World - Dinakaran

தேர்தலில் முறைகேடு என குற்றச்சாட்டு: இந்தோனேசியாவில் வலுக்கும் போராட்டம்... 6 பேர் பலி

ஜகார்த்தா: இந்தோனேசியா தேர்தலில் முறைகேடு தொடர்பாக இருதரப்புக்கிடையே ஏற்பட்ட மோதலில் 6 பேர் உயிரிழந்தனர். மேலும் 200-க்கும் மேற்பட்டோர் படுகாயம் அடைந்தனர். உலகின் 3-வது பெரிய ஜனநாயக நாடான இந்தோனேசியா திகழ்ந்து வருகிறது. அந்நாட்டில் அதிபர், நாடாளுமன்ற உறுப்பினர்கள் மற்றும் உள்ளாட்சி பிரதிநிதிகளை தேர்வு செய்யும் 3 தேர்தல்களும் கடந்த மாதம் 17-ந் தேதி நடைபெற்றது. இந்த நிலையில், அதிபர் தேர்தலுக்கான அதிகாரப்பூர்வ இறுதி முடிவுகளை அந்நாட்டு தேர்தல் ஆணையம் கடந்த செவ்வாய்க்கிழமை அறிவித்தது. இதில் 55.5 சதவீத ஓட்டுகளை பெற்று தற்போதைய அதிபர் ஜோகோ விடோடோ மீண்டும் வெற்றி பெற்றதாக அறிவிக்கப்பட்டார். அவரை எதிர்த்துப் போட்டியிட்ட ஓய்வுபெற்ற ராணுவ அதிகாரி, ஜெனரல் பிரபாவோ சுபியாந்தோவிற்கு 44.5 விழுக்காடு வாக்குகளும் கிடைத்ததாக தேர்தல் ஆணையம் அறிவித்தது. இதனால் இந்த தேர்தலில் பெரும் முறைகேடுகள் நடைபெற்றதாக பிரபோவோ சுபின்யான்டோ குற்றச்சாட்டு எழுப்பியுள்ளார். அதன் காரணமாக அவர் தேர்தல் முடிவுகளை எதிர்த்து மேல்முறையீடு செய்யக்கூடும் என்றும் தெரிவித்தனர். இதனை தொடர்ந்து அவருடைய ஆதரவாளர்கள் போராட்டத்தில் ஈடுபட்டனர். தலைநகர் ஜகார்த்தா உள்பட பல்வேறு நகரங்களில் ஆயிரக்கணக்கானோர் போராட்டம் நடத்தினர். முதலில் அமைதியாக நடைபெற்ற இந்த போராட்டத்தில் திடீர் வன்முறை வெடித்தது. அதனை தொடர்ந்து, போலீசார் தடியடி நடத்தியும், கண்ணீர் புகைகுண்டுகளை வீசியும் போராட்டக்காரர்களை விரட்டி விரட்டியடித்தனர். இந்த மோதலில் 6 பேர் கொல்லப்பட்டனர். 200-க்கும் மேற்பட்டோர் படுகாயம் அடைந்துள்ளனர்.

மோடிக்கு அமெரிக்க துணை ஜனாதிபதி மைக் மற்றும் குவைத் எமிர் ஷேக் வாழ்த்து

வாஷிங்டன்:  நாடாளுமன்ற தேர்தலில் வெற்றி பெற்ற பிரதமர் மோடிக்கு, அமெரிக்க துணை ஜனாதிபதி மைக் வாழ்த்து தெரிவித்துள்ளார். நாடாளுமன்ற தேர்தலில் பா.ஜ.க. தலைமையிலான தேசிய ஜனநாயக கூட்டணி 350-க்கு மேற்பட்ட இடங்களில் வெற்றி பெற்றுள்ளது. பிரதமர் நரேந்திர மோடி இரண்டாவது முறையாக மீண்டும் பிரதமராக பதவியேற்க உள்ளார்.மேலும் பாராளுமன்ற தேர்தலில் பிரதமர் மோடி வெற்றி பெற்றதற்கு குவைத் எமிர் ஷேக் சபா அல்-அஹ்மத் அல் ஜாபர் அல் சபா,குவைத் இளவரசர் ஷேக் நவாஃப் அல் அஹ்மத் அல் ஜாபர் அல் சபா மற்றும் குவைத் பிரதமர் ஷேக் ஜபீர் அல் முபாரக் அல் ஹாமாத் அல் சபா ஆகியோர் வாழ்த்து தெரிவித்தனர். இந்நிலையில் நாளை மத்திய அமைச்சரவை கூட்டம் நடைபெற உள்ளது. இக்கூட்டத்திற்குப் பிறகு, பிரதமர் பதவியை மோடி ராஜினாமா செய்ய உள்ளார்.  26-ம் தேதி ஜனாதிபதி ராம்நாத் கோவிந்தை சந்தித்து ராஜினாமா கடிதம் கொடுப்பார் என தெரிகிறது. அதன்பின்னர் பாஜக தலைமையில் புதிய அரசு அமைக்க உரிமை கோருகிறார். மோடி மீண்டும் பிரதமராக பதவியேற்க உள்ளார். பதவி ஏற்பு விழா அடுத்த வாரம் நடைபெறும் என்று எதிர்பார்க்கப்படுகிறது.

