Theni - Dinakaran

கோடை காலத்தில் பழங்கள் விற்பனை சரிவு

தேவாரம், மே 19: உத்தமபாளையம் தாலுகாவில் கம்பம், கூடலூர், சின்னமனூர், தேவாரம், ஓடைப்பட்டி, கோம்பை, உத்தமபாளையம், பண்ணைப்புரம்  உள்ளிட்ட ஊர்களில் அதிக அளவில் திராட்சை, மாதுளை, ஆப்பிள், ஆரஞ்சு உள்ளிட்ட பழங்களை விற்பனை செய்யும் கடைகள் உள்ளன. பொதுமக்களால் மாற்று உணவு பழக்க வழக்கங்களில் பழங்கள் விற்பனை முக்கிய இடத்தை பெற்றுள்ளன. தற்போது கோடை வெப்பம் கொளுத்துவதால் நிழலுக்கு ஒதுங்கும் மக்கள் அதிக அளவில் கோடையை குளிர்விக்கும்  குளிர்பானங்கள், கூழ், மோர், வெள்ளரிக்காய், தர்ப்பூசணி உள்ளிட்டவற்றை வாங்குகின்றனர். இதனால் பழங்கள் விற்பனை சரிந்துள்ளன. இதற்கு காரணம் கோடை வெப்பம் என்றாலும், தற்போதைய நிலையில் வெப்பத்தை தணித்திட உடனடி தேவையாக உள்ள குளிர்பானங்களையும், இயற்கை உணவுபொருட்களையுமே மக்கள் விரும்புகின்றனர். இதுகுறித்து வியாபாரிகள் கூறுகையில், `` குளிர்பானங்களின் விற்பனை அதிகரித்துள்ளது. பழங்கள் வரத்து இருந்தாலும் இதன் விற்பனை இப்போது சரிந்துள்ளது’’ என்றனர்.

கூடைப்பந்து போட்டியில் இந்தியன் வங்கி அணி வெற்றி

பெரியகுளம், மே 19 : பெரியகுளத்தில் 60ம் வைரவிழா ஆண்டு அகில இந்திய அளவிலான கூடைப்பந்து போட்டி மே 15ம் தேதி துவங்கியது. இப்போட்டிகள் மே 21ம் தேதி நடைபெறுகிறது. இப்போட்டிகளில் அகில இந்திய அளவில் தலை சிறந்த அணிகள் விளையாட உள்ளன. போட்டிகள் நாக் அவுட் மற்றும் லீக் சுற்று முறையில் நடைபெற உள்ளன. 3ம் நாள் மாலை நடைபெற்ற முதல் போட்டியில் பெங்களூரு பாங்க் ஆப் பரோடா(விஜயா வங்கி) அணி 100 புள்ளிகள் எடுத்து எதிர்த்து  சென்னை கஸ்டம்ஸ் அணியினை வென்றது. இரண்டாவது ஆட்டத்தில் சென்னை இந்தியன் வங்கி அணி 104 புள்ளிகள் எடுத்து இந்திய தரைப்படை(கிரீன்) அணியை வென்றது.  திடீரென பலத்த காற்றுடன் பெய்த மழை காரணமாக அடுத்து நடைபெற வேண்டிய இரண்டு ஆட்டங்கள் இன்று காலை நடைபெற உள்ளன. 

உத்தமபாளையம் பகுதிகளில் சூறாவளி காற்றுடன் திடீர் கனமழை

உத்தமபாளையம், மே 19:  உத்தமபாளையம் பகுதிகளில் பெய்த கனமழையால் மின்சார கம்பங்கள் ஒடிந்தன. மரங்கள் சாய்ந்ததால் மின்தடை ஏற்பட்டது. உத்தமபாளையம், அனுமந்தன்பட்டி, உ.அம்பாசமுத்திரம், கோகிலாபுரம் உள்ளிட்ட ஊர்களில் நேற்று முன்தினம் கனமழை பெய்தது. இரவில் தொடங்கிய மழை இடி, மின்னலுடன் வெளுத்து வாங்கியது. இதனால் அனைத்து ஊர்களிலும் மின்சார தடை ஏற்பட்டது. இரவு 8.45 மணி முதல் 10.30 மணி வரை மக்களை மிரட்டும் வகையில் மழை கொட்டியது. உத்தமபாளையம் ஒருங்கிணைந்த கோர்ட் வளாகம் அருகே  மின்சாரகம்பம் உடைந்தது. அங்கே இருந்த மரங்களும் சாய்ந்தது. இதனால் உத்தமபாளையம் - அனுமந்தன்பட்டி சாலையில் போக்குவரத்து தடைபட்டது. உடனடியாக சம்பவ இடத்திற்கு வந்த மின்சார வாரிய அதிகாரிகள் கொட்டும் மழையையும் பொருட்படுத்தாமல் மின்தடையை சரிசெய்தனர். மரங்கள் அகற்றப்பட்டன. இதனால் பொதுமக்கள் நிம்மதி அடைந்தனர்.

கிணற்றில் தவறி விழுந்த மூதாட்டி பலி

தேவதானப்பட்டி, மே 19:  தேவதானப்பட்டி அருகே குள்ளப்புரத்தில் தோட்டத்தில் தண்ணீர் பாய்ச்சும் போது மூதாட்டி கிணற்றில் தவறி விழுந்து பலியானார். குள்ளப்புரம் மேலத்தெருவைச் சேர்ந்த லட்சுமணன் மனைவி பார்வதி(60). இவர் நேற்று முன்தினம் மாலை அவரது தென்னந்தோப்பில் தண்ணீர் பாய்ச்சும் போது தவறி கிணற்றில் விழுந்து விட்டார். அருகில் இருந்தவர்கள் வந்து பார்க்கும் போது பார்வதி இறந்து விட்டார். பெரியகுளம் தீயணைப்பு வீரர்கள் வந்து உடலை மீட்டனர். ஜெயமங்கலம் போலீசார் உடலை கைப்பற்றி விசாரித்து வருகின்றனர்.

வீரபாண்டி கவுமாரியம்மனுக்கு வைகாசி விசாக பாலாபிஷேகம் 500 பேர் பால்குடம் எடுத்து ஊர்வலம்

தேனி, மே 19:  தேனி வீரபாண்டி கவுமாரியம்மன் கோயிலில் நேற்று வைகாசி விசாக திருவிழாவை தொடர்ந்து 500 பக்தர்கள் பால்குடம் எடுத்து பாலாபிஷேகம் செய்து நேர்த்திக்கடன் செலுத்தினர். தேனி அருகே உள்ள வீரபாண்டி கோயிலில் நேற்று வைகாசி விசாக திருவிழா சிறப்பாக கொண்டாடப்பட்டது. அம்மன் உற்சவர் சிலை இருக்கும் வீரபாண்டி கிராம கோயில் வீட்டில் இருந்து, மூலவர் சிலை அமைந்திருக்கும் கோயிலுக்கு நேற்று காலை 500க்கும் மேற்பட்ட பக்தர்கள் பால்குடம் எடுத்து ஊர்வலம் வந்தனர். அம்மனுக்கு பாலாபிேஷகம் உட்பட பல்வேறு சிறப்பு அபிேஷகம் மற்றும் ஆராதனைகள் நடந்தன. சிறப்பு பூஜைகள் நடத்தப்பட்டு பக்தர்களுக்கு பிரசாதங்கள் வழங்கப்பட்டன.

