Tirupur - Dinakaran

உடுமலை பகுதியில் விதைச்சான்று உதவி இயக்குனர் ஆய்வு

உடுமலை, டிச. 19: உடுமலை, குடிமங்கலம், மடத்துக்குளம் சுற்றுவட்டார பகுதிகளில் உள்ள விதைப்பண்ணைகள், தனியார் மற்றும் அரசு விதைச்சுத்தி நிலையங்களில் கோவை, விதைச்சான்று உதவி இயக்குனர் ஆர்.சிவக்குமார் நேற்று முன்தினம் ஆய்வு செய்தார். உடுமலை அருகே உள்ள ஆண்டியக்கவுண்டனூர், கிழுவன்காட்டூர், ஜக்கம்பாளையம் பகுதியில் உள்ள உளுந்து, பாசிப்பயறு, தினை, ஆதார நிலை விதைப்பண்ணைகளில் ஆய்வு செய்து, விவசாயிகளுடன் கலந்துரையாடினார். விதைப்பண்ணை ஆய்வின்போது, வயல் தரம் மற்றும் விதை தரம் பராமரிக்கப்படுகிறதா எனவும் அதற்கான சாகுபடி குறிப்புகள் குறித்தும் விவசாயிகளுக்கு எடுத்துரைத்தார்.மேலும் உடுமலை வட்டார வேளாண்மை உதவி இயக்குனர் அலுவலகத்தில் வட்டார வேளாண் விரிவாக்க மையத்தில் இருப்பு வைக்கப்பட்டிருந்த நெல், உளுந்து மற்றும் பிற விதைகளை ஆய்வு செய்தார்.இதேபோல், குடிமங்கலம் வட்டாரத்தில் உள்ள சைமா எனப்படும் பருத்தி விதை சுத்திகரிப்பு மற்றும் சான்றளிப்பு நிலையத்திலும், மடத்துக்குளம், கணியூர், காரத்தொழுவு பகுதியிலும் ஆதார நிலை விதைப்பண்ணைகளில் ஆய்வு செய்தார். ஆய்வின்போது விதைச்சான்று அலுவலர்கள் விமலா, சர்மிளா, ஹேமலதா, ராஜேஸ்வரி உடனிருந்தனர்.

ஓட்டல் தொழிலாளர்களுக்கு நலவாரியம் அமைக்க வலியுறுத்தல்

திருப்பூர், டிச. 19: ஓட்டல்களில் வேலை செய்யும் தொழிலாளர்களுக்கு தனி நலவாரியம் அமைக்க வேண்டுமென சிஐடியூ பொதுத் தொழிலாளர் சங்கம் வலியுறுத்தியுள்ளது.திருப்பூர் பழைய பஸ் நிலையம் அருகில் பி.ஆர். அரங்கில் திருப்பூர் பொதுத் தொழிலாளர் சங்க 25 வது  மகாசபை கூட்டம் தலைவர் மூர்த்தி தலைமையில் நடந்தது. பாபு வரவேற்றார். சிஐடியூ கட்டுமானத் தொழிலாளர் சங்க மாநில பொதுச் செயலாளர் குமார் பேசினார்.  ஓட்டல் தொழிலாளர்களுக்கு தனி நலவாரியம் அமைக்க வேண்டும், சிலிண்டர் விநியோகம் செய்யும் தொழிலாளர்களுக்கு குறைந்தபட்ச மாத ஊதியம் ரூ.18 ஆயிரம் வழங்க வேண்டும் உள்ளிட்ட பல்வேறு தீர்மானங்களை நிறைவேற்றினர். கீழ்கண்ட புதிய நிர்வாகிகள் தேர்ந்தெடுக்கப்பட்டனர். பொதுத் தொழிலாளர் சங்கத் தலைவராக முருகேசன், செயலாளராக சுப்பிரமணியம், பொருளாளராக ராஜன், துணைத் தலைவர்களாக  உண்ணிகிருஷ்ணன், சண்முகம், துணைச் செயலாளர்களாக பாபு, திருச்செல்வம் ஆகிய 7 நிர்வாகிகளும், 10 பேர் நிர்வாகக்குழு உறுப்பினர்களாகவும் தேர்வு செய்யப்பட்டனர். பாபு வரவேற்றார். மூர்த்தி நன்றி கூறினார்.

இளைஞர்கள் வேலை தேடுபவர்களாக இல்லாமல் கொடுப்பவர்களாக மாற வேண்டும்

திருப்பூர், டிச.19: திருப்பூர் மாவட்ட இளைஞர்கள் புதிய தொழில் முனைவோர்களாக உருவாக வேண்டும் என மாவட்ட கலெக்டர்  வலியுறுத்தியுள்ளார். திருப்பூர்,  காலேஜ் ரோடு பகுதியில் உள்ள சிக்கண்ணா அரசு கலைக்கல்லூரியில், தொழில்  மேம்பாட்டு விழிப்புணர்வு முகாம் நடந்தது. இதில் மாவட்ட கலெக்டர் பழனிசாமி தலைமை வகித்து பேசியதாவது:  தமிழக அரசின் கீழ் இயங்கும் தொழில் முனைவோர் மேம்பாட்டு நிறுவனம், புதிதாக கல்வி புத்தாக்க மற்றும் தொழில்  முனைவோர் மேம்பாட்டுத்திட்டம் ஒன்றை அறிமுகப்படுத்தியுள்ளது. இதன் நோக்கம்  தமிழகத்தில் உள்ள 88 அரசு கலை மற்றும் அறிவியல் கல்லூரிகளில் இறுதியாண்டு  படிக்கும் மாணவ, மாணவியருக்கு பல்வேறு துறையில் உள்ள வாய்ப்புகளை எடுத்து கூறுவதாகும். சுயமாக தொழில் துவங்கும் வழிமுறைகளை மாணவர்களுக்கு விளக்க ஒரு நாள் விழிப்புணர்வு முகாம் நடத்தப்படுகிறது. அரசு வழங்க கூடிய நலத்திட்டங்களை பயன்படுத்தி, இளைஞர்கள் புதிய தொழில் முனைவோர்களாக உருவாக வேண்டும் . இன்றைய இளைஞர்கள்  வேலை தேடுபவர்களாக இல்லாமல் வேலை கொடுப்பவர்களாக மாற வேண்டும் என, கலெக்டர்  பழனிசாமி தெரிவித்தார். இந்நிகழ்ச்சியில், சிக்கண்ணா கல்லூரி முதல்வர்  ராமையா, மாவட்ட தொழில்மைய பொது மேலாளர் கந்தசாமி, தொழில் முனைவோர் மேம்பாடு  மற்றும் புத்தாக்க நிறுவனத்தின் பயிற்சி ஒருங்கிணைப்பாளர் சிவனேசன்  உள்ளிட்ட அரசு அலுவலர்கள் கலந்து கொண்டனர்.