மோடிக்கு கனடா நாட்டு பிரதமர் ஜஸ்டின் ட்ரூடோ வாழ்த்து

ஒட்டாவா: தொடர்ந்து 2-வது முறையாக பிரதமராக உள்ள நரேந்திர மோடிக்கு கனடா நாட்டு பிரதமர் ஜஸ்டின் ட்ரூடோ வாழ்த்து தெரிவித்துள்ளார். இருநாட்டு உறவுகளை மேம்படுத்த மோடியுடன் இணைந்து பணியாற்ற ஆவலாக உள்ளதாக அவர் கூறியுள்ளார்.

அபார வெற்றி பெற்ற மோடிக்கு அமெரிக்க துணை ஜனாதிபதி மைக் வாழ்த்து

வாஷிங்டன்:  நாடாளுமன்ற தேர்தலில் வெற்றி பெற்ற பிரதமர் மோடிக்கு, அமெரிக்க துணை ஜனாதிபதி மைக் வாழ்த்து தெரிவித்துள்ளார். நாடாளுமன்ற தேர்தலில் பா.ஜ.க. தலைமையிலான தேசிய ஜனநாயக கூட்டணி 350-க்கு மேற்பட்ட இடங்களில் வெற்றி பெற்றுள்ளது. பிரதமர் நரேந்திர மோடி இரண்டாவது முறையாக மீண்டும் பிரதமராக பதவியேற்க உள்ளார்.

பிரதமர் நரேந்திர மோடிக்கு, அமெரிக்க அதிபர் ட்ரம்ப் வாழ்த்து

வாசிங்டன்: பிரதமர் நரேந்திர மோடிக்கு, அமெரிக்க அதிபர் ட்ரம்ப் வாழ்த்து தெரிவித்துள்ளார். மக்களவை தேர்தலில் மிகப்பெரிய வெற்றி பெற்ற பாஜக, பிரதமர் மோடிக்கு அமெரிக்க அதிபர் ட்ரம்ப் வாழ்த்துகள் தெரிவித்துள்ளார்.

பிரதமர் மோடிக்கு, அபுதாபி இளவரசர் வாழ்த்து

அபுதாபி: பிரதமர் மோடிக்கு, அபுதாபி பட்டத்து இளவரசர் ஷேக் முகமது-பின்-சையது அல் நஹ்யான் வாழ்த்து தெரிவித்துள்ளார். 2 வது முறையாக பிரதமர் பதவி ஏற்க உள்ள பிரதமர் மோடிக்கு ஷேக் முகமது-பின்-சையது அல் நஹ்யான் வாழ்த்து தெரிவித்துள்ளார். மக்களவை தேர்தல் மற்றும் இடைத்தேர்தலில் பதிவான வாக்குகளை எண்ணும் பணி தொடங்கி நடைபெற்று வருகிறது. நாடு முழுவதும் 542 மக்களவை தொகுதிகளுக்கு 7 கட்டமாக தேர்தல் நடைபெற்றது.

பிரதமர் மோடிக்கு நேபாள பிரதமர் கே.பீ ஷர்மா ஓலி வாழ்த்து

காத்மாண்டு: நேபாள பிரதமர் கே.பீ ஷர்மா ஓலி இந்திய பிரதமர் நரேந்திர மோடிக்கு வாழ்த்து தெரிவித்துள்ளார். 2 வது முறையாக பிரதமர் பதவி ஏற்க இருக்கும் பிரதமர் மோடிக்கு  அவர் வாழ்த்து தெரிவித்துள்ளார். மக்களவை தேர்தல் மற்றும் இடைத்தேர்தலில் பதிவான வாக்குகளை எண்ணும் பணி தொடங்கி நடைபெற்று வருகிறது. நாடு முழுவதும் 542 மக்களவை தொகுதிகளுக்கு 7 கட்டமாக தேர்தல் நடைபெற்றது.

