Thiruvarur - Dinakaran

சீரமைப்பு பணியின்போது தரமற்ற மின்கம்பம் முறிந்து விழுந்ததில் தொழிலாளி சீரியஸ்

மன்னார்குடி, டிச.19: சீரமைப்பு பணியின்போது தரமற்ற மின்கம்பம் முறிந்து விழுந்ததில் படுகாயமடைந்த தொழிலாளி தீவிர சிகிச்சை பிரிவில் அனுமதிக்கப்பட்டுள்ளார்.திருவாருர் மாவட்டம் மன்னார்குடி அடுத்த திருமக்கோட்டை மேலத் தெருவை சேர்ந்தவர் அமல்ராஜ் (50). எலக்ட்ரீசியன். இவர் கடந்த 25 நாட்களாக தமிழ்நாடு மின் வாரியம் உள்ளிக்கோட்டை பிரிவில் கஜா புயலின் காரணமாக சேதமடைந்த மின் கம்பங்களை சீரமைக்கும் பணியில் ஒப்பந்த தொழிலாளியாக வேலை பார்த்து வந்தார். இவர் வடுவூர் காவல் சரகத்திற்குட்பட்ட முக்குளம் சாத்தனூர் கிராமத்தில்  மின் கம்பங்கள் சீரமைக்கும் பணியில் ஈடுப்பட்டு வந்தார்.இந்நிலையில்  நேற்று மதியம் அதே கிராமத்தில் உள்ள ஒருவரின் வயலில் விழுந்து கிடந்த மின் கம்பங்களை அகற்றி விட்டு புதிதாக கம்பங்கள் நடும் பணியில் தொழிலாளர்கள் ஈடுபட்டனர். அப்போது புதிதாக நடப்பட்ட மின் கம்பத்தில் அமல்ராஜ் கம்பிகளை இணைத்துக் கொண்டிருந்தார். அப்போது எதிர்பாராத நிலையில் புதிதாய் நடப்பட்ட மின்கம்பம் அடியோடு முறிந்து விழுந்ததில் அமல்ராஜ் பலத்த காயமடைந்தார். சக தொழிலாளர்கள் மற்றும் கிராமமக்கள் அமல்ராஜை மன்னார்குடி மாவட்ட அரசு தலைமை மருத்துவமனைக்கு கொண்டு சென்றனர். பின்னர்  உயிருக்கு ஆபத்தான நிலையில் தஞ்சை அரசு மருத்து வக்கல்லூரி மருத்துவமனைக்கு அனுப்பிவைக்கப்பட்டார். இதுகுறித்து வடுவூர் போலீசார் விசாரணை மேற் கொண்டு வருகின்றனர்.

மன்னார்குடி ராஜகோபால சுவாமி கோயிலில் சொர்க்கவாசல் திறப்பு

மன்னார்குடி, டிச.19: தமிழகத்தில் உள்ள மிகவும் புகழ் பெற்ற வைணவ ஆலயங்களில் மன்னார் குடி ராஜகோபால சுவாமி கோயில் பிரசித்தி பெற்ற தலமாகும். இங்கு   வைகுண்ட ஏகாதசி திருவிழா பகல் பத்து, ராப்பத்துடன் துவங்கி கடந்த 10 தினங்களாக விழா நடை பெற்று வந்தது. முக்கிய நிகழ்ச் சியான பரமபத வாசல் திறப்பு நிகழ்ச்சி நேற்று அதிகாலை காலை 4.30  மணியளவில் நடை பெற்றது. அதனையொட்டி ராஜகோபால சுவாமிக்கு மன்னர் விஜயராகவ நாயக்கர் பெருமாளுக்கு வழங்கிய வைர ஆபரணங்கள் மற்றும் மாராட்டிய அரசர்கள் குறிப்பாக சரபோஜி ராஜா பெருமாளுக்கு வழங்கிய ரத்தினங்கள் பதித்த ஆபர ணங்கள், சோழர் காலத்தில் ராஜாதி ராஜன் என்கிற சோழ மன்னர் வழங்கிய தங்க கல் பதித்த ஆபரணங்களுடன் சத்தியபாமா சமேதராக ராஜ கோபால சுவாமி பரமபத வாசல் முன் எழுந்தருளினார். தொடர்ந்து நந்தவனத்தில் அமைக்கப்பட்டுள்ள சொர்க்க வாசலில் 5 மணிக்கு எழுந்தருளிய பெருமாள்  பக்தர்களுக்கு சேவை சாதித்தார். பல்லாயிரக்கணக்கான மக்கள் பங்கேற்று சுவாமி தரிசனம் செய்தனர்.இதேபோல திருத்துறைப்பூண்டி அடுத்த ஆதிரெங்கம் ரெங்கநாத பெருமாள் கோயிலில் வைகுண்ட ஏகாதசி விழாவையொட்டி சொர்க்கவாசல் திறப்பு நேற்று காலை 5.30 மணியளவில் நடந்தது. பூமிதேவி, ஸ்ரீதேவிசமேதராய் ரெங்கநாதப் பெருமாள் எழுந்தருளி சொர்க்கவாசல் திறந்து பக்தர்களுக்கு காட்சி கொடுத்தார்.  திருவாரூர்:   திருவாரூர் பகுதிகளில் உள்ள பெருமாள் கோயில்களில் நடைபெற்ற சொர்க்கவாசல் திறப்பு நிகழ்ச்சியில் ஆயிரக்கணக்கான பக்தர்கள் கலந்து கொண்டு பெருமாளை தரிசனம் செய்தனர். வைகுண்ட ஏகாதசியையொட்டி நேற்று அதிகாலையில் பெருமாள் கோயில்களில் சொர்க்கவாசல் திறக்கும் நிகழ்ச்சி நடைபெற்றது. அதன்படி திருவாரூர் அருகே திருக்கண்ணமங்கையில் இருந்து வரும் பக்தவத்சல பெருமாள் கோயில், புலிவலத்தில் இருந்து வரும் வெங்கடாஜலபதி பெருமாள் கோயில் உட்பட பல்வேறு கோயில்களில் நேற்று அதிகாலையில் சொர்க்கவாசல் திறக்கும் நிகழ்ச்சி நடைபெற்றது. இதில் ஆயிரக்கணக்கான பக்தர்கள் கலந்து கொண்டு பெருமாளை தரிசனம்  செய்தனர்.