கோரிக்கைகளை வலியுறுத்தி கிராமிய அஞ்சல் ஊழியர்கள் காலவரையற்ற வேலைநிறுத்தம்

திருப்பூர்,டிச.19: ஆண்டுக்கு 30 நாட்கள் ஊதியத்துடன் விடுப்பு உள்ளிட்ட பல்வேறு கோரிக்கைகளை வலியுறுத்தி கிராமிய அஞ்சல ஊழியர்கள் சங்கத்தினர் காலவரையற்ற வேலை நிறுத்த போராட்டத்தில் ஈடுபட்டனர். திருப்பூர், தலைமை தபால் அலுவலகம் முன்பு நடைபெற்ற ஆர்ப்பாட்டத்திற்கு சங்கத்தின் கோட்ட தலைவர் குணசேகரன் தலைமை வகித்தார். இதில், கமலேஷ் சந்திரா தலைமையிலான ஜிடிஎஸ் கமிட்டி அறிக்கையின் சிபாரிசுகள் அனைத்தும் முழுமையாக 2016 ஆம் ஆண்டு முதல் அமல்படுத்த வேண்டும், அனைத்து பணிநிறைவு பலன்களும் 2016 முதல் பணி நிறைவு பெற்றவர்களுக்கு கிடைக்கும் வண்ணம் அமல்படுத்த வேண்டும், பணிக்கொடை உச்சவரம்பு ரூ.1.50 லட்சத்திலிருந்து  ரூ.5 லட்சமாக மாற்றி அமைக்க வேண்டும். ஆண்டுக்கு 30 நாட்கள் ஊதியத்துடன் விடுப்பு வழங்க வேண்டும். ஒரே நபரால் இயங்கும் அனைத்து கிளை அஞ்சலகங்களிலும், கூடுதல் ஜிடிஎஸ் ஒருவர் நியமிக்கப்பட வேண்டும் உள்ளிட்ட பல்வேறு கோரிக்கைகளை வைத்து தமிழகம் முழுவதும் உள்ள கிராமிய அஞ்சல உழியர்கள் சங்கங்கள் சார்பில் காலவரையற்ற வேலை நிறுத்தப்போராட்டம் நேற்று முதல் துவங்கப்பட்டது. அதன் ஒரு பகுதியாக திருப்பூர் தலைமை தபால் நிலையத்தின் முன்பு நடைபெற்ற ஆர்பாட்டத்தில் செயலாளர் ரகுநாத்,பொருளாளர் ஜெயகுமார் உள்ளிட்ட 60க்கும் மேற்பட்டோர் கலந்து கொண்டு தங்களது கோரிக்கைகளை முன் வைத்து கோசங்கள் எழுப்பினார்கள். அதன்படி, நேற்று நடந்த கால்வரையற்ற வேலைநிறுத்த போராட்டத்தில் திருப்பூர் மாவட்டத்தை சேர்ந்த மொத்த 349 கிளைகளில் 250 மூடப்பட்டது, அதில், பணிபுரியும் அஞ்சல ஊழியர்கள் 600 க்கும் மேற்பட்டோர் வேலை நிறுத்தத்தில் கலந்து கொண்டனர்.

திருப்பூர் ரயில் நிலையத்தில் தண்டவாளம் தாண்டி பயணிகள் சாகசம்

திருப்பூர், டிச.19: திருப்பூர் ரயில் நிலையத்தில் தண்டவாளத்தில் நின்று பயணிகள் ரயிலில் ஏறி வருகின்றனர். இதனால், உயிரிழப்பு ஏற்பட வாய்ப்புள்ளதால், அதனை தடுக்க ரயில்வே போலீசார் முன்வரவேண்டும் என்று கோரிக்கை விடுக்கப்பட்டுள்ளது. தொழில் நிமித்தமாக கோவை மற்றும் ஈரோடு ஆகிய பகுதிகளிலிருந்து திருப்பூருக்கு தினமும் ஆயிரக்கணக்கானோர் ரயில் மூலம் வந்து செல்கின்றனர். அரசு ஊழியர்கள், பள்ளி ஆசிரியர்கள், பனியன் கம்பெனி தொழிலாளர்கள் என்று பல தரப்பினர் மாதாந்திர டிக்கெட் எடுத்து திருப்பூர் வந்து செல்கின்றனர். இவர்கள் திருச்சி-பாலக்காடு, நாகர்கோவில்-பாலக்காடு, ஈரோடு-கோவை ஆகிய பாசஞ்சர் ரயில்களில் வந்து செல்கின்றனர். பெரும்பாலான பயணிகள் மாதந்திர சீசன் டிக்கெட் எடுத்துள்ள காரணத்தாலும், கோவை மற்றும் ஈரோடு செல்லும் வழிகளில் உள்ள சிறிய ஊர்களில் இறங்க வேண்டியுள்ளதாலும் பாசஞ்சர் ரயில்களில் மட்டுமே வந்து செல்கின்றனர். இதனால், பாசஞ்சர் ரயில்களில் செல்ல எப்போதும் கூட்டம் அதிக அளவில் இருக்கும். குறிப்பாக தினமும் மாலை நாகர்கோவில்-பாலக்காடு பாசஞ்சர் ரயிலிலும், கோவை-ஈரோடு பாசஞ்சர் ரயிலிலும் ஏற பயணிகள் கூட்டம் அதிக அளவில் இருக்கும். எனவே, இந்த ரயில்களில் இடம் பிடிக்க வேண்டும் என்பதற்காக பயணிகள் பிளாட்பார்ம் மீது மட்டும் இருந்து ரயிலில் ஏறுவது இல்லை. தண்டளாளத்தை தாண்டி இறங்கி நின்று, ரயிலின் மறுபுறமும் ஏறுவர். பிளாட்பார்ம் இருக்கும் பகுதியில் பயணிகள் ரயிலில் இருந்து இறங்குவதால், ஏறுவதற்கு சற்று தாமதமாகும். இதை தவிர்க்கவும், பயணிகள் தண்டவாளத்தின் மறுபுறம் இருந்து ரயிலில் ஏறி வருகின்றனர். அதே நேரத்தில், பாசஞ்சர் ரயில் நிற்கும் தண்டவாளத்தை தொட்டாற்போல் சரக்கு ரயில்கள் செல்ல ரயில்வே டிராக் உள்ளது. இதிலும் அவ்வப்போது ரயில்கள் அதிவேகத்தில் வந்து செல்லும். பயணிகள் தண்டவாளத்தில் நின்று ஏறுவதாலும், ரயில்கள் அவ்வப்போது அதிவேகத்தில் கடந்து செல்வதாலும் உயிர்பலி ஏற்பட வாய்ப்புள்ளது. பயணி யாராவது நிலை தடுமாறி விழுந்தால் அவர் உயிருடன் மீள்வது சிரமம். மேலும், திருப்பூர் ரயில்நிலையத்தில், ரயில்வே தண்டவாளத்தை கடக்க மேம்பாலம்  உள்ள நிலையில், பலர் ரயில்வே டிராக்கையே கடந்து வருகின்றனர். இதுவும் தவிர்க்கப்பட வேண்டும். எனவே, திருப்பூர் ரயில்நிலையத்தில் தினமும் மாலை நேரங்களில் பயணிகள் ரயில்வே தண்டவாளத்தில் இருந்து மறுபக்கம் குதித்து ரயிலில் ஏறுவதை தடுக்க ரயில்வே போலீசாரும், ரயில்வே நிர்வாகமும் முன்வரவேண்டும் என்பது சகபயணிகளின் எதிர்பார்ப்பு.