பிரதமர் மோடிக்கு ஆப்கானிஸ்தான் ஜனாதிபதி அஷ்ரப் கானி வாழ்த்து

காபுல்: பிரதமர் மோடிக்கு  ஆப்கானிஸ்தான் ஜனாதிபதி அஷ்ரப் கானி வாழ்த்து தெரிவித்துள்ளார். இந்திய மக்களிடமிருந்து ஒரு வலுவான அதிகாரம் என்றும் அவர் தெரிவித்துள்ளார். மேலும் இரு ஜனநாயக நாடுகளுக்கும் இடையேயான ஒத்துழைப்பை விரிவாக்குவதற்கான அரசாங்கம் என்றும் அவர் ட்விட்டர் பக்கத்தில் பதிவு செய்துள்ளார்.

கண்டம் விட்டு கண்டம் பாயும் ஷஹீன் -2 ஏவுகணையை வெற்றிகரமாக சோதனை செய்தது பாகிஸ்தான்

இஸ்லாமாபாத்: பாகிஸ்தான் ராணுவம் கண்டம் விட்டு கண்டம் பாயும் ஷஹீன் -2 ஏவுகணையை வெற்றிகரமாக விண்ணில் செலுத்தி சோதனை செய்தது. அணு ஆயுதங்களை ஏந்தி செல்லும் இந்த ஏவுகணை 1,500 கி.மீட்டர் தொலைவுக்கு அப்பால் உள்ள இலக்கை குறி வைத்து தாக்க கூடிய வல்லமை படைத்தது. பாகிஸ்தானின் ISPR அமைப்பின் படி , ஷஹீன் -2 ஏவுகணை பாகிஸ்தானின் மூலோபாய அமைப்பை பாதிக்கப்பதற்கும்,நாட்டின் பாதுகாப்பிற்கும் உருவாக்கப்பட்டது. ஏற்கனவே, கடந்த 2008ம் ஆண்டு இந்த ஷஹீன்-2 ரக ஏவுகணையை ஏவி பாகிஸ்தான் சோதனை செய்தது குறிப்பிடத்தக்கது.அதே சமயத்தில் ஹதீப்- 6 என்ற ஏவுகணையையும் சோதனை செய்தது. அந்த இரு ஏவுகணைகளின் சோதனை ஓட்டம் வெற்றி அடைந்ததையொட்டி அப்போதைய பாகிஸ்தான் அதிபர் பர்வேஸ் முஷாரப், ஏவுகணை தயாரிப்பு குழுவினருக்கு பாராட்டுகளை தெரிவித்திருந்தார். இந்த ஏவுகணைகளை, பாகிஸ்தான் விஞ்ஞானிகள், ரகசிய இடம் ஒன்றில் சோதித்துப் பார்த்துள்ளனர். இதையடுத்து இன்று ஷஹீன் -2 ஏவுகணையை மீண்டும் சோதனை செய்தது. அரபிக் கடல் பகுதியில் இந்த ஏவுகணையை ஏவி சோதனை நடத்தியது. டைரக்டர் ஜெனரல் மூலோபாய திட்டமிடல் பிரிவு, தளபதி இராணுவ மூலோபாய படைகள் கட்டளை, NESCOM தலைவர், இராணுவ மூலோபாயப் படைகளின் மூத்த அதிகாரிகள், மூலோபாய அமைப்புகளின் விஞ்ஞானிகள் மற்றும் பொறியியலாளர்கள் ஆகியோர் முன்னிலையில் இந்த ஏவுகணை சோதனை நடத்தப்பட்டது. ஷஹீன் -2 ஏவுகணையின் சோதனை ஓட்டம் வெற்றியை தொடர்ந்து அந்நாட்டு ஜனாதிபதி மற்றும் பிரதம மந்திரி ஆகியோர் தங்களது வாழ்த்துக்களை தெரிவித்துள்ளனர். அதேபோல அந்நாட்டு ஜெ.சி.எஸ்.சி அமைப்பின் தலைவர் மற்றும் மூத்த அதிகாரிகள் பாகிஸ்தான் விஞ்ஞானிகளுக்கு பாராட்டுகளை தெரிவித்துள்ளனர்.

