Tirupur - Dinakaran

உடுமலையில் திமுகவினர் பட்டாசு வெடித்து கொண்டாட்டம்

உடுமலை,மே24: பொள்ளாச்சி நாடாளுமன்ற தொகுதியில் திமுக வேட்பாளர் சண்முகசுந்தரம் வெற்றி பெற்றார். அதிமுக சார்பில் போட்டியிட்ட மகேந்திரன் வெற்றிவாய்ப்பை இழந்தார். நேற்று தேர்தல் முடிவுகள் வெளியானதில் இருந்தே சண்முகசுந்தரம் முன்னணியில் இருந்தார். இதையடுத்து, திமுகவினர் உடுமலை நேரு வீதியில் உள்ள திமுக அலுவலகத்தில் குவிந்தனர். பல ஆண்டுகளுக்கு பிறகு பொள்ளாச்சி  தொகுதியில் திமுக வென்றுள்ளதால் உற்சாகத்துடன் காணப்பட்டனர். மத்திய பஸ் நிலையம் முன்பு பட்டாசு வெடித்து, பொதுமக்களுக்கு இனிப்பு வழங்கினர். இதேபோல், மடத்துக்குளம், குமரலிங்கம், ராமச்சந்திராபுரம், தேவனூர்புதூர், எரிசனம்பட்டி,திமுக கிளைக்கழக சார்பாக நிர்வாகிகள் கோவிந்தராஜ் பாரதி பழனிகுமார் செந்தில்குமார் சபரிமுத்துவேல் ராசு ராதாகிருஷ்ணன் பட்டாசு வெடித்து இனிப்பு வழங்கினர். அதேபோல உடுமலை காந்தி சதுக்கம் 25வது வார்டு திமுக நிர்வாகிகள்,தொண்டர்கள்  பட்டாசு வெடுத்து இனிப்பு வழங்கினர்.

திருப்பூர் மக்களவைத் தேர்தலில் நோட்டாவுக்கு 6வது இடம்

திருப்பூர், மே 24: திருப்பூர் மக்கவைத் தொகுதியில் நோட்டாவுக்கு 6வது இடம் கிடைத்துள்ளது. திருப்பூர் மக்களவைத் தொகுதியில் இந்திய கம்யூனிஸ்ட் கட்சியின் சுப்பராயன், அதிமுக.,வின் எம்.எஸ்.எம்.ஆனந்தன், அமமுக.,வின் செல்வம், மக்கள் நீதி மய்யத்தின் சந்திரகுமார், நாம் தமிழர் கட்சியின் ஜெகநாதன் மற்றும் சுயேட்சைகள் உள்பட 12 பேர் போட்டியிட்டனர். இதில் சுப்பராயன் அதிக வாக்குகள் பெற்று வெற்றி பெற்றார். 2வது இடத்தையும் ஆனந்தனும்,, 3வது இடத்தை சந்திரகுமாரும், 4வது இடத்தை செல்வமும், 5வது இடத்தை ஜெகநாதனும் பெற்றனர். 22 ஆயிரம் வாக்குகள் பெற்ற நோட்டாவுக்கு 6வது இடம் கிடைத்தது.

திருப்பூரில் இந்திய கம்யூ., வேட்பாளர் சுப்பராயன் 93,368 வாக்கு வித்தியாசத்தில் வெற்றி

திருப்பூர்,மே24: திருப்பூர் மக்கவைத் தொகுதியில் 72.92 சதவீத வாக்குகள் பதிவானது. 15 லட்சத்து 29 ஆயிரத்து 836 வாக்காளர்களில், 11 லட்சத்து, 15 ஆயிரத்து 793 வாக்காளர்கள் தங்கள் வாக்கினை பதிவு செய்தனர். இது தவிர 4,400 தபால் ஓட்டுகள் பதிவானது. பதிவான வாக்குகள் அனைத்தும் திருப்பூர் எல்.ஆர்.ஜி கலை அறிவியல் கல்லூரியில் நேற்று எண்ணப்பட்டன. சட்டமன்ற தொகுதிகள் வாரியாக தனித்தனியாக 6 அறைகளில் வாக்கு எண்ணிக்கை நடந்தது. மொத்தம் 26 சுற்றுக்களாக வாக்கு எண்ணிக்கை நடந்தது. வாக்கு எண்ணிக்கை காலை 8 மணிக்கு துவங்கியது. மாவட்ட கலெக்டரும், தேர்தல் நடத்தும் அதிகாரியுமான பழனிசாமி வாக்கு எண்ணிக்கையை துவக்கினார். தேர்தல் பார்வையாளர்கள் முன்னிலையில் வாக்கு எண்ணிக்கை நடந்தது. காலை 9 மணி முதல் முன்னிலை நிலவரங்கள் அறிவிக்கப்பட்டன. முதல் சுற்று முதலே இந்திய கம்யூனிஸ்ட் கட்சி வேட்பாளர் சுப்பராயன் முன்னிலையில் இருந்தார். 26 சுற்றுக்களும் முன்னிலையில் இருந்த அவர், 2,932 தபால் ஓட்டுக்களை சேர்த்து மொத்தம் 5,08,725 வாக்குகள் பெற்றார். இவருக்கு அடுத்தபடியாக அதிமுக வேட்பாளர் எம்.எஸ்.எம்.ஆனந்தன் 4,15,357 வாக்குகள் பெற்றார். ஆனந்தனை விட இந்திய கம்யூனிஸ்ட் கட்சி வேட்பாளர் சுப்பராயன் 93,368 வாக்குகள் அதிகம் பெற்று வெற்றி பெற்றார். 3வது இடத்தை மக்கள் நீதி மய்யம் பிடித்தது. மொத்தம் 64,657 வாக்குகளை ம.நீ.ம., வேட்பாளர் சந்திரகுமார் பெற்றார். இவருக்கு அடுத்தபடியாக அ.ம.மு.க., வேட்பாளர் செல்வம் 43,816 வாக்குகளை பெற்று 4வது இடத்தையும், 42,189 வாக்குகளை பெற்று நாம் தமிழர் கட்சி வேட்பாளர் ஜெகநாதன் 5வது இடத்தையும் பெற்றனர். தேர்தல் முடிவுகள் முறைப்படி இரவு 8 மணிக்கு அறிவிக்கப்பட்டது. மாவட்ட கலெக்டரும், தேர்தல் நடத்தும் அலுவலருமான பழனிசாமி, தேர்தல் முடிவுகளை அறிவித்தார். இதன் பின்சுப்பராயனுக்கு தேர்தலில் வெற்றி பெற்றதற்கான சான்றிதழ் வழங்கப்பட்டது.

