Thiruvarur - Dinakaran

மன்னார்குடி அருகே திருராமேஸ்வரத்தில் ராமநாத சுவாமி கோயில் தேரோட்டம் திரளான பக்தர்கள் வடம் பிடித்தனர்

மன்னார்குடி, மே 19: மன்னார்குடி அருகே திருராமேஸ்வரம் கிராமத்தில் உள்ள ராமநாத சுவாமி கோயிலில் வைகாசி விசாக பெரு விழாவை முன்னிட்டு  தேரோட்டம் நடந்தது. ஆயிரக்கணக்கான மக்கள் வடம் பிடித்து தேரை  இழுத்தனர்.திருவாரூர் மாவட்டம் மன்னார்குடி அருகே திருராமேஸ்வரம் கிராமத்தில் உள்ள மங்கள நாயகி உடனுறை ராமநாதசுவாமி கோயிலில் 10 நாட்கள் நடைபெறும் பிரசித்தி பெற்ற வைகாசி விசாக பெருவிழா நடைபெற்று வருகிறது. இந்து சமய அறநிலையத்துறை கட்டுப்பாட்டின் கீழ் இயங்கும் மிகவும் பழமை வாய்ந்த இக்கோயிலில் கடந்த 15 வருடத்திற்கு முன்பும், கடந்த ஆண்டும் கும்பாபிஷேகம் நடைபெற்றது. அப்போது இக்கோயிலில் சிதிலமடைந்த நிலையில் பழைய தேர் ஒன்று இருந்துள்ளது. இதன் வரலாறு குறித்து தஞ்சையில் உள்ள சரஸ்வதி மகாலில் இருக்கும் பழைய ஆவண குறிப்புகளின் அடிப்படையில் சுமா 150 ஆண்டுகளுக்கு முன்பு இக்கோயிலில் தேரோட்டம் சிறப்பாக நடைபெற்றது என்ற குறிப்பு கிடைத்துள்ளது. பல்வேறு காரணங்களுக்காக தேரோட்டம் நின்று போய்விட்டது.இந்த தகவல்களை அறிந்த செங்கமலத்தாயார் மகளிர் கல்லூரி தாளாளர் டாக்டர். திவாகரன் தனது சொந்த செலவில் ரூ.30 லட்சம் மதிப்பீட்டில் இக்கோயிலுக்கு புதிதாக தேர் ஒன்றினை செய்து கொடுத்தார். கடந்தாண்டு அதன் முதல் தேரோட்டம் நடைபெற்றது. இந்நிலையில் தற்போது இக்கோயிலில் வைகாசி விசாக பெருவிழா கடந்த 10 நாட்களாக நடந்து வருகிறது. அதில் முக்கிய விழாவான திருத்தேரோட்டம் நேற்று காலை நடைபெற்றது. செங்கமலத்தாயார் கல்வி அறக் கட்டளை தாளாளர் முனைவர் திவாகரன், அவரது மகன் ஜெய் ஆனந்த் திவாகரன் மற்றும் ஆயிரக்கணக்கான பக்தர்கள் கலந்து கொண்டு தேரினை வடம் பிடித்து இழுத்து வந்து நிலையடிக்கு கொண்டு வந்தனர்.தொடர்ந்து மங்கள நாயகி உடனுறை ராமநாதசுவாமிக்கு பல்வேறு சிறப்பு பூஜைகள் நடத்தப்பட்டன. பின்னர் அருகில் உள்ள தீர்த்த குளத்தில் தீர்த்த வாரி நிகழ்ச்சி நடைபெற்றது. தேரோட்டத்தை முன்னிட்டு இன்ஸ்பெக்டர் சரவணன் தலைமையில் ஏராளமான போலீசார் பாதுகாப்பு பணியில் ஈடுபட்டிருந்தனர்.

நாகை எம்பி, திருவாரூர் எம்எல்ஏ தொகுதி வாக்கு எண்ணும் பணியில் 729 பேர் செல்போனுக்கு அனுமதியில்லை தேர்தல் அலுவலர் ஆனந்த் அறிவிப்பு

திருவாரூர், மே 19:  நாகை எம்பி தொகுதிக்குட்பட்ட நாகை, வேதாரண்யம், கீழ்வேளூர், திருவாரூர் மற்றும் நன்னிலம் ஆகிய 6 எம்எல்ஏ தொகுதிகளில் பதிவான வாக்குகள் மற்றும் திருவாரூர் எம்எல்ஏ தொகுதி இடைத்தேர்தலில் பதிவான வாக்குகள்  ஆகியவை வாக்கு எண்ணும் மையமான திருவாரூர் திரு.வி.க  அரசு  கலைக்கல்லூரியில் பாதுகாப்பாக வைக்கப்பட்டு 3 அடுக்கு பாதுகாப்பு போடப்பட்டுள்ளது. இந்நிலையில் வாக்கு எண்ணிக்கை வரும் 23ம் தேதி  நடைபெறுவதையொட்டி வாக்கு எண்ணும் பணியில் ஈடுபடும் அலுவலர்களுக்கான பயிற்சி வகுப்பு திருவாரூர் கலெக்டர் அலுவலகத்தில் தொகுதியில் தேர்தல் நடத்தும் அலுவலர் ஆனந்த் தலைமையில் நடைபெற்றது. இதில் தேர்தல் அலுவலர் ஆனந்த் பேசுகையில், வரும்  23ம் தேதி காலை 8 மணி அளவில் வாக்கு எண்ணிக்கை துவங்கவுள்ள நிலையில் இந்த பணியில்  ஈடுபடும் அலுவலர்கள் அனைவரும் காலை 6 மணிக்குள்ளாகவே மையத்திற்குள்  இருக்க வேண்டும்.மேலும்  ஒவ்வொரு வாக்கு எண்ணும் மேஜைக்கும் தலா ஒரு வாக்கு எண்ணும் அலுவலர், உதவி அலுவலர் மற்றும் நுண்பார்வையாளர் என மொத்தம் 17 மேஜைகளுக்கும் 51 அலுவலர்கள் வீதம் 306 அலுவலர்கள் மற்றும் திருவாரூர் எம்எல்ஏ தொகுதியின் இடைதேர்தல் வாக்கு எண்ணிக்கைக்காக 51 அலுவலர்கள் என மொத்தம் 357 அலுவலர்களும், இதர பணிகளுக்காக 372 அலுவலர்களும் என மொத்தம் 729 அலுவலர்கள் பணிகளில் ஈடுபடுகின்ற நிலையில் இந்த வாக்கு எண்ணும் மையத்திற்குள் அலுவலர்கள் யாரும் செல்போன் எடுத்து வர அனுமதி இல்லை என்றும் தெரிவிக்கப்படுகிறது. இவ்வாறு தேர்தல் அலுவலர் ஆனந்த் தெரிவித்துள்ளார்.

நீடாமங்கலம் பகுதியில் கோடை மழை பெய்யாததால் விவசாயிகள் அவதி

நீடாமங்கலம், மே 19:  திருவாரூர் மாவட்டம் நீடாமங்கலம் பகுதிகளில் கடந்த 6 ஆண்டுகளாக பருவ மழை பொய்த்ததால் ஏரிகள், குளங்கள், குட்டைகள் வறண்டு விட்டது. இதனால் நீடாமங்கலம் பகதிகளில் நிலத்தடி நீர் 250 அடிக்கும் கீழ் சென்று விட்டது. கடந்த ஆண்டு மேட்டூர் அணையிலிருந்து திறக்கப்பட்ட தண்ணீரை கொண்டு ஒரு போகம் சாகுபடி கூட முழுமையாக விவசாயிகள் செய்ய முடியவில்லை. இந்த ஆண்டு மன்னார்குடி, கோட்டூர், திருத்துறைப்பூண்டி உள்ளிட்ட பல்வேறு பகுதிகளில் கோடைமழை பெய்தது. ஆனால் நீடாமங்கலம் பகுதியில் கடந்த சில நாட்களாக  வெயில் கொளுத்தி வருகிறது. அதே நேரத்தில்  கோடை மழை பெய்யாததால் விவசாயிகள் மிகவும் பாதிப்படைந்துள்ளனர். அதேபோன்று ஆறுகள், ஏரிகள், குளம், குட்டைகள் வற்றியதால் தண்ணீர் கிடைக்காமல் கால்நடைகளும் மிகவும் அவதிப்பட்டு வருகின்றன.