பிரதமர் நரேந்திர மோடிக்கு இலங்கை பிரதமர் ரணில் விக்ரமசிங்கே வாழ்த்து

கொழும்பு: பிரதமர் நரேந்திர மோடிக்கு இலங்கை பிரதமர் ரணில் விக்ரமசிங்கே வாழ்த்து தெரிவித்துள்ளார். இந்தியாவுடன் இணைந்து பணியாற்றுவோம் என ரணில் விக்ரமசிங்கே வாழ்த்துச் செய்தியில் தகவல் தெரிவித்துள்ளார்.

சீனாவிலும் சரிவை சந்தித்துள்ள டாடா நிறுவன கார்களின் விற்பனை

பெய்ஜிங்: டாடா மோட்டார்ஸ் நிறுவனத்தின் கடன் சுமை 97,593 கோடி ரூபாயை எட்டியுள்ள நிலையில் சீனாவில் ஜாகுவார் கார்களின் விற்பனையும் சரிவை சந்தித்துள்ளதால், நெருக்கடியை ஏற்படுத்தி இருக்கிறது. இந்தியாவின் டாடா மோட்டார்ஸ் நிறுவனம் கடந்த 2008ம் ஆண்டு பிரிட்டனை சேர்ந்த சொகுசு கார் தயாரிப்பு  நிறுவனத்தை வாங்கி ஜாகுவா மற்றும் லேண்ட்ரோவர் ரக கார்களை தயாரித்து விற்பனை செய்து வருகின்றது.இந்நிலையில் கடந்த மூன்று காலாண்டுகளாக டாடா நிறுவனம் தொடர்ந்து நஷ்டத்தை சந்தித்து வருகின்றது. இதனால் சொகுசு கார் உற்பத்தி செய்யும் அலகுகளில், தேக்கநிலை ஏற்பட்டு சீனாவில் அந்நிறுவன கார்களின் விற்பனை குறைந்துள்ளது. கடந்த வாரம் 1052 கோடி ரூபாய் அளவுக்கு மொத்த வருமானம் ஈட்டப்பட்டுள்ளதாக ஜாகுவார் அலகில் தெரிவிக்கப்பட்டிருந்தாலும் டாடா மோட்டார்ஸின் கடன் சுமை 97,593 கோடி ரூபாயை எட்டியுள்ளது . உப்பு முதல் மின்பொருள் வரையிலான,தனது பரந்து விரிந்த சாம்ராஜ்யத்தை  மறுசீரமைக்கும் முயற்சியில் டாடா நிறுவனம் கடன் சுமைக்கு ஆளாகியுள்ளது.

ஜேஎப்-17 பாகிஸ்தானுக்கு தந்தது சீனா

பீஜிங்:  சீனாவும் பாகிஸ்தானும் இணைந்து ஒற்றை இன்ஜின் கொண்ட ஜேஎப் -17 ரக ேபார் விமானங்களை தயாரித்தன. 2007ல் இந்த விமானங்களை பாகிஸ்தான் விமானப்படைக்கு சீனா வழங்கியது. கடந்த 10 ஆண்டுகளாக பயன்படுத்திய  நிலையில், இந்த விமானத்தை மேம்படுத்துவது தொடர்பாக இரு நாடுகள் இடையே கடந்த 2016ம் ஒப்பந்தம் செய்யப்பட்டது. இதன்படி, ஜேஎப் 17 ரக போர் விமானங்களை புதுப்பிக்கும் பணியை கடந்தாண்டு நவம்பரில் சீனா தொடங்கியது. இந்நிலையில், மேம்படுத்தப்பட்ட முதல் ஜேஎப்- 17 போர் விமானத்தை பாகிஸ்தான் விமானப்படைக்கு சீனா நேற்று வழங்கியது. பழைய பாகங்கள் மாற்றப்பட்டு, தற்போதைய போர் சூழலுக்கு ஏற்ப மாற்றி அமைக்கப்பட்டுள்ள இந்த போர்  விமானம், பாகிஸ்தான் விமானப்படைக்கு புதிய பலத்தை அளிக்கும் என கூறப்படுகிறது.

