Villupuram - Dinakaran

வாகனம் மோதி தொழிலாளி பலி

திண்டிவனம், மே 15: வேலூர் பழைய டவுன் விநாயகர் கோயில் தெருவை சேர்ந்த லட்சுமணன் மகன் செல்வம் (60). கூலி தொழிலாளி. இவர் வேலூரில் இருந்து திண்டிவனத்திற்கு ஓட்டலில் வேலை செய்வதற்காக வந்துள்ளார். இவர் நேற்று அதிகாலையில் திண்டிவனம்- சென்னை தேசிய நெடுஞ்சாலையில் காவேரிப்பாக்கம் ஏரிக்கரை அருகே சாலை ஓரம் நடந்து சென்று கொண்டிருந்தார். அப்போது அடையாளம் தெரியாத வாகனம் அவர் மீது மோதியது. இதில் செல்வம் பலத்த காயமடைந்து சம்பவ இடத்திலேயே உயிரிழந்தார். தகவலறிந்து வந்த திண்டிவனம் போலீசார் உடலை மீட்டு பிரேத பரிசோதனைக்காக  திண்டிவனம் அரசு பொது மருத்துவமனைக்கு அனுப்பி வைத்தனர். மேலும் வழக்கு பதிவு செய்து விபத்து ஏற்படுத்திய வாகனத்தை தேடி வருகின்றனர்.

வனத்துறையை கண்டித்து பொதுமக்கள் சாலை மறியல்

சின்னசேலம், மே 15:  சின்னசேலம் அருகே போர்வெல் போட அனுமதி மறுத்த வனத்துறையை கண்டித்து பொதுமக்கள் சாலை மறியல் போராட்டம் செய்தனர். சின்னசேலம் ஊராட்சி ஒன்றியத்திற்கு உட்பட்டது தகரை ஊராட்சி. இங்கு சுமார் 3000க்கும் மேற்பட்ட மக்கள் வசிக்கின்றனர். இந்த கிராமத்தில் கடந்த சில தினங்களாக குடிநீர் பிரச்சனை இருந்து வந்தது. இதையடுத்து ஊராட்சி நிர்வாகத்தின் மூலம் போர்வெல் போட நீர் ஆதாரம் இருக்கும் இடத்தை பார்த்தனர். அப்போது வனத்துறைக்கு சொந்தமான இடத்தில் நீர்மட்டம் இருப்பதாக தெரிந்தது. இதையடுத்து அந்த இடத்தில் ஊராட்சி நிர்வாகம் சார்பில் போர்வெல் போட சென்றனர். இதை அறிந்த வனத்துறையினர் மாவட்ட வன அலுவலரிடம் முறையான அனுமதி பெற்றுதான் போர்வெல் போட வேண்டும் என்றுகூறி தடுத்ததாக தெரிகிறது. இதனால் ஆத்திரம் பொதுமக்கள் போர்வெல் போட அனுமதி மறுத்த வனத்துறையை கண்டித்து சாலை மறியல் போராட்டம் நடத்தினர். இதை அறிந்த சின்னசேலம் போலீசார் மற்றும் வனவர் முருகானந்தம் உள்ளிட்டோர் சம்பவ இடத்திற்கு சென்று பொதுமக்களிடம் வனத்துறையின் சட்ட திட்டங்களை விளக்கி பேசினர். மேலும் முறையான அனுமதி பெற்று போர்வெல் போடலாம் என்று கூறி மக்களை சமாதானம் செய்தனர். இதையடுத்து மறியலை கைவிட்டு பொதுமக்கள் கலைந்து சென்றனர். இந்த சம்பவம் சின்னசேலம் பகுதியில் பரபரப்பை ஏற்படுத்தியது.

விழுப்புரம் மாவட்டத்தில் 5,241 வாக்குச்சாவடிகள் அமைப்பு

விழுப்புரம்,   மே 15:  உள்ளாட்சித்தேர்தலையொட்டி விழுப்புரம் மாவட்டத்தில் கடந்த மாதம் 23ம் தேதி வரைவு வாக்குச்சாவடி பட்டியல் வெளியிடப்பட்டது. இதன்   தொடர்ச்சியாக 29ம் தேதியன்று அனைத்துக்கட்சி பிரதிநிதிகளுக்கான கருத்து   கேட்பு கூட்டம் நடத்தப்பட்டது. அதுமட்டுமின்றி பொதுமக்களிடம் இருந்து 133   கோரிக்கை மனுக்கள் பெறப்பட்டன. இந்த மனுக்கள் அனைத்தும் பரிசீலனை   செய்யப்பட்டு வாக்குச்சாவடி இறுதி பட்டியல் ஆட்சியர் அலுவலகத்தில்   நேற்று வெளியிடப்பட்டது. இதனை மாவட்ட ஆட்சியர் சுப்ரமணியன் வெளியிட  ஊரக   வளர்ச்சி முகமை திட்ட இயக்குநர் மகேந்திரன் பெற்றுக்கொண்டார்.   இதனைத்தொடர்ந்து ஆட்சியர் சுப்ரமணியன் செய்தியாளர்களிடம் கூறியதாவது: நமது   மாவட்டத்தில் ஊரக பகுதிகளில் 4,690 வாக்குச்சாவடிகளும், நகர்ப்புற  பகுதிகளில்  215 வாக்குச்சாவடிகளும், பேரூராட்சி பகுதிகளில் 285  வாக்குச்சாவடிகளும் ஆக  மொத்தம் 5,190 வாக்குச்சாவடிகள் அடங்கிய வரைவு  வாக்குச்சாவடி பட்டியல்  கடந்த 23ம் தேதியன்று வெளியிடப்பட்டது.அதன்  பிறகு அனைத்துக்கட்சி  பிரதிநிதிகள் மற்றும் பொதுமக்கள் கொடுத்த கோரிக்கை  மனுக்களை அதிகாரிகள்  மூலம் ஆய்வு செய்து எந்தெந்த பகுதிகளில் கூடுதலாக  வாக்குச்சாவடி மையங்களை  அமைப்பது என்று முடிவு செய்யப்பட்டது. அதனடிப்படையில் ஊரக பகுதிகளில் 42  வாக்குச்சாவடி மையங்களை கூடுதலாக  சேர்த்து 4,732 வாக்குச்சாவடி மையங்களை  அமைக்கவும், நகராட்சி பகுதிகளில்  10 வாக்குச்சாவடிகளை கூடுதலாக சேர்த்து  225 வாக்குச்சாவடி மையங்களை  அமைக்கவும், பேரூராட்சி பகுதிகளில்  வாக்காளர்களின் எண்ணிக்கை  குறைந்ததன்பேரில் ஒரு வாக்குச்சாவடி மையத்தை  குறைத்து 284 வாக்குச்சாவடி  மையங்களை அமைக்கவும் பட்டியல் தயாராகி அதற்கு  ஒப்புதல் வழங்கப்பட்டுள்ளது. ஊரக, நகர்ப்புற, பேரூராட்சி பகுதிகளில் ஒட்டு மொத்தமாக 5,241 வாக்குச்சாவடி  மையங்களை அமைக்க முடிவு செய்யப்பட்டு வாக்குச்சாவடி  இறுதி பட்டியல்  தற்போது வெளியிடப்பட்டுள்ளது.கடந்த ஏப்ரல் 23ம்  தேதியன்று  வெளியிடப்பட்ட வரைவு வாக்குச்சாவடி பட்டியலில் இருந்து தற்போது  கூடுதலாக  51 வாக்குச்சாவடி மையங்களை அமைக்க நடவடிக்கை எடுக்கப்பட்டுள்ளது.  இவற்றில்  4,967 வாக்குச்சாவடி மையங்களில் அனைத்து வாக்காளர்களும்  வாக்களிக்கும்  வகையிலும், 137 வாக்குச்சாவடிகளில் ஆண்கள் மட்டும், 137   வாக்குச்சாவடிகளில் பெண்கள் மட்டும் வாக்குகளை செலுத்தும் மையங்களாக   அமைக்கப்பட உள்ளது. இந்த 5,241 வாக்குச்சாவடி மையங்களில் 4,773   வாக்குச்சாவடி மையங்கள் அரசு பள்ளிகளிலும், 465 வாக்குச்சாவடி மையங்கள்   தனியார் பள்ளிகளிலும், 3 வாக்குச்சாவடிகள் தற்காலிக கொட்டகையிலும் அமைக்க   நடவடிக்கை மேற்கொள்ளப்பட்டுள்ளது. இந்த வாக்குச்சாவடி இறுதி பட்டியல்   அனைத்து உள்ளாட்சி அமைப்புகளின் அலுவலகங்களிலும் பொதுமக்கள்,   அரசியல் கட்சியினரின் பார்வைக்காக வைக்கப்படும். இவ்வாறு அவர் கூறினார். பேட்டியின்போது மாவட்ட வருவாய் அலுவலர் பிரியா, நகராட்சி கமிஷனர் லட்சுமி, பிடிஓ ஜெகதீசன்   உள்ளிட்ட பலர் உடனிருந்தனர்.