கூத்தாநல்லூர்- பாண்டுக்குடி இணைப்பு பாலத்திற்கு செல்லும் பாதை கரடு முரடான அவலம்

கூத்தாநல்லூர், மே 19: கூத்தாநல்லூரில் இருந்து பாண்டுக்குடி செல்லும் இணைப்பு பாலத்திற்கு செல்லும் பாதை கற்கள் பெயர்ந்து கரடுமுரடாக இருப்பதால் அதனை சீர் செய்து தர பொதுமக்கள் கோரிக்கை விடுத்துள்ளனர். கூத்தாநல்லூரில் இருந்து பாண்டுக்குடி செல்ல வெண்ணாற்றின் குறுக்கே பாலம் அமைக்கப்பட்டுள்ளது. இந்த பாலத்தை கடந்து தான் காக்கையாடி, சாத்தனூர், பாண்டுக்குடி, கொத்தங்குடி மற்றும் வடகோவனூர், தென்கோவனூர், திருராமேஸ்வரம் உள்ளிட்ட கிராமங்களுக்கு செல்ல முடியும். இந்த பாலத்தில் இருசக்கர வாகனங்களும் பொதுமக்களும் சென்று வருகின்றனர். கூத்தாநல்லூரில் இருந்து இந்த பாலத்திற்கு செல்ல வி.பி.எம். சாலைக்கு அருகே சாலை அமைக்கப்பட்டுள்ளது. இந்த சாலை வழியே தான் மேற்கண்ட கிராம மக்கள் சென்று வருகிறார்கள். இந்த  சாலை தற்போது கப்பிகள் பெயர்ந்து கரடுமுரடாக நடப்பதற்கே ஏற்றதாக இல்லை. அதனால் வாகன ஓட்டிகளும், பாதசாரிகளும் மிகுந்த சிரமத்திற்கு உள்ளாகின்றனர். பள்ளி செல்லும் மாணவ, மாணவிகள் அதிகம் பயன்படுத்தும் இந்த சாலையை கோடை விடுமுறை முடிந்து பள்ளிகள் திறப்பதற்கு முன்னரே சீரமைத்து தார் சாலையாகவோ, கான்கிரீட் சாவையாகவோ அமைத்து தர பொதுமக்கள் அரசுக்கு கோரிக்கை விடுத்துள்ளனர்.

திருவாரூர் பழைய நிலையத்திற்கு நாகை, திருத்துறைப்பூண்டி பேருந்துகள் வர வேண்டும் ஆர்டிஓ முன்னிலையில் நடந்த பேச்சுவார்த்தையில் உடன்பாடு

திருவாரூர், மே 17: திருவாரூர் பழைய பேருந்து நிலையத்திற்குள் நாகை மற்றும் திருத்துறைப்பூண்டி பேருந்துகள் வந்து செல்ல வேண்டும் என ஆர்டிஓ முன்னிலையில் நடைபெற்ற பேச்சு வார்த்தையில் முடிவு செய்யப்பட்டுள்ளது. திருவாரூரில்  இருந்து வந்த பேருந்து நிலையம் கடந்த 45 ஆண்டுகளுக்கு முன்னர் அமைக்கப்பட்ட நிலையில் தற்போதைய மக்கள் தொகை மற்றும் பேருந்துகள் எண்ணிக்கை அடிப்படையில் இட நெருக்கடி ஏற்பட்டது. எனவே புதிய பேருந்து நிலையம் கட்ட வேண்டும் என்று பொது மக்கள் சார்பில் வைக்கப்பட்ட கோரிக்கையினை ஏற்று திருவாரூர் நகராட்சி 30வது வார்டுக்குட்பட்ட தியாகபெருமாநல்லூர் பகுதியில் 18 ஏக்கர் நிலம் வாங்கப்பட்டு ரூ.13 கோடி மதிப்பில் அமைக்கப்பட்ட புதிய  பேருந்து நிலையம் கடந்த பிப்ரவரி 27ம் தேதி முதல்வர் எடப்பாடி பழனிசாமி மூலம் வீடியோ கான்பரன்சிங் முறையில்  திறந்து வைக்கப்பட்டது. புதிய பேருந்து நிலையம்  திறக்கப்பட்ட பின்னரும் பயணிகளுக்கு பலனில்லாமல் இருந்து வருகிறது. காரணம் திருவாரூரிலிருந்து நாகை மற்றும் திருத்துறைப்பூண்டி மார்க்கத்தில் செல்லும் பேருந்துகள் அனைத்தும் புதிய பேருந்து நிலையத்திலிருந்து பழைய பேரூந்து நிலையத்திற்குள் வராமல் வழியில் பைபாஸ் ரோடு ரயில்வே மேம்பாலம் அருகிலேயே பயணிகளை இறக்கி விடுவதும்,  திருச்சி, தஞ்சை, மதுரை மற்றும் கும்பகோணம், மன்னார்குடி  போன்ற வழித்தடங்களில் செல்லும் பேருந்துகள் அனைத்தும் புதிய பேருந்து நிலையத்திலேயே நிறுத்தப்பட்டு வந்ததாலும்  பழைய பேருந்து நிலையத்திலிருந்து புதிய பேருந்து நிலையம் செல்வதற்கு பேருந்துகள் இல்லாமல் பயணிகள் அவதிப்படும் நிலை இருந்து வருகிறது. இதனையடுத்து அனைத்து பேருந்துகளும் பழைய பேருந்து நிலையத்திற்குள் வந்து செல்ல கோரி கடந்த 3ம் தேதி ரயில்வே மேம்பாலம் அருகே வர்த்தகர்கள் மற்றும் பொது மக்கள் சார்பில் மறியல் போராட்டம்  நடைபெற்றது. இதுதொடர்பாக பேச்சுவார்த்தை ஆர்டிஓ அலுவலகத்தில் 2வது முறையாக ஆர்டிஓ முருகதாஸ் முன்னிலையில் நடைபெற்றது. இதில் வட்டார போக்குவரத்து அலுவலர் செந்தில்குமார், நகராட்சி ஆணையர் சங்கரன், அரசு போக்குவரத்து கழக வணிக மேலாளர் ராஜா, வர்த்தகர் சங்க தலைவர் பாலமுருகன் மற்றும் தனியார் பஸ் உரிமையாளர்கள் உட்பட பலர் கலந்து கொண்டனர்.   இதில் நாகை மற்றும் திருத்துறைப்பூண்டி மார்க்கத்திலிருந்து திருவாரூர் வரும் அனைத்து பேருந்துகளும் பழைய பேருந்து நிலையத்திற்கு சென்று வர வேண்டும் என்ற நடைமுறையினை அரசு போக்குவரத்து கழகம் மற்றும் நகராட்சி நிர்வாகத்தினர் ஏற்று கொண்

கோட்டூர் அருகே காரைத்திடலில் 2 மாதமாக குடிநீர் இன்றி பொதுமக்கள் கடும் அவதி போர்க்கால அடிப்படையில் நடவடிக்கை எடுக்க வலியுறுத்தல்

மன்னார்குடி, மே 17: கோட்டூர் அருகே காரைத்திடலில் 2 மாதங்களாக குடிநீர் கிடைக்காமல் மக்கள் அவதியடைந்து வரும் நிலையில் போர்க்கால அடிப்படையில் நடவடிக்கை எடுக்க கொள்ளி டம் வேதாரண்யம் கூட்டுகுடிநீர் திட்ட அதிகாரிகளுக்கு கிராம மக்கள் கோரிக்கை விடுத்துள்ளனர். திருவாரூர் மாவட்டம் கோட்டூர் ஒன்றியம் கும்மட்டித்திடல் ஊராட்சி காரைத் திடலில் சுமார் 150 குடும்பத்தினர் வசித்து வருகின்றனர். இப்பகுதிக்கு கொள்ளிடம் வேதாரண்யம் கூட்டு குடிநீர் திட்டம் மூலம் கும்மட்டித்திடல், புத்தகரம் வழியாக இரும்பு பைப் மூலம் தண்ணீர் எடுத்து சென்று காரைத்திடலில் அமைக்கப்பட்டுள்ள மேல்நிலை குடிநீர் தேக்கத்தொட்டியில் தண்ணீர் ஏற்றப்பட்டு அப்பகுதி மக்களுக்கு குடிநீர் விநியோகம் செய்யப்பட்டு வந்தது. இந்நிலையில் காரைத்திடலுக்கு முன்னால் உள்ள சில கிராமங்களில் கடந்த சில மாதங்களாக கொள்ளிடம் வேதாரண்யம் கூட்டு குடிநீர் திட்ட பைப் லைனில் சிலர் அனுமதியின்றி சொந்த உபயோகத்திற்கு தண்ணீர் எடுப்பதால் காரைத்திடல் பகுதிக்கு தண்ணீர் சென்று மேல்நிலை நீர் தேக்கத் தொட்டியில் குடிநீர் ஏற்றுவதில் பாதிப்பு ஏற்பட்டுள்ளது.  இதனால் கடந்த 2 மாதங்களாக இப்பகுதி மக்களுக்கு குடிநீர் கிடைக்காமல் தினம்தோறும்  சுமார் 4 கிமீ தூரத்தில் உள்ள நாச்சிக்குளம், கும்மட்டித்திடல் போன்ற பகுதிகளுக்கு பைக், சைக்கிள்கள் மூலம் சென்று குடிநீர் எடுத்து வரும் அவல நிலை உள்ளது. இதனால் பொது மக்கள் குடிநீருக்காக ஆளாய் பறக்கின்ற சூழல் நிலவுகிறது. நீண்ட தூரம் சென்று குடிநீர் எடுத்து வருவதால் தினமும் பலமணி நேரம் செலவிட வேண்டியுள்ளது. மேலும் வேலைக்கு செல்வோர், கூலி  வேலைகளுக்கு செல்வோர் மற்றும் பெண்கள் பெருமளவில் பாதிப்படைந்து வேதனையில் உள்ளனர். எனவே காரைத்திடலுக்கு  கடந்த 2 மாதங்களாக குடிநீர் வரவில்லை என்பதை கொள்ளிடம் வேதாரண்யம் கூட்டு குடிநீர் திட்ட அதிகாரிகள் நேரில் சென்று பார்வையிட்டு பிரச்னைக்கு என்ன காரணம் என்பதை கண்டறிந்து உடனடியாக காரைத்திடல் மக்களுக்கு குடிநீர் கிடைக்க போர்க்கால அடிப் படையில் நடவடிக்கை எடுக்க வேண்டுமென காரைத்திடல் மக்களும், கிராம கமிட்டி நிர்வாகிகள் தியாகராஜன், சண்முகம், பால சுந்தரம் ஆகியோரும் வலியுறுத்தியுள்ளனர்.