லண்டனில் தொடங்கிய மலர் கண்காட்சி.... இங்கிலாந்து ராணி இரண்டாம் எலிசபெத் பார்வையிட்டார்

லண்டன்: லண்டனில் தொடங்கிய மலர் கண்காட்சியை இங்கிலாந்து ராணி இரண்டாம் எலிசபெத் பார்வையிட்டார். வசந்த கால மலர் கண்காட்சி எனப்படும், செல்சி மலர் கண்காட்சியானது ஆண்டுதோறும், மே மாதம் நடைபெறும். இந்த மலர் கண்காட்சியை பார்வையாளர்கள் கண்டு ரசித்து வருகின்றனர். செல்சி மலர் கண்காட்சியில் விதவிதமாக அலங்காரம் செய்து வைக்கப்பட்டு உள்ள மலர்களை மக்கள் கண்டு ரசிப்பர். செல்சி மலர் கண்காட்சி பொதுமக்கள் பார்வைக்காக நேற்று திறக்கப்பட்டது. இதற்கு முன்னதாக நேற்று அங்கு சென்ற ராணி, தோட்ட பராமரிப்பாளர்களை சந்தித்து பாராட்டு தெரிவித்தார். அத்துடன், பல்வேறு வகையான மலர்கள் மற்றும் மரத்தினால் செய்யப்பட்ட கலைநயமிக்க பொருட்களை கண்டு ரசித்தார். அப்போது மலர்களின் தனித்துவம் குறித்து ஊழியர்கள் தெரிவித்தனர். மேலும், இளவரசர் வில்லியம் மற்றும் அவரின் மனைவி கேத் மிடில்டனும் உடன் சென்றனர். முன்னதாக, அங்குள்ள விளையாட்டு உபகரணங்களில் அவர்களின் குழந்தைகள் விளையாடி மகிழ்ந்தனர்.இதை தொடர்ந்து, தோட்டக்கலை நிபுணர்களுடன் இணைந்து கேத் உருவாக்கிய பூங்காவையும் அரசு குடும்பத்தினர் பார்வையிட்டனர்.

அமெரிக்காவில் ஸ்டீல் நிறுவனம் ஒன்றின் 21 மாடி கட்டிடம் 16 நொடிகளில் தகர்ப்பு

வாஷிங்டன்: அமெரிக்காவில் ஸ்டீல் நிறுவனம் ஒன்றின் 21 மாடி கட்டிடம் ஒன்று 16 நொடிகளில் தகர்க்கப்பட்டது. அமெரிக்காவின் 2வது பெரிய ஸ்டீல் உற்பத்தி நிறுவனமாக திகழ்ந்த பெத்லகேம் நிறுவனம் பென்சில்வேனியாவில் உள்ள 21 மாடி மார்ட்டின் டவரை தலைமையகமாக கொண்டு இயங்கி வந்தது. இந்த நிறுவனம் கடந்த 1972ம் ஆண்டு நிறுவப்பட்டது. அதன்பின்னர் தொழிலில் ஏற்பட்ட நஷ்டம் காரணமாக அந்த கட்டிடம் 16,000 டன் ஸ்டீல் மூலப்பொருட்களுடன் கடந்த 12 ஆண்டுகளாக பயன்பாடற்று இருந்தது. இந்தநிலையில் பழமைவாய்ந்த இந்த கட்டிடத்தை இடிக்க அதன் உரிமையாளர் முடிவுசெய்தார். அதன்படி கட்டிடங்களை தகர்க்கும் நிபுணர் குழு, வெடி வைத்து 21 மாடி கட்டிடத்தை 16 நொடிகளில் தகர்த்தினர். இதன் சத்தம், அதனைச் சுற்றி பல கிலோமீட்டர் தூரத்துக்கு கேட்டது. இதனை கண்டு அப்பகுதி மக்கள் அதிர்ச்சியடைந்தனர். மேலும் சிலர் கட்டிடம் நொறுங்குவதை தங்கள் செல்போன்களில் வீடியோ பதிவு செய்துள்ளனர். இந்த கட்டிடம் நொறுங்கிய வீடியோ காட்சியினை அந்நாட்டு ஊடகங்கள் வெளியிட்டுள்ளது. இதனை சமூக வலைத்தளங்களில் பார்ப்பவர்களும் அதிர்ச்சியுடன் பகிர்ந்து வருகின்றனர்.