இவ்வாறு அந்த மனுவில் கூறப்பட்டுள்ளது. முன்னாள் பிரதமர் ராஜிவ்காந்தி சிலையை திறக்க வேண்டும்

விழுப்புரம்,  மே 15:  வரும் 21ம் தேதி முன்னாள் பிரதமர் ராஜூவ்காந்தி  நினைவுதினத்தையொட்டி விழுப்புரத்தில் உள்ள அவரது சிலைகளை திறக்க வேண்டும் என ஆட்சியரிடம் வலியுறுத்தப்பட்டுள்ளது.இதுதொடர்பாக விழுப்புரம் மத்திய, மாவட்ட காங்கிரஸ் கமிட்டி  மாநில பொதுக்குழு உறுப்பினர் சிவா மற்றும் கட்சியினர் ஆட்சியர்  சுப்ரமணியனிடம் அளித்த மனுவில் கூறியிருப்பதாவது: முன்னாள் பாரத பிரதமர்  ராஜிவ்காந்தியின் நினைவு தினம் வரும் 21ம்தேதி அனுசரிக்கப்படுகிறது.  விழுப்புரத்தில் மாவட்ட காங்கிரஸ் கமிட்டி சார்பிலும், பொதுமக்கள்  சார்பிலும் அனுசரிக்கப்பட உள்ளது. இந்நிலையில் தேர்தல்  நடத்தை விதிகள் காரணமாக நகரில் சிக்னல் அருகே உள்ள ராஜூவ்காந்தி சிலையும், காந்திசிலை அருகே உள்ள ராஜிவ்காந்தி சிலையும் மாவட்ட நிர்வாகத்தால்  மூடப்பட்டுள்ளது. தமிழகத்தில் பாராளுமன்ற தேர்தல் முடிவடைந்த  நிலையில், ராஜிவ்காந்தி நினைவு நாளில் அஞ்சலி செலுத்துவதற்கு ஏதுவாக 2  சிலைகளையும் திறக்க ஆட்சியர் அனுமதிக்க வேண்டும். இவ்வாறு அதில்  கூறப்பட்டுள்ளது. அப்போது நிர்வாகிகள் ராம், ராஜ்குமார், பாலன், அருள்ராஜன்,  ரமணன், குப்பன் உள்ளிட்ட பலர் கலந்து கொண்டனர்.

கடையை சூறையாடியவர் மீது நடவடிக்கை

விழுப்புரம்,  மே 15:  விழுப்புரம் மாவட்டம், விக்கிரவாண்டி அருகே பெருங்கலாம்பூண்டி  கிராமத்தை சேர்ந்தவர் தட்சிணாமூர்த்தி. கூலி தொழிலாளி.  நேற்று மனைவி பிள்ளைகளுடன் வந்து எஸ்பியிடம் அளித்த மனுவில்  கூறியிருப்பதாவது:எனது உறவினருக்கு சொந்தமான நிலத்தில்  கடந்த 20 நாட்களுக்கு முன்பு ரூ.80 ஆயிரம் செலவில் கடை கட்டி பிரியாணி மற்றும் சூப் கடை நடத்தி வந்தேன். முன்விரோதம் காரணமாக சிலர்  ஜேசிபி மூலம் கடையை இடித்து தரைமட்டமாக்கி அங்கிருந்த பொருட்களை சூறையாடி  விட்டனர். இது குறித்து கஞ்சனூர் காவல் நிலையத்தில் புகார் அளித்தும்  இதுவரை நடவடிக்கை எடுக்காமல் எங்களையே போலீசார் மிரட்டி வருகின்றனர். எனவே  மாவட்ட காவல்துறை கண்காணிப்பாளர் உரிய நடவடிக்கை எடுக்க வேண்டும்.

