Villupuram - Dinakaran

பாதுகாப்பு விழிப்புணர்வு பிரசாரம்

சங்கராபுரம், பிப். 15: சங்கராபுரத்தில் நெடுஞ்சாலைத்துறை சார்பில், சாலை பாதுகாப்பு வாரவிழா நடைபெற்றது. சங்கராபுரம் வட்டாட்சியர் பாண்டியன் தலைமை தாங்கினார். நெடுஞ்சாலைத்துறை உதவி பொறியாளர் சர்மா வரவேற்றார். உதவி கோட்ட பொறியாளர் பிரபாகரன், உதவி பொறியாளர் சர்மா ஆகியோர் முன்னிலை வகித்தனர். சங்கராபுரம் சப்-இன்ஸ்பெக்டர் சிவச்சந்திரன், சாலை விழிப்புணர்வு துண்டு பிரசுரங்களை வழங்கினார். இதில் நெடுஞ்சாலைத்துறை பணியாளர்கள் மற்றும் சாலை பணியாளர்கள் உட்பட பலர் கலந்து கொண்டனர்.மரக்காணம்:  மரக்காணம் காவல் நிலையம் சார்பில் மரக்காணத்தில் சாலை பாதுகாப்பு விழிப்புணர்வு பிரசாரம் நடந்தது. இன்ஸ்பெக்டர் மைக்கேல் இருதயராஜ் தலைமை தாங்கினார். சப்-இன்ஸ்பெக்டர் கதிரவன் மற்றும் போலீசார் கலந்துகொண்டு. சாலை விதிகளை கடைபிடித்தல், ஹெல்மெட் அணிந்து வாகனம் ஓட்டுதல், ஹெல்மெட் அணிவதால் ஏற்படும் நன்மைகள், அணியாமல் ஓட்டும் போது சாலை விபத்து ஏற்பட்டால் உண்டாகும் பாதிப்புகள், இது போல் செல்போன் பேசிக் கொண்டு வாகனம் ஓட்டினால் ஏற்படும் பாதிப்புகள் குறித்து துண்டு பிரசுரங்களை வழங்கினர்.

குடிநீர் கட்டணம் செலுத்தாத வீடுகளில் குடிநீர் இணைப்பு துண்டிப்பு

கள்ளக்குறிச்சி, பிப். 15: கள்ளக்குறிச்சி நகராட்சி பகுதியில் கடந்த 5 ஆண்டுகளுக்கும் மேலாக நகராட்சிக்கு செலுத்த வேண்டிய குடிநீர் கட்டணம் முறையாக செலுத்தாமல் காலம் தாழ்த்தி வரும் குடியிருப்புகளுக்கு நேரடியாக சென்று ஆய்வு செய்து கட்டணம் செலுத்த நடவடிக்கை எடுக்க வலியுறுத்தியும், குடிநீர் கட்டணம் செலுத்தப்படாத வீடுகளுக்கு குடிநீர் இணைப்பு துண்டிப்பு நடவடிக்கை மேற்கொள்ள கள்ளக்குறிச்சி நகராட்சி ஆணையர் (பொறுப்பு) அருண் நேற்று முன்தினம் உத்தரவிட்டார். இதையடுத்து அதிகாரிகள் குழு ஆய்வு செய்ததில், கட்டணம் செலுத்தாத 10 வீடுகளுக்கு குடிநீர் இணைப்பு துண்டிக்கப்பட்டது. நேற்றுமுன்தினம் இரண்டாவது நாளாக நகராட்சி வருவாய் ஆய்வாளர் (பொறுப்பு) செந்தில் தலைமையில் வருவாய் உதவியாளர்கள் சரண்யா, ராஜூ மற்றும் குடிநீர் பிரிவு பணியாளர்களுடன் 11வது வார்டு பகுதியில் ஆய்வு மேற்கொண்டு, நீண்ட நாட்களாக குடிநீர் கட்டணம் செலுத்தாத நபர்களிடம் உரிய தொகை கட்ட வலியுறுத்தினர். அப்போது சிலர் குடிநீர் பாக்கி தொகையை உடனே செலுத்தினர். கட்டணம் செலுத்தாத 5 வீடுகளுக்கு குடிநீர் இணைப்பு துண்டிக்கப்பட்டது.  மற்றொரு குழு நகராட்சி பணி மேற்பார்வையாளர் கோமதிநாயகம் தலைமையில் பணி ஆய்வாளர் கோபிநாத், நகராட்சி வருவாய் உதவி ஆய்வாளர்கள் கில்டாரோஷிணி, சித்ரா மற்றும் குடிநீர் பிரிவு பணியாளர்களுடன் 2வது வார்டு வஉசி நகர் பகுதியில் வீடு வீடாக ஆய்வு மேற்கொண்டு, நீண்ட நாட்களாக குடிநீர் கட்டணம் செலுத்தாத நபர்களிடம் உரிய தொகை கட்ட வலியுறுத்தினர். அப்போது சிலர் குடிநீர் பாக்கி தொகையை உடனே செலுத்தியுள்ளனர். கட்டணம் செலுத்தாத 5 வீடுகளுக்கு குடிநீர் இணைப்புகள் துண்டிக்கப்பட்டது. மேலும் சொத்து வரி பாக்கி தொகை செலுத்த வேண்டியவர்களும் உடனே செலுத்த வேண்டும் என்றும் குடிநீர் பாக்கி கட்டணம் செலுத்தாத வீடுகளுக்கு நகராட்சி அதிகாரிகள் குழு தொடர் ஆய்வு செய்து குடிநீர் இணைப்பு துண்டிப்பு பணி தொடரும் என அதிகாரிகள் பொதுமக்களுக்கு எச்சரிக்கை விடுத்தனர்.