இலங்கையில் பதற்றம்...... இரு தரப்பினர் இடையே மோதல்: ஒருவர் பலி

கொழும்பு: இலங்கை தலைநகர் கொழும்பில் உள்ள கிரான்ட்பாஸ் பகுதியில் இரு தரப்பினர் இடையே ஏற்பட்ட மோதலில் ஒருவர் உயிரிழந்துள்ளார். நேற்றிரவு நடைபெற்ற தாக்குதலில் மேலும் மூவர் காயமடைந்தனர்.  காயமடைந்தவர்கள் அருகில் உள்ள மருத்துவமனையில் அனுமதிக்கப்பட்டுள்ளனர். கிரான்ட்பாஸ், வெஹெரகொடல்லே, கம்பித்தொட்டு பகுதியில் நேற்றிரவு இருதரப்பினர் இடையே மோதல் ஏற்பட்டது. இதில்  46 வயதான இந்திரஜித் சுகத் என்பவர் உயிரிழந்ததாக போலீசார் தெரிவித்துள்ளனர். இந்த தாக்குதலில் தொடர்புடைய நபர்களை கைது செய்வதற்கான நடவடிக்கைகளை போலீசார் மேற்கொண்டு வருகின்றனர். இலங்கையில் ஈஸ்டர் தினத்தன்று நடத்தப்பட்ட தீவிரவாத தாக்குதலில் 250க்கும் மேற்பட்டோர் உயிரிழந்தனர். இதனையடுத்து கடந்த சில தினங்களாக மசூதிகள், இஸ்லாமியர்கள் மீது தாக்குதல் நடத்தப்பட்டு வருகிறது. இதனால் இலங்கையில் பாதுகாப்பு பலப்படுத்தப்பட்டுள்ளது.

தலீபான், ஐ.எஸ். பயங்கரவாதிகள் மீது ஆப்கானிஸ்தான் ராணுவம் அதிரடி தாக்குதல்: 25 தீவிரவாதிகள் சுட்டுக்கொலை

காபூல்: ஆப்கானிஸ்தானில் தலீபான், ஐ.எஸ். பயங்கரவாதிகளுக்கு எதிராக ராணுவம் நடத்திய அதிரடி தாக்குதலில் 25 பயங்கரவாதிகள் சுட்டுக் கொல்லப்பட்டனர். ஆப்கானிஸ்தானின் குண்டூஸ் மாகாணத்தின் கான் அபாத் மற்றும் அதையொட்டிய அக்டாஷ் மாவட்டங்களில் பதுங்கி இருந்த தலீபான் பயங்கரவாதிகளை இலக்காகக் கொண்டு ராணுவம் நேற்று அதிரடி தாக்குதல்களை நடத்தியது. இதில் 12 பயங்கரவாதிகள் கொல்லப்பட்டனர். 12-க்கும் மேற்பட்ட பயங்கரவாதிகள் படுகாயம் அடைந்தனர். இந்த தாக்குதலில் ராணுவ தரப்பில் எந்த ஒரு சேதமும் இல்லை என தகவல்கள் கூறுகின்றன. இதேபோல் நங்கர்ஹார் மாகாணத்தின் சபார்ஹர் மாவட்டத்தின் மலைப்பகுதியில் ஐ.எஸ். பயங்கரவாதிகள் பதுங்கி இருப்பதாக கிடைத்த தகவலை அடுத்து அங்கு ராணுவம் சுற்றிவளைத்து தாக்குதல் நடத்தியது. இதில் 4 பயங்கரவாதிகள் சுட்டு கொல்லப்பட்டனர். ஆப்கானிஸ்தானில் ஒரே நேரத்தில் தலீபான் மற்றும் ஐ.எஸ். பயங்கரவாதிகளுக்கு எதிராக அந்நாட்டு ராணுவம் அதிரடி நடவடிக்கை எடுத்திருப்பது பெரும் பரபரப்பை ஏற்படுத்தி உள்ளது. இதனால் அங்கு பதற்றம் நிலவுகிறது.