₹33 லட்சம் மதிப்பில் அதிநவீன நுரையீரல், குடல் உள்நோக்கு கருவி

விக்கிரவாண்டி, மே 15:   விக்கிரவாண்டி அடுத்த முண்டியம்பாக்கத்தில் உள்ள விழுப்புரம் அரசு மருத்துவ கல்லூரி மருத்துவமனை கடந்த 2010ம் ஆண்டு தொடங்கப்பட்டு செயல்பட்டு வருகிறது. இங்கு தினந்தோறும் புறநோயாளியாக சுமார் 2 ஆயிரம் பேர் வந்து செல்கின்றனர். மேலும் உள்நோயாளியாக ஆயிரக்கணக்கானோர் சிகிச்சை பெற்று வருகின்றனர். பொதுமக்களின் தேவைக்கு ஏற்ப அனைத்து வகையான மருத்துவ பிரிவுகளும் திறக்கப்பட்டு சிகிச்சை அளிப்பதால் அதிகமான பொதுமக்கள் வந்து செல்கின்றனர்.  நுரையீரல் மற்றும் அறுவை சிகிச்சை பிரிவில் மாதத்திற்கு சுமார் 6 ஆயிரம் பேர் வந்து செல்கின்றனர். இவர்கள் பயன்பெறும் விதமாக நுரையீரல் புற்று நோய் மற்றும் காசநோய், இரப்பை, குடல் புற்றுநோய் உள்ளிட்டவற்றை ஆரம்ப நிலையிலேயே கண்டறியும் கருவி அமைக்கப்பட்டு நேற்று மருத்துவமனை பிரிவில் இதன் திறப்பு விழா நடந்தது. கல்லூரி டீன் சங்கரநாராயணன் தலைமை தாங்கி துவக்கி வைத்தார். துணை இயக்குநர்(காசநோய்) சுதாகர், மருத்துவ கண்காணிப்பாளர் அறிவழகன் ஆகியோர் முன்னிலை வகித்தனர். நிலைய மருத்துவ அலுவலர் கதிர் வரவேற்றார். இதுகுறித்து டீன் சங்கரநாராயணன் கூறுகையில், ரூ.33 லட்சத்தில் புதியதாக நுரையீரல் மற்றும் குடல் உள்நோக்கு கருவி அமைக்கப்பட்டு பொதுமக்களின் செயல்பாட்டிற்கு கொண்டுவரப்பட்டுள்ளது. 2 வாரங்களுக்கு மேல் இருமல், உடல் எடைகுறைதல், பசியின்மை, தீராத வயிற்றுவலி போன்ற அறிகுறிகள் தென்பட்டால் உடனடியாக மருத்துவமனைக்கு வந்து பரிசோதனை செய்து இக்கருவி மூலம் நோயை ஆரம்ப நிலையிலேயே கண்டறிந்து சிகிச்சை பெறலாம் என கூறினார். துணை நிலைய மருத்துவ அலுவலர் ராஜீவ்குமார், குடல் மற்றும் ஜீரண சிகிச்சை துணை பேராசிரியர் ராஜமகேந்திரன், நுரையீரல் பிரிவு டாக்டர்கள் ராம்குமார், இளையராஜா, கார்த்திகேயன் உட்பட பலர் கலந்து கொண்டனர்.

லைசென்ஸ் இல்லாமல் வாகனம் ஓட்டும் துப்புரவு பணியாளர்கள்

திண்டிவனம், மே 15:  திண்டிவனம் நகராட்சிக்கு தினந்தோறும் குப்பை சேகரிப்பதற்காக பேட்டரியால் ஆன 33 புதிய வாகனங்கள் வாங்கப்பட்டுள்ளது. இந்த 33 வாகனங்களிலும் திண்டிவனம் நகராட்சி என்று மட்டும் குறிப்பிடப்பட்டுள்ளது. வாகன  பதிவு எண்கள் குறிப்பிடப்படவில்லை. இந்த வாகனங்களை ஓட்டுனர் உரிமம்  இல்லாமல் துப்புரவு பணியாளர்களே ஓட்டுவதால் விபத்து ஏற்படும் அபாயம்  உள்ளது. மேலும் திண்டிவனத்தில் உள்ள 33 வார்டுகளுக்கும் ஒவ்வொரு வாகனம் என  வாங்கப்பட்டுள்ளது. ஆனால் துப்புரவு பணியாளர்கள் இந்த வாகனத்தை தாறுமாறாக ஓட்டுகின்றனர். சில துப்புரவு பணியாளர்கள் ஒருவருக்கு ஒருவர் வாகனம் ஓட்ட கற்றுக் கொடுப்பதும், செல்போன் பேசிக்கொண்டே  வாகனம் ஓட்டுவதும், பொது மக்களுக்கும், வாகன ஓட்டிகளுக்கும் இடையூறாக  நடுரோட்டில் நிறுத்தி பேசிக்கொண்டிருப்பதும், போக்குவரத்து விதிகளை  மீறுவதும் தொடர்ந்து நடைபெற்று வருகிறது. இதனால் திண்டிவனம் நகர்புற  பகுதிகளில் விபத்து ஏற்படும் அபாயம் உள்ளது. மேலும் இந்த வாகனங்களுக்கு பதிவு எண் இல்லாததால் விபத்து ஏற்படும் பட்சத்தில் எந்த வாகனம் விபத்தை ஏற்படுத்தியது என்பதை கண்டுபிடிக்க முடியாத சூழல் உள்ளது. எனவே வாகனங்களுக்கு பதிவு  எண், இன்சூரன்ஸ், ஓட்டுனர் உரிமம் ஆகியவை முறையாக இருக்க சம்பந்தப்பட்ட அதிகாரிகள் நடவடிக்கை எடுக்க வேண்டும் என சமூக ஆர்வலர்களும், பொதுமக்களும் கோரிக்கை  விடுத்துள்ளனர்.

பெண் குழந்தைகள் பாதுகாப்பு விழிப்புணர்வு கூட்டம்

திருக்கோவிலூர், மே 15: திருக்கோவிலூர் அடுத்த பூமாரி கிராமத்தில் பெண் குழந்தைகளை பாதுகாப்பது குறித்து விழிப்புணர்வு கூட்டம் நடந்தது. மாவட்ட எஸ்பி ஜெயக்குமார் உத்தரவின்பேரில் டிஎஸ்பி மகேஷ் மேற்பார்வையில் நடந்த கூட்டத்துக்கு திருக்கோவிலூர் அனைத்து மகளிர் காவல்நிலைய உதவி ஆய்வாளர் கலைச்செல்வி தலைமை தாங்கினார். முன்னாள் ஊராட்சி மன்ற தலைவர் கிருஷ்ணமூர்த்தி முன்னிலை வகித்தார். இதில் பெண்களுக்கு எதிரான வன்கொடுமை குற்றங்கள், குழந்தைகளுக்கு எதிரான பாலியல் குற்றங்கள் மற்றும் அதை எதிர்கொள்ளும் விதம் பற்றி விழிப்புணர்வு ஏற்படுத்தப்பட்டது. பின்னர் உதவி ஆய்வாளர் கலைச்செல்வி பேசுகையில், பெற்றோர்கள் பெண் பிள்ளைகளுக்கு திருமண வயது அடையும் முன்பே திருமணம் செய்து வைக்கக்கூடாது. பெண் பிள்ளைகள் மீது தனி கவனம் செலுத்த வேண்டும். அவர்களின் அன்றாட நடவடிக்கைகளை கவனிப்பது பெற்றோர்களின் கடமை. சந்தேகப்படும் படியான நபர்களிடம் குழந்தைகளை விளையாட அனுமதிக்க வேண்டாம். செல்போனில் சமூகவலைதளங்களில் தேவையற்ற விஷயங்களை பார்க்கின்றார்களா என்பதனையும் கண்காணித்து அதனை தடுக்க வேண்டும். பெண்பிள்ளைகள் தானே என்று அவர்களை உதாசீனப்படுத்தக்கூடாது. பெற்றோர்கள் பெண் பிள்ளைகளிடம் நண்பர்களாக பழகி அவர்களின் அச்சத்தை போக்க வேண்டும். என்று கூறினார். தொடர்ந்து அரகண்டநல்லூரிலும் ஆலோசனை கூட்டம் நடந்தது. இதில் தலைமை காவலர்கள் சித்ரா, கோகிலா, காவலர் ஆனந்தி ஆகியோர் கலந்துகொண்டனர்.