முன்விரோத தகராறில் வாலிபர் மீது சரமாரி தாக்குதல்

திருக்கோவிலூர், பிப். 15: திருக்கோவிலூர் அருகே வாலிபர் காதை கடித்த 2 பேர் கைது செய்யப்பட்டனர்.திருக்கோவிலூர் அடுத்த அந்திலி கிராமத்தை சேர்ந்தவர் நரசிங்கன் மகன் சிவா (25). இவருக்கும், அதே பகுதியை சேர்ந்த தங்கவேல் மகன் வெங்கடேசன் என்பவருக்கும் வீட்டு வாசலில் கழிவுநீர் செல்வது தொடர்பாக பிரச்னை ஏற்பட்டு முன்விரோதம் இருந்து வந்தது. இந்நிலையில் சம்பவத்தன்று அப்பகுதியில் சவஊர்வலம் சென்ற போது, வெங்கடேசன் சிவாவை இடித்துக்கொண்டு சென்றுள்ளார். இதனை தட்டிக்கேட்ட சிவாவை, வெங்கடேசன் மற்றும் அவரது நண்பர்கள் சரமாரியாக தாக்கி கொலை மிரட்டல் விடுத்ததுடன், காதை கடித்து துப்பியுள்ளார். இதில் காயமடைந்த அவர் சிகிச்சைக்காக விழுப்புரம் முண்டியம்பாக்கம் அரசு மருத்துவக்கல்லூரி மருத்துவமனையில் அனுமதிக்கப்பட்டார்.இதுகுறித்து சிவா கொடுத்த புகாரின் பேரில் அரகண்டநல்லூர் போலீசார், வெங்கடேசன், அவரது நண்பர்கள் சேரன் (19), கபிலன் (16), அமுல்ராஜ் (25) ஆகிய 4 பேர் மீது வழக்குப்பதிந்து சேரன், அமுல்ராஜை கைது செய்து, நீதிமன்றத்தில் ஆஜர்படுத்தி சிறையில் அடைத்தனர்.

மா.கம்யூ., கட்சியினர் 67 பேர் கைது

உளுந்தூர்பேட்டை, பிப். 15: உளுந்தூர்பேட்டை அருகே பிள்ளையார்குப்பம் கிராமத்தில் மார்க்சிஸ்ட் கம்யூனிஸ்ட் கட்சி சார்பில் மாத்தூர் ஊராட்சிக்கு உட்பட்ட மேட்டாத்தூர் கிராமத்தில் தரமற்ற அரசு கட்டிடங்கள் கட்ட எதிர்ப்பு தெரிவித்தும் குடிநீர் பிரச்னை உள்ளிட்ட அடிப்படை பிரச்னைகளை தீர்த்து வைக்கக் கோரியும் கண்டன ஆர்ப்பாட்டம் நடந்தது.கிளை செயலாளர் ரகு தலைமை தாங்கினார். கலியன், ஜெயபால், தங்கமணி முன்னிலை வகித்தனர். மாவட்ட செயலாளர் ஏழுமலை, மாவட்ட செயற்குழு ஸ்டாலின்மணி, ஒன்றிய செயலாளர் மோகன் ஆகியோர் கோரிக்கைகளை வலியுறுத்தி கண்டன உரையாற்றினர்.கிளை செயலாளர் ஜெயராமன், தர்மலிங்கம், பத்மநாபன், பூங்கொடி, அலமேலு உள்ளிட்டோர் கலந்து கொண்டு கோரிக்கைளை வலியுறுத்தி கோஷமிட்டனர்.அப்போது அங்கு வந்த திருநாவலூர் இன்ஸ்பெக்டர் (பொறுப்பு) ஜோகிந்தர், சப்-இன்ஸ்பெக்டர் பரணிநாதன் மற்றும் ேபாலீசார், ஆர்ப்பாட்டத்துக்கு காவல்துறை அனுமதி இல்லை என கூறி தடுத்ததால் பரபரப்பு ஏற்பட்டது.இதை தொடர்ந்து கிளை செயலாளர் ரகு உள்ளிட்ட 67 பேர் மீது போலீசார் வழக்கு பதிந்து அவர்களை கைது செய்தனர்.

2 கூரை வீடுகள் எரிந்து நாசம்

உளுந்தூர்பேட்டை, பிப். 15:  உளுந்தூர்பேட்டை அருகே நள்ளிரவில் ஏற்பட்ட தீ விபத்தில் 2 கூரை வீடுகள் எரிந்து நாசமானது.உளுந்தூர்பேட்டை அருகே எலவனாசூர்கோட்டை நம்பிகுளம் தெருவை சேர்ந்தவர் ஜெயராமன். நேற்றுமுன்தினம் இரவு இவரது கூரை வீடு திடீரென தீப்பிடித்து எரிந்தது. தீ மளமளவென அருகில் இருந்த பாபு என்பவரது கூரை வீட்டிற்கும் பரவியது. காற்றின் வேகத்தால் தீ மளமளவென பரவியதால் நள்ளிரவில் பரபரப்பு ஏற்பட்டது.இது குறித்து அப்பகுதியை சேர்ந்தவர்கள் உளுந்தூர்பேட்டை தீயணைப்பு நிலையத்துக்கு தகவல் அளித்தனர். நிலைய அலுவலர் ஜமுனாராணி தலைமையிலான குழுவினர் சென்று ஒரு மணி நேரம் போராடி தீ மேலும் பரவாமல் அணைத்தனர்.இந்த தீ விபத்தில் சுமார் ரூ. 5 லட்சம் மதிப்பிலான வீட்டு உபயோக பொருட்கள், துணிமணிகள் உள்ளிட்டவை எரிந்து சாம்பலானது. தீ விபத்துக்கான காரணம் குறித்து போலீசார் விசாரணை நடத்தி வருகின்றனர்.

