Tiruvalloor - Dinakaran

கும்மிடிப்பூண்டி காவல் நிலையத்தில் கமல் மீது பாஜக புகார்

கும்மிடிப்பூண்டி: மக்கள் நீதி மய்யம் தலைவர் நடிகர் கமல்ஹாசன் மீது பாஜவினர் கும்மிடிப்பூண்டி காவல் நிலையத்தில் நேற்று புகார் செய்தனர். அரவக்குறிச்சி பிரசாரத்தில் மக்கள் நீதி மய்யம் தலைவர் கமல்ஹாசன் இந்து மதத்திற்கு எதிராகவும், இந்து மதத்தினர் மனம் புண்படும்படியாகவும், தேச ஒற்றுமைக்கு ஊறுவிளைவிக்கும் விதமாக, மதக்கலவரத்தை தூண்டும் வகையில் பேசியதாக கூறி கும்மிடிப்பூண்டியில் பாஜவினர் காவல் நிலையத்தில் புகார் அளித்தனர்.கும்மிடிப்பூண்டி நகர பாஜ செயலாளர் சீனிவாசன் தலைமையில் பாஜ உள்ளாட்சி பிரிவு மாவட்ட செயலாளர் வேந்தன், வழக்கறிஞர் பிரிவு நிர்வாகி திருமலை, ஒன்றிய துணை தலைவர் வி.செல்வம், இளைஞரணி நிர்வாகி எஸ்.புருஷோத்தமன், மாவட்ட செயற்குழு உறுப்பினர் என்.பி.எஸ்.சந்தோஷ்பாபு, ஜி.மதி உள்ளிட்ட பாஜவினர் கும்மிடிப்பூண்டி காவல் நிலையத்தில் இந்த புகாரை அளித்தனர். புகாரை பெற்றுக் கொண்ட கும்மிடிப்பூண்டி இன்ஸ்பெக்டர் ஜெயக்குமார் புகார் குறித்து மாவட்ட எஸ்.பிக்கு  தெரிவிப்பதாக கூறினார். எனவே  பாஜகவினர் கலைந்து சென்றனர்.

திருநின்றவூர் முதல் திருவள்ளூர் வரை பில்லர் போட்டு 4 ஆண்டாகியும் கிடப்பில் நெடுஞ்சாலை பணிகள்: விரைந்து முடிக்க வலியுறுத்தல்

திருவள்ளூர்: சென்னை-திருப்பதி தேசிய நெடுஞ்சாலையில் திருநின்றவூர் முதல் திருவள்ளூர் டோல்கேட் வரை ஆங்காங்கே சிறு பாலங்கள் அமைக்க பில்லர்கள் போடப்பட்ட நிலையில் சாலை அமைக்கும் பணி 4 ஆண்டுகளாக நிலுவையில் உள்ளதால் வாகன ஓட்டிகள் பல்வேறு சிரமத்துக்கு ஆளாகின்றனர். மாநில தலைநகரான சென்னையில் இருந்து ஆந்திர மாநிலம் அனந்தபூர் பகுதியை இணைக்கும் வகையில் தேசியநெடுஞ்சாலை உள்ளது.  இந்த சாலையின் மொத்த நீளம் 442 கி.மீ. இதில் 360 கி.மீ சாலை ஆந்திர மாநிலத்திலும், 82 கி.மீ சாலை தமிழகத்திலும் உள்ளது. இந்த சாலை தமிழகத்தில் சென்னை, பாடி, ஆவடி, திருநின்றவூர், திருவள்ளூர், கனகம்மாசத்திரம், திருத்தணி, பொன்பாடி சோதனை சாவடி வரை உள்ளது. அங்கிருந்து ஆந்திர மாநிலம் துவங்குகிறது. இந்த தேசிய நெடுஞ்சாலையில், சென்னையில் இருந்து திருநின்றவூர் வரையிலும், திருவள்ளூர் டோல்கேட்டில் இருந்து பொன்பாடி வரையிலும் நெடுஞ்சாலை அமைக்கப்பட்டுள்ளது.இதற்கான சுங்க வரியும் பட்டறைபெரும்புதூரில் உள்ள சுங்கச்சாவடியில் வாகன ஓட்டிகளிடம் வசூலிக்கப்பட்டு வருகிறது. இந்நிலையில் திருநின்றவூரில் இருந்து திருவள்ளூர் டோல்கேட் வரை நெடுஞ்சாலை அமைக்க நிலங்கள் மீட்கப்பட்டு தேவைப்படும் இடங்களில் சிறு பாலங்கள் அமைக்கவும் பில்லர்கள் எழுப்பி கட்டப்பட்டன.ஆனால் கடந்த 4 ஆண்டுகளாக பணிகள் கிடப்பில் உள்ளது. இதனால், வாகன ஓட்டிகள் திருநின்றவூரில் இருந்து திருவள்ளூர் வரை போக்குவரத்து நெரிசலில் சிக்கி மிகவும் அவதிப்படுகின்றனர். மேலும், இச்சாலை முற்றிலும் சேதமடைந்து போக்குவரத்துக்கு லாயக்கற்ற நிலையில் உள்ளது. எனவே சென்னை-திருப்பதி தேசிய நெடுஞ்சாலையில் திருநின்றவூர் முதல் திருவள்ளூர் டோல்கேட் வரை நிலுவையில் உள்ள நெடுஞ்சாலை அமைக்கும் பணியை துவக்கி விரைந்து முடிக்க சம்பந்தப்பட்ட அதிகாரிகள் நடவடிக்கை எடுக்க வேண்டும் என்ற கோரிக்கை எழுந்துள்ளது.

