Tirupur - Dinakaran

மனைவியின் முன்னாள் காதலனுக்கு கத்திக்குத்து

திருப்பூர்,ஆக.20: திருப்பூர் மாவட்டம் பொங்கலூரை அடுத்த காட்டூர் பகுதியை சேர்ந்தவர் பிரகாஷ் (32). பனியன் தொழிலாளி.இவருக்கும் மதுரை மாவட்டம் மேலூரை அடுத்த திருச்சுளையை சேர்ந்த இளம் பெண் ஒருவருக்கும் கடந்த சில வருடங்களுக்கு முன் திருமணம் நடந்தது. தம்பதியர் திருப்பூர் அங்கேரிபாளையத்தை  அடுத்த வெங்கமேடு பகுதியில் தங்கி வேலைக்கு சென்று வந்தனர். இந்நிலையில், கடந்த 3 மாதத்திற்கு முன் திருச்சுளை பகுதியை சேர்ந்த கேசவமூர்த்தி என்பவர் பிரகாஷ் பணிபுரிந்த பனியன் கம்பெனியில் வேலைக்கு சேர்ந்தார். மனைவியின் ஊரை சேர்ந்தவர் என்பதால் பிரகாஷ் கேசவமூர்த்தியுடன் நட்புடன் பழகினார். இருவரும் ஒன்றாக மது அருந்தும் அளவிற்கு நெருக்கமாக பழகினர்.சம்பவத்தன்று கேசவமூர்த்தி, பிரகாஷ் மற்றும் அவரது நண்பர் மணீஸ்குமார் ஆகிய மூவரும் டாஸ்மாக் பாரில் சென்று மது அருந்தினர். அப்போது மணீஸ்குமார் பிரகாஷிடம் உனது மனைவி கேசவமூர்த்தியின் முன்னாள் காதலி என்றும், இவர்கள் காதலுக்கு எதிர்ப்பு கிளம்பியதால் உனக்கு திருமணம் செய்து கொடுத்தனர் என்றும், இதனால் சிங்கப்பூர் சென்ற பிரகாஷ் விடுமுறைக்கு ஊருக்கு வரும் போதெல்லாம் உனது மனைவியுடன் பேசி வந்தார். தற்போது நீ வேலை பார்க்கும் கம்பெனியிலேயே வேலைக்கு சேர்ந்து விட்டார் எனக் கூறி உள்ளார். இதை கேட்டு அதிர்ச்சி அடைந்த பிரகாஷ் வாக்குவாதம் செய்த போது, வீணாக தகராறு செய்தால் உனது மனைவியை என்னுடன் அழைத்து சென்று விடுவேன் என கேசவமூர்த்தி கூறி உள்ளார். ஆத்திரமடைந்த பிரகாஷ் மனைவியின் முன்னாள் காதலனாகிய கேசவமூர்த்தியை கத்தியால் சரமாரியாக குத்தி விட்டு தப்பினார். அக்கம்பக்கத்தினர் அவரை மீட்டு திருப்பூர் அரசு மருத்துவமனையில் சேர்த்தனர். அவர் அளித்த புகாரின் பேரில் அனுப்பர்பாளையம் போலீசார் வழக்கு பதிந்து பிரகாஷை கைது செய்தனர்.

சாலைகளில் சுற்றித்திரியும் கால்நடைகளால் போக்குவரத்து பாதிப்பு

திருப்பூர்,ஆக.20: திருப்பூர் வளம் பாலம் அருகே ஓட்டல் கழிவுகள் சாப்பிட வரும் கால்நடைகளால் அடிக்கடி போக்குவரத்து நெரிசல் ஏற்படுவதால் வாகன ஓட்டிகள் கடுமையாக பாதிக்கப்பட்டுள்ளனர். திருப்பூர் மாநகரின் வளம் பாலம்  அருகே பழைய பஸ் நிலையம், தீயணைப்பு அலுவலகம், திரையரங்கு  என பொதுமக்கள் அதிகமாக வந்து செல்லும் இடங்கள் ஏராளம் இருக்கிறது. மேலும், இந்த ரோட்டில் தினமும் எராளமான வாகனங்கள்  செல்வதால் எப்போதும் போக்குவரத்து நெரிசலாக இருக்கும். மேலும்,  மிகவும் முக்கியத்துவம் வாய்ந்த ரோட்டில் ஓட்டல் கழிவுகள், பழக்கழிவுகளை ஆகியவற்றை சாப்பிட வரும் மாடுகள் ஆங்காங்கே நடந்து செல்கிறது.இதுகுறித்து மாநகராட்சி நிர்வாகம் எந்த நடவடிக்கை எடுக்கவில்லை. கடந்த ஆண்டு  போக்குவரத்து பாதுகாப்பு பணியில் ஈடுபட்டிருந்த போலீசார் ஒருவரை மாநகராட்சி அருகில் ரோட்டில் சுற்றித்திரியும் மாடு ஒன்று முட்டியது குறிப்பிடத்தக்கது. மேலும், வாகனங்கள் ஒலி எழுப்பவதினால் மாடுகள் மிரண்டு ஓடியும் வருகிறது. இதனால், வாகன ஓட்டிகள் பெரிதும் அச்சத்தில் வாகனத்தை ஓட்ட வேண்டிய நிலை உள்ளது. இன்னும், சில நேரங்களில் ரோட்டில் படுத்து இளைப்பாறுகின்றன. இதனால், விலகி செல்ல முடியாமல் வாகன ஓட்டிகள் அவதிப்படுகின்றனர். மாடுகளை வளர்க்கும் உரிமையாளர் மாடுகளை கட்டி வைத்து பாதுகாக்க வேண்டும். இல்லையெனில் மாநகராட்சி நிர்வாகம் மாடுகளை பறிமுதல் செய்து மாடு வளர்க்கும் உரிமையாளரிடம் அபராதம் வசூலிக்க வேண்டுமென வாகன ஓட்டிகள் விரும்புகின்றனர்.

