Virudhnagar - Dinakaran

அரசகுடும்பன்பட்டி, செங்கமலப்பட்டி கிராம மக்கள் குடிநீர் கேட்டு காலிக்குடங்களுடன் கலெக்டர் அலுவலகத்தில் முற்றுகை தண்ணீருக்கு ஏற்பாடு செய்யுமாறு மனு

விருதுநகர், ஆக. 20: விருதுநகர் அருகே உள்ள கிராம மக்கள் மற்றும் சிவகாசி அருகே உள்ள கிராம மக்கள் குடிநீர் கேட்டு  கலெக்டர் அலுவலகத்தில் காலி குடங்களுடன் முற்றுகையிட்டதால் பரபரப்பு ஏற்பட்டது.விருதுநகர் அருகே மெட்டுக்குண்டு ஊராட்சிக்கு உட்பட்ட பொட்டல்பட்டி, அரசகுடும்பன்பட்டி, மெட்டுக்குண்டு கிராமங்கள் உள்ளன. இவற்றில் அரசகுடும்பன்பட்டியில 300 குடும்பங்கள் உள்ளன. வாரம் ஒரு முறை குடும்பத்திற்கு 5 குடம் தண்ணீர் வருகிறது.கிராமத்தில் உள்ள 5 போர்வெல்களின் மோட்டாரும், மின்இணைப்பு துண்டிக்கப்பட்டுவிட்டது. ஒரே ஒரு மோட்டாரில் பம்ப் செய்யப்படும் தண்ணீர் போதவில்லை. இதனால் 3 கி.மீ தூரம் சென்று தினசரி தண்ணீரை எடுத்து வர வேண்டிய நிலை உள்ளது. மெட்டுக்குண்டு கிராம மேல்நிலைத்தொட்டியில் தண்ணீர் பிடிக்க விட மறுக்கின்றனர். அங்குள்ள அடிகுழாயில் தண்ணீரை அடித்து எடுத்து வரவேண்டிய சூழல் உள்ளது. அடிகுழாயில் வரும் தண்ணீரை குடித்தால் காய்ச்சல், வாந்தி, வயிற்றுப்போக்கு உள்ளிட்ட கொடிய நோய்கள் வருகின்றன. கிராமத்தில் உள்ள கால்நடைகளுக்கும் தண்ணீரில்லை. கிராம மக்கள் ஒரு குடம் குடிநீரை ரூ.15 விலை கொடுத்து வாங்கி பயன்படுத்த வேண்டிய நிலை உள்ளது. அதேபோல், சிவகாசி அருகே செங்கமலப்பட்டி ஊராட்சி முருகன் காலனி, சர்ச் தெரு, கோட்டமலை காலனிகளில் 7 நாட்களுக்கு ஒரு முறை உப்பு தண்ணீர் வருகிறது. ஒரு குடம் தண்ணீரை ரூ.6க்கும்,  குடிநீரை குடம் ரூ.15க்கும் விலை கொடுத்து வாங்க வேண்டிய நிலை உள்ளது. சர்ச் தெருவில் போர்வெல் போட்டு சின்டெக்ஸ் டேங்க் அமைத்து தரவேண்டும். மாவட்ட நிர்வாகம் உடனடியாக குடிநீரும், பிற உபயோகத்திற்கான தண்ணீரை கிடைக்க நடவடிக்கை எடுக்க வேண்டுமென தெரிவித்துள்ளனர்.

பட்ஜெட் வெளியான ஒரு மாதத்தில் இந்திய பங்குசந்தையில் ரூ.4.50 லட்சம் கோடி சரிவு காங்கிரஸ் செயலாளர் எம்பி மாணிக்கம் தாகூர் பேச்சு

விருதுநகர், ஆக. 20: பட்ஜெட் வெளியிடப்பட்ட ஒரு மாதத்தில் இந்திய பங்குசந்தை ரூ.4.50 லட்சம் கோடி சரிவை சந்தித்துள்ளது. இந்திய சந்தை பெரும் வணிகர்களின் கைகளுக்கு மாறி வருகிறது. தமிழகத்தில் ஏதோ ஒரு மாற்றத்தை மத்திய அரசு நடத்த இருப்பதாக காங்கிரஸ் செயலாளர் எம்பி மாணிக்கம்தாகூர் தெரிவித்துள்ளார். விருதுநகர் அரசு ஊழியர் சங்க கட்டிடத்தில் அனைத்து துறை ஓய்வூதியர் சங்க மாவட்ட மாநாடு மாவட்ட தலைவர் குருசாமி தலைமையில் நடைபெற்றது. மாநாட்டில் எம்பி மாணிக்கம்தாகூர் உரையில், இந்திய பொருளாதாரம் கடும் சரிவை சந்தித்து வருகிறது. நாட்டில் உள்ள 6 விமான நிலையங்கள் அம்பானிக்கும், 90 நகரங்களில் கேஸ் விநியோகம் அதானிக்கு வழங்கி உள்ளனர். மேலும் நாட்டின் பொதுத்துறையான பிஎஸ்என்எல், எம்டிஎன்எல் தொலைத்தொடர்பு நிறுவனங்களின் சேவை கிடைக்காமல் செய்து வருகின்றனர். மக்களை ரிலையன்ஸ் நிறுவன ஜியோவிற்கு மாற்றி வருகின்றனர். பட்ஜெட் வெளியிடப்பட்டு ஒரு மாதத்தில் இந்திய பங்கு சந்தையில் 4.50 லட்சம் கோடியை முதலீட்டாளர்கள் இழந்துள்ளனர். வடமாநிலங்களில் முஸ்லீம்கள் இரண்டாம் தர குடிமக்களாக நடத்தப்படுகின்றனர். நாடாளுமன்றத்தில் ஓய்வூதியர்களுக்கு வருமான வரி விலக்கு, தமிழக ஓய்வூதியர்களுக்கு மத்திய அரசு ஓய்வூதியர்களுக்கு இணையாக ஓய்வூதியம், 2003க்கு பிறகு பணிக்கு சேர்ந்தவர்களுக்கு பழைய  ஓய்வூதிய திட்டத்தை நடைமுறைபடுத்த வேண்டுமென கோரிக்கை எழுப்புவேன். தற்போது காஷ்மீரில் 370 சட்டத்தை வாபஸ் பெற்றது தொடர்பாக தவறான கருத்தை மக்கள் மத்தியில் பரப்பி வருகின்றனர். ஜூன்.7ல் நிதியமைச்சர் புறநானுற்றை பற்றியும், ஆக.14ல் ஜனாதிபதி பாரதியை பற்றியும், ஆக.15ல் பிரதமர் திருக்குறள் பற்றியும் பேசி இருக்கிறார்கள் என்றால் தமிழக மக்கள் மொழி, பண்பாடு மீது வைத்திருக்கும் பற்றை பயன்படுத்தி ஏதோ ஒன்றை தமிழகத்தில் நடத்த இருக்கிறார்கள் என்பது தெளிவாகியிருக்கிறது என்றார். கூட்டத்தில் ஓய்வூதியோர் மாநில பொதுச்செயலாளர் கிருஷ்ணமூர்த்தி மற்றும் அரசு ஊழியர் சங்க நிர்வாகிகள் கலந்து கொண்டனர்.