புழல் 22வது வார்டில் துருப்பிடித்து வீணாகும் வாகனங்கள்: ஏலம் விட மக்கள் கோரிக்கை

புழல்: புழல் 22வது வார்டு காந்தி பிரதான சாலையில் மக்கள் பயன்பாட்டுக்கு குடிநீர் மேல்நிலை நீர்தேக்க தொட்டி உள்ளது. இதன் அடிப்பகுதியில் புழல் பேரூராட்சிக்கு சொந்தமான குப்பை அள்ளும் வாகனங்கள் துருப்பிடித்த நிலையில் நிறுத்தப்பட்டிருந்தது. இந்த வாகனங்களை சுற்றிலும் ஏராளமான செடி, கொடிகள் வளர்ந்து முட்புதர் மண்டி காட்சியளிக்கிறது. இதனால் அருகிலுள்ள வீடுகளுக்கு  விஷப்பூச்சிகள் ஊடுருவி வருகின்றன. மேலும், குடிநீர் தொட்டியின் அடிப்பகுதியில் அதிகளவு குப்பைகள் தேங்கி உள்ளதால், அந்த பகுதி மக்களுக்கு வழங்கப்படும் குடிநீரில் கழிவுகள் கலந்து, பல்வேறு தொற்று நோய் பரவும் அபாயமும் உள்ளது. இதுகுறித்து சம்பந்தப்பட்ட அதிகாரிகளிடம் பலமுறை புகாரளித்தும் துருப்பிடித்த வாகனங்கள் மற்றும் குப்பைக்கழிவுகளை அகற்றுவதற்கு இதுவரை எந்த நடவடிக்கையும் எடுக்கப்படவில்லை என, அப்பகுதி மக்கள் குற்றம்சாட்டுகின்றனர். எனவே துருப்பிடித்து வீணாகும் பேரூராட்சிக்கு சொந்தமான குப்பை அள்ளும் வாகனங்களை ஏலத்தில் விடவும், தேங்கி கிடக்கும் குப்பைக் கழிவுகளை அகற்றவும் சம்பந்தப்பட்ட அதிகாரிகள் உரிய நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனர்.

கும்மிடிப்பூண்டி அருகே கலப்பட டீசல் விற்றவர் கைது: 500 லிட்டர் பறிமுதல்

கும்மிடிப்பூண்டி: கும்மிடிப்பூண்டி அருகே உள்ள காயலான் கடைகளில் பதுக்கி கலப்பட டீசல் விற்றவரை போலீசார் கைது செய்தனர். கும்மிடிப்பூண்டி புதுவாயல், பெருவாயல், கவரப்பேட்டை, கும்மிடிப்பூண்டி பைபாஸ், எளாவூர், சாமிரெட்டி கண்டிகை, கோரிமேடு உள்ளிட்ட பகுதிகளில்  உள்ள காயலான் கடைகளில் திருட்டு பொருட்கள் வாங்குவதாக  கும்மிடிப்பூண்டி காவல் துணை கண்காணிப்பாளர் கல்பனா தத்துக்கு புகார் வந்தது. அவரது உதரவின்பேரில் சிப்காட் போலீசார் நேற்று அந்த பகுதிக்கு உட்பட்ட காயலான் கடைகளில் தீவிரமாக கண்காணித்து வந்தனர். அப்போது கும்மிடிப்பூண்டி பைபாஸ் கோரிமேடு பகுதி கடையை சோதனை செய்தபோது ஒருவர் 500 லிட்டர் தண்ணீர், 50 லிட்டர் டீசல் பதுக்கி வைத்திருப்பதை கண்டுபிடித்து பறிமுதல் செய்தனர். விசாரணையில் சென்னை மாங்காடு பகுதியை சேர்ந்த வெங்கடேசன் (50) என்பதும், டீசலுடன் தின்னர் கலந்து கடைக்கு விற்கப்பட்டதும் தெரிந்தது. எனவே அவரை போலீசார் கைது செய்தனர்.  இதுதொடர்பாக பூந்தமல்லி பகுதியை சேர்ந்த ஜெயக்குமாரை என்பவரை போலீசார் தேடி வருகின்றனர்.

திருவள்ளூர், சென்னை, காஞ்சியில் தண்ணீர் பஞ்சம் காலி குடங்களுடன் சாலை மறியல்

திருத்தணி: திருத்தணி அருகே சிவாடா கிராமத்தில் 400க்கு மேற்பட்ட குடும்பத்தினர் வசித்து வருகின்றனர். இங்கு, கடந்த சில வாரங்களாக முறையாக குடிநீர் வழங்கப்படவில்லை என்று கிராம மக்கள் சரமாரி குற்றம்சாட்டுகின்றனர்.  இதுதொடர்பாக பொதுமக்கள் அளித்த புகாரின்பேரில் வட்டார வளர்ச்சி அலுவலகம் சார்பில் ₹2.50 லட்சம் வழங்கி, பைப் லைன் அமைத்து குடிநீர் தட்டுப்பாட்டை போக்க உத்தரவிட்டதாக கூறப்படுகிறது. ஆனால், சிவாடா ஊராட்சி நிர்வாகத்தின் அலட்சியம் காரணமாக பைப் லைன் அமைக்கப்படாததால் குடிநீர் கிடைப்பதில் தட்டுப்பாடு நிலவுகிறது. இதுகுறித்து பலமுறை அதிகாரிகளிடம் புகாரளித்தும் எந்த நடவடிக்கையும் எடுக்காததால் ஆத்திரம் அடைந்த அப்பகுதி மக்கள் திருத்தணி-நாகலாபுரம் சாலையில் நேற்று காலிக் குடங்களுடன் திடீரென மறியல் போராட்டத்தில் ஈடுபட்டனர். தகவலறிந்து, ஊராட்சி அதிகாரிகள் சம்பவ இடத்துக்கு விரைந்து வந்து சாலை மறியலில் ஈடுபட்டவர்களிடம் சமரச பேச்சுவார்த்தை நடத்தினர். அப்போது முறையாக குடிநீர் வழங்க நடவடிக்கை எடுக்கப்படும் என்று அதிகாரிகள் உறுதியளித்ததை தொடர்ந்து, மறியலை கைவிட்டு கலைந்து சென்றனர். இதனால் அப்பகுதியில் சிறிதுநேரம் போக்குவரத்து பாதிப்பு ஏற்பட்டது. செங்கல்பட்டு:  திருக்கழுக்குன்றம் ஒன்றியம் ஒத்திவாக்கம் ஊராட்சி செல்வி நகரில் குடிநீர் கிடைக்காமல் பொதுமக்கள் அவதிப்பட்டு வந்தனர். இதுகுறித்து பலமுறை புகாரளித்தும் ஊராட்சி செயலாளர் நடவடிக்கை எடுக்காததால் ஆத்திரம் அடைந்த அப்பகுதியை சேர்ந்த பெண்கள் உள்பட 200க்கு மேற்பட்டோர் காலி குடங்களுடன் செங்கல்பட்டு-பொன்விளைந்தகளத்தூர் சாலையில் மறியலில் ஈடுபட்டனர். பல்லாவரம்:  குன்றத்தூர் அருகே தரப்பாக்கம் பகுதியில் தாம்பரம்-  மதுரவாயல் செல்லும் புறவழிச்சாலையை ஒட்டி அணுகு சாலையில் தனியாருக்கு  சொந்தமான தண்ணீர் கம்பெனிகள்  உள்ளன. இந்நிலையில் நேற்று இப்பகுதியில் உள்ள குடியிருப்புகளில் தண்ணீர்  தட்டுப்பாடு ஏற்படுவதாக கூறி தரப்பாக்கம் மற்றும் தண்டலம் ஊராட்சி பகுதியை  சேர்ந்த  பொதுமக்கள் சுமார் 100க்கும் மேற்பட்டோர் தண்ணீர் கம்பெனியை  மூடக்கோரி முற்றுகையிட்டு, சாலை மறியலில்  ஈடுபட்டனர். மதுராந்தகம்:  மதுராந்தகம் நகராட்சிக்கு உட்பட்ட 24 வார்டுகளிலும் கடந்த சில வாரங்களாக ஒருநாள் விட்டு ஒருநாள் குடிநீரும், ஒருசில பகுதிகளில் 2 நாளைக்கு ஒருமுறையும் குடிநீர் வினியோகம் செய்யப்பட்டு வருகிறது. இதனால் பெரும்பாலான மக்கள் போதிய குடிநீர் கிடைக்காமல் அவதிப்பட்டு வந்தனர். இதுகுறித்து நகராட்சி நிர்வாகத்திடம் பலமுறை புகார் தெரிவித்தும், எவ்வித நடவடிக்கையும் எடுக்கவில்லை. நகராட்சி நிர்வாகத்தின் மெத்தனப் போக்கை கண்டித்து மதுராந்தகம்-சென்னை நெடுஞ்சாலையில் பஸ் நிலையம் நுழைவாயில் எதிரே மற்றும் நகராட்சி அலுவலகம் முன்பு நேற்று காலை 8 மணியளவில் பெண்கள் உட்பட 100க்கு மேற்பட்டோர் காலி குடங்களுடன் சாலை மறியலில் ஈடுபட்டனர்