இலவச கட்டாய கல்வி மாணவர் சேர்க்கைக்கு விண்ணப்பிக்க கால அவகாசம் மெட்ரிக் பள்ளிகள் சங்க நிர்வாகி வலியுறுத்தல்

மன்னார்குடி, மே 17: திருவாரூர் மாவட்ட  நர்சரி பிரைமரி,  மெட்ரிக் மேல்நிலை மற்றும் சிபிஎஸ்இ தனியார்  பள்ளிகள்  சங்கத்தின் மாவட்ட நிர்வாகிகள் கூட்டம் மன்னார்குடியில் நடைபெற்றது. கூட்டத்திற்கு சங்கத்தின் மாவட்ட தலைவர் ரமேஷ் தலைமை வகித்தார். முன்னாள் மாவட்ட தலைவர் நீலன் அசோகன் முன்னிலை வகித்தார். கூட்டத்தில் பங்கேற்ற  தமிழ்நாடு  நர்சரி பிரைமரி,  மெட்ரிக் மேல்நிலை மற்றும்  சிபிஎஸ்இ தனியார்  பள்ளிகள்  சங்கத்தின் மாநில பொதுச் செய லாளர் நந்தகுமார் நிருபர்களுக்கு அளித்த பேட்டி:தமிழகத்தில் அனைத்து தனியார் பள்ளியிலும் இலவச கட்டாய கல்வி ஆர்டி சட்டப்படி 25 சதவீதம் மாணவர் சேர்க்கை அரசு செய்ய வேண்டும் என அறிவித்துள்ளது.  அரசு அறிவித்த நேரம் தேர்தல் காலம் என்பதால் பெற்றோர்கள்  வருமான சான்று, குடியிருப்பு, பிறப்பு, சாதி சான்று பெற ஆன் லைன்  இணையதளம் சரியாக இயங்கவில்லை. உரிய ஆவணங்கள் பெற பெற்றோர்கள் சிரமப்பட்டு வருவதால் இத்திட்டத்தின் மூலம் மாணவர்களை சேர்க்க முடியவில்லை. எனவே தமிழக அரசு ஜூன் 30 வரை கால அவகாசம் அளித்து பெற்றோர்கள் மாணவர்களை ஆன்லைனில் சேர்க்க உதவி செய்ய வேண்டும்.2017-18ம் கல்வி ஆண்டிற்குரிய ஆர்டிஇ கல்வி கட்டண பாக்கி மெட்ரிக் பள்ளிக்கு மட்டுமே வழங்கப்பட்டுள்ளது, நர்சரி, பிரைமரி பள்ளிகளுக்கு வழங்கப்படவில்லை உடனடியாக இதனை வழங்கினால் தான் பள்ளிகளை தொடர்ந்து நடத்த முடியும்.தனியார் பள்ளிகளுக்கு  தொடர் அங்கீகாரம் கொடுக்க ஆன்லைன் மூலம் அங்கீகாரம் வழங்க தமிழக அரசு ஆணையிட்டுள்ளது.  சுகாதாரத்துறை, தீயணைப்புத்துறை, வருவாய்துறை கட்டிட உறுதிசான்று, உரிமைச் சான்று தந்தால் ஆன்லைனில் தொடர் அங்கீகாரம் வழங்கப்பட்டு விடும்.  ஆனால் கல்வித்துறை அதிகாரிகள் நாங்கள் நேரில் ஆய்வு செய்ய வேண்டும். எங்களுக்கு பணம் தர வேண்டும். இல்லையென்றால் அங்கீகாரம் ரத்து செய்யப்படும் என இழுத்தடிப்பது கண்டனத்துக்குரியது.  இந்த ஆன்லைன் அங்கீகாரம் இம்மாத இறுதிக்குள் எல்லா பள்ளிகளுக்கும் வழங்க தமிழக அரசு நடவடிக்கை மேற்கொள்ள வேண்டும்.திருவாரூர் மாவட்டம் உள்ளிட்ட தமிழகத்தில் உள்ள அனைத்து மாவட்டங்களிலும் பணியாற்றும் முதன்மை கல்வி அலுவலர்கள், வட்டார கல்வி அலுவலர்கள்  தனியார் பள்ளி நிர்வாகிகளை மிரட்டி 25 ஆயிரம், 50 ஆயிரம் ரூபாய் லஞ்சம் கொடுத்தால் தான் தொடர் பள்ளி அங்கீகாரம் தருவோம் என அச்சுறுத்துகின்றனர்.  எனவே கல்வித்துறை அதிகாரிகள்  லஞ்சம் கேட்டு மிரட்டுகிற போக்கை கைவிட வேண்டும் என வலியுறுத்துகிறோம். மேலும் லஞ்சம் கேட்கும் அதிகாரிகள் மீது கல்வித்துறை அமைச்சர், முதன்மை கல்வி செயலாளர் நடவடிக்கை மேற்கொள்ள வேண்டும். இலவச கட்டாய கல்வி சட்டப்படி அரசு பள்ளி கல்வி கட்டணம் மட்டுமே வழங்குகிறது, மீதம் நோட்டு புத்தகம் மற்றும் இதர பரதநாட்டியம், யோகா உள்ளிட்ட சிறப்பு வகுப்புகளுக்கு தனி கட்டணம் அதனை அரசு தருவதில்லை. அரசு பள்ளி கல்வி கட்டணம் மட்டுமே தருகிறது. அதுவும் கடந்த 2 ஆண்டுகளாக தரவில்லை. அரசு ஒரு மாணவனுக்கு  ரூ.11 ஆயிரத்து 500 தருவதாக  சொல்லி விட்டு 4 ஆயிரம் மட்டுமே தருகிறார்கள், இதற்கு அரசு தகுந்த விளக்கம் அளிக்க வேண்டும்.தனியார் பள்ளிகளில் அதிகப்படியான கட்டணம் வசூல் செய்தால் மாணவர்களின் பெற்றோர்கள் உரிய ஆவணங்களுடன் புகார் செய்தால் நடவடிக்கை மேற்கொள்ளப்படும்.  சமச்சீர் கல்வி புதிய பாடத்திட்டத்திற்கு அரசு பள்ளி ஆசிரியர்களுக்கு பயிற்சி அளிப்பது போல் தமிழக அரசு  தனியார் பள்ளி ஆசிரியர்களுக்கும் பயிற்சி அளிக்க வேண்டும் என கூறினார்.