வெம்பக்கோட்டை போலீசார் வழக்குப்பதிவதில் பாரபட்சம் குகன்பாறை கிராம மக்கள் எஸ்பி.,யிடம் மனு

விருதுநகர், ஆக. 20:  வெம்பக்கோட்டை போலீஸ் நிலைய வழக்குப்பதிவில் பாரபட்சம் காட்டப்படுவதாக குகன்பாறை கிராம மக்கள் எ         ஸ்.பி., ராஜராஜனிடம் மனு அளித்தனர். வெம்பகோட்டை  அருகே குகன்பாறை கிராமத்தை சேர்ந்த அருந்ததியர் மக்கள் எஸ்பி ராஜராஜனிடம்  அளித்த மனுவில்,  குகன்பாறை கிராமத்தில் 40 அருந்ததியர் குடும்பங்கள்  வசித்து வருகின்றனர். கடந்த ஆக.13ல் இரவு 9 மணியளவில் மாரிமுத்து  என்பவரின் வீட்டிற்குள் நுழைந்து 12 பேர் வீட்டிற்குள் நுழைந்து தாக்குதல்  நடத்தினர். இதில் மாரிமுத்துவின் உறவினர்கள் மாரிச்சாமி, சரவணகுமார்,  முனியம்மாளை தாக்கி உள்ளனர். இரவில் வெம்பக்கோட்டை போலீஸ் நிலையத்தில்  புகார் செய்ய சென்றபோது, மருத்துவமனைக்கு செல்லுமாறு போலீசார்  அறிவுறுத்தினர். 3 நாட்கள் கழித்து சிகிச்சையில் இருந்தவர்களிடம்  போலீசார் விசாரணைக்கு சென்றபோது, பாதிக்கப்பட்டவர்கள் 12 பேர் மீது புகார்  தெரிவித்தனர். ஆனால் வெம்பக்கோட்டை போலீசார் அடி வாங்கி காயம்பட்டவர்கள்  மீது வழக்குப்பதிவு செய்து விட்டு, எதிர்தரப்பில் 7 பேர் மீது மட்டும்  வழக்குபதிவு செய்துள்ளனர். மீதமுள்ளவர்கள் மீது வழக்குப்பதிவு செய்ய  வேண்டும். அருந்ததியர் மக்களுக்கு பாதுகாப்பு வழங்க வேண்டுமென  தெரிவித்துள்ளனர்.

ராஜபாளையம் பகுதியில் கட்டிட கழிவுகளை கொட்டி கண்மாய்கள் அழிப்பு

ராஜபாளையம், ஆக. 20: ராஜபாளையம் சுற்றுவட்டார பகுதிகளில் பல கண்மாய்கள் விவசாயத்திற்காக பயன்படுத்தப்பட்டு வருகிறது. அதில் ஒரு சில கண்மாய்களில் கட்டிட கழிவு மற்றும் குப்பைகளை கொட்டி அளித்து வருவதால் விவசாயிகள் வேதனையடைந்துள்ளனர்.ராஜபாளையம் மேற்கு மலைத் தொடர்ச்சி பகுதியில் உற்பத்தியாகும் மழைநீரை நம்பி பல கண்மாய்கள் இருந்து வருகின்றன. தற்போது தமிழக அரசு பெயரளவுக்கு சில கண்மாய்களை மட்டும் மராமத்து பணிகள் என கூறி விளம்பரம் தேடிக் கொண்டு வரும் நிலையில், பல கண்மாய்கள் நிலை படுமோசமாக நிலையில் உள்ளது. ஒருசில கண்மாய்களில் கட்டிட கழிவுகள் மற்றும் குப்பைகளை கொட்டி சிறிது சிறிதாக கண்மாய்களை மூடும் அளவிற்கு இருந்து வருகிறது. இதை தடுப்பதற்கான எந்த ஒரு நடவடிக்கையும் எடுக்காமல் பெயரளவுக்கு ஒருசில கண்மாயில் மட்டும் குடிமராமத்து பணி என பல லட்சங்கள் ஒதுக்கி பணிகள் செய்து வருகின்றனர்.இந்நிலையில் விவசாயத்தை நம்பியுள்ள கண்மாய்களை காப்பாற்றி வந்தாலே போதும். அதற்கான எந்த ஒரு பணிகளையும் அரசு செய்யாமல் இருப்பதால் விவசாயத்தை மட்டுமே நம்பியுள்ள பல விவசாயிகள் மனமுடைந்து விவசாய பணிகளை மேற்கொள்வதில்லை. இதனால் விளைநிலங்களை கிடப்பில் போடுவதால் கால்நடைகளுக்கு கூட தீவனம் இல்லாமல் போய்விடுகின்றன. இதே நிலை நீடித்து வந்தால் உணவு பொருள் பற்றாக்குறை ஏற்படும் நிலை விரைவில் வரும். எனவே தமிழக அரசு உடனடியாக அனைத்து கண்மாய்களையும் பாதுகாத்து விவசாய பணிகளை செய்வதற்கு அனைத்து ஏற்பாடுகளையும் செய்ய வேண்டுமென பல விவசாயிகள் வருத்தத்துடன் தெரிவித்துள்ளனர்.