திருநங்கைகளுக்கு உதவி தொகை ₹24,000 ஆக உயர்த்த ேகாரிக்கை

சென்னை, பிப். 15:  சட்டப்பேரவையில் கேள்வி நேரத்தின்போது செஞ்சி கே.எஸ்.மஸ்தான்( திமுக) பேசியதாவது:செஞ்சி தொகுதியில் செஞ்சி, மேல்மலையனூர் ஆகிய 2 வட்டங்களில் 100க்கும் மேற்பட்ட திருநங்கைகள் வசித்து வருகின்றனர். இவர்கள் வீட்டுமனை பட்டா வழங்க வேண்டும் என்று கோரிக்கை வைத்து வருகின்றனர். இதில் மேல்மலையனூர் வட்டாட்சியர். 12 நபர்களுக்கு வீட்டுமனை பட்டா வழங்க பரிந்துரை செய்துள்ளார். செஞ்சி வட்டத்திலும் 26 பேருக்கு வீட்டுமனை பட்டா வழங்க வருவாய் துறை பரிந்துரை செய்துள்ளார். ஆனால் இதுவரையிலும் அது நிலுவையில் உள்ளது. அந்த பணிகளை துரிதப்படுத்தி 2 வட்டங்களிலும் உள்ள திருநங்கைகளுக்கு வீட்டுமனை பட்டா வழங்க வேண்டும்.அமைச்சர் ஆர்.பி.உதயகுமார்: ஒவ்வொரு கட்டமாக இந்த நடவடிக்கையை கூர்ந்து கவனித்து உரிய பரிந்துரையை மாவட்ட நிர்வாகத்திற்கு செய்து கொண்டு வருகிறார்கள். அந்த பரிந்துரையை ஏற்று துரிதமாக நடவடிக்கை மேற்கொள்ளப்பட்டு வருகிறது.மஸ்தான்(திமுக): திருநங்கைகளுக்கு நல வாரியம் மூலமாக ஆண்டுக்கு ரூ.12,000 உதவி தொகை வழங்கப்படுகிறது. அதை ரூ.24,000 உயர்த்தி, மாதந்தோறும் ரூ.2000 கிடைக்க செய்ய வேண்டும். மானியத்தோடு ஸ்கூட்டர் வழங்கும் திட்டத்தில் திருநங்கைகளுக்கு முழு மானியத்தோடு இலவசமாக ஸ்கூட்டர் வழங்க வேண்டும். இலவச பஸ் பாஸ், பேருந்துகளில் தனி இருக்கை ஒதுக்க வேண்டும். கல்வி தகுதிக்கு ஏற்ற மாதிரி அரசு வேலை வாய்ப்பில் வயது வரம்பை தளர்த்தி வேலை வழங்க வேண்டும். கூத்தாண்டவர் கோயில் திருவிழா சித்ரா பவுர்ணமி காலத்தில் நடைபெறுகிறது. இந்திய அளவில் திருநங்கைகள் அங்ேக கூடுகிறார்கள். அதற்கு மாவட்ட அளவில் விடுமுறை வழங்க வேண்டும்.அமைச்சர் உதயகுமார்: வீட்டுமனை பட்டா கேட்டார். அது வருவாய்துறை சம்பந்தமானது. திருநங்கைகளுக்கு ஒரு மானியக்கோரிக்கையை முன்வைத்து அனைத்து துறை அமைச்சர்களையும் சேர்த்து அதனை வருவாய் துறை சம்பந்தமானதாக கூறமுடியாது. அதற்கு நான் பதில் கொடுக்க முடியாது. இருந்தாலும் முதல்வருடைய கவனத்திற்கு எடுத்து சென்று தீர்வு காண முடியுமேயொழிய இதை வருவாய் துறை தீர்வு காண முடியாது. இவ்வாறு விவாதம் நடந்தது.

மயிலம் முருகன் கோயிலில் 2 ஆயிரம் தொண்டர்கள் முடி காணிக்கை

மயிலம், பிப். 15:  தேமுதிக தலைவர் விஜயகாந்த் உடல்நலகுறைவு அடைந்து அமெரிக்காவில் தங்கி சிகிச்சை பெற்று வந்தார். இந்நிலையில் கடந்த சில தினங்களுக்கு முன் விழுப்புரத்தில் தேமுதிக ஆலோசனை கூட்டம் நடந்தது. இதில் தலைவர் பூரண குணமடைந்தால் முருகன் கோயிலில் பக்தர்கள் அதிகளவில் முடிகாணிக்கை செலுத்துவது மற்றும் பால்குட ஊர்வலம்  சென்று முருகனுக்கு அபிஷேகம் செய்வது என தீர்மானம் நிறைவேற்றப்பட்டது. இந்நிலையில் விஜயகாந்த் பூரண உடல் நலம் பெற்று அமெரிக்காவிலிருந்து சென்னை வர ஏற்பாடுகள் செய்யப்பட்டு வருவதாக தகவல் கிடைத்தது.  இதனையடுத்து நேற்று முன்தினம் தேமுதிக விழுப்புரம் மாவட்ட செயலாளர் வெங்கடேசன் தலைமையில் சுமார் 2 ஆயிரம் பேர் திரண்டு முடிகாணிக்கை செலுத்தினர். பின்னர் விநாயகர் கோயில் குளத்திலிருந்து பால்குடம் காவடி எடுத்தவாறு மலை மீது ஊர்வலமாக வந்து பாலசுப்பிரமணியருக்கு அபிஷேகம் செய்து நேர்த்தி கடன் செலுத்தினர். இதில் மாநில மாவட்ட, ஒன்றிய, நகர, ஊராட்சி கிளை நிர்வாகிகள் உட்பட கட்சி நிர்வாகிகள், மகளிரணியினர் பலர் கலந்து கொண்டனர். இதனால், அப்பகுதியில் பரபரப்பு நிலவியது.

ஆட்டோக்களை சாலையின் ஓரமாக நிறுத்தி பயணிகளை ஏற்றி இறக்க வேண்டும்

கள்ளக்குறிச்சி, பிப். 15:     கள்ளக்குறிச்சி கச்சேரி சாலை பகுதியில், ஆட்டோ ஓட்டுநர்களுக்கான விழிப்புணர்வு கூட்டம் நடந்தது.  கள்ளக்குறிச்சி டிஎஸ்பி ராமநாதன் தலைமை தாங்கினார். கள்ளக்குறிச்சி மோட்டார் வாகன ஆய்வாளர் சத்தியா முன்னிலை வகித்தார். கள்ளக்குறிச்சி இன்ஸ்பெக்டர் விஜயகுமார் வரவேற்றார். கூட்டத்தில் டிஎஸ்பி ராமநாதன் பேசுகையில், கள்ளக்குறிச்சி நகர பகுதியில் ஆட்டோ ஓட்டுநர்கள் ஆட்டோக்களை சாலையில் நிறுத்தி பயணிகளை ஏற்றி இறக்குவதால் போக்குவரத்து நெரிசல் ஏற்படுகிறது. எனவே, ஆட்டோக்களை சாலையின் ஓரமாக நிறுத்தி பயணிகளை ஏற்றி இறக்க வேண்டும். ஓட்டுநர்கள் குடிபோதையில் வாகனத்தை இயக்கக்கூடாது. அனைத்து ஓட்டுநர்களும் ஓட்டுநர் உரிமம் வைத்திருக்க வேண்டும். சீருடை அணிந்து ஆட்டோக்களை இயக்க வேண்டும். அதிகப்படியான ஆட்களை ஏற்றி செல்லக்கூடாது என்றார். கூட்டத்தில், ஆட்டோ ஓட்டுநர் சங்க தலைவர் செல்வம், நிர்வாகி சர்தார் மற்றும் கச்சேரி சாலை, அண்ணா நகர், ராஜா நகர், மார்க்கெட் கமிட்டி உள்ளிட்ட பகுதியில் உள்ள 100க்கும் மேற்பட்ட ஆட்டோ ஓட்டுநர்கள் கலந்து கொண்டனர்.