மதுவிற்ற 7 பேர் கைது

திருப்பூர், டிச.19: திருப்பூரில் சட்டவிரோதமாக மது விற்பனை செய்த 7 பேரை போலீசார் கைது செய்தனர். திருப்பூர் காமாட்சி அம்மன் கோவில் வீதி, அனுப்பர்பாளையம், மில்லர் பஸ் ஸ்டாப், அங்கேரிபாளையம், கங்கா நகர் ஆகிய பகுதிகளில் உள்ள டாஸ்மாக் பார்களில் சட்டவிரோதமாக மது விற்பனை செய்யப்படுவதாக வந்த தகவலையடுத்து, மாநகர ேபாலீசார் நேற்று முன்தினம் அப்பகுதிகளில் திடீர் சோதனை நடத்தினர். அப்போது மறைவான பகுதிகளில் வைத்து மது விற்பனை செய்து கொண்டிருந்த சக்திவேல் (34), முத்துமணி (42), சதீஸ் (38), கணேஷ் (29), தர்மதுரை (19), சதீஷ்குமார் (28), இளையராஜா (27) ஆகியோரை கைது செய்தனர். அவர்களிடம் இருந்து 90 மதுபாட்டில்கள் மற்றும் 3,430 ரூபாய் பறிமுதல் செய்தனர்.

மூடுபனியால் இயல்பு வாழ்க்கை பாதிப்பு

திருப்பூர், டிச.19: திருப்பூர் மாவட்டத்தில் நேற்று காலை 5 மணி முதல் 8 மணி வரை மூடுபனியால் பொது மக்களின் இயல்பு வாழ்க்கை பாதிக்கப்பட்டது. திருப்பூர் மாவட்டத்தில் திருப்பூர் மாநகர், காங்கேயம், தாராபுரம், உடுமலை உட்பட பல்வேறு இடங்களில் நேற்று காலை 5 மணி முதல் 8 மணி வரை பனி மூட்டம் படர்ந்தது. இதனால் சில அடி துாரம் மட்டுமே கண்களுக்கு நிலப்பரப்பு தெரிந்தது. இதனால், வாகனங்கள் அனைத்தும் முகப்பு விளக்கு எரியவிட்டு ரோட்டில் மெதுவாக சென்றன. பள்ளி, கல்லுாரி செல்லும் மாணவர்கள் அலுவலகம் செல்லும் ஊழியர்கள் குறித்த நேரத்திற்கு செல்ல முடியாமல் அவதிப்பட்டனர். 8 மணிக்கு சூரியனின் வெப்பம் அதிகரிக்கவே மூடுபனி விலகியது.

யானைகள் வருவதை தடுக்க சொந்த செலவில் அகழி அமைத்த கிராம மக்கள்

உடுமலை, டிச. 19: உடுமலை அருகே மேற்கு தொடர்ச்சி மலையடிவாரத்தில் ஆண்டியூர் கிராமம் உள்ளது. வனத்தில் இருந்து வெளியேறும் காட்டு யானைகள் இங்குள்ள தோட்டங்களில் புகுந்து தென்னை, மா, மக்காச்சோள பயிர்களை சேதம் விளைவித்து வருகின்றன.யானைகளை தடுக்க வேண்டும் என வனத்துறையினரிடம் பலமுறை கோரிக்கை விடுத்தும் எந்த நடவடிக்கையும் எடுக்கப்படவில்லை.இதனால் பொறுமை இழந்த ஆண்டியூர் கிராம மக்கள் அவர்களே சொந்த செலவில், காட்டு யானைகளை தடுக்கும் வகையில் அகழி தோண்டினர்.இதுபற்றி கிராம மக்கள் கூறியதாவது:வனத்துறையினர் வந்து பார்ப்பதோடு சரி. எந்த தீர்வும் நடக்கவில்லை. சமீபத்தில் கூட 30 தென்னை மரங்களை பிடுங்கி விட்டது. அரசு நிரந்தர முடிவு காண வேண்டும். நாங்கள் தற்போது சொந்த செலவில் பள்ளம் தோண்டி உள்ளோம், என்றனர்

விளை நிலங்களில் மின் கோபுரம் அமைக்கும் விவகாரம் விவசாயிகள் 2ம் நாளாக காத்திருப்பு போராட்டம்