ராஜபாளையம் சட்டமன்ற உறுப்பினர் தனது மாத ஊதியத்திலிருந்து ரூ.5 லட்சம் நலத்திட்ட உதவி

ராஜபாளையம், ஆக. 20: ராஜபாளையம் திமுக சட்டமன்ற உறுப்பினர் தங்கப்பாண்டியன் தனது நான்கு மாத ஊதியத்திலிருந்து ரூ.5 லட்சம் மதிப்பில் நலத்திட்ட உதவிகளை வழங்கினார்.ராஜபாளையம் காமராஜர் திருமண மண்டபத்தில் நடந்த நிகழ்ச்சியில் 50 பயனாளிகளுக்கு இஸ்திரி பெட்டியும், 200 பயனாளிகளுக்கு முடிதிருத்தும் உபகரணங்களும் வழங்கப்பட்டது. இதனை விருதுநகர் தெற்கு மாவட்ட செயலாளர் கே.கே.எஸ்.எஸ்.ஆர்.ராமச்சந்திரனின் புதல்வர் ரமேஷ் கலந்து கொண்டு நலத்திட்ட உதவிகளை வழங்கினார். இவ்விழாவில்  மாவட்ட துணை செயலாளர் ராசா அருண்மொழி, ஒன்றிய செயலாளர் தங்கச்சாமி, மாவட்ட மகளிர் அணி அமைப்பாளர் சுமதி ராமமூர்த்தி, மாவட்ட மாணவர் அணி அமைப்பாளர் வேல்முருகன், பேரூர் செயலாளர் இளங்கோவன், சிங்கப்புலி அண்ணாவி மற்றும் வார்டு செயலாளர்கள், ஊராட்சி செயலாளர்கள் மாவட்ட அணிகளின் துணை அமைப்பாளர்கள், நகர, ஒன்றிய அணிகளின் அமைப்பாளர்கள், துணை அமைப்பாளர்கள், கழக நிர்வாகிகள் மற்றும் சலவை தொழிலாளர், முடி திருத்தும் தொழிலாளர் குடும்பத்துடன் கலந்து கொண்டனர்..

பட்டாசு தொழிலாளர்களுக்கு பாதுகாப்பு பயிற்சி வகுப்பு

சிவகாசி, ஆக. 20: தமிழக அரசின் தொழிலக பாதுகாப்பு மற்றும் சுகாதார இயக்கத்தால் பட்டாசு தொழிற்சாலைகளில் பணிபுரியும் போர்மேன்கள் மற்றும் சூப்பர்வைசர்களுக்கான 40வது தொகுதி ஒரு மாத கால இலவச பாதுகாப்பு பயிற்சி வகுப்பு சிவகாசி தொழிலக பாதுகாப்பு பயிற்சி மையத்தில் நடைபெறவுள்ளது. இப்பயிற்சி முகாமில் கலந்து கொள்ள விப்பமுள்ளவர்கள் செப்.4ம் தேதிக்குள் தங்கள் பெயர்களை பதிவு செய்துகொள்ள வேண்டும். பட்டாசு ஆலையில் பணிபுரியும் போர்மேன்கள், மேற்பார்வையாளர்கள் தரத்தில் ஒரு ஆலைக்கு குறைந்தது இரண்டு நபர்கள் வரை பயிற்சியில் கலந்துகொள்ள வேண்டும். இத்தகவலை தொழிலக பாதுகாப்பு மற்றும் சுகாதார பயிற்சி மைய இணை இயக்குனர் தெரிவித்துள்ளா்

புதிய கலையரங்கம் திறப்பு

திருச்சுழி, ஆக. 20: நரிக்குடி அருகே புதிய கலையரங்கத்தை தங்கம் தென்னரசு எம்எல்ஏ திறந்து வைத்தார்.விருதுநகர்  மாவட்டம் நரிக்குடி அருகே குருவியேந்தல் கிராமத்தில் திருச்சுழி சட்டமன்ற  தொகுதி மேம்பாட்டு நிதியில் ரூ.5.50 லட்சம் மதிப்பில் கலையரங்கம்  கட்டப்பட்டது. இக்கலையரங்கத்தை திமுக எம்எல்ஏ தங்கம் தென்னரசு திறந்து  வைத்தார். இதில் பொதுக்குழு உறுப்பினர்கள் செம்பொன்நெருஞ்சி  சந்திரன், கமலி பாரதி, மாவட்ட தொண்டரணி துணை அமைப்பாளர் செல்லப்பா, மீனவரணி துணை  அமைப்பாளர் பூமிநாதன், வடக்கு மாவட்ட வர்த்தக அணி துணை அமைப்பாளர் இசலி  ரமேஸ் உள்பட ஏராளமானோர் தொண்டர்கள் கலந்து கொண்டனர். கொட்டும் மழையை  பொருட்படுத்தாமல் கலையரங்கை திறந்து வைத்த எம்எல்ஏவை பொதுமக்கள்  பாராட்டினர்.