கையகப்படுத்தியது போக மீதமுள்ள நிலங்களை பட்டா மாற்றம் செய்ய வேண்டும்: 12 கிராம விவசாயிகள் எதிர்பார்ப்பு

திருத்தணி: திருத்தணி வழியாக கடந்த 8 ஆண்டுகளுக்கு முன்பாக சென்னை-திருப்பதி தேசிய நெடுஞ்சாலை பணி துவங்கப்பட்டது. இதற்காக 200 அடி அகலத்தில் சாலையை அமைக்க திட்டமிடப்பட்டு, விவசாயிகள் மற்றும் பொதுமக்களிடம் இருந்து நிலம் கையகப்படுத்தும் பணி துவங்கியது. இதன்படி திருத்தணி வட்டத்துக்கு உட்பட்ட காஞ்சிப்பாடி, கூளூர், கனகம்மாசத்திரம், பனப்பாக்கம், ஆற்காடுகுப்பம், நாபளூர், லட்சுமிபுரம், சத்திரஞ்ஜெயபுரம், பட்டாபிராமபுரம், தரணிவராகபுரம், முருக்கம்பட்டு மற்றும் பொன்பாடி உள்பட பல்வேறு பகுதிகளில் ஏராளமான விவசாய நிலங்கள் கையகப்படுத்தப்பட்டன. இதற்காக சாலையின் அகலத்துக்கு ஏற்ப இருபுறத்திலும் அளவீடு செய்து நிலங்களை வருவாய் துறையினர் கையகப்படுத்தினர். சாலை அமைக்க ஒரு சர்வே நம்பரில் தேவையான நிலங்களை எடுத்துக்கொண்டு அதற்கான இழப்பீட்டு தொகையை பொதுமக்களுக்கும், விவசாயிகளுக்கும் தேசிய நெடுஞ்சாலைத்துறை வழங்கியதாகவும், மீதமுள்ள நிலங்களை பட்டா மாற்றம் செய்து தரவில்லை என்றும் குற்றச்சாட்டு எழுந்துள்ளது. இதுகுறித்து டாக்டர் கெங்குசாமி நாயுடு மெட்ரிக்குலேஷன் பள்ளி நிர்வாகம் தரப்பில் கூறுகையில், ‘‘பட்டாபிராமபுரம் கிராமத்தில் எங்களுக்கு சொந்தமாக நிலம் உள்ளது. அந்த நிலத்தில் கெங்குசாமி நாயுடு ராஜலட்சுமி அம்மாள் கலைக்கல்லூரி கட்டப்படுகிறது. தேசிய நெடுஞ்சாலையையொட்டி, 30 சென்ட் நிலம் இருந்தது. இதில் 12 சென்ட் நிலத்தை சாலை அமைக்க உட்பிரிவு செய்து எடுத்துக்கொண்டு இழப்பீடு தொகையையும் கொடுத்துவிட்டனர். மீதம் உள்ள 18 சென்ட் நிலத்தை எங்களுக்கு பட்டா மாற்றி தர வேண்டும். இதுகுறித்து வட்டாட்சியரிடம் மனு கொடுத்தோம்.ஆனால் சிறப்பு மாவட்ட வருவாய் அலுவலர், தேசிய நெடுஞ்சாலை துறையினர் பட்டா மாற்றம் செய்யக் கூடாது என தடை உத்தரவு பிறப்பித்துள்ளனர். இதனால் எங்கள் நிலத்தை பட்டா மாற்றம் செய்ய முடியாத நிலை உள்ளது. இதனால் கல்லூரி பணி மேற்கொள்வதில் சிரமம் ஏற்பட்டுள்ளது. இதே நிலைதான் 12 கிராம விவசாயிகளுக்கும் உள்ளது.எனவே தேசிய நெடுஞ்சாலை துறை உடனடியாக எங்களுக்கு உரிமையான நிலங்களை பட்டா மாற்றிக் கொள்ள, தேசிய நெடுஞ்சாலையும், மாவட்ட கலெக்டரும் தடையை நீக்க வேண்டும்’’ என்றனர்.