சூலூர், டிச. 19: விளை நிலத்தில் மின் கோபுரம் அமைக்க எதிர்ப்பு தெரிவித்து சூலூர் அருகே சுல்தான் பேட்டையில் விவசாயிகள் 2ம் நாளாக காத்திருப்பு போராட்டத்தில் ஈடுபட்டனர்.     விளை நிலத்தில் மின் கோபுரம் அமைத்து உயர் மின் அழுத்த கேபிள் கொண்டு செல்ல தமிழக அரசும், பவர்கிரிட் நிறுவனம் திட்டமிட்டுள்ளது. இதற்காக விளை நிலங்களில் அத்துமீறி நுழைந்து நில அளவீடு செய்யும் பணிகளில் ஈடுபட்டுள்ளது. ஆனால் இதற்கு விவசாயிகள் கடும் எதிர்ப்பு தெரிவித்தும் அரசு எந்த நடவடிக்கையும் எடுக்கவில்ைல.  இதை கண்டித்து விவசாய சங்கங்களின் கூட்டியக்கம் சார்பில் சூலூர் அருகே சுல்தான்பேட்டை பகுதியில் பல்லடம், பொள்ளாச்சி சாலையில் தனியார் நிலத்தில் தொடர் காத்திருப்புப் போராட்டத்தை நேற்று முன்தினம் துவக்கினர். நேற்று 2ம் நாளாக போராட்டம் நடந்தது.  இதில் திமுக மாநில துணை பொது செயலாளர் சுப்புலட்சுமி ஜெகதீசன், சுல்தான்பேட்டை ஒன்றிய திமுக செயலாளர் மகாலிங்கம் உள்ளிட்டோர் பங்கேற்றனர்.பல்லடம் அருகில் கள்ளிப்பாளையம்  பகுதியில் இரண்டாம் நாளாக போராட்டம் நடந்தது.

சேவூரில் ரூ.10 லட்சத்திற்கு நிலக்கடலை ஏலம்

திருப்பூர், டிச.19:  சேவூர் ஒழுங்கு முறை விற்பனைக்கூடத்தில் நடைபெற்ற நிலக்கடலை ஏலத்தில் ரூ 10 லட்சத்திற்கு வர்த்தகம் நடைபெற்றது. சேவூர் ஒழுங்கு முறை விற்பனைக்கூடத்தில் நேற்று முன்தினம் நடைபெற்ற ஏலத்தில் 569 மூட்டைகள் வந்திருந்தன. குவிண்டால் ஒன்றுக்கு முதல் ரக நிலக்கடலை ரூ.4,950 முதல் ரூ.5,210 வரையிலும், இரண்டாவது ரக நிலக்கடலை ரூ.4,800 முதல் ரூ.4,900 வரையிலும், மூன்றாவது ரக நிலக்கடலை ரூ 4,450 முதல் ரூ.4,700 வரையிலும் ஏலம் போனது. மொத்தம் ரூ.10 லட்சத்திற்கு ஏலம் நடைபெற்றது. இதில் 7 வியாபாரிகள் 17 விவசாயிகள் பங்கேற்றனர்.

உடுமலை, திருப்பூரில் பெருமாள் கோயில் வைகுண்ட ஏகாதசி விழா

திருப்பூர், டிச.19: திருப்பூர் வீரராகவ பெருமாள் கோவிலில் நேற்று வைகுண்ட ஏகாதசியை முன்னிட்டு சொர்க்க வாசல் திறப்பு நடந்தது. இதில் ஆயிரக்கணக்கான பக்தர்கள் கலந்துகொண்டனர். திருப்பூர்  வீரராகவ பெருமாள் கோயிலில், வைகுண்ட ஏகாதசி விழா, திருநெடுந்தாண்டகத்துடன் துவங்கியது. தொடர்ந்து பத்து உற்சவம் துவக்கம் மற்றும் திருமொழி திருநாள் விழா நடந்தது. இதையடுத்து மோகினி அலங்காரம்,  நாச்சியார் திருக்கோலம் திருவீதி உலா நடந்தது. இதன் தொடர்ச்சியாக நேற்று (18ம் தேதி) அதிகாலை 3 மணிக்கு, வைஷ்ணவ வேத விற்பன்னர்கள் வேதங்கள் முழங்க, வீரராகவ பெருமாளுக்கு மகா அபிஷேகம் நடந்தது. இதையடுத்து 5.30 மணிக்கு, சொர்க்கவாசல் திறப்பு விழா நிகழ்ச்சியும், கருட சேவை, வீதி உலா நடந்தது. இதில் ஆயிரக்கணக்கான பக்தர்கள் பங்கேற்றனர். சொர்க்கவாசல் திறப்பை முன்னிட்டு, நேற்று முன்தினம் இரவு 9 மணி முதல் சிறப்பு பஜனை நடந்தது.உடுமலை :வைகுண்ட ஏகாதசியை முன்னிட்டு உடுமலை பகுதியில் உள்ள பெருமாள் கோயில்களில் சொர்க்கவாசல் திறப்பு நிகழ்ச்சி  நேற்று அதிகாலை நடந்தது.உடுமலை நெல்லுக்கடை வீதி சௌந்திர ராஜ பெருமாள் கோயிலில் அதிகாலை 5.30 மணிக்கு சொர்க்கவாசல் திறக்கப்பட்டது. ஏராளமான பக்தர்கள் தரிசனம் செய்தனர். தொடர்ந்து சுவாமி திருவீதிஉலா நடந்தது. மாலையில் உற்சவர் ஏகாதசி திருமஞ்சனம் நடக்கிறது.உடுமலை பெரியகடை வீதி பூமி நீளா நாயகி சமேத னிவாச பெருமாள் கோயிலிலும் சொர்க்கவாசல் திறப்பு நிகழ்ச்சி நடந்தது. இதேபோல், கொழுமம் கல்யாண வரதராஜ பெருமாள் கோயிலில் வைகுண்ட ஏகாதசியை முன்னிட்டு, நேற்று அதிகாலை 3.30 மணிக்கு அபிஷேகம், 6 மணிக்கு மகா தீபாராதனை, 7 மணிக்கு சொர்க்கவாசல் திறப்பு நடந்தது. தொடர்ந்து கருட வாகனத்தில் சுவாமி திருவீதி உலா நடந்தது.உடுமலை சுற்றுவட்டார பகுதிகளில் உள்ள பெருமாள் கோயில்கள் அனைத்திலும் சொர்க்கவாசல் திறப்பு நிகழ்ச்சி விமரிசையாக நடந்தது. இதில் திரளான பெண்கள் பங்கேற்று வழிபட்டனர்.