பெண் முன்னேற்ற தொழில் முனைவோர் நிகழ்ச்சி

விழுப்புரம், பிப். 15: விழுப்புரம் தெய்வானை அம்மாள் மகளிர் கல்லூரியில் பெண் முன்னேற்ற தொழில் முனைவோர் நிகழ்ச்சி தொடங்கியது. சிறப்பு விருந்தினராக மத்திய ஜவுளி துறை அமைச்சர் ஸ்மிருதி ராணி பங்கேற்றார். ஒருங்கிணைப்பாளர் தியாகராஜன் வரவேற்புரை வழங்கினார். துணிக்கடை உரிமையாளர்கள் சங்கத்தலைவர் மகாலட்சுமி குரூப்ஸ் ரமேஷ் உள்ளிட்டோர் முன்னிலை வகித்தனர். இஎஸ்எஸ்கே கல்விக் குழுமத்தின் தலைவர் மற்றும் விழுப்புரம் சமூகநீதி பாதுகாப்பு இயக்கத்தின் தலைவர் சாமிக்கண்ணு நோக்கவுரை வழங்கினார். அவரது உரையில் கிராமப்புற பெண்கள் அனைத்து துறையிலும் தன் கால் தடங்களை பதித்து வருகின்றனர். விண்வெளி துறையில் கால் பதிக்கும் அளவுக்கு மாணவர் சமுதாயம் வளர்ச்சி அடைந்துள்ளது என்றார். தெய்வானை அம்மாள் மகளிர் கல்லூரி முதல்வர் அருணகுமாரி, சிறப்பு விருந்தினர் மத்திய அமைச்சர் ஸ்மிருதி ராணியை பற்றி அறிமுகவுரை ஆற்றினார். அதில் பல்வேறு சமூக நல அமைப்புகளில் பொறுப்புகளை ஏற்று திறம்பட செயல்படக்கூடியவர் என்று புகழாரமும் சூட்டினார். பின்னர் மத்திய அமைச்சர் ஸ்மிருதி ராணி பேசும் போது, இந்தியாவின் எதிர்கால தூண்கள் இளம் தலைமுறையினர். அவர்கள் இன்றைய காலகட்டத்தில் பிரச்னைகளையும், சவால்களையும் எதிர்கொள்வதற்கு பல்வேறு மொழிகளை கற்றுக்கொண்டு சிறந்து விளங்க வேண்டும். மகாத்மா காந்தி முதல் முதலாக பெண்களுக்காக போராடியவர். பெண்கல்வி அவசியம். 55 ஆண்டுகளில் பெண் கல்வியை 4 லட்சத்து 25 ஆயிரம் பெண்கள் பிரதமர் நரேந்திர மோடியால் கல்வி கற்றுள்ளனர் என கூறினார். இந்நிகழ்ச்சியில் லயன் ஆர்.சந்திரன், சரவணன், சண்முகம், ஜெயகுமார், ராமமூர்த்தி மற்றும் பல்வேறு தொழில் துறை சாதனையாளர்கள் உள்ளிட்ட முக்கிய பிரமுகர்கள் கலந்து கொண்டனர். தெய்வானை அம்மாள் கல்லூரியின் முதுகலை ஆங்கிலத்துறை மாணவி அர்ச்சனா, புதுடெல்லியில் பிரதமர் மோடி பங்குபெறும் பாராளுமன்றத்தில் நடைபெறும் நிகழ்ச்சியில் கலந்து கொள்வதற்கும், குவாரியில் நடைபெற்ற தேசிய மாணவர் படையின் இணை அதிகாரிகளுக்கான பயிற்சி முகாமில் தெய்வானை அம்மாள் கல்லூரியின் தேசிய மாணவர் படையின் ஒருங்கிணைப்பாளர் விஜய சண்முண்டீஸ்வரிக்கும், மத்திய அமைச்சர் ஸ்மிருதி ராணி சிறப்பு செய்தார். இந்நிகழ்ச்சியின் நிறைவாக தெய்வானை அம்மாள் மகளிர் கல்லூரி செயலர் செந்தில்குமார் நன்றி கூறினார்.

‘அரசு அடையாள அட்டைகளை அனுமதியின்றி அச்சிட கூடாது’

விழுப்புரம், பிப். 15: விழுப்புரம் நகர காவல் நிலையத்திற்கு உட்பட்ட பிரிண்டிங் பிரஸ், பிளெக்ஸ், ஜாப் டைப்பிங் கடை உரிமையாளர்களுக்கான ஆலோசனை கூட்டம் காவல் நிலையத்தில் நடந்தது. இன்ஸ்பெக்டர் ராபின்சன் தலைமை தாங்கி பேசுகையில், எந்தவொரு பதிவு செய்யப்பட்ட லேபிள்களை உரிமையாளர் அனுமதியின்றி அச்சடிக்கவோ, ஜெராக்ஸ் எடுக்கவோ கூடாது. ரூபாய் நோட்டுகளை கலர் ஜெராக்ஸ் எடுத்தால் நடவடிக்கை எடுக்கப்படும். ஜாதி, மத கட்சி விரோதமான நோட்டீஸ் அல்லது பிளெக்ஸ் போர்டு அடித்து அதன் மூலம் சட்டம் ஒழுங்கு ஏற்படும் பட்சத்தில் அனைத்து தரப்பினர் மீதும் நடவடிக்கை எடுக்கப்படும். போலியான முறையில் ஸ்மார்ட் கார்டு, ஆதார், வாக்காளர் அடையாள அட்டை, பான் அட்டை போன்ற அரசு சார்ந்த அட்டைகளை அரசின் அனுமதியின்றி அடிக்கக்கூடாது. பிளெக்ஸ் போர்டுகள் பிரிண்ட் செய்யும்போது யாரையும் புண்படுத்தும் வகையில் வாசகங்கள் வந்தால் அதனை தவிர்க்க வேண்டும், என்றார். கூட்டத்தில் 50க்கும் மேற்பட்ட கடை உரிமையாளர்கள் கலந்து கொண்டனர்.