நகராட்சி வணிக வளாகத்தில் பூட்டி கிடக்கும் கழிப்பிடம்

உடுமலை,ஆக.20:உடுமலை தளி சாலையில், நகராட்சி வணிக வளாகம் உள்ளது. 3 தளங்களை கொண்ட கட்டிடம் உள்ளது. இங்கு 78 கடைகள் உள்ளன. வணிக வளாகத்துக்கு தினசரி ஏராளமானோர் சென்று வருகின்றனர். ஒரு கடைக்கு ரூ.10 ஆயிரம் வரை வாடகை வசூலிக்கப்படுகிறது. ஆனால் குடிநீர், கழிவறை உள்ளிட்ட அடிப்படை வசதிகள் இல்லாததால் வணிகர்களும், வாடிக்கையாளர்களும் அவதிப்படுகின்றனர்.வணிக வளாகத்தில் உள்ள கழிவறை, உரிய பராமரிப்பின்றி எப்போதும் பூட்டியே கிடக்கிறது. இதன் அருகில் உள்ள ரேஷன் கடை, வங்கி, ஆய்வு மாளிகைக்கு அமைச்சரிடம் மனு அளிக்க வரும் பொதுமக்கள் ஆகியோர் கழிவறைக்காக நகராட்சி வணிக வளாகத்துக்கு வருகின்றனர். ஆனால் பூட்டி கிடப்பதால் ஏமாற்றத்துடன் செல்கின்றனர்.அருகில் உள்ள தாகூர் மாளிகைக்கு சென்றால் அங்கும் கழிப்பிடம் பூட்டிக்கிடக்கிறது. இதனால் பெரும் அவதிப்படுகின்றனர்.எனவே, நகராட்சி வணிக வளாகத்தில் உள்ள கழிப்பிடத்தை திறந்து பயன்பாட்டுக்கு கொண்டு வர வேண்டும் என பொதுமக்கள்  கோரிக்கை விடுத்துள்ளனர்.

டாஸ்மாக் கடையினால் பள்ளி செல்ல அச்சம்

திருப்பூர், ஆக.20:திருப்பூர், விஜயாபுரம் பகுதியில் உள்ள டாஸ்மாக் கடையினால் பள்ளி செல்ல அச்சம் ஏற்பட்டுள்ளதாக பள்ளி மாணவர்கள் நேற்று கலெக்டர் அலுவலகத்தை முற்றுகையிட்டு போராட்டத்தில் ஈடுபட்டனர். திருப்பூர், விஜயாபுரம் அடுத்த அங்காளம்மன் கோயில் அருகில் செயல்பட்டு வரும் டாஸ்மாக் மதுக்கடைய அகற்ற கோரி மாணவர்கள் நேற்று கலெக்டரிடம் மனு அளிக்க வந்தனர். ஆனால், கலெக்டர் அலுவலகத்தில் பாதுகாப்பு பணியில் ஈடுபட்டிருந்த போலீசார் அவர்களை தடுத்தி நிறுத்தினார்கள். இதனால், அதிருப்தி அடைந்த பள்ளி மாணவ, மாணவிகள் முற்றுகை போராட்டத்தில் ஈடுபட்டனர். அதன்பின்னர், உள்ளே அனுமதிக்கப்பட்டு கலெக்டரை சந்தித்து மனு அளித்தனர்.திருப்பூர், விஜயாபுரம் அரசு மேல்நிலைப்பள்ளி மாணவர்கள் கூறியதாவது: நாங்கள் முத்தணம்பாளையம் அடுத்த ஆயமரம் பகுதியில் வசித்து வருகிறோம். எங்கள் பகுதியில் பள்ளி இல்லாததால் நாங்கள் விஜயாபுரத்தில் உள்ள அரசு மேல்நிலைப்பள்ளியில் படித்து வருகின்றோம். இப்பள்ளிக்கு, செல்ல எங்கள் பகுதியில் இருந்து பஸ் வசதியில்லை. ஆகையால், நாங்கள் 30 மாணவிகளும், மாணவர்களும் அங்காளம்மன் கோவில் வழியாக 8 கி.மீ  நடந்து சென்று வருகிறோம். அவ்வழியில் கடந்த ஒன்றை ஆண்டுகளாக டாஸ்மாக் கடை உள்ளது. இங்கு மது அருந்துபவர்கள் நடந்து செல்லும் போது கேலி, கிண்டல் செய்து வருகின்றனர். இத்தகைய, சூழ்நிலையில் கடந்த சில நாட்களுக்கு முன்பு டாஸ்மாக் கடை அருகில் கொடூர கொலை நடந்தது. இதனால், இப்பகுதியில் நடந்து செல்ல எங்களுக்கு மிகவும் அச்சமாக உள்ளது. ஆகையால், இந்த டாஸ்மாக் கடையை வேறு இடத்திற்கு இடம் மாற்றம் செய்ய வேண்டும். மேலும், ஆயமரம் பகுதியில் இருந்து முத்தணம்பாளையம் பகுதிக்கு செல்ல பஸ் வசதி ஏற்பாடு செய்து தர வேண்டும் எனவும் தெரிவித்தனர்.

இளம் பெண்ணை தாக்கிய சகோதரர்கள் கைது

திருப்பூர்,ஆக.20: திருப்பூரில், திருமணம் செய்ய மறுத்து, பெண்ணை தாக்கிய, அண்ணன், தம்பியை போலீசார் கைது செய்தனர். திருப்பூர் காங்கயம் ரோட்டை சேர்ந்தவர் 32 வயது பெண். இவருக்கு கடந்த 2009ம் ஆண்டு ஒருவருடன் திருமணம் நடந்தது. தம்பதியருக்கு இடையே ஏற்பட்ட கருத்து வேறுபாடு காரணமாக, ஆறு மாதத்தில் தம்பதியர் பிரிந்தனர்.ஆண் குழந்தையுடன், அப்பெண் வசித்து வருகிறார். இந்நிலையில் அப்பகுதியை சேர்ந்த பாண்டித்துரை (27) என்பவருடன் அந்த பெண்ணுக்கு பழக்கம் ஏற்பட்டது. இருவரும், திருமணம் செய்யாமல், நான்கு ஆண்டு வாழ்ந்து வந்தனர். இந்நிலையில், தன்னை ஏமாற்றி, பத்து லட்சம் ரூபாய் பெற்று கொண்டு, திருமணம் செய்ய மறுப்பதாகவும், இதுதொடர்பாக கேட்டதற்கு, அவருடைய அண்ணன் உடன் சேர்ந்து பாண்டித்துரை தாக்கியதாக திருப்பூர் வடக்கு அனைத்து மகளிர் போலீசில் அந்த பெண் புகார் அளித்தார். இதுதொடர்பாக விசாரித்த போலீசார், தம்பி பாண்டித்துரை, (27), அண்ணன் ராஜேஷ்குமார் (29) ஆகியோர் மீது வழக்குப்பதிந்து, கைது செய்து விசாரிக்கின்றனர்.