பராமரிப்பு பணி காரணமாக மின்சார ரயில்கள் ரத்து: தெற்கு ரயில்வே அறிவிப்பு

சென்னை: தெற்கு ரயில்வே வெளியிட்ட அறிக்கை: பராமரிப்பு பணி காரணமாக கும்மிடிப்பூண்டி - சென்னை கடற்கரை இடையே  இன்று முதல் 21ம் தேதி வரை இரவு 9.40 மணிக்கு இயக்கப்படும் மின்சார ரயில் ரத்து செய்யப்பட்டு, கொருக்குப்பேட்டை முதல் சென்னை கடற்கரை இடையே இயக்கப்படும் மின்சார ரயில் மூர்மார்க்கெட் வரை இயக்கப்படும். மேலும் சென்னை கடற்கரை - அரக்கோணம் இடையே நாளை முதல் 22ம் தேதி பிற்பகல் 1.20 மணிக்கு இயக்கப்படும் மின்சார ரயில் மூர்மார்க்கெட்டில் இருந்து பிற்பகல் 1.25 மணிக்கு புறப்படும். மேலும் கொச்சி வேலி- கவுகாத்தி இடையே ஜூன் 9,16,23,30 மற்றும் ஜூலை 7,14 ஆகிய தேதிகளில் பிற்பகல் 2 மணிக்கு சிறப்பு ரயில்கள் இயக்கப்படுகிறது.

பூந்தமல்லி பகுதியில் உள்ள டாஸ்மாக் கடைகள் 3 நாட்கள் விடுமுறை: கலெக்டர் உத்தரவு

திருவள்ளூர்: திருவள்ளூர் மாவட்ட கலெக்டர் மகேஸ்வரி ரவிக்குமார் வெளியிட்டுள்ள அறிக்கை: வரும் 19ம் தேதி திருவள்ளூர் நாடாளுமன்ற தொகுதிக்கு உட்பட்ட பூந்தமல்லி சட்டமன்ற தொகுதி கன்னபாளையம் வாக்குச்சாவடி எண் 195க்கு நாடாளுமன்றம் மற்றும் சட்டமன்ற இடைத்தேர்தலை  முன்னிட்டு மறுவாக்குப்பதிவு நடைபெற உள்ளது. எனவே தமிழ்நாடு மதுபான உரிமம் மற்றும் அனுமதி விதிகள் 1981 மற்றும் தமிழ்நாடு மதுபான சில்லறை விற்பனை விதிகள் 2003ன்படி மறுவாக்குப் பதிவு நடைபெறும் கன்னபாளையம் கிராமம் பூந்தமல்லி தொகுதியில் வருவதால் சட்டமன்ற தொகுதிக்கு உட்பட்ட பகுதிகளில் இயங்கும் டாஸ்மாக் மதுபான கடைகள் மற்றும் பார்கள் அனைத்தும் இன்று மாலை 6 மணி முதல் வாக்குப்பதிவு நடைபெறும் நாளான 19ம் தேதி மாலை 6 மணி வரை கண்டிப்பாக மூடப்பட வேண்டும். இவ்வாறு அதில் கூறப்பட்டுள்ளது.

தாக்கியவர்கள் மீது நடவடிக்கை எடுக்காததால் ஆந்திரா போலீசை கண்டித்து டிரைவர் தற்கொலை மிரட்டல்

* ஆலமரத்தில் ஏறி ‘அலம்பல்’ * போக்குவரத்து கடும் பாதிப்புஊத்துக்கோட்டை: தாக்கியவர்கள் மீது நடவடிக்கை எடுக்க தயக்கம் காட்டும் ஆந்திர போலீசை கண்டித்து, ஊத்துக்கோட்டையில் ஆலமரத்தின் மீது ஏறி லாரி டிரைவர் தற்கொலை மிரட்டல் விடுத்தார். இச்சம்பவத்தால் அந்த பகுதியில் சுமார் 2 மணி நேரத்துக்கு போக்குவரத்து பாதிக்கப்பட்டது. சென்னை-திருப்பதி நெடுஞ்சாலையில் உள்ள  ஊத்துக்கோட்டை   காவல் துறை மற்றும் ஆர்.டி.ஒ செக் போஸ்ட்  அருகில் 100 அடி உயர ஆலமரம் உள்ளது. இந்த மரத்தின் 70 அடி உயரத்தில் நேற்று பகல் 11.30 மணிக்கு ஒருவர் ஏறி தற்கொலை செய்ய போவதாக மிரட்டினார். தகவலறிந்து ஊத்துக்கோட்டை  டிஎஸ்பி சந்திரதாசன், இன்ஸ்பெக்டர் அனுமந்தன் மற்றும் போலீசார் சம்பவ இடத்திற்கு வந்து அவரை கீழே இறங்குமாறு கூறினர். ஆனால் அவர் கீழே  இறங்க மறுத்ததால் தேர்வாய் சிப்காட் தீயணைப்பு துறையினருக்கு தகவல் கொடுத்தனர். இதையடுத்து, அதிகாரி ராஜு தலைமையில் தீயணைப்பு துறையினர் விரைந்து வந்து தார்ப்பாயை கீழே பிடித்தபடி தற்கொலை மிரட்டல் விடுத்தவருடன் பேச்சுவார்த்தை நடத்தினர். அப்போது அந்த ஆசாமி, ‘‘கலெக்டர் வந்தால் தான் கீழே இறங்குவேன்’’ என கூறினார்.ஆலமரத்தின் மீது ஏறி ஆசாமி தற்கொலை செய்து கொள்ளப்போகும்  தகவல் காட்டு தீயை போல் பரவியது. இதனால் பொதுமக்கள் அதிக அளவில் அங்கு கூடினர். இதற்கிடையே அவரை மீட்பதற்காக தீயணைப்பு துறை வீரர் ஒருவர் ராட்சத ஏணியை பயன்படுத்தி மரத்தின் மீது ஏறினார். இதையறிந்த ஆசாமி, ‘‘நீங்கள் மேலே ஏறாதீர்கள். நானே இறங்கி வருகிறேன்’’ என கூறிவிட்டு கீழே இறங்கினார். போலீசார் விசாரணையில் சிவகாசியை சேர்ந்த லாரி டிரைவர் ஆப்ரகாம் (42)  என்பதும், ஆந்திராவில் தன்னை தாக்கியவர்கள் மீது ஆந்திர போலீஸ் நடவடிக்கை எடுக்கவில்லை என்பதால் தான் தற்கொலைக்கு முயன்றதாக கூறினார். இதையடுத்து ஆப்ரகாமை 108 ஆம்புலன்ஸ் மூலம் ஊத்துக்கோட்டை அரசு மருத்துவமனைக்கு சிகிச்சைக்கு அனுப்பினர். அங்கு சிகிச்சை முடிந்த பிறகு மீண்டும் காவல் நிலையம் கொண்டு வந்து, போலீசார்  விசாரணை நடத்தி வருகின்றனர். இந்த சம்பவத்தால் 2 மணிநேரத்துக்கு ஊத்துக்கோட்டையில் பரபரப்பும், சென்னை-திருப்பதி சாலையில் கடும் போக்குவரத்து நெரிசலும்  ஏற்பட்டது.