அரசு பேருந்துகளில் கூடுதல் கட்டணம்: பயணிகள் அதிர்ச்சி

திருக்கோவிலூர், பிப். 15: பழைய மற்றும் புதிதாக விடப்பட்டுள்ள அரசு பேருந்துகளில் டீலக்ஸ், எக்ஸ்பிரஸ் என ஸ்டிக்கர்களை ஓட்டி அதிக கட்டணம் வசூல் செய்வதாக பயணிகள் குற்றம்சாட்டி உள்ளனர். இதனால் அதிர்ச்சி அடைந்துள்ள பயணிகள், கட்டணத்தை முறைப்படுத்த வேண்டும் என கோரிக்கை விடுத்துள்ளனர்.தமிழகத்தில் பேருந்து கட்டண உயர்த்தப்பட்டதை தொடர்ந்து, அரசு மற்றும் தனியார் பேருந்துகளில் பேருந்து கட்டணம் பயண தூரம் அடிப்படையில் உயர்த்தப்பட்டது. இந்த நிலையில், விழுப்புரம் மாவட்டத்தில் இயக்கப்படும் அரசு மற்றும் தனியார் பேருந்துகளில் பயண தூரம் அடிப்படையில் கணக்கீட்டு முறையாக இந்த கட்டண உயர்வை கடைப்பிக்காமல் சில பகுதிகளுக்கு அவர்கள் விருப்பத்திற்கு ஏற்ப கட்டணத்தை உயர்த்தி பொதுமக்களிடம் வசூல் செய்து வருகின்றனர்.குறிப்பாக அரசு பேருந்துகளில்,  நகர பேருந்து முதல் அருகில் இருக்கும் பெரு நகரங்கள், வெகு தொலைவில் உள்ள நகரங்கள், வெளி மாநிலத்திற்கு செல்லும் பேருந்துகளில் எல்எஸ்எஸ், எக்ஸ்பிரஸ், டீலக்ஸ், அல்ட்ரா டீலக்ஸ் என பெயர்களை வைத்துக்கொண்டு செல்லும் பேருந்துகளில் கடந்த ஒருவார காலமாக இந்த கூடுதல் கட்டணத்தை வசூலித்து வருகின்றனர். பொதுவாக எல்எஸ்எஸ், எக்ஸ்பிரஸ், டீலக்ஸ், அல்ட்ரா டீலக்ஸ் போன்ற பெயர்களை தாங்கிக்கொண்டு செல்லும் பேருந்துகள் வழியோர உணவகங்களில் நிறுத்தக்கூடாது. அதேபோல் குறிப்பிட்ட வழித்தடத்தில் தான் இயக்கப்பட வேண்டும். மேலும் குறிப்பிட்ட பஸ் நிறுத்தத்தில் மட்டுமே பேருந்தை நிறுத்தி பயணிகளை ஏற்றிச்செல்ல வேண்டும். இவ்வாறான நடைமுறைகளை போக்குவரத்து கழகம் கடைப்பிடிக்காமல் சாதாரண பேருந்தை இயக்குவது போல், அதே பயண நேரத்தையே கடைப்பிடிக்கின்றனர். எல்எஸ்எஸ், எக்ஸ்பிரஸ், டீலக்ஸ், அல்ட்ரா டீலக்ஸ் என கூறிக்கொண்டு அனைத்து நிறுத்தத்திலும் பேருந்தை நிறுத்தி பயணிகளை ஏற்றிச்செல்கின்றனர். அனுமதிக்கப்பட்ட வழித்தடத்தையும் மாற்றி பேருந்துகளை இயக்கி வருகின்றனர். கூடுதல் கட்டணத்தால் ஏழை, எளிய மக்கள் அவதிப்பட்டு வருகின்றனர். அதோடு எல்எஸ்எஸ், எக்ஸ்பிரஸ், டீலக்ஸ், அல்ட்ரா டீலக்ஸ் போன்ற பேருந்துகளில் சென்றால் குறிப்பிட்ட நேரத்திற்கு சொகுசான பயணம் மேற்கொள்ளலாம் என்று இருக்கும் பயணிகள் மத்தியில் பெரும் ஏமாற்றத்தை ஏற்படுத்தியுள்ளது. எனவே, வழித்தடம், பயண தூரம் பேருந்தின் தரம் ஆகியவற்றை கணக்கில் கொண்டு பேருந்து கட்டணத்தை முறைப்படுத்த மாவட்ட ஆட்சியர் சம்பந்தப்பட்ட போக்குவரத்து கழக அதிகாரிகளுக்கு உத்தரவிட வேண்டும் என பயணிகள், சமூக ஆர்வலர்கள் கோரிக்கை விடுத்துள்ளனர்.

பைக்கில் 3 கிலோ கஞ்சா கடத்திய 2 வாலிபர்கள் அதிரடி கைது

விக்கிரவாண்டி, பிப். 15: மயிலத்தில் 2 வாலிபர்களிடம் 3 கிலோ கஞ்சா பறிமுதல் செய்யப்பட்டு இருவரும் கைது செய்யப்பட்டனர். கடத்தலுக்கு பயன்படுத்திய பைக்கும் பறிமுதல் செய்யப்பட்டது.விழுப்புரத்தில் இருந்து கிளியனூருக்கு பைக்கில் கஞ்சா கடத்துவதாக மயிலம் இன்ஸ்பெக்டர் பால்சுதருக்கு ரகசிய தகவல் கிடைத்தது. இதையடுத்து இன்ஸ்பெக்டர் பால்சுதர் தலைமையிலான போலீசார் மயிலம் கள்ளக்கொளத்தூர் சந்திப்பில் நேற்று முன்தினம் இரவு 11 மணியளவில் வாகன சோதனையில் ஈடுபட்டனர். அப்போது மயிலம் சாலையில் இருந்து கள்ளக்கொளத்தூர் நோக்கி திரும்பிய பைக்கை நிறுத்தி விசாரித்த போது பைக்கில் இருந்த 2 வாலிபர்களும் முன்னுக்குப்பின் முரணாக பேசியுள்ளனர்.மேலும் அவர்கள் வைத்திருந்த பையை சோதனையிட்ட போது அதில் தலா ஒன்றரை கிலோ கஞ்சா பொட்டலம் 2 இருந்தது தெரியவந்தது. தொடர்ந்து விசாரணை நடத்தியதில் புதுவை மேட்டுப்பாளையம் சாணரப்பேட்டையை சேர்ந்த பழனி மகன் நடராஜன் (38), விழுப்புரம் பழைய சிந்தாமணி சாலையை சேர்ந்த மனோகர் மகன் ராஜா (40) எனவும் தெரியவந்தது. அவர்கள் மீது வழக்குப்பதிந்த போலீசார், அவர்கள் 2 பேரையும் கைது செய்தனர். அவர்களிடம் இருந்து 3 கிலோ கஞ்சா மற்றும் பைக் பறிமுதல் செய்யப்பட்டது.