உடுமலையில் ரூ.25.92 கோடியில் அடுக்குமாடி குடியிருப்புகள் அமைச்சர் நேரில் ஆய்வு

உடுமலை,ஆக.20:உடுமலை அருகே உள்ள புக்குளத்தில், தமிழ்நாடு குடிசை மாற்று வாரியம் மூலம் ரூ.25.92 கோடி மதிப்பீட்டில் 320 வீடுகள் கொண்ட அடுக்குமாடி குடியிருப்பு கட்டப்பட்டு வருகிறது. இதை அமைச்சர் ராதாகிருஷ்ணன் நேரில் ஆய்வு செய்தார். பின்னர் அவர் நிருபர்களிடம் கூறியதாவது: உடுமலையில் பொருளாதாரத்தில் நலிவடைந்து, குடிசையில் வசிக்கும் 320 குடும்பத்தினருக்கு வீடு கட்டி கொடுக்கும் வகையில், குடிமங்கலம் ஒன்றியம்புக்குளத்தில் 2.62 ஏக்கர் பரப்பளவில் 3 தளங்களுடன் கூடிய குடியிருப்பு கட்டப்பட்டு வருகிறது. ஒரு வீட்டின் பரப்பளவு 401.24 சதுர அடியாகும். ஒவ்வொரு குடியிருப்பிலும் பல்நோக்கு அறை, படுக்கை அறை, சமையல் அறை, பால்கனி, குளியல் அறை, குடிநீர் தொட்டி, கழிவுநீர் அகற்றும் வசதி, பூங்கா, கடைகள், மழைநீர் சேகரிப்பு அமைப்பு, குப்பை தொட்டி, தெரு மின்விளக்கு போன்ற அனைத்து வசதிகளும் செய்யப்படுகின்றன. விரைவில் பணி முடிந்து முதல்வர் திறந்து வைப்பார். இவ்வாறு ராதாகிருஷ்ணன் தெரிவித்தார். அப்போது குடிசை மாற்று வாரிய உதவி பொறியாளர் குமார், வட்டார வளர்ச்சி அலுவலர் ரொனால்டு ஷெல்டன் பெர்னாண்டஸ், வட்டாட்சியர் தயானந்தன், கால்நடை பராமரிப்பு உதவி இயக்குனர் ராமசாமி மற்றும் பலர் உடனிருந்தனர்.

பொள்ளாச்சி எம்.பி நன்றி அறிவிப்பு

உடுமலை,ஆக.20:பொள்ளாச்சியில் வெற்றி பெற்ற திமுக எம்பி., சண்முகசுந்தரம் ஒன்றியம் வாரியாக வாக்காளர்களுக்கு நன்றி தெரிவித்து வருகிறார்.நேற்று தும்பாலபட்டி, குரல்குட்டை, மடத்தூர், குருவப்பநாயக்கனூர் உள்ளிட்ட இடங்களில் நன்றி தெரிவித்தார். அவருடன் மடத்துக்குளம் திமுக எம்எல்ஏ., ஜெயராமகிருஷ்ணன், உடுமலை ஒன்றிய செயலாளர் செல்வராஜ், இந்திய கம்யூனிஸ்ட் சவுந்தர்ராஜன், மார்க்சிஸ்ட் கனகராஜ், கொங்கு ரவி, தும்பாலபட்டி செல்வராஜ், லோகநாதன், தெய்வசிகாமணி, மனோகரன், பழனிசாமி, ஈஸ்வரன், போடிப்பட்டி செல்வகுமாரசாமி, ராஜா மற்றும் திமுகவினர் சென்றனர்.

சாலை பணியை விரைந்து முடிக்க கோரிக்கை

உடுமலை, ஆக. 20:தளியில் இருந்து ஆனைமலைசெல்லும் ரோட்டில் மொடக்குபட்டி பிரிவு உள்ளது. திருமூர்த்திமலை செல்லும் வாகனங்கள், பொன்னாலம்மன் சோலை வழியாக இந்த சாலையில் செல்கின்றன. மொடக்குபட்டி பிரிவில் இருந்து சுமார் 3கிமீ., தூரத்துக்கு, சாலை சீரமைப்பதற்காக மாநில நெடுஞ்சாலைத்துறை சார்பில் ஜல்லிகற்கள் கொட்டப்பட்டன. ஆனால் பணி முடியாமல் பல மாதங்களாக கிடப்பில் கிடக்கிறது. இதனால் வாகனங்களில் செல்வோர் அவதிப்படுகின்றனர்.இரு சக்கர வாகனங்கள் ஜல்லி கற்களால் பஞ்சராகின்றன. சாலை சீரமைப்பு பணி முடியாததால் பெரும் அவதிப்படுகின்றனர். எனவே, உடனடியாக முடிக்க வேண்டும் என பொதுமக்கள் கோரிக்கை விடுத்துள்ளனர்.

அவிநாசியில் ரூ.2.56 கோடியில் தார் சாலை,வடிகால் அமைக்கும் பணி

அவிநாசி,ஆக.20: அவிநாசி  சிறப்பு நிலை பேரூராட்சி சார்பில் 16வது வார்டு பகுதி முத்து செட்டி பாளையம், 18வது வார்டு காமராஜ் நகர,10வது வார்டு வி.எஸ்.வி. காலனி உள்ளிட்ட பகுதிகளில் வடிகால் வசதியுடன் கூடிய தார் சாலை அமைக்கும் பணிக்கான பூமி பூஜை நேற்று நடந்தது. நிகழ்ச்சிக்கு கலெக்டர் பழனிச்சாமி தலைமை தாங்கினார். தமிழக சட்டப் பேரவைத் தலைவர் தனபால்  பூமி பூஜையில் கலந்துகொண்டு புதிதாக தார் சாலை அமைக்கும்  பணிக்கு அடிக்கல் நாட்டி வைத்து  பணிகளை தொடங்கி வைத்தார். நிகழ்ச்சியில்,  அவிநாசி தாசில்தார் வாணிலட்சுமி ஜெகதாம்பாள், அவிநாசி பேரூராட்சி செயல் அலுவலர் ஈஸ்வரமூர்த்தி, சுகாதாரஆய்வாளர் கருப்பசாமி, சுகாதார மேற்பார்வையாளர் பாலதண்டாயுதபாணி, நிலவள கூட்டுறவு வங்கி தலைவர் ஜெகதீசன், கூட்டுறவு விற்பனை சங்க துணைத்தலைவர் ஜெயபால் உள்ளிட்ட திரளானோர் கலந்து கொண்டனர்.