திருப்பூர் மக்களவை தொகுதியில் பலத்த பாதுகாப்புடன் நடந்த வாக்கு எண்ணிக்கை

திருப்பூர்,மே24:திருப்பூரில் பலத்த போலீஸ் பாதுக்கப்புடன் வாக்கு எண்ணிக்கை நடைபெற்றது. திருப்பூர் மக்களவை தொகுதிக்கான வாக்கு எண்ணிக்கை மையமான பல்லடம் ரோடு எல்.ஆர்.ஜி மகளிர் கலைகல்லூரியில் நேற்று கல்லூரி வளாகம் முழுவதும் பலத்த போலீஸ் பாதுகாப்பு போடப்பட்டிருந்தது. மாநகர போலீஸ் உதவி கமிஷ்னர் ரமேஷ் கிருஷ்ணன், நவீன் குமார் ஆகியோர் தலைமையில் 4 இன்ஸ்பெக்டர்கள், 8 சப் இன்ஸ்பெக்டர்கள் உள்ளிட்ட 150 போலீசார் பாதுகாப்பு பணியில் ஈடுபட்டனர். பாதுகாப்பு பணியை மாநரக போலீஸ் கமிஷ்னர் சஞ்சய் குமார், துணை கமிஷ்னர் உமா ஆகியோர் பார்வையிட்டனர். மேலும் 500க்கும் மேற்பட்ட போலீசார் தேர்தல் பாதுகாப்பு பணி மேற்கொண்டனர் மக்களவை தேர்தல் வாக்கு எண்ணிக்கை நடைபெறுவதையொட்டி அசம்பாவிதங்கள் ஏதும் நடைபெறாமல் தடுக்க மாநகர போலீசார் ரோந்து வாகனங்கள் மூலம் கட்சி அலுவலகங்கள் இருக்கும் இடங்கள் நகரின் முக்கியமான பகுதிகளில் ரோந்து பணி மேற்கொண்டனர். மேலும் அனைத்து சோதனை சாவடிகளிலும் வாகன தணிக்கை ஈடுபட்டனர்.வாக்கு எண்ணிக்கை மையத்திற்குள் செல்லும் வேட்பாளர்கள் மற்றும் வாக்கு சாவடி முகவர்கள் உள்ளிட்ட அனைத்து ஊழியர்களையும் வாக்கு எண்ணிக்கை மையத்திலிருந்து 100 மீட்டர் தொலைவில் மாநகர போலீஸ் சார்பில் அமைக்கப்பட்டிருந்த மெட்டல் டிடெக்டர் கருவி மூலம் முழுமையாக சோதனை செய்த பின்னரே வாக்கு எண்ணும் மையத்திற்குள் அனுமதித்தனர்.பஸ் நிறுத்தம் தற்காலிக மாற்றம்;மாவட்ட கலெக்டர் அலுவலகத்தின் அருகில் வாக்கு எண்ணிக்கை மையமான எல்.ஆர்.ஜி மகளிர் கலைக்கல்லூரி இருப்பதால் அசம்பாவிதங்களை தடுக்க மாவட்ட கலெக்டர் அலுவலக பஸ் நிறுத்தம் 500 மீட்டர் தள்ளி தற்காலிகமாக மாற்றினர். இதனால் பயணிகள் அனைவரும் சுமார் அரை கிலோ மீட்டர் நடந்து சென்று பஸ் ஏறும் நிலை ஏற்பட்டது.

போட்டியிட்ட 12 பேரில் 10 பேர் டெபாசிட் இழந்தனர்

திருப்பூர், மே 24: திருப்பூர் மக்களவைத் தேர்தலில் போட்டியிட்ட 12 பேரில் 10 பேர் டெபாசிட் இழந்தனர்.திருப்பூர் மக்களவைத் தொகுதிக்கான தேர்தலில் பதிவான வாக்குகள் அனைத்தும் நேற்று எண்ணப்பட்டன. அதன்படி, இந்திய கம்யூனிஸ்ட் கட்சி வேட்பாளர் சுப்பராயன் அதிக வாக்குகள் பெற்று வெற்றி பெற்றார். திருப்பூர் தொகுதியில், அதிமுக., தி.மு.க., இந்திய கம்யூ., மக்கள் நீதி மய்யம், அமமுக., நாம் தமிழர் ஆகிய கட்சிகளின் வேட்பாளர்கள் உட்பட மொத்தம் 12 பேர் போட்டியிட்டனர். தேர்தலில் மொத்தம் பதிவான வாக்குகளில் 6ல் ஒரு பங்கு வாக்குகளை பெறும் வேட்பாளர்களுக்கே டெபாசிட் தொகை திரும்ப வழங்கப்படும். திருப்பூர் தொகுதியில் மொத்தம் 11,20,010 வாக்குகள் பதிவாகியுள்ளன. அதன்படி, டெபாசிட் தொகையினை பெற சுமார் 1,86 லட்சம் வாக்குகள் பெறப்பட வேண்டும். அதன்படி, திருப்பூர் தொகுதியில் வெற்றி பெற்ற இந்திய கம்யூ., கட்சி வேட்பாளர் சுப்பராயன், 2ம் இடம் பிடித்த அதிமுக, வேட்பாளர் எம்.எஸ்.எம். ஆனந்தன் ஆகிய இரண்டு பேர் மட்டுமே 1.86 லட்சத்துக்கும் அதிகமான வாக்குகளை பெற்றுள்ளனர். 3வது இடம் பிடித்துள்ள மக்கள் நீதி மய்யம் வேட்பாளர் சந்திரகுமார் 64,657 வாக்குகளையும், 4வது இடம் பிடித்த அமமுக வேட்பாளர் செல்வம் 43,819 வாக்குகளையும், 5வது இடம் பிடித்த நாம் தமிழர் கட்சி வேட்பாளர் ஜெகநாதன் 42,189 வாக்குகளையும் பெற்றார். சந்திரகுமார், செல்வம், ஜெகநாதன் உட்பட 10 வேட்பாளர்கள் இந்த தேர்தலில் டெபாசிட் இழந்தனர்.

4,400 தபால் வாக்குகள் பதிவானது

திருப்பூர், மே 24:திருப்பூர் தொகுதியில் மொத்தம் 4,400 தபால் வாக்குகள் பதிவானது. இதில் 2,932 வாக்குகள் இந்திய கம்யூனிஸ்ட் கட்சி வேட்பாளர் சுப்பராயனுக்கு கிடைத்தது. இதற்கு அடுத்தபடியாக ஆனந்தனுக்கு (அதிமுக) 575 வாக்குகளும், சந்திரகுமாருக்கு (மக்கள் நீதி மய்ம்) 119 வாக்குகளும், செல்வத்திற்கு (அமமுக) 50 வாக்குகளும், ஜெகநாதனுக்கு (நாம் தமிழர் கட்சி )110 வாக்குகளும் கிடைத்தன.