திருவாரூரில் ஆக்கிரமிப்பு அகற்றும் பணி

திருவாரூர், மே 17: திருவாரூரில்  தேசிய நெடுஞ்சாலை மற்றும் மாநில நெடுஞ்சாலைகளில் உள்ள ஆக்கிரமிப்பு நேற்று நெடுஞ்சாலை துறையினர் மூலம் அகற்றப்பட்டது. திருவாரூர் பகுதியில் கலெக்டர் அலுவலகம் இயங்கி வருகிறது. இங்கு ஆயிரத்திற்கும் மேற்பட்ட அலுவலர்கள் பணியாற்றி வரும் நிலையில் தங்களது கோரிக்கைகளுக்காக பொதுமக்கள் பலரும் தினந்தோறும் மனுக்கள் அளிப்பதற்காகவும்  வருகின்றனர். இதுமட்டுமன்றி இந்த பகுதியில் எஸ்பி அலுவலகம், தாலுகா போலீஸ் ஸ்டேஷன், ஒருங்கிணைந்த நீதிமன்றம், மாவட்ட முதன்மை கல்வி அலுவலகம் மற்றும் மாவட்ட கல்வி அலுவலகம் போன்ற அலுவலகங்களும் செயல்பட்டு வருகின்றன. மேலும் அரசு மருத்துவக் கல்லூரி மருத்துவமனையும் இந்த பகுதியில் இயங்கி வருகிறது. இதுமட்டுமின்றி தற்போது இந்த பகுதியை ஒட்டியவாறு திருவாரூரில் புதிய பேருந்து நிலையமும் திறக்கப்பட்டுள்ளதால்  இந்த பகுதி மிக வேகமாக வளர்ந்து வரும் நிலையில் அதற்கேற்ப சாலையின் இருபுறங்களிலும் ஆக்கிரமிப்பும் அதிகரித்து வருகிறது. இதன் காரணமாக போக்குவரத்து நெரிசல் ஏற்படுவது மட்டுமின்றி சில நேரங்களில் விபத்துகளும் ஏற்படுகின்றன. எனவே ஆக்கிரமிப்புகளை அகற்றக்கோரி பொதுமக்கள் மற்றும் சேவை சங்கத்தினர் உட்பட பலரும் பல்வேறு கோரிக்கை மனுக்களை அளித்துள்ள நிலையில் ஆக்கிரமிப்புகளை அகற்றுமாறு கலெக்டர் ஆனந்த் நெடுஞ்சாலை துறையினருக்கு உத்தரவிட்டார். இதனையடுத்து நெடுஞ்சாலைத்துறை கோட்ட பொறியாளர் சிவக்குமார், உதவி பொறியாளர் சந்திரசேகரன் மற்றும் இளநிலை பொறியாளர் குமாரசெல்வன் ஆகியோர் தலைமையில் நேற்று நெடுஞ்சாலை துறை ஊழியர்கள் ஜேசிபி இயந்திரம் கொண்டு இந்த பகுதியில் உள்ள தேசிய நெடுஞ்சாலையான தஞ்சை சாலை மற்றும் மாநில நெடுஞ்சாலையான மன்னார்குடி சாலை ஆகியவற்றில் உள்ள ஆக்கிரமிப்புகளை  அகற்றினர்.

முத்துப்பேட்டை அருகே சாவிலும் இணைபிரியாத தம்பதி கணவன் இறந்த துக்கம் தாளாமல் மனைவியும் மயங்கி விழுந்து சாவு

முத்துப்பேட்டை, மே 17:  முத்துப்பேட்டை அடுத்த ஆலங்காடு அய்ரக்கண்ணி பகுதியை சேர்ந்தவர் சுப்பிரமணியன்(74). ஒன்றிய அலுவலகத்தில் உதவியாளராக  பணியாற்றி ஓய்வு பெற்றவர். இவரது மனைவி ராஜேஸ்வரி(65). இவர்களுக்கு கிருஷ்ணமூர்த்தி, சந்திரா, புனிதா, நாராயணசாமி, சந்திரசேகரன் ஆகிய ஐந்து  மகன், மகள்கள் உள்ளனர். அனைவருக்கும் திருமணமாகி விட்டது. சுப்பிரமணியன், ராஜேஸ்வரி ஆகியோர் ஆரம்பத்திலிருந்தே இணைபிரியாத தம்பதிகளாக வாழ்ந்து வந்துள்ளனர். உறவினர் வீடு, நல்லது கேட்டது விசேஷங்களுக்கு எங்கு சென்றாலும் ஜோடியாக இணைபிரியாமல் சென்று வந்துள்ளனர். இந்நிலையில் சமீபகாலமாக வயது முதிர்வு காரணமாக  உடல்நிலை பாதிக்கப்பட்டிருந்த சுப்பிரமணியன் மருத்துவ சிகிச்சை பெற்று வந்தார். இருந்தும் சிகிச்சை பலனின்றி நேற்று காலை அவர் இறந்தார்.இதனையடுத்து அவரது வீட்டில் உறவினர்கள் திரண்டு பரபரப்பாக இருந்த நிலையில் கணவர் சுப்பிரமணியன் இறந்ததை அறிந்து மனைவி ராஜேஸ்வரி மயங்கி விழுந்தார். உறவினர்கள் அவரை முத்துப்பேட்டை மருத்துவமனைக்கு கொண்டு சென்றனர். ஆனால் வழியிலேயே அவரும் இறந்து விட்டதாக டாக்டர்கள் தெரிவித்துள்ளனர். இதனால் அதிர்ச்சியடைந்த உறவினர்கள் ராஜேஸ்வரி உடலையும் வீட்டுக்கு கொண்டு வந்து கணவன், மனைவி இருவரது உடல்களையும் அருகருகே வைத்து அஞ்சலி செலுத்தினர். இந்நிலையில் சாவிலும் இணை பிரியாமல் கணவன், மனைவி இருவரும் அடுத்தடுத்து இறந்த சம்பவம் ஆலங்காடு கிராமத்தில் சோகத்தை ஏற்படுத்தியுள்ளது.

மன்னார்குடி சட்டமன்ற தொகுதியில் இருந்து சென்று வாக்கு எண்ணும் அலுவலர்களுக்கு பயிற்சி வகுப்பு

மன்னார்குடி, மே 17: தஞ்சை மக்களவை தொகுதிக்கு கடந்த மாதம் தேர்தல் நடைபெற்றது. தேர்தலின் போது பதிவான வாக்குகள் அடங்கிய மின்னணு இயந்திரங்கள், யாருக்கு வாக்களித்தோம் என்பதை அறிந்து கொள்ள இந்த தேர்தலில் புதிதாக அறிமுகப்டுத்தப்பட்ட விவி  பேட் இயந்திரங்கள் 3 அடுக்கு பாதுகாப்புக்கிடையில் தஞ்சாவூர் குந்தவை நாச்சியார் பெண்கள் கல்லூரியில் வைக்கப்பட்டுள்ளது.  வரும் 23ம் தேதி வாக்கு எண்ணிக்கை நடை பெற உள்ளது. இந்நிலையில்  தஞ்சை எம்பி தொகுதிக்குப்பட்ட  மன்னார்குடி சட்டமன்ற தொகுதியில் இருந்து வாக்கு எண்ணிக்கை பணிகளுக்கு  வருவாய்த்துறை, பொதுப்பணித்துறை, கல்வித்துறை, நெடுஞ்சாலை துறைகளை சேர்ந்த  18 வாக்கு எண்ணிக்கை அலுவலர்கள், 18 உதவி அலுவலர்கள், 14 மைக்ரோ அப்சர்வர்கள் ஆகிய 52 பேரை மன்னார்குடி சட்டமன்ற தொகுதி தேர்தல் நடத்தும் உதவி அலுவலரும், வருவாய் கோட்டாட்சியருமான புண்ணிய கோட்டி நியமனம் செய்துள்ளார்.  இந்நிலையில் வாக்கு எண்ணிக்கைக்கு செல்லும் அலுவலர்களுக்கு மன்னார்குடி வருவாய் கோட்டாட்சியர் அலுவலகத்தில் பயிற்சி வகுப்பு நடைபெற்றது. வகுப்பிற்கு தேர்தல் நடத்தும் உதவி அலுவலர் புண்ணிய கோட்டி தலைமை வகித்தார். இதில் சமூகநலத்துறை தனி வட்டாட்சியர் அன்பழகன், வட்டாட்சியர்கள் மன்னார்குடி  லெட்சுமி பிரபா, நீடாமங்கலம் ஷீலா, கூத்தாநல்லூர் மகேஷ்,  தேர்தல் பிரிவு துணை வட்டாட்சியர்கள் இளங்கோவன், ஜெகதீசன் பங்கேற்று பயிற்சியளித்தனர்.இப்பயிற்சியில் பங்கு பெற்றவர்களுக்கு மின்னணு வாக்கு பதிவு இயந்திரத்தில் வாக்கு எண்ணிக்கை தொடர்பான வழிமுறைகள் மற்றும் விவி  பேட் இயந்திரத்தில் பதிவான ஒப்புகை சீட்டுகளை எண்ணும் முறை மற்றும் அஞ்சல் வாக்கு எண்ணிக்கை தொடர்பான பயிற்சிகள் அளிக்கப்பட்டன. மேலும் தபால் ஓட்டுக்களை மின்னணு முறையில் மாற்றுவதற்கான ஏற்பாட்டு முறை தொடர்பான வழிமுறைகளிலும் பயிற்சி அளிக்கப்பட்டது.