பயங்கர சூறைக்காற்று சின்னமனூர் பகுதியில் 10 ஆயிரம் வாழை சேதம்

சின்னமனூர், மே 19:  சின்னமனூர் பகுதியில் நேற்று முன் இரவு வீசிய சூறைக்காற்றுக்கு 10 ஆயிரம் வாழை, 30க்கும் மேற்பட்ட தென்னைமரங்கள சேதமடைந்தன. மேலும் மின்சாரம் துண்டிக்கப்பட்டதால் பொதுமக்கள் அவதியடைந்தனர்.தேனி மாவட்டம், சின்னமனூர் மற்றும் சுற்றுப்புற பகுதிகளில் நேற்று ன்தினம் பகலில் வெயிலின் கடுமை அதிகமாக இருந்தது. இதனால் சாலைகள் வெறிச்சோடின. இரவு 9 மணியளவில் சின்னமனூர் மற்றும் சுற்றுவட்டார பகுதியில் சூறைக்காற்றுடன் லேசான மழை பெய்தது.சூறைக்காற்றுக்கு சின்னமனூர்-போடி சாலையில் உள்ள சிந்தலைசேரி பகுதியில் ஹால்மாக்ஸ் என்பவருக்கு சொந்தமான வாழைத்தோப்பில் அறுவடைக்கு தயாராக இருந்த 10 ஆயிரம் வாழைமரங்கள் ஒடிந்து சேதமடைந்தன. குச்சனூர்-தேனி சாலையில் உள்ள அரசு மேல்நிலை பள்ளி அருகே இருந்த 70 ஆண்டு பழமையான புளிய மரம் வேருடன் சாய்ந்தது. அத்துடன் துரைச்சாமிபுரம் பகுதியில் 30க்கும் மேற்பட்ட தென்னை மரங்கள் முறிந்து விழுந்தன. சூறைக்காற்று காரணமாக சின்னமனூர் மற்றும் சுற்றுப்பகுதிகளில் மின்சாரம் துண்டிக்கப்பட்டது. இதனால் பொதுமக்கள் அவதியடைந்தனர். பாதிக்கப்பட்ட விவசாயிகள், உரிய நிவாரணம் வழங்க அரசுக்கு கோரிக்கை விடுத்துள்ளனர்.

ஆண்டிபட்டி அருகே கறவை மாடுகள் திடீர் சாவு

ஆண்டிபட்டி,மே 17: ஆண்டிபட்டி அருகே டி.ராஜகோபாலன்பட்டியைச் சேர்ந்த சக்திவேல் மனைவி நாகலட்சுமி (39). இவர் விவசாயி. கடந்த பத்து ஆண்டுகளுக்கும் மேலாக தோட்டத்திலேயே பசுந்தீவனங்களை வளர்த்து 10 கறவை மாடுகளை வளர்த்து வந்தார். நேற்று காலை வழக்கம்போல் கறவை மாடுகளுக்கு தண்ணீர் வழங்கியுள்ளார். சிறிது நேரத்தில் தண்ணீர் குடித்த 4 கறவைமாடுகளின் வாயில் நுரைதள்ளி திடீரென இறந்தன. தகவலறிந்த கால்நடை மருத்துவர் அப்துல்ரகுமான் கால்நடைகளை பரிசோதித்தும், இறந்த கறவை மாடுகளை பிரேதப் பரிசோதனை செய்தார். இதுகுறித்து ஆண்டிபட்டி போலீசார் வழக்கு பதிந்து விசாரணை செய்து வருகின்றனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.

மறு ஓட்டுப்பதிவு 400 போலீசார் பாதுகாப்பு ஏற்பாடு

தேனி, மே 17: தேனி மாவட்டத்தில் மே 19ம் தேதி மறுஓட்டுப்பதிவு நடைபெறும் பாலசமுத்திரம், வடுகபட்டி ஓட்டுச்சாவடிகளில் மத்திய பாதுகாப்பு படை உட்பட 400 போலீசார் பாதுகாப்பு பணிகளில் ஈடுபட உள்ளனர் என தேனி எஸ்.பி., பாஸ்கரன் தெரிவித்தார்.இது குறித்து அவர் கூறியதாவது: பெரியகுளம் தாலுகா வடுகபட்டி, ஆண்டிபட்டி தாலுகா பாலசமுத்திரம் கிராமங்களில் தலா ஒரு ஓட்டுச்சாவடிகளில் மறுஓட்டுப்பதிவு மே 19ம் தேதி நடக்கிறது. வடுகபட்டி ஓட்டுச்சாவடியில் 1405 வாக்காளர்களும், பாலசமுத்திரம் ஓட்டுச்சாவடியில் 1255 வாக்காளரும் ஓட்டளிக்க உள்ளனர். ஓட்டுப்பதிவு அமைதியாக நடைபெற ஒவ்வொரு ஓட்டுச்சாவடியிலும் தலா ஒரு டி.எஸ்.பி., 9 இன்ஸ்பெக்டர்கள், 23 சப்-இன்ஸ்பெக்டர்கள் 12 மத்திய பாதுகாப்புபடை வீரர்கள் உட்பட 200 போலீசார் பாதுகாப்பு பணிகளில் ஈடுபடுகின்றனர். ஓட்டுப்பதிவு நடைபெறும் கிராமத்தில் மட்டும் இன்றி சுற்றுக்கிராமங்களிலும், பாதுகாப்பு பலப்படுத்தப்பட்டுள்ளது. வடுகபட்டி, பாலசமுத்திரத்திற்கு வரும் வாகனங்கள் தீவிர சோதனைக்கு உட்படுத்தப்படும், தேவையின்றி வரும் நபர்கள் அனுமதிக்கபடமாட்டார்கள். இதே நேரத்தில் மாவட்டத்தில் எங்கும் பிரச்னை வராத வகையில் போலீசார் தீவிர ரோந்து பணிகளில் ஈடுபடுவார்கள். இவ்வாறு அவர் கூறினார்.மறு ஓட்டுப்பதிவு 400 போலீசார் பாதுகாப்பு ஏற்பாடுதேனி, மே 17: தேனி மாவட்டத்தில் மே 19ம் தேதி மறுஓட்டுப்பதிவு நடைபெறும் பாலசமுத்திரம், வடுகபட்டி ஓட்டுச்சாவடிகளில் மத்திய பாதுகாப்பு படை உட்பட 400 போலீசார் பாதுகாப்பு பணிகளில் ஈடுபட உள்ளனர் என தேனி எஸ்.பி., பாஸ்கரன் தெரிவித்தார்.இது குறித்து அவர் கூறியதாவது: பெரியகுளம் தாலுகா வடுகபட்டி, ஆண்டிபட்டி தாலுகா பாலசமுத்திரம் கிராமங்களில் தலா ஒரு ஓட்டுச்சாவடிகளில் மறுஓட்டுப்பதிவு மே 19ம் தேதி நடக்கிறது. வடுகபட்டி ஓட்டுச்சாவடியில் 1405 வாக்காளர்களும், பாலசமுத்திரம் ஓட்டுச்சாவடியில் 1255 வாக்காளரும் ஓட்டளிக்க உள்ளனர். ஓட்டுப்பதிவு அமைதியாக நடைபெற ஒவ்வொரு ஓட்டுச்சாவடியிலும் தலா ஒரு டி.எஸ்.பி., 9 இன்ஸ்பெக்டர்கள், 23 சப்-இன்ஸ்பெக்டர்கள் 12 மத்திய பாதுகாப்புபடை வீரர்கள் உட்பட 200 போலீசார் பாதுகாப்பு பணிகளில் ஈடுபடுகின்றனர். ஓட்டுப்பதிவு நடைபெறும் கிராமத்தில் மட்டும் இன்றி சுற்றுக்கிராமங்களிலும், பாதுகாப்பு பலப்படுத்தப்பட்டுள்ளது. வடுகபட்டி, பாலசமுத்திரத்திற்கு வரும் வாகனங்கள் தீவிர சோதனைக்கு உட்படுத்தப்படும், தேவையின்றி வரும் நபர்கள் அனுமதிக்கபடமாட்டார்கள். இதே நேரத்தில் மாவட்டத்தில் எங்கும் பிரச்னை வராத வகையில் போலீசார் தீவிர ரோந்து பணிகளில் ஈடுபடுவார்கள். இவ்வாறு அவர் கூறினார்.