கஜா புயலால் பாதித்தோருக்கு உரிய நிவாரணம் வழங்க கோரி 164 இடங்களில் உண்ணாவிரதம்

திருவாரூர், டிச.19:  கஜா புயல் கோரத்தால் பாதிக்கப்பட்டுள்ள  நாகை, திருவாரூர், தஞ்சை மற்றும் புதுகோட்டை மாவட்டங்களை  பேரிடர் பாதித்த மாவட்டம் என அறிவித்து அரசிதழில் வெளியிட வேண்டும், தமிழக அரசு கேட்ட நிவாரணத் தொகை ரூ 15 ஆயிரம் கோடியினை மத்திய அரசு உடன் வழங்கிட வேண்டும். பாதிக்கப்பட்ட குடிசை வீடுகள், ஓட்டு வீடுகள், தொகுப்பு வீடுகள், சேதம் அடைந்த மாடி வீடுகள் என அனைத்திற்கும் உரிய நிவாரணம் வழங்கிட வேண்டும், மேலும் குடிமனைப் பட்டா வழங்கி ஒரு லட்சம் கான்கிரிட் வீடுகள் திட்டத்தை நிறைவேற்றிட வேண்டும், சிறு,குறு விவசாயிகள் என பாகுபாடின்றி அனைத்து பயிர்களுக்கும் நிவாரணம் வழங்க  வேண்டும், பாதிக்கப்பட்டுள்ள நெல்பயிர் ஏக்கருக்கு ரூ 25 ஆயிரமும், தென்னை மரம் ஒன்றுக்கு ரூ 20 ஆயிரமும், வாழை ஏக்கர் ஒன்றுக்கு ரூ ஒரு லட்சமும் வழங்கிட வேண்டும், புளி,மா, எலுமிச்சை, பலா,தேக்கு மற்றும் பாதிக்கப்பட்டுள்ள அனைத்து மரங்களுக்கும், இறந்துள்ள உயர்ரக கலப்பின மீன்களுக்கும் உரிய இழப்பீடு வழங்கிட வேண்டும், விடுபட்டுள்ள மனித உயிரிழப்புகள், ஆடு, மாடுகள் இறப்பிற்கும் உரிய  நிவாரணம் வழங்கிட வேண்டும், மகளிர் குழு கடன்,கல்விக் கடன்கள் தள்ளுபடி செய்திட வேண்டும் என்ற கோரிக்கைகளை  வலியுறுத்தி இந்திய கம்யூனிஸ்ட் கட்சி சார்பில் நேற்று இந்த 4 மாவட்டங்களிலும் உண்ணாவிரத போராட்டம் நடைபெற்றது. அதன்படி திருவாரூரில் ரயில் நிலையம் முன்பாக கட்சியின் மாநில குழு உறுப்பினர் மாசிலாமணி தலைமையில் நடைபெற்ற போராட்டத்தினை மாநில செயலாளர் முத்தரசன் துவக்கி வைத்து பேசினார். மேலும் மன்னார்குடியில் மாவட்ட செயலாளர் சிவபுண்ணியம் தலைமையிலும், திருத்துறைபூண்டியில் முன்னாள் எம்.எல்.ஏ உலகநாதன் மற்றும் மாவட்ட நிர்வாக குழு உறுப்பினர் சந்திரராமன் ஆகியோர்  தலைமையிலும், முத்துப்பேட்டையில் பேரூராட்சி அலுவலகம் முன்பாக நகர செயலாளர் மார்க்ஸ், உதயமார்த்தாண்டபுரத்தில் ஒன்றிய செயலாளர் முருகையன் தலைமையிலும், நீடாமங்கலத்தில் மாவட்ட குழு உறுப்பினர் ஞானமோகன், ஒன்றிய செயலாளர் தமிழார்வன் தலைமையிலும்வலங்கைமான் தாலுக்காவில் கொட்டையூரில் விவசாய சங்க ஒன்றிய செயலாளர் நாகராஜன் தலைமையிலும், ஆலங்குடியில் விவசாய சங்க ஒன்றிய செயலாளர்கலியபெருமாள் தலைமையிலும், விவசாய சங்க மாவட்ட தலைவர் ரெங்கராஜன் தலைமையிலும் ஒன்றிய துணை செயலாளார் செந்தில் குமார் உள்ளிட்ட 300 க்கும் மேற்பட்ட  இந்திய கம்யூனிஸ்ட் கட்சியினர் உண்ணாவிரதத்தில் ஈடுபட்டனர். திருவாரூர் மாவட்டம் முழுவதும் மொத்தம் 164 இடங்களில் இந்த உண்ணாவிரத போராட்டம் நடைபெற்றது. பிச்சை எடுத்து போராட்டம்மன்னார்குடி ஒன்றிய இந்திய கம்யூனிஸ்ட் கட்சி சார்பில் சவளக்காரன் உள் ளிட்ட 25 கிராமங்களில்  உண்ணாவிரத போராட்டம் நடைபெற்றது. சவளக் காரன் கிளையின் சார்பில் நடைபெற்ற போராட்டத்தை மாநில நிர்வாகக்குழு உறுப்பினர் வை. செல்வராஜ் துவக்கி வைத்தார். ஒன்றிய செயலாளர் வீர மணி தலைமை வகித்தார். கோரிக்கைகளை விளக்கி மாவட்டக்குழு உறுப் பினர் நாகேஷ், இளைஞர் மன்ற ஒன்றிய செயலாளர் பாப்பையன் உள்ளிட் டோர் பேசினர். போராட்டத்தின் போது அக்கட்சியினர் தட்டேந்தி பிச்சை எடுத்து நூதன முறையில் போராட்டத்தில் ஈடுபட்டனர்.

ஏராளமானோர் திரண்டனர் மன்னார்குடி நகராட்சி அலுவலகத்தில் பிளாஸ்டிக் ஒழிப்பு விழிப்புணர்வு கூட்டம்

மன்னார்குடி, டிச.19: பிளாஸ்டிக் ஒழிப்பு குறித்து தமிழக அரசு பிறப்பித்துள்ள உத்தரவினை மன் னார்குடி நகராட்சி பகுதியில் அமல் படுத்தும் பொருட்டு  இரண்டாம் கட்ட விழிப்புணர்வு கூட்டம் நகராட்சி அலுவலகத்தில் நடைபெற்றது. நிகழ்ச்சிக்கு மாவட்ட சுற்றுச்சுழல் பொறியாளர் ராமசுப்பு தலைமை வகித்து பேசுகையில், ஜனவரி 2019 முதல் மக்கள் அன்றாடம் பயன்படுத்தப்படும் பிளாஸ்ட் பயன்பாடு தடை செய்யப்படுகிறது.  இதற்கு மாற்று பொருளாக துணி பை, பேப்பர் பை, சணல் பை, பேப்பர் டம்ளர், பேப்பர் மேஜை விரிப்புகள், வாழை இலை, பாக்கு இலைகளை பயன்படுத்தலாம் என கூறினார். மன்னார்குடி நகராட்சி நகர்நல  அலுவலர் டாக்டர் சந்திரசேகரன் பேசினார். நிகழ்ச்சியில் நகராட்சி மேலாளர் லட்சுமணன், உணவு பாதுகாப்பு அலுவலர் மணாழாகன், வர்த்தகர் சங்க தலைவர் பாரதி ஜீவா, அமைப்பு செயலாளர் எஸ்எம்டி  கருணாநிதி, பொதுச்செயலாளர் ஆனந்த் உள்ளிட்டோர் பங்கேற்று கருத்துக்களை கூறினர். நிகழ்ச்சியை நகராட்சி சுகாதார ஆய்வாளர்கள் ராஜேந்திரன், பிரபாகரன் ஆகியோர் செய்திருந்தனர்.

