலோ, பொட்டாஷ் 3 கிலோ, வேப்பம்புண்ணாக்கு 5 கிலோ இட வேண்டும். மேற்கண்ட உர பரிந்துரை அளவை சமபங்காக பிரித்து வருடத்தில் இருமுறை இட வேண்டும். அதாவது மார்கழி, தை மாதங்களில் ஒருமுறையும், ஆனி, ஆடி மாதங்களில் ஒருமுறையும் இட வேண்டும். மேற்கண்ட உரங்களை இட்ட 30 முதல் 45 நாட்கள் கழித்து தென்னை நுண்சத்து உரத்தை மரம் ஒன்றுக்கு ஒரு கிலோ வீதம் இட வேண்டும். இவ்வகை உரங்களை மரத்தை சுற்றி 5 அடி தூரத்தில் இட்டு மண்ணை கிளறி விட்டு உடனடியாக தண்ணீர் பாய்ச்ச வேண்டும், முறையாக உரமிடும்பட்சத்தில் குரும்பை உதிர்தல், ஒல்லிக்காய், காய்களில் வெடிப்பு, நீள வடிவிலான வெற்றுகாய்கள் ஆகிய பிரச்னைகள் குறைந்து ஆண்டுக்கு சராசரியாக 150முதல் 200 தேங்காய்கள் வரை மகசூல் பெற முடியும்.இவ்வாறு அதில் தெரிவிக்கப்பட்டுள்ளது.

கும்பகோணத்தில் செல்போன் திருடிய 2 பேர் கைது

கும்பகோணம், மே 16: கும்பகோணம் ஹாஜியார் தெருவை சேர்ந்தவர் முகம்மது ஜெயின் (45). இவர் அதே பகுதியில் செல்போன் கடை நடத்தி வருகிறார். நேற்று  முன்தினம் இரவு கும்பகோணம் கக்கன் காலனி சேர்ந்த முருகன் (42), அதே பகுதியை சேர்ந்த வசந்தகுமார் (38) ஆகியோர் முகம்மது ஜெயினின் செல்போன் கடையில் ரூ.25 ஆயிரம் மதிப்புள்ள 4 செல்போன்களை திருடினர். இதுகுறித்து கும்பகோணம் மேற்கு காவல் நிலையத்தில் முகம்மது ஜெயின் புகார் செய்தார். போலீசார் வழக்குப்பதிந்து முருகன், வசந்தகுமார் ஆகியோரை கைது செய்து விசாரணை நடத்தி வருகின்றனர்.

மின்கம்பம் விழுந்து வாலிபர் பலி

கும்பகோணம், மே 16: மேற்கு வங்கம் மாநிலம் மல்டா மாவட்டத்தை சேர்ந்தவர் ஜெகன் ஷேக் மகன்கள் ஜெலில்ஷேக் (22). ஜெவுல் ஷேக்(19). இருவரும் கும்பகோணம் பைபாஸ் சாலை பகுதியில் மின்கம்பம் நடும் பணியில் ஈடுபட்டனர். இந்நிலையில் நேற்று முன்தினம் கும்பகோணம் கொரநாட்டுகருப்பூர் பைபாஸ் சாலையில் மின்கம்பங்களை இறக்கும் பணியில் ஈடுபட்டிருந்தனர்.  அப்போது மின்கம்பம் ஜெவுல் ஷேக் மீது விழுந்ததில் படுகாயமடைந்த அவர் அந்த இடத்திலேயே பலியானார்.