குப்பைக்கு தீ வைப்பு வாகன ஓட்டிகள் அவதி

திருப்பூர்,மே24:திருப்பூர், மாநகரப்பகுதியில் கொட்டப்படும் குப்பைகளை அள்ளுவதற்கு போதுமான துப்புரவு தொழிலாளர்கள் இல்லாததால் தீ வைத்து அழிக்கப்படுகிறது. இதனால் ஏற்படும் புகை மூட்டத்தால், பொதுமக்கள் மற்றும் வாகன ஓட்டிகள் அவதிப்பட்டு வருகின்றனர். திருப்பூர், மாநகரப்பகுதியில் போதுமான துப்புரவு தொழிலாளர்கள் இல்லாததால் குடியிருப்பு பகுதியில் சேகரிக்கப்படும் குப்பைகளுக்கு தீ வைத்து அழிக்கப்படுகின்றது. பாலித்தீன் குப்பைகள், அழுகிய காய்கறிகள், பழைய காலணி, டயர்,  உடைந்து போன பிளாஸ்டிக் பொருட்கள் உள்ளிட்டைவைகள் குப்பையில் வீசப்படுகின்றது. இத்தகைய, குப்பைகள் நீண்ட நாட்களாக அள்ளப்படாமல் ஒரே இடத்தில் மலை போல் குவித்து வைக்கப்படுகிறது. பின்னர், யாரேனும் குப்பைகளுக்கு தீ வைத்து விடுகின்றனர். இதனால், அப்பகுதி முழுவதும் புகை மண்டலமாக காட்சியளிக்கிறது. மேலும், பிளாஸ்டிக் கழிவுகள் எரிக்கும் பொழுது காற்றில் நச்சு தன்மை கலக்கிறது. இதனால், அப்பகுதியில் செல்லக்கூடிய வாகன ஓட்டிகள், வசிக்கக்கூடிய பொதுமக்கள் அனைவரும் மூச்சு விடமுடியாமல் தவிக்கின்றனர். இதுகுறித்து பலமுறை மாநகராட்சி அதிகாரிகளிடம் முறையிட்டு தகவல் அளித்தும் எந்த நடவடிக்கையும் எடுக்கவில்லை. இதுகுறித்து பொதுமக்கள் கூறியதாவது: திருப்பூர் மாநகரப்பகுதியில் போதுமான துப்புரவு தொழிலாளர்கள் நியமித்து, முறையாக குப்பைகள் எடுத்து செல்ல வேண்டும். மேலும், குப்பைகளுக்கு யாரும் தீ வைத்து எரிக்க கூடாது என அதிகாரிகள் வலியுறுத்த வேண்டும் என்றனர்.

உடுமலை நகராட்சியில் பசுமை உரக்குடிலில் உரம் தயாரிப்பு துவக்கம்

உடுமலை,மே24:உடுமலை நகராட்சியில் தினசரி சேகரமாகும் திடக்கழிவுகள், பொள்ளாச்சி சாலையில் உள்ள நகராட்சி உரக்கிடங்கில் கடந்த 12 ஆண்டுகளாக அப்புறப்படுத்தப்பட்டு வருகிறது. திடக்கழிவு பணிகளை மேம்படுத்தும் வகையில், நகராட்சி உரக்கிடங்கில் உள்ள பழைய கழிவுகள் பயோ மைனிங் முறையில் அப்புறப்படுத்த பணிகள் நடைபெற்று வருகின்றன.மேலும் நகராட்சி பகுதியில் சேகரிக்கப்படும் கழிவுகளில், மக்கும் குப்பையில் இருந்து உரம் தயாரிக்க நகராட்சி பகுதியில் 3 பசுமை உரக்குடில்கள் அமைக்கப்பட்டு வருகின்றன.இதில் ராஜேந்திரா சாலையில் உள்ள பசுமை உரக்குடில் முழுமையாக பணி முடிந்ததால், பயன்பாட்டுக்கு கொண்டு வரப்பட்டுள்ளது.இதை நகராட்சி ஆணையர் ராஜாராம், கடந்த 22ம் தேதி துவக்கி வைத்தார். ‘விரைவில் அனைத்து உரக்குடில்களும் பயன்பாட்டுக்கு கொண்டு வரப்படும். இந்த உரக்குடில் மூலமாக மக்கும் குப்பை, இயற்கை உரங்களாக தயாரிக்கப்பட்டு விவசாயிகளுக்கு வழங்கப்படும்’ என்றார். நிகழ்ச்சியில் பொறியாளர் தங்கராஜ், உதவி பொறியாளர் ஜான்பிரபு, நகர்நல அலுவலர் (பொ) சிவக்குமார், துப்புரவு ஆய்வாளர்கள் ஆர்.செல்வம், பி.செல்வம், செல்வகுமார், ஆறுமுகம் ஆகியோர் பங்கேற்றனர்.

அவிநாசியில் 3 டன் பிளாஸ்டிக் பொருட்கள் பறிமுதல்

அவிநாசி, மே 24:அவிநாசியில் தடை செய்யப்பட்ட 3 டன் பிளாஸ்டிக் பொருட்களை நேற்று அதிகாரிகள்  பறிமுதல் செய்தனர். அவிநாசியில் - கோவை மெயின் ரோட்டில் தனியாருக்கு சொந்தமான பிளாஸ்டிக் பொருட்கள் விற்பனை செய்யும் கடை உள்ளது. இதன் குடோன் அருகில் உள்ள ஒரு கட்டிடத்தில் உள்ளது. இங்கு தடை செய்யபட்ட பிளாஸ்டிக் கவர்கள், தண்ணீர் டம்ளர் ஸ்ட்ரா மற்றும் பல வகையான பிளாஸ்டிக் பொருள்கள் இருப்பு வைத்து விற்பனை செய்வதாக பேரூராட்சி அதிகாரிகளுக்கு ரகசிய தகவல் கிடைத்தது. இதையடுத்து அவிநாசி பேரூராட்சி செயல்அலுவலர் ஈஸ்வரமுர்த்தி தலைமையில் துப்புரவு ஆய்வாளர் கருப்புசாமி, மேற்பார்வையாளர் பாலு மற்றும் துப்புரவு பணியாளர்கள் குழுவினர் ஆய்வு நடத்தினர். அப்போது குடோனில் 3 டன் பிளாஸ்டிக் பொருள்கள் பதுக்கி வைத்திருப்பது கண்டறியப்பட்டு பறிமுதல் செய்யப்பட்டது. மேலும் தடைசெய்யபட்ட பிளாஸ்டிக் பொருட்களை மீண்டும் இருப்பு வைத்தாலே விற்பனை செய்தாலோ ரூ.1 லட்சம் வரை வரை அபராதம் விதிக்கப்படும் என்றும்,கடை உரிமம் ரத்து செய்யப்படும் என்றும் பேரூராட்சி அதிகாரிகள் கடை உரிமையாளருக்கு எச்சரிக்கை விடுத்தனர்.