காரியாபட்டி பேரூராட்சி பகுதியில் 2 ஆயிரம் மரக்கன்று நடும் திட்டம் துவக்கம்

காரியாபட்டி, ஆக. 20: காரியாபட்டி பேரூராட்சி பகுதியில் 2 ஆயிரம் மரக்கன்று நடும் திட்டம் துவக்கப்பட்டது. விருதுநகர்  மாவட்டம், காரியாபட்டி பேரூராட்சியில் 2 ஆயிரம் மரக்கன்று நட  திட்டமிடப்பட்டது. இதன்படி இன்ஸ்பெக்டர் செல்வராஜ் முன்னிலை வகித்து  மரக்கன்று நட்டி துவக்கி வைத்தார். பேரூராட்சி செயல் அலுவலர் மோகன் கென்னடி  தலைமை வகித்தார். இதில் இளநிலை உதவியாளர் தங்கமணி, வரித்தண்டலர் பலராமன்,  கணினி ஆப்ரேட்டர் பெருமாள் மற்றும் சுகாதார பணியாளர்கள், துப்பரவு  தொழிலாளர்கள் கலந்து கொண்டனர். கண்மாய், ஊரணி மற்றும் சாலையோரங்களில்  மரக்கன்றுகள் நடப்பட்டன. வீடுகள் தோறும் மரக்கன்று வழங்கப்படும். நடவு  செய்யப்பட்ட மரங்களை பாதுகாக்க நடவடிக்கை மேற்கொள்ளப்படும். மேலும் மாநில  பேரிடர் நிவாரண நிதி திட்டம் மூலம் தரைமட்ட நீர்தேக்க தொட்டி செவல்பட்டி  மற்றும் கரிசல்குளம் கண்மாய் பகுதியில் அமைக்கப்படும் என செயல் அலுவலர்  மோகன் கென்னடி தெரிவித்தார்.

வத்திராயிருப்பு அருகே மழைவாழ் மக்களுக்கு மருத்துவ முகாம்

வத்திராயிருப்பு, ஆக. 20: வத்திராயிருப்பு அருகே நக்சல் சிறப்பு அலுவல் பிரிவு சார்பில் மலைவாழ் இன மக்களுக்கு சிறப்பு மருத்துவ முகாம் நடந்தது.வத்திராயிருப்பு பகுதியில் மேற்குத் தொடர்ச்சி மலை உள்ளது. இப்பகுதியில் மலைவாழ் இனத்தை சேர்ந்தவர்கள் தாணிப்பாறை ராம்நகரில் 75 குடும்பங்கள் வரை வசித்து வருகிறார்கள். நெடுங்குளம் வள்ளிம்மை நகரில் 10 குடும்பங்கள், கான்சாபுரம் ஆத்திக்கோயில் 15 குடும்பங்கள், பிளவக்கல் அணை பகுதியில் 20 குடும்பங்கள் வரை வசித்து வருகிறார்கள். மலைவாழ் இனத்தை சேர்ந்தவர்கள் மலையில் கடுக்காய் உள்ளிட்ட பொருட்களை சேகரிப்பதற்கு ஒரு மாதத்திற்கும் மேலாக மலையில் தங்கி சேகரித்து வந்து விற்பனை செய்வார்கள். மலைவாழ் இனத்தை சேர்ந்தவர்களை மாவேயிஸ்ட் மற்றும் நக்சல்கள் பயன்படுத்தி காலூன்றி விடக்கூடாது என்பதற்காகவும், அவர்களுக்கான சில அடிப்படை தேவைகளை நிவர்த்தி செய்வதற்கு நாக்சல் சிறப்பு அலுவல் சார்பில் மலைவாழ் மக்களுக்கு குன்னூர் வட்டார அலுவலக சார்பில் வட்டார மருத்துவ அலவலர் டாக்டர் ஜெயராமன், டாக்டர்கள் இந்திரா, வன்னியராஜ் உள்ளிட்டோர் சிகிச்சையளித்தனர். பின்னர் தாணிப்பாறை ராம்நகரில் கண் பரிசோதனையும் நடத்தப்பட்டது. இந்த முகாமை திருவில்லிபுத்தூர் டி.எஸ்.பி ராஜேந்திரன் தொடங்கி வைத்தார். நிகழ்ச்சிக்கான ஏற்பாடுகளை நக்சல் சிறப்பு அலுவல் பிரிவு எஸ்.ஐ செல்வகுமார் ஏற்பாடுகளை செய்து இருந்தார்.

தேவாங்கர் சமூகநல மாநாடு ஆலோசனை கூட்டம்

அருப்புக்கோட்டை, ஆக.20: தமிழ்நாடு அனைத்து தேவாங்கர் சமூகநல மாநாடு வருகிற செப்டம்பர் 21ம் தேதி கோவையில் நடக்கிறது. இதற்கான ஆலோசனை கூட்டம் அருப்புக்கோட்டையில் நடந்தது.  தேவாங்கர் குல ஜெகத்குரு, ஹம்பி கூட காயத்ரி பீடாதிபதி தயானந்தபுரி சுவாமிகள் தலைமை வகித்தார். ஐம்பதூர் பட்டத்து எஜமானவர் வேல்முருக கிருஷ்ணன் முன்னிலை வகித்தார். அருப்புக்கோட்டை தேவாங்கர் மகாஜனசபை தலைவர் முன்னாள் எம்எல்ஏ விஜயக்குமார் வரவேற்றார். தயானந்தபுரி சுவாமிகள் மாநாடு குறித்து விளக்கி பேசி ஆசி வழங்கினார்.  நிகழ்ச்சியில் தேவாங்கர் மகாஜன சபை செயலாளர் கார்த்திகேயன், பொருளாளர் வீரசுந்தரமணி, கல்வி கமிட்டித்தலைவர் முருகேசன், பொருளாதார கமிட்டி தலைவர் ஜெயராமன், உபதலைவர் முனீஸ்வரன், பள்ளிச் செயலாளர் கண்ணன், ஐம்பதூர் பட்டத்து நிர்வாக சபை தலைவர் சுப்பிரமணியன், செயலாளர்கள் சங்கரவேல், சங்கரராஜ், சுப்பையன், மற்றும் ஐம்பதூர் அம்பலகாரர்கள் மற்றும் உறவின்முறை நிர்வாகிகள் கலந்து கொண்டனர்.