அகில இந்திய கூடைப்பந்து கரூர் டெக்ஸ்சிட்டி அணி முதல் நாள் போட்டியில் வெற்றி

பெரியகுளம், மே 17: பெரியகுளத்தில் 60ம் வைரவிழா ஆண்டு அகில இந்திய அளவிலான கூடைப்பந்து போட்டிகள் துவங்கி நடந்து வருகின்றன. மே 21ம் தேதி வரை நடைபெற உள்ள இந்த போட்டிகளில் அகில இந்திய அளவில் தலை சிறந்த அணிகள் விளையாட உள்ளன. போட்டிகள் நாக் அவுட் மற்றும் லீக் சுற்று முறையில் நடைபெற உள்ளன. முதல் நாள் துவங்கிய போட்டிகளை விளையாட்டு வீரர் கவிஞர் து.சுப்பராயலு தலைமை வகித்து விளையாட்டுக்கொடியினை ஏற்றி வைத்து துவக்கி வைத்தார். கனரா வங்கி மேலாளர் நவீன் முன்னிலை வகித்தார். மின்வாரிய செயற்பொறியாளர் மாறன்மணி மின்னொளி இயக்கி வைத்தார். முதல் போட்டியில் செங்கோட்டை அணி 65 புள்ளிகள் பெற்று எதிர்த்து ஆடி 47 புள்ளிகள் பெற்ற பெரியகுளம் சில்வர் ஜூப்ளி அணியினை வென்றது. இரண்டாவது போட்டியில் திண்டுக்கல் அணி 62 புள்ளிகள் எடுத்து எதிர்த்து ஆடி 43 புள்ளிகள் எடுத்த வடுகபட்டி அணியினை வென்றது. 3வது ஆட்டத்தில் கரூர் டெக்ஸ் சிட்டி கூடைப்பந்து கழக அணி 79 புள்ளிகள் எடுத்து எதிர்த்து ஆடி 42 புள்ளிகள் எடுத்த தஞ்சாவூர் அணியினை வென்றது. நான்காவது ஆட்டத்தில் சேலம் திரிவேணி கூடைப்பந்து கழக அணி 54 புள்ளிகள் எடுத்து எதிர்த்து ஆடி 31 புள்ளிகள் எடுத்த தூத்துக்குடி டிபிஏ கழக அணியினை வென்றது.இரண்டாம் நாள் காலை துவங்கிய போட்டிகளை சில்வர் ஜூப்ளி ஸ்போர்ட்ஸ் கிளப்பின் மூத்த உறுப்பினர் உமாகாந்தன் தலைமை வகித்து துவக்கி வைத்தார்.  இரண்டாம் நாள் காலை நடைபெற்ற முதல் போட்டியில் சென்னை தெற்கு ரயில்வே அணி 61 புள்ளிகள் எடுத்து எதிர்த்து ஆடி 30 புள்ளிகள் எடுத்த செங்கோட்டை ரெட்போர்ட் கூடைப்பந்து கழக அணியினை வென்றது. இரண்டாவது ஆட்டத்தில் திண்டுக்கல் கூடைப்பந்து கழக அணி 68 புள்ளிகள் எடுத்து எதிர்த்து ஆடி 65 புள்ளிகள் எடுத்த தெலுங்கான ஒய்எம்ஜி அணியினை வென்றது. விளையாட்டுப்போட்டிகளுக்கான ஏற்பாடுகளை சில்வர் ஜூப்ளி ஸ்போர்ட்ஸ் கிளப் செயலர் சிதம்பரசூரியவேலு, தலைவர் அமர்நாத், துணைத்தலைவர் அபுதாகிர், பொருளாளர் செல்வராஜ் மற்றும் நிர்வாகிகள் செய்து வருகின்றனர்.

உள்ளாட்சித் தேர்தலில் ஒரு வாக்குச்சாவடி அதிகரிப்பு

தேனி, மே. 17: உள்ளாட்சித் தேர்தல் விரைவில் நடத்துவதற்கான ஆயத்தப் பணிகள் நடந்து வருகிறது. முதற்கட்டமாக வரைவு வாக்குச்சாவடி அமைக்கும் பணி நடந்தது. இதில் வரைவு வாக்குச்சாவடிகள் அமைக்கப்பட்டதில் ஏதேனும் மாற்றம் தேவைப்பட்டால் இதுகுறித்து கருத்து தெரிவிக்க மே 2 ம்தேதி வரை காலஅவகாசம் பொதுமக்கள் மற்றும் அரசியல் கட்சியினருக்கு வழங்கப்பட்டது. பின்னர், இந்த காலஅவகாசம் மே 14 ம்தேதி வரை நீட்டிக்கப்பட்டது. தேனி மாவட்டத்தில் தேனி, பெரியகுளம், போடி, சின்னமனூர், கம்பம், கூடலூர் ஆகிய 6 நகராட்சிகள், தேனி, பெரியகுளம், போடி, சின்னமனூர், கம்பம், உத்தமபாளையம், ஆண்டிபட்டி, கடமலைக்குண்டு- மயிலாடும்பாறை ஆகிய எட்டு ஊராட்சி ஒன்றியங்கள், 22 பேரூராட்சிகள், ஒரு மாவட்ட ஊராட்சி என உள்ளாட்சி அமைப்புகள் உள்ளன. உள்ளாட்சித் தேர்தல் நடக்கும் போது வாக்காளர்கள் வாக்களிக்க வசதியாக 1161 வாக்குச்சாவடிகள் அமைக்கப்பட்டு, இதனை வரைவு வாக்குச்சாவடி பட்டியலாக வெளியிடப்பட்டது.இப்பட்டியல் அனைத்து தாலுகா அலுவலகங்கள், உள்ளாட்சி நிர்வாக அலுவலகங்களில் பொதுமக்களின் பார்வைக்கு வைக்கப்பட்டது. இதில் கூடுதலாக வாக்காளர்கள் இருந்தாலோ, தொலைதூரத்தில் வாக்குச்சாவடி இருந்தாலோ கருத்து தெரிவிக்க மே 14ம் தேதி வரை காலஅவகாசம் வழங்கப்பட்டது. காலஅவகாசம் முடிவடைந்ததையடுத்து, தற்போது எந்த உள்ளாட்சி அமைப்புகளில் எதிர்ப்பு கருத்து வந்துள்ளது என அறிக்கையினை மாவட்ட நிர்வாகம் கேட்டுள்ளது. இதில் தேனி மாவட்டத்திலேயே பெரியகுளம் நகராட்சி எல்லையில் வடகரை பகுதியில் மட்டும் ஒரு வாக்குச்சாவடியில் குறைந்த பட்சம் இருக்க வேண்டிய 1200 வாக்குகளுக்கும் அதிகமாக வாக்காளர் உள்ளதாகவும், இதனை இரு வாக்குச்சாவடிகளாக மாற்ற வேண்டும் என கோரிக்கை வந்துள்ளதாக கூறப்படுகிறது. 