திருமூர்த்தி அணையில் போலீஸ் குவிப்பு

உடுமலை, மே 22:  திருமூர்த்தி அணையில் சுற்றுலா பயணிகள் உயிரிழப்பதை தடுப்பதற்காக எஸ்பி கயல்விழி உத்தரவின்பேரில் 12 போலீசார் அணையை சுற்றிலும் பாதுகாப்பு பணியில் ஈடுபடுத்தப்பட்டனர்.  திருப்பூர் மாவட்டம் உடுமலை அருகே திருமூர்த்தி அணை உள்ளது. இங்கு பஞ்சலிங்க அருவி, அமணலிங்கேஸ்வரர் கோயில் அமைந்துள்ளது. தற்போது, பள்ளிகளுக்கு கோடை விடுமுறை விடப்பட்டுள்ளதால் தினமும் ஆயிரக்கணக்கான சுற்றுலா பயணிகள் திருமூர்த்தி அணைக்கு வந்து செல்கின்றனர். அணையின் மேல் பகுதியில் அமைந்துள்ள பஞ்சலிங்க அருவியில் தண்ணீர் வராததால் சுற்றுலா பயணிகள் பொதுப்பணித்துறையின் தடையை மீறி அணைக்குள் இறங்கி குளிக்கின்றனர். சேறும், சகதியும் நிறைந்த அணையில் குளிப்பவர்கள் அகழியில் சிக்கி அடிக்கடி உயிரிழக்கின்றனர். நேற்று முன்தினம் தஞ்சாவூரை சேர்ந்த மாணவி ஒருவர் அணையில் மூழ்கி இறந்தார். இதுகுறித்து தினகரன் நாளிதழில் செய்தி வெளியானது. மேலும், சுற்றுலா பயணிகளின் உயிரிழப்பை தடுக்க அணையை சுற்றிலும் போலீஸ் பாதுகாப்பு போட வேண்டும் என சமூக ஆர்வலர்கள் கோரிக்கை விடுத்தனர். வெளியூரிலிருந்து வரும் சுற்றுலா பயணிகள் அணையின் ஆழம் தெரியாமல் குளிப்பதற்காக உள்ளே இறங்கி சேற்றில் சிக்கி உயிரிழப்பது தொடர்ந்து நடந்து வருகிறது. ஆண்டுதோறும் கோடை விடுமுறையின் போது இதுபோன்ற உயிரிழப்பை தடுக்க பொதுப்பணித்துறை மற்றும் காவல்துறை இணைந்து சுற்றுலா பயணிகளுக்கு விழிப்புணர்வு ஏற்படுத்த வேண்டும். அணையின் ஆழமான பகுதிகள் அருகே எச்சரிக்கை பலகை வைக்க வேண்டும். அதையும் மீறி குளிப்பவர்களை அணையில் இருந்து வெளியேற்ற நடவடிக்கை எடுக்க வேண்டும் என அப்பகுதி மலைவாழ் மக்கள் கோரிக்கை விடுத்திருந்தனர். இந்நிலையில் திருப்பூர் மாவட்ட எஸ்பி கயல்விழி உத்தரவின்பேரில், ஆயுதப்படை போலீசார் 10 பேரும், சட்டம் ஒழுங்கு போலீசார் 2 பேரும் என மொத்தம் 12 பேர் காலை 8 மணி முதல் மாலை 6 மணி வரை திருமூர்த்தி அணைக்கு வரும் சுற்றுலா பயணிகளை கண்காணித்து அணைக்குள் அத்துமீறி இறங்குபவர்களை எச்சரித்து வெளியேற்றி வருகின்றனர். நேற்று 2 ஆயிரத்துக்கும் மேற்பட்ட சுற்றுலா பயணிகள் திருமூர்த்தி மலைக்கு வந்தனர். அருவியில் தண்ணீர் இல்லாத காரணத்தால் அவர்கள் அத்துமீறி அணைக்குள் இறங்கி குளிக்க துவங்கினர். இதையடுத்து அணையை சுற்றிலும் பாதுகாப்பு பணியில் ஈடுபட்ட போலீசார் அங்கு குளித்துக் கொண்டிருந்தவர்களை எச்சரித்து வெளியே அனுப்பினர். அவர்கள் அறையை சுற்றிலும் கண்காணிப்பு பணியில் ஈடுபட்டனர். கோடை வெயிலால் அருவியில் குளித்து மகிழலாம் என வந்த சுற்றுலா பயணிகள் அருவியில் தண்ணீர் இல்லாததாலும், அணைக்குள் இறங்கி குளிக்க அனுமதி மறுக்கப்பட்டதாலும் ஏமாற்றத்துடன் ஊர் திரும்பினர்.

டிரைவர், நடத்துனர்களுக்கு வேலை பளு அதிகரிப்பு

திருப்பூர், மே 22: திருப்பூர் மாவட்டத்தில் அரசு போக்குவரத்து கழகத்தின் பஸ் டிரைவர், நடத்துனர்களுக்கு  தொடர் வேலை பளு காரணமாக மன அழுத்தம்அதிகரித்துள்ளது.  திருப்பூர் மாவட்டத்தில் கோவை மண்டலத்திற்குட்பட்ட அரசு போக்குவரத்து கழகத்தின் சார்பில் திருப்பூர், காங்கேயம், பல்லடம், தாராபுரம், உடுமலை ஆகிய பகுதிகளில் கிளை அலுவலகங்கள் செயல்படுகிறது. கிளைகளின் சார்பில் தொலை துார பஸ்கள், டவுன் பஸ்கள் என 900க்கு மேற்பட்ட பஸ்கள் இயக்கப்படுகிறது. நடத்துனர்களின் பணிச்சுமைகளை குறைக்க அனைத்து நடத்துனர்களுக்கும் எலக்ட்ரானிக் டிக்கெட் இயந்திரங்கள் வழங்கப்பட்டுள்ளது. தேவையான அளவு டிக்கெட் ரோல்கள் வழங்கப்பட்டது. கடந்த சில மாதங்களாக டிக்கெட் ரோல்கள் தேவையான அளவு வழங்கப்படுவதில்லை. மேலும் டிக்கெட் இயந்திரங்கள் பழுதடைந்தால் மாற்று இயந்திரங்கள் வழங்கப்படுவதில்லை. இதனால், மீண்டும் டிக்கெட் முறைக்கு மாற வேண்டிய நிலை உள்ளது. புதிதாக பணிக்கு சேர்ந்துள்ள நடத்துனர்களுக்கு கட்டணம் வாரியாக உள்ள பேப்பர் டிக்கெட் பண்டல்களை கையில் பிடிக்க முடியாமல் திணறுகின்றனர். ஸ்டேஜ் வாரியாக டிக்கெட் விற்பனை குறித்த குறிப்புகளை பட்டியலில் எழுத தெரிவதில்லை.  இதனால் நடத்துனர்கள் சொந்த செலவில் டிக்கெட் இயந்திரங்களையும், பேப்பர் ரோல்களை வாங்கி இருப்பு வைத்து பயன்படுத்தி வருகின்றனர். 100 டிக்கெட்டுக்கு ஒரு ரோல் மாற்ற வேண்டியுள்ளது. இயந்திரங்கள் பழுது ஏற்பட்டால் உடனடியாக பழுதுநீக்கி தருவதில்லை. மாதக்கணக்கில் கிடப்பில் போடுவதால் நடத்துனர்கள் மன ரீதியாக பாதிக்கப்பட்டுள்ளனர். அரசு போக்குவரத்துகழக கிளை மேனேஜர்கள் நடத்துனர்களின் சிரமங்களை கருத்தில் கொண்டு டிக்கெட் இயந்திரங்களை இருப்பு வைத்து வழங்க வேண்டும். ஏற்கனவே பயணிகளுக்கு சில்லரை வழங்குவதில் பிரச்னை, மதுபோதையில் உள்ள பயணிகளுடன் பிரச்னை, போக்குவரத்து நெரிசல், தொடர் வேலை பளு ஆகிய காரணங்களால் மன உளைச்சலுடன் வேலை பார்த்து வரும் நிலையில், டிக்கெட் இயந்திர கோளாறுகளால் மன உளைச்சல் அடைந்து வருகின்றனர்.இதே போல் டிரைவர்களுக்கும் தொடர் வேலை பளு அளித்து வருவதால், தூக்கம் இல்லாமல் பஸ்சை இயக்குகின்றனர்.இதனால் விபத்து ஏற்படுகிறது. ஒரு சில டிரைவர், நடத்துனர்கள் மதுபோதைக்கு அடிமையாவதோடு, மாரடைப்பு, பைல்ஸ், சுகர், பிரஷர் உட்பட பல்வேறு வியாதிகளோடு வேலை பார்க்கின்றனர். அரசு போக்குவரத்து கழகத்தில் வேலை பார்க்கும் டிரைவர்கள், நடத்துனர்களுக்கு தொடர் பணிகளை வழங்குவதை தவிர்த்து, ஓய்வு அளிக்க நடவடிக்கை எடுக்க வேண்டும். கடந்த 3 மாதங்களில் 10க்கும் மேற்பட்டோர் திடீர் மாரடைப்பால் இறந்துள்ளனர். 5 பேருக்கு கை, கால்கள் செயல் இழப்பு ஆகிய காரணங்களால் பாதிக்கப்பட்டு வருகின்றனர். கூடுதல் பணியாளர்களை நியமித்து டிரைவர், நடத்துனர்களின் பணிச்சுமையை குறைக்கவேண்டுமென கோரிக்கை விடுத்துள்ளனர்.