பழுதடைந்து கிடக்கும் மினி டேங்க்

கள்ளக்குறிச்சி, மே 15:     கள்ளக்குறிச்சி நகராட்சி 4வது வார்டு க.மாமனந்தல் ரோடு பகுதியில் சுமார் 25 ஆண்டுகளுக்கு முன்பு நகராட்சி நிர்வாகம் சார்பில் ஆழ்குழாய் கிணறு அமைக்கப்பட்டது. அந்த கிணற்றில் இருந்து கள்ளக்குறிச்சி நகர பகுதி மக்களுக்கு தேவையான குடிநீர் விநியோகம் செய்யப்பட்டது. இந்நிலையில் கள்ளக்குறிச்சி நகர மக்களின் குடிநீர் பஞ்சத்தை போக்கிய ஆழ்குழாய் கிணறு கடந்த ஒரு வருடமாக பழுதடைந்த நிலையில் மினி டேங்க் உடைந்து சேதமாகி உள்ளது. மேலும் மின்மோட்டார் பெட்டிகளும் சேதமடைந்து பராமரிப்பு இன்றி செடிகொடிகள் வளர்ந்து பாழடைந்த நிலையில் கிடக்கிறது. இதனால் பொதுமக்கள் குடிநீர் கிடைக்காமல் அவதிப்பட்டு வருகின்றனர். இந்த ஆழ்குழாய் கிணற்றில் நீர் ஊற்று அதிகப்படியாக உள்ளதாக அப்பகுதி மக்கள் தெரிவிக்கின்றனர். கள்ளக்குறிச்சி நகராட்சி பகுதியில் உள்ள பெரும்பாலான ஆழ்குழாய் கிணற்றில் போதுமான அளவில் நீர் ஊற்று இல்லாத நிலையில் உள்ளது.     ஆனால் நீர் ஊற்று அதிகப்படியாக உள்ள க.மாமனந்தல் ரோடு பகுதியில் உள்ள ஆழ்குழாய் கிணற்றை பராமரிப்பு செய்து மினிடேங்க் மற்றும் மின்மோட்டாரை சீரமைத்து கொடுக்க வேண்டும் என அப்பகுதி மக்கள் நகராட்சி நிர்வாகத்திடம் பலமுறை புகார் தெரிவித்தும் இதுவரை எந்த நடவடிக்கையும் எடுக்க அதிகாரிகள் முன்வரவில்லை என பொதுமக்கள் குற்றம் சாட்டுகின்றனர். எனவே பழுதடைந்த நிலையில் உள்ள மினி டேங்க் மற்றும் மின்மோட்டாரை இனியாவது பராமரிப்பு செய்து குடிநீர் தட்டுப்பாட்டை போக்கிட மாவட்ட நிர்வாகம் மற்றும் கள்ளக்குறிச்சி நகராட்சி நிர்வாகம் விரைந்து நடவடிக்கை எடுக்க வேண்டும் என பொதுமக்கள் எதிர்பார்க்கின்றனர்.

குடிநீர் வழங்காததை கண்டித்து பெண்கள் திடீர் சாலை மறியல்

கள்ளக்குறிச்சி, மே 15:    கள்ளக்குறிச்சி நகராட்சி 6வது வார்டு பகுதியில் குடிநீர் வழங்காததை கண்டித்து பெண்கள் சாலை மறியலில் ஈடுபட்டனர். அப்போது போலீசாரிடம் வாக்குவாதம் செய்ததால் பரபரப்பு ஏற்பட்டது. கள்ளக்குறிச்சி நகராட்சி 6வது வார்டு சக்தி விநாயகர் கோயில் தெரு, வாய்க்கால் மேட்டு தெரு ஆகிய பகுதியில் சுமார் 1000க்கும் மேற்பட்ட மக்கள் வசித்து வருகின்றனர். அப்பகுதி மக்களுக்கு கள்ளக்குறிச்சி நகராட்சி மூலம் குடிநீர் தெரு பைப்லைன் மூலம் விநியோகம் செய்யப்படுகிறது. இந்நிலையில் கடந்த சில மாதங்களாக கூட்டு குடிநீர் சரிவர விநியோகம் செய்வது இல்லை. இதனால் அப்பகுதி மக்கள் குடிநீர் கிடைக்காமல் அவதிப்பட்டு வருகின்றனர். இந்நிலையில் கடந்த 18 நாட்களுக்கு முன் அப்பகுதியில் குடிநீர் தட்டுப்பாடு அதிகரித்துள்ளது, எனவே 6வது வார்டு பகுதிக்கு குடிநீர் சப்ளை செய்து கொடுக்க வேண்டும் என புகார் தெரிவித்தனர். ஆனால் இதுநாள் வரை குடிநீர் வழங்க எந்த நடவடிக்கையும் நகராட்சி நிர்வாகம் எடுக்க முன்வரவில்லை. இதனால் ஆத்திரமடைந்த அப்பகுதி மக்கள், பெண்கள் நேற்று சுமார் 11 மணியளவில் காலி குடங்களுடன் கச்சிராயபாளையம் செல்லும் சாலை காந்திரோடு பகுதி சக்திவிநாயகர் கோயில் அருகில் திடீர் சாலை மறியல் போராட்டத்தில் ஈடுபட்டனர்.இதுபற்றி தகவல் அறிந்ததும் கள்ளக்குறிச்சி சப்-இன்ஸ்பெக்டர் பாலமுரளி மற்றும் போலீசார் சம்பவ இடத்திற்கு சென்று பொதுமக்களிடம் பேச்சுவார்த்தையில் ஈடுபட்டனர். அப்போது சப்-இன்ஸ்பெக்டர் பாலமுரளி குடிநீர் பிரச்னை என்றால் நகராட்சி அதிகாரிகளிடம் போய் கேளுங்கள், ஏன் சாலை மறியல் செய்கிறீர்கள் என கூறி பொதுமக்களை மிரட்டினார். அதனையடுத்து சாலை மறியலில் ஈடுபட்ட அனைவரையும் கைது செய்யுங்கள் என மற்ற போலீசார்களிடம் எஸ்ஐ கூறினார். இதனால் ஆத்திரமடைந்த பெண்கள் போலீசாரிடம் கடும் வாக்கு வாதத்தில் ஈடுபட்டனர். நகராட்சி அதிகாரிகளிடம் பலமுறை புகார் தெரிவித்தும் குடிநீர் பிரச்னைக்கு எந்த நடவடிக்கையும் எடுக்காதபட்சத்தில் தான் நாங்கள் சாலை மறியல் போராட்டம் செய்கிறோம், கைது செய்வதாக இருந்தால் எங்கள் அனைவரையும் கைது செய்யுங்கள் என கூறி போலீசாரிடம் வாக்குவாதம் செய்ததால் பரபரப்பு ஏற்பட்டது. பின்னர் ஒரு வழியாக பொதுமக்களிடம் சமாதானம் செய்து குடிநீர் கிடைக்க நடவடிக்கை எடுப்பதாக போலீசார் உத்தரவாதம் அளித்தனர். அதனையடுத்து பொதுமக்கள் சாலை மறியலை கைவிட்டு அங்கிருந்து கலைந்து சென்றனர். இந்த சாலை மறியல் போராட்டத்தால் கச்சிராயபாளையம் செல்லும் சாலை காந்திரோடு பகுதியில் சுமார் அரை மணி நேரம் கடுமையான போக்குவரத்து பாதிப்பு ஏற்பட்டது.