கீழ்பவானி பாசன கால்வாயில் விநாயகர் சிலைகளை கரைக்க விவசாயிகள் எதிர்ப்பு

திருப்பூர், ஆக.20:திருப்பூர், கீழ்பவானி பாசன கால்வாயில் விநாயகர் சிலைகளை கரைக்க கூடாது என கீழ்பவானி விவசாயிகள் சங்கத்தினர் நேற்று கலெக்டர் அலுவலகத்தில் மனு அளித்தனர். இதுகுறித்து கீழ்பவானி விவசாயிகள் நல சங்கம் தலைவர் கலெக்டர் அலுவலகத்தில் அளித்த மனுவில் கூறியிருப்பதாவது: கீழ்பவானி பாசனம் ஈரோடு, திருப்பூர், கரூர் ஆகிய மாவட்டங்களில் இடம் பெற்றுள்ளது. திருப்பூர் மாவட்டத்தில் கீழ்பவானிப் பாசன கால்வாய் 35 மைல் பயணித்து கரூர் மாவட்டத்தில் முடிகிறது. திருப்பூர் மாவட்டத்தில் மட்டும் சுமார் 18 ஆயிரம் ஏக்கர் இதன் மூலம் பாசனம் பெற்று வருகிறது. இந்நிலையில், சதுர்த்தி விழாவின் போது விநாயகர் சிலைகளை ஈரோடு மற்றும் கரூர் மாவட்டங்களில் உள்ள பாசன கால்வாய்கள் கரைப்பதில்லை. ஆனால், திருப்பூர் மாவட்டத்தில் மட்டும் கடந்த இரண்டு ஆண்டுகளாக பாசன பயனாளிகளின் எதிர்ப்பையும் மீறி பாசன கால்வாயில் சிலைகள் கரைக்கப்பட்டது. இதனால், பாசன நீர் மாசு பட்டதோடு மட்டுமல்லாமல் உடைக்கப்பட்ட சிலைகளின் பாகங்கள் கால்வாய் நீரில் உருண்டோடி மதகு குழாய்களை அடைத்த காரணத்தால் நீர் நிர்வாகம் பாதிக்கப்பட்டது. நீர் தேங்கி கரை உடையும் சூழ்நிலையும் உருவானது. கீழ்பவானி தலைமை கால்வாய்களின் அருகில் நொய்யல் ஆறு ஓடுகிறது. இப்படி இருக்கும்போது விநாயகர் சிலைகளை புனித தன்மை கொண்ட ஜீவநதியாக மாற்றப்பட்டிருக்கும் நொய்யல் ஆற்றில் கலக்காமல் எதற்காக கீழ்பவானி பாசன கால்வாய் கரைக்க வேண்டும். ஆகஸ்ட்16ம் தேதி கீழ்பவானி பாசனத்திற்கு தண்ணீர் திறக்கப்பட்டுள்ளது. கடந்த இரண்டு ஆண்டுகளில் எதிர்ப்பையும் மீறி நடந்த தவறு நடப்பு ஆண்டில் நடத்தி விடக்கூடாதே எந்த சூழ்நிலையும் விநாயகர் சிலைகளை கால்வாய் நீரில் கரைப்பதற்கு நடப்பு ஆண்டில் பாசன பயனாளிகள் விடமாட்டார்கள். எனவே, நொய்யல் ஆற்றில் விநாயகர் சிலை கரைக்க நடவடிக்கை எடுக்க வேண்டும் என்றார்.

திருப்பூர் எஸ்.பியாக திஷா மிட்டல் பொறுப்பேற்பு

திருப்பூர்,ஆக.20:திருப்பூர் மாவட்டத்திற்கு புதிய எஸ்.பியாக திஷாமிட்டல் நேற்று பொறுப்பேற்றார். திருப்பூர் மாவட்ட போலீஸ் எல்லையில் 5 சரகங்களுக்கு உட்பட்டு 30க்கும் மேற்பட்ட காவல் நிலையங்கள் செயல்பட்டு வருகிறது. இந்நிலையில் திருப்பூர் மாவட்ட போலீஸ் கண்காணிப்பாளராக கயல்விழி இருந்தார். கடந்த சில தினங்களுக்கு முன்பு அரசால் வெளியிட்ட ஐ.பி.எஸ். அதிகாரிகளுக்கான பணியிடமாற்ற அறிவிப்பில் திருப்பூர் எஸ்.பி கயல்விழி உளுந்தூர்பேட்டை சிறப்பு பட்டாலியன் பிரிவிற்கும், பெரம்பலூர் மாவட்ட எஸ்.பியாக இருந்த திஷாமிட்டல்  திருப்பூர் எஸ்.பியாகவும் பணிமாற்றம் செய்யப்பட்டனர். திருப்பூர் எஸ்.பியாக இருந்த கயல்விழி உளுந்தூர்பேட்டை சென்ற நிலையில் திருப்பூர் எஸ்.பியாக திஷா மிட்டல் நேற்று பொறுப்பேற்றுக்கொண்டார்.

