Vellore - Dinakaran

பிறந்தநாள் கொண்டாட பணம் கொடுக்காததால் ஆத்திரம் தாய், தந்தை, பெட்ரோல் ஊற்றி கொளுத்திய பாசக்கார மகன் பாட்டியும் படுகாயம்

திருமலை, மே 17: பிறந்த நாள் கொண்டாட பணம் கொடுக்காத தாய், தந்தையை பெட்ரோல் ஊற்றி மகன் கொளுத்திய சம்பவம் அதிர்ச்சியை ஏற்படுத்தியுள்ளது. ஆந்திர மாநிலம், பிரகாசம் மாவட்டத்தில் மார்காபுரம் எஸ்.சி காலனியை சேர்ந்தவர் கல்லய்யா. இவரது மனைவி லட்சுமி. இவர்களுக்கு இரண்டு மகன், மகள் உள்ளனர். இதில் மூத்த மகன் பிரகாஷ் அதே பகுதியில் இண்டர்மீடியட் இரண்டாம் ஆண்டு படித்து வருகிறார். இந்நிலையில், பிரகாஷ் நேற்று தன்னுடைய பிறந்தநாளை நண்பர்களுடன் கொண்டாட முடிவு செய்து, பெற்றோரிடம் பணம் கேட்டு உள்ளான். ஆனால், அவரது பெற்றோர் மற்றும் பாட்டி அங்கம்மா, பணம் கொடுக்க இயலாத நிலையில் இருக்கிறோம் என்று கூறினார்களாம். இதனால் ஆவேசமடைந்த பிரகாஷ், தான் பாட்டிலில் கொண்டு வந்த பெட்ரேலை ஊற்றிக்கொண்டு தற்கொலை செய்துகொள்ளப்போவதாக மிரட்டினாராம்.அப்போது பிரகாஷின் பெற்றோர் மற்றும் பாட்டி அவரிடமிருந்த கேனை பறித்துக்கொண்டு தாங்களும் தீக்குளிப்போம் என்று பதிலுக்கு மிரட்டி பெட்ரோலை தங்கள் மீது ஊற்றிக்கொண்டனர். இதில் மேலும் ஆத்திரமடைந்த பிரகாஷ் தீ பற்ற வைத்து அவர்களின் மீது வீசினாராம். உடல் முழுவதும் தீப்பற்றி அலறித்துடித்த கல்லய்யா, லட்சுமி, அங்கம்மாவின் அலறல் சத்தம் கேட்டு அக்கம்பக்கத்தினர் ஓடிவந்தனர். ஆனால் அதற்குள் பிரகாஷ் அங்கிருந்து தப்பி ஓடிவிட்டான். தொடர்ந்து தீயை அணைத்து 3 பேரையும் மார்காபுரம் மருத்துவமனையில் சேர்த்தனர். தகவல் அறிந்த மார்க்காபுரம் போலீசார் வாக்குப்பதிவு செய்து விசாரணை நடத்தி வருகின்றனர். இதற்கிடையே மகனை போலீசார் கைது செய்தால் அவரின் எதிர்காலம் பாதிக்கும் என்பதால் போலீஸ் நடவடிக்கையிலிருந்து தப்பிக்க செய்வதற்காக கல்லய்யா, லட்சுமி, அங்கம்மா ஆகியோர் தாங்களே தீக்குளித்ததாக போலீசாரிடம் கூறியதாக தெரிகிறது.

விசாகப்பட்டினம் அருகே காரில் கஞ்சா கடத்திய சென்னை கல்லூரி மாணவன் உட்பட 3 பேர் கைது

திருமலை, மே 17: விசாகப்பட்டினம் அருகே காரில் கஞ்சா கடத்திய சென்னை கல்லூரி மாணவன் உட்பட 3 பேரை போலீசார் கைது செய்தனர். ஆந்திர மாநிலம், விசாகப்பட்டினம் மாவட்டம், கொத்தவலசா காவல் நிலைய இன்ஸ்பெக்டர் ரெட்டி சீனிவாசுக்கு கிடைத்த ரகசிய தகவலின் அடிப்படையில் போலீசார் நேற்று வாகன சோதனையில் ஈடுபட்டனர். அப்போது, அவ்வழியாக வந்த காரை நிறுத்தி சோதனை செய்தனர். அதில் 9 கிலோ கஞ்சா கடத்தி வருவது தெரியவந்தது. இதையடுத்து, கஞ்சா கடத்தி வந்த குண்டூரை சேர்ந்த 3 மாணவர்களை போலீசார் கைது செய்தனர். இதில், குண்டூரை சேர்ந்த ராகுல் ரெட்டி சென்னையில் உள்ள இன்ஜினியரிங் கல்லூரியில் 4ம் ஆண்டு படித்து வருகிறார். மேலும் குண்டூர் மாவட்டம் நரசு ராயப்பேட்டையை சேர்ந்த சாய் சுஸ்மந்த், குண்டூரை சேர்ந்த டிகிரி படித்து வரும் சாய் கிரண் ஆகிய 3 பேர் என்பது தெரியவந்தது. தொடர்ந்து நடத்திய விசாரணையில், ராகுல் ரெட்டி, தனக்கு சொந்தமான ஒன்றரை சவரன் தங்க செயினை அடகு வைத்த நிலையில் அதனை மீட்க சீனியர் மாணவர் அசோக்கிடம் தெரிவித்தார். இதற்கு அசோக் விசாகப்பட்டினம் மாவட்டம் அரக்கு சென்று கஞ்சா கொண்டு வந்தால் பணம் தருவதாக தெரிவித்தார்.இதையடுத்து, அசோக், ராகுல்ரெட்டிக்கு ஒரு நபரின் செல்போன் எண் மற்றும் ₹10 ஆயிரம் வழங்கி அனுப்பி வைத்தார். தொடர்ந்து, ராகுல் ரெட்டி தனது நண்பர்கள் இருவருடன் சேர்ந்து பதிவு செய்யப்படாத புதிய காரை எடுத்துக் கொண்டு விசாகப்பட்டினத்திற்கு சென்று அங்கிருந்து கஞ்சாவை வாங்கிக் கொண்டு வரும் போது போலீசாரிடம் சிக்கினர். இதுகுறித்து மாணவர்களின் பெற்றோர்களுக்கு தகவல் தெரிவிக்கப்பட்டு விசாரணை மேற்கொண்டு வருவதாக போலீசார் தெரிவித்தனர்.

சந்திரகிரியில் மறுவாக்குப்பதிவு நடைபெற உள்ள 5 வாக்குச்சாவடி மைய பகுதிகளில் நாளை 144 தடை உத்தரவு கலெக்டர் தகவல்

சித்தூர், மே 17: சந்திரகிரியில் மறுவாக்குப்பதிவு நடைபெற உள்ள 5 வாக்குச்சாவடி மைய பகுதிகளில் நாளை 144 தடை உத்தரவு பிறப்பிக்கப்பட்டுள்ளது என்று கலெக்டர் பிரத்யும்னா தெரிவித்தார். சித்தூரில் கலெக்டர் பிரத்யும்னா நேற்று நிருபர்களிடம் கூறியதாவது: சந்திரகிரி சட்டப்பேரவை தொகுதிக்குட்பட்ட என்ஆர் கம்மபள்ளி, புலி வருத்தி வாரிபள்ளி, கொத்த கண்டிகை, கம்ப பள்ளி, வெங்கடாபுரம் ஆகிய 5 வாக்குச்சாவடி மையங்களில் நாளை காலை 7 மணி முதல் மாலை 6 மணி வரை மறுவாக்குப்பதிவு நடக்கிறது. இங்கு 3899 வாக்காளர்கள் உள்ளனர். மறுவாக்குப்பதிவு அன்று வாக்குச்சாவடி மையங்கள் அமைந்துள்ள பகுதிகளில் 144 தடை உத்தரவு பிறப்பிக்கப்பட்டுள்ளது. எனவே, அப்பகுதியில் கூட்டமாக சுற்றித்திரிய கூடாது. மேலும் 5 வாக்குச்சாவடி மையத்துக்கு 20 இவிஎம் இயந்திரங்கள் அனுப்பப்பட உள்ளது. தேர்தல் அதிகாரிகள், வாக்குச்சாவடி மைய அதிகாரிகள் எந்தவிதமான பிரச்னைகளும் இன்றி தேர்தல் நடத்த ஒத்துழைக்க வேண்டும். இதேபோல் 23ம் தேதி நடக்கும் வாக்கு எண்ணிக்கைக்காக அனைத்து ஏற்பாடுகளும் நடந்து வருகிறது. வாக்கு எண்ணும் பணியில் ஈடுபட உள்ள அதிகாரிகள் மற்றும் ஊழியர்கள் தங்களுக்கு நியமிக்கப்பட்ட வாக்குச்சாவடி மையத்திற்கு காலை 6 மணிக்குள் செல்ல வேண்டும்.அதிகாரிகள் மற்றும் ஊழியர்களுக்கு வெள்ளை நிற அனுமதி அட்டையும், ஏஜென்டுகளுக்கு பச்சை நிற அட்டையும் வழங்கப்பட உள்ளது. ஏஜென்டுகள் இங்க் பேனா எடுத்துவரக்கூடாது. வாக்கு எண்ணும் மையத்தில் தேர்தல் அதிகாரியை தவிர யாருக்கும் செல்போன் எடுத்துச்செல்ல அனுமதியில்லை. வாக்கு எண்ணிக்கை நடைபெறும் இடத்தின் அருகே காருக்கு கூட அனுமதி கிடையாது. இதற்காக வாக்கு எண்ணும் மையத்தின் அருகே பார்க்கிங் ஏற்பாடு செய்யப்பட்டுள்ளது. வாக்கு எண்ணிக்கையன்று வேட்பாளர்கள் முன்னிலையில் ஸ்ட்ராங் ரூம் திறக்கப்பட்டு 7.30 தபால் வாக்குகள் எண்ணப்படும். இதைத்தொடர்ந்து வாக்குப்பதிவு இயந்திரங்களில் பதிவான வாக்குகள் எண்ணப்படும். இவ்வாறு அவர் கூறினார்.