பால் உற்பத்தியாளர் சங்க கூட்டம்

நீடாமங்கலம், மே 17: நீடாமங்கலத்தில் பால் உற்பத்தியாளர் சங்க மாவட்டக்குழு கூட்டம் அதன் மாவட்ட தலைவர் துரைச்சாமி தலைமையில் நடந்தது. மாவட்ட செயலாளர் ரெத்தினம் வேலை அறிக்கையை வாசித்தார். மாவட்டபொருளாளர் ரெகுபதி நிதி அறிக்கையை வாசித்தார். கூட்டத்தில் மாவட்ட விவசாய சங்க செயலாளர் கலியபெருமாள், மார்க்சிஸ்ட் கம்யூனிஸ்ட் கட்சியின் நீடாமங்கலம் ஒன்றிய செயலாளர் ராஜமாணிக்கம் கலந்து கொண்டனர். மன்னார்குடி அருகில் உள்ள திருமக்கோட்டையில் ஜூன் முதல் வாரம் மாவட்ட மாநாடு நடத்துவது. உள்ளிட்ட பல்வேறு தீர்மானங்கள் நிறைவேற்றப்பட்டது.

கூ.நல்லூர் பகுதியில் அடிக்கடி மின்தடை சீர்செய்ய வேண்டும் மிவா அலுவலகத்தில் மனிதநேய மக்கள் கட்சி கோரிக்கை மனு

கூத்தாநல்லூர், மே 17: கூத்தாநல்லூர் தாலுகாவில் தொடரும் மின்வெட்டை சரிசெய்யக்கோரி மனிதநேய மக்கள் கட்சியின் சார்பில் மின்வாரிய அலுவலகத்தில் கோரிக்கை மனு அளிக்கப்பட்டுள்ளது. கூத்தாநல்லூர் சுற்றுவட்டார பகுதிகளில் கடந்த ஒரு வாரமாக அவ்வப்போது மின் தடை ஏற்பட்டு வருகிறது. இதுகுறித்து வந்த புகார்களை அடுத்து மின்வாரிய அலுவலகத்தை தொடர்பு கொண்டபோது மன்னார்குடியில் இருந்து வரும் 110 கே.வி. மின்மாற்றியில் ஏற்பட்ட அழுத்தத்தின் காரணமாக ஏற்பட்ட வெப்பத்தை குறைக்க வேறுவழிகள் இன்றி மின்சாரம் நிறுத்தப்படுவதாகவும், மின் அழுத்த வெப்பம் குறைந்தவுடன் மின்சார இணைப்பு தரப்படுவதாகவும் காரணம் கூறப்பட்டது. மேலும்  படிப்படியாக இந்த நிலை மாறும் எனவும் கூறப்பட்டது.ஆனால் மின்தடை தொடர்ந்ததோடு,  நாள் ஒன்றுக்கு பலமுறை மின்சாரம் போய்வந்தது.  இதனால் கொளுத்தும் வெயிலில் பொதுமக்களும் குழந்தைகளும் மிகுந்த அவதிக்கு உள்ளாகி வருகின்றனர். மேலும் மின்சாரம் இருக்கும் நேரங்களிலும் குறைந்த அழுத்த மின்சார விநியோகத்தால் பல இடங்களில் ஏசி, பிரிட்ஜ், இன்வெர்ட்டர் உள்ளிட்டவைகள் சரிவர இயங்கவில்லை. இது தொடர்பாக மனித நேய மக்கள் கட்சியின் மாநில விவசாய அணி துணை செயலாளர் ரஹ்மத்துல்லாஹ் கூத்தாநல்லூர் மின்வாரிய அலவலகத்தில் உதவி மின்பொறியாளர் சங்கர் கணேசை சந்தித்து மின்வெட்டை உடனே சரிசெய்து தரும்படியும், பொதக்குடி, சவுக்கத்தலிதெரு மற்றும் அத்திக்கடை சவுக்கத்தலிதெரு காதிரியா தெரு, சுக்காங்கேணி உள்ளிட்டபகுதிகளில் நிலவும் குறைந்த அழுத்த மின்சார விநியோகத்தை சீர்செய்து தரவும் கேட்டு கொண்டு கோரிக்கை மனு அளித்தார். அப்போது மனிதநேய மக்கள் கட்சி நிர்வாகிகள் நைனாஸ் அகமது, முகமது ஜான், நிஜாமுதீன் உள்ளிட்டோர் உடன் இருந்தனர்.

கூத்தாநல்லூர் அய்யம்பேட்டையில் பாலத்தின் கீழ் பள்ளத்தால் வாகன ஓட்டிகள் அவதி

கூத்தாநல்லூர், மே 17: கூத்தாநல்லூர் அருகே அய்யம்பேட்டையில் 45 ஆண்டுகால பாலத்தின் கீழ் திடீர் பள்ளம் ஏற்பட்டுள்ளதால் பொதுமக்களும் விவசாயிகளும் அச்சத்தில் உள்ளனர். பாலத்தை பாதுகாக்கவும் அரசுக்கு பொதுமக்களும் விவசாயிகளும்  கோரிக்கை வைத்துள்ளனர். கூத்தாநல்லூரில் இருந்து வேதபுரம் செல்லும் சாலையில் நாகங்குடியை அடுத்த அய்யம்பேட்டையில் அமைந்துள்ளது அதிவீரராமனாறு. இந்த ஆற்றைக் கடந்து தான் மணக்கரை வழியாக மன்னார்குடி, திருத்துறைப்பூண்டி, வேதபுரம் ஆகிய பகுதிகளுக்கு செல்ல வேண்டும். அதிவீர ராமனாற்றின் குறுக்கே 1974ம் ஆண்டு ஜுன் மாதம் 1ம் தேதி தமிழக அரசின் பொதுப்பணித்துறையால் அப்போதைய சட்டமன்ற உறுப்பினர் ஏ.கே.சுப்பையா  தலைமையில் தமிழக உணவுத்துறை அமைச்சராக இருந்த கு.பாலகிருஷ்ணன் முன்னிலையில் அப்போதைய தமிழக கூட்டுறவுத்துறை அமைச்சராக இருந்த மன்னை நாராயணசாமியால் பாலம் கட்ட அடிக்கல் நாட்டி 2005ல் கட்டி முடிக்கப்பட்டு திறக்கப்பட்டு அதிவீரராமனறு சமநிலை நீர்தேக்க பாலமாக  பயன்பாட்டிற்கு வந்தது. ஏறத்தாழ 45 ஆண்டுகள் பாரம்பரியம் மிக்க இந்த பாலம் 50க்கும் மேற்பட்ட கிராமங்களை இணைப்பதுடன் 5000 ஏக்கர் விவசாய நிலங்களுக்கு நீர் பாசன வசதியை ஏற்படுத்தும் சமநிலை நீர்தேக்க பாலமாகவும் செயல்பட்டு வருகிறது. மேலும் இந்த பாலத்தில் நாள் ஒன்றுக்கு நூற்றுக்கும் மேற்பட்ட இருசக்கர வாகனங்களும், கனரக வாகனங்களும் ஆயிரக்கணக்கான பொதுமக்களும் கடந்து சென்று இதனை பயன்படுத்தி வருகின்றனர். இந்த பாலத்தில்தான் தற்போது பாலத்தின் பேஸ்மென்ட் பகுதியில் திடீர் பள்ளம் ஏற்பட்டுள்ளது.  பாலத்தின் அடியில் ஏற்பட்டுள்ள இந்த பள்ளம் பாலத்தின் மேற்பகுதிக்கு சேதாரத்தை விளைவித்து விடும் என பொதுமக்களும் விவசாயிகளும் அச்சத்தில் உள்ளனர். மேலும்  ஆற்றில் தண்ணீர் வந்துவிட்டால் பள்ளத்தின் வழியாக தண்ணீர் சென்று பாலத்தின் அஸ்திவாரத்திற்கே சேதாரத்தை விளைவிக்கும் எனவும் அச்சம் தெரிவிக்கின்றனர். எனவே வரும் முன் காப்போம் என்பதுபோல அதிவீரராமனாற்று பாலத்தின் அடியில்  ஏற்பட்டுள்ள பள்ளத்தை உடனடியாக சரிசெய்து பாலத்தின் உறுதித்தன்மையை நிலைநாட்டி பொதுமக்களுக்கும், விவசாயிகளுக்கும் ஏற்பட்டுள்ள நியாயமான அச்சத்தை போக்க வேண்டும் என அரசுக்கு விவசாயிகளும் பொதுமக்களும் கோரிக்கை வைத்துள்ளனர்.