மதுவால் வந்த விபரீதம் திருப்பூர் பனியன் தொழிலாளி கொலை வழக்கில் உறவினர் கைது

திருப்பூர், டிச.19: திருப்பூரில் பனியன் நிறுவன தொழிலாளி கொலை வழக்கில், உறவினரை போலீசார் கைது செய்து சிறையில் அடைத்தனர்.திண்டுக்கல் மாவட்டம் சிலுக்குவார்பட்டியை சேர்ந்தவர் முருகன் (20). இவருடைய நண்பர் ஆறுமுகம் (20). இவர்கள் 2 பேரும் திருப்பூர் மாஸ்கோ நகர் அருகில் உள்ள வசந்தம் நகரில் அறை எடுத்து தங்கி அங்குள்ள பனியன் நிறுவனத்தில் வேலை செய்து வந்தனர்.இந்நிலையில் கடந்த 16ம் தேதி மாலையில், முருகன் மட்டும் அறையை விட்டு வெளியே சென்றார். அதன் பின்னர் அவர் அறைக்கு திரும்பவில்லை. இதற்கிடையில் இரவு 9.30 மணிக்கு வசந்தம் நகரில் உள்ள ஒரு வீதியில் கழுத்து அறுக்கப்பட்ட நிலையில், உடலில் பல்வேறு இடங்களில் கூர்மையான ஆயுதத்தால் குத்தப்பட்டு முருகன் பிணமாக கிடந்தார். இது குறித்து திருப்பூர் வடக்கு போலீசாருக்கு தகவல் தெரிவிக்கப்பட்டது. சம்பவ இடத்திற்கு விரைந்து வந்த போலீசார் முருகனின் உடலை கைப்பற்றி, பிரேத பரிசோதனைக்கு திருப்பூர் அரசு மருத்துவமனைக்கு அனுப்பி வைத்தனர். நேற்று முன்தினம் மாலை பிரேத பரிசோதனை முடிந்து உடல் குடும்பத்தாரிடம் ஒப்படைக்கப்பட்டது. கொலை தொடர்பாக, 10க்கும் மேற்பட்டோரிடம் போலீசார் விசாரணை நடத்தினர். இதில் முருகனின் தூரத்து உறவினரான திண்டுக்கல் மாவட்டம் சிலுக்குவார் பட்டியை ேசர்ந்த ஈஸ்வரன் மகன் வீர மணிகண்டன் என்கிற சசிக்குமார் (22) என்பவரை சந்தேகத்தின் பேரில், பிடித்து தீவிர விசாரணை நடத்தினர். இதில், முருகனை அவர் தான் கொலை செய்தார் என தெரிய வந்தது. மேலும், விசாரணையில், காலேஜ் ரோட்டில் வைத்து இருவரும் மது குடித்துள்ளனர். அப்போது இருவரிடையே வாய்த் தகராறு ஏற்பட்டுள்ளது. இதில் ஆத்திரம் அடைந்த சசிக்குமார், முருகனை கத்தியால் கழுத்தை அறுத்து கொலை செய்ததும் தெரிய வந்தது. இதையடுத்து போலீசார் வழக்குப்பதிவு செய்து சசிக்குமாரை கைது செய்து சிறையில் அடைத்தனர்.

பிழை இல்லாத வாக்காளர் பட்டியல் தயாரிக்க சிறப்பு பார்வையாளர் அறிவுரை

திருப்பூர், டிச.19: திருப்பூர் மாவட்டத்தில்,  பிழை இல்லாத வாக்காளர் பட்டியலை தயாரிக்க வேண்டும் என  ஆய்வுக்கூட்டத்தில் வாக்களர் பட்டியல் சிறப்பு பார்வையாளர் அலுவலர்களுக்கு அறிவுரை வழங்கினார். திருப்பூர் மாவட்ட கலெக்டர் அலுவலக கூட்டரங்கில் நேற்று வாக்காளர் பட்டியல் சிறப்பு சுருக்கமுறை திருத்தம் - 2019, தொடர்பாக வாக்காளர் பதிவு அலுவலர் மற்றும் உதவி வாக்காளர் பதிவு அலுவலர்களுடனான ஆய்வுக்கூட்டம் கலெக்டர் கே.எஸ்.பழனிசாமி முன்னிலையில் நடந்தது. வாக்காளர் பட்டியல் சிறப்பு பார்வையாளர் வேளாண்மை விற்பனை மற்றும் வேளாண் வணிகத்துறை ஆணையர் சுன்சோங்கம் ஜடக்சிரு தலைமை வகித்தார். திருப்பூர் மாவட்டத்திலுள்ள திருப்பூர் வடக்கு, திருப்பூர் தெற்கு, பல்லடம், அவினாசி, காங்கயம், தாராபுரம், உடுமலைப்பேட்டை மற்றும் மடத்துக்குளம் ஆகிய 8 சட்டமன்ற தொகுதிகளில் உள்ள 2482 வாக்குச்சாவடிகளை உள்ளடக்கிய 1028 வாக்குச்சாவடி மையங்களிலும், வாக்காளர் பட்டியலில் பெயர் இடம் பெறாதவர்கள், வாக்காளர் பட்டியலில் உள்ள பதிவுகளில் திருத்தம், பெயர் நீக்கம் செய்யவிரும்புவோர் மற்றும் ஒரே தொகுதிக்குள் குடியிருப்பு மாறியவர்கள், முகவரி மாற்றம் செய்வது போன்ற கோரிக்கைகள் தொடர்பாக சிறப்பு முகாம்கள், அந்தந்த வாக்குச்சாவடி மையங்களில் நடைபெற்றது.  அதன்படி, கடந்த செப்.1ம் தேதி முதல் அக்.31ம் தேதி வரை பெறப்பட்ட கோரிக்கைகள் தொடர்பாக கள விசாரணை மேற்கொள்ளப்பட்டு, கணினியில் பதிவேற்றம் செய்யும் பணிகள் நடைபெற்று வருகிறது. இப்பணிகள் தொடர்பாக வாக்காளர் பதிவு அலுவலர் மற்றும் உதவி வாக்காளர் பதிவு அலுவலர்களுடனான ஆய்வுக்கூட்டம் நேற்று நடைபெற்றது. இக்கூட்டத்தில், வாக்காளர் பெயர் சேர்த்தல், பெயர் நீக்கல் மற்றும் திருத்தம் செய்ய பெறப்பட்ட மனுக்கள் தொடர்பாக விசாரணை மேற்கொள்ளப்பட்டு முடிவு செய்யப்பட்ட இனங்கள் குறித்து ஆய்வு செய்யப்பட்டது.  முடிவு செய்யப்பட்ட படிவங்கள் இந்திய தேர்தல் ஆணையத்தால் தெரிவிக்கப்பட்ட வழிகாட்டுதலின் படி கள விசாரணை செய்யப்பட்டுள்ளதா என்பது குறித்தும், பிழையில்லாத வாக்காளர் பட்டியல் தயாரிப்பதற்கான நடவடிக்கைகள் மேற்கொள்ளப்பட்டுள்ளதா என்பது குறித்தும் ஆய்வு மேற்கொள்ளப்பட்டது. பாராளுமன்ற தேர்தல் நடைபெறவுள்ளதால் திருப்பூர் மாவட்டத்தில் பிழை இல்லாத வாக்காளர் பட்டியலை தயாரிக்க அனைத்து அலுவலர்களும் ஒருங்கிணைந்து செயல்பட வேண்டுமென,வாக்களார் பட்டியல் சிறப்பு பார்வையாளர் சுன்சோங்கம் ஜடக் சிரு அறிவுரைகளை வழங்கினார். இந்த ஆய்வுக் கூட்டத்தின் போது, மாவட்ட வருவாய் அலுவலர் ச.பிரசன்னா ராமசாமி, சப்-கலெக்டர் கிரேஷ் பச்சாவு, திருப்பூர் மாநகராட்சி ஆணையாளர் சிவகுமார், தேர்தல் தனி வட்டாட்சியர் முருகதாஸ் அனைத்து வட்டாட்சியர்கள், நகராட்சி ஆணையாளர்கள் மற்றும் அரசு அலுவலர்கள் கலந்து கொண்டனர்.