வாக்கு எண்ணிக்கை முடியும் வரை விடுதியில் வெளியூர் நபர்களை தங்க வைக்க வேண்டாம்

திருப்பூர், மே 22:  திருப்பூர் மாவட்டத்தில் வாக்கு எண்ணிக்கை முடியும் வரை விடுதி மற்றும் திருமண மண்டபங்களில் வெளியூர் நபர்களை தங்க வைக்க வேண்டாம் என எஸ்பி கயல்விழி அறிவுறுத்தி உள்ளார்.  இதுகுறித்து அவர் நேற்று வெளியிட்ட அறிக்கையில் கூறியிருப்பதாவது: திருப்பூர் மக்களவை தொகுதி வாக்கு எண்ணிக்கையின் போது கட்சி ரீதியாகவும், ஜாதி மற்றும் மத ரீதியாகவும் வெளியூர் நபர்களால் பிரச்னை ஏற்பட வாய்ப்பு உள்ளது. மேலும், அவர்கள் விடுதிகள் மற்றும் திருமண மண்டபங்களில் தங்குவதற்கு வரலாம். எனவே, உரிமையாளர்கள் வாக்கு எண்ணிக்கை முடியும் வரை வெளியூர் நபர்களை தங்க வைக்க வேண்டாம். சந்தேகப்படும் வகையில் யாராவது தங்கியிருந்தால் போலீஸ் கட்டுப்பாட்டு அறை எண் 100 மற்றும் திருப்பூர் மாவட்ட தனிப்பிரிவு 0421 -2970017, 94981 01320 என்ற எண்களில் தொடர்பு கொண்டு தகவல் கொடுக்க வேண்டும். இவ்வாறு அறிக்கையில் கூறி உள்ளார்.

வேலாயுதம்பாளையம் ஊராட்சியில் தடைசெய்யப்பட்ட பிளாஸ்டிக் பொருட்கள் பறிமுதல்

அவினாசி, மே 22: அவிநாசி ஒன்றியம் வேலாயுதம்பாளையம் ஊராட்சி, பழங்கரை ஊராட்சி  பகுதிகளில் தடைசெய்யப்பட்ட பிளாஸ்டிக் பொருட்களை அதிகாரிகள் பறிமுதல் செய்தனர். திருப்பூர் மாவட்ட கலெக்டர் பழனிசாமி உத்தரவின்பேரில், அவிநாசி வட்டார வளர்ச்சி அலுவலர் சாந்திலட்சுமி தலைமையில், மண்டல துணை வட்டார வளர்ச்சி அலுவலர் பூங்கொடி ஆகியோர் மேற்பார்வையில் 15 பேர் கொண்ட குழுவினர் வேலாயுதம்பாளையம் ஊராட்சி அவிநாசி, கோவை, ஈரோடு மெயின் ரோடு, ஆட்டையாம்பாளையம் ஆகிய பகுதிகளில் திடீர் ஆய்வு மேற்கொண்டனர். இதில் மண்டல துணை வட்டார வளர்ச்சி அலுவலர்கள் சிவராமன், ராமலிங்கம், ஊராட்சி உதவியாளர்கள் பழங்கரை செல்வம், செம்பியநல்லூர் லோகநாதன், வேலாயுதம்பாளையம் பரமேசுவரன், புதுப்பாளையம் சிவராஜ் உள்ளிட்ட பலர் கலந்து கொண்டனர்.  அப்போது தடைசெய்யப்பட்ட பிளாஸ்டிக் பொருட்களை விற்பனை செய்த மற்றும் இருப்பு வைத்திருந்த  மொத்த விற்பனையாளர்கள், பேக்கரிகள், தள்ளுவண்டிகள், மளிகை கடைகளில் தடைசெய்யப்பட்ட பிளாஸ்டிக் பைகள், ஒரு முறை மட்டும் பயன்படுத்தப்படும் பிளாஸ்டிக் டம்ளர் உட்பட 255 கிலோ பிளாஸ்டிக் பறிமுதல் செய்யப்பட்டது. மேலும், ரூ.16 ஆயிரம் அபராதம் விதிப்பட்டது. தொடர்ந்து பிளாஸ்டிக் விற்பனை செய்தால், ரூ.ஒரு லட்சம் வரை அபராதம் விதிக்கப்படும், மேலும் கடை உரிமம் ரத்து செய்யப்படும் என அதிகாரிகள் எச்சரித்தனர்.