நிவாரணம் வழங்காத மத்திய மாநில அரசுகளை கண்டித்து திமுக ஆர்ப்பாட்டம்

மன்னார்குடி, டிச.19: கஜா புயல் பாதித்த பகுதிகளுக்கு நிவாரணம் வழங்காத மத்திய மாநில அரசுகளை கண்டித்து மன்னார்குடி சட்டமன்ற தொகுதி திமுக சார்பில் ஆர்டிஓ அலுவலகம் எதிரே ஆர்ப்பாட்டம் நடைபெற்றது. கஜா புயலால் பாதிப்படைந்துள்ள அனைத்து விவசாயிகளின் கடன்களையும் ரத்து செய்ய வேண்டும், பாகுபாடின்றி அனைவருக்கும் நிவாரணம் வழங்க வேண்டும், புயலால் பாதிக்கப்பட்ட அனைத்து வகையான மரங்களுக்கும் இழப்பீடு வழங்க வேண்டும், பயிர் காப்பீடு செய்த அனைவருக்கும் உடனே இழப்பீட்டு தொகையை வழங்க வேண்டும், கருகும் பயிர்களை காக்க போர்க்கால அடிப்படையில் விவசாய மின் மோட்டர்களுக்கு மின் இணைப்பு கொடுக்க வேண்டும்,  கஜா புயல் பாதித்த பகுதிகளுக்கு நிவாரணம் வழங்காத மத்திய மாநில அரசுகளை கண்டித்தும் மன்னார்குடி  தொகுதி திமுக சார்பில் ஆர்டிஓ அலுவலகம் எதிரே கண்டன ஆர்ப்பாட்டம் நடைபெற்றது.மாவட்ட திமுக செயலாளர் பூண்டி கலைவாணன் தலைமை வகித்தார். கோரிக்கைகளை வலியுறுத்தி  மன்னை தொகுதி எம்எல்ஏ டிஆர்பி ராஜா, மாநில தலைமை செயற்குழு உறுப்பினர் தலையா மங்கலம் பாலு,  மாநில வர்த்தகர் சங்க துணைத் தலைவர் பைங்காநாடு ஞானசேகரன் ஆகியோர் பேசினர். முடிவில் நகர செயலாளர் வீரா கணேசன் நன்றி கூறினார்.  திமுக ஒன்றிய செயலாளர்கள் மேலவாசல் தன்ராஜ், தேவதாஸ்,  விசு அண்ணாதுரை, மாயவநாதன், குமரேசன், மாவட்ட துணைச் செயலாளர் கலைவாணி மோகன், மாவட்ட மகளிரணி செயலாளர் ராணி சேகர்  உள்ளிட்ட இரண்டாயிரத்துக்கும் மேற்பட்டோர் பங்கேற்றனர்.

அலுவலக பணிகளுக்கு கணினி வழங்க கோரி கலெக்டர் அலுவலகம் எதிரில் விஏஓ சங்கத்தினர் ஆர்ப்பாட்டம்

திருவாரூர், டிச.19:  அலுவலக பணிகளுக்கு அரசின் சார்பில் கணினி வழங்க கோரி திருவாரூரில் நேற்று வி.ஏ.ஓ சங்கத்தினர் கலெக்டர் அலுவலகம் எதிரே ஆர்ப்பாட்டத்தில் ஈடுபட்டனர். வருவாய் துறை தொடர்பான சான்றுகளை கணினி மூலம் வழங்குவதற்காக தமிழக அரசு மூலம் விஏஓக்களுக்கு லேப்டாப் வழங்கப்பட்டிருந்த நிலையில் இவ்வாறு வழங்கப்பட்ட லேப்டாப் உரிய தரமில்லாததால் அடிக்கடி பழுது ஏற்படுவதாகவும் இதனால் பொது மக்களுக்கு உரிய நேரத்தில் சரிவர சான்றிதழை வழங்க முடியவில்லை எனக்கூறி கடந்த அக்டோபர் மாதம் 31ம் தேதி வி.ஏ.ஓக்கள் தங்களிடம் உள்ள லேப்டாப்புகளை தாலுகா அலுவலகத்தில் ஒப்படைக்கும் போராட்டத்தில் ஈடுபட்டனர். இதுமட்டுமின்றி கூடுதல் பொறுப்பு வகிக்கும் வருவாய் கிராமங்களுக்கான கணக்குகளை ஓப்படைக்கும் போராட்டத்தில் கடந்த மாதம்  8ம் தேதி ஈடுப்பட்ட நிலையில், வி.ஏ.ஒ அலுவலங்களுக்கு தரமான கணினியினை உடனே வழங்க வேண்டும், மின்வசதி, கழிவறை வசதி உட்பட அனைத்து அடிப்படை வசதிகளையும் ஏற்படுத்திதர வேண்டும், கூடுதல் பொறுப்பு வகிக்கும் பணிகளுக்கு உரிய ஊக்க தொகையினை வழங்க வேண்டும் என்பது உட்பட பல்வேறு கோரிக்கைகளை வலியுறுத்தி திருவாரூர் மாவட்டத்தில் கடந்த 10ம் தேதி முதல் வி.ஏ.ஓ சங்கத்தினர் வேலை நிறுத்த போராட்டத்தில் ஈடுபட்டு வருகின்றனர்.இந்நிலையில் கோரிக்கைகளை வலியுறுத்தி திருவாரூரில்  நேற்று முன்தினம்  ஆர்.டி.ஒ அலுவலகம் முன் ஆர்ப்பாட்டத்தில் ஈடுப்பட்ட நிலையில் நேற்று கலெக்டர் அலுவலகம் எதிரே ஆர்ப்பாட்டத்தில்  ஈடுப்பட்டனர். மாவட்ட தலைவர் கதிரேசன் தலைமையில் நடைபெற்ற இந்த ஆர்ப்பாட்டத்தில் மாநில பொது செயலாளர் ராஜ்குமார், மாவட்ட செயலாளர் ராஜகுமார், மாவட்ட துணை தலைவர் மார்ட்டின் உட்பட பலர் கலந்து கொண்டனர்.    

பட்டியலில் இடம்பெறாதவர்களை வாக்காளர் பட்டியலில் சேர்க்க உரிய நடவடிக்கை வேண்டும்

திருவாரூர்,  டிச.19:  திருவாரூர் மாவட்டத்தில் இதுவரையில் வாக்காளர் பட்டியலில் இடம்பெறாத இளம் வாக்காளர்களை பட்டியலில் சேர்ப்பதற்கு உரிய நடவடிக்கை எடுக்க வேண்டும் என மாவட்ட நிர்வாகத்திற்கு வாக்காளர் பட்டியல் பார்வையாளர் வள்ளலார் தெரிவித்துள்ளார். திருவாரூர் மாவட்டத்தில் கடந்த செப்டம்பர் மாதம் 1ம் தேதி முதல் அக்டோபர் மாதம் 31ந் தேதி வரை நடைபெற்ற வாக்காளர் பட்டியல் சிறப்பு திருத்த பணி குறித்து அலுவலர்கள் மற்றும் அரசியல் கட்சியினருடனான ஆலோசனை கூட்டம் கலெக்டர் அலுவலகத்தில் வாக்காளர் பட்டியல் பார்வையாளர் வள்ளலார் தலைமையில் நடைபெற்றது. இதில் கலெக்டர் நிர்மல்ராஜ் மற்றும் அலுவலர்கள் அரசியல் கட்சியினர் கலந்து கொண்டனர். இக்கூட்டத்தில் வாக்காளர் பட்டியல் பார்வையாளர் வள்ளலார் பேசுகையில், மாவட்டத்தில் நடைபெற்ற வாக்காளர் பட்டியல் பெயர் சேர்த்தல், நீக்கல் சிறப்பு திருத்த பணியின்போது மொத்தம் பெறப்பட்ட 43 ஆயிரத்து 50 விண்ணப்பங்களில் 41 ஆயிரத்து 291 விண்ணப்பங்கள் ஏற்றுகொள்ளப்பட்டுள்ளன. இந்த விண்ணப்பங்கள் குறித்து ஆலோசனை மேற்கொள்வதற்காக இக்கூட்டமானது நடைபெறுகிறது. இதில் பெயர் நீக்கல் தொடர்பாக பெறப்பட்ட விண்ணப்பங்களை முறையாக பரிசீலித்து சம்பந்தப்பட்ட கிராமங்களில் உள்ள இறப்பு பதிவேடுகளை ஆய்வு செய்தபின் நீக்கல் தொடர்பான நடவடிக்கையில் ஈடுபட வேண்டும் என்று அலுவலர்களை கேட்டுக்கொள்கிறேன். மேலும் இதுவரையில் வாக்காளர் பட்டியலில் இடம்பெறாமல் இருந்துவரும் கல்லூரி மாணவர்கள் மற்றும் இளம் வாக்காளர்களை கண்டறிந்து அவர்களை பட்டியலில் சேர்ப்பதற்கு மாவட்ட நிர்வாகமும், அலுவலர்களும், தனியார் தொண்டு நிறுவனமும் ஈடுபட வேண்டும். இவ்வாறு வள்ளலார் தெரிவித்துள்ளார்.