அருப்புக்கோட்டையில் நடந்தது ராஜபாளையம் அருகே மண்வள அட்டை இயக்கம்

ராஜபாளையம், ஆக. 20: ராஜபாளையம் வட்டாரத்தில் மண்வள அட்டை இயக்கம் 2019-20ன் கீழ் மண்வள அட்டையை பயன்படுத்தி உரமிடுதல் திட்டத்தின் ஜமீன் கொல்லங்கொண்டான் மாதிரி கிராமம் தேர்வு செய்யப்பட்டு அனைத்து விவசாயிகளின் நிலத்திலும் ஜுன் 2019ல் மண் மாதிரி எடுக்கப்பட்டு மண் ஆய்வு செய்யப்பட்டது. மண் ஆய்வின் அடிப்படையில் ஒவ்வொரு விவசாயிகளுக்கும் மண்வள அட்டை தயார் செய்யப்பட்டது. ஜமீன் கொல்லங்கொண்டான் மாதிரி கிராமத்தில் நடந்த சிறப்பு பயிற்சியில் மண்வள அட்டையை பயன்படுத்தி உரமிடுதல் சம்பந்தமான பயிற்சி நடத்தப்பட்டது. இதில் விவசாயிகள் மற்றும் உர விற்பனையாளர்கள் கலந்து கொண்டனர். இப்பயிற்சிக்கு வேளாண்மை உதவி இயக்குநர் ராஜபாளையம் சுப்பையா தலைமை வகித்து உரையாற்றினார். வேளாண்மை உதவி இயக்குநர் தரக்கட்டுப்பாடு, (விருதுநகர்) மண்வள அட்டையை பயன்படுத்தி உரமிடுதல் பற்றி சிறப்புரையாற்றினர். வேளாண்மை அலுவலர் தனலட்சுமி பயிருக்குத் தேவையான சத்துக்கள் மற்றும் அதன் முக்கியத்துவம் பற்றி எடுத்துக் கூறினார். வேளாண்மை துணை இயக்குநர் விவசாயிகள் ஓய்வூதியத் திட்டம் மற்றும் நுண்ணீர் பாசணத் திட்டம் பற்றி எடுத்துக்கூறினார். இப்பயிற்சிக்கான ஏற்பாடுகளை உதவி வேளாண்மை அலுவலர்கள் ஜீவா மற்றும் சுரேஷ் செய்திருந்தனர்.

இறந்து கரை ஒதுங்கிய டால்பின்

தொண்டி, ஆக. 14:  தொண்டி கடல் பகுதியில் இறந்து உடல் அழுகிய நிலையில் சுமார் 500 எடை கொண்ட டால்பின் கடலில் மிதந்து வந்துள்ளது. இதுகுறிதது தகவல் அறிந்த வனத்துறை அலுவலர் சதீஷ் உத்தரவின் பெயரில் வனவர் சுதாகர் உள்ளிட்டோர் சென்று டால்பினை கைப்பற்றி மருத்துவ பரிசோதனை செய்து புதைத்தனர்.இதுகுறிதது வனத்துறையினர் கூறுகையில், இது ஓங்கி என்னும் டால்பின் வகையை சேர்ந்தது. 8 அடி நீளம் 5 அடி சுற்றளவு 500 கிலோ எடை உள்ளது. நடுக்கடலில் கப்பலில் மோதி வாய் பகுதியில் காயம் பட்டதால் 4 நான்கு நாட்களுக்கு முன்பு இறந்திருக்கலாம் என வனத்துறையினர் தெரிவித்தனர். உடன் டால்பினை மருத்துவ பரிசோதனை செய்து புதைத்தனர்.

பி.இ படித்த வாலிபர் மாயம்

விருதுநகர், ஆக.14: விருதுநுகர் அருகே எட்டுநாயக்கன்பட்டியை சேர்ந்தவர் ஜெயம். இவருக்கு இரு மகன்கள், ஒரு மகள் உள்ளனர். இளையமகன் இருளப்பன்(24) பிஇ சிவில் முடித்து சென்னையில் ஓராண்டு வேலை செய்துள்ளார். வேலை செய்த இடத்தில் விபத்தில் கால்முறிவு ஏற்பட்டு வீட்டில் இருந்துள்ளார். இந்நிலையில் இருளப்பனும் மனநிலை பாதிக்கப்பட்ட நிலையில், யாரிடமும் பேசமால் இருந்ததாக கூறப்படுகிறது. கடந்த ஆக.7ம் தேதி அதிகாலை 3 மணி வரை வீட்டில் இருந்த இருளப்பன் திடீரென வெளியே சென்றவர் வீடு திரும்பவில்லை. இது தொடர்பாக சூலக்கரை போலீசில் தாய் தனம் அளித்த புகாரில் போலீசார் இருளப்பனை தேடிவருகின்றனர்.