தபால் வாக்கு எண்ண 4 உதவி தேர்தல் அலுவலர் நியமனம்

திருப்பூர், மே 22:  திருப்பூரில் தபால் வாக்குகள் எண்ணுவதற்கு 4 உதவி தேர்தல் நடத்தும் அலுவலர், ராணுவ வீரர்களின் தபால் வாக்குகள் எண்ண ஒரு உதவி தேர்தல் நடத்தும் அலுவலரும் நியமனம் செய்யப்பட்டுள்ளதாக கலெக்டர் பழனிச்சாமி தெரிவித்தார். திருப்பூர் மக்களவை தொகுதி உள்ளடக்கிய 6 சட்டமன்ற தொகுதிகளுக்கான வாக்கு எண்ணிக்கை நாளை (23ம் தேதி) ஆர்.ஜி., பெண்கள் அரசு கல்லூரியில் உள்ள வாக்கு எண்ணும் மையத்தில் நடக்கிறது. எண்ணிக்கை மையத்தில் 3 அடுக்கு பாதுகாப்பு போடப்பட்டுள்ளது.வாக்கு இயந்திரங்கள் வைக்கப்பட்டுள்ள அறைகள் மற்றும் இதர அனைத்து இடங்களிலும் கண்காணிப்பு கேமரா பொருத்தப்பட்டு கண்காணிக்கப்பட்டு வருகிறது. அனைத்து கேமரா தொகுப்புகளையும் தேர்தல் நடத்தும் அலுவலர் அறையில் பார்க்க வசதி செய்யப்பட்டுள்ளது.  மேலும், வாக்கு எண்ணும் மையத்தில் தேர்தல் நடத்தும் அலுவலர், மேலிட பார்வையாளர் தவிர இதர நபர்கள் யாரும் செல்போன் எடுத்து வர அனுமதியில்லை. தபால் வாக்குகள் எண்ணுவதற்கு நான்கு உதவி தேர்தல் நடத்தும் அலுவலர்களும், ராணுவ வீரர்களின் தபால் வாக்கு எண்ண ஒரு உதவி தேர்தல் நடத்தும் அலுவலர் நியமனம் செய்யப்பட்டுள்ளனர். 6 சட்டமன்ற தொகுதிகளில் ஒவ்வொரு சட்டமன்ற தொகுதியின் வாக்குகள் எண்ணுவதற்கு 14 மேஜைகள் அமைக்கப்பட்டுள்ளது. தபால் வாக்கு எண்ண 4 மேஜைகளும், ராணுவ வீரர்களின் தபால் வாக்குகள் ஸ்கேன் செய்வதற்கு ஒரு மேஜையும் அமைக்கப்பட்டுள்ளது. இது குறித்து கலெக்டர் பழனிச்சாமி நிருபர்களிடம் கூறுகையில்,`ஈரோடு மக்களவை தொகுதிக்குட்பட்ட திருப்பூர் திருமங்கலத்தில் கடந்த ஏப்.18ம் தேதி வாக்குபதிவின் போது மாதிரி வாக்குகள் சரி பார்க்கும் பணியில் விதிமுறை மீறப்பட்டது.இதனால், மே 19ம் தேதி மறு தேர்தல் நடந்தது. ஆகையால், வாக்குபதிவின் போது விதிமீறிய தேர்தல் அலுவலர்கள் மீது ஈரோடு மாவட்ட கலெக்டர் அறிக்கை கொடுத்த பின்பு தகுந்த நடவடிக்கை எடுக்கப்படும்.  மேலும், இதுவரை 4,290 தபால் வாக்குகள் வரப்பெற்றுள்ளது. அத்துடன் எல்ஆர்ஜி அரசு கல்லூரி வளாகத்தில் துணை ராணுவ வீரர்கள், போலீசார் என மொத்தம் 477 பேர் பாதுகாப்பு பணியில் ஈடுபட்டுள்ளனர்’ என்றார்.

காங்கயம் அருகே காற்றுக்கு மரம் முறிந்து ரோட்டில் விழுந்தது

காங்கயம், மே 22:  காங்கயம் - சென்னிமலை சாலையில் புளியமரம், வேம்பு, ஆலமரம் உள்ளது. இதில் 50 ஆண்டு வரை ஆன ஏராளமான மரங்கள் உள்ளன. இந்த சாலை கடந்த ஆண்டு விரிவாக்கம் செய்யப்பட்டபோது, மரத்தையொட்டி தார்சாலை அமைக்கப்பட்டதால், சில மரங்கள் அகற்றப்பட்டது. மேலும் சாலை விரிவாக்கத்தால் பல மரங்கள் வலுவிழந்த நிலையில் இருந்தது. இந்நிலையில் நேற்று முன்தினம் பல இடங்களில் சூறைகாற்று வீசியது. இந்த காற்றின் போது, காங்கயம் அடுத்த நால்ரோடு பகுயில் சாலையோரத்தில் இருந்த 50 ஆண்டு ஆன வேப்பமரம் முறிந்து சாலையில் விழுந்தது.   இதையறிந்த அப்பகுதி மக்கள் மரத்தை வெட்டி அகற்றும் பணியில் ஈடுபட்டனர். மரத்தின் கிளை முறிந்து அருகே யிருந்த மின் கம்பிகள் மீது விழாமல் அருகில் விழுந்ததால் பெரும் விபத்து தவிர்க்கப்பட்டது.

இருபுறமும் வளர்ந்த வேப்ப மரங்களால் அமராவதி பிரதான கால்வாய் உடையும் அபாயம்

உடுமலை, மே 22:இருபுறமும் வளர்ந்த வேப்ப மரங்களால் அமராவதி பிரதான கால்வாய் சேதமடையும் நிலை ஏற்பட்டுள்ளது. உடனடியாக மரங்களை வெட்டி அகற்ற வேண்டும் என விவசாயிகள் கோரிக்கை விடுத்துள்ளனர்.  அமராவதி அணையில் இருந்து துவங்கும் பிரதான கால்வாய், தாராபுரம் அடுத்த கோவிந்தாபுரம் வரை சுமார் 67 கிமீ., தூரம் செல்கிறது. இதன் மூலம் 27 ஆயிரம் ஏக்கர் நிலம் பாசன வசதி பெறுகிறது. இந்த வாய்க்கால் பாசனத்தை பயன்படுத்தி விவசாயிகள் நெல், கரும்பு பயிர்களை அதிகளவில் பயிரிடுகின்றனர். சீலக்காம்பட்டியில் இருந்து மெட்ராத்தி செல்லும் சாலையின் குறுக்கே பிரதான கால்வாய் செல்கிறது. இதன் இடதுபுறம் சுமார் 1 கிமீ., தூரத்துக்கு, கால்வாயின் இருபுறமும் வேப்ப மரங்கள் வளர்ந்துள்ளன. கால்வாயை மூடி மறைக்கும் அளவுக்கு அடர்த்தியாக வேப்ப மரங்கள் உள்ளன. இலைகளும், மரக்கிளைகளும் முறிந்து கால்வாய்க்குள் விழுகின்றன. இதனால், கால்வாயின் தண்ணீர் செல்லும் வேகம் குறைகிறது. குறிப்பாக கடைமடை பகுதிக்கு தண்ணீர் செல்வதில் சிக்கல் ஏற்படுகிறது. மேலும், வேப்பமர வேர்களால் கால்வாயின் இருகரைகளிலும் வெடிப்பு ஏற்பட்டு வருகிறது. இதே நிலை நீடித்தால் கால்வாய் கரை உடையும் அபாயம் உள்ளது. எனவே, இரு கரைகளிலும் உள்ள வேப்ப மரங்களை வெட்டி அகற்ற வேண்டும்.  இது குறித்து விவசாயிகள் கூறுகையில், ‘‘சிறிய மரமாக இருக்கும்போதே வெட்டி இருக்க வேண்டும். தற்போது பெரிய அளவில் வளர்ந்து கால்வாயில் இடையூறாக உள்ளது. நீண்ட நாட்களாக கவனிக்காமல் விட்டுவிட்டனர். மரக்கிளைகள் விழுந்து கிடப்பதால் தண்ணீர் கடைமடைக்கு தாமதமாக வருகிறது. எனவே, மரங்களை அகற்ற வேண்டும்,’’ என்றனர்.