வீடு, நிவாரணம் வழங்க வலியுறுத்தி சாலையில் மரங்களை போட்டு நரிக்குறவர்கள் மறியல் போராட்டம்

முத்துப்பேட்டை, டிச.19:  முத்துப்பேட்டை அடுத்த இடும்பாவனத்தில் கஜா புயலால் பாதிக்கப்பட்ட நரிக்குறவர்கள், தங்களுத்து வீடு கட்டித்தரக்கோரி சாலையில் மரங்களை போட்டு மறியலில் ஈடுபட்டதால் பரபரப்பு ஏற்பட்டது. திருவாரூர் மாவட்டம் முத்துப்பேட்டை அடுத்த இடும்பாவனம் கிராமத்தில் சாலையோரத்தில் நூற்றுக்கும் மேற்பட்ட நரிக்குறவர்கள் குடிசை அமைத்து நீண்டகாலமாக வசித்து வருகின்றனர். கடந்த மாதம் வீசிய கஜா புயலால் இந்த குடிசைகள் அனைத்தும் சேதமடைந்தது. இதனால் நரிக்குறவர் குடும்பங்கள் வசிக்க வழியில்லாமல் பரிதவித்து வருகின்றனர். மேலும் அரசின் நிவாரண பொருட்கள் மற்றும் நிவாரண தொகையும் இந்த மக்களுக்கு வழங்கவில்லை. இதனால் ஆத்திரம் அடைந்த நரிக்குறவ குடும்பத்தினர் சுமார் 100பேர் இடும்பாவனம் கீழபெருமழை சாலை அருகே அமர்ந்து மறியலில் ஈடுபட்டனர். மேலும் சாலையில் மரங்களை போட்டும், பழைய பிளக்ஸ் பேனரை கட்டி போக்குவரத்தை தடுத்தும் மறியலில் ஈடுபட்டதால் பரப்பரப்பு ஏற்பட்டது.  தகவல் அறிந்து சம்பவ இடத்திற்கு வந்த முத்துப்பேட்டை இன்ஸ்பெக்டர் ராஜேஷ் மற்றும் வருவாய்த்துறையினர் மறியலில் ஈடுபட்ட நரிக்குறவ மக்களிடம் விரைவில் நிவாரணங்கள் கிடைக்கவும், தங்களது அனைத்து கோரிக்கையும் சம்பந்தப்பட்ட அதிகாரிகள் கவனத்திற்கு எடுத்து செல்லப்படும் என்று உறுதியளித்தனர். இதனையடுத்து சாலை மறியலில் ஈடுபட்டவர்கள் கலைந்து சென்றனர். இதனால் வேதாரண்யம் - முத்துப்பேட்டை சாலையில் சுமார் ஒருமணிநேரம் போக்குவரத்து தடைப்பட்டது. முத்துப்பேட்டை அருகே அனுமதியின்றி மது விற்றவர் கைதுமுத்துப்பேட்டை, டிச.19: முத்துப்பேட்டை அருகே அனுமதியின்றி மது விற்றவர் கைது செய்யப்பட்டார். திருவாரூர் மாவட்டம், முத்துப்பேட்டை அடுத்த நாச்சிக்குளம் கடைத்தெருவில் அனுமதியின்றி அரசு மதுபானங்களை கூடுதல் விலைக்கு விற்பனை செய்து வருவதாக முத்துப்பேட்டை போலீசாருக்கு தகவல் வந்தது. இதனையடுத்து சிறப்பு சப்-இன்ஸ்பெக்டர் ரெங்கராஜன் தலைமையில் போலீசார் சம்பந்தப்பட்ட இடத்திற்கு சோதனையில் ஈடுபட்டனர். அப்போது அங்கு அதேபகுதியை சேர்ந்த இபுராஹீம் மகன் நாகூர் பிச்சை என்பவர் ஒரு கடைக்கு பின்புறம் மதுபானங்கள் விற்பனையில் ஈடுபட்டது தெரியவந்தது. இதனையடுத்து அவரிடமிருந்து ஏராளமான மதுபானங்களை பறிமுதல் செய்த போலீசார் நாகூர் பிச்சையை கைது செய்து திருத்துறைப்பூண்டி கோர்ட்டில் ஆஜர்படுத்தப்பட்டு சிறையில் அடைத்தனர்.  

கமலேஷ் சந்திரா கமிட்டி பரிந்துரையை அமலாக்க கோரி கிராமப்புற அஞ்சலர்கள் ஆர்ப்பாட்டம்