கலசலிங்கம் பல்கலையில் மாணவர்கள் கிளை துவக்க விழா

திருவில்லிபுத்தூர், ஆக. 14: திருவில்லிபுத்தூர் அருகே உள்ள கலசலிங்கம் பல்கலையில் கலசலிங்கம் ஸ்கூல் ஆஃப் பிசினஸ் சார்பில் தேசிய பணியாளர் மேலாண்மை நிறுவனம் மாணவர்கள் கிளை துவக்க விழா சிறப்பாக நடைபெற்றது. இந்த விழாவிற்கு பதிவாளர் வாசுதேவன் தலைமை வகித்தார். டீன் ரவீந்திரன் வரவேற்றார் தேசிய பணியாளர் மேலாண்மை நிறுவனத்தின் துணைத்தலைவர் ஆதிலட்சுமி லோகமூர்த்தி சிறப்பு விருந்தினராக கலந்து கொண்டார்.என்.ஐ.பி.எம் மாணவர் கிளையை துவக்கி வைத்து ஆதிலட்சுமி லோகமூர்த்தி பேசினார்.  கிளை துவக்க விழாவில் நெல்லை மதுரா கோட்ஸ் நிறுவனத்தைச் சேர்ந்த மேலாளர் முருகேசன் கலந்து கொண்டார். துவக்க விழாவில் கலந்து கொண்ட அனைவருக்கும் நன்றி தெரிவித்து துறைத்தலைவர் விஜி பேசினார். விழாவிற்கான ஏற்பாடுகளை பேராசிரியர்கள் ஐயம்பெருமாள், செல்வராணி மற்றும் மாணவர்கள் சிறப்பாக செய்திருந்தனர்.

வத்திராயிருப்பு பகுதியில் 10 நிமிடம் மட்டுமே பெய்த மழையால் விவசாயிகள் கவலை

வத்திராயிருப்பு, ஆக. 14: வத்திராயிருப்பில் 10 நிமிடம் மட்டுமே மழை பெய்ததால் விவசாயிகள் வேதனையடைந்துள்ளனர். தமிழகத்தில் நிலகிரி உள்ளிட்ட பல்வேறு மாவட்டங்களில் மழை பெய்து வெள்ளப்பெருக்கு ஏற்பட்டு அந்த பகுதிகளில் உள்ள ஆணைகள் நிரம்பி வருகின்றன. ஆனால் விருதுநகர் மாவட்டம், வத்திராயிருப்பு பகுதியில் மட்டும் மழை பெய்யாமல் காலம் தாழ்த்தி வருதோடு, கடந்த பத்து நாட்களாக வெயில் கெளுத்தி வருகிறது. இந்நிலையில் நேற்று மதியம் பலத்த மழை பெய்வது போன்று கடும் மேகங்கள் சூழ்ந்த நிலையிலும், மதியம் 12.30 மணியளவில் வத்திராயிருப்பு பகுதியில் மட்டும் சுமார்10 நிமிடம் மட்டுமே மழை பெய்து நின்றுவிட்டது. இந்த மழை பலத்த மழையாக பெய்யும் என்று எதிர்பார்த்திருந்த விவசாயிகளும், பொது மக்களுக்கும் மழை பெய்யாததால் ஏமாற்றமே மிஞ்சியது. ஆனால் வரும் நாட்களில் தொடர்ந்து மழை பெய்தால் மட்டுமே விவசாய பணிகளை தொடங்க முடியும் என்ற கவலையில விவசாயிகள் உள்ளனர்.

வேன் மோதி போலீஸ்காரர் காயம்

திருவில்லிபுத்தூர், ஆக. 14: திருவில்லிபுத்தூர் அருகே வேன் மோதியதில் போலீஸ்காரர் காயமடைந்தார். விருதுநகர் மாவட்டம், வத்திராயிருப்பு ஆயுதப்படை பிரிவில் போலீசாக பணியாற்றி வருபவர் செல்வக்குமார். இவர் நேற்றுமுன்தினம் மாலை டூவீலரில் ஆயுதப்படை முகாமிற்கு கூமாப்பட்டியில் இருந்து சென்றார். அப்போது ராஜபாளையத்தில் இருந்து அருப்புக்கோட்டை நோக்கி சென்ற வேன், டூவீலர் மீது மோதியது. இதில் படுகாயமடைந்த செல்வக்குமார் மதுரையிலுள்ள தனியார் மருத்துவமனையில் சிகிச்சைக்காக அனுமதிக்கப்பட்டுள்ளார்.இதுகுறித்து திருவில்லிபுத்தூர் நகர் போலீசார் வழக்குப்பதிவு செய்து விசாரிக்கின்றனர்.