குடிநீர் தட்டுப்பாட்டை போக்க ₹69.91 கோடியில் 2911 பணிகள்

விழுப்புரம்,  மே 15: விழுப்புரம் மாவட்டத்தில் குடிநீர் தட்டுப்பாட்டை போக்க ரூ.69.91  கோடியில் 2911 பணிகள் மேற்கொள்ளப்பட்டு வருகின்றன. குடிநீர் பிரச்னைகள்  இருந்தால் மாவட்ட நிர்வாகம் அறிவித்துள்ள இலவச தொலைபேசி எண்ணை தொடர்பு  கொண்டு புகார் அளிக்கலாம் என ஆட்சியர் சுப்ரமணியன் தெரிவித்துள்ளார். இதுகுறித்து அவர் வெளியிட்டுள்ள செய்திக்குறிப்பு:விழுப்புரம்  மாவட்டத்தில் தற்போது நிலவும் வறட்சியின் காரணமாக ஊரக மற்றும்  நகர்புறப்பகுதியில் உள்ள பொதுமக்களுக்கு தினசரி தடையின்றி குடிநீர்  வழங்கும் வகையில் ரூ.69.91 கோடி செலவில் 2911 பணிகள் மேற்கொள்ளப்பட்டு வருகின்றன. இருப்பினும் வறட்சி காரணமாக பல  இடங்களில் நிலத்தடி நீர்மட்டம் குறைந்து வருவதாலும், பொதுமக்கள் முறையற்ற  குடிநீர் இணைப்புகள் மூலமாகவும் மற்றும் சட்டவிரோதமாக மின்மோட்டார் மூலம்  தண்ணீர் உறிஞ்சி எடுக்கும் நிலையும் பல இடங்களில் காணப்படுகிறது. இதனால் சீரான  குடிநீர் விநியோகம் செய்ய முடியாத நிலை ஒரு சில இடங்களில் ஏற்பட்டுள்ளது.  இந்நிலையை போக்கி அனைத்து மக்களுக்கும் சீரான குடிநீர் விநியோகம்  செய்யும் வகையில் முறையற்ற குடிநீர் இணைப்புகளை துண்டித்திடவும் மற்றும்  சட்டவிரோதமாக குடிநீரை உறிஞ்சும் மின்மோட்டார்களை பறிமுதல் செய்யவும்  சம்பந்தப்பட்ட நகராட்சி, பேரூராட்சி மற்றும் ஊரக வளர்ச்சி மற்றும்  ஊராட்சித்துறை அலுவலர்களுக்கு உத்தரவிடப்பட்டுள்ளது. எனவே பொதுமக்கள்  சட்டவிரோதமாக எடுத்துள்ள குடிநீர் இணைப்புகள் மற்றும் மின்மோட்டார்களை  தாங்களே முன்வந்து அகற்றிக்கொள்ள வேண்டும். அவ்வாறு இல்லையென்றால் குடிநீர்  இணைப்புகளை சம்பந்தப்பட்ட துறை அலுவலர்கள் மூலமாக துண்டிப்பு செய்வதுடன்  மின்மோட்டார்களும் பறிமுதல் செய்யப்பட்டு அபராதம் விதிக்கப்படும். பொதுமக்கள் குடிநீர் பிரச்னைகள் குறித்து மாவட்ட நிர்வாகத்திற்கு தகவல்  தெரிவிக்க ஏதுவாக விழுப்புரம் ஆட்சியர் அலுவலகத்தில் இலவச தொலைபேசியுடன்  கூடிய கட்டுப்பாட்டு அறைகள் செயல்பட்டு வருகின்றன. இதற்கான இலவச தொலைபேசி  எண்கள் 1800 425 3566 மற்றும் 1077 என்ற எண்களை தொடர்பு கொண்டு குடிநீர்  பிரச்னைகளை தெரிவிக்கலாம். இவ்வாறு அதில் கூறப்பட்டுள்ளது.

எலவனாசூர்கோட்டை பகுதியில் அடிக்கடி மின்வெட்டு

உளுந்தூர்பேட்டை,  மே 14: உளுந்தூர்பேட்டை அருகேயுள்ள எலவனாசூர்கோட்டை, வீரமங்கலம்,  கீழப்பாளையம், மேலப்பாளையம், எ.புதூர், செம்பியன்மாதேவி, பரமேஸ்வரிமங்கலம் உள்ளிட்ட கிராமங்களில் கடந்த இரண்டு நாட்களாக  அடிக்கடி மின்வெட்டு ஏற்படுவதாக பொதுமக்கள், விவசாயிகள் புகார் தெரிவித்துள்ளனர். தொடர்ந்து பல மணி நேரம் மின்சாரம் துண்டிக்கப்பட்டு  வருவதால் பொதுமக்களின் இயல்பு வாழ்க்கை பாதிக்கப்படுவதுடன்,  வியாபாரிகள், வர்த்த நிறுவனங்களை வைத்து உள்ளவர்கள், விவசாயிகள் கடுமையாக  பாதிப்பு அடைந்துள்ளனர். இது குறித்து இந்த கிராமங்களை சேர்ந்த பொதுமக்கள்,  சமூக ஆர்வலர்கள் மின்வாரிய அதிகாரிகளிடம் புகார் தெரிவித்தும் உரிய  நடவடிக்கை எடுக்கப்படவில்லை என குற்றம்சாட்டியுள்ளனர். பல கிராமங்களில் கடந்த இரண்டு நாட்களாக தொடர்ந்து 8 மணி நேரம் முதல் 10 மணி நேரம் வரையிலும் மின்சாரம் விநியோகிக்கப்படவில்லை என புகார் எழுந்துள்ளது.  தற்போது கோடை  காலம் என்பதால் மின்சாரம் இல்லாமல் வயதானவர்கள், குழந்தைகள் தூங்க  முடியாமல் கொசுக்கடியில் அவதி அடைந்து வருவதாக கூறுகின்றனர். இதுகுறித்து  மாவட்ட மின்வாரிய அதிகாரிகள் உரிய நடவடிக்கை எடுத்து எலவனாசூர்கோட்டை  மற்றும் சுற்றியுள்ள கிராமங்களில் தடையின்றி மின்சாரம் வழங்க நடவடிக்கை எடுக்க வேண்டும் என  கோரிக்கை வைத்துள்ளனர்.