முத்துப்பேட்டையில் ஆர்ஐ அலுவலகம் பூட்டியே கிடப்பதால் சான்றிதழ் பெற முடியாமல் மக்கள் அவதி நடவடிக்கை எடுக்க எதிர்பார்ப்பு

முத்துப்பேட்டை, மே 16: முத்துப்பேட்டை ஆர்ஐ அலுவலகம் சரிவர திறக்கப்படாததால் சான்றிதழ் பெற முடியாமல் மக்கள் அவதிக்குள்ளாகியுள்ளனர். திருவாரூர் மாவட்டம், முத்துப்பேட்டை புது காளியமன் கோவில் அருகே ஆர்ஐ அலுவலகம் இயங்கி வந்தது. அந்த கட்டிடம் பழுதடைந்ததால் அருகில் உள்ள தனியார் மருத்துவமனை மாடியில் வாடகை கட்டிடத்தில் இயங்கி வருகிறது. சுமார் பத்து ஆண்டுகளுக்கு மேலாக அதே வாடகை மாடி கட்டிடத்தில்தான் ஆர்ஐ அலுவலகம் செயல்படுகிறது. இதனால் முதியோர்கள் மற்றும் உடல்நிலை பாதிக்கப்பட்டவர்கள் மாடி ஏறுவதில் சிரமப்படும் நிலை இருந்து வருகிறது. இந்நிலையில் ஆர்ஐ அலுவலகத்தை பல மாதங்களாக சரிவர திறப்பதில்லை என்றும், மாதத்தில் பல நாட்கள் முற்றிலும் திறப்பதில்லை என்றும் கூறப்படுகிறது. இதனால் தினந்தோறும் முத்துப்பேட்டை ஆர்ஐ அலுவலகத்தில் சான்றிதழ் வாங்குவதற்காக மக்கள் காத்துகிடக்கின்றனர். நேற்று காலை 9 மணிக்கே ஆர்ஐ அலுவலகம் வந்த மக்கள் அங்கு வருவாய் ஆய்வாளர் இல்லாததால் வழக்கம்போல் அவரை செல்பேசியில் தொடர்பு கொண்டனர். சற்றுநேரத்தில் வந்துவிடுவதாக கூறியவர் மதியம் 1 மணியாகியும் வரவில்லை. கடைசியாகபோன் போட்ட ஒருவரிடம் திருத்துறைப்பூண்டியில் இருக்கேன் வந்துதான் பார்க்கமுடியும் என்று கூறினார்.  இதனால் வேறு வழியின்றி சான்றிதழ்கள் பெறாமல் பலர் ஏமாற்றத்துடன் திரும்பி சென்றனர். இதுகுறித்து சான்றிதழ்பெற வந்தவர்களின் ஜாம்புவானோடை  ஜெயராணி கூறுகையில்: ஓஏபி விண்ணப்பத்தில் கையெழுத்து வாங்க மூன்று நாட்களாக வந்து செல்கிறேன். ஆர்ஐயை பார்க்க முடியவில்லை. தினமும் ஏமாற்றத்துடன் செல்கிறேன். ஆர்ஐயை பார்த்தபிறகும் மறுபடியும் எத்தனைநாள் அலைய போறேன் என்பது தெரியவில்லை என்றார். ஆசாத்நகர் சல்மான்கான் கூறுகையில்: எனக்கு முதல் பட்டதாரி சான்றிதழ் பெற ஒரு வாரமாக வந்து ஆர்ஐயை பார்க்க முடியாததால் ஏமாற்றத்துடன்தான் திரும்பி செல்கிறேன்.போனில் தொடர்புக்கொண்டால் வருவதாக கூறுகிறார். ஆனால் வருவதில்லை என்றார் கவலையுடன். செங்காங்காடு நடராஜன் கூறுகையில்: வாரிசு சான்றிதழ் பெற ஒரு வாரமாக அலைகிறேன் ஆர்ஐயை பார்க்கவே முடியவில்லை. வயதான காலத்தில் அதுவும் தற்பொழுது வெயில் கொளுத்துவதால் வேறு வழியின்றி சுமார் கிலோமீட்டர் தூரத்திலிருந்து தினமும் வந்து அலைகிறேன் என்றார். இதுகுறித்து ஆர்ஐயை தொலைபேசியில் தொடர்புகொண்டு கேட்டபோது, ஒருவரிடம் (திருத்துறைப்பூண்டியில் இருப்பதாக கூறியவர்) அதெல்லாம் இல்லை சார். தினமும் அலுவலகம் திறக்கிறோம். பக்கத்தில் தான் வந்துகிட்டு இருக்கேன். இப்ப வந்துருவேன் சார் என்று கூறி போனை வைத்தார். அடுத்த நிமிடத்தில் அலுவலகம் வந்தார்.  இதுகுறித்து அப்பகுதியை சேர்ந்தவர்கள் கூறுகையில், முத்துப்பேட்டை ஆர்ஐ அலுவலகம் திறப்பதே கிடையாது. ஆர்ஐ என்பதே தெரியாது அவரை பார்த்ததே கிடையாது. இந்த அலுவலகத்தில் உதவியாளர்கள் கூட இருப்பதில்லை. இதனால் தினமும் ஏராளமான மக்கள் ஏமாற்றம் அடைந்து திரும்பி செல்கின்றனர். மாவட்ட கலெக்டர் உரிய விசாரணை செய்து நடவடிக்கை எடுக்க வேண்டும் என்றனர்

விசாக பெருவிழா சத்குணநாத கோயிலில் சுவாமி வீதியுலா

முத்துப்பேட்டை. மே 16: திருவாரூர் மாவட்டம், முத்துப்பேட்டை அடுத்த இடும்பாவனம் கிராமத்தில் உள்ள சத்குணநாத கோயிலில் இந்தாண்டு வைகாசி விசாகப்பெருவிழா கடந்த 9ம்தேதி கொடியேற்றத்துடன் துவங்கியது. விழாவையொட்டி தினமும் பல்வேறு சுவாமி வீதியுலா நடைபெற்று வருகிறது. நேற்றிரவு மங்களநாயகிபுரம் கிராம மக்கள் சார்பில் காலை பஞ்சமூர்த்திகள் திருவீதி உலா, அதனை தொடர்ந்து பல்வேறு பூஜைகள் சிறப்பு நிகழ்ச்சிகள் நடந்தன. இரவு யானை வாகனத்தில் சுவாமி வீதியுலா வெகு சிறப்பாக நடந்தது. வீதியுலா கோவிலிலிருந்து புறப்பட்டு பல்வேறு பகுதிக்கு சென்று வந்தது. இதில் சுற்றுபகுதியை சேர்ந்த ஏராளமான பக்தர்கள் கலந்து கொண்டனர்.