சந்திரகிரியில் 7 வாக்குச்சாவடிகளில் மறுவாக்குப்பதிவு நடத்தக்கோரி அமைச்சருடன் தெலுங்கு தேசம் வேட்பாளர் சாலைமறியல்

* திருப்பதியில் பரபரப்பு * போக்குவரத்து பாதிப்புதிருப்பதி, மே 17: சந்திரகிரியில் 7 வாக்குச்சாவடிகளில் மறு வாக்குப்பதிவு நடத்தக்கோரி அமைச்சருடன் தெலுங்கு தேசம் வேட்பாளர் சாலைமறியலில் ஈடுபட்டார். இதனால் அங்கு பரபரப்பும் போக்குவரத்து பாதிப்பும் ஏற்பட்டது. ஆந்திர மாநிலத்தில் கடந்த மாதம் 11ம் தேதி 175 சட்டப்பேரவை தொகுதிகளுக்கும், 25 மக்களவை தொகுதிக்கும் வாக்குப்பதிவு நடைபெற்றது. இதில் குண்டூர், பிரகாசம், நெல்லூர் மாவட்டத்தில் பல்வேறு காரணத்தினால் 5 வாக்குச்சாவடி மையத்திற்கு கடந்த மாதம் மறு வாக்குப்பதிவு நடைபெற்றது. இந்நிலையில் சித்தூர் மாவட்டம், சந்திரகிரி தொகுதியில் நடை பெற்ற தேர்தலில் கம்ம கண்டிகை, புலிவர்த்திபள்ளி உட்பட 7 வாக்குச்சாவடி மையங்களில் ஒய்எஸ்ஆர் காங்கிரஸ் கட்சிக்கு வாக்களிக்க விடாமல் இடையூறு செய்ததாக அக்கட்சியின் வேட்பாளர் செவி ரெட்டி பாஸ்கர் ரெட்டி மாநில தேர்தல் அலுவலர் கோபாலகிருஷ்ண திரிவேதிக்கு புகார் அளித்தார்.  இதேபோன்று தெலுங்கு தேசம் கட்சியின் சார்பில் இரண்டு வாக்குச்சாவடி மையத்தில் தெலுங்கு தேசம் கட்சிக்கு வாக்களிக்க விடாமல் இடையூறு செய்ததாக அக்கட்சியின் வேட்பாளர் புலிவர்த்தி நானி புகார் அளித்திருந்தார். இதற்கிடையே தேர்தல் ஆணையம் வெளியிட்டுள்ள அறிக்கையில் சந்திரகிரி சட்டப்பேரவை தொகுதிக்குட்பட்ட கம்ம கண்டிகை, புலிவர்த்தி பள்ளி உட்பட 5 வாக்குச்சாவடி மையத்திற்கு மட்டும் வருகிற 19ம் தேதி மறுவாக்குப்பதிவு நடைபெறும் என அறிவித்திருந்தது. இந்நிலையில் திருப்பதி சப்-கலெக்டர் அலுவலகம் முன் தேர்தல் ஆணையம் ஒருதலை பட்சமாக செயல்படுவதாக கூறி ஆந்திர தொழில் துறை அமைச்சர் அமர்நாத் ரெட்டி, சந்திரகிரி சட்டப்பேரவை தொகுதி தெலுங்கு தேசம் கட்சி வேட்பாளர் புலிவர்த்தி நானி ஆகியோர் கட்சி தொண்டர்களுடன் நேற்று சாலைமறியலில் ஈடுபட்டனர். இதனால் அங்கு பரபரப்பும் போக்குவரத்து பாதிப்பும் ஏற்பட்டது. இதுகுறித்து போராட்டத்தில் ஈடுபட்டவர்கள் கூறியதாவது:ஒய்எஸ்ஆர் காங்கிரஸ் கட்சி 7 வாக்குச்சாவடி மையத்தில் மறு வாக்குப் பதிவுக்கு கேட்ட நிலையில் 5 வாக்குச்சாவடி மையத்தில் மறுவாக்குப் பதிவுக்கு தேர்தல் ஆணையம் உத்தரவிட்டுள்ளது. தெலுங்கு தேசம் கட்சி இரண்டு வாக்குச்சாவடி மையத்தில் மறுவாக்குப்பதிவு நடத்த வேண்டும் என்ற கோரிக்கையை நிராகரித்து தேர்தல் ஆணையம் ஒரு தலைப்பட்சமாக செயல்படுகிறது. எனவே 19ம் தேதி நடைபெறக்கூடிய மறுவாக்குப்பதிவின் போது தற்போது அறிவிக்கப்பட்ட 5 வாக்குச்சாவடி மையங்களுடன் சேர்த்து தெலுங்கு தேசம் கட்சி புகார் அளித்துள்ள இரண்டு வாக்குச்சாவடி மையத்திற்கும் சேர்த்து 7 மையத்திலும் மறுவாக்குப்பதிவு நடத்த வேண்டும். தேர்தல் ஆணையம் உரிய நடவடிக்கை எடுக்காவிட்டால் உச்ச நீதிமன்றத்திலும் வழக்கு தொடரப்படும். இவ்வாறு அவர்கள் கூறினர். தொடர்ந்து திருப்பதி சப்-கலெக்டர் மகேஷ்குமாரிடம், வேட்பாளர் புலிவர்த்தி நானி மனு அளித்தார். தேர்தல் அதிகாரி அறிக்கை அடிப்படையில் நடவடிக்கைஇதுகுறித்து மாநில தேர்தல் அதிகாரி கோபாலகிருஷ்ண திரிவேதி கூறுகையில், `மறுவாக்குப்பதிவு நடத்தக் கூடிய பகுதிகளில் வேட்பாளர்கள் மற்றும் புகார்தாரர்கள் அளிக்கும் தகவலை மட்டும் வைத்து மறு வாக்குப்பதிவு நடைபெறுவதற்கு உத்தரவு அளிக்கவில்லை. மாவட்ட கலெக்டர்கள் மற்றும் அந்தந்த மையத்தில் உள்ள தேர்தல் அதிகாரி வழங்கிய அறிக்கையை வைத்தே மறு வாக்குப்பதிவுக்கு உத்தரவு அளிக்கப்பட்டுள்ளது' என்றார்.

200 அடி பள்ளத்தில் தவறி விழுந்த கர்நாடக பக்தர் மீட்பு திருப்பதி மலைப்பாதையில் பரபரப்பு

திருமலை, மே 17: திருப்பதி மலைப்பாதையில் 200 அடி பள்ளத்தில் தவறி விழுந்த கர்நாடக பக்தர் பத்திரமாக மீட்கப்பட்டார். திருமலையில் இருந்து திருப்பதிக்கு செல்லும் மலைப்பாதையில் உள்ள அவ்வாச்சாரி கோணா என்ற இடத்தில் உள்ள பள்ளத்தாக்கில் இருந்து ஒருவரது அலறல் சத்தம் நேற்று காலை அவ்வழியாக சென்ற பக்தர்களுக்கு கேட்டது. உடனடியாக திருமலை 2வது காவல் நிலைய போலீசாருக்கு தகவல் அளித்தனர். அதன்பேரில் அங்கு வந்த போலீசார் பக்தர்கள் சத்தம் கேட்டதாக கூறிய இடத்துக்கு சென்று பார்த்தனர். அப்போது அங்கு 200 அடி ஆழத்தில் ஆண் ஒருவர் இருப்பது தெரிந்தது. இதனால் பரபரப்பு ஏற்பட்டது. தொடர்ந்து, போலீசார் பள்ளத்தில் இறங்கி அவரை மீட்டு மேலே கொண்டு வந்தனர். பின்னர் அவரிடம் போலீசார் விசாரித்தபோது, கர்நாடக மாநிலம் ஷிமோகாவை சேர்ந்த நிவாஸ் என்பதும், மலைப்பாதையில் உள்ள தடுப்பு சுவர் மீது ஏறி நடந்து சென்ற போது கால் தவறி பள்ளத்தில் விழுந்ததும் தெரியவந்தது. மேலும், நிவாஸ் மன நோயால் பாதிக்கப்பட்டிருப்பதாக போலீசார் தெரிவித்தனர். தொடர்ந்து போலீசார் அவரிடம் விசாரணை நடத்தி வருகின்றனர்.