மழை வேண்டி 108 சங்கு அபிஷேகம்

திண்டிவனம், மே 14: திண்டிவனம்  அடுத்த கர்ணாவூர் கிராமத்தில் உள்ள இளங்காளியம்மன் கோயிலில் 108 சங்கு அபிஷேக விழா நடைபெற்றது. கிராம மக்கள்  ஒன்றிணைந்து 4 வருடத்திற்கு ஒரு முறை இக்கோயிலில் இவ்விழாவை நடத்தி  வருகின்றனர். இக்கிராமத்தில் வாழ்ந்து வரும் பொதுமக்கள் நலமுடன் வாழ  வேண்டியும், மழை வேண்டியும் இவ்விழா நடத்தப்படுகிறது.கடந்த 8ம் தேதி காப்பு  கட்டும்  நிகழ்ச்சியுடன் தொடங்கிய விழாவின் நேற்று  5வது  நாளில் 108  சங்கு அபிஷேகம் நடந்தது. இதனை தொடர்ந்து காளியம்மன் விநாயகர் வடிவில்  அம்மன் வீதி உலா நடைபெற்றது.  இதில் ஏராளமான  பொதுமக்கள் கலந்து கொண்டு தரிசனம் செய்தனர்.

நீர்நிலைகளை பாதுகாக்க விவசாயிகள் வலியுறுத்தல்

திருக்கோவிலூர், மே 14:  திருக்கோவிலூர் மற்றும் சுற்றுவட்டார பகுதிகளில் ஏரி, குளம், குட்டை,  கசிவுநீர் குட்டைகள், பாசன வாய்க்கால்கள் ஆகியவை பொதுப்பணித்துறை மற்றும்  ஊரக வளர்ச்சித்துறையின் கட்டுப்பாட்டில் உள்ளது. இந்த நீர்நிலைகள்  அனைத்தும் ஆக்கிரமிப்பின் பிடியில் சிக்கி தவிப்பதுடன், பல ஆண்டுகளாக  தூர்வாரப்படாமலும், புதர்மண்டியும் கிடப்பதால் நீர்பிடிப்பு இல்லாமல்  போனது. மேலும், தண்ணீர் செல்வதற்கு போதிய வழியில்லாமல் குடியிருப்பு  பகுதிகளுக்குள் சென்று விடுகிறது.இதனால் நீர்பிடிப்பு பகுதிகளில்  மழை காலங்களிலும், தென்பெண்ணை ஆற்றில் நீர் பெருக்கெடுத்து ஓடும்  சமயங்களிலும் அந்த தண்ணீரை சேமிக்க முடியாமல் அவை வீணாக கடலில் கலப்பதுடன்  வயல்வெளி அல்லாத பகுதிகளுக்கு சென்று விடுகிறது. இதனால் விவசாயிகளுக்கு எவ்வித பயனும் இல்லாமல் போகிறது. அதோடு நீர்நிலைகளில் தண்ணீரை சேமித்து  அதன்மூலம் நிலத்தடி நீர்மட்டத்தை பாதுகாக்க முடியாத நிலை உள்ளது. இதனால் இப்பகுதியில்  நிலத்தடி நீரை நம்பி இருக்கும் பாசன பகுதிகள் அனைத்தும் வறண்டு போனதுடன்,  குடிநீருக்கும் பஞ்சம் ஏற்பட்டு வருகிறது.  வரலாறு காணாத அளவிற்கு இரண்டு  ஆண்டுகளாக நீர்நிலைகள் நிரம்பாததால் நிலத்தடி நீர்மட்டம் அதள பாதாளத்திற்கு  சென்று விட்டது. இதனால் ஒருபக்கம் விவசாயம் பொய்த்து விட்டது. மற்றொரு பக்கம்  குடிநீர் பஞ்சம் ஏற்பட்டுள்ளது. மேலும் கால்நடைகள் மேய்வதற்கு புல்கூட  முளைக்காத அளவிற்கு விளைநிலங்களும், நீர்பிடிப்பு பகுதிகளும் வறண்டு  விட்டது. இதனால் கால்நடைகளை வளர்க்கும் விவசாயிகள் அதிக விலைக்கு மாட்டுத்தீவனங்கள், வைக்கோல்  ஆகியவற்றை வாங்கி கொடுக்க வேண்டிய நிலைக்கு தள்ளப்பட்டுள்ளனர். எனவே திருக்கோவிலூர் மற்றும்  சுற்றுவட்டார பகுதிகளில் உள்ள நீர்நிலைகளை பாதுகாக்கும் வகையில் பருவமழை  தொடங்குவதற்கு முன் ஆக்கிரமிப்பின் பிடியில் இருந்து மீட்டு  தூர்வாரி செப்பனிட சம்பந்தப்பட்ட பொதுப்பணி மற்றும் ஊரக வளர்ச்சித்துறை  அதிகாரிகளுக்கு மாவட்ட நிர்வாகம் உத்தரவிட வேண்டும் என்று சமூக ஆர்வலர்கள் கோரிக்கை  விடுத்துள்ளனர்.