காட்டுயானைகள் தாக்கி உயிரிழந்தவர் குடும்பத்திற்கு கேரள அமைச்சர் ஆறுதல்

மூணாறு,மே 17: மூணாறு அருகே காட்டுயானைகள் தாக்கி உயிரிழந்த கிருஷ்ணன் குடும்பத்திற்கு கேரள மின்சாரத்துறை அமைச்சர் எம்.எம் மணி நேரில் சென்று ஆறுதல் கூறினார். மூணாறு அருகே சின்னக்கானல் பகுதியில் ஆதிவாசி குடியிருப்பை சேர்ந்த கிருஷ்ணன் மே 12ம் தேதி இஞ்சி பயிரிடுவதற்காக சென்றார் அப்போது இரண்டு காட்டுயானைகள் அவரை தலையில் மிதித்து கொன்றன. யானையின் சத்தத்தை கேட்ட அப்பகுதி பொதுமக்கள், அவற்றை விரட்டி கிருஷ்ணனின் உடலை மீட்டனர்.இந்நிலையில் கேரளா மின்சாரத்துறை அமைச்சர் எம்.எம் மணி, யானை தாக்கி உயிரிழந்த கிருஷ்ணனின் வீட்டிற்கு நேற்றுமுன்தினம் சென்று ஆறுதல் கூறினார். மேலும் இந்த சம்பவத்தை கேரள அரசின் கவனத்திற்கு கொண்டு சென்று காட்டு யானைகள் தாக்குதலில் இருந்து பாதுகாக்க நடவடிக்கை மேற்கொள்ளப்படும் என்று உறுதி அளித்தார். மார்க்சிஸ்ட் கட்சி சந்தன்பாறை ஏறிய செயலாளர் வி.சுனில்குமார் மற்றும் சேனாபதி சசி உடனிருந்தனர்

பசுமை பள்ளத்தாக்கு பாழாகும் அவலம்

தமிழகத்தில் கம்பம் பள்ளத்தாக்கிற்கென தனி பெயர் உள்ளது. காரணம் பொறியாளர் பென்னிகுக் முல்லைபெரியாறு அணையை கட்டினார். சொந்த செலவில் கட்டிய அவர் தேனிமாவட்டம் மட்டும் அல்லாமல் 5 மாவட்ட விவசாயமும் பாதுகாக்கப்படவேண்டும் என்ற நோக்கத்துடன் இதனை கட்டினார். இதனால்தான் இன்றும் நெல்வயல்கள், தென்னை, காய்கறி விவசாயம் அதிக ஏக்கர் பரப்பில் செய்யப்படுகிறது. தற்போது வீரபாண்டியில் இருந்து கம்பம், கூடலூர் வரை 7 இடங்களில் பைபாஸ் சாலை வருகிறது. இதில் பலநூறு ஏக்கர் நன்செய் மற்றும் புன்செய் நிலங்கள் அழிக்கப்படும் ஆபத்து உள்ளது. இதனால் எங்கு பார்த்தாலும் பசுமையாக தென்படும் கம்பம் பள்ளத்தாக்கில் எங்கு நோக்கினும் சாலைகள் என்ற நிலை உருவாக உள்ளது.

ேதனியில் கிணற்றில் தவறி விழுந்து போதை வாலிபர் பலி

தேனி, மே 17: தேனியில் மது போதையில் கிணற்றின் மீது அமர்ந்திருந்த போதை வாலிபர், தவறி விழுந்து உயிரிழந்தார். தேனி அல்லிநகரத்தில் உள்ள தியேட்டர் ரோட்டில் வசித்தவர் வீரக்குமார்(26). வெல்டிங் தொழில் செய்து வந்த இவர், நேற்று தேனியில் மின்தடை என்பதால், தனது நண்பர்கள் முனியாண்டி, ராஜேஷ்கண்ணன், ராஜா ஆகியோருடன் சேர்ந்து மது அருந்தினார்.பின்னர் பூதிப்புரம் டாஸ்மாக் கடைக்கு எதிரே தோட்டப்பகுதிக்குள் சென்றனர், அங்கு வீரக்குமார் 100 அடி ஆழமுள்ள கிணற்றின் சுற்றுச்சுவர் மீது அமர்ந்திருந்தார். அப்போது போதையில் திடீரென தடுமாறி கிணற்றுக்குள் உள்ளே விழுந்து இறந்து விட்டார். தேனி தீயணைப்பு படையினர் வீரக்குமார் உடலை மீட்டனர். இவரது உடல் மருத்துவ பரிசோதனைக்காக தேனி மருத்துவக் கல்லூரி மருத்துவமனைக்கு கொண்டு செல்லப்பட்டது. பழனிசெட்டிபட்டி போலீசார் விசாரணை நடத்தி வருகின்றனர்.