அந்தமான் நிகோபார் தீவுகளில் மிதமான நிலநடுக்கம்: ரிக்டர் அளவில் 5.8 ஆக பதிவு

அந்தமான்: அந்தமான் நிகோபார் தீவுகளில் லேசான நிலநடுக்கம் உணரப்பட்டது. ரிக்டர் அளவுகோலில் 5.8 ஆக பதிவாகியுள்ளது என இந்திய வானிலை ஆய்வு மையம் தெரிவித்துள்ளது. இன்று காலை சரியாக 6.09 மணி அளவில் இந்த நிலநடுக்கம் உணரப்பட்டுள்ளது. இந்த நிலநடுக்கத்தின் ஆழம் 10 கிலோ மீட்டராக இருந்தது என தகவல் வெளியாகியுள்ளது. இந்த நிலநடுக்கத்தால் ஏற்பட்ட சேத விவரங்கள் குறித்து எந்த தகவலும் இல்லை. இருப்பினும் நிலநடுக்கத்தால் குடியிருப்புகள், கட்டிடங்களில் அதிர்வு ஏற்பட்டதால் மக்கள் பீதியடைந்தனர். இந்த நிலநடுக்கம் காரணமாக எந்தவித சுனாமி எச்சரிக்கையும் விடுக்கப்படவில்லை. இதேபோல நேற்று நள்ளிரவு அந்தமானில் மிதமான நிலநடுக்கம் உணரப்பட்டது. இந்த நிலநடுக்கம் ரிக்டர் அளவில் 5.6 ஆக பதிவாகியுள்ளது. நள்ளிரவு 12.39 மணிக்கு ஏற்பட்ட நிலநடுக்கத்தால் அங்குள்ள கட்டிடங்கள் லேசாக அதிர்ந்தன. இதையடுத்து காலையில் 6.09 மணி அளவில் மீண்டும் நிலநடுக்கம் உணரப்பட்டுள்ளது. இதேபோல அந்தமான் நிக்கோபார் தீவுகளில் கடந்த மே 17ம் தேதி நள்ளிரவு 12.35 மணிக்கு நிலநடுக்கம் ஏற்பட்டது. இது ரிக்டர் அளவுகோலில் 4.9 ஆக பதிவானது. பூமிக்கு அடியில் 10 கிலோமீட்டர் ஆழத்திலும் இந்த நிலநடுக்கம் ஏற்பட்டதாக தெரிவிக்கப்பட்டிருந்தாதது. இந்த நிலநடுக்கத்தால் எந்த வித பாதிப்பும் ஏற்படவில்லை. அந்தமான் நிகோபார் தீவுகள் நிலநடுக்கம் அதிகம் ஏற்படும் இடத்தில் அமைத்துள்ளது. இதனால், ஒரு நாளைக்கு 2க்கும் மேற்பட்ட பூகம்பங்கள் ஏற்படுவது அசாதாரணமான விஷயம் ஒன்றும் இல்லை. கடந்த ஏப்ரல் மாதம் 1ம் தேதியில் மட்டும் அந்தமான் நிகோபார் தீவுகளில் 20 முறை லேசான நில அதிர்வுகள் ஏற்பட்டுள்ளது குறிப்பிடத்தக்கது.

ஐரோப்பிய ஒன்றியத்தில் இருந்து வெளியேறும் ஒப்பந்தத்தில் ஒருபகுதியாக பிரிட்டன் பிரதமர் தெரசா மே மீண்டும் வரைவு மசோதா தாக்கல்

லண்டன்: பிரெக்ஸிட் எனப்படும் ஐரோப்பிய ஒன்றியத்தில் இருந்து வெளியேறும் ஒப்பந்தத்தில் ஒரு பகுதியாக பிரதமர் தெரசா மே மீண்டும் ஒரு வரைவு மசோதாவை தாக்கல் செய்துள்ளார். 2016-ம் ஆண்டு நடத்தப்பட்ட பொது வாக்கெடுப்பில் ஐரோப்பிய ஒன்றியத்தில் இருந்து  பிரிட்டன் வெளியேற அந்த நாட்டு மக்கள் வாக்களித்தனர். பிரிட்டன் வெளியேற நான்கு  ஆண்டு கால அவகாசம் கொடுக்கப்பட்டிருந்தது. கடந்த மார்ச் 29-ம் தேதியுடன் இந்த கால அவகாசம் முடிவுக்கு வந்தது. ஆனால் அதற்கான பிரெக்ஸிட் ஒப்பந்த வரைவு மசோதாவை மூன்று முறை தொடர்ந்து அந்நாட்டு நாடாளுமன்ற உறுப்பினர்கள் தோற்கடித்துவிட்டனர். தற்போது 4 வது முறையாக வரைவு மசோதாவை தெரசா மே தாக்கல் செய்துள்ளார். இந்த முறை கன்சர்வேடிவ் மற்றும் தொழிலாளர் கட்சி எம்பிகள் ஆதரவளிக்க வேண்டும் என்று தெரசா மே கேட்டுக்கொண்டுள்ளார். ஆனால் எதிர்க்கட்சி தலைவர் ஜெர்மி கார்பின் அதனை ஏற்க மறுத்துவிட்டார். பிரிட்டனின்  எதிர்க்கால நலனை பாதுகாக்கும் வகையில் ஐரோப்பிய யூனியனுடன் ஒரு நிரந்த ஒப்பந்தத்துடன் வெளியேற வேண்டும் என்பது பெரும்பாலன எம்பி-க்களின் கோரிக்கையாகும். இந்த நிலையில் ஏப்ரல் 12-ம் தேதி வரை நீட்டிக்கப்பட்ட கால அவகாசமும் முடிவடைந்துவிட்டதால் மீண்டும் கால அவகாசம் கேட்க தேரசா மே முடிவு செய்துள்ளார்.