வேலூர், ஆற்காட்டில் குடிநீர் வழங்காததை கண்டித்து பொதுமக்கள் சாலை மறியல்

வேலூர், மே 17: வேலூர் மற்றும் ஆற்காட்டில் குடிநீர் வழங்காததை கண்டித்து பொதுமக்கள் நேற்று திடீர் சாலைமறியலில் ஈடுபட்டனர். தமிழகத்தில் வெயிலின் தாக்கம் அதிகரிக்க தொடங்கியுள்ளது. இதனால் அணைகள், ஏரிகள் உட்பட நீர்நிலைகள் தண்ணீரின்றி வறண்டு காணப்படுகிறது. நிலத்தடி நீர்மட்டம் அதலபாதாளத்திற்கு சென்றுவிட்டது. இதனால் மாநிலம் முழுவதும் குடிநீருக்காக காலிக்கூடங்களுடன் பொதுமக்கள் தண்ணீர் தேடி அலைய வேண்டிய நிலை ஏற்பட்டுள்ளது. பொதுமக்கள் குடிநீர் வழங்க ஏற்பாடுகள் செய்யாத அதிகாரிகளை கண்டித்து ஆங்காங்கே சாலை மறியலில் ஈடுபட்டு வருகின்றனர். அதேபோல் வேலூர் மாவட்டத்திலும் கடும் குடிநீர் தட்டுப்பாடு ஏற்பட்டுள்ளது. இந்நிலையில், வேலூர் மாநகராட்சி சைதாப்பேட்டையில் அண்ணா சாஸ்திரி தெரு, கானாறு குடிபா தெரு, சுருட்டுக்கார தெரு ஆகிய பகுதிகளில் கடந்த 2 வாரமாக குடிநீர் வழங்கப்படவில்லை. இதனால் ஆத்திரமடைந்த அப்பகுதி மக்கள், குடிநீர் வழங்காததை கண்டித்து அப்பகுதி மக்கள் சுமார் 50க்கும் மேற்பட்டோர் காலி குடங்களுடன் திடீரென நேற்று சாலைமறியலில் ஈடுபட்டனர். இதுகுறித்து தகவலறிந்த போலீசார் மற்றும் மாநகராட்சி ஊழியர்கள் சம்பவ இடத்திற்கு சென்று பேச்சுவார்த்தை நடத்தினர். அப்போத,குடிநீர் வழங்க நடவடிக்கை எடுப்பதாக கூறியதையடுத்து மறியலை கைவிட்டு கலைந்து சென்றனர். இதனால் அப்பகுதியில் பரபரப்பு ஏற்பட்டது.ஆற்காடு: ஆற்காடு அடுத்த அருங்குன்றம் ஊராட்சியில் 2 ஆயிரத்திற்கும் மேற்பட்ட மக்கள் வசிக்கின்றனர். இவர்களது குடிநீர் தேவைக்காக பைப் லைன் மற்றும் போர்வெல்கள் அமைக்கப்பட்டு தண்ணீர் விநியோகம் செய்யப்பட்டு வந்தது. கடந்த சில மாதங்களாக 20க்கும் மேற்பட்ட போர்வெல்களில் பழுது ஏற்பட்டதால் சரிவர குடிநீர் விநியோகம் செய்யவில்லையாம். இதனால், நீண்டதூரம் சென்று பொதுமக்கள் தண்ணீர் பிடித்துவரும் நிலை ஏற்பட்டது. இதுகுறித்து, வட்டார வளர்ச்சி அலுவலர், ஊராட்சி செயலாளர் உட்பட பல்வேறு அதிகாரிகளுக்கு புகார் தெரிவித்தும் இதுவரை எவ்வித நடவடிக்கையும் எடுக்கவில்லை. இதனால், ஆத்திரமடைந்த அப்பகுதியை சேர்ந்த 100க்கும் மேற்பட்ட பொதுமக்கள் நேற்று காலை 7.30 மணியளவில் அருங்குன்றம் பஸ் நிறுத்தம் அருகே உள்ள மேல்நிலை நீர் தேக்கத்தொட்டி அருகே காலிக்குடங்களுடன் சாலையில் மறியலில் ஈடுபட்டனர். மேலும், அவ்வழியாக வந்த அரசு டவுன் பஸ் மற்றும் தனியார் லாரிகளை சிறைபிடித்து போராட்டத்தில் ஈடுபட்டனர். தகவலறிந்த பிடிஓ வெங்கடாச்சலம், ஒன்றிய பொறியாளர் ஏகநாதன், வருவாய் ஆய்வாளர் ஷம்ஷாத் மற்றும் போலீசார் சம்பவ இடத்திற்கு வந்து மறியலில் ஈடுபட்டவர்களுடன் பேச்சுவார்த்தை நடத்தினர்.அதிகாரிகளை பொதுமக்கள் முற்றுகையிட்டு, ‘பொதுப்பணித்துறைக்கு சொந்தமான கால்வாய்களையும், ஏரி நீர்வரத்துக் கால்வாய்களையும் சிலர் ஆக்கிரமித்துள்ளனர். இதனால், நிலத்தடி நீர் மட்டம் எங்கள் பகுதியில் குறைந்துள்ளது. எனவே, ஆக்கிரமிப்புகளை அகற்றி சேதமடைந்த தடுப்பணைகளை சீரமைத்து போர்வெல்களை சரிசெய்து குடிநீர் வழங்க நடவடிக்கை எடுக்க வேண்டும்’ என்றனர். அதற்கு பிடிஓ, உரிய நடவடிக்கை எடுத்து குடிநீர் வழங்கப்படும் என உறுதி அளித்தார். இதையடுத்து, பஸ், லாரிகளை விடுவித்து அங்கிருந்து பொதுமக்கள் கலைந்து சென்றனர். இதனால், அப்பகுதியில் சுமார் 2 மணி நேரம் போக்குவரத்து பாதிக்கப்பட்டு பரபரப்பு ஏற்பட்டது.

வேலூர் அரசு அருங்காட்சியகத்தில் 16ம் நூற்றாண்டு வீரக்கல் ஒப்படைப்பு

வேலூர், மே 17: வேலூர் அரசு அருங்காட்சியகத்தில் 16ம் நூற்றாண்டு வீரக்கல் ஒப்படைக்கப்பட்டது.  திருவண்ணாமலை மாவட்டம், போளூர் தாலுகாவுக்குட்பட்ட சென்னியமங்கலம் கிராமத்தில் கடந்த 2016ம் ஆண்டு கி.பி.16ம் நூற்றாண்டை சேர்ந்த விஜயநகர பேரரசு காலத்திய வீரக்கல் கண்டுபிடிக்கப்பட்டது. போரில் இறந்தவர்கள் நினைவாக வைக்கப்படும் இந்த கல், போளூர் தாலுகா அலுவலகத்தில் வைக்கப்பட்டிருந்தது. இதையறிந்த திருவண்ணாமலை கலெக்டர் கந்தசாமி இந்த வீரக்கல்லை வேலூர் கோட்டையில் உள்ள அருங்காட்சியகத்்தில் ஒப்படைக்கும்படி உத்தரவிட்டார். அதன்ேபரில் நேற்று காலை 16ம் நூற்றாண்டை சேர்ந்த அந்த வீரக்கல் கொண்டு வரப்பட்டு அருங்காட்சியகத்தில் ஒப்படைக்கப்பட்டது. இதனை பெற்றுக்கொண்ட காப்பாட்சியர் சரவணன் கூறுகையில், வேலூர், திருவண்ணாமலை மாவட்டத்தில் இதுவரை 19 வீரக்கல் கண்டறியப்பட்டு அருங்காட்சியகத்துக்கு கொண்டு வரப்பட்டு பொதுமக்கள் பார்வைக்கு வைக்கப்பட்டுள்ளது' என்றார்.

குடியாத்தம் கெங்கை அம்மன் திருவிழாவின் போது 100க்கும் மேற்பட்ட செல்போன்கள் திருட்டு காவல் நிலையத்தில் குவியும் புகார்கள்

குடியாத்தம் மே 17: குடியாத்தத்தில் சிரசு திருவிழாவின் போது ஒரே நாளில் 100க்கும் மேற்பட்ட செல்போன்கள் திருட்டுபோனது. இதுகுறித்து போலீசார் விசாரணை நடத்தி வருகின்றனர். குடியாத்தம் கெங்கையம்மன் கோயில் சிரசு திருவிழா நேற்று முன்தினம் நடைபெற்றது. இதையொட்டி, பல லட்சம் பக்தர்கள் அம்மனை தரிசிக்க திரண்டனர். இந்தநிலையில், கூட்ட நெரிசலை பயன்படுத்தி மர்ம ஆசாமிகள் 100க்கும் மேற்பட்ட நபர்களிடம் செல்போன்களளை திருடி உள்ளனர். இதுகுறித்து, ஏராளமானோர் நேற்று முன்தினம் தற்காலிக போலீஸ் உதவி மையத்தில் புகார் தெரிவித்தனர். இதையடுத்து, நேற்று காலை குடியாத்தம் தாலுகா மற்றும் டவுன் காவல் நிலையத்தில் புகார் தெரிவித்து சிஎஸ்ஆர் பெற்று சென்றனர். மேலும், சிலர் செல்போன்களுக்கு இன்சூரன்ஸ் செய்திருந்ததால் காவல் நிலையத்தில் சான்றிதழ் பெற மனு அளித்தனர்.

அரக்கோணம் ஏடிஎம் மிஷினில் கூடுதல் பணம் வந்ததா? பொதுமக்கள் குவிந்ததால் திடீர் பரபரப்பு

அரக்கோணம், மே 17: அரக்கோணம் பழனிப்பேட்டை பகுதியில் ஒரு வங்கியின் ஏடிஎம் மெஷின் உள்ளது. இந்த ஏடிஎம் மெஷினில் ஒரு சிலர் நேற்று காலை பணம் எடுக்க சென்றனர். அப்போது, அவர்கள் பணம் எடுக்கும் போது குறித்த தொகையை விட கூடுதலாக பணம் வந்ததாக கூறப்படுகிறது. இத்தகவல், அப்பகுதியில் வேகமாக பரவியது. இதையடுத்து, ஏடிஎம்மில் பணம் எடுப்பதற்காக பொதுமக்கள் பலர் ஒன்று திரண்டு வந்தனர். இதுகுறித்து தகவல் அறிந்த டவுன் போலீசார் சம்பவ இடத்திற்கு வந்தனர். பின்னர் இதுகுறித்து உடனடியாக வங்கி அதிகாரிகளுக்கு தெரிவித்தனர். பின்னர், தற்காலிகமாக ஏடிஎம் மிஷின் உள்ள பகுதியின் கதவு மூடப்பட்டது. இந்நிலையில், ஏடிஎம் மிஷினில் ஏதேனும் தொழில்நுட்பக் கோளாறுகள் ஏற்பட்டு உள்ளதா? என்பது குறித்து ஆய்வு செய்த பின்பு பொதுமக்கள் பயன்பாட்டிற்கு கொண்டு வரப்படும் என வங்கி தரப்பில் தெரிவிக்கப்பட்டது. இதையடுத்து, பொதுமக்கள் அனைவரும் அங்கிருந்து கலைந்து சென்றனர். இதனால், அப்பகுதியில் சற்று பரபரப்பு ஏற்பட்டது என்பது குறிப்பிடத்தக்கது. மேலும், ஏடிஎம்மில் இருந்து யாருக்காவது கூடுதலாக பணம் சென்று உள்ளதா? அப்படி, பணம் எடுத்து சென்றது யார், யார் என்பது குறித்து வங்கி அதிகாரிகள் ஆய்வு செய்து வருகின்றனர்.