உத்தமபாளையம் பகுதியில் விளைநிலங்களை அழித்து 4 வழிச்சாலை

உத்தமபாளையம், மே 17: உத்தமபாளையம் பகுதிகளில் விளைநிலங்களை அழித்து நான்கு வழிச்சாலை திட்டத்திற்காக பைபாஸ்சாலை முதற்கட்டமாக சர்வே செய்து கற்களை நடும் பணி தொடங்கி உள்ளது. தேனி மாவட்டத்தில் நான்குவழிச்சாலை திட்டம் திண்டுக்கல் மாநிலநெடுஞ்சாலையில் இருந்து தேனி மாநில நெடுஞ்சாலைக்காக கடந்த 2009ம் ஆண்டு முதல் நடந்து வருகிறது. இதில் தேவதானப்பட்டி - வத்தலக்குண்டு, வீரபாண்டி - கோட்டூர் சாலை, பணிகள் நடந்துள்ளன. நான்கு வழிச்சாலை திட்டம் என பணிகள் நடந்தாலும், வாகனங்கள் அதிகளவில் செல்லாத நிலையில் இதனை இரண்டு வழிச்சாலையாக மாற்றி தேனி முதல் கம்பம் வரை பணிகள் நடந்துள்ளன. சாலைகளை விரிவாக்கம் செய்யும் பணிக்காக பெரியகுளம் முதல் கம்பம் வரை ஆங்காங்கே பணிகள் நடந்துள்ளன. இவை தவிர நான்கு வழிச்சாலை திட்டம் வருகிறது எனக்கூறி 2009ம் ஆண்டு முதலே தேனிமாவட்டத்தில் பல நூறு ஏக்கர் நன்செய், மற்றும் புன்செய் நிலங்கள் கையப்படுத்தப்பட்டுள்ளன.இதில் பைபாஸ் சாலை அமைக்கப்பட உள்ளன. முக்கியமாக கம்பம் பள்ளத்தாக்கில் சின்னமனூர் அவுட்டர் பகுதிகளில் வரக்கூடிய கண்ணம்மாள் கோயில் பகுதிகளில் இருந்து விளைநிலங்களை அழித்து பாளையம் செல்லும் மாநில நெடுஞ்சாலையில் பைபாஸ் முடிகிறது. இதில் சுமார் 5.50 கிலோ மீட்டர் தொலைவு வருகிறது. தொடர்ந்து பாளையத்தில் பென்னிகுக் நர்சரி கார்டன் தொடங்கி அனுமந்தன்பட்டி ஆஞ்சநேயர் கோயில் அடுத்துள்ள பகுதி வரை சுமார் நான்கரை கி.மீ தூரம் பைபாஸ் சாலை வருகிறது. இதற்காக பொன் விளையும் பூமி என மக்களால் கொண்டாடப்பட்ட நெல்வயல்கள், அதிகமான தண்ணீர் ஊற்று உள்ள தென்னை தோப்புகள் கையகப்படுத்தப்பட்டுள்ளன. இதனால் விளைநிலங்களை இழந்த நூற்றுக்கும் மேற்பட்ட விவசாயிகளுக்கு மாவட்டம் முழுவதிலும் நிலத்திற்கான இழப்பீட்டு தொகை தரப்பட்டுள்ளது.ஆனால், இழப்பீட்டு தொகை போதாது என நீதிமன்றத்தில் விவசாயிகள் தொடர்ந்த வழக்கு நிலுவையில் உள்ளது. நான்கு வழிச்சாலை தேனி முதல் கம்பம் வரை சென்றாலும், மாநில நெடுஞ்சாலையாக உள்ள சாலைகள் இரண்டு வழிச்சாலையாக போடப்பட்டுள்ளன. எனவே, பைபாஸ் பணிகளில் தற்போது இதனை செயல்படுத்தும் மத்திய அரசின் நகாய் நிறுவனம் களமிறங்கி உள்ளது. குறிப்பாக பைபாஸ் சாலைகளை அமைத்திட தேவையான நடவடிக்கையை முதற்கட்டமாக தொடங்கி உள்ளது. இதற்காக முதற்கட்டமாக பாளையம் பென்னிகுக் கார்டன் பகுதியில் உள்ள நெல் விளையக்கூடிய நிலங்களில் பொக்லைன் மூலம் அழிக்கப்பட்டு சர்வே செய்யப்பட்டு வருகின்றன. இதன் சர்வே பணிகள் இன்னும் 20 நாட்கள் வரை நடக்க உள்ளன. வருவாய்த்துறையினர் நிலம் கையகப்படுத்தி தந்துள்ள நிலையில் இதனை கிராம கணக்குகள், மற்றும் நில வரைபடம்(ஸ்கெட்ச்), மூலமாக சரிசெய்யும் பணி நடக்கிறது. நிலம் கையகப்படுத்தப்பட்டபோது ஏற்கனவே சர்வே செய்து சர்வே கல் ஊன்றப்பட்டன.ஆனால் இவை 8 ஆண்டுங்களுக்கு மேலாகிவிட்ட நிலையில் காணாமல் போய்விட்டதால் மீண்டும் இப்பணி தொடங்கி உள்ளது. பைபாஸ் சாலை தேனிமாவட்டத்தில் அமைக்கப்படும்போது விளைநிலங்கள் அழியக்கூடிய ஆபத்துக்கள் உள்ளன. இதுகுறித்து அதிகாரிகளிடம் கேட்டபோது, `` நான்கு வழிச்சாலை திட்டத்திற்காக ஏற்கனவே நிலம் கையகப்படுத்தப்பட்டுள்ளது. இதற்காக 75 சதவீதம் வரை நிலஇழப்பீட்டு தொகை வழங்கப்பட்டு விட்டது. மீதமுள்ளவர்கள் கோர்ட்டை நாடி உள்ளனர். இதன் உத்தரவு வந்தவுடன் முழுவதுமாக நில இழப்பீட்டு தொகை வழங்கப்படும். தற்போது நான்கு வழிச்சாலை பைபாஸ் சாலைக்காக சர்வே கல் ஊன்றும் பணி நடக்க இருக்கிறது. சாலை அமைக்கும் பணி எப்போதும் தொடங்கும் என இதனை செயல்படுத்தும் நகாய் நிறுவனத்திடம்தான் கேட்கவேண்டும்’’ என்றனர்.

வெயிலுக்கு பலியாகும் பிராய்லர் கோழிகள்

ஆண்டிபட்டி,மே 17: கடுமையான வெயிலின் தாக்கத்தால் ஆண்டிபட்டி பகுதியில் பிராய்லர் கோழிகள் செத்து மடிகின்றன. இவற்றை வீதியில் வீசுவதால் தொற்றுநோய் பரவும் அபாயம் ஏற்பட்டுள்ளது. ஆண்டிபட்டியைச் சுற்றி ஜம்புலிபுத்தூர், திம்மரசநாயக்கனூர் உள்ளிட்ட பல்வேறு கிராமங்களில் கோழிப்பண்ணைக்கு செட் அமைத்து பல லட்சம் பிராய்லர் கோழிகளை வளர்க்கப்படுகின்றன. இவைகளுக்கு 40 நாட்களுக்கு தேவையான தண்ணீர் தீவனம், மருந்து உள்ளிட்ட உணவுப் பொருட்களை வழங்கி பராமரித்து வருகின்றனர். இந்த நிலையில் தற்போது வெயில் காலம் என்பதால் பிராய்லர் கோழிகள் வெயிலின் தாக்கத்தை தாங்க முடியாமல் தினமும் நூற்றுக்கும் மேற்பட்டவை இறந்து வருகின்றன. இவ்வாறு இறக்கும் கோழிகளை பாதுகாப்பான முறையில் பூமிக்கடியில் தோண்டி புதைத்து விடுகின்றனர். ஆனால் நாய்கள் அவற்றை தோண்டி சாப்பிடுவதால் நாய்களுக்கும் தொற்றுநோய் பரவுகிறது. மேலும் நாய்கள் தின்றது போக எஞ்சிய இறைச்சி ஈக்கள், கொசுக்கள், காகம் போன்ற உயிரினங்களும் சாப்பிடுவது மட்டுமின்றி அழுகி துர்நாற்றம் வீசுவதால் தொற்றுநோய் பரவும் அபாயம் ஏற்பட்டுள்ளது. எனவே, கோழிப்பண்ணைகளை சுகாதாரத்துறையினர் ஆய்வு செய்து உரிய தீர்வு காண வேண்டும் என்று சமூக ஆர்வலர்கள் கோரிக்கை விடுத்துள்ளனர்.இதுகுறித்து அவர்கள் கூறுகையில், `` கோழிப்பண்ணையில் பல்வேறு காரணங்களினால் இறக்கும் பிராய்லர் கோழிகளை பாதுகாப்பான முறையில் பூமிக்கடியில் ஆழமாகத் தோண்டி புதைக்க வேண்டும். ஆனால், கோழிப்பண்ணையில் உள்ளவர்கள் இறந்த கோழிகளை திறந்த வெளியில் போட்டு வருகின்றனர். இதனால் துர்நாற்றம் அதிகமாகி காற்றிலும் மற்ற உயிரினங்கள் மூலமாக தொற்றுநோய் பரவுகிறது. மேலும் கிராமப் பகுதியில் கோழிப்பண்ணைகள் இருப்பதால் துர்நாற்றம் தாங்க முடியாமல் பொதுமக்கள் சிரமத்திற்கு உள்ளாகி வருகின்றனர்’’ என்று தெரிவித்தனர்.