சிறப்பு மனுநீதி முகாம்

கள்ளக்குறிச்சி, பிப். 15:விழுப்புரம் மாவட்ட ஆட்சியர் சுப்ரமணியன் அறிவுறுத்தலின் பேரில் கள்ளக்குறிச்சி சார் ஆட்சியர் ஸ்ரீகாந்த் தலைமையில் வரும் 18ம் தேதி காலை 10 மணி முதல் 2 மணிவரை கள்ளக்குறிச்சி சார் ஆட்சியர் அலுவலகத்தில் கோட்ட அளவிலான கள்ளக்குறிச்சி, சங்கராபுரம், சின்னசேலம் ஆகிய  மூன்று தாலுகாவிற்கு உட்பட்ட மாற்றுத்திறனாளிகளுக்கு சிறப்பு மனுநீதி முகாம் நடத்தப்பட உள்ளது. எனவே, சிறப்பு முகாமில் மாற்றுத்திறனாளிகள் கலந்துகொண்டு தங்களது கோரிக்கை தொடர்பான மனுக்களை கள்ளக்குறிச்சி சார் ஆட்சியிரிடம் மனு கொடுத்து பயன்பெறுமாறு கேட்டுக்கொள்ளப்படுகிறது.உளுந்தூர்பேட்டை கடைவீதியில் ஆக்கிரமிப்பு பொருட்கள் பறிமுதல்உளுந்தூர்பேட்டை, பிப். 15: உளுந்தூர்பேட்டை பேரூராட்சிக்கு உட்பட்ட பேருந்து நிலையம், கடைவீதி, பாண்டூர் ரோடு, விருத்தாசலம் சாலை உள்ளிட்ட முக்கிய இடங்களில் கடந்த மாதம் ஆக்கிரமிப்புகள் கட்டிடங்கள் அனைத்தும் அகற்றப்பட்டது. இந்நிலையில் தொடர்ந்து சாலையின் ஓரம் சிறுகடைகள் மற்றும் சாலையோர ஓட்டல்கள் வைத்து ஆக்கிரமிப்பு செய்து போக்குவரத்து மற்றும் பொதுமக்களுக்கு இடையூறு ஏற்படுத்தப்பட்டு வந்தது. இதையடுத்து நேற்று சப்-இன்ஸ்பெக்டர் செல்வநாயகம் தலைமையிலான போலீசார் அப்பகுதிக்கு சென்று அங்கிருந்த கடைகள் மற்றும் பொருட்களை அதிரடியாக பறிமுதல் செய்து, மினிடெம்போவில் ஏற்றி காவல்நிலையத்துக்கு எடுத்து சென்றனர். 50க்கும் மேற்பட்ட கடைகளில் இருந்த ஆக்கிரமிப்பு பொருட்களை போலீசார் திடீரென பறிமுதல் செய்ததால் உளுந்தூர்பேட்டை பகுதியில் பரபரப்பு ஏற்பட்டது. தொடர்ந்து ஆக்கிரமிப்பு செய்பவர்கள் மீது வழக்குப்பதிந்து கடும் நடவடிக்கை எடுக்கப்படும் என போலீசார் எச்சரிக்கை செய்தனர்.

குடிநீர் தட்டுப்பாடு ஏற்படும் அபாயம்

சின்னசேலம், பிப். 15: சின்னசேலம் வட்டார பகுதிகளில் குடிநீர் தட்டுப்பாட்டை தடுத்திடும் வகையில் மாவட்ட நிர்வாகம் தகுந்த முன்னெச்சரிக்கை நடவடிக்கை எடுக்க வேண்டும் என பொதுமக்கள் எதிர்பார்க்கின்றனர்.சின்னசேலம் தாலுகாவில் வடக்கநந்தல் பேரூராட்சிக்கு உட்பட்ட அக்கராயபாளையம், கச்சிராயபாளையம், வடக்கநந்தல், வெங்கட்டம்மாபேட்டை ஆகிய கிராமங்களுக்கு கோமுகி ஆற்றில் இருந்துதான் குடிநீர் வழங்கப்பட்டு வருகிறது. இந்த ஆண்டு போதிய பருவமழை பெய்யாததால் கோமுகி அணையும் வறண்டு உள்ளது. இதனால் ஆற்றில் உள்ள தண்ணீர் வடிந்து ஆங்காங்கே தண்ணீர் குட்டையாக தேங்கி நிற்கிறது. இன்னும் ஓரிரு நாளில் அந்த தண்ணீரும் வடிந்து ஆறு வடிந்து போகும் நிலை ஏற்பட உள்ளது. இந்த நிலையில், கோமுகி ஆற்றில் பலர் மின்மோட்டார் வைத்து நீரை உறிஞ்சி விவசாயத்திற்கு பயன்படுத்தி வருகின்றனர். அதேபோல கோமுகி ஆற்றில் ஓரிரு வீடு கட்டும் பயனாளிகளை தவிர மணல் மாபியா கும்பல்கள் மணலை டிராக்டர்களில் அள்ளி செல்கின்றனர். இதனால் கோமுகி ஆற்றில் நீர்மட்டம் வெகுவாக குறைந்து வருகிறது. இதனால் இன்னும் ஓரிரு வாரங்களில் இந்த பகுதியில் கடும் குடிநீர் தட்டுப்பாடு ஏற்படும் சூழல் உள்ளது. அதேபோல சின்னசேலம் பகுதியில் உள்ள வி.கிருஷ்ணாபுரம், வி.அலம்பளம், வி. மாமந்தூர், கருங்குழி, செம்பாகுறிச்சி, பாக்கம்பாடி, தோட்டப்பாடி, பெத்தாசமுத்திரம் உள்ளிட்ட பல்வேறு கிராமங்களிலும் போதிய பருவமழை பொழியாத காரணத்தால் ஏரிகளும், குடிநீர் கிணறுகளும் காய்ந்துபோய் உள்ளது. இதனால் அந்த பகுதியில் உள்ள போர்வெல் கிணறுகளில் நீர்மட்டம் குறைந்து விட்டதால் குடிநீர் பற்றாக்குறை உள்ளது. இதிலும் சில கிராமங்களில் 2 அல்லது 3 நாட்களுக்கு ஒருமுறை மட்டுமே குடிநீர் வழங்கப்பட்டு வருகிறது. வி. மாமந்தூர், வி. கிருஷ்ணாபுரம் போன்ற கிராமங்களில் குடிநீர் தட்டுப்பாடு தலை விரித்தாடுவதால் பெண்கள் காடு, காடாக அலைந்து குடிநீர் எடுத்து வருகின்றனர். அதேபோல கல்வராயன்மலைப் பகுதியில் உள்ள பெரும்பாலான கிராமங்களில் கடும் வறட்சியின் காரணமாக தற்போதே அங்குள்ள மக்களுக்கு முழுமையான அளவில் குடிநீர் கிடைப்பதில்லை. அங்குள்ள பள்ளிகளில் தங்கி படிக்கும் மாணவர்களுக்கு குளிக்க, துணி துவைக்க தண்ணீர் பற்றாக்குறை உள்ளது.எனவே, அரசு துறை அதிகாரிகள் அடங்கிய குழு அமைத்து கோடை காலம் துவங்கும் முன் தற்போதிலிருந்தே குடிநீர் வசதி இல்லாத கிராமங்களை தேர்வு செய்து போர்வெல் கிணறு அமைத்து குடிநீர் வசதி செய்து தரவேண்டும். அதேபோல பயன்பாடு அற்ற போர்வெல் கிணறுகளை கணக்கெடுத்து, அதை மேலும் ஆழப்படுத்த ஊராட்சி ஒன்றியம் நடவடிக்கை எடுக்க வேண்டும் என மக்கள் எதிர்பார்க்கின்றனர்.