விளையாடிக்கொண்டு இருந்தபோது கொதிக்கும் எண்ணெயில் தவறி விழுந்து சிறுமி பலி

திருவள்ளூர்: திருவள்ளூர் அருகே விளையாடிக்கொண்டிருந்த சிறுமி எண்ணெய் கடாயில் தவறி விழுந்து பலியான சம்பவம் பெரும் சோகத்தை ஏற்படுத்தி உள்ளது. திருவள்ளூர் அடுத்த செதில்பாக்கம் கிராமத்தை சேர்ந்தவர் கோபி (30). இவர், தனது மனைவி மற்றும் 3 மகள்களை கோடை விடுமுறையை முன்னிட்டு, போளிவாக்கத்தில் உள்ள தனது மாமியார் வீட்டுக்கு அனுப்பி வைத்தார். அங்கு, கடந்த 10ம் தேதி மாலை வீட்டில் கல் அடுப்பு வைத்து கடாயில் வடை சுட்டுக்கொண்டு இருந்தனர். அப்போது விளையாடிக்கொண்டு இருந்த 3வது மகள் பவித்ரா (4) எதிர்பாராத விதமாக கடாய் மீது விழுந்தார். இதில் கை, கால் மற்றும் உடலில் தீக்காயம் ஏற்பட்டு அலறினாள்.உடனடியாக சிறுமியை சிகிச்சைக்கென திருவள்ளூர் அரசு மருத்துவமனையில் சேர்த்தனர். அங்கிருந்து மேல் சிகிச்சைக்காக சென்னை கீழ்ப்பாக்கம் அரசு மருத்துவமனையில் அனுமதிக்கப்பட்டார். அங்கு சிகிச்சை பலனின்றி நேற்று சிறுமி பவித்ரா இறந்தார். இதுகுறித்து மணவாளநகர் போலீசார் வழக்குப்பதிந்து விசாரித்து வருகின்றனர்.

திருத்தணி பீரகுப்பம் கிராமத்தில் சாதி சான்று கோரி தாசில்தாரிடம் மனு: விரைந்து வழங்குவதாக உறுதி

திருத்தணி: திருத்தணி, பீரகுப்பம் கிராமத்தை சேர்ந்த பொதுமக்கள் சாதி சான்று வழங்கிடக் கோரி, வருவாய் கோட்டாட்சியர் அலுவலகத்தில் மனுவுடன் குவிந்தனர். கோட்டாட்சியர் இல்லாததால் அவர்களது மனுவை தாசில்தார் பெற்றுக்கொண்டு நடவடிக்கை எடுப்பதாக உறுதி அளித்தார். திருத்தணி பீரகுப்பம் கிராமத்தில் 50க்கும் மேற்பட்ட அருந்ததி மக்கள் வசிக்கின்றனர். இந்த வகுப்பை சேர்ந்த மக்களுக்கு ஆதிதிராவிடர் சாதி சான்று வழங்க வேண்டி கிராம நிர்வாக அதிகாரியிடம் மனு கொடுத்து இருந்தனர். இந்நிலையில் இதற்கான உரிய ஆதாரங்கள் ஒப்படைக்கவில்லை என்று கூறி இவர்களது மனு நிராகரிக்கப்பட்டதாக கூறப்படுகிறது. இதனால், பீரகுப்பம் கிராமத்தை சேர்ந்த 40க்கும் மேற்பட்டோர் திருத்தணியில் கோட்டாட்சியார் அலுவலகத்தில் தலித் மக்கள் முன்னணி அமைப்பாளர் வழக்கறிஞர் மு.சு. திருநாவுக்கரசு தலைமையில் நேற்று கோரிக்கை மனுக்களுடன் குவிந்தனர்.அப்போது அலுவலகத்தில் ஆர்டிஓ இல்லாததால், தாசில்தார் செங்கலா அவர்களது மனுக்களை பெற்றுக்கொண்டு உடனடியாக சாதி சான்றுகள் வழங்க நடவடிக்கை எடுப்பதாக உறுதி அளித்தார். பள்ளி, கல்லூரிகளில் தனது பிள்ளைகளை சோர்ப்பதற்கு சாதி சான்று அவசியமாக உள்ளதால் விரைந்து வழங்க வேண்டும் என்று கோரிக்கை விடுத்தனர். இதையடுத்து உடனடியாக நடவடிக்கை எடுப்பதாக கூறியதை தொடர்ந்து பொதுமக்கள் அனைவரும் கலைந்து சென்றனர். அப்போது, மண்டல துணை வட்டாட்சியர் மதியழகன் மற்றும் வருவாய்துறை அதிகாரிகள் உடன் இருந்தனர்.

12 மாணவர்களை தேனீக்கள் கொட்டிய விவகாரம் அறிவியல் கழக நிர்வாகியை கைது செய்து விசாரிக்க முடிவு: அனுமதி இல்லாமல் அழைத்து சென்றது அம்பலம்

திருவள்ளூர்: திருவள்ளூர் மாவட்டம் பூண்டி அருகே உள்ளது கூடியம் குகை. இது ஒரு தொன்மையான வரலாற்றுக் குகை வாழிடம் ஆகும். தொல்லியல் ஆய்வுச் சான்றுகளின்படி இக்குகைகள் பழைய கற்கால மனிதர்களின் வாழ்விடங்களாக இருந்தவையாக கருதப்படும் இடமாக திகழ்கிறது. இந்த இடம் வனத்துறை கட்டுப்பாட்டில் உள்ளது. இந்நிலையில் தமிழ்நாடு அறிவியல் கழகம் சார்பில் அதன் நிர்வாகி வேலாயுதம் தலைமையில் மாணவ, மாணவியர்கள், ஆசிரியர்கள், சமூக ஆர்வலர்கள், அறிவியல் ஆர்வலர்கள் என 50 பேர் இந்த கூடியம் குகையை காண நேற்று முன்தினம் சென்றனர். குகையின் அடிவாரத்தில் உள்ள கோயில் அருகே செல்லும்போது, அங்கு கூடு கட்டியிருந்த நூற்றுக்கணக்கான மலைத் தேனீக்கள் வேலாயுதம் உட்பட அனைவரையும் சரமாரியாக முகம், கை, கால் தலை என கொட்டியுள்ளது.  இதில் 5 மாணவிகள், ஒரு பெண் ஆசிரியர், 3 மாணவர்கள் உள்ளிட்ட 12 பேர் படுகாயம் அடைந்தனர்.தகவலறிந்து வனத்துறையினர் சம்பவ இடத்துக்கு சென்று, காயம் அடைந்தவர்களை மீட்டு கச்சூர் ஆரம்ப சுகாதார நிலையத்தில் முதல் உதவி அளித்து, மேல் சிகிச்சைக்காக திருவள்ளூர் தலைமை அரசு மருத்துவமனையில் சேர்க்கப்பட்டுள்ளனர். இதுகுறித்து வனத்துறை அலுவலர் கிரண் கூறுகையில், ‘‘வனத்துறையினரின் அனுமதி இல்லாமல் செல்லக்கூடாது என்ற விதிமுறையை மீறி சென்றதால் இது போன்ற நிகழ்வுகள் நடந்துள்ளது. வனத்துறையினர் விரைந்து சென்று நடவடிக்கை எடுத்ததால் உயிர் சேதம் தவிர்க்கப்பட்டுள்ளது. சிகிச்சைக்குப் பின் தமிழ்நாடு அறிவியல் இயக்க நிர்வாகி வேலாயுதத்தை கைது செய்து விசாரணை நடத்தி உரிய நடவடிக்கை எடுக்கப்படும்’’ என்றார்.