கூத்தாநல்லூர் அருகே சித்தாம்பூர்-வாழச்சேரி சாலை சீரமைப்பு

கூத்தாநல்லூர், மே 16: கூத்தாநல்லூர் அருகே கோறையாற்றிலிருந்து சித்தாம்பூர் வழியாக வாழச்சேரி செல்லும் சாலை தினகரன் செய்தி எதிரொலியால் சீரமைக்கப்பட்டது.   லெட்சுமாங்குடியில் இருந்து மன்னார்குடி செல்லும் சாலையிலிருந்து கோரையாற்று பாலம் அருகே வாழச்சேரி செல்வதற்கு சித்தாம்பூர் வழியாக இணைப்புசாலை உள்ளது. இந்த சாலை சித்தாம்பூர், குடிதாங்கிச்சேரி, அரசூர், வேட்டைத்திடல், கீழ்பாதி, விழங்கோட்டகம், வெள்ளக்குடி, கற்கோவில் ஆகிய கிராமப்பகுதிகளை இணைக்கும் பிரதான சாலையுமாகும்.  சுமார் ஐயாரத்திற்கும் மேற்பட்ட மக்கள் வசிக்கும் இந்த கிரமாங்களில் இருந்து வரும் மக்களுக்கும், வாகனங்களுக்கும்  இந்த சாலை ஒன்றுதான்பிரதான வழியாகும். கடந்த பல ஆண்டுகளாக சித்தாம்பூர் வாழச்சேரி சாலை செப்பனிடப்படாமல் போக்குவரத்துக்கு பயன்படாமல் குண்டும் குழியுமாக காணப்பட்டது. அவசர காலங்களில் ஆம்புலன்ஸ் உள்ளிட்ட வாகனங்கள் செல்லவோ, தீயணைப்பு வாகனங்கள் செல்லவோ மிகுந்த சிரமம் அடையும் நிலையும் தொடர்ந்து வந்தது.  இந்த சாலையை சீரமைத்துதர பொதுமக்கள் அரசுக்கு பல கோரிக்கைகளை வைத்தும் எந்த பலனும் இல்லாத நிலையில் இந்த பகுதி  பொதுமக்களின் வேண்டுகோளை ஏற்று இந்த சாலை குறித்து  தினகரன் நாளிதழில் கடந்த ஏப்ரல் 21ம் தேதி படத்துடன் செய்தி  வெளியிடப்பட்டது.அதனைத் தொடர்ந்து அரசு இந்த சாலையில் சீரமைப்பு பணிகளை தற்போது தொடங்கியுள்ளது. கடந்த சில நாட்களாக இந்த சாலை சீரமைப்புபணிகள் நடைபெற்று வருகின்றன. இதன் காரணமாக தற்போது சாலையில் ஜல்லிகள் கொட்டப்பட்டு  இயந்திரங்களின் உதவியோடு சாலை சீரமைக்கப்படடு வருகிறது. சித்தாம்பூர் வாழச்சேரி சாலை போக்குவரத்துக்கு ஏற்றதாக மாற்மாற்றப்பட்டு வருகிறது. இதனால் செய்தி வெளியிட்ட தினகரனுக்கு பொதுமக்கள் தங்கள் நன்றி தெரிவித்துள்ளனர்.

திருவாரூரில் 7வது நாளாக லாரிகள் வேலை நிறுத்தம் அரவைக்கு நெல்மூட்டைகள் அனுப்பும் பணி பாதிப்பு

திருவாரூர், மே 16: திருவாரூர் மாவட்டத்தில் நேற்று 7வது நாளாக  லாரிகள் வேலை நிறுத்தம் காரணமாக பொது விநியோக திட்டத்தின் அரவைக்காக நெல் மூட்டைகள் எடுத்து செல்லும் பணி பாதிக்கப்பட்டது.  தமிழகத்தில் விவசாயிகள் உற்பத்தி செய்யும் நெல் தமிழ்நாடு நுகர்பொருள் வாணிப கழகம் மூலம் கொள்முதல் செய்யபட்டு வருகிறது. இவ்வாறு கொள்முதல் செய்யப்படும் நெல்கள் அனைத்தும் அந்தந்த மாவட்டத்தில் இயங்கி வரும் பதிவுபெற்ற லாரி உரிமையாளர்கள் சங்கம் மூலம் நுகர்பொருள் வாணிப கழகத்திற்கு சொந்தமான குடோன்கள் மற்றும் அரவைக்காக நவீன அரிசி ஆலைகள் போன்றவற்றிற்கு எடுத்துச் செல்லும் பணி  நடைபெற்று வருகிறது. இதுமட்டுமின்றி  வெளி மாவட்டங்களுக்கு ரயில்கள் மூலம் தினந்தோறும் நெல் மற்றும் அரிசிகளை அனுப்பும் பணியிலும் இந்த லாரிகள் பயன்படுத்தப்பட்டு வருகின்றன. இந்நிலையில் கடந்த சில நாட்களாக நுகர்பொருள் வாணிப கழகத்திலிருந்து  நவீன அரிசி ஆலைகளுக்கு நெல் மூட்டைகளை எடுத்துச் செல்லும் லாரி உரிமையாளர்களுக்கும்,  அரிசி ஆலை உரிமையாளர்களுக்குமிடையே இருந்து வரும் வாடகை பிரச்சனை காரணமாக லாரி உரிமையாளர்கள்  சங்கத்தினர் கடந்த 9ம் தேதி முதல் லாரிகளை இயக்காமல் வேலை நிறுத்த்தில் ஈடுபட்டு வருகின்றனர். நேற்று 7வது நாளாக வேலை நிறுத்தம் காரணமாக லாரிகள் இயங்காததால் மாவட்டத்தில் உள்ள நவீன அரிசி ஆலைகளுக்கு  நுகர்பொருள் வாணிப கழகத்தின் மூலம் அரவைக்காக நெல் மூட்டைகள் எடுத்து செல்லும் பணி பாதிக்கப்பட்டது. இதனையடுத்து அரிசி ஆலை உரிமையாளர்கள் தங்களிடம் உள்ள லாரிகள் மூலம் நெல் மூட்டைகளை எடுத்து செல்லும் பணியில் ஈடுபட்டனர்.

முத்துப்பேட்டை அடுத்த பேட்டை புனித செபஸ்தியார் ஆலய தேர்பவனி ஏராளமானோர் பங்கேற்பு

முத்துப்பேட்டை, மே 16: திருவாரூர் மாவட்டம், முத்துப்பேட்டை அடுத்த பேட்டை கிராமத்தில் உள்ள புகழ்பெற்ற புனித செபஸ்தியார் ஆலயத்தின் 12ம் ஆண்டுதேர் திருவிழா கடந்த சில தினங்களுக்கு முன் பட்டுக்கோட்டை பங்குத்தந்தை ஜோசப் செல்வராஜ் அடிகளார் தலைமையில் கொடி ஏற்றத்துடன் துவங்கியது. இந்தநிலையில் தேர் பவனி வரும் நிகழ்ச்சி நேற்றுமுன்தினம் இரவு மிக சிறப்பாக நடைபெற்றது. முன்னதாக பட்டுக்கோட்டை உதவி பங்குத்தந்தை சார்லஸ் அடிகளார் பாடல் திருப்பலியை தொடர்ந்து பலவண்ண வாண வேடிக்கைகளுடன் பேட்டை செபஸ்தியார் ஆலயத்திலிருந்து தேர் ஊர்வலம் புறப்பட்டது. இதில் தெற்குத்தெரு, பேட்டைசாலை, பெரிய கடைத்தெரு, பங்களாவாசல், பழைய பஸ் ஸ்டாண்ட், மன்னார்குடி சாலை பகுதியில் சென்று விட்டு மீண்டும் அதே பகுதி வழியாக பேட்டை சென்று பல முக்கிய வீதிகளில் ஊர்வலமாக சென்றது. பின்னர் தேர் ஊர்வலம் நள்ளிரவு செபஸ்தியார் ஆலயம் வந்தடைந்தது. வழியெங்கும் பல்வேறு மதத்தினர் வரவேற்று வழிபாடு நடத்தினர். இதில் பங்குத்தந்தை ஜோசப் செல்வராஜ், உதவி பங்குத்தந்தை சார்லஸ்  அடிகளார், புனித செபஸ்தியார் ஆலயத்தின் தலைவர் காஸ்டா, துணைத்தலைவர் சூசைசைமாணிக்கம், செயலாளர் அமல்தாஸ், பொருளாளர் அமலதாஸ் துணைச் செயலாளர் தாவீது ராஜா மற்றும் ஜெயராஜ், சகாயராஜ், டேவிட்ராஜ் உள்பட ஏராளமான பக்தர்கள் கலந்துகொண்டனர்.இந்நிலையில் தேர் திருவிழாவின் இறுதி நாளான நேற்று மாலை புனிதக்கொடி இறக்கும் நிகழ்ச்சி சிறப்பாக நடைபெற்றது. இதில் ஏராளமான பக்தர்கள் கலந்து கொண்டனர். திருத்துறைப்பூண்டி : திருத்துறைப்பூண்டி அருகே உள்ள காடுவாகொத்தமங்கலம் புனித செபஸ்தியார் ஆலய 55ம் ஆண்டு திருவிழா கடந்த மாதம் 6ம் தேதி கொடியேற்றத்துடன் தொடங்கியது. தொடர்ந்து நவநாள் ஜெபம் நடைபெற்றது. நேற்றுமுன்தினம் இரவு திருவிழாவில் பங்குதந்தை ஜான்பிரிட்டோ திருப்பலியும், தொடர்ந்து 5 திருத்தேர் பவனியும் நடைபெற்றது. இதில் பள்ளங்கோவில்  ஜான்பிரிட்டோ உயர்நிலைப்பள்ளி நிர்வாகி ஜான்பிட்டர், உதவி பங்குதந்தைகள் அலெக்சாண்டர், ஜான் ஆரோக், மற்றும் கிராம மக்கள், மாதர் சங்கம், இளைஞர் பெருமன்றம், மாணவர் பெருமன்றம் நிர்வாகிகள் உள்ளிட்டோர் கலந்து கொண்டனர்.