பனியன் தொழிலாளர்கள் சென்ற வேன் கவிழ்ந்து விபத்து

காங்கயம், டிச. 19: காங்கயம் அருகே பனியன் தொழிலாளர்களை ஏற்றி சென்ற வேன்  கவிழ்ந்ததில்  5 பெண் உட்பட 12 பேர் காயம் அடைந்தனர்.  காங்கயத்தில் இருந்த பனியன் தொழிலாளர்களை ஏற்றி கொண்டு வேன் ஒன்று நேற்று பல்லடம் நோக்கி சென்றது. இந்நிலையில், காலை 8.30 மணியளவில் காங்கயம்-கோவை ரோட்டில் உள்ள ஒரு பெட்ரோல் பங்க் அருகே வேன் சென்ற போது திடீரென ரோட்டில்   கவிழ்ந்தது. இதில் பயணம் செய்த காங்கயத்தை சேர்ந்த ராஜேஸ்வரி(36), அன்னம்மாள்(42), வனிதா(24), சபீனா(23), சுமதி(38), ஆகிய 5 பெண் உட்பட 12 பேர் காயமடைந்தனர். இதில் 7 பேர் மட்டும் திருப்பூர் அரசு மருத்துவமனையில் சிகிச்சைக்காக சேர்க்கப்பட்டனர். மற்ற 5 பேர் லேசான காயத்துடன் காங்கயம் அரசு மருத்துவமனையில் சிகிச்சை பெற்றனர். இதற்கிடையே வேனை ஓட்டி சென்ற டிரைவர் தப்பி ஓடிவிட்டார். விபத்து தொடர்பாக காங்கேயம் போலீசார் வழக்குப்பதிந்து விசாரிக்கின்றனர்.

பெண்ணை தாக்கியவர் கைது

திருப்பூர், டிச.19:  திருப்பூர் மாவட்டம் அவிநாசியை சேர்ந்தவர் மூர்த்தி (36). இவரது மனைவி லட்சுமி (33). இவர் கடந்த 16ம் தேதி, தனது தோழி கலையரசி என்பவருடன், துணி எடுப்பதற்காக திருப்பூர் வந்துள்ளார். துணி எடுத்துவிட்டு, வீடு திரும்புவதற்காக திருப்பூர் பழைய பஸ் நிலையத்தில் பஸ்சுக்காக காத்திருந்தார். அப்போது அவர்களுக்கு அருகில் நின்றிருந்த சிவகங்கை மாவட்டம் இளையாங்குடி சாலிகிராமத்தை சேர்ந்த செல்வராஜ் என்பவர், லட்சுமியிடம் தகராறில் ஈடுபட்டதாக தெரிகிறது.  இதனால் இருவரிடையே வாக்குவாதம் ஏற்பட்டுள்ளது.  அப்போது, செல்வராஜ் தனது பாக்கெட்டில் இருந்த கீ செயினை எடுத்து லட்சுமியின் தலை மற்றும் வயிற்றில் குத்தியதாக கூறப்படுகிறது. இதில் லட்சுமிக்கு காயம் ஏற்பட்டது. இதையடுத்து லட்சுமி திருப்பூர் அரசு மருத்துவமனையில் சேர்க்கப்பட்டு சிகிச்சைப் பெற்று வருகிறார்.