அரக்கோணம் அருகே மணல் கடத்தலுக்காக ஆற்றில் பள்ளம் தோண்டியபோது மணல் சரிந்து தொழிலாளி பலி: மேலும் 3 பேருக்கு தீவிர சிகிச்சை

அரக்கோணம், மே 17: அரக்கோணம் அருகே மணல் கடத்தலுக்காக பள்ளம் தோண்டிய போது ஆற்றில் மணல் சரிந்து ஒருவர் உயிரிழந்தார். இதுதொடர்பாக போலீசார் டிராக்டர் உரிமையாளர் உட்பட 2 பேரை கைது செய்து விசாரித்து வருகின்றனர். வேலூர் மாவட்டம், அரக்கோணம் அடுத்த தக்கோலம், வளர்புரம், மின்னல் உள்ளிட்ட பல்வேறு இடங்களில் உள்ள ஆறு, ஏரி, குளம், குட்டை, தனியார் நிலங்களில் மண், மணல் போன்றவைகளை அனுமதியின்றி எடுத்து லாரி, டிராக்டர் உள்ளிட்ட வாகனங்களில் கடத்தி விற்பனை செய்யப்படுகிறது. இதனை வருவாய், காவல் துறையினர் கண்டு கொள்வதில்லை. இந்நிலையில், அரக்கோணம் அடுத்த வளர்புரம் பகுதியில் உள்ள நந்தியாற்றின் கரையையொட்டி நேற்று காலை 4 பேர் பள்ளம் தோண்டி மணல் திருடிக்கொண்டு இருந்தனர். அப்போது, எதிர்பாராதவிதமாக திடீரென மணல் சரிந்து 4 பேரும் அதில் சிக்கினர். இதில் மூச்சுதிணறல் ஏற்பட்டு ஒருவர் பரிதாபமாக இறந்தார். மற்ற 3 பேரும் மயங்கிய நிலையில் கிடந்தனர். இதைப்பார்த்த அவ்வழியாக சென்றவர்கள் 3 பேரையும் மீட்டு திருத்தணியில் உள்ள தனியார் மருத்துவமனையில் சேர்த்தனர். தகவலறிந்த அரக்கோணம் தாசில்தார் ஜெயக்குமார், டிஎஸ்பி விஜயகுமார், தாலுகா இன்ஸ்பெக்டர் அமுதா மற்றும் போலீசார் சம்பவ இடம் சென்று விசாரணை நடத்தினர். இதில், மணல் சரிவில் சிக்கி இறந்தவர் வளர்புரம் பகுதியைச் சேர்ந்த தங்கவேல்(27) என்பதும், மயங்கிய நிலையில் இருந்தவர்கள் அதே பகுதியை சேர்ந்த சர்க்கில் தாஸ்(45), நாகராஜ்(32), ஏழுமலை(35) என தெரியவந்தது. மேலும், இவர்கள் மணல் கடத்தல் கும்பலிடம் கூலிவேலை செய்து வந்ததும், முதலில் மணலை குவியல் குவியலாக சேகரித்து பிறகு லாரி மற்றும் டிராக்டர்களில் கடத்திச்செல்வது தெரியவந்தது. இதுகுறித்து, அரக்கோணம் தாலுகா போலீசார் வழக்குப்பதிந்து, நந்தியாற்று பகுதியில் மணல் கடத்தியதாக வளர்புரம் பகுதியை சேர்ந்த டிராக்டர் உரிமையாளர் ஜோதி(42), டிரைவர் மணிகண்டன்(30) ஆகியோரை நேற்று கைது செய்து விசாரித்து வருகின்றனர்.

திருப்பதி கோவிந்தராஜர் கோயில் பிரமோற்சவத்தின் 5வது நாளில் தங்க கருட வாகனத்தில் சுவாமி பவனி ஆயிரக்கணக்கான பக்தர்கள் தரிசனம்

திருமலை, மே 16: திருப்பதி கோவிந்தராஜர் கோயில் பிரமோற்சவத்தின் 5வது நாளில் தங்க கருட வாகனத்தில் சுவாமி பவனி வந்தார். இதில் ஆயிரக்கணக்கான பக்தர்கள் திரண்டு சுவாமி தரிசனம் செய்தனர். திருப்பதி கோவிந்தராஜ சுவாமி கோயிலில் கடந்த 11ம் தேதி கொடியேற்றத்துடன் பிரமோற்சவம் தொடங்கியது. பிரமோற்சவத்தின் 4வது நாளான நேற்றுமுன்தினம் காலை கல்ப விருட்ச வாகனத்திலும் இரவு சர்வ பூபாள வாகனத்திலும் சுவாமி வீதி உலா வந்தார். இந்நிலையில், பிரமோற்சவத்தின் 5வது நாளான நேற்று காலை மோகினி அலங்காரத்தில் பல்லக்கில் கோவிந்தராஜர் எழுந்தருளி நான் மாட வீதிகளில் வலம் வந்து பக்தர்களுக்கு அருள்பாலித்தார். சுவாமி வீதி உலாவின் முன் யானைகள் அணிவகுத்து செல்ல பக்தர்களின் கோலாட்டம், பஜனைகள் நடைபெற்றது. வழி நெடுகிலும் கடை உரிமையாளர்கள், வியாபாரிகள், பொதுமக்கள் கற்பூர ஆரத்தி எடுத்து சுவாமியை வழிபட்டனர்.பின்னர் காலை 9.30 மணி முதல் 11 மணி வரை சுவாமி தாயாருக்கு சிறப்பு திருமஞ்சனம் நடைபெற்றது. இதில் பால், தயிர், தேன், சந்தனம் உட்பட பல்வேறு பழரசங்களால் அபிஷேகம் செய்யப்பட்டது. மாலை 6 மணி முதல் 7 மணி வரை ஊஞ்சல் சேவையும் இரவு 8 மணி முதல் 9 மணி வரை தங்க கருட வாகனத்தில் எழுந்தருளி சுவாமி வீதி உலா வந்து பக்தர்களுக்கு அருள்பாலித்தார். இதில் கோயில் பெரிய ஜீயர், சின்ன ஜீயர், துணை செயல் அலுவலர் வரலட்சுமி, உதவி செயல் அலுவலர் உதயபாஸ்கர் ரெட்டி, கண்காணிப்பாளர் ஞானபிரகாஷ், ஹரி, ஆலய இன்ஸ்பெக்டர் கிருஷ்ணமூர்த்தி உட்பட ஆயிரக்கணக்கான பக்தர்கள் திரண்டு கற்பூர ஆரத்தி எடுத்து சுவாமி தரிசனம் செய்தனர். பிரமோற்சவத்தின் 6வது நாளான இன்று காலை அனுமந்த வாகனத்திலும் இரவு கஜ (யானை) வாகனத்திலும் சுவாமி எழுந்தருளி நான்குமாட வீதியில் உலா வந்து பக்தர்களுக்கு அருள்பாலிக்க உள்ளார்.

மேற்குவங்கத்தில் வன்முறையை தூண்டி வரும் திரிணாமுல் காங்கிரசை தேர்தலில் இருந்து விலக்க வேண்டும் ஆந்திர பாஜ தலைவர் கோரிக்கை

திருமலை, மே 16: மேற்குவங்கத்தில் வன்முறையை தூண்டி வரக்கூடிய திரிணாமுல் காங்கிரஸ் கட்சியை தேர்தலிலிருந்து விலக்க வேண்டும்  என்று ஆந்திர மாநில பாஜ தலைவர் கண்ணா லட்சுமி நாராயணா கோரிக்கைவிடுத்தார். விஜயவாடாவில் ஆந்திர மாநில பாஜ மாநில தலைவர் கண்ணா லட்சுமி நாராயணா நேற்று நிருபர்களிடம் கூறியதாவது: மேற்குவங்கத்தில் நடைபெற்று வரும் வன்முறை சம்பவங்கள் ஜனநாயகத்தை சீர்குலைக்கும் விதமாக உள்ளது. அமித்ஷா மீது நடைபெற்ற தாக்குதல் மிகவும் கண்டிக்கத்தக்கது. வன்முறை மூலமாக ஆட்சியை பிடிக்க வேண்டும் என மேற்குவங்க முதல்வர் மம்தா பானர்ஜி முயற்சி செய்து வருகிறார்.எனவே, வன்முறையை தூண்டி வரக்கூடிய திரிணாமுல் காங்கிரஸ் கட்சியை தேர்தலில் இருந்து விலக்க வேண்டும் என தேர்தல் ஆணையத்திற்கு கோரிக்கை வைக்கிறோம். மாநிலக் கட்சிகள் ஆட்சிக்கு வந்த உடனேயே மாநிலம் முழுவதும் தங்களுக்கே சொந்தம் என்ற கற்பனையில் உள்ளனர். ஆந்திர மாநிலத்தில் தேர்தல் முடிவுக்குப் பிறகு பாஜ முக்கிய பங்கு வகிக்கும். மேற்கு வங்க முதல்வர் மம்தா பானர்ஜி மீது தேர்தல் ஆணையம் உடனடியாக நடவடிக்கை எடுக்கவேண்டும். இவ்வாறு அவர் கூறினார்.