விதிமீறி வைக்கப்படும் டிவைடர்களால் விபத்து அபாயம்

திருப்பூர், மே 22: திருப்பூரில் விதிமீறி, ரோடுகளில் டிவைடர் வைக்கப்படுவதால், விபத்து ஏற்படும் அபாயம் உள்ளது. இதனால், வாகன ஓட்டிகளும் சிரமத்துக்குள்ளாகி வருகின்றனர்.  மாநில மற்றும் மாவட்ட தேசிய நெடுஞ்சாலைகளில் வேகத்தடை மற்றும் டிவைடர்கள் வைப்பதற்கு பல்வேறு கட்டுப்பாடுகள் உள்ளன. போக்குவரத்து நெரிசல் அதிகமுள்ள ரோடுகளில், இதுபோன்ற தடை ஏற்படுத்தும் போது, போக்குவரத்து சீராய்வு கமிட்டி மூலம் போக்குவரத்து போலீசார், நெடுஞ்சாலை துறை அதிகாரிகளை கொண்ட குழு ஆய்வு செய்து அதற்கான நடவடிக்கை எடுக்க வேண்டும். இந் நிலையில், திருப்பூரில் விதிமீறி ஏராளமான ‘டிவைடர்’ வைக்கப்பட்டு, போக்குவரத்து மாற்றப்படுகிறது. மேலும், போக்குவரத்து அதிகமான முக்கிய ரோடுகளில், பல இடங்களில் வைக்கப்படும் டிவைடர்களால் விபத்து ஏற்படும் அபாயம் அதிகரித்துள்ளது. பள்ளி, கல்லூரிகள் முன்பு குறிப்பிட்ட நேரம் மட்டும் வைப்பதற்கு பதிலாக, டிவைடர்கள் சாலைகளில் நிரந்தரமாக வைக்கப்பட்டுள்ளது. இதை அதிகாரிகளும் கண்டுகொள்வதில்லை. குறிப்பாக, புறநகர் பகுதிகளில் வைக்கப்படும் டிவைடர்கள் இருப்பது தெரியாமல், இரவு நேரங்களில் வாகனங்கள் மோதி விபத்து ஏற்படுகிறது. அவினாசி ரோடு, பி.என்.ரோடு, தாராபுரம் ரோடு, காங்கயம் ரோடு என பல இடங்களில் அதிகாரிகளுக்கே தெரியாமல் டிவைடர் வைக்கப்படுகின்றன. எனவே, விதிமுறைப்படி ரோடுகளில் தேவையான இடங்களில் மட்டும் டிவைடர் வைக்கவும், விதிமீறி தனியார் நிறுவனங்கள் வைத்துள்ள விளம்பர டிவைடர்களை அகற்றவும் போலீசார் நடவடிக்கை எடுக்க வேண்டும்.

மாவட்டத்தில் ஆசிரியர் தகுதி தேர்வு 12 ஆயிரம் பேர் எழுதுகின்றனர்

திருப்பூர், மே 22:  திருப்பூர் மாவட்டத்தில் ஆசிரியர் தகுதி தேர்வை 31 தேர்வு மையங்களில் 12 ஆயிரம் பேர் எழுத உள்ளனர்.  கட்டாய கல்வி உரிமைச் சட்டப்படி அனைத்து பள்ளிகளிலும் ஆசிரியர்களாக பணிபுரிபவர்கள் ஆசிரியர் தகுதி தேர்வில் தேர்ச்சி பெற்றிருக்க வேண்டும் என மத்திய அரசு அறிவித்துள்ளது. இதற்கான தேர்வை ஆசிரியர் தேர்வு வாரியம் நடத்துகிறது. இந்த தேர்வு 2 தாள்களை கொண்டது. முதல் தாளில் தேர்ச்சி பெற்றவர்கள் 1ம் வகுப்பு முதல் 5ம் வகுப்பு வரையும், 2ம் தாளில் வெற்றி பெற்றவர்கள் 6ம் வகுப்பு முதல் 8ம் வகுப்பு வரையும் பாடம் நடத்த தகுதி உடையவர்கள் ஆவர். அந்த வகையில் இந்தாண்டுக்கான ஆசிரியர் தகுதித் தேர்வு அடுத்த மாதம் ஜூன் 8 மற்றும் 9ம் ஆகிய தேதிகளில் நடக்கிறது. இந்த தேர்வுக்கு கடந்த மார்ச் மாதம் 15ம் தேதி முதல் ஏப்.12ம் தேதி வரை இணையதளம் மூலம் விண்ணப்ப பதிவு நடந்தது. அதன்படி, திருப்பூர் மாவட்டத்தில் முதல் தாள் தேர்வுக்கு 4 ஆயிரத்து 500 பேரும், 2ம் தாள் தேர்வுக்கு 7 ஆயிரத்து 500 பேர் என மொத்தம் 12 ஆயிரம் பேர் விண்ணப்பித்துள்ளனர். இவர்களில் முதல் தாள் தேர்வு எழுத திருப்பூர் கல்வி மாவட்டத்தில் 7 மையங்களும், பல்லடம் கல்வி மாவட்டத்தில் 1 மையமும், தாராபுரம் கல்வி மாவட்டத்தில் 2 மையங்களும், உடுமலை கல்வி மாவட்டத்தில் 2 மையங்கள் என மொத்தம் 12 மையங்கள் அமைக்கப்பட்டுள்ளன.இதேபோல், 2ம் தாள் தேர்வை எழுத திருப்பூர் கல்வி மாவட்டத்தில் 11 மையங்களும், பல்லடம் கல்வி மாவட்டத்தில் 2 மையமும், தாராபுரம் கல்வி மாவட்டத்தில் 3 மையங்களும், உடுமலை கல்வி மாவட்டத்தில் 3 மையங்கள் என மொத்தம் 19 மையங்கள் அமைக்கப்பட்டுள்ளன. அந்த வகையில் திருப்பூர் மாவட்டத்தில் 31 மையங்கள் அமைக்கப்பட்டுள்ளதாக மாவட்ட கல்வித்துறை அதிகாரிகள் தெரிவித்தனர்.