விவசாயிகள் கோடை உழவு செய்ய அறிவுறுத்தல்

திண்டிவனம், மே 14:  ஒலக்கூர் பகுதி விவசாயிகள் கோடைஉழவு செய்து அதிக மகசூல் பெற வேண்டுமென ஒலக்கூர் வேலாண்மை உதவிஇயக்குனர் சுமதி வேண்டுகோள் விடுத்துள்ளார்.  இதுபற்றி வேளாண்மை உதவி இயக்குனர் சுமதி கூறுகையில், விவசாயிகள் ஏப்ரல், மே மாத கால  இடைவெளியில் சாகுபடி நிலத்தை தரிசாக போடாமல் சட்டிக்கலப்பை கொண்டு உழவு செய்ய வேண்டும். இந்த கோடை உழவில் ஆழமாக உழுது மேல்மண்ணை கீழாகவும் கீழ்மண்ணை மேலாகவும் புரட்டிப்போடுவதால் மண்ணில் நாள்பட இறுக்கமாக உள்ள இடம் தளர்த்தப்பட்டு இலகுவாகிறது.  இதனால் மண்ணில் காற்றோட்டம் அதிகரிக்கிறது.  மழைநீர் சேமிக்கப்படுவதால் மண்ணின் ஈரப்பதம் தக்க வைப்பதோடு மண் அரிமானம் தடுக்கப்படுகிறது.      மேலும் புற்கள் அழிக்கப்பட்டு அவையே மக்கி நிலத்திற்கு உரமாகிறது. இதனால் அதிக அளவு விளைச்சல் கிடைக்கும்.  கோடை உழவினால் மண்ணில் வாழும் பல்வேறு நோய்களை உருவாக்கும் நோய்க்காரணிகள் பயிர்களை தாக்கும் பூச்சிகள் கூட்டுப்புழுக்கள் உள்ளிட்டவை அழிக்கப்படுகிறது.  ஆகையால் ஒலக்கூர் பகுதியில் உள்ள அனைத்து விவசாயிகளும் கோடைஉழவு செய்து பயன்பெறுமாறு வேளாண்துறை துணை இயக்குனர் தெரிவித்துள்ளார்.

திடக்கழிவு மேலாண்மை கிடங்கில் குப்பைகளை கொட்ட கோரிக்கை

சின்னசேலம், மே 14: வடக்கநந்தல்  பேரூராட்சி பகுதியில் குப்பைகளை  திடக்கழிவு மேலாண்மை கிடங்கிலேயே கொட்ட வேண்டும் என்று சமுதாய சீர்திருத்த  இளைஞர் சங்கத்தினர் கோரிக்கை விடுத்துள்ளனர். விழுப்புரம் மாவட்டம்  வடக்கநந்தல் பேரூராட்சியில் அக்கராயபாளையம், கச்சிராயபாளையம்,  மேட்டுப்பாளையம், அம்மாபேட்டை, வெங்கட்டம்மாபேட்டை ஆகிய கிராமங்கள் அடங்கி  உள்ளது. இதில் கச்சிராயபாளையம், வடக்கநந்தல், அக்கராயபாளையம் பகுதியை  சேர்ந்த தெருக்களில் சேரும் குப்பைகளை சேமித்து தரம் பிரிக்கும் வகையில் அக்கராயபாளையம் பெரிய குன்றுக்கு அருகில் வடக்கநந்தல் பேரூராட்சிக்கு  சொந்தமான திடக்கழிவு மேலாண்மை கிடங்கு உள்ளது. குப்பைகளை தரம்பிரிக்க பெண்  தொழிலாளர்களும் உள்ளனர்.  ஆனால் அங்கு குறைந்த அளவிலான குப்பைகளை மட்டுமே  கொட்டி தரம் பிரிப்பதாக கூறப்படுகிறது. இன்னும் மீதி உள்ள குப்பைகளை  அக்கராயபாளையம் புதுகாலனி அருகில் உள்ள குன்றுமேட்டின் அடிவாரத்தில் உள்ள  பள்ளத்தில் கொட்டி வருகின்றனர்.  இதில் பிளாஸ்டிக் கழிவுகளும், குப்பைகளும்  அடங்கும். குப்பைகள் சேர்ந்த பின்பு அதை தீ வைத்து எரிக்கின்றனர். இதனால்  அப்பகுதியில் சுற்று சூழல் மாசுபடுகிறது. அந்த வழியே செல்லும் மக்களுக்கு  மூச்சு திணறல் ஏற்படுகிறது. இதனால் நுரையீரல் சம்பந்தமான நோய் ஏற்படும் அபாயம் உள்ளது. இதனால் அந்த இடத்தில் குப்பைகளை கொட்ட வேண்டாம் என்று  அக்கராயபாளையம் இளைஞர் சங்த்தினர் பேரூராட்சி வண்டியை மறித்து வாக்குவாதம்  செய்தனர். ேமலும், குப்பையை வேறு இடத்தில் கொட்ட வேண்டும் என பேரூராட்சியிடம்  மனு  கொடுத்தும் எந்த நடவடிக்கையும் இல்லை. இந்த இடத்தில் குப்பைகளை கொட்டுவதால்  சுற்றுச்சூழல் மாசுபடுவதுடன் நோய் பரவும் அபாயமும் உள்ளது. ஆகையால்  சுற்றுச்சூழல் மாசுபடுவதை தடுக்கும் பொருட்டு பேரூராட்சி குப்பைகளை திடக்கழிவு மேலாண்மை கிடங்கிலேயே கொட்ட நடவடிக்கை எடுக்க வேண்டும் என்று கலெக்டருக்கு பொதுமக்கள் கோரிக்கை விடுத்துள்ளனர்.

கிராம மக்கள் சாலை மறியல்

செஞ்சி, மே 14: செஞ்சி அருகே குடிநீர் பிரச்னையை கண்டித்து சாலை மறியலில் ஈடுபட்ட கிராம மக்களிடம் போலீசார் பேச்சுவார்த்தை நடத்தி உரிய நடவடிக்கை எடுப்பதாக உறுதி அளித்தனர். இதனால் போராட்டம் கைவிடப்பட்டது.விழுப்புரம் மாவட்டம் செஞ்சி அருகே வடவானூர் கிராமத்தில் 500க்கும் மேற்பட்ட குடும்பத்தினர் வசித்து வருகின்றனர். இங்கு கடந்த சில மாதங்களாக குடிநீர் பிரச்னை இருந்து வருகிறது. இதுகுறித்து ஊராட்சி நிர்வாகம் மற்றும் ஊராட்சி ஒன்றிய அலுவலகத்தில் முறையிட்டும் இதுவரை எந்த நடவடிக்கையும் எடுக்கப்படவில்லை. இதனால் ஆத்திரமடைந்த பொதுமக்கள் செஞ்சி-திண்டிவனம் தேசிய நெடுஞ்சாலை வடவானூரில் திடீர் சாலை மறியல் போராட்டத்தில் ஈடுபட்டனர். இதுகுறித்து தகவலறிந்து சம்பவ இடத்துக்கு விரைந்து வந்த செஞ்சி இன்ஸ்பெக்டர் உலகநாதன் மற்றும் போலீசார் மறியலில் ஈடுபட்டவர்களிடம் பேச்சுவார்த்தை நடத்தினர். அப்போது இதுதொடர்பாக உரிய நடவடிக்கை எடுத்து குடிநீர் பிரச்னை தீர்க்கப்படும் என அவர்கள் உறுதியளித்ததன் பேரில் சாலை மறியல் போராட்டம் கைவிடப்பட்டது. இந்த மறியல் போராட்டத்தால் அப்பகுதியில் சுமார் அரை மணி நேரம் போக்குவரத்து பாதிக்கப்பட்டு செஞ்சி, திண்டிவனம், சென்னை, புதுச்சேரி செல்லும் வாகனங்கள் மற்றும் பயணிகள் அவதியடைந்தனர்.