மறுவாக்குப்பதிவு தேர்தல் வாக்குச்சாவடி அலுவலர்கள் நியமனம்

தேனி, மே 17: தேனி மாவட்டத்தில் மே 19ம் தேதி நடக்க உள்ள இரு வாக்குச்சாவடிகளுக்கான மறு வாக்குப்பதிவுக்கான வாக்குச்சாவடி அலுவலர்கள் நியமிக்கப்பட்டுள்ளனர். தேனி மாவட்டத்தில் தேனி மக்களவை தொகுதி பொதுத்தேர்தல் , ஆண்டிபட்டி மற்றும் பெரியகுளம் சட்டமன்றத் தொகுதி இடைத்தேர்தல் வாக்குப்பதிவு கடந்த மாதம் 18ம்தேதி நடந்தது. இதனையடுத்து, வாக்குப்பதிவு இயந்திரங்கள் அனைத்தும் வாக்கு எண்ணும் மையம் அமைந்துள்ள கொடுவிலார்பட்டியில் உள்ள தேனி கம்மவார் சங்கம் பொறியியல் கல்லூரிக்கு அனுப்பி வைக்கப்பட்டது. இந்நிலையில், வாக்குப்பதிவின்போது ஏற்பட்ட தவறுகளை காரணம் காட்டி தேனி மாவட்டத்தில் ஆண்டிபட்டி சட்டமன்றத் தொகுதிக்குட்பட்ட பாலசமுத்திரத்தில் வாக்குச்சாவடி எண் 67க்கும், பெரியகுளம் சட்டமன்றத் தொகுதிக்குட்பட்ட வடுகபட்டியில் வாக்குச்சவாவடி எண் 197க்கும் வருகிற 19ம் தேதி மறுவாக்குப்பதிவு நடத்த மாநில தலைமை தேர்தல் ஆணையம் உத்தரவிட்டது.இதனையடுத்து, இவ்விரு வாக்குச்சாவடிகளுக்கும் வாக்குச்சாவடி அலுவலர்கள் நியமிக்கப்பட்டுள்ளனர். இதன்படி, ஒரு வாக்குச்சாவடிக்கு வாக்குச்சாவடி நிலைய அலுவலர் உள்ளிட்ட 6 பேரும், தலா ஒரு வாக்குச்சாவடிக்கு ஒரு மைக்ரோ அப்சர்வருமாக மொத்தம் இருவாக்குச்சாவடிகளுக்கும் 12 வருவாய்த் துறை அலுவலர்கள் வாக்குச்சாவடி அலுவலர்களாக நியமிக்கப்பட்டுள்ளனர்.வாக்குப்பதிவு நாளன்று வாக்குப்பதிவு முடிந்ததும், மின்னனு வாக்குப்பதிவு இயந்திரங்களில் மறுவாக்குப்பதிவு இயந்திரங்கள் என எழுதி வாக்கு எண்ணும் மையத்தில் வைக்கப்பட உள்ளது. அதேசமயம் ஏற்கனவே, மறுவாக்குப்பதிவு நடத்தப்பட்ட வாக்குச்சாவடிகளில் வாக்குப்பதிவு நடத்தப்பட்டு வாக்கு எண்ணும் மையத்தில் வைக்கப்பட்ட வாக்குப்பதிவு இயந்திரங்கள் மீது எண்ணக்கூடாத வாக்குப்பதிவு இயந்திரங்கள் என எழுதி வாக்கு எண்ணும் மையத்தில் வைக்கவும் மாவட்ட தேர்தல் ஆணையம் உத்தரவிட்டுள்ளது.

வீரபாண்டி கோயில் திருவிழா சிறப்பு பஸ்கள் இயக்கியதில் பல லட்சம் வருவாய் இழப்பு போக்குவரத்து அதிகாரிகள் புலம்பல்

தேனி, மே 17: வீரபாண்டி கவுமாரியம்மன் கோயில் விழாவிற்கு சிறப்பு பஸ்கள் இயக்கப்பட்டதில் வருவாய் இழப்பு ஏற்பட்டுள்ளதாக அரசு போக்குவரத்துக்கழக அதிகாரிகள் தெரிவித்தனர். தேனி மாவட்டத்தில், வீரபாண்டி கவுமாரியம்மன் கோயில் விழா எட்டு நாட்கள் நடந்து முடிந்தது. இந்த விழாவிற்காக தேனி, ஆண்டிபட்டி, பெரியகுளம், போடி, சின்னமனூர், கம்பம் பகுதியில் இருந்து அரசு போக்குவரத்துக்கழகம் சிறப்பு பஸ்களை இயக்கியது. கடந்த ஆண்டு நிர்ணயிக்கப்பட்ட அதே கட்டணம் நடப்பு ஆண்டும் நிர்ணயிக்கப்பட்டு இருந்தது. ஆனால், நடப்பு ஆண்டு பக்தர்கள் வருகை குறைவால் அரசு போக்குவரத்துக்கழகத்திற்கு வருவாய் இழப்பு ஏற்பட்டுள்ளது என போக்குவரத்துக்கழக அதிகாரிகள் தெரிவித்தனர். இதுகுறித்து அவர்கள் கூறியதாவது: இந்த விழாவிற்கு சிறப்பு பஸ்கள் இயக்க வீரபாண்டியில் இரண்டு சிறப்பு பஸ்ஸ்டாண்ட்கள் அமைக்கப்பட்டு மின்விளக்கு வசதி, கழிப்பறை, குடிநீர் வசதி செய்யப்பட்டது. தவிர அத்தனை இடங்களிலும் கூடுதல் பணியாளர்கள் நியமிக்கப்பட்டனர். இவர்கள் கூடுதல் நேரம் பணிபுரிந்ததால் சிறப்பு சம்பளம் வழங்கப்பட்டது. டீசல் விலையும் கூடி விட்டது. கடந்த ஆண்டு இந்த சிறப்பு பஸ்கள் மூலம் அரசு போக்குவரத்துக்கழகத்திற்கு தினமும் 17 முதல் 18 லட்சம் ரூபாய் வரை வசூலானது. நடப்பு ஆண்டு தினசரி வசூல் 15 லட்சம் ரூபாயினை தாண்டவில்லை. சில நாட்கள் இதற்கும் குறைவாகவும் வசூலானது. கடும் வெயில் நிலவியதால் பகலில் பக்தர்கள் வருகை குறைவாக இருந்தது. இரவில் மட்டும் பயணிகள் வருகை அதிகரித்தது. தவிர நடப்பு ஆண்டு கூடுதல் பக்தர்கள் சொந்த வாகனங்களில் கோயிலுக்கு வந்து சென்றனர். இது போன்ற காரணங்களால் வருவாய் இழப்பு ஏற்பட்டது. மொத்தக்கணக்கு பார்த்தால் அரசு போக்குவரத்துக்கழகத்திற்கு நஷ்டம் தான். இருப்பினும் பக்தர்களுக்கு சேவை செய்ய வேண்டும் என்ற நோக்கத்தில் நாங்கள் செயல்பட்டு பக்தர்களுக்கு சிறப்பான போக்குவரத்து வசதிகள் செய்து கொடுத்தோம்.