திருச்சுழியில் உள்ள குண்டாற்றில் ஆடி தபசு திருவிழா ஏராளமான பக்தர்கள் பங்கேற்பு

திருச்சுழி, ஆக. 14: திருச்சுழியில் உள்ள குண்டாற்றில் ஆடி தபசு திருவிழாவை முன்னிட்டு ஆயிரக்கணக்கான பக்தர்கள் குவிந்தனர். திருச்சுழியில் ஆடி தபசு விழாவை முன்னிட்டு நேற்று மாலை குண்டாற்று படுகையில் திருமேனிநாதருக்கும், துணைமாலையம்மனுக்கும் மாலை மாற்றும் நிகழ்ச்சி கோலாகலமாக நடைபெற்றது. திருச்சுழியில் உள்ள ராமநாதபுரம் தேவஸ்தானம் சமஸ்தானம் பாத்தியப்பட்ட துணைமாலையம்மன் சமேத திருமேனிநாதர் திருக்கோவிலில் கடந்த 4ம் தேதி ஆடி தபசு விழா கொடியேற்றத்துடன் துவங்கியது. தபசு விழாவை முன்னிட்டு தினந்தோறும் அம்மன், கிளி, குதிரை, அன்னம், வெள்ளி ரிஷப வாகனம் உள்ளிட்ட பல்வேறு வாகனங்களில் அம்மன் அலங்காரத்துடன் வீதி உலா வந்து பக்தர்களுக்கு காட்சியளித்தார். இந்நிலையில் 10ம் நாள் நிகழ்ச்சியாக ஆயிரக்கணக்கான பக்தர்கள் முன்னிலையில் துணைமாலையம்மனுக்கும், திருமேனிநாதருக்கும் மாலை மாற்றும் நிகழ்ச்சி குண்டாற்று பகுதியில் நடைபெற்றது.  இது குறித்து திருச்சுழி பட்டர் கூறுகையில்: திருச்சுழிக்கு கிழக்கே தென்வடலாக ஓடும் குண்டாற்று படுகையில் சிவன் நாராயணன் பிள்ளை தபசு மண்டபத்தில் நேற்று முன்தினம் காலையில் துணைமாலையம்மன் தபசு கோலத்துடன் பக்தர்களுக்கு காட்சியளித்தார். துணைமாலையம்மன் தபசு மண்டபத்தில் திருமேனிநாதரை அடைவதற்காக தவம் மேற்கொள்வதாகவும், அன்று மாலை திருமேனிநாதர் ரிஷப வாகனத்தில் அம்மனுக்கு காட்சி தந்து ஏற்றுக்கொள்ளும் நிகழ்ச்சியும் நடைபெற்றது. இதனை தொடர்ந்து திருமேனிநாதர் ரிஷப வாகனத்தில் சென்று அம்மனை சாந்தம் செய்து குண்டாற்றில் திருமேனிநாதருக்கும், துணைமாலையம்மனுக்கும் மாலை மாற்றும் நிகழ்ச்சி நடைபெற்றது. மேலும் தீபாராதனை நடைபெற்ற பின்பு தபசு மண்டபத்தில் இருவருக்கும் அபிஷேக ஆராதனையும் நடைபெற்றது. அம்பாள் பூரண சந்தோசத்துடனும், பகவான் மனைநிறைவோடும் மக்களுக்கு அருள்பாலித்து, ஆடி தபசு காணவரும் பக்தர்கள் பிரச்சனை தீர்வதாகவும், திருமண தடை நீங்குவதாகவும், குழந்தை பாக்கியம் தடை நீங்குவதாகவும் பக்தர்கள் நம்பி வழிபடுகின்றனர். இறுதி நிகழ்ச்சியாக திருமேனிநாதர், துணைமாலையம்மன் வீதி உலா சென்று திருக்கோவிலை சென்றடைகின்றனர்.

கோர்ட்டில் சாட்சி சொன்னவருக்கு வெட்டு 2 பேருக்கு 7 ஆண்டு சிறை சிவகாசி கோர்ட் தீர்ப்பு

சிவகாசி,  ஆக. 14: கோர்ட்டில் சாட்சி சொன்னவரை அரிவாள் வெட்டிய 2 பேருக்கு 7  ஆண்டுகள் சிறை தண்டனை விதித்து சிவகாசி கோர்ட் நேற்று தீர்ப்பு வழங்கியது. சிவகாசி  அருகே கீழத்திருத்தங்கல் திருவள்ளுவர் காலனியை சேர்ந்தவர் வடிவு(40).  இவருக்கும் அதே பகுதியை சேர்ந்த குழந்தைராஜ்(52), ஜெயராஜ்(52)  ஆகியோருக்கும் நீண்ட நாட்களாக நிலப்பிரச்னை இருந்துள்ளது. இது தொடர்பாக  சிவகாசி சார்பு நீதிமன்றத்தில் வழக்கு நடைபெற்று வந்தது. இந்த வழக்கில்  வடிவுக்கு ஆதரவாக வடிவின் சகோதரர்  ஈசாக்(48) கோர்டில் சாட்சி  கூறியுள்ளார். இதனால் ஆத்திரமடைந்த குழந்தைராஜ், ஜெயராஜ் இருவரும் கடந்த  7.4.2012ம் ஆண்டு ஈசாக்கை அரிவாளால் வெட்டினர். இது குறித்து ஈசாக்  மனைவி செல்லத்தாய் கொடுத்த புகாரின் பேரில் குழந்தைராஜ், ஜெயராஜ் இருவர்  மீதும் சிவகாசி கிழக்கு போலீசார் வழக்குப்பதிவு செய்து கைது செய்தனர்.  சம்பவம் குறித்து சிவகாசி சார்பு நீதிமன்றத்தில் வழக்கு நடைபெற்று வந்தது.  அரசு வழக்கறிஞர் ஆனந்தகுமார் வாதாடினார். குற்றவாளிகள் குழந்தைராஜ்,  ஜெயராஜ் இருவருக்கும் தலா 7 ஆண்டுகள் சிறை தண்டனையும், 1 ஆயிரம் ரூபாய்  அபராதமும் விதித்து நீதிபதி பிலிப்நிக்கோலக் அலேக் தீர்ப்பு வழங்கினார்.