இருதரப்பினர் மோதல் 2 பேர் கைது

திருக்கோவிலூர், பிப். 14:  திருக்கோவிலூர் அடுத்த கனகனந்தல் கிராமத்தை சேர்ந்தவர் கோவிந்தராஜ்(45). இவருக்கும், அதே பகுதியை சேர்ந்த காத்தவராயன்(60) என்பவருக்கும் நிலம் சம்பந்தமாக பிரச்னை ஏற்பட்டு முன்விரோதம் இருந்து வந்துள்ளது.இந்த நிலையில் சம்பவத்தன்று கோவிந்தராஜையும், அவரது தம்பி தணிகாசலத்தையும் ஆபாசமாக திட்டி தாக்கி  காத்தவராயன் கொலை மிரட்டல் விடுத்துள்ளார். இதில் காயமடைந்த இருவரும் சிகிச்சைக்காக திருக்கோவிலூர் அரசு மருத்துவமனையில் அனுமதிக்கப்பட்டனர். அதேபோல் காத்தவராயனை ஆபாசமாக திட்டி தாக்கி தணிகாசலம் கொலைமிரட்டல் விடுத்துள்ளார். இது குறித்து கோவிந்தராஜ் கொடுத்த புகாரின் பேரில் காத்தவராயன் மீதும், காத்தவராயன் கொடுத்த புகாரின் பேரில் தணிகாசலம் மீதும் திருக்கோவிலூர் போலீசார் தனித்தனியாக வழக்கு பதிந்து, அதில் இருவரையும் கைது செய்தனர்.

மகளிர் விடுதிகளை பதிவு செய்ய ஆட்சியர் உத்தரவு

விழுப்புரம், பிப். 14:  விழுப்புரம் மாவட்ட ஆட்சியர் சுப்ரமணியன் வெளியிட்டுள்ள செய்திக்குறிப்பில், சமூக நலம்-மகளிர் நலம்-சென்னை உயர்நீதிமன்றம் ஆணையில், பணிபுரியும் மகளிர் விடுதிகளை தமிழ்நாடு பெண்கள் மற்றும் குழந்தைகளுக்கான விடுதிகள் மற்றும் இல்லங்களுக்கான சட்டம் 2014 கீழ் வரும் 28ம் தேதிக்குள் பதிவு செய்ய வேண்டும். அதனை தொடர்ந்து விழுப்புரம் மாவட்டத்தில் தனியார் நிறுவனங்கள் மூலம் செயல்பட்டுவரும் பணிபுரியும் மகளிர் விடுதிகளை தமிழ்நாடு பெண்கள் மற்றும் குழந்தைகளுக்கான விடுதிகள் மற்றும் இல்லங்களுக்கான சட்டம் 2014 கீழ் வரும் 28ம் தேதிக்குள் பதிவு செய்யுமாறு அறிவுறுத்தப்படுகிறது. மேலும் பதிவு செய்யப்படாமல் செயல்பட்டு வரும் பணிபுரியும் மகளிர் விடுதிகளை பதிவு செய்ய உரிய சான்றுகளுடன் தங்கள் விடுதிகளின் கருத்துருக்களை ஆட்சியர் அலுவலகத்தில் செயல்பட்டு வரும் மாவட்ட சமூகநல அலுவலகத்தில் சமர்பிக்க வேண்டும். அவ்வாறு விடுதிகள் பதிவு செய்யாமல் தொடர்ந்து செயல்பட்டு வந்தால் அந்த விடுதிகளை நடத்த தடை உத்தரவும், விடுதி உரிமையாளர்கள் மீது மாவட்ட நிர்வாகம் மூலம் உரிய நடவடிக்கை எடுக்கப்படும், என தெரிவித்துள்ளார்.

எல்லை பிரச்னையால் 108 ஆம்புலன்ஸ் சேவை கிடைப்பதில் சிக்கல்

வானூர், பிப். 14:  வானூர் பகுதியில் 108 ஆம்புலன்ஸ் சேவை இல்லாததால் நோயாளிகள் அவதியடைகின்றனர்.இந்தியா முழுவதும் கர்ப்பிணிகள் மற்றும் நோயாளிகள், விபத்துகளில் சிக்குபவர்களுக்கு இலவசமாக 108 ஆம்புலன்ஸ் சேவை துவக்கப்பட்டது. இந்த திட்டம் தமிழகத்தில் வெற்றிகரமாக செயல்படுத்தப்பட்டு வருகிறது. அதே வேளையில் புதுச்சேரி அருகே உள்ள தமிழக பகுதியான வானூர் வட்டம் உள்ளிட்ட பகுதிகளில் 108 ஆம்புலன்ஸ் சேவைக்கு அழைத்தால் புதுச்சேரியை தொடர்பு கொள்ளுங்கள் என்று முதலில் செய்தி வருகிறது. அவர்களுக்கு தொடர்பு கொண்டால் தமிழக பகுதியாக உள்ளதால் தமிழக 108 சேவைக்கு தொடர்பு கொள்ளுங்கள் என்று மாறிமாறி கூறி வருகின்றனர். இதை தொடர்ந்து தமிழக 108 சேவைக்கு அழைத்தால் அவர்கள் அந்த தொலைபேசியை எடுத்து பேசாமல் அலைக்கழிக்கின்றனர். இதனால் நோயாளிகள் மற்றும் விபத்துகளில் சிக்கி படுகாயம் அடைபவர்கள் பெரும் அவதிக்குள்ளாகின்றனர். எனவே 108 சேவை வானூர் வட்டார பகுதிகளில் தடையின்றி உடனடியாக கிடைக்க மாவட்ட ஆட்சியர் நடவடிக்கை எடுக்க வேண்டும் என வானூர் வட்டார பகுதி பொதுமக்கள் கோரிக்கை விடுத்துள்ளனர்.