தாதையகுண்டா கோயில் திருவிழா நிறைவு நாளில் விஸ்வரூப தரிசனத்தில் காட்சியளித்த கங்கையம்மன்

* மண் எடுப்பதில் பக்தர்களிடையே தள்ளுமுள்ளு * திருப்பதியில் பரபரப்புதிருப்பதி, மே 16: திருப்பதி தாதையகுண்டா கங்கையம்மன் கோயில் திருவிழாவின் நிறைவு நாளில் விஸ்வரூப தரிசனத்தில் கங்கையம்மன் காட்சியளித்தார். தொடர்ந்து மண் எடுப்பதில் பக்தர்களிடையே தள்ளுமுள்ளு ஏற்பட்டதால் பரபரப்பு ஏற்பட்டது. திருப்பதியில் பல ஆண்டுகளுக்கு முன்பு மக்களை வதைத்து வந்த அசுரனை தாதையகுண்டா கங்கையம்மன் ஒவ்வொரு நாள் ஒவ்வொரு வேடமிட்டு வந்து அழித்ததாக பக்தர்களிடையே நம்பிக்கையாக உள்ளது. இதை நினைவுகூறும் வகையில் ஒவ்வொரு ஆண்டும் தாதையகுண்டா கங்கையம்மன் கோயிலில் மே மாதம் இரண்டாவது வாரத்தில் திருவிழா நடத்தப்படுவது வழக்கம். அதன்படி, இந்தாண்டு திருவிழா கடந்த 7ம் தேதி தொடங்கி நேற்றுடன் நிறைவு பெற்றது. திருவிழாவின் முதல்நாளன்று அதிகாலை அவிலாலா ஏரியில் இருந்து மஞ்சள், குங்குமம் கொண்டு வரப்பட்டு அம்மனுக்கு பால், தயிர், மஞ்சள், இளநீர் கொண்டு சிறப்பு அபிஷேகங்கள் நடத்தப்பட்டது.தொடர்ந்து கோயிலில் உள்ள அம்மனின் மறுவடிவமாக கூறப்படும் கல்தூணிற்கு சிறப்பு அபிஷேகம் செய்யப்பட்டு, மஞ்சள், குங்குமம் வைத்து புதிய புடவைகள் அணிவிக்கப்பட்டு சிறப்பு பூஜைகள் நடந்தது. இதையடுத்து பைராகி வேடம், பண்ட வேடம், தோட்டி வேடம், துரை வேடம், மாதங்கி வேடம், 13ம் தேதி சுனப்பகுண்டலு வேடத்தில் அம்மன் பக்தர்களுக்கு அருள்பாலித்தார். நேற்றுமுன்தினம் திருவிழா நடைபெற்றது. இதில் ஆயிரக்கணக்கான பக்தர்கள் கலந்துகொண்டு பொங்கல் வைத்து ஆடு, கோழி பலியிட்டு நேர்த்திக்கடன் செலுத்தினர். மேலும் பல்வேறு வேடமணிந்து வந்து தீச்சட்டி சுமந்தனர். இந்நிலையில் திருவிழாவின் நிறைவு நாளான நேற்று சிறப்பு வாய்ந்த விஸ்வரூப தரிசனத்தில் அம்மன் பக்தர்களுக்கு காட்சியளித்தார். இதையொட்டி நேற்றுமுன்தினம் நள்ளிரவு முதல் நேற்று அதிகாலை களிமண்ணால் அம்மனின் பிரமாண்டமான சிரசு வடிவமைக்கப்பட்டது. பின்னர் அம்மனின் கண் திறக்கப்பட்டு விஸ்வரூப தரிசனத்தில் கங்கையம்மன் பக்தர்களுக்கு காட்சியிளத்தார். தொடர்ந்து சிறப்பு பூஜைகள் செய்யப்பட்டு மகா தீபாராதனை நடைபெற்றது. பின்னர் சில நிமிடங்களிலேயே அம்மனின் சிரசு கலைக்கப்பட்டு அந்த மண் பக்தர்களுக்கு பிரசாதமாக வழங்கப்பட்டது. இந்த மண்ணை பெற பக்தர்களிடையே தள்ளுமுள்ளு ஏற்பட்டது. இதனால் அங்கு பரபரப்பு ஏற்பட்டது. தொடர்ந்து அங்கு பாதுகாப்பு பணியில் ஈடுபட்ட போலீசார் நெரிசல் ஏற்படாமல் பார்த்துக்கொண்டனர்.அம்மன் மண்ணின் சிறப்புஅம்மனின் சிரசு கலைக்கப்பட்டு கிடைக்கும் மண்ணை வீட்டில் வைத்தால் குடும்பத்தில் சகல தோஷங்கள் நீங்கி செல்வ செழிப்புடன் நலமாக வாழலாம் என்ற நம்பிக்கை பக்தர்களிடையே இருந்து வருகிறது. இதனால் மண்ணை எடுக்க ஒவ்வொரு ஆண்டும் பக்தர்களிடையே தள்ளுமுள்ளு ஏற்படுவது தொடர்கதையாக உள்ளது.

திருப்பதி தேவஸ்தானம் சார்பில் 27ம் தேதி முதல் கோடைக்கால சுபப்பிரதம் பயிற்சி வகுப்பு தொடக்கம் 7, 8, 9ம் வகுப்பு மாணவர்களுக்கு அனுமதி

திருமலை, மே 16: திருப்பதி தேவஸ்தானம் சார்பில் 27ம் தேதி முதல் கோடைக்கால சுபப்பிரதம் பயிற்சி வகுப்புகள் தொடங்குகிறது. இதில் 7, 8, 9ம் வகுப்பு மாணவர்களுக்கு அனுமதி அளிக்கப்படுகிறது. திருமலை திருப்பதி தேவஸ்தானம் சார்பில் ஒவ்வொரு ஆண்டும் கோடை விடுமுறையில் நமது பாரத சம்பிரதாயம், கலாசாரத்தை வருங்கால தலைமுறையினர் மாணவ, மாணவிகளுக்கு கொண்டு செல்லும் விதமாக கோடைக்கால சுபப்பிரதம் பயிற்சி வகுப்பு தேவஸ்தானம் சார்பில் நடத்தப்பட்டு வருகிறது. அதன்படி இந்தாண்டு வருகிற 27ம் தேதி முதல் ஜூன் 2ம் தேதி வரை 7, 8, 9ம் வகுப்பு மாணவ, மாணவிகளுக்கு சுபப்பிரதம் பயிற்சி வகுப்புகள் நடத்தப்பட உள்ளது. 2012ம் ஆண்டு முதல் திருமலை திருப்பதி தேவஸ்தானம் சார்பில் நடத்தப்படும்இந்த பயிற்சி வகுப்பில் வெங்கடேஸ்வர சுவாமியின் வாழ்க்கை வரலாறு, பகவத்கீதை, நமது சம்பிரதாயம், கலாசாரம், ராமாயணம், பாரத குடும்ப வாழ்க்கை நடைமுறை, கலாசார பண்டிகைகள், திருவிழாக்கள் உட்பட பல்வேறு விதமான பயிற்சிகள் திருப்பதியில் 7 மையங்களில் 3500 மாணவ, மாணவிகளுக்கு பயிற்சி வழங்கப்படுகிறது.இதற்காக இந்து தர்ம பிரசார பரிஷத் திட்ட உதவியாளர், மாவட்ட தர்ம பிரசார பிரசாத் மண்டலி உறுப்பினர்கள், தேவஸ்தான கல்யாண மண்டபம் மற்றும் வெப்சைட் மூலமாக இந்த பயிற்சி வகுப்பில் பங்கேற்க விருப்பமுள்ள மாணவ, மாணவிகள் விண்ணப்பிக்கலாம். பூர்த்தி செய்யப்பட்ட விண்ணப்பங்களை மீண்டும் அந்தந்த மண்டல மற்றும் மாவட்ட இந்து தர்ம பிரசார பிரசாத் அதிகாரிகளிடம் ஒப்படைக்க வேண்டும். திருப்பதியில் உள்ள மாணவர்களுக்காக அன்னமாச்சாரியா கலாமந்திரம், இந்து தர்ம பிரசார பரிஷத் ஒருங்கிணைப்பாளர் அலுவலகத்தில் விண்ணப்பங்களை பெற்றுக் கொள்ளலாம். இதுதவிர திருப்பதி தேவஸ்தான கல்வி மையங்களான வெங்கடேஸ்வரா கலைக் கல்லூரி, பத்மாவதி கலைக் கல்லூரி,  கோவிந்த ராஜ சுவாமி கலைக் கல்லூரி,  வெங்கடேஸ்வரா ஜூனியர் கல்லூரி ,  பத்மாவதி ஜூனியர் கல்லூரி, ஓரியண்டல் கல்லூரி,  பத்மாவதி பாலிடெக்னிக் கல்லூரி ஆகிய இடங்களில் மாணவர்களுக்கும் மாணவிகளுக்கும் தனித்தனியாக பயிற்சி வழங்கப்பட உள்ளது. பயிற்சி வகுப்புகளுக்கான தேவையான புத்தகங்கள், உணவு தங்கும் வசதி ஆகியவை தேவஸ்தானம் சார்பில் இலவசமாக செய்து தரப்பட உள்ளதாக தேவஸ்தானம் வெளியிட்டுள்ள அறிக்கையில் தெரிவிக்கப்பட்டுள்ளது.