கல் குவாரிக்கு அனுமதி வழங்கினால் பல ஏக்கர் விவசாயம் பாழாகும் அபாயம் தடை விதிக்க விவசாயிகள் கலெக்டரிடம் மனு

விருதுநகர், ஆக. 14: விருதுநகர் அருகே எரிச்சநத்தத்தில் 25 ஏக்கரில் கல்குவாரி அமைக்க அனுமதி அளித்தால் நூற்றுக்காணக்கான ஏக்கரில் விவசாயம் பாதிக்கும் என்பதால் கல்குவாரிக்கான அனுமதியை ரத்து செய்ய வேண்டுமென விவசாயிகள் கலெக்டரிடம் மனு அளித்தனர்.தமிழ் விவசாயிகள் சங்க மாநில தலைவர் நாராயணசாமி தலைமையில் எரிச்சநத்தம் பகுதி விவசாயிகள் அளித்த மனுவில், எரிச்சநத்தம் கிராமத்தில் 6 சர்வே எண்களில் கல்குவாரி அமைக்க ஏற்பாடுகள் நடந்து வருகிறது. கல்குவாரி அமைத்தால் பல நூறு ஏக்கர் விளைநிலங்கள் முழுமையாக பாதிக்கப்படும். கல்குவாரியில் வைக்கப்படும் வெடியால் விவசாயிகளும், விவசாயமும் கடுமையாக பாதிக்கப்படும் வாய்ப்புகள் அதிகம் உள்ளது. கல்குவாரி அமைய உள்ள இடத்திற்கு அருகில் தனியார் பள்ளி, கோவில்கள் அமைந்துள்ளன. கல்குவாரிக்கான உரிமம் வழங்கக்கூடாது. மீறி கல்குவாரிக்கான அனுமதி வழங்கப்பட்டால் விவசாயிகள் போராட்டம் நடத்த வேண்டிய சூழல் உருவாக்கும் என தெரிவித்தனர்.

விருதுநகர்-சிவகாசி சாலையில் பிளாஸ்டிக் மறுசுழற்சி ஆலையால் விபத்து ஏற்படும் அபாயம்

விருதுநகர், ஆக. 14: விருதுநகரில் சாலையோரத்தில் நடத்தப்படும் கழிவு பிளாஸ்டிக்குகளை தூசியாக வெட்டும் ஆலை முன் குவிந்து கிடக்கும் தூசிகுப்பைகள் காற்றி பறந்து சாலையில் செல்வோர் மீது விழுவதால் விபத்து ஏற்படும் அபாயம் உருவாகி உள்ளது. விருதுநகரில் சிவகாசி ரோட்டில் தாமரை மகளிர் குழு நடத்தும் பிளாஸ்டிக் மறுசுழற்சி மையத்தில் ஊராட்சிகளில் சேரும் பிளாஸ்டிக் கழிவுகளை பிரித்து பொடி தூசியாக வெட்டும் ஆலை நடத்தப்படுகிறது. பிளாஸ்டிக கழிவுகளை இலவசமாக பெற்று தரம் பிரித்து தூசியாக வெட்டி கிலோ ரூ.35 விலையில் விற்பனை செய்கின்றனர். தார்ரோடுகள் அமைக்கும் போது பிளாஸ்டிக் தூசிகள் விலைபோகின்றன. தார் ரோடு போடுவதற்கான ஆர்டர்கள் வழங்கும் வரை பிளாஸ்டிக் மற்றம் பாலித்தின் பைகளை வெட்டி சிறு, சிறு தூசியாக மூட்டைகளில் குவித்து வைக்கின்றனர். மகளிர் குழுவினர் பிளாஸ்டிக் தூசிகளை சிவகாசி ரோட்டிலும், கூரைக்குண்டு ஊராட்சி ஆனைக்குழாய் தெருவிற்கு செல்லும் சாலையிலும் குவித்து வைத்துள்ளனர்.இந்த பிளாஸ்டிக் தூசி குவியலில் இருந்து தூசிகள் காற்று வீசும் மாலை நேரத்தில் சாலைகளில் பறக்கிறது. அருகில் உள்ள கடைகள், வீடுகளுக்குள் செல்கிறது. இதனால் குடியிருப்புவாசிகள் கடும் அவதிக்குள்ளாகி வருகின்றனர். பிளாஸ்டிக் மறுசுழற்சி மையத்தில் உரிய பாதுகாப்பு விதிமுறைகள் பின்பற்றப்படவில்லை. சாலையோரத்திலும் மக்கள் நடமாடும் பகுதியில் பிளாஸ்டிக் கழிவுகளை தூசியாக்கி கொட்டி வைத்துள்ளனர். கணேசன் கூறுகையில், பிளாஸ்டிக் கழிவு தூசிகள் காற்று வீசும் போது மக்கள் மீது விழுகிறது. மகளிர் குழுவினரிடம் தெரிவித்தால் கலெக்டரிடம் கூறுங்கள் என்கின்றனர். சுழற்சி மையத்தை சுற்றி முறையான தடுப்புகள் இருந்தால் காற்று வீசும் போது சாலையில் செல்லும்போது அவர்களது கண்களில் பிளாஸ்டிக் தூசி விழுவதால் விபத்துகள் ஏற்படும் அபாயம் உள்ளது. செல்வகுமார் கூறியதாவது: பிளாஸ்டிக் கழிவுகளில் இருந்து துர்நாற்றம் வீசுகிறது. கழிவுகள் காற்றில் பறப்பதால் வாகன ஓட்டிகள், கடையினர் பாதிக்கப்படுகின்றனர். சாலையோரத்தில் இருக்கும் கழிவு பிளாஸ்டிக் மறுசுழற்சி மையத்தை இடம் மாற்றம் செய்ய வேண்டும். தாமரை மகளிர் மன்ற நிர்வாகி காமாட்சி: ரோடு போட ஆர்டர்கள் வரும் வரை வைத்திருக்க வேண்டிய நிலை உள்ளது. முழுமையாக தார்பாய் போட்டு மூட முடியவில்லை என்றார். மகளிர் திட்ட அலுவலர் கிறிஸ்டோபர்: ரோடு போடுவதற்கான ஆர்டர் அளித்து வருகின்றனர். விரைவில் பிளாஸ்டிக் கழிவுகள் எடுக்கப்படும் என்றார்.