கல்லூரி வளாகத்தில் புகுந்து பேராசிரியர் பைக்கை திருடிய இருவர் கைது

ெசன்னை, மே 15: செங்கல்பட்டு பொத்தேரி பகுதியை சேர்ந்தவர் அரவிந்தன். அதே பகுதியில் உள்ள தனியார் கல்லூரியில் பேராசிரியராக பணியாற்றி வருகிறார். கடந்த 2 நாட்களுக்கு முன், வழக்கம்போல கல்லூரிக்கு சென்ற அரவிந்தன் தனது பைக்கை கல்லூரி வளாகத்தில் நிறுத்தினார். பின்னர் வகுப்புக்கு சென்றுவிட்டார். மாலையில் வகுப்பு முடிந்ததும் பைக்கை எடுக்க வந்தபோது மாயமாகி இருந்தது. கல்லூரி வளாகம் முழுவதும் தேடியும் கிடைக்காததால் அதிர்ச்சி அடைந்து மறைமலைநகர் போலீசில் புகார் செய்தார். இதுகுறித்து போலீசார் வழக்குப்பதிவு செய்து கல்லூரி வளாகத்தில் பொருத்தப்பட்டு இருந்த சிசிடிவி கேமராவில் பதிவான காட்சிகளை வைத்து விசாரித்து வந்தனர்.இந்நிலையில் நேற்று காட்டாங்கொளத்தூர் அருகே போலீசார் ரோந்து பணியில் ஈடுபட்டிருந்தனர். அப்போது, அவ்வழியாக பைக்கில் வந்த 2 பேரை சந்தேகத்தின்பேரில் பிடித்தனர்.விசாரணையில் சென்னை பாடி பகுதியை சேர்ந்த மோகன்ராஜ் (28), திருப்போரூர் அடுத்த காயராம்பேடு பகுதியை சேர்ந்த மகேஷ்குமார் (20) ஆகியோர் என்பதும், அரவிந்தன் பைக்ைக திருடியவர்கள் என்பதும் தெரிய வந்தது. இதையடுத்து இருவரையும் போலீசார் கைது செய்து 2 பைக்குகளை பறிமுதல் செய்தனர். பின்னர் செங்கல்பட்டு நீதிமன்றத்தில் ஆஜர்படுத்தி சிறையில் அடைத்தனர்.‘

இளம்பெண்ணை தாக்கிய வாலிபர் கைது

கும்மிடிப்பூண்டி, மே 15: கும்மிடிப்பூண்டி அடுத்த பூதூர் பகுதியை சேர்ந்தவர் ராஜேந்திரன். இவரது மகள் தீபிகா (18). ராஜேந்திரனுக்கும், அதே பகுதியை சேர்ந்த நாகேந்திரன் மகன் ரகுபதிக்கும் முன் விரோதம் இருந்து வந்தது.இந்நிலையில் ரகுபதி, ராஜேந்திரன் இருவருக்கும் ேநற்று திடீரென வாய்த்தகராறு ஏற்பட்டது. ராஜேந்திரனின் மகள் தீபிகா ரகுபதியை தட்டிக்கேட்டுள்ளார். இதில் இருவருக்கும் வாய் தகராறு ஏற்பட்டுள்ளது. ஆத்திரமடைந்த ரகுபதி தீபிகாவை அடித்தாக கூறப்படுகிறது.இது குறித்து தீபிகா அளித்த புகாரின் பேரில் பாதிரிவேடு போலீசார் வழக்குப் பதிவு செய்து ரகுபதியை கைது செய்து கும்மிடிப்பூண்டி நீதிமன்றத்தில் ஆஜர்படுத்தி புழல் சிறையில் அடைத்தனர்.

அரசு பஸ் கன்டக்டர் மர்ம மரணம்

சென்ைன, மே 15: கோயம்பேடு பணிமனையில் அரசு பஸ் கன்டக்டர் திடீரென மயங்கி விழுந்து இறந்ததால் பரபரப்பு ஏற்பட்டது.சென்னை புதுப்பேட்டை தெற்கு கூவம் ரோடு பகுதியை சேர்ந்தவர் கோபி (44). கோயம்பேடு அரசு போக்குவரத்துக்கழக பணிமனையில் பஸ் கன்டக்டராக உள்ளார். நேற்று அதிகாலை 3 மணியளவில் பணிக்கு வந்த இவர், பணிமனையில் உள்ள அறைக்கு சென்றபோது, திடீரென வாயில் நுரை தள்ளியபடி மயங்கி விழுந்தார்.சக ஊழியர்கள் உடனடியாக ஆம்புலன்சுக்கு தகவல் தெரிவித்தனர். அதன்படி, அங்கு வந்த ஆம்புலன்ஸ் வந்தவர்கள், கோபியை பரிசோதித்துவிட்டு அவர் இறந்துவிட்டதாக தெரிவித்தனர். இதையடுத்து கோயம்பேடு போலீசார், கோபியின் உடலை கைப்பற்றி பிரேத பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பி வைத்தனர். மேலும், இதுபற்றி வழக்கு பதிவு செய்து, கோபி எதனால் இறந்தார் என விசாரிக்கின்றனர்.