கொடிகாத்த குமரன் நகரில் அடிப்படை வசதி செய்து தர சபாநாயகரிடம் கோரிக்கை

அவிநாசி,ஆக.20:கொடிகாத்த குமரன் நகர் குடியிருப்போர் நலச்சங்கம் சார்பில், அடிப்படை வசதி செய்து தரக்கோரி சட்டமன்ற சபாநாயகரிடம் அவிநாசியில் நேற்று கோரிக்கை மனுவை கொடுத்தனர். அவிநாசியில் நடைபெற்ற நலத்திட்ட உதவிகள் வழங்கும் நிகழ்ச்சிகளில் தமிழ்நாடு சட்டப்பேரவைத் தலைவர் தனபால் கலந்து கொண்டார். அப்போது அவரிடம்  கொடிகாத்த குமரன்நகர் குடியிருப்போர் நலச்சங்கத்தினர் ஒரு கோரிக்கை மனு அளித்தனர். அந்த மனுவில் கூறியிருப்பதாவது: கொடிகாத்த குமரன் நகர் 1995ம் வருடம் உருவாக்கப்பட்டது. இன்று வரை அடிப்படை வசதிகளான தெருவிளக்கு, சாக்கடைவசதி, குடிநீர் இணைப்பு ஆகியன இல்லாமல் அவதிப்பட்டு வருகின்றோம். எங்களது மனைப்பிரிவில் முதன்மை சாலையில் 40 அடிரோட்டில் போக்குவரத்துக்கு இடையூறாக உள்ள ஆக்கிரமிப்புகளை அகற்றவேண்டும். இந்த பகுதியில் சாக்கடை வசதி இல்லாத காரணத்தால் ஓவ்வொரு வீடுகளின் முன்பும் குழிகளை வெட்டி கழிவுநீரைத் தேக்கிவைப்பதால் கொசுக்கள் உற்பத்தியாகி, தொற்றுநோய்களும், மர்ம காய்ச்சலும் பரவுகிறது. எனவே புதிதாக தார் ரோடு, சாக்கடை வசதி அமைத்து தரவேண்டும். இவ்வாறு அந்த மனுவில் கூறப்பட்டிருந்தது.

மகளின் கொலை வழக்கை விரைவு நீதிமன்றத்திற்கு மாற்ற கோரி கலெக்டரிடம் தந்தை மனு

திருப்பூர்,ஆக.20: தனது மகளின் கொலை வழக்கை விரைவு நீதிமன்றத்திற்கு மாற்றக் கோரியும்,தங்கள் குடும்பத்திற்கு பாதுகாப்பு வழங்க வலியுறுத்தியும் செல்வராஜ் (59) என்பவர் தனது குடும்பத்துடன் நேற்று திருப்பூர் கலெக்டர் அலுவகத்தில் மனு அளித்தார். அந்த மனுவில் அவர் கூறியிருப்பதாவது:  திருப்பூர் கொங்கு மெயின் ரோடு செல்வலட்சுமி நகர் பகுதியில் வசித்து வருகிறேன். எனது இளைய மகள் பிரியா, கொங்கு மெயின் ரோடு பகுதியை சேர்ந்த ரமேஷ்குமார் என்பவரை 10 வருடத்திற்கு முன் காதலித்து திருமணம் செய்தாள். அவர்களுக்கு 9 வயதில் மகளும், 12 வயதில் மகனும் உள்ளனர். இந்நிலையில் கருத்து வேறுபாடு காரணமாக ரமேஷ்குமாரை பிரிந்து எனது மகள் பிரியா மற்றும் குழந்தைகள் எங்களுடன் இருந்து வந்தார். கடந்த 1ம் தேதி அருள்ஜோதி நகரிலுள்ள ரமேஷ்குமாரின் தாய் வீட்டில் வைத்து பேசி சமாதானம் ஏற்படுத்தி கொள்ளலாம் என கூறி பிரியாவை அழைத்து சென்று கத்தியால் குத்தி கொலை செய்துவிட்டார். பின்னர்  வடக்கு போலீசார் ரமேஷ்குமாரை கைது செய்து சிறையிலடைத்தனர். எனது மகள் கொலை வழக்கை விரைவு நீதிமன்றத்தில் நடத்தி குறுகிய காலத்தில் குற்றவாளிக்கு கடும்  தண்டனை வாங்கி தர போலீசாருக்கு உத்தரவிட வேண்டும். மேலும் எங்களது குடும்பத்திற்கு தகுந்த பாதுகாப்பு அளிக்க வேண்டும். இவ்வாறு அந்த மனுவில் அவர் கூறியுள்ளார்.

மது விற்ற 5 பேர் கைது

திருப்பூர், ஆக.20:திருப்பூர் சேடர்பாளையம் ரோடு, வஞ்சிபாளையம் ஆகிய பகுதிகளில் உள்ள பெட்டிக் கடைகளில் தடை செய்யப்பட்ட புகையிலை பொருட்கள் விற்பனை செய்யப்படுவதாக வந்த தகவலையடுத்து, திருமுருகன்பூண்டி போலீசார் நேற்று முன்தினம் அப்பகுதியில் திடீர் சோதனை நடத்தி, புகையிலை பொருட்களை விற்பனைக்கு வைத்திருந்த மொகமது சாலி (27), நாகராஜ் (32) ஆகியோரை கைது செய்து 52 பாக்கெட் புகையிலை பொருட்களை பறிமுதல் செய்தனர். மேலும், காங்கயம் ரோடு, புஷ்பா ஜங்கசன், மங்கலம் ரோடு ஆகிய பகுதிகளில் உள்ள டாஸ்மாக் பார்களில் மதுவிலக்கு போலீசார் சோதனை நடத்தி, சட்டவிரோதமாக மது விற்பனையில் ஈடுபட்ட வரதராஜன் (34), குமார் (42), அருண்குமார் (24) ஆகியோரை கைது செய்து, அவர்களிடம் இருந்து 54 மதுபாட்டில்களை பறிமுதல் செய்தனர்.