கள்ளச்சாராயம் விற்ற 4பேர் கைது

திருக்கோவிலூர், மே 14: திருக்கோவிலூர் பகுதியில் கள்ளச்சாராயம் விற்பனை செய்யப்படுவதாக மதுவிலக்கு அமல்பிரிவு போலீசாருக்கு தகவல் வந்தது. இதையடுத்து இன்ஸ்பெக்டர் கவிதா மற்றும் போலீசார் அப்பகுதியில் அதிரடி சோதனை நடத்தினர்.  அப்போது ரிஷிவந்தியத்தை சேர்ந்த கலியபெருமாள்(49), திம்மச்சூர் கிராமத்தை சேர்ந்த வேலு(42), பாலு(40), நெடுமுடையான் கிராமத்தை சேர்ந்த சவுந்தர்ராஜன்(52) ஆகிய 4பேரையும் போலீசார் கையும் களவுமாக பிடித்து அவர்களிடம் இருந்து தலா 10லிட்டர் சாராயத்தை பறிமுதல் செய்தனர். மேலும் 4 பேர் மீதும் வழக்கு பதிந்து கைது செய்தனர்.

போக்குவரத்து விதி மீறிய 49 பேர் மீது வழக்கு

உளுந்தூர்பேட்டை,  மே 14: உளுந்தூர்பேட்டை டிஎஸ்பி பாலசந்தர் உத்தரவின் பேரில் திருநாவலூர்,  எலவனாசூர்கோட்டை, எடைக்கல், உளுந்தூர்பேட்டை காவல்நிலையத்திற்கு உட்பட்ட  பகுதியில் போலீசார் தீவிர வாகன தணிக்கையில் ஈடுபட்டனர். அப்போது தேசிய  நெடுஞ்சாலைகள் மற்றும் டோல்கேட் அருகில், பேருந்து நிலையம் பகுதியில்  குடிபோதையிலும், லைசென்சு இல்லாமலும், உரிய ஆவணங்கள் இன்றியும், அதிக  வேகத்துடனும் இருசக்கர மற்றும் கனரக வாகனங்களை ஓட்டிச் சென்ற 49 வாகன  ஓட்டுனர்கள் மீது போலீசார் வழக்கு பதிவு செய்தனர். தொடர்ந்து  போக்குவரத்து விதிமுறைகளை மீறி வாகனங்களை ஓட்டிச் செல்லும் வாகன  ஓட்டுனர்கள் மீது கடும் நடவடிக்கைகள் எடுக்கப்படும் என போலீசார் எச்சரிக்கை  செய்துள்ளனர்.

அடுத்தடுத்து 5 பைக் திருட்டு வாகன ஓட்டிகள் அச்சம்

உளுந்தூர்பேட்டை,  மே 14: உளுந்தூர்பேட்டை மற்றும் திருநாவலூர் காவல்நிலையத்திற்கு உட்பட்ட  பகுதியில் நிறுத்தி வைக்கப்பட்டு இருந்த 5 இருசக்கர வாகனங்கள் அடுத்தடுத்து  திருடு போனதால் வாகன ஓட்டுனர்கள் அச்சம் அடைந்துள்ளனர். உளுந்தூர்பேட்டை  அருகே கெடிலம் கிராமத்தை சேர்ந்தவர் மணிகண்டன் (29). இவர் சம்பவத்தன்று தனது  இருசக்கர வாகனத்தை அப்பகுதியில் உள்ள ஒரு காம்ப்ளக்ஸ் முன்பு நிறுத்தி  வைத்திருந்தார். சிறிது நேரம் கழித்து மீண்டும் வந்து பார்த்த போது  காணவில்லை. இதே போல் களத்தூர்  கிராமத்தை சேர்ந்தவர் வெங்கடேசன்(43) பஞ்சாயத்து கிளார்க்கான இவர்  சம்பவத்தன்று உளுந்தூர்பேட்டை உழவர் சந்தை அருகில் தனது பைக்கை நிறுத்தி  வைத்து இருந்தார். கடைக்கு சென்று விட்டு மீண்டும் வந்து பார்த்த போது  பைக்கை மர்ம நபர்கள் திருடி சென்றது தெரியவந்தது. இதேபோல் உளுந்தூர்பேட்டை அருகே எடைக்கல் கிராமத்தை சேர்ந்தவர்  அருண்குமார்(21), மாரனோடை கிராமத்தை சேர்ந்த சின்னராஜ்(37), திருக்கோவிலூர்  அருகே மேலதாழனூர் கிராமத்தை சேர்ந்த ஜெயசங்கர்(36) ஆகிய 3 பேரும்  சம்பவத்தன்று கூவாகம் கூத்தாண்டவர் கோயிலுக்கு சென்று இருந்தனர். கோயில்  அருகில் உள்ள குளக்கரையில் தனது பைக்குகளை நிறுத்தி வைத்து இருந்தனர்.  கோயிலுக்கு சென்றுவிட்டு மீண்டும் வந்து பார்த்த போது பைக்குகளை காணவில்லை.  ரூ.2 லட்சம் மதிப்பிலான 5 பைக்குகள் அடுத்தடுத்து திருடு போன சம்பவம்  குறித்து உளுந்தூர்பேட்டை மற்றும் திருநாவலூர் காவல்நிலையத்தில் 5 பேரும்  தனித்தனியாக புகார் அளித்தனர். புகாரின் பேரில் சப்-இன்ஸ்பெக்டர்கள் நந்தகோபால்  மற்றும் சவுகத்அலி ஆகியோர் வழக்கு பதிந்து பைக்குகளை திருடிய  காட்டுப்பையூர் கிராமத்தை சேர்ந்த கலியமூர்த்தி மகன் விஜயகுமார்(22),  புதுநன்னாவரம் கிராமத்தை சேர்ந்த சுப்ரமணி மகன் பரமசிவம்(27) ஆகியோரை தேடிவருகின்றனர். உளுந்தூர்பேட்டை மற்றும் திருநாவலூர் காவல்நிலையத்திற்கு  உட்பட்ட பகுதியில் 5 இருசக்கர வாகனங்கள் திருடு போன சம்பவம் வாகன  ஓட்டுனர்கள் இடையே அச்சத்தை ஏற்படுத்தி உள்ளது.