மன்னார்குடி, டிச.19: கமலேஷ் சந்திரா கமிட்டி பரிந்துரையை அமல்படுத்த வலியுறுத்தி கிராமப் புற அஞ்சலர்கள் காலவரையற்ற வேலை நிறுத்தத்தை துவங்கி அதனையொட்டி மன்னார்குடி தலைமை அஞ்சலகம் முன் ஆர்ப்பாட்டத்தில் ஈடுபட்டனர். கிராமப்புற அஞ்சல் ஊழியர்களுக்கான கமலேஷ் சந்திரா கமிட்டியின் அனைத்து பரிந்துரைகளையும் ஜனவரி 2016 முதல் அமல்படுத்திட வேண்டும், அஞ்சல் துறையை தனியார் மயமாக முயற்சிப்பதை கைவிட வேண்டும், கிராமப்புற அஞ்சலங்களை மூடும் திட்டத்தை உடனே கைவிட வேண்டும், தற்காலிக ஊழியர்களை பணி நிரந்தரம் செய்திட வேண்டும், கிராமப்புற அஞ்சல் ஊழியர்களுக்கு ஓய்வூதியம் வழங்கிட வேண்டும் உள்ளிட்ட பல்வேறு கோரிக்கைகளை வலியுறுத்தி அகில இந்திய கிராமப்புற அஞ்சல் ஊழியர் சங்கத்தினர் நேற்று முதல் தொடர் வேலை நிறுத்தத்தை துவங்கினர்.போராட்டத்தின் முதல் நாளையொட்டி அகில இந்திய கிராமப்புற அஞ்சல் ஊழியர் சங்கத்தினர் மன்னார்குடி தலைமை தபால் அலுவலகம் முன் கோரிக்கைகளை வலியுறுத்தி சங்க கிளையின் தலைவர் தமிழ்ச்செல்வன், செயலாளர் உதயகுமார், பொருளாளர் பண்டரிநாதன் ஆகியோர் தலைமையில் ஆர்ப்பாட்டத்தில் ஈடுபட்டனர். கோரிக்கைகளை வலியுறுத்தி கடந்த ஆண்டு மே 28ம் தேதி முதல் ஜூன் 16ம் தேதி வரை தொடர்ச்சியாக 19 நாட்கள் கிராமப்புற அஞ்சல் ஊழியர் சங்கத்தினர் தொடர் வேலை நிறுத்த போராட்டத்தில் ஈடுபட்டனர். அப்போது நடந்த பேச்சு வார்த்தையில் ஈடுபட்ட மத்திய அரசு தங்களின் முக்கிய  கோரிக்கைகளை திட்டமிட்டு புறம் தள்ளி தங்களை வஞ்சித்து விட்டதால் இந்த ஆண்டும் கிராமப்புற அஞ்சல் ஊழியர்கள் போராட்டத்தை துவங்கி உள்ளதாக சங்க நிர்வாகிகள் கூறினர். கிராமப்புற அஞ்சலர்களின் தொடர் வேலை நிறுத்த போராட்டத்தால் மன் னார்குடி, கோட்டூர் வட்டாரங்களில் உள்ள சுமார் 220 கிராமப்புற அஞ்சல கங்கள் வெறிசோடி கிடக்கின்றன.

நீடாமங்கலம் அருகே பாசன வாய்க்கால்களில் 25 ஆண்டுகளாக தண்ணீர் வராததால் விவசாயம் பாதிப்பு

நீடாமங்கலம், டிச.18: நீடாமங்கலம் அருகே முன்னாவல் கோட்டையில் 3 மற்றும் 4ம் நம்பர் பாசன வாய்க்காளில் 25 ஆண்டுகளாக தண்ணீர் வராததால் சிறு குறு விவசாயிகள் பாதிப்படைந்துள்ளனர். தஞ்சை மாவட்டத்திலிருந்து வரும் காவிரியாற்றில் வடவாறு என்ற ஆறு பிரிகிறது. இந்த ஆறு பிரிந்து புத்தூர் என்ற இடத்தில் வந்து 3 மற்றும் 4ம் நம்பர் பாசன வாய்க்கால் செல்கிறது. இந்த வாய்க்கால் புலியக்குடி, குச்சிபாலையம் வரை பாசம் தருகிறது. அதன் பிறகு வாய்க்கால் ஆங்காங்கே தூர்ந்து பாசன வசதியில்லாமல் உள்ளது. இந்த வாய்க்கால் முன்னாவல்கோட்டை வழியாக சென்று ராயபுரம் வரை சுமார் 500 ஏக்கர் விளை நிலங்களுக்கு பாசன வசதியை ஏற்படுத்தி வந்தது. ஆனால் கடந்த 25 ஆண்டுகளாக இந்த வாய்க்காலில் தண்ணீர் வருவதில்லை. எப்போதாவது 100 நாள் வேலை திட்டத்தில் வாய்க்கால் தூர் வாரப்பட்டு மரம் புல் செடிகள் மண்டி கிடக்கிறது. புலியக்குடிக்கு வரும் பாசன வாய்க்காலுக்கு பிறகு இடை இடையே வாய்க்காலில் இருபுறமும் கரைகளை வெட்டி சிலர் தண்ணீர் பாய்த்து வருகின்றனர்.  பெரும் விவசாயிகள் சுமார் 500 அடி வரை நிலத்தடிநீரை எடுத்து மின் மோட்டாரில் விவசாயம் செய்து வருகின்றனர். இதனாலும் சிறு குறு விவசாயிகளுக்கு பாதிப்பு ஏற்படும் நிலை எள்ளது. இதே நிலை தொடர்ந்தால் வரும் 10 ஆண்டுகளில் உப்பு நீர் கிராமத்தில் புகுந்து குடிநீர் தட்டுப்பாடு ஏற்படும் நிலை உள்ளது.  இது தொடர்பாக அப்பகுதி விவசாயிகள் கூறுகையில், தஞ்சை, திருவாரூர் இரு மாவட்ட பிரச்னை என்பதால் இரண்டு மாவட்ட கலெக்டர்களையும் சந்தித்து இது தொடர்பாக கிராமம் சார்பில் மனு கொடுக்கப்பட்டுள்ளது. துறை அதிகாரிகளிடமும் பலமுறை மனு கொடுக்கப்பட்டுள்ளது. அதிகாரிகளின் அலச்சியத்தால்தான் 25 அண்டுகளாக பாசனம் செய்ய முடியாமல் சிறு குறு விவசாயிகளாகிய  நாங்கள் எங்களிடம் உள்ள நிலங்களை பெரிய விவசாயிகளிடும் அடகு வைத்துள்ளோர். சிலர் சாகுபடி செய்ய  முடியாமல் விளை நிலங்களை தரிசாக போட்டுள்ளனர். எனவே சம்மந்தப்பட்ட தஞ்சை, திருவாரூர் மாவட்ட கலெக்டர்கள் நடவடிக்கை எடுத்து முன்னாவல் கோட்டை வழியாக வரும் 3 மற்றும் 4ம் நம்பர் பாசன வாய்க்காளை தூர்வாரி விவசாயத்திற்கு தண்ணீர் வழங்க வேண்டும் என அப்பகுதி விவசாயிகள் கோரிக்கை விடுத்துள்ளனர்.

வேளாண் அறிவியல் நிலையம் சார்பில் ஒருங்கிணைந்த பயிர் பாதுகாப்பு பயிற்சி

நீடாமங்கலம், டிச.18:   திருவாரூர் மாவட்டம் நீடாமங்கலம் வேளாண்மை அறிவியல் நிலையம் சார்பில் நெற்பயிரில் ஒருங்கிணைந்த பயிர் பாதுகாப்பு பயிற்சி ராயபுரம் கிராமத்தில் விரிவாக்கத்துறை உதவி பேராசிரியர் ராமசுப்ரமணியன் தலைமையில் நடந்தது. பயிற்சியில் மண்ணியியல்துறை உதவி பேராசிரியர் அனுராதா கலந்து கொண்டு உர மேலாண்மை தொழில் நுட்பங்கள் பற்றி பேசினார். உதவிபேராசிரியர் ராஜேஷ்குமார், பூச்சியியல்துறை உதவி பேராசிரியர் ராஜாரமேஷ் கலந்து கொண்டு இயற்கைவழி பயிர் பாதுகாப்பு முறைகளை பின்பற்றுவதன் மூலம் மண்வளம் பாதுகாக்கப்படுகிறது. சுற்றுச்சூழல் மாசுபாடு அடைவது தடுக்கப்படுகிறது. நஞ்சில்லா உணவு உற்பத்தி செய்யப்படுகிறது. நன்மை செய்யும் உயிரினங்கள் பாதுகாக்கப்படுகிறது உள்ளிட்ட பயன்கள் பற்றிய விவசாயிகளுக்கு வயல்வெளியில் செயல் விளக்கம் அளித்தார். ஏற்பாடுகளை நிக்ரா திட்ட உதவியாளர் விஜிலா செய்திருந்தார்.