மாவட்டத்தில் பி.டி.ஓ.,க்கள் மாற்றம்

திருப்பூர், ஆக. 20: திருப்பூர் மாவட்டத்தில் உள்ள, 13 ஊராட்சி ஒன்றியத்தில், வட்டார ஊராட்சி, கிராம ஊராட்சி என, 26 பி.டி.ஓ.,க்கள் பணியாற்றி வருகின்றனர். அத்துடன், பி.டி.ஓ., மற்றும் துணை பி.டி.ஓ., நிலை அலுவலர், கலெக்டர் அலுவலகத்திலும் பணியில் உள்ளனர்.நிர்வாக நலன்கருதி, ஆறு பி.டி.ஓ.,க்கள் அதிரடியாக இடமாறுதல் செய்யப்பட்டுள்ளனர். காங்கயம் பி.டி.ஓ.,(ஊராட்சி) மீனாட்சி, திருப்பூர் வட்டார பி.டி.ஓ.,வாக மாற்றப்பட்டுள்ளார். திருப்பூரில் இருந்த மகுடேஸ்வரி, காங்கயம் ஒன்றியத்துக்கு மாற்றப்பட்டுள்ளார். குடிமங்கலம் வட்டார பி.டி.ஓ., பியூலா எப்சிபாய், கலெக்டர் அலுவலக தேர்தல் பிரிவு பி.டி.ஓ., வாக மாற்றப்பட்டுள்ளார். மருத்துவ விடுப்பில் சென்ற பாலசுப்ரமணியன், குடிமங்கலம் பி.டி.ஓ., வாக நியமிக்கப்பட்டுள்ளார்.குண்டடம் வட்டார பி.டி.ஓ., பிரியா, வெள்ளகோவிலுக்கும், அங்கிருந்த அய்யாசாமி குண்டடத்துக்கும் இடமாற்றம் செய்யப்பட்டுள்ளனர். பணியிடமாறுதல் செய்த பி.டி.ஓக்களிடமிருந்து எவ்வித, மேல்முறையீட்டையும் ஏற்க இயலாது. உடனடியாக, அந்தந்த இடங்களில் பொறுப்பேற்க வேண்டுமென, மாவட்ட நிர்வாகம் உத்தரவிட்டுள்ளது. உள்ளாட்சி தேர்தல் வர வாய்ப்பு இருப்பதால், அதற்கான ஏற்பாடுகளை மேற்கொள்ள வசதியாக, காலியாக இருந்த, தேர்தல் பிரிவு பி.டி.ஓ., பணியிடம் நிரப்பப்பட்டுள்ளதாக கூறப்படுகிறது.

ஸ்மார்ட் சிட்டி குறித்து வெள்ளை அறிக்கை வெளியிட வேண்டும் அனைத்துக் கட்சியினர் வலியுறுத்தல்

திருப்பூர், ஆக.20:ஸ்மார்ட் சிட்டி குறித்து திருப்பூர் மாநகராட்சி நிர்வாகம்  வெள்ளை அறிக்கை வெளியிட வேண்டும் என்று அனைத்துக் கட்சியினர் வலியுறுத்தியுள்ளனர்.  இதுதொடர்பாக இந்தியக் கம்யூனிஸ்ட் கட்சியின் திருப்பூர் மாவட்டச் செயலாளர் ரவி தலைமையில் மாநகராட்சி உதவி ஆணையர் சந்தானத்திடம் அளித்துள்ள மனுவில் கூறியுள்ளதாவது: திருப்பூர் மாநகராட்சி நிர்வாகம் பொலிவுறு நகரம் திட்டத்தின்படி பிரதான சாலைகளில் பள்ளிக் கட்டடங்கள், பொது பயன்பாட்டுக் கட்டடங்கள், குடிநீர் தொட்டிகள், குடியிருப்புகளை அகற்றி இடித்து விட்டு வணிக வளாகங்கள், பல அடுக்கு வாகன நிறுத்துமிடம், பூங்கா போன்றவற்றை நிறுவுவதற்கான நடவடிக்கைகளில் ஈடுபட்டு வருகிறது. தற்போதைய நிலையில் திருப்பூர் மாநகரில் நிலவும் போக்குவரத்து நெரிசலால் பொதுமக்கள் அவதிக்குள்ளாகி வருகின்றனர்.மேலும், பல அடுக்கு வாகன நிறுத்தம், வணிக வளாகங்கள் அமைத்தால் மாநகரின் மத்தியில் கடுமையான போக்குவரத்து நெரிசல் ஏற்படும். மாநகராட்சியில் மக்கள் பிரதிநிதிகள் இல்லாத நிலையில் வளர்ச்சித் திட்டங்களில் மாநகராட்சி நிர்வாகம் ஈடுபட்டுள்ளது சரியல்ல. இதில், பல்வேறு தவறுகளும், முறைகேடுகளும் ஏற்பட வாய்ப்பு உள்ளது. எனவே, பொலிவுறு நகரம் திட்டங்கள் என்ன என்றும், மேற்கொள்ளும் கட்டுமானப் பணிகள் குறித்து மாநகராட்சி நிர்வாகம் வெள்ளை அறிக்கை வெளியிட வேண்டும். இதைத்தொடர்ந்து, எம்எல்ஏக்கள்,எம்.பிக்கள்மற்றும் அனைத்து அரசியல் கட்சி கூட்டத்தைக் கூட்டி எடுக்கப்படும் நடவடிக்கைகளின் அடிப்படையில் பொலிவுறு நகரம் திட்டங்களை செயல்படுத்த வேண்டும் என்று தெரிவிக்கப்பட்டுள்ளது. மற்றொரு மனுவில், பலமடங்கு உயர்த்தப்பட்ட சொத்து வரியை ரத்து ெசய்ய வேண்டும் என வலியுறுத்தப்பட்டிருந்தது. இந்த மனுக்கள் அளிப்பின்போது, காங்கிரஸ் கட்சி மாநகர் மாவட்டச் செயலாளர் கிருஷ்ணன், திமுக மாநகர அவைத்தலைவர் ஈஸ்வரமூர்த்தி, மார்க்சிஸ்ட் கட்சி வடக்கு நகர செயலாளர் முருகேஷ், மதிமுக மாநகர செயலாளர் சிவபாலன் உள்ளிட்ட பல்வேறு கட்சி நிர்வாகிகள் உடனிருந்தனர்.