மளிகை கடையை உடைத்து பணம், பீடி சிகரெட் கொள்ளை

புழல், மே 15: புழலில் மளிகை கடையின் பூட்டை உடைத்து, பணம், பீடி மற்றும் சிகரெட்டுகளை மர்ம நபர்கள் கொள்ளை அடித்து சென்றனர்.புழல் மேக்ரோ மார்வல் நகர் 5வது தெருவை சேர்ந்தவர் நித்யானந்தம் (31). இவர், புழல் பாலாஜி நகர், காந்தி பிரதான சாலையில் மளிகை கடை நடத்தி வருகிறார்.வழக்கம் போல, நேற்று முன்தினம் இரவு வியாபாரம் முடிந்ததும் கடையை பூட்டி விட்டு வீட்டுக்கு சென்றார். நித்யானந்தம், நேற்று காலை 7 மணியளவில் கடையை திறக்க வந்தார். அப்போது, ஷட்டரில் இருந்த பூட்டு இல்லாததை கண்டு அதிர்ச்சியடைந்தார். மர்ம நபர்கள், யாரோ பூட்டை உடைத்து, கடையின் அருகில் வீசியது தெரியவந்தது. பின்னர், ஷட்டரை திறந்து உள்ளே சென்று பார்த்தபோது, கல்லாவில் வைத்திருந்த ரூ.10 ஆயிரம், உண்டியலில் வைத்திருந்த ரூ.3 ஆயிரம் மற்றும் ரூ.4 ஆயிரம் மதிப்பிலான சிகரெட், பீடிகள் கொள்ளை போனது தெரிந்தது.இதுகுறித்து புழல் போலீசில் நித்யானந்தம் புகார் செய்தார். போலீசார் வழக்கு பதிவு செய்து மர்ம ஆசாமிகளை வலைவீசி தேடி வருகின்றனர்.

சென்னை விமான நிலையத்தில் ₹13 லட்சம் கடத்தல் தங்கம் பறிமுதல்

சென்னை, மே 15: சென்னை விமான நிலையத்தில் அடுத்தடுத்து வந்த 2 விமானங்களில் ₹13 லட்சம் மதிப்புடைய தங்க கட்டிகளை கடத்தி வந்த இலங்கை பெண் பயணி உள்பட 2 பேரை சுங்க அதிகாரிகள் கைது செய்தனர்.சார்ஜாவில் இருந்து ஏர் இந்தியா விமானம் நேற்று காலை 7.30 மணிக்கு சென்னை சர்வதேச விமான நிலையத்திற்கு வந்தது. அதில் வந்த பயணிகளை சுங்க அதிகாரிகள் சோதனையிட்டனர். அப்போது மதுரையை சேர்ந்த வசந்த்ஜெயராஜ் (26) என்பவர், சுற்றுலா பயணி விசாவில் சார்ஜாவிற்கு சென்று, திரும்பி வந்தார். அவரது உடமைகளை சுங்க அதிகாரிகள் சோதனையிட்டனர். அதில் எதுவும் இல்லை.அவர் புதிதாக ஸ்பீக்கர் மற்றும் ஹேர் டிரையர் ஆகியவற்றை வாங்கி வந்திருந்தார். அவைகளை பிரித்து பார்த்த போது அவற்றில் 250 கிராம் தங்க கட்டிகளை மறைத்து வைத்திருந்தது தெரிந்தது. இதன் மதிப்பு ₹8 லட்சம். இதையடுத்து சுங்க அதிகாரிகள் அவரை கைது செய்து தங்க கட்டிகளை பறிமுதல் செய்தனர்.இதேபோல், நேற்று காலை 8.35 மணிக்கு ஸ்ரீலங்கன் விமானம் சென்னை சர்வதேச விமான நிலையத்திற்கு வந்தது. அதில் வந்த பயணிகளை சுங்க அதிகாரிகள் சோதனையிட்டனர். அப்போது இலங்கையை சேர்ந்த பாத்திமா (43) என்ற பயணி சென்னைக்கு வந்திருந்தார். அவரது உடமைகளை சுங்க அதிகாரிகள் சோதனையிட்டனர். அதில் எதுவும் இல்லை.சந்தேகம் தீராத பெண் அதிகாரிகள் அவரை தனி அறைக்கு அழைத்துச் சென்று சோதனையிட்டனர். அவரது உள்ளாடைக்குள் 150 கிராம் தங்க கட்டிகள் மறைத்து வைத்திருந்ததை கண்டு பிடித்தனர். இதன் மதிப்பு ₹5 லட்சம். அவரையும் கைது செய்து, தங்கத்தை பறிமுதல் செய்

சிறுமியிடம் சில்மிஷம் செய்த தாத்தாவுக்கு 10 ஆண்டு சிறை

சென்னை, மே 15: 4 வயது சிறுமியிடம் சில்மிஷம் செய்த 72 வயது தாத்தாவுக்கு 10 ஆண்டு சிறை தண்டனை விதித்து மகளிர் நீதிமன்றம் உத்தரவிட்டுள்ளது.சென்னை, அமைந்தகரை பகுதியை சேர்ந்தவர் நீலா  (பெயர் மாற்றப்பட்டுள்ளது). இவர், வாடகை வீட்டில் வசித்து வருகிறார். இவருக்கு 4 வயதில் பெண் குழந்தை ஒன்று உள்ளது. பெற்றோர் தங்கள் குழந்தையை வீட்டின் உரிமையாளர் ஜெய்லாபுதீன் (72) என்பவரிடம் விட்டுச் சென்றால் அவர் பார்த்துக்கொள்வார் என்று கூறப்படுகிறது. இந்நிலையில், கடந்த 2018 மே மாதம், குழந்தை வீட்டின் வெளியே விளையாடிக் கொண்டிருந்துள்ளது. அப்போது தாய் நீலா வெளியே வந்து பார்த்தபோது குழந்தை காணாமல் போய்யுள்ளது. பின்னர் குழந்தையை தேடியபோது, ஜெய்லாபுதீன் வீட்டில் இருந்து அழும் சத்தம் கேட்டுள்ளது. அங்கு சென்றபோது, முதியவர் சிறுமியிடம் தவறாக நடந்துள்ளார். இதனை பார்த்த நீலா, குழந்தையை மீட்டு, அண்ணா நகர் அனைத்து மகளிர் காவல்நிலையத்தில் புகார் அளித்தார். இன்ஸ்பெக்டர் தனலட்சுமி போக்சோ சட்டத்தின் கீழ் வழக்கு பதிவு செய்து, ஜெய்லாபுதீனை கைது செய்து குற்றப்பத்திரிகை தாக்கல் செய்தார். இந்த வழக்கு மகளிர் நீதிமன்ற நீதிபதி மஞ்சுளா முன்பு விசாரணைக்கு வந்தது. அப்போது அரசு வக்கீல் ஸ்ரீலேகா ஆஜராகி வாதிட்டார். அதில், ஜெய்லாபுதீன் செய்தது தவறு என்று நிரூபிக்கப்பட்டது. இதையடுத்து நீதிபதி குற்றம் நிரூபிக்கப்பட்டதால், குற்றவாளிக்கு 10 ஆண்டு சிறை தண்டனையும், ரூ.5 ஆயிரம் அபராதமும் விதித்து உத்தரவிட்டார்.