கொளுத்தும் அக்னி நட்சத்திரம் முத்துப்பேட்டையில் குடிநீருக்காக திண்டாடும் மக்கள் ஆங்காங்கே குடிநீர் டேங்க் அமைக்க கோரிக்கை

முத்துப்பேட்டை, மே 16: திருவாரூர் மாவட்டம்,  முத்துப்பேட்டையை ஆட்டி படைக்கும் அக்னி நட்சத்திரம் வெயிலால் மக்கள் குடிநீருக்காக திண்டாடுகின்றனர் அதனால் ஆங்காங்கே மக்கள் கூடும் இடத்தில்  குடிநீர் டேங் வைக்க வர்த்தகக்கழகம் கோரிக்கை விடுத்துள்ளது.  தமிழகத்தில் வெப்ப சலனம் காரணமாக 108 டிகிரி வரை வெயில் கொளுத்தி வருகிறது. இதில் இந்தாண்டு பருவமழை பெய்யாததற்கு காரணம் அதிகளவில் மரங்கள் வெட்டப்பட்டதுதான் முக்கிய காரணம் என்று ஆய்வில் கண்டு பிடிக்கப்பட்டுள்ளது. இதில் அக்னி நட்சத்திரதிரம் என்னும் கத்திரி வெயில் கடந்த 4ம்தேதி தொடங்கி 11நாட்கள் ஆகியுள்ளது. 19 நாட்கள் அக்னி நட்சத்திரம் நீடிக்கும் என்று கூறப்படுகிறது.இதனால் திருவாரூர் மாவட்டத்தில் 107 டிகிரி முதல் 108 டிகிரி வரை வெயில் கொளுத்தி வருகிறது. இதில் குறிப்பாக கஜா புயலால் பாதிக்கப்பட்ட முத்துப்பேட்டை பகுதியில் 80 சதவித மரங்கள் அடியோடு சாய்ந்து இல்லாததால் இந்தாண்டு இப்பகுதியில் பருவமழை இல்லை. இதனால் மேலும் இப்பகுதியில் கடும் வெப்பம் அதிகரித்துள்ளது. இதனால் குடிநீர் தட்டுப்பாடு ஏற்பட்டுள்ளது. இந்த நிலையில் முத்துப்பேட்டை பகுதியில் வருடந்தோறும் இதுபோன்று கோடை நேரத்தில் அரசியல் கட்சியினர் ஆங்காங்கே தண்ணீர் பந்தல் அமைப்பது வழக்கம். ஆனால் இந்தாண்டு தேர்தல் விதிமுறை அமலுக்கு வந்ததால் இந்த தண்ணீர் பந்தல்கள் இல்லை. அதனால் சுற்றுப் பகுதியிலிருந்து முத்துப்பேட்டைக்கு வரும் மக்கள் வெயிலின் தாக்கத்தை தணிக்க குடிநீர் கிடைக்காமல் பெரிதும் தவித்து வருகின்றனர்.  தற்பொழுது பிளாஸ்டிக் ஒழிப்பால் பாக்கெட் தண்ணீருக்கு வேலை இல்லாததால் பாட்டில் தண்ணீரை வாங்கி குடிக்க வசதி இல்லாமல் ஏழை எளிய மக்கள் முக்கியமாக குடிநீர் கிடைக்காமல் அவதிப் பட்டு வருகின்றனர். இதனால் அரசு சார்பில் முத்துப்பேட்டையில் பல்வேறு இடங்களில் மக்களின் வசதிக்கு குடிநீர் பந்தல் அமைத்து தரவேண்டும் என்று கோரிக்கை விடுக்கப்பட்டு வருகிறது.இந்தநிலையில் நேற்று முத்துப்பேட்டை வர்த்தகக் கழகம் சார்பில் அதன் தலைவர் மெட்ரோ மாலிக் தலைமையில் நிர்வாகிகள் அசோகன், விவேக், நவாஸ்கான், தியாகு, பெரியக்கடை தெரு வர்த்தகக் கழக பொருளாளர் வெற்றி உட்பட நிர்வாகிகள் திரண்டு  முத்துப்பேட்டை பேரூராட்சியில் மனு ஒன்று கொடுத்தனர். அதில் கூறியிருப்பதாவது: முத்துப்பேட்டை பகுதியில் கடுமையான வெப்பம் காரணமாக குடிநீர் தட்டுப்பாடு ஏற்ப்பட்டுள்ளதுடன் கடைதெருவுக்கு வரும் மக்கள் தங்களது தாகத்தை தீர்க்க குடிநீர் கிடைக்காமல் மிகவும் அவதிக்குள்ளாகியுள்ளனர். அதனால் முத்துப்பேட்டை புதிய பழைய பேருந்து நிலையங்கள், ஆசாத்நகர், காணா ஓட்டல் அருகில், பேரூராட்சி எதிர்புறம், பங்களா வாசல், அரசு மருத்துவமனை வாசல் ஆகிய பகுதியில் குடிநீர் டேங் அமைத்து தண்ணீர் பந்தல் ஏற்பாடு செய்து தர வேண்டும். மனுவை பெற்றுக்கொண்ட பேரூராட்சி இரண்டாம் நிலை அலுவலர் செல்வகுமார், “ இன்னும் இரண்டு நாளில் அப்பகுதிகளில் குடிநீர் வசதி ஏற்படுத்தி தரப்படும் என்றார்.

லெட்சுமாங்குடி கடைவீதியில் சரக்கு வாகனங்களால் போக்குவரத்து நெரிசல்

கூத்தாநல்லூர், மே 16: லெட்சுமாங்குடி கடைவீதியில் பகல் நேரங்களில் சரக்கு வாகனங்களை சாலையில் நிறுத்தி பொருட்களை இறக்குவதால் போக்குவரத்து நெரிசல் ஏற்படுகிறது. இதைத்தடுக்க சரக்கு இறக்கும் வாகனங்களை நெறிப்படுத்த வேண்டும், வியாபாரிகளும், பொதுமக்களும் போக்குவரத்து காவல்துறையினருக்கு கோரிக்கை விடுத்துள்ளனர்.  திருவாரூர் மாவட்டத்தில் அதிகமான நெரிசல் உள்ள கடைவீதிகளில் முக்கிய இடம் பிடித்திருப்பது லெட்சுமாங்குடி திருவாரூர் சாலையாகும். இங்கு காலை 8 மணிக்கு பிறகும்  இரவு 8.00 மணிவரையிலும் போக்குவரத்து மிகுந்து காணப்படுகிறது. இதனால் பலநிமிட நேரங்கள் வாகனங்கள் காத்திருந்து போக்குவரத்து நெரிசல் ஏற்படுத்துவதுடன் வாகனங்கள் ஊர்ந்து செல்லவேண்டிய நிலை எற்படுகிறது.  இந்த நிலையை மாற்ற ஏற்கனவே ஏ.ஆர். சாலையில் வாகனங்கள் அனுமதிக்கப்பட்டு ஒருவழிப் பாதையாக செயல்பட்டு வந்தது. பின்னர் அதுவும் நிறுத்தப்பட்ட நிலையில் தற்போது திருவாரூர் சாலையில் இரண்டு வழியிலும் போகும் வாகனங்களும் அனுமதிக்கப்பட்டு வருகின்றன. மேலும் இந்த சாலை மிகவும் குறுகியதாகவும், வியாபார நிறுவனங்கள் நிறைந்தும் காணப்படுகிறது. அதனால் இந்த சாலையில் போக்குவரத்து நெரிசல் அடிக்கடி ஏற்படுகிறது. இந்தநிலையில் வியபார நிறுவனங்களுக்கு சரக்குகளை இறக்க வரும் வாகனங்கள் கடைகளுக்கு முன்னால் வாகனத்தை நிறுத்தி சரக்குகளை இறக்குவதால் மேலும் போக்குவரத்து தடை ஏற்பட்டு வாகன நெரிசல் ஏற்படுகிறது. எனவே காலை 8 மணிக்கு மேல் கடைகளுக்கு சரக்குகளை இறக்கும் வாகனங்களை தடைசெய்து அதற்கு முன்னரே சரக்குகளை இறக்க அனுமதிக்கவேண்டும். இல்லை என்றால் இரவு 8 மணிக்கு பிறகு கடைகளுக்கு சரக்கு இறக்கும் வாகனங்களை அனுமதிக்க போக்குவரத்து காவலர்கள் ஒழுங்குபடுத்தவேண்டும் என வாகன ஓட்டிகளும், பொதுமக்களும்  போக்குவரத்து காவல்துறையினருக்கு கோரிக்கை வைத்துள்ளனர்.