திருப்பதி கோயிலில் மழை வேண்டி சிறப்பு யாகம் உச்சநீதிமன்ற நீதிபதி பங்கேற்பு

திருமலை, மே 16: திருப்பதி கோயிலில் மழை வேண்டி நடந்து வரும் சிறப்பு யாகத்தில் உச்சநீதிமன்ற நீதிபதி என்.வி.ரமணா பங்கேற்றார். நாடு முழுவதும் மழை பெய்து, அணைகளில் நீர் நிரம்பி தண்ணீர் பற்றாக்குறையை போக்க வேண்டும் என ஒவ்வொரு ஆண்டும் திருமலை திருப்பதி தேவஸ்தானம் சார்பில் காரீரி இஸ்டி யாகம் நடத்தப்பட்டு வருகிறது. அதன்படி இந்தாண்டு நேற்றுமுன்தினம் முதல் 18ம் தேதி வரை மழை வேண்டி பாபவிநாசம் செல்லும் சாலையில் பார்வேட்டை மண்டபம் அருகே காரீரி இஸ்டி யாகம் நடத்தப்பட்டு வருகிறது.இந்நிலையில் யாகத்தின் இரண்டாவது நாளான நேற்று காலை கணபதி யாகம், பார்ஜன்ய யாகம் நடத்தப்பட்டது. இதனை உச்சநீதிமன்ற நீதிபதி என்.வி.ரமணா தனது மனைவியுடன் பங்கேற்றார். அவருக்கு யாகம் செய்து வரக்கூடிய வேத பண்டிதர்கள், ரூத்விக்குகள் யாகம் குறித்த பலன்களை விவரித்தனர். முன்னதாக உச்சநீதிமன்ற நீதிபதி ரமணா ஏழுமலையான் கோயிலில் நடந்த அர்ச்சனை சேவையில் பங்கேற்று சுவாமி தரிசனம் செய்தார்.

‘பல்லி விழுந்ததால் சகுனம் சரியில்லை’ குளித்துவரும்படி கூறி மூதாட்டியிடம் 10 சவரன், ₹1 லட்சம் திருடிச்சென்ற பெண் ஜோலார்பேட்டையில் நூதன முறையில் துணிகரம்

ஜோலார்பேட்டை, மே 16: ஜோலார்பேட்டையில் பல்லி விழுந்ததால் சகுனம் சரியில்லை, உடனே சென்று குளிக்கும்படி கூறி மூதாட்டியிடம் 10 சவரன் நகை, ₹1 லட்சம் பணத்தை நூதன முறையில் திருடிச்சென்ற பெண் உட்பட 2 பேரை போலீசார் தேடி வருகின்றனர்.வேலூர் மாவட்டம் ஜோலார்பேட்டை அடுத்த பாச்சல் பகுதியை சேர்ந்தவர் பாஸ்கர்(29). வெளிநாட்டில் வேலை செய்கிறார். இவரது மனைவி இளையராணி. இவருடன் பாஸ்கரனின் தாய் குணசுந்தரி, பாஸ்கரனின் தாத்தா கண்ணன், பாட்டி யசோதா ஆகியோர் வசித்து வருகின்றனர். இந்நிலையில் பாஸ்கரன் கடந்த 3 மாதத்திற்கு முன்பு வெளிநாட்டில் இருந்து தனது சொந்த ஊருக்கு வந்தார். நேற்றுமுன்தினம் பாஸ்கரன் தனது நண்பர்களை பார்க்க வெளியே சென்றார். இளையராணி மூக்கனூரில் உள்ள தனது தாய் வீட்டிற்கும், குணசுந்தரி கட்டிட வேலைக்கும் சென்றுவிட்டனர். வீட்டில் கண்ணன், யசோதா ஆகியோர் மட்டும் இருந்தனர். அசதி காரணமாக கண்ணன் வீட்டில் தூங்கிக்கொண்டிருந்தார்.அப்போது பாஸ்கரனின் வீட்டருகே சாப்பிட்டுக் கொண்டிருந்த 30 வயது மதிக்கத்தக்க ஒரு பெண்ணும், 50 வயது மதிக்கதக்க ஒரு ஆணும் குடிக்க தண்ணீர் வேண்டும் என யசோதாவிடம் கேட்டுள்ளனர். இதனால் யசோதா தண்ணீர் எடுத்து வந்துள்ளார். இதற்கிடையே இளம்பெண்ணுடன் வந்த அந்த நபர், பழம் வாங்கி வருவதாக கூறி அங்கிருந்து சென்றார். அப்போது யசோதா தண்ணீர் எடுத்து வந்தபோது, அவர் மீது சுவற்றில் இருந்து பல்லி விழுந்தது. இதனை பார்த்த அந்த இளம்பெண் சகுனம் சரியில்லை, நீங்கள் சென்று குளித்துவிடுங்கள் எனக் கூறினாராம். இதையடுத்து யசோதா குளிக்க சென்றார். அப்போது வீட்டிற்குள் புகுந்த அந்த இளம்பெண், பீரோவை திறந்து நகை, பணம் ஆகியவற்றை திருடிக்கொண்டு தப்பியோடிவிட்டார். குளித்துவிட்டு வந்த யசோதா, துணிகளை எடுக்க பீரோவை திறந்தார். அப்போது பீரோவில் வைத்திருந்த 10 சவரன் நகை, ₹1 லட்சம் திருட்டு போனதை பார்த்து அதிர்ச்சி அடைந்தார். வெளியே வந்து பார்த்தபோது இளம்பெண்ணையும் காணவில்லை. பல்லியை மூதாட்டி மீது போட்டு நாடகமாடி இந்த நூதன திருட்டில் ஈடுபட்டுள்ளதாக கூறப்படுகிறது. இதுகுறித்து பாஸ்கரன் ஜோலார்பேட்டை போலீசில் புகார் அளித்தார். அதன்பேரில் போலீசார் வழக்குப்பதிந்து பெண் உட்பட 2 பேரையும் வலைவீசி தேடி வருகின்றனர்.

குடியாத்தம் கெங்கையம்மன் திருவிழா கோலாகலம் பக்தர்கள் வெள்ளத்தில் மிதந்து வந்த அம்மன் சிரசு லட்சக்கணக்கான பக்தர்கள் தரிசனம்