110 ஏக்கர் பரப்பிலான குளத்தை ஆக்கிரமித்த கருவேல மரங்கள்

காங்கயம், ஆக.20: காங்கயம் அருகே 110 ஏக்கர் பரப்பிலான கத்தாங்கண்ணி குளத்தை சுற்றிலும் கருவேல மரங்கள் ஆக்கிரமித்துள்ளது. இதனால் மழை வெள்ளம் வந்தும் பயனில்லாமல் போனது என விவசாயிகள் புகார் தெரிவித்துள்ளனர். திருப்பூர் மாவட்டம் காங்கயம் ஒன்றியம் பாலசமுத்திரம்புதூர் ஊராட்சிக்கு உட்பட்ட கத்தாங்கண்ணி குளம் 110 ஏக்கர் பரப்பில் உள்ளது. இதில் தண்ணீர் தேக்கினால், கத்தாக்கன்னி, வயக்காட்டு புதூர், ரெட்டிபாளையம், கணபதிபாளையம், தம்மரெட்டிபாளையம், சாவடிபாளையம், புதூர், ரசப்பாளையம் உள்பட 30க்கும் மேற்பட்ட கிராமங்களிலுள்ள ஆயிரக்கணக்கான ஏக்கர் நிலங்களுக்கு நிலத்தடி நீர்மட்ட ஆதாரமாகவும், 200 ஏக்கர் நேரடி பாசனம் பெறும் பகுதிகளாக உள்ளது. ஒரத்துப்பாளையம் அணை கட்டும் முன்பு வரை, நொய்யலில் வரும் தண்ணீர் கத்தாங்கன்னி குளத்தில் தேக்கி நெல், வாழை என விவசாயம் செழுமையாக நடைபெற்று வந்தது. திருப்பூரிலிருந்து வரும், சாய, சாக்கடை கழிவு நீர் காரணமாக, 20 ஆண்டுக்கு முன் தடுப்பணை உடைக்கப்பட்டது. இந்த தண்ணீரை பயன்படுத்தி விவசாயமும் செய்ய முடியாமல் பேனது, நிலமும் மாசடைந்தது. இது குறித்து வழக்குகளும் நீதி மன்றத்தில் உள்ளது. இதனால் குளத்திற்கு நீர் வராமல், சீமை கருவேல மரங்கள் குளத்தினை ஆக்கிரமித்துள்ளது. வாய்க்காலும், புதர் மண்டி, மண் மூடி பல இடங்களில் அடையாளத்தை இழந்துள்ளது. 110 ஏக்கர் பரப்பளவு உள்ள குளத்தில் தற்போது 90 ஏக்கர் பரப்பளவில் வேலி முட்கள் மூடி  குளம் இருப்பதே தெரியாமல் உள்ளது. தற்போது பெய்த மழையினாலும், நொய்யல் தண்ணீர் சிறிதளவு வந்ததாலும் தற்போது 8 ஏக்கர் பரப்பில் தண்ணீர் தேங்கியுள்ளது. கோவை மாவட்டம் வெள்ளியங்கிரி மலைத்தொடர்களில் மழை பெய்து நொய்யல் ஆற்றுக்கு வெள்ளப்பெருக்கு ஏற்பட்டு தண்ணீர் சென்றது. இது போல் மழைநீர் வரும் போது தண்ணீரில் உப்புத்தன்மை குறைவாக இருக்கும். அந்த தண்ணீரை குளத்திற்கு தண்ணீர் திறந்து விட வேண்டும் என விவசாயிகள் தரப்பில் பல ஆண்டுகளாக கோரிக்கை விடுத்துள்ளனர். ஆனால் விவசாயிகள் கோரிக்கைக்கு அதிகாரிகள் செவி சாய்க்கவில்லை. இது குறித்து அப்பகுதி விவசாயிகள் கூறியதாவது: கத்தாங்கன்னி குளத்தில் தண்ணீர் தேக்கும் போது சுற்று வட்டாரத்தில் உள்ள 200 ஏக்கரில் பாசனம் பெற்று வந்தது. சுற்று வட்டாரப்பகுதியில் 1000 ஏக்கர் நிலத்தடி நீர்மட்டம் உயர்ந்தது. ஒரு முறை குளத்தை நிரப்பி விட்டால் ஆண்டு முழுவதும் தண்ணீர் பிரச்னை வராது. கால்நடைகள் வளர்க்கவும், விவசாயம் செய்யவும் முடியும். ஆனால் கடந்த 15 ஆண்டுகளாக குளத்தை தூர் வாராமல் உள்ளனர். இதனால் குளம் இருப்பது தெரியாமல் கருவேல மரங்கள் வளர்ந்து புதர்களாக உள்ளது. தண்ணீர் வரும் வாய்க்கால் மூடி கிடக்கிறது. குளத்தில் உள்ள மதகுகளும் பழுதடைந்துள்ளது. கடும் வறட்சியால் நிலத்தடி நீர் மட்டம் அடி பாதளத்திற்கு சென்று தண்ணீர் பஞ்சம் ஏற்பட்டு, குடிப்பதற்கும், கால்நடைகளுக்கும் சிரமப்பட வேண்டியுள்ளது. இதனால் மழைக்காலங்களில், நொய்யலில் வரும் வெள்ளநீரை சேமிக்கும் வகையில், வாய்க்கால் மற்றும் குளத்தை தூர்வார வேண்டும். அதே போல், சீமைக்கருவேலன் மரங்களையும் அகற்ற வேண்டும். அரசு குடிமராமத்து பணிகள் நடைபெறும் என அறிவித்துள்ள நிலையில், கத்தாங்கன்னி குளத்தை மாவட்ட நிர்வாகமும். அதிகாரிகளும்  கண்டுகொள்ளாமல் உள்ளனர். இது விவசாயிகள் மத்தியில் கவலையை ஏற்படுத்தியுள்ளது. குளத்தை தூர் வாரி வரும் மழை காலத்தில் மழை நீரை தேக்கி வைக்க நடவடிக்கை எடுக்க வேண்டும். இவ்வாறு தெரிவித்தார்.

மாநகராட்சி பகுதியில் கொசு மருந்து அடிக்கும் பணி தீவிரம்

திருப்பூர், ஆக.14: திருப்பூர் மாநகராட்சியில் உள்ள 60 வார்டுகளிலும் 8 லட்சத்துக்கும் அதிகமான மக்கள் வசிக்கின்றனர். இதில், அடிப்படை வசதி குறைவாக, தூய்மையற்று காணப்படும் பகுதிகளில் கொசுக்கள் பரவாமல் இருக்க, நோய் தடுப்பு நடவடிக்கையாக கொசு மருந்து தெளிக்கும் பணி துவங்கியுள்ளது. ஒரு சுகாதார ஆய்வாளர், மூன்று துப்புரவு பணியாளர்கள் தலைமையிலான குழு, இரண்டு நாளைக்கு ஒரு வார்டு வீதம் ‘அபெட்’ மருந்தை வீடுகளில் உள்ள குடிநீர் தொட்டிகள், பாத்திரம் கழுவும் தொட்டிகளில் தெளிக்கின்றனர். இதுதவிர, லாரிகள், டிராக்டர்கள் மூலம் கொசு புகை மருந்து அடிக்கப்பட்டு வருகிறது. இதுகுறித்து மாநகராட்சி அதிகாரிகள் கூறுகையில், ‘‘டெங்கு நோய் தடுப்பு நடவடிக்கையாக கொசு மருந்து தெளிக்கப்படுகிறது. பொதுமக்கள், மாநகராட்சி நிர்வாகத்துக்கு ஒத்துழைப்பு தர வேண்டும். குப்பை மற்றும் கழிவுகளை ரோட்டில் கொட்டக்கூடாது. தொட்டிகளில் போட்டு, கொசு வராமல் பாதுகாத்துக் கொள்ள வேண்டும். அனைத்து வார்டுகளிலும் கொசு மருந்து தெளிக்கப்படும்,’’என்றனர்.