2 வாலிபர்களை தாக்கியவர் கைது

திருக்கோவிலூர், பிப். 14:  திருக்கோவிலூர் அடுத்த மாடாம்பூண்டியை சேர்ந்தவர் துரை மகன் ராம்குமார்(32). தனியார் சர்க்கரை ஆலையில் வேலை பார்த்து வரும் இவர் சம்பவத்தன்று இவரும், இவரது நண்பர் பாலமுருகனும் மாடாம்பூண்டி கூட்டு ரோட்டில் இருந்து திருக்கோவிலூர் நோக்கி சென்று கொண்டிருந்தனர். அப்போது அதே ஊரை சேர்ந்த முருகானந்தம்(40) என்பவர் சாலையில் கிடந்த கேபிள் டிவி வயரை எடுத்துக்கொண்டிருந்தார். அப்போது அந்த வயர் ராம்குமார் மீது பட்டதை தட்டிக்கேட்டுள்ளார். இதனால் ஆத்திரமடைந்த முருகானந்தம், ராம்குமாரையும், அவரது நண்பர் பாலமுருகனையும் ஆபாசமாக திட்டி தாக்கி கொலைமிரட்டல் விடுத்துள்ளார். இது குறித்து ராம்குமார், திருப்பாலப்பந்தல் போலீசில் புகார் செய்தார். புகாரின் பேரில் முருகானந்தம் மீது போலீசார் வழக்கு பதிந்து அவரை கைது செய்து நீதிமன்றத்தில் ஆஜர்படுத்தி சிறையில் அடைத்தனர்.

வரதட்சணை கேட்டு இளம்பெண் சித்ரவதை 8 பேர் மீது வழக்கு: கணவன் அதிரடி கைது

திருக்கோவிலூர், பிப். 14: சங்கராபுரம் வட்டம் மைக்கேல்புரம் கிராமத்தை சேர்ந்தவர் சவரிமுத்து(35). இவருக்கும் அதே பகுதியை சேர்ந்த பரிமளாமேரி(24) என்பவருக்கும் கடந்த இரண்டு ஆண்டுகளுக்கு முன் திருமணம் நடந்தது. இவர்கள் திருமணத்தின் போது பரிமளாதேவியின் பெற்றோர் வீட்டில் 7 சவரன் நகையும், ஒரு லட்சம் மதிப்பிலான சீர்வரிசை பொருட்களும் வழங்கினர். மேலும் இவர்களுக்கு ஒன்றரை வயதில் ஒரு பெண் குழந்தை உள்ளது. இந்த நிலையில் சவரிமுத்துவும், அவரது குடும்பத்தினரும் பரிமளாதேவியிடம் தாய் வீட்டில் இருந்து வரதட்சணை வாங்கி வரவேண்டும் என்று சித்ரவதை செய்து வந்துள்ளனர். இதனிடையே சம்பவத்தன்று கணவர் குடும்பத்தினர் மீண்டும் ரூ.3 லட்சம் ரொக்கம் வரதட்சணை வாங்கி வரவேண்டும் என்று கூறி அவரை ஆபாசமாக திட்டி தாக்கி கொலை மிரட்டல் விடுத்ததோடு மண்ணெண்ணெய் ஊற்றி தீ வைத்து விடுவதாகவும் மிரட்டியுள்ளனர். இதுகுறித்து பரிமளாதேவி, திருக்கோவிலூர் அனைத்து மகளிர் காவல் நிலையத்தில் புகார் செய்தார். புகாரின் பேரில் கணவர் சவரிமுத்து, மாமனார் எரோனிமூஸ், மாமியார் ரீத்தாமேரி, கணவரின் சகோதரிகள் விமலாராணி, அமலோற்பவமேரி, அருள்ஜோதி, ஆரோக்கியமேரி மற்றும் செட்ராஜ் ஆகிய 8 பேர் மீது போலீசார் வழக்கு பதிந்து, அதில் சவரிமுத்துவை கைது செய்து நீதிமன்றத்தில் ஆஜர்படுத்தி சிறையில் அடைத்தனர். மேலும் இது குறித்து போலீசார் விசாரணை நடத்தி வருகின்றனர்.

கிராம நிர்வாக அலுவலர்கள் ஆலோசனை கூட்டம்

விக்கிரவாண்டி, பிப். 14: விக்கிரவாண்டி தாலுகாவில் பிரதம மந்திரி விவசாயிகள் ஊக்க தொகை பயனாளிகள்  அறிக்கை தயாரித்தல் குறித்த விஏஓக்கான ஆலோசனை கூட்டம் தாலுகா அலுவலகத்தில் நடந்தது. தாசில்தார் சுந்தர்ராஜன் தலைமை தாங்கினார். தலைமையிடத்து நில அளவையர் ரவி முன்னிலை வகித்தார். வருவாய் உதவி அலுவலர் தஸ்தகீர் வரவேற்றார். கூட்டத்தில், தாலுகாவில் உள்ள விவசாயிகள் பிரதம மந்திரி விவசாயிகள் ஊக்கத்தொகை திட்டத்தில் பயனாளிகள் குறித்த அறிக்கையை தயார் செய்தல் குறித்தும், துரித காலத்தில் முழு அறிக்கையை தயார் செய்து தருவது குறித்தும், விஏஓக்களுக்கு தாசில்தார் சுந்தர்ராஜன் விளக்கம் அளித்தார். வருவாய் ஆய்வாளர்கள் மூர்த்தி, விஜயன், மெகருனிஷா, தரணி, பாரதி மற்றும் அனைத்து கிராம நிர்வாக அலுவலர்கள் கலந்து கொண்டனர்.