குடியாத்தம், மே 16: குடியாத்தம் கெங்கையம்மன் கோயில் திருவிழாவில் நேற்று காலை அம்மன் சிரசு பக்தர்கள் வெள்ளத்தில் மிதந்து கோயிலை வந்தடைந்தது. இவ்விழாவில் லட்சக்கணக்கான பக்தர்கள் கலந்து கொண்டு சுவாமியை வழிபட்டனர். வேலூர் மாவட்டத்தில் நடைபெறும் பிரசித்திபெற்ற விழாக்களில் ஒன்று குடியாத்தம் கெங்கையம்மன் கோயில் சிரசு திருவிழா. ஆண்டுதோறும் வைகாசி மாதம் 1ம் தேதி இந்த விழா நடைபெறுகிறது. அதன்படி இந்தாண்டு சிரசு திருவிழா நேற்று கோலாகலமாக நடந்தது.இத்திருவிழா கடந்த மாதம் 10ம் தேதி பால் கம்பம் நடப்பட்டு, காப்பு கட்டுதலுடன் தொடங்கியது. தொடர்ந்து காலை, மாலை அம்மனுக்கு சிறப்பு அபிஷேகம், ஆராதனைகள் நடந்தன. இவ்விழாவின் ஒரு நிகழ்வாக கடந்த 11ம் தேதி அம்மனுக்கு திருக்கல்யாண உற்சவம் நடந்தது. விழாவை முன்னிட்டு தினமும் திரளான பக்தர்கள் தங்கள் குடும்பத்துடன் வந்து பொங்கல் வைத்தும், கூழ் வார்த்தும் நேர்த்திக்கடன் செலுத்தினர். தொடர்ந்து நேற்று முன்தினம் தேரோட்டம் நடந்தது. சிறப்பு அலங்காரத்தில் அம்மன் தேரில் எழுந்தருளி வீதி உலா வந்து பக்தர்களுக்கு அருள்பாலித்தார்.விழாவின் முக்கிய நிகழ்வான கெங்கையம்மன் சிரசு ஊர்வலம் நேற்று நடந்தது. காலை 6 மணியளவில் முத்தியாலம்மன் கோயிலில் இருந்து கெங்கையம்மன் சிரசு ஊர்வலமாக புறப்பட்டு முக்கிய வீதிகள் வழியாக பக்தர்கள் வெள்ளத்தில் நீந்தியபடியே கோயிலை வந்தடைந்தது. அங்கு மண்டபத்தில் சண்டாளச்சியின் உடலில் அம்மன் சிரசு பொருத்தப்பட்டது. தொடர்ந்து அம்மனுக்கு கண் திறக்கப்பட்டு சிறப்பு பூஜைகள் நடந்தன. பின்னர் பக்தர்கள் தரிசனத்திற்கு அனுமதிக்கப்பட்டனர். மலர் மாலை, எலுமிச்சை மாலை, ரூபாய் நோட்டு மாலை ஆகியவற்றை பக்தர்கள் நீண்டவரிசையில் காத்திருந்து அம்மனுக்கு அணிவித்து வழிபட்டனர். சிரசு ஊர்வலத்தின் போது வழிநெடுகிலும் திரண்டிருந்த லட்சக்கணக்கான பக்தர்கள் தேங்காய் உடைத்து தங்கள் நேர்த்திக்கடனை செலுத்தினர். சிரசுக்கு லட்சக்கணக்கான பக்தர்கள் மாலை அணிவித்து தேங்காய் உடைத்தும், ஆடு, கோழிகளை பலியிட்டும் நேர்த்திக்கடன் செலுத்தினர். சுமார் 3 டன் தேங்காய்கள் சிரசு ஊர்வலத்தின்போது உடைக்கப்பட்டன. மேலும் சிரசு ஊர்வலத்தில் 500க்கும் மேற்பட்ட கிராமிய கலைஞர்கள் மயிலாட்டம், புலியாட்டம், சிலம்பாட்டம் என தங்கள் திறமைகளை வெளிப்படுத்தியபடி வந்தனர்.திருவிழாவின் இறுதி நிகழ்வாக இன்று இரவு அம்மன் உடலில் இருந்து சிரசு பிரிக்கப்பட்டு, கவுண்டன்ய ஆற்றங்கரையில் அலங்காரம் கலைக்கப்பட்டு மீண்டும் முத்தாலம்மன் கோயிலுக்கு கொண்டு வரப்படுகிறது. இந்த ஆண்டு குடியாத்தம் கெங்கையம்மன் திருவிழாவில் தமிழகம் மட்டுமின்றி ஆந்திரா, கர்நாடகாவை சேர்ந்த பல லட்சம் பக்தர்கள் கலந்து கொண்டனர். குடியாத்தம் கெங்கையம்மன் கோயில் விழாவையொட்டி நேற்று வேலூர் மாவட்டத்துக்கு உள்ளூர் விடுமுறை அளிக்கப்பட்டிருந்தது. விழாவுக்கு ஏடிஎஸ்பி ஆசைத்தம்பி தலைமையில் 3 டிஎஸ்பிகள், 10 இன்ஸ்பெக்டர்கள், 30 எஸ்ஐக்கள் உட்பட 600 போலீசார் பாதுகாப்பு பணியில் ஈடுபட்டனர். இதுதவிர தனிப்பிரிவு போலீசார், உளவுத்துறை, வெடிகுண்டு நிபுணர்க்ள பல்வேறு பாதுகாப்பு கருவிகளுடன் கோயில், ஊர்வலம், சிரசு மண்டபம் உட்பட முக்கிய இடங்களில் கண்காணிப்பில் ஈடுபட்டிருந்தனர்.கிராமங்கள் சார்பில் மரியாதைகுடியாத்தம் கெங்கையம்மன் கோயில் திருவிழாவின் போது குடியாத்தம் நகரை சுற்றியுள்ள 30 முதல் 40க்கும் மேற்பட்ட கிராமங்கள் சார்பில் தாரை தப்பட்டை, பம்பை மேளம் முழங்க, சிலம்பாட்டம், ஒயிலாட்டம், புலியாட்டம் என ஆட்டம் பாட்டமுடன் வந்து அம்மனுக்கு மாலைகள் செலுத்தப்பட்டது. இது பாரம்பரியமாக கடைபிடிக்கப்பட்டு வருவதாகவும், இதன் மூலம் கெங்கையம்மன் குடியாத்தம் மட்டுமின்றி சுற்றுப்புற கிராமங்களை காக்கும் தெய்வமாகவும் விளங்குகிறாள் என்றும் பக்தர்கள் தெரிவித்தனர்.பெண்களின் கூந்தலை துண்டித்த கும்பல்பொதுவாக திருவிழாக்காலங்களில் கூடும் மக்கள் கூட்டத்தை பயன்படுத்தி திருட்டு ஆசாமிகள் பணம், நகை போன்றவற்றைதான் அபேஸ் செய்வர். ஆனால், குடியாத்தம் கெங்கையம்மன் கோயில் திருவிழாவில் நகை, பணம் மட்டுமின்றி 10க்கும் மேற்பட்ட பெண்களின் கூந்தலையும் மர்ம ஆசாமிகள் வெட்டி எடுத்து சென்றுள்ளனர். கூட்டத்தை விட்டு வெளியில் வந்த பிறகே தங்கள் கூந்தல் பறிபோனதை அறிந்த பெண்கள் அதிர்ச்சியடைந்து அங்கிருந்த போலீசாரிடம் புகார் அளித்தனர். இந்த புகாரை கண்டு போலீசார் மிரண்டு போனதுதான் மிச்சம்.திருவிழாவில் அன்னதானம்குடியாத்தம் கெங்கையம்மன் திருவிழாவில் நகரின் பல இடங்களில் வீடுகள், மண்டபங்களில் பக்தர்களுக்கு அன்னதானம் வழங்கப்பட்டது. அதோடு சாலைகள், தெருக்களில் ஆங்காங்கே நீர்மோர், எலுமிச்சை சாறு, கூழ், குடிநீர், குளுக்கோஸ் கலந்த நீர் ஆகியன வழங்கப்பட்டன.தற்காலிக பஸ் நிலையங்கள்கெங்கையம்மன் திருவிழாவை முன்னிட்டு வேலூர், காட்பாடி மார்க்கங்களில் இருந்து வரும் பஸ்களுக்கான நகராட்சி பள்ளி மைதானமும், ஆம்பூர் மார்க்கத்தில் இருந்து வரும் பஸ்களுக்காக செருவங்கியிலும், பேரணாம்பட்டு மார்க்கத்தில் இருந்து வரும் பஸ்கள் நிறுத்த பெரும்பாடியிலும் என 3 தற்காலிக பஸ் நிலையங்கள் ஏற்படுத்தப்பட்டிருந்தன. இத்திருவிழாவுக்காக வேலூர், ஆம்பூர், பேரணாம்பட்டு, திருப்பத்தூர், வாணியம்பாடி, ஒடுகத்தூர் என பல்வேறு இடங்களில் இருந்து 60 சிறப்பு பஸ்கள் இயக்கப்பட்டன.கோயில் அருகில் 2 தீயணைப்பு வாகனங்களும், ஆம்புலன்ஸ் ஒன்றும் தயார் நிலையில் நிறுத்தி வைக்கப்பட்டிருந்தன. மருத்துவர்கள், செவிலியர்கள் உட்பட 25 பேர் கொண்ட தற்காலிக மருத்துவ முகாம் அமைக்கப்பட்டிருந்தது. மின்கசிவு, மின்தடை உட்பட மின்சாரம் தொடர்பான எதிர்பாராத பிரச்னைகளை சமாளிக்க 25க்கும் மேற்பட்ட மின்ஊழியர்கள் தயார் நிலையில் வைக்கப்பட்டிருந்தனர்.மதியத்துக்கு மேல் கொட்டிய மழைபொதுவாக குடியாத்தம் கெங்கையம்மன் திருவிழாவுக்கு முன்னும், பின்னும் மழை பெய்வது வாடிக்கை. இந்த ஆண்டும் திருவிழாவுக்கு ஒரு நாள் முன்னதாக பலத்த மழை குடியாத்தம் மற்றும் சுற்றுப்புற பகுதிகளில் கொட்டியது. நேற்று மதியமும்1 மணி நேரத்துக்கும் மேல் பலத்த மழை பெய்தது.

அரசு நடுநிலைப்பள்ளி வளாகத்தில் அமைந்துள்ள 2381 அங்கன்வாடி மையங்களில் எல்கேஜி, யுகேஜி சேர்க்கை தொடக்கக்கல்வி இயக்குனர் உத்தரவு

வேலூர், மே 15: அரசு நடுநிலைப்பள்ளி வளாகத்தில் அமைந்துள்ள 2381 அங்கன்வாடி மையங்களில் எல்கேஜி, யுகேஜி சேர்க்கை நடத்தப்பட வேண்டும் என்று தொடக்கக்கல்வி இயக்குனர் உத்தரவிட்டுள்ளார். இதுகுறித்து தொடக்கக்கல்வி இயக்குனர் அனைத்து முதன்மைக்கல்வி அலுவலர்களுக்கும் அனுப்பியுள்ள சுற்றறிக்கையில் கூறியிருப்பதாவது: அரசு பள்ளிகளில் தீவிர மாணவர் சேர்க்கை தொடர்பாக அனைத்து வட்டாரக் கல்வி அலுவலர்களுக்கும் அறிவுரை வழங்கி மாணவர் சேர்க்கை முழுமையாக நடைபெற ஒத்துழைப்பு நல்க வேண்டும். கட்டாய கல்வி உரிமைச் சட்டத்தின் கீழ் மாணவர்களின் சேர்க்கைக்கான நடைமுறையை பின்பற்றி சேர்க்கையை அதிகப்படுத்த வேண்டும். கோடை விடுமுறை காலத்திலேயே சேர்க்கையினை நடத்த தலைமையாசிரியர்களுக்கு அறிவுறுத்த வேண்டும். அரசு நடுநிலைப்பள்ளி வளாகத்தில் அமைந்துள்ள 2381 அங்கன்வாடி மையங்களில் எல்கேஜி மற்றும் யுகேஜி மாணவர் சேர்க்கையை துரிதப்படுத்துமாறு அப்பள்ளிகளின் தலைமையாசிரியர்களுக்கு வட்டாரக் கல்வி அலுவலர்கள் அறிவுறுத்தி நடவடிக்கை மேற்கொள்ள வேண்டும்.அங்கன்வாடியில் பயிலும் குழந்தைகளில் 5 வயதுடைய குழந்தைகளை கண்டறிந்து அவர்களை அரசு பள்ளிகளில் 1ம்வகுப்பு சேர்க்க உரிய நடவடிக்கை மேற்கொள்ள வேண்டும். மேலும் பள்ளியை சுற்றியுள்ள குடியிப்புகளில் உள்ள 5 வயதுடைய குழந்தைகளை கண்டறிந்து அவர்களை உடனடியாக சேர்க்க வேண்டும். பள்ளிகளில் மாணவர் சேர்க்கை சார்ந்த தகவலை பொது மக்கள் அனைவரும் அறியும்படி பேனர்கள், துண்டு பிரசுரங்கள், பதாகைகள், விளம்பரப்பலகைகள் மற்றும் பிரசார வாகனங்கள் மூலம் தெரியப்படுத்த வேண்டும். இடைநின்ற மாணவர்களை மீட்டு சேர்க்கை நடத்த வேண்டும். அரசின் திட்டங்களை பெற்றோர்களிடம் எடுத்து கூற வேண்டும். கிராமக் கல்விக்குழுக் கூட்டம், பள்ளி மேலாண்மைக்குழு கூட்டம் மற்றும் பெற்றோர் ஆசிரியர் கழக கூட்டம் கலெக்டர் தலைமையில் கூட்டம் நடத்தி மாணவர் சேர்க்கையை அதிகப்படுத்த நடவடிக்கை எடுக்க வேண்டும். இந்த பணியில் ஒருங்கிணைந்த பள்ளி கல்வியின் கீழ் பணிபுரியும் வட்டார வளமைய ஆசிரியர் பயிற்றுனர்களை ஈடுபடுத்தி கொள்ள வேண்டும். மேலும் பொதுமக்கள் இடையே விழிப்புணர்வு ஏற்படுத்தும் வகையில் பேரணி நடத்தப்பட வேண்டும். கோடை வெயிலின் தாக்கம் அதிகமாக உள்ளதால், மாணவர்களின் சேர்க்கை சார்பாக நடக்கும் விழிப்புணர்வு பேரணி நடத்தும் போது பள்ளி மாணவர்கள் கட்டாயம் ஊர்வலத்தில் பங்கு பெறச் செய்யக் கூடாது. இந்த தகவலை அனைத்து வட்டாரக் கல்வி அலுவலர்கள் மூலமாக அனைத்து பள்ளி தலைமை ஆசிரியர்களுக்கும் தெரியப்படுத்தி உரிய நடவடிக்கை மேற்கொள்ள வேண்டும். சேர்க்கை தொடர்பான விவரத்தை இயக்குனருக்கு முதன்மைக்கல்வி அலுவலர்கள் அனுப்பி வைக்க வேண்டும். இவ்வாறு அதில் கூறியிருந்தது.