20 அம்ச கோரிக்கைகளை வலியுறுத்தி விஏஓ சங்கத்தினர் 8ம் நாளாக ஆர்ப்பாட்டம்

மன்னார்குடி, டிச.18:  பழைய ஓய்வூதிய திட்டத்தை மீண்டும் நடைமுறைப்படுத்த வேண்டும் உள்ளிட்ட 20 அம்ச  கோரிக்கைகளை வலியுறுத்தி கிராம நிர்வாக அலுவலர்கள் சங்கத்தினர் 8ம்  நாளாக மன்னார்குடியில் ஆர்ப்பாட்டத்தில் ஈடுபட்டனர். பழைய ஓய்வூதிய திட்டத்தை மீண்டும் நடைமுறை படுத்த வேண்டும், உட்பிரிவு பட்டா மறுதல்களில் விஏஓகளின் பரிந்துரையை கட்டாயமாக வேண்டும், ஒரே உத்தரவில் மாவட்ட மாறுதல்களை வழங்க வேண்டும், கூடுதல் பொறுப்பு கிராமங்களுக்கு பொறுப்பு ஊதியத்தை உடன் வழங்க வேண்டும் உள்ளிட்ட 20 அம்ச கோரிக்கைகளை வலியுறுத்தி கிராம நிர்வாக அலுவலகர்கள் சங்கத்தினர் கடந்த 10ம் தேதி முதல் தொடர் போராட்டங்களில் ஈடுபட்டு வருகின்றனர். இந்நிலையில் மேற்கண்ட கோரிக்கைகளை வலியுறுத்தி தமிழ்நாடு கிராம நிர்வாக அலுவலகர்கள் சங்கத்தினர் மன்னார்குடி ஆர்டிஓ அலுவலகம் எதிரே நேற்று கோரிக்கை விளக்க ஆர்ப்பாட்டத்தில் ஈடுபட்டனர். விஏஓ சங்க மாவட்ட செயலாளர் ராஜகுமார் தலைமை வகித்தார். மன்னை வட்ட கிளை தலைவர் கனகராஜன், செயலாளர் ஸ்டாலின், பொருளாளர் மாலா, ஆகியோர் முன்னிலை வகித்தனர். கோரிக்கை களை விளக்கி சங்க மாவட்ட பொருளாளர் சற்குணம், வட்ட துணை தலைவர் ஜெரால்டு ராஜ்குமார், துணை செயலாளர் வீரசேகரன் ஆகியோர் பேசினர். ஆர்ப்பாட்டத்தில்  மன்னார்குடி, திருத்துறைப்பூண்டி, கூத்தாநல்லூர், நீடாமங்கலம் ஆகிய 4 வட்டங்களை சேர்ந்த 150க்கும் மேற்பட்ட  விஏஓக்கள் பங்கேற்றனர்.திருவாரூர்: திருவாரூரில்  நேற்று ஆர்.டி.ஒ அலுவலகம் முன் விஏஓ சங்கத்தினர் ஆர்ப்பாட்டத்தில் ஈடுபட்டனர். மாவட்ட தலைவர் கதிரேசன் தலைமையில் நடைபெற்ற இந்த ஆர்ப்பாட்டத்தில் மாநில பொது செயலாளர் ராஜ்குமார், மாவட்ட செயலாளர் ராஜகுமார், மாவட்ட துணை தலைவர் மார்ட்டின் உட்பட பலர் கலந்து கொண்டனர். 

போலீசாரை கண்டித்து இன்று 4 மாவட்டங்களில் உண்ணாவிரதம் விவசாயிகள் சங்கம் அறிவிப்பு

திருவாரூர், டிச.18: தமிழ்நாடு விவசாயிகள் சங்க மாநில துணை செயலாளர் மாசிலாமணி வெளியிட்டுள்ள அறிக்கை: கஜா புயல் கோரத்தால் பாதிக்கப்பட்டுள்ள மாவட்டங்களை பேரிடர் பாதிப்பு மாவட்டம் என அறிவித்து அரசிதழில் வெளியிட வேண்டும், தமிழக அரசு கேட்ட நிவாரணத் தொகை ரூ 15 ஆயிரம் கோடியினை மத்திய அரசு உடன் வழங்கிட வேண்டும், பாதிக்கப்பட்ட குடிசை வீடுகள், ஓட்டு வீடுகள், தொகுப்பு வீடுகள்,சேதம் அடைந்த மாடி வீடுகளுக்கும் நிவாரணம் வழங்கிட வேண்டும், மேலும் குடிமனைப் பட்டா வழங்கி ஒரு லட்சம் கான்கிரிட் வீடுகள் திட்டத்தை நிறைவேற்றிட வேண்டும், சிறு,குறு விவசாயிகள் என பாகுபாடின்றி அனைத்து பயிர்களுக்கும் நிவாரணம் வழங்க வேண்டும், பாதிக்கப்பட்டுள்ள நெல்பயிர் ஏக்கருக்கு ரூ 25 ஆயிரமும், தென்னை மரம் ஒன்றுக்கு ரூ 20 ஆரமும், வாழை ஏக்கர் ஒன்றுக்கு ரூ ஒரு லட்சமும் வழங்கிட வேண்டும், புளி,மா, எலுமிச்சை, பலா,தேக்கு மற்றும் பாதிக்கப்பட்டுள்ள அனைத்து மரங்களுக்கும், இறந்துள்ள உயர்ரக கலப்பின மீன்களுக்கும் உரிய இழப்பீடு வழங்கிட வேண்டும், விடுபட்டுள்ள மனித உயிரிழப்புகள், ஆடு,மாடுகள் இறப்பிற்கும் நிவாரணம் வழங்கிட வேண்டும், மகளிர் குழு கடன்,கல்விக் கடன்கள் தள்ளுபடி செய்திட வேண்டும் என்ற கோரிக்கைகளை முன் வைத்து போராடிய பொதுமக்கள், உள்ளிட்ட அரசியல் தலைவர்கள் மீது மிரட்டும் போக்கில் போலீசார் வழக்குப் போட்டுள்ளனர். எனவே கோரிக்கைகளுக்காக போராட்டத்தில் ஈடுப்பட்டவர்கள் மீது போடப்பட்டுள்ள பொய் வழக்கினை ரத்து செய்ய கோரி தமிழக அரசையும், காவல்துறையையும் கண்டித்து நாகை, திருவாரூர், தஞ்சை மற்றும் புதுக்கோட்டை மாவட்டங்களில் இன்று (18ம் தேதி) சுமார் ஆயிரம் இடங்களில் காலை 8 மணி முதல் மாலை 5 மணி வரை மாபெரும் உண்ணாவிரத போராட்டத்தில் ஈடுபடவுள்ளோம். இதில் அனைத்துப் பகுதி மக்களும் பெரும் திரளாக பங்கேற்க வேண்டும். இவ்வாறு மாசிலாமணி தெரிவித்துள்ளார்.