குடும்ப தகராறில் மனைவியின் கழுத்தை நெரித்த கணவன் கைது

கும்மிடிப்பூண்டி, மே 15: கும்மிடிப்பூண்டி அடுத்த ஆரம்பாக்கம் பகுதியை சேர்ந்தவர் வசந்த் (33). அவரது மனைவி சுரேகா (22). இவர்களுக்குள் குடும்ப தகராறு ஏற்பட்டது. இதன் காரணமாக இரு தரப்பை சேர்ந்தவர்களும் தனித்தனியாக கும்மிடிப்பூண்டி காவல் நிலையத்தில் புகார் அளித்தனர். அதன்பேரில் வசந்த் கைது செய்யப்பட்டார். அவரது மனைவி சுரேகாவிடம் போலீசார் விசாரணை நடத்தி வருகின்றனர்.கும்மிடிப்பூண்டி அடுத்த ஆரம்பாக்கத்தை சேர்ந்த ராமசந்திரன் மகன் வசந்த். இவருக்கும் கும்மிடிப்பூண்டி சாமிரெட்டிக் கண்டிகை பகுதியை சேர்ந்த சுரேகா (22) என்பவருக்கும்  கடந்த ஒன்றரை வருடத்திற்கு முன்பு திருமணம் நடந்தது.திருமணம் ஆன, 3 மாத காலத்திற்கு பிறகு இருவருக்கும் எந்த  ஆலயத்திற்கு செல்வது என்பது தொடர்பாக பிரச்னை துவங்கி, அது குடும்ப தகராறாக மாறியது. தொடர்ந்து சுரேகா, கணவர் வசந்த்திடம் சண்டையிட்டு அம்மா வீட்டிற்கு சென்றுவிட்டார்.இதனை தொடர்ந்து கடந்த சில நாட்களுக்கு முன்பு வசந்த்தின் தந்தை  சுரேகாவின் வீட்டிற்கு சென்று சமாதான பேச்சுவார்த்தை நடத்தியுள்ளார். அப்போது இரு தரப்பிற்கும் வாய் தகராறு ஏற்பட்டுள்ளது. தொடர்ந்து இந்த தகராறில் வசந்த், சுரேகாவின் கழுத்தை பிடித்து நெரித்து கொல்ல முயன்றதாகவும், சுரேகா இலங்கை அகதிகள் முகாமை சேர்ந்த சிலரை வைத்து வசந்தை அடித்ததாகவும் இரு தரப்பினரும் கும்மிடிப்பூண்டி காவல் நிலையத்தில் புகார் அளித்தனர்.இதனை தொடர்ந்து கும்மிடிப்பூண்டி போலீசார் வழக்கு பதிவு செய்தனர். மனைவியின் கழுத்தை நெரித்து  அடித்ததாக அளித்த புகாரின் பேரில் வசந்தை கைது செய்து  கோர்ட்டில் ஆஜர்படுத்தி சிறையில் அடைத்தனர். மேலும், வசந்த் அளித்த புகாரின் பேரில் போலீசார் சுரேகாவிடம் விசாரித்து வருகின்றனர்.

சர்வீஸ் சாலையில் இயக்காமல் மாநகர பஸ் டிரைவர்கள் அடாவடி

திருவொற்றியூர், மே 15: கத்திவாக்கம் மேம்பால சர்வீஸ் சாலை வழியாக மாநகர பேருந்துகளை இயக்காமல், மேம்பாலத்தின் மீது செல்வதால் பயணிகள் அவதிக்குள்ளாகின்றனர். எண்ணூர் பேருந்து நிலையத்திலிருந்து தடம் எண் 56, 28பி, 159,  159ஈ, 1சி ஆகிய மாநகர பேருந்துகள் கத்திவாக்கம் நெடுஞ்சாலை வழியாக சென்னையின் பல்வேறு பகுதிகளுக்கு இயக்கப்படுகின்றன. இந்த பேருந்துகள் கத்திவாக்கம் மேம்பாலத்திற்கு கீழ் உள்ள சர்வீஸ் சாலை வழியாக சென்று, அங்குள்ள நிறுத்தத்தில் நின்று பயணிகளை ஏற்றிச் செல்வது வழக்கம். எண்ணூர் அனல்மின் நிலைய ஊழியர்கள், அலுவலர்கள் மற்றும் அங்குள்ள தபால் நிலையம், வங்கி ஆகியவற்றுக்கு வந்து செல்பவர்கள் இந்த பஸ் நிறுத்தத்தை பயன்படுத்தி வருகின்றனர். இந்நிலையில், சமீபகாலமாக மேற்கண்ட பேருந்துகள் பெரும்பாலும் சர்வீஸ் சாலையில் செல்லாமல், கத்திவாக்கம் மேம்பாலத்தின் மீது சென்று விடுகின்றன. இதனால், எண்ணூர் அனல்மின் நிலைய அலுவலகத்தில் பணி புரிவோர் மற்றும் அதன் அருகில் உள்ள வங்கி மற்றும் தபால் நிலையத்திற்கு வந்து செல்பவர்கள் பேருந்து ஏறுவதற்காக மேம்பாலத்தை சுற்றி வர வேண்டிய நிலை உள்ளது. இதனால், முதியவர்கள், பெண்கள் உள்பட பலர் கடும் அவதிக்குள்ளாகின்றனர். இதுகுறித்து  எண்ணூர்  பேருந்து நிலைய கிளை மேலாளருக்கு பொதுமக்கள் பலமுறை புகார் கொடுத்தும், எந்த நடவடிக்கையும் எடுக்கவில்லை என்று கூறப்படுகிறது. எனவே, கத்திவாக்கம் மேம்பால சர்வீஸ் சாலையில் வழக்கம்போல் பேருந்துகளை இயக்க சம்மந்தப்பட்ட அதிகாரிகள் நடவடிக்கை எடுக்க வேண்டும் என்று பொதுமக்கள் கோரிக்கை விடுத்துள்ளனர்.