வாக்கு எண்ணும் மைய கண்காணிப்பாளர்களுக்கு பயிற்சி

தேனி, மே. 15: தேனி மாவட்ட கலெக்டர் அலுவலகத்தில் வாக்கு எண்ணும் மையத்தின் கண்காணிப்பாளர்களுக்கான பயிற்சி வகுப்புகள் நேற்று நடந்தது. தேனி பாராளுமன்றத் தொகுதி பொதுத்தேர்தல் மற்றும் ஆண்டிபட்டி, பெரியகுளம் சட்டமன்றத் தொகுதிகளுக்கான இடைத்தேர்தல் கடந்த ஏப்ரல் 18ம் தேதி நடந்தது. வாக்குப்பதிவு நடந்து முடிந்ததையடுத்து, பாராளுமன்றத் தேர்தலுக்கான வாக்குப்பதிவு இயந்திரங்கள் மற்றும் வாக்குப்பதிவு கட்டுப்பாட்டுக் கருவிகள், பெரியகுளம், ஆண்டிபட்டி சட்டமன்றத் தொகுதிகளுக்கான வாக்குப்பதிவு மற்றும் வாக்குப்பதிவு கட்டுப்பாட்டுக்கருவிகள், வாக்குப்பதிவு உறுதி செய்யும் இயந்திரங்கள் வாக்கு எண்ணும் மையமான தேனி அருகே கொடுவிலார்பட்டியில் உள்ள தேனி கம்மவார் சங்க பொறியியல் கல்லூரி வளாகத்தில் பாதுகாப்பாக வைக்கப்பட்டுள்ளது. வாக்கு எண்ணும் மையத்தில் வருகிற 23ம் தேதி வாக்கு எண்ணிக்கை நடக்க உள்ளது.வாக்கு எண்ணிக்கை மையத்தில் உள்ள கண்காணிப்பாளர்கள் மற்றும் உதவியாளர்களுக்கு பயிற்சி வகுப்பு நேற்று தேனி கலெக்டர் அலுவலகத்தில் நடந்தது. கலெக்டர் பல்லவிபல்தேவ் தலைமை வகித்தார். அப்போது கலெக்டர் பல்லவிபல்தேவ் பேசும்போது, வாக்கு எண்ணிக்கையில் ஈடுபட உள்ள அலுவலர்களுக்கான டேபிள் குறித்து வாக்கு எண்ணும் நாளான 23ம் தேதி காலை 5 மணிக்கு கணினி குலுக்கல் முறையில் ஒதுக்கீடு செய்யப்படும்.இதையடுத்து, எந்த மேஜையில் எந்த இயந்திரங்கள் எண்ண வேண்டும் என்பதும் கணினி குலுக்கல் முறையில் ஒதுக்கீடு செய்யப்படும். எனவே வாக்கு எண்ணும் பணியில் ஈடுபடும் அலுவலர்கள் தங்களுக்கான வாக்கு எண்ணும் கூடத்திற்கு காலை 5 மணிக்கு வரவேண்டும். வாக்கு எண்ணும் மேஜையில் ஒரு மேற்பார்வையாளர், ஒரு உதவியாளர், ஒரு நுண்பார்வையாளர் ஈடுபடுவர். முதலில் தபால் வாக்குகள் எண்ணப்பட்டு பின்னர், மின்னணு வாக்குப்பதிவு வாக்குகள் எண்ணப்படும்.மின்னணு வாக்குப்பதிவு இயந்திரங்கள் வைக்கப்பட்டுள்ள பாதுகாப்பு அறை, வாக்கு எண்ணும் நாளன்று காலையில் வேட்பாளர்கள் மற்றும் வேட்பாளர்களின் முகவர்கள் முன்னிலையில் திறந்து, வாக்கு எண்ணும் மேஜைக்கு கொண்டு செல்ல வேண்டும். இந்நடவடிக்கைகளை அனைத்தும் வீடியோ மூலம் பதிவு செய்ய வேண்டும். வாக்கு எண்ணிக்கையின்போது, குலுக்கல் முறையில் வி பேட் எனப்படும் 5 வாக்குப்பதிவினை உறுதி செய்யும் இயந்திரங்கள் தேர்வு செய்யப்பட்டு பதிவான வாக்குகள் எண்ணிக்கை நடத்த வேண்டும்.ஒரு சுற்றுக்கு தேவையான வாக்குப்பதிவு இயந்திரங்கள் எடுத்தவுடன் அடுத்த சுற்றுவரும்வரை இயந்திரங்கள் பாதுகாப்பு அறையில் பூட்டப்பட்டு பாதுகாப்பாக வைக்க வேண்டும். வாக்கு எண்ணும் அலுவலர்கள் தங்கள் மேஜையை தவிர்த்து வேறு எங்கும் செல்லக்கூடாது. வாக்குப்பதிவு இயந்திரங்கள் தங்களுக்கு ஒதுக்கப்பட்டதுதானா என்பதை சரிபார்த்துக் கொள்ள வேண்டும். வாக்குப்பதிவு இயந்திரத்தில் உள்ள பச்சை அட்டையில் உள்ள எண்ணை 17சி விண்ணப்பத்துடன் ஒப்பிட்டு சரிபார்த்திட வேண்டும். வாக்கு எண்ணிக்கைக்கான பொத்தானை அழுத்தியவுடன் முகவர்கள் காணும் வகையில் கட்டுப்பாட்டுக் கருவியினை வைத்துக் கொள்ள வேண்டும்.கட்டுப்பாட்டுக் கருவியில் வரும் முடிவுகளை கார்பன் தாள் வைத்து இருபிரதிகள் தயாரித்து அதில் முகவர்களிடம் கையொப்பம் பெற வேண்டும். வாக்கு எண்ணிக்கை குறிக்கப்பட்ட இருபிரதிகளையும் உதவித் தேர்தல் நடத்தும் அலுவலரிடம் வழங்க வேண்டும். உதவித் தேர்தல் நடத்தும் அலுவலர் அதனை பிரதி எடுத்து வேட்பாளர்களின் முகவர்களுக்கு வழங்கிட வேண்டும். வாக்கு எண்ணும்போது சந்தேகம் எழுந்தால் அதனை தேர்தல் நடத்தும் அலுவலரிடம் உடனடியாக தெரிவிக்க வேண்டும் என கலெக்டர் பல்லவிபல்தேவ் தெரிவித்தார். பயிற்சி வகுப்பில் மாவட்ட வருவாய் அலுவலர் கந்தசாமி, உதவித் திட்ட அலுவலர் தண்டபாணி, ஆண்டிபட்டி வட்டாட்சியர் பாலசண்முகம், வாக்கு எண்ணும் மைய கண்காணிப்பாளர்கள், உதவியாளர்கள் உள்ளிட்ட சுமார் 160 பேர் கலந்து கொண்டனர்.