மின்சீரமைப்பு பணிகளுக்கு ஆட்களை அனுப்ப வலியுறுத்தி சாலை மறியல்

முத்துப்பேட்டை, டிச.18:  முத்துப்பேட்டை அடுத்த இடும்பாவனத்தில் அனைத்து பகுதிகளுக்கும் மின்  சீரமைப்பு பணிகளுக்கு பணியாளர்கள் அனுப்ப வேண்டும் எனக்கோரி பொதுமக்கள்  சாலை மறியல் போராட்டத்தில் ஈடுபட்டனர்.  திருவாரூர் மாவட்டம், முத்துப்பேட்டை அடுத்த இடும்பாவனம் ஊராட்சிக்குட்பட்ட பகுதியில் கஜா புயல் பதிப்புக்கு பிறகு தற்பொழுதுதான் மின் சீரமைப்பு பணிகள் நடந்து வருகிறது. இதனால் மின்சாரம் இல்லாமல் ஒரு மாதக்காலமாக மின்சாரம் இன்றி மக்கள் தவித்து வருகிறனர்.  இந்நிலையில் இப்பகுதியில் கடந்த 2 நாட்களாக நடக்கும் பணிகள் இப்பகுதியில் உள்ள முக்கிய பிரமுகர் மற்றும் ஆளுங்கட்சியை சேர்ந்தவர்கள் பகுதிக்கு மட்டும் மின் பணியாளர்கள் பணியில் ஈடுபட்டு வந்தனர். இதனால் மின் சீரமைப்பு பணிகள் துவங்காத பகுதி மக்கள் கடும் அதிருப்தியடைந்தனர். இதில் அப்பகுதியில் மக்கள் முகாமிட்டு தங்கியுள்ள சுனாமி கட்டிடத்திற்காவது முதலில் மின் சீரமைப்பு செய்ய வேண்டும் என்று மக்கள் கோரிக்கை விடுத்தனர். ஆனாலும் மின் பணியாளர்கள் காதில் வாங்காமல் முக்கிய பகுதிக்கு மட்டுமே பணியாளர்களை அனுப்பி சீரமைத்து வந்தனர். இதனால் அதிருப்தியடைந்த அப்பகுதியை சேர்ந்த மார்க்சிஸ்ட் ஒன்றியக்குழு உறுப்பினர் வீரசேகரன், அப்பகுதி ஊரக வளர்ச்சி மன்ற தலைவர் ராமகிருஷ்ணன் ஆகியோர் தலைமையில் மக்கள் அனைத்து பகுதிகளுக்கும் பாரபட்சம் இல்லாமல் பணியாளர்கள் அனுப்பவேண்டும் எனக்கோரி வேதாரண்யம்-முத்துப்பேட்டை சாலையில் மறியலில் ஈடுபட்டனர். இதனையடுத்து அங்குவந்த அப்பகுதி மின்வாரிய செயற்பொறியாளர் மற்றும் முத்துப்பேட்டை போலீசார், சாலை மறியலில் ஈடுபட்டவர்களிடம் பேச்சுவார்த்தை நடத்தினர். இதில் உடனே இங்குள்ள பணியாளர்கள் அனைவரையும் அனைத்து பகுதிக்கும் சீரமைப்பு பணிக்கு அனுப்பப்படும் என்று உறுதியளித்து அனுப்பி வைத்தனர். இதனையடுத்து சாலை மறியலில் ஈடுபட்டவர்கள் அங்கிருந்து கலைந்து சென்றனர். இதனால் வேதாரண்யம்-முத்துப்பேட்டை சாலையில் சுமார் 3 மணிநேரம் போக்குவரத்து முற்றிலும் தடைப்பட்டது.

வலங்கைமான் அரசு மருத்துவமனையில் 6 மாதமாகியும் உயர்கோபுர மின்விளக்கு பணி முடியாமல் தாமதம்

வலங்கைமான், டிச.18:   வலங்கைமான் அரசு மருத்துவமனையில்  உயர்கோபுர மின்விளக்கு அமைக்க பணிகள் துவங்கப்பட்டு ஆறுமாதங்களை கடந்த நிலையில்  இதுவரை பணிகள் முடியவில்லை என பொதுமக்கள் குற்றச்சாட்டியுள்ளனர்.  திருவாரூர் மாவட்டம் வலங்கைமான் பேரூராட்சிப் பகுதியில் அரசு மருத்துவமனை செயல்பட்டு வருகிறது. இவ் மருத்துவமனை வளாகத்தில் பொதுமக்களின் நலன்கருதி உயர்கோபுர மின்விளக்கு அமைக்க தீர்மானிக்கப்பட்டது. பின்னர் அதற்கான பணிகள் நடைபெற டெண்டர் விடப்பட்டு பணிகள் துவங்கியது. உயர்கோபுர மின்விளக்கு அமைப்பதற்கான கான்கிரீட்டால் ஆன அடித்தளம் கடந்த ஆறு மாதங்களுக்கு முன் அமைக்கப்பட்டது. மேலும் மின்விளக்கு பொருத்துவதற்கான உயர் கோபுரங்களும் அப்போதே வரவழைக்கப்பட்டு மருத்துவமனை சுற்றுசுவர் அருகே கொண்டுவந்து போடப்பட்டுள்ளது. பல மாதங்களாக இப்பணிகள் முடிவுறாமல்  கிடப்பில் போடப்பட்டுள்து. பயன்பாட்டிற்கு வராமலே உயர் கோபுரங்கள் வீணாகும் சூழ்நிலை உள்ளது. எனவே மேலும் கால தாமதம் செய்யாமல் மக்களின் பயன்பாட்டிற்கு உயர்கோபுர மின்விளக்கு வருவதற்கு உரிய நடவடிக்கை எடுக்க அரசுக்கு  பொதுமக்கள் கோரிக்கை விடுத்துள்ளனர்.

புயலால் பாதிக்கப்பட்ட சலவை தொழிலாளர்களுக்கு வங்கி கடன் வழங்க வலியுறுத்தல்

நாகை,டிச.18: நாகை மாவட்ட மிகவும் பிற்படுத்தப்பட்டோர் கட்டமைப்பு மாவட்ட பொருளாளர் ரவிக்குமார் சங்கம் சார்பில் நாகை கலெக்டரிடம் வழங்கிய கோரிக்கை மனுவில் கடந்த நவம்பர் மாதம் 15, 16ம் தேதியில் அடித்த கஜா புயல் பாதிப்பால் முடி திருத்தும் தொழிலாளர்கள், தொழில் செய்யும் கருவிகள், கண்ணாடி, நாற்காலி, போன்றவற்றை இழந்து விட்டோம். சலவை தொழிலாளர்களுக்கு குடியிருப்பதற்கு வீடு இல்லை. தற்போதுள்ள வீடுகள் சேதம் அடைந்து விட்டது. அந்த தொழில் செய்ய தேவையான மேஜை, இஸ்திரி பெட்டி போன்றவை வீனாகி விட்டது.  எங்கள் வாழ்வுக்கு அரசின் நிபந்தனை அற்ற வங்கி கடன் பெற்றும், அரசின் இலவச வீடு கட்டியும் தர வேண்டும். முடி திருத்துவோர், சலவைத் தொழிலாளர்கள் சார்பில் கேட்டுக்கொள்கிறேன். இவ்வாறு அந்த மனுவில் கூறப்பட்டுள்ளது.