நாளை டாஸ்மாக் கடை விடுமுறை

திருப்பூர், மே 22:  வாக்கு எண்ணிக்கை முன்னிட்டு திருப்பூரில் நாளை (23ம் தேதி) டாஸ்மாக் கடைகளுக்கு விடுமுறை அளிக்கப்பட்டுள்ளது.  திருப்பூர் மாவட்டத்தில் வாக்கு எண்ணிக்கை நாளை நடக்கிறது. இதை முன்னிட்டு டாஸ்மாக் கடைகள் மற்றும் உரிமம் பெற்ற டாஸ்மாக் பார்களுக்கு விடுமுறை அளிக்கப்பட்டுள்ளது. இதைமீறுபவர்கள் மீது கடும் நடவடிக்கை எடுக்கப்படும் என கலெக்டர் பழனிச்சாமி தெரிவித்தார்.திருப்பூரில் குற்றச்சம்பவங்கள் அதிகரிப்புதிருப்பூர், மே 22:  திருப்பூர் மாவட்டத்தில் கடந்த சில மாதங்களாக வழிப்பறி, கொலை, கொள்ளை, சூதாட்டம் உள்ளிட்ட குற்றச்சம்பவங்கள் அதிகரித்து வருகிறது. இதை தடுக்க வேண்டிய போலீசார் சிலர் துணை போவதாக குற்றச்சாட்டு எழுந்துள்ளது.  திருப்பூர் பகுதியில் தொடர் கொள்ளை, வழிப்பறி, சேவல்கட்டு, சட்டவிரோத புகையிலை பொருட்கள் விற்பனை, ஒரு நம்பர் லாட்டரி, 24 மணி நேர மது விற்பனை உள்ளிட்ட பல வகையான குற்றச்சம்பவங்கள் அதிகரித்து வருகிறது. அதுமட்டுமல்லாமல் ஆளுங்கட்சி பிரமுகர்கள் சட்டவிரோதமாக நடத்தும் சூதாட்ட விடுதிகள் திருப்பூரில் உள்ள தொழிலார்களின் வாழ்வில் ஒரு பகுதியை சூதாடிவிடுகிறது. மேலும், மாவட்டம் முழுவதும் 200க்கும் மேற்பட்ட டாஸ்மாக் கடைகள் உள்ளது. அதில் பகுதிகடைகளில் மட்டுமே பார் வசதி உள்ளது. பார்களிலும், பாருக்கு அருகில் உள்ள பகுதிகளிலும் 24 மணி நேரமும் மது விற்பனை ஜோராக நடக்கிறது. இவைகள் அந்தந்த பகுதி போலீசாரின் ஆசியுடன் நடப்பதாகவும் சமூக ஆர்வலர்கள் குற்றம் சாட்டுகின்றனர். மேலும் இது போன்ற சட்டவிரோத செயல்களில் ஈடுபடுபவர்கள் ஆளுங்கட்சி பிரமுகர்கள் மற்றும் பணபலம் கொண்டவர்களாக உள்ளனர். இதனால் சில போலீசார் அவர்களுக்கு ஆதரவாக செயல்படுவதாகவும் குற்றச்சாட்டு எழுந்துள்ளது. திருப்பூரில் இருக்கும் போலீஸ் நிலையங்களில் இது போன்ற சம்பவங்கள் தொடர்பாக புகார் அளிக்க பொதுமக்கள் சென்றால் புகாரை பெறாமல் ‘அப்படியா பார்த்துக்கொள்ளலாம்’ என்று ஒற்றை வார்த்தையில் முடித்துக்கொள்கிறார்களாம். இது குறித்து சுட்டிக்காட்டினால், ஒருசில நேரங்களில் பெயரளவுக்கு நடவடிக்கை மேற்கொள்ளப்படுகிறது. குற்ற சம்பவங்களில் புகாரை பெற்று வழக்கு பதிவு செய்து விசாரணை நடத்தி நடவடிக்கை எடுக்க வேண்டிய போலீசார் தூங்கி வழிகின்றனர். இது குறித்து சமூக ஆர்வலர்கள் கூறியதாவது: திருப்பூர் பகுதிகளில் அதிகப்படியான குற்றச்செயல்கள் அரங்கேறி வருகிறது. திருப்பூர் மாநகரப்பகுதிக்குள் பாண்டியன் நகர், போயம்பாளையம், பூலுவபட்டி, பழைய பஸ் நிலையம் போன்ற பகுதிகளில் கஞ்சா விற்பனை, மது விற்பனை நடக்கிறது. குறிப்பாக திருமுருகன் பூண்டி போலீஸ் நிலைய எல்லைக்குள் கடந்த சில நாட்களுக்கு முன்னர் கோவை போலீசார் வழக்கு ஒன்றின் விசாரணைக்காக வந்த இடத்தில் கஞ்சா பறிமுதல் செய்துள்ளனர். மேலும் மசாஜ் சென்டர் என்ற பெயரில் விபசாரம், சூதாட்ட விடுதிகள் நாளுக்கு நாள் அதிகமாகி வருகிறது. இவைகளால் பல குடும்பங்கள் சீரழிவை நோக்கி பயணிக்கிறது. இவைகளை போலீசார் கட்டுபடுத்துவதாக தெரியவில்லை. இது குறித்து பொதுமக்கள் மாவட்ட கலெக்டர், போலீசாரிடம் மனு அளித்தும் பயனில்லை. இனிமேலாவது போலீசார் கண்விழித்து நடவடிக்கை எடுக்க வேண்டும். இவ்வாறு அவர் கூறினார்.

பள்ளி மாணவர்களுக்கு வழங்க 2.23 லட்சம் புத்தகம் தயார்

திருப்பூர், மே 22: திருப்பூர் மாவட்டத்தில் பள்ளி மாணவர்களுக்கு வழங்க, 2.23 லட்சம் புத்தகங்கள் தயார் நிலையில் உள்ளது. கோடை விடுமுறை முடிந்து அடுத்த மாதம் 3ம் தேதி அனைத்து பள்ளிகளும் திறக்கப்பட உள்ளன. கல்வியாண்டு துவங்கவுள்ளதால், அதற்கான பணிகளை மாவட்ட கல்வித்துறை வேகப்படுத்தி உள்ளது. 1 முதல் 5 வரையுள்ள துவக்க பள்ளி குழந்தைகள், 6ம் வகுப்பு முதல் 8ம் வகுப்பு வரையிலான மாணவர்கள், 9 மற்றும் 10ம் வகுப்பு மாணவர்களுக்கு வழங்க முதல் கட்டமாக, 2.23 லட்சம் புத்தகங்கள் தயாரிக்கப்பட்டுள்ளது. அத்துடன், 40 பக்கம், 80 மற்றும் 190 பக்கம் கொண்ட கட்டுரை நோட்டு, ஓவியம், கிராப்ட் நோட்டு, மொழிப்பயிற்சி புத்தகம் வழங்கப்பட உள்ளது. தமிழ்நாடு அரசு பாடநூல் கழகத்தில் இருந்து ஆறு லாரிகள் மூலம் இவை அனுப்பப்பட்டது. இடுவம்பாளையம் அரசு மேல்நிலை பள்ளியில் புத்தகங்கள் அனைத்தும் பாதுகாப்பாக வைக்கப்பட்டுள்ளது. இந்த வார இறுதியில் ஒவ்வொரு தாலுகா வாரியாக, பள்ளிகளை பிரித்து, அவற்றுக்கான புத்தகங்கள் பள்ளி தலைமை ஆசிரியர் வசம் ஒப்படைக்கப்படுகிறது.அவர்கள் பள்ளி திறக்கப்படும் நாளான்று (ஜூன் 3) அனைத்து மாணவர்களுக்கும் புத்தகங்களை வழங்குவர். நடப்பு கல்வியாண்டில் 7, 10 மற்றும் பிளஸ்-2 வகுப்புகளுக்கு புதிய பாடத்திட்டம் அறிவிக்கப்பட்டுள்ளது. மாணவர் எண்ணிக்கைக்கு தகுந்தவாறு கூடுதலாக புத்தகங்கள் வழங்கப்படும் என கல்வி துறை அதிகாரிகள் தெரிவித்தனர்.