தேனியில் நடந்தது மறு வாக்குப்பதிவு நடக்கும் பகுதியில் பூத் சிலிப் தயாரிக்கும் பணி தீவிரம்

தேனி, மே. 15: தேனி மாவட்டத்தில் மறுவாக்குப்பதிவு நடக்கும் இரு வாக்குச்சாவடிகளை சேர்ந்த வாக்காளர்களுக்கு பூத் சிலிப் தயாரிக்கும் பணி துரிதமாக நடந்து வருகிறது. தேனி மாவட்டத்தில் உள்ள ஆண்டிபட்டி சட்டமன்றத் தொகுதியில் பாலசமுத்திரம் கிராமத்தில் உள்ள வாக்குச் சாவடி எண் 67க்கும், பெரியகுளம் சட்டமன்றத் தொகுதிக்குட்பட்ட வடுகபட்டியில் வாக்குச்சாவடி எண் 197க்கும் வருகிற 19ம் தேதி மறுவாக்குப்பதிவு நடத்த மாநில தலைமை தேர்தல் ஆணையம் உத்தரவிட்டது. இதள்படி இவ்விரு வாக்குச்சாவடி மையங்களுக்கும் வருகிற 19ம் தேதி மறுவாக்குப்பதிவு நடக்க உள்ளது.இவ்விரு வாக்குச்சாடிகளிலும் மொத்தம் சுமார் 2 ஆயிரத்து 500 வாக்காளர்கள் உள்ளனர். இவ்வாக்காளர்கள் ஏற்கனவே, கடந்த ஏப்ரல் 18ம் தேதி வாக்களிக்கும்போது, இடது கையின் ஆள்காட்டி விரலில் மை வைத்தனர். தற்போது இவ்விரு வாக்குச்சாவடி மையஙகளிலும், மறு வாக்குப்பதிவு நடக்க உள்ளதால், வாக்காளர்களுக்கு பூத் சிலிப்கள் வழங்க வேண்டியுள்ளது. எனவே, இவ்விருவாக்குச்சாடிக்கும் பூத்சிலிப் தயாரிக்கும் பணி துரிதமாக நடந்து வருகிறது.

சுருளி அருவியில் செயல்படாத குடிநீர் தொட்டி

கம்பம், மே 15: சுருளி அருவி பகுதியில் மின் மோட்டார் பழுது காரணமாக பல மாதங்களாக செயல்படாத குடிநீர் தொட்டியை சரிசெய்து செயல்பாட்டிற்கு கொண்டுவர வேண்டும் என பொதுமக்கள் கோரிக்கை விடுத்துள்ளனர். தேனி மாவட்டத்திலுள்ள சுற்றுலாத்தலங்களில் சிறப்பு மிக்கது சுருளி நீர்வீழ்ச்சி. இது சுற்றுலா தலமாகவும், புண்ணிய தலமாகவும் விளங்குகிறது. இங்கு சுருளிமலை ஐயப்பசாமி கோயில், பூதநாராயணன் கோயில், ஆதிஅண்ணாமலையார் கோயில், சுருளிவேலப்பர் கோயில் மற்றும் கைலாய நாதர் குகையும் உள்ளன. சுருளி நீர்வீழ்ச்சியின் அடிவாரப் பகுதியில் இறந்தவர்களுக்கான புண்ணியாதானம் செய்யும் நிகழ்வுகள் அதிக அளவில் நடைபெறும். இங்கு முக்கிய விசேஷ நாட்களில் ஆயிரக்கணக்கான பக்தர்கள் வந்து செல்கின்றனர்.இந்நிலையில் பக்தர்கள் மற்றும் சுற்றுலாப்பயணிகளின் குடிநீர் தேவைக்காக சுருளிப்பட்டி ஊராட்சி சார்பில் பல லட்சம் ரூபாய் செலவில் மின்மோட்டாருடன் கூடிய தரைமட்ட நீர்தேக்க தொட்டி அமைத்து குடிநீர் விநியோகம் செய்யப்பட்டது. இதனால் அருவிப்பகுதிக்கு புண்ணியாதானம் நிகழ்வு மற்றும் விசேஷங்களுக்கு வருபவர்கள் சமையல் போன்ற வேலை செய்வதற்கு தண்ணீர் கிடைத்து வந்தது. இந்நிலையில் கடந்த ஆறு மாதங்களுக்கும் மேலாக மோட்டார் பழுது காரணமாக இந்த தரைமட்ட நீர்தேக்க தொட்டி பராமரிப்பின்றி செயல்பாடின்றி கிடப்பதால் பக்தர்களும், பொதுமக்களும் சிரமப்படுகின்றனர். எனவே விரைவில் மோட்டார் பழுதிநீக்கி செயல்படாத குடிநீர் தொட்டியை சரிசெய்து செயல்பாட்டிற்கு கொண்டுவர வேண்டும் என பொதுமக்கள் கோரிக்கை விடுத்தள்ளனர்.இதுகுறித்து, அதிகாரிகள் கூறுகையில், ‘கடந்த ஒன்பது மாதத்தில் மூன்று முறை அந்த மோட்டார் பழுதுநீக்கப்பட்டுள்ளது. தற்போது சுருளிப்பட்டி ஊராட்சி மூலம் சுருளி டோல்கேட் வசூல் செய்யும் பணத்தின் மூலம் சுமார் ஐந்து லட்சம் ரூபாய் செலவில் பணிகள் செய்ய புரபசல் அனுப்பி உள்ளோம். அனுமதி கிடைக்கும் பட்சத்தில் புதிய மோட்டார் வாங்கி பொருத்தவும், ஆற்றில் மேலும் ஒரு போர் போட்டு தரைமட்ட நீர்தேக்க தொட்டிக்கு தண்ணீர் கொண்டுசெல்லவும், அத்துடன் அங்குள்ள கழிப்பறைக்கும் தண்ணீர் கொண்டு செல்லவும் திட்டமிடப்பட்டள்ளது’ என்றார்.