தமிழகம் முழுவதும் மலிவு விலை சிமென்ட் கிடைப்பதில் சிக்கல் வங்கி வரைவோலை கொடுத்து மாதக்கணக்கில் காத்திருப்பு

வேலூர், மே 16: தமிழகம் முழுவதும் பல்வேறு ஊர்களில் வங்கி வரைவோலை சமர்ப்பித்தும் உரிய காலத்தில் மலிவு விலை சிமென்ட் கிடைக்காமல் கட்டிடப்பணிகள் பாதிக்கப்பட்டுள்ளதாக பொதுமக்கள் வேதனை தெரிவித்துள்ளனர். சிமென்ட் விலை ஏற்றத்தால் ஏழை நடுத்தர மக்கள் பாதிக்கப்படுவதை தடுக்கும் வகையில் சலுகை விலையில் சிமென்ட் விற்பனை செய்யும் வகையில் அம்மா சிமென்ட் திட்டத்தை அரசு செயல்படுத்தி வருகிறது. தனியார் சிமென்ட் நிறுவனங்களில் இருந்து கொள்முதல் செய்யப்படும் சிமென்ட் மூட்டைகள் தமிழகத்தில் அனைத்து மாநகராட்சி, நகராட்சி, பேரூராட்சி மற்றும் ஊராட்சி ஒன்றியங்களில் உள்ள 470 கிடங்குகளில் இருப்பு வைத்து மூட்டை ஒன்று 190க்கு விற்பனை செய்யப்படும்.இத்திட்டத்தின் கீழ் வீடு கட்டுவோர் 100 சதுர அடிக்கு 50 மூட்டைகள் வீதம் அதிகபட்சமாக 1500 சதுர அடிக்கு 750 மூட்டைகள் வரை சலுகை விலையில் சிமென்ட் பெற்றுக் கொள்ளலாம். சிமென்ட் வாங்க விரும்புவோர் அங்கீகரிக்கப்பட்ட கட்டிட திட்ட வரைபடத்தையோ அல்லது கிராம நிர்வாக அலுவலர், வருவாய்த்துறை அலுவலர், ஊராட்சி ஒன்றிய மேற்பார்வையாளர், ஊராட்சி ஒன்றிய ஆய்வாளரின் சான்றிதழையோ சமர்ப்பிக்க வேண்டும். அரசின் மலிவு விலை சிமென்ட் சிவில் சப்ளைஸ் கார்ப்பரேஷனின் 220 கிடங்குகள், ஊரக வளர்ச்சித்துறையின் 250 கிடங்குகள் மூலம் விற்பனை செய்யப்படுகிறது. இதற்காக திட்டத்தின் பெயரிலேயே வங்கி வரைவோலை எடுத்து சிமென்ட் மூட்டைகளை வாங்கிக் கொள்ளலாம். ஆனால், வங்கி வரைவோலை எடுத்து சமர்ப்பித்து 3 முதல் 5 மாதங்கள் வரை சிமென்ட் கிடைக்காமல் அவதியுறுவதாக புகார் எழுந்துள்ளது.வேலூர் மாவட்டத்தில் வேலூர், ஆம்பூர், வாணியம்பாடி, திருப்பத்தூர் என பல இடங்களிலும் வீடு கட்டவும், கட்டிடம் பழுது பார்க்கவும், வீடு விரிவாக்கம் செய்யவும் வங்கி வரைவோலை எடுத்து சமர்ப்பித்தவர்கள் 5 மாதங்களாக சிமென்ட் கிடைக்கும் என்ற நம்பிக்கையில் காத்திருக்கின்றனர். இதுதொடர்பாக அவர்கள் சம்பந்தப்பட்ட கிடங்குகளில் கேட்டபோது, சரியான பதில் கிடைக்கவில்லை என்றும், இந்த நிலை மாநிலம் முழுவதும் பரவலாக நீடிப்பதாகவும் கூறப்படுகிறது. இதுதொடர்பாக வேலூர் சிவில் சப்ளைஸ் குடோன் அலுவலகத்தில் விசாரித்தபோது, ‘ஏற்கனவே ஆர்டர் கொடுத்த தனியார் சிமென்ட் நிறுவனம் சிமென்ட் சப்ளை செய்யாததால், வேறு நிறுவனத்துக்கு ஆர்டர் மாற்றப்பட்டுள்ளது. ஓரிரு நாட்களில் சிமென்ட் சப்ளை செய்யப்பட்டுவிடும். சிமென்ட் வந்ததும் வங்கி வரைவோலை கொடுத்தவர்களுக்கு வழங்கப்படும். அதேபோல் குடியாத்தம், ஆம்பூர், காவேரிப்பாக்கம், திருப்பத்தூர் குடோன்களிலும் சிமென்ட் வந்துவிடும். மாநிலம் முழுக்க இப்பிரச்னை இருப்பதாக கூற முடியாது’ என்றனர்.

அரக்கோணம்- சென்னை இடையே புறநகர் மின்சார ரயில்கள் தாமதம் பயணிகள் அவதி

அரக்கோணம், மே 16: அரக்கோணத்தில் இருந்து சென்னை செல்லும் புறநகர் மின்சார ரயில்கள் தாமதமாக இயக்கப்பட்டதால் பயணிகள் அவதிப்பட்டனர். வேலூர் மாவட்டம், அரக்கோணம் ரயில் நிலையத்திலிருந்து நாள்தோறும் ெசன்னைக்கும், சென்னையிலிருந்து அரக்கோணத்திற்கும் நூற்றுக்கும் மேற்பட்ட புறநகர் மின்சார ரயில்கள் இயக்கப்படுகிறது. இதேபோல் அரக்கோணம் ரயில் நிலையம் வழியாக வடமாநிலம் மற்றும் வடமாவட்டங்களுக்கு எக்ஸ்பிரஸ் உள்ளிட்ட பல்வேறு ரயில்களும் சென்று வருகின்றன. இதனால் அரக்கோணம் ரயில் நிலையத்தில் எப்போதும் கூட்டம் மிகுந்து காணப்படும்.இந்நிலையில் அரக்கோணம் ரயில் நிலையத்தில் இருந்து சென்னை சென்ட்ரல் மற்றும் கடற்கரைக்கு நேற்று காலை 6 மணியில் இருந்து 8 மணிக்குள்ளாக செல்லவேண்டிய மின்சார ரயில்கள் சுமார் 20 நிமிடங்கள் வரை காலதாமதமாக புறப்பட்டுச்சென்றன. இதனால் பயணிகள் கடும் அவதிப்பட்டனர். இதுகுறித்து ரயில் நிலைய அதிகாரிகளை பயணிகள் சந்தித்து, ‘ஏன் அடிக்கடி புறநகர் மின்சார ரயில்களை தாமதமாக இயக்குகிறீர்கள்?’ என கேட்டனர். அதற்கு காட்பாடி மார்க்கம் உள்ளிட்ட பல்வேறு பகுதியில் இருந்து அடுத்தடுத்து சுமார் 4க்கும் மேற்பட்ட எக்ஸ்பிரஸ் ரயில்கள் வந்ததால், பிளாட்பாரங்களில் மாற்றி மாற்றி ரயில்கள் இயக்கப்பட்டன. இதனால் மின்சார ரயில் இயக்குவதில் காலதாமதம் ஏற்பட்டதாக தெரிவித்தனர். இதையடுத்து பயணிகள் கலைந்து சென்றனர்.