புகையிலை பழக்கத்தால் சீரழியும் இளைஞர்கள் அதிகாரிகள் நடவடிக்கை எடுக்க கோரிக்கை

திருப்பூர், டிச.19: திருப்பூர் மாநகர் பகுதிகளில் வடமாநில தொழிலாளர்களின் எண்ணிக்கை அதிகரித்துள்ளதால் புகையிலை விற்பனை சூடு பிடித்துள்ளது. தமிழக இளைஞர்களும்  புகையிலை போடும் பழக்கத்திற்கு அடிமையாகியுள்ளதால் உயிரிழப்பு அபாயம் அதிகரித்து வருவதாக சமூக ஆர்வலர்கள் கவலை தெரிவித்துள்ளனர். திருப்பூர் மாநகர் மற்றும் புறநகர் பகுதிகளில் பல ஆயிரக்கணக்கான பின்னலாடை நிறுவனங்கள், பஞ்சாலைகள், ஹோட்டல்கள், பேக்கரி, தங்கும் விடுதிகள், கட்டுமானப்பணி, இரும்பு உருக்கு ஆலை பணி என 5 லட்சத்துக்கும் மேற்பட்ட வடமாநில தொழிலாளர்கள் வேலை பார்த்து வருகின்றனர். இவர்களுக்கு புகையிலை போடும் பழக்கம் இருப்பதால் கண்விழித்த நேரம் முதல் உறங்கும் நேரம் வரை புகையிலை பொருட்களை வாயில் போட்டு அடக்கிக்கொள்வது வழக்கம். வடமாநில தொழிலாளர்களை பார்த்து அவர்களுடன் வேலை பார்க்கும் தமிழக தொழிலாளர்கள், டிரைவர்கள் புகையிலை பழக்கத்திற்கு அடிமையாகி வருகின்றனர்.  புகையிலை பழக்கத்தால் புற்றுநோய் தாக்கம் நாளுக்கு நாள் அதிகரித்து, உயிரிழப்பு அபாயம் ஏற்பட்டு வருவதாக சமூக நல ஆர்வலர்கள் கவலை தெரிவித்துள்ளனர்.இது குறித்து தமிழக அரசு புகையிலை பொருட்களை தடைவிதித்துள்ளது. ஆனால் அதிகாரகள் சோதனை என்பது பெயரளவிற்கே நடக்கிறது. புகையிலை பொருட்கள் கடைகளில் திருட்டு தனமாக விற்பனை செய்ப்படுவதால், ரூ.5 க்கு கிடைத்த பாக்கெட் தற்போது ரூ.15 முதல் ரூ.20 வரை விற்கப்படுகிறது. வடமாநில இளைஞர்கள் சில மாதங்கள், சில ஆண்டுகளில் தங்களது சொந்த மாநிலங்களுக்கு செல்கின்றனர். அவர்களுக்கு ஏற்படும் உடல் உபதைகள் தமிழக இளைஞர்களுக்கு தெரிவது இல்லை. இதனால் தொடர்ந்து புகையிலையை பயன்படுத்துவதால் பல் கறுப்பு நிறமாக மாறி சொத்தை ஏற்படுகிறது. வாய் புற்றுநோய், தொண்டை புற்றுநோய், நுரையீரல் புற்றுநோயால் உடல் மெலிந்து சில ஆண்டுகள் இறப்பு ஏற்படும் என மருத்துவர்கள் எச்சரிக்கின்றனர். புகையிலை பயன்படுத்துவதால் ஏற்படும் பாதிப்புகள் குறித்து விழிப்புணர்வு நோட்டீஸ், தெரு முனை பிரச்சாரம், தெரு நாடகம் நடத்த வேண்டும்.  திருப்பூரில் புகையிலை விற்பனையை முற்றிலும் தடை செய்ய மாவட்ட நிர்வாகம் உரிய நடவடிக்கை எடுக்க வேண்டும் என்ற கோரிக்கை வலுத்துள்ளது.

தீ விபத்தில் வைக்கோல் எரிந்து நாசம்

அந்தியூர், டிச.19; அந்தியூர் அருகே உள்ள மூலகடையில் வைக்கோல் ஏற்றிவந்த டிராக்டர் ன் மீது மின்சார கம்பிகள் உரசியதில் வைக்கோல் போர்கள் எரிந்து நாசனமானது.  அந்தியூர் காந்திநகர் முனியப்பன் கோவில் தோட்டத்தை சேர்ந்தவர் தங்கராஜ். இவர் கால்நடைகளுக்காக கோபி நஞ்சகவண்டம்பாளையத்திலிருந்து டிராக்டரில் வைக்கோல் பேர்களை ஏற்றி வந்தார். மூலக்கடை சாலையில் டிராக்டர் வந்த போது மேலே இருந்த மின்கம்பத்தில் வைகோல் போர் மோதியதில் தீப்பிடித்தது.. வண்டியை நிறுத்தி டிராக்டர் மற்றும் டிரைலரை தனியாக பிரித்ததால் பெரும் சேதம் தவிர்க்கப்பட்டது.

தாழ்த்தப்பட்ட மக்களுக்கான நிலம் ஆக்கிரமிப்பு

காங்கயம்,டிச.19: காங்கயம் தாலுகா நிழலி கிராமத்தில் உள்ள புள்ளகாளிபாளையம் பகுதியில், கடந்த 1988 ஆண்டு ஆதிதிராவிட நலத்துறை சார்பில் வீடு இல்லாத தாழ்த்தப்பட்ட 20 குடும்பங்களுக்கு இலவசமாக வீட்டு மனை வழங்கப்பட்டது. அந்த இடத்தை தற்போது சிலர் ஆக்கிரமித்துளனர்.இந்த ஆக்கிரமிப்புகளை அகற்றிவிட்டு, நிலங்களை மீட்டு தரும் படி வி.சி.கட்சியினர் தனி தாசில்தார் அலுவலகத்தில் மனு கொடுத்தனர். இதில்மாவட்ட செயலாளர் தமிழ்முத்து, காங்கயம் சட்டமன்றத் தொகுதி செயலாளர் ஜான் நாக்ஸ் ஆகியோர் தலைமையில் பாதிக்கப்பட்ட மக்கள் கலந்து ெகாண்டனர்.