இலங்கையில் குண்டுவெடிப்பு சம்பவங்கள் நடைபெற்று ஒரு மாதத்திற்கு பிறகு கத்தோலிக்க பள்ளிகள் திறப்பு

இலங்கை: இலங்கையில் குண்டுவெடிப்பு சம்பவங்கள் நடைபெற்று ஒரு மாதமாகும் நிலையில் அந்நாட்டில் கத்தோலிக்க பள்ளிகள் திறக்கப்பட்டுள்ளன. இலங்கையில் கடந்த மாதம் ஈஸ்டர் தினத்தின் போது தேவாலயங்கள் மற்றும் ஓட்டல்களில் நடந்த குண்டுவெடிப்பு சம்பவங்களில் 250-க்கும் மேற்பட்டோர் பலியாகினர். இதனையடுத்து அந்த நாட்டில் பலத்த பாதுகாப்பு போடப்பட்டது. பின்னர் அந்த நாட்டில் பள்ளிகள் திறக்கப்பட்ட போது பாதுகாப்பு காரணமாக கத்தோலிக்க பள்ளிகளின் திறப்பு தள்ளிவைக்கப்பட்டது. இந்நிலையில் குண்டுவெடிப்பு சம்பவங்கள் நடைபெற்று ஒரு மாதம் ஆகும் நிலையில் அங்கு கத்தோலிக்க பள்ளிகள் திறக்கப்பட்டுள்ளன. புத்தக பைகள் சோதனை செய்யப்பட்ட பிறகு மாணவர்கள் பள்ளிகளுக்குள் அனுமதிக்கப்பட்டனர்.

நியூசிலாந்து நாட்டில் முதல் முறையாக தீவிரவாத தடுப்பு சட்டத்தின் கீழ் வழக்கு

நியூசிலாந்த்: நியூசிலாந்து நாட்டில் முதல் முறையாக தீவிரவாத தடுப்பு சட்டத்தின் கீழ் வழக்கு தொடரப்பட்டுள்ளது. நியூசிலாந்தின் கிரிஸ்ட்சேர்ச் பகுதியில் உள்ள இரண்டு மசூதிகளில் கடந்த மார்ச் மாதம் நடந்த துப்பாக்கிச்சூடு தாக்குதலில் 51 பேர் உயிரிழந்தனர். இந்த சம்பவத்தில் துப்பாக்கிச்சூடு தாக்குதல் நடத்திய நபர் கைது செய்யப்பட்ட நிலையில், 51 பேரை கொலை செய்தது, 40 பேரை கொலை செய்ய முயன்றதாகவும், தீவிர வாத செயலில் ஈடுப்பட்டதாகவும் வழக்குகள் பதிவு செய்யப்பட்டுள்ளன.நியூசிலாந்தில் தீவிரவாத தடுப்பு சட்டம் கடந்த 2002ஆம் ஆண்டு தான் கொண்டுவரப்பட்டது. இந்நிலையில் அந்த நாட்டில் முதல் முறையாக இந்த சட்டத்தின் கீழ் வழக்கு தொடரப்பட்டுள்ளது. வழக்கறிஞர்களிடம் ஆலோசனை நடத்தப்பட்ட பிறகே அந்த வழக்கு பதிவு செய்யப்பட்டதாக அந்நாட்டு காவல்துறை அதிகாரிகள் தெரிவித்துள்ளனர்.