மக்கள் இயல்பு நிலைக்கு திரும்ப வேண்டி காளியம்மன் கோயிலில் குத்து விளக்கு பூஜை

மன்னார்குடி, டிச.18:  கஜா புயலால் பாதிக்கப்பட்ட டெல்டா மாவட்டங்களில்  மக்கள் இயல்பு நிலைக்கு திரும்ப வேண்டி மன்னார்குடி பாப்பார காளியம்மன் கோயிலில் சிறப்பு குத்துவிளக்கு பூஜை  நடைபெற்றது. உலக நன்மையை வேண்டும், சீராக மழை பொழிய வேண்டும், கஜா புயலால் பாதிக்கப்பட்ட டெல்டா மாவட்டங்களில் மக்கள் இயல்பு நிலைக்கு திரும்ப வேண்டும் என வலியுறுத்தி சிறப்பு குத்துவிளக்கு பூஜை மன்னார்குடி அடுத்துள்ள பிரசித்தி பெற்ற பாப்பார காளியம்மன் கோயிலில் நடைபெற்றது.இதனையொட்டி மூலவர் காளியம்மனுக்கு புதிதாக செய்யப்பட்ட வெள்ளி கவசம் அணிவிக்கப்பட்டு சிறப்பு அலங்காரம் செய்யப்பட்டிருந்தது. கோயிலின் முன் 4 ஆதி உயரம் கொண்ட விளக்கு அமைத்து அதன் அருகே உற்சவர் காளியம்மனை எழுந்தருள செய்து பாஸ்கர சிவாச்சாரியார் தலைமையில் குங்குமத்தால் சிறப்பு அபிசேகம் செய்யப்பட்டது. தொடந்து கோயிலின் வெளிப்புறத்தில் 700க்கும் மேற்பட்ட பெண்கள் குத்து விளக்கேற்றி பாப்பார காளியம்மனுக்கு சிறப்பு அபிசேகம் செய்து பல்வேறு அர்ச்சனைகள் செய்யப்பட்டது.சிறப்பு குத்துவிளக்கு பூஜை நடந்தது.

திருவாரூர் கலெக்டர் அலுவலகம் முன் சங்கு ஊதும் போராட்டம் நடத்த முயன்ற தமமுகவினர் 30 பேர் கைது

திருவாரூர், டிச.18:  திருவாரூரில் கலெக்டர் அலுவலகம் முன் சங்கு ஊதும் போராட்டத்தில் ஈடுபட முயன்ற தமிழக மக்கள் முன்னேற்றக் கழகத்தினர் 30 பேர்களை போலீசார் கைது செய்தனர். தேவேந்திர குல வேளாளர் சமூகத்தின் உட்பிரிவுகளான குடும்பர், பண்ணாடி, காலாடி, கடையர், பள்ளர், வாதிரியார் மற்றும்   தேவேந்திர குலத்தார் என  7 உட்பிரிவுகளையும் தேவேந்திரகுல வேளாளர் பெயர் என பெயர் மாற்றம் செய்து அரசு ஆணை வழங்கிட வலியுறுத்தி திருவாரூரில் நேற்று கலெக்டர் அலுவலகம் முன்பாக தமிழக மக்கள் முன்னேற்றக் கழகத்தினர் சங்கு ஊதும் போராட்டத்தில் ஈடுபட முயன்றனர். இதனையடுத்து  போராட்டத்தில் ஈடுப்பட்ட மாவட்ட தலைவர் ஆரோக்கியசெல்வம், இளைஞரணி மாவட்ட பொறுப்பாளர் முருகேஷ்பாண்டியன், நகர செயலாளர் பாவா, ஒன்றிய செயலாளர் முருகானந்தம் உட்பட மொத்தம் 30 பேர்களை தாலுகா போலீசார் கைது செய்து புலிவலத்தில் உள்ள திருமண மண்டபம் ஒன்றில் தங்க வைத்து மாலையில் விடுதலை செய்தனர்.

மன்னார்குடி கிழக்கு ஒன்றியத்தில் திமுகவினர் நிவாரண பொருட்கள் வழங்கல்

நீடாமங்கலம், டிச.18: திருவாரூர் மாவட்டம் கூத்தாநல்லூர் தாலுகா மன்னார்குடி கிழக்கு ஒன்றிய திமுக சார்பில் கஜா புயலால் பாதிக்கப்பட்ட மக்களுக்கு மாவட்ட செயலாளர் பூண்டி காலைவாணன் தலைமையில் பாலகுறிச்சியில் 500 பேருக்கு போர்வை, புள்ளமங்கலத்தில் 100 பேருக்கு புடவை, வக்ராநல்லூரில் 100 பேருக்கு 5கிலோ அரிசி, புடவை நிவாரணமாக வழங்கப்பட்டது. மன்னார்குடி கிழக்கு ஒன்றிய திமுக செயலாளர் குமரேசன், மாவட்ட பிரதிநிதி செல்வம், ஒன்றிய பொருளாளர் ஜெகஜிவன்ராம், ஊராட்சி செயலாளர் முருகேசன், சுந்தரமூர்த்தி உள்ளிட்ட பலர் கலந்து கொண்டனர்.

முத்துப்பேட்டை அருகே மின்சாரம் கேட்டு 2 கிராம மக்கள் மறியல்

முத்துப்பேட்டை, டிச.18: முத்துப்பேட்டை அருகே மின்சாரம் கேட்டு 2 கிராம மக்கள் சாலை மறியலில் ஈடுபட்டனர். திருவாரூர் மாவட்டம், முத்துப்பேட்டை அடுத்த தில்லைவிளாகம் ஓமங்காடு கிராமத்தில் கஜா புயல் பாதிப்பு ஏற்பட்டு ஒருமாதம் கடந்தும் மின் சீரமைப்பு பணி துவங்காமல் மின்சாரமின்றி மக்கள் தவித்து வருகின்றனர். இதனால் அதிருப்தியடைந்த அப்பகுதி கிராம மக்கள் தில்லைவிளாகம் பத்தர்கடை பேருந்து நிறுத்தம் அருகே சாலை மறியலில் ஈடுபட்டனர். தகவல் அறிந்து சம்பவ இடத்திற்கு வந்த மின் வாரிய அதிகாரிகள் நாளை முதல் (இன்று) மின்சாரம் சீரமைப்பு பணிகள் துவங்கும் என்று உறுதியளித்தனர். இதனையடுத்து மக்கள் கலைந்து சென்றனர். இதனால் வேதாரண்யம்-முத்துப்பேட்டை சாலையில் ஒருமணி நேரம் போக்குவரத்து தடைப்பட்டது.அதேபோல் முத்துப்பேட்டை அடுத்த கழுவங்காடு கிராமத்தில் கஜா புயல் பாதிப்பு ஏற்பட்டு ஒரு மாதம் கடந்தும் மின்சாரம் வராததை கண்டித்து தில்லைவிளாகம் பெட்ரோல் பங்கு அருகே சாலை மறியலில் ஈடுபட்டனர். தகவல் அறிந்து சம்பவ இடத்திற்கு வந்த முத்துப்பேட்டை சப்-இன்ஸ்பெக்டர் சிலம்புசெல்வன் மற்றும் மின்வாரிய அதிகாரிகள் பேச்சுவார்த்தையில் ஈடுபட்டு உடன் சீரமைப்பு பணிக்கு பணியாளர்களை அணிப்பினர் இதனையடுத்து மறியலில் ஈடுபட்ட பொதுமக்கள் கலைந்துசென்றனர்.