திருப்பூர் வடக்கு மாவட்ட திமுக சார்பில் அரசு பள்ளி நூலகத்துக்கு ரூ.1 லட்சம் புத்தகங்கள்

திருப்பூர், ஆக.14: திருப்பூர் வடக்கு மாவட்ட திமுக இளைஞரணி சார்பில், மாணவர்கள் பயன்பாட்டிற்கு ரூ.1 லட்சம் மதிப்பிலான புத்தகங்கள் அரசு பள்ளி நூலகத்திற்கு வழங்கப்பட்டது.திருப்பூர் அங்கேரிபாளையம் வி.கே.அரசு மேல்நிலைப்பள்ளியில் முன்னாள் மாணவர்கள் சார்பில், மாணவ, மாணவியர் பயன்பாட்டிற்காக நூலகம் ஒன்று சமீபத்தில்  அமைக்கப்பட்டது. இந்நிலையில், முன்னாள் மாணவர்கள் மற்றும் வடக்கு மாவட்ட திமுக இளைஞரணி சார்பில், மாணவர்கள் பயன்படும் வகையில், நூலகத்திற்கு புத்தகங்கள் கேட்டு, திமுக., தலைவர் மு.க.ஸ்டாலினிடம் கோரிக்கை வைக்கப்பட்டது.அக்ேகாரிக்கையை ஏற்று, ரூ.1 லட்சம் மதிப்பிலான 500 புத்தகங்களை அவர் வழங்கினார். அந்நூல்களை பள்ளி நூலகத்திற்கு ஒப்படைக்கும் நிகழ்ச்சி, பள்ளி வளாகத்தில் நேற்று காலை நடந்தது. திருப்பூர் வடக்கு மாவட்ட திமுக செயலாளர் செல்வராஜ் கலந்து கொண்டு, பள்ளி மாணவர்கள், ஆசிரியர்கள், பள்ளி வளர்ச்சிக்குழு நிர்வாகிகள், முன்னாள் மாணவர்கள், அறக்கட்டளை நிர்வாகிகள் முன்னிலையில் புத்தகங்களை நூலகத்திற்கு வழங்கினார். இதில், மாநகர யெலாளர் டி.கே.டி.நாகராஜ், மாவட்ட அவைத் தலைவர் திருமூர்த்தி, மாவட்ட இளைஞரணி அமைப்பாளர் தங்கராஜ், மாநகர அவைத் தலைவர்a ஈஸ்வரமூர்த்தி, தினேஷ்குமார், பகுதி செயலாளர்கள் ராமதாஸ், ஜோதி, மாநகர இளைஞரணி அமைப்பாளர் செந்தில்குமார், மாவட்ட சிறுபான்மை பிரிவு அமைப்பாளர் ஜான் வல்தாரீஸ் உள்ளிட்ட பலர் கலந்து கொண்டனர்.

கிராம சபை கூட்டத்தில் விவாதிக்க அழைப்பு

திருப்பூர், ஆக.14:  திருப்பூர் மாவட்டத்தில் நாளை(15ம் தேதி) நடக்கும் கிராம சபை கூட்டங்களில் பொதுமக்கள் கலந்து கொண்டு தேவைகள் குறித்து விவாதிக்கலாம் என மாவட்ட நிர்வாகம் தெரிவித்துள்ளது.தமிழக அரசு உத்தரவுப்படி திருப்பூர் மாவட்டத்திலுள்ள 13 ஊராட்சி ஒன்றியங்களுக்கு உட்பட்ட 265 கிராம ஊராட்சிகளிலும் சுதந்திர தினமான ஆக.15ம் தேதி கிராம சபை கூட்டம் அந்தந்த ஊராட்சிகளில் பொது இடங்களில் நடக்கிறது. கிராம சபை கூட்டங்களில் கிராம ஊராட்சி நிர்வாகம் மற்றும் பொது நிதி செலவினம், குடிநீர் சிக்கனமாக பயன்படுத்துதல், டெங்கு காய்ச்சல் தடுப்பு நடவடிக்கைகள் குறித்து விவாதித்தல், கிராம ஊராட்சி வளர்ச்சி திட்டம், பிளாஸ்டிக் பொருட்கள் உற்பத்தி தடை செய்தல், உணவுப் பொருள் வழங்குதல் மற்றும் நுகர்வோர் பாதுகாப்பு, திறந்த வெளியில் மலம் கழித்தல் இல்லா ஊராட்சிகள், ஒருங்கிணைந்த சுகாதார வளாகங்கள், பள்ளிகளில் சுகாதார விழிப்புணர்வு போட்டிகள் நடத்துதல், திடக்கழிவு மேலாண்மை திட்டம், ஜல் சக்தி திட்டம், பிரதம மந்திரி குடியிருப்பு திட்டம், சூரிய மின்சக்தியுடன் கூடிய பசுமை வீடு திட்டம், மழைநீர் சேகரிப்பு உட்பட 25 அம்சங்கள் குறித்து விவாதிக்கப்படவுள்ளது. எனவே, கிராம சபை கூட்டத்தை திறம்பட நடத்திட ஏதுவாக ஒவ்வொரு ஊராட்சிக்கும் ஊராட்சி ஒன்றிய அலுவலகத்திலிருந்து அலுவலர்கள் நியமிக்கப்பட்டுள்ளனர். எனவே அந்தந்த கிராம பொது மக்கள் கிராமசபை கூட்டத்தில் கலந்து கொள்ளலாம் என மாவட்ட நிர்வாகம் சார்பில் தெரிவிக்கப்பட்டுள்ளது.