மீட்டு தரக்கோரி மனு ஆற்றில் கொட்டப்படும் கழிவு நடவடிக்கை எடுக்க கோரிக்கை

திருப்பூர், டிச.19:  திருப்பூரில் கோழி மற்றும் இறைச்சிக்கடைகள் ஏராளமாக உள்ளன. இறைச்சி கடைகள் மற்றும் கோழிக்கடைகளின் கழிவுகள் முறையாக வெளியேற்றப்படாமல், நகரின் மத்தியில் ஓடும் நொய்யல் ஆற்றில் தொடர்ந்து கொட்டப்படுகின்றன. கழிவுகளை மூட்டையாக கட்டி வீசப்படுகிறது. அதிலும், அணைப்பாளையம் பகுதியில் உள்ள தரைமட்ட பாலம் பகுதியில் கழிவுகள் அதிகளவில் கொட்டப்படுகின்றன. நகருக்குள் இருக்கும் இறைச்சி கடைகளில் விற்கப்படும் ஆடு, மாடு ஆகியவை நகராட்சி வதைக்கூடங்களில் அறுக்கப்பட்டு, ‘சீல்’ பெற வேண்டும். அவற்றையே விற்க வேண்டும் என்ற விதிமுறை பின்பற்றப்பட வேண்டும்.   ஆனால், முறையான கண்காணிப்பு இல்லாததால், கடைகளிலேயே அறுக்கப்பட்டு, கழிவுகள் முறைகேடாக நொய்யல் ஆறு, ஓடைகள், பொது இடங்களில் கொட்டப்படுகின்றன.  இதனால், நீர் நிலைகள் மாசடைவதோடு, கடும் துர்நாற்றம், தொற்றுநோய் பரவுதல் உள்ளிட்ட ஒட்டுமொத்த நகரின் சுகாதாரமும் கேள்விக்குறியாகிறது. இதுகுறித்து சமூக ஆர்வலர்கள் கூறுகையில், சுகாதாரதுறை அதிகாரிகளின் கண்காணிப்பு இல்லாததால், இறைச்சிக் கடைக்காரர்கள், மூட்டை மூட்டையாக கட்டி நொய்யல் ஆற்றில் கொட்டி செல்கின்றனர். இதனால் ஆறு மாசுபடுவதோடு, சுகாதாரக்கேடும் ஏற்படுகிறது. ஆகவே, மாநகராட்சி அதிகாரிகள் இறைச்சிக் கடைகளை கண்காணித்து உரிய நடவடிக்கை எடுக்க வேண்டும், என்றனர். கிராம நிர்வாக அலுவலர்கள் கண்டன பேரணி திருப்பூர்,டிச.19: கிராம நிர்வாக அலுவலகர் சங்கத்தின் சார்பில் பல்வேறு கோரிக்கைகளை வலியுறுத்தி காலவரையற்ற வேலை நிறுத்த போராட்டத்தில் ஈடுப்பட்டு வருகின்றனர். அதன் ஒரு பகுதியாக நேற்று திருப்பூரில் கண்டன பேரணியில் ஈடுபட்டனர்.கிராம நிர்வாக அலுவலர் அலுவலகங்களில் அடிப்படை வசதிகளை செய்து தர வேண்டும், ஓரே அரசாணையின் மூலமாக மாவட்ட மாறுதல் வழங்க வேண்டும், கிராம நிர்வாக அலுவலர்களுக்கான அடிப்படைக் கல்வித் தகுதியை பட்டப்படிப்பாக உயர்த்த வேண்டும் என்பன உள்ளிட்ட கோரிக்கைகளை வலியுறுத்தி கிராம நிர்வாக அலுவலர்கள் சங்கம் சார்பில் மாநில அளவில் தொடர் போராட்டம் நடைபெற்று வருகிறது. இதில் திருப்பூரில் கடந்த இரண்டு நாட்களாக நடந்த ஆர்ப்பாட்டத்தில் 200 கிராம நிர்வாக அலுவலர்கள் பங்கேற்றுள்ளனர்.  போராட்டத்தின் தொடர்ச்சியாக நேற்று திருப்பூர் தென்னம்பாளையம் அரசு பள்ளியிலிருந்து மாவட்ட கலெக்டர் அலுவலகம் வரை பேரணியாக வந்து மாவட்ட கலெக்டர் அலுவலகத்தில் தங்களது கோரிக்கைகளை வலியுறுத்தி மனு அளித்தனர். மீாவட்ட தலைவர் பழனிச்சாமி தலைமை வகித்தார். மாவட்ட செயலாளர் சசிக்குமார் முன்னிலை வகித்தார், மண்டல பொருளாளர் மாணிக்கவாசகம் பேரணியை துவக்கிவைத்தார். இதில், சுமார் 180 கலந்துகொண்டனர். இதில், கோரிக்கைகளை வலியுறுத்தி முழக்கங்களை எழுப்பினர்.

பவானிசாகர் அணைக்கு நீர்வரத்து குறைகிறது

சத்தியமங்கலம், டிச.19: ஈரோடு மாவட்டத்தின் முக்கிய நீராதாரமான பவானிசாகர் அணையின் மூலம் ஈரோடு, திருப்பூர் மற்றும் கரூர் மாவட்டங்களில் உள்ள 2 லட்சத்து 47 ஆயிரம் ஏக்கர் நிலங்கள் பாசன வசதி பெறுகின்றன. தற்போது அணையிலிருந்து கீழ்பவானி வாய்க்கால் பாசனத்திற்கு நீர் திறக்கப்பட்டுள்ளது. கடந்த நவம்பர் 28ம் தேதி வாய்க்கால் பாசனத்திற்கு கெடு முடிந்த நிலையில் கடைமடை பகுதியில் நெல்பயிர் களையெடுக்கும் பருவத்தில் உள்ளதால் பாசனத்திற்கு நீர்திறப்பு காலத்தை நீட்டிக்க வேண்டும் என விவசாயிகள் கோரிக்கை விடுத்ததை தொடர்ந்து தற்போது நீர்திறப்பு டிசம்பர் 28 வரை நீட்டிக்கப்பட்டுள்ளது. இந்நிலையில் அணைக்கு நீர்வரத்து நேற்றுமுன்தினம் 1012 கனஅடியாக நிலையில் நேற்று காலை 8 மணி நிலவரப்படி 612 கன அடியாக குறைந்தது.  அணையின் நீர்மட்டம் நேற்று காலை நிலவரப்படி 95.31 அடியாகவும் நீர் இருப்பு 25.2 டிஎம்சி யாகவும் உள்ளது. அணையிலிருந்து கீழ்பவானி வாய்க்கால் பாசனத்திற்கு 2300 கனஅடி நீரும், பவானி ஆற்றில் குடிநீர் தேவைக்காக 200 கனஅடி நீரும் வெளியேற்றப்படுகிறது. இம்மாதம் 28 ம் தேதி கீழ்பவானி வாய்க்கால் ஒற்றைப்படை மதகு பாசனத்திற்கு நீர் நிறுத்தப்படுவதோடு 2019 ஜனவரி முதல் வாரத்தில் கீழ்பவானி வாய்க்கால் இரட்டைப்படை மதகுகளுக்கு புன்செய் பாசனத்திற்காக நீர் திறக்க அரசாணை வெளியாகும் என எதிர்பார்க்கப்படுகிறது.